tvati

საქართველოს პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძე ამბობს, რომ რუსეთი ამ ნაბიჯით ცდილობს საქართველოს ევროინტეგრაციის გზა დააზიანოს. რა თქმა უნდა, ეს არის რუსეთის ხელისუფლების გადაწყვეტილება, რაშიც ჩვენ არ ჩავრეულვართ და ეს არ იყო არც ჩვენი მოთხოვნა და არც ჩვენი სურვილი, თუმცა მათ იმ დროს, როცა საქართველოსთვის ძალიან მნიშვნელოვანი საკითხები იხილება და საქართველომ უნდა გადადგას ახალი ნაბიჯი ევროპული ინტეგრაციის გზაზე, რატომღაც, რუსეთის ხელისუფლებამ გადაწყვიტა, რომ 20 წლის განმავლობაში ნაწარმოები პოლიტიკა შეეცვალა და სავიზო რეჟიმი გაეუქმებინა“, -განაცხადა სამხარაძემ. მის კომენტარს სამთავრობო არხი „იმედი“ ავრცელებს. რუსეთის ფედერაციის პრეზიდენტის, ვლადიმერ პუტინის განკარგულების მიხედვით, რუსეთი საქართველოსთან უვიზო მიმოსვლას აუქმებს. ასევე, ვლადიმერ პუტინმა რუსული ავიაკომპანიებისთვის საქართველოში პირდაპირი ფრენის აკრძალვაც მოხსნა. რაც შეეხება რუსული ავიაკომპანიებისთვის საქართველოში ფრენაზე აკრძალვის მოხსნას, უკვე გამოქვეყნდა ვლადიმერ პუტინის შესაბამისი ბრძანება, რომლის მიხედვითაც, პრეზიდენტის 2019 წლის 21 ივნისის ბრძანება საქართველოში ფრენის აკრძალვის შესახებ ძალადაკარგულად გამოცხადდა. რუსული ავიაკომპანიები მოსკოვიდან თბილისში, კვირაში 7 პირდაპირ რეისს შესრულებენ. ამის შესახებ რუსეთის ტრანსპორტის სამინისტრომ უთხრა რუსულ მედიას. 2000 წელს საქართველო აღმოჩნდა ერთადერთი ქვეყანა დსთ-ის ქვეყნებიდან, რომელსაც რუსეთმა დაუწესა სავიზო რეჟიმი. 2006 წელს რუსეთმა დააწესა ემბარგო ქართული პროდუქციის იმპორტზე, შეწყდა, საჰაერო მიმოსვლა რუსეთ-საქართველოს შორის. იმავე წლის ზამთარში რუსეთმა საქართველოს მოულოდნელად შეუწყვიტა გაზის მიწოდება. 2008 წლის აგვისტოს ომის შემდეგ საქართველოს მიერ რუსეთისთვის დაწესებული სავიზო რეჟიმი 2012 წელს საქართველოს მესამე პრეზიდენტმა, მიხეილ სააკაშვილმა ცალმხრივად გააუქმა. 2019 წელს პუტინის გადაწყვეტილებით, პირდაპირი ავიამიმოსვლა საქართველოსა და რუსეთს შორის შეწყდა 20 ივნისის მოვლენების შემდეგ – როდესაც დიდი სახალხო პროტესტი მოჰყვა მართლმადიდებლობის საპარლამენტთაშორისო ასამბლეის სესიის დროს რუსეთის დუმის დეპუტატ სერგეი გავრილოვის საქართველოს პარლამენტის თავმჯდომარის სავარძელში ჩაჯდომასა და სესიის რუსულ ენაზე ჩატარებას. პუბლიკა

უკრაინაში, ბახმუტთან ბრძოლისას, კიდევ ერთი ქართველი მებრძოლი დაიღუპა, ერთი კი დაიჭრა. ინფორმაციას ამის შესახებ სხვა მებრძოლები ავრცელებენ. საქართველოს საგარეო საქმეთა სამინისტროს ცნობით, უკრაინაში საქართველოს საელჩო ინფორმირებულია საქართველოს მოქალაქის გარდაცვალების შესახებ. განხორციელდება შესაბამისი პროცედურები. უკრაინაში რუსეთის მიერ სრულმასშტაბიანი ომის დაწყების შემდეგ, 2022 წლის 24 თებერვლიდან დღემდე, რუსეთის წინააღმდეგ მებრძოლი 40-ზე მეტი ქართველია დაღუპული. ნეტგაზეთი

“ქართული ოცნების” თავმჯდომარე ირაკლი კობახიძე “იმედის” ეთერით ეხმაურება რუსეთის მიერ საქართველოს მოქალაქეებისთვის სავიზო რეჟიმის, ასევე, პირდაპირ ავიარეისებზე დაწესებული შეზღუდვების გაუქმებას და ამ თემაზე გაკეთებულ კრიტიკულ შეფასებებს საქართველოში. კობახიძე აბსურდულს უწოდებს მოსაზრებას, რომ ეს გადაწყვეტილება რუსეთის “საჩუქარია” პრორუსული ხელისუფლებისთვის და ამბობს: “სინამდვილეში რეალობა არის ერთი. რეალობა არის ის, რომ ჩვენ ვატარებთ პრაგმატულ პოლიტიკას და ამ პოლიტიკის გამოხატულებაა ის, რაც დღეს იქნა მიღებული ჩვენი მოქალაქეების სასარგებლოდ. აქ, საბოლოო ჯამში, ხომ მოსარგებლე არის ჩვენი მოქალაქე, რომელსაც უწევს შემოვლითი გზით სამმაგი ხარჯით მგზავრობა. მილიონამდე ქართველი ცხოვრობს რუსეთის ფედერაციაში”. კობახიძის თქმით, “იყო სასჯელი დაწესებული რუსეთის მხრიდან და ეს სასჯელი მოიხსნა. საქართველოს მოქალაქეებისთვის დაწესებული სასჯელი”. მისი თქმით, ეს იყო რუსეთის მხრიდან ცალმხრივი გადაწყვეტილება, რაც შეეხება საქართველოს, ის რუსეთისთვის არ აწესებს სანქციებს, რადგან კობახიძის აზრით, ეს იქნება საქართველოს და მისი მოსახლეობის დასჯა. ნეტგაზეთი

უკრაინის პრეზიდენტის, ვოლოდიმირ ზელენსკის განცხადებით, მის ქვეყანას მეტი დრო სჭირდება რუსეთის წინააღმდეგ კონტრშეტევის დასაწყებად, რადგან სამხედროებს ჯერ კიდევ სჭირდებათ დაპირებული დასავლური დახმარება. „იმით, [რაც გვაქვს] შეგვიძლია წინსვლა და წარმატების მიღწევა, მაგრამ ბევრ ადამიანს დავკარგავთ. ვფიქრობ, რომ ეს მიუღებელია. ასე რომ, უნდა დავიცადოთ. ჯერ კიდევ გვჭირდება ცოტა მეტი დრო“, - აღნიშნა ზელენსკიმ. მისივე თქმით, საბრძოლო ბრიგადები, რომელთა ნაწილი ნატო-ს ქვეყნების მიერაა გაწვრთნილი, კონტრშეტევისთვის მზადაა, მაგრამ არმიას ჯერ კიდევ სჭირდება „რაღაცები“, მათ შორის ჯავშანტექნიკა. ამასთან, ვოლოდიმირ ზელენსკიმ ხაზგასმით აღნიშნა, რომ უკრაინა მშვიდობის სანაცვლოდ ტერიტორიის დათმობას არ აპირებს. „არავის შეუძლია ზეწოლა მოახდინოს უკრაინაზე ტერიტორიების დათმობასთან დაკავშირებით. რატომ უნდა მისცეს მსოფლიოს რომელიმე ქვეყანამ პუტინს თავისი ტერიტორია?“- აღნიშნა ზელენსკიმ.

