tvati

„ბიბისი“ აპროტესტებს, რომ „ტვიტერში“ ტელეკომპანიის მთავარი გვერდი მონიშნეს, როგორც „მთავრობის მიერ დაფინანსებული მედია“. დიდი ბრიტანეთის საზოგადოებრივი მაუწყებელი უკვე დაუკავშირდა „ტვიტერის“ ხელმძღვანელობას, რათა აღნიშნული პრობლემა, რაც შეიძლება მალე მოგვარდეს. „ბიბისი“ ყოველთვის არის და იყო დამოუკიდებელი. ჩვენ გვაფინანსებს ბრიტანეთის საზოგადოება ლიცენზიის გადასახადის გზით“, – ნათქვამია „ბიბისის“ მიერ გავრცელებულ განცხადებაში. საპასუხოდ, „ტვიტერის“ მფლობელმა, ილონ მასკმა განაცხადა, რომ სოციალური ქსელი მიზნად ისახავს „მაქსიმალური გამჭვირვალობისა და სიზუსტის მიღწევას და ამიტომ, მედიის დაკავშირება მის მფლობელებთან და დაფინანსების წყაროებთან გონივრულია“. „მივიჩნევ, რომ მედიაორგანიზაციებმა თავადაც უნდა იცოდნენ და მცდარად არ უნდა ამტკიცებდნენ საკუთარ მიუკერძოებლობას. ყველა ორგანიზაცია არის მიკერძოებული. ზოგიერთი აშკარად უფრო მეტად, ვიდრე სხვები. აქვე უნდა აღვნიშნო, რომ მე ვარ „ბიბისის“ ახალი ამბების გვერდის გამომწერი „ტვიტერში“, რადგან ვფიქრობ, ის ყველაზე ნაკლებად მიკერძოებულ ორგანიზაციებს შორისაა“, – განაცხადა ილონ მასკმა. აღსანიშნავია, რომ მანამდე „ტვიტერის“ ქსელში „მთავრობის მიერ დაფინანსებულ მედიაორგანიზაციად“ მონიშნეს აშშ-ის საზოგადოებრივი მაუწყებელი „NPR“. ამის გამო „NPR“ -ში განაცხადეს, რომ ვიდრე ეს მონიშვნა არ მოიხსნება, ისინი „ტვიტერის“ გვერდზე ახალ ჩანაწერებს არ გამოაქვეყნებენ. ავტორი - ლევან ახალაია

დადგა ეტაპი, როცა მთავრობა უნდა ჩაერიოს რიგ საკითხებში. შეიძლება შემუშავდეს ნორმატიული ჩარჩო, რომელიც მინიმუმადე დაიყვანს სასამართლოზე პოლიტიკის გავლენას – ამის შესახებ საქართველოს უზენაესი სასამართლოს და იუსტიციის უმაღლესი საბჭოს თავმჯდომარემ, ნინო ქადაგიძემ განაცხადა. მისივე თქმით, ამასთან დაკავშირებით პრემიერ-მინისტრ ირაკლი ღარიბაშვილთან შეხვედრაზეც ისაუბრეს. „დამატებით ჩავთვალეთ საჭიროდ, რომ დადგა ეტაპი, როცა მთავრობა უნდა ჩაერიოს რიგ საკითხებში. ყოველ შემთხვევაში, ვთვლი, რომ გარკვეულ სწორ ხედვებზე დაფუძნებული ნორმატიული ჩარჩო შეიძლება იქნას შემუშავებული, რაზეც ბატონ ირაკლისაც ვესაუბრეთ, რომელიც ფაქტობრივად გამორიცხავს სასამართლოში რაიმე ფორმით ჩარევას, აგრეთვე, მინიმუმადე დაიყვანს სასამართლოში პოლიტიკის გავლენას. კიდევ ერთხელ მადლობას ვუხდი ბატონ ირაკლის და ვფიქრობ, მისი მხარდაჭერა, თანადგომა ძალიან მნიშვნელოვანია დღეს სასამართლო სისტემისთვის“, – განაცხადა ნინო ქადაგიძემ.

ევროკავშირმა ანტირუსული სანქციების ახალი, რიგით მე-11 პაკეტი შესაძლოა, აპრილში მიიღოს. მოსალოდნელია, რომ ბრიუსელი ყურადღებას უკვე დაწესებული შეზღუდვების თავიდან აცილების მექანიზმებზე გაამახვილებს, მათ შორის მესამე ქვეყნების ხარჯზე, შესაბამისად, მათ შესაძლოა, გავლენა მოახდინოს თურქეთზე, ყაზახეთსა და არაბულ ქვეყნებზე. სანქციების ახალ პაკეტზე საუბარი თითქმის მაშინვე დაიწყო, რაც 25 თებერვალს რუსეთის წინააღმდეგ მე-10 პაკეტი დამტკიცდა. როგორც Politico წერდა, ევროკავშირის ქვეყნები შემდეგი ანტირუსული შეზღუდვების განხილვას კათოლიკური აღდგომის დადგომისთანავე დაიწყებს. მანამდე, ევროკომისიის ხელმძღვანელმა ურსულა ფონ დერ ლაიენმა ხაზგასმით აღნიშნა, რომ ახალი პაკეტი მიმართული იქნება უკვე შემოღებული შეზღუდვების გვერდის ავლით წინააღმდეგ ბრძოლისთვის. ესტონეთის საგარეო საქმეთა მინისტრის, ურმას რეინსალუს განცხადებით, ამჯერად შემაკავებელი ზომები კიდევ უფრო მეტი რუსი ბიზნესმენის მიმართ უნდა შემოვიდეს. გარდა ამისა, მე-11 პაკეტი უნდა შეიცავდეს „მეორადი სანქციებს“ მათ მიმართ, ვინც ეხმარება მოსკოვს შეზღუდვების გვერდის ავლაში. ფინეთის საგარეო საქმეთა მინისტრის, პეკა ჰავისტომის აზრით კი, სიაში რუსი მაღალჩინოსნების მეტი ნათესავი უნდა იყოს შეყვანილი. სანქციების გვერდის ავლით ზომები შეიძლება გავრცელდეს სხვა ქვეყნებზეც, მაგრამ, სავარაუდოდ, ეს მოხდება ეტაპობრივად და არა ერთდროულად. ევროკავშირმა შესაძლოა სანქციები „როსატომის“ წინააღმდეგ დააწესოს, ვინაიდან ევროკავშირს აქვს განვითარებული ბირთვული ინდუსტრია. ევროკავშირის პრობლემა ის არის, რომ ევროპაში ურანის პოვნა რთულია, ის საზღვარგარეთ უნდა იყიდო. ურანის მნიშვნელოვან ნაწილს „როსატომის“ სტრუქტურები ყიდიან. შედეგად, ურანი შესაძლოა, მნიშვნელოვნად გაძვირდეს. ცნობისათვის, 2023 წელს რუსეთში მნიშვნელოვანი ტექნოლოგიებისა და საქონლის იმპორტის შეზღუდვამ შესაძლოა სულ უფრო მეტად გამოიწვიოს მათი წარმოების დეფიციტი, რადგან ბევრი მათგანი უბრალოდ არ შეიძლება ჩანაცვლდეს ან მიწოდებული იყოს როგორც პარალელური იმპორტი. დიდი ალბათობით, ამ პრობლემის გადაწყვეტა საშუალოვადიან პერსპექტივაშია, რაც დაკავშირებული იქნება იმასთან, შეძლებს თუ არა რუსეთი ამ პერიოდის განმავლობაში ამ საქონლის იმპორტის ჩანაცვლებას სხვა ქვეყნებიდან მიწოდებით. ავტორი: ეკა დარჩიაშვილი

