tvati

პრეზიდენტის ადმინისტრაცია ხვალინდელ ღონისძიებასთან დაკავშირებით მორიგ განცხადებას ავრცელებს, სადაც ნათქვამია, რომ შეხვედრა სხვადასხვა სფეროს წარმომადგენელ ქალებთან აპოლიტიკურია და რაიმე მოძრაობის დაფუძნებას არ ისახავს მიზნად. „ხვალ, 9 აპრილს, საქართველოს თანამედროვე ისტორიაში ერთ-ერთ ყველაზე მნიშვნელოვან დღეს, საქართველოს პრეზიდენტი თბილისის ოპერისა და ბალეტის სახელმწიფო თეატრში სხვადასხვა სფეროს წარმომადგენელ ქალებს უმასპინძლებს, რათა ერთად აღვნიშნოთ ეს მნიშვნელოვანი თარიღი და ერთად გამოვხატოთ მხარდაჭერა საქართველოს ევროპული მომავლის მიმართ.

უკრაინელებმა ომის დაწყების შემდეგ რუსეთის 177 680 -მდე ჯარისკაცი გაანადგურეს, მათ შორის 570 - ბოლო დღე-ღამის განმავლობაში, - ამის შესახებ ინფორმაციას უკრაინის შეიარაღებული ძალების გენერალური შტაბი ავრცელებს. ამასთან, უკრაინაში შეჭრის დღიდან რუსების საერთო დანაკარგები მოიცავს: 3 636 ტანკს, 7 020 ჯავშანტექნიკას, 2 727 ერთეულ საარტილერიო სისტემას, 307 საბრძოლო თვითმფრინავს და 292 ვერტმფრენს, 5 599 ავტომობილსა და საწვავის ავზს, 18 გემს/ნავს, 2 298 უპილოტო საფრენ აპარატს, 304 ერთეულ სპეცტექნიკას და 911 ფრთოსან რაკეტას. იპნ

ყირიმის დეოკუპაცია უალტერნატივოა, - ამის შესახებ უკრაინის პრეზიდენტმა ვოლოდიმირ ზელენსკიმ სიტყვით გამოსვლის დროს განაცხადა. „არ დაგვავიწყდეს, რომ სწორედ ჩვენი უკრაინული ყირიმის ოკუპაციით, სწორედ ყირიმში უკრაინული და ყირიმულ თათრული თავისუფლების, ყირიმელი მუსლიმების წინააღმდეგ რეპრესიებით დაიწყო რუსეთის მცდელობა, მონობაში ჩააყენოს უკრაინა და ცივილიზებული ევროპის სხვა ერები“, - განაცხადა ზელენსკიმ. მისი თქმით, ახლა ყირიმში რუსული დროშის ქვეშ ბოროტება ბატონობს - „მიმდინარეობს დამცირებები, რეპრესიები, მკვლელობები და ომი“. „მაგრამ იქ, სადაც ბოროტების გზა დაიწყო, დარწმუნებული ვარ სწორედ იქ გველის ამ ბოროტებაზე გამარჯვება. ყირიმის დეოკუპაცია უალტერნატივოა არა მხოლოდ უკრაინისთვის, არამედ მთელი მსოფლიოსთვისაც. დარწმუნებული ვარ ამაში. მსოფლიოში წესრიგისთვის, რომელიც გაეროს კონვენციებსა და ქარტიას ეყრდნობა, და არა მკვლელების, მოძალადეების, მძარცველების კრიმინალურ ჩვევებს, რომელთა გავრცელებასაც რუსეთი ცდილობს”, - აღნიშნა ზელენსკიმ. IPN

„არ მიხარია და კიდევაც განვიცდი ამერიკის შეერთებული შტატების სახელმწიფო მდივნის გადაწყვეტილებას”, – საქართველოს პრეზიდენტი სალომე ზურაბიშვილი ეხმაურება აშშ-ის გადაწყვეტილებას, დაასანქციროს საქართველოს 4 მოსამართლე. ზურაბიშვილის თქმით, ის შიშობს, რომ აშშ-ის გადაწყვეტილება ევროპაში აღქმული არ იყოს, როგორც ნეგატიური სიგნალი და ამ ყოველივემ გავლენა არ მოახსინოს სტატუსის მიღებაზე. აშშ-ის სახელმწიფო დეპარტამენტის პრესსპიკერის განცხადებით, სახელმწიფო დეპარტამენტმა ქართველ მოსამართლეებს: მიხეილ ჩინჩალაძეს, ლევან მურუსიძეს, ირაკლი შენგელიას და ვალერიან ცერცვაძეს სავიზო შეზღუდვები დაუწესა. სანქცირებულ მოსამართლეებს და მათი ოჯახის წევრებს, ეკრძალებათ ამერიკის შეერთებულ შტატებში შესვლა. ასევე იხილეთ ეს მიუკერძოებელი სასამართლო სისტემის ჩამოყალიბების მიმართ ერთგულების დემონსტრირების შესაძლებლობაა - დეგნანი 07 აპრილი, 2023 „ეს არის შესაძლებლობა, მოხდეს დემონსტრირება, რომ მთავრობა ერთგულია კორუფციის წინააღმდეგ ბრძოლის და ჭეშმარიტად მიუკერძოებელი სასამართლო სისტემის ჩამოყალიბების მიმართ”, – ამის შესახებ საქართველოში აშშ-ის ელჩმა, კელი დეგნანმა განაცხადა. ჟურნალისტებმა მას ჰკითხეს, შეუშლის თუ არა ხელს საქართველოს ევროპულ მომავალს აშშ-ის მიერ ქართველი მოსამართლეების დასანქცირება იმ ფონზე, როცა საქართველო ევროკომისიის 12 რეკომენდაციის შესრულების პროცესშია. პუბლიკა

მთავრობის ადმინისტრაციის შენობის წინ სკვერი მოეწყობა, – ამის შესახებ „პუბლიკას” მთავრობის ადმინისტრაციის პრესსამსახურში განუცხადეს. ამ დროისთვის მიმდებარე ტერიტორიაზე კეთილმოწყობითი სამუშაოები მიმდინარეობს:

საქართველოს პარლამენტის თავმჯდომარის, შალვა პაპუაშვილის განცხადებით, საქართველოში აშშ-ის ელჩთან, კელი დეგნანთან შეხვედრაზე სხვადასხვა საკითხზე ისაუბრეს, მათ შორის აშშ-ის მიერ მოსამართლეების დასანქცირებაზე. მისივე თქმით, ელჩმა განმარტა, რომ ეს არის არა სანქცია, არამედ სავიზო შეზღუდვა. „სამ მოსამართლეს და ერთ ყოფილ მოსამართლესთან დაკავშირებით მიღებულ გადაწყვეტილებას რაც შეეხება, ერთი მნიშვნელოვანი ფაქტია – ელჩმა თქვა, რომ ეს არ არის სანქცია, არის სავიზო შეზღუდვა და იყო ენობრივი თარგმანის პრობლემა. შედეგობრივად, სავარაუდოდ, დიდი განსხვავება არ არის, თუმცა ტერმინი „სანქცია“ ალბათ აქ არ გამოიყენება. ასევე, ვისაუბრეთ იმასთან დაკავშირებით, რა მტკიცებულებები არსებობს ამის უკან. ელჩმა გაიმეორა ის, რასაც ჩვენ საჯაროდ ვისმენდით, რომ გადაწყვეტილება დაფუძნებულია, ძირითადად, საჯარო წყაროებიდან მიღებულ ინფორმაციაზე. როგორც ჩანს, არაფერი რაიმე დამატებითი ინფორმაცია არ არსებობს, არის ის, რაც პრესაში თუ სხვადასხვა კვლევაშია. ის, რაც ჩვენ, ყველამ ვიცით. სპეციფიკურად რომელი ინფორმაცია იყო ამის განმაპირობებელი, ამასთან დაკავშირებით რაიმე დამატებითი ინფორმაცია არ მიგვიღია. მართალია, თვითონ გადაწყვეტილება ეხება მხოლოდ სავიზო შეზღუდვას, მაგრამ აბსოლუტურად მიუღებელია ადამიანების, საქართველოს მოქალაქეების, ქართველი მოსამართლეების მიმართ პიროვნული შეტევა, მათთვის, როგორც კორუმპირებული მოსამართლეებისთვის, იარლიყების მიწებება. პარტნიორები ასე არ იქცევიან“, – განაცხადა შალვა პაპუაშვილმა.

