tvati

მართლმადიდებელი სამყარო დღეს გიორგობას აღნიშნავს. ამასთან დაკავშირებით ტაძრებში სადღესასწაული წირვა შესრულდება. 6 მაისი წმინდა დიდმოწამე გიორგის აღსრულების დღეა. წმინდანი მესამე საუკუნის მეორე ნახევარში, კაბადოკიაში, მდიდარ ქრისტიანულ ოჯახში დაიბადა. მოგვიანებით, წმინდა გიორგი რომის იმპერატორ დიოკლიტიანეს მმართველობის დროს მხედართმთავარი გახდა. ქრისტიანებზე დევნის დაწყების შემდეგ იგი იმპერატორს განუდგა. კერპთაყვანისმცემელმა რომის იმპერატორმა წმინდა გიორგის ქრისტეს უარყოფა მოსთხოვა. უფლის შეწევნით წმინდა გიორგიმ მრავალი სატანჯველი დაითმინა, მათ შორის – ბორბალზე გაკვრა. მისი თხოვნით უფალმა მიცვალებული მკვდრეთით აღადგინა. წმინდანს 303 წელს თავი მოკვეთეს. წმიდა გიორგი 30 წლის ასაკში ეწამა. იგი ეკლესიის ისტორიაში შევიდა, როგორც ძლევაშემოსილი და უძლეველი ზეციური მხედარი. მართლმადიდებელი ეკლესია წმინდა გიორგის ხსენებას წელიწადში ორჯერ დღესასწაულობს. 23 ნოემბერს მისი ბორბალზე წამების დღეა. ამ უკანასკნელ დღესასწაულს ქართული ეწოდება, რადგან სხვა ეკლესიებში საქართველოდან გადავიდა.

მივესალმებით საქართველოს მიერ გულდასმით განხორციელებულ ძალისხმევას საერთაშორისო ფინანსური სანქციების მხარდაჭერისა და ექსპორტის კონტროლის საქმეში, რაც აშშ-ის საელჩოს ხელშეწყობით ხორციელდება, - ამის შესახებ საერთაშორისო უსაფრთხოებისა და მასობრივი განადგურების იარაღის გაუვრცელებლობის საკითხებში აშშ-ის სახელმწიფო დეპარტამენტის ბიუროს „ტვიტერის“ ოფიციალურ გვერდზეა აღნიშნული. ბიურო ყურადღებას ამახვილებს ფინანსთა სამინისტროს შემოსავლების სამსახურთან თანამშრომლობაზე. ფინანსთა სამინისტროს ინფორმაციით, ცოტა ხნის წინ საქართველოს ფინანსთა სამინისტროს შემოსავლების სამსახურის წარმომადგენლებმა და აშშ-ის ელჩმა კელი დეგნანმა, მონაწილეობა მიიღეს რენტგენო სკანერის გადაცემის ცერემონიაში, რომელიც ბათუმის აეროპორტში გაიმართა და მიზნად ისახავს აკრძალული საქონლის გამოვლენის შესაძლებლობის განმტკიცებას. „ეს ფაქტი გააძლიერებს საქართველოს ეროვნულ უსაფრთხოებას, ხოლო საბაჟოსა და საზღვრის დაცვის უწყებებს, დაეხმარება აკრძალული და მასობრივი განადგურების იარაღის ტრეფიკინგის აღკვეთაში“, - აღნიშნულია განცხადებაში. იპნ

სახელმწიფო უსაფრთხოების სამსახური ქრისტინე თაკალანძის უკანონო პატიმრობას ეხმაურება. უწყებაში აცხადებენ, რომ თაკალანძის 10 წლით და 6 თვით უკანონოდ დაპატიმრებას წინ უძღოდა გამოგონილი და აბსურდული ბრალდებების საფუძველზე თაკალანძის უკანონოდ დაკავება, რასაც მოჰყვა მრავალთვიანი უკანონო პატიმრობა. „ქრისტინე თაკალანძის მიმართ, საოკუპაციო რეჟიმის მხრიდან განხორციელებულ ძალადობრივ და უკანონო ქმედებებთან დაკავშირებით, საერთაშორისო თანამეგობრობამ არაერთგზის დააფიქსირა კონსოლიდირებული პოზიცია და დაგმო დანაშაულებრივი პრაქტიკა, რაც მიზანმიმართულად მკვიდრდება საქართველოს ოკუპირებულ ტერიტორიებზე. ქრისტინე თაკალანძის უკანონო პატიმრობის პირველივე დღიდან, ცენტრალური ხელისუფლება იყენებს ყველა არსებულ მექანიზმს. ასევე, აღნიშნული საკითხი ჩვენი საერთაშორისო პარტნიორების დღის წესრიგის უმნიშვნელოვანეს კომპონენტს წარმოადგენს. ერთობლივი ძალისხმევით, კეთდება ყველაფერი, რათა უკანონო პატიმრობაში მყოფი ქრისტინე თაკალანძე დაუბრუნდეს საკუთარ ოჯახს. საქართველოს ოკუპირებულ რეგიონებსა და საოკუპაციო ხაზის გასწვრივ განხორციელებულ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას“, – ნათქვამია განცხადებაში. ოკუპირებულ აფხაზეთში ჯაშუშობის ბრალდებით დაკავებულ საქართველოს მოქალაქეს, ქრისტინე თაკალანძეს 10 წლითა და 6 თვით თავისუფლების აღკვეთა მიუსაჯეს. დე ფაქტო აფხაზეთის საგამოძიებო სამსახური მას საქართველოს დაზვერვასთან თანამშრომლობას ედავებოდა. publika

