tvati

მესამე წელია, საქართველოში აშშ-ის ელჩის პოზიციას კელი დეგნანი იკავებს. მას ვადა მალე ეწურება, თუმცა სწორედ მის ელჩობას დაემთხვა აშშ-ის გადაწყვეტილება, რომელიც უკანასკნელ დღეებში ერთ-ერთი მთავარი თემაა როგორც ქართული პოლიტიკური სპექტრისთვის, ისე მედიისთვის: სახელმწიფო დეპარტამენტმა 4 ქართველი მოსამართლე დაასანქცირა. 12 აპრილს ჩაწერილი ინტერვიუს დიდი ნაწილიც სწორედ სანქციებსა და ქართულ მართლმსაჯულებას ეხება, თუმცა “ნეტგაზეთმა” ელჩს არაერთი კითხვა დაუსვა სხვა პროცესებზეც, მათ შორის, მმართველი პარტიის ხისტ რიტორიკასა და კონსპირაციულ თეორიებზე, ქართულ მედიაგარემოზე და ევროკავშირის კანდიდატის სტატუსზე, რომელთან დაკავშირებით პასუხსაც, საქართველოს გარდა, მისი სტრატეგიული პარტნიორი აშშ-ც ელის. ქალბატონო ელჩო, უკანასკნელი ახალი ამბებით დავიწყოთ: BBC-ის ჟურნალისტური გამოძიების თანახმად, საქართველოს თავდაცვის ყოფილი მინისტრი და ტელეკომპანია “ფორმულას” მფლობელი დავით კეზერაშვილი დაკავშირებულია „ასობით სხვადასხვა საინვესტიციო ბრენდის გლობალურ თაღლითურ ქსელთან“, რომელმაც კლიენტთა მოტყუების გზით მილიარდ დოლარზე მეტი გამოიმუშავა. ინფორმირებული ხართ ამ საკითხზე? და თუ ხართ, რა კომენტარს გააკეთებდით? არ მომცემია საშუალება, მთლიანად წამეკითხა ეს ისტორია და დეტალების შესახებ ინფორმირებული არ ვარ. თუმცა, ისე ჟღერს, რომ ესაა კიდევ ერთი შემახსენებელი, თუ რატომაა ღირებული დამოუკიდებელი საგამოძიებო ჟურნალისტიკისა და დამოუკიდებელი საგამოძიებო ორგანოების ქონა, რომლებიც შეისწავლიან მსგავს ბრალდებებს და უზრუნველყოფენ მოქალაქეების უფლებების დაცვას. მოსამართლეთა სანქცირებაზე ვისაუბროთ: შალვა პაპუაშვილმა თქვენთან შეხვედრის შემდეგ განაცხადა, რომ ელჩმა თქვა, ეს არ არის სანქცია, სავიზო შეზღუდვაო. ირაკლი კობახიძემ განაცხადა, ელჩმა უკან დაიხია და თქვა, ეს სანქცია კი არა, “მოსანქციო” რამ არისო. როგორ უპასუხებთ მმართველი გუნდის ამ კომენტარებს? აშშ-ის კანონმდებლობით საკმაოდ ნათელია, რას ნიშნავს ეს სანქციები და რატომ არის ისინი საჭირო აშშ-ის კანონმდებლობაში, როცა გვაქვს საკმარისი და სანდო მტკიცებულებები, ინფორმაცია, კორუფციულ ქმედებებში მონაწილე პირების შესახებ. არ აქვს მნიშვნელობა, რომელ ტერმინს გამოიყენებ. შედეგები ერთნაირია. ამ პირებს არ აქვთ უფლება, შევიდნენ აშშ-ში. მას შემდეგ, რაც სახელმწიფო მდივანს აქვს საკმარისი, სანდო ინფორმაცია მნიშვნელოვანი კორუფციული ქმედებების შესახებ, შეერთებული შტატების კანონმდებლობით ჩვენ ვალდებულნი ვართ, დავაწესოთ ეს სავიზო სანქციები. ეს ეხება შეერთებული შტატების კანონს, ეს ეხება იმას, თუ ვის აქვს უფლება, შევიდეს აშშ-ში. თუ საქართველოს ხელისუფლებას სურს გადაწყვიტოს ამ ბრალდებებთან დაკავშირებით თავისი, საკუთარი გამოძიების დაწყება საქართველოს კანონმდებლობით, ეს, რა თქმა უნდა, საქართველოს ხელისუფლების პრეროგატივაა. ჩვენ ვიმედოვნებთ, რომ ისინი გამოიყენებენ ამ შესაძლებლობას, რათა წარმოაჩინონ საქართველოს ერთგულება კორუფციასთან ბრძოლაში, კანონის უზენაესობისა და დამოუკიდებელი სასამართლოს დაცვის კუთხით. ეს არის ის, რაზეც ამ მთავრობამ, ამ მმართველმა პარტიამ აწარმოა კამპანია 2011 და 2012 წლებში: კორუფციისგან მართლმსაჯულების გაწმენდა და დამოუკიდებელი სასამართლო სისტემის უზრუნველყოფა. [ამჟამინდელი ხელისუფლება] აკრიტიკებდა კიდეც ზოგიერთ ამ პიროვნებას. შეგვიძლია, ვთქვათ, რომ ის განცხადებები, რომლებიც ვახსენეთ, წარმოადგენს სიტყვებითა და განმარტებებით მანიპულირების მცდელობას მმართველი პარტიის მხრიდან, რათა გადაფაროს ამ სანქციების რეალური მნიშვნელობა? ინგლისურ [ენაში] ძალიან, ძალიან ნათელია, თუ რას წარმოადგენს ეს [სანქციები]. ესაა სანქციები, რომელთა საჭიროებაც დგება კორუფციულ საქმიანობაში მონაწილეობის შესახებ სანდო ინფორმაციის საფუძველზე. სამწუხაროდ, ქართული იმდენად კარგად არ ვიცი, რომ ამ შეკითხვას ქართულად ვუპასუხო, თუმცა ინგლისურად საკმაოდ ნათელია, თუ რას ნიშნავს ეს სავიზო სანქციები, რომელთა შედეგია ის, რომ ეს ადამიანები ვერ შევლენ აშშ-ში. მმართველი გუნდისგან ასევე ისმის შეფასებები, რომ ამ სანქციების უკან კორუფციული პროცესები დგას და სახელმწიფო მდივნამდე ვიღაცამ არასწორი ინფორმაცია მიიტანა. რამდენად რეალურია იმის შესაძლებლობა, რომ ვაშინგტონი რომელიმე დაინტერესებულ მხარეს “შეცდომაში შეეყვანა”? ეს უბრალოდ არაა სიმართლე, ეს [პროცესის] არასწორი დახასიათებაა. ეს პროცესი ძალიან გულმოდგინედ და ყურადღებით [წარიმართება]. სანამ მდივან ბლინკენამდე მივა, ინფორმაცია გულმოდგინედ მოწმდება, რათა დადგინდეს რომ ის არის სანდო და საკმარისია სავიზო სანქციებისთვის. როცა [სახელმწიფო] მდივანი აკეთებს თავის შეფასებას და აცხადებს ამ სანქციების დაწესების შესახებ, ინფორმაცია უკვე საკმაოდ ვრცლად არის მიმოხილული. ხელისუფლება, ასევე მოსამართლეები, არაერთგზის მოითხოვენ თქვენგან მტკიცებულებებს, თუ რის საფუძველზე დაასანქცირეს ეს მოსამართლეები. თქვენ ერთ-ერთ ეთერში აღნიშნეთ, რომ ინფორმაცია, რომლის საფუძველზეც სანქციები დაწესდა, ძირითადად, საჯაროა. ღია წყაროების გარდა, არსებობს თუ არა სხვა მონაცემებიც, რომლებსაც დაეყრდნო აშშ ამ გადაწყვეტილების მიღებისას? სავიზო სანქციები დაფუძნებულია სხვადასხვა წყაროზე. როგორც ვთქვი, მათი უმრავლესობა საჯაროდაა ხელმისაწვდომი. ეს ინფორმაცია და ბრალდებები, წლებია, ცნობილია. აშშ-ში გვაქვს კანონის შესაბამისი პროცესი, რომლითაც ხდება ამ სავიზო სანქციების [დაწესება]… [საქართველოს] მთავრობასთან ერთად ბევრი წელი ვიმუშავეთ მართლმსაჯულების რეფორმის ოთხ ტალღაზე. გვქონდა ძალიან დადებითი და მნიშვნელოვანი პროგრესი, მაგრამ, სამწუხაროდ, ბოლო 4 წელიწადში არის პოლიტიკური ნების ნაკლებობა, გატარდეს მნიშვნელოვანი რეფორმები, რომელიც ამ მართლმსაჯულებას გარდაქმნიდა ჭეშმარიტად დამოუკიდებელ და მიუკერძოებელ მართლმსაჯულებად, რომლის პირობებშიც მოსამართლეებს ექნებათ საშუალება, აღასრულონ კანონი წარმოდგენილი მტკიცებულებების მიხედვით. ძალიან ბევრ ბრწყინვალე მოსამართლეს შევხვდი საქართველოში, მთელი ქვეყნის მასშტაბით. მათი სურვილია აკეთონ თავიანთი საქმე და აღასრულონ კანონი წარმოდგენილი მტკიცებულებებით, პოლიტიკური ჩარევის გარეშე. რეფორმის თვალსაზრისით გადასადგმელია ნაბიჯები, ბევრი მათგანი ნათლადაა წარმოდგენილი ვენეციის კომისიის 5 მოსაზრებაში და სხვა ექსპერტების მიერ. ნათელია, რა ნაბიჯები უნდა გადაიდგას, რათა მოსამართლეებს ჭეშმარიტად მიეცეთ საქმის კეთების საშუალება, როგორც ეს მათ სურთ. პირადად თუ მოგისმენიათ მოსამართლეებისგან პრეტენზიები მათ საქმიანობაში ჩარევის, დაშინებისა და სხვა მსგავსი პრაქტიკების შესახებ? მოსამართლეებთან ჩემი შეხვედრები ფოკუსირებული იყო მათი საქმიანობის ტექნიკურ ასპექტზე. მეც იურისტი ვარ და ძალიან ვარ დაინტერესებული მათი სამუშაოთი, ჩართულობით საზოგადოებასთან, სასამართლოების მუშაობით საქართველოში და აგრეთვე მსურს გავიგო მათგან, ეხმარება თუ არა მათ აშშ-ის პროგრამები, ან თუ არის სხვა გზები, რომელთა მეშვეობითაც დავეხმარებოდით მართლმსაჯულების სისტემის გაუმჯობესებაში. სპეციფიკური ინფორმაცია, როგორც ვთქვი, საკმაოდაა საჯაროდ ხელმისაწვდომი, მათ შორის, განცხადებები მოსამართლეებისა, რომლებიც თავად გამოვიდნენ და ისაუბრეს სასამართლო სისტემაში არსებულ პირობებზე. არაერთი განცხადება მოვისმინეთ როგორც სანქცირებულ მოსამართლეთა წრიდან, ისე ხელისუფლებიდან, იმის შესახებ, რომ ეს სანქციები აღქმულია სუვერენიტეტის ხელყოფად და ქართული სასამართლოს ხელში ჩაგდების მცდელობად. როგორ უპასუხებთ მსგავს კომენტარებს? ვფიქრობ, ეს ამ სანქციების არასწორი დახასიათებაა. ამ სავიზო სანქციებს მოითხოვს აშშ-ის კანონი. საქმე გვაქვს აშშ-ის კანონთან, თუ ვის შეუძლია აშშ-ში შესვლა. საქმე ეხება არა საქართველოს მართლმსაჯულების სისტემას ან პოლიტიკურ პარტიას, არამედ ამ ოთხ პირს, რომლებიც ჩართულნი არიან კორუფციაში და ბოროტად იყენებენ თავიანთ უფლებამოსილებას, ბლოკავენ საქართველოს მართლმსაჯულების სისტემის ფუნქციონირებას. ისინი ჩართულნი იყვნენ მოსამართლეების კეთილგანწყობის მოპოვებაში ან მათ იძულებაში, რათა [ამ უკანასკნელებს] გადაეწყვიტათ საქმეები [სანქცირებულ პირთა] პოლიტიკური მოკავშირეების სასარგებლოდ; ისინი ჩართულნი იყვნენ სხვა მოსამართლეთა დანიშვნებით ან დისციპლინის [საკითხებით] მანიპულირებაში, რათა მათთვის სასარგებლო შედეგი დამდგარიყო. ეს არის ქმედებები, რომლებმაც ძირი გამოუთხარა სასამართლოს დამოუკიდებლობას და დაბლოკა პროგრესი იმ მიმართულებით, რომელზეც ქვეყანა წლებია მუშაობს, [ანუ] ჭეშმარიტად