tvati

საქართველოს ინსპექტორის სამსახურის ყოფილი ხელმძღვანელის, ლონდა თოლორაიას განცხადებით, საქართველოს პრეზიდენტის მიერ თბილისის ოპერისა და ბალეტის სახელმწიფო თეატრში სხვადასხვა სფეროს წარმომადგენელი ქალების შეკრებაზე ხელისუფლების წარმომადგენლები „ვერ მოვიდნენ კი არა, არ მივიდნენ.“ მისივე თქმით, სწორი პოზიცია, რომელიც საქართველოს პრეზიდენტს უჭირავს, ხელისუფლების წარმომადგენლებისთვის მიუღებელია. „ჩემი აზრით, ეს ძალიან მნიშვნელოვანი შეხვედრა იყო. სამწუხაროდ, ჩვენ იმის შეხსენება გვჭირდება, რომ ეს ქვეყანა ყველასია და ამ ქვეყნის ინტერესებისთვის ყველამ ჩვენი საქმე უნდა ვაკეთოთ, ჩემთვის ძალიან ემოციური შეხვედრა იყო. კიდევ ერთხელ, ამ ადამიანმა შეგვახსენა, რომ ქვეყნის განვითარებაში თითოეული ჩვენგანის როლი ძალიან მნიშვნელოვანი არის და მივესალმები იმას, რომ საქართველოს პრეზიდენტი დღეს ზუსტად იმ ადგილზე დგას, რომელ ადგილზეც საქართველოს ნებისმიერი მოქალაქე უნდა იდგეს. ასევე, ვისურვებდი, რომ ამ შეხვედრაზე ხელისუფლების წარმომადგენლები ყოფილიყვნენ, იმიტომ, რომ ეს ერთიანობის საჩვენებელი ღონისძიება იყო. აბსოლუტურად ნეიტრალური ღონისძიება იყო, სადაც სამშობლოს სიყვარულზე კიდევ ერთხელ დაგაფიქრებდა. ხელისუფლების წარმომადგენლები ვერ მოვიდნენ კი არა, არ მივიდნენ. სწორი პოზიცია, რომელიც საქართველოს პრეზიდენტს უჭირავს, მათთვის მიუღებელია, ზოგადად ყველანაირი განსხვავებული აზრი მათთვის მიუღებელია. ყველა ღონისძიება, მათ შორის ასეთი პატრიოტულ მოტივებზე ჩატარებული ღონისძიება, მათთვის რატომღაც მიუღებელი აღმოჩნდა, მაშინ როდესაც ძალიან ხმამაღლა გვესაუბრებიან ქართველობაზე, ეროვნულ ინტერესებზე და დღევანდელი დღე სხვა არაფერია, თუ არა საქართველოს ეროვნული ინტერესების ირგვლივ გაერთიანება“, - განაცხადა თოლორაიამ. იპნ

უკრაინული მხარე უკმაყოფილოა ვატიკანის გადაწყვეტილებით, რომლითაც დიდ პარასკევს რომში გამართული ჯვრის ტარების მსვლელობაში უკრაინელი მოზარდების გვერდით რუსი მოზარდებიც მონაწილეობდნენ. საგარეო საქმეთა სამინისტროს პრესსპიკერის, ოლეგ ნიკოლენკოს თქმით, ამით ვატიკანმა აგრესორი და მსხვერპლი ქვეყანა ერთმანეთს გაუთანაბრა. „ჩვენ ძალიან მადლიერი ვართ პაპის ფრანცისკეს შეშფოთების გამო უკრაინისა და უკრაინელების მიმართ. სამწუხაროდ, იძულებული ვართ განვაცხადოთ, რომ წლევანდელი პროცესია კიდევ ერთხელ დაიჩრდილა მსხვერპლისა და აგრესორის გათანაბრების მცდელობით. იმედგაცრუებული ვართ, რომ უწმინდესმა მხედველობაში არ მიიღო უკრაინული მხარის არგუმენტაცია“, – აცხადებს ნიკოლენკო. ავტორი - სალომე თორაძე

მადლობა საქართველოს პრეზიდენტს დიდებული წუთებისთვის, თავისუფლებისთვის ბრძოლის ისტორიის ასე ამაღელვებლად გაცოცხლებისთვის, მებრძოლი ქალების დაფასებისთვის და ქვეყნის უახლესი ისტორიის გადამწყვეტ მომენტში სწორ ადგილას დგომისთვის, - ამის შესახებ, პარტია "საქართველოსთვის" თავმჯდომარის მოადგილე ნათია მეზვრიშვილი, სოციალურ ქსელში წერს. მისი თქმით, 9 აპრილის ტრაგედიამ დამოუკიდებლობა მოიტანა, დღევანდელი ბრძოლა კი, საქართველოს ევროპული ოჯახის ღირსეულ წევრად აქცევს. "სამწუხაროდ, 34 წლის შემდეგაც თავისუფლებისთვის ვიბრძვით. მაგრამ თავისუფლებისთვის ბრძოლის მძიმე, სევდიანი და ამავდროულად საამაყო წარსული გვახსენებს, რომ სხვა არჩევანის უფლება არ გვაქვს - საქართველოს მომავალი ევროპაშია! 9 აპრილის ტრაგედიამ დამოუკიდებლობა მოიტანა. დღევანდელი ბრძოლა მჯერა, საქართველოს ევროპული ოჯახის ღირსეულ წევრად აქცევს! დიდება თავისუფლებას! დიდება გმერთად საქართველოსთვის! წინ ევროპისკენ!", - წერს ნათია მეზვრიშვილი.

მინდა, გაგიზიაროთ ერთი არახალი ინიციატივა, რომელიც ჯერ განხორციელებული არ არის, მაგრამ იმედს არ ვკარგავ, რამდენიმე წელია, მივწერე თუნდაც თბილისის მერს და სხვებს, რომ ვაკის პარკში ის მემორიალი, რომელიც ეძღვნება მეორე მსოფლიო ომს, უნდა იყოს გადაკეთებული, – ამის შესახებ საქართველოს პრეზიდენტმა, სალომე ზურაბიშვილმა განაცხადა. პრეზიდენტის განცხადებით, მემორიალი უნდა მოიცავდეს ყველა იმ ბრძოლას, რომელიც საქართველოს ჰქონდა. „უნდა იყოს გადაკეთებული, რომ, მეორე მსოფლიო ომთან ერთად, ყველა ჩვენი ბრძოლა და ყველა ის ადამიანი, რომელიც იბრძოდა ამ ქვეყნის დამოუკიდებლობისთვის, იყვნენ გაერთიანებული. ჩვენ თუ გვიჭირს გაერთიანება ცოცხლად, შეიძლება, მემორიალში გაერთიანებული ვიყოთ და ესეც იქნება ძალიან დიდი ნიშანი. უფრო ღირსეულიც იქნება, როცა ან უცხოელ სტუმრებს მივიყვანთ და ავუხსნით, რა არის საქართველოს ისტორია, ან ჩვენ მოწაფეებს რომ მივიყვანთ და ასევე გავაგებინებთ, რა იყო ეს ღირსეული ფურცლები ჩვენი ისტორიისა“, – განაცხადა ზურაბიშვილმა. 1ტვ

ძალიან ვწუხვარ, რომ ვიღაცებმა გაავრცელეს, თურმე დღეს აქ პარტიას ან რაღაც მოძრაობას ვაშენებდი, დაავიწყდათ, რომ 71 წლის გავხდი, მოძრაობა თუ იქნება, ეს იქნება თქვენი მოძრაობა, რადგან მომავალი არის თქვენი და თქვენი შვილების, მე ვიქნები იქ, სადაც ვიყავი ყოველთვის, არც ორიენტაცია შემიცვლია, სხვათა შორის, მაგრამ დრო არის, რომ ერთად ვიყოთ და ვთქვათ: არა დაყოფას, – ამის შესახებ საქართველოს პრეზიდენტმა, სალომე ზურაბიშვილმა განაცხადა. ზურაბიშვილის თქმით, სამწუხაროა, რომ დღესაც საჭიროა დაცვა იმის, რომ საქართველოს მომავალი არის ევროპაში. „ვწუხვარ, რომ დღეს ვიღაცები აქ არ მოუშვეს და თქვეს, რომ თურმე სასურველი არ იყო აქ ყოფნა. როგორ არ არის აქ ყოფნა სასურველი, როცა ჩვენ ვზეიმობთ 9 აპრილს და როცა პრეზიდენტი იწვევს არა პარტიულად, არა მიკერძოებულად, არამედ ყველას, რომ ეს თარიღი მაინც იყოს ჩვენი ეროვნული გაერთიანების ერთი თარიღი. ჩვენ თუ ავაშენებთ ჩვენს ერთიანობას ამდენ თარიღზე, შეიძლება, რაღაცას მივაღწიოთ კიდეც. იმაზეც ვწუხვარ, რომ 9 აპრილს მიწევს იმის დაცვა, რომ ჩვენი ერთადერთი და უალტერნატივო მომავალი არის ევროპა, აბა, სხვა რა, ჩექმა გვინდა? ნიჩბები გვინდა? თუ არ გვახსოვს ჩვენი ისტორია? სხვა ალტერნატივა არ გვაქვს. აქედან წასვლისას ირჩევენ ევროპას და მე მინდა, აქ ამოირჩიონ ევროპა, აქ მივიღოთ ევროპიდან ის, რაც გვინდა, ის, რაც წარმოადგენს ჩვენი იდენტობის გაძლიერებას და აქ გახდეს საქართველო ევროპული სახელმწიფო. უნდა შევძლოთ საერთო ინტერესების დანახვა, უნდა შევძლოთ ქვეყნის მომავლისთვის მთავარის და მეორადის გამიჯვნა, უნდა შევძლოთ პარტიულისა და ეროვნულის ერთმანეთში არაღრევა, უნდა შევძლოთ შურის, ბოღმის და სიძულვილის დაძლევა“, – განაცხადა ზურაბიშვილმა.