ჩვენი ხელისუფლება ცდილობს, რუსეთის გადაწყვეტილება ჰუმანურად წარმოაჩინოს - საქართველო ყოველდღიურად შორდება დასავლეთს და მადლობებს იღებს რუსეთისგან, - ამის შესახებ ჟურნალისტებთან პარტია "საქართველოსთვის" წევრმა მიხეილ დაუშვილმა სავიზო რეჟიმის მოხსნისა და ფრენების აღდგენის თაობაზე რუსეთის პრეზიდენტის გადაწყვეტილების კომენტირებისას აღნიშნა. დაუშვილის განცხადებით, რუსეთთან სავიზო რეჟიმის გამკაცრების აუცილებლობაზე ჯერ კიდევ ერთი წლის წინ საუბრობდნენ და ახლა ასეთი გადაწყვეტილების მიღება ხელისუფლებისგან იქნებოდა ერთგვარი პასუხიც. დაუშვილი ამბობს, რომ ეს გადაწყვეტილება საქართველოს მოქალაქეების სასიკეთოდ მიღებული არ არის, ხოლო რუსეთის მოქალაქეები, რომლებიც საქართველოში ჩამოდიან, ტურისტები არ არიან და ისინი საცხოვრებლად მოდიან აქ. "ჩვენ უნდა გვახსოვდეს, რომ რუსეთი ოკუპანტია და პუტინია სწორედ ის ადამიანი, ვინც საქართველოს უდიდესი პრობლემა შეუქმნა და ჩვენი მოქალაქეების დაღუპვა არის პირადად მისი პასუხისმგებლობა. ვინმეს ხომ არ ჰგონია მართლა, რომ პუტინმა ეს იმიტომ გააკეთა, რომ ქართველ ხალხზე გიჟდება? ცალკე აღებული ეს გადაწყვეტილებები პრობლემა არ არის, მაგრამ პრობლემაა კონტექსტში - როცა რეგიონში ომია, რუსეთი ოკუპანტია და მთელი ცივილიზებული სამყარო რუსეთს ებრძვის, შენ კი შორდები შენს მოკავშირეებს, რომლებიც რუსეთისგან გიცავს, უახლოვდები რუსეთს, ამიტომ ეს გადაწყვეტილება უდიდესი საფრთხის შემცველია,"- განაცხადა დაუშვილმა. რუსეთმა საქართველოს მოქალაქეებისთვის სავიზო რეჟიმი გააუქმა. შესაბამისი განკარგულება რუსეთის პრეზიდენტმა ვლადიმერ პუტინმა გამოსცა. პუტინის განკარგულების თანახმად, სავიზო რეჟიმი 15 მაისიდან გაუქმდება.ვლადიმერ პუტინმა რუსული ავიაკომპანიებისთვის საქართველოში ფრენებზე აკრძალვაც მოხსნა. იპნ

„ქართული ოცნება” "ევროპის სოციალისტურ პარტიას" ტოვებს. ამის შესახებ პარტიის თავმჯდომარე ირაკლი კობახიძემ პოლიტსაბჭოს სხდომის შემდეგ ბრიფინგზე განაცხადა. მისი თქმით, მმართველი პატია "ევროპის სოციალისტურ პარტიის" წევრი 2015 წლიდან იყო. კობახიძის განცხადებით, გადაწყვეტილების შესახებ ევროპის სოციალისტურ პარტიას დაუყოვნებლივ გაეგზავნება წერილობითი განცხადება. “ევროპის სოციალისტურ პარტიის" იდეოლოგიური ტრანსფორმაცია მიუღებელია და შეუთავსებელია პარტიის და ქართველი ხალის ფასეულობებთან”,- განაცხადა ირაკლი კობახიძემ. იპნ

რუსეთის ამ გადაწყვეტილებას არავითარ შემთხვევაში არ უნდა შევხედოთ ჩვენი მოქალაქეების პრაქტიკული საჭიროების ჭრილში (ოცნება შეეცდება ამაზე ააწყოს პროპაგანდა) - ამ გადაწყვეტილებას უნდა შევხედოთ კონტექსტურად ქვეყნის საგარეო ორიენტაციის ცვლილების ჭრილში, - ამის შესახებ, სოციალურ ქსელში, პარტია "სქართველოსთვის" თავმჯდომარის მოადგილე, ნათია მეზვრიშვილი წერს. როგორც ნათია მექვრიშვილი აღნიშნავს, იმ ფონზე, როცა მთელი ცივილიზებული დასავლეთი შორდება რუსეთს, რუსეთთან ფიზიკური დაახლოება, დასავლეთისთვის არის მკაფიო მესიჯი, რომ საქართველო დგას რუსეთთან ერთად. "ეს არის ოცნების ბოლო ორი წლის ანტი-დასავლური პოლიტიკის, დასავლეთის მტრად და „გლობალური ომის პარტიის“ ნაწილად გამოცხადების ლოგიკური შედეგი; რუსეთის ჯილდო ხელისუფლებას, რომელიც სულ უფრო გვაშორებს დასავლეთს და გვაახლოებს რუსეთთან; ჯილდო კანდიდატის სტატუსის დაკნინებისთვის, ევროპარლამენტარების გინებისთვის, უკრაინის პოლიტიკურ მხარდაჭერაზე უარისთვის და ა.შ. ეს არის ლოგიკური შედეგი იმ ნაბიჯების და განცხადებების, რის გამოც ოცნება ხშირად იმსახურებს რუსეთის ხელისუფლების მაღალჩინოსნების ქება-დიდებას. იმ ფონზე, როცა მთელი ცივილიზებული დასავლეთი შორდება რუსეთს, რუსეთთან ფიზიკური დაახლოება, დასავლეთისთვის არის მკაფიო მესიჯი, რომ საქართველო დგას რუსეთთან ერთად. შესაბამისად, ეს გადაწყვეტილება უდიდესი დარტყმა იქნება საქართველოს ევროინტეგრაციის პროცესისთვის.", - წერს ნათია მეზვრიშვილი.

