tvati

დავით კეზერაშვილს ვურჩიე, რომ მისი პოლიტიკიდან შორს ყოფნა კარგი იყო მისთვისაც და ქვეყნისთვისაც, ახლა ვურჩევ მათ, ვინც „გამოსავალს“ ეძებს, მონსტრთან ბრძოლაში მონსტრს არ უნდა დაემსგავსო, – ამის შესახებ „ნაციონალური მოძრაობის“ წევრი ნიკა მელია სოციალურ ქსელში წერს. მელიას თქმით, ადამიანი არ არის დამნაშავე, ვიდრე არ დაადგენს სასამართლო. „ადამიანი არაა დამნაშავე, სანამ არ დაადგენს სასამართლო. ეს უდანაშაულობის პრეზუმფციის ანბანია. ბრიტანეთის სასამართლო არაა თბილისის საქალაქო სასამართლო, რომ ჭეშმარიტება არ დაადგინოს, თუმცა არც BBC-ი არის PosTV. მოკლე კომენტარს გავაკეთებ BBC-ზე გამოქვეყნებულ საგამოძიებო რეპორტაჟთან დაკავშირებით, ვრცლად მოგვიანებით. ერთი წუთით წარმოვიდგინოთ, რომ მსგავსი რეპორტაჟი გაკეთდა ბიძინა ივანიშვილზე – რა იქნებოდა იმ ადამიანების კომენტარები, რომლებიც დღეს „გამოსავალს“, „ახსნასა“ და „განმარტებას“ ეძებენ. შედიან დეტალებში, როდესაც პრობლემა არა დეტალებში, არამედ არსშია. მე დავით კეზერაშვილს ვურჩიე, რომ მისი პოლიტიკიდან შორს ყოფნა კარგი იყო როგორც მისთვის, ისე ქვეყნის მომავლისთვის, ქვეყანაში ავტოკრატიის დემოკრატიით შეცვლისათვის. ახლა კი ვურჩევ მათ, ვინც „გამოსავალსა“ და „ახსნას“ ეძებს: მონსტრთან ბრძოლაში მონსტრს არ უნდა დაემსგავსო. ორმაგი სტანდარტებით მორალური უპირატესობა არ მოიპოვება. ამ ქვეყანაში აუცილებლად გაიმარჯვებს ღირსება და სიმართლე – ამ გამარჯვებას კი სჭირდება მართალი ხალხი, რომელიც სიტუაციას აფასებს ფაქტობრივი მოცემულობიდან და არა – „დავალებიდან“ გამომდინარე. თუ „ქართული ოცნების“ დეპუტატებს ვთხოვთ ან ვთხოვდით, ჰქონოდათ სწორი რეაქცია და ამოსავალი წერტილი ყოფილიყო სწორი და არა – „მოსახერხებელი“ პოზიცია, ამ შემთხვევაში იმავეს ვისურვებდი ნებისმიერისაგან – ჰქონდეთ ისეთივე რეაქცია, როგორიც ექნებოდათ, ეს რეპორტაჟი რომ ნებისმიერ სხვას შეხებოდა“, – წერს მელია. „ბიბისი“ აქვეყნებს ჟურნალისტური გამოძიების მასალებს, სადაც გაშიფრულია ევროპელი პენსიონრების გაძარცვის სქემა, ხოლო თაღლითური სქემის ორგანიზატორად დავით კეზერაშვილია დასახელებული.

მეტი საქმე არ აქვს ბატონ დავით კეზერაშვილს, რომ ქოლცენტერები შექმნას, მისი მუშაობა დააორგანიზოს და ა.შ., – ამის შესახებ „ნაციონალური მოძრაობის“ წევრმა, დევი ჭანკოტაძემ „ბიბისის“ მიერ გავრცელებულ მასალასთან დაკავშირებით განაცხადა, სადაც გაშიფრულია ევროპელი პენსიონრების გაძარცვის სქემა, ხოლო თაღლითური სქემის ორგანიზატორად დავით კეზერაშვილია დასახელებული. ჭანკოტაძის თქმით, „ეს არის ერთ-ერთი მეთოდი, რომ კეზერაშვილის წინააღმდეგ განხორციელდეს საინფორმაციო ომი“. „ეს არის შავი პიარის ერთ-ერთი ნაწილი, რომელიც, ყველანი ვხედავთ, რომ ხორციელდება ბატონი დავით კეზერაშვილის წინააღმდეგ. მეტი საქმე არ აქვს ბატონ დავით კეზერაშვილს, რომ ქოლცენტერები შექმნას, მისი მუშაობა დააორგანიზოს და ა.შ. დავით კეზერაშვილი არის ოპოზიციონერი, ოპოზიციას უჭერს მხარს და ეს არის ერთ-ერთი მეთოდი, რომ მის წინააღმდეგ განხორციელდეს საინფორმაციო ომი“, – განუცხადა ჭანკოტაძემ „რუსთავი 2“-ს.

ამერიკის შეერთებული შტატების პრეზიდენტი ჯო ბაიდენი და გაერთიანებული სამეფოს პრემიერ -მინისტრი რიში სუნაკი ამ წუთებში, ირლანდიის დედაქალაქ ბელფასტში ერთმანეთს ხვდებიან. ამის შესახებ ინფორმაციას „გარდიანი“ ავრცელებს. გამოცემის თანახმად, მოსალოდნელია, რომ ლიდერები უკრაინაში მიმდინარე ომს განიხილავენ. ამ დილით ჟურნალისტებთან გამართულ ბრიფინგზე აშშ-ის ეროვნული უშიშროების საბჭოს ევროპის დირექტორმა, ამანდა სლოატმა, განაცხადა, რომ შეხვედრის მთავარი თემა ჩრდილოეთ ირლანდია იქნება, ისევე როგორც უკრაინის ომი. ცნობისთვის, 11 აპრილს, აშშ-ის პრეზიდენტი ჯო ბაიდენი ჩრდილოეთ ირლანდიას ეწვია. ის ბელფასტში სამშვიდობო შეთანხმების 25 წლის იუბილის აღსანიშნავად ჩავიდა, რომელმაც ჩრდილოეთ ირლანდიაში ძალადობის დასრულებას ხელი შეუწყო. იპნ

რუსეთის ფედერაციის ჯარი აგრძელებს საზარელი ომის დანაშაულების ჩადენას უკრაინაში, - ასე გამოეხმაურა უკრაინის საგარეო საქმეთა სამინისტრო სოციალურ ქსელში გავრცელებულ ვიდეოს, რომელზეც რუსი ოკუპანტების მიერ უკრაინელი სამხედრო ტყვესთვის თავის მოჭრის ფაქტია ასახული. ამასთან, უწყების მიერ გავრცელებულ განცხადებაში ნათქვამია, რომ ეს რუსი ჯარისკაცების მხრიდან უკრაინელი ხალხისა და სამხედრო ტყვეების მიმართ ჩადენილი პირველი სისასტიკე არ არის. უკრაინის საგარეო უწყება საერთაშორისო თანამეგობრობას რეაგირებისა და უკრაინისთვის მხარდაჭერის გაზრდისკენ მოუწოდებს. „უკრაინა შეძრწუნებულია ამ საზარელი ვიდეოთი, რომელშიც რუსი სამხედროები უკრაინელ სამხედრო ტყვეს თავს ჭრიან. რუსი ჯარისკაცები კამერის წინ პოზირებისას განსაკუთრებული ცინიზმით ართმევენ ადამიანს სიცოცხლეს. ეს რუსი ჯარისკაცების მხრიდან უკრაინელი სამხედრო ტყვეებისადმი არაადამიანური მოპყრობის პირველი მაგალითი არ არის. ათასობით შემთხვევა არის აღრიცხული ბუჩაში, ირპენში, ჰოსტომელში, ბოროდიანკაში, ოლენივკაში, მარიუპოლსა და უკრაინის სხვა სოფლებსა და ქალაქებში. რუსეთი განგებ ატარებს წამების, ფიზიკური შეურაცხყოფის, არაადამიანური მოპყრობის, სხეულის სერიოზული დაზიანების, მძიმე ტანჯვის მიყენების და განზრახ მკვლელობის პოლიტიკას მშვიდობიანი უკრაინელებისა და ტყვედ აყვანილი სამხედრო პერსონალის მიმართ. ვიდეოზე გადაღებული უკრაინელი სამხედრო ტყვეს მკვლელობა წარმოადგენს ჟენევის კონვენციების სერიოზულ დარღვევას და წარმოადგენს ომის დანაშაულს უკრაინის სისხლის სამართლის კოდექსისა და რომის საერთაშორისო სისხლის სამართლის წესდების შესაბამისად. რომის წესდების მიხედვით, ასეთი ქმედებები ასევე შეიძლება კვალიფიცირდეს როგორც დანაშაული კაცობრიობის წინააღმდეგ. ჩვენ მოვუწოდებთ საერთაშორისო სისხლის სამართლის სასამართლოს პროკურატურას, დაუყოვნებლივ გამოიძიოს რუსი სამხედროების კიდევ ერთი სისასტიკე უკრაინის ტერიტორიაზე რუსეთის ფედერაციის მოქალაქეების მიერ ჩადენილი ომისა და კაცობრიობის წინააღმდეგ ჩადენილ დანაშაულთა გამოძიების კონტექსტში. ყველა ის პირი, ვინც ჩართული იყო უკრაინაში საშინელ დანაშაულებში, მათ შორის რუსეთის ფედერაციის უმაღლესი ხელმძღვანელობა და უშუალო დამნაშავეები, უდავოდ დაისჯებიან. ჩვენ მოვუწოდებთ საერთაშორისო თანამეგობრობას დაუყოვნებლივ მიიღოს ზომები, რათა გააძლიეროს უკრაინის სამხედრო მხარდაჭერა, რაც ხელს შეუწყობს უკრაინის ხალხის დაცვას რუსული გენოციდისგან და ჩვენი ყველა ტერიტორიის გათავისუფლებას“, - ნათქვამია უკრაინის საგარეო უწყების განცხადებაში. ინტერპრესნიუსი