საქართველოს პრეზიდენტმა სალომე ზურაბიშვილმა ნანა მახარაძე და ნანა მალაშხია ღირსების მედლით დააჯილდოვა დღეს, 9 აპრილს გამართულ სეხვედრაზე, რომელსაც სხვადასხვა პროფესიის ქალები ესწრებიან. ნანა მახარაძე არის 9 აპრილის მონაწილე ქალი, რომლის ცნობილი ფოტო დროშით საქართველოსა და მსოფლიოში ცნობილი გახდა, ხოლო ნანა მალაშხია არის წელს რუსული კანონის წინააღმდეგ გამართული აქციების მონაწილე, ქალი ევროკავშირის დროშით. ნანა მალაშხიას პრეზიდენტმა ღირსების მედალი გადასცა საქართველოს ევროპული მომავლისთვის ბრძოლაში მტკიცე და აქტიური სამოქალაქო პოზიციის გამოვლენისათვის, ხოლო ნანა მახარაძეს საქართველოს დამოუკიდებლობის მოსაპოვებლად ეროვნულ-განმათავისუფლებელ ბრძოლაში მტკიცე სამოქალაქო პოზიციის გამოვლენისა და საზოგადოების პატრიოტული სულისკვეთების ამაღლებისთვის. “ახლა მათ დავაილრდოვებთ, მაგრამ ეს ჯილდო პერსონალური არ არის, ეს ძვნება ყველა იმ ქალს, რომელიც ამ და სხვა პერიოდებში იბრძოდა საქართველოს დამოუკიდებლობისთვის და საქართველოს მომავლისთვის. ეს ორნი არიან ამის სახეები და მათ ვიწვევ აქ”, – განმარტა პრეზიდენტმა. [მასალა განახლდება] ნეტგაზეთი

თბილისის მერი კახა კალაძე აცხადებს, რომ მთავრობის ადმინისტრაციის წინ სკვერის მოწყობა მერიის ნებართვის გარეშე დაიწყეს. კალაძის თქმით, მთავრობის ადმინისტრაციამ მერიისგან მშენებლობის ნებართვა ითხოვა, რაზეც მერიას ჯერ თანხმობა არ აქვს დაბრუნებული. „მთავრობის ადმინისტრაციის მხრიდან შემოსული იყო განცხადება ნებართვაზე პირველი კლასის მშენებლობაზე, რაც არის ლანდშაფტური სივრცის მოწყობა. ჩვენ მომდევნო დღეების განმავლობაში განვიხილავთ ამას და შესაბამისი პასუხიც იქნება დაბრუნებული. როგორც გითხარით, საუბარია სკვერის მოწყობაზე, შესაბამისად, ჩვენი მხრიდან თანხმობა იქნება გაცემული და ამის შემდეგ დაიწყება სამუშაოები“, – განაცხადა კალაძემ. ამასთან, კალაძის თქმით, ოპოზიციური პარტიები მთავრობის ადმინისტრაციის წინ სკვერის მოწყობის საკითხით მანიპულირებენ, როცა მას საპროტესტო აქციებს უკავშირებენ. „ყოველთვის ხდება მანიპულაცია ამგვარი თემით. მე მახსოვს, როდესაც დავიწყეთ პარლამენტის შენობის წინ არსებული სივრცის კეთილმოწყობა და მოწესრიგება, მსგავსი განცხადებები კეთდებოდა. საზოგადოება ძალიან კარგად შეაფასებს ამ ყველაფერს. ხდება კონკრეტული სივრცის მოწესრიგება და გალამაზება. ამაში ცუდი არაფერია. კონკრეტული პოლიტიკოსები და პოლიტიკური პარტიები ცდილობენ, რომ ეს რაიმესთან დააკავშირონ. ერთი მეუბნებოდა, რომ რიკოთის უღელტეხილი თურმე იმიტომ ჩაგვიკეტავს, რომ ხალხი დასავლეთიდან აღმოსავლეთში აქციაზე არ წამოვიდეს. ყოველთვის იქნება ასეთი მანიპულაციები, სანამ ასეთი ოპოზიციური პოლიტიკური სპექტრი გვყავს“, – განაცხადა კახა კალაძემ. ნეტგაზეთი

დღეს, როგორც არასდროს, ისე გვჭირდება ერთიანობა, - ამის შესახებ „საქართველოსთვის“ ლიდერი გიორგი გახარია სოციალურ ქსელში წერს და ეხმაურება 1989 წლის 9 აპრილის ტრაგედიას. მისი თქმით, გვიწევს ბრძოლა იდეალების დასაცავად, რისთვისაც 9 აპრილს იბრძოდნენ. „9 აპრილს, ქართველი ხალხის ერთიანობამ და თავგანწირვამ მოგვიტანა ნანატრი გამარჯვება - ერთიანი, დამოუკიდებელი და თავისუფალი საქართველო! დღესაც, თავისუფალ ქვეყანაში, ისევ გვიწევს ბრძოლა იმ იდეალების დასაცავად, რისთვისაც 9 აპრილს ჩვენი მოქალაქეები იბრძოდნენ! დღეს, როგორც არასდროს, ისე გვჭირდება ერთიანობა!“, - წერს გახარია „ფეისბუქზე“.

პარტია "საქართველოსთვის" "ნაციონალური მოძრაობის" მიერ ორგანიზებულ დღევანდელ საპროტესტო აქციას არ უერთდება. ამის შესახებ პარტიის წევრმა, ანა ბუჩუკურმა ჟურნალისტებს განუცხადა. "მგონი სჯობს, რომ ამ სიმბოლოებს ყველა გავუფრთხილდეთ და პატივი ვცეთ, რადგან არ შეიძლება დღეს რაღაც აქცია დააანონსო. მართალი გითხრათ, მიზანი ვერ გავიგე, თუ რას ემსახურება. როდესაც პოლიტიკურ აქციაზეა საუბარი, ამას სჭირდება თავისი წინაპირობები. დღევანდელ დღეს ჩვენ ყველამ ერთად, ვისაც როგორ გვესმის, ისე უნდა ვცეთ პატივი იმ იდეალებს, რასაც ჰქვია ერთიანი, დამოუკიდებელი და თავისუფალი საქართველო. დღევანდელი დღის პოლიტიკური მიზნებისთვის გამოყენება არ მიმაჩნია მიზანშეწონილად. წარმოდგენა არ მაქვს, რას ემსახურება ბატონი ხაბეიშვილის მიერ დაანონსებული აქცია, ჩვენი გუნდი ამ აქციას არ უერთდება", - განაცხადა ბუჩუკურმა. ცნობისთვის, დღეს, 17:00 საათზე, "ნაციონალური მოძრაობის" მიერ ორგანიზებული საპროტესტო აქცია გაიმართება. ipn

მართლმადიდებელი ეკლესია იერუსალიმში მაცხოვრის დიდებით შესვლას, ბზობის დღესასწაულს აღნიშნავს. ამასთან დაკავშირებით ტაძრებში სადღესასწაულო წირვა-ლოცვა შესრულდება. დიდმარხვის მეექვსე კვირა დღეს მართლმადიდებელი ეკლესია მაცხოვრის იერუსალიმში დიდებით შესვლას ზეიმობს, რასაც ქრისტიანები ბაიაობას, ანუ ბზობას უწოდებენ. იგი ათორმეტთაგან რიგით პირველი მოძრავი დღესასწაულია, რომელიც ყოველთვის ბრწყინვალე აღდგომის წინა კვირა დღეს აღინიშნება. სახარების მიხედვით, მაცხოვრის შესვლა იერუსალიმს ძლევამოსილი მეფის სატახტო ქალაქში შესვლას ჰგავდა და მას უბრალო ადამიანებმა საზეიმო შეხვედრა მოუწყვეს. იერუსალიმისკენ მიმავალ მაცხოვარს გზაზე ხალხი სამოსელს უფენდა, ზოგს კი პალმის (ბზის) რტოები ეკავა და ასე ეგებებოდა მას. ყოველი მხრიდან ისმოდა ღაღადისი: "ოსანა ძესა დავითისასა, კურთხეულ არს მომავალი სახელითა უფლისათა! ოსანა, რომელი ხარ მაღალთა შინა!" დღესასწაულთან დაკავშირებით მორწმუნეები ტაძრებში ბზის რტოებით და სანთლებით მიდიან. ეკლესიებში ბზა იკურთხება, როგორც სიმბოლო უფლისთვის მიგებებისა. ipn

ჩემო მეგობრებო,მინდა გამოვეხმაურო მოსამაეთლე დავით მგელიაშვილის,ჩემი სასამართლო პროცესიდან ჩამოშორების საქმეს. მოგახსენებთ,ჩემი ექვსთვიანი უკანონო პატიმრობის შემდეგ საქმე არსებითი განხილვისთვის გადაეცა მოსამართლე დავით მგელიაშვილს.მისი პირველი პრინციპული გადაწყვეტილება იყო,ჩემი და ანზორ ფიფიასთვის აღმკვეთი ღონისძიების პატიმრობის,გირაოთი შეცვლა და ჩვენი სასამართლო დარბაზიდან გათავისუფლება, - ამის შესახებ, პატიმრობიდან ცოტა ხნის წინ გათავისუფლებული, პარტია "საქართველოსთვის" და წალენჯიხის საკრებულოს წევრი, გელა აბულაძე სოციალურ ქსელში წერს. მისი თქმით, მგელიაშვილის სამართლიანობა და პრინციპული მიდგომა საკითხისადმი, მიუღებელი აღმოჩნდა "ქართული ოცნებისთვის", რის გამოც სასამართლო პროცესებს ჩამოაშორეს. "მას შემდეგ ჩატარდა რამოდენიმე სასამართლო სხდომა,სადაც მიმდინარეობდა ბრალდების მოწმეთა დაკითხვა.მთელი ამ პროცესის დროს მოსამართლის მხრიდან აშკარად გამოკვეთილი სამართლიანობა და ღირსეული ,პრინციპული მიდგომა საკითხისადმი,ეტყობა მიუღებელი აღმოჩნდა მმართველი პარტიისათვის და რაღაც მექანიზმებით შეძლეს ჩამოეშორებინათ ჩემი სასამართლო პროცესებიდან.. ხელისუფლების ეს ნაბიჯი კიდევ ერთხელ უსვამს ხაზს მათ მზაობას, რომ ნებისმიერ ფასად ჩამოიშორონ გზიდან განსხვავებული აზრის მქონე ადამიანი... უღრმეს მადლობას ვუხდი მოსამართლე დავით მგელიაშვილს სამართლიანობისთვის,პრინციპულობისთვის და წარმატებებს ვუსურვებ! მადლობას გიხდით თქვენ,ჩემო მეგობრებო უზარმაზარი ნდობისა მხარდაჭერიათვის.გპირდებით,რომ არ დავნებდები..ბრძოლა გრძელდება!!!", წერს გელა აბულაძე.