აქონდროპლაზიის დიაგნოზის მქონე ბავშვების მშობლები მთავრობის ადმინისტრაციასთან 24-საათიან პროტესტს წყვეტენ. გადაწყვეტილება ჯანდაცვის სამინისტროში დღევანდელი შეხვედრის შემდეგ მიიღეს. „დღეს მშობლები ჯანდაცვის სამინისტროში საკოორდინაციო საბჭოს შეკრებას დავესწარით, სადაც დავრწმუნდით, რომ პროტოკოლი მაისის ბოლოს იქნებადასრულებული. ასევე, მოვისმინეთ ფინანსთა სამინისტროს წარმომადგენლის განცხადება, რომ როდესაც ჯანდაცვის სამინისტრო საქართველოში ვოსორიტიდის შეძენას გადაწყვეტს, ის თანხებს დაუყონებლივ გამოყოფს. ასევე, რაც მთავარია, ჩვენ, მშობლები, ყოველკვიურ შეკრებაზე ჩართული ვიქნებით. ვინაიდან, ჩვენ უფრო ბევრი გვაქვს წინ სამუშაო, მშვიდი გონება გვჭირდება და პირველ რიგში, ვჭირდებით ჩვენს ოჯახებს, ამიტომ, ვწყვეტთ 24-საათიან აქციას კანცელარიასთან“, – განაცხადეს მშობლებმა. ჯანდაცვის სამინისტროში შეხვედრის დასრულების შემდეგ მშობელმა, მაკუნა გოჩიაშვილმა facebook-პოსტში დაწერა, რომ შეხვედრისას მშობლები გაეცნენ ექიმების სამუშაო ჯგუფს, რომელიც პროტოკოლზე მუშაობს. და მათ გააცნეს, რა ეტაპზე არიან ახლა. „მათგან მივიღეთ სიტყვიერი დაპირება პროტოკოლის დამტკიცების ვადაზე – მაქსიმუმ 10 ივნისი. ფინანსთა სამინისტროს წარმომადგენლისგან მივიღეთ მზაობა, რომ ერთი დღე იქნება მათთვის საკმარისი, პროტოკოლის დამტკიცებიდან, ვოსორიტიდისთვის საჭირო თანხის გამოსაყოფად. გავეცანით ბიომარინთან კომუნიკაციის დეტალებს – არის წინსვლა, თუმცა აქ ვადები ბუნდოვანია.რაც მთავარია, სახალხო დამცველის წარმომადგენელმა ოფიციალურად ჩაგვსვა მშობლები ყოველკვირეულ საკოორდინაციო საბჭოს წევრებში“, – წერს მშობელი. პუბლიკა

აქონდროპლაზიის მქონე ბავშვების მშობლების განცხადებით, ჯანდაცვის სამინისტროში დღევანდელ შეხვედრაზე მედიკამენტის შემოტანასთან დაკავშირებით სიტყვიერ შეთანხმებას მიაღწიეს. მშობლები ელიან, რომ უახლოეს თვეებში სახელმწიფო მათი შვილებისთვის საჭირო მედიკამენტს შემოიტანს. ამის შესახებ “ნეტგაზეთს” შეხვედრის ერთ-ერთი მონაწილე მშობელი, სალომე გაბელაშვილი ესაუბრა. მისი თქმით, დღევანდელ შეხვედრას დაახლოებით 25-მდე ადამიანი ესწრებოდა, მათ შორის იყვნენ მშობლები, ფინანსთა და ჯანდაცვის სამინისტროს, სახალხო დამცველის და ჯანდაცვის მსოფლიო ორგანიზაციის წარმომადგენლები და ექიმები, ვინც მედიკამენტით მკურნალობასთან დაკავშირებულ პროტოკოლზე მუშაობს. “ძალიან ბევრი ადამიანია ჩართული, ვისაც მშობლები ნდობას ვუცხადებთ, სიტყვაც ეთქმით და ფიზიკურად აღარ მოგვატყუებენ. და თუ მოგვატყუებენ, გაასმაგებული ენერგიითა და ძალებით მივმართავთ ყველა გზას, რომ ჩვენი შვილების ინტერესები დავიცვათ. დასრულდა ის დრო [მოლაპარაკებების პირველი ეტაპი, რომელიც 16 თვე უშედეგოდ დასრულდა]. მაშინ ერთპიროვნულად წყვეტდნენ რაღაცებს და ახლა ჩვენ დავესწრებით ყველა საბჭოს. აშკარად ჩანს, რომ ჩვენი მოტყუების სურვილი აღარც თვითონ აქვთ. შეთანხმება შედგა და ჩვენ, მშობლებს მართლა გვჯერა, რომ პროცესი წინ და წინ წავა”, — განმარტა გაბელაშვილმა. მისი თქმით, დღევანდელ შეხვედრაზე ისაუბრეს პროტოკოლთან დაკავშირებით და მიიღეს პირობა, რომ მაისის ბოლოს ვოსორიდიტით მკურნალობის პროტოკოლი დასრულებული იქნება, 10 ივნისამდე კი შესაბამისი ექსპერტები დაამტკიცებენ დოკუმენტს. როგორც ის ამბობს, პროტოკოლის დამტკიცების შემდეგ მედიკამენტის შემოტანის ზუსტი ვადები დამოკიდებულია თავად კომპანიაზეც, რომლის ინტერესებშიც შედის წარმოებული პროდუქტის გაყიდვა. შესაბამისად, ბეგიაშვილის განმარტებით, 2023 წლის სექტემბრამდე სახელმწიფოს საკმარისი დრო ექნება, რომ აქონდროპლაზიის მქონე ბავშვების მკურნალობის პროცესი დაიწყოს. “ქალბატონმა თამარ გაბუნიამ განაცხადა, რომ ზუსტ ვადებს ვერ გვეუბნებიან, რადგან მაისის ბოლოს გაიდლაინი უნდა დასრულდეს და შემდეგ შევძლებთ ვადების თქმას, როდის შემოვიტანთ მედიკამენტს და ჩვენი შვილები როდის დაიწყებენ მკურნალობას. ფინანსთა სამინისტროს მხრიდან იყო ასევე წარმომადგენელი და თქვა, რომ რაც კი საჭირო იქნება ამ ბავშვებისთვის, ნებისმიერ თანხას გამოყოფენ”, — განაცხადა გაბელაშვილმა. რაც შეეხება პროტესტის გაგრძელებას, სალომე გაბელაშვილის განცხადებით, დღევანდელ შეხვედრაზე მოსმენილ ინფორმაციას სხვა მშობლებსაც გააცნობენ და ამის შემდეგ მშობელთა უმრავლესობა მიიღებს საბოლოო გადაწყვეტილებას, გააგრძელებენ თუ არა პროტესტს მთავრობის კანცელარიასთან, სადაც რამდენიმე კვირაა ღამეებს ათენებენ. შეხვედრის შედეგების შესახებ ფეისბუკის საკუთარ გვერდზე განცხადება გააკეთა კიდევ ერთმა მშობელმა, მაკუნა გოჩიაშვილმაც. მისი თქმით, სახალხო დამცველის წარმომადგენელმა მშობლები ოფიციალურად ჩასვა ყოველკვირეულ საკოორდინაციო საბჭოს წევრებში: შეხვედრის შესახებ განცხადება ჯანდაცვის სამინსიტრომაც გაავრცელა. განცხადებაში აღნიშნულია, რომ მინისტრის პირველი მოადგილე ადასტურებს სამინისტროსა და ექსპერტების ჯგუფის მზაობას, რომ ბავშვების საუკეთესო ინტერესებიდან გამომდინარე დაჩქარბულ ვადებში უზრუნველყონ აქონდროპლაზიის მართვისთვის აუცილებელი პროტოკოლის და გაიდლაინის შექმნა. თამარ გაბუნიას თქმით, სამინისტრო “ვოსორიდიტის” მწარმოებელ კომპანიასთან განგრძობს კომუნიკაციას. აქონდროპლაზიის დიაგნოზის მქონე ბავშვების მშობლები უკვე რამდენიმე თვეა საპროტესტო აქციებს მართავენ და საქართველოში მათი შვილებისთვის საჭირო მედიკამენტის შემოტანასა და სახელმწიფოს დაფინანსებას ითხოვენ. მშობლების მოთხოვნის საპასუხოდ, ირაკლი ღარიბაშვილმა 24 აპრილის მთავრობის სხდომაზე განაცხადა, რომ წამლის დაფინანსების პრობლემა ქვეყანაში არ დგას, რადგან საუბარია დაახლოებით 10 მილიონზე. თუმცა მთავრობა ამ ნაბიჯს ჯერ არ გადადგამს, რადგან მას პრეპარატის შემოსატანად დამატებითი სამედიცინო მტკიცებულებები სჭირდება. პრემიერ-მინისტრის განცხადების შემდეგ მშობლებმა პროტესტი გააგრძელეს, გამართეს არაერთი აქციაც, რასაც მოქალაქეებიც შეუერთდნენ. 29 აპრილს კი ჯანდაცვის მინისტრის მოადგილემ, თამარ გაბუნიამ განაცხადა, რომ მზად იყვნენ დაჩქარებულად შეექმნათ აქონდროპლაზიის მართვის პროტოკოლი და გაიდლაინი. ამის შემდეგ მშობლებსა და ჯანდაცვის სამინისტროს წარმომადგენლებს შორის რამდენიმე შეხვედრა გაიმართა. საუბარია პრეპარატ Voxzogo-ს (აქტიური ნივთიერება – ვოსორიდიტი), რომელსაც 2021 წელს აშშ-ის წამლისა და საკვების ადმინისტრაციამ (FDA), ასევე ევროპის წამლის სააგენტომ (EMA) ავტორიზაცია მისცა. ეს პრეპარატი პირველია, რომელიც გამოიყენება სინდრომისა და მისგან გამოწვეული სიმპტომების სამკურნალოდ. მშობლები ამბობენ, რომ მისი მიღება ეფექტურია მხოლოდ გარკვეულ დრომდე, კერძოდ – 18 წლამდე. ნეტგაზეთი

