tvati

გიორგი გახარია რეგიონული მიმართულებით პარტიის საქმიანობის გაძლიერების მიზნით შეხვედრებს აგრძელებს. პარტია “საქართველოსთვის” თავმჯდომარე გიორგი გახარია იმერეთის რეგიონის საკრებულოების და პარტიის წევრებს შეხვდა, რომლებსაც პარტიის რეგიონული მდივანი შალვა კერესელიძე წარუდგინა. შეხვედრაზე საქმიანობის და წარმომადგენლობის გაძლიერება და რეგიონებში პარტიის სამომავლო სამოქმედო გეგმით გათვალისწინებული მუშაობის განახლება განიხილეს. #იმერეთისაქართველოსთვის

ევროკომისიის პრეზიდენტი, ურსულა ფონ დერ ლაიენი სამშაბათს, “ევროპის დღის” აღსანიშნავად კიევს ეწვევა, - ინფორმაციას CNN-ი ევროკომისიის პრეზიდენტის პრესსპიკერზე დაყრდნობით ავრცელებს. უკრაინის პრეზიდენტმა ვოლოდიმირ ზელენსკიმ დღეს განაცხადა, რომ მისი ქვეყანა 9 მაისს „მეორე მსოფლიო ომში“ ნაცისტურ გერმანიაზე გამარჯვების დღის ნაცვლად „ევროპის დღეს“ აღნიშნავს. ზელენსკიმ პარლამენტს წარუდგინა კანონპროექტი, რომელიც “გამარჯვების დღის“ ერთი დღით ადრე, 8 მაისს აღნიშვნას ითვალისწინებს. რაც შეეხება „ევროპის დღეს“, ეს არის ყოველწლიური ღონისძიება, რომელიც ევროპაში მშვიდობასა და ერთიანობას აღნიშნავს. 9 მაისი არის ისტორიული „შუმანის დეკლარაციის“ წლისთავი. დეკლარაცია 1950 წლის 9 მაისს საფრანგეთის მაშინდელმა საგარეო საქმეთა მინისტრმა, რობერტ შუმანმა წარადგინა და მან ევროპის ქვეყნების გაერთიანებას და დღევანდელი ევროკავშირის შექმნას ჩაუყარა საფუძველი. IPN

ცესკო-ს განცხადებით, ცესკოს თავმჯდომარის მოადგილე, გიორგი სიორიძე რეგულარულად ცდილობს საკითხის პოლიტიზებას და პოლიტიკურად მიკერძოებული განცხადებებით აზიანებს ინსტიტუციას. „ცენტრალური საარჩევნო კომისიის თავმჯდომარის და წევრების არჩევის საკითხი საარჩევნო ადმინისტრაციის დამაზიანებელი განცხადებების საბაბი კიდევ ერთხელ გახდა. ამჯერად საუბარია განცხადებაზე, რომელიც ცესკოს თავმჯდომარის მოადგილემ ამ საკითხთან დაკავშირებით მომზადებულ კანონპროექტზე საუბრისას გააკეთა. გიორგი სიორიძე, რომელიც საარჩევნო ადმინისტრაციაში პარტია „ლელოს“ მიერ არის დანიშნული, აცხადებს, რომ ამ კანონპროექტით „ხელისუფლება ცესკოს ფაქტობრივად ერთპარტიულ ოკუპაციას უკეთებს“. სამწუხაროა, რომ ეს არ არის მის მიერ გაკეთებული საარჩევნო ადმინისტრაციის იმიჯის შემლახავი პირველი განცხადება. ის რეგულარულად ცდილობს საკითხის პოლიტიზებას და პოლიტიკურად მიკერძოებული განცხადებებით აზიანებს ინსტიტუციას. გიორგი სიორიძე, როგორც ცესკოს ერთ-ერთი ხელმძღვანელი პირი, ვალდებულია დაიცვას საარჩევნო ადმინისტრატორის პროფესიული და ეთიკური ნორმები, იყოს მიუკერძოებელი. თუმცა, ამის საპირისპიროდ, დღეს მის მიერ გაკეთებული განცხადება გახდა უწყების იმიჯის დამაზიანებელი პოლიტიკური კამპანიის საფუძველი. იმ ფონზე, როცა საარჩევნო ადმინისტრაცია ორიენტირებულია საარჩევნო პროცესში ელექტრონული ტექნოლოგიების დანერგვის მიმართულებით განსახორციელებელ საქმიანობებზე და აშკარაა ამ კუთხით მიღწეული მნიშვნელოვანი წარმატებები, ამ ტიპის განცხადებები აზიანებს არა მხოლოდ უწყებას, არამედ ზოგადად საარჩევნო გარემოს. საარჩევნო რეფორმის წარმატებით განხორციელება და ელექტრონული ტექნოლოგიების დანერგვა არჩევნებში ჩართული ყველა მხარის პასუხისმგებლობაა. უმნიშვნელოვანესია, რომ პროცესი არ დაზიანდეს პოლიტიკური მოტივების გამო, რადგან არჩევნები საერთო საქმეა და მისი წარმატებით ჩატარებაც ყველა მხარის ინტერესში უნდა იყოს“- ნათქვამია განცხადებაში.

სომხეთის პრემიერ-მინისტრი, ნიკოლ ფაშინიანი დღეს, რუსეთის პრეზიდენტის, ვლადიმერ პუტინის მიწვევით მოსკოვში გაემგზავრება, - ინფორმაციას რუსული მედია სომხეთის მინისტრთა კაბინეტის პრესსამსახურზე დაყრდნობით ავრცელებს. მათივე ინფორმაციით, ფაშინიანი, 9 მაისს „გამარჯვების დღისადმი“ მიძღვნილ ღონისძიებებში მიიღებს მონაწილეობას. „პრემიერი ნიკოლ ფაშინიანი რუსეთის პრეზიდენტის, ვლადიმერ პუტინის მოწვევით დღეს სამუშაო ვიზიტით მოსკოვში გაემგზავრება. პრემიერ-მინისტრი მონაწილეობას მიიღებს დიდ სამამულო ომში გამარჯვებისადმი მიძღვნილ ღონისძიებებში, რომელიც 9 მაისს გაიმართება“,- აცხადებენ სომხეთის მინისტრთა კაბინეტის პრესსამსახურში. იპნ

