ყველა აქტივობა

სპეციალურ საგამოძიებო სამსახურში ირაკლი დგებუაძის მიმართ გამოძიება „სამსახურებრივი უფლებამოსილების გადამეტების” მუხლით მიმდინარეობს. როგორც სპეციალურ საგამოძიებო სამსახურში „პუბლიკას” განუცხადეს, გამოძიება 13 იანვარს დაიწყო. მას შემდეგ, რაც „ბათუმელები/ნეტგაზეთის” დამფუძნებელმა და დირექტორმა, მზია ამაღლობელმა უფლებადამცველებს ბათუმის პოლიციის უფროსის, ირაკლი დგებუაძის მხრიდან არასათანადო მოპყრობის შესახებ მოუყვა, ადვოკატები ითხოვენ, რომ საგამოძიებომ სათანადო კვალიფიკაციით დროულად გამოიძიოს დამამცირებელი მოპყრობის ფაქტი, ხოლო დგებუაძეს უფლებამოსილება შეუჩერდეს. მზია ამაღლობელმა საიას თავმჯდომარეს, ნონა ქურდოვანიძეს განუცხადა, რომ ირაკლი დგებუაძე მას აყენებდა სიტყვიერ შეურაცხყოფას, შეაფურთხა სახეში და არ აძლევდა წყლის დალევის, ასევე, საპირფარეშოთი სარგებლობის უფლებას. მზია ამაღლობელი ბათუმში აქციაზე 11 იანვარს დაწყებულ აქციაზე, უკვე 12 იანვარს დააკავეს. მას ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს. 14 იანვარს მზია ამაღლობელს ბათუმის საქალაქო სასამართლოს მოსამართლემ, ნინო სახელაშვილმა აღკვეთის ღონისძიების სახით პატიმრობა შეუფარდა. წინასასამართლო სხდომის თარიღად 4 მარტი, 11:00 საათი განისაზღვრა. პუბლიკა

თავდასხმა იყო წინასწარ ორგანიზებული, ჩასაფრებით მოწყობილი, პოლიტიკური შურისძიება. თავდასხმის დამკვეთი - ბიძინა ივანიშვილი, - ამის შესახებ პარტია „გახარია საქართველოსთვის“ თავმჯდომარე, გიორგი გახარია აცხადებს. როგორც გახარია აცხადებს, მას არ აინტერესებს შემსრულებლები, რადგან მას საქმე აქვს მასზე „თავდასხმის და მოქალაქეებზე ძალადობის დამკვეთთან“. „მინდა, კიდევ ერთხელ, მადლობა გადაგიხადოთ მხარდაჭერისთვის. დღეიდან მუშაობის ჩვეულ რიტმს ვუბრუნდები. რაც შეეხება თავდასხმას, ეს იყო წინასწარ ორგანიზებული, ჩასაფრებით მოწყობილი, პოლიტიკური შურისძიება. თავდასხმის დამკვეთი - ბიძინა ივანიშვილი. ივანიშვილი დიდი ხანია მემუქრება მე და ჩემს ოჯახს, სხვადასხვა ფორმით და გზებით, მათ შორის, საჯაროდაც. მე არ მაინტერესებს ამ თავდასხმის შემსრულებლები. მე საქმე მაქვს ჩემზე თავდასხმის და მოქალაქეებზე ძალადობის დამკვეთთან. რაც შეეხება გამოძიებას, მათ ვაძლევთ შესაძლებლობას, შეინარჩუნონ სახე და არ გახდნენ ძალადობრივი დანაშაულების თანამონაწილე“,- აცხადებს გიორგი გახარია. შეგახსენებთ, რომ გიორგი გახარიას ბათუმში, სასტუმრო „შერატონში“ თავს 15 იანვარს დაესხნენ. გახარია კლინიკაში გადაიყვანეს, თუმცა საავადმყოფო მალევე დატოვა. ექიმის განცხადებით, მას ცხვირის ძვლის მოტეხილობა და ტვინის შერყევა ჰქონდა. ერთ-ერთი პირი, რომელიც გახარიასთან ფიზიკურ დაპირისპირებაში მონაწილეობდა „ქართული ოცნების“ დეპუტატი დიმიტრი სამხარაძეა. გარდა გიორგი გახარიაზე თავდასხმისა, ამავე სასტუმროში დაპირისპირება მოხდა არასამთავრობო სექტორის წარმომადგენელ ზვიად ქორიძესთან. ქორიძის ინფორმაციითაც, მას „ქართული ოცნების“ წარმომადგენელი დიმიტრი სამხარაძე და მისი თანმხლები პირები დაუპირისპირდნენ. იპნ

პარტიის „გახარია საქართველოსთვის“ ქალთა ორგანიზაცია გმობს ჟურნალისტ მზია ამაღლობელის პატიმრობას და მის წინააღმდეგ სისხლის სამართლებრივი დევნის დაწყებას, რაც აშკარად უსამართლო და არაპროპორციულია. ამის შესახებ პარტიის წევრებმა დღეს თბილისში, სააპელაციო სასამართლოსთან გამართულ აქციაზე განაცხადეს. “პოლიციელის მხრიდან მრავალჯერადი სიტყვიერი შეურაცხყოფის და ადგილზე განხორციელებული არაერთი უკანონობის შემდეგ ემოციურ მდგომარეობაში გაწნული ერთჯერადი სილის გამო მზია ამაღლობელისთვის უმძიმესი ბრალდების წაყენება და მისი დაპატიმრება მიუთითებს იმაზე, რომ ადგილი აქვს ანგარიშსწორებას გამოხატული აზრის და ჟურნალისტური საქმიანობის გამო. პრაქტიკაში არ მოიძებნება ერთჯერადი სილის გამო, მით უმეტეს, იმ ვითარებაში, რა ვითარებაშიც ეს მოხდა, პატიმრობაში მყოფი ადამიანი, მით უმეტეს, კრიტიკული ჟურნალისტი. მეტიც, არათუ პატიმრობის, არამედ არც ერთი აღკვეთის ღონისძიების გამოყენების საფუძველი არ არსებობდა მზია ამაღლობელის მიმართ. ეს კიდევ ერთხელ მიუთითებს, რომ სასამართლო სისტემა ივანიშვილის მორჩილებაშია და ნებისმიერი გადაწყვეტილება წინასწარ შეთანხმებულია მურუსიძე-ჩინჩალაძის დაჯგუფებასთან”, – აცხადებენ პარტიაში. მათი თქმით, იმ პირობებში, როცა სამართალდამცავი სტრუქტურები ძალადობრივად უსწორდებიან საქართველოს მოქალაქეებს, მათ შორის მშვიდობიან დემონსტრანტებსა და ახალგაზრდებს, და არც ერთი დამნაშავე პასუხისგებაში მიცემული არ არის, ასეთი ბრალდებები წინააღმდეგობაში მოდის სამართლებრივი თანასწორობის პრინციპთან. “მოვუწოდებთ სასამართლოს, არ დაივიწყოს საკუთარი პასუხისმგებლობა სამართლიანობისა და კანონის უზენაესობის დაცვის მიმართ. ნებისმიერი უსამართლო გადაწყვეტილება ისტორიის მხრიდან აღიქმება როგორც რეჟიმის მორჩილების გამოვლინება, ხოლო ასეთი გადაწყვეტილების მიღებაში მონაწილე პირებს, რომლებიც კორუმპირებული მურუსიძე-ჩინჩალაძის კლანის წევრები არიან, მომავალში მოუწევთ პერსონალური პასუხისგება, ყველას მოუწევს, ქართველი ხალხის წინაშე ჩადენილი დანაშაულების ფასი გადაიხადოს”. ბათუმელები/ნეტგაზეთის დამფუძნებელი და დირექტორი მზია ამაღლობელი დააპატიმრეს. ბათუმელები/ნეტგაზეთი, როგორც დამოუკიდებელი და გავლენებისგან თავისუფალი მედიასაშუალება, რომელიც მზია ამაღლობელმა 2001 წელს დააფუძნა, მიიჩნევს, რომ ის არის რუსული რეჟიმის სინდისის პატიმარი, არ აპირებს შეგუებას, ითხოვს მის დაუყოვნებლივ გათავისუფლებას და აგრძელებს ბრძოლას სიტყვის თავისუფლებისთვის. მზია ამაღლობელი მე-11 დღეა პროტესტის ნიშნად შიმშილობს. ნეტგაზეთი

