tvati

ფინეთი უკვე ოფიციალურად ნატო-ს 31-ე წევრი სახელმწიფოა. ფინეთის საგარეო საქმეთა მინისტრმა, პეკა ჰავისტომ გაწევრიანების ოფიციალური პროცესი ცოტა ხნის წინ დაასრულა, როდესაც აშშ-ის სახელმწიფო მდივანს, ენტონი ბლინკენს ბრიუსელში, ნატო-ს შტაბ-ბინაში ოფიციალური დოკუმენტი გადასცა. ნატო-ს გენერალურმა მდივანმა, იენს სტოლტენბერგმა ბრიუსელში დღეს გამართულ პრესკონფერენციაზე განაცხადა, რომ ალიანსში გაწევრიანება „ფინეთს უფრო უსაფრთხოს და ნატო-ს უფრო ძლიერს გახდის“. მისი თქმით, რუსეთის პრეზიდენტს, ვლადიმერ პუტინს უკრაინაში შეჭრის გაცხადებული მიზანი ჰქონდა - “მიეღო ნაკლები ნატო მის საზღვრებთან, მაგრამ ის ზუსტად საპირისპიროს იღებს“. ინტერპრესნიუსი

სახელმწიფო უსაფრთხოების სამსახურის უფროსის ყოფილი მოადგილე სოსო გოგაშვილი სასამართლომ ბრალადწარდგენილ ხუთივე მუხლში დამნაშავედ ცნო. აღნიშნული გადაწყვეტილება თბილისის საქალაქო სასამართლოს მოსამართლემ ვალერიან ბუგიანიშილმა გამოაცხადა. მოსამართლემ ყოფილ მაღალჩინოსანს 5 წლით თავისუფლების აღკვეთა მიუსაჯა. სასამართლოს განაჩენის გამოცხადებას გოგაშვილის ოჯახის წევრების მხრიდან უკმაყოფილება მოჰყვა. ცნობისთვის, სოსო გოგაშვილს ბრალი ედებოდა საქართველოს სისხლის სამართლის კოდექსის 320-ე მუხლის პირველი ნაწილით (სახელმწიფო საიდუმლოების განზრახ გახმაურება) ,157 პრიმა მუხლის პირველი ნაწილით (პირადი ცხოვრების საიდუმლოს უკანონოდ მოპოვება და შენახვა); 333-ე მუხლის პირველი ნაწილით (მოხელის მიერ სამსახურებრივი უფლებამოსილების გადამეტება, რამაც სახელმწიფოს კანონიერი ინტერესის არსებითი დარღვევა გამოიწვია), 157-ე მუხლის მე-4 ნაწილით (პერსონალური მონაცემების უკანონოდ მოპოვება, შენახვა, გავრცელება მასობრივი მაუწყებლობის მეშვეობით, რამაც მნიშვნელოვანი ზიანი გამოიწვია, სამსახურებრივი მდგომარეობის გამოყენებით) და 236-ე მუხლის მე-3 ნაწილით (ცეცხლსასროლი იარაღისა და საბრძოლო მასალის მართლსაწინააღმდეგო შეძენა და შენახვა). ინტერპრესნიუსი

დეჟავუ მქონდა, „wanna be ბიძინა" გამოვიდა ფაქტობრივად, შთაბეჭდილება დამრჩა, რომ კეზერაშვილს ბიძინობა უნდა, - ამის შესახებ პარტია „საქართველოსთვის" წევრმა და დეპუტატმა ანა ბუჩუკურმა განაცხადა. როგორც ბუჩუკურმა აღნიშნა, ადამიანები პოლიტიკაში არაფორმალურად არ უნდა მონაწილეობდნენ. „ძალიან უცნაური ეთერი ჰქონდა ბატონ კეზერაშვილს, ბოლომდე ვერ ვუყურე, კვარაცხელიას თამაში იყო, მაგრამ რასაც ვუყურე, კითხვები უფრო მეტი გააჩინა, ვიდრე რამეს უპასუხა. ზოგადად, ვერავის აუკრძალავ პოლიტიკაში ყოფნას, მაგრამ ჩვენი გუნდის პოზიციაა, რომ ეს უნდა იყოს ფორმალური და ეს ეხება ბიძინა ივანიშვილსაც და კეზერაშვილსაც. ცოტა დეჟავუ მქონდა, "wanna be ბიძინა" გამოვიდა ფაქტობრივად, ანუ მინდა ვიყო ბიძინა ივანიშვილი, ეს ხუმრობით რა თქმა უნდა. არ ვიცი, რას ემსახურებოდა მისი ეს ინტერვიუ, მაგრამ მე პირადად დამრჩა შთაბეჭდილება, რომ მას ბიძინობა უნდა, როგორც ჩანს,"- განაცხადა ბუჩუკურმა.

პარტია "საქართველოსთვის" წევრისა და დეპუტატის, მიხეილ დაუშვილის განცხადებით, ვენეციის კომისიამ ცალსახად თქვა თავის შუალედურ დასკვნაში, რომ „დეოლიგარქიზაციას“ სჭირდება სისტემური მიდგომა და არა ის მიდგომა, რომელიც დღევანდელ პროექტშია ასახული. მისივე თქმით, ამისთვის ყველაზე მნიშვნელოვანი სასამართლოს ძირეული რეფორმაა. "ამიტომ კიდევ ერთხელ, თუნდაც ერთობლივად, მაგრამ გავატაროთ რეალური სისტემური რეფორმები, რათა მივაღწიოთ „დეოლიგარქიზაციას“. ამისათვის ყველაზე მნიშვნელოვანია სასამართლოს ძირეული რეფორმა, უნდა მოხდეს იუსტიციის უმაღლეს საბჭოში არამოსამართლე, დამოუკიდებელი და მიუკერძოებელი წევრების დანიშვნა, უნდა განხორციელდეს რეალური ანტიკორუფციული სააგენტოს შექმნა, რომელიც იქნება არა ფორმალური, ან თავის დროზე კორუფციისთვის გაგდებულ პრემიერ-მინისტრს დაქვემდებარებული, არამედ - რეალურად დამოუკიდებელი და საგამოძიებო ფუნქციებით აღჭურვილი. ზუსტად უნდა იცოდეთ, რომ , თუ საქართველო მიიღებს კანდიდატის სტატუსს, ეს იქნება სრულად ჩვენი მოქალაქეების დამსახურება და არავისი სხვისი, რადგან „ქართულმა ოცნებამ“ ყველაფერი გააკეთა იმისთვის, რომ საქართველოს კანდიდატის სტატუსი არ მიეღო.", - განაცხადა პარლამეტში სიტყვით გამოსვლისას მიხეილ დაუშვილმა. დაუშვილი ასევე გამოეხმაურა რესპუბლიკური საავადმყოფოს ირგვლივ შექმნილ სიტუაციას და საავადმყოფოს თანამშრომლებს მხარდაჭერა გამოუცხადა. "ასევე მინდა გამოვეხმაური „რესპუბლიკური საავადმყოფოს“ ირგვლივ შექმნის სიტუაციას - ჩვენ რადქმაუნდა მხარდაჭერას ვუხცადებთ, საავადმყოფოს თანამშრომლებს, რადგან ამ ადამიანების მხარდაჭერა არის ძალიან მნიშვნელოვანი, მათ აქვთ აბსოლუტურად სწორი მოთხოვნები. მე ერთი რაღაც მინდა გაგახსენოთ, ეს საქმე შეიცავს პოლიტიკური კორუფციის ძალიან დიდ ნიშნებს, რადგან „ქეისი“, რომელიც ვითარდება „რესპუბლიკური საავადმყოფოს“ ირგვლივ, როგორც ჩანს, გუშინ არ დაწყებულა - ზუსტად მსგავსი გარიგება არსებობდა ჯერ კიდევ 2015 წელს, როცა ბატონი ღარიბაშვილი იყო ასევე პრემიერ - მინისტრი და როგორც ჩანს, იმ ძველი გარიგების გახსენებასთან გვაქვს საქმე, ამიტომ მოგიწოდებთ არ დაარღვიოთ „რესპუბლიკური საავადმყოფოს“ თანამშრომელთა უფლებები.", - აღნიშნა მიხეილ დაუშვილმა.

