tvati

მედიის ადვოკატირების კოალიცია ტელეკომპანია „ფორმულას“ ჟურნალისტებისთვის პარლამენტში აკრედიტაციის შეჩერებას გმობს. ტელეკომპანია „ფორმულას“ ინფორმაციით პარლამენტმა ტელევიზიის გადამღებ ჯგუფს, ჟურნალისტ გიორგი კიკაბიძესა და ოპერატორ თედო ქვაჩახიას მმართველი პარტიის წევრი ირაკლი ზარქუასთვის პუტინის გადაწყვეტილების შესახებ კითხვების დასმის გამო აკრედიტაცია 1 თვით შეუჩერა. ტელეკომპანიაში აცხადებენ, რომ აკრედიტაციის შეჩერების მოთხოვნით თავად დეპუტატმა ირაკლი ზარქუამ პარლამენტის თავმჯდომარეს, შალვა პაპუაშვილს მიმართა. კოალიციაში აღნიშნავენ, რომ ეს არ არის პირველი შემთხვევა, როცა პარლამენტი მედიის წარმომადგენლებს დისკრიმინაციულიად აკრედიტაციას უჩერებს. განცხადების ავტორების თქმით, საქართველოს პარლამენტი, ნაცვლად საჯაროობისა და ქვეყანაში პლურალიზმის უზრუნველყოფისა, ახორციელებს მედიის წინააღმდეგ სისტემურ სადამსჯელო ღონისძიებებს. „ჟურნალისტების მუშაობა სასიცოცხლოდ მნიშვნელოვანია დემოკრატიის ფუნქციონირებისთვის და მიუღებელია მათი შეზღუდვა საჯარო ინტერესის საკითხებზე გაშუქებისას. მედიის როლი დემოკრატიაში არის სიმართლის გამოვლენა, მნიშვნელოვანი მოვლენების გაშუქება და ხელისუფლებაში მყოფთა საქმიანობის მონიტორინგი“ — ვკითხულობთ მედიის ადვოკატირების კოალიციის მიერ გავრცელებულ განცხადებაში. კოალიცია მოუწოდებს პარლამენტს დაუყოვნებლივ აღადგინოს ტელეკომპანია „ფორმულას“ ჟურნალისტებისთვის აკრედიტაცია, გააუქმოს პარლამენტის თავმჯდომარის ბრძანების, მასობრივი ინფორმაციის საშუალებების წარმომადგენლების აკრედიტაციის წესის შესახებ, სადაო მუხლები, უზრუნველყოს, რომ ჟურნალისტებს ხელი არ შეეშალოთ პროფესიული მოვალეობების შესრულებაში. კოალიცია მოუწოდებს მმართველ პარტია „ქართულ ოცნებას“ პატივი სცეს და დაიცვას მედიის თავისუფლება, რომელიც განცხადების ავტორების შეფასებით, ნებისმიერი დემოკრატიული საზოგადოების ქვაკუთხედია.

დიდთოვლობის გამო თუშეთისკენ მიმავალ გზაზე ცხვრის ფარა ზვავში მოყვა და დაახლოებით 50-მდე სული დაიხოცა. ამის შესახებ რადიო თავისუფლებას ცხვრის მეპატრონემ, ზვიად იჩუკაიძემ უთხრა. მისი ინფორმაციით, თოვლი მაშინ ჩამოწვა, როცა ღამის სადგომიდან ცხვარი გამოიყვანეს. „გზის გაგრძელებას ვაპირებდით, თავდაღმართი ადგილია და ცხვრის ნაწილი მოულოდნელად ზვავში მოყვა, ჩამარხა... რამდენიმე დღით ადრე აქ სხვა მეცხვარეებმაც გაიარეს, მაგრამ არაფერი მომხდარა. ახლა დიდი თოვლია. საფრთხე აღარ არის, უკვე სოფელ ხისოში ვართ. ჩემი მეგობარი მეცხვარეც ზვავში მოყვა, კინაღამ ფეხები დაამტვრია, ძლივს ამოვიყვანეთ. კარგადაა, არაფერი არ სჭირს“, - უთხრა რადიო თავისუფლებას მეცხვარე ზვიად იჩუკაიძემ. მისი ინფორმაციით, წელიწადის ამ დროს, ასეთი მასშტაბური სტიქია არ ახსოვს. მეცხვარეებს ყოველ წელს ზამთრის საძოვრებიდან ცხვარი ზაფხულის საძოვრებზე სხვადასხვა მუნიციპალიტეტში მთაში მიჰყავთ. კახეთში უმეტესად თუშეთში. ბარიდან, სოფელ ზემო ალვანიდან, საძოვრებამდე დაახლოებით 70 კილომეტრია. დიდთოვლობის და რთული მეტეოროლოგიური პირობების გამო თუშეთთან დამაკავშირებელი სამანქანო გზა ყოველთვის ოქტომბრიდან მაისის ნახევრამდე იკეტება. გზის ნაწილი კლდეებსა და მთებზე გადის და ერთ-ერთი ყველაზე რთული სატრანსპორტო მონაკვეთია საქართველოში. radio tavisupleba

რუსეთის ბრიანსკის ოლქის ქალაქ კლინცში „მი-8“ ტიპის ვერტმფრენის ჩამოვარდნას ორი პილოტი ემსხვერპლა, - ინფორმაციას რუსული მედია ავრცელებს. მათივე ინფორმაციით, კატასტროფის მიზეზი ვერტმფრენის ძრავაში გაჩენილი ცეცხლი იყო. „ქალაქ კლინცში ვერტმფრენი ჩამოვარდა. წინასწარი მონაცემებით, ვერტმფრენი ძრავაში გაჩენილი ხანძრის გამო ჩამოვარდა“, - განაცხადა წყარომ რუსულ მედიასთან საუბარში. ამასთან, რუსული მედიის ინფორმაციით, ბრიანსკის ოლქში „სუ-34“ ტიპის მოიერიშე თვითმფრინავიც ჩამოვარდა. „უკრაინის საზღვართან „სუ-34“ ჩამოვარდა. ბორტზე მყოფთა ბედი დგინდება", - განაცხადა წყარომ რუსულ მედიასთან საუბარში. მისივე თქმით, კატასტროფის გარემოებების დასადგენად შესაბამისი მოკვლევა მიმდინარეობს. ipn