საქართველოში რუსი მუშახელის მიზიდვა, თითქმის, ოთხჯერ გაიზარდა. ამის შესახებ რეკრუტირების პორტალ HeadHunter-ის (hh.ru) მონაცემებში არის ნათქვამი, რომელიც რეზიუმეებზე დამსაქმებელთა პასუხების მიხედვით არის გაანალიზებული. ანგარიში სააგენტო RBC-მ მოიპოვა. რუსი მუშახელის მასობრივი მიზიდვის მხრივ საქართველო რეიტინგში მესამე ადგილზეა. ქვეყანაში 2023 წლის პირველ კვერტალში რუსი მუშახელის 9,3 ათასი განაცხადი დაფიქსირდა, რაც გასული წლის პირველ კვარტალთან შედარებით 160%-ით მეტია. მაშინ საქართველოში დასაქმება სულ 3,6 ათას რუსს სურდა. რუსი მუშახელის მასობრივი მიზიდვის მხრივ ყაზახეთი ლიდერობს, სადაც განმცხადებელთა რაოდენობა 29,5 ათასს შეადგენს. შემდეგი ქვეყანა 20,5 ათასი რუსი განმცხადებლით ბელარუსია, ხოლო ათეულის ბოლო ქვეყანა არაბეთის გაერთიანებულ საემიროებია, სადაც მხოლოდ 2,2 ათასი განაცხადი დაფიქსირდა. 2023 წლის პირველ კვარტალში გასაუბრებაზე მიწვეულ რუს სამუშაოს მაძიებელთა რეზიუმეების რაოდნების მხრივ საზღვარგარეთის ქვეყნების ტოპ 10-ეული ასეთია: ყაზახეთი - 29,5 ათასი (+67%); 2022 წლის 1 კვარტალში 17,7 ათასი ბელარუსი - 20,5 ათასი (მინუს 15%); 2022 – 24,3 ათასი საქართველო - 9,3 ათასი (+160%); 2022 – 3,6 ათასი უზბეკეთი - 7 ათასი (+92%); 2022 – 3,6 ათასი ყირგიზეთი - 4,8 ათასი (+294%); 2022 – 1,2 ათასი თურქეთი - 4,6 ათასი (+384%); 2022 – 1 ათასი აშშ - 4,3 ათასი (+276%); 2022 - 1,2 ათასი სომხეთი - 4 ათასი (+198%); 2022 - 1,4 ათასი გერმანია - 2,9 ათასი (+129%); 2022 – 1,3 ათასი არაბეთის გაერთანებული საემიროები - 2,2 ათასი (+411%); 2022 – 0,4 ათასი ამასთან, ზოგიერთმა, ძირითადად, ევროპულმა ქვეყანამ რუსების სამუშაოდ მიწვევა, თითქმის, ან მთლიანად შეწყვიტა. მათ შორის არის ისლანდია, ნორვეგია, დიდი ბრიტანეთი, სლოვაკეთი, პოლონეთი. თუმცა გასულ წელს ამ ქვეყნებში რამდენიმე ასეული ვაკანსიის შეთავაზება მაინც დაფიქსირდა. აღსანიშნავია, რომ რუსეთის ორ მთავარ პარტნიორ ქვეყანაში, ჩინეთსა და ინდოეთში დამსაქმებლები რუს მუშახელს სულ უფრო ნაკლებად ეპატიჟებიან. ამ ქვეყნებში რეზიუმეებზე გამოხმაურებათა რაოდენობა მეოთხედნახევრით შემცირდა. მოამზადა ლადო სულაბერიძემ

თბილისში 150 მიუსაფარ ძაღლზე გათვლილი ახალი თავშესაფარი აშენდება, – ამის შესახებ დედაქალაქის მერმა კახა კალაძემ თბილისის მთავრობის სხდომაზე განაცხადა. ამასთან, კალაძემ აღნიშნა, რომ მზადაა ამ მიმართულებით კომპლექსური მუშაობისთვის. მისი თქმით, უპირველად უნდა განხორციელდეს საკანონმდებლო ცვლილებები.

გმირთა მოედანზე საგზაო მოძრაობის ორგანიზებაში ცვლილებები შედის. როგორც თბილისის მერმა, კახა კალაძემ დღეს მუნიციპალიტეტის მთავრობის სხდომაზე განაცხადა, დაგეგმილია სატრანსპორტო ნაკადების მოწესრიგება, გამტარუნარიანობისა და უსაფრთხოების გაზრდა მინიმალური ინფრასტრუქტურული ჩარევით. „მოგეხსენებათ, გმირთა მოედანი ქალაქის ერთ-ერთი პრობლემური სატრანსპორტო კვანძია, სადაც ბევრი ავტომობილი იყრის თავს და გადაადგილება შეუძლებელია, განსაკუთრებით, პიკის საათებში. ამ კვანძის ამჟამინდელი გეგმარებით, რამდენიმე მიმართულების კვეთა ხდება დარეგულირების გარეშე – ჭაბუა ამირეჯიბის გზატკეცილიდან, ასევე კოსტავას ქუჩისა და თამარ მეფის გამზირიდან, რაც ართულებს ნაკადების შეუფერხებელ გადაადგილებას. კვანძზე შუქნიშნის ობიექტის მოწყობით, არსებული ნაკადები დაიყოფა, რაც გააუმჯობესებს გამტარუნარიანობას. დაგეგმილი ცვლილებები დადებითად აისახება როგორც კერძო ავტომობილების, ასევე, საზოგადოებრივი ტრანსპორტის გადაადგილებაზე“, – განაცხადა კახა კალაძემ. მისივე თქმით, დაგეგმილ ცვლილებებზე უკვე მომზადდა სიმულაციური მოდელირება, რაც შერჩეული გადაწყვეტის ეფექტურობაზე მიუთითებს.

