tvati

საქართველოს ფინანსთა სამინისტროს საგამოძიებო სამსახურის ინფორმაციით, ყალბი დოკუმენტებით სახელმწიფოს კუთვნილი დიდი ოდენობით თანხის თაღლითურად დაუფლების ფაქტი გამოავლინეს. მათივე ცნობით, ტარდება შესაბამისი ღონისძიებები აღნიშნულ დანაშაულებრივ ქმედებაში მონაწილე სხვა პირთა დადგენა-მხილების მიზნით. გამოძიება საქართველოს სისხლის სამართლის კოდექსის 210-ე და 180-ე მუხლებით მიმდინარეობს, რაც სასჯელის სახით ითვალისწინებს თავისუფლების აღკვეთას 7-დან 10 წლამდე ვადით. publika

ნიუ იორკის ფედერალურმა სასამართლომ, ამერიკის შეერთებული შტატების ყოფილი პრეზიდენტი, დონალდ ტრამპი მწერალ ელიზაბეთ ჯინ კეროლის სექსუალური შევიწროებისთვის დამნაშავედ ცნო და 2-მილიონიანი კომპენსაციის გადახდა დააკისრა. საქმე ნაფიცმა მსაჯულებმა განიხილეს. ნაფიცმა მსაჯულებმა ასევე საფუძვლიანად ცნეს კეროლის სარჩელი, რომელიც ტრამპს ცილისწამებაში ადანაშაულებდა და აშშ-ის ყოფილ პრეზიდენტს კომპენსაციის სახით კიდევ 3 მილიონი დოლარის გადახდა დააკისრეს. დონალდ ტრამპმა Fox News Digital-თან ინტერვიუში განაცხადა, რომ მას „წარმოდგენა არ აქვს“ ვინაა ჯინ კეროლი და სასამართლოს გადაწყვეტილებას გაასაჩივრებს. ამერიკის 45-ე პრეზიდენტმა გადაწყვეტილებას „სამარცხვინო“ უწოდა. ამ საქმის გამო დონალდ ტრამპს პატიმრობა არ ემუქრება, რადგან ჟურნალისტი მხოლოდ ფინანსურ კომპენსაციას მოითხოვდა. ჟურნალ Elle-ს ყოფილი მიმომხილველი, ელიზაბეთ ჯინ კეროლი, ამერიკის შეერთებული შტატების ყოფილ პრეზიდენტს, დონალდ ტრამპს გაუპატიურებაში ადანაშაულებდა. კეროლმა ტრამპი გაუპატიურებაში 2019 წელს დაადანაშაულა, ჯერ კიდევ მისი პრეზიდენტობის დროს, თუმცა საქმის განხილვა მხოლოდ 2023 წლის აპრილში დაიწყო. დონალდ ტრამპი ბრალდებებს უარყოფდა და ამბობდა, რომ ისინი გამოგონილია. სასამართლოში გაუპატიურების ეპიზოდი დონალდ ტრამპს არ დაუდასტურდა. publika

უკრაინელმა სამხედროებმა ბახმუტის რაიონში 3 კილომეტრის სიგანისა და 2,6 კილომეტრის სიგრძის ტერიტორიის გათავისუფლება შეძლეს, ამბობს „აზოვის პოლკის“ ყოფილი ხელმძღვანელი ანდრეი ბილეცკი, რომელიც ახლა ბახმუტში იბრძვის. ამავე ცნობას ადასტურებს ბრიგადა, რომელშიც ის ახლა იბრძვის. უკრაინული გამოცემა „გორდონი“ წერს, რომ უკრაინამ თითქმის 9 კვადრატული კილომეტრის გათავისუფლება მოახერხა. ბილეცკის თქმითვე, უკრაინელთა შეტევის შედეგად განადგურებულია რუსეთის შეიარაღებული ძალების 72-ე ბრიგადის ქვედანაყოფები. ბილეცკი აგრეთვე აღნიშნავს, რომ დიდი დანაკარგები განიცადა „ვაგნერის“ „მესამე მოიერიშე რაზმმა“. გუშინდელ მიმართვაში „3 კილომეტრის დაკარგვა“ დაადასტურა „ვაგნერის“ ჯგუფის დამფუძნებელმა ევგენი პრიგოჟინმა. მისი თქვით, რუსულმა 72-ე ბრიგადამ ფრონტის ამ მონაკვეთზე პოზიციები დატოვა. დონეცკის ოლქში მდებარე ქალაქ ბახმუტში თვეებია, საქალაქო ბრძოლები მიმდინარეობს. რუსული მხარე არაერთხელ იუწყებოდა თავისი წარმატებების შესახებ, თუმცა ქალაქის აღება მაინც ვერ მოახერხა. netgazeti

საქართველოს პრეზიდენტმა სალომე ზურაბიშვილმა ევროპის დღისადმი მიძღვნილ ღონისძიებაზე მოქალაქეებს მიმართა. ზურაბიშვილის თქმით, საქართველოს ევროპელ პარტნიორებს კარგად ესმით საქართველოს სტრატეგიული ადგილი და ქვეყნის სამომავლო როლი. ზურაბიშვილის თქმით, ევროკავშირი ქვეყნების ერთადერთი გაერთიანებაა, რომელმაც მისი წევრ სახელმწიფოებს სრულად შეუნარჩუნა საკუთარი იდენტობა და მოახერხა მათი მშვიდობის დაცვა. პრეზიდენტი აღნიშნავს, რომ ევროპა საქართველოსთვისაც მშვიდობიანი მომავლის გარანტია: „ჩემი იმედია, ჩვენ ევროპა აქ შემოვიყვანოთ. აქ მივიღოთ ყველაფერი ის, რისთვისაც ევროპაში მივდივართ. აქ იყოს ის ცხოვრების, სამუშაო სტანდარტები და კეთილდღეობა, რასაც ვეძებთ ევროპაში. […] ჩვენი სტრატეგიული ადგილი, ჩვენი სამომავლო როლი კარგად ესმით [ევროპაში]. თუ ჩვენ შევძლებთ, რომ ვიყოთ იქ, სადაც საჭიროა, ეს იქნება ძალიან მნიშვნელოვანი თვით ევროპისთვის და ევროპა არის მშვიდობა. ეს არის ისტორიაში ქვეყნების ერთადერთი გაერთიანება , რომელმაც ამ ქვეყნებს თავიანთი იდენტობა სრულად შეუნარჩუნა და შეუნარჩუნა მათ მშვიდობა. არცერთ ქვეყანას არ დასხმია თავს ევროპა. ეს არის ნამდვილი მშვიდობიანი მომავალი, რაც არ უნდა ვიღაცები ლაპარაკობდნენ რაღაც ფრონტებზე, რაც სრულიად გაუგებარია. ჩვენი მშვიდობიანი, ჩვენი თავისუფალი მომავალი არის მათთან ერთად, მაგრამ ჩვენი იდენტობით, ჩვენი ღირებულებებით და ჩვენი განვითარებით, ეს რაც მთავარია“, — თქვა სალომე ზურაბიშვილმა. netgazeti

