tvati

პარტია „საქართველოსთვის“ წევრის, ბერდია სიჭინავას განცხადებით, მიხეილ სააკაშვილთან დაკავშირებით სტრასბურგის სასამართლოს გადაწყვეტილების შეფასების ირგვლივ, პოლიტიკურ სპეკულაციებთან დაკავშირებით საუბარი უნდა დასრულდეს. „ადამიანის უფლებათა ევროპული სასამართლოს გადაწყვეტილება მნიშვნელოვანია. ამ გადაწყვეტილებას პატივი უნდა სცენ როგორც სახელმწიფოს წარმომადგენლებმა, ისე მოსარჩელე მხარემ, შესაბამისად, ამ გადაწყვეტილების შეფასების ირგვლივ, პოლიტიკურ სპეკულაციებთან დაკავშირებით საუბარი ერთხელ და სამუდამოდ უნდა დასრულდეს. ეს არ არის პოლიტიკური საკითხი, ეს განხილული უნდა იქნას წმინდად სამართლებრივ და ჰუმანიტარულ ჭრილში. „ქართული ოცნების“, „ნაციონალური მოძრაობის“ მხრიდან სააკაშვილის ჯანმრთელობის თემით სპეკულაციები ერთხელ და სამუდამოდ უნდა დასრულდეს. ერთ შემთხვევაში ხელისუფლებამ უნდა დაასრულოს სპეკულაციები იმასთან დაკავშირებით, რომ ადამიანი სიმულირებს, საკანში გადაღებული კადრების გამოქვეყნება და მისი მადისკრედიტირებელი კამპანიის წარმოება, მეორე მხრივ, „ნაციონალურმა მოძრაობამ“ უნდა შეწყვიტოს საუბარი იმასთან დაკავშირებით, თითქოს ვიღაცას წამებით კლავენ ციხეში. ეს უნდა დაიცალოს პოლიტიკური შინაარსისგან და ადამიანის უფლებათა ევროპულ სასამართლოს უნდა მივცეთ შესაძლებლობა, ეს საკითხი განიხილოს ჰუმანიტარულ და სამართლებრივ ჭრილში. ამასთან დაკავშირებით კონკრეტული გადაწყვეტილებები პატივისცემას უნდა იმსახურებდეს“, – განაცხადა ბერდია სიჭინავამ. ორი დღის წინ ცნობილი გახდა, რომ სტრასბურგის სასამართლომ უარი უთხრა მიხეილ სააკაშვილს ვარშავაში გადაყვანაზე და სახელმწიფოს არ დაავალა ქვეყნის შიგნით მისი სხვა სამკურნალო დაწესებულებაში გადაყვანა. ავტორი - ლიზი ჩიმჩიური

17.00 საათზე თურქეთში საპარლამენტო და საპრეზიდენტო არჩევნებში კენჭისყრა დასრულდა და დაიწყო ხმების დათვლის პროცესი. როგორც სააგენტო Anadolu იუწყება, მედიას ეკრძალება კონკრეტული შედეგების გავრცელება 21:00 საათამდე. თურქეთში ეგზიტპოლები არ ტარდება. ამჟამინდელმა პრეზიდენტმა რეჯეპ თაიპ ერდოანმა ხმა სტამბოლის ერთ-ერთ რაიონში მისცა, შემდეგ კი ანკარაში გაემგზავრა. მისმა მთავარმა ოპონენტმა, საერთო ოპოზიციის კანდიდატმა ქემალ ქილიჩდაროღლუმ და პრეზიდენტობის მესამე კანდიდატმა სინან ოჰანმა ანკარაში მისცეს ხმა. 74 წლის ქემალ ქილიჩდაროღლუ, რომელმაც პირობა დადო, რომ გამოასწორებს თურქეთის მოშლილ ეკონომიკას და აღადგენს დემოკრატიულ ინსტიტუტებს, რომლებიც ერდოანის ავტორიტარული მმართველობის პერიოდში გაქრნენ. გამარჯვებისთვის საპრეზიდენტო კანდიდატს ხმათა 50%-ზე მეტი უნდა ჰქონდეს მოგროვილი - წინააღმდეგ შემთხვევაში, თურქეთს არჩევნების მეორე ტური ელის. საპრეზიდენტო არჩევნების პარალელურად თურქეტში დღეს ჩატარდა საპარლამენტო არჩევნებიც - ქვეყანაში დღეს მოქმედებს პროპორციული სისტემა. პარლამენტში მოსახვედრად პარტიებმა უნდა მიიღონ ხმების არანაკლებ 7 პროცენტი ან დამოუკიდებლად ან სხვა პარტიებთან ალიანსში. საპარლამენტო არჩევნებში სულ 24 პოლიტიკური პარტია და 151 დამოუკიდებელი კანდიდატი მონაწილეობს. პარტიების ნაწილი არჩევნებში კოალიციებით არის წარმოდგენილი. radio tavisupleba

რუსეთის საოკუპაციო ძალების წარმომადგენლებმა, გორის მუნიციპალიტეტის სოფელ ნიქოზის მიმდებარედ, ოკუპირებულ ტერიტორიაზე უკანონოდ დააკავეს საქართველოს მოქალაქე. ამის შესახებ ინფორმაციას საქართველოს უსაფრთხოების სამსახური ავრცელებს. სუს-ი განმარტავს, რომ აღნიშნული ინციდენტის შესახებ ინფორმაციის მიღებისთანავე, სახელმწიფო უსაფრთხოების სამსახურის მიერ გააქტიურდა ევროკავშირის სადამკვირვებლო მისიის მიერ ოპერირებული ცხელი ხაზი და ინციდენტის შესახებ დაუყოვნებლივ ეცნობა საერთაშორისო პარტნიორებსა და ჟენევის საერთაშორისო დისკუსიების თანათავმჯდომარეებს. „ამოქმედებულია ყველა არსებული მექანიზმი უკანონოდ დაკავებული საქართველოს მოქალაქის უმოკლეს ვადებში გასათავისუფლებლად. საქართველოს ოკუპირებულ ტერიტორიებზე, ისევე როგორც საოკუპაციო ხაზის გასწვრივ ჩადენილ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას”, - ნათქვამია სუს-ის ინფორმაციაში.