დამოუკიდებელი და მიუკერძოებელი სასამართლოს შექმნისთვის. ეს ძალიან მნიშვნელოვანია, რადგან ფუნდამენტურად დემოკრატია ეფუძნება და მისი სიძლიერე დამოკიდებულია სასამართლოს დამოუკიდებლობაზე. ვფიქრობ, ბევრჯერ ვიხილეთ, რომ თუ არ გაქვს დამოუკიდებელი და მიუკერძოებელი სასამართლო, საზოგადოებას არ აქვს რწმენა სამართლიან არჩევნებში, იმაში, რომ მიაღწევს სამართალს სასამართლოში, განსაკუთრებით, თუ საქმეში ფიგურირებენ გავლენიანი პირები. ეს ფუნდამენტურია ნებისმიერი დემოკრატიის ფუნქციონირებისთვის. ამიტომაც, ჩვენ მზად ვართ, განვაგრძოთ ეს მუშაობა მთავრობასთან, სასამართლოსთან, იუსტიციის სამინისტროსთან, რათა ვცადოთ, დავეხმაროთ საქართველოს იმაში, რომ გააუმჯობესოს მართლმსაჯულების სისტემა. ესაა საქართველოს პრიორიტეტი და ესაა ჩვენი, როგორც საქართველოს მხარდამჭერის პრიორიტეტი; [ამასთან], ეს არის მოთხოვნა ნატოსა და ევროკავშირის წევრობისთვის და, როგორც ვნახეთ, ესაა ნაწილი 12 პრიორიტეტისა, რომელიც უნდა შესრულდეს, რათა საქართველომ კანდიდატის სტატუსი მიიღოს დეკემბერში — ის, რაც ყველა ჩვენგანს სურს. აშშ-ის მიერ ქართული მართლმსაჯულების რეფორმაში შეტანილი წვლილი ახსენეთ. იქნებ უფრო მეტი ვუამბოთ საზოგადოებას ამ დახმარებაზე, თავისი მასშტაბებით, რიცხვებითა და შინაარსით… ახლა არ მაქვს ზუსტი მონაცემი, მაგრამ ამაზე საქართველოსთან ერთად ვმუშაობთ წლებია, ათწლეულებიც კი. მხარს ვუჭერთ მცდელობებს, გაუმჯობესებდეს სასამართლო. ვმუშაობთ მთავრობასთან, იუსტიციის სამინისტროსთან, სასამართლოებთან, იუსტიციის უმაღლეს საბჭოსთან, იუსტიციის უმაღლეს სკოლასთან… ეს არის ძალიან პოპულარული და წარმატებული პროგრამები, რომელთა ფარგლებშიც ერთმანეთს ვახვედრებთ ამერიკელ და ქართველ მოსამართლეებს, სადაც მათ შეუძლიათ, გაცვალონ აზრები, საუკეთესო გამოცდილება, ისწავლონ ერთმანეთისგან. [ქართველი მოსამართლეები] მიდიან აშშ-ში, რომ ნახონ, როგორ მუშაობს ამერიკული სასამართლო, ამერიკელები კი აქ [ჩამოდიან], რათა ნახონ, როგორ მუშაობს ქართული სასამართლო. სხვადასხვა გზები გვაქვს. ზოგჯერ [მუშაობა] მიდის ძალიან ტექნიკურ საკითხებზე, როგორიცაა სასამართლოს ეფექტიანობის გაუმჯობესება, რათა შემსუბუქდეს დიდი რაოდენობის განსახილველი საქმეებით გამოწვეული წნეხი. ეს ზოგჯერ ანელებს [მოსამართლეთა] შესაძლებლობას, სწრაფად გამოიტანონ გადაწყვეტილება. იყო ბევრი ბრწყინვალე გაცვლითი პროგრამა ნაფიც მსაჯულთა სასამართლოზე, რომლითაც მოქალაქეები უფრო პირდაპირ მონაწილეობენ სასამართლო პროცესში. იყო მუშაობა მედიაციაზეც: მხარეების მედიაციის კონცეფციის დანერგვა, დავის მოგვარება, რაც, როგორც წესი, უფრო სწრაფი [პროცესია] და ხშირ შემთხვევაში უფრო ეფექტურია, ყველა უფრო კმაყოფილია შედეგით. ეს შედეგი კი უფრო სწრაფად დგება და უფრო იაფიცაა. როგორ ფიქრობთ, შეიძლება თუ არა, აშშ-ში შესვლის აკრძალვას სხვა სახის სანქციებიც მოჰყვეს აწ უკვე სანქცირებულ მოსამართლეთა თუ სხვათა მიმართ? ჩვენ წინასწარ არ ვაცხადებთ სანქციებზე. ჩვენ ბევრი საშუალება გვაქვს, რომელთაც ასეთ შემთხვევებში ვიყენებთ და ეს არაა ის, რის წინასწარ გაცხადებასაც ვაპირებ დღეს. ერთსაც დავაზუსტებ სანქციების საკითხზე: წინაა ევროკავშირის პასუხი საქართველოსთვის კანდიდატის სტატუსის მინიჭებასთან დაკავშირებით. როგორ ფიქრობთ, უარყოფითი პასუხის შემთხვევაში მმართველი გუნდი შეეცდება თუ არა ამ უარის დაკავშირებას ფაქტთან, რომ აშშ-მა ქართველი მოსამართლეები დაასანქცირა და ამან ქვეყნის რეპუტაციაზე უარყოფითად იმოქმედა? არ ვფიქრობ, რომ ეს ლოგიკურია. ესაა ძალიან პოზიტიური ნაბიჯი და, როგორც აღვნიშნე, შესაძლებლობა კორუფციასთან ბრძოლისა და დამოუკიდებელი სასამართლოს ჩამოყალიბების კუთხით, რასაც პირდაპირ მოიცავს 12 რეკომენდაცია. ეს არის უზარმაზარი შესაძლებლობა, თუ საქართველოს მთავრობა გადაწყვეტს, რომ აღნიშნული კუთხით შეხედოს ამ [საკითხს]. მე არ მინდა ფიქრი იმაზე, რომ საქართველო დეკემბერში მიიღებს რაიმე სხვა [პასუხს], გარდა ძალიან პოზიტიური შედეგისა. ვფიქრობ, ახლა საქართველოს ყველა პოლიტიკური ლიდერის, ყველას ძალისხმევა უნდა იყოს ფოკუსირებული 12 რეკომენდაციის შესრულებისადმი თავდადების დემონსტრირებაზე, ინკლუზიურად, ჭეშმარიტად ნაყოფიერად, რათა ევროკავშირის წევრ ქვეყნებს არ ჰქონდეთ არანაირი მიზეზი იმისათვის, რომ არ მისცენ [საქართველოს] კანდიდატის სტატუსი და ჰქონდეთ ყველა მიზეზი იმისთვის, რომ მხარი დაუჭირონ საქართველოს ევროკავშირში გაწევრიანების გზაზე. 12 რეკომენდაციიდან ერთ-ერთია დეპოლარიზაცია. მეორე მხრივ, ვხედავთ, რომ “რუსული კანონპროექტის” ჩაგდების შემდეგ მმართველი გუნდის რიტორიკა კიდევ უფრო ხისტი გახდა. გვესმის ტერმინები, როგორებიცაა ლგბტ პროპაგანდა, სატანისტები, ეკლესიის მტრები, ისევე როგორც ლიბერალი ფაშისტები. რას ცდილობს მმართველი პარტია მსგავსი სტილის შეტევით ოპონენტებისადმი? არ მინდა, მმართველი პარტიის სახელით ვილაპარაკო, მაგრამ შემიძლია ვთქვა, რომ ადამიანების სტიგმატიზება და მათთვის იარლიყების მიწებება სრულიად შეუფერებელია. არაერთგზის ვნახეთ, რომ ათობით ათასმა ქართველმა ყველა სფეროდან, ყველა ტიპის [მოქალაქემ], მშვიდობიანად გამოხატა თავისი სურვილი, ძლიერი ნება ევროპული მომავლისა. ეჭვგარეშეა ის, თუ რა სურს საქართველოს მოსახლეობას და მათ არაერთგზის მოჰფინეს ნათელი [ამ სურვილს], მშვიდობიანად გამოხატეს ის თბილისის, ქუთაისის, ბათუმის, სხვა ქალაქების ქუჩებში. ვფიქრობ, ესაა საკვანძო ფაქტორი: საქართველოს მოსახლეობამ ნათლად დააფიქსირა, როგორი მომავალი სურს და ესაა ევროპა. ნებისმიერმა მთავრობამ უნდა უპასუხოს ხალხის ნებას, განსაკუთრებით მაშინ, როცა არა მხოლოდ ცალკეულმა კატეგორიამ, არამედ საქართველოს მოსახლეობის ფართო [წარმომადგენლობამ] მთელი ქვეყნის გარშემო, ნათლად დააფიქსირა თავისი არჩევანი. რუსეთის მიერ უკრაინაში ომის დაწყების შემდეგ, “ქართულმა ოცნებამ” და მასთან ასოცირებულმა პირებმა არაერთი ღიად უხეში პოზიცია დააფიქსირეს საქართველოს მეგობრების, სტრატეგიული პარტნიორების მიმართ. მეორე მხრივ, არაერთხელ გვესმის მტკიცებები “გლობალური ომის პარტიის” არსებობაზე, რომელსაც საქართველოს ომში ჩათრევა სურს. თქვენ ამ მტკიცებებს პირდაპირ უწოდეთ კონსპირაციული თეორიები. თქვენი აზრით, რაში მდგომარეობს აღნიშნული თეორიების მიზანი? არ მინდა, მიზანთან დაკავშირებით სპეკულაციებში შევიდე. ვფიქრობ, რომ [ამ თეორიების] შედეგი ხალხის შეშინებაა. როცა ისეთ მგრძნობიარე სიტუაციაში ხარ, როგორშიც საქართველოა, რომლის ტერიტორიის 20% ისეთი აგრესორის მიერ არის ოკუპირებული, როგორიც რუსეთია, უკვე [ისედაც] არსებობს შფოთისა და შიშის შრე. ჩემთვის კონსპირაციული თეორიები, პროპაგანდა, რომელიც მოწოდებულია ხალხის დაბნევისა და შეშინებისკენ, არის ძალიან სახიფათო და შეუფერებელი. ესაა პროპაგანდა, რომელიც გვესმის რუსეთისგან, რუსეთის დუმის სპიკერისგან, რუსეთის საგარეო საქმეთა სამინისტროს სპიკერისგან ან თავად მინისტრისგან. და როცა [ამ პროპაგანდას] იმეორებენ აქ, თბილისში, ვფიქრობ, საქართველოს ნებისმიერი მოქალაქე შეშფოთებული უნდა იყოს. არანაირი სიმართლის მარცვალი არ დევს მოსაზრებაში, რომ ვინმეს სურს, საქართველო ომში ჩაითრიოს. აშშ, ნატო, ჩვენ ყველაფერს ვაკეთებთ, რაც შეგვიძლია იმისათვის, რომ ეს ომი შეჩერდეს და არ გაფართოვდეს. ჩვენ არასოდეს გვენდომება საქართველოს ჩართვა ომში, იმის სრულად გათვალისწინებით, თუ როგორ დელიკატურ სიტუაციაშია [ეს ქვეყანა]. გაუგებარია, იმ ფონზე, როცა 30 წელია, ვეხმარებით საქართველოს, რათა ააშენოს თავისი საზოგადოება, გააძლიეროს თავდაცვა თავისი საზღვრების უკეთ დასაცავად, გაააქტიუროს თავისი ეკონომიკა, რათა უკეთესი სამუშაო ადგილები შეიქმნას და ხალხმა უკეთესად იცხოვროს… რატომ უნდა დავაყენოთ ეს [ყველაფერი] რისკის წინაშე? რატომ უნდა დავაყენოთ საქართველო რისკის წინაშე? ეს სრულიად გაუგებარია. ნათელია, რომ მსგავსი ბრალდებები უშუალოდ საქართველოს დასავლელი მეგობრების, ზოგიერთი ევროპარლამენტარის, ამერიკელი სენატორის მიმართაც ხმიანდება. შეგვიძლია, ვისაუბროთ მმართველი გუნდის პირდაპირ მცდელობაზე, მოახდინოს დასავლეთის დისკრედიტაცია, რომელიც ხშირად არის კრიტიკული მმართველი პარტიის ზოგიერთი გადაწყვეტილების მიმართ? რაც აქ ვარ, მინახავს რუსული პროპაგანდა სხვადასხვა წყაროდან, რომელიც, ჩემი აზრით, ემსახურება საქართველოსა და აშშ-ის მჭიდრო პარტნიორობისთვის, მეგობრობისთვის, ევროპული მომავლისადმი საქართველოს ერთგულებისთვის ძირის გამოთხრას. სპეკულაციებში არ შევალ – რატომ, მაგრამ კიდევ ერთხელ: საქართველოს მოსახლეობამ არაერთგზის დააფიქსირა, რომ მისი