საქართველოს დემოკრატიული ინიციატივა[GDI] აფხაზეთის ავტონომიური რესპუბლიკის მინისტრის, დავით ფაცაციას სარჩელზე სასამართლოს მიერ ტელეკომპანია “პირველის” მიმართ გამოტანილ განაჩენს აკრიტიკებს. GDI-ის შეფასებით, განაჩენი ხელს უწყობს საზოგადოებაში ხელისუფლების კრიტიკასთან დაკავშირებით შიშის გაძლიერებას და არ შეესაბამება აქამდე ეროვნულ თუ ევროპულ დონეზე დადგენილ პრაქტიკას. ორგანიზაცია სასამართლოზე ტელეკომპანიის ინტერესებს იცავს. საუბარია 15 000 ლარის დაკისრებაზე, რაც მოსამართლე არჩილ კოჭლამაზაშვილმა ტელეკომპანია “პირველს” მორალური ზიანის ანაზღაურების მოტივით დააკისრა. აფხაზეთის ავტონომიური რესპუბლიკის იძულებით გადაადგილებულ პირთა მინისტრმა და “ქართული ოცნების” თავმჯდომარის, ირაკლი კობახიძის სიძემ, დავით ფაცაციამ სასამართლოს მიმართა მედიაში გაჟღერებული განცხადებების გამო, რომელიც სახელმწიფო აუდიტის სამსახურის დასკვნებს უკავშირდება. კერძოდ, დასკვნები ეხება დევნილთა ჩასახლების ობიექტებში სარემონტო-აღდგენითი სამუშაოების ჩატარების დროს სამინისტროში გამოვლენილ დარღვევებს და თანხების არამიზნობრივ ხარჯვას. ტელეკომპანია „პირველში“ გაკეთებული განცხადებების თანახმად, “არამიზნობრივად დახარჯული თანხების კვალი სამინისტროს ხელმძღვანელამდე”, დავით ფაცაციამდე მიდის. არასამთავრობო ორგანიზაციის განმარტებით, დავით ფაცაცია თავდაპირველად კომპენსაციის სახით 1 ლარს ითხოვდა, მოგვიანებით კი ეს თანხა 30 000 ლარამდე გაზარდა. GDI აღნიშნავს, რომ თანხის გაზრდის შესახებ მოთხოვნა მოჰყვა თბილისის მერის, კახა კალაძის მედიის წინააღმდეგ შეტანილი სარჩელის დაკმაყოფილებას და ბიძინა ივანიშვილის ბიძაშვილის, უჩა მამაცაშვილის სარჩელის დაკმაყოფილების შესახებ გადაწყვეტილების ძალაში დატოვებას. ამასთან, არასამთვრობო ორგანიზაცია მიუთითებს, რომ დავით ფაცაციამ მოთხოვნილი თანხის გაზრდის მოტივის შესახებ დასმულ შეკითხვაზე სასამართლო პროცესზე განაცხადა, რომ ამით მედიისა და ჟურნალისტების დასჯა სურდა გაკეთებული განცხადებებებისთვის. GDI-ის ინფორმაციით, სასამართლოში ტელეკომპანიის წარმომადგენლები უთითებდნენ, რომ აღნიშნული განცხადებები აუდიტის დასკვნის შესახებ გაკეთებული შეფასებები იყო, დავით ფაცაცია კი მოხსენიებული იყო როგორც სამინისტროს ხელმძღვანელი, რომელსაც სახელმწიფო აუდიტის რეკომენდაციებზე შესაბამისი რეაგირების ვალდებულება აკისრია. GDI-ს ცნობით, სასამართლომ მოპასუხე მხარის პოზიციები არ გაიზიარა და მხედველობაში არ მიიღო მოსარჩელის რეალური მიზანი, რომლის მიხედვითაც მას სასარჩელო მექანიზმის სადამსჯელო ღონისძიებად გამოყენება სურდა. ორგანიზაციის შეფასებით, მორალური ზიანის ანაზღაურების სახით 15 000 ლარის დაკისრება მედიისთვის საგანგაშოა და არაგონივრულად მაღალ თანხას წარმოადგენს იმ ზიანთან მიმართებაში, რომელიც, შესაძლოა, მინისტს განეცადა: “მსგავსი ცილისწამების საქმეზე 15 000 ლარის დაკისრება მედიისათვის, მაშინ როდესაც მეორე მხარეს მაღალი პოლიტიკური თანამდებობის მქონე პირი დგას და გავრცელებული ინფორმაცია ეხება საჯარო ფუნქციების შესრულებას, არ შეესაბამება აქამდე ეროვნულ თუ ევროპულ დონეზე დადგენილ პრაქტიკას. ამასთან, იგი მეტად უწყობს ხელს “მსუსხავი ეფექტის” და შესაბამისად შიშის გაძლიერებას საზოგადოებაში, რომ ხელისუფლების ნებისმიერი კრიტიკა შეიძლება დაექვემდებაროს პასუხისმგებლობას”, — აღნიშნავს GDI. ორგანიზაციის შეფასებით, ხელისუფლების და მასთან დაკავშირებული გავლენიანი პირების წინააღმდეგ გაკეთებული კრიტიკული განცხადებები სასამართლო დავის დაწყების საფუძველი არაერთხელ გამხდა, რაც GDI-ის განცხადებით, სასარჩელო მექანიზმის ბოროტად გამოყენება და მიზნად ისახავს სამოქალაქო საზოგადოების დაშინების გზით სიტყვისა და გამოხატვის თავისუფლების უკანონო შეზღუდვას. “ხელისუფლების წარმომადგენლების მხრიდან უსაფუძვლო სარჩელების შეტანის ტენდენციის გათვალისწინებით, ზემოაღნიშნული გადაწყვეტილება ქმნის განსაკუთრებით საშიშ პრეცედენტს, ვინაიდან არსებობს იმის მოლოდინი, რომ საჯარო პირების მხრიდან გაიზრდება სიტყვისა და გამოხატვის თავისუფლების მართლმსაჯულების ობიექტად ქცევის შემთხვევები, რაც არსებითად შეუშლის ხელს მედიის წარმომადგენლების საქმიანობას და შექმნის „მსუსხავ ეფექტს“ სიტყვისა და გამოხატვის თავისუფლებისათვის”, — ნათქვამია განცხადებაში. netgazeti

ყალბი ორგანიზაციების და მაქინაციების მეშვეობით ხდება უცხოური ფულის ინვესტირება ქართულ პოლიტიკაში. ბოლო პერიოდში გამოაშკარავდა ასეთი სქემები „გირჩის“, „დროას“, „ევროპული საქართველოს“ და სხვა პარტიების შემთხვევაში. მნიშვნელოვანია, აუდიტის სამსახური დაინტერესდეს ამ საკითხით, - ამის შესახებ პარლამენტის თავმჯდომარე შალვა პაპუაშვილმა ჟურნალისტებს განუცხადა. მისი თქმით, ყალბი არასამთავრობო ორგანიზაციები არა უბრალოდ აფილირებულია ამ პარტიებთან, პირდაპირ დაფუძნებულია და იმართება ლიდერების მიერ და ხდება პოლიტიკური ფულის გრანტად გაფორმება, რაც არის პარტიების უკანონო დაფინანსება. „ზოგადი წესია, რომ უცხოურ ფულს არაფერი ესაქმება პოლიტიკაში. ჩვენ ვხედავთ, რომ სამწუხაროდ ასეთი ყალბი ორგანიზაციების და რაღაც მაქინაციების მეშვეობით ხდება უცხოური ფულის ინვესტირება ქართულ პოლიტიკაში და მნიშვნელოვანია, ამას მიექცეს ყურადღება. ბოლო პერიოდში ვნახეთ, რომ გამოაშკარავდა ასეთი სქემები „გირჩის“ შემთხვევაში, „დროას“, სხვა პარტიების შემთხვევაში. „ევროპულ საქართველოსაც“ ჩამოყალიბებული აქვს ყალბი არასამთავრობო ორგანიზაციები, რომელიც არა უბრალოდ აფილირებულია ამ პარტიებთან, პირდაპირ მათი დაფუძნებულია, ლიდერების მიერ, იმართება მათ მიერ და ხდება პოლიტიკური ფულის გრანტად გაფორმება, რაც არის პარტიების უკანონო დაფინანსება. ამიტომ, მნიშვნელოვანია, აუდიტის სამსახური დაინტერესდეს ამ საკითხით და ზოგადად, ამ ორგანიზაციებმაც გაასაჯაროონ საკუთარი დაფინანსება, მათ შორის დონორებმა, რომლებიც აფინანსებენ ამ ორგანიზაციებს, თუნდაც IRI-მ, გაასაჯაროოს, რა მოცულობის თანხით აფინანსებს ამ ე.წ. ენჯეოს, რომელიც სინამდვილეში “გირჩის” პარტიის გაგრძელებაა, რა თანხით, რა მიზნებისთვის აფინანსებს, რატომ ხდება IRI-ის მიერ გადახდილი ფულით ახალგაზრდების იარაღთან შეჩვევა და რევოლუციური სცენარების დანერგვა. სწორედ ამაზე იყო საუბარი მათ შორის, როდესაც ვსაუბრობდით უცხოური დაფინანსების გამჭვირვალობის მნიშვნელობაზე. მაშინ იცით, რომ სამწუხაროდ არასწორად იქნა ეს ყველაფერი მიტანილი საზოგადოებამდე. სინამდვილეში ჩვენ ვხედავთ, რომ აქ შეიძლება სხვა ინტერესები იყო, რომ დაფარული ყოფილიყო ის დაფინანსებები, რომელიც საქართველოში შემოედინება“, - განაცხადა შალვა პაპუაშვილმა. როგორც შალვა პაპუაშვილმა აღნიშნა, არაერთხელ ისაუბრა პარტნიორებთან, რომ მათი გადასახადის გადამხდელების ფული გამოიყენება საქართველოში ძალადობის იდეის დანერგვისა და წახალისებისთვის. „მე არაერთხელ მქონდა ჩვენს პარტნიორებთან ამაზე საუბარი, რომ მათი გადასახადის გადამხდელების ფული გამოიყენება საქართველოში ძალადობის იდეის დანერგვისთვის და ძალადობის წახალისებისთვის. ახლა აღმოჩნდა, რომ IRI პირდაპირ აფინანსებს ზუსტად ასეთი სახის ღონისძიებებს, სადაც იარაღთან გარკვეული გაშინაურება ხდება ახალგაზრდების, რომ მათ მერე არ მოერიდოთ საჭირო დროს ამ იარაღის ხელში დაჭერა. როდესაც ასეთი ღონისძიებები ფინანსდება ამერიკელი გადასახდელის ფულით, ეს რა თქმა უნდა ძალიან შოკისმომგვრელია. კიდევ ერთხელ, ერთის მხრივ, მოვუწოდებ ამ ორგანიზაციებს, ჩახედონ, რაში იხარჯება მათი ფული, ძალადობრივი ჯგუფების და არჩევნების უარმყოფელების დაფინანსება რომ ხდება, შემდეგ რომ არ იყოს საუბარი იმაზე, თითქოს ეს ფული ქართველ ხალხს ხმარდება. პირდაპირ ვხედავთ, რომ ეს ფული ხმარდება ქართველი ხალხის ეროვნული ინტერესების საწინააღმდეგო საქმეებს, ამიტომ, მნიშვნელოვანია გადაიხედოს ეს საკითხი“, - განაცხადა შალვა პაპუაშვილმა. palitranews