უკრაინის პრეზიდენტი, ვოლოდიმირ ზელენსკი ოფიციალური ვიზიტით იტალიაში ჩავიდა, - უკრაინული მედიის ინფორმაციით, ამის შესახებ პრეზიდენტი ზელენსკი „ტელეგრამ“ არხზე წერს. „რომი. შეხვედრები იტალიის პრეზიდენტ სერჯო მატარელასთან, პრემიერ მინისტრ ჯორჯა მელონთან და პაპ ფრანცისკესთან. მნიშვნელოვანი ვიზიტი უკრაინის გამარჯვებისთვის“, - წერს ზელენსკი. იტალიური მედიის ცნობით, კიევის დროით 11:13 საათზე ზელენსკი რომში, „ჩამპინოს“ აეროპორტში დაეშვა, სადაც მას იტალიის საგარეო საქმეთა მინისტრი, ანტონიო ტაიანი დახვდა. ვოლოდიმირ ზელენსკი, ვიზიტის ფარგლებში, შეხვედრებს გამართავს იტალიის პრეზიდენტ სერჯო მატარელასთან, პრემიერ-მინისტრ ჯორჯა მელონთან და საგარეო საქმეთა მინისტრ ანტონიო ტაიანთან. ამასთან, დღის მეორე ნახევარში ის ვატიკანში რომის პაპს შეხვდება. იპნ

ზურა მასურაშვილი, ახალგაზრდა ფერმერია კახეთიდან. დედოფლისწყაროში წლების წინ, უნივერსიტეტის დამთავრების შემდეგ დაბრუნდა და ბებია-პაპის მეურნეობის სრულად გადახალისება გადაწყვიტა. ზურას უნდოდა, ოჯახის ტრადიციულ მეურნეობაში სიახლე შეეტანა. თავიდან 2014 წელს, ფერმაში გერმანულ-შვეიცარიული შვიცბრაუნები ჩამოიყვანა. მაგრამ მიხვდა, რომ უფრო მეტი რძის წარმოებისთვის ჰოლანდიური ჰოლშტეინი უკეთესი იქნებოდა. ეს ორივე ძროხების მაღალპროდუქტიული ჯიშებია. ახლაც კარგად ახსოვს, რამხელა წინააღმდეგობა და სკეპტიციზმი დაინახა ოჯახის წევრებსა და მის გარშემომყოფებში. ყველა ეუბნებოდა, რომ მსგავსი კულტურული ჯიშები საქართველოში ვერ გაძლებდნენ, კლიმატსა და ჩვენს ბუნებრივ პირობებს ვერ შეეგუებიანო. მაგრამ, ფაქტია, თითქმის 10 წლის წინ დაწყებულმა საქმემ გაამართლა. ზურას ახლა ფერმაში 300-მდე შავჭრელი ძროხა და ხბო ჰყავს და მომავალში გაფართოებასაც გეგმავს. „თავიდანვე ვიცოდი, რომ ეს ჯიშები გაძლებდნენ. ერთადერთი, რასაც ეს საქონელი ვერ იტანს, უჭმელობა და უპატრონობაა. როგორც ადამიანს სჭირდება რაღაც სახის კომფორტი, ისევე უნდათ ამ ძროხებს მოვლა“. განვითარებაში ზურას სხვადასხვა ფაქტორი დაეხმარა. პირველ რიგში ცოდნა და ევროპის სხვადასხვა ქვეყანაში მიღებული გამოცდილება. ზურა მიყვება, 2014 წელს, როცა პირველად მოხდა საქონლის იმპორტი, ჩვენს ქვეყანაში არც თუ ისე დიდი გამოცდილება იყო ამ მხრივ და ფერმერები, ვისაც სიახლის დანერგვა უნდოდათ, დიდი პრობლემების წინაშე იდგნენო. ზურას შემდეგ საშუალება ჰქონდა წასულიყო ისეთ ქვეყნებში, სადაც ეს დარგი განვითარებულია: შემდეგ იყო სხვადასხვა საგრანტო პროგრამა და სახელმწიფოს დაბალპროცენტიანი აგროსესხები. მათ შორის იყო ევროკავშირის, ავსტრიის განვითარების ფონდისა და ფაოს მხარდაჭერა. ასევე, სოფლის მეურნეობის პროექტი, რომელიც ფერმერს ფერმის მექანიზაციაში დაეხმარა. ზურას ფერმაში თანამედროვე ტიპის საწველი დარბაზი აქვს, სადაც ერთდროულად 16 ფური იწველება და ყველაფერს ამას, დაახლოებით, 10 წუთი სჭირდება. მექანიზაციის პირობებში, ფერმაში 12 -მდე ადგილობრივი მაინცაა დასაქმებული. სანამ ფერმერობას გადაწყვეტდა, ზურამ სამედიცინო უნივერსიტეტში, ჯანდაცვის ფაკულტეტი დაამთავრა. მაგრამ მერე მიხვდა, რომ ეს ცოდნა სხვანაირად უნდა გამოეყენებინა და პროფსასწავლებელში ჩააბარა, სადაც ვეტერინარის დიპლომიც აიღო. ამიტომ, დღეს საკუთარ ფერმაში როგორც ვეტექიმი და კვების ტექნოლოგი, თვითონვე მუშაობს. ზურასვე პასუხისმგებლობაა საქონლის ხელოვნური განაყოფიერებაც, რასაც დიდი გეგმაზომიერება და სწორი მიდგომა სჭირდება. ყიდულობს იმპორტირებულ ბიოლოგიურ მასას, რომელსაც ინახავენ თხევად აზოტში, სპეციალურ ჭურჭელში. შემდეგ ამას იყენებენ განაყოფიერებისთვის. ხელოვნური განაყოფიერება ისე და ისეთ დროს უნდა მოხდეს, რომ ფერმამ მთელი წლის განმავლობაში სტაბილური რძე შეინარჩუნოს. ზურა მიხსნის, რომ ძროხის განაყოფიერების სწორი პროცესი პირდაპირ პროპორციულია შემდეგ წველადობის წარმატებასთან: კითხვაზე, რამდენად მნიშვნელოვანია ზოგადად, ალტერნატიული გზების ძიება ტრადიციული მეურნეობების განვითარებაში, ახალგაზრდა ფერმერი მპასუხობს, რომ მთავარია ცოდნა და ამ ცოდნის დანერგვას წინ არაფერი უდგას:

აფხაზეთის #10 საჯარო სკოლაში, USAID სამოქალაქო განათლების მიმართულებით ,მცირე გრანტების ფარგლებში, განხორციელებული პროექტის ,,პატარა მოქალაქეების ხმა", შემაჯამებელი ღონისძიება გაიმართა, - ამის შესახებ ინფორმაციას სოციალურ ქსელში "ჩხოროწყუ საქართველოსთვის" ავრცელებს. როგორც განცხადებაშია აღნიშნული, პროექტი ითვალისწინებდა ,აფხაზეთის #10საჯარო სკოლის მოსწავლეთა თვითმმართველობის და სამოქალაქო კლუბის მიერ , იმ ინიცირებული აქტივობების გაცნობას ,რომელიც განხორციელდა ჩხოროწყუს მუნიციპალიტეტის საკრებულოსა და მერიასთან თანამშრომლობის შედეგად. "შეხვედრას ჩხოროწყუს მუნიციპალიტეტის საკრებულოს თავმჯდომარე შოთა წურწუმია მოწვეულ სტუმრებთან ერთად ესწრებოდა. #ახალგაზრდებისაქართველოსთის", - წერს "ჩხოროწყუ საქართველოსთვის".

უკრაინაში რუსეთის სრულმასშტაბიანი შეჭრის დაწყებიდან, სულ მცირე, 22 644 რუსი ჯარისკაცი დაიღუპა ფრონტზე, მათგან 2100 მობილიზებულია. სამხედროების ვინაობა მედიაზონასა და BBC-ის რუსული სამსახურის ჟურნალისტებმა დაადგინეს. ღია წყაროების მონაცემებზე დაყრდნობით (მედიაში ნეკროლოგები, დაღუპულთა ნათესავების პოსტები სოციალურ ქსელებში და ა.შ.), ჟურნალისტებმა და მოხალისეებმა დაადგინეს, რომ 10 230 რუსი სამხედრო დაიღუპა 2022 წლის 1 დეკემბრიდან, როდესაც რუსული არმია ცდილობდა შეტევას დონეცკისა და ლუგანსკის ოლქების რაიონებში. ამ დროის განმავლობაში დაღუპული სამხედრო მოსამსახურეების ნახევარზე მეტი მოხალისეები, მობილიზებულები და პატიმრები არიან. საუბარია გამომძიებლების მიერ იდენტიფიცირებულ 5522 ჯარისკაცზე. აქედან 3100 პატიმარია, რომლებიც მონაწილეობდნენ დონეცკის რეგიონში სოლედარსა და ბახმუტზე თავდასხმებში. ამავდროულად, ჟურნალისტების მიერ დადასტურებული დანაკარგების რაოდენობით რუსეთის რეგიონებს შორის ლიდერობენ სვერდლოვსკის ოლქი (869 დაღუპული), კრასნოდარის ტერიტორია (850 დაღუპული) და ჩელიაბინსკის ოლქი (737 დაღუპული). ამასთან, ცნობილია მოსკოვიდან 142 გარდაცვლილი, ხოლო პეტერბურგიდან - 202. დაღუპულთა რეალური რიცხვი, გამომძიებლების აზრით, შეიძლება რამდენჯერმე მეტი იყოს. გარდა ამისა, უცნობია დაკარგულთა და დატყვევებულთა რაოდენობა. მანამდე აშშ-ის ეროვნული უშიშროების საბჭოს სტრატეგიული კომუნიკაციების კოორდინატორმა ჯონ კირბიმ განაცხადა, რომ ბოლო ხუთი თვის განმავლობაში რუსეთმა დაკარგა 20 000 ადამიანი უკრაინაში, მათგან ნახევარი ვაგნერელი იყო. მისი თქმით, ზარალის მნიშვნელოვანი ნაწილი ბახმუტს დაეცა. ამ და სხვა მიმართულებით ბრძოლებში კიდევ 80 000 რუსი ჯარისკაცი დაიჭრა. რუსეთის ფედერაციის თავდაცვის სამინისტრო არ ავრცელებს მონაცემებს უკრაინასთან ომში დაღუპული ჯარისკაცების, მოხალისეებისა და პატიმრების რაოდენობის შესახებ. radio tavisupleba

ბახმუტის მიმართულებით რუსული ძალების ქმედებებს აბსოლუტურად განსხვავებულად ახასიათებენ რუსეთის თავდაცვის სამინისტრო და „ვაგნერის“ ჯგუფის ხელმძღვანელი ევგენი პრიგოჟინი. ეს არის ამ ორ ძალას შორის არსებული კონფლიქტის კიდევ ერთი გამოხატულება. ბოლო დღეებში პრიგოჟინი უკრაინელების წინსვლაზე საუბრობს, ხოლო 11-12 მაისის ღამით რუსმა „სამხედრო კორესპონდენტებმა“ განაცხადეს, რომ ბახმუტის მიმართულებით უკრაინამ „ფლანგების გარღვევა“ მოახერხა. დილით ამ მიმართულებით წინსვლის შესახებ განაცხადეს კიევშიც. პრიგოჟინი ამბობს, რომ უკრაინა „ფლანგებს არღვევს“ და მალე კონტრიერიშზე გადავა უკრაინა აცხადებს, რომ ბახმუტში 2 კილომეტრით წინ წაიწია თუმცა რუსეთის თავდაცვის სამინისტროში უარყვეს ცნობები „ფლანგების გარღვევაზე“ და თქვეს, რომ რეალურად რუსულმა ძალებმა უკან დაიხიეს, „თავდაცვისთვის უფრო მომგებიან პოზიციაზე“. ასეთ შეფასებას არ ეთანხმება პრიგოჟინი და ამბობს, რომ სინამდვილეში რუსული ძალები გაიქცნენ: „ვაგნერის“ ჯგუფის ხელმძღვანელი უკვე საკმაო ხანია, ღიად ებრძვის რუსეთის თავდაცვის სამინისტროს და მწვავედ, ზოგჯერ გინებითაც კი აკრიტიკებს მის ხელმძღვანელობას და კერძოდ მინისტრ სერგეი შოიგუს. netgazeti

რუსეთმა უკრაინაში 198 260 ჯარისკაცი დაკარგა, მათგან 590 ბოლო ერთ დღეში. ამის შესახებ ინფორმაციას უკრაინის შეიარაღებული ძალების გენერალური შტაბი ავრცელებს. უკრაინის გენშტაბის მიერ გავრცელებული ინფორმაციის თანახმად, ჯამში, ომის დაწყებიდან დღემდე, განადგურებულია 3 751 ტანკი, 7 307 ჯავშანმანქანა, 3 095 საარტილერიო სისტემა, 561 ერთეული ზალპური ცეცხლის რეაქტიულ სისტემა, 314 საჰაერო თავდაცვის სისტემა, 308 თვითმფრინავი, 294 ვერტმფრენი, 2 665 ოპერატიულ-ტაქტიკური დონის უპილოტო საფრენ აპარატი, 970 ფრთოსანი რაკეტა, 18 გემი/ნავი, 6 011 საავტომობილო ტექნიკა და საწვავის ავზი, 402 ერთეული სპეცტექნიკა. IPN