პარლამენტის თავმჯდომარის პრეროგატივაა, თუ რა ტიპის წესებს შემოიღებს, – ამის შესახებ საქართველოში ამერიკის შეერთებული შტატების ელჩმა, კელი დეგნანმა ტელეკომპანია „მთავარისა“ და „ტვ პირველის“ ჟურნალისტებისთვის პარლამენტში აკრედიტაციის დროებით შეჩერების საკითხზე კომენტირებისას განაცხადა. როგორც კელი დეგნანმა აღნიშნა, აშშ ძლიერი და დამოუკიდებელი მედიის აქტიური დამცველია. „აშშ ასევე ძლიერი მხარდამჭერია პროფესიონალური და ეთიკური მედიის. სწორედ ეს ბალანსი იძლევა საშუალებას, რომ მოსახლეობამ მიიღოს მნიშვნელოვანი და სანდო ინფორმაცია. პარლამენტის თავმჯდომარის პრეროგატივაა, რა ტიპის წესებს შემოიღებს. როგორც ვიცი, ჩვენ საკანონმდებლო ორგანოშიც არსებობს აკრედიტაციის მოთხოვნა, თუმცა ასევე მნიშვნელოვანია, როგორ განხორციელდება ეს წესი და განხორციელდება თუ არა სამართლიანად და მიუკერძოებლად“, – განაცხადა ელჩმა. ავტორი - გივი ბარამიძე

აბსოლუტურად მიუღებელია ადამიანების, საქართველოს მოქალაქეების, ქართველი მოსამართლეების მიმართ პიროვნული შეტევა, მათთვის, როგორც კორუმპირებული მოსამართლეებისთვის იარლიყების მიწებება, პარტნიორები ასე არ იქცევიან, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა. პაპუაშვილის თქმით, აშშ-ის მხრიდან არაპარტნიორული ნაბიჯი გადაიდგა. „საქართველო აშშ-ის ხანგრძლივი სტრატეგიული პარტნიორია. ჩვენი ჯარისკაცები ამერიკელ ჯარისკაცებთან ერთად მხარდამხარ იბრძოდნენ სხვადასხვა ცხელ წერტილში, იქნებოდა ეს ერაყი თუ ავღანეთი. ჩვენმა ხალხმა გაიღო სისხლი, რათა უზრუნველყოფილი ყოფილიყო საერთაშორისო მშვიდობა ამერიკელ და საერთაშორისო პარტნიორებთან ერთად. ამ პარტნიორობას ჩვენ 30 წელი პატიოსნად ვატარებთ და ყოველთვის, სადაც საჭირო არის ჩვენი პარტნიორობა, თანადგომა, ამას ვიჩენთ, მათ შორის იმით, რომ ავღანეთში საქართველო იყო ამერიკის შემდეგ ყველაზე დიდი კონტრიბუტორი ერთ სულ მოსახლეზე გადათვლით. უკან როდესაც იხევდა ალიანსის ძალები, საქართველომ უმოკლეს ვადებში ლოგისტიკურად მოაწესრიგა ავღანეთიდან ალიანსის ძალების უკან დახევა და ამან უზრუნველყო, მათ შორის ის, რომ პროცესი მთლიანად ყოფილიყო ორგანიზებული. ეს ნაბიჯი არ არის ისეთი, როგორც იქცევიან პარტნიორები, როდესაც ჩვენი მოქალაქეებისა და მოსამართლეებისთვის იარლიყების მიწებება ხდება, რომ ისინი არიან კორუმპირებულები. ამავე დროს, იმ კონტექსტში, რომ არანაირი მტკიცებულების წარმოდგენა არ ხდება. არის მითითება რაღაც საჯარო წყაროებზე, რაც ყველამ ვიცით და ვერავინ ამბობს, რა არის ამ საჯაროში სპეციფიკური წყარო. ამიტომ, რა თქმა უნდა, ამასთან დაკავშირებით გამოვთქვი ჩემი იმედგაცრუება. ამას გარდა, ეს არის ძალიან ცუდ დროს მიღებული ცუდი გადაწყვეტილება. რაც არ უნდა ყოფილიყო ამ გადაწყვეტილების საფუძველი თუ მიზანი, ვხედავთ, რა ხდება, ვინ სარგებლობს ამ გადაწყვეტილებით. სარგებლობს რადიკალიზმის გაღვივება, სარგებლობს პოლარიზაციის გაღრმავება და სარგებლობს საქართველოს ევროპული ინტეგრაციისთვის წყლის შეყენება. ამიტომ ასეთი მოქმედება თავისთავად ძალიან იმედგამაცრუებელია. აშშ 30 წელზე მეტია, საქართველოს სხვადასხვა მიმართულებით ეხმარება და სამწუხაროა, რომ ასეთი ნაბიჯებით ხდება გარკვეული ხინჯის მიყენება იმ დახმარებისთვის, რომელსაც თუნდაც სასამართლო სისტემის მიმართ იჩენდა. ჩვენ ვნახეთ გუშინ მოსამართლეების განცხადებები, რომ ხდება ჩარევა მათ საქმიანობაში. ძალიან ვწუხვარ, რომ ასეთი არაპარტნიორული ნაბიჯი გადაიდგა. როდესაც მოსამართლეებისკენ იშვერენ თითს და ეძახიან კორუმპირებულებს, ქართველი ხალხი იმსახურებს, მტკიცებულებები წარმოადგინონ მათ, რომლებიც ამას აკეთებენ და იარლიყს აწებებენ საქართველოს მოქალაქე მოსამართლეებს“, – განაცხადა შალვა პაპუაშვილმა. ავტორი - ეკატერინე კოპალიანი

არ არსებობს მიზეზი, რატომ მოისურვებს აშშ საქართველოს ხიფათში ჩაგდებას, სამწუხაროა, რომ ვისმენთ სრულიად მცდარ შეთქმულების თეორიას და ზოგჯერ ეს ისმის მმართველი პარტიის წევრებისგან, – ამის შესახებ საქართველოში ამერიკის შეერთებული შტატების ელჩმა, კელი დეგნანმა ჟურნალისტებს განუცხადა. „მეორე ფრონტის საკითხს რაც შეეხება, როგორც მანამდე არაერთხელ მითქვამს, ეს 100 პროცენტით სიცრუეა, აბსოლუტური ტყუილია. არ არსებობს მიზეზი, რატომ მოისურვებს აშშ საქართველოს ხიფათში ჩაგდებას. ჩვენ 30 წლის განმავლობაში ვცდილობთ, დაგეხმაროთ, გააძლიეროთ შესაძლებლობა, დაიცვათ საზღვრები თქვენი უსაფრთხოების გაძლიერებაში, თავდაცვის სამინისტროსთან, სანაპირო დაცვასთან, სასაზღვრო პოლიციასთან ერთად მუშაობით. რატომ ჩავაგდებთ საქართველოს რისკის ქვეშ. ძალიან მგრძნობიარე ვართ იმ საკითხში, რომ საქართველოს ტერიტორიის 20 პროცენტი ოკუპირებულია ისეთი აგრესორის მიერ, როგორიც რუსეთია. ჩვენ აბსოლუტურად არასდროს ჩავაყანებთ საქართველოს ასეთ პოზიციაში. ეს ადრეც ბევრჯერ მითქვამს. სამწუხაროა, რომ ვისმენთ სრულიად მცდარ შეთქმულების თეორიას და ზოგჯერ ეს ისმის მმართველი პარტიის წევრებისგან. ძალიან სამწუხაროა. ეს ასი პროცენტით სიცრუეა“, – განაცხადა კელი დეგნანმა. ავტორი - გივი ბარამიძე