ცესკო - სთან დაკავშირებით ცვლილებების მიღების შემთხვევაში, მომდევნო არჩევნების ბედი გადაწყდება ბატონი ივანიშვილის რომელიმე რეზიდენციაში, - ამის შესახებ ჟურნალისტებთან პარტია „საქართველოსთვის" წევრმა ბექა ლილუაშვილმა განაცხადა, რითაც გამოეხმაურა უმრავლესობის საკანონმდებლო ინიციატივას, რომლის თანახმად, ცესკოს თავმჯდომარეობის და ე.წ. პროფესიული წევრობის კანდიდატების შერჩევის და პარლამენტისთვის წარდგენის პრეროგატივა პრეზიდენტის ნაცვლად, პარლამენტის თავმჯდომარეს ექნება, ხოლო ასარჩევად სრული შემადგენლობის უმრავლესობა (76 ხმა) იქნება საჭირო. მისი თქმით, ცვლილებების დაინიცირება მოწმობს, რომ "ქართული ოცნება" არჩევნების გასაყალბებლად უკვე ემზადება. ლილუაშვილის განცხადებით, მნიშვნელოვანია საერთაშორისო პარტნიორებთან კომუნიკაცია და "ქართულ ოცნებაზე" წნეხის შენარჩუნება, რომ მსგავსი ცვლილებები არ განხორციელდეს. "ეს ცვლილებები მიუთითებს, რომ საქართველოს ხელისუფლება შუალედური არჩევნების ზარ - ზეიმით ჩატარების შემდეგ დადგა მკაფიო მოცემულობის წინაშე, რომ არანაირი რესურსი გარდა არჩევნების გაყალბებისა ხელისუფლების შესანარჩუნებლად არ აქვს და ამავდროულად ეს კიდევ ერთხელ მოწმობს იმას, რომ ამ ცვლილებების მიღების შემთხვევაში მომდევნო არჩევნების ბედი გადაწყდება ბატონი ივანიშვილის რომელიმე რეზიდენციაში. შესაბამისად, მნიშვნელოვანია, საზოგადოებამ მოახდინოს მაქსიმალური მობილიზაცია მომდევნო არჩევნებზე, რომ ხელისუფლებას არ მიეცეს არჩევნების გაყალბების საშუალება. ამავდროულად პარლამენტში ოპოზიციური პარტიების მხრიდან უნდა იქნას პოლიტიკურ დღის წესრიგში ეს საკითხი არსებითად შემოტანილი, რადგან სპეციალური საგამოძიებო სამსახურის, სასამართლოს და სხვა ინსტიტუტების შემდეგ საარჩევნო კომისიასთან დაკავშირებით ასეთი ცვლილება მიუთითებს იმაზე, რომ არჩევნების გაყალბებაზე "ქართული ოცნება" უკვე მუშაობს და უკვე კანონით აფორმებს ამ რეალობას,"- განაცხადა ლილუაშვილმა. ის ასევე გამოეხმაურა "ლელოსთან" შესაძლო კოალიციური თანამშრომლობის თაობაზე ინფორმაციას და აღნიშნა, რომ ალიანსის საჭიროება მათთვის არ დგას, ხოლო "ლელოსთან" მნიშვნელოვან საკითხებზე თანამშრომლობენ. "საარჩევნო ბარიერის გადალახვის თვალსაზრისით ალიანსების საჭიროება ჩვენთვის არ არსებობს, რადგან ბარიერის გადალახვის პრობლემა არც დღეს დგას პარტია "საქართველოსთვის" და არც მომავალში იქნება. რაც შეეხება საქართველოს ეროვნული ინტერესებისთვის, ევროპული მომავლის გადარჩენისთვის "ლელოსთან" თანამშრომლობაზე ჩვენ კომპლექსები არასდროს გვქონია და გავაგრძელებთ თანამშრომლობას,"- განაცხადა ლილუაშვილმა. ინტერპრესნიუსი

კიევის მერის, ვიტალი კლიჩკოს განცხადებით, რუსეთმა წუხელ კიევზე, უკრაინაში სრულმასშტაბიანი შეჭრის შემდეგ, დრონების გამოყენებით ყველაზე მასიური თავდასხმა განახორციელა. "ჩვენი საჰაერო თავდაცვის ძალების წყალობით, 36-ვე დრონი ჩამოაგდეს. ეს არის ყველაზე მასიური თავდასხმა ჩვენს ქალაქზე ომის დაწყების შემდეგ", - აღნიშნა კლიჩკომ. მისი თქმით, თავდასხმის შედეგად ქალაქის არცერთი მცხოვრები არ დაღუპულა, თუმცა დაზიანდა საცხოვრებელი კორპუსები, საბავშვო ბაღი და სკოლა. ყველაზე სერიოზულად დაზიანდა მაღალსართულიანი შენობა სვიატოშინსკის რაიონში. „ამ სახლში მცხოვრები ადამიანები დაშავდნენ. 5 ადამიანია დაშავებული, ორი საავადმყოფოშია, ერთს ოპერაცია ჩაუტარდა, არც ერთი მათგანის სიცოცხლეს საფრთხე არ ემუქრება“, - განაცხადა მერმა. ინტერპრესნიუსი

რა ხდება ე.წ ქოლცენტრების საქმეზე? კახაბერ ქემოკლიძე, პარტია "საქართველოსთვის" პოლიტიკური მდივანი "პოლიტ-ქალაქში" 344873154_938772633993710_327410600376635620_n.mp4

მარტის აქციების დროს დაკავებული, პარტია “საქართველოსთვის” წევრის, კოკა კობალაძის პროცესი ისევ გადაიდო. ამის შესახებ ინფორმაციას პარტია „საქართველოსთვის“ ავრცელებს. „კოკა კობალაძეს შინაგან საქმეთა სამინისტრო პოლიციელებისადმი წინააღმდეგობის გაწევას და წვრილმან ხულიგნობას ედავება. სასამართლოს კობალაძის ადვოკატმა ვიდეო მტკიცებულებები წარუდგინა, სადაც ჩანს, რომ დაკავების დროს კობალაძე პოლიციას წინააღმდეგობას არ უწევს და არც შეურაცხყოფას აყენებს. დღეს, სასამართლო პროცესზე მოწმის სახით პოლიციელები უნდა დაეკითხა, თუმცა პროცესზე შინაგან საქმეთა სამინისტროს თანამშრომლები არ გამოცხადდნენ, რის მიზეზადაც სამინისტროს წარმომადგენელმა პოლიციელების გადაუდებელ ოპერატიულ ღონისძიებაში მონაწილეობა დაასახელა. პარტია “საქართველოსთვის” წევრის, კოკა კობალაძის პროცესი 31 მაისს, 12 საათზე გაიმართება“, - ნათქვამია ინფორმაციაში.

პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ბრალდებულ ლაზარე გრიგორიადისის სასამართლო პროცესი გადაიდო. აღნიშნულის მიზეზი ადვოკატების თქმით, მათ მიერ მტკიცებულების დაუშვებლობის საკითხის სააპელაციო სასამართლოში გასაჩივრება გახდა. სწორედ აღნიშნულთან დაკავშირებით, სააპელაციო სასამართლოდან გადაწყვეტილება დაცვის მხარეს არ მიუღია. სხდომა გაურკვეველი ვადით გადაიდო. გრიგორიადისი დუმილის უფლებით სარგებლობს. ცნობისთვის, ლაზარე გრიგორიადისს, რომელსაც პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ედება ბრალი, აღკვეთის ღონისძიების სახით პატიმრობა 31 მარტს შეეფარდა. გამოძიების ინფორმაციით, ბრალდებულმა 7 მარტს, რუსთაველის გამზირზე გამართული აქციის მიმდინარეობისას, 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, რომლებიც სამსახურებრივ მოვალეობას ასრულებდნენ, ორჯერ ისროლა ე.წ. „მოლოტოვის კოქტეილი“. ასევე, ბრალდებულმა 9 მარტს, ჭანტურიას ქუჩაზე, განზრახ წაუკიდა ცეცხლი შინაგან საქმეთა სამინისტროს კუთვნილ „ტოიოტა კოროლას“ მოდელის ავტომანქანას, რომელიც ადგილზე დაიწვა. ამ ქმედების შედეგად, სახელმწიფო ბიუჯეტს 39 500 ლარის ქონებრივი ზიანი მიადგა. ლაზარე გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის „ა“ ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს. 7-8 მარტის საქმეზე სისხილის სამართლის კოდექსით ჯამში, 6 პირი დააკავეს, მათგან 5 ბრალდებული გირაოს სანაცვლოდ არის გათავისუფლებული. palitranews

ცესკო-ს თავმჯდომარისა და რამდენიმე წევრის კანდიდატების შერჩევის და პარლამენტისთვის წარდგენის უფლებამოსილება, პრეზიდენტის ნაცვლად, პარლამენტის თავმჯდომარეს ექნება. შესაბამისი ცვლილებები „საარჩევნო კოდექსსა“ და რეგლამენტში შედის. კანონპროექტის მიხედვით, იცვლება მათ არჩევასთან დაკავშირებული პროცედურა და კვორუმი. კერძოდ, თუ პარლამენტი ცესკო-ს თავმჯდომარესა და წევრებს სრული შემადგენლობის უმრავლესობით (76 ხმით) მხარს დაუჭერს, თანამდებობას ხუთი წლის ვადით დაიკავებენ. რაც შეეხება შერჩევის პროცედურას, ცვლილებებით, ცესკო-ს თავმჯდომარისა და წევრების შესარჩევ კონკურს გამოაცხადებს და საკონკურსო კომისიას შექმნის პარლამენტის თავმჯდომარე. პარლამენტის თავმჯდომარე წარუდგენს საკანონმდებლო ორგანოს კანდიდატურებს. საკონკურსო კომისიის შემადგენლობაში პრეზიდენტის ერთი წარმომადგენელი იქნება. კანონპროექტით კონკრეტდება, რომ იმ შემთხვევაში, თუ კენჭისყრის შედეგად ყველა ვაკანსია არ შეივსო, პრეზიდენტი შესაბამისი კონკურსში მონაწილე სხვა კანდიდატს წარადგენს და კენჭი პრეზიდენტის წარდგენილ კანდიდატურას ეყრება. ცვლილებების ინიციატორები უმრავლესობის წევრები არიან. ისინი განმარტავენ, რომ ცესკო-ს წევრობისა და ცესკო-ს თავმჯდომარეობის კანდიდატების შერჩევის დღეს მოქმედი წესის ანალოგიური სამართლებრივი პრაქტიკა არცერთ განვითარებულ ქვეყანაში არ არსებობს. მოქმედი კანონით, ცესკო-ს თავმჯდომარეობისა და წევრობის კანდიდატები პარლამენტს ასარჩევად პრეზიდენტმა უნდა წარუდგინოს, რომელიც მანამდე საკონკურსო კომისიას ქმნის და აცხადებს კონკურსს. რაც შეეხება პარლამენტის მიერ მათი არჩევის წესსა და პროცედურას, ცესკო-ს თავმჯდომარის და წევრების ასარჩევად პლენარულ სხდომაზე კენჭისყრა თავდაპირველად 2/3-იანი კვორუმით ტარდება. იმ შემთხვევაში, თუკი ცესკო-ს თავმჯდომარის 2/3-ით არჩევა ვერ ხდება, კენჭი მათ სრული შემადგენლობის უმრავლესობით ეყრება. 2/3-იანი კვორუმით არჩეული ცესკო-ს თავმჯდომარე თანამდებობას 5-წლიანი ვადით იკავებს, უბრალო უმრავლესობით დამტკიცებული კი – ექვსი თვის ვადით. ავტორი - თეონა მანაგაძე

