tvati

აშშ მზად არის, მომავალში მეტი იარაღი მიაწოდოს უკრაინას, თუ ქვეყნისგან შესაბამის მოთხოვნას მიიღებს, – ამის შესახებ აშშ-ის სახელმწიფო მდივანმა, ენტონი ბლინკენმა PBS-თან ინტერვიუში განაცხადა. ბლინკენმა აღნიშნა, რომ ომის დაწყების პირველივე დღიდან აშშ მუშაობს იმისთვის, რომ უკრაინას ჰქონდეს ყველაფერი, რაც რუსული აგრესიისგან თავის დასაცავად სჭირდება. „რაიმე ხარვეზი, იარაღის დეფიციტი თუ არის, გვეტყვიან და ჩვენ ყველა ღონეს ვიხმართ, შევავსოთ ეს დეფიციტი“, – განაცხადა ბლინკენმა. გუშინ უკრაინის პრეზიდენტმა, ვოლოდიმერ ზელენსკიმ განაცხადა, რომ უკრაინას კიდევ სჭირდება ცოტა დრო კონტრშეტევის დასაწყებად. მისი თქმით, საბრძოლო ბრიგადები მზადყოფნაში არიან, მაგრამ არმიას ჯერ კიდევ ესაჭიროება ჯავშანტექნიკა. 1tv

ავიაკომპანია Georgian Airways-ის დამფუძნებელი თამაზ გაიაშვილი მიესალმება რუსეთის გადაწყვეტილებას საქართველოსთან პირდაპირი ფრენების აღდგენასა და საქართველოს მოქალაქეებისთვის სავიზო რეჟიმის გაუქმებაზე. როგორც მან სააგენტო Avianews.ge-ს უთხრა, რეისების დასაგეგმად გარკვეული პროცედურების გავლაა საჭირო. “ჯერჯერობით [რუსულ მხარესთან] არანაირი მოლაპარაკებები არ დაგვიწყია. თუმცა მივესალმები სავიზო რეჟიმის გაუქმების და პირდაპირი ავიარეისების აღდგენის გადაწყვეტილებას. ძალიან გამიხარდა, რომ ჩვენი მთავრობაც პოზიტიურად არის განწყობილი. ბოლოს და ბოლოს ეროვნული მთავრობაა, რომელსაც ეროვნული ინტერესები აქვს. დაველოდები მოვლენების განვითარებას, რადგანაც ბევრი რამეა კიდე საჭირო. ყველაფერს რომ თავი დავანებოთ, ერთ დღეში რეისი არ იწყება და რეისის დაგეგმვა შეუძლებელია”, — ციტირებს გაიაშვილს Avianews.ge. რუსული მედიის თანახმად, რუსული ავიაკომპანიები საქართველოს მიმართულებით პირდაპირი ფრენების დაწყებას უკვე მომდევნო კვირიდან შეძლებენ. თავის მხრივ, გაიაშვილი Georgian Airways-ის მაგალითზე აცხადებს, რომ კომპანიას ფრენების დასაწყებად მომზადება სჭირდება, რადგანაც რეისების დაგეგმვა ერთ დღეში არ ხდება. “რუსული მხარე შესაძლოა მომზადებულია, მაგრამ მე მომზადებული ჯერ არ ვარ. მომავალ კვირაში ავიაკომპანიაში თათბირი ჩატარდება, სადაც საბოლოო გადაწყვეტილებებს მივიღებთ. ჩვენ დაინტერესებული ვართ, რასაკვირველია. ჯერ ერთი ეს ჩვენს ხალხს დაეხმარება. ვინმემ გამაგებინოს, რატომ უნდა იარონ ერევნის, ბაქოს, თურქეთის გავლით? ვინმემ თქვას, თუ შეიძლება რუსეთში წასვლა ველოსიპედით, მანქანით და ტრაქტორით, თვითმფრინავით რატომ არ შეიძლება? თუ დემოკრატიაა, მივცეთ ხალხს არჩევანი”, — აღნიშნავს ის. ვლადიმირ პუტინის ახალი განკარგულებით, რუსეთმა მოხსნა საქართველოსთან პირდაპირ ავიამიმოსვლაზე 2019 წლის 20 ივნისის მოვლენების შემდეგ დაწესებული შეზღუდვა. აგრეთვე, გაუქმდა სავიზო რეჟიმი საქართველოს მოქალაქეებისთვის. საქართველოსთან პირდაპირი ფრენები რუსეთმა 2019 წლის 8 ივლისს შეწყვიტა, მას შემდეგ, რაც დუმის დეპუტატის, სერგეი გავრილოვის საქართველოს პარლამენტის თავმჯდომარის სკამში დაჯდომამ პროტესტი გამოიწვია. ბოლო დროს რუსული მხარე აქტიურად საუბრობდა საქართველოსთან პირდაპირი ავიამიმოსვლის აღდგენის შესაძლებლობაზე. მმართველ პარტიაში მოვლენათა ასეთ განვითარებას მიესალმებოდნენ, თუმცა წინააღმდეგი იყო პრეზიდენტი სალომე ზურაბიშვილი. პრეზიდენტის თქმით, საქართველოსნაირი სახელმწიფოს ერთ-ერთი პრიორიტეტი დიასპორის მიმართ კომპლექსური სტრატეგიის ქონა უნდა იყოს და „არა კრემლის მიერ შერჩეულ დროს და დაკვეთილ მუსიკაზე ცეკვა“. ეკონომიკის სამინისტროს განცხადებით, მომართვის შემთხვევაში, რუსული კომპანიები, რომლებსაც სანქციები არ დაუწესდათ, ფრენების განხორციელებას შეძლებენ. netgazeti

აშშ-ის სახელმწიფო დეპარტამენტის პრესსპიკერის მოადგილე, ვედანტ პატელი, ჟურნალისტის კითხვის საპასუხოდ გამოეხმაურა ვლადიმერ პუტინის გადაწყვეტილებას, რომლის მიხედვითაც რუსეთსა და საქართველოს შორის პირდაპირი ავიამიმოსვლა უნდა აღდგეს. პატელმა 11 მაისს თქვა: იმპორტისა და ექსპორტის კონტროლს დაქვემდებარებულ ავიახომალდებში აშშ-ის სანქციებს დაქვემდებარებული ავიახომალდები იგულისხმება. ვლადიმირ პუტინის ახალი განკარგულებით, რუსეთმა მოხსნა საქართველოსთან პირდაპირ ავიამიმოსვლაზე 2019 წლის 20 ივნისის მოვლენების შემდეგ დაწესებული შეზღუდვა. აგრეთვე, გაუქმდა სავიზო რეჟიმი საქართველოს მოქალაქეებისთვის. საქართველოსთან პირდაპირი ფრენები რუსეთმა 2019 წლის 8 ივლისს შეწყვიტა, მას შემდეგ, რაც დუმის დეპუტატის, სერგეი გავრილოვის საქართველოს პარლამენტის თავმჯდომარის სკამში დაჯდომამ პროტესტი გამოიწვია. ბოლო დროს რუსული მხარე აქტიურად საუბრობდა საქართველოსთან პირდაპირი ავიამიმოსვლის აღდგენის შესაძლებლობაზე. მმართველ პარტიაში მოვლენათა ასეთ განვითარებას მიესალმებოდნენ, თუმცა წინააღმდეგი იყო პრეზიდენტი სალომე ზურაბიშვილი. პრეზიდენტის თქმით, საქართველოსნაირი სახელმწიფოს ერთ-ერთი პრიორიტეტი დიასპორის მიმართ კომპლექსური სტრატეგიის ქონა უნდა იყოს და „არა კრემლის მიერ შერჩეულ დროს და დაკვეთილ მუსიკაზე ცეკვა“. ეკონომიკის სამინისტროს განცხადებით, მომართვის შემთხვევაში, რუსული კომპანიები, რომლებიც არ არიან სანქციების ქვეშ, ფრენების განხორციელებას შეძლებენ. პუტინის გადაწყვეტილების გახმაურების შემდეგ, სამინისტროში თქვეს, რომ სანქცირებული კომპანიები ან ხომალდები რეისებს ვერ განახორციელებენ. netgazeti

შეერთებულმა შტატებმა კოვიდ 19-თან დაკავშირებული სასაზღვრო შეზღუდვები დაასრულა, რომელმაც მექსიკის საზღვარზე ბევრი მიგრანტის დაბლოკვა გამოიწვია, თუმცა ე.წ. Title 42 შეზღუდვები მაშინვე შეიცვალა თავშესაფრის მიღების ახალი წესებით, რომლებიც უკანონო გადაკვეთის თავიდან აცილებას ისახავს მიზნად. მიმდინარე კვირაში მიგრანტებს შორის გავრცელდა ინფორმაცია, რომ თავშესაფრის მიღების ახალი წესები გაცილებით გაართულებს შეერთებულ შტატებში დარჩენას. ახალი რეგულაციის ძალაში შესვლამდე რამდენიმე საათით ადრე, მიგრანტების რაოდენობის მკვეთრი ზრდის გამო აშშ-მექსიკის საზღვარზე კრიზისული მდგომარეობა შეიქმნა. BBC-ის ინფორმაციით, მხოლოდ ერთ დღე-ღამეში განმავლობაში მექსიკიდან აშშ-ში 10 000-ზე მეტი ადამიანი გადავიდა, რაც რეკორდული მაჩვენებელია. „რესპუბლიკელები“ ბაიდენს ყოფილი პრეზიდენტის, დონალდ ტრამპის უფრო შემზღუდველი პოლიტიკის შემსუბუქებაში ადანაშაულებენ. ბაიდენი, თავის მხრივ, კონგრესს ადანაშაულებს იმაში, რომ ყოვლისმომცველი საიმიგრაციო რეფორმა არ მიიღო. დონალდ ტრამპმა Title 42 პირველად 2020 წლის მარტში შემოიღო, როდესაც მსოფლიო კოვიდ 19-მა მოიცვა. ჯანდაცვის ოფიციალურმა წარმომადგენლებმა განაცხადეს, რომ იმ დროს განკარგულების მიზანი დაკავების ხალხმრავალ ცენტრებში ვირუსის გავრცელების შეკავება იყო. ეს საშუალებას აძლევდა აშშ-ს ხელისუფლებას, მიგრანტები მექსიკაში ან სხვა ქვეყნებში სწრაფად, აშშ-ში თავშესაფრის მოთხოვნის შესაძლებლობის გარეშე გაეძევებინა. IPN

