tvati

ცხოველთა მონიტორინგის სააგენტოს დირექტორის, გიორგი კობიაშვილის ინფორმაციით, შინაური ცხოველის გასეირნების წესების დარღვევისთვის, შესაძლოა, მეპატრონისთვის გათვალისწინებული ჯარიმა გაიზარდოს. როგორც მან აღნიშნა, აღნიშნულ სიახლეზე საკანონმდებლო ორგანო მუშაობს, დღეს კი ჯარიმის ოდენობა 20 ლარით არის განსაზღვრული. „ცხოველი რეგისტრირებული უნდა იყოს, მეტისის შემთხვევაში მეპატრონე ვალდებულია მოახდინოს ცხოველის სტერილიზაცია-კასტრაცია. მინიმალური საკვების მიცემა, ასევე, აუცილებელია მეპატრონემ გასეირნების წესები დაიცვას. კერძოდ, 19:00 საათიდან 23:00 საათამდე, როდესაც გამოგყავს ცხოველი, უნდა გამოიყენო ალიკაპი ან საბელი. ასევე, შესაძლებელია მოკლე საბელით გამოიყვანო, ალიკაპის გარეშე. ეს მინიმალური წესებია, რომელიც მეპატრონემ უნდა დაიცვას. არსებობს გასეირნების წესები, რომლის დარღვევის შემთხვევაში მეპატრონე 20 ლარით ჯარიმდება. როგორც მე მაქვს ინფორმაცია, იგეგმება ამ ჯარიმის გაზრდა. რასაც მეც ვემხრობი. ვფიქრობ, დღეს საკმაოდ დიდ პრობლემა არის ამ მიმართულებით. სკვერებში, სადაც არსებობს ძაღლებისთვის სასეირნო სპეციალური სივრცე ცარიელია და ძაღლების უშვებენ საბელის გარეშე, მაგალითად ბავშვების სივრცეში“,- აღნიშნა გიორგი კობიაშვილმა მედიაცენტრ „მთავარში“. ინტერპრესნიუსი

საქართველოს პარლამენტის თავმჯდომარე შალვა პაპუაშვილი, დელეგაციასთან ერთად, 7-12 მაისს, ვიზიტით მალტისა და იტალიის რესპუბლიკებს ეწვევა. საქართველოს პარლამენტის ინფორმაციით, პარლამენტის თავმჯდომარე შეხვედრებს მალტის რესპუბლიკის პარლამენტის სპიკერთან და მალტის რესპუბლიკის პრეზიდენტთან გამართავს. შეხვედრა გაიმართება მალტის პარლამენტის საგარეო და ევროპულ საქმეთა კომიტეტის წევრებთან. „ ვიზიტის ფარგლებში დაგეგმილია შეხვედრები ვატიკანის სამოციქულო სასახლეში აღმოსავლეთ ეკლესიების დიკასტერის პრეფექტთან, და წმინდა საყდრის სახელმწიფო მდივანთან. პარლამენტის თავმჯდომარე და დელეგაციის წევრები იტალიის პარლამენტის ქვედა პალატის თავმჯდომარე ლორენცო ფონტანას და სენატის ვიცე-პრეზიდენტ ჯან მარკო ჩენტინაიოს შეხვდებიან. საქართველოს საპარლამენტო დელეგაცია, პარლამენტის თავმჯდომარის ხელმძღვანელობით , იტალიის რესპუბლიკის ევროპულ საქმეთა მინისტრს, რაფაელე ფიტოს და იტალიის საგარეო საქმეთა და საერთაშორისო თანამშრომლობის მინისტრის მოადგილეს, ედმონდო ჩირიელის შეხვდება. შეხვედრები გაიმართება იტალია-საქართველოს საპარლამენტო მეგობრობის ჯგუფის წევრებთან და ქართული დიასპორის წარმომადგენლებთან. საპარალამენტო დელეგაციის შემადგენლობაში დეპუტატები: ნიკოლოზ სამხარაძე, მაკა ბოჭორიშვილი, გივი მიქანაძე, ქეთევან თურაზაშვილი და პარლამენტის თავმჯდომარის კაბინეტის უფროსი, ლევან მახაშვილი შედიან“,- აღნიშნულია ინფორმაციაში. იპნ

სოფიო ჩიკვილაძე (ცოტნე გამსახურდიას პირველი მეუღლე): "ძაან არ მინდა ამ თემაზე საჯაროდ საუბარი ,მაგრამ სხვა გზა არაა. კოლხურ კოშკს და გასხვისებულ მიწას ეხება ,ვისაც არ გაინტერებთ ასქროლეთ, to be honest მეც მეზარება წერა.. ცოტნეს ყავს მემკვიდრეები ,ხოდა რომ ყიდით რას ყიდით ან რა უფლებით? ან ვინც იყიდა თავში ჭკუა თუ აქვს? ნომერ პირველი მემკვიდრე არის აღშფოთებული. მე როგორც მის მშობელ დედას მთხოვა ,რომ დამეწერა. აქვე არავის არ ეგონოს ,რომ ჩემი შვილების წინ ვინმეს ან რამეს დავაყენებ . ხოდა რავიცი გინდათ შოუ? კი ბატონო ..რა პრობლემაა. პ.ს. არადა ვიჯექი ჩემთვის ესპანურის დალოცვილ* ზმნებს ვიზეპირებდი ..არ გასვენებთ გამჩენი არც თქვენ და არც მე." სტატუსი იხილეთ ბმულზე: https://www.facebook.com/sopho.chikviladze1/posts/6390247664347727