თბილისში, ართვინის ქუჩაზე კედლის მოწყობის სამუშაოების დროს ფერდობის მასა ჩამოიშალა, რა დროსაც სამუშაოების შემსრულებელი კომპანიის ორი თანამშრომელი დაიღუპა. როგორც „ინტერპრესნიუსს“ თბილისის მერიაში განუცხადეს, ართვინის ქუჩა N67-ში, ჩუღურეთის რაიონის გამგეობის დაკვეთით, კომპანია “ოუ ნი” გრუნტის დამჭერი კედლის მოწყობის სამუშაოებს ასრულებდა, რა დროსაც ავარიული ფერდობის მასა ჩამოიშალა და მოიყოლა კომპანიის ორი თანამშრომელი. „მომხდარ ფაქტზე დაწყებულია გამოძიება, რომელიც დაადგენს, რამ გამოიწვია ფერდის ჩამოშლა”, - განაცხადეს მერიაში. არსებული ინფორმაციით, შემთხვევა რამდენიმე საათის წინ მოხდა. ipn

წარმოდგენილია სასამართლო რეფორმასთან, საკანონმდებლო ცვლილებებთან დაკავშირებით ვენეციის კომისიის რეკომენდაციები, ჩვენ გულდასმით გავეცანით ამ რეკომენდაციებს, - ამის შესახებ პარტია „ქართული ოცნების“ თავმჯდომარემ, ირაკლი კობახიძემ, სასამართლო რეფორმაზე დასმული კითხვის პასუხად განაცხადა. მმართველი პარტიის ლიდერის თქმით, სასამართლო რეფორმასთან დაკავშირებით, ვენეციის კომისიის დასკვნის მიხედვით გადაისინჯება პარლამენტში ინიცირებული კანონპროექტი და საბოლოო რედაქცია რეკომენდაციების გათვალისწინებით ჩამოყალიბდება. კობახიძის თქმით, საქართველო ევროკომისიის რეკომენდაციებს „პირნათლად ასრულებს“. „ჩვენ პირნათლად ვასრულებთ 12 პუნქტს. ზედმიწევნით გავყვებით იმ რეკომენდაციებს, რომლებიც არის წარმოდგენილი. შესაბამისად, გადაისინჯება ის დოკუმენტი, რომელიც ინიცირებულია და სწორედ ამ მსჯელობის საფუძველზე ჩამოყალიბდება საბოლოო რედაქცია, რომელსაც დაამტკიცებს საქართველოს პარლამენტი. სასამართლოს ნაწილშიც 12-დან ერთ-ერთი პუნქტი იქნება სათანადოდ შესრულებული“, - განაცხადა ირაკლი კობახიძემ. ipn

რუსეთის თავდაცვის სამინისტრო ადასტურებს, რომ ბახმუტთან, საბრძოლო მოქმედებებისას ორი რუსი პოლკოვნიკი დაიღუპა.­ როგორც მედია შოიგუს უწყებაზე დაყრდნობით წერს, დაიღუპნენ რუსეთის არმიის მე-4 მოტორიზებული მსროლელი ბრიგადის მეთაური, პოლკოვნიკი ვიაჩესლავ მაკაროვი და სამხედრო-პოლიტიკური მუშაობისთვის საარმიო კორპუსის მეთაურის მოადგილე, პოლკოვნიკი ევგენი ბროვკო. ipn

უკრაინის პრეზიდენტის, ვოლოდიმირ ზელენსკის განცხადებით, მან გერმანელ კოლეგასთან, ფრანკ-ვალტერ შტაინმაიერთან არსებული ვითარება და გერმანიასა და უკრაინას შორის ინტენსიური თანამშრომლობა განიხილა. ამის შესახებ ზელენსკიმ “ტელეგრამის” საკუთარ არხზე დაწერა. “გერმანია გააგრძელებს უკრაინის პოლიტიკურ, სამხედრო და ფინანსურ მხარდაჭერას მანამ, სანამ ეს საჭირო იქნება”, - აღნიშნა ზელენსკიმ. ამასთან, უკრაინის ლიდერმა გერმანიას, რუსეთის აგრესიის პირობებში, დიდი სამხედრო, ეკონომიკური და ფინანსური მხარდაჭერისთვის მადლობა გადაუხადა. შეგახსენებთ, გერმანიაში ეს ვოლოდიმირ ზელენსკის პირველი ვიზიტია მის ქვეყანაში რუსეთის სრულმასშტაბიანი აგრესიის დაწყების შემდეგ. ინტერპრესნიუსი

თბილისში, პოლიკარპე კაკაბაძის N25-ში კლდის მასა ჩამოიშალა, რის შედეგადაც მსუბუქად დაზიანდა ორი ავტომობილი. ამის შესახებ „ინტერპრესნიუსს“ თბილისის მერიაში განუცხადეს. მათივე ინფორმაციით, ამ ეტაპზე, საავტომობილო გზა ჩახერგილი არ არის და ტერიტორიაზე, შესაბამისი სამსახურების მიერ, გაწმენდითი სამუშაოები მიმდინარეობს. IPN

გიორგი გახარიამ ტალინში, ლენარტ მერის უსაფრთხოების საერთაშორისო კონფერენციაში მიიღო მონაწილეობა, - ამის შესახებ ინფორმაციას პარტია "საქართველოსთვის" თავმჯდომარე გიორგი გახარია სოციალურ ქსელში, საკუთარ ფეისბუქ გვერდზე ავრცელებს. როგორც ინფორმაციაშია აღნიშნული, გიორგი გახარია დახურულ პანელზე სიტყვით გამოვიდა, რომელიც ევროკავშირის გაფართოებას უკავშირდებოდა. "გახარიამ ხაზი გაუსვა საქართველოს გამოწვევებზე ევროინტეგრაციის გზაზე, ჩვენი ქვეყნის ინტეგრაციის აუცილებლობაზე უკრაინასთან და მოლდოვასთან ერთად.", - ვკითხულობთ სოციალური ქსელით გავრცელებულ ინფორმაციაში.