უზენაესი სასამართლოს მოსამართლე ვლადიმერ კაკაბაძე სოციალურ ქსელში ანტიამერიკულ კომენტარს წერს და აშშ-ის სახელმწიფო მდივანს, ენტონი ბლინკენს მიმართავს: “დიდი ხანია გასული, რაც ვიეტნამში ქალებს და ბავშვებს ქიმიური იარაღით აღარ წამლავთ ბატონო ბლინკენ!?”. აღნიშნული კომენტარი მან უზენაესი სასამართლოს მოსამართლის, ლევან თევზაძის პოსტზე დაწერა, სადაც თევზაძე აშშ-ს აკრიტიკებდა მისი კოლეგებისთვის სანქციების დაწესების გამო. “ნეტგაზეთი” ვლადიმერ კაკაბაძის ფეისბუკ ანგარიშის ავთენტურობის დასადასტურებლად იუსტიციის უმაღლეს საბჭოსაც დაუკავშირდა. პრესსამსახურში გვითხრეს, რომ ცდილობენ მასთან დაკავშირებას და პასუხს შეგვატყობინებენ. 5 აპრილს აშშ-ის სახელმწიფო დეპარტამენტმა გამოაცხადა, რომ სანქციებს უწესებს ე.წ. კლანის წევრ მოსამართლეებს. სახდეპის თქმით, სანქცირება უკავშირდება მნიშვნელოვან კორუფციულ საქმიანობაში მათ ჩართულობას. მოსამართლეებს და მათი ოჯახის წევრებს აეკრძალათ აშშ-ში შესვლა. დეტალურად: აშშ-მა მურუსიძე, ჩინჩალაძე და სხვა მოსამართლეები დაასანქცირა ოპოზიცია სანქციებს მიესალმება, მმართველის გუნდის ლიდერმა კი თქვა, რომ სახელმწიფო მდივნის, ენტონი ბლინკენის განცხადების უკან დგას კორუფციული პროცესები, რაც იმას ნიშნავს, რომ მას არასწორი ინფორმაცია მიაწოდეს საქართველოში მიმდინარე პროცესების შესახებ. დეტალურად: [ბლინკენის] განცხადების უკან დგას კორუფციული პროცესები — კობახიძე აშშ-ის მიერ ოთხი მოსამართლისა და მათი ოჯახის წევრების სანქცირების საპასუხოდ, იუსტიციის უმაღლესი საბჭოს წევრი ლევან მურუსიძე აცხადებს, რომ აშშ-ის სახელმწიფო დეპარტამენტის გადაწყვეტილება პირადად მისთვის „ძალიან ცუდი იქნება“, თუმცა „ცხოვრება გაგრძელდება“. ნეტგაზეთი

უკრაინის კონტრშეტევა უახლოეს დღეებში დაიწყება, – ამის შესახებ აშშ-ის სახელმწიფო მდივანმა, ენტონი ბლინკენმა განაცხადა. ინფორმაციას „ბიბისი“ ავრცელებს. მედიის ცნობით, ბლინკენმა ასევე აღნიშნა, რომ ვიდრე რუსული აგრესია გრძელდება, დასავლეთის ქვეყნები შეინარჩუნებენ რუსეთზე უპრეცედენტო ზეწოლას სანქციებისა და ექსპორტის კონტროლის გამოყენებით. 1ტვ

თუ ვინმეს ჰქონია, რომ რაღაც სანქციებით შემაშინებს, ძალიან ცდება, - ამის შესახებ „ქართული ოცნების“ გენერალურმა მდივანმა, კახა კალაძემ განაცხადა. მისივე თქმით, ის ქართულ პოლიტიკაში შემოსვლას არ ნანობს. “თუ ვინმეს ჰქონია, რომ რაღაც სანქციებით შემაშინებს, ძალიან ცდება. 2011 წელს, როდესაც მე გადაწყვეტილება მივიღე პოლიტიკაში შემოსვლასთან დაკავშირებით, ეს გადაწყვეტილება ნაკარნახევი იყო იქიდან გამომდინარე, რაც ხდებოდა ქვეყანაში, რა ვითარებაც იყო, თორემ მე რა მინდოდა პოლიტიკაში, აბსოლუტურად ყველანაირად შეძლებულად ვცხოვრობდი, ევროპის ერთ-ერთ საუკეთესო ქალაქში, მაგრამ ეს გადაწყვეტილება მივიღე ჩემი ქვეყნის და სამშობლოს სიყვარულის გამო, იმ ვითარების გამო, თუ რაც ხდებოდა ქვეყანაში. ეს ნაბიჯი გადავდგი და არ ვნანობ. მგონია, რომ სწორი გადაწყვეტილება მივიღე. დღესაც მე ვემსახურები ჩემს სამშობლოს და ჩემს ხალხს”, - განაცხადა კალაძემ. ჟურნალისტის კითხვაზე, ხომ არ გეგმავს თანხების გამოტანას სხვადასხვა ქვეყნის ბანკებიდან მოსალოდნელი სანქციების გამო, კალაძე ჟურნალისტს მოუწოდებს, რომ მის თანხებზე არ ინერვიულოს. “თქვენ ნუ ინერვიულებთ ჩემს თანხებზე და ბანკებზე, სანერვიულო ისედაც ბევრი გაქვთ და ვხედავთ, რა მდგომარეობაშიც იმყოფებით, ჩემზე ნუ ინერვიულებთ. ჩემს თავს, როგორმე მივხედავ და მაგაზე თქვენ არ ინერვიულოთ”, - აღნიშნა კალაძემ. იპნ