საქართველოს ხელისუფლებამ უნდა გადახედოს, ასახავს თუ არა ეს ქმედება ქართველი ხალხის სურვილებს, - ასე ეხმაურება ამერიკელი სენატორი, ჯინ შაჰინი რუსეთის მიერ საქართველოს მოქალაქეებისთვის სავიზო რეჟიმის გაუქმებას და პირდაპირი ავიარეისების აღდგენას. „ქართველ ხალხს სურს მომავალი, რომელიც შეესაბამება დემოკრატიას და ევროპას და არა ურთიერთობა ქვეყანასთან, რომელიც უკანონოდ შეიჭრა და ინარჩუნებს კონტროლს მათი ქვეყნის 20%-ზე. ქართველმა კანონმდებლებმა უნდა გადახედონ, ასახავს თუ არა ეს ქმედებები მათი მოქალაქეების სურვილებს“, - წერს ამერიკელი სენატორი „ტვიტერზე“. IPN

უკრაინის თავდაცვის მინისტრის მოადგილის, ანა მალიარის განცხადებით, უკრაინელ დამცველებს ამ კვირაში ბახმუტში არც ერთი პოზიცია არ დაუკარგავთ, - ამის შესახებ ინფორმაციას უკრაინული მედია ავრცელებს. მალიარმა ასევე დაადასტურა ინფორმაცია, რომ უკრაინის შეიარაღებულმა ძალებმა ბახმუტის მიმართულებით 2 კილომეტრით წინ წაიწიეს. „მტერმა ვერ შეასრულა თავისი გეგმები. მათ ცოცხალი ძალის დიდი დანაკარგი განიცადეს. ჩვენმა დამცველებმა ბახმუტის მიმართულებით 2 კილომეტრით წინ წაიწიეს, ამ კვირაში ბახმუტში არც ერთი პოზიცია არ დაგვიკარგავს“, - განაცხადა უკრაინის თავდაცვის მინისტრის მოადგილემ. მისი თქმით, ოკუპანტები, რეალური მდგომარეობის გასამართლებლად, ავრცელებენ ცრუ ინფორმაციას იარაღის დეფიციტის შესახებ. IPN

მოკავშირეებმა კონტრშეტევისთვის უკრაინას 575 ტანკი და 28 თვითმფრინავი გადასცეს, - იტყობინება ტვიტერით ევროკავშირში პოლონეთის წარმომადგენლობის ოფისი . პოლონეთის მისიის თანახმად, 575 ტანკიდან 325 უკრაინულ მხარეს პოლონეთმა გადასცა. ამავე დროს, ნიდერლანდებმა უკრაინას 85 ტანკი გადასცა, გერმანიამ – 80, აშშ – 76. უკრაინის შეიარაღებული ძალებისთვის გადაცემული 28 თვითმფრინავიდან პოლონეის ანგარიშზე მოდის 14 თვითმფრინავი. საუბარია Mig-29 კლასის გამანადგურებლებზე. დღესვე ბრიტანეთის თავდაცვის მინისტრმა დაადასტურა, რომ უკრაინას გადასცეს რამდენიმე შორ რადიუსზე მოქმედი ფრთოსანი რაკეტა Storm Shadow, რომელთა დიაპაზონი 250 კილომეტრს აღემატება. ასევე ნახეთ დიდმა ბრიტანეთმა უკრაინას შორი რადიუსის ფრთოსანი რაკეტები Storm Shadow გადასცა კიევი პირველად იღებს ამ დიაპაზონის რაკეტებს. მანამდე, უკრაინის ხელისუფლების მოთხოვნის მიუხედავად, დასავლეთის ქვეყნები კიევს აწვდიდნენ იარაღს, რომელსაც 80 კილომეტრამდე მანძილზე შეეძლო სამიზნეებზე იერიშის განხორციელება. რადიო თავისუფლება

საოკუპაციო ძალების წარმომადგენლებმა გორის მუნიციპალიტეტის სოფელ მეჯვრისხევის მიმდებარედ ოკუპირებულ ტერიტორიაზე უკანონოდ დააკავეს საქართველოს მოქალაქე, - ამის შესახებ ინფორმაციას სახელმწიფო უსაფრთხოების სამსახური ავრცელებს. მათივე ცნობით, აღნიშნული ინციდენტის შესახებ ინფორმაციის მიღებისთანავე, სახელმწიფო უსაფრთხოების სამსახურის მიერ გააქტიურდა ევროკავშირის სადამკვირვებლო მისიის მიერ ოპერირებული ცხელი ხაზი. ოკუპირებულ ტერიტორიაზე საქართველოს მოქალაქის უკანონოდ დაკავების შესახებ დაუყოვნებლივ ეცნობა საერთაშორისო პარტნიორებსა და ჟენევის საერთაშორისო დისკუსიების თანათავმჯდომარეებს. ამოქმედებულია ყველა არსებული მექანიზმი უკანონოდ დაკავებული საქართველოს მოქალაქის უმოკლეს ვადებში გასათავისუფლებლად. საქართველოს ოკუპირებულ ტერიტორიებზე, ისევე როგორც საოკუპაციო ხაზის გასწვრივ ჩადენილ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას.

თბილისის საქალაქო სასამართლომ ოჯახის წევრის მიმართ მუქარის და ძალადობის ჩადენისთვის წარდგენილ ბრალდებაში, ლაშა ნაკაიძე დამნაშავედ ცნო და მას სასჯელის სახედ და ზომად 1 წლით თავისუფლების აღკვეთა განუსაზღვრა. როგორც პროკურატურის მიერ გავრცელებულ ინფორმაციაშია აღნიშნული, პროკურატურა სააპელაციო წესით გაასაჩივრებს ლ.ნ.-ს მიმართ სასამართლოს მიერ გამოტანილ ნაწილობრივ გამამართლებელ გადაწყვეტილებას, ოჯახის წევრის გაუპატიურების და პირადი ცხოვრების საიდუმლოს უკანონოდ მოპოვება, შენახვა და გავრცელების ფაქტებზე. შინაგან საქმეთა სამინისტროს მიერ ჩატარებული გამოძიებით დადგინდა, რომ 2022 წლის 15 აგვისტოს, ბრალდებული ლ.ნ. გენდერის ნიშნით შეუწყნარებლობის მოტივით, შურისძიების ნიადაგზე დანის და ხმოვანი პისტოლეტის დემონსტრირებით სიცოცხლის მოსპობით დაემუქრა ა.პ.-ს, ასევე სხეულის სხვადასხვა არეში დარტყმით და მჩხვლეტავი საგნის ზემოქმედებით ფიზიკურად იძალადა მასზე. აღნიშნულის შემდგომ, ბრალდებულმა ძალადობით და ძალადობის მუქარით სექსუალურად იძალადა დაზარალებულზე. დაზარალებულის მომართვის საფუძველზე, სამართალდამცველებმა ბრალდებული 2022 წლის 16 აგვისტოს დააკავეს. პროკურატურამ მას ბრალდება საქართველოს სისხლის სამართლის კოდექსის 11 პრიმა 137-ე მუხლის პირველი ნაწილით (გაუპატიურება), 126 პრიმა მუხლის პირველი ნაწილით (ოჯახში ძალადობა) და 11 პრიმა 151-ე მუხლის მე-2 ნაწილის „დ“ ქვეპუნქტით (სიცოცხლის მოსპობის მუქარა ოჯახის წევრის მიმართ) წარუდგინა. პროკურატურა განაჩენს, რომლითაც ბრალდებული უდანაშაულოდ იქნა ცნობილი ბრალდების ნაწილში, სააპელაციო წესით გაასაჩივრებს. „საქართველოს პროკურატურა აგრძელებს მკაცრ სისხლის სამართლის პოლიტიკას ქალთა მიმართ ძალადობის ფაქტებზე და ძალადობის ჩამდენი ყველა პირი კანონის ფარგლებში უმკაცრესად დაისჯება. ძალადობის მსხვერპლთა მხარდაჭერა პროკურატურისთვის ერთ-ერთი მთავარი პრიორიტეტია”, - აღნიშნავს პროკურატურა. https://pog.gov.ge/news/prokuraturis-mier-wardgenili-mtkicebulebebis-safuZvelze-ojaxis-wevris-mimarT-muqaris-da-Zaladobis-f