„საერთო სასამართლოების შესახებ“ ორგანულ კანონში დაგეგმილი ცვლილებების პროექტს, რომელიც სასამართლო რეფორმის სამუშაო ჯგუფმა ევროკავშირის 12 რეკომენდაციის ფარგლებში მოამზადა, 15 მაისის სხდომაზე იურიდიულ საკითხთა კომიტეტი განიხილავს. გასული წლის ნოემბერში ინიცირებული საკანონმდებლო ცვლილებები განსახილველად პირველი მოსმენით გადის. კანონის პროექტით "საერთო სასამართლოების შესახებ" ორგანულ კანონში გათვალისწინებულია შემდეგი საკითხები: დგინდება ღია სასამართლო სხდომის შედეგად მიღებული სასამართლო აქტის, დაშტრიხვის გარეშე, ნებისმიერი დაინტერესებული პირისთვის საჯარო ინფორმაციის სახით გაცემის წესი. უზენაესი სასამართლოს მოსამართლის თანამდებობაზე ასარჩევად პარლამენტისთვის წარსადგენი კანდიდატების შერჩევის პროცესში მიღებული იუსტიციის უმაღლესი საბჭოს განკარგულებისა და საბჭოს წარდგინების გასაჩივრების საკითხთან დაკავშირებით შემდეგი შეზღუდვა დგინდება: - თუ საჩივრის განხილვის შედეგად უზენაესი სასამართლოს საკვალიფიკაციო პალატამ დაადგინა, რომ კანდიდატების შერჩევის პროცესში იუსტიციის უმაღლესი საბჭოს წევრი მიკერძოებული იყო, მისი მიდგომა დისკრიმინაციული იყო ან მან კანონმდებლობით მისთვის მინიჭებულ უფლებამოსილებას გადაამეტა, რის შედეგადაც კანდიდატის უფლებები დაირღვა ან საფრთხე სასამართლოს დამოუკიდებლობას შეექმნა, იუსტიციის უმაღლესი საბჭოს ეს წევრი საბჭოს მიერ ხელახალი განკარგულების/ხელახალი წარდგინების მიღების პროცესში აღარ მონაწილეობს. იცვლება რაიონული ან სააპელაციო სასამართლოს მოსამართლის ვაკანტურ თანამდებობაზე პირის განწესების წესი. კერძოდ, დგინდება, რომ იუსტიციის უმაღლესი საბჭო რაიონული ან სააპელაციო სასამართლოს მოსამართლის ვაკანტურ თანამდებობაზე მოსამართლეს დანიშნავს უზენაესი სასამართლოს მოსამართლის თანამდებობაზე ასარჩევად პარლამენტისთვის წარსადგენი კანდიდატის შერჩევისათვის დადგენილი წესით. იუსტიციის უმაღლესი საბჭოს მოსამართლე წევრის არჩევის პროცედურაში მონაწილე საბჭოს წევრობის კანდიდატი უფლებამოსილი იქნება, კენჭისყრამდე მიმართოს მოსამართლეთა კონფერენციას და წარუდგინოს საკუთარი ხედვა და მოსაზრება მისი იუსტიციის უმაღლესი საბჭოს წევრად არჩევის შემთხვევაში მის მიერ საბჭოს წევრის უფლებამოსილებების განხორციელებასთან დაკავშირებულ საკითხებზე. აღნიშნული ინიციატივები განიხილა და მხარი დაუჭირა პარლამენტის ადამიანის უფლებათა დაცვისა და საპროცედურო საკითხთა კომიტეტებმა. IPN

14-15 მაისს, საქართველოს ვიზიტით დანიის სამეფოს საგარეო საქმეთა მინისტრი ლარს ლიოკე რასმუსენი ეწვევა. ამის შესახებ ინფორმაციას საგარეო საქმეთა სამინისტრო ავრცელებს. უწყების ცნობით, დანიელ კოლეგას საქართველოს საგარეო საქმეთა მინისტრი ილია დარჩიაშვილი უმასპინძლებს. შეხვედრები როგორც პირისპირ ფორმატში, ასევე ორი ქვეყნის დელეგაციებს შორის გაიმართება. ინფორმაციაში აღნიშნულია, რომ ვიზიტის ფარგლებში, დანიის სამეფოს საგარეო საქმეთა მინისტრთან შეხვედრას საქართველოს პრემიერ-მინისტრი ირაკლი ღარიბაშვილი გამართავს. „ლარს ლიოკე რასმუსენს თან ახლავს დანიის ბიზნეს დელეგაცია, გაიმართება მინისტრის და ბიზნეს დელეგაციის შეხვედრა საქართველოს ვიცე-პრემიერთან, ეკონომიკისა და მდგრადი განვითარების მინისტრთან ლევან დავითაშვილთან. აღსანიშნავია, რომ ვიზიტის ფარგლებში დანიის საგარეო საქმეთა მინისტრი ქართველ კოლეგასთან, ილია დარჩიაშვილთან ერთად, ოფიციალურად გახსნის საქართველოში დანიის საელჩოს. ლარს ლიოკე რასმუსენი საოკუპაციო ხაზს ეწვევა და ადგილზე გაეცნობა არსებულ ვითარებას“, - აღნიშნულია ინფორმაციაში.

უკრაინის პრეზიდენტი ვოლოდიმირ ზელენსკი ბერლინში ჩავიდა, სადაც ის თავის გერმანელ კოლეგას, ფრანკ ვალტერ შტაინმაიერს შეხვდა, მოგვიანებით კი კანცლერ ოლაფ შოლცსაც შეხვდება. ეს ზელენსკის პირველი ვიზიტია გერმანიაში ომის დაწყების შემდეგ. გუშინ კი უკრაინის ლიდერი იტალიაში იმყოფებოდა, სადაც ქვეყნის პრეზიდენტსა და რომის პაპთან აუდიენცია გამართა. მოგვიანებით ზელენსკიმ აღნიშნა, რომ კონტრიერიში, რომლის შესახებაც ბოლო პერიოდში სულ უფრო ხშირად საუბრობენ, მალე დაიწყება. ავტორი - სალომე თორაძე