1 აშშ დოლარის ოფიციალური ღირებულება 2.4834 ლარი გახდა. ეროვნული ბანკის მიერ გამოქვეყნებული მონაცემების თანახმად, დღევანდელი ვაჭრობის შედეგად 1 აშშ დოლარის ღირებულება 2.4834 ლარი გახდა. კურსი, რომელიც დღეს მოქმედებდა, 2.4858 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0024 ლარი შეადგინა. რაც შეეხება ევროს, მისი კურსი 2.7377 ლარია. მაშინ, როცა დღეს მოქმედი კურსი 2.7488 ლარს შეადგენდა. შესაბამისად, ევროს ცვლილებამ 0.0111 ლარი შეადგინა. დღევანდელი ვაჭრობის შედეგად მიღებული კურსები ძალაში ხვალ შევა.

ოკუპირებულ აფხაზეთში ე.წ. უზენაესმა სასამართლომ საქართველოს მოქალაქეს, ქრისტინე თაკალანძეს, „ჯაშუშობის“ ბრალდებით, 10 წლითა და ექვსი თვით თავისუფლების აღკვეთა მიუსაჯა. 25 წლის ქრისტინე თაკალანძე 2022 წლის 20 ივლისს, გალის რაიონში დააკავეს. ზუგდიდში დაბადებული ქრისტინე თაკალანძე გალის რაიონის სოფელ ნაბაკევში ცხოვრობდა. აფხაზეთის სეპარატისტული რეჟიმი თაკალანძეს ქართულ სპეცსამსახურებთან თანამშრომლობაში ადანაშაულებს. ავტორი - ქეთი ჩოხელი

US Embassy Tbilisi, Georgia 27 წთ · ვუერთდებით საქართველოსა და ნეაპოლში მიმდინარე საყოველთაო დღესასწაულს. საქართველოს მომავალი მართლაც ევროპაშია, სადაც მისი შესაძლებლობები რეალიზდება და ისევე იბრწყინებს მთელი მსოფლიოს დასანახად, როგორც დღეს ქართველი ფეხბურთელი - ხვიჩა კვარაცხელია. გილოცავთ, ეს მხოლოდ დასაწყისია! We join the ongoing public celebrations in Georgia and Naples. Georgia's future is indeed in Europe where its potential will be realized and it will shine in front of the whole world, as the Georgian soccer player Khvicha Kvaratskhelia does today. Congratulations, this is only the beginning. ფოტო ნაკიფუს I საჯარო სკოლა

საქართველოს ნაკრების ყოფილმა მწვრთნელმა, ვლადიმირ ვაისმა კომენტარი გააკეთა მიმდინარე სეზონში „ნაპოლის“ შემტევის, ხვიჩა კვარაცხელიას თამაშზე. „ხვიჩა ახალგაზრდაა, მაგრამ „ნაპოლიში“ გადასვლის შემდეგ თავი არ დაუკარგავს, ის გუნდის საკვანძო მოთამაშე გახდა. „ნაპოლის“ მან ფლანგზე აგრესია შემატა. ძალიან კარგი ბიჭია და საკუთარი შესაძლებლობების სჯერა. თავისი ნიჭით ის „ნაპოლის“ ჩემპიონობის მოპოვებაში დაეხმარა. მომავალში მას კიდევ უფრო მეტ წარმატებას ვუსურვებ. კვარაცხელია იტალიური ფეხბურთისა და საქართველოს ნაკრების ვარსკვლავია. ძალიან ბედნიერი ვარ მის გამო“, – განაცხადა ვაისმა Sport 42-თან ინტერვიუში. საქართველოს ნაკრების 22 წლის ფეხბურთელი იტალიაში გასულ ზაფხულს გადავიდა. მიმდინარე სეზონში მან „ნაპოლის“ შემადგენლობაში 38 მატჩი ჩაატარა. კვარაცხელიამ ყველა ტურნირზე 14 გოლი გაიტანა და 14 საგოლე გადაცემა შეასრულა. ავტორი - მერაბ მამულაშვილი