უკრაინის პრეზიდენტი, ვოლოდიმირ ზელენსკი გამოდის ინიციატივით, რომ „მეორე მსოფლიო ომში“ ნაციზმზე გამარჯვების დღე უკრაინაში 8 მაისს აღინიშნოს, - ინფორმაციას უკრაინული მედია ავრცელებს. ამავდროულად, მან ხელი მოაწერა განკარგულებას უკრაინაში 9 მაისს ევროპის დღის აღნიშვნის შესახებ. „ჩვენ ვუბრუნებთ ჩვენს სახელმწიფოს პატიოსან ისტორიას იდეოლოგიური გავლენის გარეშე. სწორედ 8 მაისს იხსენებს მსოფლიოს ქვეყნების უმეტესობას ნაცისტებზე გამარჯვების სიდიადეს. არ დავუშვებთ ანტიჰიტლერულ კოალიციის ერების ერთობლივი გამარჯვების მითვისებას და არ დავუშვებთ სიცრუეს, თითქოს გამარჯვება რომელიმე ქვეყნის ან ერის მონაწილეობის გარეშე იყო შესაძლებელი“, - განაცხადა ზელენსკიმ. მან რუსეთის უკრაინაში შეჭრა ჰიტლერის ექსპანსიონისტურ მიზნებს შეადარა და განაცხადა, რომ ორივე რეჟიმის მიზანი ერთი და იგივეა - „მონობა ან განადგურება“. „სამწუხაროდ, ბოროტება დაბრუნდა. როგორც მაშინ შემოიჭრა ბოროტება ჩვენს ქალაქებსა და სოფლებში, ასე ხდება ახლაც, როგორც მაშინ კლავდა ჩვენს ხალხს, იგივეს აკეთებს ახლაც“, - აღნიშნა ზელენსკიმ. ipn

საქართველოში სათესლე კარტოფილის იმპორტის მოცულობა 2015 წლის შემდეგ ყველაზე მაღალია და მიმდინარე წინასეზონურ პერიოდში, ანუ დეკემბერ-აპრილში ამავე თვეების ბოლო 8-წლიან საშუალო მაჩვენებელს 45%-ით აღემატება. ამის შესახებ პორტალ EastFruit-ის მონაცემებში არის ნათქვამი. საქართველოში სათესლე კარტოფილის იმპორტი დეკემბერში იწყება, ხოლო აქტიური საიმპორტო თვეები თებერვალი, მარტი და აპრილია. იმპორტის პიკი აპრილშია, მაისში კი საგრძნობლად იკლებს და მომდევნო წლის დეკემბრამდე, პრაქტიკულად, ჩერდება. ვაჭრობის ოფიციალური მონაცემებით, მიმდინარე წინასეზონურ პერიოდში იმპორტის საშუალო თვიური CIF-ფასები (ღირებულება, დაზღვევა, ფრახტი, ანუ გადაზიდვა) 1 კგ-ზე 0.80-დან 1.00 დოლარამდე (2-დან 2,5 ლარამდე) მერყეობს. ეს, წლიური თვალსაზრისით, დაახლოებით, 5-10%-იანი ზრდაა, თუმცა ეროვნული ვალუტის გამყარების გამო ლარში ფასები შემცირდა. წინა წლების მსგავსად, საქართველოში სათესლე კარტოფილის იმპორტი ახლაც გერმანიიდან და ნიდერლანდებიდან ხდება. როგორც წესი, ევროკავშირის თესლი ქართულ ბაზარს უმაღლესი ხარისხის კარტოფილით უზრუნველყოფს. კერძოდ, ქართველი ფერმერები, რომლებიც სათესლე კარტოფილის იმპორტს მიმართავენ, აცხადებენ, რომ ხარისხიან კარტოფილზე მოთხოვნა მაღალია და მასში კარგადაც იხდიან. თუმცა, EastFruit-ის მონაცემებით, ევროკავშირის თესლიდან მიღებული მაღალი ხარისხის პროდუქცია კარტოფილის მთლიან წარმოებაში, როგორც წესი, დიდ წილს არ იკავებს. კერძოდ, 2022 წლის დეკემბრიდან დღემდე საქართველოში, დაახლოებით, 1800 ტონა სათესლე კარტოფილი შემოვიდა. კილოგრამ თესლზე 10 კილოგრამ სასურსათო კარტოფილს პროგნოზირებენ. იმის გათვალისწინებით, რომ ამ მოცულობას მაისის იმპორტიც დაემატება, იმპორტირებული თესლიდან მოსავლიანობა 18 000 ტონას გადააჭარბებს, კარტოფილის მთლიანი წარმოება კი ქვეყანაში, ჩვეულებრივ, 200 000 ტონას შეადგენს. მოამზადა ლადო სულაბერიძემ

უკრაინის თავდაცვის მინისტრის მოადგილე, ანა მალიარი არ გამორიცხავს, რომ 9 მაისს, როდესაც რუსები 1941-1945 წლების „დიდ სამამულო ომში" „გამარჯვების დღეს“ აღნიშნავენ, უკრაინის წინააღმდეგ რუსეთის აგრესია გამწვავდეს. „შეუძლებელია 100%-ით დადასტურება ან უარყოფა. ვიდრე ომი გაგრძელდება ესკალაციის ალბათობა ყოველთვის იქნება, თარიღის მიუხედავად“, - აღნიშნა უკრაინის თავდაცვის მინისტრის მოადგილემ. მალიარის თქმით, რუსებს უყვართ თარიღები და ისტორიული პარალელები, მაგრამ იყო საკმაოდ ბევრი ისტორიული და სადღესასწაულო თარიღი, როდესაც გამწვავება არ მომხდარა. „ამიტომ, შეიძლება იყოს ან არ იყოს გამწვავება. ჩვენ ყოველთვის მზად უნდა ვიყოთ მტრის მზაკვრული ქმედებისთვის და თავდაცვისთვის", - აღნიშნა უკრაინის თავდაცვის მინისტრის მოადგილემ. რუსულმა ძალებმა ბოლო დღეებში ბახმუტის დაბომბვის ინტენსივობა საგრძნობლად გაზარდა, მაგრამ უკრაინის თავდაცვის ძალები ქალაქის შენარჩუნებას ახერხებენ. არსებული სიტუაციის კომენტირებისას, უკრაინის არმიის აღმოსავლეთის დაჯგუფების მეთაურმა, ალექსანდრე სირსკიმ განაცხადა, რომ რუსები ყველანაირად ცდილობენ ბახმუტის 9 მაისამდე აღებას, უკრაინელი ჯარისკაცების ამოცანაა, მათ ამაში ხელი შეუშალონ. ინტერპრესნიუსი