სტრასბურგის სასამართლომ დაადასტურა, რომ საქართველოს ხელისუფლება მოქმედებს სტანდარტების შესაბამისად, ის იცავს ადამიანის უფლებებს, მიუხედავად იმისა, თუ რამდენად მძიმე დანაშაული შეიძლება ჰქონდეს ჩადენილი კონკრეტულ პატიმარს, – ამის შესახებ საქართველოს პირველ არხს პარტია „ქართული ოცნების“ თავმჯდომარემ, ირაკლი კობახიძემ განაცხადა. როგორც ირაკლი კობახიძემ აღნიშნა, სტრასბურგის სასამართლომ ცივი წყალი გადაასხა წელიწადნახევრიან კამპანიას. „გახსოვთ, რომ წელიწად-ნახევრის განმავლობაში მიხეილ სააკაშვილის მხარდამჭერები – და არა მარტო შიდა მხარდამჭერები, ეს იყო ევროპარლამენტის რეზოლუციებში ასახული, სახალხო დამცველი მონაწილეობდა ამ კამპანიაში, ისინი ამტკიცებდნენ, რომ მიხეილ სააკაშვილი ყოველდღე იყო სიკვდილის პირას, ეს იყო მათი გზავნილი – ისინი ითხოვდნენ მიხეილ სააკაშვილის გათავისუფლებას, სხვა ქვეყანაში გადაყვანას, ეს იყო წმინდა წყლის პოლიტიკური კამპანია, რომელსაც ჰქონდა კონკრეტული პოლიტიკური მიზნები. სტრასბურგის სასამართლომ დაადასტურა, რომ საქართველოს ხელისუფლება მოქმედებს სტანდარტების შესაბამისად, ის იცავს ადამიანის უფლებებს, მიუხედავად იმისა, თუ რამდენად მძიმე დანაშაული შეიძლება ჰქონდეს ჩადენილი კონკრეტულ პატიმარს. ეს დაადასტურა სტრასბურგის სასამართლომ, შესაბამისად, ყოველგვარ სპეკულაციებს – მოწამვლას, აბსოლუტურად აბსურდულ ბრალდებებს, სტრასბურგის სასამართლომ გასცა სათანადო და ძალიან მკაფიო პასუხი“, – განაცხადა კობახიძემ. მისივე თქმით, რადიკალების აგრესია სტრასბურგის სასამართლოს მიმართ გასაგებია, თავის დროზე მათ აქვთ წაგებული უამრავი საქმე, ეს პროცესები კიდევ გრძელდება. „მათ წააგეს უამრავი საქმე მათი ხელისუფლების წინააღმდეგ სტრასბურგის სასამართლოში, ეს საქმეები ეხებოდა ადამიანების წამებას, არაადამიანურ მოპყრობას და ა.შ. მათ ვერ მოიგეს ვერცერთი მათთვის სასარგებლო საქმე. აქედან გამომდინარე, მათი აგრესია სტრასბურგის სასამართლოს მიმართ ბუნებრივია, თუმცა ვხედავთ, რომ სტრასბურგის სასამართლო მოქმედებს სწორედ ადამიანის უფლებების დაცვის სტანდარტების შესაბამისად. აქედან გამომდინარე, ვერცერთ საქმეში ვერ იქნებოდნენ „ნაცმოძრაობის“ წარმომადგენლები წარმატებული ამ სასამართლო ინსტანციაში“, – განაცხადა კობახიძემ. მისივე თქმით, სტრასბურგის სასამართლოს გადაწყვეტილების შემდეგ, წესით, ბოდიში აქვთ მოსახდელი შესაბამის ევროპარლამენტარებს, რომლებმაც სამ რეზოლუციას დაუჭირეს მხარი, ყოფილ სახალხო დამცველს, სხვადასხვა ოპოზიციურ პარტიას და ა.შ. „მათ ბოდიში აქვთ მოსახდელი, თუმცა ჩვენ მაინც და მაინც მათგან ბოდიშს არ ველოდებით, იქიდან გამომდინარე, რომ ეს მაშინაც იყო მათი პოლიტიკური არჩევანი და დღესაც ისინი მოქმედებენ პოლიტიკური ინტერესების შესაბამისად. ისინი რომ იყვნენ ობიექტური დამკვირვებლები, ბოდიშს მოიხდიდნენ, თუმცა ამის მოლოდინი, სამწუხაროდ, არ გვაქვს“, – განაცხადა კობახიძემ. გუშინ ცნობილი გახდა, რომ სტრასბურგის სასამართლომ უარი უთხრა მიხეილ სააკაშვილს ვარშავაში გადაყვანაზე და სახელმწიფოს არ დაავალა ქვეყნის შიგნით მისი სხვა სამკურნალო დაწესებულებაში გადაყვანა. ავტორი - თეონა მაჭარაშვილი

ქართველი ხმლით მოფარიკავე სანდრო ბაზაძე მადრიდის მსოფლიო თასის გამარჯვებული გახდა. მან ყველა მეტოქე დამაჯერებლად დაამარცხა. ნახევარფინალში სანდრომ ფრანგი მაქსიმ პიანფეტი 15:11 დაამარცხა, ფინალში კი იტალიელ რიკარდო ნუჩიოს 15:6 სძლია. სანდრო ბაზაძე 2022 წლის მადრიდის მსოფლიო თასიდან დღემდე ზედიზედ მე-11 ტურნირზე (მსოფლიო ჩემპიონატი, ევროპის ჩემპიონატი, გრან პრი, მსოფლიო თასი) საუკეთესო სამეულშია. ავტორი - ელენე ბილიხოძე