„ნაციონალური მოძრაობის“ წევრი ლევან ბეჟაშვილი აცხადებს, რომ BBC-ს საგამოძიებო სტატია ქართული სამთავრობო მედიების მიერაა შემოგდებული, რათა „ივანიშვილის ბაობაბების სკანდალი“ და რიკოთზე არსებული ვითარება გადაიფაროს. საუბარია BBC-ის ჟურნალისტური გამოძიებაზე, რომლის თანახმად, საქართველოს ყოფილი თავდაცვის მინისტრი და „ფორმულას“ მფლობელი დავით კეზერაშვილი დაკავშირებულია „ასობით სხვადასხვა საინვესტიციო ბრენდის გლობალურ თაღლითურ ქსელთან“, რომელმაც კლიენტთა მოტყუების გზით მილიარდ დოლარზე მეტი გამოიმუშავა. „ასეთი ინფორმაციები მათ შორის, BBC-ის მიერ გამოქვეყნებული, იყო სხვა დროსაც და ვხედავთ, რომ სამართალდამცავი ორგანოები, მათ შორის ევროპული ქვეყნების, ასეთ ინფორმაციაზე სათანადოდ ვერ და არ რეაგირებენ, ალბათ იმიტომ, რომ შესაბამისი მტკიცებულებები და დასაბუთება არ არსებობს[…] ეს თემაც შემოგდებულია სამთავრობო მედიის მიეს იმისათვის, რომ გადაიფაროს ივანიშვილის ბაობაბების სკანდალი ნიგერიაში[ბაობაბების საქართველოში ექსპორტის შეთანხმებას კენიის პარლამენტში იძიებენ ] და რიკოთზე არსებული კატასტროფული ვითარება, რომელიც „ქართული ოცნების“ პირდაპირი ბრალეული მოქმედებით არის გამოწვეული და სხვა უამრავი საკითხი, მათ შორის სანქცირების საკითხი და ა.შ“, – აცხადებს ლევან ბეჟაშვილი. ნეტგაზეთი

საქართველოს პარლამენტის თავმჯდომარე შალვა პაპუაშვილი ჟურნალისტებთან საუბრისას აცხადებს, რომ იმედი აქვს, დავით კეზერაშვილი საქართველოს გადმოეცემა, რათა თავდაცვის ყოფილმა მინისტრმა სასჯელი მოიხადოს. პაპუაშვილის თქმით, BBC-ს საგამოძიებო სტატია კიდევ ერთი დასტურია იმისა, რაზეც მმართველი პარტია დიდი ხანია საუბრობს. პაპუაშვილი აცხადებს, რომ კეზერაშვილი, რომელიც თავს ევროპულ ქვეყნებს აფარებს, იქიდან გეგმავს საქართველოში არეულობას: „კიდევ ერთხელ მტკიცდება, რასთან გვაქვს საქმე. სამწუხაროდ, ამ ადამიანს, კეზერაშვილს ვგულისხმობ, იფარებს ევროპა და ვხედავთ ჩვენ, იქიდან გეგმავს არეულობას ქვეყანაში. თავადვე აღიარებს, რომ აფინანსებს პოლიტიკურ პარტიებს საქართველოში, მედიებს, არასამთავრობო სექტორს. ადამიანი, რომელმაც ჯერ ჯარს მოჰპარა ფული, შემდეგ ევროპელი პენსიონერები თაღლითური სქემით გაძარცვა, დღეს რომ პირდაპირ ჩართულია ფინანსებით ქართულ პოლიტიკაში, მედიაში და არასამთავრობო სექტორში, ამაზე ვსაუბრობთ სწორედ ჩვენც. სამწუხაროა, რომ ხდება იგივე შეცდომის გამეორება, რა შეცდომაც იყო მიხეილ სააკაშვილთან დაშვებული, როდესაც ის შეფარებული იყო ევროპის ქვეყნებში და იქიდან ურევდა აქ სიტუაციას. ახლა სწორედ დავით კეზერაშვილია შეფარებული ევროპულ ქვეყნებს და იქიდან ურევს სიტუაციას საქართველოში. მე იმედი მაქვს, შეხედავენ სერიოზულად ევროპული ქვეყნები ამ საქმეს და დავით კეზერაშვილი გადმოეცემა საქართველოს, რათა მან მოიხადოს სასჯელი იმ დანაშაულისთვის, რომელიც ჩაიდინა“, — აცხადებს შალვა პაპუაშვილი. „ბი-ბი-სი“-ს ჟურნალისტური გამოძიების თანახმად, საქართველოს ყოფილი თავდაცვის მინისტრი და „ფორმულას“ მფლობელი დავით კეზერაშვილი დაკავშირებულია „ასობით სხვადასხვა საინვესტიციო ბრენდის გლობალურ თაღლითურ ქსელთან“, რომელმაც კლიენტთა მოტყუების გზით მილიარდ დოლარზე მეტი გამოიმუშავა. თავად დავით კეზერაშვილი მის მიერ დაფუძნებულ ტელეკომპანია „ფორმულასთან“ ინტერვიუში ბრალდებებს თაღლითური „ქოლ-ცენტრების“ ოპერირების შესახებ უარყოფდა. დავით კეზერაშვილი საქართველოში ასევე მსჯავრდებულია ე.წ. წვრთნების საქმეზე, რომელზეც ყოფილი თავდაცვის მინისტრი ორი ინსტანციის სასამართლომ გაამართლა, უზენაესმა სასამართლომ კი გამამტყუნებელი განაჩენი გამოიტანა და მას 5 წლით პატიმრობა დაუსწრებლად მიუსაჯა. პროკურატურა ტელეკომპანია ფორმულას დამფუძნებელს ედავებოდა თავდაცვის მინისტრობის პერიოდში საწვრთნელ პროექტებზე 5 მილიონზე მეტი თანხის გაფლანგვას. დავით კეზერაშვილი ამჟამად საქართველოში ფლობს ტელეკომპანია „ფორმულას“ წილის 51%-ს. ნეტგაზეთი