საკუთარ ფიქრებში ოკუპანტებმა ეს ომი უკვე წააგეს, - ამის შესახებ უკრაინის პრეზიდენტმა ვოლოდიმირ ზელენსკიმ ვიდეომიმართვაში განაცხადა. „შტაბის შეხვედრა ჩავატარე დღეს. ოპერატიული მიმართულებების ხელმძღვანელების მნიშვნელოვანი ანგარიშები იყო… რა უნდა გვესმოდეს ახლა: ოკუპანტები შინაგანად უკვე მზად არიან მარცხისთვის. საკუთარ ფიქრებში მათ ეს ომი უკვე წააგეს. ყოველ დღე მათ უნდა ვაწვებოდეთ ისე, რომ მათი მარცხის შეგრძნება მათ გაქცევად, მათ შეცდომებად, მათ დანაკარგებად იქცეოდეს”, - განაცხადა ზელენსკიმ. უკრაინის პრეზიდენტმა ასევე აღნიშნა, რომ უკრაინელი სამხედროებისთვის მეტი იარაღის გადაცემა მზადდება. “თქვენთვის, მეომრებო, კიდევ უფრო მეტი იარაღის, მეტი შესაძლებლობების გადაცემისთვის ვემზადებით, რათა აგრესორი დავძლიოთ და მშვიდობა აღვადგინოთ”, - აღნიშნა ზელენსკიმ. იპნ

მნიშვნელოვანია ადამიანის უფლებათა ევროპული სასამართლოს გადაწყვეტილება, არ დათანხმებულიყო გადაუდებლად ყოფილი პრეზიდენტის უცხო ქვეყნის სამკურნალო დაწესებულებაში გადაყვანას, - ამის შესახებ ნათქვამია საქართველოს პრეზიდენტის, სალომე ზურაბიშვილის განცხადებაში. მისი თქმით, მნიშვნელოვანია, რომ ამ გადაწყვეტილებით ახალი რეპუტაციული ზიანი არ მიადგა საქართველოს, მით უმეტეს, იმ დროს, როდესაც განიხილება საქართველოს კანდიდატის სტატუსი. „ამავე დროს, მიმაჩნია, რომ აუცილებელია, მომავალშიც უზრუნველყოფილი იყოს მისი სიცოცხლისა და ჯანმრთელობის უფლება“, - ნათქვამია პრეზიდენტის განცხადებაში. ინფორმაციისთვის, იუსტიციის მინისტრის რატი ბრეგაძის განცხადებით, სტრასბურგის სასამართლოს გადაწყვეტილებით, ყოფილ პრეზიდენტს მიხეილ სააკაშვილს უარი ეთქვა ვარშავაში გადაყვანაზე. მისივე თქმით, ამავდროულად, სახელმწიფოს არ დაევალა სააკაშვილის ქვეყნის შიგნით სხვა სამკურნალო დაწესებულებაში გადაყვანა.

2023 წლის ბიუჯეტთან დაკავშირებული ერთ-ერთი ჩემს მიერ მერისთვის გაგზავნილი შენიშვნა (წინადადება) გათვალისწინებულია - ბათუმის ავტობუსებში გაჩერებებს გამოაცხადებენ, - ამის შესახებ სოციალურ ქსელში პარტია "საქართველოსთვის" ბათუმის საკრებულოს წევრი აკაკი გვიანიძე წერს. მისი თქმით, მუნიციპალურ ტრანსპორტში, სამარშრუტოზე ხაზზე მოძრავ ავტობუსებში, გაჩერების ტექსტის [ხმოვანი] გამოცხადების პროგრამული უზრუნველყოფის შექმნა-დანერგვასა და შემდგომი ყოველთვიურ მხარდაჭერაზე ტენდერი ავტოტრანსპორტმა უკვე გამოაცხადა. "ამონარიდი 2023 წლის ბიუჯეტის პროექტთან დაკავშირებული ჩემი შენიშვნებიდან: "შშმ პირებისთვის (უსინათლოებისა და მცირედმხედველებისთვის) და ქალაქის სტუმრებისთვის საზ. ტრანსპორტის გაჩერებებისთვის სახელების მინიჭება და გაჩერებების გამოცხადება ავტობუსებში (მეტროს პრინციპით) აუცილებელია. უნდა მოხდეს აღნიშნული სამუშაოების განსახორციელებლად საჭირო ფინანსების ბიუჯეტში გათვალისწინება.", - წერს გვიანიძე.

სტრასბურგის სასამართლომ მიხეილ სააკაშვილის ადვოკატების მოთხოვნა არ დააკმაყოფილა, – ამის შესახებ საქართველოს იუსტიციის მინისტრმა, რატი ბრეგაძემ დღევანდელ ბრიფინგზე განაცხადა. „დღეს გამოქვეყნდა სტრასბურგის სასამართლოს გადაწყვეტილება, რომლის თანახმადაც მსჯავრდებულ მიხეილ სააკაშვილის, საქმეში „სააკაშვილი საქართველოს წინააღმდეგ“ უარი ეთქვა ვარშავაში გადაყვანაზე და ამავდროულად სახელმწიფოს არ დაევალა მისი ქვეყნის შიგნით სხვა სამკურნალო დაწესებულებაში გადაყვანა“, – აღნიშნა ბრეგაძემ. მიხეილ სააკაშვილის ადვოკატებმა სააკაშვილის საქმესთან დაკავშირებით სტრასბურგის სასამართლოში სარჩელი 11 აპრილს გადააგზავნეს. ადვოკატები მიხეილ სააკაშვლისთვის სასჯელის გადავებასა და უცხოეთში სამკურნალოდ გადაყვანას ითხოვდნენ. 1TV