საქართველოს საპარლამენტო დელეგაცია სტოკჰოლმში ევროკავშირის წევრი ქვეყნების პარლამენტების ევროპის საკითხთა კომიტეტების შეხვედრაში მიიღებს მონაწილეობას. საქართველოს პარლამენტის ევროპასთან ინტეგრაციის კომიტეტის თავმჯდომარის, მაკა ბოჭორიშვილის განცხადებით, შეხვედრაზე, რომელშიც მონაწილეობას მიიღებენ საპარლამენტო დელეგაციები ევროკავშირის წევრი ყველა ქვეყნიდან, საქართველო ევროკავშირის თავმჯდომარე ქვეყნის მიწვევით მიიღებს მონაწილეობას. „შესაბამისად, შესაძლებლობა გვექნება, ჩვენს კოლეგებს ვესაუბროთ საქართველო-ევროკავშირის ურთიერთობებზე, საქართველოს მიერ ევროკავშირის რეკომენდაციების შესრულების პროგრესზე და ასევე ევროკავშირის ერთიან სივრცეში საქართველოს ინტეგრაციის მნიშვნელოვან საკითხებზე, რომლებზეც იმსჯელებენ ჩვენი კოლეგები ევროკავშირის წევრი ქვეყნებიდან. შესაძლებლობა გვექნება, მონაწილეობა მივიღოთ სხვადასხვა სესიის ფარგლებში დებატებში და სხდომის ბოლოს შემუშავდება ერთობლივი დოკუმენტი, რომელშიც ასახული იქნება საქართველოს მხარდამჭერი გზავნილები, კონკრეტულად ევროკავშირის კანდიდატი ქვეყნის სტატუსის მინიჭებასთან დაკავშირებით“, – განაცხადა მაკა ბოჭორიშვილმა.

თურქეთში დღეს საპრეზიდენტო და საპარლამენტო არჩევნები იმართება. თურქეთის მოქალაქეებს საპრეზიდენტო არჩევნებში სამ კანდიდატს შორის მოუწევთ არჩევანის გაკეთება; ესენი არიან: ქვეყნის მოქმედი პრეზიდენტი რეჯეფ თაიფ ერდოღანი, ოპოზიციის ერთიანი კანდიდატი ქემალ ქილიჩდაროღლუ და ასევე – სინან ოგანი. კიდევ ერთმა კანდიდატმა, მუჰარემ ინჯემ საკუთარი კანდიდატურა არჩევნებამდე რამდენიმე დღით ადრე მოხსნა. საპარლამენტო არჩევნებში სულ 24 პოლიტიკური პარტია და 151 დამოუკიდებელი კანდიდატი მონაწილეობს. პარტიების ნაწილი არჩევნებში კოალიციებით არის წარმოდგენილი. საარჩევნო უბნები ადგილობრივი დროით დილის 08:00 საათზე გაიხსნება და საღამოს, 17:00 საათზე დაიხურება. არჩევნებში მონაწილეობის უფლება სულ 64.1 მილიონ მოქალაქეს ექნება. ხუთ მილიონამდე ამომრჩეველი პირველად მისცემს ხმას. საარჩევნო უბნებზე ამომრჩევლებს ვიდეოს გადაღება აკრძალული ექნებათ. შესაბამისად, უბანზე მობილური ტელეფონებით ან კამერებით შესვლა დაუშვებელია. ამომრჩევლები საკუთარ არჩევანს ორ სხვადასხვა ბიულეტენზე დააფიქსირებენ და ერთ კონვერტში მოათავსებენ. პირველ რიგში დაითვლება საპრეზიდენტო არჩევნების შედეგები. თურქეთის უმაღლესმა საარჩევნო საბჭომ 6 თებერვლის დამანგრეველი მიწისძვრით დაზარალებულ რაიონებში სპეციალური საარჩევნო უბნები კონტეინერებში გახსნა. ამასთან, არჩევნების დღეს აკრძალული იქნება ალკოჰოლის გაყიდვა, დახურული იქნება გასართობი დაწესებულებები. მედიასაშუალებებში ადგილობრივი დროით საღამოს 18:00 საათზე დაუშვებელი იქნება საარჩევნო შედეგებთან დაკავშირებით პროგნოზების გაკეთება. არჩევნების შედეგების შესახებ ინფორმაციას მხოლოდ ქვეყნის უმაღლესი საარჩევნო საბჭო გაავრცელებს. მათი გასაჯაროება ადგილობრივი დროით საღამოს 21:00 საათზე მოხდება. ავტორი - ლევან ახალაია