სანამ ქვეყნის პრემიერ-მინისტრი კვლავ აგრძელებს ეკონომიკური ზრდით და სიღარიბის ფსევდო შემცირებით თავმოწონებას, მისი გამოსვლის პარალელურად, მისივე კაბინეტთან მიმდინარეობს აქონდროპლაზიით დაავადებულ ბავშვთა მშობლებისა და ახლობლების აქცია, - ამის შესახებ პარლამენტში სიტყვით გამოსვლისას პარტია "საქართველოსთვის" წევრმა და დეპუტატმა ბექა ლილუაშვილმა განაცხადა. როგორც ლილუაშვილმა აღნიშნა, პარლამენტში შესულია ონკოპაციენტების და მათი ოჯახის წევრების პეტიცია, 6000 ადამიანის ხელმოწერით და მხარდაჭერის მოთხოვნით, დიაბეტით დაავადებული ბავშვებისთვის კი, შეზღუდულადაა ხელმისაწვდომი ინსულინის ინექცია აფთიაქებში. "მიუხედავად ახალგაზრდების კლიშეების მიწებებისა, პოლიტიკური ანგარიშსწორებებისა, თავისუფალი აზრის დევნის და შევიწროვებისა - ვერ გადაფარავთ მოქალაქეების რეალურ გამოწვევებს, - განაცხადა ლილუაშვლა და დასძინა, რომ მის მიერ დასახელებული პრობლემების გადასაჭრელად ბიუჯეტში ფული საკმარისადაა. ლილუაშვილის თქმით, 2023 წლის 2 თვეში ბიუჯეტში დამატებით 166 მლნ. ლარი შემოვიდა. შესაბამისად, ფინანსური რესურსი არსებობს, საჭიროა მხოლოდ პოლიტიკური ნება - ეს რესურსი მიემართოს ჩვენი მოქალაქეების მხარდასაჭერად და არა საარჩევნო - პარტიული საჭიროებებისთვის.’

31 მარტს საქართველოს პრეზიდენტმა მკაცრად გააკრიტიკა და მოუწოდა მმართველ გუნდს, რომ აღასრულოს ხალხის ნება - ის, რისთვისაც ამდენი მსვერპლი გაიღო ჩვენმა ერმა, - ამის შესახებ პარლამენტის პლენარულ სხდომაზე პარტია "საქართველოსთვის" წევრმა და დეპუტატმა ალექსანდრე მოწერელიამ განაცხადა. მისი თქმით, არავის აღარ სჯერა მმართველი გუნდის ნაამბობის იმის შესახებ, რომ ჩვენ ევროპა ომში გვითრევს. "უთუ თქვენ ამის გჯერათ? ნუთუ დღეს პარლამენტში უნდა იყოს წყენები იმის თაობაზე, თუ ვინ დაუჭირა მხარი პრორუსულ კანონს, კანონს რომელიც იყო ანტი-ქართული, ჩვენ ხომ ჩვენი სტრატეგიული მოკავშირე გვეუბნება ამას და გავიხსენოთ ისიც, რომ ჩვენი ოკუპანტი ქვეყანა მიესალმა ამ კანონის მიღებას და აღშფოთდა, როდესაც ეს კანონი იქნა გაწვეული საქართველოს პარლამენტიდან. ამიტომ ნუ იქნება პიროვნული წყენები, როდესაც ამ საკითხის შეფასებებს ვაკეთებთ", - განაცხადა ალექსანდრე მოწერელიამ.

საპენსიო სესხებთან დაკავშირებული რეფორმის განხორციელების შემდგომ მარეგულირებელს ლიბერთი ბანკთან შუამდგომლობის და დახმარების თხოვნით 244-მა პირმა მიმართა. ეს, ,,მოქალაქეების" წევრის, დეპუტატ ქეთევან თურაზაშვილის საპარლამენტო კითხვაზე პასუხია, რომელმაც სებ-ს მიმართა შემდეგ საკითხებზე: საპენსიო სესხებთან დაკავშირებული რეფორმის განხორციელების შემდგომ, რამდენმა პენსიონერმა მიმართა ეროვნული ბანკის მომხმარებელთა დაცვის სამსახურს, სს ლიბერთი ბანკთან შუამდგომლობისა და დახმარების თხოვნით, საპენსიო სესხის ან/და ოვერდრაფტის ხელშეკრულების გადახედვის და ცვლილების კუთხით. "2023 წლის 01 იანვრიდან 2023 წლის 27 მარტის ჩათვლით საქართველოს ეროვნული ბანკის მომხმარებელთა უფლებების დაცვის და ფინანსური განათლების დეპარტამენტის მომხმარებელთა უფლებების დაცვის განყოფილებას სს „ლიბერთი ბანკის“ მიერ გაცემული საპენსიო სესხის/კრედიტის ან/და ე.წ. „ოვერდრაფტის“ საკრედიტო პროდუქტებთან დაკავშირებით მომართა 244 (ორასორმოცდაოთხი) მომხმარებელმა, საიდანაც 197 (ასოთხმოცდაჩვიდმეტი) მომართვა ეხებოდა უშუალოდ საპენსიო სესხს/კრედიტს, ხოლო, 47 (ორმოცდაშვიდი) მომართვა უკავშირდებოდა ე.წ. „ოვერდრაფტს“. დამატებით გაცნობებთ, რომ აღნიშნული მომართვების/განცხადებების შინაარსი განსხვავებულია და მოიცავს როგორც საკრედიტო პროდუქტების შესაბამისი ხელშეკრულებების პირობებთან, ასევე, გადახდის გრაფიკთან დაკავშირებულ შეკითხვებს/პრეტენზიებს და სხვა სახის საკითხებს. ამასთან, საპროცენტო განაკვეთის შესახებ უკმაყოფილება დააფიქსირა 18 (თვრამეტი) მომხმარებელმა. ამასთან, გაცნობებთ, რომ ზემოაღნიშნულ მომართვებთან/განცხადებებთან მიმართებაში საქართველოს ეროვნული ბანკი მოქმედებს საქართველოს კანონმდებლობით, მათ შორის, „საქართველოს ეროვნული ბანკის შესახებ“ საქართველოს ორგანული კანონით განსაზღვრული უფლებამოსილებისა და კომპეტენციის ფარგლებში" - წერია მარეგულირებლის პასუხში. უნდა აღინიშნოს, რომ კითხვასა და სებ-ის პასუხში არ ჩანს მიმართვიანობის სტატისტიკა კანონის ცვლილებამდე. ავტორი: თამარ მუკბანიანი