რუსეთის ფედერაციამ საქართველოს მოქალაქეებისთვის სავიზო რეჟიმი გააუქმა. შესაბამისი განკარგულება რუსეთის პრეზიდენტმა, ვლადიმირ პუტინმა გამოსცა. განკარგულების მიხედვით, საქართველოს მოქალაქეებისთვის სავიზო რეჟიმი 15 მაისიდან უქმდება. რუსეთის პრეზიდენტის შესაბამისი განკარგულება სამართლებრივი ინფორმაციის ოფიციალურ ინტერნეტპორტალზე გამოქვეყნდა. დოკუმენტის თანახმად, საქართველოს მოქალაქეები რუსეთის ტერიტორიაზე შესვლას პასპორტით შეძლებენ. გამონაკლისი ვრცელდება იმ მოქალაქეებზე, რომლებიც რუსეთში სამუშაო მიზნით ჩადიან ან 90 დღეზე მეტი ვადით გეგმავენ დარჩენას. ავტორი - ქეთი ჩოხელი

„ოცნების" მიერ ცესკო-სთან დაკავშირებით დაგეგმილი ცვლილებები ნათლად აჩვენებს, რომ ხელისუფლება, რომლის მიმართ ნდობა დღესვე კითხვის ნიშნის ქვეშ დგას, უკვე ემზადება 2024 წლის არჩევნების გასაყალბებლად, - ამის შესახებ პარლამენტში გამართულ ბრიფინგზე პარტია "საქართველოსთვის" წევრმა და დეპუტატმა ბექა ლილუაშვილმა განაცხადა. "საქართველოსთვის" წევრები პრეზიდენტს მოუწოდებენ ცესკოსთან დაკავშირებულ ცვლილებებს ვეტო დაადოს, ხოლო საერთაშორისო პარტნიორებს და ადგილობრივ ორგანიზაციებს მიმართავენ, გააძლიერონ ძალისხმევა კანონის მიღების წინააღმდეგ. „ეს ნიშნავს, რომ "ოცნებას" გაყალბების გარდა, სხვა რესურსი არ გააჩნია. არაფორმალური ძალაუფლების და გავლენების შესანარჩუნებლად, გადაწყვეტილი აქვთ, მოქალაქეებს წაართვან არჩევანის უფლება და მოჰპარონ ევროპული მომავალი. „ოცნების" მიერ, სრულად კონტროლირებადი, სანქცირებული სასამართლო და ცესკო, ჩვენი პარტნიორების ყოველდღიური შტურმი და სადამკვირვებლო ორგანიზაციების მადისკრედიტირებელი კამპანია ქმნის არჩევნების დაცვის კრიტიკულ საჭიროებას, და ამაში ყველამ საკუთარი როლი უნდა შევასრულოთ, რადგან სამართლიანად და გამჭვირვალედ ჩატარებული არჩევნები - ერთადერთი დემოკრატიული, ვიმეორებ ერთადერთი დემოკრატიული გზაა, გადარჩეს ამ ქვეყნის ევროპული მომავალი. დაუშვებელია, რომ ძალაუფლების დაკარგვის შიშები, წარმოადგენდეს სახელმწიფო ინსტიტუტების გაუქმების მოტივს, დაუშვებელია, არჩევნების ბედი წყდებოდეს - ივანიშვილის რომელიმე რეზიდენციაში. ამიტომ, მივმართავთ საქართველოს პრეზიდენტს გამოიყენოს ვეტოს უფლება არჩევნების დასაცავად. ასევე მივმართავთ სტრატეგიულ პარტნიორებს და ადგილობრივ ორგანიზაციებს, გააძლიერონ ძალისხმევა კანონის მიღების წინააღმდეგ და თავისუფალი და სამართლიანი არჩევნების ჩასატარებლად. მოვუწოდებთ პოლიტიკურ პარტიებსა და მედიას, ყველა ძალისხმევა მიმართონ არჩევნების დაცვისკენ. პარტია "საქართველოსთვის" უახლოეს დღეებში ოფიციალურად მიმართავს ყველა ზემოაღნიშნულ აქტორს. ჩვენ გავაძლიერებთ ძალისხმევას და გამოვიყენებთ ყველა პლატფორმას არჩევნების თავისუფალ და სამართლიან გარემოში ჩატარების ხელშეწყობისთვის,"- განაცხადა ლილუაშვილმა. ინფორმაციისთვის, პარლამენტში ინიცირებულია უმრავლესობის საკანონმდებლო ინიციატივა, რომლის გათვალისწინებით, ცესკოს თავმჯდომარეობის და ე.წ. პროფესიული წევრობის კანდიდატების შერჩევისა და პარლამენტისთვის წარდგენის პრეროგატივა პრეზიდენტის ნაცვლად, პარლამენტის თავმჯდომარეს ექნება. იცვლება მათ არჩევასთან დაკავშირებული პროცედურა და კვორუმი - თუკი პარლამენტი ცესკოს თავმჯდომარესა და წევრებს სრული შემადგენლობის უმრავლესობით (76 ხმა) მხარს დაუჭერს, თანამდებობას 5 წლის ვადით დაიკავებენ. ამ მიმართულებით „საარჩევნო კოდექსსა“ და პარლამენტის რეგლამენტში ცვლილებები ფრაქცია „ქართული ოცნების“ დეპუტატებმა მოამზადეს და ის ბიუროს 8 მაისის სხდომაზე წარედგინა.

ევროკომისიის პრეზიდენტის, ურსულა ფონ დერ ლაიენის განცხადებით, რუსეთი ცდილობს გაანადგუროს თავისუფლების ღირებულებები უკრაინაში, რადგან მას ქვეყნის ევროკავშირისკენ მიმავალი გზის ეშინია. „ჩვენ, ევროპელები ვაფასებთ ჩვენს თავისუფლებას, დემოკრატიას, აზროვნებისა და სიტყვის თავისუფლებას“, - განაცხადა ურსულა ფონ დერ ლაიენმა უკრაინის პრეზიდენტ ვოლოდიმირ ზელენსკისთან ერთობლივ პრესკონფერენციაზე. „უკრაინა იბრძვის ევროპის იდეალებისთვის, რომლებსაც ჩვენ დღეს ვზეიმობთ. რუსეთში, პუტინმა და მისმა რეჟიმმა გაანადგურეს ეს ღირებულებები. მათ ეშინიათ თქვენი წარმატებისა და მაგალითის, რომელსაც თქვენ აჩვენებთ და ეშინიათ ევროკავშირისკენ მიმავალი თქვენი გზის“, - აღნიშნა ურსულა ფონ დერ ლაიენმა. მისი თქმით, რუსეთი დრამატულ მარცხს განიცდის, უკრაინა კი წარმატებით უწევს მას წინააღმდეგობას. შეგახსენებთ, ევროკომისიის პრეზიდენტი კიევში დღეს, „ევროპის დღის“ აღსანიშნავად ჩავიდა.