სპეციალური საგამოძიებო სამსახური შინაგან საქმეთა სამინისტროს უმცროსი დეტექტივის მიერ სამსახურებრივი უფლებამოსილების შესაძლო გადამეტების შედეგად მოქალაქის დაზიანების ფაქტთან დაკავშირებით მიმდინარე გამოძიების შესახებ განცხადებას ავრცელებს. „გვსურს, საზოგადოებას მივაწოდოთ ინფორმაცია ტელეკომპანია „TV პირველის“ მიერ მომზადებულ სიუჟეტთან დაკავშირებით, რომელიც საქართველოს შინაგან საქმეთა სამინისტროს უმცროსი დეტექტივის შ.მ.-ს მიერ მოქალაქე გ.გ.-ს დაზიანების ფაქტს ეხებოდა. აღნიშნულ საქმეზე „TV პირველის“ ჟურნალისტმა, მარიამ გაფრინდაშვილმა სპეციალურ საგამოძიებო სამსახურს ხუთშაბათს 14 შეკითხვით წერილობით მიმართა, რასთან დაკავშირებითაც უწყებამ მას ასევე წერილობით ამომწურავი პასუხები გასცა. თუმცა, უწყების მიერ სისხლის სამართლის საქმეზე გაცემული დეტალური ინფორმაცია ჟურნალისტმა არ გააჟღერა, რაც მიანიშნებს, რომ სიუჟეტის მიზანი სპეციალური საგამოძიებო სამსახურის დისკრედიტაცია და საზოგადოების შეცდომაში შეყვანა იყო. გვსურს, განვმარტოთ, რომ სპეციალურმა საგამოძიებო სამსახურმა საქართველოს შინაგან საქმეთა სამინისტროს უმცროსი დეტექტივის მიერ სამსახურებრივი უფლებამოსილების შესაძლო გადამეტების შედეგად მოქალაქე გ.გ.-ს დაზიანების ფაქტზე გამოძიება 2023 წლის 31 მარტს დაიწყო. ამ დროისთვის გამოძიების ხელთ არსებული მასალებით დგინდება, რომ 2023 წლის 31 მარტს, ღამის საათებში უმცროსი დეტექტივი, მეწყვილესთან ერთად, სამსახურებრივ მოვალეობას ასრულებდა და ქ. თბილისში, ვაჟა-ფშაველას N75ა-ს მიმდებარე ტერიტორიაზე იმყოფებოდა, რა დროსაც ქუჩაზე, პოლიციელების სიახლოვეს იარაღის მაგვარი საგნის დემონსტრირებით მოქალაქე გ.გ.-მ ჩაიარა, რის შემდეგაც მას პოლიციის თანამშრომლები დაედევნნენ. დევნის პროცესში უმცროსი დეტექტივის მიერ იარაღიდან ორი გასროლა განხორციელდა, რის შედეგადაც გ.გ.-მ დაზიანება ფეხის არეში მიიღო. იმავე დღეს მოქალაქეს პირველადი სამედიცინო დახმარება გაეწია და გაწერილი იქნა კლინიკიდან. სპეციალური საგამოძიებო სამსახურის მიერ საქმეზე ტარდება ყველა აუცილებელი საგამოძიებო მოქმედება. მოწმის სახით გამოიკითხნენ ინციდენტში მონაწილე პოლიციელები და შემთხვევის ადგილის სიახლოვეს მყოფი პირები. რაც შეეხება პოტენციურ დაზარალებულს, გამოძიების პირველივე დღეებიდან მოქალაქე გ.გ.-მ, რომელმაც მომხდარი ინციდენტის შედეგად ფეხის არეში მიიღო დაზიანება და რომლის მიერ მოწოდებულ ობიექტურ ინფორმაციასაც დიდი მნიშვნელობა აქვს გამოძიების მიმდინარეობასა და შედეგებზე, უარი განაცხადა გამოძიებასთან თანამშრომლობასა და საგამოძიებო ორგანოში გამოცხადებაზე. საგამოძიებო სამსახურის არაერთი მცდელობის შემდეგ, გ.გ. გამოიკითხა გამომძიებლის მიერ, რომელმაც განმარტა, რომ პოლიციის თანამშრომლების მიმართ პრეტენზია არ გააჩნია, პოლიციის თანამშრომლის მიერ გასროლის შედეგად დაზიანება არ მიუღია და თავს დაზარალებულად არ მიიჩნევს“, – აღნიშნულია საგამოძიებო სამსახურის განცხადებაში. უწყების ცნობით, შემთხვევის ადგილზე მდებარე კერძო ობიექტიდან გამოთხოვილი იქნა მომხდარი ფაქტის ამსახველი ერთადერთი ვიდეოჩანაწერი, რომელიც არსებული ფორმითა და ხარისხით სრულყოფილად ვერ ასახავს შემთხვევის ადგილზე განვითარებულ მოვლენებს. „აქედან გამომდინარე, ვიდეოჩანაწერის გაწმენდისა და მისი ხილვადობის გაუმჯობესების მიზნით, გამოძიების მიერ დანიშნულ იქნა ჰაბიტოსკოპიური ექსპერტიზა. გამოძიების მიერ ამოღებულ, ასევე შემთხვევის ადგილზე აღმოჩენილ კვლევის ნიმუშებთან დაკავშირებით, გამოძიებისთვის საინტერესო შეკითხვებზე პასუხის გასაცემად ექვსი ექსპერტიზაა დანიშნული. კერძოდ, სსიპ „ლევან სამხარაულის სახელობის სასამართლო ექსპერტიზის ეროვნულ ბიუროში“ დანიშნულია სასამართლო-სამედიცინო, ბალისტიკური, ტრასოლოგიური, დაქტილოსკოპური, ქიმიური და ბიოლოგიური ექსპერტიზები. ამ დროისთვის გამოძიებას არცერთი ექსპერტიზის პასუხი არ მიუღია. იმისთვის, რომ გამოძიების წინაშე არსებულ ყველა შეკითხვას გაეცეს ამომწურავი პასუხი, გამოძიებამ მოახერხოს და საქმეზე წარმოადგინოს ობიექტური სურათი და მიღებულ იქნას შესაბამისი სამართლებრივი გადაწყვეტილებები, მნიშვნელოვანია ზემოხსენებული ექსპერტიზის დასკვნების მიღება, განსაკუთრებით იმ პირობებში, როდესაც პოტენციური დაზარალებული არ თანამშრომლობს გამოძიებასთან და არ სურს საქმეზე ინფორმაციის მოწოდება. მიუხედავად იმისა, რომ სპეციალურმა საგამოძიებო სამსახურმა ჟურნალისტს მიმდინარე გამოძიების თაობაზე დეტალური ინფორმაცია მიაწოდა და განუმარტა, რომ საქმეზე გადაწყვეტილების მისაღებად აუცილებელი საგამოძიებო მოქმედებები არ ამოწურულა და მიმდინარე ექვსი ექსპერტიზიდან არცერთი ექსპერტიზა დასრულებული არ არის, აღნიშნულმა ტელევიზიამ უწყება მიზანმიმართულად საქმის არაჯეროვან გამოძიებასა და გადაწყვეტილების შეგნებულად დაყოვნებაში დაადანაშაულა, რაც კიდევ ერთხელ მიანიშნებს ჟურნალისტის მცდელობაზე „დანაშაულის დაფარვის“ ცრუ ვერსიებზე საუბრით და არასწორი ინფორმაციების გავრცელებით მოახდინოს საგამოძიებო უწყების დისკრედიტაცია. საზოგადოებას განვუმარტავთ, რომ სპეციალური საგამოძიებო სამსახური ყველა სისხლის სამართლის საქმეზე საგამოძიებო და საპროცესო მოქმედებებს შემჭიდროებულ ვადებში ატარებს, რის შემდეგაც მიიღება კანონით გათვალისწინებული ზომები“, – ნათქვამია სპეციალური საგამოძიებო სამსახურის განცხადებაში.