არჩევანი ევროპაა. ესაა ის, რისკენაც საქართველო საუკუნეების მანძილზე მიისწრაფოდა. ეს არ არის ახალი გზა. ეს არის გზა, რომელსაც საქართველო საუკუნეებია მიუყვება. როდესაც ზოგჯერ მესმის, რომ ადამიანები ამბობენ, ევროპული, დასავლური ღირებულებები ქართულ ღირებულებებთან შეუსაბამოაო, არ ვიცი, რაზე ლაპარაკობენ, რადგან საქართველოს ასეულობით წლის მანძილზე ჰქონდა ადამიანის უფლებათა პატივისცემის, დემოკრატიის, თავისუფლების, დამოუკიდებლობის იდეები. ამ ქვეყანამ ძალიან ბევრი იბრძოლა საუკუნეების მანძილზე, რათა დამოუკიდებლობა შეენარჩუნებინა. შთამბეჭდავია, რომ საქართველოს აქვს თავისი ენა, დამწერლობა, ეკლესია, ტრადიციები, კულტურა, მიუხედავად იმისა, რომ მრავალი სხვა კულტურა ტრიალებდა აქ საუკუნეთა მანძილზე. ჩემთვის ეს აჩვენებს, რომ ქართველთა დნმ-ში დევს ძალიან ღრმა სიყვარული და ერთგულება თავისუფლებისადმი, თავიანთი კულტურისადმი, დამოუკიდებლობისა და სუვერენიტეტის შენარჩუნებისადმი. ყველაფერი ის, რაც აშშ-ს უკეთებია საქართველოსთან პარტნიორობის ფარგლებში, წარმოადგენდა მხარდაჭერას საქართველოს თავდადებისადმი თავისი სუვერენიტეტისთვის, ტერიტორიული მთლიანობისთვის და თავისუფლების, დამოუკიდებლობის სიყვარულისთვის. მინდა, დავაზუსტო, რას ნიშნავს აშშ-ის ელჩისთვის, როცა ზემოხსენებული კონსპირაციული თეორიები ესმის არა ცალკეული მარგინალიზებული პოლიტიკოსებისგან, არამედ მმართველი პარტიის წარმომადგენლებისგან? რა თქმა უნდა, ძალიან იმედგამაცრუებელია, როცა გვესმის, როგორ იმეორებენ მმართველი პარტიის წევრები ანტიდასავლურ, პრორუსულ პროპაგანდას. ვფიქრობ, საქართველოს ნებისმიერი მოქალაქე შეშფოთდება ნებისმიერ მომენტში, როცა [ესმით], რომ რუსეთის დუმის სპიკერის მიერ დაწყებულ პროპაგანდას იმეორებენ აქ, თბილისში და განსაკუთრებით, მმართველი პარტიის წევრები. პატიმრობაში მყოფ ექსპრეზიდენტზეც გკითხავთ: მისი დაკავებიდან მეორე დღეს თქვით, რომ სააკაშვილის საქმე ტესტი იქნებოდა ქართული მართლმსაჯულებისთვის. რას ფიქრობთ, როგორ აბარებს ქართული მართლმსაჯულება ამ ტესტს? ჩვენ ძალიან ვართ შეშფოთებულნი სახალხო დამცველის ოფისის ბოლო ანგარიშით, რომელიც მიხეილ სააკაშვილის მდგომარეობის შემდგომ გაუარესებაზე იუწყება. კვლავაც მთავრობის პასუხისმგებლობაა მისთვის[ სააკაშვილისთვის] საჭირო სამედიცინო და ფსიქოლოგიური დახმარების უზრუნველყოფა. მისი კეთილდღეობა და ჯანმრთელობა ხელისუფლების ხელშია. ვფიქრობ, მათ უნდა გადადგან ნაბიჯები მისი ჯანმრთელობის მდგომარეობის გაუმჯობესების უზრუნველსაყოფად. როგორც ზემოთ აღნიშნეთ, პატივს სცემთ საქართველოს მოქალაქეთა ნებას ევროპულ მომავალთან დაკავშირებით და გსურთ, ქვეყანამ დადებითი პასუხი მიიღოს კანდიდატის სტატუსზე. ყოველივე იმის ფონზე, რაზეც ზემოთ ვისაუბრეთ, რამდენად რეალისტურად მიგაჩნიათ კანდიდატის სტატუსი საქართველოსთვის დღეს? ეს დამოკიდებულია საქართველოს მოსახლეობაზე, საქართველოს პოლიტიკურ ლიდერებზე. ვფიქრობ, მათ უნდა აჩვენონ ევროკავშირის წევრ ქვეყნებს, რომ ისინი მართლაც მოწოდებულნი არიან, გააკეთონ, რაც საჭიროა. საგზაო რუკა ნათელია. ამ კითხვაზე პასუხი იქნება ის, თუ რამდენად გულწრფელად იმუშავებენ პოლიტიკური ლიდერები ამ 12 პრიორიტეტის შესრულებაზე. უნდა იყოს ჭეშმარიტად გულწრფელი ძალისხმევა რეფორმისათვის, რადგან ეს საქართველოსთვის [კეთდება]. [საქმე] მხოლოდ ევროკავშირის მოხიბვლას არ [ეხება]. ეს ეხება იმ სახელმწიფოს აშენებას, რომლის სურვილიც ქართველ ხალხს ათწლეულებია გაცხადებული აქვს. რეკომენდაციები, რომლებიც [საქართველოს მიეცა], ახალი არ არის. ესაა ნაბიჯები, რომელთა საჭიროებაც, ვფიქრობ, მმართველმა პარტიამაც აღიარა და ოპოზიციამაც. ყველას თავისი როლი აქვს იმის უზრუნველყოფაში, რომ ევროკავშირის რომელიმე სახელმწიფოს არ დარჩეს ეჭვი, რამდენად იმსახურებს საქართველო კანდიდატის სტატუსს. მე ვფიქრობ, ეს ჯერაც სრულიად შესაძლებელია, მაგრამ ამას სჭირდება საქართველოს პოლიტიკური ლიდერების გაერთიანებული ძალისხმევა, ისევე როგორც მთელი მოსახლეობის მხარდაჭერა. 12 რეკომენდაციის კონტექსტში უნდა გკითხოთ “მთავარი არხის” დამფუძნებელზე, ნიკა გვარამიაზე, რომელიც ციხეში იხდის სასჯელს. როგორ ფიქრობთ, რამდენადაა შესაძლებელი “სათანადო მედიაგარემოს” შესახებ პუნქტის შესრულება გვარამიას გათავისუფლების გარეშე? ჩვენ თავშივე დავსვით შეკითხვები ბატონი გვარამიას საკითხზე, მათ შორის, დაკავების დროის გარემოებაზე, ბრალდებასა და შემდგომში, განაჩენზე. სახალხო დამცველის ოფისმაც გაავრცელა განცხადება და თქვა, რომ ეს იყო პოლიტიკურად მოტივირებული. დამოუკიდებელი მართლმსაჯულება საჭიროა არა მხოლოდ ზოგადი მიზნებისათვის, არამედ იმისათვის, რომ პოლიტიკურ დევნასთან დაკავშირებით კითხვები აღარ გაჩნდეს. თუ გაგაჩნია დამოუკიდებელი სასამართლო, საზოგადოებასაც აქვს ნდობა, რომ ასეთი გადაწყვეტილებები პოლიტიკურად მოტივირებული არ არის. მანამ, სანამ სასამართლოს მიუკერძოებლობასთან დაკავშირებით კითხვები არსებობს, მსგავსი ტიპის საქმეც იარსებებს. კონკრეტულად ეს საქმე გამწვავებულია ფაქტით, რომ ბატონი გვარამია ერთ-ერთი ოპოზიციური მედიის ხელმძღვანელია. ეს თავის მხრივ, კავშირშია ძლიერი დემოკრატიის ერთ-ერთ ძირითად ასპექტთან — მედიის თავისუფლებასთან. საქართველოს ჰქონდა ძალიან ძლიერი მედია. ჩვენ ვხედავთ, რომ სივრცეები ვიწროვდება ბოლო რამდენიმე წლის განმავლობაში, მათ შორის, შემთხვევებით, როგორიცაა ბატონი გვარამიას დაპატიმრება და გასამართლება. ეს უბრალოდ ხაზს უსვამს მედიის თავისუფლების მნიშვნელობას და ჭეშმარიტად დამოუკიდებელი სასამართლოს არსებობის სასიცოცხლო მნიშვნელობას, რათა საზოგადოებას ჰქონდეს ნდობა ამ სასამართლოების მიერ მიღებული გადაწყვეტილებების მიმართ. საქართველოსა და აშშ-ის სამომავლო ურთიერთობებზე ვისაუბროთ. შეიძლება თუ არა, მმართველი გუნდის რიტორიკა, რომლის პირობებშიც, მაგალითად, რუსული სტილის კანონის მიღების მცდელობა ვიხილეთ, აისახოს ამერიკის დახმარებებზე საქართველოსთვის? საქართველოს კვლავაც ძალიან ძლიერი, ორპარტიული მხარდაჭერა აქვს აშშ-ის კონგრესში. ათწლეულებია, კონგრესი ამ დახმარებას უზრუნველყოფს საქართველოსთვის, რადგან ჩვენი მხარდაჭერა მიემართება საქართველოს მოსახლეობას… ყველაფერი ეს კეთდება საქართველოს საზოგადოების ინტერესების, ოცნებების, მოთხოვნების მხარდასაჭერად ძლიერი, დაცული, აყვავებული დემოკრატიის აშენების კუთხით. დარწმუნებული ვარ, კონგრესი კვლავაც ფოკუსირდება საქართველოს დახმარებაზე ყველა შესაძლო გზით და გააგრძელებს [ამ] დახმარების უზრუნველყოფას. მე კონგრესის სახელით ვერ ვისაუბრებ, რადგან ის ხელისუფლების ცალკე შტოს წარმოადგენს, თუმცა ვიცი, რომ საქართველოს მხარდაჭერა, რესპუბლიკელებსა თუ დემოკრატებს შორის, კვლავ ძალაშია. არის გარკვეული შეშფოთება, თუ საით მიდის საქართველო, თუმცა როგორც კონგრესს, ისე სახელმწიფო დეპარტამენტს ესმის, რომ ეს რთული პროცესია. რაც შეეხება აშშ-ისა და საქართველოს ურთიერთობებს: ჩვენ გვაქვს ძალიან ძლიერი პარტნიორობა და გაგვაჩნია ერთად გაკეთებული საქმეების მყარი გამოცდილება ქართველი ხალხის ინტერესებიდან გამომდინარე; იმ ძლიერი საქართველოს ინტერესებიდან გამომდინარე, რომელიც შეძლებს თავისი საზღვრების დაცვას, თავისი ბაზრის დივერსიფიცირებას რუსეთის ბაზარზე დამოკიდებულების თავიდან ასაცილებლად, ისევე როგორც შეძლებს სამუშაო ადგილების შექმნას მეწარმეობითა და შემოქმედებითი ქართველების გამჭრიახობით. როცა საქართველოს გარშემო ვმოგზაურობდი, შევხვდი შესანიშნავ ადამიანებს, განსაკუთრებით, ახალგაზრდებს, რომელთაც დიდებული იდეები აქვთ იმაზე, თუ როგორ უნდა შეიტანონ წვლილი თავიანთი საზოგადოების, ქვეყნის [განვითარებაში]. მე მწამს, რომ კიდევ ბევრი გვაქვს ერთად სამუშაო და შემიძლია, დაგარწმუნოთ, რომ აშშ ზურგს არ შეაქცევს საქართველოს საზოგადოებას. იმედი გვაქვს, რომ საქართველოს პოლიტიკური ლიდერებიც არ შეაქცევენ ზურგს აშშ-ს. დასასრულს, გკითხავთ, პირადად თუ იცნობთ აშშ-ის ახალ ელჩად წარდგენილ რობინ დანიგენს? რა გამოცდილება აქვს მას საქართველოს კონტექსტში, რას ფიქრობს აქაურ პოლიტიკურ კლიმატზე, საქართველოსა და აშშ-ის ურთიერთობებზე… ელჩის პოზიციაზე წარდგენილი [რობინ] დანიგენი ერთ-ერთი საუკეთესო, ძალიან გამოცდილი დიპლომატია. ამჟამად ის არის სახელმწიფო მდივნის თანაშემწის მოადგილე უკრაინისა და აღმოსავლეთ ევროპის საკითხებში. ასე რომ, საკმაოდ კარგად იცნობს ამ რეგიონს, ისევე როგორც ერთ-ერთ ყველაზე რთულ პრობლემას მთელი რეგიონისთვის, ევროპისთვის. ვფიქრობ, ის ძალიან აღფრთოვანებულია საქართველოში ჩამოსვლით და ვფიქრობ, თქვენ ის მოგეწონებათ.