თბილისის მერის, კახა კალაძის განცხადებით, აშშ-ს სახელმწიფო დეპარტამენტის მიერ მიღებული გადაწყვეტილება მიუღებელია, რადგან მათ არანაირი ფაქტი და მტკიცებულება არ წარმოუდგენიათ. კალაძეს იმედი აქვს, რომ აშშ-ს სახელმწიფო დეპარტამენტის მიერ წარმოდგენილი იქნება მიზეზები, წინააღმდეგ შემთხვევაში, მერის თქმით, ეს გადაწყვეტილება სუვერენიტეტული სახელმწიფოს დამოუკიდებელ სასამართლოზე ზეწოლად აღიქმება. “რაც შეეხება გადაწყვეტილებას, რომელიც გუშინ გაჟღერდა, ამასთან დაკავშირებით უკვე ძალიან ბევრი კომენტარი და განმარტებები გაკეთდა. ასევე, ამასთან დაკავშირებით ილია დარჩიაშვილს ჰქონდა ძალიან კარგი წერილი, სადაც დეტალურად მოყვანილი იყო კონკრეტული მაგალითები, თუ რა ხდებოდა 2012 წლამდე სასამართლოში, რა ვითარება და მდგომარეობა იყო, ხოლო ახლა, დღეს რა გვაქვს. ამ ყველაფრის შედარება ნებისმიერ ადამიანს ძალიან მარტივად შეუძლია. შესაბამისად, ის გადაწყვეტილება, რომელიც ჩვენ მოვისმინეთ კატეგორიულად მიუღებელია, იმიტომ, რომ არანაირი ფაქტი, არანაირი მტკიცებულება არ არის წარმოდგენილი. მე დიდი იმედი მაქვს, რომ წარმოდგენილი იქნება რაღაც, თუ რაზეც აღნიშნული გადაწყვეტილება მიღებული იქნა, ამ ყველაფრის საბაბი რა იყო, წინააღმდეგ შემთხვევაში, ეს გადაწყვეტილება აღქმული იქნება სუვერენიტეტული სახელმწიფოს დამოუკიდებელ სასამართლოზე ზეწოლად. ვფიქრობ, ასეთი დამოკიდებულება დააზიანებს იმ ურთიერთობას, რომელიც არსებობს ჩვენს ქვეყანასა და ამერიკას შორის. ჩვენ გვახსოვს ქვეყანაში 2012 წლამდე რა ხდებოდა, სასამართლო ჩვეულებრივი ნოტარიუსი იყო. ნახეთ, ის გადაწყვეტილებები, რა გადაწყვეტილებების მიღებაც ხდებოდა და შემდეგ, როგორ ხდებოდა მიღებული გადაწყვეტილებების გასაჩივრება სტრასბურგში, რამდენი და რა მოცულობა იყო და რა ვითარება გვაქვს დღეს. ყველაფერი ხომ შედარებითია? ძალიან მარტივად ხელმისაწვდომია აღნიშნული მონაცემები ნებისმიერი ადამიანისთვის. იმ კრიმინალურ, სისხლიან რეჟიმს, რომელსაც მიხეილ სააკაშვილის ხელისუფლება წარმოადგენდა, დღეს ზუსტად, ის კონკრეტული ხაზი, რომელიც ასანქცირებს, ვთქვათ მოსამართლეებს, აბსოლუტურად გაუგებრად, ყოველგვარი მტკიცებულებების გარეშე, ის ადამიანები გვეუბნებოდნენ, რომ მიხეილ სააკაშვილის მმართველობა დემოკრატიის შუქურა იყო”, - განაცხადა კალაძემ. იპნ

სახალხო დამცველი ლევან იოსელიანი ზოგიერთი მედიასაშუალების ჟურნალისტებისა და ოპერატორებისთვის აკრედიტაციის შეჩერების საკითხთან დაკავშირებით განცხადებას ავრცელებს. როგორც ომბუდსმენის განცხადებაშია აღნიშნული, მედიის წარმომადგენლების მიმართ მსგავსი დამოკიდებულება და გადაწყვეტილებები ხელს უშლის ქვეყანაში პოლარიზაციის შემცირებას. სახალხო დამცველი მოუწოდებს საქართველოს პარლამენტის თავმჯდომარეს, სადავო წესში ცვლილება შეიტანოს იმგვარად, რომ რეგულაცია არ იწვევდეს მედიის წარმომადგენლის საქმიანობაში გაუმართლებელ ჩარევას. „საქართველოს სახალხო დამცველი ლევან იოსელიანი ეხმიანება საქართველოს პარლამენტის აპარატის მიერ სხვადასხვა დროს კრიტიკული მედიის (On.ge, „ნეტგაზეთი“, „პუბლიკა“, „ფორმულა“ „ტვ პირველი“, „მთავარი არხი“) ჟურნალისტებისა და ოპერატორებისთვის აკრედიტაციის შეჩერების საკითხს. როგორც მედიის წარმომადგენლები მიუთითებენ, აკრედიტაციის შეჩერება დისკრიმინაციული საფუძვლით, მათ მიერ მმართველი პარტიისთვის მიუღებელი პოზიციის დაფიქსირებით თუ კითხვების დასმით არის გამოწვეული. ინტერპრესნიუსი

მაგ მოსამართლეების გულშემატკივარი ცხოვრებაში არ ვყოფილვარ, მაგრამ რა ხდება ახლა - პოლიტიკური ტურები გამოვიდნენ და კიდევ რაღაცის არევა უნდათ - ჩვენ არ ვართ ის ერი, ვიღაცის დაპყრობა მოვინდომოთ, მაგრამ ის ერიც არ ვართ ერთის მონობიდან მეორის მონად ვიქცეთ, - ამის შესახებ ბოდბელმა მთავარეპისკოპოსმა, მეუფე იაკობმა ქადაგებისას განაცხადა, რითაც ამერიკის შეერთებული შტატების მიერ ოთხი ქართველი მოსამართლის დასანქცირების ფაქტი შეაფასა. მეუფე იაკობის თქმით, ევროპას, ამერიკას და საქართველოს ერთმანეთთან ძალიან ცუდი მიმართვები აქვთ და „უცხოეთიც რუსის საქმეს აკეთებს“ „მინდა პირდაპირ გითხრათ, რომ მაგ მოსამართლეების გულშემატკივარი ცხოვრებაში არ ვყოფილვარ, მაგრამ რა ხდება ახლა - პოლიტიკური ტურები გამოვიდნენ და კიდევ რაღაცა არევა უნდათ. თურმე საქართველოში იმ სასამართლოსთან შედარებით, რაც იყო, დიდი განსხვავებაა. ქართველი ხალხის სახელით გამოდიან. მე ამერიკელებთან ყოველთვის საკმაოდ კარგი ურთიერთობა მქონდა. დღესაც კარგი ურთიერთობა მაქვს და მინდა რომ ჩემს სახელმწიფოსაც კარგი ურთიერთობა ჰქონდეს. ჩვენ არ ვართ ის ერი, ვიღაცის დაპყრობა მოვინდომოთ, მაგრამ ის ერიც არ ვართ ერთის მონობიდან მეორის მონად ვიქცეთ. ჩვენ გავაკეთებთ იმას, რომ ვერც რუსმა, ვერც ევროპელმა, ვერც ამერიკელმა, ვერც ჩინელმა, ვერც თურქმა, ვერც ირანელმა და ვერც სხვამ იბატონოს ჩვენზე. არ მჭირდება ისეთი მთავრობა, რომელიც ვიღაცის მონა-მორჩილი იქნება, დაუტკაცუნებენ თითს და ისე მოიქცევა. აბა, ამერიკას გაუბედე და მასე გაუკეთე. ძალიან ცუდი მიმართვები გვაქვს - ჩვენ ევროპასთან, ევროპას ჩვენთან, ჩვენ ამერიკასთან, ამერიკას ჩვენთან და საბოლოოდ რა მივიღეთ? რაღაც კინკლაობაში გადავიდა, რა. და ვინ გაიხარებს ამით? - გინდა არ გინდა, ეს უცხოეთი რუსის საქმეს აკეთებს, ამის შემდეგ, რაც არ უნდა თქვან ახლა,“ - განაცხადა მეუფე იაკობმა. მისივე განცხადებით, ევროკავშირის კანდიდატის სტატუსის მიღების საკითხი „ჭირი გაგვიხდა“ და ამ საკითხს „რევოლუციისთვის იყენებენ“. „ამ ევროკავშირის კანდიდატობაც ჭირი გაგვიხდა ჩვენ, რა. იყენებ ამას. რა თქმა უნდა, ქართველ კაცს უნდა წესიერი და კარგი ცხოვრება. არ მიგიღებენ და პრობლემას გიქმნიან - რუსული მთავრობა, რუსული ეს, თვითონ რუსები, რა. კომუნისტური მოლდოვა, კორუფციაში ჩამხრჩვალი უკრაინა მიიღეს, თუმცა უკრაინა ომის მდგომარეობაშია. მიიღონ არავისი არ გვშურს, მაგრამ ჩემთან რევოლუციურ სცენარს რატომ მიწერ თუ არ მინდა?!“ - განაცხადა მეუფემ. როგორც მეუფე იაკობი აღნიშნავს, ამერიკულმა და ქართულმა მხარემ ერთმანეთთან უნდა მოილაპარაკონ და წყენები უნდა დაივიწყონ. „მე ვფიქრობ, რომ სრულიად საკმარისია. ამერიკელებმა და ჩვენებმა დროზე დაილაპარაკონ, რაც იყო იყო. ის წყენები უნდა დაივიწყო, იმიტომ რომ წინ უფრო დიდი რაღაცებია. ერთი რამე იცოდნენ, საქართველოს არავისთან არ უნდა ცუდი ურთიერთობა. თუ დახმარება უნდათ, არა თუ კანდიდატად უნდა მიგიღონ, არამედ მიგიღონ ევროკავშირში, რა. პოლარიზება ხომ დამთავრდება“, - განაცხადა მეუფე იაკობმა. იპნ