ვანში არასრულწლოვნების მიმართ განხორციელებული შესაძლო გარყვნილი ქმედების ფაქტზე გამოძიება მიმდინარეობს. ამის შესახებ შსს-ში აცხადებენ. უწყების ცნობით, საგამოძიებო მოქმედებები პირველ მაისსვე დაიწყო, მათ შორის მშობლის თანდასწრებით გამოიკითხნენ არასრულწლოვნები. „მიმდინარე წლის პირველ მაისს, ვანის რაიონულ სამმართველოში მიღებული ოპერატიული ინფორმაციის საფუძველზე, არასრულწლოვნების მიმართ განხორციელებული შესაძლო გარყვნილი ქმედების ფაქტზე დაიწყო გამოძიება. გამოძიების ფარგლებში 1-ელ მაისსვე დაიწყო საგამოძიებო მოქმედებები, მათ შორის კანონიერი წარმომადგენლის - მშობლის თანდასწრებით გამოიკითხნენ არასრულწლოვნები. მომდევნო დღეებში ჩატარდა ასევე არაერთი საგამოძიებო მოქმედება, მათ შორის დამატებით გამოიკითხნენ საქმესთან შემხებლობაში მყოფი პირები, სკოლის მოსწავლეები, სკოლის პედაგოგები, საქმეზე გრძელდება გამოძიება, ტარდება ყველა საჭირო საპროცესო და საგამოძიებო მოქმედება. საქმეზე გამოძიება სსკ-141-ე მუხლის პირველი ნაწილით გრძელდება”, - აცხადებენ შსს-ში. გამოძიების ფარგლებში მოხდება ყველა იმ პირის დაბარება და გამოკითხვა ვისაც აქვს ნებისმიერი ინფორმაცია საქმესთან დაკავშირებით. შეგახსენებთ, სოციალურ ქსელში გავრცელებული ინფორმაციით, სკოლის სამარშრუტო ტაქსის მძღოლი მოსწავლეებს სიტყვიერად და ფიზიკურად ავიწროებდა. ვიდეომასალა მოსწავლეებმა გაავრცელა. არსებული ინფორმაციით, არასრულწლოვანებმა მომხდარის შესახებ მშობლებს უამბეს, რის შემდეგაც საქმეში პოლიცია ჩაერთო. მომხდარის გამო თანამდებობა დატოვა სკოლის დირექტორმა, რომელიც მძღოლის მეუღლეა. სავარაუდო დამნაშავის ოჯახში მომხდარის დეტალებზე არ საუბრობენ და მომხდარ ფაქტს დაუჯერებლად მიიჩნევენ. მომხდარზე საუბარი უჭირთ არასრულწლოვანების ოჯახშიც.

აშშ-ის ტეხასის შტატის ქალაქ ალენში მდებარე სავაჭრო ცენტრში მამაკაცმა უმისამართო ცეცხლი გახსნა. სროლის შედეგად დაიღუპა რვა ადამიანი. დაჭრილია შვიდი ადამიანი, მათგან სამის მდგომარეობა მძიმეა. დაღუპულებს შორის არიან ბავშვებიც. თავდამსხმელი პოლიციამ მოკლა. ტეხასის გუბერნატორმა გრეგ აბოტმა მომხდარს „ენით აღუწერელი ტრაგედია“ უწოდა და თქვა, რომ შტატის ხელისუფლება ადგილობრივ ხელისუფლებას ყველანაირ დახმარებას გაუწევდა. ქალაქ ალენში 105 ათასი ადამიანი ცხოვრობს და ის დალასიდან 30 კილომეტრის მოშორებით მდებარეობს. radio tavisupleba

6 მაისს, სოციალურ მედიაში გავრცელდა არასრულწლოვანის მიმართ განხორციელებული, სავარაუდო სექსუალური ხასიათის ქმედების ამსახველი ვიდეოკადრები. ამ დროისათვის, სახალხო დამცველის ხელთ არსებული ინფორმაციით, საქმეზე დაწყებულია გამოძიება. სახალხო დამცველი მოუწოდებს საგამოძიებო ორგანოებს დროული და ეფექტიანი რეაგირებისკენ.