რიგითი ევროპელის თვალში, ახლა ჩვენ თაღლითების ქვეყანა ვართ, - ამის შესახებ პარტია “საქართველოსთვის” თავმჯდომარემ გიორგი გახარიამ იმერეთის რეგიონის საკრებულოების და პარტიის წევრებთან შეხვედრაზე განაცხადა. ვიდეოში, რომელიც პარტიის სოციალურ ქსელში ვრცელდება, გიორგი გახარია საუბრობს იმაზე, რატომ არ უნდა „ქართულ ოცნებას“ "ქოლ-ცენტრების" საქმეზე კომისიის შექმნა. გახარიას თქმით, ყოფილი თავდაცვის მინისტრი და ოპოზიციური პარტიის ლიდერი ევროპელ პენსიონერებს თაღლითურად ფულს პარავს, რომელსაც ოფიციალური პირები ან ხელს აფარებდნენ, ან თვითონაც „თაღლითურად იპარავდნენ“. „ეს ქოლცენტრების თემა, არის იდეალური მაგალითი, როგორ სიჩუმეში, ბნელ ოთახში ერთად ისხდნენ და თაღლითურად ფულს პარავდნენ ევროპელებს და ახლა, დღეს კიდევ, ფინანსური თაღლითობა გადაჰყავთ პოლიტიკურ თაღლითობაში და ცდილობენ, რომ ერთმა ერთს დააბრალოს, მეორემ მეორეს და შენ კიდევ, საქართველოს მოქალაქემ, რომელმაც ფასი ამისი უკვე გადაიხადა. თქვენ ხომ არ გგონიათ, რომ ამის ფასს ვინმე არ გადაიხდის? ამის ფასს თითოეული ჩვენგანი გადაიხდის. ამის ფასს გადავიხდით ყველა ჩვენ, იმიტომ, რომ რიგითი ევროპელის თვალში, ახლა ჩვენ თაღლითების ქვეყანა ვართ. რა უნდა იფიქროს იმ ევროპელმა, აი ვიღაცას თუ დააინტერესა და დეტალებში წავიდა იტყვის, რომ კაცო, აგერ ყოფილი თავდაცვის მინისტრი, ოპოზიციური პარტიის ლიდერი და თურმე, ევროპელ პენსიონერებს თაღლითურად ჰპარავს ფულს. მერე, კომისია რომ გაკეთდება, გაირკვევა, რომ ოფიციალური პირები ამას ან ხელს აფარებდნენ, ამ თაღლითს, ან თვითონაც თაღლითურად იპარავდნენ. ეს ხალხი გააკეთებს ელემენტარულ დასკვნას: აქ ხელისუფლებაც თაღლითია, ოპოზიციაც თაღლითია, ესენი ყველანი თაღლითები ყოფილან და საბოლოო ჯამში ამ განაჩენს გამოუტანენ ვის? - რიგით მოქალაქეს და ჩვენს შვილებს. მორჩა, ამიტომ არ უნდათ. ესენი ახლა, რეალურად, რასაც აკეთებენ ერთმანეთზე გადაბრალებით, ცდილობენ, თავისი მოპარული ფული დაიცვან”, - აცხადებს გახარია. ინტერპრესნიუსი

აშშ-მა უკრაინისთვის 1.2 მილიარდი დოლარის ოდენობის სამხედრო დახმარების პაკეტის გამოყოფის შესახებ განაცხადა. ინფორმაციას აშშ-ის თავდაცვის დეპარტამენტის პრესსამსახური ავრცელებს. პაკეტი მიზნად ისახავს უკრაინის საჰაერო თავდაცვის გაძლიერებასა და მისი შეიარაღებული ძალების საარტილერიო ჭურვების მოთხოვნის დაკმაყოფილებას. პაკეტი უკრაინის უსაფრთხოების დახმარების ინიციატივის (USAI) ფარგლებში გამოიყოფა. მასში შევა: საჰაერო თავდაცვის დამატებითი სისტემები და საბრძოლო მასალა; დასავლური გამშვები მოწყობილობების, რაკეტებისა და რადარების უკრაინული საჰაერო თავდაცვის სისტემებთან ინტეგრაციისთვის საჭირო აღჭურვილობა; დრონების საწინააღმდეგო საბრძოლო მასალა; 155 მმ საარტილერიო ჭურვები; კომერციული სატელიტური გამოსახულების მომსახურება; და წვრთნებში, შეიარაღების შეკეთებასა და მომსახურებაში დახმარება. “შეერთებული შტატები გააგრძელებს თავის მოკავშირეებთან და პარტნიორებთან მუშაობას, რათა უკრაინას ბრძოლის ველზე მისი უშუალო მოთხოვნილებების და უსაფრთხოების გრძელვადიანი მოთხოვნების დასაკმაყოფილებლად საჭირო შესაძლებლობები მიეწოდოს”, - წერია განცხადებაში. ინტერპრესნიუსი

პირველი ევროპის დღეა მას შემდეგ, რაც ევროკავშირის ლიდერებმა განაცხადეს, რომ საქართველოს მომავალი ევროკავშირშია , - ამის შესახებ ევროპული საბჭოს პრეზიდენტმა შარლ მიშელმა ევროპის დღესთან დაკავშირებით მიმდინარე ღონისძიებაზე, ქართველი ხალხისადმი მიმართვისას განაცხადა. “დღეს ევროპის დღეა და პირველი ევროპის დღეა მას შემდეგ, რაც ევროკავშირის ლიდერებმა განაცხადეს, რომ საქართველოს მომავალი ევროკავშირშია. საქართველოს ხალმა ნათელი არჩევანი გააკეთა, ევროპული ღირებულებებისა და თავისუფლების ნათელი არჩევანი. სწორედ ამიტომ ქვეყნის მომავალი ჩვენ საერთო ოჯახშია. საუკეთესოს გისურვებთ. თქვენთან ერთად ვართ და ბედნიერ ევროპის დღეს გისურვებთ” , - განაცხადა მიშელმა. იპნ

ჩვენი პოლიტიკური გუნდი არ გეგმავს კოალიციურ ერთობას რომელიმე პოლიტიკურ პარტიასთან. გაერთიანება საერთო ღირებულებების გარშემო, რა თქმა უნდა, შესაძლებელია, - აცხადებს პარტია "საქართველოსთვის" აღმასრულებელი მდივანი ბერდია სიჭინავა. მისივე თქმით, ბოლო დღეების განმავლობაში განსაკუთრებით აქტიურობს „ლელოს“ ფრთა. "მათი განცხადებებიდან გამომდინარე ჩანს, რომ, ხელისუფლებაში ვიყავით თუ ოპოზიციაში ვართ, მათი პოლიტიკური დღის წესრიგი ტრიალებდა და ტრიალებს გიორგი გახარიას გარშემო. რაც არ უნდა ისაუბროს „ლელომ“ გიორგი გახარიასთან დაკავშირებით, გიორგი გახარიას რეიტინგს არც არაფერი დააკლდება და არც მის მხარდაჭერას მოქალაქეებში. როგორც ჩანს, „ლელოს“ მიზანია, გადალახოს ხუთპროცენტიანი ბარიერი, რომელიც ვერცერთ არჩევნებში ვერ გადალახა. ჩვენს პოლიტიკურ პარტიას გვაქვს ჩვენი დღის წესრიგი, რომელიც მორგებულია მოქალაქეების ინტერესებზე. წარმატებას ვუსურვებ მათ, ოღონდ ეს არ უნდა იყოს გაგებული ისე, რომ ვინმეს, რომელიმე პოლიტიკურ პარტიას, მათ შორის „ლელოს“, აქვს უფლება, თავს დაგვესხას და ისეთი რიტორიკა აწარმოოს, რასაც ბოლო დღეების განმავლობაში ვაკვირდებით.", - აცხადებს ბერდია სიჭინავა.

გიორგი გახარია - რატომ არ უნდა ოცნებას ქოლცენტრების საქმეზე კომისიის შექმნა? 345586708_267002152431062_2281001437192943574_n.mp4

პარტია „საქართველოსთვის“ საჯარო სკოლების საბაზო საფეხურის მოსწავლეების სასკოლო კვების უზრუნველყოფის ინიციატივით გამოდის ბრიფინგი: პარტია „საქართველოსთვის" გამოვდივართ ინიციატივით, საჯარო სკოლების საბაზო საფეხურის მოსწავლეების სასკოლო კვების უზრუნველყოფის შესახებ” - ამის შესახებ პარტია “საქართველოსთვის” ბათუმის საკრებულოს წევრმა აკაკი გვიანიძემ განაცხადა. აკაკი გვიანიძის განცხადებით, აღნიშნული საკითხის ინიცირება პარტია #საქართველოსთვის მიერ მოხდება ყველა საკრებულოში. “აღნიშნული საკითხის ინიცირება პარტია "საქართველოსთვის" ადგილობრივი გუნდის წევრების მიერ მოხდება ყველა საკრებულოში. 21 აპრილს უკვე დავაყენეთ საკითხი ბათუმის საკრებულოში. კვლევა, რომელიც სახელმწიფო ორგანოს, საქსტატის მიერ არის ჩატარებული, გვაჩვენებს, რომ სასკოლო საათებში კვება უმნიშვნელოვანესი გამოწვევაა. ბავშვების აბსოლუტური უმრავლესობა სასკოლო საათებში შიმშილობს. მაშინ, როდესაც დაბალანსებული კვება მოსწავლის ფიზიკური, მენტალური, ემოციური, კოგნიტური განვითარებისა და ჯანმრთელობის წინაპირობაა. ბავშვების ერთ მესამედზე მეტი (34.9%) არასდროს იკვებება სკოლის საათების განმავლობაში. 38% არარეგულარულად და ბავშვების მხოლოდ ერთ მეოთხედზე ოდნავ მეტი (27%) იკვებება ყოველდღიურად სკოლის საათების განმავლობაში. მსოფლიოში არსებული სასკოლო კვების მოდელების ანალიზის ცხადყოფს, რომ ოპტიმალური ვარიანტია „სადილის ყუთის“ („ლანჩბოქსის) მოდელი” - განაცხადა აკაკი გვიანიძემ. მისი თქმით, პარტია “საქართველოსთვის” ინიციატივის მიღების შემდეგ, მუნიციპალიტეტის მერიის მიერ, ტენდერის გზით, შერჩეული პირი, მუნიციპალიტეტის ტერიტორიაზე არსებულ საჯარო სკოლებს, წლის განმავლობაში, სასწავლო დღეებში მიაწვდიან მოსწავლისთვის განკუთვნილ ინდივიდუალურ სადილის ყუთებს, გათვალისწინებული იქნება ინკლუზიური მიდგომა. “ჩვენი ინიციატივის თანახმად, მუნიციპალიტეტის მერიის მიერ, ტენდერის გზით, შერჩეული პირი (პირები), მუნიციპალიტეტის ტერიტორიაზე არსებულ საჯარო სკოლებს, წლის განმავლობაში, სასწავლო დღეებში მიაწვდიან მოსწავლისთვის განკუთვნილ ინდივიდუალურ სადილის ყუთებს, გათვალისწინებული იქნება ინკლუზიური მიდგომა. პროგრამის ბიუჯეტის განსაზღვრა უნდა მოხდეს მუნიციპალიტეტის ბიუჯეტისა და „სადილის ყუთის“ შიგთავსის გათვალისწინებით. სტანდარტიზირებული ფასი ერთ მოსწავლეზე წელიწადში შეადგენს 44 აშშ დოლარს. ჩვენი ბავშვების ჯანმრთელობა და კეთილდღეობა არის ზეპარტიული საკითხი, ამიტომ, მოვუწოდებთ საკრებულოებს და განსაკუთრებით მერებს, ჩართულობისა და თანამშრომლობისკენ”- განაცხადა აკაკი გვიანიძემ. #ბავშვებისთვის brifingi.mp4