2023 წლის პირველი სამი თვის მონაცემების მიხედვით, შინაგან საქმეთა სამინისტროს საექსპერტო - კრიმინალისტიკური დეპარტამენტის ნარკოლოგიური შემოწმების სამსახურმა, ქვეყნის მასშტაბით, ნარკოტიკულ ზემოქმედებაზე 1241 ადამიანი შეამოწმა, საიდანაც 928-ს ნარკოტიკული თრობა დაუდასტურდა. როგორც შინაგან საქმეთა სამინისტროს მიერ ვებგვერდზე გამოქვეყნებულ საჯარო ინფორმაციაშია აღნიშნული, 2023 წლის პირველ კვარტალში ნარკოტიკულ ზემოქმედებაზე შემოწმებულ პირთაგან არცერთი არ იყო არასრულწლოვანი, ხოლო 32 მათგანი ქალია. დოკუმენტის მიხედვით, შსს საექსპერტო - კრიმინალისტიკური დეპარტამენტის ნარკოლოგიური შემოწმების სამსახურმა, იანვარ-მარტში, ყველაზე მეტი 754 მამაკაცი 25-44 ასაკობრივი კატეგორიიდან შეამოწმა, საიდანაც 574-ს ნარკოლოგიური თრობა დაუდასტურდა. რაც შეეხება ქალების შემოწმების შედეგებს, 32 ქალიდან, ოფიციალური ინფორმაციის მიხედვით, დადებითი ნარკოლოგიური შედეგი 13 მათგანს ჰქონდა. ამასთან, შინაგან საქმეთა სამინისტროს საჯარო ინფორმაციის მიხედვით, საექსპერტო - კრიმინალისტიკური დეპარტამენტის ნარკოლოგიური შემოწმების სამსახურმა, ნარკოტიკულ ზემოქმედებაზე ყველაზე მეტი ადამიანი თბილისსა და სამეგრელოს რეგიონში შეამოწმა. რაც შეეხება 2022 წლის მონაცემებს, დოკუმენტის მიხედვით, შსს საექსპერტო - კრიმინალისტიკური დეპარტამენტის ნარკოლოგიური შემოწმების სამსახურმა, ქვეყნის მასშტაბით, ნარკოლოგიურ თრობაზე 5052 ადამიანი შეამოწმა, საიდანაც ნარკოტიკული თრობა 3631-ს დაუდასტურდა. ცნობისთვის, შინაგან საქმეთა სამინისტროს მიერ გამოქვეყნებული ინფორმაციით, 2021 წლის განმავლობაში, ქვეყნის მასშტაბით, სულ 4225 პირი შეამოწმეს, ნარკოტიკული თრობა 2689-ს დაუდასტურდა. შემოწმებულ პირთაგან 71 ქალი იყო, მათ შორს, ნარკოტიკული თრობა 17 ქალს დაუდასტურდა. რაც შეეხება არასრულწლოვანებს, 2021 წლის განმავლობაში, ჯამში, ქვეყნის მასშტაბით, 30 არასრულწლოვანი შეამოწმეს, მათ შორის 28 ბიჭი და 2 გოგო, აქედან ნარკოტიკული თრობა 19-ს აქვს დადასტურებული 17 - ბიჭს და 2 - გოგოს. ipn

უკრაინის შეიარაღებული ძალების ცნობით, 8 მაისის ღამით მოიგერიეს რუსეთის მიერ კამიკაძე დრონებით, „Shahed-ით" შეტევა. უწყების ცნობით, 35-ვე უპილოტო საფრენი აპარატი ბრიანსკის ოლქის აეროდრომიდან იყო გაშვებული. 8 მაისის დილას გავრცელდა ცნობები კიევის რამდენიმე რაიონში დრონების ნამსხვრევების ჩამოცვენის შესახებ. დაშავდა 5 ადამიანი, ინფორმაცია კიევის საქალაქო-სამხედრო ადმინისტრაციის ხელმძღვანელმა სერგეი პოპკომ გაავრცელა. გავრცელებული ინფორმაციით, რვა გაშვება განხორციელდა რუსეთის მიერ ანექსირებული ყირიმის კონცხის თარხანკუტის ტერიტორიიდან. უკრაინელი სამხედროების ინფორმაციით, რაკეტები მოხვდა ერთ-ერთი კვების საწარმოს საწყობსა და რეკრეაციულ ზონას შავი ზღვის სანაპიროზე. 8 მაისის ღამით რუსეთის სტრატეგიულმა ავიაციამ Х-22 ტიპის რაკეტით იერიში მიიტანა ქალაქ ოდესაზე. იუწყებიან, რომ რუსეთის მიერ ანექსირებული ყირიმის კონცხის თარხანკუტის ტერიტორიიდან რვა გაშვება განხორციელდა. უკრაინელი სამხედროების ინფორმაციით, რაკეტები ერთ-ერთი კვების საწარმოს საწყობსა და შავი ზღვის სანაპიროზე არსებულ დასასვენებელ ობიექტს მოხვდა. ირანული წარმოების კამიკაძე დრონების ჩამოგდების შესახებ უკრაინის შეიარაღებულმა ძალებმა პირველად გასული წლის სექტემბრის შუა რიცხვებში განაცხადეს, მას შემდეგ უკრაინა რეგულარულად ავრცელებს ინფორმაციას ირანული დრონების ჩამოყრის შესახებ. მაშინ ირანმა და რუსეთმა უარყვეს რუსული არმიისთვის დრონების მიწოდება. თეირანმა ნოემბერში აღიარა რუსეთისთვის დრონების მიყიდვა. radio tavisupleba