ხუმრობთ, რომ შეიძლებოდა, ეს ჩვენს თავზე მიგვეღო? ხაბეიშვილს და მარგველაშვილს გადეცით, ერთმანეთს მიხედონ. ხაბეიშვილმა და მარგველაშვილმა უნდა გადაწყვიტონ, ვინ არის ნამდვილი ოპოზიცია? სერიოზულიც არ არის, სასაცილოა, – ამის შესახებ პარტია „საქართველოსთვის“ წევრმა, მიხეილ დაუშვილმა განაცხადა. დაუშვილი გამოეხმაურა ლევან ხაბეიშვილის განცხადებას, სადაც „ნაციონალური მოძრაობის“ თავმჯდომარე ამბობს: „ერთხელ და სამუდამოდ ამ ქვეყანაში უნდა გაირკვეს, ვინ არის ნამდვილი და ვინ – თვითმარქვია ოპოზიცია“. ამასთან, მიხეილ დაუშვილმა ჟურნალისტებთან განმარტა, რატომ არ ესწრებოდა გუშინდელ აქციას პარტია „საქართველოსთვის“. „გუშინდელი აქცია „ნაციონალური მოძრაობის“ ვიწროპარტიული ინტერესებიდან გამომდინარე იყო. ჩვენ ამ აქციაზე რა გვინდოდა, რა საქმე გვქონდა. რაც შეეხება აქციას, რომელიც ზეპარტიულ ეროვნულ თემებსა და სახელმწიფო ინტერესებს ეხება, არცერთი ასეთი აქცია არ ყოფილა, სადაც ჩვენ მონაწილეობა არ მიგვიღია. გუშინდელი აქცია რატომ ვერ შედგა, ორგანიზატორებს ჰკითხეთ, ამ თემის განხილვაში არ შევალ. ცნობილია, რატომ არ ენდობიან და ვის ენდობიან ჩვენი მოქალაქეები. „ნაციონალურ მოძრაობას“ თუ, ზოგადად, ოპოზიციას ბოლო წლებია, არ ენდობიან და ამის გამოც არის „ქართული ოცნება“ ხელისუფლებაში. ეს სამწუხარო მოცემულობა და ფაქტია. ამას დასკვნების გამოტანა, თანმიმდევრულობა და ჩვენი მოქალაქეების დარწმუნება სჭირდება იმაში, რომ ჩვენ შეგვიძლია, ერთობლივად ვმართოთ ქვეყანა ისე, რომ პირველ პლანზე დავაყენოთ ქვეყნის ინტერესები და არა – ჩვენი ვიწროპარტიული ინტერესები. პირველ რიგში, ეს უნდა ვაჩვენოთ ჩვენს მოქალაქეებს და პარტნიორებს“, – განაცხადა მიხეილ დაუშვილმა. ავტორი - მანანა დევაძე

კონცეფცია ახალ რესპუბლიკურ საავადმყოფოსთან დაკავშირებით არის ადეკვატური, სწორი და მართებული, – აღნიშნულის შესახებ ჯანმრთელობის დაცვისა და სოციალურ საკითხთა კომიტეტის თავმჯდომარემ, ზაზა ლომინაძემ თბილისის რესპუბლიკური საავადმყოფოს კონცეფციის პრეზენტაციაზე განაცხადა. ლომინაძეს განმარტებით, ჯანდაცვის კომიტეტი აღნიშნულ პროცესში აქტიურადაა ჩართული. „დღევანდელი შეხვედრა სამედიცინო საზოგადოებასთან ძალიან მნიშვნელოვანი იყო. ის გარანტიები, რაც პრემიერ-მინისტრმა და მინისტრმა ბრძანეს, ეს გარანტიები არის და იქნება შესრულებული. ყველაფერი მკაცრი კონტროლის ქვეშ გვეყოლება. ჩვენი კომიტეტი, ჯანდაცვის სამინისტროსთან ერთად, აქტიურად ვართ ჩართული ამ პროექტის განხორციელებაში. კონცეფცია იყო სწორი და ადეკვატური“, – განაცხადა ზაზა ლომინაძემ. აკად. ნ. ყიფშიძის სახელობის ცენტრალურ საუნივერსიტეტო კლინიკასთან დაკავშირებით, სამომავლო გეგმებისა და კონცეფციის პრეზენტაცია გაიმართა. თბილისის რესპუბლიკური საავადმყოფოს თანამშრომლებსა და მოწვეულ სტუმრებს ჯანდაცვის მინისტრმა, ზურაბ აზარაშვილმა მიმართა და მაღალტექნოლოგიური, საერთაშორისო სტანდარტების შესაბამისი სახელმწიფო კლინიკის მნიშვნელობაზე გაამახვილა ყურადღება. ღონისძიებაზე რესპუბლიკური საავადმყოფოს თანამშრომლებს შესაძლებლობა ჰქონდათ, კლინიკასთან დაკავშირებით არსებულ გეგმებზე ინფორმაცია მიეღოთ. პრეზენტაციაზე განიხილეს კლინიკაში არსებული გამოწვევები და მათი გადაჭრის გზები. იმსჯელეს ამ კუთხით არსებულ საერთაშორისო გამოცდილებასა და საუკეთესო პრაქტიკაზე. აღინიშნა, რომ, მრავალი ევროპული ქვეყნის პრაქტიკის შესაბამისად, აუცილებელია სახელმწიფო, ცენტრალური, მულტიფუნქციური კლინიკის არსებობა ქალაქის ცენტრში. ინფორმაციას ჯანდაცვის სამინისტრო ავრცელებს.

დროებითი საგამოძიებო კომისიის შექმნას ვინც ითხოვს, თავადაც გადასარევად ხვდება, რომ ეს არასწორია, მათ შორის არათავსებადია კონსტიტუციურ წესრიგთან, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ საქართველოს პირველ არხს განუცხადა. მისივე თქმით, არ შეიძლება, მოსამართლეების გათავისუფლების საკითხი პოლიტიკური ხელისუფლების მხრიდან განიხილებოდეს. როგორც სარჯველაძემ აღნიშნა, ოპოზიციის მიზანი აჟიოტაჟის შექმნაა. „სასამართლო ხელისუფლების დამოუკიდებლობა არ უშვებს შესაძლებლობას, რომ რომელიმე სხვა პოლიტიკურ ხელისუფლებაში განიხილებოდეს სასამართლო ხელისუფლების თანამდებობის პირთა ავკარგიანობისა და ამაზე რეაგირების საკითხი. არ შეიძლება, მოსამართლეების გათავისუფლების საკითხი პოლიტიკური ხელისუფლების მხრიდან განიხილებოდეს. ამას ყველამ ანგარიში უნდა გაუწიოს. მათი მიზანია აჟიოტაჟის შექმნა და ამ თემის კიდევ უფრო ცხელ პოლიტიკურ თემად გადაქცევა, რაც არ არის კარგი პროცესი, მათ შორის სასამართლოს დამოუკიდებლობისთვის“, – განაცხადა მიხეილ სარჯველაძემ. ავტორი - თეონა მანაგაძე