საარჩევნო კოდექსში დაგეგმილი ცვლილებებით ოცნება ცდილობს საკანონმდებლო დონეზე დაიქვემდებაროს ცესკო და ემზადება 2024 წლის არჩევნების გასაყალბებლად., - განცხადებას ამის შესახებ პარტია "საქართველოსთვის" ავრცელებს. როგორც პარტიის მიერ გავრცელებულ განცხადებაშია აღნიშნული, ეს პროცესი ხელისუფლებამ ჯერ კიდევ მაშინ დაიწყო, როცა: უარი თქვა ანტი-კორუფციულ და მართლმსაჯულების რეფორმებზე, რაც ქვეყანაში არჩევნების ჩატარებას პოლიტიკური კორუფციისგან, სისტემური მუქარისგან და ზეწოლისგან თავისუფალი გარემოში უზრუნველყოფდა; ადგილობრივ სადამკვირვებლო ორგანიზაციებს, ადგილობრივი და საერთაშორისო სადამკვირვებლო მისიების დამფინანსებელ საერთშორისო ორგანიზაციებს თავს დაესხა მათდამი საზოგადოების ნდობის დასუსტების მიზნით და არჩევნების სანდო სადამკვირვებლო მისიების გარეშე ჩასატარებლად. "დღეს, ხელისუფლება არჩევნების გაყალბებისთვის მზადებას აგრძელებს საპარლამენტო საგამოძიებო კომისიების შექმნაზე უარით, რათა შეინარჩუნოს პოლიტიკური კორუფცია და შავი ფული, როგორც არჩევნების გაყალბების ინსტრუმენტი. ბოლო ორი წლის განმავლობაში ოცნებამ გააუქმა ყველა დამოუკიდებელი ინსტიტუტი, რასაც ხელისუფლების თვითნებობის კონტროლის ფუნქცია უნდა შეესრულებინა და არჩევნების თავისუფალ და სამართლიან გარემოში ჩატარება უნდა უზრუნველეყო. საარჩევნო კოდექსში ცესკოსთან დაკავშირებით დაგეგმილი ცვლილებები არის 2024 წლის არჩევნების გაყალბების მცდელობის გაფორმება საკანონმდებლო დონეზე. არჩევნების გაყალბება არის ერთადერთი ინსტრუმენტი, რაც ძალაუფლების შესანარჩუნებლად დარჩა პოლიტიკური რესურსისგან დაცლილ ხელისუფლებას, რომელიც სრულად გასულია საკანონმდებლო ჩარჩოებიდან და ყოველდღიურად არღვევს კონსტიტუციას. თავისუფალი და სამართლიანი არჩევნები არის საქართველოში მშვიდობიანი და დემოკრატიული ცვლილებების ერთადერთი გზა. შესაბამისად, 2024 წლის არჩევნები არის დასაცავი, იმისთვის, რომ ქვეყანა დავაბრუნოთ დემოკრატიული განვითარების გზაზე და დავიცვათ მისი ევროპული მომავალი. პარტია #საქართველოსთვის აქტიურად იმუშავებს თავისუფალ და სამართლიან გარემოში არჩევნების ჩატარების ხელშეწყობისთვის. მოვუწოდებთ მთელ პოლიტიკურ სპექტრს, არასამთავრობო და საერთაშორისო ორგანიზაციებს, მედიას, ექსპერტებს - მთელი ძალისხმევა მიმართონ არჩევნების დაცვისკენ. ამაზე გადის დღეს ქვეყნის ევროპული მომავლის გადარჩენის გზა. Georgian Dream intends to subordinate CEC on a legislative level and is preparing to rig 2024 elections. GD started this process long ago, when: It refused to implement anti-corruption and justice reforms, which would ensure conduct of elections free of political corruption, systemic pressure and threat; attacked national observation missions and international organizations providing funding to national and international observation missions to undermine public trust in them and ensure conduct of elections without reliable observation missions. Today the Ruling Party continues preparation for rigging elections by refusing to create Parliamentary investigative commissions, to retain political corruption and shadow money as a tool for election rigging. Over the past 2 years GD abolished all independent institutions, which should have played controlling function of Government and ensure conduct of elections in a free and fair environement. Legislative changes planned with respect to CEC is a formalization of an attempt to rig 2024 elections. Election rigging is the only tool for the Government, deprived of political resources, completely outside the legal framework, violating the constitution every day, to maintain the power. Free and fair elections is the only way of peaceful, democratic political changes in Georgia. Therefore, we have to protect 2024 elections in order to bring Country back on a right democratic track and protect its European future. Political party For Georgia will actively work to contribute to the counduct of free and fair elections. We urge entire political spectrum, NGO’s international organizations, media, experts – to direct all efforts to protect elections. The way to save the European future of the Country goes through this.", - ნათქვამია განცხადებაში.

ევროკომისიის პრეზიდენტი, ურსულა ფონ დერ ლაიენი კიევში ჩავიდა, - ამის შესახებ ევროკომისიის ხელმძღვანელი „ტვიტერზე“ თავად იუწყება. „სასიამოვნოა კიევში დაბრუნება. სადაც ჩვენთვის ძვირფას ღირებულებებს ყოველდღე იცავენ. ამიტომ, ეს არის ღირსეული ადგილი „ევროპის დღის“ აღსანიშნავად“, - აცხადებს ურსულა ფონ დერ ლაიენი. ის მიესალმება უკრაინის პრეზიდენტის, ვოლოდიმირ ზელენსკის გადაწყვეტილებას, უკრაინაში 9 მაისის „ევროპის დღედ“ გამოცხადებასთან დაკავშირებით. ევროკომისიის პრეზიდენტმა გამოაქვეყნა კიევის რკინიგზის სადგურზე გადაღებული ფოტო, სადაც მას საგარეო საქმეთა მინისტრის მოადგილე, ევგენი პერებიინისი დახვდა. ცნობილია, რომ ურსულა ფონ დერ ლაიენი დღეს ვოლოდიმირ ზელენსკის შეხვდება. პალიტრანიუსი

ოცნება ღიად აგრძელებს 2024 წლის საპარლამენტო არჩევნების გაყალბებისთვის მზადებას., - ამის შესახებ სოციალურ ქსელში პარტია "საქართველოსთვის" თავმჯდომარის მოადგილე ნათია მეზვრიშვილი წერს. მისივე თქმით, საარჩევნო კოდექსში იგეგმება ცვლილებები, რომელიც ცესკოს ახლა უკვე საკანონმდებლო დონეზე მთლიანად უქვემდებარებს მმართველ პარტიას. "ცესკოს დამოუკიდებლობა კრიტიკულად მნიშნელოვანია 2024 წლის არჩევნების თავისუფალ და სამართლიან გარემოში ჩასატარებლად. შემოთავაზებული ცვლილებებით აღნიშნული გამოირიცხება, ვინაიდან იცვლება კანონის ყველა ის დებულება, რომელიც საკანონმდებლო დონეზე მაინც ქმნიდა ცესკოს დამოუკიდებლობის გარანტიას. კერძოდ: ცესკოს წევრებს (7 წევრს) პარლამენტს ასარჩევად წარუდგენს პარლამენტის თავმჯდომარე პრეზიდენტის ნაცვლად - გამოირიცხა პრეზიდენტის როლი. ცესკოს თავმჯდომარეობის კანდიდატს პარლამენტს ასარჩევად წარუდგენს პარლამენტის თავმჯდომარე პრეზიდენტის ნაცვლად - გამოირიცხა პრეზიდენტის როლი. როგორც თავმჯდომარე, ისე წევრები აირჩევა უბრალო უმრავლესობით (76 ხმით), ნაცვლად ხმების 2/3-ისა, ანუ 100 ხმისა - არჩევა მმართველი პარტიის ხელშია. ცესკოს თავმჯდომარის უფლებამოსილების ვადაა 5 წელი მათ შორის მაშინაც, როცა აირჩევა 76 ხმით. დღეს მოქმედი რედაქციით, ცესკოს თავმჯდომარე 5 წლით აირჩევა მხოლოდ მაშინ, თუ ხმების 2/3-ს მიიღებს. სხვა შემთხვევაში მისი არჩევის ვადაა 6 თვე - ცესკოს თავმჯდომარე 5 წლით აირჩევა მხოლოდ მმართველი პარტიის ლეგიტიმაციით. შეგახსენებთ, ცესკოს თავმჯდომარეს და ორ წევრს თითქმის ერთი წელია ვადა გაუვიდათ და ხელისუფლება აჭიანურებს მათი არჩევის პროცესს - ანუ გვყავს თავმჯდომარე, რომელსაც არ აქვს პარლამენტის სრული შემადგენლობის 2/3-ის ლეგიტიმაცია. ნაცვლად დადგენილი წესით რეალურად დამოუკიდებელი კანდიდატების არჩევისა, ოცნებამ მიმართა გზას, რომელიც არჩევნების გაყალბებაზე გადის., - წერს ნათია მეზვრიშვილი და აღნიშნავს, რომ გარდა ამისა, საარჩევნო რეფორმა კანდიდატის სტატუსის მიღების აუცილებელი წინაპირობაა. აღნიშნული ცვლილებები კი, პირდაპირ მიმართულია კანდიდატის სტატუსის და ევროინტეგრაციის პროცესის წინააღმდეგ.