ამასობაში, ტელეგრამის რუსულ არხებზე ვრცელდება ინფორმაცია, რომ მხარეთა (როგორც ჩანს მოლაპარაკებები "წარმატებით" დაასრულეს ჩვენებმა) შეთანხმების საფუძველზე, რუსეთ- საქართველოს შორის, პირდაპირი ფრენები აღდგა, - ამის შესახებ სოციალურ ქსელში, პარტია "საქართველოსთვის" წევრი და დეპუტატი ბექა ლილუაშვილი წერს. როგორც ბექა ლილუაშვილი აღნიშნავს, პირველი ფრენა 18 აპრილს განხორციელდება.

2023 წლის 1-ელ კვარტალში საქართველოში რუსეთიდან ვიზიტორების რიცხვი წინა წლის ანალოგიურ პერიოდთან შედარებით 3.6-ჯერ გაიზარდა. ტურიზმის ეროვნული ადმინისტრაციის ცნობით, გასულ 3 თვეში წინა წლის ანალოგიურ პერიოდთან შედარებით, რუსეთიდან საერთაშორისო ვიზიტორების რაოდენობა 257.7%-ით არის გაზრდილი. უფრო კონკრეტულად, 2023 წლის 1-ელ კვარტალში რუსეთიდან საქართველოს 256 787 ვიზიტორი ეწვია, მაშინ როცა 2022 წლის ამავე პერიოდში ეს მაჩვენებელი 71 793 იყო. აღსანიშნავია ისიც, რომ საერთაშორისო ვიზიტორების რაოდენობის მიხედვით, 2023 წლის 1-ელ კვარტალში ტოპ-15 ქვეყანას შორის რუსეთი 1-ელ ადგილზეა. მას მოსდევს თურქეთი - 216 391 ვიზიტორით, მე-3 ადგილზე კი სომხეთია - 182 543 ვიზიტორით. რაც შეეხება პანდემიამდელ 2019 წლის 1-ლი კვარტალის მაჩვენებელს, რუსეთიდან საქართველოში 254 077 ვიზიტორი შემოვიდა, რაც 2023 წლის ანალოგიური პერიოდის მაჩვენებელზე 1,1%-ით ნაკლებია. ავტორი: თაია არდოტელი

საქართველოს პარლამენტის თავმჯდომარე შალვა პაპუაშვილი ევროპის საბჭოს ვენეციის კომისიას სთხოვს “დეოლიგარქიზაციის შესახებ” კანონპროექტზე მოსაზრება დაჩქარებულ ვადებში შეიმუშაონ. 12 აპრილს პარლამენტის იურიდიულ საკითხთა კომიტეტზე დეოლიგარქიზაციის შესახებ კანონპროექტი მეორე მოსმენით განიხილეს. ვენეციის კომისიის დასკვნის გამო მეორე მოსმენაზე დაბრუნებულ კანონპროექტში რამდენიმე ცვლილება შევიდა. ვენეციის კომისიის პრეზიდენტს, კლერ ბაზი მალორის პაპუაშვილი სწორედ ამ სიახლის შესახებ ატყობინებს და წერილს უგზავნის. “გაცნობებთ, რომ საქართველოს პარლამენტის იურიდიულ საკითხთა კომიტეტმა „დეოლიგარქიზაციის შესახებ“ საქართველოს კანონი მეორე მოსმენით, ვენეციის კომისიის რეკომენდაციების გათვალისწინებით, კიდევ ერთხელ განიხილა. ასევე, გწერთ, რომ გთხოვოთ ვენეციის კომისიის დაჩქარებული მოსაზრება აღნიშნულ კანონპროექტთან დაკავშირებით, რომელიც თან ერთვის ამ წერილს. მოთხოვნილი დასკვნის აქტუალობა დაკავშირებულია ამ კანონის, როგორც ევროკავშირის 12 რეკომენდაციის მნიშვნელოვანი ნაწილის შესრულებასთან, რაც საქართველოს ევროკავშირში კანდიდატი ქვეყნის სტატუსის მინიჭების ერთ-ერთი მთავარი წინაპირობაა. დაჩქარებული მოსაზრების საჭიროება, ასევე, გამომდინარეობს პარლამენტის საგაზაფხულო სესიის მჭიდრო განრიგიდან, რომელიც ივნისში დასრულდება. აქედან გამომდინარე, ქალბატონო პრეზიდენტო, ჩემი თხოვნაა, შეიმუშაოთ დაჩქარებული მოსაზრება ზემოაღნიშნული კანონპროექტის თაობაზე”, – ნათქვამია პაპუაშვილის წერილში ვენეციის კომისიის პრეზიდენტისადმი. ვენეციის კომისიამ 14 მარტს გამოაქვეყნა შუალედური მოსაზრება “დეოლიგარქიზაციის შესახებ” კანონპროექტისადმი, რომელიც საქართველოს პარლამენტმა ევროკომისიის 12 რეკომენდაციის ფარგლებში მოამზადა. “ქართული ოცნების” განცხადებით, კანონპროექტი უკრაინაში მომზადებული დოკუმენტის ანალოგია. ვენეციის კომისიამ დეოლიგარქიზაციის კანონპროექტთან დაკავშირებით განაცხადა, რომ საქართველოდან გაგზავნილი დოკუმენტი პერსონალურ მიდგომებს ეფუძნება და არ არის სისტემურს, რომელიც მოემსახურებოდა ინსტიტუციებსა და საკანონმდებლო ჩარჩოს გაძლიერებას. ვენეციის კომისიის მოსაზრების საპასუხოდ კანონპროექტში ქართველმა დეპუტატებმა გარკვეული ცვლილებები განახორციელეს. ნეტგაზეთი

მთავრობის ადმინისტრაციის შენობის წინ რამდენიმე დღეა, რაც სამშენებლო სამუშაოები მიმდინარეობს. აქ სკვერის მოწყობა იგეგმება. თუმცა, მთავარი დეტალები, მაგალითად, რა დაჯდება მისი მოწყობა, როდის დასრულდება ან როგორი იქნება საბოლოო პროექტი – უცნობია. სკვერის მოწყობის გადაწყვეტილება დროში დაემთხვა სხვადასხვა ჯგუფის მხრიდან გახშირებულ საპროტესტო აქციას მთავრობის ადმინისტრაციის წინ და გააჩინა განცდა, რომ ტერიტორიის შემოღობვით საპროტესტო სივრცეს ართმევენ აქტივისტებსა და ოპოზიციას. შემოღობვამდე დროის მცირე მონაკვეთში მთავრობის ადმინისტრაციასთან არაერთი აქცია გამართეს ვოლტის კურიერებმა, აქონდროპლაზიის მქონე ბავშვთა მშობლებმა, ათორის დაზარალებულმა კლიენტებმა, ლაზარე გრიგორიადისის მხარდამჭერებმა, პოლიტიკურმა პარტიებმა და სხვა. “ქართულ ოცნებაში” ამ მოსაზრებას უარყოფენ და მას მანიპულაციას უწოდებენ. სკვერის მოწყობა ისე დაიწყეს, რომ მერიისგან თანხმობა არ ჰქონიათ, თუმცა, მთავრობას თბილისის მერმა კახა კალაძემ მისცა გარანტია, რომ ამ თანხმობას უწყება აუცილებლად გასცემდა, ეს ასეც მოხდა 10 აპრილს. მერიის პოზიციაა, რომ მათ თანხმობამდე ადგილზე მხოლოდ “მოსამზადებელი სამუშაოები” ჩატარდა და არა ძირითადი. ოფიციალური რენდერების თანახმად, რომელიც თბილისის არიქიტექტურის სამსახურის საიტზე აიტვირთა, სკვერის შიგნით უნდა მოეწყოს ღობე, რომელიც ადმინისტრაციის შესასვლელ ნაწილს შემოღობავს. ოპოზიციაში ამბობენ, რომ ღობის აღმართვას პოლიტიკური მოტივიც აქვს. მათ მიაჩნიათ, რომ რაკი მთავრობის ადმინისტრაცისთან ხშირია საპროტესტო აქციები – ამგვარი სკვერის მოწყობით ხელისუფლება აქციების თავიდან არიდებას ცდილობს. ფოტომონტაჟი: თბილისის არქიტექტურის სამსახურის საიტზე ატვირთული დოკუმენტაცია ნეტგაზეთი 12 აპრილს, მთელი დღის განმავლობაში ელოდებოდა პასუხს მთავრობისგან შემდეგ კითხვებზე: რომელი კომპანია მოაწყობს სკვერს, რა დაუჯდება ის ბიუჯეტს, გამოცხადდა თუ არა შესაბამისი ტენდერი. მთავრობიდან დღის ბოლოს გვიპასუხეს და გვითხრეს, რომ პასუხების მისაღებად საჯარო ინფორმაცია უნდა გამოგვეთხოვა, რასაც სულ მცირე 10 სამუშაო დღე სჭირდება. კითხვებზე არ გვიპასუხა არც ივანე ჯაფარიძემ, მთავრობის ადმინისტრაციის ადმინისტრაციული დეპარტამენტის უფროსმა, რომელიც თბილისის არქიტექტურის სამსახურის საიტზე სკვერის პროექტის დამკვეთადაა მითითებული. „მიმართეთ პრესცენტრს,“ – გვითხრა მან. რატომ არის სკვერის ასე აშენება პრობლემა? თბილისის საკრებულოს წევრი „ნაციონალური მოძრაობიდან“ ირაკლი ნადირაძე ერთ-ერთია, ვინც მთავრობის წინ სკვერის მშენებლობას აკრიტიკებს. ის ამბობს, რომ 7 აპრილს – „ყოველგვარი გაფრთხილებისა და ნებართვის გარეშე“ კანცელარიის მიმდებარე ტერიტორია შემოღობეს და მოსამზადებელი სამუშაოები დაიწყეს. ირაკლი ნადირაძე. ფოტო: საზოგადოებრივი მაუწყებელი მერია სკვერის აშენებამდეც და ნებართვის გაცემის შემდეგაც აცხადებდა, რომ სკვერის მოწყობა I კლასის მშენებლობად ითვლება, შესაბამისად, ნებართვა სავალდებულო არ იყო. თბილისსა და სხვა ქალაქებში კანონი თითოეული შენობის ტიპისთვის სხვადასხვა რეგულაციებს აწესებს. მათგან უმეტესობას მშენებლობის ნებართვა სჭირდება, თუმცა, პირველი კლასის მშენებლობები გამონაკლისია. ამის მიუხედავად, მას მაინც აქვს მკაცრი კრიტერიუმები: I კლასის შენობა-ნაგებობების კლასების მახასიათებლები ნადირაძე მიიჩნევს, რომ ამ შემთხვევაში სკვერის მოწყობა პირველი კლასის მშენებლობა არ არის, რადგან სკვერი შენდება არა მიწაზე ან გრუნტზე, არამედ უკვე არსებული შენობის სახურავზე. „ეს სინამდვილეში არის არსებული შენობის რეკონსტრუქცია – რადგან ხდება რამდენიმე ათწლეული წლის წინ აშენებულ შენობაზე დამატებითი კონსტრუქციების დადგმა და მისი დამძიმება, რაც შესაბამისი კვლევების გარეშე და ნებართვების გარეშე – უბრალოდ არ შეიძლება. აუცილებლად განსასაზღვრია სახურავი დამატებით რა დაწოლას გაუძლებს, ჩატყდება თუ არა. ამ დეტალების დასადგენად არაერთი კვლევის წარმოდგენას ითვალისწინებს მშენებლობის ნებართვა. თუ ამ დასკვნების გარეშე მოაწყვეს სკვერი – ეს ნიშავს იმას, რომ ქალაქში საშიშროების კიდევ ერთი კერა ჩნდება,“ – განმარტავს ის. ნეტგაზეთს დეპუტატმა რამდენიმე დოკუმენტი მიაწოდა, მათ შორის, სამხარაულის ექსპერტიზის დასკვნა, რომელიც 2022 წლის მაისით თარიღდება. კვლევა ბიუროს მთავრობამ დაუკვეთა და ის შენობის მზიდუნარიანობას სწავლობდა. დოკუმენტს თან ახლავს ფოტოები, სადაც ჩანს, რომ სპორტულ დარბაზში აუზიცაა გაკეთებული. ექსპერტებმა ასევე ფოტო გადაუღეს ბზარებსაც. მთავრობის სპორტული დარბაზი. ფოტო გადაიღო სამხარაულის ბიურომ 2022 წლის მარტში. დარბაზი გარედან გამოიყურება ასე: მთავრობის ადმინისტრაციასთან არსებული სპორტული დარბაზი. ფოტო გადაღებულია 12 აპრილს დასკვნით ნაწილში სამხარაულის ბიურო ამ შენობაზე დასაშვები დატვირთვის ოდენობაზე წერს: „რადიო თავისუფლებას“ ტერიტორიაზე მომუშავე მუშებმა რამდენიმე დღის წინ უთხრეს, რომ ისინი „დელტა მშენებელმა“ დაიქირავა. ამ კომპანიას ნეტგაზეთიც დაუკავშირდა. „დელტა მშენებლის“ წარმომადგენელმა გვითხრა, რომ ისინი მხოლოდ ტერიტორიის მოსაწესრიგებელ სამუშაოებს ასრულებენ. შესაბამისად, კვლავ უცნობია, ვინ უნდა განახორციელოს სამშენებლო სამუშაოები. „დელტა მშენებლის“ 100%-იან წილს სახელმწიფო სამეცნიერო-ტექნიკური ცენტრი „დელტა“ ფლობს. ამჟამად მთავრობის კანცელარია სამშენებლო შავი ღობითაა შემოსაზღვრული. ტერიტორიაზე მოქალაქეების შესვლა აკრძალეს. მთავრობის ადმინისტრაციისკენ მიმავალი კიბე. ფოტო: ნინო ძანძავა