რუსეთი ახლა ბომბავს უკრაინას, მაგრამ უბრალოდ შესაძლებლობა არ აქვს დაბომბოს პოლონეთი, საფრანგეთი, ბერლინი. ხომ უსმენთ,როგორი რიტორიკა აქვთ რუსებს - წარმოიდგინეთ, არის აქტორი, რომელიც ანადგურებს იმ ევროპას, რომელზედაც შენი მომავალია დამოკიდებული და შენ მასთან აბამ „ფლირტს?, - ამის შესახებ რონდელის ფონდის მკვლევარმა, კახა გოგოლაშვილმა „პალიტრანიუსის“ გადაცემაში „პოლიტიკური სივრცე“ განაცხადა, როდესაც ისაუბრა რუსეთის მიერ საქართველოსთვის სავიზო რეჟიმის გაუქმებაზე. მისი შეფასებით, სავიზო რეჟიმის გაუქმება, ეს არის საქართველოს ხელისუფლების „ფლირტი“ რუსეთთან. გოგოლაშვილის თქმით, საქართველოსთვის სასიცოცხლოდ მნიშვნელოვანი ევროკავშირთან ურთიერთობაა. „საქართველოს ევროკავშირთან სხვანაირი ურთიერთობა აქვს. ჩვენ ვართ ქვეყანა,რომელსაც გვაქვს ამბიცია, რომ ევროკავშირის წევრობა გვინდა, რაც ჩვენთვის სასიცოცხლოდ მნიშვნელოვანია. ჩვენი მომავალი უსაფრთხოება, საერთოდ ჩვენი არსებობა, ეკონომიკური მდგრადობა, ადამიანური განვითარება, კულტურის, იდენტობის შენარჩუნება, ყველაფერი დამოკიდებულია იმაზე მოვახერხებთ, თუ არა ჩვენ ევროკავშირში გაწევრიანებას და კიდევ უკეთესი, თუ ამასთან ერთად ნატო-ს წევრებიც გავხდებით. ანუ ეს არის დღევანდელ სამყაროში ჩვენი გადარჩენის ფორმულა. რაც შეეხება იმას, თუ რა არის ცუდი ვიზის გაუქმებასა და ფრენების აღდგენაში, ეს არის რუსეთთან ურთიერთობების დათბობა და უკეთესი ურთიერთობების დინამიკა, როდესაც ომია და რუსეთი ანადგურებს ევროპას. მაგალითად, ახლა ბომბავს უკრაინას, მაგრამ უბრალოდ შესაძლებლობა არ აქვს დაბომბოს პოლონეთი, საფრანგეთი, ბერლინი. ხომ უსმენთ ,როგორი რიტორიკა აქვთ რუსებს, გინდათ სამხედროებს გინდათ პოლიტიკოსებს, ხვალვე დაბომბავდნენ ყველას და ახლა, წარმოიდგინეთ, არის აქტორი, რომელიც ანადგურებს იმ ევროპას, რომელზედაც შენი მომავალია დამოკიდებული და შენ ამასთან აბამ „ფლირტს?, აბამ კარგ ურთიერთობებს და აწყობ შენ მატერიალურ კეთილდღეობას?“, - განაცხადა გოგოლაშვილმა.

ქართული ძიუდოს ისტორიაში პირველად, მსოფლიოს ჩემპიონატის ფინალში ერთმანეთს საქართველოს ნაკრების წევრები შეხვდნენ! დოჰაში მიმდინარე მსოფლიოს ჩემპიონატზე დღეს, მამაკაცთა შორის 90 კილოგრამი წონითი კატეგორიის კონკურენცია ლაშა ბექაურისა და ლუკა მაისურაძის ფინალით დაგვირგვინდა. სულ შეჯიბრებაში 58 ძიუდოისტი ჩაება და ქართველმა ძიუდოისტებმა ფინალის გზაზე ოთხ-ოთხი მეტოქე დაამარცხეს. ქართული დაპირისპირების ბედი კი დამატებით დროში გადაწყდა, მაისურაძის მიერ შესრულებული ვაზარით. ლაშა ბექაური მსოფლიოს ტატამიზე ოლიმპიური ჩემპიონის რანგში გავიდა, ხოლო ლუკა მაისურაძე - ევროპის მოქმედი ჩემპიონის რანგში. მსოფლიოს 2023 წლის ჩემპიონატი დოჰაში 7 მაისს დაიწყო და მამაკაცთა და ქალთა შორის, უკვე მედლების ხუთ-ხუთი კომპლექტი გათამაშდა. მამაკაცებში, ხუთი წონითი კატეგორიიდან ორში, კვარცხლბეკის უმაღლეს საფეხურზე ქართველები ავიდნენ. 10 მაისს მსოფლიოს ჩემპიონი ტატო გრიგალაშვილი (81 კგ) გახდა, ზედიზედ მეორედ. სულ კი, საქართველოს ნაკრების ანგარიშზე ორი ოქროს, ერთი ვერცხლის და ერთი ბრინჯაოს მედალია. მესამე საპრიზო ადგილი 60 კილოგრამში მოჭიდავე გიორგი სარდალიშვილმა დაიკავა. 12 მაისს საქმეში 100 კილოგრამ წონით კატეგორიაში მოჭიდავე მამაკაცები ჩაებმებიან და საქართველოს ამ წონაშიც ორი მონაწილე ეყოლება: ევროპის სამგზის ჩემპიონი ვარლამ ლიპარტელიანი და მსოფლიო მასტერსის მოქმედი ჩემპიონი ილია სულამანიძე. რადიო თავისუფლება

სულ მცირე შვიდმა რუსულმა ავიაკომპანიამ უკვე გამოთქვა სურვილი, საქართველოში პირდაპირი ფრენები განახორციელოს, იუწყება რუსული მედია. როგორც „როსავიაციის“ დოკუმენტშია ნათქვამი, ეს კომპანიებია: „რედ ვინგზი“, „აეროფლოტი“, „სევერნი ვეტერ“, „ურალსკიე ავიალინიი“, „იუ-ვე-ტე აერო“, „სმარტავია“, „პაბედა“. ყველაზე მეტი რეისის განხორციელების სურვილი აქვს „რედ ვინგზს“. მთლიანობაში კი ავიაკომპანიებს სამი მიმართულების რეისების შესრულება სურთ: მოსკოვი–თბილისი; სამარა–თბილისი; ყაზანი-თბილისი. მოსკოვი-თბილისის რეისის კვირაში 21-ჯერ შესრულება სურს „რედ ვინგზს“. შვიდ-შვიდჯერ – „აზიმუტს“ და „სევერნი ვეტერს“, 14-ჯერ – „აეროფლოტს“. სამარა-თბილისის რეისის 7-ჯერ შესრულება უნდა „რედ ვინგზს“, ორ-ორჯერ – „ურალსკიე ავიალინიის“ და „იუ-ვე-ტე აეროს“, სამჯერ – „სმარტავიას“. აგრეთვე შვიდჯერ სურს ყაზანი-თბილისის რეისის შესრულება „რედ ვინგზს“. სამჯერ – „იუ-ვე-ტე აეროს“, ხუთჯერ – „პაბედას“, ორჯერ – „სევერნი ვეტერს“. გუშინ რუსეთის ფედერაციამ გააუქმა სავიზო რეჟიმი საქართველოს მოქალაქეებისთვის და მოხსნა შეზღუდვა პირდაპირ ფრენებზე. მმართველ გუნდში ამ გადაწყვეტილებას პოზიტიურად შეხვდნენ, თუმცა ნეგატიური იყო პრეზიდენტისა და ოპოზიციის რეაქცია. ნეტგაზეთი

გაერთიანებულმა სამეფომ უკრაინას მრავალი ფრთოსანი რაკეტა Storm Shadow-ი მიაწოდა, - ინფორმაციას CNN-ი დასავლელ მაღალჩინოსნებზე დაყრდნობით ავრცელებს. ტელეკომპანია განმარტავს, რომ აღნიშნული რაკეტები უკრაინას, რუსული ძალების წინააღმდეგ მოსალოდნელი კონტრშეტევის ფონზე, შორ მანძილზე დარტყმის შესაძლებლობას აძლევს. ფრთოსანი რაკეტა Storm Shadow გაერთიანებული სამეფოსა და საფრანგეთის მიერ ერთობლივადაა შემუშავებული და როგორც წესი, საჰაერო ბაზირებისაა. მისი სროლის დიაპაზონი 250 კმ-ზე მეტია. CNN-ი ასევე განმარტავს, რომ Storm Shadow-ს მოქმედების დიაპაზონი საკმარისია აღმოსავლეთ უკრაინაში, რუსეთის მიერ კონტროლირებად ტერიტორიაზე დარტყმის განსახორციელებლად. ამასთან, წყარომ ტელეკომპანიასთან საუბარში განაცხადა, რომ გაერთიანებულმა სამეფომ უკრაინის მთავრობისგან მიიღო გარანტიები, რომ ეს რაკეტები გამოყენებული იქნება მხოლოდ უკრაინის სუვერენულ ტერიტორიაზე და არა რუსეთის ტერიტორიაზე. CNN-ი ყურადღებას ამახვილებს იმაზე, რომ რაკეტების განლაგება ხდება მაშინ, როდესაც უკრაინული ძალები ემზადებიან კონტრშეტევის დასაწყებად, რომლის მიზანი ქვეყნის აღმოსავლეთ და სამხრეთ ნაწილებში კრემლის მიერ კონტროლირებადი ტერიტორიების დაბრუნებაა. ინტერპრესნიუსი