შინაგან საქმეთა სამინისტროს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს ტრეფიკინგის და უკანონო მიგრაციის წინააღმდეგ ბრძოლის სამმართველოს თანამშრომლებმა, გენერალურ პროკურატურასთან ერთად საქმეზე ჩატარებული ოპერატიული და საგამოძიებო მოქმედებების შედეგად 4ოთხი პირი დააკავეს. 2001 წელს დაბადებული დ.ფ., 1971 წელს დაბადებული გ.ფ., 1998 წელს დაბადებული ნ.გ. და პირობითი მსჯავრის ქვეშ მყოფი 2000 წელს დაბადებული მ.კ. არასრულწლოვნით ვაჭრობის ბრალდებით არიან დაკავებულები. „დანაშაული 14-დან 17 წლამდე ვადით თავისუფლების აღკვეთას ითვალისწინებს. ჩატარებული გამოძიებით დადგინდა, რომ ბრალდებულები დ.ფ., გ.ფ., ნ.გ. და მ.კ მცირეწლოვან ბავშვებზე ფსიქოლოგიურ ზეწოლას და შრომით ექსპლუატაციას სისტემატურად ახდენდნენ. აიძულებდნენ გაეყიდათ ყვავილები და ეთხოვათ მოწყალება. მიღებულ თანხას კი თავად ითვისებდნენ. იმ შემთხვევაში თუ არასრულწლოვნები არ დაემორჩილებოდნენ დაკავებულების მითითებებს მათ სიტყვიერად და ფიზიკურად უსწორდებოდნენ. გამოძიება საქართველოს სისხლის სამართლის კოდექსის 143 სეკუნდა მუხლის მე-2 და მე-3 ნაწილებით მიმდინარეობს“, – ნათქვამია შსს-ს მიერ გავრცელებულ ინფორმაციაში.

დარწმუნებული ვარ, რომ უკრაინა გაიმარჯვებს, - ამის შესახებ იტალიის პრემიერ-მინისტრმა ჯორჯა მელონიმ რომში უკრაინის პრეზიდენტ ვოლოდიმირ ზელენსკისთან გამართული მოლაპარაკებების შემდეგ განაცხადა. „დარწმუნებული ვარ იმაში, რომ უკრაინა გაიმარჯვებს, რომ კიდევ უფრო ძლიერი, უფრო აყვავებული აღდგება. უკრაინის მომავალი მშვიდობისა და თავისუფლების მომავალია, და ეს ევროპული მომავალია. და სხვა შესაძლო ვარიანტები აქ არ არის,” - განაცხადა მელონიმ. როგორც მან აღნიშნა, რომი გააგრძელებს მოკავშირეებთან მუშაობას უკრაინისთვის სამხედრო დახმარების გადასაცემად. „მშვიდობისკენ დამარცხებით, უკრაინის [ტერიტორიების] ჩაბარებით ვერ მივალთ, ეს ძალიან სახიფათო იქნებოდა მშვიდობისთვის ევროპაში, და პრეცედენტი იქნებოდა მსოფლიოს ყველა ერისთვის. მშვიდობისკენ მხოლოდ მაშინ მივალთ, როდესაც რუსეთი შეწყვეტს სამხედრო ქმედებების წარმოებას და სამოქალაქო ობიექტებზე თავდასხმას. გავაგრძელებთ მოსკოვისადმი მიმართვას მოთხოვნით, რომ საბრძოლო ქმედებები შეაჩეროს და უკრაინის ტერიტორიიდან ჯარები გაიყვანოს“, - განაცხადა მელონიმ. მისი თქმით, იტალია მზად არის სრული მხარდაჭერა გაუწიოს უკრაინას, როდესაც კიევი საჭიროდ ჩათვლის რუსეთთან სამშვიდობო მოლაპარაკებების დაწყებას, და რომი მხარს უჭერს ზელენსკის 10-პუნქტიან სამშვიდობო გეგმას. იპნ

ბახმუტის შემოგარენში ჩვენი სამხედროები ორი მიმართულებით მიიწევენ წინ. ამის შესახებ უკრაინის თავდაცვის მინისტრის მოადგილე ანა მალიარი „ტელეგრამის” პირად გვერდზე წერს. „მიმართულებაზე საბრძოლო ქმედებების ეპიცენტრში სიტუაცია დინამიკურად ვითარდება. ბახმუტის შემოგარენში ორი მიმართულებით ჩვენი სამხედროები ეტაპობრივად წინ მიიწევენ. სწორი ციფრები ახლა არ იქნება, ვინაიდან აქტიური საბრძოლო ქმედებები მიმდინარეობს. ჩვენები მტერს ანადგურებენ და უკვე ბევრი აიყვანეს ტყვედ. სამაგიეროდ, თავად ქალაქში ვითარება უფრო რთულია. თუმცა, ხელმძღვანელობის სწორი დაგეგმარებისა და ჩვენი მებრძოლების სიმამაცის წყალობით მტერი ვერ ახერხებს ქალაქზე კონტროლის დამყარებას“, - წერს მალიარი. ipn

თქვენ ამას დაინახავთ, ხოლო რუსეთი იგრძნობს, - ასეთი კომენტარი გააკეთა უკრაინის პრეზიდენტმა ვოლოდიმირ ზელენსკიმიტალიურ გამოცემებთან ინტერვიუში კონტრიერიშის გეგმებზე საუბრისას. უკრაინის პრეზიდენტმა აღნიშნა, რომ კონტრიერიშიც „პირველი ნაბიჯები მალე იქნება“, მაგრამ ზუსტი თარიღები არ დააკონკრეტა. „ძალიან სერიოზულად ვემზადებით. ვიცი, რომ ყველა მოტივირებულია, მაგრამ სამწუხაროდ, [თარიღებზე] თქვენ კითხვაზე ვერ გიპასუხებთ, მაგრამ ამას ნამდვილად დაინახავთ, ხოლო რუსეთი ამას ნამდვილად იგრძნობს“, - განაცხადა ზელენსკიმ. იპნ