ჩარლზ III გაერთიანებული სამეფოს მეფედ აკურთხეს, მისი მეუღლე კამილა — დედოფლად. ცერემონია 6 მაისს, ლონდონში, უესტმინსტერის სააბატოში გაიმართა 2 300 სტუმრის წინაშე, რომელთა შორის სხვადასხვა სახელმწიფოს 100 ლიდერიც იყო. აღნიშნულს წინ უძღოდა მსვლელობა ლონდონის ბუკინგემის სასახლიდან სააბატომდე, კორონაციის შემდეგ კი მეფე და დედოფალი კვლავ სასახლეში დაბრუნდნენ. პროცესისთვის თვალის მისადევნებლად ლონდონის ქუჩებში ათასობით ადამიანი იყო შეკრებილი. ზოგიერთმა მოქალაქემ ადგილები წინა ღამით დაიბევა, რათა უკეთესი ხედით ენახა ცერემონია. კორონაციას თან ერთოდა პროტესტიც მონარქიის წინააღმდეგ. პოლიციამ 52 ადამიანი დააკავა, რომელთა შორისაა ერთ-ერთი ცნობილი ანტი-მონარქისტული ჯგუფის, “რესპუბლიკის” ლიდერი. აქტივისტებმა და უფლებადამცველებმა გააკრიტიკეს სამართალდამცავთა ეს ქმედება, პოლიცია კი ამბობს, რომ დაკავებულნი საზოგადოებრივი წესრიგის დარღვევასა და სხვა ქმედებებში არიან ეჭვმიტანილნი. ჩარლზ III-ის დედა, გაერთიანებული სამეფოს დედოფალი ელისაბედ II, გასული წლის 8 სექტემბერს, 96 წლის ასაკში გარდაიცვალა. ის დიდი ბრიტანეთის მონარქებს შორის ყველაზე დიდხანს, 70 წლის მანძილზე იკავებდა ტახტს. მეფე ჩარლზ III და დედოფალი კამილა ბუკინგემის სასახლის აივანზე. ფოტო: EPA-EFE/Neil Hall მეზღვაურთა მარში იმ დროს, როცა მეფე და დედოფალი ბუკინგემის სასახლეში ბრუნდებიან კორონაციის შემდეგ. ფოტო: EPA-EFE/STR ლონდონის ქუჩებში ათასობით მოქალაქე გამოვიდა პროცესზე თვალის მისადევნებლად. ფოტო: EPA-EFE/STR ლონდონის ქუჩებში ათასობით მოქალაქე გამოვიდა პროცესზე თვალის მისადევნებლად. ფოტო: EPA-EFE/STR მეფე ჩარლზ III და დედოფალი კამილა ბუკინგემის სასახლეში ბრუნდებიან. EPA-EFE/STR მეფე ჩარლზ III და დედოფალი კამილა ბუკინგემის სასახლეში ბრუნდებიან. EPA-EFE/STR მონარქიის საწინააღმდეგო პროტესტი ლონდონში. დემონსტრანტს ტანისამოსზე აწერია “[ის] არ არის ჩემი მეფე”, ერთ-ერთ პლაკატზე კი წერია “აიკრძალოს მონარქია”. ფოტო: EPA სამეფო საჰაერო ძალების ავიაშოუ ლონდონის თავზე. ფოტო: EPA-EFE/STR მოქალაქე ტელეფონს ამოწმებს მეფისა და დედოფლის მოლოდინში. ფოტო: EPA სამეფო ოჯახის წევრები ბუკინგემის სასახლის აივნაზე. ფოტო: EPA netgazeti

თბილისის ანძა ევროკავშირის დროშის ფერებში განათდა. „თბილისი გილოცავთ ევროპის დღეს! – ევროპის დღესთან დაკავშირებით, თბილისის ანძა ევროკავშირის დროშის ფერებში განათდა. ევროპის დღეები თბილისში საზეიმო ღონისძიებებით აღინიშნება“, – აღნიშნულია თბილისის მერიის ფეისბუქის გვერდზე გამოქვეყნებულ ინფორმაციაში.

თბილისში, იაკობ გოგებაშვილის ქუჩაზე 4 მაისს კაცის მკვლელობისთვის დაკავებულ დაცვის პოლიციის თანამშრომელს ბრალი სისხლის სამართლის კოდექსის შემსუბუქებული მუხლით წაუყენეს. თუკი თავდაპირველად საუბარი იყო განზახ მკვლელობის კვალიფიკაციაზე, ახლა უკვე მას "დამნაშავის შეპყრობისთვის აუცილებელი ზომის გადაცილებით მკვლელობას" ედავებიან. მას აქამდე 10-დან 15 წლამდე პატიმრობა ემუქრებოდა, ახლა კი შესაძლოა გამოსასწორებელი სამუშაო ვადა ან შინაპატიმრობა მიუსაჯონ. 108-ე მუხლით განზრახ მკვლელობა ისჯება თავისუფლების აღკვეთით ვადით 10-დან 15 წლამდე წლამდე; 114-ე მუხლით მკვლელობა დამნაშავის შეპყრობისათვის აუცილებელი ზომის გადაცილებით ისჯება გამასწორებელი სამუშაოთი ვადით ორ წლამდე ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით ერთიდან სამ წლამდე. ბრალის წაყენების შესახებ ინფორმაცია პროკურატურის პრესსამსახურმა გაავრცელა. შემსუბუქებული კვალიფიკაციის მიუხედავად, უწყება აღკვეთის ღონისძიებად პატიმრობის შეფარდების შუამდგომლობით მიმართავს სასამართლოს. რა მოხდა ვერაზე - გამოძიების ვერსია გოგებაშვილის ქუჩაზე მდებარე რესტორან "ლა ვერასთან" იმყოფებოდნენ გ.მ. და დაცვის პოლიციის ის თანამშრომელი, რომელიც საგამოძიებო სამსახურმა დააკავა. 4 მაისის საღამოს მათ მიუახლოვდა კაცი (ს.გ.), რომელმაც ცეცხლსასროლი იარაღიდან რამდენჯერმე ესროლა გ.მ.-ს, რომელიც დაცვის პოლიციის თანამშრომლის დასაცავი პირის ნათესავია და შემთხვევის ადგილიდან მიმალვა სცადა. სწორედ ამ დროს მას დაედევნა დაცვის პოლიციის თანამშრომელი და ცეცხლსასროლი იარაღით რამდენჯერმე ესროლა - კაცი (ს.გ.) გულ-მკერდის არეში მიყენებული ცეცხლნასროლი დაზიანებების შედეგად ადგილზე გარდაიცვალა. მომხდართან დაკავშირებით გამოძიება სისხლის სამართლის კოდექსის 108-ე მუხლით დაიწყო, რაც განზრახ მკვლელობას გულისხმობს. სპეციალურ საგამოძიებო სამსახურში დანაშაულის მეორე დღეს 5 მაისს ბრიფინგი გაიმართა, სადაც თქვეს, რომ დააკავეს შინაგან საქმეთა სამინისტროს დაცვის პოლიციის თანამშრომელი. რადიო თავისუფლება