აშშ-ის თავდაცვის სამინისტროდან (პენტაგონი) გამოჟონილი დოკუმენტების თანახმად, სერბეთი დათანხმდა უკრაინისთვის იარაღის მიწოდებას, ან უკვე მიაწოდა კიდეც, იუწყება „როიტერსი“. დოკუმენტის თანახმადვე, ოფიციალურმა ბელგრადმა უარი თქვა უკრაინელი სამხედროების წვრთნაზე, მაგრამ მიაწოდა კიევს იარაღი და აღნიშნა, რომ აქვს პოლიტიკური ნება და სამხედრო შესაძლებლობა, მომავალშიც განაგრძოს მიწოდება. სრულმასშტაბიანი ომის დაწყებიდან, სერბეთი, რომელსაც რუსეთთან ისტორიული, კულტურული და სხვა კავშირები აქვს, საკუთარ ნეიტრალურ პოზიციაზე საუბრობდა. დოკუმენტი, რომელიც 2 მარტით თარიღდება, აშშ-ის შიდა მოხმარებისთვისაა და მისი გადაცემა უცხო ქვეყნებისთვის არ შეიძლება. „როიტერმა“ დოკუმენტის ავთენტურობის დადასტურება ვერ მოახერხა. გარდა ამისა, ამ საკითხზე ჯერჯერობით არ გაუკეთებიათ კომენტარი უკრაინულ, სერბულ და ამერიკულ მხარეს. აგრეთვე, დოკუმენტში აშშ-ის თავდაცვის სამინისტრო ოთხ კატეგორიად ყოფს ქვეყნებს, რომლებსაც შეუძლიათ უკრაინის დახმარება. კერძოდ, ეს კატეგორიებია: ქვეყნები, რომლებმაც დადეს იარაღის მიწოდებისა და უკრაინელი სამხედროების წვრთნის დაპირება; ქვეყნები, რომლებმაც უკვე მიაწოდეს უკრაინას იარაღი; ქვეყნები, რომლებმაც უკვე გაწვრთნეს უკრაინელი სამხედროები; ქვეყნები, რომლებსაც აქვთ სამხედრო შესაძლებლობა და პოლიტიკური ნება მომავალში უკრაინის დახმარებისთვის. მხოლოდ ორ ქვეყანას ჰქონდა შეფასება „არა“ ოთხივე კატეგორიაში – ავსტრიას და მალტას. netgazeti

რიკოთი სატვირთო მანქანებისთვის დღეს, ხოლო მსუბუქი ტრანსპორტისთვის ხვალიდან, 13 აპრილიდან გაიხსნება, – ინფორმაციას ამის შესახებ გზების დეტარტამენტი ავრცელებს. „თბილისი–სენაკი–ლესელიძის საავტომობილო გზის 147-ე კილომეტრთან (ჩუმათელეთი-ხევის მონაკვეთზე) განვითარებული ქვათაცვენის გამო, ფერდის ჩამოწმენდის, გზის სავალი ნაწილის გაწმენდისა და გაფართოების სამუშაოები მთელი ღამის განმავლობაში მიმდინარეობდა. ჩატარებული სამუშაოების შედეგად, დღის მეორე ნახევარში მოძრაობა აღდგება მხოლოდ სატვირთო ავტოტრანსპორტისათვის; ვინაიდან 11 აპრილს ვერ მოხერხდა სატვირთო ავტოტრანსპორტის დადგენილი რეჟიმით გატარება, 12 აპრილს რიკოთის მონაკვეთის გავლით, მთელი დღის და ღამის განმავლობაში, იმოძრავებენ მხოლოდ სატვირთო მანქანები; მსუბუქი ავტოტრანსპორტი 12 აპრილს გადაადგილებას კვლავ გომი-საჩხერე-ჭიათურა-ზესტაფონის მიმართულებით შეძლებს; 13 აპრილის 07:00 საათიდან რიკოთის მონაკვეთზე მოძრაობა აღდგება დაწესებული სპეციალური რეჟიმით, კერძოდ: 07:00 საათიდან 19:00 საათამდე თბილისი-სენაკი-ლესელიძის საავტომობილო გზის 114-ე კმ-დან (ახალსოფლის კვანძი) 194-ე კმ-მდე (ზესტაფონი) გადაადგილება დასაშვები იქნება მხოლოდ მსუბუქი ავტოტრანსპორტისთვის. 21:00 სთ-დან დილის 06:00 სთ-მდე ამავე მონაკვეთზე გადაადგილდებიან მხოლოდ სატვირთო ავტომანქანები. სატვირთო ავტომანქანები გადაადგილდებიან პატრულის მკაცრი ზედამხედველობით, ინტერვალებით, გაუჩერებლად და რევერსულად ანუ ცალმხრივად, მიმართულების შეცვლით”, – წერია განცხადებაში. პუბლიკა

მივმართავ ქალბატონ დეგნანს, დაასანქცირეთ კეზერაშვილი! რეაგირებას ველოდები - ქალბატონო ფოტიგა, რაისა თუ რასა, კუბილიუს ბატონო, შეცდომაში იყავით შეყვანილი, თუ მონაწილე ხართ ამ სქემის, ლობისტური სქემის?! - ასე მიმართავს საერთაშორისო პარტნიორებს საპარლამენტო უმრავლესობის წევრი ირაკლი ზარქუა. ზარქუა BBC-ს მიერ მილიარდ დოლარიან თაღლითურ სქემასთან დაკავშირებით გამოქვეყნებულ საგამოძიებო სტატიას გამოეხმაურა, სადაც დავით კეზერაშვილი ერთ-ერთ მთავარ ორგანიზატორადაა მოხსენიებული. „დარწმუნებული ვარ „ბიბისის" ეს ძიება გაგრძელდება, ოფიციალურ სახეს მიიღებს ეს გამოძიება. მჯერა ბრიტანული გამოძიების და ახლა მივმართავ ქალბატონ დეგნანს, დაასანქცირეთ ეს ადამიანი. ჩვენი მთავარი პარტნიორის, ჩვენი, თქვენი - ამერიკელების პარტნიორია ბრიტანეთი, დასკვნა დაიდო, რომ ეს კაცი არის მძარცველი, ევროპელ პენსიონერებს ძარცვავს და ეს ადამიანი თურმე აქ, საქართველოში მედიებს აფინანსებს თურმე, როგორც თვითონ თქვა, პოლიტიკურ პარტიებს. ქალბატონო კელი, ეს დემოკრატიას არ წაადგება და თქვენ ხომ დემოკრატიას მხარს უჭერთ ჩვენს ქვეყანაში?! ამიტომ მე ველოდები თქვენგან რეაგირებას, ობიექტურ რეაგირებას. ახლა მაინტერესებს, რეზოლუცია რომ მიიღეს, 560 კაცს რომ მოაწერინეს ხელი, ქალბატონო ფოტიგა, კიდევ რომელია რაისა თუ რასა, კუბილიუს ბატონო, ის ვინც თქვენ ქართველებს გამოგვიცხადეთ მედია დევნილი არისო, თურმე თქვენსავე პენსიონერებს ძარცვავს და ეს თქვენმა პარტნიორებმა, ბრიტანელებმა დაადასტურეს. ახლა მაინტერესებს შეცდომაში იყავით შეყვანილი, თუ თქვენც მონაწილე ხართ ამ სქემის, ლობისტური სქემის?! გეკითხებით ბატონო კუბიულიუს, ფოტიგა, ქალბატონო ანა, გამოდით და თქვით, აბა, რომ კეზერაშვილი არის თურმე მედია დევნილი და პოლიტდევნილი სააკაშვილთან ერთად. ხედავთ რა სამარცხვინოები გახდით?! "- განაცხადა ზარქუამ. ამასთან, ზარქუა „ფორმულაზე" მომუშავე ჟურნალისტებსაც მიმართავს. „ის, რაც ჩვენ გუშინ მოვისმინეთ „ბიბისიზე“, კეზერაშვილთან დაკავშირებით, ამას დიდი ხანია „ქართული ოცნება" ვამბობთ. კეზერაშვილის თითოეული თეთრი ეს არის ჩვენი გმირი ბიჭების, სამხედროების ნაძარცვი ფული და შემდეგ ევროპელი პენსიონერების ნაძარცვი ფული. აქ ხომ სიახლე არაფერი ყოფილა, უბრალოდ, ევროპის ერთ- ერთი მნიშვნელოვანი, წამყვანი არხიდან უკვე ჟურნალისტური გამოძიების შედეგად მივიდნენ ამ დასკვნამდე, რომ ხუთი ბიზნესმენი ჩართულია ევროპელი პენსიონერების ძარცვაში. ახლა მაინტერესებს „ფორმულას" წამყვანები რომ არიან, მრავალათასიანი ხელფასებით, 20 ათას ლარზე მეტი რომ აქვთ ყოველ თვე, აბა, რას გვეტყვით? ესეც "ქართული ოცნება" ხომ არ არის, მათი ევროპელი კოლეგები ასკვნიან ჟურნალისტური გამოძიების საფუძველზე, რომ "ფორმულას" დამფუძნებელმა, დამფინანსებელმა გაძარცვა და დღემდე ძარცვავს თურმე პენსიონერებს და ამ ფულით მერე მორალს რომ კითხულობენ ხოლმე", - განაცხადა ზარქუამ. ინტერპრესნიუსი