რიკოთის საუღელტეხილო მონაკვეთზე ამჟამად მოძრაობა თავისუფალია და, ავტოტრანსპორტის მაღალი ინტენსივობიდან გამომდინარე, გადაადგილება შენელებულია მხოლოდ სურამისა და ვერტყვიჭალის კვანძებთან, – ამის შესახებ საქართველოს საავტომობილო გზების დეპარტამენტი ავრცელებს. უწყების ცნობით, რიკოთის მონაკვეთზე მონიტორინგის ჯგუფები აგრძელებენ 24-საათიან მკაცრ მონიტორინგს. „რიკოთის საუღელტეხილო მონაკვეთზე, დაწესებული სპეციალური რეჟიმის შესაბამისად, მთელი ღამის განმავლობაში მოძრაობდა მისაბმელიანი, ნახევრად მისაბმელიანი და სატვირთო ავტოტრანსპორტი. მსუბუქი და სამგზავრო ავტოტრანსპორტის მოძრაობა დილის 7 საათიდან დაიწყო. ამჟამად მოძრაობა თავისუფალია და, ავტოტრანსპორტის მაღალი ინტენსივობიდან გამომდინარე, გადაადგილება შენელებულია მხოლოდ სურამისა და ვერტყვიჭალის კვანძებთან. რიკოთის მონაკვეთზე მონიტორინგის ჯგუფები აგრძელებენ 24-საათიან მკაცრ მონიტორინგს. ასევე, მსუბუქი და სამგზავრო ავტოტრანსპორტისთვის მოძრაობა თავისუფალია გომი-საჩხერე-ჭიათურა-ზესტაფონის მიმართულებით. საერთაშორისო მნიშვნელობის თბილისი-სენაკი-ლესელიძის საავტომობილო გზის კმ114-კმ194 (ახალსოფლის კვანძი-ზესტაფონი) მონაკვეთზე, ავტოტრანსპორტის მოძრაობა დასაშვებია შემდეგი სპეციალური რეჟიმებით: მსუბუქი ავტოტრანსპორტის და ავტობუსების (მათ შორის 30 ადგილზე მეტი ტევადობის) მოძრაობა დასაშვებია 07:00 სთ-დან 19:00 სთ-მდე, ხოლო დანარჩენი სახის ავტოტრანსპორტის მოძრაობა აკრძალულია; მისაბმელიანი, ნახევრად მისაბმელიანი ავტოტრანსპორტის და სატვირითო ავტომობილების (3500კგ>) მოძრაობა დასაშვებია 21:00 სთ-დან 06:00 სთ-მდე, რევერსულად, ხოლო დანარჩენი სახის ავტოტრანსპორტის მოძრაობა აკრძალულია; საავტომობილო გზის რიკოთის გვირაბი-ხევის მონაკვეთზე ყველა სახის ავტოტრანსპორტის მოძრაობა განხორციელდება გაუჩერებლად გავლის რეჟიმში; შიდასახელმწიფოებრივი მნიშვნელობის გომი-საჩხერე-ჭიათურა-ზესტაფონის საავტომობილო გზაზე მსუბუქი ავტოტრანსპორტის მოძრაობა თავისუფალია დღე-ღამის ნებისმიერ დროს. აღნიშნული რეჟიმებით მოძრაობა განხორციელდება საპატრულო პოლიციის უშუალო ზედამხედველობით და კოორდინაციით“, – აღნიშნულია საქართველოს საავტომობილო გზების დეპარტამენტის ინფორმაციაში.

არ ვიცი, რომელია „გლობალური ომის პარტია“, ნაგულისხმებია გერმანია? ევროკავშირია ნაგულისხმები? - ეს სისულელე იქნებოდა. ზოგიერთი განცხადება ანტიდასავლურია, - ამის შესახებ საქართველოში გერმანიის ელჩი პეტერ ფიშერი "ინტერპრესნიუსთან" ინტერვიუში აცხადებს. ელჩი „საქართველოში მეორე ფრონტის გახსნის" სურვილის თაობაზე ნარატივს გამოეხმაურა და აღნიშნა, რომ დასავლეთის მიზანი არა ომის ესკალაცია, არამედ მისი დასრულებაა. „მე ამას ასე არ გამოვხატავდი. ჩვენ გვესმის ასეთი სახის განცხადებები, ზოგჯერ რაღაც „გლობალური ომის პარტიაზე“. არ ვიცი, ვინ არის „გლობალური ომის პარტია.“ ნაგულისხმებია გერმანია? ევროკავშირია ნაგულისხმები? მე ვკითხავდი იმ ადამიანებს, ვინც ასეთ განცხადებას აკეთებს. ეს ასე ვერ იქნება. ეს სისულელე იქნებოდა, რადგან ჩვენი მიზანი იყო ამ ომის თავიდან აცილება და როცა რუსეთის აგრესიის გამო ომი დაიწყო, ჩვენ ვცდილობდით მის შეზღუდვას და არა გაფართოებას. ჩვენ ძალიან კარგად გვესმის საქართველოს სისუსტეები და შეზღუდვები და პატივს ვცემთ მათ. ყველას აქვს თავისი აზრის გამოთქმის უფლება, მაგრამ ზოგიერთი განცხადება ანტიდასავლურია და ეხება რაღაც „გლობალური ომის პარტიას“, „მეორე ფრონტს“ და იმას, რომ ვიღაც ცდილობს ამის მოწყობას. არ ვიცი ვის გულისხმობენ. არა მგონია, ეს იყოს დასავლეთი,“ - განაცხადა გერმანიის ელჩმა. ინტერვიუს სრული ვერსია იხილეთ ბმულზე იპნ

იდეა ნამდვილად არსებობდა, რომ სხვადასხვა პარტიის ქალი დეპუტატები პრეზიდენტთან ერთად წასულიყვნენ სტრასბურგში, თუმცა, იცით, საბოლოო ჯამში, როგორ განვითარდა მოვლენები,- ამის შესახებ პარტია „საქართველოსთვის“ წევრმა, დეპუტატმა ანა ბუჩუკურმა განაცხადა. ბუჩუკური ადასტურებს არსებულ ინფორმაციას, რომ პრეზიდენტთან ერთად ქალი დეპუტატების სტრასბურგში გამგზავრებაზე სალომე ზურაბიშვილთან მოლაპარაკებები მიმდინარეობდა. „თქვენ იცით, ბოლო პერიოდში პრეზიდენტს ჰქონდა სხვადასხვა ქალ დეპუტატებთან კომუნიკაცია, მათ შორის, ჩვენთანაც. იცით და ვადასტურებ, რომ ეს იდეა ნამდვილად არსებობდა, რომ სხვადასხვა პარტიის ქალი დეპუტატები მასთან ერთად წასულიყვნენ სტრასბურგში. თუმცა, იცით, საბოლოო ჯამში, როგორ განვითარდა მოვლენები. თუმცა, ჩვენ ამ იდეას თავიდანვე მივესალმეთ. ზოგადად, ჩვენს გუნდს პრეზიდენტთან კომუნიკაცია არ გაგვიწყვეტია მას შემდეგ, რაც დავტოვეთ ხელისუფლება. რაც შეეხება ამ კონკრეტულ საკითხს, შეხვედრები იყო, რომელსაც ნათია მეზვრიშვილი ესწრებოდა, როგორც იცით. დეტალებზე საუბარი არ ყოფილა, საბოლოო ჯამში, მივიღეთ ის, რაც მივიღეთ, თუმცა, იმედია ეს იდეა განხორციელდება, რადგან მრავალპარტიული წარმომადგენლობა მნიშვნელოვანია, მათ შორის, ვისურვებდი, ჩართული იყოს ხელისუფლების წარმომადგენელი ამ ღონისძიებაში, მიუხედავად ყველაფრისა. მე არ ვამბობ, რომ ეს მოლაპარაკებები არ შედგა, მიმდინარეობდა, მაგრამ საბოლოო ჯამში მივიღეთ ის, რაც მივიღეთ. უნდა დაველოდოთ, რომ გაირკვეს ეს ყველაფერი, მანამდე არსებული პრაქტიკა გვიჩვენებს იმას, რომ მთავრობას შეუშლია ხელი მისთვის“, - განაცხადა ბუჩუკურმა.

ძალიან სამწუხაროა, - ასე ეხმაურება ევროპარლამენტარი ვიოლა ფონ კრამონი საქართველოს პრეზიდენტის სალომე ზურაბიშვილის მიერ ევროპარლამენტში სიტყვით გამოსვლის გაუქმებას. “ძალიან სამწუხაროა. სურვილი მქონდა, რომ ჩვენ (ევროპარლამენტში საქართველოს ძალიან ბევრი მეგობარია) მივიღებდით მას [ზურაბიშვილს] პლენარულ სხდომაზე საპრეზიდენტო სიტყვით გამოსვლისთვის. იმედია შემდეგ სესიაზე შეძლებს. მნიშვნელოვანია საქართველოს ევროკავშირის დღის წესრიგში დატოვება,” - წერს ფონ კრამონი. 18 აპრილს, სტრასბურგში საქართველოს პრეზიდენტის, სალომე ზურაბიშვილის ვიზიტი, სადაც პრეზიდენტი ევროპარლამენტის წინაშე სიტყვით უნდა გამოსულიყო, გადაიდო. პრეზიდენტის ადმინისტრაციის განმარტებით, საქართველოს მთავრობის მხრიდან ხელოვნურად გაჭიანურებული თანხმობის მიღების პროცესის გამო, საქართველოს პრეზიდენტმა მიიღო გადაწყვეტილება გადაედო უმნიშვნელოვანესი ვიზიტი ქალაქ სტრასბურგში, რადგან პრეზიდენტს მიაჩნია, რომ ეს უნდა იყოს ნაბიჯი დეპოლარიზაციისკენ და არა პირიქით. „ევროპარლამენტისადმი მიმართვა და ევროკავშირის უმაღლეს წარმომადგენლებთან შეხვედრების შესაძლებლობა მაქსიმალურად უნდა იყოს გამოყენებული ჩვენი კანდიდატის სტატუსის გასამყარებლად და ამიტომ ევროპარლამენტის პრეზიდენტთან ერთად იქნება შერჩეული გამოსვლის სათანადო დრო”, - წერია განცხადებაში. იპნ

ე.წ. ქოლცენტრების თაღლითურ სქემაზე BBC-ის ფილმში დავით კეზერაშვილი საქართველოში მდებარე ბევრი ქოლცენტრის დამფუძნებლად სახელდება. BBC-ის ინფორმაციით, საქართველოში მოქმედი ქოლცენტრების უმრავლესობა ე.წ. პიქსელის შენობაში მდებარეობდა და ბევრი მათგანი საქართველოს ყოფილი თავდაცვის მინისტრის, დავით კეზერაშვილის მიერ იყო დაფუძნებული ან დარეგისტრირებული. ფილმში მას “მისტერ ოფშორად” მოიხსენიებენ. BBC-ის გადამღები ჯგუფი ერთ-ერთი ქოლცენტრის ოფისში ქართველი სამართალდამცავების მიერ ჩატარებულ სპეცოპერაციასაც დაესწრო, რომელსაც ასევე გერმანელი პროკურორები ესწრებოდნენ. ჟურნალისტის თქმით, აღნიშნულ სპეცოპერაციასთან პარალელურად საქართველოს მასშტაბით კიდევ 30 რეიდი განხორციელდა. იპნ

„გვსურს გამოვეხმაუროთ საქართველოს პრეზიდენტის განცხადებას ქალაქ სტრასბურგში მისი ვიზიტის გადადებასთან დაკავშირებით”. – საქართველოს მთავრობა განცხადებას აქვეყნებს. „ხაზგასმით ვაცხადებთ, რომ ინფორმაცია იმის შესახებ, რომ საქართველოს მთავრობამ ხელოვნურად გააჭიანურა თანხმობის გაცემის პროცესი, რაც გახდა ვიზიტის გადადების მიზეზი, არის მცდარი და სიმართლეს არ შეესაბამება. საქართველოს მთავრობის მხრიდან სიტყვიერი თანხმობა სტრასბურგში დაგეგმილ ვიზიტთან დაკავშირებით პრეზიდენტმა ჯერ კიდევ მარტის დასაწყისში, მისი აშშ-ში ვიზიტის დროს მიიღო. მთავრობის ადმინისტრაციასა და პრეზიდენტის ადმინისტრაციას შორის მიმდინარეობდა სამუშაო პროცესი და ტექნიკური დეტალების დაზუსტება. ბოლო, დაზუსტებული წერილი პრეზიდენტის ადმინისტრაციიდან მთავრობის ადმინისტრაციაში შემოვიდა გუშინ, 12 აპრილს და მეორე დღესვე, 13 აპრილს მას გაეგზავნა წერილობითი თანხმობა 17-19 აპრილს საფრანგეთის რესპუბლიკაში, ქალაქ სტრასბურგში სამუშაო ვიზიტთან დაკავშირებით. ასევე, საქართველოს პრეზიდენტს გაეგზავნა წერილობითი თანხმობა დიდ ბრიტანეთსა და ჩრდილოეთ ირლანდიის გაერთიანებულ სამეფოში სამუშაო ვიზიტთან დაკავშირებით. აქვე აღვნიშნავთ, რომ 13-16 მარტს საფრანგეთის რესპუბლიკასა და ბელგიის სამეფოში პრეზიდენტის სამუშაო ვიზიტის შემთხვევაში, პრეზიდენტის ადმინისტრაციიდან 10 მარტს შემოსულ წერილზე მთავრობის ადმინისტრაციამ თანხმობა 13 მარტს გასცა. შესაბამისად, მთავრობის ადმინისტრაციამ როგორც წინა ვიზიტების შემთხვევაში, ასევე აღნიშნულ ვიზიტთან დაკავშირებითაც თანხმობა მყისიერად გასცა”. – ვკითხულობთ განცხადებაში. პრეზიდენტის ადმინისტრაციის განცხადების მიხედვით კი, ზურაბიშვილის ვიზიტი ევროპარლამენტში მთავრობის მხრიდან თანხმობის გაჭიანურების გამო გადაიდო. „საქართველოს მთავრობის მხრიდან ხელოვნურად გაჭიანურებული თანხმობის მიღების პროცესის გამო, საქართველოს პრეზიდენტმა მიიღო გადაწყვეტილება გადაედო უმნიშვნელოვანესი ვიზიტი ქალაქ სტრასბურგში, რადგან პრეზიდენტს მიაჩნია, რომ ეს უნდა იყოს ნაბიჯი დეპოლარიზაციისკენ და არა პირიქით. ევროპარლამენტისადმი მიმართვა და ევროკავშირის უმაღლეს წარმომადგენელებთან შეხვედრების შესაძლებლობა მაქსიმალურად უნდა იყოს გამოყენებული ჩვენი კანდიდატის სტატუსის გასამყარებლად და ამიტომ ევროპარლამენტის პრეზიდენტთან ერთად იქნება შერჩეული გამოსვლის სათანადო დრო”. – ვკითხულობთ განცხადებაში. პუბლიკა