რუსეთის დუმის დეპუტატი სერგეი გავრილოვი „მთავარი არხისთვის“ მიცემულ ინტერვიუში მიესალმება საქართველოს მოქალაქეებისთვის რუსეთში შესასვლელად სავიზო რეჟიმის გაუქმებას. „ვთვლი, რომ ეს არის ძალიან დადებითი გადაწყვეტილება, რომელსაც დიდი ხანი ველოდით. ეს მოხსნის იმ ხელოვნურ ბარიერებს, რომლებიც ხელს უშლიდა ქართველებს რუსეთში მყოფი ნათესავების მონახულებაში, ისევე, როგორც პირიქით. ეს ასევე ხელს შეუწყობს კომერციული და პირადი კონტაქტების დამყარებას. ასევე შეამცირებს არსებულ დაძაბულობას სამხრეთ კავკასიაში. ჩვენ არაერთხელ მივმართავდით რუსეთის პრეზიდენტს, რომ მოხსნილიყო ყველა არსებული ბარიერი, მით უმეტეს, რომ საქართველოს არა აქვს სავიზო რეჟიმი რუსეთის მოქალაქეებთან. ვისაც არ უნდა რუსეთში ჩამოსვლა, შეუძლია არ ჩამოვიდნენ. მე არ ვიცი, იცოდა თუ არა ქართულმა ოცნებამ ამ გადაწყვეტილების შესახებ წინასწარ, მაგრამ ვიცი, რომ საქართველოში ბევრი ელოდა ამ გადაწყვეტილებას. პირადად მე ვაპირებ ჩამოსვლას. შესაძლოა ეს არ მოხდეს ახლო მომავალში, მაგრამ საქართველოში ჩემი ბევრი ნათესავია დაკრძალული. არ ვიცი, შემომიშვებენ თუ არა საქართველოში, ეს დამოკიდებულია ქვეყნის ხელისუფლებაზე”,- ამბობს გავრილოვი. [„მთავარი არხის“ თარგმანი] სწორედ გავრილოვის ვიზიტს უკავშირდება 2019 წელს რუსეთ-საქართველოს შორის პირდაპირი ფრენების გაუქმება. პუბლიკა

სტუდია მონიტორმა NCDC-ის პიარის ნინო მამუკაშვილის მეილის მიმოწერა მოიპოვა, სადაც ჩანს, თუ როგორ უკრძალავს ჯანდაცვის სამინისტრო დაავადებათა კონტროლისა და საზოგადოებრივი ჯანმრთელობის ეროვნულ ცენტრს, რომ სტუდია მონიტორს უკვე მომზადებული საჯარო ინფორმაცია მიაწოდოს. ამ საკითხზე ჩვენ ნინო მამუკაშვილს დავუკავშირდით, თუმცა მან ჩვენთან საუბარში აღნიშნული მიმოწერა უარყო. სტუდია მონიტორი·

"ქოლ-ცენტრებიდან შემოსული შავი ფული "ქართულ ოცნებას" არჩევნების გასაყალბებლად სჭირდება" - ექს-პრემიერის პარტია "ქართულ ოცნებას" ქოლ-ცენტრებისა და დავით კეზერაშვილის მფარველობაში ამხელს. პარტია "საქართველოსთვის" წვერი ნათია მეზვრიშვილი ამბობს, რომ "ოცნებას" აწყობს, ყველაზე დიდ ოპოზიციურ პარტიაში არსებობდეს ოლიგარქი, რომელიც დანაშაულებრივი გზით მოპოვებული ფულით აფინანსებს პარტიას, რათა შემდეგ თქვას, რომ ისინი უარესები არიან. დავით კეზერაშვილის და ხელისუფლების გარიგებაზე თავდაპირველად განცხადება გიორგი გახარიამ გააკეთა. ექს-პრემიერმა თქვა, რომ კეზერაშვილთან ერთად "ქართული ოცნება" ქოლ ცენტრების ბიზნესს ლობირებდა. ტვპირველი

საქართველოს საგარეო საქმეთა მინისტრი, ილია დარჩიაშვილი ამბობს, რომ ნებისმიერი პასუხისმგებლიანი ხელისუფლებისთვის მისასალმებელი იქნებოდა ისეთი გადაწყვეტილება, რომელიც მის მოქალაქეებს პირდაპირი ფრენების შესაძლებლობას მისცემდა. ამ კომენტარით გამოეხმაურა მინისტრი რუსეთის პრეზიდენტის დღევანდელ გადაწყვეტილებას, საქართველოს მოქალაქეებისთვის სავიზო რეჟიმის გაუქმებასთან დაკავშირებით. ილია დარჩიაშვილის თქმით, ნებისმიერი ქვეყანა თავად წყვეტს, რომელი ქვეყნის მოქალაქეებს დაუწესოს უვიზო რეჟიმი და რომელი ქვეყნისთვის მოხსნას. მინისტრის კომენტარს საზოგადოებრივი მაუწყებელი ავრცელებს. რუსეთის ფედერაციის პრეზიდენტის, ვლადიმერ პუტინის განკარგულების მიხედვით, რუსეთი საქართველოსთან უვიზო მიმოსვლას აუქმებს. ასევე, ვლადიმერ პუტინმა რუსული ავიაკომპანიებისთვის საქართველოში პირდაპირი ფრენის აკრძალვაც მოხსნა. რუსეთის მიერ საქართველოსთან სავიზო რეჟიმი ვლადიმერ პუტინის გადაწყვეტილებით, 15 მაისიდან გაუქმდება. საქართველოს მოქალაქეებს ვიზის გარეშე რუსეთის ტერიტორიაზე ყოფნის უფლება 90 დღემდე ვადით შეეძლებათ. რაც შეეხება რუსული ავიაკომპანიებისთვის საქართველოში ფრენაზე აკრძალვის მოხსნას, უკვე გამოქვეყნდა ვლადიმერ პუტინის შესაბამისი ბრძანება, რომლის მიხედვითაც, პრეზიდენტის 2019 წლის 21 ივნისის ბრძანება საქართველოში ფრენის აკრძალვის შესახებ ძალადაკარგულად გამოცხადდა. რუსული ავიაკომპანიები მოსკოვიდან თბილისში, კვირაში 7 პირდაპირ რეისს შეასრულებენ. ამის შესახებ რუსეთის ტრანსპორტის სამინისტრომ რუსულ მედიას უთხრა. პუბლიკა

პარტია „საქართველოსთვის“ თავმჯდომარე გიორგი გახარია აცხადებს, რომ რუსეთის მიერ საქართველოს მოქალაქეებისთვის სავიზო რეჟიმის გაუქმება და ავიაკომპანიებისთვის საქართველოში ფრენებზე აკრძალვის მოხსნა, მთავრობის „კარგი ქცევის“ შედეგია. მისივე თქმით, პარტია „ქართული ოცნების“ ყოფილი თავმჯდომარე და ყოფილი პრემიერ-მინისტრი ბიძინა ივანიშვილი საქართველოს აგრესორის მხარეს აყენებს. „რუსეთის გადაწყვეტილება ფრენების აღდგენაზე და სავიზო შეზღუდვის მოხსნაზე არის საქართველოს მთავრობის “კარგი ქცევის” შედეგი, რისთვისაც საქართველოს მთავრობა ხშირად იმსახურებს რუსეთის მაღალჩინოსნების ქებას. ივანიშვილი საქართველოს აგრესორის მხარეს აყენებს და საფრთხეს უქმნის საქართველოს ევროინტეგრაციის პერსპექტივას ქართველი ხალხის სურვილის წინააღმდეგ”, - აცხადებს გახარია.