პარლამენტის ადამიანის უფლებათა დაცვისა და სამოქალაქო კომიტეტის თავმჯდომარე მიხეილ სარჯველაძე ოპოზიციის მიერ ინიცირებული საგამოძიებო კომისიის შექმნის მომხრე არაა და ამბობს, რომ პარლამენტი არაა ადგილი, სადაც სასამართლო ხელისუფლების თანამდებობის პირების ქმედებათა კანონიერებაზე უნდა იმსჯელოს. როგორც სარჯველაძემ ჟურნალისტებს განუცხადა, თუ რაიმე სასანქციო პირობა არსებობს, საზოგადოება უფლებამოსილია ინფორმაცია ჰქონდეს. „მხოლოდ ღია წყაროებით გასული ინფორმაცია, სადაც არასამთავრობოების კრიტიკას ვისმენთ ცალკეული მოსამართლეების ან სასამართლო სისტემაში შესაძლო არსებული პრობლემების შესახებ, საკმარისი არ იქნება და რა თქმა უნდა, საზოგადოება უფლებამოსილი და ღირსია, გაიგოს, რა იყო ამ გადაწყვეტილების მიზეზი ან წინაპირობა. რაც შეეხება საკითხს, რომ საგამოძიებო კომისია ჩამოყალიბდეს, ეს აზრი არ მომწონს. პარლამენტი არ არის ადგილი, რომელმაც სასამართლო ხელისუფლების თანამდებობის პირების ქმედებათა კანონიერებაზე იმსჯელოს და რეაგირება მოახდინოს. ეს დააკნინებს სასამართლო ხელისუფლების დამოუკიდებლობის პრინციპს. სასამართლო ხელისუფლება ყოველთვის უნდა იყოს დამოუკიდებელი აღმასრულებელი და საკანონმდებლო - პოლიტიკური ხელისუფლებისგან“, - განაცხადა მიხეილ სარჯველაძემ. მისივე თქმით, ამერიკის შეერთებული შტატების გადაწყვეტილების მიზეზი ახსნილი უნდა იყოს, რადგან საზოგადოებაში პასუხგაუცემელი კითხვებია. „როდესაც კონკრეტული პირების წინააღმდეგ გადაწყვეტილება მიიღება, უნდა აიხსნას მიზეზი. უამრავი პასუხგაუცემელი კითხვა დაიბადა საზოგადოებაში, მათ შორის ის, რომ თუ შეერთებულ შტატებში კანონისმიერი მოვალეობაა, რომ ვინც სასამართლო ხელისუფლებაში არ მოსწონთ, დაასანქცირონ, რატომ არ იყო გადაწყვეტილება მიღებული 2012 წლამდე სასამართლოზე, რომლის თაობაზეც მთელი ევროპაა შეთანხმებული, რომ მაშინ სასამართლო შეუდარებლად უარესი იყო, ვიდრე დღესაა“, - განაცხადა მიხეილ სარჯველაძემ. გარდა ამისა, კითხვაზე, მოსალოდნელია თუ არა, რომ აშშ-ის გადაწყვეტილებამ კანდიდატის სტატუსის მიღებაზე ნეგატიურად იმოქმედოს, სარჯველაძე ამბობს, რომ „როდესაც სანქციების გამოყენების დროს კონკრეტულ საფუძვლებზე მითითება არ ხდება, არ შეიძლება ამან ნეგატიური გავლენა მოახდინოს ევროკომისიის მიერ მისაღებ გადაწყვეტილებაზე“. „დოკუმენტში, სადაც თითოეული რეკომენდაციის არსია ახსნილი, აღნიშნულია, რომ საქართველოში განხორციელებული რეფორმების ოთხივე ტალღა წარმატებული იყო (ამას არ ერთი ოპოზიციონერი არ აღიარებს და არ ვიცი, ახლა თუ შეცვალეს რიტორიკა). ამიტომ მათ შორის ასეთი ტიპის სამწუხარო გადაწყვეტილება, რომელიც ამერიკის შეერთებული შტატების მიერაა მიღებული, არ მგონია ასახვას პოვებდეს ევროკომისიის საბოლოო გადაწყვეტილებაზე“, - განაცხადა მიხეილ სარჯველაძემ. იპნ

უკრაინის პრეზიდენტი გამოვიდა მოწოდებით შეიქმნას დასავლეთის ძალების კოალიცია, რომელიც კიევს მიაწვდის თანამედროვე საბრძოლო თვითმფრინავებს. ზელენსკის თქმით, მისი ძალები კვლავაც აკონტროლებენ აღმოსავლეთის ქალაქ ბახმუტს, თუმცა ქალაქის დატოვება შესაძლებელი იქნება იმ შემთხვევაში, თუკი ამით უკრაინელი სამხედროების სიცოცხლე გადარჩება. ვარშავაში ვიზიტით მყოფმა ზელენსკიმ 5 აპრილს ისაუბრა პოლონეთის როლზე დასავლეთის ქვეყნების დარწმუნებაში უკრაინისთვის საბრძოლო ტანკების მიწოდების პროცესში და განაცხადა, რომ შესაძლებელია ანალოგიური "თვითმფრინავების კოალიციის" ფორმირებაც. პოლონეთის პრეზიდენტი, ანჯეი დუდა გამოვიდა პირობით, რომ უკრაინას მიაწვდის კიდევ მეტ MiG-29-ის ტიპის საბრძოლო თვითმფრინავს. ვაშინგტონსა და უკრაინის დამხმარე დასავლეთის სხვა ქვეყნებს შორის ჯერჯერობით შეთანხმება არ არის F-16-ის ტიპის საბრძოლო თვითმფრინავების გაგზავნაზე. რადიო თავისუფლება

უკრაინაში ომს კიდევ ერთი ქართველი მებრძოლი შეეწირა. დაღუპული წარმოშობით ზუგდიდელი, არსენ ქეცბაიაა. მისი თანამებრძოლების ინფორმაციით, ქეცბაია უკრაინაში წლების განმავლობაში ცხოვრობდა და უკრაინის შეიარაღებული ძალების ერთ-ერთ ბატალიონში მსახურობდა. რუსეთ-უკრაინის ომს დღემდე 41 ქართველი მებრძოლი ემსხვერპლა. ინტერპრესნიუსი