ქოლცენტრების სქემის ქართველი თაღლითი BBC-სთან ინტერვიუში ამბობს, რომ მუშაობის დაწყებისას არ იცოდა, თუ რას აკეთებდა. ფილმში, რომელიც BBC-მ გაავრცელა, ის ჰყვება, რომ თავი ძალიან ცუდად იგრძნო მაშინ, როცა გაიგო, თუ "რა ხდებოდა სინამდვილეში". "სტუდენტებისთვის ძალიან რთულია კარგი სამსახურის მოძებნა მაღალი ანაზღაურებით. როცა დავიწყე მუშაობა, არ ვიცოდი, რას ვაკეთებდი. რეალურად, გვეგონა, რომ ადამიანებს ვეხმარებოდი, მაგრამ, როცა გავიგე, რა ხდებოდა სინამდვილეში, თავი ძალიან ცუდად ვიგრძენი იმ ადამიანების გამო, რომლებიც თაღლითობის მსხვერპლი გახდნენ". - ამბობს ის BBC-ის ჟურნალისტთან ინტერვიუში. ასევე, BBC-ის გამოძიებაში გაქურდული წყვილი ჰყვება, როგორ მოპარეს ასიათასობით ფუნტი. "გვეუბნებოდნენ, ისე მოგივლით, როგორც საკუთარ დედას. ერთ-ერთი მამაკაცი გვეუბნებოდა: ფილ, იაზრებ, რომ მალე მილიონერი გახდები? ჩვენ 340 000 ფუნტი დავკარგეთ ზუსტად შვიდ დღეში". - ამბობს მოტყუებული ქალი. 12 აპრილს BBC-მ გამოაქვეყნა ჟურნალისტური გამოძება თაღლითების იმ ჯგუფთან დაკავშირებით, რომელიც, მასალების მიხედვით, საქართველოს თავდაცვის ყოფილ მინისტრს, ბიზნესმენ დავით კეზერაშვილს უკავშირდება.

საქართველოს პროკურატურა ქოლცენტრების სქემასთან დაკავშირებით განცხადებას ავრცელებს. პროკურატურის ცნობით, თაღლითური ონლაინ პლატფორმებისა და დანაშაულში მონაწილე პირთა გამოსავლენად ერთ-ერთი ღონისძიება მიმდინარე წლის მარტში ჩატარდა - ქსელი, სავარაუდოდ, 2019-2021 წლებში მოქმედებდა და, მინიმუმ, 33 000 ადამიანს €89 მილიონის ზარალი მიადგა. უწყების განცხადებით, საგამოძიებო მოქმედებები ერთდროულად ჩატარდა ბულგარეთში, რუმინეთში, ისრაელსა და საქართველოში, რის შედეგადაც სხვა ქვეყნის ტერიტორიაზე დაკავებულია შესაძლო დანაშაულში მონაწილე 5 პირი. განცხადებას უცვლელად გთავაზობთ: გვსურს გამოვეხმაუროთ ევროჯასტის მიერ დღეს გავრცელებულ განცხადებას, რამდენიმე ქვეყანაში, მათ შორის საქართველოში ჩატარებულ სპეციალურ ღონისძიებასთან დაკავშირებით,რომელიც მიმართული იყო თაღლითური ონლაინ პლატფორმების და დანაშაულში მონაწილე პირთა გამოსავლენად. ერთ-ერთ ესეთი ღონისძიება მიმდინარე წლის მარტში ჩატარდა, დანაშაულში მონაწილე პირთა გამოსავლენად, რომელთა ქმედებების შედეგად 89 მილიონი ევროს ზიანი მიადგა მინიმუმ 33 000 დაზარალებულს, ევროპის სხვადასხვა ქვეყნის მოქალაქეებს. დანაშაულებრივი თაღლითური ქსელი, რომელიც სავარაუდოდ მოქმედებდა 2019-2021 წლების პერიოდში, სოციალურ მედიაში და სხვა საჯარო სივრცეში განთავსებული რეკლამებისა და ე.წ ქოლ-ცენტრებს გამოყენებით, ევროპის სხვადასხვა ქვეყნის მოქალაქეებს ინვესტიციების მოზიდვას, სანაცვლოდ კი მაღალ სარგებელს ჰპირდებოდა. მოგვიანებით, დაზარალებულები გაწეულ ინვესტიციებს კარგავდნენ, რომელიც დამნაშავეთა საბანკო ანგარიშებზე ნაწილდებოდა. საქართველოში ჩატარებულ ღონისძიებას უძღვებოდა საქართველოს პროკურატურა, ევროჯასტში საქართველოს მეკავშირე პროკურორთან კოორდინაციით. ერთობლივი საგამოძიებო ჯგუფის ფარგლებში, საქართველოს ტერიტორიაზე ჩასატარებელი საგამოძიებო მოქმედებები, საქართველოს პროკურატურისა და გერმანიის ფედერაციული რესპუბლიკის სამართალდამცავი სტრუქტურების შესაბამის წარმომადგენლების ჩართულობით იგეგმებოდა ბოლო რამდენიმე თვის განმავლობაში, სისხლის სამართლის სფეროში თანამშრომლობის ევროკავშირის იუსტიციის ერთიანი ქსელის - ევროჯასტის მხარდაჭერით. დაგეგმილი საგამოძიებო მოქმედებები, მხარეთა შეთანხმებით ერთდროულად ჩატარდა რამდენიმე ქვეყანაში, კერძოდ ბულგარეთში, რუმინეთში, ისრაელში და საქართველოში, რის შედეგადაც სხვა ქვეყნის ტერიტორიაზე დაკავებულია, შესაძლო დანაშაულში მონაწილე 5 პირი. ასევე, გამოიკითხნენ სავარაუდო დანაშაულთან შემხებლობაში მყოფი პირები, ამოღებულია უამრავი დოკუმენტაცია და ელექტრონული ინფორმაციის მატარებლები. საქმეზე გრძელდება გამოძიება და საერთაშორისო თანამშრომლობა დანაშაულებრივი ჯგუფის წევრების, ასევე ანალოგიური საქმიანობით დაკავებული სხვა ფიზიკური თუ იურიდიული პირების გამოვლენისა და მხილების მიზნით. საზოგადოებას შევახსენებთ, რომ საქართველოს პროკურატურა ევროჯასთის მხარდაჭერით ე.წ თაღლითური ქოლ-ცენტრების საქმიანობის წინააღმდეგ საბრძოლველად არაერთი წელია აქტიურად თანამშრომლობს გერმანიის ფედერაციული რესპუბლიკისა და სხვა მრავალი ქვეყნის კომპეტენტურ უწყებებთან. ერთობლივი საგამოძიებო ჯგუფის ფარგლებში, ტრანსნაციონალური, ე.წ თაღლითური ქოლ-ცენტრების და ორგანიზებულ დანაშაულში მონაწილე პირთა გამოვლენის მიზნით, საქართველოს ტერიტორიაზე 2021 წლის ოქტომბერსა და 2022 წლის ნოემბერში ჩატარდა ფართომაშტაბიანი ღონისძიებები. ღონისძიების ფარგლებში განხორციელდა რამდენიმე მოქმედი ქოლ-ცენტრის, ათეულობით ფიზიკური პირის, მათი საცხოვრებელი ბინების, ავტომანქანების და სამუშაო ადგილების ჩხრეკა. ამოღებული იქნა ასეულობით ინფორმაციის ელექტრონული მატარებელი, დოკუმენტაცია და დიდი ოდენობით ფულადი თანხა. ამავდროულად ყადაღა დაედო სავარაუდოდ დანაშაულებრივი გზით მოპოვებულ ათეულობით მილიონი ლარის ღირებულების ქონებებს და საბანკო ანგარიშებზე განთავსებულ დიდი ოდენობით თანხებს. ჩატარებული ფართომაშტაბიანი ღონისძიებების შედეგად დაკავებულ იქნა დანაშაულებრივი ორგანიზებული ჯგუფის ხელმძღვანელები და ათეულობით წევრი, სისხლისსამართლებრივი დევნა დაიწყო დანაშაულში მონაწილე იურიდიული პირების მიმართ. საქართველოში ჩატარებულ სპეციალურ ოპერაციებში გერმანიის ფედერაციული რესპუბლიკის 80-მდე და საქართველოს სამართალდამცავი ორგანოების 400-მდე თანამშრომელი მონაწილეობდა. საქართველოს გენერალური პროკურატურის ერთ-ერთ ძირითად მიმართულებას სწორედ ტრანსნაციონალური დანაშაულის წინააღმდეგ ბრძოლა წარმოადგენს, რომელიც ფართოდ არის გავრცელებული ევროპის სხვადასხვა ქვეყნის ტერიტორიაზე, დანაშაულებრივი სქემისა და მონაწილე პირების გამოვლენაში ჩართულია არაერთი ქვეყნის სამართალდამცავი სტრუქტურის თანამშრომელი, რომლებთანაც საქართველოს გენერალური პროკურატურა აქტიურ რეჟიმში თანამშრომლობს. საქართველოს პროკურატურა კიდევ ერთხელ მადლობას უხდის ევროჯასტს და გერმანიის ფედერაციული რესპუბლიკის საგამოძიებო სტრუქტურებს ტრანსნაციონალური დანაშაულის წინააღდეგ ბრძოლაში ეფექტიანი თანამშრომლობისთვის. 12 აპრილს BBC-მ გამოაქვეყნა ჟურნალისტური გამოძება თაღლითების იმ ჯგუფთან დაკავშირებით, რომელიც, მასალების მიხედვით, საქართველოს თავდაცვის ყოფილ მინისტრს, ბიზნესმენ დავით კეზერაშვილს უკავშირდება. ტაბულა

პრეზიდენტის ადმინისტრაცია სტრასბურგში სალომე ზურაბიშვილის ვიზიტის გადადების თაობაზე განცხადებას ავრცელებს. პრეზიდენტის ადმინისტრაცია ვიზიტის გადადების მიზეზად ასახელებს საქართველოს მთავრობის მხრიდან "ხელოვნურად გაჭიანურებული თანხმობის" მიღების პროცესს. როგორც პრესსამსახურის განცხადებაშია აღნიშნული, ევროპარლამენტში გამოსვლის "სათანადო დრო" ევროპარლამენტის პრეზიდენტთან ერთად იქნება შერჩეული. „საქართველოს მთავრობის მხრიდან ხელოვნურად გაჭიანურებული თანხმობის მიღების პროცესის გამო, საქართველოს პრეზიდენტმა მიიღო გადაწყვეტილება გადაედო უმნიშვნელოვანესი ვიზიტი ქალაქ სტრასბურგში, რადგან პრეზიდენტს მიაჩნია, რომ ეს უნდა იყოს ნაბიჯი დეპოლარიზაციისკენ და არა პირიქით. ევროპარლამენტისადმი მიმართვა და ევროკავშირის უმაღლეს წარმომადგენელებთან შეხვედრების შესაძლებლობა მაქსიმალურად უნდა იყოს გამოყენებული ჩვენი კანდიდატის სტატუსის გასამყარებლად და ამიტომ ევროპარლამენტის პრეზიდენტთან ერთად იქნება შერჩეული გამოსვლის სათანადო დრო”, - წერია განცხადებაში. ინფორმაციისთვის, დღეს გახდა ცნობილი, რომ 18 აპრილს, სტრასბურგში საქართველოს პრეზიდენტის, სალომე ზურაბიშვილის ვიზიტი, სადაც პრეზიდენტი ევროპარლამენტის წინაშე სიტყვით უნდა გამოსულიყო, გადაიდო.