არ მგონია, კახა კალაძეს კრიტიკა იმის გამო ეკუთვნოდეს, რომ მას სხვა აქებს - ნუ გაავლებთ პირდაპირ პარალელებს, მაგრამ პრინციპის ასახსნელად ვამბობ: - მაგალითად, ჰიტლერს თუ ბეთჰოვენი მოსწონდა, ეს ბეთჰოვენის ნაკლია? - ასე უპასუხა „ქართული ოცნების“ დეპუტატმა მიხეილ სარჯველაძემ კრემლის პროპაგანდისტის, მარგარიტა სიმონიანის “ფეისბუქ“ პოსტთან დაკავშირებით დასმულ კითხვას. აქვე სარჯველაძემ ხაზგასმით აღნიშნა, რომ ის პიროვნულ შედარებას არ აკეთებს, რადგან არც კალაძეა ბეთჰოვენი და არც სიმონიანი - ჰიტლერი. „მარგარიტა სიმონიანის განცხადებების კომენტირება არც აქტუალურია და არც ჩემი მოვალეობაა. სიმართლე გითხრათ, პირადად მე არც ვადევნებ თვალს მის განცხადებებს - თვალს მარტო იმ თვალსაზრისით ვადევნებ, რომ მხოლოდ ინფორმაცია მქონდეს. სხვა მხრივ, ინტერესი არ მაქვს. არ მგონია, რომ კომენტარების გაკეთება დიდად აუცილებელი იყოს“, - განაცხადა სარჯველაძემ. Russia Today-ის რედაქტორმა, მარგარიტა სიმონიანმა თბილისის მერის კახა კალაძის განცხადება „ფეისბუკის“ გვერდზე დაპოსტა და აღნიშნა, რომ “ამ ვითარებაში საქართველო განსაკუთრებულად გონივრულად იქცევა - ნეტავ, სომხეთიც ასე იქცეოდეს”. ipn

„ქოლ ცენტრების“ უკან დგახართ თქვენ, ლილუაშვილს ვეუბნები, შს მინისტრს, მთავარ პროკურორს, ფეხებს ვერ მომჭამთ ძირში! - თქვენ მოგიწევთ ამაზე პასუხისგება, ციხეში წასვლა და იმ ნაძარცვი ქონების უკან დაბრუნება, რომელზეც ხელს ითბობთ, - ამის შესახებ ჟურნალისტებთან „სტრატეგია აღმაშენებლის“ ლიდერმა გიორგი ვაშაძემ განაცხადა. მისი თქმით, მსგავსი ბრალდებებით მისი გაჩერება სურთ, რასაც ვერ მიაღწევენ. „მორიგი დეზინფორმაციული სპეცოპერაცია რუსული რეჟიმის მხრიდან, სადაც უნდათ, რომ გამსვარონ მე, ჩემი ძმა, რომ თითქოს „ქოლ-ცენტრებთან“ კავშირი გვაქვს, ეს არის 100 პროცენტიანი ტყუილი და „ქოლ-ცენტრების“ უკან თუ ვინმე დგას საქართველოში ეს არის რუსული ოცნება, რომელიც ფინანსდება თავიდან ბოლომდე ამ „ქოლ-ცენტრების“ თაღლითური სქემით, რომელსაც მფარველობენ სუს-ის, შსს-ის, პროკურატურის პირველი პირები. სწორედ ამიტომ ამბობენ უარს საგამოძიებო კომისიაზე და ამით აღიარებით ჩვენებას აკეთებენ, რომ თვითონ დგანან „ქოლ-ცენტრების“ უკან, ახლა უნდათ ისრები გადმოიტანონ აქეთ. პირდაპირ ეთერში ვეუბნები, ყველა დამნაშავე, ვინც ხელს ითბობთ ევროპელი პენსიონერების ძარცვაზე, ვინც შებღალა საქართველოს სახელმწიფოს რეპუტაცია, ყველას მოგიწევთ პასუხისგება. მე აუცილებლად დავუკავშირდები და გავიდე კონტაქტზე გერმანელ სამართალდამცავებთან, რომლებსაც მაქსიმალურად მივაწვდით ყველა ინფორმაციას, რასაც მოვაგროვებთ, ყველა ჩემს კონტაქტს ევროკავშირში გამოვიყენებთ იმისთვის, რომ ეს თაღლითი მავნებლები, ეს კრიმინალები მიეცნენ პასუხისგებაში მათ შორის, ევროპელი სამართალდამცავების მხრიდან. „ქოლ-ცენტრების“ უკან დგახართ თქვენ, თქვენ ხართ თაღლითები, დამნაშავეები, ლილუაშვილს ვეუბნები, შს მინისტრს, მთავარ პროკურორს, ფეხებს ვერ მომჭამთ ძირში! მე ვერ გამაჩერებთ! გინდათ გავჩერდე, ჩვენ უკან დავიხიოთ რუსულ რეჟიმთან ბრძოლაში, ვერ მოგართვით! ეს არ მოხდება. ცამდე მართალი ვარ მე, ცამდე მართალია ჩემი ძმა და ყველა ცამდე მართლები ვართ თქვენი მავნებლური, თაღლითური, კორუმპირებული რეჟიმის წინააღმდეგ. სამართლიანობა იზეიმებს ამ ქვეყანაში და თქვენ იქნებით პასუხისგებაში მიცემული. არ გეგონოთ, რომ რაღაც ბრალდება წამომიყენეთ და ასე გავატარო ერთი პრესკონფერენციით, აგერ მე და აგერ თქვენ! თქვენ მოგიწევთ ამაზე პასუხისგება, ციხეში წასვლა და იმ ნაძარცვი ქონებების უკან დაბრუნება, რომელზეც ხელს ითბობთ. სამი რამით ფინანსდება ახლა „ქართული ოცნება“: „ქოლ-ცენტრების“ თაღლითური სქემით, კონტრაბანდით რომელსაც რუსეთთან აწარმოებენ და კორუფციით, რომელმაც აღვირახსნილ მასშტაბებს მიაღწია“, - განაცხადა ვაშაძემ. palitranews