უკრაინის პრეზიდენტის ოფისს „ევროვიზიის“ ორგანიზატორებისთვის ვოლოდიმირ ზელენსკის სიტყვით გამოსვლის წინადადებით არ მიუმართავს, - ამის შესახებ უკრაინის პრეზიდენტის პრესმდივანი, სერგეი ნიკოფოროვი „ფეისბუქში“ წერს. „The Times-ის ინფორმაცია სინამდვილეს არ შეესაბამება. უკრაინის პრეზიდენტის ოფისს ფინალში ან კონკურსის ნებისმიერ სხვა ეტაპზე ვოლოდიმირ ზელენსკის ონლაინმიმართვის წინადადებით „ევროვიზიის“ სიმღერის კონკურსის ორგანიზატორებისთვის არ მიუმართავს“, – წერს ნიკოფოროვი. მანამდე, The Times-მა გაავრცელა ინფორმაცია, რომ „ევროვიზია“ 2023-ის ორგანიზატორებმა უარი უთხრეს უკრაინის პრეზიდენტს, ვოლოდიმირ ზელენსკის, რომელმაც მათ კონკურსის ფინალის დროს ვიდეო ფორმატში სიტყვით მიმართვის წინადადებით მიმართა. იპნ

კიდევ ერთი წარმატებული შეხვედრა ახალგაზრდებთან და ჩვენს ლიდერთან - გიორგი გახარიასთან, ჩვენ ვართ თაობა, რომელიც შეცვლის ჩვენი ქვეყნის მომავალს უკეთესობისაკენ - ამის შესახებ სოციალურ ქსელში პარტია "საქართველოსთვის" ჩხოროწყუს ახალგაზრდული ორგანიზაციის თავმჯდომარე აკო თოლორდავა წერს და შეხვედრის ფოტოებს აქვეყნებს. ცნობისთვის, აღნიშნული გასვლითი ტრენინგ კურსი წყალტუბოში, 5-6 მაისს ჩატარდა. ახალგაზრდები უკეთ გაეცნენ არჩევნების შემდგომი სამუშაოების სპეციფიკას და გამოცდილებებს . ასევე, აღნიშნულ ფორმატში გაიმართა დისკუსია პარტიის ლიდერებთან, ახალგაზრდების როლსა და მათი პოლიტიკაში ჩართულობის საჭიროებებზე. შეხვედრაზე ახალგაზრდებმა განიხილეს ქალთა გაძლიერების მიმართულებით არსებული გამოწვევები, ისაუბრეს სამომავლო პერსპექტივებსა და გეგმებზე.

პარლამენტის ყოფილ წევრებს პარლამენტის შენობაში დაუბრკოლებლად შესვლის უფლება აღარ ექნებათ, - ეს ერთ-ერთია იმ მთელ რიგ ცვლილებათა შორის, რომლის შეტანაც პარლამენტის რეგლამენტში იგეგმება. მოქმედ რეგლამენტში არსებობს მუხლი, რომლის მიხედვით, ყოფილ დეპუტატს პარლამენტის შენობაში შესვლა - მომდევნო ერთი მოწვევის პარლამენტის უფლებამოსილების პერიოდში - დაუბრკოლებლად შეუძლია. რეგლამენტში დაგეგმილი ცვლილებებით კი, კანონიდან აღნიშნული ჩანაწერი ამოდის. ამავე პროექტით გათვალისწინებულია საპარლამენტო უმრავლესობის ლიდერის იმავე შრომის ანაზღაურებითა და სამუშაო პირობებით უზრუნველყოფა, რითაც პარლამენტის ვიცე-სპიკერი სარგებლობს. რეგლამენტში კეთდება ჩანაწერი, რომლის მიხედვით, უმრავლესობის ლიდერი უზრუნველყოფილია იმავე შრომის ანაზღაურებითა და სამუშაო პირობებით (სამუშაო ფართობი, სამდივნო, სამსახურებრივი ავტომობილი, კავშირგაბმულობის საშუალებები და სხვა ტექნიკური საშუალებები), რომლებითაც მოქმედი პარლამენტის თავმჯდომარის მოადგილე სარგებლობს. „აღნიშნული ცვლილებები პარლამენტის ბიუჯეტის ხარჯვით ნაწილზე გავლენას იქონიებს. საპარლამენტო უმრავლესობის ლიდერის გასამრჯელო ამჟამად იმ პარლამენტის წევრის გასამრჯელოს უთანაბრდება, რომელიც პარლამენტის თანამდებობის პირი არ არის, ხოლო რეგლამენტით გათვალისწინებული ცვლილების შესაბამისად მისი ანაზღაურება პარლამენტის თავმჯდომარის მოადგილის გასამრჯელოს გაუთანაბრდება, რა შემთხვევაშიც სხვაობა 1 716 ლარს შეადგენს. ასევე, უმრავლესობის ლიდერი იმ გარანტიებით ისარგებლებს (სამუშაო ფართობი, სამსახურებრივი ავტომობილი, კავშირგაბმულობის საშუალებები და სხვა ტექნიკური საშუალებები), რითაც პარლამენტის თავმჯდომარის მოადგილე სარგებლობს. გარდა აღნიშნულისა, რეგლამენტის პროექტით გათვალისწინებული საპარლამენტო უმრავლესობის ლიდერის სამდივნოს შექმნა გამოიწვევს ხარჯების ზრდას, რაც დამოკიდებული იქნება სამდივნოში დასაქმებული საჯარო მოსამსახურეებისა და მათი შრომის ანაზღაურების ოდენობაზე, ასევე მათთვის საჭირო სამუშაო პირობებით უზრუნველყოფაზე. აქვე უნდა აღინიშნოს, რომ რეგლამენტის პროექტის მიღება მოქმედი უმრავლესობის ლიდერისათვის ფინანსურ შედეგებს არ გამოიწვევს, რადგან რეგლამენტის თანახმად, უმრავლესობის მოქმედი ლიდერი, როგორც წინა მოწვევის პარლამენტის თავმჯდომარე, აღნიშნული გარანტიებით ისედაც უზრუნველყოფილია. შესაბამისად, დღეს მოქმედ თანამდებობებზე მყოფ პირებთან მიმართებით ფინანსური შედეგები უცვლელი რჩება და ბიუჯეტის ხარჯვითი ნაწილის ზრდას არ იწვევს“, - ვკითხულობთ რეგლამენტის პროექტზე თანდართულ განმარტებით ბარათში. ცნობისთვის, რეგლამენტის თანახმად, საპარლამენტო უმრავლესობის ლიდერი საპარლამენტო თანამდებობა არ არის. რეგლამენტის პროექტის ავტორი და ინიციატორი არიან „ქართული ოცნების“ დეპუტატები: ირაკლი ქადაგიშვილი, ირაკლი შატაკიშვილი, გიორგი კახიანი და გრეტა წიწავა. რეგლამენტში ცვლილებების პროექტი პარლამენტის ბიუროს უახლოეს სხდომაზე წარედგინება.