განათლების მინისტრმა გიორგი ამილახვარმა აშშ-ის ელჩთან, კელი დეგნანთან, სამუშაო შეხვედრა გამართა. როგორც სამინისტრო იუწყება, მინისტრმა დიპლომატთან მნიშვნელოვანი საგანმანათლებლო და სამეცნიერო პროექტები განიხილა, რომლებიც ამერიკის შეერთებულ შტატებთან პარტნიორობით ხორციელდება. „გიორგი ამილახვარმა მადლობა გადაუხადა კელი დეგნანს განათლებისა და მეცნიერების სფეროების განვითარების მხარდაჭერისთვის და აღნიშნა, რომ ამერიკის შეერთებული შტატები უკვე მრავალი წელია საქართველოში სხვადასხვა მიმართულებით მასშტაბურ ინიციატივებს ახორციელებს, რაც მნიშვნელოვნად უწყობს ხელს ქვეყანაში ადამიანური კაპიტალის განვითარებას. მინისტრმა საქართველოს განათლების სისტემაში ერთობლივი საგანმანათლებლო პროგრამების დანერგვის სრული მზაობა გამოთქვა, მისი თქმით, ქვეყნის მთავარი სტრატეგიული პარტნიორის მიერ განხორციელებული საგანმანათლებლო პროგრამები მნიშვნელოვანია ახალგაზრდებისთვის, რათა თითოეულ მათგანს ჰქონდეს შესაძლებლობა, მიიღოს მაღალი ხარისხის, საერთაშორისო დონის განათლება", - ნათქვამია პრესრელიზში. სამინისტროს ცნობით, კელი დეგნანმა განაცხადა, რომ საქართველო და აშშ უკვე მრავალი წელია ნაყოფიერად თანამშრომლობენ. ელჩმა მინისტრს დაუდასტურა, რომ ამერიკის შეერთებული შტატები გააგრძელებს საქართველოს განათლების სისტემის განვითარების მხარდაჭერას და ამ მიმართულებით სამინისტროსთან მჭიდრო პარტნიორობას. საუბრისას მხარეებმა სამომავლო პროექტებისა და გეგმების განხორციელების გზებზე იმსჯელეს. შეხვედრის შემდეგ გიორგი ამილახვარმა და კელი დეგნანმა უმასპინძლეს ფულბრაიტის ინგლისური ენის სწავლების ასისტენტის პროგრამის (ETA-English Teaching Assistant) მონაწილე მასწავლებლებს. საპარლამენტო უმრავლესობაში შემავალი „ხალხის ძალის" წევრები ბოლო თვეების განმავლობაში აკრიტიკებენ საქართველოს სტრატეგიულ პარტნიორს, ამერიკის შეერთებულ შტატებს და ელჩ კელი დეგნანს; ისინი აცხადებდნენ, რომ ამერიკის საელჩო საქართველოში ცდილობდა ხელისუფლების შეცვლას „ისეთი ადამიანების მოსაყვანად, რომლებიც ქვეყნის ომში ჩართვას მარტივად მოაწერდნენ ხელს"; ისინი ცდილობენ საზოგადოება დაარწმუნონ იმაში, რომ ამერიკის შეერთებული შტატები დაინტერესებულია არა მხოლოდ "მეორე ფრონტის" გახსნით საქართველოში, არამედ რევოლუციის მოწყობითაც. რადიო თავისუფლება

პრეზიდენტს „მთავარი არხის“ გენერალური დირექტორი ნიკა გვარამია არ შეუწყალებია. ამის შესახებ ნეტგაზეთს პენიტენციურ სამსახურში განუცხადეს. რაც შეეხება პრეზიდენტის ადმინისტრაციას, სააღდგომოდ შეწყალებულთა შესახებ ამ უწყებაში კომენტარს არ აკეთებენ. საქართველოს პრეზიდენტმა სალომე ზურაბიშვილმა აღდგომის დღესასწაულთან დაკავშირებით 10 მსჯავრდებული შეიწყალა. გაჩნდა მოლოდინი, რომ შეწყალებულთა შორის შესაძლოა მთავარი არხის დამფუძნებელი ნიკა გვარამიაც იყოს. ნეტგაზეთი

ამერიკის შეერთებული შტატების მიერ მოსამართლეების სანქცირებას „ქართული ოცნების“ ხელისუფლება დამოუკიდებელ მართლმსაჯულებაში ჩარევის ინტერესით ხსნის და ქვეყნის სუვერენიტეტის ვაშინგტონისგან დაცვის პირობას დებს. რონდელის ფონდის უფროსი მეცნიერ-თანამშრომელთან და ევროპული კვლევების ცენტრის დირექტორ კახა გოგოლაშვილთან განვიხილავთ, რეალურად აქვს თუ არა ადგილი საქართველოს სუვერენიტეტის ხელყოფას? სუვერენიტეტი VS საერთაშორისო ვალდებულები სახელმწიფოს სუვერენიტეტი გულისხმობს შიდა საქმიანობაში და საგარეო ურთიერთობებში სხვა სახელმწიფოებისგან დამოუკიდებლობას. თუმცა საერთაშორისო ურთიერთობების სისტემაში არ არსებობს ისეთი აბსოლუტური სუვერენიტეტის ცნება, რომ სახელმწიფო თან იყოს გლობალური სიკეთეების მონაწილე, იღებდეს საერთაშორისო დახმარებებს და, ამავდროულად, უარს აცხადებდეს იმ ჩარჩოებში მოქცევაზე, რომელშიც სუვერენულ სახელმწიფოებს საერთაშორისო სამართალი, საერთაშორისო ქცევის ნორმები და საერთაშორისო ორგანიზაციები აქცევს. სხვა სახელმწიფოებთან შეთანხმებები თუ საერთაშორისო ორგანიზაციებში (ევროკავშირი, ევროპის საბჭო, გაერო და სხვა) მონაწილეობა გარკვეულწილად წარმოადგენს საკუთარი სუვერენული უფლებების ნებაყოფლობით შეზღუდვას. როდესაც საუბრობენ იმაზე, რომ ევროკავშირს ან აშშ-ს არ აქვთ უფლება, რომ ჩაერიონ საქართველოს სასამართლოს საქმიანობაში და აკრიტიკონ იქ მიმდინარე პროცესები, რომ, თითქოს, ეს საქართველოს ექსკლუზიური სუვერენული სფეროა, გოგოლაშვილის თქმით, უნდა გაითვალისწინონ, რომ საქართველოს ევროკავშირთან და აშშ-სთან შეთანხმებებით აქვს აღებული ვალდებულებები, რომ ერთად ითანამშრომლონ საქართველოში მართლმსაჯულების სისტემის განვითარებისთვის, მისი დამოუკიდებლობის, პროფესიული დონის, მიუკერძოებლობის განვითარების მიზნით. „ეს უკვე თავისთავად გულისხმობს, რომ აშშ-ს და ევროკავშირს აქვთ საქართველოს მხრიდან მინიჭებული უფლება, აკონტროლონ ქვეყანაში მართლმსაჯულების სისტემის განვითარების პროცესი და მოახდინონ შესაბამისი რეაგირება“, — აცხადებს კახა გოგოლაშვილი. კონკრეტულად ის მიუთითებს სტრატეგიული პარტნიორობის შესახებ აშშ-საქართველოს ქარტიასა და ევროკავშირთან ასოცირების შესახებ შეთანხმებებზე, რომელშიც ვკითხულობთ: აშშ-საქართველოს ქარტია სტრატეგიული პარტნიორობის შესახებ, ნაწილი IV, მუხლი 2: ასოცირების შეთანხმება. კარი II. მუხლი 4: სად გადის ზღვარი სუვერენიტეტს შელახვასა და საერთაშორისო შეთანხმებებით ნაკისრ ორმხრივ ვალდებულებების მონიტორინგს შორის? „ქართული ოცნების“ თავმჯდომარე ირაკლი კობახიძე აცხადებს, რომ მისგან სწორედ კონსტიტუციის და კანონის დარღვევას და სასამართლოს საქმეში ჩარევას ითხოვდნენ. კობახიძის ნათქვამი გოგოლაშვილისთვის დამაჯერებელი არ არის: „ირაკლი კობახიძეს პროპაგანდისტული სტილი ძალიან კარგად აქვს შემუშავებული. ნებისმიერ მოვლენას ისე ატრიალებს, როგორც თავად გაუხარდება“, — ამბობს იგი. კახა გოგოლაშვილი ასევე აღნიშნავს, რომ საქართველოს შეუძლია სთხოვოს სახელმწიფო დეპარტამენტს მეტი ინფორმაცია მოსამართლეების სანქცირების მიზეზების შესახებ, თუმცა აშშ-ის არანაირი საერთაშორისო ვალდებულება არ აქვს, კონკრეტული ფაქტები წარმოადგინოს. სუვერენიტეტის სახელით ავტორიტარიზმისკენ… კახა გოგოლაშვილი საქართველოს ხელისუფლების მიერ დასავლეთის დემონიზაციას და დელეგიტიმაციას ხსნის „ქართული ოცნების“ სურვილით, მუდმივად შეინარჩუნოს ძალაუფლება. „დასავლეთს არ სურს ავტოკრატია საქართველოში. ამიტომ მიდის პროპაგანდა, თუ რა ცუდია დასავლეთი, როგორ ერევა ჩვენს საქმეებში… რომ რეალურად არაფერი დემოკრატია არ არსებობს; პროპაგანდისტები გამოჰყავთ და იძახიან, რომ სულ 8 ოჯახი მართავს თითქოს ამერიკას და მთელი დემოკრატიული სამყარო არის მასონთა ლოჟის მოგონილი ბლეფი და სხვადასხვა შეთქმულების თეორიები. ამ თეორიებით ხდება საკუთარი ძალაუფლების სამუდამოდ დაკანონების ლეგიტიმაცია. კი ბატონო, დაიკანონებ ძალაუფლებას, მაგრამ შეგიძლია მერე დაიცვა შენი ქვეყანა ევროპის და ამერიკის გარეშე ისე, რომ არ ჩაბარდე შენნაირ არადემოკრატიულ სხვა რომელიმე აქტორს?“, — ამბობს გოგოლაშვილი და დასძენს, რომ დამოუკიდებლობის მოპოვების შემდეგ საქართველომ დემოკრატიული ქვეყნის მშენებლობაში დახმარებისთვის თავად მიმართა აშშ-სა და ევროპას: ე.წ. სუვერენული დემოკრატიის კონცეფციას კი, რომელიც რუსეთში ჩამოყალიბდა და რომლის არსიც რუსეთის თავისებურებებზე, ინტერესებზე და განვითარების პრიორიტეტებზე დემოკრატიის „მორგებაში” მდგომარეობს, ხშირად ეფარებიან ავტოკრატიული მმართველები, რათა საკუთარი „არადემოკრატიულების უფლება” დაიცვან. კახა გოგოლაშვილის აზრით, ე.წ. სუვერენული დემოკრატიის მოდელი საქართველოში არ იმუშავებს. „ჯერ ერთი, ხალხისთვის მიუღებელია. რა მოიტანა რუსეთში, აზერბაიჯანში ან სხვაგან სუვერენული დემოკრატიის მოდელმა? — ელიტების კარგად ყოფნა და გამდიდრება და დანარჩენების სრული უფლებების გარეშე დატოვება. რუსეთში ადამიანები იმდენად უფლების გარეშე დარჩნენ, რომ არავინ შეეკითხა, ისე დაიწყეს ომი უკრაინაში და ახლა არავინ ეკითხება, ისე აგზავნიან ამ ომში მოქალაქეებს, ზოგჯერ იარაღსაც არ აძლევენ. რუსეთმა მოაქცია საკუთარი თავი სრულ იზოლაციაში, მაგრამ რუსეთს უზარმაზარი რესურსები აქვს — მთელ მსოფლიოს ამარაგებს წიაღისეულით. აზერბაიჯანსაც ნუ უყურებენ, იმიტომ რომ აზერბაიჯანს აქვს ჩვენზე ბევრად მეტი რესურსი. საქართველო რით გაიტანს თავს? მაღალი ხარისხის დემოკრატიის სახელმწიფოებში — მაგალითად ფინეთში, შვედეთში, ავსტრალიაში — ყოველგვარი დიდი ბუნებრივი რესურსების გარეშე, ხალხი ბევრად უკეთესად ცხოვრობს, იმიტომ რომ დემოკრატია თავისთავად ადამიანის განვითარების და მისი კონკურენტუნარიანობის შესაძლებლობაა და სწორედ ადამიანური კაპიტალი ხდება უმთავრესი სიმდიდრე. დემოკრატიაზე ნელ-ნელა უარის თქმა არ არის ნორმალური და ეს არ არის ის, რაც ქართველ ხალხს უნდა“, — დასძენს კახა გოგოლაშვილი. წინაისტორია ამერიკის შეერთებულმა შტატებმა სანქციები დაუწესა მოქმედ და ყოფილ მოსამართლეებს: მიხეილ ჩინჩალაძეს, ლევან მურუსიძეს, ირაკლი შენგელიასა და ვალერიან ცერცვაძეს „მნიშვნელოვან კორუფციულ საქმიანობაში მათი ჩართულობის გამო“. მოსამართლეებს და მათი ოჯახის წევრებს აეკრძალათ აშშ-ში შესვლა. თბილისმა გადაწყვეტილებას „სრულიად გაუგებარი და მიუღებელი“ უწოდა. „იმედს გამოვთქვამთ, რომ სახელმწიფო დეპარტამენტი წარმოადგენს შესაბამის მტკიცებულებებს ან გადახედავს თავის გადაწყვეტილებას. სხვა შემთხვევაში, საქართველოს სახელმწიფოსა და ქართველი ხალხის მხრიდან აღნიშნული აღიქმება როგორც სუვერენული სახელმწიფოს დამოუკიდებელ სასამართლოზე ზეწოლა და მის საქმიანობაში უხეში ჩარევა, რაც საქართველოსა და აშშ-ის ორმხრივ მრავალწლიან მეგობრულ ურთიერთობებს დააზიანებს“, — ნათქვამია საქართველოს საგარეო საქმეთა მინისტრ ილია დარჩიაშვილის წერილში აშშ-ის სახელმწიფო მდივან ენტონი ბლინკენისადმი. აშშ-საქართველოს მეგობრულ ურთიერთობებს ჩრდილი მიადგა მეტწილად „ოცნების“ კონსპირაციით იმის შესახებ, რომ თითქოს არსებობს გლობალური ომის პარტია, რომელსაც განზრახული აქვს საქართველოში მეორე ფრონტის გახსნა. ახლა კი მმართველი პარტიის ლიდერი საუბრობს კორუფციულ ინტერესებში „ბლინკენის გასვრაზე“ და თუ აშშ წესებით არ ითამაშებს, „არსენალში შენახული“ სატელეფონო საუბრების გამოქვეყნებას არ გამორიცხავს. ნეტგაზეთი