როგორც ჩანს, “ლელოს” პოლიტიკური დღის წესრიგი გიორგი გახარიას გარშემო ტრიალებს, - წერს სოციალურ ქსელში პარტია "საქართველოსთვის" აღმასრულებელი მდივანი ბერდია სიჭინავა. როგორც ბერდია სიჭინავა აცხადებს, მათი გუნდის ამოცანა “ოცნების” ხელისუფლების ცვლილებაა, ვიღაცების კი - 5%-იანი ბარიერის გადალახვა. "ჩვენი გუნდის ამოცანა “ოცნების” ხელისუფლების ცვლილებაა, ვიღაცების - 5%-იანი ბარიერის გადალახვა (წარმატებები ამ საკითხში). დაფუძნების დღიდან გვაქვს თანმიმდევრული და ყველა პარტიისგან განსხვავებული, დამოუკიდებელი პოლიტიკა, რაც, ვფიქრობ, ჩვენი ძლიერი მხარეა. არავისთან არაფრის გარკვევას არ ვაპირებთ, არავისთვის არაფერი გვაქვს ასახსნელი ჩვენი მოქალაქეების გარდა! 2021 წელს ადგილობრივ დონეზე დაწყებულ ცვლილებებს ჩვენს მოქალაქეებთან ერთად მივიყვანთ ბოლომდე #საქართველოსთვის!", - წერს ბერდია სიჭინავა.

რამდენიმე დღეა “ლელოს” სპიკერები ორგანიზებულად მედიაში მხოლოდ გახარიაზე საუბრობენ, ჩვენი გუნდი, როგორც აქამდე, პარლამენტში გააგრძელებს მათ შორის “ლელოსთან” თანამშრომლობას იმ საკითხებზე, რაზეც ვთანხმდებით, - ამის შესახებ სოციალურ ქსელში პარტია "საქართველოსთვის" წევრი და დეპუტატი ანა ბუჩუკური წერს. მისი თქმით, მათ გუნდს არასოდეს არავისთან თანამშრომლობის კომპლექსი არ ჰქონია, არ აქვს და არ ექნება. "პოლიტიკურ პარტიას არაფერი ასახსნელი სხვა პარტიასთან არ აქვს. მთავარია ხალხი - ხალხთან კომუნიკაცია ყოველთვის იყო გახარიას ძლიერი მხარე. რა თქმა უნდა, ყველა თავისით წყვეტს, რა როგორ გააკეთოს, მაგრამ ჩვენი გუნდის მიზანი ხელისუფლების ცვლილებაა, ზოგისთვის 5%-იანი ბარიერის გადალახვა. წარმატებები ყველას.", - წერს ბუჩუკური.

რუსულმა ძალებმა უკრაინის ტერიტორიას საზღვაო და საჰაერო ბაზირების ფრთოსანი რაკეტებით დაარტყა, - ამის შესახებ უკრაინის შეიარაღებული ძალების მთავარსარდალმა, ვალერი ზალუჟნიმ განაცხადა. მისივე თქმით, 8 მაისს, ადგილობრივი დროით, დაახლოებით, 22:00 საათზე, მოწინააღმდეგემ შავ ზღვაში განთავსებული ხომალდებიდან უკრაინის აღმოსავლეთ რეგიონების მიმართულებით „კალიბრის“ ტიპის 8 ფრთოსანი რაკეტა გაუშვა, თუმცა საჰაერო თავდაცვის სარდლობა „ვოსტოკის“ ძალებმა და საჰაერო თავდაცვის საშუალებებმა 8-ვე მათგანი გაანადგურეს. ვალერი ზალუჟნის ინფორმაციით, 9 მაისს, უკრაინის დროით დილის 04:00 საათზე, რუსულმა ძალებმა სტრატეგიული საავიაციო თვითმფრინავებიდან - ოთხი Tu-95MS ბომბდამშენიდან - Х-101/Х-555 ტიპის 17 ფრთოსანი რაკეტა გაუშვეს. აქედან 15 უკრაინის საჰაერო თავდაცვის ძალებმა და საშუალებებმა გაანადგურეს. რაინის შეიარაღებული ძალების მთავარსარდლის განმარტებით, უკრაინის დაბომბვის ორი ტალღის შედეგად, ოკუპანტებმა „კალიბრისა“ და Х-101/Х-555 ტიპის 25 რაკეტა გაუშვეს, მათგან 23 უკრაინის შეიარაღებული ძალების საჰაერო ძალების საჰაერო თავდაცვამ უკრაინის თავდაცვის ძალების სხვა კომპონენტებთან თანამშრომლობით გაანადგურა. IPN