სანქციების საკითხებში ევროკავშირის სპეციალური წარმომადგენელი დეივიდ ო’სალივანი საქართველოში ჩამოვა. ჯერჯერობით დაზუსტებული არ არის, როდის ეწვევა თბილისს ო’სალივანი, თუმცა ცნობილია, რომ ის სანქციების გვერდის ავლის საწინააღმდეგო ზომების იმპლემენტაციას განიხილავს. „დეივიდ ო’სალივანი ამჟამად ეწვევა რიგ მესამე ქვეყნებს, რათა განიხილოს ევროკავშირის მუშაობა სანქციების იმპლემენტაციასა და სანქციებისთვის გვერდის ავლის საწინააღმდეგო ზომებზე. საქართველო იმ ქვეყნებს შორისაა, სადაც ჩასვლასაც იგი მომავალ კვირებში და თვეებში გეგმავს“, – ნათქვამია ევროკომისიის მიერ „ნეტგაზეთისთვის“ გაგზავნილ პასუხში. ინტერპრესნიუსი

ევროკავშირს შესაძლოა გარკვეული კონიუნქტურიდან საჭიროება ჰქონდეს, საქართველოს წინსვლა შეაფერხოს - არ შეიძლება უსამართლობის მოლოდინში ისეთი რამეები ვაკეთოთ, რაც საკუთარი თავისთვის ზიანს მოიტანს, თვითდაზიანებას ხომ ვერ მივიყენებთ?! - ამის შესახებ ჟურნალისტებთან პარლამენტის პირველმა ვიცე- სპიკერმა გია ვოლსკიმ განაცხადა, რითაც უპასუხა კითხვას, შეიძლება თუ არა „ქართულმა ოცნებამ“ რუსეთის პრეზიდენტის გადაწყვეტილების საპასუხოდ განიხილოს რაიმე ზომების მიღება. ვოლსკი აცხადებს, რომ დასაშვებია მოსაზრება, რომ რუსეთმა ვიზების გაუქმებისა და ფრენების აღდგენის გადაწყვეტილება საკუთარი ინტერესებით მიიღო, რომელიც „დასავლეთთან ჭიდილში“ გამოიხატება, თუმცა, სანქციის დაწესება მას შემდეგ, რაც რუსეთმა სანქცია მოხსნა, თვითდაზიანება იქნება. „საერთაშორისო ურთიერთობის კუთხით ჭკუა მომეკითხება, ბოლოს და ბოლოს პირველი საელჩო მაქვს გახსნილი ვაშინგტონში. არ არსებობს ქვეყანა, რომელიც თავის ინტერესებით არ მოქმედებს. რუსეთის მიერ ამ პოზიტივის დემონსტრირება მნიშვნელოვანწილად შესაძლოა და უნდა დაუშვათ თავიდანვე, რომ მის ინტერესებს ემსახურება და მისი ინტერესი, ჭიდილი ევროკავშირთან, დასავლურ სტრუქტურებთან არის მუდმივი, სულ იქნება. აქედან გამომდინარე საწყენი არავისთვის არის ის კამათი, რაც შეიძლება ამას მოჰყვეს ოპოზიციას და მმართველ გუნდს შორის. ვფიქრობ, დამაზიანებელი იქნება თუკი ჩვენ სარკისებურად გადმოვიტანთ წინადადებებს, რასაც „ნაცმოძრაობა“ გვთავაზობს - დავუწესოთ სანქცია. სანქციის დაწესება მას მერე, რაც რუსეთმა სანქცია მოგვიხსნა, ეს არის საკუთარ თავზე ისეთი ზიანის მიყენება, რომელსაც საზოგადოება არ გაპატიებს და სწორადაც მოიქცევა. ამ შემთხვევაში გონიერება მართებს ევროკავშირსაც, რადგან ევროკავშირს შესაძლოა ამის საჭიროება ჰქონდეს კონიუნქტურიდან გამომდინარე, რომ საქართველოს წინსვლა შეაფერხოს, გარკვეული მოსაზრებებია, ამასთან დაკავშირებით ეს მიზეზი მოიყვანოს, რომ იმან სანქცია მოუხსნა ქართველებს და ამით ჩვენს თანამემამულეებს მისცა შესაძლებლობა იმოძრაონ გაცილებით ნაკლები ხარჯით და ადამიანური უფლებების რეალიზება მოახდინონ, ეს იქნება უმართლობა. ჩვენ არ შეიძლება ევროკავშირისგან უსამართლობის მოლოდინში ისეთი რამეები ვაკეთოთ, რაც საკუთარ თავს ზიანს მოუტანს, თვითდაზიანებას ხომ ვერ მივიყენებთ?!“ - განაცხადა ვოლსკიმ. იპნ

ამერიკული Abrams-ის ტანკები უკრაინას შემოდგომის დასაწყისში გადაეცემა,- ამის შესახებ აშშ-ის თავდაცვის მინისტრმა ლოიდ ოსტინმა სენატში, სამხედრო ბიუჯეტთან დაკავშირებით გამართული მოსმენის დროს განაცხადა. „ჩვენ ყველაფერს ვაკეთებთ ამ ტანკების მიწოდების დასაჩქარებლად, პროგნოზი ასეთია - შემოდგომის დასაწყისი“, - განაცხადა ლოიდ ოსტინმა. მისი განმარტებით, უკრაინელ სამხედროებს უკვე აქვთ „წვდომა“ Abrams-ის რამდენიმე ტანკზე, რათა დაიწყონ ეკიპაჟების მომზადება იმ ტანკებისთვის, რომლებიც მოგვიანებით ჩამოვლენ. პენტაგონი იმედოვნებს, რომ დაპირებული ტანკების უკრაინაში ჩასვლამდე ეკიპაჟები მზად იქნებიან მათ სამართავად. იპნ