რუსეთის მიერ ოკუპირებული აფხაზეთის დე ფაქტო ხელისუფლებამ დღეს, 10 აპრილს გახსნა დანარჩენ საქართველოსთან გასული კვირის ბოლოს ჩაკეტილი ე.წ. საზღვარი. რადიო თავისუფლების კორესპონდენტის ინფორმაციით, მოქალაქეებს ორმხრივად გადაადგილება ისევ შეუძლიათ ორივე, ე.წ. გამშვები პუნქტით - ენგურის ხიდით, რომელიც ოკუპირებული გალის რაიონის სოფლებს ზუგდიდის მუნიციპალიტეტთან აკავშირებს და საბერიო-ფახულანის პუნქტით, რომელიც აფხაზეთის გალის რაიონის და სამეგრელოს წალენჯიხის მუნიციპალიტეტის ადმინისტრაციულ საზღვარზე მდებარეობს. „საერთოდ, დილით 8 საათზე იხსნება ხიდი და უკვე ამ დროიდან იყო ხალხის რიგი. ყველას ზუგდიდში უნდოდა წასვლა, მაგრამ 10 საათამდე გვალოდინეს. მგონია, რომ ბრძანებას ელოდებოდნენ. თვითონაც არ იცოდნენ, რა ექნათ. შაბათი-კვირას არ ჰქონდათ ინფორმაცია, რა გადაწყვეტილება ჰქონდა „მთავრობას“. როგორც კი დაურეკეს, მოგვცეს წასვლის უფლება“, - უთხრა რადიო თავისუფლებას ოკუპირებული გალის რაიონის ერთ-ერთმა მცხოვრებმა, რომელმაც ე.წ. საზღვარი ენგურის ხიდის გავლით გადმოკვეთა. საბერიო-ფახულანის ე.წ. გამშვები პუნქტის გახსნა დაგვიდასტურა წალენჯიხის მუნიციპალიტეტის მერის მოადგილემ, თამარ ბელქანიამ. ასევე ნახეთ ენგურის ხიდი ცალმხრივად ჩაიკეტა ასევე ნახეთ ჩაიკეტა ფახულანი-საბერიოს ე.წ. გამშვები პუნქტიც აფხაზეთის დე ფაქტო მთავრობამ ე.წ. საზღვრის გადაკვეთა 7 აპრილს, დილიდან შეზღუდა. საბერიო-ფახულანის „გამშვები პუნქტის“ გავლით მიმოსვლა ორივე მხრიდან აიკრძალა, ენგურის ხიდის გავლით კი, გადაადგილება შეეძლოთ მხოლოდ მათ, ვინც სამეგრელოს რეგიონიდან ბრუნდებოდნენ ოკუპირებულ აფხაზეთში. ადგილობრივი მოსახლეობისთვის გადაწყვეტილების მიზეზი არავის განუმარტავს. კრემლის მიერ კონტროლირებული მედიით 7 აპრილს გავრცელდა აფხაზეთის დე ფაქტო რესპუბლიკის უშიშროების სამსახურის განმარტება, რომ მიზეზი „საქართველოში შექმნილი საზოგადოებრივ-პოლიტიკური სიტუაციაა“. კონკრეტულად რა იგულისხმებოდა, ამ შეტყობინებიდან არ ჩანდა. ოკუპირებული გალის რაიონის მცხოვრებთა ნაწილმა აკრძალვა დაუკავშირა თბილისში, 9 აპრილის საპროტესტო აქციას. 8 აპრილს გამოქვეყნდა აფხაზეთის ე.წ. უშიშროების სამსახურის განცხადება, რომ „ნაციონალური მოძრაობის“ მიერ 9 აპრილს, თბილისში დანიშნულ აქციაში მონაწილეობისთვის „მასობრივად“ ხდება „აფხაზეთიდან ე.წ. დევნილების“ და გალის რაიონის მცხოვრებთა ჩართვა, ამიტომ, 7 აპრილიდან მიმოსვლა შეიზღუდა, რათა მინიმუმამდე იყოს დაყვანილი „დესტრუქციულ პროცესებში“ აფხაზეთის მცხოვრებთა მონაწილეობა. radio tavisupleba

აღდგომის ღამეს თბილისში მეტრო 04:00 საათამდე იმუშავებს. თბილისის მერმა კახა კალაძემ 16 და 17 აპრილს საზოგადოებრივი ტრანსპორტის დროებით შეცვლილ განრიგებზე დედაქალაქის მთავრობის სხდომაზე ისაუბრა. თბილისის მეტრო 15 აპრილის 23:00 საათიდან უფასო იქნება და ნაცვლად 00:00 საათისა, იმუშავებს 04:00 საათამდე; გარდა ამისა, 16 და 17 აპრილს დაწესდება ავტობუსის დროებითი მარშრუტები, რომლებიც 08:00-დან 20:00 საათამდე იმოძრავებენ მუხათგვერდის, ვაშლიჯვრის, კუკიის, ახალი კუკიის, მახათის, საბურთალოს, ღრმაღელის, ველისა და ვარკეთილის სასაფლაოების მიმართულებებით. "აღნიშნულ მარშრუტებზე მოძრავი ავტობუსები მგზავრებს მოემსახურება უფასოდ. ავტობუსები იმოძრავებენ მეტროსადგურებიდან „მარჯანიშვილი“, „დიდუბე“, „დელისი“, „სარაჯიშვილი“, „ვარკეთილი“, ასევე, სადგურის მოედნიდან, ბესარიონ ჭიჭინაძის ქუჩიდან და ვარკეთილის III მასივიდან, კერძოდ, შუამთისა და აბაშვილის ქუჩების გადაკვეთიდან", - თქვა კახა კალაძემ. 16 აპრილს საქართველოს მართლმადიდებელი ეკლესია აღდგომის დღესასწაულს აღნიშნავს. ღამით ყველა მოქმედ ეკლესიაში სააღდგომო ლიტურგია გაიმართება. radio tavisupleba