ჟურნალისტები მზია ამაღლობელს სთხოვენ, შეწყვიტოს შიმშილობა. საერთო განცხადებაში ნათქვამია: „ბათუმელების” დამფუძნებელი და დირექტორი, მზია ამაღლობელი ბათუმის პოლიციის უფროსის, ირაკლი დგებუაძისთვის ხელის დარტყმის გამო 11 იანვარს დააკავეს. ედავებიან პოლიციელზე თავდასხმას. დაკავებისას მზია ამაღლობელს მიაყენეს შეურაცხყოფა, მოექცნენ არაადამიანურად. მას 4-დან 7 წლამდე პატიმრობა ემუქრება. „ბათუმელების” დამფუძნებელს შეფარდებული აქვს წინასწარი პატიმრობა, ამასთან, გამოცხადებული აქვს შიმშილობა. 21 იანვარს ქუთაისის სააპელაციო სასამართლომ წარმოებაში არ მიიღო საჩივარი მზია ამაღლობელისთვის წინასწარი პატიმრობის შეცვლის შესახებ. წინა დღეს, 20 იანვარს „საიას“ თავმჯდომარემ, ნონა ქურდოვანიძემ განაცხადა, რომ თუ ქუთაისის სააპელაციო სასამართლო მზია ამაღლობელს აღკვეთის ღონისძიების სახით გამოყენებულ პატიმრობას არ შეუცვლის, მაშინ ადვოკატები სტრასბურგის სასამართლოს მიმართავენ. პუბლიკა

„გახარია საქართველოსთვის“ თავმჯდომარე, გიორგი გახარია თბილისის პროკურატურაში იმყოფება. როგორც „ინტერპრესნიუსს“ გენერალურ პროკურატურაში განუცხადეს, ის უწყებაში გამოკითხვაზეა დაბარებული. გიორგი გახარია საგამოძიებო უწყებაში ბათუმის სასტუმრო „შერატონში“ მომხდარი ინციდენტის გამო იმყოფება. ცნობისთვის, „გახარია საქართველოსთვის“ ლიდერს, გიორგი გახარიას ბათუმში, სასტუმრო „შერატონში“ თავს 15 იანვარს დაესხნენ. გახარია კლინიკაში გადაიყვანეს, თუმცა საავადმყოფო მოგვიანებით დატოვა. ექიმის განცხადებით, გიორგი გახარიას ცხვირის ძვლის მოტეხილობა და ტვინის შერყევა ჰქონდა. ერთ-ერთი პირი, რომელიც გახარიასთან ფიზიკურ დაპირისპირებაში მონაწილეობდა „ქართული ოცნების“ დეპუტატი დიმიტრი სამხარაძეა. გარდა გიორგი გახარიაზე თავდასხმისა, ამავე სასტუმროში დაპირისპირება მოხდა არასამთავრობო სექტორის წარმომადგენელ ზვიად ქორიძესთან. ქორიძის ინფორმაციითაც, მას „ქართული ოცნების“ წარმომადგენელი დიმიტრი სამხარაძე და მისი თანმხლები პირები დაუპირისპირდა. იპნ

21 იანვარს აფხაზეთის საოკუპაციო რეჟიმის ე.წ უზენაესმა სასამართლომ საქართველოს მოქალაქე, კახა მურადოვი დამნაშავედ სცნო სისხლის სამართლის კოდექსის ორი მუხლით – „სამშობლო ღალატი“ და „ცეცხლსასროლი იარაღით უკანონო ვაჭრობა“ და 15 წლით თავისუფლების აღკვეთა მიუსაჯა მაქსიმალური უსაფრთხოების კოლონიაში. აფხაზეთის რეჟიმის ე.წ პროკურატურა აცხადებს, რომ თავად მურადოვმა დანაშაული გამოძიების არც ერთ ეტაპზე არ აღიარა. ე.წ პროკურატურისვე ცნობით, „მურადოვი აფხაზეთის მოქალაქეა. თუმცა, 2024 წელს, დაკავების შემდეგ, აფხაზეთის სახელმწიფო უსაფრთხოების სამსახურმა განაცხადა, რომ მას ქართული პასპორტიც ჰქონდა”. მურადოვის სოხუმში დაკავების შესახებ ინფორმაცია 2024 წლის 14 მაისს გავრცელდა. ოკუპირებული აფხაზეთის ე.წ სახელმწიფო უსაფრთხოების სამსახურმა მისი დაკავებისა და დაკითხვის ვიდეო გამოაქვეყნა, რომელშიც ის „ქართული სპეცსამსახურების წარმომადგენლებთან კავშირებზე ლაპარაკობს”. ოკუპირებული აფხაზეთის ე.წ სამთავრობო საინფორმაციო სააგენტო „აპსნიპრესი” მაშინ წერდა: გავრცელდა ინფორმაცია, რომ მურადოვს, სავარაუდოდ, „კონტაქტები ჰქონდა საქართველოს სახელმწიფო საბჭოს ეგრეთ წოდებული გაგრის ბატალიონის ყოფილ მეთაურებთან, რადიკალური ნაციონალისტური დაჯგუფება „მხედრიონის“ წევრებთან, ასევე სამხედრო ოპერაციებში მონაწილე ქართული ლეგიონის დაქირავებულებთან, რომლებიც იბრძვიან უკრაინის შეიარაღებული ძალების მხარეს“. მურადოვის წინააღმდეგ გამოტანილ განაჩენზე საქართველოს ხელისუფლება კომენტარს არ აკეთებს. პუბლიკა