ისეთი პირი უჩანს ოცნების აზრის და გეო-პოლიტიკის “გიგანტები” მალე იმას მოახერხებენ, რომ ომში მართლაც ჩავერთვებით - ოღონდ რუსების მხრიდან... “ფაშისტებზე” ისე ხშირად საუბრობენ, რომ მალე უკრაინის ტერიტორიის “უკრაინელი ფაშისტებისგან” გაწმენდას დაგვიანონსებენ (თანაც სიამაყით), - ამის შესახებ სოციალურ ქსელში პარტია "საქართველოსთვის" პოლიტიკური მდივანი კახაბერ ქემოკლიძე წერს. მისი თქმით, მოსკოვს განზრახული აქვს, "ოცნება" როგორც გაბანკროტებული ძალა, სათავისოდ გამოიყენოს. "ისეთი ტემპით მივდივართ, რომ ოკუპირებულ ტერიტორიებს კი არ დაიბრუნებენ, არამედ აქეთ “დაუბრუნებენ”: აღმოსავლეთ საქართველოს “სამხრეთ ოსეთს” მიუერთებენ, ხოლო დასავლეთ საქართველოს (განსაკუთრებით სამეგრელოს და სვანეთს) აფხაზეთს. ამ ყველაფერს კი ზარზეიმით გვამცნობენ, როგორც საყოველთაო სამშვიდობო ოცნებისეული (ანუ ივანიშვისეული) მისიის რეზულტატური შედეგი. ამ ვითარების ტრაგი-კომიკურობა რომ გვერდით გადავდოთ, “საყოველთაო მშვიდობის” და რუსული ფულის შედეგად მიღწეული ე.წ. 10%-იანი ეკონომიკური ზრდის ძახილში კრემლი ყოველგვარი იარაღის, ზედმეტი ენერგიისა და დამატებითი ძალისხმევის გარეშე ბოლომდე “უსრულებს” გეოპოლიტიკურად სრულიად უსუსურ ოცნებას. როგორც ჩანს, მოსკოვს განზრახული აქვს ცივილურ სამყაროში ოცნების, როგორც გადამგდებების, თაღლითების, გაბანკროტებულების, აფერისტების, ერთი კაცის ჭკუაზე ერთდროულად მარცხნივ-მაჯვნივ მოსიარულეების (მართლაც ცალ ფეხზე მდგომელების) და მეგობრების გარეშე დარჩენილების იარლიყი, სათავისოდ მყისიერად გამოიყენოს… დასკვნა: 2 0 2 4 - გონიერი ხალხის დახმარებით დიდი და კარგი ცვლილებების წელი უნდა იყოს!", - წერს ქემოკლიძე.

ოფიციალური გაცვლითი კურსით, რომელიც ხვალ, 11 მაისს შევა ძალაში, ლარი დოლართან და ევროსთან მიმართებით გაუფასურდა. 11 მაისისთვის 1 დოლარის ღირებულება 2.5294 ლარით განისაზღვრა, რაც წინა დღის კურსზე 0.0464 ლარით მეტია. ეროვნული ვალუტა გაუფასურდა ევროსთან მიმართებითაც, 11 მაისს 1 ევროს ღირებულება ოფიციალური კურსით 2.7707 ლარი იქნება, რაც წინა დღის კურსზე 0.0277 ლარით მეტია. ლარის გაუფასურებ აუკვე აისახა სავალუტო ჯიხურებსა და კომერციულ ბანკებში, სადაც 1 აშშ დოლარის ყიდვა, საშუალოდ 2.6 ლარად არის შესაძლებელი, 1 ევროს ყიდვა კი — 2.88 ლარად. ნეტგაზეთი

რუსი პროპაგანდისტი მარგარიტა სიმონიანი მიესალმება პუტინის მიერ საქართველოს მოქალაქეებისთვის უვიზო რეჟიმის გაუქმებას. მისი თქმით, ეს საქართველომ „თავისი სწორი ქცევით“ დაიმსახურა. რუსეთმა საქართველოს მოქალაქეებისთვის სავიზო რეჟიმი გააუქმა. რუსეთის სამართლებრივ პორტალზე გამოქვეყნდა ვლადიმერ პუტინის შესაბამისი განკარგულება. უვიზო რეჟიმი ძალაში 15 მაისიდან შევა. აგრეთვე, რუსეთმა გააუქმა შეზღუდვა საქართველოსთან პირდაპირ ავიამიმოსვლაზე. ნეტგაზეთი