ჟენევის საერთაშორისო მოლაპარაკებების მორიგ, 57-ე რაუნდზე, სხვადახვა საკითხთან ერთად, მონაწილეებმა აფხაზეთის დე ფაქტო მთავრობიდან, აფხაზური პასპორტებით მსოფლიოში გადაადგილების შესაძლებლობა მოითხოვეს. “მეორე სამუშაო ჯგუფის ფარგლებში ჰუმანიტარული საკითხების განხილვისას, აფხაზურმა მხარემ მორიგ ჯერზე აფხაზური ნაციონალური პასპორტებით მსოფლიოში გადაადგილების შესაძლებლობის მიღების საკითხი დააყენა. ამასთან, განიხილებოდა განათლების წვდომის, სამედიცინო უზრუნველყოფისა და სხვა აქტუალური საკითხები”, – ნათქვამია აფხაზეთის დე ფაქტო საგარეო საქმეთა სამინისტროს განცხადებაში, რომელიც ჟენევაში შეხვედრის შემდეგ გაავრცელეს”. დღეს, აფხაზეთის მოსახლეობას მსოფლიოში გადაადგილება. რუსეთის მოქალაქეობის ქონის შემთხვევაში, რუსული პასპორტებით შეუძლია. ამასთან, ქართული მხარე, აფხაზეთის მოსახლეობას საქართველოს მოქალაქის პასპორტებს სთავაზობს.

კიევისა და სრულიად უკრაინის მიტროპოლიტი ეპიფანე 9 აპრილს, ბზობის დღესასწაულზე კიევ-პეჩერის ლავრაში წირვას აღავლენს. ამის შესახებ ინფორმაციას უკრაინის ავტოკეფალიური ეკლესია (ПЦУ) ავრცელებს. განცხადებაში ნათქვამია, რომ მიტროპოლიტი ეპიფანე ლოცვას აღავლენს სამშობლოს მცველთა, უკრაინის გამარჯვებისა და სრულიად უკრაინული ერისთვის. 29 მარტს ამოიწურა ვადა, რომელიც უკრაინის ხელისუფლებამ მისცა მოსკოვის საპატრიარქოს უკრაინის მართლმადიდებელ ეკლესიას (УПЦ МП) კიევ-პეჩერის ლავრის დასატოვებლად. რუსული პროპაგანდა აღნიშნულს წარმოაჩენს როგორც უკრაინის ხელისუფლების ბრძოლას ეკლესიასთან და ქრისტიანობასთანაც კი. საქართველოშიც ვრცელდება დეზინფორმაცია მოქმედი სამონასტრო კომპლექსის მუზეუმ-ნაკრძალად გადაკეთებისა და იქ ღვთისმსახურების შეწყვეტის შესახებ, რაც სიმართლეს არ შეესაბამება. კიევ-პეჩერის ლავრას ისედაც ეროვნული ნაკრძალის სტატუსი აქვს და უკრაინის სახელმწიფოს საკუთრებაშია. ის მოსკოვის საპატრიარქოს უკრაინული ეკლესიისთვის უსასყიდლოდ სარგებლობაშია გადაცემული 2013 წლის 19 ივლისის ხელშეკრულებით, რომელიც უკრაინამ 29 მარტიდან გააუქმა. უკრაინის ავტოკეფალური ეკლესიის წინამძღოლი, კიევ-პეჩერის მიძინების ლავრის ახალი არქიმანდრიტი, მიტროპოლიტი ეპიფანე ირწმუნება, რომ კიევ-პეჩერის ლავრის ტერიტორიაზე მდებარე მონასტერი არ დაიხურება და ღვთისმსახურების ენა, თანამედროვე უკრაინულთან ერთად, ძველი სლავური იქნება. უკრაინაში ორი მართლმადიდებლური ეკლესიაა: ავტოკეფალური უკრაინის მართლმადიდებელი ეკლესია (ПЦУ) მოსკოვის საპატრიარქოს უკრაინის მართლმადიდებელი ეკლესია (УПЦ МП). УПЦ МП-ის მღვდლებს ახლა კიევ-პეჩერის ლავრას ატოვებინებენ. უკრაინის ერთიანი, ავტოკეფალიური მართლმადიდებელი ეკლესია 2018 წლის 15 დეკემბერს შეიქმნა. ამავე დღეს აირჩიეს წინამძღოლად მიტროპოლიტი ეპიფანე. უკრაინის ეკლესიამ კონსტანტინოპოლის მსოფლიო საპატრიარქოსგან ავტოკეფალიის ტომოსი 2019 წლის დასაწყისში მიიღო. დროთა განმავლობაში უკრაინის ავტოკეფალია აღიარეს ალექსანდრიისა და აფრიკის საპატრიარქოს, ასევე, ელადისა (საბერძნეთის) და კვიპროსის ეკლესიებმა. უკრაინის დამოუკიდებელი ეკლესიის გამოცხადებით ქვეყნის საეკლესიო ცხოვრებაში ახალი, რუსეთისთვის არასასურველი რეალობა დადგა, თუმცა მოსკოვზე დაქვემდებარებულ ეკლესიას არსებობა არ შეუწყვეტია: ომის დაწყებამდე მოსკოვის საპატრიარქოსა და მის მეთაურს, პატრიარქ კირილს, უკრაინის ტერიტორიაზე არსებული 12 000 სამრევლო ექვემდებარებოდა და მოსკოვი განკარგავდა მრავალ ეკლესია-მონასტერს. კიევ-პეჩერის ლავრა, ქვეყნის მთავარი მართლმადიდებლური კომპლექსი, ბოლო დრომდე სწორედ მოსკოვის საპატრიარქოს დაქვემდებარებული უკრაინის ეკლესიის რეზიდენცია იყო. თუმცა 24 თებერვლის შემდეგ სურათმა მნიშვნელოვნად დაიწყო ცვლა: საზოგადოებრივი აზრის გამოკითხვა აჩვენებდა, რომ იმ უკრაინელ მართლმადიდებელთა ნახევარს, რომლებიც ამ დრომდე რუსეთზე დაქვემდებარებული ეკლესიის წევრები იყვნენ, სურდათ, მათ ეკლესიას მოსკოვთან და კირილთან კავშირი გაეწყვიტა. როგორც მრევლის, ისე არაერთი სასულიერო პირის აღშფოთების მიზეზი მოსკოვის პატრიარქის მიერ რუსეთის ომის მხარდაჭერა გახდა. მოსკოვის საპატრიარქოს დაქვემდებარებაში მყოფი ეკლესიის ასობით მღვდელმა მოითხოვა, კირილი საერთაშორისო საეკლესიო ტრიბუნალის წინაშე წარდგეს. ასობით სამრევლომ საერთოდ დატოვა ეს ეკლესია და უკრაინის ავტოკეფალურ ეკლესიაში გადაინაცვლა. ამ ვითარებაში მოსკოვზე დაქვემდებარებულმა უკრაინის მართლმადიდებელმა ეკლესიამ „სრული ავტონომიისა და დამოუკიდებლობის” შესახებ განაცხადა. УПЦ МП-ის წინამძღოლმა, მიტროპოლიტმა ონოფრემ დაგმო რუსეთის აგრესია და აღნიშნა, რომ არ ეთანხმება ომზე მოსკოვის პატრიარქ კირილის პოზიციას. თუმცა უკრაინის ხელისუფლებას, ისევე როგორც ავტოკელაფურ ეკლესიას, ეპიფანეს ხელმძღვანელობით, ამ გამიჯვნის არ სჯერათ. თეოლოგების განმარტებით, ეს უფრო იძულებითი ფორმალობა იყო, ვიდრე ქმედითი ნაბიჯი და ონოფრეს არ გაუწყვეტია რუსეთის ეკლესიასთან ევქარისტული კავშირი. ნეტგაზეთი