უზარმაზარი პერსონალური ინფორმაცია იქნა წაღებული სასტუმრო „შერატონიდან“, მათ შორის სხვა სტუმრების პერსონალური მონაცემების შესახებ ინფორმაცია. ეს მიანიშნებს, რა საფრთხის მატარებელია ამ სასტუმროში გაჩერება. თუ მართლები არიან, თავდამსხმელებს რატომ მალავენ? მოვა დრო და ვისაუბრებთ, რა მოხდა. პარალელურ გამოძიებას ვატარებთ, დაახლოებით 4-5 ადამიანი იდენტიფიცირებული გვყავს, - ამის შესახებ „გახარია საქართველოსთვის“ პარტიის აღმასრულებელმა მდივანმა, ბერდია სიჭინავამ „პალიტრანიუსის“ გადაცემა „დღის ნიუსრუმში“ პარტიის თავმჯდომარე, გიორგი გახარიაზე განხორციელებული თავდასხმის დეტალებზე საუბრისას განაცხადა. როგორც სიჭინავამ აღნიშნა, ამ პირობებში, მოლოდინია, რომ რაღაც სიგიჟე დაიდგმება, თუმცა, გამოძიებას შანს აძლევენ, რომ „გამობრძანდნენ და ისაუბრონ, რაც მოხდა რეალურად“. „თავიდან გვეგონა სამართალდამცავი ორგანოების ზეწოლის ქვეშ იყო სასტუმრო „შერატონის“ ადმინისტრაცია, რა მიზეზს არ იგონებდნენ. რეალურად კი თანამზრახველები აღმოჩნდნენ. თურმე, მთელი ეს დღეები ელოდებოდნენ პროკურატურისგან განჩინების მიღებას, რათა სერვერული ინფრასტრუქტურა, სადაც პერსონალური ინფორმაცია ინახება, ამოეღოთ და ხელმიუწვდომელი გამხდარიყო გახარიასთვის და საზოგადოებისთვის. ეს კრიმინალური აქტი აღბეჭდილია ამ ვიდეოჩანაწერში. სტანდარტულ შემთხვევაში შემდეგნაირად ხდება: საგამოძიებო ორგანო მიდის შესაბამისი ინფორმაციის გამოთხოვის განჩინებით, იწერს სერვერებიდან ინფორმაციას, რომელიც მათთვის საინტერესო პერიოდს შეეხება და ამაგრებენ სისხლის სამართლის საქმეზე. ადამიანები მივიდნენ და დაახლოებით 20 ვინჩესტერის მოცულების ინფორმაცია წაიღეს სასტუმროდან. გუშინ გავარკვიეთ, რომ სასტუმრო „შერატონს“ შუა დღის საათებში ნაყიდი ჰქონდა დაახლოებით 20 ვინჩესტერი, რათა ეს სერვერული ინფრასტრუქტურა გამართული ყოფილიყო. უზარმაზარი ინფორმაცია იქნა წაღებული, მათ შორის, უამრავი ადამიანის პერსონალური ინფორმაცია, ვინც სასტუმროში ცხოვრობდა და ცხოვრობს, სასტუმროს სტუმრებისაც. ეს მიანიშნებს, რა საფრთხის მატარებელია ამ სასტუმროში გაჩერება. ეს სასტუმრო არის კრიმინალური რეჟიმის მომსახურე სასტუმრო! ამ სიგიჟეების შემოქმედია ივანიშვილი, რომელიც რეჟიმის მთავარ სახედ იქცა. მას ნიღაბი აქვს ჩამოცმული და ისე ძალადობს საკუთარი შვილის ტოლ მოქალაქეებზე. ახალგაზრდები ციხეში ჰყავს დამწყვდეული, მისი დავალებით სცემს, იტაცებენ რუსთაველის ქუჩებიდან, ტელეფონებს და ჯვრებს ართმევენ მოქალაქეებს, პირში აფურთხებენ, ამ ყველაფრის შემოქმედია ნიღაბჩამოცმული ივანიშვილი, რომელიც ახლა სადღაც იმალება. ალბათ, საკუთარი შვილებიც არ უყვარს. როგორ შეიძლება საყოველთაო ზიზღის ობიექტად აქციო ოჯახი. ამ პირობებში, მოლოდინია, რომ რაღაც სიგიჟე დაიგეგმება, პირველი, ალბათ, ყავისგან დაზარალებული ზონდერი შესაძლოა გვყავდეს. თუ მართლები არიან, თავდამსხმელებს რატომ მალავენ? თუ გახარია დაესხა თავს, რატომ იმალებიან ესენი? ჭუჭყიანი მორალის ადამიანები სად იმალებიან?! მოვა დრო და ვისაუბრებთ რა მოხდა. ორგანიზებულ თავდასხმაში მონაწილე ყველა პირის იდენტიფიცირება მოხდება. პარალელურ გამოძიებას ვატარებთ და დაახლოებით 4-5 ადამიანი იდენტიფიცირებული გვყავს. ველოდებით გამოძიებას, შანს ვაძლევთ გამობრძანდნენ და ისაუბრონ, რაც მოხდა რეალურად“,- აღნიშნა სიჭინავამ. როგორც სიჭინავამ აღნიშნა, ამ ეტაპზე გიორგი გახარიას გამოძიებისთვის ინფორმაცია არ აქვს მიწოდებული გამოკითხვის ფორმატში, სამუშაო რეჟიმი კი არ შეუწყვეტია და მეორე დღესვე მართავდა სამუშაო შეხვედრებს. „გიორგი გახარიას სამუშაო რეჟიმი არ შეუწყვეტია. მეორე დღესვე მართავდა სამუშაო შეხვედრებს. სამუშაო გრძელდება, უფრო შემართებით, ბევრად უფრო გეგმაზომიერად მივიყვანთ რეჟიმს იქამდე, რომ მოძალადე რეჟიმი საბოლოოდ დასრულდეს ამ ქვეყანაში, ივანიშვილის ტყვეები ციხიდან გათავისუფლდეს“, - აღნიშნა სიჭინავამ. ამასთან, სიჭინავამ ევროპარლამენტში გიორგი გახარიასთან დაკავშირებით გაჟღერებული განცხადებების შეაფასა და აღნიშნა, რომ ოპონენტების წინააღმდეგ განხორციელებული თავდასხმები „იმაზე ძვირი დაუჯდება ივანიშვილს და მის რეჟიმს, ვიდრე მათ წარმოუდგენიათ“. „ასეთი ბრუტალური გამოვლინება რეჟიმს დასასრულთან უფრო აახლოებს. გახარიაზე თავდასხმა არ არის კლასიკური ტიპის ოპოზიციონერზე თავდასხმა, ის არის ყოფილი პრემიერი. ეს მნიშვნელოვანი გზავნილია, რომ უსაფრთხო ამ ქვეყანაში არავინაა, მათ შორის არც ოპოზიციური პარტიის წარმომადგენლები, სამოქალაქო საზოგადოება, ჟურნალისტები. საქართველო არის საკითხი, რომელიც ევროპის დღის წესრიგიდან არ მოიხსნება. რეჟიმმა ყველა წითელი ხაზი გადაკვეთა. ყველა ხვდება რომ ე.წ. ოცნების ხელისუფლებას ხელი ვერ ჩამოერთმევა. ესენი არიან პოლიტიკური კეთროვნები! პოლიტიკური კრიზისიდან გამოსვლის ერთადერთი გზა არის ახალი არჩევნები“,- აღნიშნა სიჭინავა. ამასთან, ის ევროპარლამენტარ სერგეი ლაგოდინსკის განცხადებას გამოეხმაურა, რომელმაც ევროპარლამენტის სხდომაზე აღნიშნა: „ირაკლი კობახიძევ და მიხეილ ყაველაშვილო, გეკითხებით, სადამდე ხართ მზად ესკალაციისთვის?“. ბერდია სიჭინავას თქმით, აღნიშნულ განცხადებაში „არასწორი ადრესატი იყო დასმული, ვინაიდან იქამდე იქნებიან ყაველაშვილი და კობახიძე მზად, სანამ ბიძინა უბრძანებთ მათ“. „ესენი არიან გალიაში ჩამწყვდეული თანამდებობის პირები. ივანიშვილი რეჟიმის გადასარჩენად ყველაფერზეა წამსვლელი“,- აღნიშნა სიჭინავამ. გარდა ამისა, ბერდია სიჭინავამ ის ფაქტიც შეაფასა, რომ ბიძინა ივანიშვილი შვეიცარიულ ბანკ Julius Baer-ს სასამართლოში უჩივის. როგორც სიჭინავამ აღნიშნა, „ივანიშვილის დავები არ დამთავრდება, ვინაიდან ის ვაჭარია“. „კოლექტიურ სიგიჟეშია „ქართული ოცნება“. ივანიშვილი არის ვაჭარი, რომელიც ქვეყნის სუვერენიტეტით ვაჭრობს იმისთვის, რომ საკუთარი ფინანსური საკითხები მოაგვაროს. „გლობალური ომის პარტია“ თურმე ისეთი მძლავრი ორგანიზაციაა მსოფლიოში, რომ შეერთებული შტატებიც ტყვედ ჰყავს აყვანილი, ბრიტანეთიც და ერთი ივანიშვილი ვერ დაამარცხა. წარმოუდგენელ სიგიჟეში გვაცხოვრებს. აჯერებს, ამ „სალაფავს“ აჭმევს საკუთარ პროპაგანდას. წარმოუდგენელია, მისი პრობლემებით იწყება და მთავრდება პოლიტიკური ცხოვრება ე.წ. პრემიერისთვის, პრეზიდენტისთვის... არ დამთავრდა ამის დავები, ფინანსები. ვაჭარია, რომელიც ვაჭრობს, არც ყაველაშვილის ბედი ადარდებს და არც კობახიძის. დარბის, ხან ქონებას აფორმებს, ხან შვილებს კომპანიებს ურეგისტრირებს. თუ არ ადარდებს ფინანსები, რას წივის და ტირის?! რა უბედურებაში გვაცხოვრებს“, - აღნიშნა სიჭინავამ. იპნ

თბილისის საკრებულოს „გახარია საქართველოსთვის“ წევრები თბილისის მერს, კახა კალაძეს მიმართავენ, რომ გმირთა მოედანთან მდებარე ე.წ. 11 სართულიანი შენობის პრობლემით დაინტერესდეს. როგორც „გახარია საქართველოსთვის“ თბილისის საკრებულოს წევრმა, გიორგი შარაშიძემ განაცხადა, ე.წ. 11 სართულიანის მოსახლეობას აწუხებს საკანალიზაციო სისტემის პრობლემა, რის გამოც ისინი წლებია გაუსაძლის პირობებში ცხოვრობენ. შარაშიძის თქმით, 13 ივნისის სტიქიის შემდეგ მცხოვრებელთა მდგომარეობა კიდევ უფრო დამძიმდა, როდესაც უხარისხოდ, არაკომპეტენტურად და არაკვალიფიციურად ჩატარდა სარეაბილიტაციო სამუშაოები. „საკანალიზაციო სისტემა, რომელიც თავის დროზე გაკეთდა, გათვლილი იყო მხოლოდ ამ ერთ, 11 - სართულიან სახლზე, მაგრამ დღეს, უკვე ყველა მიმდებარე შენობა, მათ შორის ახალი მშენებლობები დაერთებულია ამ ძველ სისტემაზე და შესაბამისად, საკანალიზაციო სისტემას შეექმნა გამტარუნარიანობის პრობლემა და ამის შედეგად, განსაკუთრებით წვიმიან ამინდებში პირდაპირ სარდაფებში ამოდის კანალიზაცია, რაც რა თქმა უნდა, გაუსაძლის, ანტისანიტარიულ მდგომარეობას. მიუხედავად მოსახლეობის არაერთგზის მიმართვისა GWP-ს, თბილისის მერიის შესაბამისის სამსახურების მიმართ, არავინ დაინტერესებულა და არავის სერიოზული რეაგირება არ ჰქონია. ამიტომ, ჩვენ, ფრაქცია „გახარია საქართველოსთვის“ , გახარიას გუნდი თბილისის საკრებულოში პირდაპირ მივმართავთ თბილისის მერს, ბატონ კახა კალაძეს და მოვუწოდებთ, თუ მას სურს თბილისის რეალური პრობლემების გადაჭრა პირადად მობრძანდეს აქ, დაინტერესდეს მოსახლეობის პრობლემებით და თავი დაანებოს, მათ შორის რუსთაველის რეაბილიტაციას, რომელსაც არ აქვს ისეთი გაუსაძლისი ვითარება, როგორიც ამ შენობას აქვს. რეაბილიტაციის გზით რომ ცდილობს დაშალოს მშვიდობიანი პროტესტანტები ეს მას არ გამოუვა. აქ ელოდება მას ხალხი, რეალური პრობლემა და თუ მას სურს რეალურ პრობლემა გადაუჭრას თბილისელებს სასწრაფოდ მოვიდეს, გასწიოს შესაბამისი შუამდგომლობა GWP-სთან, რომელიც მართალია კერძო კომპანიაა, მაგრამ უშუალოდ არის პასუხისმგებელი ამ სამუშაოების შესრულებაზე და ადგილობრივ მოსახლეობას შვება მიეცეს“,- განაცხადა გიორგი შარაშიძემ. აღნიშნული განცხადება გიორგი შარაშიძემ ე.წ. 11 სართულიანთან, პარტიის წევრებთან, ტატა ხვედელიანთან და სალომე კობალაძესთან ერთად გააკეთა. იპნ