რა მარტივად კლავენ ეს მხეცები. ეს ვიდეო - უკრაინელი სამხედრო ტყვეს მოკვლა, მსოფლიომ უნდა ნახოს. ეს არის ვიდეო რუსეთზე, როგორიც ის არის, რა სახის ქმნილებები არიან ისინი, - ასე გამოეხმაურა უკრაინის პრეზიდენტი ვოლოდიმირ ზელენსკი სოციალურ ქსელში გავრცელებულ ვიდეოს, სადაც რუსი ოკუპანტები უკრაინელ სამხედროს ტყვეს თავს აჭრიან. ზელენსკის თქმით, ეს არ არის ერთი ეპიზოდი და ერთი შემთხვევა, ეს ვიდეო ასახავს იმას, რაც რუსეთს სურს ნორმად და ჩვევად აქციოს - ადამიანის სიცოცხლის განადგურება. უკრაინის პრეზიდენტმა ყველა ლიდერს მოქმედებისკენ მოუწოდა. „ეს ისეთი რაღაცაა, რისი იგნორირებაც მთელს მსოფლიოში არავის შეუძლია. რა მარტივად კლავენ ეს მხეცები. ეს ვიდეო - უკრაინელი სამხედრო ტყვეს მოკვლა - მსოფლიომ უნდა ნახოს. ეს არის ვიდეო რუსეთზე, როგორიც ის არის, რა სახის ქმნილებები არიან ისინი. არ არსებობს ხალხი მათთვის, შვილი, ძმა, ქმარი, ვიღაცის შვილი. ეს არის ვიდეო რუსეთზე, რომელიც ცდილობს, ეს ახალი ნორმა გახადოს, სიცოცხლის განადგურების ჩვევად აქციოს. ეს არ არის შემთხვევა, ეს არ არის ერთი ეპიზოდი, მსგავსი შემთხვევა ადრეც იყო, ასეთი შემთხვევა იყო ბუჩაში, ათასჯერ. ყველას უნდა ჰქონდეს რეაქცია, ყველა ლიდერს. არ ელოდოთ, რომ ეს დავიწყებას მიეცემა, დრო რომ გავა. ჩვენ არ ვაპირებთ არაფრის დავიწყებას! არც მკვლელების პატიებას ვაპირებთ! ყველაფერს თავისი სამართლებრივი პასუხისმგებლობა მოჰყვება. ტერორის დამარცხება აუცილებელია. ვერავინ ვერ გაიგებს, თუ ლიდერები არ იმოქმედებენ, მოქმედება საჭიროა ახლა. და ჩვენ უკრაინაში ფოკუსირება უნდა მოვახდინოთ ფრონტის ხაზზე იმდენად რამდენადაც ეს შესაძლებელია. დაგვეხმარეთ იმდენად, რამდენადაც შესაძლებელია, რათა განვდევნოთ ოკუპანტი ჩვენი მიწიდან. მთავარი მიზანი გამარჯვებაა. მთავარი მიზანი უკრაინის გაძლიერებაა გამარჯვებისთვის. ოკუპანტის დამარცხება და მკვლელების სამართლებრივ პასუხისგებაში მიცემა. ტრიბუნალი ბოროტი სახელმწიფოსთვის! მუდმივი ხსოვნა ყველა ადამიანის, ვისი სიცოცხლეც რუსულმა ტერორმა იმსხვერპლა! დიდება ყველას, ვინც იბრძვის ამ ბოროტების წინააღმდეგ! დიდება უკრაინას!“- განაცხადა ვოლოდიმირ ზელენსკიმ. იპნ

სახელმწიფო უსაფრთხოების სამსახურის ანტიკორუფციული სააგენტომ ყალბი ვალუტის გასაღების ფაქტზე საქართველოს 4 მოქალაქე დააკავეს.

ჯანდაცვის სამინისტრომ ქირურგიული მომსახურების დროს გამოსაყენებელი სახარჯი მასალების (კორონარული სტენტი, ბროლი, ორთოპედიული ენდოპროთეზი) მინიმალური მოთხოვნები და მახასიათებლები დაამტკიცა. ჯანდაცვის სამინისტროს ინფორმაციით, ცვლილების შედეგად, საყოველთაო ჯანდაცვის სახელმწიფო პროგრამის ფარგლებში სერვისის მიმწოდებელი ყველა სამედიცინო დაწესებულება ვალდებულია, მხოლოდ საერთაშორისო სტანდარტების, FDA, MDR ან CE სერტიფიკატის მქონე მასალები გამოიყენოს. როგორც უწყებაში აცხადებენ, სიახლე პირველი მაისიდან ჩატარებულ ქირურგიულ მომსახურებებზე გავრცელდება. სახარჯი მასალებისთვის ევროპული და ამერიკული სტანდარტების განსაზღვრით, სამინისტრო მოქალაქეებისთვის ხარისხიან სამედიცინო მომსახურებას უზრუნველყოფს. სახარჯი მასალების გარდა, 2023 წელს განისაზღვრება სამედიცინო აღჭურვილობის საერთაშორისო სტანდარტები და რეგულირების საკითხები. 2025 წლიდან კი საყოველთაო ჯანდაცვის სახელმწიფო პროგრამაში ჩართული ყველა სამედიცინო დაწესებულებისთვის სავალდებულო იქნება საერთაშორისო აკრედიტაცია. ჯანდაცვის სამინისტროში აცხადებენ, რომ რეფორმების მიზანი საერთაშორისო სტანდარტების დანერგვა, მოქალაქეებისთვის ხარისხიანი სამედიცინო მომსახურების უზრუნველყოფა და ხარისხის კონტროლის მძლავრი მექანიზმების შექმნაა.

ზაზა ავალიანის მიერ რესპუბლიკური საავადმყოფოს დირექტორის თანამდებობის დატოვების შემდეგ რესპუბლიკური საავადმყოფოს თანამშრომლებმა პროტესტი შეწყვიტეს. აღნიშნულის შესახებ საქართველოს პირველ არხს რესპუბლიკური საავადმყოფოს დირექტორის მოვალეობის შემსრულებელმა, თეა თავართქილაძემ განუცხადა. ამ ეტაპზე, კლინიკის თანამშრომლები რესპუბლიკურ საავადმყოფოსთან დაკავშირებით საექსპერტო დასკვნის პასუხებს ელოდებიან, რომლის მიხედვითაც, საბოლოოდ უნდა გადაწყდეს, რამდენად აუცილებელია კლინიკის შენობის ნაწილის დემონტაჟი. თეა თავართქილაძის ინფორმაციით, კლინიკა ჩვეულ რეჟიმში განაგრძობს მუშაობას. „11 აპრილიდან მე ვასრულებ დირექტორის ფუნქცია-მოვალეობას. რესპუბლიკურ საავადმყოფოში ამ ეტაპზე უწყვეტად მიმდინარეობს კლინიკური პროცესი. სამინისტროს წარმომადგენლები სამუშაო ჯგუფის სახით მოვლინებული არიან კლინიკაში, რომლებიც გვეხმარებიან, ჩართული არიან ლოგისტიკის პროცესში. ძალიან დიდი მხარდაჭერა გვაქვს სამინისტროდან. ამ ეტაპზე შეწყვეტილია პროტესტი, რაც კლინიკის თანამშრომლების მხრიდან იყო. სამინისტრომ დააკმაყოფილა მათი მოთხოვნები. კლინიკა აგრძელებს ჩვეულ რეჟიმში მუშაობას“, – განაცხადა თეა თავართქილაძემ. საქართველოს ჯანდაცვის მინისტრის მოადგილე, ილია ღუდუშაურმა გუშინ განაცხადა, რომ რესპუბლიკური საავადმყოფოს დირექტორმა, ზაზა ავალიანმა თანამდებობა დატოვა. ავტორი - თათია ტაბეშაძე