თბილისში, აღმაშენებლის გამზირზე მდებარე ერთ-ერთ ოფისში, სავარაუდოდ, ე.წ. ქოლცენტრებთან დაკავშირებით საგამოძიებო მოქმედებები ჩატარდა. როგორც გაირკვა, აღნიშნულ შენობაში 25%-ს „სტრატეგია აღმაშენებლის“ ლიდერის, გიორგი ვაშაძის ძმა დავით ვაშაძე ფლობს. მისი თქმით, მას მხოლოდ შენობის მეორე სართული ეკუთვნის, სადაც სასტუმრო აქვს გახსნილი, დანარჩენი ფართის შესახებ კი ინფორმაცია არ აქვს. „მე ვფლობ ამ შენობაში 25%-ს და ჩემი წილი არის რეალიზებული მეორე სართულზე სასტუმროში, რომელიც არის ჩემს საკუთრებაში 100%-ით. შპს „თბილისი თაიმსი“ არის ასევე ჩემი კომპანია და დაახლოებით, 7 წელია აქ სასტუმრო მაქვს. შესაბამისად, სხვა ფართებთან მე საერთოდ შეხება არ მაქვს და ვერ მაქვს. ასეთი გადანაწილება არის, რომ ეს ნაწილი არის ჩემი, რაზეც პასუხისმგებელი ვარ, სხვებზე ვერც ვერთვები. ამიტომ, მე ინფორმაცია არ მქონდა. დისტანციურად ვმართავ სასტუმროს, სეზონიც დაბალია და შესაბამისად, როცა აქ მოვდიოდი, ზემოთ საერთოდ არც ვიცოდი თუ გახსნილი იყო[რამე]“, – განაცხადა დავით ვაშაძემ „მთავარ არხთან“ საუბრისას. რაც შეეხება „პრაიმტაიმის“ მიერ გავრცელებულ ინფორმაციას, რომ აღნიშნულ შენობაში „ქოლცენტრი“ გიორგი ვაშაძესა და უკრაინის მმართველი პარტიის ლიდერს, დავით არახამიას ეკუთვნით, დავით ვაშაძის თქმით, ეს შეუძლიათ შესაბამისმა უწყებებმა გამოიძიონ. „მოდით, გამოვიძიოთ. ზოგადად, ეს საკითხი მთელ ქვეყანას აწუხებს და ჩემთვისაც ძალიან შემაწუხებელია. ჩემი საქმიანობიდან გამომდინარე, ბევრ უცხოელთან მაქვს ურთიერთობა და ჩვენს ქვეყანას ძალიან აქვს სახელი ამის გამო გაფუჭებული. ჩემი აზრით, კარგი იქნება გამოიძიონ შესაბამისმა სტრუქტურებმა, პარლამენტშიც არის ინიცირებული საგამოძიებო კომისია და ამ „ქოლცენტრიდან“ დაიწყონ, შეისწავლონ, ვის აქვს რამე შეხება“, — განაცხადა დავით ვაშაძემ. ნეტგაზეთი

როდესაც ირაკლი კობახიძემ განცხადება საარჩევნო ბარიერის 2%-მდე დაწევის თაობაზე გააკეთა, საუბარი იმაზე იყო, რომ საქართველოს სტატუსზე გადაწყვეტილება შარშან დეკემბერში უნდა მიეღოთ. როდესაც თარიღმა გადაინაცვლა, მან გარკვეული კორექტივები შეიტანა, - ამის შესახებ ჟურნალისტებთან “ქართული ოცნების“ დეპუტატმა მიხეილ სარჯველაძემ განაცხადა. მისივე თქმით, საარჩევნო ბარიერის დაწევის საკითხი დღეს აქტუალური არ არის. „5%-იანი ბარიერის წინააღმდეგ ის პარტიები გამოდიან, რომელიც შეშფოთებული არიან, რომ ჯამში, მათი მთლიანი მხარდაჭერა 5%-ს არ აჭარბებს. ეს ის მოცემულობაა, რასაც ანგარიში უნდა გაეწიოს. თავად ეს გარემოება მეტყველებს მათი არგუმენტების ავ-კარგიანობაზე. როდესაც საარჩევნო ბარიერის საკითხზე ვმსჯელობთ, მხედველობაში უნდა მივიღოთ ძალიან ბევრი გარემოება და არა კონკრეტული პარტიების ძალიან მწირი მხარდაჭერა საზოგადოებაში. გასაგებია იმ პარტიის გულისტკივილი, რომელსაც 1%-იანი მხარდაჭერა აქვს, რადგან მას პარლამენტში მოხვედრა უნდა და წინ ეღობება სამართლებრივი წესრიგი, ბარიერი და ასე შემდეგ. მაღალ ბარიერს თავისი დადებითი მხარეები აქვს - როდესაც კონსტიტუციაში ეს ნორმა ჩაიდო, გარკვეულ გათვლებს ეფუძნოდა. ბარიერის დაწევის საკითხი დღეს აქტუალური არ არის და სჯობს ამ თემას მოგვიანებით დავუბრუნდეთ, როდესაც საამისოდ უკეთესი პირობები იქნება. უკეთესობაში ერთადერთ რამეს ვგულისხმობ - როცა საკითხი საზოგადოებაში რადიკალიზაციის მიზნებისათვის არ იქნება გამოყენებული“, - განაცხადა მიხეილ სარჯველაძემ. გასული წლის ივლისში ირაკლი კობახიძემ გააკეთა განცხადება იმის შესახებ, რომ მმართველი პარტია მზადაა საკონსტიტუციო ცვლილებები გაატაროს და 2024 წლისა და ყველა მომდევნო საპარლამენტო არჩევნებისთვის ბარიერი 5%-დან 2%-მდე დაწიოს, თუ ქვეყანა ევროკავშირის წევრობის კანდიდატის სტატუსს მიიღებს. "დეკემბერში, ევროკავშირის მიერ საქართველოსთვის კანდიდატის სტატუსის მინიჭებიდან არაუგვიანეს ერთი თვისა, საქართველოს პარლამენტი სამივე მოსმენით მიიღებს კონსტიტუციურ კანონს, რომლის თანახმად 2024 წლის და მისი მომდევნო საპარლამენტო არჩევნები სრულად პროპორციული სისტემით და 2-პროცენტიანი საარჩევნო ბარიერით ჩატარდება. ამ პოლიტიკურ ვალდებულებას ჩვენ ვიღებთ პარტიის პოლიტიკური საბჭოს და საპარლამენტო უმრავლესობის სახელით ევროპული საბჭოსა და ევროპული კომისიის წინაშე", - განაცხადა გასული წლის შემოდგომაზე ირაკლი კობახიძემ. ინტერპრესნიუსი