3 წლიანი დავის შემდეგ სასამართლო გადაწყვეტილება ნაწილობრივ აღსრულდა (აღდგენის ნაწილში). როგორც იქნა, ადგილობრივი თვითმმართველობის წარმომადგენლებმა მიიღეს გადაწყვეტილება (რომელიც დიდი ხნის წინ უნდა გაეკეთებიათ და ბიუჯეტს არ მიადგებოდა ის ზარალი, რაც ჩემი უკანონო გათავისუფლებით მიაყენეს), სისრულეში მოეყვანათ სასამართლოს მიერ მიღებული განჩინება, რომლითაც დაუყოვნებლივ უნდა აღვდგენილიყავი ა.ა.ი.პ. დასუფთავებისა და კეთილმოწყობის სერვის ცენტრის უფროსის მოადგილის თანამდებობაზე, საიდანაც უკანონოდ, ყოველგვარი დასაბუთების გარეშე, კანონის სრული დარღვევით გამათავისუფლეს, - ამის შესახებ სოციალურ ქსელში პარტია "საქართველოსთვის" ზესტაფონის საკრებულოს წევრი მაია კახნიაშვილი წერს. მისივე თქმით, თვითმმართველობის კოდექსის თანახმად ეკრძალება ერთდროულად იყოს საკრებულოს წევრი და დასუფთავების სამსახურის თანამშრომელი, ამიტომ მიიღო გადაწყვეტილება მუშაობა საკრებულოში გააგრძელოს. "ამ პროცესების პარალელურად, თვითმმართველობის არჩევნებზე, ზესტაფონის მოსახლეობამ გამომიცხადა ნდობა და გავხდი საკრებულოს წევრი, პარტიიდან “საქართველოსთვის”. თვითმმართველობის კოდექსი არ მაძლევს უფლებას ვიყო საკრებულოს წევრი და ასევე გახლდეთ დასუფთავების და კეთილმოწყობის სამსახურის უფროსის მოადგილე. შესაბამისად, მიწევს არჩევანის გაკეთება, თანამდებობასა და საკრებულოს წევრობას შორის. მიუხედავად იმისა, რომ დასუფთავების სამსახურში მოადგილის ხელფასი ორჯერ აღემატება საკრებულოს ხარჯს, უარი განვაცხადე აღდგენაზე და ჩემი ნებით დავტოვე სამსახური. მივიღე გადაწყვეტილება, გავაგრძელო მუშაობა საკრებულოში, რათა ვემსახურო ჩემს რაიონს და დავიცვა იმ ხალხის ინტერესები, ვინც ნდობა გამომიცხადა ვყოფილიყავით მათი ხმა!", - წერს მაია კახნიაშვილი.