“შერატონი” ჩართულია მტკიცებულებების განადგურების სქემაში, იმ სპეცოპერაციაში, რომელსაც “ოცნება” ატარებს. აკაკი გვიანიძე, პარტია "გახარია საქართველოსთვის" - ბათუმი. ვიდეო: https://www.facebook.com/ForGeoGe/videos/1063574698859561

ევროპარლამენტარები პარტია “გახარია საქართველოს” ლიდერზე, ყოფილ პრემიერ-მინისტრ გიორგი გახარიაზე თავდასხმას ეხმაურებიან. რასა იუკნევიჩიენე, ევროპის სახალხო პარტია: ოპოზიციის ერთ-ერთ ლიდერზე, გიორგი გახარიაზე განხორციელდა სასტიკი თავდასხმა. …. ევროპამ უნდა დააწესოს პერსონალური სანქციები პასუხისმგებელ პირებზე, განსაკუთრებით ბიძინა ივანიშვილზე. ტობიას კრემერი, სოცდემოკრატები : გასულ კვირას საქართველოს ყოფილ პრემიერ-მინისტრ გიორგი გახარიაზე განხორციელდა სასტიკი თავდასხმა სამთავრობო ბანდდაჯგუფების მიერ, რომელთა შორის იყო „ქართული ოცნების“ ე.წ. დეპუტატი, იარაღით შეიარაღებული. გახარია მძიმე მდგომარეობაში, სისხლისდენითა და მოტეხილობებით დატოვეს, რის გამოც მისი ჰოსპიტალიზაცია გახდა აუცილებელი. სერგეი ლაგოდინსკი, ევრონესტის საპარლამენტო ასამბლეის დელეგაციის თავმჯდომარე: პარტია, რომელიც საკუთარ თავს “ქართულ ოცნებას” ეძახის, თავისი ძალაუფლების სრულ ძალას იყენებს, რათა გაასამართლოს ჟურნალისტები, თავს დაესხას მშვიდობიან დემონსტრანტებს და ოპოზიციის წევრებს, ყოფილ პრემიერ-მინისტრ გიორგი გახარიასაც, რომელსაც სულ რამდენიმე დღის წინ სასტიკად დაესხნენ თავს. ნაჩო სანჩეს ამორი, სოცდემოკრატების ჯგუფი: კოლეგებმა აღნიშნეს საქართველოს ყოფილი პრემიერ-მინისტრის, გიორგი გახარიას, წინააღმდეგ მმართველი პარტიის შეიარაღებული წარმომადგენლების მიერ განხორციელებული თავდასხმა. ეს შემთხვევა და მრავალი სხვა მეტყველებს სრულ დაუსჯელობაზე. მარკოს როს სემპერე, სოცდემოკრატების ჯგუფი: საქართველოში ჩვენ ვნახეთ პოლიტიკური ძალადობა და ოპოზიციის წინააღმდეგ განხორციელებული თავდასხმები. განსაკუთრებულად მინდა აღვნიშნო ოპოზიციის ერთ-ერთი ლიდერის, გიორგი გახარიას მიმართ განხორციელებული თავდასხმა, რის შედეგადაც მისი ჰოსპიტალიზაცია გახდა აუცილებელი. დაინიუს ჟალიმასი, ლიბერალების ჯგუფი : საქართველოში დემოკრატიისთვის მებრძოლ მოქალაქეები სასტიკად უსწორდებიან. გასულ კვირას ოპოზიციის ერთ-ერთ ლიდერს, გიორგი გახარიას, და „საერთაშორისო გამჭვირვალობა – საქართველოს“ წარმომადგენელს, ზვიად ქორიძეს, სასტიკად დაესხნენ თავს და მძიმე დაზიანებები მიაყენეს. გურიანიუსი

საქართველო კრიტიკულ ეტაპზეა: ევროპული ღირებულებები, ან კრემლის კრიმინალური რეჟიმის ტრიუმფი, - ამის შესახებ პოლონელმა ევროპარლამენტარმა, მალგორზატა გოშიევსკამ ევროპარლამენტში, საქართველოს საკითხზე მიმდინარე დებატებისას განაცხადა. მისი თქმით, ორი თვეა საქართველოში ანტიდემოკრატიული ხელისუფლების წინააღმდეგ საპროტესტო აქციები მიმდინარეობს, რომელსაც ხელისუფლება სასტიკი რეპრესიებით პასუხობს. „ორი თვეა საქართველო ჩაფლულია მასობრივ პროტესტში სასტიკი, ანტიდემოკრატიული ხელისუფლების წინააღმდეგ, რომელმაც კიდევ ერთხელ გააყალბა არჩევნები და ევროკავშირთან გაწევრიანების შესახებ მოლაპარაკებები შეაჩერა. ხელისუფლება სასტიკი რეპრესიებით პასუხობს. საქართველო კრიტიკულ ეტაპზეა: ევროპული ღირებულებები, ან კრემლის კრიმინალური რეჟიმის ტრიუმფი. ჩვენ, ევროპარლამენტი, გვერდზე არ უნდა გავდგეთ, უნდა მოვითხოვოთ სანქციები ოლიგარქი ივანიშვილის და მასთან დაკავშირებული ბიზნესმენებისა და პოლიტიკოსების წინააღმდეგ, ამჟამინდელი მთავრობის და პარლამენტის საერთაშორისო იზოლაცია, თავისუფალი მედიის, პროევროპული ორგანიზაციების მხარდაჭერა, ყოფილი პრეზიდენტის, სააკაშვილის და სხვა პოლიტიკური პატიმრების გათავისუფლება“, - აღნიშნა ევროპარლამენტარმა. მისი თქმით, საქართველოსთან დაკავშირებით მოქმედების და გადაწყვეტილების მიღების დროა. იპნ

"იცით რაზე მეღიმება? პროკურატურას რომ ჰგონია, ჭკუაში მოგვატყუებს. მართლა ვერ ხვდებით რამხელა სირცხვილი გელოდებათ ყოფილ პრემიერზე თავდასხმის საქმის ჩაფარცხვისთვის? ნუ რომ აღარაფერი ვთქვათ იმაზე, რომ დანაშაულის ჩაფარცხვა დანაშაულია. ხომ იცით მაინც ვაჩვენებთ სიმართლეს და სერიოზულ პრობლემებს რატომ იქმნით? მრჩეველიც აღარავინ დაგრჩათ?" ნათია მეზვრიშვილი, პარტია "გახარია საქართველოსთვის" თავმჯდომარის მოადგილე. Facebook