კრიმინალი გაიზარდაო - სტატისტიკა დაკლებულია, საიდან მოგაქვთ, რა ციფრებს უყურებთ, ვინ გეუბნებათ ამას, რომ კრიმინალი გაიზარდა? - არ შეიძლება ხალხი მოატყუოთ, - ასე უპასუხა შინაგან საქმეთა მინისტრმა ვახტანგ გომელაურმა ჟურნალისტის კითხვას ქვეყანაში არსებულ კრიმინალურ ვითარებასთან დაკავშირებით. გომელაურმა ასევე ისაუბრა გოგებაშვილის ქუჩაზე მომხდარ მკვლელობაზე და აღნიშნა, რომ საქმე გახსნილია. „გუშინ ნამდვილად ცუდი შემთხვევა მოხდა. გახსნილია, დაკავებულია ერთი პირი, ეს ერთი პირი ჩვენი დაცვის პოლიციის თანამშრომელია, რომელიც კერძო პირთან დაცვაში მუშაობდა. გამოძიება მიმდინარეობს, დანარჩენზე სახელმწიფო ინსპექტორის სამსახური გააკეთებს კომენტარს, წინასწარ არ მინდა კომენტარები გავაკეთო. რაც შეეხება კრიმინალის გაზრდას, თქვენ ყოველ წელს ამას იძახით, რომ კრიმინალი გაიზარდა. მაგალითად, შარშან, პირველად მოხდა საქართველოში, რომ წელიწადში 74 მკვლელობა მოხდა, როცა 300-330 იყო ზუსტად 2012 წლამდე. ყველაზე დაბალი დაფიქსირდა 2022 წელს - 74 მკვლელობა, რომელიც ნამდვილად უპრეცედენტოა, როგორც თქვენ გიყვართ - უპრეცედენტოს ახსენებთ ხოლმე ხშირად, ნამდვილად უპრეცედენტოა. კრიმინალი გაიზარდაო, სტატისტიკა დაკლებულია, საიდან მოგაქვთ, რა ციფრებს უყურებთ, ვინ გეუბნებათ ამას, რომ კრიმინალი გაიზარდა? - ეს უბედურებაა, არ შეიძლება ხალხი მოატყუოთ, ტყუილი უთხრათ ხალხს. ციფრებია, რომელიც ჩვენს საიტზე ღიად დევს და ნახეთ. საიდან მოიტანეთ, რომ გაიზარდა კრიმინალი? მე ციფრებით გელაპარაკებით, თქვენ გინდა 50-იანი წლები დაარქვით და გინდა 90-იანი წლები, მე გელაპარაკებით ციფრებით და ფაქტებით. ფაქტები მომიყვანეთ და დაგეთანხმებით“, - განაცხადა გომელაურმა.

ჩვენ თუ ვმფარველობთ [„ქოლ-ცენტრებს“] და ჩვენი თუა, რატომ ვკეტავთ მაშინ, გიჟები ვართ? ეს, რა თქმა უნდა, ტყუილია. ჩვენ ვააშკარავებთ ნამდვილად, - ასე უპასუხა შინაგან საქმეთა მინისტრმა ვახტანგ გომელაურმა ჟურნალისტების შეკითხვას, რომლის მიხედვითაც ოპოზიცია ხელისუფლებას „ქოლ ცენტრების“ მფარველობაში ადანაშაულებს. როგორც გომელაურმა აღნიშნა, ე.წ. ქოლ-ცენტრების საქმეზე რამდენიმე უწყება ერთად მუშაობს. „დაველოდოთ გამოძიებას. დეტალებში არ ჩავალ. ალბათ, ფინანსური პოლიცია გაკეთებს ამაზე განცხადებას, თუმცა ხაზი მინდა გავუსვა, რომ ნამდვილად აქტიურად ვმუშაობთ ამ მიმართულებით როგორც ფინანსური პოლიცია, ასევე შინაგან საქმეთა სამინისტრო და სხვადასხვა უწყება, რათა მაქსიმალურად დაიხუროს და აღარ იფუნქციონიროს საქართველოში“, - განაცხადა გომელაურმა. იპნ