სიტყვა "რიელტორი" ინგლისური ენიდან მოდის. ამ პროფესიის წარმომადგენელთა­ გასამრჯელო წინასწარ შეთანხმებული ფიქსირებული თანხაა რეალიზებულ პროდუქტზე. რუბრიკა "პროფესიის" სტუმარია­ რიელტორი ნინი მამაგულაშვილი: - ჩემი მოვალეობაა მოქალაქეებს ბინების ყიდვა-გაყიდვასა და ქირაობა-გაქირავებაში დავეხმარო. ამ საქმეში ფეხის მოსაკიდებლად აუცილებლად უნდა იყო კომუნიკაბელური, ზრდილობიანი, ცოტა ფსიქოლოგობაც გჭირდება, და რა თქმა უნდა, იღბალი. ტექნიკური უნივერსიტეტი რომ დავამთავრე, მაშინ დაიწყო 90-იანი წლების არეულობა და აღარავის სჭირდებოდა ქიმიკოსი. იმხანად დავოჯახდი, ბავშვები შემეძინა და ქმარს რომ გავცილდი, თავი ხომ უნდა მერჩინა, ამიტომ დავიწყე რიელტორობა. სადაც ვცხოვრობდი და ვმოძრაობდი ბავშვობაში, სტუდენტობაში, იმ უბნებს, ვაკეს, ვერას, საბურთალოს, კარგად ვიცნობ და ამიტომაც მიადვილდება მუშაობა. - რა უმთავრესი თვისება უნდა ჰქონდეს განვითარებული რიელტორს? - ინტუიცია ჩვენს საქმეში საჭირო და მნიშვნელოვანია. რომ დაგირეკავენ, მაინცდამაინც ეს ბინა მინდაო, შენ გონებით უკვე ტვინში ხაზავ, აქ თუ არ მოეწონა, მერე რომელ ბინაში წაიყვან. ხალხთან ხშირი ურთიერთობის წყალობით უკვე გიმუშავდება­ ინტუიცია, უმრავლეს შემთხვევაში შეგიძლია გამოიცნო, ვინ რისი გადამხდელია. ხვდები, ღირს თუ არა მასთან თანამშრომლობა, თორემ ზოგი ისეთია, წლობით ათვალიერებს გასაყიდ ბინებს და ამ დროს ფული ხელში არ უჭირავს. ერთს თეთრი კარკასის შეძენა უნდოდა. მივიყვანე, დაათვალიერა და მეუბნება, ამ ვარიანტს დიდი ნაკლი არა აქვს, მაგრამ მაინც სხვა ბინები მანახეო. რამდენი ხანია ბინას ეძებთ-მეთქი? 3 წელიო. მაშინ მივხვდი, რომ არასდროს არაფერს იყიდდა. არიან ისეთები, გეუბნებიან, ხვალ გეტყვი პასუხსო, მერე კი ბრუნდება ბინის პატრონთან ან გამქირავებელთან და ეუბნება, დამიკელი, რაც რიელტორს უნდა მისცეო. მეც მქონდა შემთხვევა. გოგოს ბანკი უყიდდა ბინას, ტირილით მოვიდა, მიშველეთო. სასწრაფოდ დავახვიეთ მთელი თბილისი და ბინა რამდენიმე დღეში ისეთ ფასად გავაყიდვინეთ, გამოსახლების ალბათობაც მოეხსნა და ოროთახიანის ყიდვის შანსიც მიეცა. რამდენიმე ვარიანტი ვაჩვენეთ და მოვიფიქრებო, გვითხრა. ამის მერე დაიკარგა. 5 დღის შემდეგ ერთი ოროთახიანის მეპატრონე მოგვადგა ოფისში და ჩვენი გასამრჯელო მოგვიტანა, ჩემი ბინა თქვენმა მოყვანილმა გოგონამ შეიძინა და მომსახურების თანხა მოგიტანეთო. ასეთი­ წესიერი იყო ის კაცი, ბინის დაკარგვას გადარჩენილი გოგონა კი უსინდისოდ მოგვექცა. ერთხელ ბაგებში ბინის საყიდლად მივიყვანე ახლობელი. მეორე დღეს მისულა მეპატრონესთან, რიელტორის თანხა დამიკელი და სულ ჩავხსნათ ჩვენი მოლაპარაკებიდანო. დამირეკა იმ ადამიანმა და მითხრა, ეგეთ ხალხს აღარ ენდო და სხვა მყიდველი მომიძებნეო. - ამბობენ, უკრაინა-რუსეთის ომის გამო ძალიან მოიმატა ფასებმაო. - ომის პირველ თვეებში არაადეკვატური ფასები იყო, ახლა ცოტა დაიწია. ვინც ახლა შემოდის, უფრო ღარიბი ფენაა. ძველი შემოსულებიც, რომლებიც კოლოსალურ თანხად გაურიგდნენ მეპატრონეს, შედარებით იაფ ბინებს ეძებენ. - რა მოთხოვნები აქვთ დამქირავებლებს? - თანამედროვე ბინები, აუცილებელია­ გათბობა, კონდიციონერი. არიან ძალიან მდიდრები, რომლებიც 2-3-ათასიან ბინებში შედიან და პრემიუმკლასს ითხოვენ. სხვათა შორის, ბევრს მოსწონს "სტალინკები", მაღალჭერიანი ბინები. - დაქირავების მსურველებში რუსი უფრო მეტია თუ უკრაინელი? - რუსები ჭარბობენ. ერთი უკრაინელი გოგონა ქმარ-შვილთან ერთად 300 დოლარად დავაბინავე. მომსახურების თანხა არ გამომირთმევია, დედა ვარ და ომს გამოქცეულის ვარამზე როგორ მოვითბობდი ხელს. - ტრანსპორტში­ მოვისმინე, "სპალნი" რაიონს ვეძებთო. რას გულისხმობდნენ? - "სპალნი" რაიონს ვაჟა-ფშაველას კვარტალებს უწოდებენ, თან ცენტრში რომ არიან და თან ხმაური არ შედის სახლში. სიწყნარე უნდათ, იმიტომ, რომ აქ შემოსულთა 80% შინიდან ონლაინ მუშაობენ. - რთულია რიელტორობა? - მძიმე სამუშაოა, მთელი დღე ქუჩაში­ ხარ და ბინებს ნახულობ, მერე მყიდველი ან დამქირავებელი უნდა მიიყვანო, საბუთები შესწავლილი უნდა გქონდეს და უნდა გახსოვდეს ყველაფერი, ტელეფონის ნომრებიც კი... იცი, რა აქვს ამ პროფესიას ცუდი? შეიძლება 2 თვე მაგრად იმუშაო და მერე 3 თვე ტყუილად იარო. შემოსავალი არასტაბილურია. 1 წელია ყველამ რიელტორობა მოინდომა ომის გამო. ბევრი პირდაპირ საზღვრებთან ხვდებოდა ქვეყანაში შემოსულებს. ყველა სასტუმროსთან რიელტორები იდგნენ. ბევრი ამბობდა, მთელ ბინებს რუსები ყიდულობენო, უფრო სწორად კი უფრო შერეული ოჯახები ყიდულობენ. მყავდა კლიენტი, რომელსაც რუსული გვარი ჰქონდა, მაგრამ მამა ჯოხაძე ჰყოლია. მართალია, გვარი არ მომცა, მაგრამ წელიწადში 3 თვეს საქართველოში ვატარებდი და ახლა დადგა დრო, სამუდამოდ აქ დავსახლდეო. - რამდენიმე პოლიტიკოსს წამოაძახეს, სხვანაირად ჭიკჭიკებ და სინამდვილეში თვითონაც სარფიანად გაქვს ბინები რუსებზე მიქირავებულიო. ვითომ სიმართლეა? - ბევრ პოლიტი­კოსს, მათ შორის ოპოზიციონერებსაც, აქვთ მიქირავებული ბინა რუსებისთვის. სხვათა შორის, ყველაზე ძვირად ღირებული ბინები "კოვიდის" დროს გაიყიდა. - ჩამოსულები აქ დიდი ხნით რჩებიან თუ მაინც გარკვეული დროით, რომ აზრზე მოვიდნენ და დაგეგმონ მომავალი ცხოვრება? - უკრაინელები უმთავრესად კანადაში­ მიდიან, ბევრიც აშშ-ში, საბერძნეთში, გერმანიაში... რუსები ევროპისკენ იხედებიან. უკრაინაში ომი რომ დაიწყო, იმ დროს ჩემი შვილი სომხეთში იყო მივლინებით. იქაც ზუსტად ისეთივე ვითარება შექმნილა - მითხრა, მოსკოვში მეგონა თავი, სულ რუსული მესმოდაო. - ბევრი ომს გამოქცეულის პირადი ისტორია გეცოდინებათ... - მე ვისთანაც მქონდა ურთიერთობა, უმრავლესობა ახალგაზრდა, Iთ-სპეციალისტები იყვნენ. 2 ბიჭი მყავდა, 2014 წლიდან მიტინგებზე ვდგავართ, ახლა იქ რა გაგვაჩერებდაო. ერთმა აკადემიკოსმა მითხრა, ჩემი ქვეყანა მეცოდებაო. რატომ-მეთქი? იმიტომ, რომ პროგრესულად მოაზროვნე ვინც ჰყავდა, წამოვიდა და რუსეთში მხოლოდ მასა დარჩაო. ერთ ლენინგრადელის ოჯახს მივაქირავე ბინა და რამდენი ხნით გავაფორმო კონტრაქტიო, მკითხეს. მე რა ვიცი, ეგ საკითხი თქვენს პრეზიდენტთან შეათანხმეთ-მეთქი, გავეხუმრე. ეგ ჩვენი პრეზიდენტი არ არის, არავის აგვირჩევიაო! აბა, პრეზიდენტი როგორ გახდა-მეთქი? როგორც ხდებიანო... - ყველაზე მეტად რა გაბრაზებთ თქვენს საქმიანობაში? - განცხადებაში ტექსტი "მაკლერი არ გამომეხმაუროს!", მაგრამ ბოლოს მაინც ჩვენ გვირეკავენ. მაცოფებენ ისეთი მომხმარებლები, რომ მეუბნებიან, გამიქირავე ბინა და პატივს გცემო. რას ჰქვია პატივს მცემ?! მე გასამრჯელოს გაწეული შრომისთვის ვიღებ. ქართველებს თუ არ ჩავთვლით, პოსტსაბჭოთა ქვეყნების მოქალაქეებთან, განსაკუთრებით აზერბაიჯანელებსა და ბალტიისპირელებთან, თურქებთან მირჩევნია მუშაობა. აი, ინდუსებისთვის ბინების შოვნა კი ჭირს. ძალიან მძაფრი სუნელები აქვთ. მათ რომ გაისტუმრებ, რემონტი თუ არ გააკეთე, სუნს ვერ მოაშორებ სახლს. კიდევ მქონდა რამდენიმე შემთხვევა ირანელებსა და ჩინელებთან. გეტყვიან, 2 კაცი ვიცხოვრებთო, არადა, 8-10 კაცი ცხოვრობს. ისეთი დამქირავებელიც მინახავს, კორპუსის სამოთახიანში, მისაღებ ოთახში, მწვადს რომ წვავდა პარკეტზე დადგმულ რკინის თასში. ამბობენ, აპრილიდან ბინის ფასები შეიცვლებაო. მაისიდან კი აგარაკების დაქირავება დაიწყება. ათასი, 5 ათასი და 10 ათასიც ღირს, სახლს გააჩნია. უფრო ქართველები ქირაობენ. სხვათა შორის, ყველაზე მაღალი ფასებია წყნეთში, მერე მოსდევს ოქროყანა. კიკეთსა და კოჯორში ფასი ნაკლებია. მცხეთასა და საგურამოშიც კარგად ქირავდება - ანუ ისეთ ადგილებს ეძებენ, რომ თბილისში სამსახურში ადვილად იარონ. ამ ბოლო დროს ინტერნეტთაღლითობამ იმატა. ბევრი რიელტორებისთვის ვერ იმეტებს ფულს, ამიტომ დამოუკიდებლად ათავსებს საიტზე განცხადებას. ჰაკერი ასეთებზე ნადირობს, თუ ამა თუ იმ ნომერს მხოლოდ ერთი განცხადება უდევს, ე.ი. გამოუცდელია, უკავშირდება საზღვარგარეთის ნომრით, ეუბნება, მომეწონა თქვენი ბინა, 1 კვირაში ჩამოვალ და მომაქირავეთ. ახლავე გირიცხავთ პირველი და ბოლო თვის საფასურსო. ბინის მფლობელი აძლევს ბანკის ნომერს, მოდის ლინკი, ვითომ დასადასტურებლად, და როგორც კი ლინკს გახსნი, წამებში მთელ თანხას გიხსნიან ანგარიშიდან. - რა მოლოდინი გქონდათ, სანამ რიელტორობას დაიწყებდით და რა სურათი დაგხვდათ? - მეგონა, ავშენდებოდი, მაგრამ.... თუმცა მადლობა ღმერთს, იმდენი გვაქვს, არ გვშია, არ გვწყურია, არ გვაწვიმს და არ გვათოვს. კვირის პალიტრა

7-9 მარტის აქციებზე პოლიციელების ჯანმრთელობის ხელყოფისა და სახელმწიფო ქონების განადგურების ბრალდებით დაკავებული ლაზარე გრიგორიადისის ადვოკატის, თათია მანეჟაშვილის განცხადებით, სააპელაციო სასამართლომ აღმკვეთი ღონისძიებების შეცვლასთან დაკავშირებული საჩივარი დაუშვებლად ცნო. როგორც ადვოკატმა „ინტერპრესნიუსს“ განუცხადა, დაცვის მხარე ითხოვდა, სააპელაციო სასამართლოს ყველაზე მკაცრი აღმკვეთი ღონისძიება - პატიმრობა, ნაკლებად მკაცრი აღმკვეთი ღონისძიებით - გირაოთი შეეცვალა. მისივე თქმით, დოკუმენტების მიღების შემდეგ, დაცვის მხარე გაეცნობა თუ რატომ დატოვა სააპელაციო სასამართლომ საქალაქო სასამართლოს გადაწყვეტილება ძალაში და რატომ არ შეცვალა ის. „როგორც მოგეხსენებათ, ჩვენ პირველი ინსტანციის სასამართლოს განჩინება გავასაჩივრეთ. ვითხოვდით, რომ სააპელაციო სასამართლოს ყველაზე მკაცრი აღმკვეთი ღონისძიება ანუ პატიმრობა, რომელიც ლაზარე გრიგორიადისს შეუფარდეს, ნაკლებად მკაცრი აღმკვეთი ღონისძიებით, გირაოთი შეეცვალა. სასამართლომ ეს მოთხოვნა დაუშვებლად ცნო, წარმოებაში არ მიიღო და ძალაში პირველი ინსტანციის სასამართლოს განჩინება დატოვა. საქმის არსებითი განხილვა ახლა იწყება. ჩვენ აღკვეთის ღონისძიების საკითხი გავასაჩივრეთ და მთლიანად საქმეზე არ გვისაუბრია. ჩვენ სააპელაციო სასამართლოს განჩინება ჯერ დოკუმენტური სახით არ მიგვიღია. როდესაც მივიღებთ, გავეცნობით და გამოვიკვლევთ, რატომ დატოვა სააპელაციო სასამართლომ საქალაქო სასამართლოს გადაწყვეტილება ძალაში და რატომ არ შეცვალა ის“, - განაცხადა თათია მანეჟაშვილმა „ინტერპრესნიუსთან“. ცნობისთვის, ლაზარე გრიგორიადისს თბილისის საქალაქო სასამართლომ აღკვეთის ღონისძიების სახედ პატიმრობა 31 მარტს შეუფარდა. გამოძიების ინფორმაციით, ბრალდებულმა ლაზარე გრიგორიადისმა 7 მარტს, რუსთაველის გამზირზე გამართული აქციის მიმდინარეობისას, 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, რომლებიც სამსახურებრივ მოვალეობას ასრულებდნენ, ორჯერ ისროლა ე.წ. „მოლოტოვის კოქტეილი“. ასევე, გამოძიების ინფორმაციით, ბრალდებულმა 9 მარტს, ჭანტურიას ქუჩაზე, განზრახ წაუკიდა ცეცხლი შინაგან საქმეთა სამინისტროს კუთვნილ „ტოიოტა კოროლას“ მოდელის ავტომანქანას, რომელიც ადგილზე დაიწვა. ამ ქმედების შედეგად, სახელმწიფო ბიუჯეტს 39 500 ლარის ქონებრივი ზიანი მიადგა. „ლაზარე გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის „ა“ ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს“, - ნათქვამია გამოძიების მიერ გავრცელებულ ინფორმაციაში. იპნ