კაპიტოლიუმის შტურმში მონაწილე მამაკაცს 14 წლით პატიმრობა მიუსაჯეს. გადაწყვეტილება ვაშინგტონის სასამართლომ გამოიტანა. ეს ამავე საქმეზე ბრალდებულთა წინააღმდეგ გამოტანილ განაჩენთა შორის ყველაზე მკაცრი ვერდიქტია. საქმე ეხება პენსილვანიის შტატში მცხოვრებ 49 წლის მამაკაცს, რომელიც 2021 წლის 6 იანვარს კაპიტოლიუმის შტურმის დროს წინ მიუძღოდა ტრამპის მხარდამჭერებს და პოლიციელებს დაესხა თავს. კერძოდ მან სამართალდამცავების წინააღმდეგ წიწაკის სპერეი გამოიყენა და სკამი ჩაარტყა. შეგახსენებთ, რომ კაპიტოლიუმის შტურმის საქმეზე ბრალი 950 ადამიანს წაუყენეს. სასამართლოებმა 600-ზე მეტი განაჩენი უკვე გამოიტანეს. ავტორი - ლევან ახალაია

რუსეთის ქალაქ ნიჟნი ნოვგოროდში ავტომობილის აფეთქების შედეგად რუსი პროპაგანდისტი, მწერალი ზახარ პრილეპინი დაშავდა. ინფორმაციას საინფორმაციო სააგენტო „ტასი“ ავრცელებს. რუსეთის შინაგან საქმეთა სამინისტროს ინფორმაციით, აფეთქების შედეგად გარდაიცვალა პროპაგანდისტის მძღოლი, ხოლო თავად პრილეპინი დაშავებულია. წინასწარი ინფორმაციით, შემთხვევას სხვა მსხვერპლი არ მოჰყოლია. მომხდარის მოტივი ამ დროისთვის უცნობია, მიმდინარეობს გამოძიება. 1tv

ახლა, იმის ნაცვლად, რომ დეპუტატის უფლებამოსილება შეასრულონ, მოინდომეს, რომ გახდენენ გამომძიებლები. ეს აჩვენებს,­ რამდენად სკანდალზე და არევაზე ორიენტირებული ოპოზიცია ჰყავს დღეს საქართველოს და არა, ხელისუფლებას, - ამის შესახებ პარლამენტის თავმჯდომარე, შალვა პაპუაშვილმა ჟურნალისტებს განუცხადა, როდესაც ე.წ. ქოლ-ცენტრებთან დაკავშირებით ოპოზიციის მიერ საგამოძიებო კომისიის შექმნის მოთხოვნაზე ისაუბრა. პაპუაშვილის თქმით, ეს მოთხოვნა ოპოზიციის შემდგარობას აჩვენებს. „ეს აჩვენებს ჩვენი ოპოზიციის შემდგარობას, აჩვენებს იმას, რომ მათი პოლიტიკურ დღის წესრიგი ნაკარნახევია არა მოქალაქეების ინტერესებით, არამედ ხან გარედან, ხან სხვადასხვა ჯგუფებიდან. ქართველმა ხალხმა შეადაროს, რას აკეთებს ხელისუფლება, რას აკეთებს ოპოზიცია. ხელისუფლება ერთი წელია უკვე დაკავებულია იმით, რომ იმ წინაპირობებს ასრულებს, რომელიც მნიშვნელოვანია კანდიდატის სტატუსის მისაღებად. ოპოზიცია თითს თითზე არ ადებს იმისთვის, რომ ამაში მონაწილეობა მიიღოს. ახლა, იმის ნაცვლად, რომ დეპუტატის უფლებამოსილება შეასრულონ მოინდომეს, რომ გახდენენ გამომძიებლები. ეს აჩვენებს, რამდენად სკანდალზე და არევაზე ორიენტირებული ოპოზიცია ჰყავს დღეს, საქართველოს და არა, ხელისუფლებას. სინამდვილეში ეს არის საქართველოს ოპოზიცია, რომელიც ყველაფერს აკეთებს იმისთვის, რომ შექმნას ნეგატიური ფონი იმისთვის, რომ როდესაც ევროკავშირს გადაწყვეტილება ექნება კანდიდატის სტატუსთან დაკავშირებით, ასეთი ნეგატიური ფონი და ასეთი მღელვარებით იხელმძღვანელოს და არა იმ შედეგით, რომელსაც საქართველო აღწევს“, - განაცხადა პაპუაშვილმა. ipn

უკრაინამ რუსული ტყვეობიდან „აზოვსტალის” 45 დამცველი დაიბრუნა. ინფორმაციას ამის შესახებ უკრაინის პრეზიდენტის ადმინისტრაციის ხელმძღვანელი ანდრეი ერმაკი „ტელეგრამის” პირად არხზე ავრცელებს. „ეს აზოვსტალის 42 მამაკაცი და სამი ქალი დამცველია. ყველა მათგანი ეროვნული გვარდიელია ქვედანაყოფიდან, რომელიც 9 წლის წინ შეიქმნა აზოვის სანაპიროებზე. 35 რიგითი და სერჟანტი, 10 ოფიცერი. მათ შორის არიან მებრძოლები, რომლებიც მარიუპოლის დაცვის დროს „აზოვსტალში” დაქორწინდნენ,” - წერს ერმაკი. ამავდროულად, რუსეთის თავდაცვის სამინისტრო განცხადებას ავრცელებს, რომ „რთული მოლაპარაკებების შედეგად” უკრაინული ტყვეობიდან მათ სამი პილოტი დაიბრუნეს. IPN