ეკონომიკური პოლიტიკის კვლევის ცენტრის (EPRC) უფროსი მკვლევარი , საგარეო საქმეთა მინისტრის ყოფილი მოადგილე და ყოფილი ელჩი გიგი გიგიაძე მიიჩნევს, რომ რუსეთის მხრიდან სავიზო რეჟიმის გაუქმება ისევე როგორც საქართველოსა და რუსეთს შორის პირდაპირი ფრენების აღდგენა, უარყოფითად იმოქმედებს წლის ბოლომდე ევროკავშირის წევრობის კანდიდატის სტატუსის მინიჭებაზე. როგორც „ნეტგაზეთთან“ საუბრისას გიგიაძე აღნიშნავს, რუსეთის გადაწყვეტილება სავიზო რეჟიმის გაუქმების შესახებ, მოსკოვის მიმართ საქართველოს ხელისუფლების პოლიტიკის დადებითად შეფასებაა: „ეს არის, ასე ვთქვათ, დაფასება. ჩვენ ბოლო წელიწად-ნახევრის მანძილზე ვისმენთ რუსეთის ხელისუფლების მხრიდან საკმაოდ მაქებარ გზავნილებს საქართველოს ხელისუფლებისადმი მათი ე.წ. ბრძნული პოლიტიკისადმი რუსეთთან მიმართებით და ეს ნაბიჯი შეიძლება ჩავთვალოთ გარკვეული სახის კულმინაციად,“ — ამბობს გიგიაძე „ნეტგაზეთთან“ საუბრისას. გიგი გიგიაძის თქმით, იმ შემთხვევაში თუ რუსული ავიაკომპანიები დაიწყებენ საქართველოს მიმართულებით პირდაპირი რეისების შესრულებას, ეს პირდაპირ იქნება განხილული როგორც რუსეთისთვის დაკისრებული საერთაშორისო სანქციების დარღვევა და ყველა ქართული კომპანია, რომელიც მათ გარკვეულ მომსახურებას გაუწევენ, ანალოგიური სანქციების ქვეშ აღმოჩნდებიან: „ვფიქრობ ამან შეიძლება მნიშვნელოვანი სირთულეები შეუქმნას საქართველოსთვის ევროკავშირის წევრობის კანდიდატი ქვეყნის სტატუსის მინიჭების საკითხს, ვინაიდან თუ რუსული ავიაგადამზიდები დაიწყებენ ფრენას საქართველოს მიმართულებით, ჩვენ ვიცით, რომ ისინი სანქცირებული არიან ევროკავშირის და დასავლეთის მიერ და შესაბამისად ის ქართული კომპანიები, რომლებიც მათ მოემსახურებიან ან გაუწევენ გარკვეულ სერვისებს, აღმოჩნდებიან იგივე სანქციების ქვეშ. გარდა ამისა, ამ საკითხზე რამდენიმე თვის წინაც იყო საუბარი, ჩვენ მაშინ მოვისმინეთ საქართველოს ხელისუფლების წარმომადგენლების მხრიდან პოზიცია, რომ ისინი ფაქტობრივად მიესალმებიან პირდაპირი ფრენების აღდგენის საკითხს და ვერაფერს ცუდს ამაში ვერ ხედავდნენ, ხოლო ჩვენი ევროპელი პარტნიორებისთვის, ვფიქრობ რომ ეს იქნება გარკვეული წითელი ხაზის გადაკვეთა, ვინაიდან როგორც უკვე ვახსენე, რუსული ავიაგადამზიდები და ავიაკომპანიები არიან სანქციების ქვეშ და მათი ფრენების დაწყება საქართველოს მიმართულებით, ძალიან ნეგატიურად აისახება საქართველო-ევროკავშირის ურთიერთობებზე,“ — აცხადებს გიგი გიგიაძე. ყოფილი ელჩის თქმით, ამ შემთხვევაში ერთ-ერთი გამოსავალი შეიძლება იყოს რომ პირდაპირი რეისები ქართულმა ავიაკომპანიებმა შეასრულონ, თუმცა ამ შემთხვევაშიც, გიგი გიგიაძე მიიჩნევს, რომ აღნიშნულ ნაბიჯს ნეგატიური შეფასება ექნება საქართველოს დასავლელი პარტნიორების მხრიდან და უარყოფითად იმოქმედებს კანდიდატის სტატუსის მინიჭების საკითხზე: “რა დამოკიდებულება ექნება ევროკავშირს იმ შემთხვევაში თუ ქართული ავიაკომპანიები დაიწყებენ რუსეთში ფრენას, ეს დროში უნდა ვნახოთ. ყოველ შემთხვევაში, მიმაჩნია, რომ ამას ნეგატიური შეფასება ექნება ჩვენი დასავლელი პარტნიორების მხრიდან, რადგან მათი პოზიცია ჩვენთვის ცნობილია: ისინი მაქსიმალურად ცდილობენ აგრესორ ქვეყანასთან დისტანცირებას და მისთვის ხელსაყრელი პირობების შექმნაზე უარს ამბობენ. აქედან გამომდინარე, თუ საქართველო რაიმე ფორმით მოახერხებს და აღადგენს პირდაპირ ფრენებს რუსეთთან, ჩემი აზრით, ამას ვერაფრით ვერ მოჰყვება დადებითი შეფასება ევროკავშირის მხრიდან, განსაკუთრებით ამ დროს, როცა რუსეთის ფართომასშტაბიანი სამხედრო აგრესია უკრაინის მიმართ გრძელდება, ფაქტობრივად, რეალობა არ შეცვლილა, ისინი არ განიხილავენ უკრაინის ტერიტორიის დატოვებას. საბოლოო ჯამში, ეს უარყოფითად იმოქმედებს საქართველოსთვის წლის ბოლომდე კანდიდატის სტატუსის მინიჭებაზე,“ – აღნიშნავს გიგი გიგიაძე. ვლადიმირ პუტინის ახალი განკარგულებით, რუსეთმა მოხსნა საქართველოსთან პირდაპირ ავიამიმოსვლაზე 2019 წლის 20 ივნისის მოვლენების შემდეგ დაწესებული შეზღუდვა. სამართლებრივ პორტალზე გამოქვეყნებული დოკუმენტის თანახმად, ბათილადაა ცნობილი პუტინის ბრძანება შეზღუდვის შესახებ. რუსეთის ტრანსპორტის სამინისტროს განცხადებით, რუსული ავიაკომპანიები რუსეთ-საქართველოს შორის პირდაპირი ფრენების აღსადგენად ემზადებიან. უწყებაში ამბობენ, რომ რუსული ავიაკომპანიები, რუსული წარმოების თვითმფრინავებით, მოსკოვი-თბილისი/თბილისი-მოსკოვის რეისებს კვირაში 7-ჯერ შეასრულებენ. საქართველოსთან პირდაპირი ფრენები რუსეთმა 2019 წლის 8 ივლისს შეწყვიტა, მას შემდეგ, რაც დუმის დეპუტატის, სერგეი გავრილოვის საქართველოს პარლამენტის თავმჯდომარის სკამში დაჯდომამ პროტესტი გამოიწვია. ბოლო დროს რუსული მხარე აქტიურად საუბრობდა საქართველოსთან პირდაპირი ავიამიმოსვლის აღდგენის შესაძლებლობაზე. მმართველ პარტიაში მოვლენათა ასეთ განვითარებას მიესალმებოდნენ, თუმცა წინააღმდეგი იყო პრეზიდენტი სალომე ზურაბიშვილი. ნეტგაზეთი

პრეზიდენტს უნდა საქართველოს თავი დაამახსოვროს, როგორც ევროინტეგრაციისთვის მებრძოლმა, მაგის შნო და ერთი ადგილი თუ აქვს, აბრძანდეს, ჩავიდეს ევროპაში და უთხრას: "თქვენ საქართველოს მოქალაქეები და საქართველო დასაჯეთ, როცა სამართლიანად ეკუთვნოდა და არ მიანიჭეთ სტატუსი”, - ეს განცხადება საპარლამენტო უმრავლესობის წევრმა ირაკლი ზარქუამ რუსეთის მხრიდან შეზღუდვის გაუქმების თაობაზე პრეზიდენტის განცხადების კომენტირებისას გააკეთა. ზარქუა ამბობს, რომ სალომე ზურაბიშვილისგან ვერ შედგა ვერც მთავარსარდალი, ვერც ლიდერი და ვერც პოლიტიკური ფიგურა. "რაც შეეხება პრეზიდენტს, ბოლო პერიოდში აცდენილია რეალობას, ვერ საზღვრავს საქართველოს მოქალაქეების ინტერესებში რა არის და რა - არა. ახლა მივიდეს და უთხრას მილიონამდე ეთნიკურ ქართველს, რომ ეს არ არის სწორი, რომ ისევ უნდა იწვალონ, გადმოფრინდნენ ერევნით, აზერბაიჯანით, მეტი დახარჯონ, აღარაფერს ვამბობ ტურისტულ სარგებელზე. დაელაპარაკოს იმ მოქალაქეებს ქალბატონი სალომე, მივიდეს და უთხრას: "იცით რა, თქვენ არ გეკუთვნით, მიუხედავად იმისა, რომ გაგიმარტივდათ საქართველოში ჩამოსვლა, ჩვენ მაინც უნდა გაგირთულოთ". აცდენილია, ვერ შედგა მისგან ვერც მთავარსარდალი, ვერც საქართველოს ლიდერი და ვერც პოლიტიკური ფიგურა, ამიტომ მიწურვის ჟამი უდგება პრეზიდენტობის ვადის და უნდა დაამახსოვროს საქართველოს თავი როგორც მებრძოლმა ევროინტეგრაციისთვის. მაგის შნო და ერთი ადგილი თუ აქვს, აბრძანდეს, ჩავიდეს ევროპაში და უთხრას თქვენ საქართველოს მოქალაქეები და საქართველო დასაჯეთ, როცა სამართლიანად ეკუთვნოდა და არ მიანიჭეთ სტატუსი. ჩავიდეს და ელაპარაკოს, ხომ აქვს კავშირები, ხომ ამბობს, ჩვენ იმიტომ ავირჩიეთ, რომ ევროპასთან მეტად დააგვაახლოებდა. რა გააკეთა ქალბატონმა სალომემ გარდა იმისა, რომ მავნებლობს?! ", - განაცხადა ზარქუამ. იპნ