დღეს, 8 აპრილს, მცხეთის მერიასთან აქცია გაიმართა. აქციის მონაწილეები ჯიღაურაში უკანონო ცემენტის ქარხნის დემონტაჟს ითხოვენ. უკანონო ცემენტის ქარხანა საცხოვრებელი სახლებიდან რამდენიმე ათეულ მეტრში, საგურამოსთან ახლოს, ჯიღაურაში დგას, რომელიც ბოლო პერიოდში, ფაქტობრივად, ძვირადღირებულ სააგარაკე სივრცედ იქცა. ქარხანა, რომელიც „ქართული ოცნების“ შემწირველს ეკუთვნის, წესით, ახლა არ უნდა მუშაობდეს, რადგან მცხეთის მერიამ მფლობელს ობიექტის დემონტაჟი დაავალა. თუმცა მმართველი პარტიის შემწირველმა მფლობელმა საქმე სასამართლოში გაასაჩივრა, ხოლო სასამართლომ არსებითი განხილვის დასრულებამდე დემონტაჟის გადაწყვეტილება შეაჩერა. გასულ კვირას გარემოსდაცვითი ზედამხედველობის დეპარტამენტმა ჯიღაურაში კიდევ ერთხელ შეამოწმა აღნიშნული საწარმო და არაერთი დარღვევა დაადგინა. გარემოსდაცვითი ზედამხედველობის დეპარტამენტის ცნობით, საწარმოში დამონტაჟებული აირმტვერდამჭერი მოწყობილობა არის გაუმართავი, საიდანაც ხდება მტვრის ნაწილაკების გაფრქვევა, რაც ვიზუალური დაკვირვებითაც ფიქსირდება. ატმოსფერულ ჰაერში მტვრის ნაწილაკების კონცენტრაციის გადაჭარბება შესაბამისი ექსპრეს გაზომვებით დადასტურდა. ასევე დადგინდა, რომ ატმოსფერული ჰაერის დაბინძურების წყაროების და მათ მიერ გაფრქვეულ მავნე ნივთიერებათა ინვენტარიზაციის ტექნიკური ანგარიში ფაქტობრივ მდგომარეობასთან შეუსაბამოა. აღნიშნული პრობლემის შესახებ რამდენიმე კვირის წინ ნეტგაზეთი წერდა.

7 მარტის აქციაზე დაშავებულ ზაზა ბიღიაშვილს, რომელმაც ერთ თვალში მხედველობა დაკარგა, ამ დრომდე არ აქვს მინიჭებული დაზარალებულის სტატუსი. ხელისუფლება ირწმუნება, რომ რუსული კანონის წინააღმდეგ გამართული აქციის დარბევისას „ყველაფერი იდეალურად იყო“, თუმცა ამ დრომდე ასაიდუმლოებს 7-9 მარტის აქციებზე დაშავებულთა შესახებ ინფორმაციას. მათ ასევე კითხვები აქვთ ზაზა ბიღიაშვილის მხედველობის დაკარგვასთან დაკავშირებით. „პიროვნებებზე ნუ გადაგვყავს საქმე“ თბილსერვის ჯგუფის თანამშრომელმა ზაზა ბიღიაშვილმა, რომელიც 7 მარტს რუსული კანონის წინააღმდეგ გამართულ აქციაზე იმყოფებოდა, აქციის დაშლისას ერთ თვალში მხედველობა სრულად დაკარგა. ზაზა ბიღიაშვილს იმავე ღამეს, 8 მარტს, აღმოუჩინეს გადაუდებელი დახმარება და ჩაუტარდა ოპერაცია. პირველადი დასკვნით, ბიღიაშვილს ჰქონდა თვალის კაკლის ნაფლეთი ჭრილობა, თავის ტვინის შერყევა, თავის მრავლობითი ღია ჭრილობა, ქალასა და სახის ძვლების მრავლობითი მოტეხილობა. თვალის კაკლის შენარჩუნებისა და ანთებითი პროცესის შეჩერების მიზნით, ზაზა ბიღიაშვილს მეორე ოპერაცია 21 მარტს ჩაუტარდა. თუმცა, მან მარჯვენა თვალში მხედველობა სრულად დაკარგა და მისი აღდგენა შეუძლებელია. სამედიცინო დოკუმენტების თანახმად, ავადმყოფობა მწვავედ მიმდინარეობს. ჯანმრთელობის მდგომარეობის გამო მკვეთრად შეიზღუდა ზაზა ბიღიაშვილის შრომისუნარიანობაც. თუმცა ამ დრომდე სახელმწიფოს შესაბამისი უწყებები და ქვეყნის პოლიტიკური ხელმძღვანელობა არ დაინტერესებულა ზაზა ბიღიაშვილის სოციალური საჭიროებებით, არ გამოუხატავს წუხილი ან თანადგომა მისი და მისი ოჯახის მიმართ. როგორც ზაზა ბიღიაშვილის ცოლი მაია გორგოშიძე ნეტგაზეთს ეუბნება, მის ქმარს მხოლოდ სამსახურიდან, თბილსერვის ჯგუფიდან დაუკავშირდნენ მოიკითხეს, რამე ხომ არ სჭირდებოდა. ზაზა ბიღიაშვილი და მაია გორგოშიძე მიუხედავად იმისა, რომ ზაზა ბიღიაშვილის შესახებ საჯაროდაა ცნობილი, „ქართული ოცნების“ წარმომადგენლები მიიჩნევენ, რომ მარტის აქციებზე სამართალდამცველებს ლოიალური დამოკიდებულება ჰქონდათ. ზაზა ბღიაშვილის მხედველობის დაკარგვასთან დაკავშირებით კი ამბობენ, რომ ამაზე კითხვები არსებობს. მმართველი პარტიის აღმასრულებელი მდივნის, მამუკა მდინარაძის თქმით, თუ გამოძიებით ვერ დადგინდება, რომ ზაზა ბიღიაშვილმა დაზიანება „სავარაუდო დანაშაულის შედეგად მიიღო“, მას დაზარალებულის სტატუსი ვერ ექნება. ამ ფაქტთან დაკავშირებით სპეციალური საგამოძიებო სამსახურმა გამოძიება დაიწყო. ზაზა ბიღიაშვილის დასახმარებლად საქმეში ამ ეტაპზევე ჩაერთო „სამართლიანი არჩევნები” და „წამების მსხვერპლთა ფსიქოსოციალური და სამედიცინო რეაბილიტაციის ცენტრი” (GCRT), რომლის დახმარებითაც შესაძლებელი გახდა ბიღიაშვილისა და მისი ოჯახისათვის აუცილებელი სამედიცინო, საექსპერტო და სხვა მხარდამჭერი სერვისის უზრუნველყოფა. 14 მარტს ლევან სამხარაულის სახელობის სასამართლო ექსპერტიზის ეროვნულ ბიუროში ექსპერტიზა დაინიშნა, როგორც სპეციალური საგამოძიებო სამსახურის, ისე „სამართლიანი არჩევნების” მიმართვის საფუძველზე. რა მოხვდა თვალში ზაზა ბიღიაშვილს? ზაზა ბიღიაშვილის უფლებადამცველები ამბობენ, რომ ლევან სამხარაულის სახელობის სასამართლო ექსპერტიზის ეროვნულმა ბიურომ დასკვნისთვის მაქსიმალურ ვადად 365 დღე განსაზღვრა. როგორც სამხარაულის ექსპერტიზის ბიუროში ნეტგაზეთს უთხრეს, ზაზა ბიღიაშვილთან დაკავშირებით დანიშნულია კომისიური ექსპერტიზა, რომელიც ექსპერტიზის ჩატარების მიზნით ჯანდაცვის სამინისტროს შესაბამისი ექიმ-სპეციალისტის მოწვევას ითვალისწინებს, რაც თავის მხრივ ექსპერტიზის ვადებს ახანგრძლივებს. პარალელურად, ზაზა ბიღიაშვილის ჯანმრთელობის მდგომარეობისა და დაზიანების ხარისხის შესაფასებლად „სამართლიანმა არჩევნებმა” ალტერნატიულ დამოუკიდებელ ექსპერტიზას მიმართა. როგორც წამების მსხვერპლთა ფსიქოსოციალური და სამედიცინო რეაბილიტაციის ცენტრის (GCRT) აღმასრულებელი დირექტორი ლელა ცისკარიშვილი ამბობს, დამოუკიდებელი სამედიცინო ექსპერტიზის პირველადი ინფორმაციით, ზაზა ბიღიაშვილს თვალში ცრემლსადენი გაზის კაფსულა მოხვდა. „ამას აღწერს ზუსტად ექსპერტიზა, თუ რა ტიპის ნივთიერება მოხვდა, რა კუთხით და ა.შ. დამოუკიდებელი სამედიცინო ექსპერტიზა უკვე ჩატარდა, იმ კვირის დასაწყისში გვექნება პასუხი. თუმცა, პირველადი მონაცემით, ცხადია, რომ მას ცრემლსადენი გაზის კაფსულა მოხვდა თვალში“, – ამბობს ლელა ცისკარიშვილი. 7 მარტს მომხდარს იხსენებს თავად ზაზა ბიღიაშვილიც და ამბობს, რომ მან დაზიანება მაშინ მიიღო, როცა სპეცრაზმელთა მხრიდან გასროლა მოხდა. ლელა ცისკარიშვილის თქმით, გაზის კაფსულები აქციაზე მომიტინგეებს ვერ ექნებოდათ, ამიტომ ხელისუფლება ვალდებულია, რომ სრულად აგოს პასუხი ზაზა ბიღიაშვილისთვის დაზიანების მიყენების გამო. წამების მსხვერპლთა ფსიქოსოციალური და სამედიცინო რეაბილიტაციის ცენტრის (GCRT) აღმასრულებელი დირექტორი ლელა ცისკარიშვილი „[ხელისუფლების]აქცენტიც არასწორია ანუ დაზიანებული იქნა სახელმწიფოს მხრიდან. სულ რომ არ გამქრალიყო მხედველობა ბოლომდე და უკეთესი გამოსავალი ყოფილიყო, ეს არ ნიშნავს, რომ ეს დაზიანება არ მოხდა. ძალიან არასწორად გადადის აქცენტები. ჩვენი ამოცანაა, რომ ვაიძულოთ ხელისუფლება და სახელმწიფო, სრულად აანაზღაუროს მორალური და მატერიალური ზარალი, რაც მიადგა ბატონ ზაზას სახელმწიფოს მიერ ჩადენილი ქმედების შედეგად. იქ გაზის კაფსულები მომიტინგეებს არ ჰქონდათ, მხოლოდ სპეციალური დანიშნულების რაზმს და პოლიციას ჰქონდა. შესაბამისად, ჩვენი ამოცანა არის, რომ სრულად აგონ ამაზე პასუხი და სრული რეპარაცია მოხდეს“, – ამბობს ლელა ცისკარიშვილი. სახელმწიფო ყველანაირად ცდილობს, რომ აირიდოს პასუხისმგებლობა „სამართლიანი არჩევნების“ იურისტი ლელა ხათრიძე, რომელიც ზაზა ბიღიაშვილის ადვოკატია, ამბობს, რომ მიზეზ-შედეგობრივი კავშირი გამოძიებამ უნდა დადგინოს, თუმცა ახლა ხელისუფლება ცდილობს, რომ ეს მიზეზ-შედეგობრივი კავშირი გაწყვიტოს. მისი თქმით, ამ შემთხვევაში პირდაპირ იკვეთება სახელმწიფოს ბრალეულობა და მას შემდეგ, რაც დაზიანების ხარისხის სრულად განისაზღვრება და დადგინდება შრომისუნარიანობის რა დონის შეზღუდვასთან აქვთ საქმე, ზაზა ბიღიაშვილის უფლებადამცველები განვსაზღვრავენ რა იქნება სამართლებრივი მოთხოვნა სახელმწიფოს წინაშე. როგორც ლელა ხათრიძე ამბობს, სანამ ზაზა ბიღიაშვილს დაზარალებულად არ ცნობენ, მანამდე მის უფლებადამცველებს წვდომა არც საქმის მასალებთან აქვთ. „ჩვენ გვჭირდება საქმის მასალებთან წვდომა, რომ გავიგოთ რას აკეთებს საგამოძიებო სამსახური, რა ეტაპზეა გამოძიება, აქვს თუ არა წინსვლა და რეალურად დამოუკიდებელია თუ არა და აქვთ თუ არა მართლა სურვილი, რომ გამოძიებით დაადგინოს სავარაუდო დამნაშავე პირები, რომელთაც სასამართლოში წარადგენს“, – ამბობს ლელა ხათრიძე. მოქმედებს თუ არა სახელმწიფო შერჩევითად? როცა საქმე სახელმწიფოს პასუხისმგებლობის დადგომას ეხება, მმართველი გუნდის წარმომადგენლები ცდილობენ, რომ მხოლოდ თავიანთი „კომპეტენციის“ ფარგელბში ისაუბრონ. პარლამენტის იურიდიულ საკითხთა კომიტეტის თავმჯდომარე და „ქართული ოცნების“ წევრი ანრი ოხანაშვილს არალოგიკურად მიაჩნია ზაზა ბიღიაშვილის საქმის მსვლელობაზე კომენტარი გააკეთოს. თუმცა განსხვავებული დამოკიდებულება აქვთ ხელისუფლების წარმომადგენელბს იმ სამოქალაქო პირების მიმართ, რომლებიც აქციების დროს დააკავეს. როგორც „სამართლიანი არჩევნების“ აღმასრულებელი დირექტორი ნინო დოლიძე ნეტგაზეთთან ამბობს, სახელმწიფოს ნება შერჩევითი ჩანს და აქციებთან დაკავშირებულ საქმეებზე გამოძიების ეფექტურად წარსამართად ინტერესსა და პოლიტიკურ ნებას მაშინ იჩენენ, როცა საქმე სამოქალაქო პირების ბრალეულობას შეეხება. ნინო დოლიძე ნეტგაზეთი