თბილისის ვიცე-მერის, ირაკლი ხმალაძის განცხადებით, მერიას ჯერჯერობით მთავრობის ადმინისტრაციის შენობის წინ სკვერის მოწყობის შესახებ თანხმობა არ გაუცია, მაგრამ ნებართვის გაცემას გეგმავენ. მისივე თქმით, მთავრობის ადმინისტრაციის მიმდებარე ტერიტორია ისტორიული ზონაა, რისთვისაც პროექტის დამტკიცებამდე საბჭოს თანხმობაა საჭირო, ხოლო ტენდერის გამოცხადება საჭირო არ არის. „მთავრობის ადმინისტრაციის წინ სკვერის მშენებლობის შესახებ მერიაში პროექტი გასულ კვირას შემოვიდა, დღე არ მახსოვს. ჯერჯერობით თანხმობა გაცემული არ არის. ამ პროცესში გარემოს დაცვის და არქიტექტურის სამსახურია ჩართული, მას შემდეგ, რაც თანხმობა გაიცემა, სამუშაოები ჩატარდება. ჯერჯერობით სამუშაოები არ დაწყებულა, მოსამზადებელი სამუშაოები ჩატარდა. როგორც ვიცი, ადგილზე მასალები მიიტანეს, მაგრამ ღობის მომზადება არ დაწყებულა. შესაძლოა, თხრილები ღობის განთავსების მიზნით გაკეთდა. ჩვენ ადგილზე, რაც ვნახეთ, სამუშაოები დაწყებული არ არის, მაგრამ ყველაზე მთავარი არის ის, რომ კარგი პროექტია და მერია იმუშავებს, ვეცდებით ძალიან მალე გავცეთ თანხმობა. ამას მშენებლობის ნებართვა არ სჭირდება, ეს არის პირველი კლასის ნაგებობა, ამაზე თანხმობას მუნიციპალიტეტი გასცემს. მართალია ისტორიული ზონაა, ამისთვის საბჭოს თანხმობაა საჭირო, ხოლო ტენდერის გამოცხადება არა. რაც შეეხება შემსრულებელ კომპანიას, ამის შესახებ ინფორმაცია არ მაქვს. ჩემთვის მნიშვნელოვანია, რომ იქ სკვერი კეთდება, რაც ძალიან კარგია, ამის თანხმობაზე მუნიციპალიტეტი მუშაობს, უმოკლეს დროში თანხმობას გავცემთ, თუ საბჭოსთან ვიზუალი არის შესათანხმებელი, შევათანხმებთ“, - განაცხადა ხმალაძემ. IPN

11 აპრილს პარლამენტის რიგგარეშე სხდომის მოწვევის მოთხოვნით ოპოზიციონერი დეპუტატები პრეზიდენტს მიმართავენ. სალომე ზურაბიშვილთან გაგზავნილ მოთხოვნას 46 დეპუტატი აწერს ხელს. პარლამენტის რიგგარეშე სხდომის დღის წესრიგის ერთადერთი საკითხი „რეფორმების ჯგუფის" მიერ ინიცირებული დადგენილების პროექტის მიღება იქნება, რომელიც სასამართლოს სისტემაში კორუფციულ და სხვა კანონსაწინააღმდეგო ქმედებათა შემსწავლელი დროებითი საგამოძიებო კომისიის შექმნას ითვალისწინებს. პარლამენტის დროებითი საგამოძიებო კომისიის გამოსაკვლევი საკითხები უნდა იყოს: სასამართლო სისტემაში მოსამართლეთა გავლენიანი ჯგუფის არსებობა, რომელიც უკანონოდ ერევა მართლმსაჯულების განხორციელებასა და მოსამართლეთა შერჩევა-დაწინაურებაში, მოსამართლეებზე უკანონო ზემოქმედების, კორუფციისა და ნეპოტიზმის სავარაუდო ფაქტები. „2023 წლის 5 აპრილს ამერიკის შეერთებული შტატების სახელმწიფო დეპარტამენტმა საქართველოს სამ მოქმედ და ერთ ყოფილ მოსამართლეს სანქციები დაუწესა. კერძოდ, მათ გაუუქმდათ მოქმედი ვიზები მნიშვნელოვანი კორუფციული საქმიანობის გამო. აღნიშნულმა პირებმა, ბოროტად გამოიყენეს მათი თანამდებობა როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა, რითაც ზიანი მიაყენეს სამართლის უზენაესობასა და საზოგადოების ნდობას საქართველოს სასამართლო სისტემის მიმართ", - აღნიშნულია პრეზიდენტისადმი გაგზავნილ მოთხოვნაში. IPN

უკრაინის შეიარაღებული ძალების საჰაერო ძალებმა მოწინააღმდეგის ექვს პოზიციას დაარტყეს, ხოლო სარაკეტო და საარტილერიო დანაყოფებმა მთელი დღის განმავლობაში კიდევ 11 დაარტყმა განახორციელეს მათი მიმართულებით. ამის შესახებ უკრაინის შეიარაღებული ძალების გენერალური შტაბის 9 აპრილის 18:00 საათის მონაცემებშია აღნიშნული. 2022 წლის 24 თებერვლიდან, ომის დაწყებიდან 2023 წლის 9 აპრილამდე უკრაინის თავდაცვის ძალებმა 178 150 რუსი აგრესორი გაანადგურეს, მათ შორის 470 ჯარისკაცი მხოლოდ გასული დღის განმავლობაში. იპნ

103 წლისა გარდაიცვალა ნიურნბერგის სასამართლო პროცესის უკანასკნელი გადარჩენილი პროკურორი, ბენჯამინ ფერენცი. ფერენცი 1920 წელს დაიბადა უნგრეთში. ის ერთი წლისაც არ იყო, როცა მისი ოჯახი შეერთებულ შტატებში გადავიდა, უნგრეთში ებრაელების დევნას გაექცა. მან ჰარვარდში სამართალი ისწავლა და 1945 წელს შეუერთდა ჯგუფს, რომელიც აგროვებდა ნაცისტური არმიის სამხედრო დანაშაულების მტკიცებულებებს, კერძოდ კი, მუშაობდა ამერიკული არმიის მიერ გათავისუფლებულ საკონცენტრაციო ბანაკებში. 27 წლის ასაკში ის გახდა ნიურნბერგის პროცესის - ომის დამნაშავეების სასამართლო პროცესის - პროკურორი. ფერენცი ე.წ. "აინზაცგუპენის" - ესეს-ის ქვედანაყოფის საქმეზე ბრალმდებლის როლში იყო. „აინზატცგრუპენი“ ადამიანების მასობრივ განადგურებაში მონაწილეობდა აღმოსავლეთ ევროპისა და სსრკ-ს ოკუპირებულ ტერიტორიებზე. საქმეში 22 ბრალდებული იყო, რომელთაც მთლიანობაში 1 მილიონზე მეტი ადამიანის მკვლელობა ედებოდათ ბრალად. ყველა მათგანი დამნაშავედ ცნეს, 13-ს - სიკვდილით დასჯა მიესაჯა. ნიურნბერგის პროცესის შემდეგ, ფერენცი ჩართული იყო რეპარაციისა და რესტიტუციის პროგრამებში. მან მონაწილეობა მიიღო სისხლის სამართლის საერთაშორისო სასამართლოს შექმნაში ჰააგაში, სადაც ფეხით მოსიარულეთა ერთ-ერთი ქუჩა მის სახელს ატარებს. რადიო თავისუფლება