„საბოლოოდ საქართველოს პრეზიდენტი აღარ მიმართავს მომავალ კვირას სტრასბურგში დაგეგმილ ევროპარლამენტის პლენარულ სხდომას, ითქვა, რომ ქართულმა მხარემ გააუქმა” – წერს ტვიტერზე „რადიო თავისუფლების“ ევროპის ბიუროს რედაქტორის რიკარდ იოზვიაკი. დღეს საქართველს პრეზიდენტის ადმინისტრაციამ გაავრცელა ინფორმაცია, რომ სალომე ზურაბიშვილის ვიზიტი ევროპარლამენტში გადადებულია. „18 აპრილს, სტრასბურგში დაგეგმილი საქართველოს პრეზიდენტის ვიზიტი გადაიდო, სადაც პრეზიდენტი ევროპარლამენტის წინაშე სიტყვით უნდა გამოსულიყო“, – ნათქვამია პრეზიდენტის ადმინისტრაციის განცხადებაში. პრეზიდენტმა სალომე ზურაბიშვილმა პარლამენტში ყოველწიური მოხსენებით გამოსვლის დროს თქვა, რომ ის 18 აპრილს ევროპარლამენტში სიტყვით გამოვიდოდა. „ახლახან მივიღე ევროპარლამენტის პრეზიდენტის მოწვევა ევროპარლამენტში სიტყვით გამოსვლაზე, რაც 2010 წლის შემდეგ არ მომხდარა. 18 აპრილს, ევროპარლამენტს მივმართავ სიტყვით, ვიცი ეს არ იქნება ადვილი, მაგრამ აუცილებელია, რომ ჩვენი ხალხის სათქმელი გაიგოს და მოისმინოს ევროპამ“, – ამბობდა სალომე ზურაბიშვილი 31 მარტს. პუბლიკა

საქართველოს პრეზიდენტის, სალომე ზურაბიშვილის ვიზიტი სტრასბურგში გადაიდო, შესაბამისად ის ევროპარლამენტში სიტყვით აღარ გამოვა. „18 აპრილს, სტრასბურგში დაგეგმილი საქართველოს პრეზიდენტის ვიზიტი გადაიდო, სადაც პრეზიდენტი ევროპარლამენტის წინაშე სიტყვით უნდა გამოსულიყო“, – ნათქვამია პრეზიდენტის ადმინისტრაციის განცხადებაში. პრეზიდენტმა სალომე ზურაბიშვილმა პარლამენტში ყოველწიური მოხსენებით გამოსვლის დროს თქვა, რომ ის 18 აპრილს ევროპარლამენტში სიტყვით გამოვიდოდა. ახლახან მივიღე ევროპარლამენტის პრეზიდენტის მოწვევა ევროპარლამენტში სიტყვით გამოსვლაზე, რაც 2010 წლის შემდეგ არ მომხდარა. 18 აპრილს, ევროპარლამენტს მივმართავ სიტყვით, ვიცი ეს არ იქნება ადვილი, მაგრამ აუცილებელია, რომ ჩვენი ხალხის სათქმელი გაიგოს და მოისმინოს ევროპამ“, – ამბობდა სალომე ზურაბიშვილი 31 მარტს. პუბლიკა

რუსული ძალების მიერ ხერსონის ოლქის დაბომბვის შედეგად ორი ადამიანი დაიღუპა და ორი დაშავდა, - ინფორმაციას უკრაინული მედია ხერსონის სამხარეო სამხედრო ადმინისტრაციის ხელმძღვანელზე, ალექსანდრე პროკუდინზე დაყრდნობით ავრცელებს. მათივე ინფორმაციით, რუსებმა ავიაციის გამოყენებით სკოლის შენობა დაბომბეს. „დღეს მტრის ავიაციამ ბერისლავის რაიონის სოფელ ზმიევკას დაარტყა, რუსებმა ავიაბომბები ადგილობრივი სკოლის შენობაში ჩამოყარეს. წინასწარი ინფორმაციით, ერთი ადამიანი გარდაიცვალა, ერთი კი დაშავდა“, - განაცხადა პროკუდინმა. მისი თქმით, რუსებმა სოფელი ნიკოლსკოეც დაბომბეს, რის შედეგადაც 52 წლის მამაკაცი დაშავდა. ხერსონის ოლქის დნიპროს რაიონში პარკის დაბომბვას კი 45 წლის მამაკაცი ემსხვერპლა. იპნ

საქართველოს პრეზიდენტმა, სალომე ზურაბიშვილმა აღდგომის ბრწყინვალე დღესასწაულთან დაკავშირებით ათი მსჯავრდებული შეიწყალა. ინფორმაციას საქართველოს პრეზიდენტის ადმინისტრაცია ავრცელებს. მათივე ცნობით, შეწყალებულებიდან ხუთი მსჯავრდებული სრულად გათავისუფლდა პენიტენციურ დაწესებულებაში თავისუფლების აღკვეთის სახით დანიშნული სასჯელის შემდგომი მოხდისგან. ასევე, სამ მსჯავრდებულს პენიტენციურ დაწესებულებაში მოსახდელად დარჩენილი სასჯელის ვადა შეუმცირდა, ხოლო ორ მსჯავრდებული სრულად გათავისუფლდა პირობითად ჩათვლილი თავისუფლების აღკვეთის შემდგომი მოხდისაგან.

ახალგაზრდობას მინდა ვუთხრა, რომ ზომბებივით ნუ იქნებიან, აზროვნება ისწავლონ - რუსის მონობა სხვისი მონობით შევიცვალოთ? ნურას უკაცრავად, - ამის შესახებ ბოდბელმა მთავარეპისკოპოსმა, მეუფე იაკობმა ქადაგებისას განაცხადა. მისი თქმით, ქართული მართლმადიდებლური ეკლესია ყოველთვის იდგება მართლმადიდებლობის და საქართველოს სახელმწიფოს ძლიერების სადარაჯოზე. „ახალგაზრდობას მინდა ვუთხრა, რომ საუკეთესო ახალგაზრდობა გვყავს, მაგრამ რობოტებივით და ზომბებივით ნუ იქნებიან, აზროვნება ისწავლონ. შეიძლება გეგონოს, ქრისტეს საქმეს ვაკეთებო, მაგრამ სინამდვილეში ბარაბას საქმეს ემსახურებოდე და რუსულ სიტყვას ვიტყვი - „ურა პატრიოტი" იყო. ჩვენი ეკლესია ყოველთვის იდგება მართლმადიდებლობის და საქართველოს სახელმწიფოს ძლიერების სადარაჯოზე. ჩვენი ეკლესია არ დაუშვებს, რომ სადმე ძალით შეგვიყვანონ, რაც არ უნდა იმპერია იყოს. ჩვენ თუ ვინმესთან ურთიერთობა გვინდა, იმიტომ გვინდა, რომ კარგად ვიცხოვროთ, კარგად ვიყოთ და არა ვიღაცის მონები ვიყოთ. რუსის მონობა სხვისი მონობით შევიცვალოთ? ნურას უკაცრავად. ყველამ იცოდეს - ევროპამაც, ამერიკამაც, რუსმაც, თურქმაც, ირანელმა, ჩინელმა და ა.შ. - ქართველი კაცი არავის მონა არ გახდება“, - განაცხადა მეუფე იაკობმა. იპნ

იუსტიციის უმაღლესი საბჭოს მოსამართლე წევრის დიმიტრი გვრიტიშვილის განცხადებით, სამმა მოსამართლემ ამერიკის შეერთებულ შტატებში სასწავლო ვიზიტით გამგზავრებაზე უარი განაცხადა. გვრიტიშვილი ფიქრობს, რომ აღნიშნული მოსამართლეებისგან ეს ერთგვარი სოლიდარობის აქტია. „მიმდინარე თვეში (22-30 აპრილის განმავლობაში) დაგეგმილია ქართველი მოსამართლეების სასწავლო ვიზიტი აშშ-ში. ჩემთვის, როგორც საქართველოს იუსტიციის უმაღლესი საბჭოს წევრისათვის, ცნობილი გახდა, რომ ამ ვიზიტის მონაწილე სამმა მოსამართლემ: ნანა ჯოხაძემ, თამარ ბეჟანიშვილმა და კონსტანტინე კოპალიანმა უარი განაცხადეს გამგზავრებაზე, რის შესახებაც მათი განცხადებები ოფიციალურად არის შემოსული საბჭოში. ჩემი მოსაზრებით, ეს არის სოლიდარობის ერთგვარი აქტი, ისევე, როგორც ეს იყო ლაშა ჩხიკვაძის შემთხვევაში (როცა ასევე რამდენიმე მოსამართლემ უარი თქმა ანალოგიურ ვიზიტში მონაწილეობაზე და გამგზავრებაზე), რადგან აშშ-ის წარმომადგენელთა მხრიდან სახეზეა აშკარად უსამართლო და დამამცირებელი მიდგომა ქართველი მოსამართლეების მიმართ“,- წერს დიმიტრი გვრიტიშვილი საკუთარ „ფეისბუქ“ გვერდზე. ცნობისთვის, აშშ მიხეილ ჩინჩალაძეს, ლევან მურუსიძეს, ირაკლი შენგელიას და ვალერიან ცერცვაძეს სანქციებს უწესებს. აშშ-ის სახელმწიფო მდივნის განცხადების თანახმად, ამერიკის სახელმწიფო დეპარტამენტი მიხეილ ჩინჩალაძის, ლევან მურუსიძის, ირაკლი შენგელიას და ვალერიან ცერცვაძის საჯარო სანქცირებას ახდენს, ვიზის აკრძალვის შესახებ 7031(c) წესის საფუძველზე, მნიშვნელოვან კორუფციულ საქმიანობაში მათი ჩართულობის გამო. იპნ

„ნაციონალური მოძრაობის“ წარმომადგენლებმა საგამოძიებო კომისიასთან დაკავშირებით შეთანხმებულ თარიღზე უპასუხისმგებლობა გამოიჩინეს - თუ მათ ამაზე ჩვენი შეფასება არ მოსწონთ, ცივი წყალი დალიონ, - ამის შესახებ ჟურნალისტებს პარტია "საქართველოსთვის" დეპუტატმა ბექა ლილუაშვილმა განუცხადა. ლილუაშვილის თქმით, "ნაციონალური მოძრაობის" ქმედებები პარლამენტში მუშაობის დროს არათანმიმდევრულია და არათანმიმდევრული ნაბიჯი ბევრჯერ გადადგეს. "დიდი უპასუხისმგებლობა იყო ის, რაც რიგგარეშე სხდომის მოწვევასთან დაკავშირებით მოხდა - ორი დეპუტატი საზღვარგარეთ წავიდა. ეს იყო უკიდურესად უპასუხისმგებლო ქმედება. ამიტომ საქმით უნდა დაამტკიცონ, სამშაბათის პლენარული სხდომაც მალე მოვა და ვნახავთ, მათ გადაწყვეტილებას", - განაცხადა ბექა ლილუაშვილმა. interpressnews

რამდენიმე წუთის წინ მესტიისა და ზემო სვანეთის ეპარქიამ ახალგაზრდა მორჩილის შესახებ სამწუხარო ინფორმაცია გაავრცელა. როგორც ირკვევა, მორჩილი ნიკოლოზი, ერისკაცობაში ბაჩო ავალიანი ავარიას ემსხვერპლა. როგორც ეპარქიაში განმარტავენ, დეტალები არ იციან, თუმცა, მათი თქმით, ის ქალაქში იმყოფებოდა. მორჩილის ტრაგიკულ გარდაცვალებაზე ახლობლები წერენ. „ადგილს ვერ ვპოულობ. გული გასკდება. ჩემი ბაჩო, ჩემი თბილი“ primetime