როგორც პარტია გახარია საქართველოსთვის თავმჯდომარის მოადგილე, ნათია მეზვრიშვილი წერს, სასტუმრო შერატონში უთხრეს, რომ გახარიაზე თავდასხმის კადრების ასლი აღარ აქვთ, გამოძიებას სერვერებიანად გაატანეს. მეზვრიშვილის შეფასებით, სასტუმრომ მტკიცებულებების განადგურების "რეკორდი მოხსნა". "შერატონმა გახარიაზე თავდასხმაში თანამონაწილეობის და მტკიცებულებების განადგურების ახალი რეკორდი მოხსნა. ამ დრომდე არ გვაძლევდნენ კადრებს. მენეჯერი ირწმუნებოდა, რომ არსებობს და ასლი მათთან შენახული იქნებოდა მაშინაც კი, თუ განჩინებით გამოძიება წაიღებდა. ამ დრომდე ჩვენს წარმომადგენლებს დროს შეგნებულად უჭიანურებდნენ. რა თქმა უნდა, ეჭვი გვქონდა, რომ გამოძიებასთან ლაგდებოდნენ და შესაძლოა სერვერებიანად გაეტანებინათ და ეთქვათ, რომ აღარ აქვთ. ასეც მოხდა. რამდენიმე წუთის წინ გვითხრეს, რომ ასლი აღარ აქვთ, გამოძიებას სერვერებიანად გაატანეს. ეს ხდება მას შემდეგ, რაც გამოძიება პრაქტიკულად გვემალება გახარიას გამოკითხვაზე, რისი სურვილიც გუშინ გამოვხატეთ. ჯერ შსს-ს გამომძიებელმა ზუსტად 3 საათი გვალოდინა პასუხზე გამოკითხავდნენ თუ არა. 3 საათის თავზე ვიგებთ, რომ საქმე პროკურატურას წაუღია. პროკურორს ვუფიქსირებთ იგივე მოთხოვნას. ველოდებით დილამდე. დღეს დილით პროკურორი იკარგება და ახლახანს დღეს აღებული განჩინებით მირბიან შერატონში ჩანაწერების პრაქტიკულად გასატაცებლად. შერატონის მომხმარებლებმა უნდა იცოდნენ, რომ მათი პერსონალური ინფორმაცია უდიდეს საფრთხეშია. ვინჩესტერით კადრების გატანების არანაირი მიზეზი არ არსებობდა, გარდა ერთისა - განადგურება-ფალსიფიკაცია და ამაში რეჟიმთან ერთად შერატონი იქნება მონაწილე" - წერს მეზვრიშვილი. 15 იანვარს, ქალაქ ბათუმში პარტია საქართველოსთვის ლიდერს, გიორგი გახარიას და ზვიად ქორიძეს თავს დაესხნენ და ფიზიკურად გაუსწორდნენ ქართული ოცნების დეპუტატი დიმიტრი სამხარაძე და აჭარის უმაღლესი საბჭოს წევრი, გიორგი მანველიძე სხვა პირებთან ერთად. შსს-მ გახარიაზე თავდასხმის ფაქტზე გამოძიება ძალადობის მუხლით დაიწყო. სასტუმრო შერატონის წარმომადგენლის ცნობით, თავდასხმის ამსახველი ჩანაწერები სრულად აქვთ და ოფიციალური მომართვის შემდეგ უწყებებს გამოძიებისთვის გადასცემენ. tabula

საქართველოს მეხუთე პრეზიდენტ სალომე ზურაბიშვილის აზრით, „ნეტგაზეთისა“ და „ბათუმელების“ დამფუძნებელ მზია ამაღლობელისთვის შესაძლებელი იყო ადმინისტრაციული პასუხისმგებლობის დაკისრება. როგორც ზურაბიშვილმა Atlantic Council-ის ორგანიზებულ დისკუსიაში Fire Side Chat განაცხადა, მიზეზი, რის გამოც ხელისუფლება მიმართავს სისხლის სამართლებრივ და არა ადმინისტრაციულ კოდექსს, მოსახლეობის დაშინებაა. „[მზია ამაღლობელის] პატიმრობა სიგიჟეა. ეს შეიძლება ყოფილიყო ადმინისტრაციული სახდელი. ისინი უმეტეს შემთხვევაში არ იყენებენ ადმინისტრაციულ სახდელს. ეს არის დანარჩენი მოსახლეობის დაშინების მცდელობა. ისინი ვერ შეძლებენ [მზია ამაღლობელის დაშინებას]. ის ძალიან ძლიერია. მაგრამ ეს არის სხვების დაშინების მცდელობა. იგივეა ამ ცნობილ მსახიობზეც [ანდრო ჭიჭინაძეზე]. საზოგადოებას ეუბნებიან — თუ ჩვენ შეგვიძლია მასთან მიმართებაში ასე მოქცევა და 9 წლის პასუხისმგებლობის წინაშე დაყენება, ნებისმიერ თქვენგანს შეიძლება იგივე დაემართოს“, — განაცხადა სალომე ზურაბიშვილმა და დასძინა, რომ ასეთი დაშინება ქართულ საზოგადოებაზე არ მუშაობს. ნეტგაზეთი

ევროკომისია, რას ელოდებით? საქართველოს ჩვენი მხარდაჭერა სჭირდება - თბილისში გამგზავრება, პრეზიდენტ ზურაბიშვილის მხარდაჭერა და მსურველთა კოალიციით რეალური სანქციების ამოქმედება, - ამის შესახებ ნიდერლანდელმა ევროპარლამენტარმა, რაინიე ვან ლანშოტმა ევროპარლამენტში, საქართველოს საკითხზე მიმდინარე დებატებისას განაცხადა. „დღეს გარეთ ცივა. წარმოიდგინეთ, გადიხართ გარეთ და იქ 6 საათის განმავლობაში დგახართ. სიცივისგან კანკალებ და გეშინია, რომ შესაძლოა, პოლიციამ გცემოს უმიზეზოდ. სახლში დივანზე ოჯახთან ერთად ჯდომა, ბევრად უკეთესია, მაგრამ მაინც ქუჩაში რჩები, ხვალ ისევ მიდიხარ ისე, როგორც ამას ბოლო 55 დღის განმავლობაში აკეთებ, რადგან გსურს, შენი ქვეყანა დიქტატურა არ გახდეს, რადგან გსურს, შენს ქვეყანაში დემოკრატია და თავისუფლება იყოს, რადგან გსურს, შენი ქვეყანა ევროკავშირს შეუერთდეს. რას იგრძნობთ, თუ იგივე კავშირი რამდენიმე თვიანი დებატების შემდეგ გადაწყვეტს, რომ შეიძლება, მხოლოდ შეიძლება, ოდნავ გაურთულონ რეპრესიული რეჟიმის ჩინოვნიკებს თვითმფრინავით მგზავრობა. ევროკომისია, რას ელოდებით? საქართველოს ჩვენი მხარდაჭერა სჭირდება. თბილისში გამგზავრება, პრეზიდენტ ზურაბიშვილის მხარდაჭერა და მსურველთა კოალიციით რეალური სანქციების ამოქმედება“, - აღნიშნა ევროპარლამენტარმა. იპნ

ქართველ ხალხს მხოლოდ ერთი რამ სურს - არჩევნების ხელახლა ჩატარება დემოკრატიულ პირობებში, და ეს უნდა მისცეთ მათ, ეს არის უფლება, რომლისთვისაც იბრძვიან, - ამის შესახებ ევროპარლამენტარმა სერგეი ლაგოდინსკიმ ევროპარლამენტის პლენარულ სხდომაზე განაცხადა. “აქ დეზინფორმაციასა და ტყუილებზე ვსაუბრობდით და ზოგიერთმა ამ ტყუილმა ამ პოდიუმამდე მოაღწია. ხალხი რაღაც “სისხლიან მაიდანზე” ან “ქუჩაში ძალადობაზე” საუბრობს. ჩვენ ვიყავით ქუჩებში, ბევრი ჩვენგანი ჩავედით თბილისში, ჩვენ რეალურად თქვენს სამუშაოს ვასრულებდით მაშინ, როდესაც თქვენ ჯერ კიდევ აქ იყავით. და ჩვენ დავდიოდით იმ ხალხთან ერთად ცივ ღამეებში, ასობით ათასი ადამიანი. და ისინი თავიანთი და თავისი შვილიშვილების მომავლისთვის მიდიოდნენ, და ამბობდნენ, რომ ევროპული მომავალი სურთ. ქართველების დემოკრატიული მომავლის შესახებ ოცნება თანხვედრაშია ევროპულ ოცნებასთან. და ეს არის საქართველოს ნამდვილი ოცნება, მაგრამ პარტია, რომელიც საკუთარ თავს “ქართულ ოცნებას” ეძახის, თავისი ძალაუფლების სრულ ძალას იყენებს, რათა გაასამართლოს ჟურნალისტები, თავს დაესხას მშვიდობიან დემონსტრანტებს და ოპოზიციის წევრებს, ყოფილ პრემიერ-მინისტრ გიორგი გახარიასაც, რომელსაც სულ რამდენიმე დღის წინ სასტიკად დაესხნენ თავს. ასე რომ, ვკითხულობ: “ირაკლი კობახიძევ და მიხეილ ყაველაშვილო, გეკითხებით, სადამდე ხართ მზად ესაკალაციისთვის? თქვენს ხალხს მხოლოდ ერთი რამ სურს - არჩევნების ხელახლა ჩატარება დემოკრატიულ პირობებში. და ეს უნდა მისცეთ მათ. ეს არის უფლება, რომლისთვისაც იბრძვიან და არ უნდათ რომ აწამონ. ვნახეთ ხალხი, რომელიც აწამეს საქართველოში. მათ აქვთ უსაფრთხოდ ყოფნის უფლება, ხოლო თუ არა, მაშინ „მსურველთა კოალიციაზე“ უნდა ვიმუშაოთ, რომელიც მიზნობრივ სანქციებზე იმუშავებს, მათ შორის თქვენს წინააღმდეგ“, - განაცხადა ლაგოდინსკიმ. იპნ