2023 წლის ზაფხულში გამოვა ნეტფლიქსის ახალი მძაფრსიუჟეტიანი ფილმი – „Extraction 2″. ფილმში მთავარი როლის შემსრულებელ კრის ჰემსვორთს პარტნიორობას გაუწევენ ქართველი მსახიობები: თორნიკე გოგრიჭიანი, ანდრო ჯაფარიძე და თინა დალაქიშვილი. მათთან ერთად სურათში მონაწილეობას მიიღებენ: დათო ბახტაძე, თაკო ტაბატაძე, ირაკლი კვირიკაძე, ლევან საგინაშვილი, თორნიკე ბზიავა და სხვა ქართველი მსახიობები. ფილმის აღწერის მიხედვით, მთავარი გმირი ტაილერ რეიკი ქართველ განგსტერს უპირისპირდება და მისი ტყვეობიდან ერთი ოჯახის დახსნას ცდილობს. კადრები ფილმის გადასაღები მოედნიდან: კრის ჰემსვორთი, ანდრო ჯაფარიძე და თინა დალაქიშვილი ფილმში – Extraction 2 კრის ჰემსვორთი და თინა დალაქიშვილი ნეტგაზეთი

საპარლამენტო ფრაქცია „ლელოს“ წევრი ანა ნაცვლიშვილი აცხადებს, რომ ლაზარე გრიგორიადისის ციხეში მონახულებაზე პარლამენტის თავმჯდომარისგან ნებართვა ვერ მიიღო. ანა ნაცვლიშვილის პასუხად შალვა პაპუაშვილი აცხადებს, რომ პენიტენციურ დაწესებულებაში შესვლა და პატიმრის მონახეულება არაა დეპუტატის უფლება, ესაა პარლამენტის თავმჯდომარის უფლება, რომლის დელეგირებაც მას შეუძლია პარლამენტის წევრზე. პაპუაშვილი ამბობს, რომ „სამწუხაროდ ამ უფლების გამოყენება ხდება ექსტენსიურად პარლამენტის წევრების მხრიდან“ და ცდება ხოლმე იმ ზღვარს, რომელიც არის წესით განსაზღვრული. მარტის აქციებზე ე.წ. მოლოტოვის კოქტეილის სროლაში ბრალდებულ ლაზარე გრიგორიადისის ადვოკატის თქმით, მის დაცვის ქვეშ მყოფს თავდაპირველად მასთან ადვოკატი არ შეუშვეს, ასევე გრიგორიადისს პენიტენციურმა დაწესებულებამ თმის გადაპარსვა მოსთხოვა. მას ამის სურვილი არ ჰქონდა, თუმცა დაემორჩილა მოთხოვნას. პენიტენციური სამსახურის განმარტებით, ტყუილია გავრცელებული ინფორმაცია იმის შესახებ, თითქოსდა მასთან არ შეუშვეს ადვოკატი. მათივე მტკიცებით, სიმართლეს არ შეესაბამება ინფორმაცია, თითქოს მას თმა მთლიანად გადაპარსეს, მითუმეტეს მისი ნების საწინააღმდეგოდ. პუბლიკა

პარტია „ლელოს“ დეპუტატი უმრავლესობის წევრის მაკა ბოჭორიშვილის გამოსვლას გამოეხმაურა, რომელმაც ოპოზიცია დაადანაშაულა რუსული ინტერესების გატარებაში და განაცხადა, რომ წინა ხელისუფლებისგან განსხვავებით, სწორედ „ქართულმა ოცნებამ“ გააღრმავა ევროინტეგრაცია. სალომე სამადაშვილმა ბოჭორიშვილს მედროვე უწოდა და გაიხსენა, რომ უმრავლესობის დეპუტატი „ქართული ოცნების“ ხელისუფლებაში მოსვლამდე სწორედ ყოფილი მთავრობის წევრი იყო და ივანიშვილს აკრიტიკებდა. სიმართლე კი არის მარტივი, მხოლოდ ასეთი ხალხი დაგრჩათ თქვენ, „ქართულო ოცნებავ“ – მედროვე. ხალხი, რომელიც ჩაბარდება ყველა ხელისუფლებას, „ნაციონალური მოძრაობის“ დროს „ნაციონალი“ იქნება, „ქართული ოცნების“ დროს – „ოცნების“ მსახური და მათი პირიდან სიმართლე არასდროს ამოვა. ამიტომ არის დღეს რაც აქ მოისმინეთ ტყუილი. სიმართლე არის ის, რაც გითხრათ თქვენ მიერ არჩეულმა პრეზიდენტმა აქ, ამ დარბაზში რამდენიმე დღის წინ. სამადაშვილის გამოსვალმე ევროპასთან ინტეგრაციის კომიტეტის თავმჯდომარემ მაკა ბოჭორიშვილმა რუსეთის ინტერესების გატარებაში ოპოზიცია დაადანაშაულა და განაცხადა, რომ არ არსებობს არც „რუსული კანონი“ და არც „რუსული ოცნება“, ოპოზიციამ კი ყველაფერს „რუსული“ დარქვა და „ჩრდილოელი მეზობელი გაუფასურებულ იარლიყად აქცია“. „საქართველოს დამოუკიდებლობის, სუვერენიტეტის, თავისუფლების, ტერიტორიული მთლიანობის ხელმყოფი ჩრდილოელი მეზობელი, წესით, ქვეყნის გადარჩენისთვის ბრძოლაში რომ უნდა გვაერთიანებდეს, აქციეთ ყველაზე გაუფასურებულ იარლიყად და ყველაფერს დაარქვით რუსული. მისივე თქმით, ერთმანეთთან შეუთავსებელი იყო ქვეყნის ევროინტეგრაცია და სინგაპურიზაცია, რასაც წინა ხელისუფლება აცხადებდა და „ქართული ოცნების“ ხელისუფლებაში მოსვლამდე ევროპის ენერგეტიკულ გაერთიანებაში გაწევრება ვერ მოხერხდა. პუბლიკა

სანკტ-პეტერბურგის კაფეში მომხდარ აფეთქებაში ეჭვმიტანილი დარია ტრეპოვა დააკავეს. ინფორმაციას „ბიბისი“ ავრცელებს. მედიის ცნობით, რუსეთის ეროვნულმა ანტიტერორისტულმა კომიტეტმა აფეთქებას ტერორისტული აქტი უწოდა. კომიტეტის ცნობით, აფეთქება უკრაინის სპეცსამახურების მიერ იყო დაგეგმილი. ამასთან, „ბიბისის“ ინფორმაციით, უკრაინის პრეზიდენტის აპარატის ხელმძღვანელის მრჩეველმა, მიხაილ პოდოლიაკმა პეტერბურგში მომხდარ აფეთქებაში კიევის მონაწილეობა უარყო და მას „შიდა ტერორიზმის აქტი“ უწოდა. სანკტ-პეტერბურგის კაფეში აფეთქების შედეგად რუსი სამხედრო ბლოგერი ვლადლენ ტატარსკი დაიღუპა. 1ტვ

ზურაბ ჟვანიას მოედნის, ასევე ყაზბეგისა და პეკინის გამზირების ახალი გეგმარებითი სქემის მიხედვით, ტრანსპორტის გადაადგილების სქემაში გარკვეული ცვლილებები შედის, – ინფორმაციას თბილისის მერია ავრცელებს. „კერძოდ, 3 აპრილის 20:00 საათიდან ონიაშვილის ქუჩაზე მოძრაობა ცალმხრივი გახდება და ავტომობილები გადაადგილდებიან მხოლოდ ბუდაპეშტის ქუჩის მიმართულებით“, – აღნიშნულია თბილისის მერიის ინფორმაციაში.