გუშინ რაც ვიხილეთ, რა დავარქვა არ ვიცი, „გედის სიმღერა“, თუ რა - პანიკაში მყოფი სანქცირებულების ჯგუფის წევრები ცდილობენ აჩვენონ, რომ თითქოს მათ არაფერი აღელვებთ, - ამის შესახებ პარტია „საქართველოსთვის“ წევრმა ნათია მეზვრიშვილმა ჟურნალისტებს განუცხადა, რითაც გამოეხმაურა საქართველოს მოსამართლეების კორპუსის წარმომადგენლების მიერ გუშინ, ერთ-ერთ რესტორანში მოსამართლეების დღის აღნიშვნას. როგორც მეზვრიშვილი აცხადებს, ის, რაც გუშინ ხდებოდა, მძიმე სანახავი იყო და ეს „ქართული სასამართლოს სახეა“. „ჩემთვის, როგორც არა მხოლოდ პოლიტიკოსისთვის, არამედ როგორც იურისტისთვის, უმძიმესი სანახავი იყო. ზოგადად, მოსამართლეები, პროკურორები და ადვოკატები ადამიანები არიან, ქეიფი და დროსტარება, ბუნებრივია, აკრძალული არ არის, თუმცა არსებობს რაღაც ეთიკური სტანდარტები, რაც განსაკუთრებით მოსამართლეებმა უნდა დაიცვან. გუშინ რაც ვიხილეთ, ამას რა დავარქვა არ ვიცი - „გედის სიმღერა“ თუ რა, მძიმე სანახავი იყო. ეს არის სასამართლოს სახე. პანიკაში მყოფი სანქცირებულების ჯგუფის წევრები ცდილობენ, აჩვენონ, რომ თითქოს მათ არაფერი აღელვებთ. საზოგადოების წინაშე დემონსტრირებას ცდილობენ, თითქოს, არაფერი აინტერესებთ . აპირებენ გააგრძელონ ისე, როგორც აქამდე. მძიმეა, რომ ეს არის სასამართლოს სახე. კეთილსინდისიერი და დამოუკიდებელი მოსამართლეების არსებობა, რომლებიც სისტემაში არიან, მნიშვნელობას კარგავს ამ ფონზე, იმიტომ რომ ზედაპირზე ამოსულია კორუფციონერი მოსამართლეების სურათი, იმიჯი და მაფიოზური დაჯგუფება. ეს ყველაფერი მძიმე ზინას აყენებს მთლიანად მართლმსაჯულების სისტემას და არა მხოლოდ სასამართლოს“,- განაცხადა ნათია მეზვრიშვილმა. IPN

რუსული ძალების მიერ დონეცკის ოლქის ქალაქ კონსტანტინოვკას დაბომბვის შედეგად 2 ადამიანი დაიღუპა და 10 დაშავდა, - ინფორმაციას უკრაინის გენერალური პროკურატურა ავრცელებს. უწყების ცნობით, ერთ-ერთი დაღუპული 15 წლის გოგონაა. „13 მაისს რუსეთის ფედერაციის საოკუპაციო ჯარებმა კიდევ ერთხელ დაბომბეს ქალაქი კონსტანტინოვკა. ოკუპანტების თავდასხმის შედეგად ქალაქის ორი მცხოვრები, მათ შორის 15 წლის გოგონა, დაიღუპა. ათმა ადამიანმა სხვადასხვა სიმძიმის დაზიანებები მიიღო. დაშავებულებს შორის ორი მოზარდია, რომელთა ასაკი 15 და 16 წელის. ისინი საავადმყოფოში გადაიყვანეს“, - აცხადებენ უკრაინის გენერალურ პროკურატურაში. უწყების ცნობით, დაბომბვის შედეგად დაზიანდა და განადგურდა მრავალსართულიანი და კერძო სახლები, ბენზინგასამართი სადგური, აფთიაქი და მაღაზიები. წინასწარი მონაცემებით, ქალაქი „სმერჩის“ მრავალჯერადი სარაკეტო სისტემებიდან დაბომბეს. იპნ

ძიუდოს საერთაშორისო ფედერაციის (IJF) ოფიციალურ ვებგვერდზე ნიკოლას მესნერის სტატია გამოქვეყნდა, რომელიც ქართულ ძიუდოსა და მისი აღორძინების პერიოდზე მოგვითხრობს. „საქართველოს ძიუდოს ფედერაციის პრეზიდენტის, გიორგი ათაბეგაშვილისთვის ყველაფერი ნათელია“, – აღნიშნავს წერილის ავტორი. შეგახსენებთ, რომ საქართველოს ნაკრებმა მსოფლიო ჩემპიონატი ორი ოქროს, ერთი ვერცხლისა და ერთი ბრინჯაოს მედლით დაასრულა. მსოფლიო ჩემპიონები ტატო გრიგალაშვილი (81 კგ) და ლუკა მაისურაძე (90 კგ) გახდნენ, ვერცხლის მედალი ლაშა ბექაურმა (90 კგ) მოიპოვა, ხოლო მესამე ადგილი 19 წლის გიორგი სარდალაშვილმა (60 კგ) დაიკავა. აღსანიშნავია,რომ საერთო გუნდურ ჩათვლაში საქართველოს ნაკრები მამაკაცთა შორის პირველ ადგილზე გავიდა. ავტორი - დავით კუჭავა

რუსეთის საოკუპაციო ძალების მიერ 11 მაისს, გორის მუნიციპალიტეტის სოფელ მეჯვრისხევის მიმდებარედ, ოკუპირებულ ტერიტორიაზე უკანონოდ დაკავებული გიორგი ტერაშვილი გათავისუფლდა, – ამის შესახებ ინფორმაციას სახელმწიფო უსაფრთხოების სამსახური ავრცელებს. სუს-ს ცნობით, გიორგი ტერაშვილი ცენტრალური ხელისუფლების მიერ კონტროლირებად ტერიტორიაზე იმყოფება. „გიორგი ტერაშვილის დაუყოვნებელი გათავისუფლების მიზნით, აქტიურად გამოიყენებოდა როგორც „ცხელი ხაზის“ მექანიზმი, ასევე ცენტრალური ხელისუფლების ხელთ არსებული ყველა სხვა ინსტრუმენტი. საქართველოს ოკუპირებულ რეგიონებსა და საოკუპაციო ხაზის გასწვრივ განხორციელებულ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას. ცენტრალური ხელისუფლება, საერთაშორისო პარტნიორებთან ერთად, განაგრძობს აქტიურ მუშაობას ოკუპირებულ ტერიტორიებზე უკანონო პატიმრობაში მყოფი საქართველოს ყველა მოქალაქის გასათავისუფლებლად“, – აღნიშნულია სუს-ის ინფორმაციაში.