მივმართავ ხელისუფლებას, ხალხის ძალას კი არა, ხალხის ხმას მოუსმინოს, - ამის შესახებ საქართველოს პრეზიდენტმა სალომე ზურაბიშვილმა, რუსეთის მიერ საქართველოსთვის სავიზო რეჟიმის გაუქმებასთან დაკავშირებით განაცხადა. მისივე თქმით, ის დარწმუნებულია, რომ ამ საკითხთან მიმართებით საზოგადოება არის ერთიანი. „ეს არ არის მხოლოდ ის საკითხი, რომელიც ეწინააღმდეგება კანდიდატის სტატუსის მიღებას, ესეც მაფიქრებს, მაგრამ ეს, პირველ რიგში, ეწინააღმდეგება საქართველოს ინტერესებს, საქართველოს ღირსებას. ჩვენ უნდა ვიცოდეთ სად დგას ეს ქვეყანა, რომელიც არის ოკუპირებული, რომლის ტერიტორიებიც არის ოკუპირებული და რომელიც არის სოლიდარული ჩვენი უკრაინელი მეგობრების. ეს არის ჩვენი პოზიცია და ამ პოზიციის ერთგულნი უნდა ვიყოთ, უნდა ვიყოთ ბოლომდე. ეს არის საზოგადოების მოთხოვნა და დარწმუნებული ვარ თუ სხვანაირად მოხდა და დიდი იმედი მაქვს, რომ არ მოხდება, საზოგადოებასაც ექნება ამაზე პასუხი“, - განაცხადა სალომე ზურაბიშვილმა. ipn

მოვუწოდებ ხელისუფლებას - დროა, თავისი პოზიცია მკაფიოდ გამოაჩინოს, დროა, შეიკრიბოს უსაფრთხოების საბჭო და განხილული იყოს 3-თვიანი ვიზების დაწესება, - ამის შესახებ საქართველოს პრეზიდენტმა სალომე ზურაბიშვილმა ბრიფინგზე განაცხადა, რითაც რუსეთის მიერ საქართველოსთან პირდაპირი ფრენების აღდგენასა და სავიზო რეჟიმის გაუქმებას გამოეხმაურა. მისი თქმით, რუსეთის მხრიდან ეს ნაბიჯი პროვოკაციული, „უდროო და მიუღებელია“. „დღეს ყველამ მოვისმინეთ მორიგი რუსული პროვოკაციული განცხადება. რას ემსახურება ეს პროვოკაცია - შესაძლებელია ერთი მხრივ ეს იყოს გადაფარვა თავიანთი მარცხის, კრახის, ბახმუტში - არ ვიცი, როგორ უნდა დავახასიათო, მაგრამ ვგულისხმობ იმას, რაც ხდება და სადაც ვერ ახერხებენ თავიანთი ძალის გამოჩენას. შესაძლოა, ეს იყოს პასუხი ევროკავშირის მიერ გუშინ გაცხადებული სანქციების მე-11 პაკეტის მიმართ. ბევრი რამ შეიძლება იყოს, მაგრამ ჩვენთვის მთავარია, რომ ეს არის პროვოკაცია ჩვენი საზოგადოების გამოწვევისთვის და ჩვენს ხელისუფლებას დიდი გამოწვევის წინაშე აყენებს. ეს უთუოდ გამოიწვევს ერთგვარ დაძაბულობას, ყოველ შემთხვევაში პარტიებს შორის, თორემ დარწმუნებული ვარ, საზოგადოებაში დაძაბულობას არ გამოიწვევს - გამოიწვევს რეაქციას, რომელსაც ძალიან კარგად ესმის, რომ რუსეთი ამ ნაბიჯებს დგამს თავისი ინტერესებიდან გამომდინარე. სამწუხაროა, რომ ჩვენმა ხელისუფლებამ ჯერ ვერ გაიგო, არ დაფიქრდა ისტორიაზე და მაგალითებზე, რაც არსებობს, რომ რუსეთის ხელისუფლება დათმობებზე დათმობით არ პასუხობს. პასუხობს იმით, რაც უფრო გაართულებს მდგომარეობას. ეს არის მისი ქცევის მუდმივი მეთოდი და ამაზე უნდა დაფიქრდეს ხელისუფლებაა. ჩემი პოზიცია „ტვიტერზე“ გამოვხატე. მიმაჩნია რომ უადგილოა, უდროოა. ვიზების მოხსნა არ გვჭირდება, არც ფრენების აღდგენა, სანამ რუსეთი მთელი მსოფლიოსთვის აგრესორია და ოკუპანტის ასეთი ჟესტი უდროო და მიუღებელია. მოვუწოდებ ხელისუფლებას - დროა, თავისი პოზიცია მკაფიოდ გამოაჩინოს. დროა, რომ რაც არაერთხელ მოვითხოვე - შეიკრიბოს უსაფრთხოების საბჭო, შეიკრიბოს საჯაროდ და განხილული იყოს 3-თვიანი ვიზების დაწესება, რაც საჭირო არის ჩვენთვის, თუნდაც შიდა გამოწვევებიდან გამომდინარე“, - განაცხადა სალომე ზურაბიშვილმა. რუსეთმა საქართველოს მოქალაქეებისთვის სავიზო რეჟიმი გააუქმა. შესაბამისი განკარგულება რუსეთის პრეზიდენტმა ვლადიმერ პუტინმა გამოსცა. პუტინის განკარგულების თანახმად, სავიზო რეჟიმი 15 მაისიდან გაუქმდება. ამასთან, ვლადიმერ პუტინმა რუსული ავიაკომპანიებისთვის საქართველოში ფრენებზე აკრძალვაც მოხსნა. ipn

კიდევ ერთი რუსული პროვოკაცია! - ასე გამოეხმაურა საქართველოს პრეზიდენტი სალომე ზურაბიშვილი „ტვიტერის“ საკუთარ გვერდზე რუსეთის მიერ საქართველოსთან პირდაპირი ფრენების აღდგენასა და სავიზო რეჟიმის გაუქმებას. „კიდევ ერთი რუსული პროვოკაცია! საქართველოსთან პირდაპირი ფრენების აღდგენა და სავიზო რეჟიმის გაუქმება მიუღებელია, ვიდრე რუსეთი განაგრძობს აგრესიას უკრაინაზე და ოკუპირებული აქვს ჩვენი ტერიტორია“, - აღნიშნა ზურაბიშვილმა. რუსეთმა საქართველოს მოქალაქეებისთვის სავიზო რეჟიმი გააუქმა. შესაბამისი განკარგულება რუსეთის პრეზიდენტმა ვლადიმერ პუტინმა გამოსცა. პუტინის განკარგულების თანახმად, სავიზო რეჟიმი 15 მაისიდან გაუქმდება. ამასთან, ვლადიმერ პუტინმა რუსული ავიაკომპანიებისთვის საქართველოში ფრენებზე აკრძალვაც მოხსნა. ipn