უკრაინის ეროვნული უსაფრთხოებისა და თავდაცვის საბჭოს მდივნის, ოლექსი დანილოვის განცხადებით, რუსეთს ყველაზე უარესი მომავალში ელოდება. მისი თქმით, რუსეთის პრეზიდენტის, ვლადიმერ პუტინის საუბარი "ყველაზე დიდ გეოპოლიტიკურ“ კატასტროფაზე, რომელშიც ის საბჭოთა კავშირის დაშლას გულისხმობდა, პროგნოზი აღმოჩნდა. „"ყველაზე დიდი გეოპოლიტიკური კატასტროფა", რომელზეც პუტინმა ისაუბრა, პროგნოზი აღმოჩნდა და არა ფაქტი. რუსეთისთვის კატასტროფა ახლა ხდება და ყველაზე უარესი წინ არის - დამარცხება, დაშლა, სასამართლო პროცესი, კონტრიბუცია“, - დაწერა დანილოვმა „ტვიტერზე“. IPN

საქართველოში ევროკავშირის ელჩი პაველ ჰერჩინსკი ორბელიანის მოედანზე, ევროპის დღეების ფარგლებში გამართულ ღონისძიებებს დაესწრო და მოქალაქეებს ევროპის დღე მიულოცა. მისი თქმით, ამ დღეს საქართველო ევროპული პერსპექტივით ხვდება, რაც დიდი წარმატებაა. „ჩვენ ევროპის დღეს აღვნიშნავთ. ამ დღეს საქართველო ევროპული პერსპექტივით ხვდება, ეს დიდი წარმატებაა. შემდეგი ეტაპი კანდიდატის სტატუსის მოპოვებაა, რაც კიდევ უფრო დაახლოვებს საქართველოს ევროკავშირის წევრობასთან. ამ მიზანს მოსახლეობის დიდი უმრავლესობა უჭერს მხარს. ეს ისტორიული შანსია, რათა გახდეთ ერთიანი, უსაფრთხო და ეკონომიკურად ძლიერი ევროპული ოჯახის წევრი. ვუსურვებ საქართველოს წარმატებას ამ გზაზე“, – განაცხადა პაველ ჰერჩინსკიმ, რომელმაც ორბელიანის მოედანზე შეკრებილებს ქართულად მიმართა. 1TV

ეს არ არის პირველი ევროპის დღის აღნიშვნა საქართველოში, მაგრამ ეს პირველი ევროპის დღის აღნიშვნაა, რომელსაც საქართველო ვროპული პერსპექტივით ხვდება. შვედეთი ყოველთვის მხარს უჭერდა საქართველოს ევროპულ ინტეგრაციას, – ამის შესახებ საქართველოში შვედეთის სამეფოს საგანგებო და სრულუფლებიანმა ელჩმა, ულრიკ თიდესტრომმა ორბელიანის მოედანზე ევროპის დღეებისადმი მიძღვნილ ღონისძიებაზე განაცხადა. ელჩის თქმით, საქართველოს გზა ევროპისკენ ისეთივე მნიშვნელოვანია შვედეთისთვის, როგორც მისი თავმჯდომარეობა ევროკავშირში. „გილოცავთ შვედეთის და ევროპის დღეს. ჩემთვის დიდი პატივია, რომ დღეს აქ ვარ, საქართველოს პრემიერ-მინისტრთან, თბილისის მერთან და ევროკავშირის ელჩთან ერთად, შვედეთის დღეების აღსანიშნავად, რომელიც ევროპის დღეების ნაწილს წარმოადგენს. მინდა, გულითადი მადლობა გადავუხადო საქართველოს მთავრობას, საგარეო საქმეთა სამინისტროს და საქართველოში შვედეთის საელჩოს ამ დღის მოწყობისთვის. მშვენიერია ქართულ-შვედური სოფლის ნახვა აქ, თბილისის გულში. ასევე, მინდა, მადლობა გადავუხადო შვედ არტისტებს და მომღერლებს, რათა აქ ჩამოვიდნენ, რომ თქვენ გასიამოვნონ და კონცერტი გამართონ. ასევე, აქ არის შვედეთის ერთ-ერთი საუკეთესო შეფმზარეული, რათა დაგაგემოვნებინოთ შვედური კერძები. დიდი მადლობა უნდა გადაგიხადოთ ყველას, დამსწრე საზოგადოებას, რათა მობრძანდით აქ, რომ აღგვეღნიშნა შვედეთის და ევროპის დღე ერთად. ეს არ არის პირველი ევროპის დღის აღნიშვნა საქართველოში, მაგრამ ეს პირველი ევროპის დღის აღნიშვნაა, რომელსაც საქართველო ვროპული პერსპექტივით ხვდება. შვედეთი ყოველთვის მხარს უჭერდა საქართველოს ევროპულ ინტეგრაციას. საქართველოს გზა ევროპისკენ ისეთივე მნიშვნელოვანია შვედეთისთვის, როგორც მისი თავმჯდომარეობა ევროკავშირში. რატომ? იმიტომ, რომ ჩვენ ერთად უფრო ძლიერები ვართ, და გვჭირდება უფრო მეტი საქართველო როგორც შვედეთში, ასევე ევროკავშირში, და გვინდა უფრო მეტი შვედეთი საქართველოში, რასაც ჩვენ დღეს დავინახავთ. დიდი მადლობა, საქართველოს გაუმარჯოს, შვედეთს გაუმარჯოს, ევროპას გაუმარჯოს“, – განაცხადა ულრიკ თიდესტრომმა.

თბილისის მერიის ინფორმაციით, წერეთლის გამზირზე მიმდინარე სარეაბილიტაციო სამუშაოების პროცესში აღმოჩენილია მიწისქვეშა ნაგებობები, რომლებიც, სპეციალისტების დასკვნით, წარმოადგენს მე-19 საუკუნის სამარხს. მათივე ცნობით, შესწავლის და გადაწყვეტილების მიღების პროცესში ჩართულები არიან საქართველოს კულტურული მემკვიდრეობის დაცვის ეროვნული სააგენტოს წარმომადგენლები და არქეოლოგები. თბილისის მერიაში განმარტავენ, რომ ადგილზე სამუშაოები წარმოებს სწორედ სპეციალისტების ზედამხედველობით, შესაბამისი წესების დაცვით და დამატებით ინფორმაციას უახლოეს დღეებში გაავრცელებენ. ავტორი - თათია მაყაშვილი