მან არ მიიღო მედიკამენტი. დატოვა საცხოვრებელი სახლი, რის გამოც რამდენიმე დღის განმავლობაში უცნობი იყო მისი ადგილსამყოფელი, - ამის შესახებ პროკურორმა ალინა კუკავამ „ამბასადორში“ ხანძრის გაჩენის ფაქტზე დაკავებულის ანზორ ლომიძის სასამართლო პროცესზე განაცხადა. პროკურორის განმარტებით, ბრალდებულის მშობლის თქმით, მის შვილს ფსიქიკური ჯანმრთელობის პრობლემა ჰქონდა და მედიკამენტებს არ იღებდა. ამასთან, ალინა კუკავამ აღნიშნა, რომ „ბრალდებული ხანდახან აგრესიულად გამოიყურება“. „მან არ მიიღო მედიკამენტი. დატოვა საცხოვრებელი სახლი, რის გამოც რამდენიმე დღის განმავლობაში უცნობი იყო მისი ადგილსამყოფელი“, - განაცხადა ალინა კუკავამ. ცნობისთვის, „ამბასადორში“ ხანძრის გაჩენის ფაქტზე დაკავებულ ანზორ ლომიძეს, თბილისის საქალაქო სასამართლომ აღკვეთის ღონისძიების სახით პატიმრობა შეუფარდა. სხდომას თავად ბრალდებულიც ესწრებოდა, რომელიც მომხდართან დაკავშირებით, ამ ეტაპზე, დუმილის უფლებას იყენებს. ბრალდების მხარის შუამდგომლობას პატიმრობის შეფარდების შესახებ არ ეთანხმებოდა დაცვის მხარე. ადვოკატის თქმით, ანზორ ლომიძე ვერ აღიქვამს მოვლენებს. ადვოკატი მიიჩნევს, რომ მისი დაცვის ქვეშ მყოფი შესაბამის სტაციონარში უნდა მოთავსდეს. იპნ

გაეროს ბავშვთა ფონდის (UNICEF) ცნობით, 2022 წლის თებერვლიდან, უკრაინაში მიმდინარე ომის დროს სულ მცირე 501 ბავშვი დაიღუპა. UNICEF-ის აღმასრულებელი დირექტორის, ქეთრინ რასელის განცხადებით, ეს მხოლოდ გაეროს მიერ შემოწმებული ოდენობაა და „რეალური რიცხვი სავარაუდოდ გაცილებით მაღალია“. ცნობისთვის, უკრაინის გენერალური პროკურატურის ინფორმაციით, 2023 წლის 1 აპრილის დილის მდგომარეობით, რუსმა სამხედროებმა უკრაინაში 467 ბავშვი მოკლეს, ხოლო 944-ზე მეტმა კი სხვადასხვა სახის დაზიანება მიიღო. interpressnews

საქართველოს პრეზიდენტმა ვილნიუსში, ოფიციალური ვიზიტის ფარგლებში, ლიეტუვის სეიმის თავმჯდომარესთან ერთად, მონაწილეობა მიიღო უკრაინის თავისუფლებისთვის ბრძოლის მხარდამჭერ შეხვედრაში, რომელიც კათედრალის მოედანზე ბუჩაში, ირპინში, ბოროდენკოსა და უკრაინის სხვა ქალაქებში სასტიკად ნაწამებ მსხვერპლთა პატივისაცემად ჩატარდა. ამის შესახებ ინფორმაციას პრეზიდენტის ადმინისტრაცია ავრცელებს. ,,მინდა ყველას მოგესალმოთ. ეს ნამდვილად სპონტანური შეხვედრაა, არ იყო სიტყვით გამოსვლა დაგეგმილი. უბრალოდ მსურდა ეს მომენტი თქვენთან ერთად გამეზიარებინა და თქვენამდე მომეტანა ქართველი ხალხის სოლიდარობა. რამდენიმე დღის წინ, სხვა ლიდერებთან ერთად, ბუჩას გათავისუფლების წლისთავთან დაკავშირებულ ღონისძიებაში დისტანციურად მივიღე მონაწილეობა, რადგან იმ დროს საპარლამენტო გამოსვლა მქონდა, სადაც წუთიერი დუმილით პატივი მივაგეთ ბუჩას ტრაგედიაში დაღუპულების ხსოვნას, რომელიც ყველა იმ ტრაგედიის სიმბოლოა, რასაც დღეს უკრაინა განიცდის. მინდა გითხრათ, რომ ყველაზე მნიშვნელოვანი საკითხი აქ, ლიეტუვაში ყოფნისას ისაა, რომ ლიეტუვა ერთ-ერთი ქვეყანაა, რომელმაც უკრიანისა და საქართველოს მსგავსად იცის, რას ნიშნავს რუსეთის ოკუპაციისა და აგრესიის გამოცდილება. ევროპაში მრავალი ადამიანი იმეორებს, რომ თქვენ ჩვენი მომავლისა და ჩვენი თავისუფლებისათვის იბრძვით, მაგრამ ჩვენ ჩვენი გამოცდილებიდან ვიცით, რომ თქვენ ჩვენი თავისუფლებისა და ევროპული მომავლისთვის იბრძვით. დარწმუნებული ვარ, რომ ერთად ვიქნებით ევროპაში და ეს თქვენი, თქვენი მეომრებისა და თქვენი მოქალაქეების გამორჩეულად მამაცური ბრძოლის დამსახურება იქნება, რომლებიც ერთად ახორციელებენ ამ გამორჩეულ წინააღმდეგობას. დიდება უკრაინას!“ , - განაცხადა საქართველოს პრეზიდენტმა სიტყვით გამოსვლისას, რომელსაც ლიეტუვაში ამ ეტაპზე მცხოვრები უკრაინელები ესწრებოდნენ. შეხვედრაში მონაწილეობა მიიღეს ასევე: უკრაინის ელჩმა ლიეტუვაში პეტრო ბეშტამ, აშშ-ის ელჩმა ლიეტუვაში რობერტ გილკრისტმა, შვედეთის ელჩმა ლიტვაში ინგერ ბაქსტონმა, ვილნიუსის მერმა რობერტას დუჩნევიჩმა. ipn

სპეციალური პენიტენციური სამსახური მარტის აქციების მიმდინარეობისას პოლიციელების ჯანმრთელობის ხელყოფისა და სახელმწიფო ქონების განადგურების საქმეზე ბრალდებული, ლაზარე გრიგორიადისის საქმეზე განცხადებას ავრცელებს. პენიტენციური სამსახური აცხადებს, რომ სიმართლეს არ შეესაბამება ინფორმაცია, თითქოს მას თმა "მთლიანად გადაპარსეს, მითუმეტეს ნების საწინააღმდეგოდ." პენიტენიცური სამსახური ასევე „ტყუილს“ უწოდებს ინფორმაციას, რომ ლაზარე გრიგორიადისთან ადვოკატი არ შეუშვეს. „2023 წლის 31 მარტს 11:00 საათზე N8 პენიტენციურ დაწესებულებაში შემოსახლებულ იქნა ბრალდებული ლ.გ. „დაწესებულებაში მიღებისას ბრალდებული გაეცნო მის უფლებებსა და მოვალეობებს, მათ შორის საპარიკმახერო მომსახურებით სარგებლობის უფლებას. მან ისარგებლა პატიმრობის კოდექსის 36-ე მუხლით გათვალისწინებული საპარიკმახერო მომსახურების უფლებით. სიმართლეს არ შეესაბამება ინფორმაცია, თითქოს მას თმა მთლიანად გადაპარსეს, მითუმეტეს მისი ნების საწინააღმდეგოდ. ტყუილია გავრცელებული ინფორმაცია იმის შესახებ, თითქოსდა მასთან არ შეუშვეს ადვოკატი. ბრალდებულ ლ. გ-ს დაცვის უფლება, ისევე როგორც ნებისმიერი პატიმრის, სრულად გარანტირებულია პენიტენციურ დაწესებულებებში. ბრალდებული დაწესებულებაში მოთავსების დღესვე, 2023 წლის 31 მარტს 21:50 საათზე, მოინახულა სახალხო დამცველის აპარატის წარმომადგენელმა”, - ნათქვამია განცხადებაში.