რუსეთის სამთავრობო საინფორმაციო სააგენტო TASS ავრცელებს ინფორმაციას, რომ 10 ქვეყნის რუსული თეატრები 2023 წელს რუსეთის ფედერაციისგან ფინანსურ დახმარებას მიიღებენ. თეატრების ჩამონათვალში თბილისში არსებული ალექსანდრე გრიბოედოვის სახელობის რუსული დრამატული თეატრიცაა. ამის შესახებ TASS-ის ცნობით, რუსეთის ფედერაციის კულტურის მინისტრის მოადგილის ალა მანილოვამ ისაუბრა. მანილოვამ აღნიშნა, რომ უცხოეთში მდებარე რუსული თეატრების ფინანსური მხარდაჭერა ორი მიმართულებით ხორციელდება: უახლესი თეატრალური სასცენო აღჭურვილობის შეძენა და საპრემიერო სპექტაკლების მხარდაჭერა. „5 მილიონი რუბლი – აღჭურვილობისთვის, 5 მილიონი რუბლი – პროდუქციისთვის,”- თქვა მან. პუბლიკა

თბილისის მერმა კახა კალაძემ ჟურნალისტების შეკითხვებს უპასუხა მთავრობის კანცელარიასთან მიმდინარე სამუშაოებთან დაკავშირებით. მისი თქმით, მთავრობის ადმინისტრაციისგან შევიდა მერიაში წერილი, მაგრამ ჯერ თანხმობა არ გაუციათ. კახა კალაძე ამბობს, რომ ყოველთვის ხდება მანიპულაცია ამგვარი თემებით. გუშინ გახდა ცნობილი, რომ კანცელარიის წინ სკვერის მოწყობა იგეგმება. პუბლიკა

21 მარტს Google-მა თავისი ჩატბოტი Bard ფართო საზოგადოებისთვის ხელმისაწვდომი გახადა. მისი გამოყენება ჯერჯერობით მხოლოდ აშშ-სა და გაერთიანებულ სამეფოშია შესაძლებელი, ახალ ჩატბოტზე კი ჩვენს ქვეყანაში ხელი არ მიგვიწვდება. ასევე იხილეთ: როგორია Google-ის ახალი ჩატბოტი Bard და რით განსხვავდება ChatGPT-ისგან? ამ ყველაფრის ფონზე ინტერნეტში უჩვეულო ქცევა მოხშირდა: სხვადასხვა Facebook გვერდი სახელს იცვლის და Google Bard ხდება. მეტიც, ზოგიერთ შემთხვევაში აღნიშნულ ანგარიშებს გვერდით ვერიფიკაციის ნიშანი აქვს, მათი დათვალიერების შემდეგ კი შეიძლება უცებ ისიც აღმოაჩინოთ, რომ Bard-ის, Google-ის ახალი ჩატბოტის, გვერდი უკვე წლებია არსებობს. ამ ყველაფერმა შეცდომაში არ შეგიყვანოთ — Google Bard-ის თითქმის ყველა ასეთი ანგარიში ყალბია. იდება და ზოგჯერ მასობრივადაც ვრცელდება გარეკლამებული პოსტები, რომლებსაც სპეციალური ბმულები ახლავს სხვადასხვა სერვისის გადმოსაწერად. თუკი ბმულს მაინც გავხსნით, ჩვენს Facebook ანგარიშებს იპარავენ და ყველა გვერდს გვართმევენ, რომელსაც კი ვმართავთ. შედეგად კიდევ უფრო ბევრი ფეისბუკგვერდი იქცევა Google Bard ანგარიშად. ფოტო: Facebook ეს ცნობილი ტელესერიალის ფეისბუკგვერდსაც დაემართა: ჩცდ-ის ანგარიში Google Bard-ად გადაკეთდა, მასზე გადასვლის შემთხვევაში კი ახალი სახელით დადებულ ძველ პოსტებსაც იხილავთ. ფოტო: Facebook ანალოგიური რამ შეემთხვა გადაცემის ჩემი სამზარეულოს წესები ფეისბუკგვერდსაც. ფოტო: Facebook ფოტო: Facebook მსგავსი გვერდები ხშირად Google-ის ჩატბოტის, Bard-ის, ფანგვერდებადაა გასაღებული და ინფორმაციული ხასიათის ახალ პოსტებსაც ავრცელებს. წესი ერთია — არ გადახვიდეთ ბმულზე და არაფერი გადმოწეროთ. ფოტო: Facebook გახშირებულ შემთხვევებს Facebook-ის ქართველი მომხმარებლებიც ეხმაურებიან, მათ შორის, მედიაკომპანია ფორმულას ციფრული კომუნიკაციების ხელმძღვანელი მარიამ ბაჯელიძეც. როგორც მისი პოსტიდან ვიგებთ, დაზარალებულები პრობლემის გადაჭრას Facebook-ის მშობელ კომპანიასთან, Meta-სთან, კომუნიკაციით ცდილობენ, შედეგად კი " მცირე პროგრესი არის, მაგრამ არასაკმარისი". უცხოურ მედიაში აღნიშნული კიბერთაღლითობის შესახებ ინფორმაცია არ მოიპოვება. არანაირი განცხადება არ მოგვისმენია Google-ისა და Meta-ს მხრიდანაც. საგულისხმოა, რომ მსგავსი თაღლითობა აქამდე ChatGPT-ის შემთხვევაშიც ვიხილეთ: ჰაკერები ყალბ ანგარიშებსა და მოპარულ ფეისბუკგვერდებზე Chrome-ის ერთ-ერთ Extension-ს ავრცელებდნენ, მისი დაყენებით კი მომხმარებლებს აცურებდნენ და ანგარიშებს ართმევდნენ. Google-მა აღნიშნული Extension 9 მარტს ამოშალა Chrome Web Store-იდან. როგორ დავიცვათ თავი თუკი რომელიმე ფეისბუკგვერდის ადმინი/მოდერატორი ხართ, ზემოხსენებული საფრთხის მიმართ განსაკუთრებული ყურადღება გმართებთ. შესაძლოა, თქვენ მიერ მოწონებული რომელიმე გვერდი Google Bard-ის ყალბ ანგარიშად გადაკეთდა. ამ შემთხვევაში საფრთხე მანამ არ გემუქრებათ, სანამ აღნიშნული გვერდის მიერ მოწოდებულ ბმულებზე არ გადახვალთ. იმისათვის, რომ შემთხვევითობები თავიდან აირიდოთ, შეგიძლიათ, დროებით გატეხილი ფეისბუკგვერდის პოსტები აღარ იხილოთ: პოსტის თავზე სამ წერტილს დააჭირეთ; ამოირჩიეთ "Snooze [გვერდის სახელი] for 30 days"/"დროებით ჩაჩუმდეს [გვერდის სახელი] 30 დღით". ასე ყალბი გვერდის პოსტებსა და საზიანო ბმულებს ერთი თვით ვეღარ იხილავთ. მეორე მხრივ, შეძლებთ დაელოდოთ — ვინ იცის, იქნებ ერთ დროს თქვენთვის საყვარელი ფეისბუკგვერდი დაბრუნდეს. ამ შემთხვევაში დაზარალებული ანგარიშები გამომწერებს არ დაკარგავენ და მათთვის თაღლითობაც ნაკლებად მტკივნეულად ჩაივლის. სხვა მხრივ, ასეთ შემთხვევებში კიბერჰიგიენის ზოგადი პრინციპები უნდა გაიხსენოთ, მათ შორის: არასოდეს გადახვიდეთ ბმულზე, სანამ მის სანდოობაში ბოლომდე არ დარწმუნდებით. ასევე იხილეთ: 10 ხერხი, რომლითაც კიბერჰიგიენას შეინარჩუნებ თუკი ციფრულ სივრცეში თავის დასაცავად მეტი ინფორმაციის მიღება გსურთ და კიბერუსაფრთხოებასთან დაკავშირებული საკითხები გაინტერესებთ, ამ ბმულზე ჩვენს სხვა სტატიებსაც გაეცნობით. on.ge