თვის ყოველ ბოლო პარასკევს, კრისტიან ჰეროლდი, რეგენსბურგის (გერმანია) „კარიტასიდან“, მობილური ტელეფონების ნებაყოფლობით დონორებს ელოდება. ის ტელეფონებს თავისი კლიენტებისთვის - რეგენსბურგის იმ უსახლკარო მაცხოვრებლებისთვის აგროვებს, რომლებსაც მობილური ტელეფონები არ გააჩნიათ. როგორ გადავარჩინოთ ახალგაზრდები უსახლკარობისგან კამპანია საზოგადოებრივ ცხოვრებაში აქტიური მონაწილეობისთვის კამპანია, სახელწოდებით „მეორადი ტელეფონი“ („SecondHandy“), იმ მიზნით ტარდება, რომ უსახლკაროებს საზოგადოებრივ ცხოვრებაში მონაწილეობის შესაძლებლობა მიეცეთ. დონორებმა ტელეფონი პირადად უნდა ჩააბარონ. სმარტფონის ასაკს მნიშვნელობა არა აქვს - მთავარია, გამართული იყოს. პროექტის მენეჯერი, კრისტიან ჰეროლდი ამოწმებს, მობილურ ტელეფონში მისი წინა მფლობელის ყველა მონაცემი და ინფორმაცია წაშლილია თუ არა. მხოლოდ ასეთი შემოწმების შემდეგ გადაეცემა სმარტფონი ახალ მფლობელს. ადამიანები სხვისთვის დახმარების გაწევის დიდ სურვილს ამჟღავნებენ ხალხი აქციაში მონაწილეობის მიღებისთვის მზადყოფნას გამოთქვამს: ერთ საათში ხუთი დონორი მოვიდა, მათ რვა მობილური ტელეფონი ჩააბარეს. ბევრი დონორისთვის მნიშვნელოვანია, რომ ტელეფონი სანაგვეში კი არ მოისროლოს, არამედ ახალ მფლობელს გადაეცეს. კრისტიან ჰეროლდი ასეთ დადებით დასკვნას აკეთებს: ძალიან კმაყოფილი ვარ. ვფიქრობ, ჩემს კლიენტებს ეს საჩუქარი აუცილებლად მოეწონებათ. შემოწირული მობილური ტელეფონების ნახევარზე მეტის გამოყენება ნამდვილად შეიძლება- კრისტიან ჰეროლდი სმარტფონები უსახლკაროებს ოჯახთან კავშირს უნარჩუნებს ამის შემდეგ, კრისტიან ჰეროლდი ტელეფონებს თავის კლიენტებს გადასცემს. უსახლკაროები მას ხშირად რჩევისთვის აკითხავენ, ზოგჯერ კი ძალიან კონკრეტულ ნივთისთვის, მაგალითად, - სმარტფონისთვის. ბენი საარი გამონაკლისი არ არის: ის ქუჩაში 2019 წლიდან ცხოვრობს. ამ მომენტისთვის რეგენსბურგის უსახლკაროთა თავშესაფარში მონახა ადგილი. ის კარგა ხანია სმარტფონის გარეშეა და ამიტომ, განსაკუთრებით უხარია მობილურის ჩუქება, რადგან მხოლოდ მისი საშუალებით შეუძლია, სხვადასხვა ოფისს დაუკავშირდეს. მაგრამ ეს არ არის ერთადერთი მიზეზი: სხვა თუ არაფერი, შემიძლია ისევ დავურეკო ჩემს ოჯახს, რომელიც ძალიან მენატრება. ყველაზე ცუდი ის არის, როდესაც ოჯახი გენატრება და მასთან კონტაქტს ვერ ახერხებ- ბენი საარი უსახლკარო ადამიანებმა თავად უნდა აიღონ გაშვებული ხარჯები სიმ-ბარათსა და მიმდინარე ხარჯებზე უსახლკაროებმა თავად უნდა იზრუნონ. ყველა შემოწირულ ტელეფონს უკვე ჰყავს მსურველი. კამპანია - ეს არის მარტივი გზა იმისთვის, რომ უსახლკაროებს მიეცეთ შესაძლებლობა, მეტი მონაწილეობა მიიღონ საზოგადოებრივ ცხოვრებაში. EUROVISION

არ უნდა გაგვიკვირდეს, რომ სხვა ოპოზიციონერებსაც ასეთი „ქოლცენტრები“ ჰქონდეთ, რადგან მათ არ აქვთ არანაირი შემაფერხებელი და მორალური მუხრუჭი, – ამის შესახებ პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა. მისი თქმით, ზოგადად, ოპოზიციას სახელი გატეხილი აქვს საქართველოში. „თუ გავითვალისწინებთ იმას, რომ მათი მთავარი დამფინანსებელია დავით კეზერაშვილი, რომელიც ამით არის ცნობილი არა მხოლოდ საქართველოში, არამედ ევროპაში, არ უნდა გაგვიკვირდეს, რომ სხვა ოპოზიციონერებსაც ასეთი „ქოლცენტრები“ ჰქონდეთ, რადგან მათ არ აქვთ არანაირი შემაფერხებელი და მორალური მუხრუჭი ამ მიმართულებით“, – განაცხადა სამხარაძემ. ავტორი - თეონა მანაგაძე

რუსულმა სამხედრო თვითმფრინავმა გადაიტაცა და სახიფათოდ მიუახლოვდა პოლონეთის თვითმფრინავს, რომელიც პატრულირებას ახორციელებდა ევროკავშირის სასაზღვრო დაცვის სააგენტოს, Frontex-ისთვის - იუწყება პოლონეთის საზღვრის დაცვის სააგენტო 7 მაისს. Let L-410 5 მაისს პატრულირებას ახორციელებდა საერთაშორისო საჰაერო სივრცეში, რუმინეთის განლაგების რეგიონში, როცა მას მიუახლოვდა რუსეთის Su-35 - აცხადებს პოლონეთის საზღვრის დაცვის სააგენტო, რომელიც რუსეთის საბრძოლო თვითმფრინავს ბრალს სდებს "აგრესიულ და სახიფათო მანევრირებაში". radio tavisupleba