უკრაინელებმა ომის დაწყების შემდეგ რუსეთის 180 050 ჯარისკაცი გაანადგურეს, მათ შორის 730 - ბოლო დღე-ღამის განმავლობაში, - ამის შესახებ ინფორმაციას უკრაინის შეიარაღებული ძალების გენერალური შტაბი ავრცელებს. ამასთან, უკრაინაში შეჭრის დღიდან რუსების საერთო დანაკარგები მოიცავს: 3 646 ტანკს, 7 043 ჯავშანტექნიკას, 2 770 ერთეულ საარტილერიო სისტემას, 307 საბრძოლო თვითმფრინავს და 293 ვერტმფრენს, 5 630 ავტომობილსა და საწვავის ავზს, 18 გემს/ნავს, 2 334 უპილოტო საფრენ აპარატს, 319 ერთეულ სპეცტექნიკას და 911 ფრთოსან რაკეტას. ipn

შეერთებული შტატები ამაყობს, რომ მხარს უჭერს საქართველოს შრომისმოყვარე, კეთილსინდისიერ, პროფესიონალ მოსამართლეებს, რომლებიც მუდმივად მზად არიან, დაიცვან და აღასრულონ კანონი ქართველი ხალხის საკეთილდღეოდ,- ამის შესახებ საქართველოში აშშ-ს საელჩოს მიერ გავრცელებულ ინფორმაციაშია ნათქვამი. როგორც ინფორმაციაშია აღნიშნული, აშშ-ის საელჩო ხელს უწყობს მოსამართლეებს, გაეცნონ საერთაშორისო გამოცდილებას და უზრუნველყონ ადამიანის ფუნდამენტური უფლებებისა და კანონის უზენაესობის დაცვა სასამართლო დარბაზებში, ეს ყველაფერი კი უფრო დემოკრატიული და თანასწორი საზოგადოების განვითარების წინაპირობაა. „USAID-თან პარტნიორობით, სამოქალაქო და ადმინისტრაციული სამართლის 10 ქართველი მოსამართლე საქმიანი ვიზიტით აშშ-ში იმყოფებოდა. ვიზიტი მიზნად ისახავდა გამოხატვის თავისუფლების ირგვლივ გამოცდილების გაზიარებას. მოსამართლეები დაესწრნენ სასამართლო სხდომებს და შეხვდნენ აშშ-ის სასამართლო ექსპერტებს. ასევე ესტუმრნენ სიტყვის თავისუფლების ინსტიტუტს და ჟურნალისტთა კომიტეტს პრესის თავისუფლებისთვის, რათა მიეღოთ ინფორმაცია გამოხატვის თავისუფლების დაცვისა და იმ გამოწვევების შესახებ, რასაც ჟურნალისტები აწყდებიან. მედიასთან დაკავშირებული სამართლებრივი საკითხების განხილვის მიზნით მოსამართლეები ასევე შეხვდნენ „New York Times"-ის წარმომადგენლებს. მათ, ასევე, შესაძლებლობა ჰქონდათ, დაკვირვებოდნენ დავის განხილვას აშშ-ის ფედერალურ სააპელაციო სასამართლოში და მიეღოთ ღირებული ინფორმაცია სააპელაციო პროცესების შესახებ. სასწავლო ვიზიტისთვის მოსამართლეების შერჩევა საკმაოდ კონკურენტული იყო. ღია კონკურსში მონაწილეობა სამოცმა კანდიდატმა მიიღო. შერჩეული მოსამართლეები საქართველოს შვიდ სხვადასხვა სასამართლოს წარმოადგენენ. გამოხატვის თავისუფლება წარმოადგენს ადამიანის ფუნდამენტურ უფლებას და დემოკრატიის საყრდენს ყველგან. ის ხელს უწყობს ინოვაციას, განათლებას, საზოგადოების ინფორმირებულობას და უმნიშვნელოვანესი წვლილი შეაქვს ადამიანის უფლებების დაცვაში. გამოხატვის თავისუფლების დაცვა, ხშირად, სწორედ სასამართლოს საშუალებით ხორციელდება. შეერთებული შტატები მხარს უჭერს მოსამართლეებს და სამართლის სფეროს სხვა პროფესიონალებს, მიიღონ დასაბუთებული და დამოუკიდებელი გადაწყვეტილებები, რომელიც თავისუფალია ყოველგვარი ზეწოლისა და გარე გავლენისგან“, - აცხადებენ საელჩოში.

BBC-მ მილიარდ დოლარიან თაღლითურ სქემასთან დაკავშირებით საგამოძიებო სტატია გამოაქვეყნა. სტატიაში, რომელიც ეძღვნება უპირატესად საპენსიო ასაკის ადამიანების დანაზოგის თაღლითური გზით მითვისებას, საქართველოს თავდაცვის ყოფილი მინისტრი დავით კეზერაშვილიც არის ნახსენები. BBC-ის ინფორმაციით, სტატიაზე მუშაობისას მათ დაიწყეს საჯაროდ ხელმისაწვდომი კორპორაციული დოკუმენტების შესწავლა სქემაში ჩართული Milton group-ის კომპანიებს შორის კავშირის დასადგენად. სტატიაში ნათქვამია, რომ ამ პროცესში 5 სახელი გამოიკვეთა - დავით თოდუა, რატი ჭელიძე, გურამ გოგეშვილი, ჯოზეფ მგელაძე და მაიკლ ბენიმინი, რომლებიც მითითებულები იყვნენ როგორ Milton-ის სავაჭრო პლატფორმის ან მხარდამჭერი ტექნიკური კომპანიების ხელმძღვანელებად. BBC -მ ამ ადამიანებიდან ოთხს: ჭელიძის, გოგეშვილის, მგელაძისა და ბენიმინის გვარებს „პანამა ფეიფერის“ დოკუმენტებშიც მიაგნო. სტატიაში ნათქვამია, რომ კომპანიები, რომელთა დირექტორებად აღნიშნული პირები არიან დასახელებულები, საქართველოს თავდაცვის ყოფილ მინისტრს, დავით კეზერაშვილს უკავშირდება. ამასთან, სტატიაში ნათქვამია, რომ არ არსებობდა საჯაროდ ხელმისაწვდომი დოკუმენტები, რომლებიც კეზერაშვილს Milton-ის ქსელთან დააკავშირებდა, თუმცა „პანამა ფეიფერის“ დოკუმენტების მიხედვით, ის დასახელებული იყო ქსელში არსებული კომპანიების მშობელი კომპანიების დამფუძნებლად ან ერთ-ერთ საწყის აქციონერად. „კეზერაშვილი იმ ქსელის ცენტრში აღმოჩნდა. როდესაც საქმე „მილტონის ჯგუფს" ეხებოდა, ასევე არ არსებობდა საჯაროდ ხელმისაწვდომი დოკუმენტაცია, რომელიც კეზერაშვილს თაღლითურ კომპანიებთან აკავშირებდა და არ არსებობდა რაიმე მტკიცებულება იმისა, რომ მას რაიმე პირდაპირი ფინანსური ინტერესი ჰქონოდა Milton-ის ბრენდებში. მაგრამ Milton-თან დაკავშირებული კომპანიების რამდენიმე ყოფილმა თანამშრომელმა კონფიდენციალურად გვითხრა, რომ მათ ჰქონდათ პირდაპირი ურთიერთობა კეზერაშვილთან და იცოდნენ, რომ იგი Milton Group-ში იყო ჩართული“,- ვკითხულობთ სტატიაში. სტატიაში ნათქვამია, რომ კეზერაშვილი ხშირად ახდენს თაღლითური სავაჭრო პლატფორმების პოპულარიზაციას სოციალური ქსელის პირად ანგარიშებზე. ასევე, სტატიაში ნათქვამია, რომ LinkedIn-ზე მან გამოიყენა თავისი ანგარიში სამუშაო ადგილების პოპულარიზაციისთვის და მილტონთან დაკავშირებული კომპანიების შესახებ პოსტების გასაზიარებლად. BBC-ის ცნობით, დავით კეზერაშვილმა თავისი ადვოკატების მეშვეობით უკვე უარყო ნებისმიერი კავშირები Milton group-თან და ამ გზით ფინანსური მოგების ქონა, თუმცა გამოცემასთან პირადად გასაუბრებაზე თავი შეიკავა. ipn