უნდა ვიზრუნოთ უცხოეთში მყოფ ჩვენს მოქალაქეებსა, თუ ყოფილ მოქალაქეებზე, ეს უნდა იყოს ჩვენნაირი სახელმწიფოს ერთ-ერთი პრიორიტეტი და დიასპორის მიმართ კომპლექსური სტრატეგია და არა კრემლის მიერ შერჩეულ დროს და დაკვეთილ მუსიკაზე ცეკვა! - ამის შესახებ საქართველოს პრეზიდენტი სალომე ზურაბიშვილი სოციალურ ქსელ „ფეისბუქის“ პირად გვერდზე წერს. პრეზიდენტის განცხადებით, რუსეთ-საქართველოს შორის მიმოსვლა პრობლემას არც აქამდე არ წარმოადგენდა და მმართველი პარტიის წარმომადგენლები ტყუილად აპელირებენ ჰუმანიტარულ ფსევდოპატრიოტულ გრძნობებზე. „თუ ესოდენ გვაინტერესებს ქართული წარმოშობის თანამემამულეების ბედი, საინტერესოა, რატომ ვერაფრით მივაღწიე შედეგს იუსტიციასთან ოთხწლიანი მოლაპარაკებებით, ანუ იმას, რომ გამარტივდეს მოქალაქეობის მინიჭება, რათა ხელოვნურად, გაუგებარი ტესტებით არ ვართულებდეთ საქართველოს მოქალაქეობის აღდგენას, ან მინიჭებას. დარწმუნებული ვარ, ეს საკითხი ბევრად მტკივნეულია და აქტუალური რუსეთში (და არა მხოლოდ რუსეთში) მცხოვრები ჩვენი თანამემამულეებისთვის, მით უმეტეს, დღევანდელ დღეს, როცა ბევრს სამუდამო დაბრუნების სურვილი გაუღვივდა. რაც ეხება საქართველოში ჩამოსვლის ვითომცდა სირთულეებს, გაგახსენებთ, რომ რუსეთიდან უპრობლემოდ ჩამოდიან მინსკის, ერევნის, ბაქოს და თურქეთის გავლით, ან კიდევ ლარსის სახმელეთო საზღვრის გადაკვეთით. ვიზის პრობლემა ხომ არ ჰქონიათ! 700 000 -ზე მეტი შემოსული რუსეთის მოქალაქე (მათ შორის, ქართული წარმოშობის) და 600 000 ჩვენი ქვეყნიდან გასული, იმას მაინც ადასტურებს, რომ გადაადგილება მარტივია. მაშასადამე, ტყუილად აპელირებენ რაღაც ჰუმანიტარულ, ფსევდოპატრიოტულ გრძნობებზე. ეს საკითხი არ დგას და არ იდგა, თუ არა კრემლის მანიპულაცია! საინტერესოა რატომ? ვინც ამ თემით აპელირებს და სტკივა რუსეთში მყოფი ჩვენი მოქალაქეების ბედი, იმავდროულად, ნუთუ არ ადარდებს ასევე ამერიკაში, ან ევროპაში მცხოვრები ჩვენი მოქალაქეების ბედი, რომლებიც პირდაპირი რეისებით ვერ სარგებლობენ და მათაც უჭირთ სამშობლოში ჩამოსვლა. იმაზეც ხომ არ უნდა ვფიქრობდეთ, რომ უკვე სამი წელია, არ შეუძლიათ ჩვენს თანამემამულეებს ჰერეთიდან ჩამოსვლა, რადგანაც კოვიდის შემდეგ ჩაკეტილი ლაგოდეხ - ბელაქანის საზღვარი აღარც გახსნილა. (ადამიანებმა გრძელი გზა უნდა გაიარონ ბაქომდე და იქიდან გადმოფრინდნენ, რაც პრაქტიკულად მათი უმრავლესობის შესაძლებლობებს აღემატება). უნდა ვიზრუნოთ უცხოეთში მყოფ ჩვენს მოქალაქეებსა, თუ ყოფილ მოქალაქეებზე, ეს უნდა იყოს ჩვენნაირი სახელმწიფოს ერთ-ერთი პრიორიტეტი და დიასპორის მიმართ კომპლექსური სტრატეგია და არა კრემლის მიერ შერჩეულ დროს და დაკვეთილ მუსიკაზე ცეკვა!“- განაცხადა სალომე ზურაბიშვილმა. IPN

2008 წელს რუსული თვითმფრინავები საქართველოში მშვიდობიანი მოქალაქეების დასაბომბად ჩაფრინდნენ, ახლა ქართველების ევროპული მომავლის დაბომბვას გეგმავენ. ამის შესახებ უკრაინის საგარეო საქმეთა სამინისტროს სპიკერი, ოლეგ ნიკოლენკო “ფეისბუქის” პირად გვერდზე წერს. ამასთან ნიკოლენკო აცხადებს, რომ უკრაინა ვლადიმირ პუტინის გადაწყვეტილებას განიხილავს, როგორც პოლიტიკურ კომპენსაციას საქართველოს ამჟამინდელი მთავრობის მიმართ. უკრაინის საგარეო უწყება მოუწოდებს საქართველოს მთავრობას, მოახდინოს ევროკავშირთან რუსეთის მიმართ პოლიტიკის სინქრონიზაცია და თავი შეიკავოს ქმედებებისგან, რომლებიც საქართველოს სამომავლო ევროპულ წინსვლას უარყოფენ. “რუსეთი საქართველოს ეშმაკთან გარიგებას სთავაზობს. ხოლო ეშმაკთან გარიგებაში, როგორც ცნობილია, ეშმაკი იმარჯვებს. ვლადიმირ პუტინის გადაწყვეტილებას საქართველოს მოქალაქეებისთვის უვიზო მიმოსვლა შემოიღოს და ავიამიმოსვლა განაახლოს, განვიხილავთ, როგორც პოლიტიკურ კომპენსაციას საქართველოს ამჟამინდელი მთავრობის მიერ რუსეთის წინააღმდეგ სანქციების შემოღებაზე უარისთვის და ევროინტეგრაციის შეჩერებისთვის. მოსკოვთან თბილისის ურთიერთობების ნორმალიზაციის კურსი მიმდინარეობს საქართველოს ტერიტორიის 20%-ის ოკუპაციის, მცოცავი “ბორდერიზაციის,” საქართველოს მოქალაქეების გატაცების, ოკუპირებულ ტერიტორიებზე ადამიანის უფლებებისა და თავისუფლებების დარღვევისა და საქართველოს რუსეთის მოქალაქეებით გავსების ფონზე. კრემლი დათმობებს იღებს ქართველის ერისთვის მიყენებული უბედურებისთვის პასუხისმგებლობის აღების გარეშე. 2008 წელს რუსული თვითმფრინავები საქართველოში მშვიდობიანი მოქალაქეების დასაბომბად ჩაფრინდნენ. ახლა ქართველების ევროპული მომავლის დაბომბვას გეგმავენ. რუსეთი არ არის დაინტერესებული საქართველოს ევროკავშირსა და ნატოში სვლით, მის კეთილდღეობასა და განვითარებაში. მოსკოვის მიზანია შექმნას პირობები, რომლებშიც პროგრესი შეუძლებელი იქნება. ეს ბელარუსის გამოცდილებით დამტკიცდა, რომლის სუვერენიტეტი და დამოუკიდებლობა რუსეთის ფედერაციამ შთანთქა. აგრესორის პოლიტიკა, როგორც მოსალოდნელი იყო, არ პოულობს მხარდაჭერას ქართველ პოლიტიკოსებსა და მოსახლეობაში, რომლებმაც არაერთხელ გამოხატეს საკუთარი პოზიცია საჯაროდ, მათ შორის პროტესტებითაც. ამ კონტექსტში სრულ სოლიდარობას და მხარდაჭერას ვუცხადებთ ქართველებს მათ კანონიერ მისწრაფებაში ააშენონ აყვავებული ევროპული სახელმწიფო მის საერთაშორისოდ აღიარებულ საზღვრებში. მოვუწოდებთ საქართველოს მთავრობას ევროკავშირთან მოახდინოს რუსეთის მიმართ პოლიტიკის სინქრონიზაცია და თავი შეიკავოს ქმედებებისგან, რომლებიც საქართველოს სამომავლო ევროპულ წინსვლას უარყოფენ”, - წერს ნიკოლენკო. ipn