რუსი ოკუპანტები მიკოლაივის ოლქს X-22 ტიპის 5 რაკეტით დაესხნენ თავს, - ამის შესახებ ოლქის სამხედრო ადმინისტრაციის ხელმძღვანელი, ვიტალი კიმი იუწყება. მისი ინფორმაციით, თავდასხმის შედეგად სამრეწველო საწარმოს შენობა დაზიანდა. „წინასწარი ინფორმაციით, Tu-22M3 სტრატეგიული თვითმფრინავიდან ოლშანსკაიასა და კონსტანტინოვსკაიას თემებს X-22 ტიპის 5 რაკეტა ესროლეს, დაზიანდა სამრეწველო საწარმოს შენობა“, - აცხადებს ვიტალი კიმი. მისივე თქმით, სარაკეტო დარტყმას მსხვერპლი არ მოჰყოლია. ipn

წელს სასკოლო ექსკურსიების გამართვისას 150 კმ-იანი შეზღუდვა მოიხსნება. ამის შესახებ განათლებისა და მეცნიერების სამინისტროში განგვიცხადეს. აღნიშნული შეზღუდვა შარშან დაწესდა და სკოლებს უწევდათ, მარშრუტი ისე დაეგეგმათ, რომ მანძილი 150 კმ-ზე მეტი არ ყოფილიყო. მაშინ ფაქტს მშობლების მხრიდან უკმაყოფილება მოჰყვა. მაშინ სამინისტროში განმარტავდნენ, რომ მანძილის შეზღუდვა მოსწავლეთა უსაფრთხოების მიზნით იყო განსაზღვრული და ამავდროულად, სკოლებისთვის სარეკომენდაციო ხასიათის გახლდათ. გათვალისწინებული იყო კორონავირუსით გამოწვეული ეპიდვითარებაც. თუმცა, წელს აღნიშნული შეზღუდვა მოიხსნება და სკოლებს ნებისმიერი მიმართულებით შეეძლებათ ექსკურსიის მოწყობა. ამასთანავე, ძალაში რჩება ყველა ის რეკომენდაცია, რაც აქამდე იყო შემუშავებული. კერძოდ: ექსკურსიის ორგანიზატორი/ხელმძღვანელი პასუხისმგებელია მგზავრობის პროცესში და ექსკურსიის ლოკაციაზე მოსწავლეთა უსაფრთხოებაზე, რისთვისაც იგი გამოითხოვს და სკოლის დირექტორს ექსკურსიამდე არანაკლებ 10 დღის ადრე წარუდგენს ტრანსპორტის გამართულობის დამადასტურებელ დოკუმენტს, მძღოლის პირადობის დამადასტურებელი დოკუმენტისა და შესაბამისი კატეგორიის ავტომანქანის მართვის უფლების დამადასტურებელი მოწმობის ასლს. ასევე ინფორმაციას ექსკურსიის მიზნების, დაგეგმილი აქტივობების, მონაწილე პირების, პასუხისმგებელი პირების, ექსკურსიის თარიღისა და ლოკაციის შესახებ. ამის შემდეგ სკოლის დირექტორი წარდგენილ დოკუმენტაციას განიხილავს და გადაწყვეტს, მისცეს თუ არა ორგანიზატორს ექსკურსიის განხორციელების უფლება. მნიშვნელვანია, რომ ექსკურსიის დროს არასრულწლოვნები არ მოხვდნენ მდინარისა და წყალსაცავების მიმდებარე ტერიტორიაზე, მეწყერსაშიშ და და სხვა დაუცველ ტერიტორიაზე. განაგრძეთ კითხვა BPN.GE

ცხოველთა მონიტორინგის სააგენტო შინაური ცხოველების მეპატრონეებს სთავაზობს, რომ დაარეგისტრირონ ცხოველები მუნიციპალურ თავშესაფარში, რის შემდეგაც ცხოველის უფასოდ სტერილიზაცია - კასტრაციას შეძლებენ. როგორც ცხოველთა მონიტორინგის სააგენტოს დირექტორი გიორგი კობიაშვილი განმარტავს, რეგისტრაციის საფასური 19 ლარს შეადგენს. „ცხოველთა მონიტორინგის სააგენტო მოსახლეობას სიახლეს ვთავაზობთ: თუ მოქალაქე მოვა მუნიციპალურ თავშესაფარში და აქ დაარეგისტრირებს ცხოველს, მუნიციპალური თავშესაფარი უფასოდ მოახდენს ცხოველის სტერილიზაცია-კასტრაციას, რაც საკმაოდ კარგია. იცით, რომ გარკვეულ საფასურს იხდიან ადამიანები როგორც კერძო ვეტკლინიკაში, ასევე მუნიციპალურ თავშესაფარში, ასეთი მომსახურება ფასიანია. ამ კამპანიით გვინდა წავახალისოთ ცხოველთა რეგისტრაცია, რაც ძალიან მნიშვნელოვანია. ასევე, გვინდა ხაზი გაესვას სტერილიზაცია-კასტრაციის მნიშვნელობას. ადამიანებს შეუძლიათ ცხოველთან ერთად მობრძანდნენ მუნიციპალურ თავშესაფარში, სადაც რეგისტრაციის საფასურია გადასახდელი 19 ლარის ოდენობით, სპეციალური ჩიპით ხდება ცხოველის რეგისტრაცია და იდენტიფიცირება, რის შემდეგაც შეუძლიათ ცხოველი სრულიად უფასოდ გაასტერილონ ცხოველი მუნიციპალურ თავშესაფარში. ამ კამპანიას სატესტო სახე აქვს, 1 თვე იქნება გათვალისწინებული. შედეგებიდან გამომდინარე, თუ როგორ გაამართლებს ეს კამპანია, ვიფიქრებთ, გავაგრძელოთ თუ არა ასეთი აქცია. ის მეპატრონე, რომელსაც ცხოველი არ ჰყავს რეგისტრირებული ჯარიმას ექვემდებარება. 2015 წელს საკრებულომ გამოსცა დებულება, რომლის მიხედვითაც აუცილებელია მოსახლეობამ დაარეგისტრიროს პატრონობაში მყოფი ცხოველი“,- აღნიშნავს გიორგი კობიაშვილი მედიაცენტრ „მთავარში“. ინტერპრესნიუსი