7 მარტს თბილისში, "აგენტების კანონის" საწინააღმდეგო აქციაზე დაშავებული ზაზა ბიღიაშვილის ექსპერტიზის პასუხისთვის სამხარაულის ბიურომ მაქსიმალური ვადა, ერთი წელი მოითხოვა. ზაზა ბიღიაშვილს აქციაზე, სავარაუდოდ, მხუთავი აირის ბალონი მოხვდა თავის არეში, რის შედეგადაც ერთ თვალში მხედველობა სრულად დაკარგა, მიიღო ტვინის შერყევა და ამ დრომდე უჩივის ნევროლოგიურ გართულებებს. რადიო თავისუფლებას სამხარაულის ბიუროში განუმარტეს, რომ დაშავებული დემონსტრანტის ექსპერტიზის პასუხისთვის მაქსიმალური ვადა დასახელდა იმ გარემოების გათვალისწინებით, რომ საჭიროა კომისიური ექსპერტიზა პირის გამოკვლევით და სამედიცინო დოკუმენტაციის შესწავლით, რაც გარე ექსპერტების ჩართვას გულისხმობს, ეს პროცესი კი დროში ხშირად იწელება. "ეს არ ნიშნავს, რომ ერთ წელზე მალე არ შეიძლება არ იყოს დასკვნა", - გვითხრეს ბიუროს პრესსამსახურში. სამხარაულის ექსპერტიზის ბიურომ ზაზა ბიღიაშვილის ჯანმრთელობის მდგომარეობის შესახებ ორი დასკვნა უნდა მოამზადოს: ერთი - სპეციალური საგამოძიებო სამსახურისთვის, რომელიც მარტის აქციებზე სამართალდამცველების მხრიდან შესაძლო ძალის გადამეტების შემთხვევებს სწავლობს და მეორე - თავად ზაზა ბიღიაშვილისთვის, რომელსაც ამ დრომდე არ აქვს დაზარალებულის სტატუსი. ასევე ნახეთ ირაკლი ღარიბაშვილის თქმით, 7-9 მარტის აქციებზე არავინ დაშავებულა - მხედველობა დაკარგა ერთ თვალში ზაზა ბიღიაშვილმა ზაზა ბიღიაშვილის ოჯახმა 365 დღე სამხარაულის ექსპერტიზის ბიუროს დასკვნისთვის ხანგრძლივ ვადად მიიჩნია და მიმართა ალტერნატიულ ექსპერტს, რომლის ექსპერტიზის პასუხებსაც მიმდინარე კვირის ბოლოს ელოდებიან. ბიღიაშვილის ინტერესებს "სამართლიანი არჩევნები" იცავს. როგორც არასამთავრობო ორგანიზაციის იურისტმა ლელა ხათრიძემ უთხრა რადიო თავისუფლებას, მათ უფრო დეტალური კითხვები დაუსვეს ექსპერტიზას ზაზას ჯანმრთელობის მდგომარეობის, დაზიანების შესაფასებლად, ვიდრე ეს სპეციალურმა საგამოძიებო სამსახურმა გააკეთა. "ჩვენს მიერ სამხარაულის ექსპერტიზის ბიუროსთვის დასმული კითხვები უფრო ვრცელი იყო. მათ ხანგრძლივი ვადები აქვთ და მაქსიმალური ვადა დაასახელეს და არ გვაქვს მოლოდინი, რომ დროულად იქნება დასკვნა", - გვითხრა ლელა ხათრიძემ. ასევე ნახეთ წლები ექსპერტიზის დასკვნის ლოდინში - როგორ მუშაობს “სამხარაული” ზაზა ბიღიაშვილის მეუღლემ, მაია გორგოშიძემ რადიო თავისუფლებას უთხრა, რომ დამოუკიდებელმა ექსპერტმა დაზიანების გამომწვევი მიზეზების გარდა, უნდა თქვას, რამდენად შეამცირებს ტრავმა მის შრომისუნარიანობას და იქონიებს გავლენას ცხოვრების ხარისხზე. 55 წლის კაცი დაზიანებული თვალით საპროტესტო აქციებამდე "თბილსერვისჯგუფში" დასუფთავების მანქანის მძღოლად მუშაობდა. ტრავმის შემდეგ ამ პოზიციაზე მუშაობის გაგრძელებას ის, სავარაუდოდ, ვეღარ შეძლებს. რადიო თავისუფლება

სახალხო დამცველმა საქართველოს პარლამენტში 2022 წელს საქართველოში ადამიანის უფლებათა და თავისუფლებათა დაცვის მდგომარეობის შესახებ წლიური ანგარიში წარადგინა. ომბუდსმენის აპარატის შეფასებით, 2022 წელს ადამიანის უფლებების დაცვის მდგომარეობა არსებითად არ გაუმჯობესებულა, მეტიც, რიგი მიმართულებებით მნიშვნელოვანი გაუარესებაც კი შეინიშნებოდა. ქალთა თანასწორუფლებიანობის ნაწილში, ანგარიშში საუბარია სექსუალური შევიწროების შესახებ შესახებ და ნათქვამია, რომ გასულ წელს სახალხო დამცველს, აქტიურად მიმართავდნენ ქალები სექსუალური შევიწროების საკითხებზე. ანგარიშში საუბარია, რომ მომართვები, ძირითადად, დასაქმების ადგილზე მომხდარ ფაქტებს შეეხებოდა. ამავე ანგარიშში ხაზგასმულია, რომ საანგარიშო წელს, ქალთა საფეხბურთო კლუბებში მოასპარეზე ფეხბურთელები კვლავ ვერ სარგებლობდნენ ჯანმრთელობის დაზღვევით და არ უნაზღაურდებოდათ მიღებული ტრავმების მკურნალობისთვის აუცილებელი პროცედურებისა და სამკურნალო მედიკამენტების ხარჯები, რაც მათი ჯანმრთელობისა და პროფესიული საქმიანობისთვის შეუქცევადი ზიანის გამოწვევის რისკებს წარმოშობს.