მმართველი პარტია ცესკოს თავმჯდომარისა და პროფესიული წევრების არჩევის წესს საკუთარ ინტერესს არგებს , - ამის შესახებ ნათქვამია განცხადებაში, რომელსაც „სამართლიანი არჩევნებისა და დემოკრატიის საერთაშორისო საზოგადოება“ და „საერთაშორისო გამჭვირვალობა საქართველო“ ავრცელებს. ორგანიზაციების განმარტებით, წარმოდგენილი ცვლილებები უფრო მეტად შეამცირებს ცესკოს დამოუკიდებლობას, გაზრდის მასზე მმართველი პარტიის გავლენას და უკიდურესად დააკნინებს პრეზიდენტის როლს კანდიდატების შერჩევის პროცესში. განცხადების თანახმად, წარმოდგენილი კანონპროექტი აგრძელებს მმართველი პარტიის მიერ ძალაუფლების სრული კონცენტრაციის ტენდენციას. „2023 წლის 8 მაისს საქართველოს პარლამენტის უმრავლესობის წევრების მიერ ბიუროს წარედგინა კანონპროექტი ცენტრალური საარჩევნო კომისიის (ცესკოს) დაკომპლექტების წესის ცვლილების შესახებ, რომლის მიღების შემთხვევაშიც, ცესკოს თავმჯდომარისა და პროფესიული წევრების კანდიდატებს, პრეზიდენტის ნაცვლად, შეარჩევს და პარლამენტს წარუდგენს პარლამენტის თავმჯდომარე. გარდა ამისა, წარდგენილი კანდიდატების თანამდებობაზე სრული ვადით (5 წლით) არჩევას პარლამენტი სრული შემადგენლობის უმრავლესობით შეძლებს, მაშინ როდესაც დღეს ამისთვის პარლამენტის ⅔-ის მხარდაჭერაა საჭირო. წარმოდგენილი ცვლილებები უფრო მეტად შეამცირებს ცესკოს დამოუკიდებლობას, გაზრდის მასზე მმართველი პარტიის გავლენას და უკიდურესად დააკნინებს პრეზიდენტის როლს კანდიდატების შერჩევის პროცესში. საარჩევნო ადმინისტრაციის კონსენსუსის წესით არჩევა, ასევე მნიშვნელოვანი წინაპირობაა 2024 წლის საპარლამენტო არჩევნების კონტექსტშიც. ამასთანავე, ინიციატივა სრულიად ეწინააღმდეგება 2021 წლის 19 აპრილის პოლიტიკურ შეთანხმებას, ვენეციის კომისიის/ეუთო-ოდირის რეკომენდაციებს და ევროკავშირის მიერ საქართველოსთვის წარმოდგენილი 12 პირობიდან ერთ-ერთს. უფრო კონკრეტულად, საკანონმდებლო ორგანოში ინიციირებული საკანონმდებლო პაკეტი ითვალისწინებს ცვლილებებს საქართველოს საარჩევნო კოდექსსა და საქართველოს პარლამენტის რეგლამენტში, რომელთა თანახმადაც, მცირდება ცესკოს ე.წ. პროფესიული წევრების სრული ვადით - 5 წლით, ასარჩევად დადგენილი კვორუმი. არსებული ⅔-ის უმრავლესობის ნაცვლად, ცესკოს თავმჯდომარესა და 7 წევრს საქართველოს პარლამენტი სრული შემადგენლობის უმრავლესობით აირჩევს. აგრეთვე, იცვლება და იზღუდება პრეზიდენტის როლი ცესკოს დაკომპლექტების პროცესში. ცესკოს თავმჯდომარისა და პროფესიული წევრების შესარჩევად, პრეზიდენტის ნაცვლად, საკონკურსო კომისიას შექმნის და შემდეგ კანდიდატებს საკანონმდებლო ორგანოს წარუდგენს პარლამენტის თავმჯდომარე. 9 - წევრიან საკონკურსო კომისიაში გათვალისწინებულია საქართველოს პრეზიდენტის 1 წარმომადგენლის ყოფნა. პარლამენტის თავმჯდომარე, ასევე, მიიღებს გადაწყვეტილებას ცესკოს წევრობის კანდიდატთა წარდგენაზე უარის თქმისა და ხელახალი კონკურსის გამოცხადების შესახებ. ამასთან, თუ პარლამენტის მიერ კენჭისყრის შედეგად ყველა ვაკანსია არ შეივსო, კენჭი ეყრება კონკურსში მონაწილე პირებიდან ამჯერად უკვე საქართველოს პრეზიდენტის მიერ წარდგენილ ცესკოს წევრობის კანდიდატებს, არაუგვიანეს 14 დღის ვადაში. თუ ვაკანსია კვლავ შეუვსებელი დარჩა, არაუგვიანეს 3 დღისა დარჩენილ ვაკანსიაზე კონკურსი თავიდან გამოცხადდება. კანონის პროექტზე მომზადებულ განმარტებით ბარათში ინიციატორები აღნიშნავენ, რომ ცესკოს შეუფერხებლად მუშაობის უზრუნველსაყოფად საჭიროა ცესკოს წევრები და ცესკოს თავმჯდომარე საქართველოს პარლამენტის მიერ არჩეული იყვნენ კანონმდებლობით განსაზღვრული სრული ვადით და აღარ გახდეს საჭირო ე.წ „ჩიხური მდგომარეობიდან“ გამოსავლის დამატებითი მექანიზმების გამოყენება. თუმცა, წარმოდგენილი ცვლილებები არ პასუხობს საარჩევნო ადმინისტრაციის წინაშე არსებულ უმთავრეს გამოწვევას - ნდობის ნაკლებობას და ეწინააღმდეგება საარჩევნო ადმინისტრაციის დაკომპლექტების წესის შესახებ აქამდე არსებულ ფუნდამენტურ შეთანხმებას, მმართველი პარტიის მიერ აღებულ ვალდებულებებსა და კომპეტენტური ადგილობრივი და საერთაშორისო ორგანიზაციების რეკომენდაციებს. ცესკოს თავმჯდომარისა და პროფესიული წევრების მაღალი კვორუმით, პოლიტიკური კონსენსუსის საფუძველზე არჩევა წარმოადგენდა ევროპული საბჭოს პრეზიდენტის, შარლ მიშელის მედიაციით 2021 წლის 19 აპრილს მიღწეული პოლიტიკური შეთანხმების ერთ-ერთ ძირითად საკითხს. გარდა ამისა, საარჩევნო ადმინისტრაციის, როგორც სახელმწიფო ინსტიტუტის, დამოუკიდებლობის ნაკლებობის საკითხი ვენეციის კომისიისა და ეუთო-ოდირის კრიტიკის საგანი არაერთხელ გამხდარა. ამ ინსტიტუტების რეკომენდაციების გათვალისწინება კი ევროკავშირის წევრი ქვეყნის კანდიდატის სტატუსის მისაღებად ევროკომისიის მიერ საქართველოსათვის წარდგენილი 12 პირობიდან ერთ-ერთია. წარმოდგენილი კანონპროექტი აგრძელებს მმართველი პარტიის მიერ ძალაუფლების სრული კონცენტრაციის ტენდენციას, აძლევს რა მას ცესკოს პროფესიული წევრების არჩევის შეუზღუდავ უფლებამოსილებას. ამავდროულად, გამორიცხავს პრეზიდენტის რეალურ მონაწილეობას ცესკოს დაკომპლექტებაში და მას უტოვებს უმნიშვნელო როლს, რათა კონსტიტუცია ფორმალურად არ იქნეს დარღვეული. მოვუწოდებთ საქართველოს პარლამენტს, მხარი არ დაუჭიროს წარმოდგენილ კანონპროექტს”, - აღნიშნულია განცხადებაში.

5 ივლისის საქმეზე, „საზოგადოებრივი მაუწყებლის“ ოპერატორის, ილია თვალიაშვილის მიმართ განხორციელებულ ფიზიკურ ძალადობაში მსჯავრდებულებს – გიორგი წარუაშვილსა და გიორგი მაღრაძეს თბილისის სააპელაციო სასამართლომ მსჯავრი დაუმძიმა და 3-3 წლით თავისუფლების აღკვეთა მიუსაჯა. ამ გადაწყვეტილებით შეიცვალა პირველი ინსტანციის სასჯელი – საქალაქო სასამართლომ მათ 1 წლით და 3 თვით თავსუფლების აღკვეთა გასულ წელს მიუსაჯა. პროკურატურა სწორედ აღნიშნული ორი პირის მიმართ სასჯელის დამძიმებას ითხოვდა. დღესვე გამოცხადდა გადაწყვეტილება 5 პირის მიმართ ე.წ. მოპედის ეპიზოდზე. მათ მიმართ პირველი ინსტანციის სასამართლოს გადაწყვეტილება უცვლელი დარჩა. საქალაქოს გადაწყვეტილებით, ზაზა ჭაავას 1 წლით პატიმრობა; მურად დევდარიშვილის 1 წლით; თედო ბურდულს 3 წლით; გენო გერმანიშვილს 3 წლით; გიორგი ხეჩუაშვილს 3 წლით თავისუფლების აღკვეთა ჰქონდათ მისჯილი. პუბლიკა