თბილისში ჟვანიას ქუჩაზე მომხდარი სავარაუდოდ, შეიარაღებული დაპირისპრების საქმეზე, რომელშიც ახალგაზრდები მონაწილეობენ, შინაგან საქმეთა სამინისტრომ გამოძიება დაიწყო. სოციალურ ქსელში გავრცელებულ ვიდეომასალაში ჩანს, რომ ერთი მანქანა ეჯახება მეორე მანქანას, ირგვლივ რამდენიმე ახალგაზრდაა შეკრებილი. ისმის გინების ხმა, ასევე, სავარაუდოდ გასროლის ხმაც. შსს-ში მედიასთან ამბობენ, რომ საგამოძიებო მოქმედებები მიმდინარეობს, გამოძიება კი, სისხლის სამართლის კოდექსის 239-ე მუხლით დაიწყო, რაც ხულიგნობას გულისხმობს, ჩადენილს ცეცხლსასროლი იარაღის ან იარაღად სხვა საგნის გამოყენებით. პუბლიკა

რუსეთის მიერ გატაცებული 31 ბავშვი უკრაინაში დააბრუნეს, - ამის შესახებ ორგანიზაცია „გადაარჩინე უკრაინა“ იუწყება. „ხერსონისა და ხარკოვის ოლქებიდან რუსების მიერ გატაცებული ბავშვები რამდენიმეთვიანი განშორების შემდეგ ოჯახებს დაუბრუნდნენ“, - აცხადებენ ორგანიზაციაში. მათივე ინფორმაციით, ბავშვები ახლა უსაფრთხოდ არიან, მაგრამ ფსიქოლოგიური და ფიზიკური გაჯანსაღება ესაჭიროებათ. იპნ

ადვილია ადამიანის დისკრედიტება თანამედროვე მედიაინსტრუმენტებით. ჩვენ უნდა შევხედოთ არა აღქმებს, არამედ ქართული მართლმსაჯულების შედეგებს, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა. შალვა პაპუაშვილმა ვრცლად ისაუბრა, 2012 წლის შემდეგ რა ნაბიჯები გადაიდგა სხვადასხვა მიმართულებით, მათ შორის სასამართლო სისტემაში. „2012 წლამდე არსებობდა რეჟიმი, რომელიც დაფუძნებული იყო ტოტალიტარიზმზე, ზოგადად, უკანონო სისტემა იყო. 2012 წლის შემდეგ, როდესაც „ქართული ოცნება“ მოვიდა ხელისუფლებაში, საუბარი იყო, რა უნდა მოხდეს, უნდა იყოს თუ არა გარდამავალი მართლმსაჯულება, მაგალითად, როცა ყველას გაატარებ გარკვეულ ფილტრში. ყველაში იგულისხმება პოლიცია, პროკურატურა, სასამართლო, საჯარო მოხელეები – მთელ საჯარო სისტემას გაატარებ გარკვეულ ფილტრში და მოაწყობ ერთ დიდ სასამართლოს, რომელიც შეიძლება, წლები გაგრძელდეს. ასე ვთქვათ, დაახარისხებ ადამიანებს, ვინ იყო და ვინ არა სისტემის ნაწილი, დამნაშავე, არადამნაშავე. მაშინდელ პარლამენტს თუ გაიხსენებთ, ამაზე სხვადასხვა იდეა იყო. მახსოვს ეს, როგორც მაშინ ექსპერტს, რომელიც ამ სფეროში ვმოღვაწეობდი. მაშინ საერთაშორისო პარტნიორების, მათ შორის იმათი, სადაც მე ვიყავი, როგორც ექსპერტი, რეკომენდაცია იყო, რომ ეს რევოლუციური ძვრები – გაყარე და ახლები მოიყვანე, აღარ გინდათ. ეს მოხდა 2003 წელს სასამართლო სისტემასა და სხვა სისტემაში. ყველა პარტნიორის რეკომენდაცია, მათ შორის არასამთავრობო სექტორის რეკომენდაცია იყო, რომ გამოიძიეთ, სადაც გაქვთ მტკიცებულებები, რომ სისხლის სამართლის დანაშაული ჰქონდათ ჩადენილი, მთავარი დამნაშავეები, ვინც სისტემა შექმნა ჩაგვრის, მორჩილების. საბოლოო ჯამში, იქაც ზოგიერთი მფარველობის ქვეშ მოექცა და ვნახეთ, მიხეილ სააკაშვილი ბოლო პერიოდამდე თავისუფლად დადიოდა სხვადასხვა ქვეყანაში; რაც შეეხება სისტემას, მოარღვიეთ სისტემა, რომელიც დამყარებულია ამ ტოტალიტარიზმზე და მიეცით შესაძლებლობა, ეს სისტემა ასე არ არსებობდეს. ეს გააკეთა მაშინ „ქართულმა ოცნებამ“. სამოქალაქო მშვიდობისთვის რას ვშვრებით? ვყოფთ საზოგადოებას ყოფილებად და ახლებად? ვყოფთ საჯარო სივრცეს და საჯარო მოსამსახურეებს ყოფილებად და ახლებად? რაც გააკეთა მიხეილ სააკაშვილმა, რომელმაც ჩარეცხა მთელი წინა თაობა და მოიყვანა, ასე ვთქვათ, ახალი ელიტა. სწორედ ეს იყო ყველას რეკომენდაცია, ნუ გაიმეორებთ ამ შეცდომას, სისტემა გამოასწორეთ. ყველამ მოიკრიბა ძალა და გადაერთო სისტემის გაუმჯობესებაზე. გავიდა 10 წელი, ახლა რა გვაქვს შედეგი. გადახედეთ ქართულ მართლმსაჯულებას, სად არის პრობლემა სასამართლო გადაწყვეტილებებში? ეს უნდა ითქვას. ფოკუსირება იმიტომ ხდება სახელებზე, რომ გამორჩეული ადამიანის დისკრედიტაცია ადვილია. როდესაც იყო კრიტიკული პროცესები, სადაც პოლიტიკური ლიდერები იყვნენ და ჩნდებოდა მოსამართლე, რომელიც მანამდე საზოგადოებისთვის უცნობი იყო, როგორ წამიერად ხდება შემდეგ ამ მოსამართლის დისკრედიტების მცდელობაც, იმ წამსვე რაღაც კავშირების გამონახვა და შექმნა. ადვილია ადამიანის დისკრედიტება თანამედროვე მედიაინსტრუმენტებით. ჩვენ უნდა შევხედოთ არა აღქმებს, არამედ ქართული მართლმსაჯულების შედეგებს. პირველი, მეორე, მესამე ინსტანციის გადაწყვეტილებებს. მახსოვს „რუსთავი 2“-ის საქმეზე რა პანიკა იყო ატეხილი. ალბათ სამივე ინსტანციაში სულ 15-მდე მოსამართლე იყო ჩართული. ყველა მოსამართლის დისკრედიტება მოხდა. ხან ოჯახს უწუნებდნენ, ხან ძმას, ხან რა იყო, ხან – რა. „რუსთავი 2“-ის სასამართლო როცა დასრულდა უზენაეს სასამართლოში, მაშინ იყო განცხადებები, მათ შორის საერთაშორისო პარტნიორების, რომლებიც აკრიტიკებდნენ ამ გადაწყვეტილებას. რა აღმოჩნდა სინამდვილეში? სტრასბურგის სასამართლომ თქვა, რომ ყველაფერი იყო სწორი. სასამართლო სისტემა ფასდება მისი შედეგებით, გადაწყვეტილებებით“, – განაცხადა შალვა პაპუაშვილმა. ავტორი - ეკატერინე კოპალიანი