ჩინჩალაძე-მურუსიძის სინდიკატისთვის რომ ცალსახად მიუღებელი და შეუთავსებელია ჯერ კიდევ აქა-იქ შემორჩენილი, თითზე ჩამოსათვლელი დამოუკიდებელი მოსამართლეები, ამის კიდევ ერთი ნათელი მაგალითია მომხდარი ფაქტი, - ამის შესახებ სოციალურ ქსელში საკონსტიტუციო სასამართლოს ყოფილი თავმჯდომარე და პარტია "საქართველოსთვის" საკრებულოს წევრი ზაზა თავაძე წერს. მისი თქმით, ცნობილი გახდა, რომ პარტია "საქართველოსთვის" გუნდის პოლიტპატიმრების - აკაკი ბართაიას, გელა აბულაძისა და ნოდარ ავდალიანის სისხლის სამართლის საქმეების გამხილველი მოსამართლე დავით მგელიაშვილი, რომელიც უკვე სამივე საქმეზე არსებითად იხილავდა საქმეებს, ჩამოაშორეს ზემოაღნიშნული ყველა პოლიტიკური საქმის განხილვას. "არაერთხელ გვითქვამს, რომ ჩინჩალაძე-მურუსიძე ცდილობს სრულად დაიმორჩილოს ყველა მოქმედი მოსამართლე, ზუსტად ისე, როგორც ისინი თავად ემორჩილებიან ცნობილ ოლიგარქს და უსიტყვოდ ასრულებენ ნებისმიერ მის დაკვეთას იქნება ეს პოლიტიკურად მოტივირებული სისხლის სამართლის საქმეები, თუ პოლიტიკური კორუფციით გაჟღენთილი სამოქალაქო დავები. აქედან გამომდინარე, შეგვიძლია დავასკვნათ, რომ ამ შემთხვევაშიც აშკარად იკვეთება ჩინჩალაძე-მურუსიძის სინდიკატის ჩარევა მოსამართლის დამოუკიდებლობაში, რაც სისხლის სამართლის დანაშაულია. სანამ ისინი ივანიშვილის ფრთის ქვეშ არიან მოკალათებული, სწორედ ასეთი კრიმინალური მეთოდებით აგრძელებენ სასამართლო სისტემის მართვას და სწორედ ამიტომაც აქვს ჩვენი ქვეყნის მოქალაქეების აბსოლუტურ უმრავლესობას დაკარგული სამართლიანი სასამართლოს და ზოგადად სამართლიანობის განცდა, ამიტომაც გარბიან ქვეყნიდან ევროპასა და ამერიკაში. ალბათ, შორს არ არის ის დრო, როცა ყველას მოეკითხება… არავის შერჩება დამოუკიდებელი სასამართლო სისტემის რღვევა, სასამართლო ხელისუფლების მორჩილებაში ყოფნა და დამოუკიდებელ მოსამართლეებზე სათითაოდ ნადირობა, მათი ჩამოშორება განსახილველი საქმეებიდან და მართული მოსამართლეებით ჩანაცვლება.", - წერს ზაზა თავაძე.

საქართველოს პრეზიდენტი სალომე ზურაბიშვილი ლიეტუვის რესპუბლიკის სეიმის თავმჯდომარეს, ვიქტორია ჩმილიტე-ნიელსენს შეხვდა. პრეზიდენტის ადმინისტრაციის მიერ გავრცელებული ინფორმაციით, საუბარი შეეხო საქართველოსა და ლიეტუვას შორის ორმხრივი ურთიერთობების განვითარების საკითხს, მათ შორის საპარლამენტო ურთიერთობების მიმართულებით, ასევე, ქვეყნებს შორის დიპლომატიური ურთიერთობების 30 წლისთავს. „როგორც შეხვედრისას აღინიშნა, სეიმის ბოლო რეზოლუცია ხაზს უსვამს ჩვენი ორი ქვეყნის საერთო ღირებულებებზე დაფუძნებულ მჭიდრო კავშირებს და საქართველოს მიმართ ლიეტუვის მუდმივ მხარდაჭერას. საქართველოს პრეზიდენტმა ლიეტუვის სეიმის თავმჯდომარესთან შეხვედრისას უკრაინაში მიმდინარე ომი და რეგიონში შექმნილი ვითარება განიხილა და კიდევ ერთხელ, ქართველი ხალხის სახელით გამოხატა სოლიდარობა უკრაინის მიმართ. ევროკავშირში ინტეგრაციის პროცესზე საუბრისას საქართველოს პრეზიდენტმა ხაზი გაუსვა იმ საკითხს, რომ ევროკავშირში გაწევრიანება საქართველოს მოსახლეობის უდიდესი ნაწილის ურყევი ნებაა და სწორედ ამის გამოხატულება იყო მარტში გამართული აქციები. ევროინტეგრაციის პროცესში ამ ეტაპზე საჭიროა, რომ ქართველმა ხალხმა მიიღოს ძლიერი გზავნილი და დაინახოს, რომ ევროპა მის გვერდით დგას. საქართველოს პრეზიდენტის ვიზიტი და 18 აპრილს ევროპარლამენტის წინაშე სიტყვით გამოსვლა კი სწორედ იმ მიზანს ემსახურება, რომ ევროკავშირმა გაიგოს ქართველი ხალხის ურყევი ნება და კიდევ ერთხელ დაინახოს, რომ საქართველო იმსახურებს კანდიდატის სტატუსს. შეხვედრისას ისაუბრეს საქართველოს ოკუპირებულ ტერიტორიებზე შექმნილ მძიმე ჰუმანიტარულ მდგომარეობაზე და რომ ევროინტეგრაცია არის ასევე უდიდესი შესაძლებლობა ოკუპირებულ ტერიტორიებზე მცხოვრები ხალხისთვის. ხაზი გაესვა ნატო-საქართველოს ურთიერთობების გაძლიერებისა და განვითარების საკითხში ლიეტუვის როლის მნიშვნელობას. ასევე, აღინიშნა, რომ ევროატლანტიკური სივრცის გაფართოებისას საქართველო არ უნდა დარჩეს მის მიღმა და ნატო-ს ვილნიუსის სამიტზე საჭიროა საქართველოს უმაღლეს დონეზე ჩართულობა“, – აღნიშნულია პრეზიდენტის ადმინისტრაციის მიერ გავრცელებულ ინფორმაციაში.