თბილისში, ვარკეთილში მკვლელობა მოხდა. ადგილობრივების ინფორმაციით, მეზობლებს შორის ურთიერთშელაპარაკება ერთ-ერთი კორპუსის მიმდებარედ, ფარდულში დაიწყო, სადაც სუფრა იყო გაშლილი. მოკლულია 50 წლამდე ასაკის მამაკაცი. მას ჭრილობა ცივი იარაღით აქვს მიყენებული. შსს-ს ინფორმაციით, მომხდარზე გამოძიება სსკ-ის 108-ე, განზრახ მკვლელობის მუხლით დაიწყო. ავტორი - ლიზა დვალი

პენტაგონის საიდუმლო დოკუმენტების გაჟონვის გამო, უკრაინამ ზოგიერთი სამხედრო გეგმა შეცვალა, - ამის შესახებ CNN-ს წყარომ განუცხადა, რომელიც, ტელეკომპანიის ცნობით, უკრაინის პრეზიდენტ ვოლოდიმირ ზელენსკისთან დაახლოებული პირია. პენტაგონის პრესსპიკერის მოადგილის, საბრინა სინგის განცხადებით, მათ უკვე დაიწყეს „უწყებათაშორისი ძალისხმევა“ გაჟონვის გავლენის შესაფასებლად. „თავდაცვის სამინისტრო აგრძელებს გადაღებული დოკუმენტების ავთენტურობის განხილვასა და შეფასებას, რომლებიც ვრცელდება სოციალურ მედიასაიტებზე და რომლებიც, როგორც ჩანს, შეიცავს სენსიტიურ და უაღრესად გასაიდუმლოებულ მასალას. დაიწყო უწყებათაშორისი ძალისხმევა, რომელიც ფოკუსირებულია იმ ზეგავლენის შეფასებაზე, რომელიც შეიძლება ჰქონდეს ამ გადაღებულ დოკუმენტებს როგორც აშშ-ის, ასევე, ჩვენი მოკავშირეებისა და პარტნიორების უსაფრთხოებაზე“, - აღნიშნა საბრინა სინგმა. მისი თქმით, დოკუმენტების გაჟონვის საკითხზე აშშ-ის ოფიციალური პირები შაბათ-კვირას მოკავშირეებსა და პარტნიორებს ესაუბრნენ. შეგახსენებთ, აშშ-ის იუსტიციის დეპარტამენტმა პენტაგონის დოკუმენტების შესაძლო გავრცელების ფაქტზე, რომლებიც სოციალური მედიის რამდენიმე პლატფორმაზე გამოქვეყნდა, გამოძიება დაიწყო. ოფიციალური პირების განცხადებით, დოკუმენტებში განხილულია თემების ფართო სპექტრი, რომლებიც ეხება ომს უკრაინაში, ჩინეთს, ახლო აღმოსავლეთსა და აფრიკას. დოკუმენტების ნაწილი დეტალურად აღწერს აშშ-სა და ნატო-ს მიერ უკრაინისთვის აღმოჩენილ დახმარებასთან დაკავშირებულ თემებს. ამასთან, ერთ-ერთ დოკუმენტში, რომელიც დათარიღებულია 23 თებერვლით, დეტალურად არის აღწერილი, თუ როგორ ამოიწურება უკრაინის S-300 ტიპის საჰაერო თავდაცვის სისტემების მარაგი გამოყენების ამჟამინდელი ტემპით 2 მაისამდე. IPN

მოსამართლე ირაკლი შენგელია ამერიკის შეერთებული შტატების სასამართლოსთვის მიმართვას გეგმავს, რათა აშშ-ის სახელმწიფო დეპარტამენტის გადაწყვეტილება მის დასანქცირებასთან დაკავშირებით გაასაჩივროს. ამის შესახებ ის სოციალურ ქსელში წერს. „მინდა ვაცნობო საზოგადოებას, რომ ვიწყებ აქტიურ მოქმედებებს, რათა მივმართო აშშ-ის მართლმსაჯულების შესაბამის ორგანოს და სადავო გავხადო ჩემი სანქცირების შესახებ უპრეცედენტო, აბსოლუტურად დაუსაბუთებელი გადაწყვეტილება, კორუფციაში ჩაბმის შესახებ უმძიმესი ბრალდებით, რომელიც ჩემი ღირსებისა და რეპუტაციის წინააღმდეგ არის მიმართული. არ ვაპირებ ,,კორუმპირებულის“ იარლიყთან შეგუებას. ჩემთვის აშშ-ის ვიზა არ არის მთავარი, შესაძლოა საერთოდაც აღარასდროს გავემგზავრო იქ, არამედ მთავარია ღირსებისა და იმ საქმიანი რეპუტაციის დაცვა, რაც გამაჩნია, მთელი ცხოვრების მანძილზე საკუთარი მოვალეობების კეთილსინდისიერად და კვალიფიციურად შესრულების შედეგად. ვინაიდან ჩემი სარჩელის ადრესატი არის აშშ-ის სასამართლო, სარჩელი მას წარედგინება გარკვეულ დროში, მას შემდეგ, რაც გადავწყვეტ მისი წარდგენისათვის აუცილებელ ორგანიზაციულ საკითხებს. დარწმუნებული ვარ, სიმართლე არ დაიკარგება და სრულად აღვიდგენ ჩემს დარღვეულ უფლებებს”, - წერს შენგელია. ცნობისთვის, აშშ ოთხ ქართველ მოსამართლეს - მიხეილ ჩინჩალაძეს, ლევან მურუსიძეს, ირაკლი შენგელიას და ვალერიან ცერცვაძეს სანქციებს უწესებს. აშშ-ის სახელმწიფო მდივნის, ენტონი ბლინკენის განცხადების თანახმად, ამერიკის სახელმწიფო დეპარტამენტი მიხეილ ჩინჩალაძის, ლევან მურუსიძის, ირაკლი შენგელიას და ვალერიან ცერცვაძის საჯარო სანქცირებას ახდენს, ვიზის აკრძალვის შესახებ 7031(c) წესის საფუძველზე, მნიშვნელოვან კორუფციულ საქმიანობაში მათი ჩართულობის გამო. როგორც განცხადებაში ბლინკენი განმარტავს, აღნიშნულმა პირებმა, ბოროტად გამოიყენეს მათი თანამდებობა როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა, რითაც ზიანი მიაყენეს სამართლის უზენაესობასა და საზოგადოების ნდობას საქართველოს სასამართლო სისტემის მიმართ. ipn