პრეზიდენტ სალომე ზურაბიშვილის განცხადებით, საქართველოსნაირი სახელმწიფოს ერთ-ერთი პრიორიტეტი დიასპორის მიმართ კომპლექსური სტრატეგიის ქონა უნდა იყოს და „არა კრემლის მიერ შერჩეულ დროს და დაკვეთილ მუსიკაზე ცეკვა“. ამის შესახებ სალომე ზურაბიშვილი ფეისბუკზე წერს, რითაც ის სახელისუფლებო პროპაგანდას ეხმიანება რუსეთში „საქართველოს მილიონზე მეტი მოქალაქის ცხოვრების“ შესახებ. მისი თქმით, ესაა ტყუილი აპელირება ჰუმანიტარულ და ფსევდოპატრიოტულ გრძნობებზე. „თუ ესოდენ გვაინტერესებს ქართული წარმოშობის თანამემამულეების ბედი, საინტერესოა, რატომ ვერაფრით მივაღწიე შედეგს იუსტიციასთან ოთხწლიანი მოლაპარაკებებით, ანუ იმას, რომ გამარტივდეს მოქალაქეობის მინიჭება, რათა ხელოვნურად, გაუგებარი ტესტებით არ ვართულებდეთ საქართველოს მოქალაქეობის აღდგენას, ან მინიჭებას. დარწმუნებული ვარ, ეს საკითხი ბევრად მტკივნეულია და აქტუალური რუსეთში (და არა მხოლოდ რუსეთში) მცხოვრები ჩვენი თანამემამულეებისთვის, მით უმეტეს, დღევანდელ დღეს, როცა ბევრს სამუდამო დაბრუნების სურვილი გაუღვივდა. რაც ეხება საქართველოში ჩამოსვლის ვითომცდა სირთულეებს, გაგახსენებთ, რომ რუსეთიდან უპრობლემოდ ჩამოდიან მინსკის, ერევნის, ბაქოს და თურქეთის გავლით, ან კიდევ ლარსის სახმელეთო საზღვრის გადაკვეთით. ვიზის პრობლემა ხომ არ ჰქონიათ! 700 000 -ზე მეტი შემოსული რუსეთის მოქალაქე (მათ შორის, ქართული წარმოშობის) და 600 000 გასული ჩვენი ქვეყნიდან, იმას მაინც ადასტურებს, რომ გადაადგილება მარტივია. მაშასადამე, ტყუილად აპელირებენ რაღაც ჰუმანიტარულ, ფსევდოპატრიოტულ გრძნობებზე. ეს საკითხი არ დგას და არ იდგა, თუ არა კრემლის მანიპულაცია! საინტერესოა, რატომ?“ – წერს ზურაბიშვილი. სალომე ზურაბიშვილის თქმით, ისინი, ვინც ამ თემით აპელირებენ, მხოლოდ რუსეთში მცხოვრებ საქართველოს მოქალაქეებზე კი არა, სხვა ქვეყნებში მცხოვრებ ქართველებზეც უნდა დარდობდნენ. „ვინც ამ თემით აპელირებს და სტკივა რუსეთში მყოფი ჩვენი მოქალაქეების ბედი, იმავდროულად, ნუთუ არ ადარდებს ასევე ამერიკაში, ან ევროპაში მცხოვრებ ჩვენს მოქალაქეების ბედი, რომლებიც პირდაპირი რეისებით ვერ სარგებლობენ და მათაც უჭირთ სამშობლოში ჩამოსვლა. იმაზეც ხომ არ უნდა ვფიქრობდეთ, რომ უკვე სამი წელია, არ შეუძლიათ ჩვენს თანამემამულეებს ჰერეთიდან ჩამოსვლა, რადგანაც კოვიდის შემდეგ ჩაკეტილი ლაგოდეხ – ბელაქანის საზღვარი აღარც გახსნილა. (ადამიანებმა გრძელი გზა უნდა გაიარონ ბაქომდე და იქიდან გადმოფრინდნენ, რაც პრაქტიკულად მათი უმრავლესობის შესაძლებლობებს აღემატება). უნდა ვიზრუნოთ უცხოეთში მყოფ ჩვენს მოქალაქეებსა, თუ ყოფილ მოქალაქეებზე, ეს უნდა იყოს ჩვენნაირი სახელმწიფოს ერთ-ერთი პრიორიტეტი და დიასპორის მიმართ კომპლექსური სტრატეგია და არა კრემლის მიერ შერჩეულ დროს და დაკვეთილ მუსიკაზე ცეკვა!“, – წერს სალომე ზურაბიშვილი. ვლადიმირ პუტინის ახალი განკარგულებით, რუსეთმა მოხსნა საქართველოსთან პირდაპირ ავიამიმოსვლაზე 2019 წლის 20 ივნისის მოვლენების შემდეგ დაწესებული შეზღუდვა. აგრეთვე, გაუქმდა სავიზო რეჟიმი საქართველოს მოქალაქეებისთვის. საქართველოსთან პირდაპირი ფრენები რუსეთმა 2019 წლის 8 ივლისს შეწყვიტა, მას შემდეგ, რაც დუმის დეპუტატის, სერგეი გავრილოვის საქართველოს პარლამენტის თავმჯდომარის სკამში დაჯდომამ პროტესტი გამოიწვია. ბოლო დროს რუსული მხარე აქტიურად საუბრობდა საქართველოსთან პირდაპირი ავიამიმოსვლის აღდგენის შესაძლებლობაზე. მმართველ პარტიაში მოვლენათა ასეთ განვითარებას მიესალმებოდნენ, თუმცა წინააღმდეგი იყო პრეზიდენტი სალომე ზურაბიშვილი. იმაზეც ხომ არ უნდა ვფიქრობდეთ, რომ უკვე სამი წელია, არ შეუძლიათ ჩვენს თანამემამულეებს ჰერეთიდან ჩამოსვლა, რადგანაც კოვიდის შემდეგ ჩაკეტილი ლაგოდეხ – ბელაქანის საზღვარი აღარც გახსნილა. (ადამიანებმა გრძელი გზა უნდა გაიარონ ბაქომდე და იქიდან გადმოფრინდნენ, რაც პრაქტიკულად მათი უმრავლესობის შესაძლებლობებს აღემატება). უნდა ვიზრუნოთ უცხოეთში მყოფ ჩვენს მოქალაქეებსა, თუ ყოფილ მოქალაქეებზე, ეს უნდა იყოს ჩვენნაირი სახელმწიფოს ერთ-ერთი პრიორიტეტი და დიასპორის მიმართ კომპლექსური სტრატეგია და არა კრემლის მიერ შერჩეულ დროს და დაკვეთილ მუსიკაზე ცეკვა!“, – წერს ზურაბიშვილი. netgazeti

ვფიქრობ, უკვე ბევრი ქართველია შეშფოთებული საქართველოში რუსეთის ასობით ათასი მოქალაქის ყოფნით, რომლებიც გასულ წელს ჩამოვიდნენ, ახლა გვესმის რუსეთის ტურიზმის სააგენტოსგან, რომ შესაძლოა, კიდევ მილიონი ჩამოვიდეს პირდაპირი ფრენების გახსნის შემდეგ, – ამის შესახებ საქართველოში აშშ-ის ელჩმა, კელი დეგნანმა განაცხადა. დეგნანის თქმით, ვლადიმერ პუტინის გადაწყვეტილება სავიზო რეჟიმის გაუქმების შესახებ და ასევე პირდაპირი ფრენების აღდგენაზე უცნაურად ჩანს სისხლიანი რეჟიმისგან, რომელიც იმას უკეთებს ახლა უკრაინას, რაც საქართველოს 15 წლის წინ გაუკეთა. „აშშ ვერ იტყვის, მოახდენს თუ არა გავლენას პუტინის გადაწყვეტილება საქართველოს კანდიდატის სტატუსზე, ეს აჩენს შეკითხვას, რატომ აკეთებს პუტინი ამას საქართველოსთვის ახლა, დარწმუნებული ვარ, არავის სჯერა, რომ ის ზრუნავს ქართველი მგზავრების კომფორტზე. ჩვენ ვნახეთ, რომ ზოგჯერ პუტინი იყენებს ქვეყანაში რუსების ყოფნას ამ ქვეყანაში ჩარევისთვის. ვფიქრობ, უკვე ბევრი ქართველია შეშფოთებული საქართველოში რუსეთის ასობით ათასი მოქალაქის ყოფნით, რომლებიც გასულ წელს ჩამოვიდნენ. ახლა ჩვენ გვესმის რუსეთის ტურიზმის სააგენტოსგან, რომ შესაძლოა, კიდევ მილიონი ჩამოვიდეს პირდაპირი ფრენების გახსნის შემდეგ. ბატონ პუტინს თუ სურს, აჩვენოს, რომ ზრუნავს, ის გაიყვანდა რუსეთის ჯარებს აფხაზეთიდან და ცხინვალიდან და შეასრულებდა ცეცხლის შეწყვეტის შეთანხმებით ნაკისრ ვალდებულებებს, შეცვლიდა რუსეთის მიერ აფხაზეთისა და ცხინვალის აღიარებას. ეს იქნებოდა ნიშნები, რომელსაც ქართველები დააფასებდნენ. შეგახსენებთ, რომ ეს არის ქვეყანა, რომელიც 2008 წელს შემოიჭრა საქართველოში, რომელმაც 1989 წელს სცადა დაენგრია საქართველოს დამოუკიდებლობა. მათ სცადეს ქართული ენის ჩაჩუმება 1978 წელს და საუკუნეების განმავალობაში შეურაცხყოფდნენ ქართულ ეკლესიებს მთელი ქვეყნის მასშტაბით. ეს არის ქვეყანა, რომელიც თავს ესხმის უკრაინას, ისევე როგორც ეს გააკეთა საქართველოს წინააღმდეგ 15 წლის წინ. სამიზნეში იღებს საცხოვრებელ კორპუსებს, სკოლებს, საავადმყოფოებს, ბავშვები აშორებს ოჯახებს. უცნაურად ჩანს ეს ჟესტი სისხლიანი რეჟიმისგან, რომელიც იმას უკეთებს ახლა უკრაინას, რაც საქართველოს 15 წლის წინ გაუკეთა“, – განაცხადა დეგნანმა. რუსეთის პრეზიდენტმა, ვლადიმერ პუტინმა დღეს გამოსცა განკარგულებები, რომლებიც საქართველოსთან სავიზო რეჟიმის გაუქმებას და პირდაპირი ფრენების აღდგენას ითვალისწინებს. საქართველოსთან რუსეთს სავიზო რეჟიმი ცალმხრივად ჰქონდა დაწესებული. რუსეთის ფედერაციასთან სავიზო რეჟიმი 2012 წელს მაშინდელი პრეზიდენტის, მიხეილ სააკაშვილის ბრძანებით გაუქმდა. მანამდე კი, 2010 წლის ოქტომბერში სავიზო რეჟიმის გაუქმება რუსეთის ფედერაციაში შემავალი ჩრდილოეთ კავკასიის რესპუბლიკების მცხოვრებლებს შეეხოთ. ავტორი - გივი ბარამიძე