შინაგან საქმეთა სამინისტროს სტრატეგიული კომუნიკაციების დეპარტამენტი რიკოთის უღელტეხილის მონაკვეთზე არსებულ ვითარებასთან დაკავშირებით განცხადებას ავრცელებს. „გვსურს, გამოვეხმაუროთ სხვადასხვა მედიასაშუალებაში გასულ ინფორმაციას, თითქოს რიკოთის უღელტეხილის მონაკვეთზე ავტომობილების მოძრაობა რამდენიმე დღის განმავლობაში შეფერხებული იყო. 8 აპრილიდან აღნიშნულ მონაკვეთზე საპატრულო პოლიციის თანამშრომლები საგზაო დეპარტამენტის მიერ დადგენილი რეჟიმების შესაბამისად, შეუფერხებლად უზრუნველყოფდნენ როგორც მსუბუქი, ასევე სატვირთო ავტომობილების გადაადგილებას, მათ შორის, ამავე რეჟიმის შესაბამისად, მისაბმელიანი და ნახევრად მისაბმელიანი სატვირთო ავტომობილები გადაადგილდებოდნენ რევერსულად, საღამოს 21:00 საათიდან დილის 06:00 საათამდე პერიოდში. შესაბამისად, ინფორმაცია იმის შესახებ, რომ აღნიშნულ მონაკვეთში მძღოლებს რამდენიმე დღე უწევთ ლოდინი, არ შეესაბამება სიმართლეს. ამ დროის მონაცემებით, რიკოთის უღელტეხილზე ყველა ტიპის ავტოტრანსპორტისთვის გადაადგილება სრულად აკრძალულია. თბილისიდან დასავლეთის და დასავლეთიდან თბილისის მიმართულებით გადაადგილება მსუბუქი და სამგზავრო ავტოტრანსპორტისთვის შესაძლებელია გომი-საჩხერე-ჭიათურა-ზესტაფონის გზის გავლით, შეუფერხებლად. აღნიშნულ გზაზე გადატვირთული მოძრაობა ამ დროისთვის არ შეინიშნება. საპატრულო პოლიციის წარმომადგენლები, მგზავრთა უსაფრთხოდ გადაადგილების მიზნით, კვლავ რჩებიან ადგილზე და ავტოტრანსპორტის გატარებას უზრუნველყოფენ საგზაო დეპარტამენტის მიერ დაწესებული რეჟიმების მიხედვით“, – აღნიშნულია განცხადებაში.

ყაზახეთი აზერბაიჯანისა და საქართველოს გავლით ნავთობის ექსპორტის გაზრდას გეგმავს. ინფორმაციას ამის შესახებ ყაზახური გამოცემა Kazinform ქვეყნის ვიცე-პრემიერზე, ვაჭრობისა და ინტეგრაციის მინისტრზე სერიკ ჟუმანგარინზე დაყრდნობით ავრცელებს. “გასულ წელს “ყაზმუნაიგაზმა” და “სოკარმა” საბოლოოდ მოაწერეს ხელი შეთანხმებას, 2023 წლიდან ბაქო-თბილისი-ჯეიჰანის მილსადენით 1.5 მილიონი ტონა ნავთობის მიწოდებას ვგეგმავთ. მარტში უკვე დაიწყო პროცესი, პირველი ორი ტანკერი გაიგზავნა - ეს 20 ათასი ტონაა, აპრილისთვის 125 ათასი ტონა არის დაგეგმილი”, - განაცხადა ჟუმანგარინმა. მისი თქმით, ბაქო ნავთობის ტრანსპორტირების სხვა მარშრუტებსაც სთავაზობს. კერძოდ, ბაქო-სუფსას მილსადენის გამოყენებას და რკინიგზით ბათუმისა და ფოთის პორტებში მიწოდებას. მინისტრის თქმით, ყაზახეთის მიერ ახლა ბაქო-სუფსას მილსადენის ტექნიკური მახასიათებლების გამოთვლა მიმდინარეობს. “გუშინ საკმაოდ მკაფიოდ განიხილებოდა გაერთიანებული საწარმოს შექმნის საკითხი, რომელიც ამ სატრანზიტო მარშრუტზე ერთიანი ოპერატორი იქნებოდა, გამჭოლი ტარიფით, ტრანზიტის იაფი შესაძლებლობებით, ინოვაციური ტექნოლოგიების გამოყენებით” , - აღნიშნა ჟუმანგარინმა. ცნობისთვის, 2023 წლის 21 მარტს ყაზახეთმა რუსეთის გვერდის ავლით ისტორიაში პირველად პირდაპირ მიაწოდა ნავთობი აზერბაიჯანს. ინტერპრესნიუსი

აზერბაიჯანსა და სომხეთს შორის შეიარაღებული შეტაკება მოხდა, არიან დაჭრილები და დაღუპულები. ინფორმაციას ამის შესახებ აზერბაიჯანისა და სომხეთის თავდაცვის უწყებები ავრცელებენ. “11 აპრილს, სომხეთის შეიარაღებული ძალების ქვედანაყოფებმა გორუსის რეგიონის დიღის დასახლების მიმართულებით მდებარე პოზიციებიდან ცეცხლსასროლი იარაღის გამოყენებით ინტენსიური ცეცხლი გაუხსნეს ლაჩინის რეგიონის მიმართულებით მდებარე აზერბაიჯანის არმიის პოზიციებს,” - წერს აზერბაიჯანის თავდაცვის სამინისტრო. მათი ცნობით, აზერბაიჯანის შეიარაღებულმა ძალებმა “შესაბამისი საპასუხო ზომები” მიიღეს. მათ ასევე აღნიშნეს, რომ “სომხეთის პროვოკაციის” შედეგად აზერბაიჯანელთა რიგებში არიან დაჭრილები და გარდაცვლილები, მაგრამ რაოდენობა არ დაუკონკრეტებიათ. რაც შეეხება სომხურ მხარეს, სომხეთის თავდაცვის სამინისტრო წერს, რომ “აზერბაიჯანის სამხედრო ქვედანაყოფებმა ცეცხლი გაუხსნეს სომეხ სამხედრო მოსამსახურეებს, რომლებიც საინჟინრო სამუშაოებს აწარმოებდნენ ტეღის დასახლების მიმართულებით“. მათი თქმით, სომეხმა სამხედროებმა სამხედრო საპასუხო ზომები მიიღეს. მათ ასევე აღნიშნეს, რომ სომეხ სამხედროთა შორის არიან დაჭრილები და გარდაცვლილები, მაგრამ რაოდენობა არ დაუკონკრეტებიათ. მოგვიანებით, სომხურმა მხარემ იმავე მიმართულებაზე აზერბაიჯანი ნაღმმტყორცნის გამოყენებაში დაადანაშაულა. მათი თქმით, სომხეთის შეიარაღებული ძალები შესაბამის თავდაცვით ზომებს იღებენ. მოგვიანებით, სომხეთის თავდაცვის სამინისტრომ განცხადება გაავრცელა, რომ ადგილობრივი დროით 19:55 საათისთვის ფრონტის ხაზზე ვითარება “შედარებით სტაბილური” რჩება. იპნ