პარტია "საქართველოსთვის" მცხეთის მუნიციპალიტეტის სოფელ ჯიღაურაში უკანონოდ მოქმედ ბეტონის საწარმოს ფუნქციონირებასა და ადგილობრივი მოსახლეობისთვის მიყენებული ზარალის საკითხს განცხადებით ეხმაურება, რომელსაც planeta.ge უცვლელად გთავაზობთ: "პარტია "საქართველოსთვის" სახელით გვინდა გამოვეხმაუროთ მცხეთის მუნიციპალიტეტის სოფელ ჯიღაურაში უკანონოდ მოქმედ ბეტონის საწარმოს ფუნქციონირებისა და ადგილობრივი მოსახლეობისთვის მიყენებული ზარალის საკითხს. ასევე გვსურს, სოლიდარობა და სრული მხარდაჭერა გამოვუცხადოთ სოფელ ჯიღაურაში მცხოვრებ ადგილობრივ მოსახლეობას. პარტია „საქართველოსთვის“ საპარლამენტო გუნდმა, ჯიღაურაში არსებულ პრობლემასთან დაკავშირებით, ყველა შესაბამის სახელმწიფო უწყებას მიმართა და მათ შორის მცხეთის მუნიციპალიტეტის ადგილობრივ თვითმმართველობას. საქართველოს პარლამენტის წევრის მცხეთის, დუშეთის, თიანეთისა და ყაზბეგის მაჟორიტარი დეპუტატის შალვა კერესელიძის სახელით გავუგზავნეთ შუამდგომლობის წერილები, რათა დეტალურად დაინტერესდნენ და შეისწავლონ ხსენებული საკითხი, თუ რატომ ხდებოდა და როგორ ფუნქციონირებდა წელიწადნახევრის განმავლობაში ყოვლად უკანონო და ნებართვის არ მქონე ბეტონის საწარმო ტურისტულად აქტიურ ზონაში და მოსახლეობის განსახლების კუთხით მჭიდროდ დასახლებულ ადგილზე და როგორ ახერხებდა უნებართვოდ მოქმედი საწარმო, საგადასახადო შემოსავლების კუთხით, სახელმწიფო ბიუჯეტთან ანგარიშსწორებას. ერთი წლის განმავლობაში, რატომ ვერ გახდა შესაძლებელი ერთხელ მაინც, სასამართლოს სხდომის ჩატარება და კანონის შესაბამისი გადაწყვეტილების მიღება. უდავოდ სამწუხაროა ის ფაქტიც, რომ ამ უკანონობას სანამ მოსახლეობის მხრიდან დიდი პროტესტი არ მოჰყვა წელიწადნახევრის განმავლობაში, არანაირი რეაგირება არ ქონია და მხოლოდ მოსახლეობის დიდი მღელვარების შემდეგ გახდა შესაძლებელი სხვა და სხვა უწყებების მხრიდან შესაბამისი რეაგირების გაკეთება. ყოველივე აღნიშნული გვაძლევს მტკიცე საფუძველს ვიფიქროთ, რომ საქმე გვაქვს კორუფციულ გარიგებებთან და სამოხელეო დანაშაულთან. მოვუწოდებთ ყველა შესაბამის უწყებას, დაინტერესდნენ სოფელ ჯიღაურაში უკანონოდ მოქმედ ბეტონის საწარმოს არალეგიტიმური საქმიანობით და მიიღონ კანონით გათვალისწინებული მკაცრი ზომები, რათა ჯიღაურას მოსახლეობას საქართველოს კონსტიტუციის შესაბამისად, მიეცეთ უფლება იცხოვრონ ჯანმრთელ გარემოში და თავიდან აიცილონ საწარმოს მავნე გამონაბოლქვის შედეგად გამოწვეული დავადებები. პარტია ,,საქართველოსთვის" მომავალშიც აქტიურად განაგრძობს მონიტორინგს მსგავსი პრობლემების გამოვლენასა და მოგვარების საქმეში. #ჯანსაღიგარემოსთვის", - ვკითხულობთ განცხადებაში.

საერთაშორისო მნიშვნელობის თბილისი-სენაკი-ლესელიძის საავტომობილო გზის 149-ე კმ-ზე (რიკოთის უღელტეხილი) არსებულ გზასთან განვითარებული მეწყრული პროცესის კვლევის წინასწარი შედეგების ანალიზის საფუძველზე, სპეციალისტების რეკომენდაციით, რიკოთის მონაკვეთზე ავტოტრანსპორტის მოძრაობის აღდგენა დასაშვებია სპეციალური რეჟიმის პირობებში. აღნიშნულის შესახებ ინფორმაციას საავტომობილო გზების დეპარტამენტი ავრცელებს. როგორც დეპარტამენტში აცხადებენ, ვინაიდან რეკომენდაციად კვლავ რჩება მეწყერულ უბანზე მუდმივი მკაცრი მონიტორინგი, შაბათს, 8 აპრილს, 07:00 საათიდან ავტოტრანსპორტის მოძრაობა რიკოთის მონაკვეთზე აღდგება სპეციალური რეჟიმით. „შაბათს, 8 აპრილს, 07:00 საათიდან ავტოტრანსპორტის მოძრაობა რიკოთის მონაკვეთზე აღდგება შემდეგი რეჟიმით: 07:00 საათიდან 19:00 საათამდე თბილისი-სენაკი-ლესელიძის საავტომობილო გზის 114-ე კმ-დან (ახალსოფლის კვანძი) 194-ე კმ-მდე (ზესტაფონი) გადაადგილება დასაშვები იქნება მხოლოდ მსუბუქი და სამგზავრო ავტოტრანსპორტისთვის. 21:00 სთ-დან დილის 06:00 სთ-მდე ამავე მონაკვეთზე გადაადგილდებიან მხოლოდ სატვირთო ავტომანქანები. სატვირთო ავტომანქანები გადაადგილდებიან პატრულის მკაცრი ზედამხედველობით, ინტერვალებით, გაუჩერებლად და რევერსულად ანუ ცალმხრივად, მიმართულების შეცვლით. ამასთან, რიკოთის გვირაბი-სოფელი ხევის მონაკვეთზე ნებისმიერი ტიპის ავტოტრანსპორტის მოძრაობა უნდა განხორციელდეს გაუჩერებლად გავლის რეჟიმში. მსუბუქ და სამგზავრო ავტოტრანსპორტს გომი-საჩხერეს-ჭიათურა-ზესტაფონის 109 კმ-იანი მარშრუტით სარგებლობა შეუძლია ნებისმიერ დროს. კვლევითი სამუშაოები მეწყრულ უბანზე გრძელდება. დაწყებულია შესაბამისი საპროექტო გადაწყვეტების დამუშავების პროცესი. პრევენციული სამუშაოების დასაწყებად კი მიმდინარეობს მისასვლელი გზების მოწყობა“, – აღნიშნულია ინფორმაციაში.

პენტაგონის საიდუმლო დოკუმენტების შესაძლო გასაჯაროებასთან დაკავშირებით აშშ-ის იუსტიციის დეპარტამენტმა გამოძიება დაიწყო. შიდა მოკვლევა მიმდინარეობს პენტაგონშიც, – ამის შესახებ „დოიჩე ველე“ წერს. გავრცელებული ცნობით, ასობით დოკუმენტი, რომლებიც აშშ-სა და ნატო-ს მიერ უკრაინის დახმარებასთან დაკავშირებულ ინფორმაციას შეიცავს, სოციალურ პლატფორმებზე გავრცელდა. ანონიმურობის პირობით სამმა მაღალჩინოსანმა სააგენტო „როიტერს“ განუცხადა, რომ ამ გაჟონვის უკან, სავარაუდოდ, პრორუსული ელემენტები დგანან. დოკუმენტები მიმდინარე წლის 23 თებერვლიდან 1-ელ მარტამდე პერიოდით არის დათარიღებული და გრიფით საიდუმლოა, მოიცავს დეტალურ ინფორმაციას შეიარაღებისა და სხვა აღჭურვილობის უკრაინისთვის მიწოდებასა და გრაფიკზე. ანონიმური წყაროს თქმით, აღნიშნული დოკუმენტები რედაქტირებულია და მათში რუსული მხარის მსხვერპლის რიცხვი გამიზნულად არის შემცირებული. ერთ-ერთ ასეთ დოკუმენტში დაღუპული რუსი სამხედროები რიცხვი 16 ათასიდან 17 500-მდეა დასახელებული, მაშინ როდესაც აშშ-ის ხელისუფლება ოფიციალურ განცხადებებში 200 ათასს დაღუპულზე საუბრობს. უკრაინა მისი მხრიდან ინფორმაციის გაჟონვას გამორიცხავს და აცხადებს, რომ ბოლო წლებში რუსული სპეცსამსახურების ყველაზე წარმატებული ოპერაციები ფოტოშოპში ხორციელდებოდა. უკრაინის პრეზიდენტის ოფისის ხელმძღვანელის მრჩევლის, მიხაილ პოდოლიაკის თქმით, ეს დოკუმენტები შეიცავს დიდი ოდენობით ფიქტიურ ინფორმაციას. „ეს არის რუსული დაზვერვის მიერ ოპერაციული თამაშების სტანდარტული ელემენტები და მეტი არაფერი“, – აცხადებს პოდოლიაკი. ავტორი - სალომე თორაძე