10 მაისს, რუსეთის პრეზიდენტმა, ვლადიმერ პუტინმა რუსული ავიაკომპანიებისთვის საქართველოში ფრენების, ხოლო ტურისტული სააგენტოებისთვის ტურების გაყიდვის აკრძალვა მოხსნა. რუსული „კომერსანტი“ წერს, რომ ეს მოსალოდნელი გადაწყვეტილება სენსაცია გახდა ქართველებისთვის და რიგ შემთხვევაში სკანდალიც კი გამოიწვია. რუსულმა საგარეო საქმეთა სამინისტრომ კი განმარტა, რომ ამ გზით ორ ქვეყანას შორის ურთიერთობა დათბება. რეაქცია არაერთგვაროვანი იყო: ხელისუფლებამ გადაწყვეტილება შეაქო, პრეზიდენტმა სალომე ზურაბიშვილმა კი მას „რუსული პროვოკაცია“ უწოდა. როგორც „კომერსანტი“ წერს, პუტინის ამ გადაწყვეტილებაში ქართულმა ოპოზიციამ პოტენციური საფრთხე დაინახა. რუსოფობია დასრულდა რუსეთი მიმართავდა საჰაერო მიმოსვლის შეწყვეტას ან მის აღდგენას ყოველ ჯერზე, როდესაც ორ ქვეყანას შორის ურთიერთობა ამა თუ იმ მიზეზით უარესდებოდა ან უმჯობესდებოდა. ბოლოს მოსკოვმა, პუტინის ბრძანებულებით, ასეთი აკრძალვა 2019 წლის 21 ივნისს შემოიღო. მაშინ თბილისი ფაქტობრივად, აფეთქდა საპროტესტო აქციებით, რაც გამოწვეული იყო საქართველოს პარლამენტის თავმჯდომარის სავარძელში რუსეთის სახელმწიფო სათათბიროს დეპუტატის სერგეი გავრილოვის მოულოდნელად გამოჩენით. ამან გამოიწვია პროტესტი, რომელიც გადაიზარდა არეულობაში და პოლიტიკურ კრიზისში საქართველოში, რასაც მოჰყვა პარლამენტის თავმჯდომარის ირაკლი კობახიძის გადადგომა. გარდა ამისა, სკანდალმა გამოიწვია ყველაზე სერიოზული გაციება მოსკოვისა და თბილისის ურთიერთობებში 2008 წლის რუსეთ-საქართველოს ომის შემდეგ. საქართველოს პრეზიდენტმა სალომე ზურაბიშვილმა კრიზისის პიკში რუსეთს "მტერი და ოკუპანტი" უწოდა. მაშინ პრეზიდენტის პრეს-მდივანმა, დიმიტრი პესკოვმა და საგარეო საქმეთა მინისტრმა, სერგეი ლავროვმა თბილისი რუსოფობიაში დაადანაშაულა. საპასუხოდ კი, პუტინმა 2019 წლის 21 ივნისს ხელი მოაწერა ბრძანებას, რუსეთიდან საქართველოში და პირიქით, ფრენის აკრძალვის შესახებ. მიზეზი რუსეთის მოქალაქეების უსაფრთხოება იყო. ამრიგად, რუსეთის მეზობელი ამიერკავკასიის ქვეყანა გახდა დსთ-ს მეორე სახელმწიფო, რომლის მოქალაქეებს რუსეთის ფედერაციაში მოსანახულებლად ვიზა უნდა მიეღოთ. რაც უკეთესია, მით უარესი საქართველოს ეკონომიკის სამინისტრომ მაშინვე გამოაცხადა, რომ მზად არიან გასცენ სატრანსპორტო ნებართვა იმ რუსულ ავიაკომპანიებზე, რომლებიც სანქციების ქვეშ არ იმყოფებოდნენ. „კომერსანტი“ წერს, რომ საქართველოს საგარეო საქმეთა მინისტრი ილია დარჩიაშვილი ვიზების გაუქმებით კმაყოფილია. „ჩვენი 1 მილიონზე მეტი მოქალაქე ცხოვრობს რუსეთის ფედერაციაში. მათ ძალიან მჭიდრო კავშირები აქვთ საქართველოში მცხოვრებ ადამიანებთან - ნათესავებთან, ახლობლებთან და ჰუმანიტარული პრიზმით დანახულ ამ გადაწყვეტილებას მიესალმება ნებისმიერი პასუხისმგებელი ხელისუფლება. ეს ჩვენს მოქალაქეებს ყოველდღიურ ცხოვრებას გაუადვილებს“, - განაცხადა მინისტრმა. გამოცემა აქცენტს პრეზიდენტის საქციელზე აკეთებს და აღნიშნავს, რომ სალომე ზურაბიშვილმა კიდევ ერთხელ გაუსვა ხაზი მის ნეგატიურ დამოკიდებულებას რუსეთის ხელისუფლების გადაწყვეტილების გამო და განაცხადა, რომ „რუსეთისგან საჩუქრები არ სჭირდება, რადგან ეს საჩუქრები კიდევ უფრო რთულ მდგომარეობაში აყენებს საქართველოს, რომელსაც ხშირად ადანაშაულებენ დასავლეთის მიერ დაწესებული სანქციების დარღვევაში და ასევე ზოგადად ეწინააღმდეგება პრესპექტივას, საქართველო ევროკავშირის კანდიდატი გახდეს“. შეგახსენებთ, რომ საქართველომ, უკრაინასა და მოლდოვასთან ერთად, ევროკავშირის კანდიდატი ქვეყნის სტატუსზე განაცხადი შეიტანა, თუმცა გასულ ზაფხულს ის მხოლოდ კიევმა და კიშინოვმა მიიღეს. „კომერსანტი“ წერს, რომ პუტინის ამ ხმაურიანი გადაწყვეტილების შედეგად, ოპოზიციას სერიოზული ჯერ არაფერი დაუგეგმავს: 10 მაისს საღამოს, რუსეთის მიერ ვიზების გაუქმებისა და საჰაერო მიმოსვლის აღდგენის წინააღმდეგ მცირე საპროტესტო აქცია გაიმართა საქართველოს საგარეო საქმეთა სამინისტროს წინ, სადაც რამდენიმე ათეული ადამიანი შეიკრიბა. ავტორი: ეკა დარჩიაშვილი

ნათია მეზვრიშვილი (პარტია "საქართველოსთვის" თავმჯდომარის მოადგილე): "გორბის - ანუ ოცნების პროპაგანდის ინსტრუმენტის ე.წ. კვლევა კიდევ ერთი დასტურია, რომ ოცნება არჩევნების გაყალბებისთვის ემზადება. ეს არის ოცნების საოცნებო შედეგები: უმრავლესობაში ოცნება (თავისი ოლიგარქით), მთავარ ოპოზიციურ პარტიად ნაცმოძრაობა (თავისი ოლიგარქით), შემდეგ პატარა პარტიები, რომელთაგან ბევრი ოცნებისთვის კომფორტულია ოპოზიციაში და რომლებთანაც ოცნება მარტივად შექმნის მართვად კოალიციას და პარტია „საქართველოსთვის“ - რომელიც ერთადერთი პარტიაა მზარდი რეიტინგით და რომელსაც ყველაზე დაბალი უარყოფითი რეიტინგი აქვს - არსად. ამით ადასტურებენ, ვისი ეშინიათ ყველაზე მეტად. - რეალურად ოცნება იმდენად დაცლილია პოლიტიკური რესურსისგან, რომ მათივე მათემატიკით რომ ვიხელმძღვანელოთ - 30%-ზე მეტი მხარდაჭერა უკონკურენტოდ, უდიდესი ადმინისტრაციული და ფინანსური რესურსით ჩატარებულ 29 აპრილის რიგგარეშე და შუალედურ არჩევნებში ვერ მოიპოვა. ქვეყანაში, სადაც 89% ევროკავშირში ინტეგრაციას უჭერს მხარს, 53%-იანი მხარდაჭერა ვერ ექნება ანტი-დასავლურ პარტიას, რომელსაც რუსეთი ყოველდღე აქებს და ასაჩუქრებს. მარტის აქციები ამის ნათელი დასტურია. - ეს შესანიშნავად იციან ოცნებაში. ამიტომ, ერთადერთი რესურსი, რაც დარჩათ, არის არჩევნების გაყალბება. - არჩევნების გასაყალბებლად: - გააუქმეს და დაიქვემდებარეს ყველა დამოუკიდებელი ინსტიტუტი; - ესხმიან თავს ადგილობრივ სადამკვირვებლო ორგანიზაციებს; - ესხმიან თავს USAID-ს, IRI-ს და NDI-ს (ვინც სადამკვირვებლო ორგანიზაციებს აფინანსებს და თავად აკვირდება არჩევნებს); - აირჩიეს სახალხო დამცველი (რომლის დამოუკიდებლობის მიმართ უამრავი კითხვაა); - იქვემდებარებენ ცესკოს საკანონმდებლო დონეზე; - ამზადებენ ნიადაგს გორბის მეშვეობით. - კიდევ ერთი მიზეზი, რატომ უნდა იყოს მთავარი ყურადღება გადატანილი არჩევნებზე. - The so-called survey of the Ruling Party’s propaganda instrument Gorbi is another proof that GD is preparing to rig the elections. These are the dream results of the Ruling Party: GD in the majority (with its oligarch), UNM as the main opposition party (with its oligarch), then small parties, most of which are comfortable opposition for GD and with which GD will easily create a manageable coalition, and the political party For Georgia - which is the only party with increasing support and lowest negative rating - nowhere. This confirms who they fear the most. In fact, GD’s political recourses are so low, that even according to their own mathematics, it could not win more than 30% of support in the April 29 by-elections and extraordinary elections conducted without competitors and with the greatest administrative and financial resources. In a country where 89% supports EU integration, 53% cannot support an anti-Western party that Russia praises and rewards every day. March rallies are a clear proof of this. - To rig elections GD: - abolished or subordinated all independent institutions; - attacks national election monitoring organizations; - attacks USAID, IRI and NDI (who provide funding for election monitoring organizations and monitor the elections themselves); - elected Public Defender (whose independence is questioned); - tries to subordinate Central Election Commission at legislative level; - prepares grounds through Gorbi surveys. - Another reason why the main focus should be on elections."