რიკოთის უღელტეხილზე გზის წმენდა ინტენსიურ რეჟიში მიმდინარეობს. ამის შესახებ საავტომობილო გზების დეპარტამენტის განცხადებაშია ნათქვამი. უწყების ცნობით, რიკოთის უღელტეხილზე, სამუშაოების დასრულებისა და სპეციალისტების მხრიდან გზის უსაფრთხოების შესახებ შესაბამისი რეკომენდაციების მიღებისთანავე, ავტოტრანსპორტის მოძრაობა აღდგება. „საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის ინფორმაციით, თბილისი–სენაკი–ლესელიძის საავტომობილო გზის 147-ე კილომეტრთან (ჩუმათელეთი-ხევის მონაკვეთზე), სპეციალისტების მხრიდან მუდმივი მონიტორინგის პირობებში, გამოვლინდა ადგილი საიდანაც შეიძლებოდა განვითარებულიყო ქვათაცვენა. ავტოტრანსპორტის მოძრაობის უსაფრთხოებიდან გამომდინარე, საავტომობილო გზების დეპარტამენტმა მიიღო გადაწყვეტილება დროებით შეეჩერებინა რიკოთის უღელტეხილზე მოძრაობა. ფერდის არამყარი მასის ჩამოშლის პროვოცირების შედეგად ჩამოსულია მიწის მასა. ამ ეტაპზე მიმდინარეობს გზის წმენდის და გაგანიერების ინტენსიური სამუშაოები. ამ დროისათვის, საერთაშორისო მნიშვნელობის თბილისი–სენაკი–ლესელიძის საავტომობილო გზის კმ114-კმ194 მონაკვეთზე (ახალსოფლის სატრანსპორტო კვანძი-ზესტაფონი) ყველა სახის ავტოტრანსპორტის მოძრაობა დროებით აკრძალულია. რიკოთის უღელტეხილზე, სამუშაოების დასრულებისა და სპეციალისტების მხრიდან გზის უსაფრთხოების შესახებ შესაბამისი რეკომენდაციების მიღებისთანავე, ავტოტრანსპორტის მოძრაობა აღდგება. რიკოთის საუღელტეხილო მონაკვეთზე ავტოტრანსპორტის მოძრაობის აკრძალვის პერიოდში, მსუბუქი ტრანსპორტის მოძრაობა განხორციელდება შიდასახელმწიფოებრივი მნიშვნელობის გომი-საჩხერე-ჭიათურა-ზესტაფონის საავტომობილო გზის გავლით. ხოლო, მისაბმელიანი და ნახევრადმისაბმელიანი ავტოტრანსპორტის მოძრაობა აკრძალულია”, - ნათქვამია ინფორმაციაში.

შეიზღუდოს სამთავრობო ავტომობილების „ბასლაინებში“ გადაადგილება! – ეს ინიციატივა თბილისის საკრებულოს დღევანდელ სხდომაზე საკრებულოს დეპუტატმა გახარიას გუნდიდან გიორგი შარაშიძემ დააყენა. „გარდა იმისა, რომ ავტობუსის ზოლში, ე.წ. ბასლაინში დიდი რაოდენობით ავტომობილების გადაადგილება უსამართლობის განცდას იწვევს თბლისელებში, რომელთაც საათობით უწევთ საცობებში დგომა, უსაფრთხოების კუთხითაც დიდ პრობლემას წარმოადგენს. გასაგებია, რომ სასწრაფო სამედიცინო დახმარებისა და საპატრულო პოლიციის მანქანებს საჭიროების შემთხვევაში უფლება უნდა ჰქონდეთ ბასლაინებით სარგებლობის, მაგრამ მოქალაქეები კარგად ხედავენ, რომ ხშირად ის ავტომობილები, რომლებიც დაუჯარიმებლად გადაადგილდებიან ბასლაინებში, ჩინოვნიკებს ან მათთან დაახლოებული პირებს მიეკუთვნება, რაც მოქალაქეთა შორის უსამართლობის დიდ განცდას იწვევს“, – აღნიშნა საკრებულოს სხდომაზე გამოსვლისას გიორგი შარაშიძემ და იმედი გამოთქვა, რომ ამ ინიციატივას როგორც ოპოზიციის, ისე მმართველი გუნდის მხარდაჭერა ექნება. commersant.ge

"მცირე ქვათაცვენის" შედეგად აღმოსავლეთ და დასავლეთ საქართველო ერთმანეთს მოწყვეტილია და ჯერ კიდევ არ ვიცით, რამდენ თვეში აღდგება მოძრაობა, - ამის შესახებ სოციალურ ქსელში პარტია "საქართველოსთვის" ბათუმის საკრებულოს წევრი აკაკი გვიანიძე წერს. მისი თქმით, ქუჩები და მეტროც პარალიზებულია, იმ სატრანსპორტო კოლაფსის გამო, რაც მერიის მიერ არაკომპეტენტურად დაგეგმილმა და შესრულებულმა სამუშაოებმა გამოიწვია. "დედაქალაქის ქუჩები და მეტროც კი პარალიზებულია, იმ სატრანსპორტო კოლაფსის გამო, რაც მერიის მიერ არაკომპეტენტურად დაგეგმილმა "მცირე ცვლილებებმა" და "მცირე სარეაბილიტაციო სამუშაოებმა" გამოიწვია. მერმა კალაძემ, წინასწარ ვამბობთ, მდგომარეობა კიდევ უფრო გაუარესდება და უნდა გაიგოთო. რამ გამოიწვია ეს ყველაფერი? კორუფციას, ნეპოტიზმის, არაკომპეტენტურობას, პროფესიონალების ქვეყნიდან გადინებას დაემატა ავტორიტარიზმის მშენებლობის მცდელობა, ბიძინა ივანიშვილის მილიარდებისა და მურუსიძე - ჩინჩალაძის კრიმინალური სინდიკატის გადარჩენაზე მთელი რესურსების მიმართვა. დროა წერტილი დავუსვათ არაკომპეტენტურ ავტორიტარიზმს!", - წერს აკაკი გვიანიძე.

კენიის პარლამენტის გარემოს დაცვის, ტყისა და მადნის კომიტეტმა საქართველოში ბაობაბების ექსპორტის საკითხის შესწავლა დაიწყო. კომიტეტის წევრებმა მოინახულეს ადგილები, სადაც საექსპორტო მიზნებისთვის რვა ბაობაბი ამოიღეს მიწიდან. ხეები ამჟამად ამოთხრილია და საექსპორტოდაა გამზადებული. ფაქტების შესასწავლად კომიტეტის წინაშე კენიის სატყეო სამსახურის, კენიის ტყეების შემსწავლელი ინსტიტუტისა და გარემოს მართვის ეროვნული სააგენტოს წარმომადგენლებიც წარდგნენ. მათი მიზანია, გამოიკვლიონ თითოეული ამ უწყების როლი ბაობაბების გაყიდვის საქმეში. როგორც კენიის პარლამენტის პრესსამსახური აცხადებს, დეპუტატები მიიჩნევენ, რომ სატყეო სამსახურს გადაწყვეტილება ადგილობრივი მოსახლეობის ჩართულობით უნდა მიეღო. თავის მხრივ, სატყეო სამსახურის წარმომადგენლის ჯეიმს მუამოდენაის განცხადებით, როცა მათ ბაობაბების გაყიდვის შესახებ გაიგეს, ხეები უკვე ამოთხრილი იყო. „მაშინვე, როცა ეს ამბავი გავიგეთ, ჩვენ დავიწყეთ საკითხის მოკვლევა და შეგვატყობინეს, რომ ხეები საქართველოში შეკვეთილის ბოტანიკური ბაღისთვის იყო განკუთვნილი. ბაობაბები განთავსდებიან სექციაში, სადაც წარმოდგენილია ხეები მსოფლიოს სხვადასხვა კუთხიდან“, – განაცხადა მუამოდენაიმ. კენიის ტყეების შემსწავლელი ინსტიტუტის მკვლევარმა, ლინუს ვეკესამ კი განაცხადა, რომ ბაობაბი არ არის შეტანილი გადაშენების საფრთხის წინაშე მყოფი მცენარეების სიაში და სადაც ისინი ამოთხარეს, იმ ტერიტორიაზე მათ გადაშენება არ ემუქრებათ. ამიტომ კონსერვაციის კუთხით, გადაწყვეტილება პრობლემური არ იყო. თუმცა გარემოს მართვის სააგენტოს წარმომადგენლის აზრით, იმის მიუხედავად, რომ ბაობაბებს გადაშენება ჯერჯერობით არ ემუქრება, მაინც საჭიროა მათ დასაცავად კანონმდებლობის შემუშავება. კენიის პარლამენტის პრესსამსახურის განცხადებით, გარემოს დაცვის კომიტეტი ფაქტების შესწავლის შემდეგ ანგარიშს მოამზადებს და პარლამენტს დებატებისთვის წარუდგენს. კომიტეტის თავმჯდომარემ ჯეიმს კამურენმა განაცხადა, რომ თუკი გამოიკვეთება დანაშაულის ნიშნები ოფიციალური პირების მხრიდან, მათ პასუხიც უნდა აგონ. როგორც ადგილობრივი მედია წერს, ადგილობრივი ფერმერები ბაობაბების გაყიდვიდან მიღებულ მცირე თანხებზეც ჩივიან. კილიფის მხარის ქალთა წარმომადგენლის გერტრუდ მბეიუს თქმით, ფერმერები ამბობენ, რომ თითოეულ ხეში დაახლოებით 100 000 კენიური შილინგი მიიღეს, რაც დაახლოებით 750 დოლარის ტოლია. არადა, ქართული მხარე აცხადებდა, რომ მათ თითოეულ ხეში „მილიონები გადაიხადეს“. საქართველოში შეკვეთილის დენდროლოგიური პარკისთვის ბაობაბების შეძენაზე ინფორმაცია 2022 წლის ნოემბერში გავრცელდა. ამის შემდეგ კენიის პრეზიდენტმა ბაობაბების გაყიდვის ლიცენზია შეაჩერა და ფაქტის სასწრაფოდ გამოძიება მოითხოვა, მაგრამ თებერვალში მთავრობამ მათი ექსპორტი ხელახლა დაუშვა. პუბლიკა