საქართველოს საავტომობილო გზების დეპარტამენტი განცხადებას ავრცელებს, სადაც რიკოთის მაგისტრალური გზის მშენებლობის პროექტთან დაკავშირებით არის საუბარი. საავტომობილო გზების დეპარტამენტის განცხადებაში ნათქვამია, „რომ „ნაციონალური მოძრაობა“ და მისი ინტერესების გამტარებელი მედიასაშუალებები აგრძელებენ დეზინფორმაციის გავრცელებას რიკოთის პროექტთან დაკავშირებით“. მათივე თქმით, ტყუილია, თითქოს რიკოთის მაგისტრალური გზის მშენებლობის პროექტი გასულ წელს უნდა დასრულებულიყო. გზების დეპარტამენტის განცხადებაში აღნიშნულია, რომ რიკოთის პროექტთან დაკავშირებულ მუდმივ საჯარო კომუნიკაციაში პროექტის დასრულების ვადად გაცხადებულია 2023 წლის ბოლო. „მიუხედავად ბოლო დღეებში საავტომობილო გზების დეპარტამენტის მიერ არაერთხელ გაკეთებულ განცხადებაში მითითებული დეტალური ინფორმაციისა, „ნაციონალური მოძრაობა“ და მისი ინტერესების გამტარებელი მედიასაშუალებები, აგრძელებენ დეზინფორმაციის გავრცელებას რიკოთის პროექტთან დაკავშირებით. როგორც ოპოზიციური პარტიის, ისე მედიის წარმომადგენლები არ ერიდებიან საზოგადოებისთვის ტყუილზე, ფაქტობრივ უზუსტობებსა და დამახინჯებულ გარემოებებზე აგებული ინფორმაციის მიწოდებას, რითიც სახელმწიფო უწყებების, საერთაშორისო საფინანსო ორგანიზაციების, კომპანიების და პროექტის მიმართ ნეგატიური დამოკიდებულების გაჩენას ისახავენ მიზნად. პირველ ყოვლისა, გვსურს, აღვნიშნოთ, რომ ტყუილია, თითქოს რიკოთის მაგისტრალური გზის მშენებლობის პროექტი გასულ წელს უნდა დასრულებულიყო. სიცრუეა ისიც, თითქოს დღემდე უცნობია როდის დასრულდება პროექტი. რიკოთის პროექტთან დაკავშირებულ მუდმივ საჯარო კომუნიკაციაში პროექტის დასრულების ვადად გაცხადებულია 2023 წლის ბოლო. ამასთან, საზოგადოებას მუდმივად აქვს ინფორმაცია პროექტზე მიმდინარე სამუშაოების პროგრესის შესახებ და მათი დიდი ნაწილი უკვე სარგებლობს კიდეც გზის ახალი მონაკვეთებით. ასევე, კორუფციული ფაქტების არსებობაში მოსახლეობის დარწმუნების მიზნით, გრძელდება სრულიად დაუსაბუთებელი და ცარიელი ბრალდებების ტირაჟირება. ვერ სახელდება ვერცერთი ფაქტი და რეალური ინფორმაციის დამალვისა თუ დამახინჯების ხარჯზე, აქაც მრუდე რეალობის შეთავაზება ხდება მაყურებლისთვის. კიდევ ერთხელ განვმარტავთ, რომ რიკოთის მაგისტრალური გზის მშენებლობაში ჩართული ყველა საპროექტო, სამშენებლო თუ საზედამხედველო კომპანია შერჩეულია საერთაშორისო ტენდერის გზით. უშუალოდ ტენდერები ჩატარებულია საერთაშორისო საფინანსო ინსტიტუტების მიერ დადგენილი წესით და მათი მკაცრი ზედამხედველობით. ყველა ნაბიჯი, ყველა გადაწყვეტილება შეთანხმებული და დადასტურებულია შესაბამისი საერთაშორისო საფინანსო ინსტიტუტის მიერ, მათი პოლიტიკისა და წესის დაცვით. შესაბამისად, კორუფციაში სახელმწიფო უწყებების აბსურდული დადანაშაულება ემსახურება მხოლოდ მოსახლეობის შეცდომაში შეყვანას და სახელმწიფო უწყებების, საერთაშორისო ორგანიზაციების და პროექტის მიმართ ნეგატიური დამოკიდებულების გაჩენას. რაც შეეხება სამუშაოების წარმოების სიახლოვეს არსებული სოფლების მოსახლეობის პრეტენზიებს: სოფელ ფუთში, სახლების ტექნიკურ მდგომარეობაზე დაკვირვების მიზნით, სამშენებლო სამუშაოების დაწყებამდე პროექტის საზედამხედველო კომპანიამ ჩაატარა სოფელში მდებარე ყველა შენობის წინასწარი კვლევა, მონიშნა ყველა ნაგებობის ბზარი და მიმდინარე აფეთქებების ვიბრაციაზე ახორციელებდა მუდმივ მონიტორინგს. მიუხედავად ამისა, მოსახლეობის უკმაყოფილების გამო, საავტომობილო გზების დეპარტამენტის დაკვეთით, ტექნიკური უნივერსიტეტის ხიდსაცდელი ცენტრის მიერ უახლესი აპარატურით გადამოწმდა აფეთქებითი სამუშაოების შედეგად წარმოშობილი ვიბრაცია გვირაბთან ყველაზე ახლოს მდებარე სახლებზე. ვიბრაციის მაჩვენებელი იყო მინიმალური და გადაჭარბება არ დაფიქსირებულა. ამასთან, 2022 წლის ოქტომბერში საცხოვრებელი სახლების ტექნიკური მდგომარეობა შემოწმდა სამხარაულის ექსპერტიზის ბიუროს მიერაც. არცერთ საცხოვრებელ სახლზე არ დადგინდა პროექტზე მიმდინარე სამშენებლო სამუშაოების ზეგავლენა. რაც შეეხება მე-4 გვირაბს, მის თავზე არ არის არცერთი სახლი. გვირაბიდან 250 მეტრში არსებული ყველა სახლი მონიშნულია და ვიბრაციის გადაჭარბება არ ფიქსირდება. თებერვალში, გვირაბის თაღსა და გრუნტს შორის არსებული მცირე მანძილისა და დიდთოვლობის გამო ჩაიშალა მიწის მცირე მონაკვეთი, რომელიც არ იყო არავის კერძო საკუთრებაში. ყველა სახლზე არსებული ბზარი ამჟამად მონიშნულია და მიმდინარეობს მონიტორინგი. პირველადი დაკვირვებით, ბზარებზე ცვლილებები არ შეინიშნება. ამასთან, ერთ-ერთი მცხოვრებლის სახლზე მიმდინარე სამუშაოების ზეგავლენის დადგენის მიზნით, საავტომობილო გზების დეპარტამენტის მოთხოვნით, ლევან სამხარაულის სახელობის სასამართლო ექსპერტიზის ეროვნული ბიურო ამზადებს შესაბამის დასკვნას. მე-5 გვირაბის სამშენებლო სამუშაოების დაწყებასთან ერთად, მიმდებარე სამმა მოსახლემ მოითხოვა ქონების გამოსყიდვა. მათ სარჩელიც წარადგინეს ზესტაფონის სასამართლოში. თუმცა, მათი მოთხოვნის დაკმაყოფილების სამართლებრივი საფუძველი არ არსებობს, რადგან თითოეულის საცხოვრებელი სახლი დაშორებულია მაგისტრალის სავალი ნაწილიდან, სახლების ტექნიკური მდგომარეობა უცვლელია და მათზე სამშენებლო სამუშაოების ზეგავლენა არ დგინდება. რაც შეეხება მე-5 გვირაბის სამშენებლო მოედანთან აშენებული ბეტონის ქარხანას, 2021 წლიდან იგი აღარ ფუნქციონირებს. შესაბამისად, მოსახლეობის პრეტენზია ამ ნაწილშიც უსაფუძვლოა. სატელევიზიო სიუჟეტში არასწორი და არასრული ინფორმაცია გავრცელდა შიდასახელმწიფოებრივი მნიშვნელობის მოლითი-ჩუმათელეთის საავტომობილო გზის მონაკვეთთან დაკავშირებითაც. სარეაბილიტაციო სამუშაოების არაჯეროვნად შესრულების გამო, ხელშეკრულება საგზაო დეპარტამენტსა და Akkord Industry Construction Investment Corporation OJSC-ს შორის 2021 წლის 3 ნოემბერს შეწყდა. ხელშეკრულების შეწყვეტის შემდეგ ამოქმედდა ავანსისა და ხელშეკრულების შესრულების უზრუნველყოფის საბანკო გარანტიები, რის საფუძველზეც სახელმწიფო ბიუჯეტში უკვე გადარიცხულია 13 641 529 ლარი. სამუშაოების დასრულების მიზნით, ორჯერ ხელახლა გამოცხადებული ტენდერი არ შედგა. მაისში გამოცხადდება მორიგი ხელახალი ტენდერი. ყოველივე ზემოაღნიშნულიდან გამომდინარე, მედიის წარმომადგენლებს კიდევ ერთხელ მოვუწოდებთ, ინფორმაცია გავრცელებამდე გადაამოწმონ პროექტის განმახორციელებელ უწყებასთან და დამახინჯებული ფაქტებით გაჯერებული მონაცემებით ნუ შეეცდებიან საზოგადოების შეცდომაში შეყვანას“, – საქართველოს საავტომობილო გზების დეპარტამენტის განცხადებაში.