2022 წელს ევროკავშირის ქვეყნებიდან სომხეთში, ყირგიზეთში და ყაზახეთში გაგზავნილი, მილიარდ დოლარზე მეტი ღირებულების საქონელი „დაიკარგა“ რუსეთის ტერიტორიაზე. ამის შესახებ იტყობინება Financial Times-ი, რომელიც ამ ვითარებას „შავ ვაჭრობას“ უწოდებს. ღია მონაცემების თანახმად, უკრაინაში რუსეთის შეჭრის შემდეგ ევროკავშირის ქვეყნებიდან რუსეთში შევიდა ორი მილიარდი დოლარის ოდენობის სატრანზიტო საქონელი. ამასთან, აღნიშნავს გამოცემა, ამ „შავი ვაჭრობის“ რეალური მოცულობა ბევრად უფრო დიდია. ევროპაში წარმოებული საქონლის, მათ შორის ორმაგი დანიშნულების, სანქციების ქვეშ მყოფი პროდუქტების მიმღებად გაფორმებული იყო სომხეთი, ყაზახეთი და ყირგიზეთი. საქმე ეხება პროდუქტს, რომლის გამოყენება შეიძლება სამხედრო მიზნებითაც. რუსეთი სანქციებისთვის გვერდის ავლას ახერხებდა ევროკავშირის საბაჟო დეკლარაციებში დანიშნულების ყალბი პუნქტის მითითებით. ის საქონელი, რომლის შეტანა რუსეთში აკრძალული იყო, მაგალითად, თვითმფრინავების კომპონენტები, ოპტიკური აგრეგატები, გაზის ტურბინები, ამ გზით ევროკავშირიდან პირდაპირ რუსეთში ხვდებოდა, ვითომ ტრანზიტის მიზნით. „სად შეიძლებოდა ეს საქონელი წასულიყო? რატომ დასჭირდათ მათ უცბად, სწორედ ამ პერიოდში ეს პროდუქტები? ვის სჭირდება რეგიონში ეს საქონელი ყველაზე მეტად? ცხადია, რომ რუსეთს“, - ამტკიცებს ერკო კოდარი, ესტონეთის მინისტრი სანქციების სფეროში. სტატიაში წაიკითხავთ, რომ ამ ექსპორტის დიდი ნაწილი მოდის ბალტიის ქვეყნებზე. ამავე დროს რუსეთის მეზობელ ქვეყნებში, რომლებიც არ უჭერენ მხარს სანქციებს, შენიშნულია გარკვეული კატეგორიის პროდუქტების იმპორტის ზრდა. სავარაუდოდ, შემდეგ ისინი რუსეთში შეჰქონდათ. ევროკავშირმა არაერთხელ გამოაცხადა, რომ იბრძოლებს რუსეთში სანქცირებული საქონლის სხვა გზებით შეტანის წინააღმდეგ. მაისში ბრიუსელმა აკრძალა რუსეთის გავლით ორმაგი დანიშნულების საქონლის შეტანა. სანქციების ახალ, მე-11 პაკეტში, რომელსაც ახლა განიხილავენ ევროკავშირის ქვენები, სხვა საკითხებს შორის შეთავაზებულია იმ აკრძალული საქონლის სიის გაფართოება, რომელიც მესამე ქვეყნების გზით ხვდება რუსეთში. ამასთან, ევროკავშირი გეგმავს ახალი ინსტრუმენტების შექმნას, რომლებიც ხელს შეუშლის მესამე ქვეყნებს, გვერდი აუარონ სანქციებს. რადიო თავისუფლება

ევროკომისიის საგარეო ქმედებათა სამსახურის პრესსპიკერი პიტერ სტანო გამოეხმაურა კრემლის გადაწყვეტილებას საქართველოს მოქალაქეებისთვის უვიზო მიმოსვლის დაწესებასა და ფრენების აღდგენაზე. 11 მაისს გამართულ ბრიფინგზე მან მოუწოდა საქართველოს, შეუერთდეს რუსეთის წინააღმდეგ დაწესებულ სანქციებს, "მათ შორის ავიაციის სექტორში." "ჩვენ, რა თქმა უნდა, მივიღეთ ცნობა რუსეთის ხელისუფლებისგან საქართველოსთან საჰაერო მიმოსვლის აკრძალვის გაუქმების შესახებ. ამ კონტექსტში ჩვენ უნდა გვახსოვდეს, რომ უკრაინაში რუსეთის უკანონო აგრესიის გამო, ევროკავშირმა და არაერთმა საერთაშორისო პარტნიორმა ქვეყანამ სანქციები დაუწესეს რუსულ ავიაციის სექტორს - ჩვენ ავკრძალეთ ფრენები რუსეთში, რუსეთიდან და რუსეთის გავლით. ევროკავშირი მოუწოდებს საქართველოს, რომელიც ისწრაფვის გახდეს კანდიდატი ქვეყანა, შეუერთდეს რუსეთის წინააღმდეგ დაწესებულ სანქციებს, მათ შორის ავიაციის სფეროში. ასევე შეინარჩუნოს სიფხიზლე არსებული სანქციების გვერდის ავლის ნებისმიერი მცდელობის მიმართ, განსაკუთრებით, ავიაციის სექტორში". პიტერ სტანომ ასევე ისაუბრა უსაფრთხოების პრობლემებზე, რომლებიც რუსულ თვითმფრინავებს აქვთ, დღეს დაწესებული სანქციებიდან გამომდინარე: "უსაფრთხოების მნიშვნელოვანი პრობლემების ფონზე, საქართველომ არ უნდა დაუშვას სახიფათო რუსული თვითმფრინავები თავის ტერიტორიაზე. სანქციების გამო რუსული თვითმფრინავების პარკის 95%-ს არ შეუძლია თვითმფრინავების განახლება, რაც აუცილებელია საერთაშორისო ტექნიკური და უსაფრთხოების სტანდარტების შესანარჩუნებლად. ეს ძალიან მნიშვნელოვანი უსაფრთხოების საკითხია". რაც შეეხება რუსეთთან უვიზო მიმოსვლის აღდგენის თემას, ამაზე პიტერ სტანომ აღნიშნა, რომ საქართველოს მოქალაქეების გადასაწყვეტია, ისარგებლებენ თუ არა ამით. მანამდე რუსეთის პრეზიდენტის გადაწყვეტილებას ამერიკის სახელმწიფო დეპარტამენტი გამოეხმაურა. "ამერიკის ხმისთვის" გაგზავნილ წერილობით კომენტარში ნათქვამია, რომ რუსეთს, რომელსაც იგი სასტიკ რეჟიმად მოიხსენიებს, მთელი დასავლური საზოგადოება დაშორდა. "ამ სასტიკ რეჟიმს მთელი დასავლური საზოგადოება დაშორდა - ახლა რუსეთთან ჩართულობის გაზრდის დრო არ არის. პირდაპირი ფრენების აღდგენის ან სავიზო რეჟიმის შეცვლის ნაცვლად, ქართველ ხალხს, სავარაუდოდ, ის ურჩევნია, რომ პუტინმა რუსეთის ჯარი გაიყვანოს რუსეთის მიერ ოკუპირებული საქართველოს ტერიტორიის 20 პროცენტიდან", - აცხადებენ სახელმწიფო დეპარტამენტში. 10 მაისს რუსეთის პრეზიდენტმა ვლადიმირ პუტინმა ორი ბრძანებულება გამოსცა, რომლებითაც გაუქმდა საქართველოსთან პირდაპირი ფრენების აკრძალვის გადაწყვეტილება და საქართველოს მოქალაქეებს 15 მაისიდან მიეცათ შესაძლებლობა, უვიზოდ, 90 დღემდე ვადით ჩავიდნენ რუსეთში. რადიო თავისუფლება