გვსურს უკრაინაში ომი ისე დასრულდეს, რომ 3-4 წელიწადში აღარ დაიწყოს, - ამის შესახებ აშშ-ის სახელმწიფო მდივანმა, მარკო რუბიომ CBS Mornings-თან ინტერვიუში განაცხადა. მისი თქმით, კონფლიქტი უნდა დასრულდეს და ეს აშშ-ის პოლიტიკას წარმოადგენს. „გვსურს, რომ მის დასასრულებლად ყველაფერი გავაკეთოთ. ჩვენს ძალისხმევას გამოვიყენებთ, რათა ეს კონფლიქტი სტაბილურად დასრულდეს, რაც იმას ნიშნავს, რომ არ გვსურს კონფლიქტი დასრულდეს და შემდეგ ორ, სამ ან ოთხ წელიწადში განახლდეს. სტაბილურობის უზრუნველყოფა გვსურს", - განაცხადა რუბიომ. მისი თქმით, კონფლიქტი, რომელიც რუსეთმა დაიწყო ახლა ჩიხშია შესული და როგორც უკრაინისთვის, ისე რუსეთისთვის დამანგრეველია. "ყველა ბედნიერი უნდა იყოს, რომ დონალდ ტრამპი, რომელსაც მსოფლიოში მშვიდობის ხელშეწყობა და კონფლიქტების დასრულება სურს, აშშ-ის პრეზიდენტად აირჩიეს“, - აღნიშნა აშშ-ის სახელმწიფო მდივანმა. იპნ

საქართველოს ხელისუფლებამ საკუთარი მოქალაქეების წინააღმდეგ ძალადობა უნდა შეწყვიტოს, მათ ქართველებს საშუალება უნდა მისცენ, რომ თავიანთი სიტყვა ახალ და სამართლიან არჩევნებში გამოხატონ, - ამის შესახებ ევროპარლამენტარმა ტობიას კრამერმა (გერმანია) ევროპარლამენტში საქართველოს შესახებ გამართულ დებატებზე სიტყვით გამოსვლისას განაცხადა. „გასულ კვირას საქართველოს ყოფილ პრემიერ-მინისტრს, გიორგი გახარიას ხელისუფლების ბანდიტების ჯგუფი თავს სასტიკად დაესხა, მათ შორის „ქართული ოცნების“ ე.წ. დეპუტატი. გახარია სისხლდენით და ძვლების მოტეხილობით საავადმყოფოში გადაიყვანეს. სამწუხაროდ, ეს არ არის იზოლირებული შემთხვევა. ბოლო კვირებისა და თვეების განმავლობაში 400-ზე მეტი ქართველი, მათ შორის პოლიტიკოსი, ჟურნალისტი და რიგითი მოქალაქე დააკავეს და აწამეს. მათი დანაშაული კი უკვე 55-ე დღეა ევროპული მომავლის მოთხოვნით ქუჩაში გამოსვლაა. მე ხალხის გამბედაობა დეკემბერში ჩვენი ვიზიტისას ვნახე. ყველა ასაკის ადამიანი ქუჩაში ევროკავშირში მომავლისთვის და ევროპარლამენტში წარმოდგენისთვის გამოდის. ამას აკეთებენ მაშინ, როცა იციან რომ „ქართული ოცნების“ რეპრესიებისგან დაცული არავინ არ არის, მათ შორის არც ყოფილი პრემიერი და არც პრეზიდენტი“, - განაცხადა კრამერმა. კრამერის შეფასებით, „ქართული ოცნება“ პანიკაშია. „ქართველები თავს შეშინების უფლებას არ აძლევენ, რადგან ძალადობის ესკალაცია ძლიერების ნიშანი არ არის, არამედ იმის ნიშანია, რომ „ქართული ოცნება“ პანიკაშია. მათ ქართველი ხალხის ნება და ევროპული იდეის სიძლიერე სათანადოდ ვერ შეაფასეს. იფიქრეს, რომ არჩევნების გაყალბებას შეძლებდნენ, რუსული სამოქმედო გეგმით იმოქმედებდნენ, დაშინებით ძალაუფლებას გაიმყარებდნენ, მაგრამ მიხვდნენ, რომ ეს ეშმაკთან გარიგებაა. პუტინი პარტნიორებს არ ეძებს. ჯერ კიდევ არის დრო, რომ „ქართულმა ოცნებამ“ ეს კოშმარი დაასრულოს. ევროპისა და თავისუფლების კარი კვლავ ღია რჩება, მაგრამ ამისთვის საქართველოს ხელისუფლებამ საკუთარი მოქალაქეების წინააღმდეგ ძალადობა უნდა შეწყვიტოს. მათ ქართველებს საშუალება უნდა მისცენ, რომ თავიანთი სიტყვა ახალ და სამართლიან არჩევნებში გამოხატონ“, - აღნიშნა ევროპარლამენტარმა. იპნ

უსამართლოდ დაპატიმრებულები უნდა გაათავისუფლონ, ძალადობის აქტები უნდა გამოიძიოს და პასუხისმგებლობა უნდა იყოს სამართალდამცავებისთვის, რომლებიც ჩართული იყვნენ ამ უკანონო ქმედებებში, - ამის შესახებ შინაგან საქმეთა და მიგრაციის ევროკომისარმა, მაგნუს ბრუნერმა ევროპარლამენტის პლენარულ სხდომაზე განაცხადა. „50 დღეზე მეტია ქართველები ქვეყნის მასშტაბით ქუჩებში გამოდიან უპრეცედენტო პროტესტით, იბრძვიან თავიანთი ქვეყნის დემოკრატიული მომავლისთვის, რომელიც ევროპული ოჯახის წევრი იქნება, და იყენებენ ფუნდამენტურ უფლებებს, რომლებსაც ძალადობრივი რეპრესიებით, დაშინებითა და დაკავებებით დახვდნენ. საქართველოს მზარდი დემოკრატიული ვარდნა რეალურად ძალიან საგანგაშოა. ოფიციალურმა პირებმა ბოლო დროს რიგი კანონების შესწორებები აამოქმედეს, რომლებიც ფუნდამენტურ უფლებებს ზღუდავენ და ძირს უთხრიან დემოკრატიულ მმართველობას. ძალადობა და სიძულვილის ენა მშვიდობიანი დემონსტრანტების, პოლიტიკოსებისა და მედიის წარმომადგენლების წინააღმდეგ, საჯარო მოსამსახურეების პოლიტიკური მოტივებით გათავისუფლების შესახებ ცნობები, ისევე, როგორც სალომე ზურაბიშვილის წინააღმდეგ მუქარები სრულიად მიუღებელია. ბევრი დაკავებული პატიმრობაში რჩება და სისხლის სამართლით გასამართლება ემუქრებათ, თუმცა დღემდე სამართალდამცავი ორგანოების არცერთი წარმომადგენლის მიმართ ბრალდება წაყენებული არ არის პროტესტების ძალადობრივი დარბევებისა და დაკავებული დემონსტრანტების წამების სერიოზული ბრალდებების მიუხედავად, რაც საქართველოს ომბუდსმენმა გააჟღერა. მსგავსი ქმედებები არ შეესაბამება ევროკავშირის კანდიდატის სტატუსის მქონე ქვეყანას. ევროკავშირი სოლიდარობას უცხადებს ქართველ ხალხს და მოვუწოდებთ ოფიციალურ პირებს, სწრაფი ქმედება განახორციელონ, რათა დაძაბულობა განმუხტონ. უსამართლოდ დაპატიმრებულები უნდა გაათავისუფლონ, ძალადობის აქტები უნდა გამოიძიოს და ანგარიშვალდებულება უნდა იყოს სამართალდამცავებისთვის, რომლებიც ჩართული იყვნენ ამ უკანონო ქმედებებში“, - განაცხადა ბრუნერმა. იპნ