რეგლამენტით გათვალისწინებულია ე.წ საკანონმდებლო წინადადება, რომელიც ნებისმიერ მოქალაქეს შეუძლია, შემოიტანოს, ჩვენ, მათ შორის ჩვენი უცხოელი პარტნიორების დახმარებით, როდესაც განვიხილავდით რეგლამენტს, გაკეთდა ამ ინსტრუმენტის ანალიზიც და ჩანს, რომ, თუ არ ვცდები, ბოლო ორი-სამი წლის განმავლობაში 500 საკანონმდებლო წინადადება იყო შემოსული, საიდანაც გაზიარებული იქნა, საბოლოო ჯამში, სამი თუ ოთხი, – ამის შესახებ საქართველოს პარლამენტის თავმჯდომარემ, შალვა პაპუაშვილმა ბიუროს სხდომაზე განაცხადა. პაპუაშვილის განცხადებით, პარლამენტის აპარატი მნიშვნელოვან რესურსს ხარჯავს იმაში, რომ მოქალაქეთა წინადადებები განიხილოს, შედეგი კი არ არის, ამიტომ პარლამენტის თავმჯდომარე გამოვიდა ინიციატივით, რომ აღნიშნულ საკითხზე მსჯელობა დაიწყოს. პაპუაშვილის თქმით, კარგი იქნება, თუ რაიმე რეგულაცია გაკეთდება, რომ პარლამენტს, მათ შორის, ზედმეტი ფინანსური ხარჯი არ ჰქონდეს. „ძირითადად არის რამდენიმე მოქალაქე, რომელიც მომართავს პარლამენტს საკანონმდებლო წინადადებით, ხშირ შემთხვევაში ხდება ხოლმე ერთსა და იმავე საკითხში და წინადადებაში ერთი სიტყვის შეცვლა და ხელახლა შემოტანა. საერთო ჯამში, ჩემი აზრით, ბოროტად სარგებლობენ ამ უფლებით, რომ პარლამენტი დაკავდეს საკითხებით, რომლითაც, როგორც ჩანს, ისინი ერთ დეპუტატსაც ვერ პოულობენ, რომელიც შეუძლიათ, დაარწმუნონ და ის საკანონმდებლო ინიციატივით შემოვიდეს ამ საკითხზე. მოვიკვლიეთ, დაახლოებით რა ჯდება საკანონმდებლო წინადადების განხილვა, ყველაზე მინიმალური დათვლითაც დაახლოებით 500 ლარი არის ღირებულება იმ შრომისა, რომელსაც გასწევს პარლამენტის აპარატის სხვადასხვა მოხელე თუ დეპუტატები. გაზიარების დონე არის ძალიან დაბალი. რიგ შემთხვევაში კურიოზული საკითხები გააქვთ ხოლმე საჯაროდ, თითქოს პარლამენტი განიხილავს ხან ჟანდარმერიის შემოღებას, ხან რას და ხან რას. ეს არის წრე, ალბათ ხუთი მოქალაქის, რომელმაც რატომღაც თავის ამოცანად დაისახა პარლამენტისთვის სხვადასხვა ასეთი სახის წინადადების წარდგენა. მე ძალიან უცნაურად მეჩვენება ეს ინსტრუმენტი. რამდენადაც ვიცი, არცერთ ქვეყანაში ასეთი რამ არ არის, რომ ერთ ადამიანს შეეძლოს, ფურცელზე დატანილი რაღაც იდეა წარადგინოს, რომელზეც შემდეგ პარლამენტი, ბიურო, კომიტეტი, აპარატი – ყველა იწყებს მსჯელობას. საბოლოო ჯამში, არის, მათ შორის, ჩვენი მოქალაქეების მიერ გადახდილი გადასახადების არაეკონომიური ხარჯვა. მგონი, კარგი იქნება, თუ რაიმე რეგულაცია გაკეთდება“, – განაცხადა პაპუაშვილმა. პარლამენტის თავმჯდომარის განცხადებას გამოეხმაურა ოპოზიციონერი დეპუტატი დავით უსუფაშვილი. მისი თქმით, მზად არის აღნიშნული საკითხის განხილვაში ჩაერთოს. უსუფაშვილის განცხადებით, შესაძლებელია მექანიზმის მოძიება, რომ არც მოქალაქეთა ინტერესები დაზარალდეს და არც – პარლამენტის. „მზად ვარ, ვიფიქროთ იმაზე, რომ ასეთ საკითხებზე ჩვენ გვქონდეს განსხვავებული მექანიზმი, რომელიც მოქალაქეებს თავიანთი მოსაზრებების მოწოდების საშუალებას არ შეუზღუდავს, მაგრამ, მეორე მხრივ, ორი და სამი წელი უპასუხოდ არ დარჩებიან. კერძოდ, შეგვიძლია, ვიმუშაოთ და რეგლამენტში ჩავდოთ ასეთი მექანიზმი, რომ საკანონმდებლო წინადადების წესით შემოსული დოკუმენტი, თუ ორი თვის განმავლობაში რომელიმე საკანონმდებლო ინიციატივის სუბიექტმა არ აქცია საკანონმდებლო ინიციატივად, პარლამენტის წევრმა ან კომიტეტმა, მაშინ ითვლება უარყოფილად. კომიტეტებიც განვტვირთოთ ამ თემიდან. ორი თვე არის გონივრული ვადა, შემოსული წინადადება ჩავთვალოთ, რომ იმსახურებს ინიციატივობას და თუ არა, მოქალაქესაც ეცოდინება, რომ ორი თვე გავიდა, მორჩა. გადავდგათ ნაბიჯები იქით, რომ არც სხვას შევუზღუდოთ რამე და არც ჩვენ აღმოვჩნდეთ ასეთ ვითარებებში“, – განაცხადა უსუფაშვილმა. ავტორი - ეკატერინე კოპალიანი

ფინეთი ნატო-ს სამშაბათს, 4 აპრილს შეუერთდება, – ამის შესახებ ნატო-ს გენერალურმა მდივანმა, იენს სტოლტენბერგმა განაცხადა. „ეს არის ნაბიჯი, რომელიც ფინეთს – უფრო უსაფრთხოს, ხოლო ალიანსს უფრო ძლიერს გახდის. ჩვენ პირველად ავწევთ ფინეთის დროშას ნატო-ს შტაბ-ბინაში“, – განაცხადა სტოლტენბერგმა. სტოლტენბერგმა ასევე აღნიშნა, რომ ფინეთის ნატო-ში გაწევრიანების შედეგად შვედეთიც უფრო უსაფრთხო გახდება. ავტორი - თამთა რუხაძე