დიდ ბრიტანეთში მეფე ჩარლზ III-ის კორონაცია გაიმართა. ცერემონია უესტმინსტერის სააბატოში დაიწყო და მას არქიეპისკოპოსი კენტერბერიელი ატარებდა. მეფემ საკორონაციო ფიცი დადო. ჩარლზ III-ეს გვირგვინი, დიდი სახელმწიფო ხმალი, ორი სამეფო კვერთხი, წმინდა ედუარდის კვერთხი, საკორონაციო ბეჭედი, ასევე ჯვრიანი სკიპტრა და მტრედიანი სკიპტრა გადასცეს. კორონაციის შემდეგ ჩარლზ III სამეფო ტახტზე ავიდა და მღვდელთმსახურებისგან, პერებისგან (მაღალი არისტოკრატია) და საკუთარი ოჯახის წევრებისგან ერთგულების ფიცი მიიღო. იპნ

საქართველოში ევროკავშირის ელჩმა, პაველ ჰერჩინსკიმ ევროპის დღეების აღსანიშნავ ღონისძიებაზე მისულ სტუმრებს ქართულ ენაზე მიმართა. "მოგესალმებით ბატონო პრემიერო, ბატონო პარლამენტის თავმჯდომარევ, ბატონო მერო, ძვირფასო სტუმრებო. ჩვენ აქ ევროპის დღის აღსანიშნად შევიკრიბეთ, რომელსაც საქართველო ევროპული პერსპექტივით ხვდება. ეს დიდი წარმატებაა. შემდეგი ეტაპი კანდიდატის სტატუსის მოპოვებაა, რაც კიდევ უფრო დააახლოებს საქართველოს ევროკავშირის წევრობასთან. ამ მიზანს მოსახლეობის დიდი უმრავლესობა უჭერს მხარს. ეს ისტორიული შანსია იმისთვის, რომ გახდეთ ერთიანი, უსაფრთხო და ეკონომიკურად ძლიერი ევროპული ოჯახის წევრი. ახლა მოქმედების დროა. იმედია, დროს სასიამოვნოდ გაატარებთ მეგობრებთან, კოლეგებთან და ოჯახის წევრებთან ერთად. გაეცნობით ჩვენი, ევროპის გუნდის და ჩვენი პარტნიორების საქმიანობის შედეგებს, ეწვევით ევროსოფელს, რომელიც ევროკავშირის მრავალფეროვნებას წარმოაჩენს თავისი ისტორიით, კულტურითა და ტრადიციებით. გილოცავთ ევროპის დღეს", - თქვა ევროკავშირის ელჩმა. ამ მიმართვას უსმენდნენ: პრემიერ-მინისტრი ირაკლი ღარიბაშვილი, პარლამენტის თავმჯდომარე შალვა პაპუაშვილი, თბილისის მერი კახა კალაძე და სხვა სტუმრები. ქართულ ენაზე მიმართვის დასრულებას დამსწრე საზოგადოება ტაშით შეხვდა. დღეს, 6 მაისს, საქართველოში ევროპის დღეების აღსანიშნავი ღონისძიებები იმართება თბილისში, "ექსპო-ჯორჯიას" საგამოფენო სივრცეებში. RADIO TAVISUPLEBA

გულწრფელად იმედი მაქვს, რომ საქართველო ევროინტეგრაციის გზაზე წინ წაიწევა იმდენად სწრაფად, რამდენადაც შესაძლებელია. ველოდებით საქართველოს! - ამის შესახებ საქართველოში ევროკავშირის ელჩმა პაველ ჰერჩინსკიმ ევროპის დღისადმი მიძღვნილ ღონისძიებაზე ჟურნალისტებთან განაცხადა. „დღეს ევროპის დღეს ვზეიმობთ. 70-ზე მეტი წლის წინ სუვერენულმა დამოუკიდებელმა ევროპულმა ქვეყნებმა ძალები გააერთიანეს, რათა მშვიდობა, სტაბილურობა და კეთილდღეობა შეენარჩუნებინათ ევროპაში. ნამდვილად ბედნიერი ვარ იმით, რომ ევროპის დღეს აღვნიშნავთ მაშინ, როდესაც საქართველოს ევროპული პერსპექტივა მიენიჭა ევროპელი ლიდერების მიერ. როგორც ევროკომისიის პრეზიდენტმა თქვა, საქართველოს ევროპას მიეკუთვნება და საქართველოს გარეშე ევროპა სრული ვერ იქნება. აქ იმისთვის ვართ, რომ ევროპული ერთიანობის, ევროპული მრავალფეროვნების შესანიშნავი იდეა აღვნიშნოთ და ველოდებით საქართველოს! და გულწრფელად იმედი მაქვს, რომ საქართველო ევროინტეგრაციის გზაზე წინ წაიწევა იმდენად სწრაფად, რამდენადაც შესაძლებელია. გილოცავთ ევროპის დღეს”, - განაცხადა ჰერჩინსკიმ.