მედიის ადვოკატირების კოალიცია გმობს პარლამენტის მიერ ტელეკომპანია „ფორმულას“, „მთავარისა“ და „TV პირველის“ გადამღები ჯგუფებისთვის პარლამენტის აკრედიტაციის შეჩერებას. კოალიციის შეფასებით, აღნიშნული გადაწყვეტილებები სადამსჯელო ხასიათს ატარებს, განსაკუთრებით, „ქართული ოცნების“ მხრიდან კრიტიკული მედიის მიმართ გაცხადებული ბოიკოტისა და პოლარიზებული მედიაგარემოს ფონზე. პარლამენტის აპარატმა „TV პირველის“ გადამღები ჯგუფის წევრებს, ჟურნალისტ რუსუდან დუმბაძესა და ოპერატორ ირაკლი მურმანიშვილს, ასევე „მთავარი არხის“ ჟურნალისტ თათია წოწონავასა და ოპერატორ ზურაბ ჩხვირკიას საპარლამენტო ჟურნალისტის აკრედიტაცია ერთი თვით შეუჩერა. გუშინ, 6 აპრილს ასევე ცნობილი გახდა, რომ იმავე მიზეზით აკრედიტაცია შეუჩერეს „შაბათის ფორმულას“ ჟურნალისტსა და ოპერატორს. პარლამენტის აპარატმა 5 მარტს „პუბლიკის“ ჟურნალისტ ნათია ამირანაშვილსაც შეუჩერა აკრედიტაცია. მისთვის აკრედიტაციის გაუქმება 2 მარტს პარლამენტში გამართულ აქციაში მონაწილეობას უკავშირდება. publika

რა თქმა უნდა, საქართველოს შეუძლია, თავად დაიწყოს გამოძიება ნებისმიერ ინფორმაციასა და ბრალდებაზე, ჩვენ გავაკეთეთ ის, რასაც ამერიკის კანონი გვთხოვს, – ამის შესახებ საქართველოში ამერიკის შეერთებული შტატის ელჩმა, კელი დეგნანმა „იმედთან“ ინტერვიუში სანქცირებულ მოსამართლეებზე საუბრისას განაცხადა. „სავიზო სანქციები, რაც გუშინ გამოცხადდა, მოითხოვება ამერიკის კანონმდებლობის მიხედვით, როდესაც გვაქვს საკმარისი მტკიცებულება, რომ ადამიანები ჩარეული არიან კორუფციულ გარიგებაში. ეს არის საგულდაგულო პროცესი, მოთხოვნა და ვალდებულება, განვახორციელოთ ეს ქმედება, რომელიც განსაზღვრავს ადამიანის უფლებას, შეუძლია თუ არა შევიდეს აშშ-ში. ეს სავიზო სანქციები არ აძლევს ნებას კონკრეტულ ადამიანებს ამერიკაში შესვლის. ეს დაფუძნებულია ინფორმაციაზე, რომელიც საჯაროდ ხელმისაწვდომია და ეს ინფორმაცია და ბრალდებებიც წლების განმავლობაში ცნობილი იყო და ამერიკის კანონი გვთხოვს, რომ როდესაც გვაქვს საკმარისი ინფორმაცია, ასე მოვიქცეთ“, – აღნიშნა ელჩმა. აშშ-მა მიხეილ ჩინჩალაძეს, ლევან მურუსიძეს, ირაკლი შენგელიასა და ვალერიან ცერცვაძეს სანქციები დაუწესა.

საქართველოში აშშ-ის ელჩის, კელი დეგნანის განცხადებით, სანდო მტკიცებულება აქვთ იმასთან დაკავშირებით, რომ მოსამართლეები, რომლებიც აშშ-ის მიერ დასანქცირდნენ, ბოროტად იყენებდნენ უფლებამოსილებას სასამართლო სისტემაში. აღნიშნულის შესახებ კელი დეგნანმა ტელეკომპანია „იმედის“ ეთერში განაცხადა, რომელმაც ჟურნალისტის შემდეგ შეკითხვას უპასუხა: „საინტერესოა პრეცედენტი, სანქცირებული ოთხი ადამიანიდან ერთი მოსამართლე არის ყოფილი მოსამართლე. ვგულისხმობ ვალერიან ცერცვაძეს, რომელიც ექვსი წელია, აღარ არის სისტემაში და თავადაც დაადასტურა ეს. შესაბამისად, მოხდა ყოფილი მოსამართლის სანქცირებაც. ალბათ გადასარევად იცით, როგორი მდგომარეობა იყო 2012 წლამდე სასამართლო სისტემაში, ტელეკომპანია „იმედიც“ კი სწორედ იმ სასამართლოს მეშვეობით მიიტაცა სააკაშვილის ხელისუფლებამ, გარდა იმისა, რომ გამამტყუნებელი განაჩენები 99 პროცენტს აჭარბებდა და სწორედ სასამართლო იყო უმთავრესი ინსტრუმენტი მაშინდელი ხელისუფლების ხელში რეპრესიული რეჟიმისთვის. როგორ ფიქრობთ, რამდენად სამართლიანია, რომ დღეს სანქცირებული არ არიან ადამიანები, რომლებიც ამ სისტემის სათავეში იყვნენ – მაღალჩინოსნები, ვგულისხმობ ადეიშვილს, სააკაშვილს და სხვებს?“ კელი დეგნანის თქმით, მოსამართლეების დასანქცირება კორუფციის წინააღმდეგ ბრძოლის მნიშვნელოვანი ნაწილია. „ჩვენ გვაქვს სანდო მტკიცებულება, რომ ეს ადამიანები ბოროტად იყენებდნენ თავიანთ უფლებამოსილებას სასამრთლო სისტემაში და ამიტომ არის სავიზო სანქციები მათ წინააღმდეგ. ეს არის მნიშვნელოვანი ნაწილი კორუფციის წინააღდეგ ბრძოლისა და საქართველოს დახმარების, მიაღწიოს ნამდვილად დამოუკიდებელ სასამართლო სისტემას. მნიშვნელოვანი პროგრესია მიღწეული და ამერიკა ძალიან ამაყობს, რომ საქართველოს მთავრობასთან იმუშავა სასამართლო რეფორმების ოთხ ტალღაზე, რომელმაც ხელი შეუწყო ეფექტურობის, გამჭვირვალობის გაუმჯობესებას, მაგრამ ჭეშმარიტად დამოუკიდებელი სასამართლოს დაფუძნება უნდა გაგრძელდეს. უნდა გაგრძელდეს შინაარსიანი რეფორმები, რაც ნამდვილად უზრუნველყოფს საქართველოში სასამართლოს დამოუკიდებლობას. იყო ვენეციის კომისიის რეკომენდაციები, ევროპელი სამართლის ექსპერტების რეკომენდაციები პარლამენტისთვის, თუ რა ნაბიჯები უნდა გადაიდგას, რომ სასამართლო რეფორმა გაგრძელდეს, რეალურად დაფუძნდეს დამოუკიდებელი სასამართლო. ბევრი ნაბიჯი გადაიდგა, თუმცა გასულ თვეს ვნახეთ კომისიის რეკომენდაცია, რომ რეფორმები საჭიროა, მათ შორის იუსტიციის უმაღლესი საბჭოში. ნაბიჯები უნდა გადაიდგას და ეს ოთხი ადამიანი იყო ნაწილი იმისა, რაც ხელს უშლიდა ამ რეფორმებს, ნაბიჯებს. ეს არ არის კარგი ქართველებისთვის, რადგან ქართველები იმსახურებენ სამართლიანობას, მიუკერძოებელ სასამართლო სისტემას და ეს ძალიან მნიშვნელოვანია ევროკავშირისა და ნატო-ს წევრობისთვის. სამართლის უზენაესობა, დამოუკიდებელი სასამართლო სისტემა ცენტრალური ნაწილია. სწორედ ამიტომ კორუფციასთან ბრძოლა და სასამართლო რეფორმა არის 12 რეკომენდაციის ნაწილი, რაც ევროპის კავშირმა განსაზღვრა საქართველოსთვის, რათა საქართველომ მიიღოს კანდიდატის სტატუსი. წლების მანძილზე ამაზე მუშაობს საქართველო და შემდგომი ნაბიჯები უნდა გადაიდგას. სავიზო სანქციები არის ამერიკული კანონის შესაბამისად. ქართველი სამართალდამცავების გადასაწყვეტია, დაიწყონ რაიმე სახის გამოძიება“, – განაცხადა დეგნანმა. კელი დეგნანს ჟურნალისტმა ასევე მიმართა: „რამდენჯერმე ახსენეთ, რომ ამ ოთხ ადამიანზე არსებობდა მტკიცებულებები, თუმცა არაერთი მტკიცებულებაა, მათ შორის სააკაშვილსა და ადეიშვილზე, რომელიც არსებობს სტრასბურგის სასამართლოს გადაწყვეტილებების სახით. ამიტომაც ვიკითხე, როდესაც სისტემის შემოქმედებს არ შეეხოთ ეს სანქციები“. კელი დეგნანის განცხადებით, სანქციები განხორციელდა მათ მიმართ, სადაც სანდო ინფორმაცია არსებობდა. „ჩვენ სადაც გვაქვს სანდო ინფორმაცია ამ ოთხი ადამიანის შესახებ, სწორედ მათ მიმართ იყო სანქციები. ეს ბრალდებები ვრცელდებოდა წლების განმავლობაში და ცნობილი იყო კორუფცია სასამართლო სისტემაში და იყო ხელის შემშლელი. იმედი გვაქვს, ხელისუფლების წარმომადგენლები მიიღებენ ამ შესაძლებლობას, წარმოაჩინონ საქართველოს ერთგულება კორუფციასთან ბრძოლაში და გადადგამენ ნაბიჯებს, რათა შექმნან რეალურად დამოუკიდებელი სასამართლოს სისტემა“, – აღნიშნა კელი დეგნანმა. აშშ-მა მიხეილ ჩინჩალაძეს, ლევან მურუსიძეს, ირაკლი შენგელიასა და ვალერიან ცერცვაძეს სანქციები დაუწესა. 1tv

საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი ჯოზეფ ბორელი ოფიციალური ვიზიტით ჩინეთს მომდევნო კვირას ეწვევა. ევროკავშირის საგარეო პოლიტიკური უწყების ხელმძღვანელის პრესსპიკერის, პიტერ სტანოს განცხადებით, ვიზიტი 13 აპრილიდან 15 აპრილამდე გაგრძელდება. რამდენიმე კვირის წინ ბორელმა განაცხადა, რომ ჩინეთმა, როგორც გაერო-ს უშიშროების საბჭოს მუდმივმა წევრმა, უნდა იმოქმედოს საერთაშორისო წესრიგის დასაცავად, მას აქვს მორალური ვალდებულებები და ვერ დადგება აგრესორის მხარეზე. შეგახსენებთ, მიმდინარე კვირაში ჩინეთში ოფიციალური ვიზიტით საფრანგეთის პრეზიდენტი ემანუელ მაკრონი და ევროკომისიის პრეზიდენტი, ურსულა ფონ დერ ლაიენი იყვნენ ჩასულები, რომლებმაც ჩინეთის პრეზიდენტს მოუწოდეს, გამოიყენოს საკუთარი გავლენა რუსეთზე, რათა უკრაინაში ომი დასრულდეს.

გელათის სარეაბილიტაციო, სარესტავრაციო, საკონსერვაციო და სხვა საჭირო სამუშაოებს საქართველოს საპატრიარქო განახორციელებს, – ამის შესახებ ინფორმაციას საქართველოს საპატრიარქოს საზოგადოებასთან ურთიერთობის სამსახური ავრცელებს. მათივე ცნობით, საქართველოს საპატრიარქო აპირებს, შექმნას გელათის რეაბილიტაციის დროებითი კომიტეტი, სადაც ქართველი და საერთაშორისო დონის მოწვეული უცხოელი მეცნიერები ერთმანეთთან ითანამშრომლებენ გელათის საუკეთესო ინტერესების მისაღწევად. „გვსურს, საზოგადოებას ვაუწყოთ, რომ, 2023 წლის 24 თებერვლის შეთანხმების საფუძველზე, საქართველოს საპატრიარქოსა და საქართველოს კულტურული მემკვიდრეობის დაცვის ეროვნულ სააგენტოს შორის ხელი მოეწერა ხელშეკრულებას, რომლითაც გელათის სარეაბილიტაციო, სარესტავრაციო, საკონსერვაციო და სხვა საჭირო სამუშაოებს საქართველოს საპატრიარქო განახორციელებს. საქართველოს საპატრიარქო მსოფლიო მემკვიდრეობის ცენტრის მოთხოვნის და ICOMOS/ICCROM-ის სპეციალისტთა რეკომენდაციების თანახმად (2022 წლის 28 ნოემბერიდან 2 დეკემბრამდე განხორციელებული მისიის ანგარიში), უპირობოდ აპირებს, შექმნას გელათის რეაბილიტაციის დროებითი კომიტეტი, სადაც ქართველი და საერთაშორისო დონის მოწვეული უცხოელი მეცნიერები ერთმანეთთან ითანამშრომლებენ გელათის საუკეთესო ინტერესების მისაღწევად. გადაიხედება და განახლდება გენერალური/მართვის გეგმა. შეიქმნება კონსერვაციის ახალი და მაღალი სტანდარტის საბაზისო დოკუმენტი, რომელიც დაფუძნებული იქნება დეტალურ და სიღრმისეულ კვლევებზე. გელათის ტაძრების მხატვრობის და, პირველ ყოვლისა, ღმრთისმშობლის შობის ტაძრის მხატვრობის გადაუდებელი მდგომარეობის გამო, ორშაბათს, 10 აპრილს გაემგზავრება მხატვრობის კონსერვაციის სპეციალისტთა ჯგუფი, რომელიც დაიწყებს მსოფლიო მემკვიდრეობის ცენტრის, ICOMOS/ICCROM-ის პირველი რეკომენდაციის შესრულებას, ტაძრის მხატვრობის გრაფიკული სქემების შექმნას. საქართველოს საპატრიარქო შექმნის გელათის სპეციალურ ვებგვერდს, სადაც საზოგადოებას მიაწვდის დეტალურ ინფორმაციას, რათა მოქალაქეებს არ შეექმნათ განცდა, რომ ძეგლის მიმართ არ ხორციელდება ყველა დროული და საჭირო ღონისძიება, ხოლო მათ მიმართ არ გაგვაჩნია შესაბამისი პატივისცემა“, – აღნიშნულია ინფორმაციაში.