რუსმა „აქტივისტმა“, „უსაფრთხოებისა და კორუფციასთან ბრძოლის ფედერალური პროექტის“ ხელმძღვანელმა გენერალურ პროკურორს, იგორ კრასნოვს მსახიობ ლია ახეჯაკოვას წინააღმდეგ სისხლის სამართლის კოდექსის რამდენიმე მუხლით საქმის დაწყების მოთხოვნით მიმართა. რუსული მედიის ცნობით, ბოროდინმა განაცხადა, რომ ახეჯაკოვა აკრიტიკებს „სახელმწიფო ორგანოებისა და რუსეთის პრეზიდენტის მიერ მიღებულ გადაწყვეტილებებსა და პოლიტიკას უკრაინაში მიმდინარე სპეცოპერაციასთან დაკავშირებით“ და თითქოს უკრაინის შეიარაღებულ ძალებს აფინანსებს. რასაც უარყოფს თავად ლია ახეჯაკოვა. ბოროდინმა ლია ახეჯაკოვას წინააღმდეგ სისხლის სამართლის საქმის აღძვრა ღალატის, რუსული არმიის „დისკრედიტაციის“, ასევე სიძულვილისა და შუღლის გაღვივების მუხლებით მოითხოვა. ის ახეჯაკოვას „უცხო აგენტად“ გამოცხადებასა და სახელმწიფო ჯილდოებისა და წოდებების ჩამორთმევასაც მოითხოვს. ახეჯაკოვას ამის შესახებ კომენტარი არ გაუკეთებია. ლია ახეჯაკოვა უკრაინაში რუსეთის ომის წინააღმდეგ გამოდიოდა. ვიტალი ბოროდინმა კი ახეჯაკოვამდე ვალერი მელაძე და სხვა არტისტებიც დაასმინა, მათი ანტისაომარი რიტორიკისა და უკრაინაში რუსეთის შეჭრის კრიტიკის გამო. პუბლიკა

პარლამენტის იურიდიულ საკითხთა კომიტეტი, 12 აპრილის სხდომაზე, “დეოლიგარქიზაციის შესახებ“ კანონის პროექტის კორექტირებულ ვარიანტს განიხილავს. ხვალ გახდება ცნობილი, ვენეციის კომისიის რეკომენდაციების საფუძველზე როგორ შეიცვლება პროექტი და რა ცვლილებები აისახება მასში. ხვალვე, იურიდიულ საკითხთა კომიტეტი “ოლიგარქიული მმართველობის წინააღმდეგ” ფრაქცია “ნაციონალური მოძრაობის“ მიერ შეთავაზებულ პროექტზეც იმსჯელებს. “დეოლიგარქიზაციის შესახებ“ კანონის პროექტი, რომელიც იურიდიულ საკითხთა კომიტეტმა მოამზადა, პარლამენტმა ორი მოსმენით მიიღო, თუმცა მოგვიანებით მესამე მოსმენიდან კვლავ მეორე მოსმენაზე - მუხლობრივ განხილვაზე დააბრუნეს. ამის მიზეზად ვენეციის კომისიის მიერ გამოქვეყნებული დასკვნა დასახელდა. “დეოლიგარქიზაციის შესახებ“ კანონის პროექტი შემუშავებულია ანალოგიური შინაარსის მქონე უკრაინის კანონის მაგალითზე და არსობრივად უკრაინის კანონის ნორმებს იმეორებს. რაც შეეხება ვენეციის კომისიის დასკვნას, მისი შეფასებით, საჯარო განცხადებების ფონზე საქართველოს დეოლიგარქიზაციის კანონპროექტი დიდ რისკს შეიცავს, რომ მიღების შემდეგ იგი ოპოზიციაზე გავრცელდება. ვენეციის კომისიის შუალედურ დასკვნაში აღნიშნავს, რომ დეოლიგარქიზაციის საკითხისადმი ორი მიდგომა არსებობს. პირველია სისტემური მიდგომა, რომელსაც პრევენციული ეფექტი აქვს და ბევრ სფეროს ეხება, მაგალითად მედიასთან დაკავშირებულ კანონმდებლობას, ანტიმონოპოლიას, პოლიტიკურ პარტიებს, არჩევნებს, გადასახადებს, კორუფციისა და ფულის გათეთრების საწინააღმდეგო სფეროებს. მეორეა “პერსონალური” მიდგომა, რომელიც მიზანში იღებს ხალხს, რომლებიც გარკვეული კრიტერიუმების შესაბამისად (სიმდიდრე, მედიის ფლობა) შესაძლოა “ოლიგარქებად” კვალიფიცირდნენ. ასეთი მიდგომა ამ ხალხის მიერ ეკონომიკურ, პოლიტიკურ და საჯარო ცხოვრებაზე გავლენის შესაძლებლობას ზღუდავს. ვენეციის კომისიის დასკვნის თანახმად, “პერსონალურ” მიდგომას უფრო სადამსჯელო ხასიათი აქვს და ადამიანის რამდენიმე უფლების დარღვევის რისკს იწვევს, თუ სათანადო დონის სასამართლო პროცესის გარანტიები არ არსებობს. ვენეციის კომისია აღნიშნავს, რომ უპირატესობას სისტემურ მიდგომას ანიჭებს, მაშინ როდესაც საქართველოს მიერ წარდგენილი კანონპროექტი “პერსონალურ” მიდგომას ეყრდნობა. “ვენეციის კომისია სისტემურ მიდგომას უფრო ემხრობა, რომელიც კანონმდებლობისა და სხვადასხვა სექტორში მომუშავე ინსტიტუტების გაძლიერებას მოიცავს, და მათ შორის ეფექტური თანამშრომლობისა და ურთიერთდახმარების საშუალებას იძლევა”, - წერია ვენეციის კომისიის დასკვნაში. ვენეციის კომისია კატეგორიულად არ უარყოფს “პერსონალური” მიდგომის ყველა ელემენტს, მაგრამ აღნიშნავს, რომ ასეთი მიდგომა მყარ პროცედურულ გარანტიებს საჭიროებს, რათა ადამიანის უფლებებისა და კანონის უზენაესობის დარღვევების პრევენცია მოხდეს. “ზემოთ ჩამოთვლილი საკითხებისა და მაღალი რისკების გათვალისწინებით, ვენეციის კომისია მიიჩნევს, რომ [საქართველოს] კანონპროექტში მიღებული “პერსონალური მიდგომა”, რომელიც გაურკვეველი კრიტერიუმების საფუძველზე განსაზღვრავს პირებს და მათ სტიგმატიზაციას ახდენს, დიდ რისკს მოიცავს, რომ დასახული მიზნების მიღწევის ნაცვლად მოხდება ადამიანის უფლებების დარღვევა. კანონის თვითნებური გამოყენების რისკი კიდევ უფრო მაღალია საჯარო განცხადებების ფონზე, რაც მიუთითებს იმაზე, რომ მიღების შემდეგ იგი ოპოზიციაზე გავრცელდება”, - წერია დასკვნაში. ipn