გაერთიანებული სამეფოს მონარქის, კარლ III-ის კორონაციისთვის ბუკინგემის სასახლეში მზადება მიმდინარეობს. ბუკინგემის სასახლესთან საზეიმო ღონისძიების სანახავად ასობით ადამიანი უკვე შეიკრიბა. BBC-ის ინფორმაციით, პოლიციამ მონარქიის მოწინააღმდეგე 6 აქტივისტი დააკავა, რომლებიც კორონაციის პროცესს აპროტესტებდნენ. ოფიციალურად კორონაცია ბუკინგემის სასახლიდან უესტმინსტერის სააბატოსკენ საზეიმო მსვლელობით დაიწყება, რომელშიც 200-მდე სამხედრო მოსამსახურე მიიღებს მონაწილეობას. ლონდონში გამართულ ცერემონიას სამეფო ოჯახის წევრები, სხვადასხვა ქვეყნის ლიდერები და ცნობილი ადამიანები დაესწრებიან. ცერემონია მრავალფეროვანი და ინკლუზიური იქნება. ქრისტიანი სასულიერო პირების გარდა მასში მონაწილეობას მიიღებენ იუდაიზმის, ისლამის, ბუდიზმისა და სიქჰიზმის წარმომადგენლები. ჩარლზ მესამის კორონაცია რამდენიმე საათში, უესტმინსტერის სააბატოში გაიმართება, სადაც ის სამეფო ფიცს დადებს. ჩარლზი გაერთიანებული სამეფოს მეორმოცე მონარქი იქნება, რომელსაც გვირგვინს უესტმინსტერის სააბატოში დაადგამენ, რის შემდეგაც მას ტახტზე აიყვანენ. მეფე ჩარლზმა გაერთიანებული სამეფოს ტახტი დედის, დედოფალ ელისაბედ მეორეს გარდაცვალების შემდეგ დაიკავა. დედოფალი ელისაბედ მეორე 2022 წლის 8 სექტემბერს გარდაიცვალა. ipn

ევროპელმა ლიდერებმა გადაწყვიტეს გაეფართოებინათ ევროპა - ერთ-ერთი პოტენციური კანდიდატი ქვეყანა არის საქართველო. ჩვენ ველით შემდგომ ნაბიჯებს იქიდან გამომდინარე თუ როგორ იქნება რეფორმები იმპლემენტირებული საქართველოში, - ამის შესახებ ევროკავშირის ელჩმა საქართველოში პაველ ჰერჩინსკიმ "ევროპის დღის" აღსანიშნავ ღონისძიებაზე ჟურნალისტებთან განაცხადა. მისი თქმით, საქართველოს უკვე მიენიჭა ევროპული პერსპექტივა, რაც ისტორიული მოვლენა იყო. „დაახლოებით, 70 წლის წინ ევროპულმა დამოუკიდებელმა სუვერენულმა თავისუფალმა ერებმა გადაწყვიტეს გაეერთიანებინათ ძალისხმევა და ესაუბრათ ერთხმად იმისთვის, რომ დაეცვათ მშვიდობა, კეთილდღეობა და თავისუფლება ევროპაში. ამჟამად ჩვენ გვყავს 27 წევრი ქვეყანა და ევროპელმა ლიდერებმა გადაწყვიტეს გაეფართოებინათ ევროპა. ერთ-ერთი პოტენციური კანდიდატი ქვეყანა არის საქართველო. საქართველოს მიენიჭა ევროპული პერსპექტივა, ეს ნამდვილად ისტორიული მიღწევა იყო და ჩვენ ველით შემდგომ ნაბიჯებს იქიდან გამომდინარე თუ როგორ იქნება რეფორმები იმპლემენტირებული საქართველოში",-განაცხადა პაველ ჰერჩინსკიმ. "ევროპის დღის" აღსანიშნავი ღონისძიება "ექსპო ჯორჯიაში" იმართება. "ძალიან თბილად მოგესალმებით ევროპის დღის აღსანიშნავ ღონისძიებაზე. ჩვენ ვართ „ექსპო ჯორჯიაში“, სადაც ყველა მოწვეულია როგორც ახალგაზრდა ისე ასაკოვანი ადამიანები, დასწრება თავისუფალია. ჩვენ გავაკეთებთ ძალიან ბევრ აქტივობას დღის განმავლობაში. ამინდი მშვენიერია, განწყობა ჩინებულია. ჩვენ ყველა აქ ვართ, რათა აღვნიშნოთ ევროპის დღე და კიდევ ერთხელ გიწვევთ ყველას შემოგვიერთდეთ ამ ღონისძიების აღნიშვნაში", - განაცხადა ჰერჩინსკიმ.

საქართველოს პრეზიდენტი სალომე ზურაბიშვილი დღეს ლონდონში, მეფე ჩარლზ III-ის კორონაციის ცერემონიას დაესწრება. დიდ ბრიტანეთსა და ჩრდილოეთ ირლანდიის გაერთიანებულ სამეფოში საქართველოს ელჩის, სოფიო ქაცარავას განცხადებით, ძალიან მნიშვნელოვანია, რომ საქართველო წარმოდგენილია ამ ისტორიულ ღონისძიებაზე და საქართველოს პრეზიდენტი ესწრება ცერემონიას. „ბრიტანეთი განსაკუთრებით ემზადება მეფე ჩარლზის კორონაციისთვის, რაც ბუნებრივია, ვინაიდან თითქმის ერთი საუკუნეა მსგავსი მასშტაბის და მნიშვნელობის ცერემონია არ ჩატარებულა“, - განაცხადა ელჩმა სოფიო ქაცარავამ. ინტერპრესნიუსი