GORBI-მ სამთავრობო არხის, „იმედის“ დაკვეთით ჩატარებული საზოგადოებრივი აზრის კვლევის შედეგები გამოაქვეყნა. „გორბის“ კვლევის მიხედვით, შეკითხვაზე, დღეს რომ საპარლამენტო არჩევნები ტარდებოდეს, რომელ პარტიას მისცემდით ხმას, შედეგები ასეთია: „იმედის“ ინფორმაციით, მათი დაკვეთით „გორბის“ მიერ ჩატარებული საზოგადოებრივი აზრის კვლევა, პოლიტიკური ნაწილის გარდა, სხვა აქტუალურ საკითხებსაც მოიცავს და საზოგადოების განწყობას გამოხატავს. კვლევის სრულ შედეგებს „იმედი“ მოგვიანებით გამოაქვეყნებს. მეთოდოლოგია: „იმედის“ დაკვეთით, საზოგადოებრივი აზრისა და ბიზნესის კვლევის საერთაშორისო ცენტრმა „გორბიმ“ კვლევა 22 აპრილიდან 7 მაისის ჩათვლით ჩაატარა. წარმომადგენლობითი შერჩევით, ქვეყნისა და თბილისის მასშტაბით, პირისპირ ინტერვიუს წესით, საქართველოს 2026 მოქალაქე გამოიკითხა. 59%, ანუ 1212 რესპონდენტი სავარაუდო ამომრჩეველია, რომელიც, სავარაუდო ხმის მიცემის შესახებ 2 შეკითხვაზე პასუხისა და 2020 წლის საპარლამენტო არჩევნებზე ხმის უფლების მქონეთა თვითგაცხადებული ხმის მიცემის ისტორიის მიხედვით გამოვლინდა. ცდომილების ზღვარი: ქვეყნის მასშტაბით რიგითი მოქალაქეების გამოკითხვის შემთხვევაში – +/- 2.2%-ია. ქვეყნის მასშტაბით სავარაუდო ამომრჩევლის შემთხვევაში – +/- 2.9%-ი.

რუსეთის სახელმწიფო დუმის დეპუტატი ევგენი პოპოვი ამბობს, რომ მზადაა წარადგინოს წინადადება რუსეთისა და საქართველოს საპალარმენტო თანამშრომლობის ჯგუფის შექმნის შესახებ, იტყობინება „რია ნოვოსტი“. დეპუტატის თქმით, საუბარი არაა „მეგობრობის ჯგუფზე“, მაგრამ ორი ქვეყნის პარლამენტარებს შეუძლიათ წვლილი შეიტანონ ეკონომიკური თანამშრომლობის აღდგენაში. გუშინ რუსეთის ფედერაციამ გააუქმა სავიზო რეჟიმი საქართველოს მოქალაქეებისთვის და მოხსნა შეზღუდვა პირდაპირ ფრენებზე. მმართველ გუნდში ამ გადაწვყეტილებას პოზიტიურად შეხვდნენ, თუმცა ნეგატიური იყო პრეზიდენტისა და ოპოზიციის რეაქცია. ნეტგაზეთი

IRI და NDI დიდ როლს თამაშობენ საქართველოს დემოკრატიულ განვითარებაში წლების განმავლობაში და შეერთებული შტატები ამაყია იმით, რომ მხარს უჭერს მათ, - ამის შესახებ საქართველოში აშშ-ის ელჩმა, კელი დეგნანმა განაცხადა. „მსურს გამოვეხმაურო აღმაშფოთებელ სიცრუეს, რაც "საერთაშორისო რესპუბლიკური ინსტიტუტის" შესახებ ვრცელდება მმართველი პარტიისა და მასთან დაკავშირებული მედია საშუალებების მიერ. IRI მხარს უჭერს საქართველოში დემოკრატიას 20 წელზე მეტია. მნიშვნელოვანია აღინიშნოს, რომ „ქართული ოცნება“ IRI-სგან მეტ დახმარებას იღებს, ვიდრე რომელიმე სხვა პოლიტიკური პარტია. “ქართული ოცნების” ბევრი ლიდერი IRI-ს პროგრამების კურსდამთავრებულია, მონაწილეობა აქვს მიღებული მათში. ასე რომ ჩნდება კითხვა, რატომ ცდილობს მმართველი პარტია დამოუკიდებელი გამოკითხვის ჩახშობას და თავს ესხმის ახალგაზრდა ადამიანებს, რომლებიც დაინტერესებული არიან მხოლოდ იმით, როგორ ისწავლონ, იყვნენ კარგი მოქალაქეები ამ ქვეყანაში. დამოუკიდებელი გამოკითხვა, რომელიც არ უჭერს მხარს თქვენს პოზიციას, შესაძლოა შემაწუხებელი იყოს, მაგრამ ასევე მნიშვნელოვანია, პოლიტიკური ლიდერებისთვის ინფორმაციის მისაწოდებლად იმის შესახებ, რა არის საზოგადოების პრიორიტეტები“, - აღნიშნა ელჩმა. მისი თქმით, “საერთაშორისო რესპუბლიკური ინსტიტუტი” და „ეროვნულ-დემოკრატიული ინსტიტუტი“ ხელს უწყობენ ახალგაზრდებს, რომლებსაც ქვეყნის მომავლის განვითარებაში წვლილის შეტანა სურთ. „ჩვენ აქ, საქართველოში ვხედავთ, რომ ახალგაზრდა ადამიანებს სურთ წვლილი შეიტანონ იმ საკითხების განხილვაში, რომელსაც მომავლის განსაზღვრაში დიდი მნიშვნელობა აქვს. აი რას ემსახურება IRI და NDI, ისინი ეხმარებიან ამ ადამიანებს იმ უნარების განვითარებაში, რაც ამ საკითხების განსახილველად არის საჭირო, განსაკუთრებით იმ შემთხვევაში, როდესაც განსხვავებული მოსაზრება აქვთ ამ საკითხებთან დაკავშირებით, ეხმარება მათ იმაში, თუ როგორ ჩაერთონ კონსტრუქციულად და მშვიდობიანად პოლიტიკურ პროცესებში და წვლილი შეიტანონ თავიანთი ქვეყნის მომავლის განვითარებაში. IRI და NDI დიდ როლს თამაშობს საქართველოს დემოკრატიულ განვითარებაში წლების განმავლობაში და შეერთებული შტატები ამაყია იმით, რომ მხარს უჭერს მათ“, - აღნიშნა ელჩმა. იპნ

ამოსავალი წერტილი, რა შემთხვევაში შეიძლება ვითანამშრომლოთ ჩვენ კონკრეტულ პოლიტიკურ ოჯახთან ევროპაში, არის ღირებულებითი თავსებადობა. ამ კუთხით, ჩვენ გვქონდა პრობლემები „ევროპის სოციალისტურ პარტიასთან“, - ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა. როგორც კობახიძემ აღნიშნა, „ევროპის სოციალისტურმა პარტიამ“ თანდათან შეიცვალა მიმართულება და ფსევდო-ლიბერალური პოლიტიკის გამტარებელი გახდა. მისივე თქმით, „ქართულ ოცნებას“ არასდროს მიუღია მხარდაჭერა აღნიშნული პარტიისგან იმის მიუხედავად, რომ ერთი პოლიტიკური ოჯახის წევრები არიან. „ჩვენთვის მიუღებელია ის ფსევდო-ლიბერალური მიმართულება, რომელიც დღეს უკვე ერთგვარ წითელ ხაზად გასდევს „ევროპის სოციალისტური პარტიის“ საქმიანობას - ადრე ეს ასე არ იყო, თანდათანობით უფრო მეტად იკვეთებოდა. მეორე არის ლოიალობა: როდესაც შენ ხარ პოლიტიკური ოჯახის წევრი, ევროპული პოლიტიკური პარტიის წევრი, რა თქმა უნდა, მათგან ელოდები მხარდაჭერას. კიდევ ერთხელ ვიტყვი, რომ 2015 წლიდან ვართ ამ პოლიტიკური პარტიის წევრი, თუმცა, თქვენ თუ გაიხსენებთ რომელიმე ხმამაღალ განცხადებას? გახსოვთ უამრავი განცხადება „ევროპის სახალხო პარტიის“ (EPP) მხრიდან. ისინი პირდაპირ კრიმინალებს უჭერენ მხარს, იმის გამო, რომ კრიმინალები არიან, მათი პარტიის კრიმინალები არიან. ასეთ დროს, „ქართული ოცნება“ როდესაც არ იღებს არავითარ ხმამაღალ მხარდაჭერას „ევროპის სოციალისტური პარტიის“ მხრიდან, ეს ჩვენთვის მიუღებელია. ანუ, ორი კრიტერიუმი გვექნება: ერთ არის ღირებულებითი თავსებადობა და მეორე - სათანადო პოლიტიკური ლოიალობა და მხარდაჭერა შესაბამისი ევროპული პარტიის მხრიდან, რაც სამწუხაროდ, „ევროპის სოციალისტური პარტიის“ შემთხვევაში არ გვქონდა. იმედი გვაქვს, გამოჩნდება ევროპული ოჯახი, რომელთანაც ჩვენ ვიქნებით დაკავშირებული ამ ორი ასპექტით: პოლიტიკური ლოიალობა და ღირებულებითი თავსებადობა“, - განაცხადა ირაკლი კობახიძემ.