სასტუმროებში რუსეთიდან შემოსული ტურისტების წილი 3%-ს არ აღემატება თბილისში, შესაბამისად, მე ამ ხალხს ტურისტს არ ვეძახი. ესენი არიან ადამიანები, ვინც აქ ჩამოდიან და რჩებიან. ეს გასასინჯია, სხვა კლასიფიკაცია უნდა მივანიჭოთ, - ამის შესახებ „სასტუმროებისა და რესტორნების ფედერაციის“ დამფუძნებელმა, შალვა ალავერდაშვილმა განაცხადა. როგორც მან აღნიშნა, ასევე „დაუჯერებელია“ მონაცემები იმის შესახებ, რომ საქართველომ მარტში უკრაინიდან 20 ათასი ტურისტი მიიღო. აღნიშნულ კონტექსტში, ალავერდაშვილი მიიჩნევს, რომ ცვლილებები და გამიჯვნაა საჭირო ამჟამად არსებულ სტატისტიკაში. „საკმაოდ რთული პირველი კვარტალი გავიარეთ. ჩვენდა სამწუხაროდ, გლობალურად ომის გამო, ჩვენთან ევროპელი ტურისტების ჯგუფური ჯავშნები თითქმის არ ხდება, თითზე ჩამოსათვლელია. ევროპიდან შემოდიან ინდივიდუალური სტუმრები. ჩვენი სტაბილური პარტნიორია ისრაელი. დივერსიფიკაციიდან გამომდინარე, რუსეთიდან ტურისტებს არ ველოდებით, ნაკლები იქნება. რა თქმა უნდა, უკრაინიდან ტურისტები არ არიან, თუმცა, სტატისტიკაში უკრაინიდან ჩამოსული 20 ათასზე მეტი ადამიანი შევიდა. სტატისტიკაში ყველა ის ადამიანი აღირიცხება, ვინც საზღვარგარეთიდან შემოდის და 24 საათზე მეტი რჩება ქვეყანაში. შესაბამისად, გჯერათ, რომ 20 ათასი ტურისტი მივიღეთ უკრაინიდან მარტის თვეში? გასამიჯნი გვაქვს სტატისტიკა. სტატისტიკის მიხედვით, ტურისტულ სექტორში საკმაოდ დიდი შემოსავლები მივიღეთ და რუსეთი არის პირველ ადგილზე. არ დაგეთანხმებით, სასტუმროებში რუსების წილი რეალურად პირველ კვარტალში 3%-ზე მეტი არ იყო. სასტუმროების დატვირთვიდან გამომდინარე სასტუმროებში რუსეთიდან შემოსული ტურისტების წილი 3%-ს არ აღემატებოდა თბილისში, შესაბამისად, მე ამ ხალხს ტურისტს არ ვეძახი. ესენი არიან ადამიანები, ვინც აქ ჩამოდიან და რჩებიან. ეს გადასასინჯია, სხვა კლასიფიკაცია უნდა მივანიჭოთ“, - განაცხადა შალვა ალავერდაშვილმა. რაც შეეხება მიმდინარე წლის ზაფხულის სეზონს, მისი თქმით, ტურისტების მიერ უკვე ბევრი ჯავშანია გაკეთებული. „ზაფხულის სეზონს ძალიან კარგს ველოდებით, ბევრი ჯავშანიც გვაქვს. განსაკუთრებით ივლისის თვე იქნება პიკური, რადგან დღეში თითქმის 30 რეისამდეა დაგეგმილი, ბათუმშიც თბილისშიც, მთაშიც და ბარშიც. წელს 60-65% საქართველოს დატვირთვას „გალფის ქვეყნები“ (სპარსეთის ყურის ქვეყნები) შეავსებენ“,- განაცხადა შალვა ალავერდაშვილმა. IPN

სიმონ ხეჩინაშვილის საუნივერსიტეტო კლინიკის კლინიკური მენეჯერის, რეანიმაციული განყოფილების გამგის, ნიკოლოზ კვაჭაძის განცხადებით, გოგებაშვილის ქუჩაზე მომხდარი თავდასხმის შედეგად დაჭრილი ორი პირიდან ერთ-ერთის, გივი მარგველაშვილის ჯანმრთელობის მდგომარეობა მძიმეა. როგორც „ინტერპრესნიუსს“ ნიკოლოზ კვაჭაძემ განუცხადა, პაციენტი მკურნალობას რეანიმაციულ განყოფილებაში აგრძელებს. „ამ ეტაპზე პაციენტის ჯანმრთელობის მდგომარეობა მძიმეა და მკურნალობას აგრძელებს რეანიმაციის განყოფილებაში. კლინიკაში შემოსვლისთანავე ქირურგიული დახმარება ჩაუტარდა“, - განაცხადა ნიკოლოზ კვაჭაძემ. ცნობისთვის, 4 აპრილს, თბილისში, გოგებაშვილის ქუჩაზე რესტორან LA VERA-სთან სროლის დროს ერთი ადამიანი მოკლეს და ორი პირი დაჭრეს. შინაგან საქმეთა სამინისტროს ინფორმაციით, მომხდართან დაკავშირებით გამოძიება სისხლის სამართლის კოდექსის 108-ე მუხლით დაიწყო, რაც განზრახ მკვლელობას გულისხმობს. თბილისში, გოგებაშვილის ქუჩაზე მომხდარი განზრახ მკვლელობისა და ცეცხლსასროლი იარაღის მართლსაწინააღმდეგოდ ტარების ფაქტზე შინაგან საქმეთა სამინისტროს დაცვის პოლიციის დეპარტამენტის პირადი დაცვის სამმართველოს უფროსი ინსპექტორი კ.კ. დააკავეს. IPN

პარლამენტს უმრავლესობას კიდევ ერთი დეპუტატი მაია მენაღარიშვილი ტოვებს. მენაღარიშვილისთვის პარლამენტის წევრის უფლებამოსილების ვადამდე შეწყვეტის საკითხზე უკვე ჩანიშნულია საპროცედურო საკითხთა და წესების კომიტეტის სხდომა. კომიტეტი 8 მაისს შეიკრიბება. IPN

გუშინ, გოგებაშვილის ქუჩაზე მომხდარი სროლის ფაქტზე, დაკავებულია შსს-ის დაცვის პოლიციის დეპარტამენტის პირადი დაცვის სამართველოს უფროსი ინსპექტორი, იუწყება სპეციალური საგამოძიებო სამსახური. როგორც უწყებაში ამბობენ, ბრალდებულს გამოძიება განზრახ მკვლელობას და ცეცხლსასროლი იარაღის მართლსაწინააღმდეგო ტარებას ედავება. გამოძიების ვერსიით, ბრალდებული იმყოფებოდა დასაცავი პირის ნათესავთან, რა დროსაც უკანასკნელს თავდამსხმელმა ცეცხლი გაუხსნა. თავდასხმელს საპასუხო ცეცხლი გაუხსნა ბრალდებულმა, რის შედეგადაც ბრალდებული გარდაიცვალა. ნეტგაზეთი

„ვაგნერის“ ჯგუფის დამფუძნებელი ევგენი პრიგოჟინი ამბობს, რომ მისი ძალები 9 მაისის შემდეგ, „ტყვია-წამლის შიმშილის [დეფიციტის]“ გამო ბახმუტს დატოვებენ და თავიანთ პოზიციებს რუსეთის თავდაცვის სამინისტროს ძალებს გადასცემენ. პრიგოჟინის თქმითვე, ქალაქში მოწინააღმდეგეთა ძალები „ვაგნერელებს“ ხუთჯერ აღემატებიან: გვიან ღამით, პრიგოჟინმა ვიდეოიმიმართვაც გაავრცელა, რომელშიც პირდაპირ აგინა რუსეთის თავდაცვის სამინისტროს ხელმძღვანელობას ტყვია-წამლის მიუწოდებლობის გამო. ნეტგაზეთი