„გორბის“ კვლევა სურვილები უფროა, ვიდრე კვლევა, - ამის შესახებ ჟურნალისტებთან პარტია „საქართველოსთვის“ წევრმა მიხეილ დაუშვილმა განაცხადა. როგორც მან აღნიშნა, „ქართული ოცნება" არჩევნების მითვისებას აპირებს. „ამ სურვილების მიხედვით გამოიკვეთა ის, რომ „ქართული ოცნება“, ძალაუფლების შესანარჩუნებლად, აპირებს ყველაფერზე წავიდეს, არჩევნების მითვისების ჩათვლით“, - განაცხადა დაუშვილმა. დეპუტატი ასევე გამოეხმაურა „ქართული ოცნების“ გადაწყვეტილებას დატოვოს „ევროპელი სოციალისტების“ პარტია და აღნიშნა, რომ ქართულ ოცნებას პარტნიორები აღარ ენდობიან. „მე არ ვფიქრობ, რომ „ქართული ოცნება” ტოვებს „ევროპელ სოციალისტებს“, ვფიქრობ, რომ „ქართული ოცნება“ გააგდეს და მათ დაასწრეს ამ გადაწყვეტილებას. მთავარი პრობლემა ის არ არის, ტოვებს თუ გადაგდეს, მთავარი პრობლემაა ის, რომ „ქართულ ოცნებას“ არავითარი ნდობა აღარ გააჩნია პარტნიორებში, რაც დიდი გამოწვევა და პრობლემაა ქვეყნისთვის. ასეთი ტიპის მოქმედებები როგორც მინიმუმ ხელს არ უწყობს კანდიდატის სტატუსის მიღებას და დადებით როლს არ თამაშობს,"- განაცხადა დაუშვილმა. იპნ

საქართველოს პროკურატურის განცხადებით, დიდი ოდენობით თანხების თაღლითობისა და უკანონო შემოსავლის ლეგალიზაციის ფაქტებზე ორი ტრანსნაციონალური დანაშაული გახსნეს. სისხლისსამართლებრივი დევნა ორი ფიზიკური და ორი იურიდიული პირის მიმართ დაიწყო. პროკურატურის განცხადებით, დანაშაულებრივი ჯგუფის წევრებმა ფინანსურ ინსტიტუტში თანხის დაბანდებისას მაღალი საპროცენტო განაკვეთის მიღების მიზნით, ინტერნეტში ყალბი რეკლამა განათავსეს და აშშ-ის მოქალაქეებს დიდი ოდენობით თანხები საქართველოში, მათ მიერვე დაფუძნებული საწარმოს საბანკო ანგარიშებზე მოტყუებით ჩაარიცხინეს. ამ სქემით ისინი დაზარალებულებისგან $1 820 000-ს დაეუფლნენ. პროკურატურის განცხადებით, ამის გარდა მათ გახსნეს კიდევ ერთი საქმე, რომლის მიხედვითაც უცხო ქვეყნის მოქალაქემ საქართველოში გახსნილი საბანკო ანგარიშები გამოიყენა და საფრანგეთში მოქმედ საწარმოებისგან მოტყუებით მიიღო ფული. „საფრანგეთში მოქმედი საწარმოების კუთვნილი დიდი ოდენობით თანხის მოტყუებით დაუფლების მიზნით, უცხო ქვეყნის მოქალაქემ ოფშორული კომპანია დაარეგისტრირა და საქართველოში მოქმედ საბანკო დაწესებულებაში საწარმოს ანგარიშები გახსნა. შემდგომში, ბრალდებულმა, ფიქტიური დანიშნულებებისა და ყალბი დოკუმენტების საფუძველზე, მართლსაწინააღმდეგოდ დაუფლებული თანხის ნაწილი, დანაწევრებით გადარიცხა სხვადასხვა ქვეყანაში მასთან დაკავშირებული პირების საბანკო ანგარიშებზე, რა გზითაც 100 000 ევროს ლეგალიზაცია მოახდინა“, – აცხადებს პროკურატურა. პროკურატურის ინფორმაციით, ფიზიკური პირების მიმართ დევნა წინასწარი შეთანხმებით ჯგუფის მიერ ჩადენილი დიდი ოდენობით თანხების თაღლითობისა და ჯგუფურად ჩადენილი განსაკუთრებით დიდი ოდენობით უკანონო შემოსავლის ლეგალიზაციის ფაქტებზე დაიწყო. დანაშაული 9-დან 12 წლამდე თავისუფლების აღკვეთას ითვალისწინებს. რაც შეეხება იურიდიულ პირებს, მათ ბრალდება უკანონო შემოსავლის ლეგალიზაციის ფაქტზე წარედგინათ, რასაც თან ახლდა განსაკუთრებით დიდი ოდენობით შემოსავლის მიღება. დანაშაული იურიდიული პირის ლიკვიდაციას ან საქმიანობის უფლების ჩამორთმევას და ჯარიმას ითვალისწინებს. „ბრალდებულ ფიზიკურ პირებს აღკვეთის ღონისძიების სახით პატიმრობა დაუსწრებლად შეეფარდათ“, – აცხადებს პროკურატურა.

„[ლიბერალიზმი] პირდაპირი საფრთხე შეიძლება იყოს ჩვენი უსაფრთხოების და სუვერენიტეტის დაკარგვის“, – ასე შეაფასა ბუდაპეშტში კონსერვატიული პოლიტიკური მოქმედების კონფერენციაზე ირაკლი ღარიბაშვილის ჰომოფობიური და ტრანსფობიური გამოსვლა თავდაცვის მინისტრმა ჯუანშერ ბურჭულაძემ. „ჩემი აზრით, ჩვენს ხელისუფლებას სხვა ალტერნატივა არ აქვს. ლიბერალიზმი, გარდა იმისა, რომ ჩვენ ამას არ შევხედოთ რელიგიური და მორალური პრიზმიდან, პირდაპირი საფრთხე შეიძლება იყოს ჩვენი უსაფრთხოების და სუვერენიტეტის დაკარგვისა თუ შენარჩუნების. თუ უკითხავთ ჩვენს ოპონენტებს, როგორია ჩვენი გენოფონდი, როგორია მისი პერსპექტივა. რა თქმა უნდა, ამის ხელშეწყობა, ამ პრიზმიდან მინდა ვაჩვენო ჩვენს ოპონენტებს, ეს იქნება კატასტროფა და საქართველოს სუვერენიტეტის რისკები, პირდაპირ შემიძლია განვაცხადო. 4 მაისს საქართველოს პრემიერ-მინისტრი, ირაკლი ღარიბაშვილი უნგრეთში კონსერვატიული პოლიტიკური მოქმედების ყოველწლიურ კონფერენციაზე ჰომოფობიური და ტრანსფობიური სიტყვით გამოვიდა. კონსერვატიული პოლიტიკური სამოქმედო კონფერენცია (CPAC) 1974 წელს აშშ-ში დაფუძნებული კონსერვატორთა ყოველწლიური ყრილობაა. PUBLIKA