საქართველომ დიდი ხანია გადაწყვიტა, რომ მისი ადგილი ევროკავშირშია, ეს საქართველოს მოსახლეობის ისტორიული არჩევანია. ამის შესახებ საქართველოში ევროკავშირის ელჩმა პაველ ჰერჩინსკიმ ევროპის დღისადმი მიძღვნილ ღონისძიებაზე სიტყვით გამოსვლის დროს განაცხადა. “ევროკავშირის ელჩობა საქართველოში ნამდვილი პრივილეგიაა, ასეთ ისტორიულ დროს, როდესაც საქართველომ ევროკავშირის წევრობაზე განაცხადი გააკეთა. 73 წლის წინ ევროპულმა ქვეყნებმა გადაწყვიტეს თავიანთი უთანხმოებები დაევიწყებინათ და ძალები დიდი სიკეთისთვის გაეერთიანებინათ. დღეს აღვნიშნავთ ევროკავშირის, როგორც სამშვიდობო პროექტის მუდმივ ღირებულებას, მრავალფეროვნებაში, ერთიანი, ყველა წევრი სახელმწიფოს წარმატებული ეკონომიკური და პოლიტიკური თანამშრომლობის მაგალითს. ზუსტად ამას, მშვიდობისა და უსაფრთხოების შენარჩუნებას, კეთილდღეობისა და ეკონომიკური შესაძლებლობების შექმნას, კანონის უზენაესობის უზრუნველყოფას, ადამიანის უფლებების დაცვას და ჩვენი წევრი ქვეყნების მრავალფეროვნების წარმოჩენას იცავს ევროკავშირი. ეს ის ღირებულებებია, რომლებიც საქართველოსა და ევროპას აკავშირებს. საქართველომ დიდი ხანია გადაწყვიტა, რომ მისი ადგილი ევროკავშირშია. ეს საქართველოს და საქართველოს მოსახლეობის ისტორიული არჩევანია. ამ მისწრაფებას ევროკავშირმა უპასუხა და ჩვენმა ლიდერებმა საქართველოსთვის ევროპული პერსპექტივის მინიჭება გადაწყვიტეს. ევროკავშირმა ასევე გამოაცხადა საქართველოსთვის ევროკავშირის კანდიდატის სტატუსის მინიჭების მზაობა მას შემდეგ, რაც ძირითადი პრიორიტეტები შესრულდება. ეს იყო ისტორიული გადაწყვეტილება და უნიკალური შესაძლებლობა, რომელიც საქართველოს მიეცა”, - განაცხადა ჰერჩინსკიმ.

პრეზიდენტის ადმინისტრაციის განცხადებით, ცესკოს თავმჯდომარეობის და ე.წ. პროფესიული წევრობის კანდიდატების შერჩევასთან დაკავშირებით საკანონმდებლო პაკეტს, მიღების შემთხვევაში, პრეზიდენტი ვეტოს დაადებს. ამის შესახებ პრეზიდენტის ადმინისტრაცია განცხადებას ავრცელებს, სადაც აღნიშნულია, რომ პრეზიდენტი კანდიდატურების შერჩევისას ხელმძღვანელობს მათი დამოუკიდებლობის ხარისხითა და მიუკერძოებლობით და ეჭვქვეშ არ აყენებს მათ კვალიფიკაციას. „უკვე მესამედ, მმართველი უმრავლესობა ცვლის კანონებს იმ მიზეზით, რომ პრეზიდენტმა არ წარადგინა მათთვის სასურველი კანდიდატები კონკრეტულ თანამდებობებზე. ესენია: ელჩები, ეროვნული ბანკის საბჭოს წევრები, ცესკო-ს თავმჯდომარე და წევრები. სამივე შემთხვევაში პრეზიდენტის პრინციპული პოზიცია გამომდინარეობს სახელმწიფო და არა პირადი ინტერესებიდან. პრეზიდენტი, კანდიდატურების შერჩევისას, ხელმძღვანელობს მათი დამოუკიდებლობის ხარისხითა და მიუკერძოებლობით. პრეზიდენტი ეჭვქვეშ არ აყენებს მათ კვალიფიკაციას, მაგრამ პრინციპულად მიაჩნია, რომ ასეთ თანამდებობებზე ერთპარტიული დანიშვნები ეწინააღმდეგება სახელმწიფოებრიობას და ევროპულ მომავალს. ამდენად, ამ კანონსაც პრეზიდენტი ვეტოს დაადებს“, - აღნიშნულია განცხადებაში. ცნობისთვის, პარლამენტში ინიცირებულია უმრავლესობის საკანონმდებლო ინიციატივა, რომლის გათვალისწინებით, ცესკოს თავმჯდომარეობის და ე.წ. პროფესიული წევრობის კანდიდატების შერჩევისა და პარლამენტისთვის წარდგენის პრეროგატივა პრეზიდენტის ნაცვლად, პარლამენტის თავმჯდომარეს ექნება. იცვლება მათ არჩევასთან დაკავშირებული პროცედურა და კვორუმი - თუკი პარლამენტი ცესკოს თავმჯდომარესა და წევრებს სრული შემადგენლობის უმრავლესობით (76 ხმა) მხარს დაუჭერს, თანამდებობას 5 წლის ვადით დაიკავებენ. ამ მიმართულებით „საარჩევნო კოდექსსა“ და პარლამენტის რეგლამენტში ცვლილებები ფრაქცია „ქართული ოცნების“ დეპუტატებმა მოამზადეს და ის ბიუროს 8 მაისის სხდომაზე წარედგინა.