რუსეთის სახელისუფლებო მედიის, Russia Today-ის რედაქტორმა, მარგარიტა სიმონიანმა თბილისის მერის, კახა კალაძის განცხადება ფეისბუკის საკუთარ გვერდზე დაპოსტა და აღნიშნა, რომ საქართველო გონივრულად იქცევა. უკრაინაში რუსეთის შეჭრის და სრულმასშტაბიანი ომის დაწყების შემდეგ რუსეთს არაერთმა ქვეყანამ დაუწესა სანქციები, მათ შორის ევროკავშირის ქვეყნებმა, აშშ-მა და დიდმა ბრიტანეთმა. საქართველოს მთავრობის გაცხადებული პოზიცია ომის დაწყების პირველი დღეებიდანვე იყო, რომ ქვეყანა არ შეუერთდებოდა საერთაშორისო სანქციებს. “ქართული ოცნების” ლიდერები აცხადებდნენ, რომ რუსეთის წინააღმდეგ სანქციები არ არის ეფექტური, რის გამოც საქართველოს ხელისუფლება არაერთხელ გახდა დასავლელი პარტნიორების მხრიდან კრიტიკის ობიექტი. netgazeti

აღმაშენებლის გამზირზე სპეცოპერაცია მიმდინარეობს. „რუსთავი 2“-ის ინფორმაციით, სპეცოპერაცია გვიან ღამით ე.წ. ქოლ-ცენტრების საქმესთან დაკავშირებით დაიწყო და ამ დრომდე გრძელდება. გავრცელებული ინფორმაციით, სამართალდამცველებმა უკვე ამოიღეს კომპიუტერული ტექნიკა. ადგილზე მუშაობენ სპეციალური საგამოძიებო სამსახურის თანამშრომლები და ექსპერტ კრიმინალისტები. როგორც "ინტერპრესნიუსს" საქართველოს ფინანსთა სამინისტროს საგამოძიებო სამსახურში განუცხადეს, უწყების თანამშრომლების მიერ მიღებული შეტყობინების საფუძველზე, შესაბამისი საპროცესო და საგამოძიებო მოქმედებები განხორციელდა. მათივე განმარტებით, მომხდართან დაკავშირებით გამოძიება გრძელდება. IPN

მაგარი იდეაა, ბატონო კახა კალაძე. თქვენ მე შთამაგონეთ, რომ საქართველოს მომავალ არჩევნებში, როგორც „მწვანეთა“ კანდიდატმა მონაწილეობა მივიღო, - ასე ეხმაურება ევროპარლამენტარი ვიოლა ფონ კრამონი თბილისის მერის, კახა კალაძის განცხადებას იმასთან დაკავშირებით, რომ არ არის გამორიცხული ოპოზიციამ რომელიმე ევროპარლამენტარი რომელიმე ოლქში 2024 წლის არჩევნებში მაჟორიტარ კანდიდატად წარადგინოს. „მოდით, ვიმუშაოთ ამ საკითხზე“, - წერს კრამონი და განმარტავს, რომ მისი პოსტი ხუმრობაა. „ყველა ჩემ გამომწერს, ვისაც უყვარს ჩემი ნათქვამის არასწორად გაგება: ეს ხუმრობა იყო!“- წერს ევროპარლამენტარი. ცნობისთვის, თბილისის მერმა, კახა კალაძემ რამდენიმე დღის წინ ვიოლა ფონ კრამონის შესახებ განაცხადა, რომ არ გამორიცხავს, ხვალ-ზეგ თბილისში „მოლოტოვის კოქტეილით“ ვიხილოთ. „არც იმას გამოვრიცხავ, ოპოზიციამ რომელიმე ევროპარლამენტარი მაჟორიტარად წარმოგვიდგინოს 2024 წელს“, - აღნიშნა კალაძემ. ინტერპრესნიუსი

ასეთი შეფასება მისასალმებელია, მაგრამ საკმაოდ დაგვიანებული. „ქართული კოშმარი“ მუშაობს ჩვენი ღირებულებებისა და ქართველი ხალხის ევროატლანტიკური მისწრაფებების წინააღმდეგ, - ასე ეხმაურება ევროპარლამენტარი მირიამ ლექსმანი „ევროპელი სოციალისტების პარტიის“ განცხადებას, რომელმაც უნგრეთში, „კონსერვატიული პოლიტიკური მოქმედების“ ყოველწლიურ კონფერენციაზე (CPAC) საქართველოს პრემიერ-მინისტრის, ირაკლი ღარიბაშვილის სიტყვით გამოსვლა დაგმო. მანამდე „ევროპელი სოციალისტების პარტიამ“ გაავრცელა განცხადება, სადაც აღნიშნულია, რომ გმობს საქართველოს პრემიერ-მინისტრის, ირაკლი ღარიბაშვილის „კონსერვატიული პოლიტიკური მოქმედების“ კონფერენციაში მონაწილეობას და მიიღო გადაწყვეტილება, რომ მორიგ სხდომაზე „ქართული ოცნების“ სტატუსი შეაფასოს. „პრემიერ ღარიბაშვილის ქმედება მიუღებელია და მას ჩვენი პოლიტიკური ოჯახის ღირებულებების მიღმა აყენებს. „ევროპელი სოციალისტების პარტიამ“ მიიღო გადაწყვეტილება, რომ ხელმძღვანელობის მომავალ სხდომაზე პარტიაში „ქართული ოცნების“ სტატუსის შეფასება მოხდება. ეს ცხადია, აუცილებელი ნაბიჯია ღარიბაშვილის დღევანდელი ინტერვენციის შემდეგ“, - აღნიშნულია „ევროპელი სოციალისტების პარტიის“ ვიცე-პრეზიდენტის, კატი პირის განცხადებაში. ცნობისათვის, „ქართულ ოცნებას“ „ევროპელი სოციალისტების პარტიაში“ ამჟამად პარტიის დამკვირვებელი წევრის სტატუსი აქვს. იპნ

2021 წლის მონაცემებით, ქვეყანაში ნერვული სისტემით ავადმყოფობის 116 363 შემთხვევაა რეგისტრირებული. ამის შესახებ „ინტერპრესნიუსს“ დაავადებათა კონტროლის ეროვნული ცენტრიდან გამოთხოვილი საჯარო ინფორმაციის საპასუხოდ აცნობეს. მათივე განმარტებით, რეგისტრირებული მონაცემები მოიცავს შემთხვევებს, როცა ერთ პირს ნერვული სისტემით ავადმყოფობის ფაქტი რამდენჯერმე დაუფიქსირდა. როგორც დაავადებათა კონტროლის ეროვნულ ცენტრში განმარტავენ, პრევალენტობა 100 000 მოსახლეზე 3137.6-ს შეადგენს. ipn