12 მაისს მართლმადიდებელი ეკლესია წმინდა მოციქულის, ანდრია პირველწოდებულის ხსენებისა და ყოვლადწმინდა ღვთისმშობლისადმი საქართველოს წილხვდომილობის დღეს – იმედის დღეს აღნიშნავს. სახარების მიხედვით, წმინდა მოციქული ანდრია პირველწოდებული პეტრე მოციქულის ძმა იყო. ქრისტემ მოციქულთა შორის პირველად ანდრიას მოუწოდა, ამიტომაც მას პირველწოდებული ეწოდა. გადმოცემის მიხედვით, წმინდა მოციქული პირველად დიდაჭარაში შემოვიდა. წმინდა სინოდმა 2018 წლის დეკემბერში მიიღო გადაწყვეტილება, რომ 12 მაისი საქართველოს ყოვლადწმინდა ღვთისმშობლის წილხვდომილობის დღედ დადგენილიყო და ეროვნულ დღესასწაულად გამოცხადებულიყო. 2019 წელს, მთავრობის მიმართვის შედეგად, საქართველოს პარლამენტმა „შრომის კოდექსში“ მომზადებული ცვლილებები დაამტკიცა, რომლის გათვალისწინებით, წმინდა ანდრია მოციქულის ხსენების დღესთან ერთად, 12 მაისი – ყოვლადწმინდა ღვთისმშობლისადმი საქართველოს წილხვდომილობის დღე – იმედის დღედ დაწესდა. ანდრია პირველწოდებულის ხსენებას საქართველოს მართლმადიდებელი სამოციქულო ეკლესია წელიწადში ორჯერ ზეიმობს – 12 მაისს წმინდა მოციქულის საქართველოში შემოსვლის, ხოლო 13 დეკემბერს მისი გარდაცვალების დღეს. 1ტვ

საქართველოს თავდაცვის მინისტრის, ჯუანშერ ბურჭულაძის განცხადებით, დავით კეზერაშვილის მინისტრობის დროს გაწეული ხარჯების შესახებ საბუთები ან გამქრალი, ან გადამალული იყო. როგორც ბურჭულაძემ აღნიშნა, წინა ხელისუფლებიდან რამდენიმე მინისტრი მულტიმილიონერი გახდა. „მე არ დამიანონსებია, რომ კიდევ რაიმე საქმის აღძვრას ვაპირებთ დავით კეზერაშვილის წინააღმდეგ. მე ამას არ ვარქმევ კორუფციას, ეს იყო მთელი ხელისუფლების მიერ თანხების მიტაცება. ეს არ იყო კორუფცია, როდესაც თანხებს რიცხავდნენ ოფშორულ კომპანიებში ავანსად და შემდეგ ის კომპანია კოტრდებოდა, ამის გაკეთებას ალბათ ათი წლის ბავშვიც არ იკადრებს. არაფერი ზედმეტი ჭკუა ამას არ სჭირდება. საზოგადოებრივი და სახელმწიფოებრივი ინტერესებიდან გამომდინარე, ჩვენ არც კი დავუყადაღეთ ტელევიზია მას. თქვენ იცით მისი მოღვაწეობის შესახებ, ჯერ ქართველი ხალხი გაძარცვა, შემდეგ წავიდა და ევროპელი პენსიონერები გაძარცვა. რაზეა საერთოდ საუბარი, მე არ ვიცი. წინა ხელისუფლებიდან რამდენიმე მინისტრი მულტიმილიონერი გახდა, როგორ ბედავენ საერთოდ მორალზე საუბარს, არ ვიცი“, – განაცხადა ჯუანშერ ბურჭულაძემ ტელეკომპანია „იმედის“ ეთერში.

არაფორმალურ მმართველებს უნდა ვებრძოლოთ და ვხედავთ არა მხოლოდ ხელისუფლების, არამედ ოპოზიციის მხარესაც, – ამის შესახებ ოპოზიციონერმა დეპუტატმა, მიხეილ დაუშვილმა განაცხადა. დაუშვილის თქმით, არაფორმალური გავლენები და შავი ფულის როლი ქართულ პოლიტიკაში გასანულებელია. „სამწუხაროდ, ქართულ პოლიტიკაში არაფორმალური გავლენების და შავი ფულის არსებობა ძალიან დიდ ნეგატიურ გავლენას ახდენს ქართულ პოლიტიკაზე. როგორც ჩანს, არაფორმალურ მმართველებს უნდა ვებრძოლოთ და ვხედავთ არა მხოლოდ ხელისუფლების მხარეს, არამედ ოპოზიციის მხარესაც. ეს ძალიან დამაზიანებელია მთლიანად ოპოზიციური სპექტრისთვის. „ნაციონალური მოძრაობა“ როდესაც იქცევა ისე, როგორც იქცევა, თავის არაფორმალური გავლენებით თუ ბევრი სხვა არაგონივრული გადაწყვეტილებით, „ქართულ ოცნებას“ აძლიერებს და ძალაუფლების შენარჩუნებაში ეხმარება. რაც შეეხება ბატონი ადეიშვილის გამოჩენას. პლუს ახალი გვარი დაემატა თუ არ დაემატა, საბოლოო ჯამში, ფაქტი ხომ ფაქტად რჩება, ოპოზიციის მხარეს არაფორმალური გავლენები და არაფორმალური მმართველობა რეალურ და დიდ გამოწვევად რჩება. არაფორმალური გავლენა მიუღებელია ყველა მხარეს, როგორც ხელისუფლების, ასევე ოპოზიციის მხარეს. არაფორმალური გავლენები და შავი ფულის როლი ქართულ პოლიტიკაში შესამცირებელი და გასანულებელია. „ნაციონალურმა მოძრაობამ“ თავი დაანებოს ისეთი მოქმედებებს, რომლითაც ხელს შეუწყობს „ქართული ოცნების“ გაძლიერებას და ძალაუფლების შენარჩუნებას“, – განაცხადა დაუშვილმა. „ნაციონალური მოძრაობის“ ყოფილმა თავმჯდომარე ნიკა მელიამ გუშინ განაცხადა: „„ნაციონალური მოძრაობის“ მართვის ბერკეტებს სრულად ფლობენ დავით კეზერაშვილი, ვანო მერაბიშვილი და ზურაბ ადეიშვილი“. ავტორი - მანანა დევაძე