თუკი უკრაინა გაიმარჯვებს, გაიმარჯვებს საქართველოც, თუ უკრაინა დამარცხდება, ჩვენ ყველანი დავმარცხდებით, საქართველოს ჩათვლით. და ეს არ ნიშნავს არავის ომში ჩათრევას - ესაა იმ ქვეყნის დახმარება, რომელიც თავისუფლებისთვის იბრძვის, - ამის შესახებ ლატვიის საგარეო საქმეთა მინისტრმა ედგარს რინკევიჩმა „ამერიკის ხმის“ ქართულ რედაქციასთან ინტერვიუში განაცხადა. მისი თქმით, საქართველოს უნდა ესმოდეს, რომ ის, რაც ახლა ევროპაში ხდება - რუსეთის აგრესია უკრაინის მიმართ - ძალიან დიდ გავლენას ახდენს საქართველოს მომავალზეც. „თქვენ ან ისტორიის სწორ მხარეს დგახართ, ან - არა. ეს არჩევანი საქართველოს გასაკეთებელია. ჩვენ აქ ვართ, რომ დაგეხმაროთ, მაგრამ ჩვენ არ ვართ იმისთვის, რომ მთავრობას თავს რაიმე მოვახვიოთ. უბრალოდ, შემდეგ, მთავრობას ნუ გაუკვირდება, რომ ის საკანონმდებლო რეფორმის პროცესები, რომლებსაც ჩვენ მივიჩნევთ, რომ მცდარი მიმართულებით მიდის, არ იქნება გულთბილად მიღებული. არჩევანი საქართველოსა და მისი მთავრობის გასაკეთებელია, თუმცა თუ გადადგმული ნაბიჯები არ შეესაბამება ევროკავშირის პარტნიორი ქვეყნის ქმედებებს, მაშინ თბილისს არ უნდა გაუკვირდეს, რომ შესაძლოა, არც ევროკავშირმა გადადგას ნაბიჯები საქართველოს ბლოკში მისაღებად. ჩვენ ევროკომისიისგან ველოდებით ანგარიშს სამივე ქვეყნის შესახებ - ესენია უკრაინა, მოლდოვა და საქართველო. იცით, შეიძლება გქონდეს ფორმალური კრიტერიუმები, შეიძლება გამოსცე ძალიან ბევრი კანონი, ან განაცხადო, რომ შეასრულე 226 ან 295 რეკომენდაცია და ბევრი დიდებული რამ გააკეთე, მაგრამ თუკი არ არის ღირებულებათა ის ევროპული სული, თუკი ადამიანის უფლებები და კანონის უზენაესობა არაა უზრუნველყოფილი, მაშინ ეს ქვეყანა ვერ წავა წინ როგორც ევროკავშირის წევრობის კანდიდატი და როგორც წევრი. საბოლოოდ, ეს საქართველოს მთავრობის გადასაწყვეტია: მართლაც სურს თუ არა საქართველოს განაგრძოს ევროპულ გზაზე სიარული: სურს გახდეს კანდიდატი და ამის შემდეგ მიღების თაობაზე მოლაპარაკებებიც დაიწყოს და წინ წავიდეს, თუ, გადაწყვეტს, რომ უგულებელყოს ჩვენი მეგობრული რჩევები. მაგრამ მაშინ მოდით, ნუ გვექნება მოლოდინი, რომ იქნება ევროკავშირის ბევრი წევრი სახელმწიფო, რომელიც იტყვის, რომ საქართველო მზადაა შემდეგი ნაბიჯისთვის“, - განაცხადა ლატვიის პირველმა დიპლომატმა. მან ამასთანავე აღნიშნა, რომ ლატვიას ძალიან აწუხებს ყოფილი პრეზიდენტის მიხეილ სააკაშვილის ჯანმრთელობის მდგომარეობა. „ჩვენ ძალიან გვაწუხებს ყოფილი პრეზიდენტის, მიხეილ სააკაშვილის ჯანმრთელობის მდგომარეობა. ჩვენ არ ვაყენებთ ეჭვქვეშ სასამართლოს გადაწყვეტილებებს. ჩვენ ვაკვირდებით მისი ჯანმრთელობის მდგომარეობას, გვჯერა, რომ გონივრული და დროული იქნებოდა გადაწყვეტილება მისი სამედიცინო მკურნალობის მიღების მიზნით გათავისუფლების შესახებ“,- განაცხადა ედგარს რინკევიჩმა. იპნ

პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ბრალდებული, ლაზარე გრიგორიადისის ადვოკატის, ლიკა ბითაძის განცხადებით, სამართალდამცველები დაკავების დროს აღიარებითი ჩვენების არ მიცემის შემთხვევაში მეგობრის დაკავებით დაემუქრნენ. როგორც ადვოკატმა გრიგორიადისის გლდანის მე-8 პენიტენციურ დაწესებულებაში მონახულების შემდეგ აღნიშნა, დაკავების დროს მისი უფლებები დაირღვა. „ვესაუბრეთ ლაზარეს და მან თავიდან ბოლომდე ყველაფერი მოგვიყვა. მისი სურვილია, რომ გავაჟღერო ყოველივე. ადვოკატის ნაწილში ცალსახად მისი უფლებები დაირღვა. მან განმარტა, რომ იგი ითხოვდა ადვოკატს, მას კი ადვოკატი არ მიუყვანეს. დაკავებისას მას მიაწოდეს მისი ტელეფონი და უთხრეს, რომ დაერეკა ადვოკატისთვის. მან, როცა მისი ტელეფონის კოდი აკრიფა, ტელეფონი ხელიდან გამოგლიჯეს და ადვოკატთან არ დაარეკინეს. მისი თქმით, სავარაუდოდ მასთან ვინმე დეპარტამენტის უფროსი შევიდა, რომლის სახელი და გვარი არ იცის, უფროსს ჰგავდაო. ის შევიდა მასთან და უთხრა, რომ ადვოკატს არ მოგიყვანთო. ამავე დროს, თუ ის ჩვენებას არ მისცემდა, ეს უნდა ყოფილიყო აღიარებითი ჩვენება, ამ შემთხვევაში მის მეგობარს, გიორგი ჯარიაშვილს დააკავებდნენ. ამ ეტაპზე ისევ დუმილის უფლებას გამოვიყენებო. აქციაში მონაწილეობას, რა თქმა უნდა, არ უარყოფს. პირველივე სასამართლოზე მივცემ ჩვენებას რა იყო რეალურადო“, - განაცხადა ბითაძემ. ამასთან, ადვოკატის თქმით, ლაზარე გრიგორიადისის ციხეში მისი სურვილის საწინააღმდეგოდ თმა გადაპარსეს. „ციხის, პენიტენციურის პირობებში არის ნორმალურ პირობებში, როგორც თვითონ განმარტა. უბრალოდ, ერთადერთი შენიშვნა ჰქონდა იმასთან დაკავშირებით, რომ მე არ მინდოდაო თმის გადაპარსვაო და თმა გადამპარსესო“, - აღნიშნა ბითაძემ. ინტერპრესნიუსი

საქართველოს პრეზიდენტი სალომე ზურაბიშვილი ლიეტუვაში ოფიციალური ვიზიტისას ლიეტუვის რესპუბლიკის პრემიერ-მინისტრს ინგრიდა შიმონიტეს შეხვდა. პრეზიდენტის ადმინისტრაციის ცნობით, შეხვედრისას ხაზი გაესვა, საქართველოს პრეზიდენტის ვიზიტის მნიშვნელობას, როგორც რეგიონში შექმნილი გეოპოლიტიკური ვითარებიდან ასევე, საქართველოს ევროპული ინტეგრაციის პროცესის გადამწყვეტი ეტაპიდან გამომდინარე. საქართველოს პრეზიდენტმა ხაზი გაუსვა ლიეტუვას მუდმივი და მტკიცე მხარდაჭერის მნიშვნელობას საქართველოს სუვერენიტეტისა და ევროპული გზის მიმართ. მხარეებმა ისაუბრეს რეგიონში არსებულ ვითარებაზე, უკრაინაში მიმდინარე ომზე და რუსულ აგრესიაზე. პრეზიდენტმა კიდევ ერთხელ გამოხატა სოლიდარობა უკრაინისა და უკრაინელი ხალხის მიმართ და აღნიშნა, რომ საქართველომ არაერთხელ საკუთარ თავზე გამოსცადა რუსული აგრესია და ის, რაც დღეს უკრაინაში ხდება. საუბარი შეეხო საქართველოს ევროკავშირის კანდიდატი ქვეყნის სტატუსის მიღების მნიშვნელობას და აღინიშნა, რომ ეს უნდა იყოს როგორც პოლიტიკური, ასევე დამსახურებაზე დაყრდნობილი გადაწყვეტილება. პრეზიდენტის განცხადებით, დღეს ქართველი ხალხი გაერთიანებულია ერთი საერთო მიზნის გარშემო და ეს საქართველოს ევროპული მომავალია, ეს კი დეპოლარიზაციისკენ წინგადადგმული ნაბიჯია. მხარეებმა საქართველოს ევროატლანტიკური ინტეგრაციის პროცესი განიხილეს. აღინიშნა, რომ საჭიროა ნატოს მომავალ სამიტზე, რომელიც ვილნიუსში 11-12 ივლისს გაიმართება, საქართველო უმაღლესი დონით იყოს წარმოდგენილი. ხაზი გაესვა იმ გარემოებას, რომ საქართველო ალიანსის საიმედო პარტნიორია. იპნ