მოვუწოდებ ევროკავშირის ლიდერებს, წევრ სახელმწიფოებს და სხვა საერთაშორისო ორგანიზაციებს, თავი შეიკავონ ყველა ქმედებისგან, რაც მოახდენს თვითდანიშნული “ქართული ოცნების“ ხელისუფლების ლეგიტიმაციას, - ამის შესახებ ლიეტუველმა ევროპარლამენტარმა, რასა იუკნევიჩიანემ ევროპარლამენტში, საქართველოს საკითხზე მიმდინარე დებატებისას განაცხადა. „მამაცი ქართველები 50 დღეზე მეტია აპროტესტებენ თავიანთი ევროპული მომავლის მოპარვას მიუხედავად „ქართული ოცნების“ ხელისუფლების მხრიდან სისასტიკისა და ძალადობისა. სხვათა შორის, ქუჩაში გამოსული ადამიანები მათ „კრემლის ოცნების“ „რუსეთის ოცნების“ პარტიას ეძახის. მაშინ, როცა ქართველები იბრძვიან ევროპული გზისთვის, ჩვენი მოვალეობაა, ვიყოთ მკაფიო ჩვენს მხარდაჭერაში: პირველი - ქართველი ხალხის ერთადერთი ნამდვილი და ლეგიტიმური წარმომადგენელი და ერთადერთი აღიარებული თანამდებობის პირი არის სალომე ზურაბიშვილი, მეორე - „ქართული ოცნება“ და თვითგამოცხადებული ერთპარტიული პარლამენტი არ არის ლეგიტიმური ხელისუფლება, მოვუწოდებ ევროკავშირის ლიდერებს, წევრ სახელმწიფოებს და სხვა საერთაშორისო ორგანიზაციებს, თავი შეიკავონ ყველა ქმედებისგან, რაც მოახდენს თვითდანიშნული “ქართული ოცნების“ ხელისუფლების ლეგიტიმაციას“, - აღნიშნა ევროპარლამენტარმა. მისი თქმით, საქართველოში ძალადობა ხალხის, პოლიტიკური ოპოზიციის და სამოქალაქო საზოგადოების წინააღმდეგ ძლიერდება. „ოპოზიციის ერთ-ერთი ლიდერი, გიორგი გახარია სასტიკად სცემეს, თავს დაესხნენ თავისუფალ ჟურნალისტებს, მათ შორის მზია ამაღლობელი, რომელსაც ორთვიანი პატიმრობა მიუსაჯეს. ევროპამ ამას უნდა უპასუხოს პასუხისმგებელი პირების, განსაკუთრებით ბიძინა ივანიშვილის, წინააღმდეგ პერსონალური სანქციების დაწესებით. ერთადერთი გამოსავალი კრიზისიდან არის ახალი, დამოუკიდებელი, სამართლიანი არჩევნები, ყოველგვარი დაყოვნების გარეშე“, - აღნიშნა ევროპარლამენტარმა. იპნ

„რადიო თავისუფლების“ წამყვანმა „ტვ იმედის“ მფლობელს ირაკლი რუხაძეს ინტერვიუს დროს ჰკითხა ჰქონდა თუ არა მას ინფორმაცია აშშ-ის მომავალ გენერალურ პროკურორთან გაგზავნილი წერილის შესახებ, რომლითაც პამელა ბონდს სთხოვენ შეისწავლოს ირაკლი რუხაძის ბიზნესსაქმიანობა. წამყვანის, ნასტასია არაბულის თქმით, „რადიო თავიუსფლება“ წერილის შინაარსს ანონიმურობის პირობის დაცვით ავრცელებს. „მეორე წერილი ანონიმურობის პირობის დაცვით გვაქვს, 15 იანვრით არის დათარიღებული და გაგზავნილია აშშ-ის მომავალ გენერალურ პროკურორთან პამელა, იგივე პენ ბონდთან, ეს წერილი არის გაგზავნილი იმ დღეს როცა კონგრესში მისი მოსმენა იმართებოდა. წერილში, როემლიც ჩვენ გავქვს ნანახი, პამელა ბონდს სთხოვენ, რომ შესწავლოს თქვენი ბიზნესსაქმიანობა, როემლიც თაღლითურად არის მოხსენიებული, აქვე ნათქვამია, რომ თქვენ ხართ აშშ-ის მოქაალქე და ამის გათვალისწინებით გაცილებით მეტი პასუხისმგებლობა გეკისრებათ აშშ-ის ხაზინის მიერ დასანქცირებულ პირებთან ურთიერთობაში. იცოდით რომ ასეთი წერილი არსებობდა?“,- ჰკითხა ჟურნალისტმა რუხაძეს. პასუხად ირაკლი რუხაძე ამბობს, რომ წერილის შესახებ ინფორმაცია არ აქვს, მაგრამ თითქმის დარწმუნებულია ვინაა წერილის ავტორი, თუმცა მას არ დაასახელებს. როგორც ჟურნალისტი ამბობს, აღნიშნულ წერილში „ტვ იმედის“ შესახებ ნათქვამია, რომ ტელევიზია „რეგულარულად გადასცემს ივანიშვილის რეჟიმის პროპაგანდას ჩვენი ქვეყნის შურაცხმყოფელი თემებით და ადანაშაულებს შეერთებულ შტატებს მთელი მსოფლიოს პრობლემებში. ჟურნალისტმა რუხაძეს ჰკითხა ასახავს თუ არა ეს „იმედის“ საქმიანობას? „არ ასახავს“ – უპასუხა ირაკლი რუხაძემ და თქვა, რომ მას ძალიან უყვარს ამერიკა, ძალიან უყვარს ევროპა და მასზე „მეტად ვერავინ ვერ იხეირებს საქართველო, რომ ევროკავშირში შევიდეს.“ პუბლიკა

პარტია „გახარია საქართველოსთვის“ ინფორმაციით, გიორგი გახარიაზე სასტუმრო „შერატონში“ მომხდარ თავდასხმაზე გამოძიება პროკურატურას გადაეცა. მათივე ცნობით, „შერატონიდან“ ფაქტის ამსახველი ვიდეო-მასალა დღეს „სრულად, სერვერებიანად წაიღო პროკურატურამ. წაღებულია ვინჩესტერებიც და სასტუმროს ჩანაწერის ასლი აღარ აქვს“. როგორც პარტიის განცხადებაშია აღნიშნული, „ეს ყველაფერი მიუთითებს გამოძიების და “შერატონის”კოორდინირებულ ქმედებებზე, რომლის მიზანია მტკიცებულებების განადგურება“. „გიორგი გახარიაზე ორგანიზებული თავდასხმიდან ამ დრომდე “შერატონი ბათუმი” უარს აცხადებს ვიდეოკადრების გადმოცემაზე, რისი მიღების უფლებაც ჩვენ გვაქვს. “შერატონის” ხელმძღვანელობა გვარწმუნებდა, რომ ჩანაწერები არსებობს და ასლი აუცილებლად შეინახება მათთან მაშინაც კი, როცა გამოძიება განჩინებით ამოიღებს ჩანაწერებს. პარალელურად “შერატონ ბათუმის” მენეჯერი ოფიციალურ პასუხს არ გვიბრუნებს და ჩვენს წარმომადგენელს იურისტებთან კონსულტაციის „მიზეზით“ ისტუმრებს. გუშინ შინაგან საქმეთა სამინისტროს შევთავაზეთ გიორგი გახარიას გამოკითხვა. პასუხის დაბრუნებას ზუსტად 3 საათი დასჭირდა. 3 საათის თავზე გავიგეთ, რომ საქმე გამოსაძიებლად პროკურატურას გადაეცა. გუშინვე შედგა პროკურორთან კომუნიკაცია, რომელთანაც დაფიქსირდა დღეს გამოკითხვის მზაობა. ამის შემდგომ პროკურატურა მიუწვდომელი გახდა კომუნიკაციაში. რამდენიმე წუთის წინ “შერატონისგან” ვიგებთ, რომ ჩანაწერები განჩინებით სრულად, სერვერებიანად წაიღო პროკურატურამ. წაღებულია ვინჩესტერებიც და მათ ჩანაწერის ასლი აღარ აქვთ. ეს ყველაფერი მიუთითებს გამოძიების და “შერატონის”კოორდინირებულ ქმედებებზე, რომლის მიზანია მტკიცებულებების განადგურება. ჩვენს ხელთ არსებული ინფორმაციით, “შერატონი” აქტიურად იყო დანაშაულის თანამონაწილე. გარდა ამისა, ამით უდიდესი საფრთხის ქვეშ დგას სერვერებზე არსებული მომხმარებელთა პერსონალური ინფორმაცია“, - ნათქვამია პარტიის მიერ გავრცელებულ განცხადებაში. იპნ