უკრაინაში დაღუპული კიდევ ერთი ქართველი ზურაბ ოდიშვილი საქართველოში ჩამოასვენეს. როგორც „ნაციონალური მოძრაობის“ წევრმა გიორგი ბოტკოველმა ჟურნალისტებს განუცხადა, უკრაინაში მებრძოლი ქართველები ყველა მოქალაქის გასაკეთებელს აკეთებენ და იბრძვიან როგორც საქართველოს, ისე უკრაინის თავისუფლებისთვის. „ჩვენ არაერთი ისტორია მოგვისმენია ქართველი ვაჟკაცების ბრძოლის შესახებ უკრაინის ფრონტზე. ერთი რამ შეგვიძლია, რომ ვიამაყოთ, ყველას გასაკეთებელს აკეთებენ. იბრძვიან როგორც ჩვენი ქვეყნის, ისე უკრაინის თავისუფლებისთვის. ერთ-ერთი ასეთი გამორჩეული იყო ზურაბ ოდიშვილიც. მასზე ბევრი ისტორია მოვისმინეთ იქ მებრძოლი ქართველებისგან და მისი კუთხიდან, ყაზბეგიდანაც, სადაც მის თავგანწირულ ვაჟკაცობაზე საუბრობენ. ჩვენ, როგორც შეგვიძლია, პატივი უნდა მივაგოთ მათ თავდადებასა და გმირობას“,- განაცხადა გიორგი ბოტკოველმა. ცნობისთვის, კიდევ ერთი ქართველი მებრძოლი, ზურაბ ოდიშვილი უკრაინაში 26 აპრილს დაიღუპა. 2022 წლის 24 თებერვლის, რუსეთის ფართომასშტაბიანი შეჭრის შემდეგ, უკრაინაში სულ 43 ქართველი მებრძოლია დაღუპული. იპნ

საქართველოს სახელმწიფო უსაფრთხოების სამსახურისა და ეროვნულ კონტრტერორისტულ სისტემაში ჩართული კომპეტენტური უწყებების მონაწილეობით, წარმოებული ოპერაციების შედეგად, გამოვლენილია ტერორისტული ორგანიზაცია „ისლამური სახელმწიფოს“ აქტივობები სხვადასხვა უცხო ქვეყნის ტერიტორიაზე. დაკავებულია უცხო ქვეყნის ერთი მოქალაქე, - ამის შესახებ სახელმწიფო უსაფრთხოების სამსახურის კონტრტერორისტული ცენტრის დირექტორის მოვალეობის შემსრულებელმა ბაჩა მგელაძემ სუს-ში გამართულ ბრიფინგზე განაცხადა. მისივე ინფორმაციით, კომპლექსურად წარმოებული კონტრტერორისტული საქმიანობის შედეგად მოპოვებულია მასალები და მტკიცებულებები, რითაც იკვეთება უცხო ქვეყნებში მიმდინარე ტერორისტული აქტივობები. "ჩვენს მიერ მოპოვებულია ელექტრონული ინფორმაციის მატარებელი მოწყობილობა, საიდანაც ამოღებულია ამერიკის შეერთებული შტატებისა და ევროპის დედაქალაქების სტრატეგიული ობიექტების სატელიტური ფოტოები. მასშტაბური კონტრტერორისტული ღონისძიებების ფარგლებში, იდენტიფიცირებულია ტერორისტულ ორგანიზაციასთან შემხებლობაში მყოფი პირები, კომუნიკაციის ფორმები, მეთოდები, დაინტერესების სფეროები და შესაძლო თავდასხმის ობიექტები საქართველოს ფარგლებს გარეთ. საერთაშორისო ტერორისტული რისკებიდან გამომდინარე, სახელმწიფო უსაფრთხოების სამსახურის გადაწყვეტილებით, სისხლის სამართლის საქმეზე მიმდინარე გამოძიების ფარგლებში მოპოვებული ინფორმაციები ოპერატიულად იქნა გაზიარებული საქართველოს საერთაშორისო პარტნიორებთან და მეზობელ ქვეყნებთან, მათ შორის თურქეთთან. ამასთან, სამსახურში ამ ეტაპზე აქტიურად მიმდინარეობს ოპერატიულ-სამძებრო, საგამოძიებო და ფარული საგამოძიებო მოქმედებები. საქართველოს სახელმწიფო უსაფრთხოების სამსახური აგრძელებს უკომპრომისო ბრძოლას საერთაშორისო ტერორიზმთან. საქართველო რჩება საერთაშორისო კონტრტერორისტული სისტემის ერთ-ერთ საიმედო პარტნიორად. ამასთან, ცალსახად გამოვრიცხავთ უცხოურ მედია საშუალებებში გავრცელებულ ინფორმაციას, საქართველოს ტერიტორიაზე ტერორისტული მიზნებით სამხედრო მომზადებისა და საწვრთნელი ბაზების არსებობის თაობაზე“, - განაცხადა მგელაძემ. იპნ

საცხოვრებელი ფართიდან გამომდინარე შინაური ბინადარი ცხოველების ყოლა შესაძლოა, რაოდენობრივად შეიზღუდოს. აღნიშნული ჩანაწერი შესაძლოა, „შინაურ ბინადარ ცხოველთა შესახებ საქართველოს კანონის პროექტში“ გაჩნდეს. თუმცა ამ ეტაპზე კანონპროექტში მოსაკრებლის დაწესების დამატება სამსჯელო საკითხს წარმოადგენს. უფრო ზუსტად, მსჯელობის საკითხს წარმოადგენს, პატრონიანი და მიკედლებული შინაური ბინადარი ცხოველების რაოდენობრივი შეზღუდვა: კერძო სახლი / მრავალბინიანი საცხოვრებელი სახლის ბინა; შეზღუდვის საფუძველი - კვადრატულობა, საკადასტრო კოდი. ამასთან, პროექტის თანახმად, გამონაკლისს წარმოადგენს: სამწყემსო დანიშნულების ძაღლები, ფუნქციური დანიშნულების ძაღლები. ავტორი: თაია არდოტელი