კერძო სამხედრო კომპანია ვაგნერის ჯგუფის დამფუძნებელი რუსი ოლიგარქი, ევგენი პრიგოჟინი საკუთარი პრესსამსახურის მეშვეობით ავრცელებს ვიდეოს სათაურით – "ჭურვებს კერძო სამხედრო კომპანია ვაგნერს ჯერ კიდევ არ აძლევენ". პრიგოჟინის მტკიცებით, მან რუსეთის თავდაცვის სამინისტროსგან მიიღო განკარგულება, რომელშიც ნათქვამია, რომ პოზიციების დატოვება აღქმული იქნება როგორც სამშობლოს ღალატი. პრიგოჟინის თქმით, თუ ვაგნერი ჭურვებს ვერ მიიღებს, ისინი ფრონტს მაინც დატოვებენ და დასვამენ კითხვებს, თუ ვინ ღალატობს ქვეყანას რეალურად. "გუშინ მოგვივიდა სამხედრო ბრძანება, რომელშიც ხაზგასმით იყო ნათქვამი, პირველი, რაც მთავარია – პოზიციების დატოვება სამშობლოს ღალატად გამოცხადდებაო. ამას ჩვენ გვეუბნებიან. თუ არ იქნება საბრძოლო მასალები, ჩვენ პოზიციებს დავტოვებთ და კითხვებს დავსვამთ, ვინ ღალატობს სამშობლოს. როგორც ჩანს ის, ვინც ხელი მოაწერა. მეორე, ამ საბრძოლო ბრძანებაში ეწერა, რომ ვალდებული არიან, კერძო სამხედრო კომპანია ვაგნერი მოამარაგონ აბსოლუტურად ყველაფრით, რაც საჭიროა... როგორც ჩანს, მან, ვინც ხელი მოაწერა, ეს განცხადება ემოციურად გააკეთა თავის საბრძოლო განკარგულებაში, რადგან ეშინოდა, რომ წავიდოდით და მივიდოდნენ მასთან, როსტოვში. მასთან როსტოვში კი უკრაინელები მივლენ, თუ ფრონტი ჩამოიშლება. დღეს ყველაფერი კეთდება, რომ ის ჩამოიშალოს. დღეს თავდაცვის სამინისტროს ერთი ქვედანაყოფი გაიქცა ჩვენი ერთ-ერთი ფლანგიდან. პოზიციები მიაგდეს. ყველა გაიქცა... მესამე, ნათქვამი იყო, რომ ყველა გადაწყვეტილებას მიიღებს [გენერალი სერგეი] სუროვიკინი. პასუხს ჯერ ვერ ვიღებ". – თქვა პრიგოჟინმა.. პრიგოჟინის მტკიცებით, რუსეთის გენერალური შტაბის მეთაურმა, ვალერი გერასიმოვმა ვაგნერისთვის გამოყოფილი შეიარაღება, რაც თავდაპირველად ბრძანებაში იყო გაწერილი, საკუთარი ხელით ათჯერ შეამცირა. პრიგოჟინი თავდაცვის სამინისტროს ურჩევს, რომ მოთხოვნილი საბრძოლო მასალები გააორმაგონ და ისე გადასცენ. "რა უნდა გაკეთდეს? თუ მათ, ვინც გადაწყვეტილებებს იღებს, ომის მოგება უნდათ, ჩვენს განაცხადს აიღებდნენ, 20%-ს დაამატებდნენ ან გააორმაგებდნენ [ჭურვების რაოდენობას] და გვეტყოდნენ - ბიჭებო, აიღეთ, წადით და იბრძოლეთო. თუ ჩვენი განადგურება უნდათ, მოგვცემდნენ ამ [მოთხოვნილი რაოდენობის] საბრძოლო მასალას, წავიდოდით და დავიხოცებოდით არტიომოვსკში (ბახმუტი) და მათ ასეთი პრობლემები არ ექნებოდათ. შემდეგ შეექმნებოდათ, მაგრამ უფრო მაღალ დონეზე, როცა ხალხი მათთან ფიწლებით მივიდოდა, და წაგებული ომით ნაშოვნი ფულით აშენებულ სახლებთან ფიწლებზე წამოაცვამდა. ამიტომ, საბრძოლო მასალები უნდა გააორმაგონ და მოგვცენ, ეს მათთვის ჩემი რჩევაა". პრიგოჟინი ფაქტს, რომ რუსეთის შეიარაღებული ძალების სამხედროები გარბიან, მათი მეთაურების დავალებებს აბრალებს და ამბობს, რომ "თევზი თავიდან ყროლდება". ამას გარდა, მისი თქმით, 9 მაისის გამარჯვება "პაპების" გამარჯვებაა და თავად ახლა ოდნავადაც არ ეკუთვნით. რუსი ოლიგარქის თქმით, ვაგნერი მოატყუეს, ჯერ დაჰპირდნენ ყველაფერს, რაც საჭირო იქნებოდა, შემდეგ კი მიაწოდეს მოთხოვნილი საბრძოლო მასალის მხოლოდ 10%. მისი თქმით, ბახმუტს ჯერ არ დატოვებენ და კიდევ რამდენიმე დღე გაჩერდებიან. "7 რიცხვში ჩვენ დაგვპირდნენ, რომ [საბრძოლო მასალას] მოგვცემდნენ. 8-ში, 2 საათზე მივიღეთ საბრძოლო განკარგულება, რომ მოგვცემდნენ ყველაფერს, დღეს 9 რიცხვია, 8-ში იყო თათბირი, რომლის შემდეგაც გადმოგვცეს მოთხოვნილი რაოდენობის 10%. ჩვენ უბრალოდ თავხედურად მოგვატყუეს. არტიომოვსკიდან არ გავალთ, კიდევ რამდენიმე დღე გავჩერდებით, ვიბოდიალებთ". – თქვა პრიგოჟინმა. 5 მაისს კერძო სამხედრო კომპანია ვაგნერის ჯგუფის დამფუძნებელმა, რუსმა ოლიგარქმა ევგენი პრიგოჟინმა თავდაცვის სამინისტროს კვლავ მოსთხოვა ჭურვები, დანაკარგების რიცხვების სიდიდეში შოიგუ და მისი მოადგილე დაადანაშაულა და აღნიშნა, რომ საბრძოლო მასალის დეფიციტის გამო, ვაგნერი ქალაქ ბახმუტს 10 მაისს დატოვებდა. ამის შემდეგ რამზან კადიროვმა პრიგოჟინს პოზიციებზე საკუთარი ძალებით ჩანაცვლება შესთავაზა. მომდევნო დღეს რუსმა ოლიგარქმა საკუთარი ძალების კადიროველებით ჩანაცვლებაზე მზაობა გამოთქვა. ბახმუტის დატოვებასთან დაკავშირებულ განცხადებამდე პრიგოჟინმა გაავრცელა კადრები, რომლებშიც დახოცილი ვაგნერელები ჩანდნენ და მან შოიგუ და მისი მოადგილე, ვალერი გერასიმოვი გალანძღა. პრიგოჟინის მტკიცებით, მის ძალებს ბახმუტში ასაღები მხოლოდ რამდენიმე კილომეტრი დარჩათ, თუმცა რუსეთის თავდაცვის სამინისტროს "შურიანობაში" ადანაშაულებს. ოლიგარქის მტკიცებით, მის ჯგუფს საბრძოლო მასალის ხელოვნური დეფიციტი მოუწყვეს. 7 მაისს პრიგოჟინმა გაავრცელა ინფორმაცია, რომ ვაგნერის ჯგუფს დაჰპირდნენ ყველაფერს, რაც საჭირო იქნებოდა და თავდაცვის სამინისტროსთან შუამავლად გენერალი სერგეი სუროვიკინი დაუნიშნეს. ტაბულა

რუსეთის პრეზიდენტმა ვლადიმერ პუტინმა რუსული ავიაკომპანიებისთვის საქართველოში ფრენებზე აკრძალვა მოხსნა. აღნიშნულის შესახებ ბრძანება რუსეთის ოფიციალურ საკანონმდებლო ინტერნეტ პორტალზე გამოქვეყნდა. დოკუმენტის თანახმად, რუსეთის ფედერაციის პრეზიდენტის 2019 წლის 21 ივნისის ბრძანება ძალადაკარგულად გამოცხადდა, რომელიც რუსულ ავიაკომპანიებს საქართველოსა და რუსეთს შორის ფრენას უკრძალავდა. იპნ

მამუკა ხაზარძემ ხალხის ფულით რომ გადაწყვიტა თავისი პროექტის მშენებლობა და უარი მიიღო, ამის შემდეგ გახდა ოპოზიციონერი. მიხეილ დაუშვილი - პარტია „საქართველოსთვის" daushvili.mp4