პარლამენტის კვლევითი ცენტრის თანამშრომლების თქმით, დღეს დირექტორმა გამოუცხადა, რომ ცენტრი უქმდება და განმარტა, რომ გადაწყვეტილების საფუძველი 5 თანამშრომლის საჯარო აქტიურობა, კერძოდ, ევროინტეგრაციასთან და პროტესტის მონაწილეების მიმართ ძალადობის დაგმობასთან დაკავშირებით საჯარო სექტორში დასაქმებულთა ერთობლივ განცხადებაზე ხელმოწერაა. ამ თემაზე ცოტა ხნის წინ პარლამენტის შენობასთან ბრიფინგზე ისაუბრეს ცენტრის თანამშრომლებმა - ნინი ლეჟავამ, სალომე ნატროშვილმა და მარიამ ჩაჩუამ. მათი თქმით, აღნიშნული საჯარო სექტორში დასაქმებული თანამშრომლების მიმართ დაწყებული რეპრესიების მორიგი გამოვლინება და საჯარო სექტორში დასაქმებულ მოქმედ თანამშრომლებში შიშის დანერგვის მცდელობაა. ისინი აცხადებენ, რომ ბრძოლას გააგრძელებენ და გადაწყვეტილებას სასამართლოში გაასაჩივრებენ. "დღეს, 21 იანვარს, საქართველოს პარლამენტის კვლევითი ცენტრის დირექტორმა ამავე დაწესებულებაში დასაქმებულ პირებს გვაცნობა, რომ მიღებულია გადაწყვეტილება პარლამენტის კვლევითი ცენტრის ლიკვიდაციის შესახებ. მისი განმარტებით, აღნიშნული გადაწყვეტილება ეფუძნება ცენტრის 5 თანამშრომლის საჯარო აქტიურობას, რომლებმაც ხელი მოაწერეს საჯარო სექტორში დასაქმებულთა ერთობლივ განცხადებას საქართველოს ევროკავშირში გაწევრიანების მოლაპარაკებების საკითხის 2028 წლამდე დღის წესრიგში არ დაყენებასთან დაკავშირებით და მშვიდობიანი პროტესტის მონაწილეების მიმართ განხორციელებული ძალადობის დაგმობის შესახებ. ჩვენ, აღნიშნულ განცხადებაზე პარლამენტის კვლევითი ცენტრის თანამშრომლები და ხელმომწერი პირები მითითებულ ქმედებას ვაფასებთ, როგორც საჯარო სექტორში დასაქმებული კეთილსინდისიერი თანამშრომლების მიმართ დაწყებული რეპრესიების მორიგ გამოვლინებას და საჯარო სექტორში დასაქმებულ მოქმედ თანამშრომლებში შიშის დანერგვის მცდელობას. ჩვენ აღნიშნულს მივიჩნევთ სისტემის მხრიდან საჯარო დაწესებულებებში დასაქმებულთა მიმართ განსხვავებული მოსაზრებებისა და სხვა პოლიტიკური ნიშნით დევნისა და მარგინალიზაციის პროცესის დაწყების ღია აღიარებად. პარლამენტის კვლევითი ცენტრის ლიკვიდაციის გადაწყვეტილების საპასუხოდ, ჩვენ გამოვიყენებთ ქვეყანაში ჯერ კიდევ მოქმედი სამართლებრივი ჩარჩოს ფარგლებში არსებული სამართლებრივი დაცვის ყველა მექანიზმს და ვიბრძოლებთ საკუთარი და ჩვენი კოლეგების უფლებების დასაცავად. ჩვენ ვრჩებით საქართველოს კონსტიტუციის ერთგულნი, ვემსახურებით ჩვენს ქვეყანას და ჩვენს ხალხს", - თქვა ნინი ლეჟავამ. ფორმულა

პარლამენტთან მედიის წარმომადგენლებმა „ბათუმელების” დამფუძნებლისა და დირექტორის, მზია ამაღლობელის სოლიდარობის აქცია გამართეს. მოგვიანებით აქციის მონაწილეებმა უზენაესი სასამართლოსკენ გადაინაცვლეს. დღეს ცნობილი გახდა, რომ ქუთაისის სააპელაციო სასამართლომ წარმოებაში არ მიიღო საჩივარი მზია ამაღლობელისთვის წინასწარი პატიმრობის შეცვლის შესახებ. „ბათუმელების” დამფუძნებელს შეფარდებული აქვს წინასწარი პატიმრობა, ამასთან, გამოცხადებული აქვს შიმშილობა. გუშინ, 20 იანვარს „საიას“ თავმჯდომარემ, ნონა ქურდოვანიძემ განაცხადა, რომ თუ ქუთაისის სააპელაციო სასამართლო მზია ამაღლობელს აღკვეთის ღონისძიების სახით გამოყენებულ პატიმრობას არ შეუცვლის, მაშინ ადვოკატები სტრასბურგის სასამართლოს მიმართავენ. მზია ამაღლობელი ბათუმში აქციაზე 11 იანვარს დაწყებულ აქციაზე, უკვე 12 იანვარს დააკავეს. მას ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს. 2024 წლის 14 იანვარს ბათუმის საქალაქო სასამართლომ, მოსამართლემ ნინო სახელაშვილმა, პროკურატურის შუამდგომლობა გაიზიარა და მზია ამაღლობელი პატიმრობაში დატოვა. წინასასამართლო სხდომის თარიღად 4 მარტი, 11:00 საათი განისაზღვრა. 15 იანვარს მზია ამაღლობელმა სპეციალურ საგამოძიებო სამსახურს პოლიციის განყოფილების ეზოსა და განყოფილების შენობაში მის მიმართ არასათანადო მოპყრობის ფაქტებზე ინფორმაცია მიაწოდა. მისი თქმით, დაკავების შემდგომ ირაკლი დგებუაძე აყენებდა სიტყვიერ შეურაცხყოფას. უკვე პოლიციის განყოფილებაში კი რამდენჯერმე შეეცადა, მას ფიზიკურად გასწორებოდა, თუმცა პოლიციის სხვა თანამშრომლებმა შეძლეს მისი შეკავება და ოთახიდან გაყვანა. მზია ამაღლობელი აღნიშნავს, რომ ირაკლი დგებუაძე რამდენჯერმე შევიდა ოთახში და განაგრძობდა აგრესიულ მოპყრობას მის მიმართ. ერთ-ერთი შესვლისას კი მან მზია ამაღლობელს სახეში შეაფურთხა. მისივე ბრძანების შესაბამისად, ამაღლობელს გარკვეული დროის განმავლობაში არ ეძლეოდა წყლის დალევისა და საპირფარეშოთი სარგებლობის საშუალება. პუბლიკა

მსახიობი ანდრო ჭიჭინაძე პასუხობს “ქართული ოცნების” აღმსრულებელი მდივნის, მამუკა მდინარაძის შეთავაზებას თავდებობის შესახებ. ჭიჭინაძის წერილს მისი ადვოკატი, თორნიკე მიგინეიშვილი ავრცელებს. “მამუ, ძაან საყვარელი ხარ, მარა არ დაგავიწყდეს, რო უდანაშაულო ადამიანზე ლაპარაკობ”, – წერს ჭიჭინაძე. გუშინ, 20 იანვარს, მამუკა მდინარაძემ განაცხადა, რომ მზად არის, ანდრო ჭიჭინაძეს თავდებში ჩაუდგეს, ოღონდ იმ დათქმით, თუ “თუ ის გაითავისებს, რა ჩაიდინა, რაში იღებდა მონაწილეობას”. მდინარაძეს გუშინვე გამოეხმაურა ჭიჭინაძის დედა, ლიკა გუნცაძე. “მამუკა, ღმერთმა დაგვიფაროს, თქვენ, ბორენკას ბანდა ჩაუდგეს ანდროს თავდებში! ელოდეთ, ანდრო ბრალს რომ აღიარებს! ჩაგყვებით ბოლომდე!”, – დაწერა გუნცაძემ სოციალურ ქსელში. ნეტგაზეთი