რუსეთი 9 მაისის აღლუმებს მზარდი დაუცველობის გამო აუქმებს,- ამის შესახებ დიდი ბრიტანეთის თავდაცვის სამინისტროს დაზვერვის ანგარიშშია ნათქვამი. ანგარიშის თანახმად, რუსეთის უკვე 6-მა ოლქმა და 21-მა ქალაქმა, ასევე დროებით ოკუპირებული ყირიმის საოკუპაციო ხელმძღვანელობამ გააუქმეს 9 მაისის „აღლუმები“. ამას გარდა, კრემლში მაგ დღეს საზეიმო მიღება არ ჩატარდება, ხოლო მოსკოვში, სავარაუდოდ, მცირე მასშტაბის ზეიმი გაიმართება. „დრონების კრემლზე დარტყმა „გამარჯვების დღემდე“ რამდენიმე დღით ადრე, ასეთი თავდასხმების წინააღმდეგ რუსეთის მზარდ დაუცველობაზე მეტყველებს და უდავოდ გაზარდა რუსეთის ხელმძღვანელობის საფრთხის გრძნობა „გამარჯვების დღისადმი“ მიძღვნილ მოვლენებთან დაკავშირებით“, - წერია ანგარიშში. ბრიტანეთის დაზვერვის ინფორმაციით, 9 მაისის ღონისძიებების გაუქმებაზე, სავარაუდოდ, შესაძლო პროტესტებმა და უკრაინაში ომით უკმაყოფილებამაც იქონიეს გავლენა. ipn

ჩვენ უსაფრთხოდ ვართ მხოლოდ უკრაინის წყალობით, რუსეთი საბჭოთა კავშირის აღორძინებას ცდილობს, – ამის შესახებ მოლდოვის პრეზიდენტმა, მაია სანდუმ Financial Times-თან ინტერვიუში განაცხადა. მისივე თქმით, რუსეთი თუ უკრაინას წარმატებით დაიპყრობს, გაძლიერდება ექსპანსია და რუსული ჯარები მოლდოვის ტერიტორიაზეც შევლენ. „მათ სურთ ძველ დროში დაბრუნება, ჩვენ კი ეს არ გვინდა. მოლდოვა 30 წლის განმავლობაში ბუფერული ზონის ნაწილი იყო, ჩვენთვის ეს სიღარიბეს, კორუფციას, ცუდ მმართველობას და ემიგრაციას ნიშნავდა. ჩვენ გვინდა, ვიყოთ დემოკრატიული სამყაროს ნაწილი“, – განაცხადა სანდუმ. 1tv

ჩვენ გვაქვს მეტი პროგრესი ნატო-სა და ევროკავშირთან მიმართებით, – ამის შესახებ უკრაინის პრეზიდენტმა, ვოლოდიმირ ზელენსკიმ ყოველდღიური მიმართვისას განაცხადა. მისივე თქმით, მიმდინარე კვირაში დიპლომატიური მოლაპარაკებების შედეგად უკრაინა კიდევ უფრო გაძლიერდა. „მოხარული ვარ, ვთქვა, რომ ჰელსინკისა და ჰააგის შეხვედრების შემდეგ ჩვენ გავძლიერდით იარაღით ჩვენი ჯარისკაცებისთვის – ხმელეთზე, ჰაერსა და ზღვაზე. მადლობას ვუხდი პარტნიორებს“, – აღნიშნა ზელენსკიმ. ნიდერლანდებიდან დაბრუნების შემდეგ ზელენსკი ბაჰრეინის საგარეო საქმეთა მინისტრსაც ესაუბრა უკრაინაში მშვიდობის დამყარების საკითხებსა და საერთაშორისო ურთიერთობების სტაბილიზაციაზე. ამასთან, უკრაინის ლიდერმა შეხვედრა ვენეციის კომისიის წარმომადგენლებთან და შეერთებული შტატების კონგრესის დელეგაციასთანაც გამართა. „ვისაუბრეთ ჩვენს სახელმწიფოებს შორის შემდგომი თანამშრომლობის საკითხებზე გლობალური თავისუფლებისთვის. ახლა, როდესაც გვერდიგვერდ ვიბრძვით ტირანიის წინააღმდეგ, შეერთებულ შტატებთან ერთად მივედით თანამშრომლობის ისეთ დონეზე, რომელიც არასდროს ყოფილა უკრაინასა და შეერთებულ შტატებს შორის, თუმცა ეს არ არის ლიმიტი. ჩვენ განვაგრძნობთ ჩვენი თანამშრომლობის, ჩვენი ნამდვილი ალიანსის განვითარებას. მადლობას ვუხდი ყველას, ვინც გვეხმარება. მადლობა პრეზიდენტ ბაიდენს ხელმძღვანელობისთვის“, – განაცხადა ზელენსკიმ. ვენეციის კომისიის წარმომადგენლებთან ერთად ვოლოდიმირ ზელენსკიმ უკრაინის საკონსტიტუციო სასამართლოს მოსამართლეების კანდიდატების შერჩევასთან დაკავშირებული საკითხები და დეოლიგარქიზაციის კანონი განიხილა.