ავტორი: მარიანა კოტოვა, სოხუმი აფხაზეთის პარლამენტს ჯერ არც განუხილავს ე.წ. აპარტამენტების ექსპლუატაციის შესახებ კანონპროექტი, თუმცა უკანასკნელი რამდენიმე თვეა ეს საკითხი აფხაზური საზოგადოების ვნებათაღელვას იწვევს. სანამ პოლიტიკოსები ჰიპოტეზურ კანონზე საკუთარ სტრატეგიებს აწყობენ, ბიზნესმენები, მომავალში საცხოვრებელი ფართების სარგებლიანად გაყიდვის მიზნით, მრავალბინიან შენობებს აშენებენ. მშენებლობის პროცესი ზედმეტი ყურადღების გარეშე ჩაივლიდა, რომ არა აქტივისტთა ჯგუფი Харахакалакь [“ჩვენი ერი”], რომელმაც სოხუმის ცენტრში მრავალსართულიანი შენობის მშენებლობის წინააღმდეგ ბრძოლა დაიწყო. სოხუმი, მშენებლობები; ფოტო: ნეტგაზეთი სოხუმის სანაპიროსთან, რუსეთის საელჩოს გვერდით საცხოვრებელი კომპლექსის მშენებლობა ბიზნესმენმა თემურ ზარქუამ დაიწყო. სამუშაოები დინამიკურად მიმდინარეობდა, თუმცა, როგორც კი შენობის ბოლო სართულები ქალაქის ყველა წერტილიდან გამოჩნდა, სოხუმელები შეშფოდნენ – სოციალურ ქსელებში მომხმარებლები და საინიციატივო ჯგუფ Харахакалакь-ის არქიტექტორები და ინჟინრები სოხუმის არქიტერქტურის განადგურებაზე საუბრობდნენ და ეჭვი გამოთქვეს, მიმდინარეობდა თუ არა მშენებლობა კანონის დაცვით. მათვე დაიწყეს მშენებლობის დოკუმენტაციის მოკვლევაც. აქტივისტებს ხელში ჩაუვარდათ დოკუმენტი – სოხუმის საქალაქო კრების 2009 წლის განკარგულება, სადაც საუბარია იმის შესახებ, რომ ქალაქის იმ კონკრეტულ ტერიტორიაზე აკრძალულია 16 მეტრზე მაღალი შენობის მშენებლობა. შენობა კი, რომელსაც თემურ ზარქუა აშენებს, ამ მაჩვენებელს ბევრად აჭარბებს. შესაბამისად, აქტივისტებმა გენერალურ პროკურატურას მიმართეს. პროკურატურაში არქიტექტორების შენიშვნები გაიზიარეს და მშენებლობის შეწყვეტა და ზედა სართულების დემონტაჟი მოითხოვეს. თუმცა სოხუმის მერი ბესლან ეშბა პროკურატურის მოთხოვნას არ დაეთანხმა და 2009 წლის დადგენილებას უკანონო უწოდა. სანამ ბიუროკრატიული შეტაკებებია, მშენებლობა გრძელდება. არაოფიციალური ინფორმაციით, აფხაზი ბიზნესმენის უკან კი “რუსული ფულია”. სოხუმი, მშენებლობები; ფოტო: ნეტგაზეთი სიტუაციაზე გავლენის სადავეების არქონის გამო Харахакалакь-მ საინფორმციო ომი დაიწყო. სოციალური ქსელების, ბლოგერებისა და მედიის დახმარებით, აქტივისტებმა აფხაზეთში გავლენიანი და ავტორიტეტული მოქალაქეების მოსაზრებების გაზიარება დაიწყეს. პირველი ასეთი მოსაზრება რომან დბარს ეკუთვნის, აფხაზეთის მეცნიერებათა აკადემიის ეკოლოგიის ინსტიტუტის დირექტორს, რომელმაც სოხუმის უკანასკნელი ოცი წლის არქიტექტურას “აბსოლუტურად ქაოსური მშენებლობების დომინირება” უწოდა. სოხუმი, მშენებლობები; ფოტო: ნეტგაზეთი სოხუმი, მშენებლობები; ფოტო: ნეტგაზეთი ამის მიზეზად კი სპეციალისტი ქალაქ სოხუმის მშენებლობის გენერალური გეგმისა დ კონცეფციის არარსებობას ასახელებს. “დღეს, მცირე გამონაკლისების გარდა, მშენებარე ობიექტები დაბალი არიქტექტურული ხარისხითა და იაფფასიანი და ღრმა პროვინციალიზმის ხელწერით გამოირჩევა. ზღვის კუთხიდან თუ გავხედავთ ქალაქს, დავინახავთ სამგანზომლებიან სივრცეს. მაღალი შენობები საზღვაო ზოლში დაფარავს ამ სივრცეებს და სოხუმის ესთეტიკას სულ გააქრობს”, – ამბობს რობან დბარი. ამასთან, დბარი საუბრობს იმის შესახებ, რომ ახალი ობიექტების მშენებლობები არ ითვალისწინებს სატრანსპორტო დატვირთვას, ელექტრომომარგებისა და წყალმომარაგების საკითხებს, რომელიც ძალიან პრობლემურია სოხუმში. Харахакалакь-ს აქტივისტთა ჯგუფს შეუერთდა საინიციატივო ჯგუფი «Харахпицунда». მათ “უკანონო მშენებლოების წინააღმდეგ” ორგანიზება გაუკეთეს აქციას, რომლის ფარგლებში ქალაქში გამოკიდეს ბანერები და მოწოდებები ხელისუფლებისადმი და საზოგადოებისადმი. ასევე, ბანერები ვლადისლავ არძინბას ფრაზებით და ციტატები ფაზილ ისკანდერის შემოქმედებიდან. პლაკატების ჩამოკიდების გამო შსს-ს თანამშრომლებმა აქციაში მონაწილე ახალგაზრდები წვრილმანი ხულიგნობის ბრალდებით ერთი დღით დააკავეს. ბანერები კი ექსპერტიზაზე გაგზავნეს შესაძლო “ექსტრემიზმის დასადგენად”. ინციდენტმა აფხაზურ საზოგაოდოებაში დიდი რეზონანსი გამოიწვია, «Харахпицунда»-ს მოანილეები კი დღის გმირები გახდნენ. ამჟამად «Харахпицунда» -ს საინიციატივო ჯგუფის აქტივისტებზე ზეწოლაა. ცდილობენ ისინი დაადანაშაულონ ანტირუსულ განწყობებში და იმაში, რომ ფინანსდებიან დასავლეთიდან და გარკვეულწილად დაკავშირებული არიან საქართველოსთანაც. «Харахпицунда» ბრალდებების საპასუხოდ აცხადებს, რომ მათი მოტივაცია მხოლოდ პატრიოტიზმი და აფხაზეთისა და მისი მოსახლეობის ინტერესებისთვის ბრძოლაა. აფხაზურმა ანონიმურმა ტელეგრამ არხმა “ამრა ლაიფმა” აქტივისტთა დისკრედიტაციის მიზნით გამოაქვეყნა «Харахпицунда»-ს ერთ-ერთი მონაწილის, ელიტა კოკოსკერიას ფოტოც მისი სოციალური ანგარიშიდან, სადაც გოგონა აშშ-ში, ამავე ქვეყნის დროშით დგას. ტელეგრამ არხი ამ გზით შეეცადა ეჩვენებინა, რომ მშენებლობების წინააღმდეგ აქციის მონაწილეები გარე გავლენებით მოქმედებენ. მსგავსი ცილისწამების ობიექტები გახდნენ «Хара Хакалакь»-ს საინციატივო ჯგუფის წევრებიც – მათ შესახებ ხშირად ავრცელებენ ინფორმაციას, თითქოს ქრთამის სანაცვლოდ ახალგაზრდები მზად არიან შეწყვიტონ საინფორმაციო ომი. ბრალდებების საპასუხოდ, აქტივისტები ცნობილი სოხუმელების მოსაზრებების გამოქვეყნებას აგრძელებენ. აფხაზეთში ცნობილი ჟურნალისტი და მწერალი ნადეჟდა ვენედიქტოვა ერთ-ერთია, რომლის მოსაზრებაც აქტივისტებმა გამოაქვეყნეს. ვენედიქტოვას აზრით, სოხუმი ჯერ კიდევ ინარჩუნებს განუმეორებელ იერსახეს, თუმცა უკანასკნელ წლებში აშკარა ტენდენციაა, გადააქციონ ის სტანდარტულ ქალაქად მაღალი შენობებით და დაუკარგონ ის არქიტექტურული თავისებურება, რომელიც დაეხმარებოდა მსოფლიოს კურორტებთან კონკურენციისას. ოპოზიციონერ ადგურ ანრძიბას თქმით, თუ მშენებლობების შესახებ კანონი მიიღეს, სოხუმში ქაოსური მშენებლობების შეჩერება შეუძლებელი გახდება. პარტია “აფსნის” ხელმძღვანელი ვიტალი გაბინია კი დარწმუნებულია, რომ კანონის მიღებით მხოლოდ ერთეული ჩინოვნიკები მიიღებენ მოკლევადიან ფინანსურ სარგებელს, ამავე დროს, ვერ მისცემენ ბიზნესმენებს იმის გარანტიებსაც კი, რომ ელექტროენერგიითა და წყალმომარაგებით იქნებიან უზრუნველყოფილი. ნეტგაზეთი

ევროპის საბჭოს პრეზიდენტი შარლ მიშელი, კვირის ბოლოს, ბრიუსელში აზერბაიჯანის პრეზიდენტს ილჰამ ალიევს და სომხეთის პრემიერ-მინისტრს ნიკოლ ფაშინიანს ქვეყნებს შორის ურთიერთობების ნორმალიზებაზე მოსალაპარაკებლად შეხვდება. ამის შესახებ Financial Times-ი და Politico წყაროებზე დაყრდნობით იტყობინებიან. FT-ის ცნობით, აზერბაიჯანისა და სომხეთის ლიდერების შეხვედრა კვირას, 14 მაისს არის დაგეგმილი, Politico წყაროზე დაყრდნობით წერს, რომ სამიტი 13-14 მაისს გაიმართება და მისი დღის წესრიგის ჩამოყალიბება ჯერ კიდევ მიმდინარეობს. ალიევისა და ფაშინიანის შეხვედრა ბრიუსელში თუ ნამდვილად შედგა, ეს იქნება პირველი შეხვედრა მიმდინარე წლის თებერვლის შემდეგ, როდესაც მათ მიუნხენის უსაფრთხოების კონფერენციის საზღვრებს შორის კომუნიკაცია მოხდა. ბოლო შეხვედრა ბაქოსა და ერევნის წარმომადგენლებს შორის გასულ კვირას გაიმართა, როდესაც ვაშინგტონში საგარეო საქმეთა მინისტრები შეხვდნენ, რის შემდეგაც აშშ-ს სახელმწიფო მდივანმა ენტონი ბლინკენმა განაცხადა, რომ მათ ურთიერთობაში „მნიშვნელოვანი პროგრესია“ მიღწეული. Financial Times-ი დასძენს, რომ ევროსაბჭოს ხელმძღვანელს და სომხეთისა და აზერბაიჯანის ლიდერებს ასევე სურთ მორიგი შეხვედრის ორგანიზება 1 ივნისს ევროპის პოლიტიკური გაერთიანების სამიტის ფარგლებში, გერმანიის კანცლერის ოლაფ შოლცისა და საფრანგეთის პრეზიდენტის ემანუელ მაკრონის მონაწილეობით. პალიტრანიუსი