ცნობილი კომენტატორი და საზოგადო მოღვაწე ჯამლეტ ხუხაშვილი თბილისის ებრაელთა სასაფლაოზე დაკრძალეს. სამოქალაქო პანაშვიდს, რომელიც სპორტის სასახლეში გაიმართა, სპორტული საზოგადოება და ხელისუფლების წარმომადგენლები დაესწრნენ. პანაშვიდზე ასევე იმყოფებოდა ქვეყნის პრეზიდენტი სალომე ზურაბიშვილი. ჯამლეტ ხუხაშვილი 78 წლის ასაკში გარდაიცვალა. იგი 1963 წლიდან იყო საქართველოს პირველი არხის სპორტული კომენტატორი; 1980-1992 წლებში მუშაობდა სხვადასხვა მედიასაშუალებებში; იყო საზოგადოება „დინამოს“ მწვრთნელი. 1994 წლიდან საქართველოს ეროვნული საკალათბურთო ნაკრების უფროსი იყო. 1990 წლიდან „მაქაბის“ კლუბის პრეზიდენტი გახლდათ. დასახელებულია „დინამოს“ საუკეთესო მწვრთნელად (1986), საუკეთესო სპორტულ კომენტატორად (2004). იყო სპორტული რადიო „ჯაკოს“ გენერალური დირექტორი. ჯამლეტ ხუხაშვილი გახლდათ თბილისის საპატიო მოქალაქე და საქართველოს ებრაელთა მსოფლიო კონგრესის თავმჯდომარე. 1998 წელს იგი დაჯილდოვდა ღირსების ორდენით, ქართული სპორტის განვითარების, მისი პოპულარიზაციის, ქართველ და ებრაელ ხალხთა ურთიერთობების განმტკიცების საქმეში შეტანილი პირადი წვლილისათვის. 1ტვ

მედიის ინფორმაციით, უკრაინის პრეზიდენტი ვოლოდიმირ ზელენსკი, მის ქვეყანაში რუსეთის შეჭრის შემდეგ, გერმანიაში პირველ ვიზიტს გეგმავს. როგორც გამოცემა Bild-ი წერს, უკრაინის პირველი პირი მომავალ თვეში ქალაქ აახენში შარლემანის პრიზის მისაღებად აპირებს ჩასვლას. ამასთან, გამოცემა აღნიშნავს, რომ უკრაინის შესაძლო კონტრშეტევამ შესაძლოა დაჯილდოების ცერემონიაზე ზელენსკის ვირტუალურად დასწრება გამოიწვიოს. გარდა ამისა, Bild-ი იუწყება, რომ ცერემონიას გერმანიის კანცლერი ოლაფ შოლციც დაესწრება. ცნობისთვის, პრიზი უკრაინის პრეზიდენტსა და უკრაინელ ხალხს მათი გმირობისთვის უნდა გადაეცეს. ინტერპრესნიუსი

პაპმა ფრანცისკემ წმ. პეტრეს მოედანზე, აღდგომის საზეიმო წირვა აღავლინა, რის შემდეგაც ვატიკანში შეკრებილ დაახლოებით 100 000 მორწმუნეს, წმინდა პეტრეს ბაზილიკის ცენტრალური აივნიდან, ტრადიციული სააღდგომო სიტყვით "Urbi et Orbi" ("ქალაქსა და მსოფლიოს") მიმართა. მედიის ცნობით, კათოლიკე ეკლესიის მეთაურმა "საყვარელი უკრაინელი ხალხის" მშვიდობისთვის ილოცა და ღმერთს შეევედრა რუსეთის ხალხს აღდგომის ნათელი მოეფინოს. „დაე, უფალმა ანუგეშოს დაჭრილები და ყველა, ვინც ომის გამო საყვარელი ადამიანები დაკარგა... დაე, პატიმრები დაბრუნდნენ სახლებში და მთელი საერთაშორისო საზოგადოება გლობალურად ომის დასასრულებლად იბრძოდეს“, - აღნიშნა პაპმა. ამასთან, რომის პაპმა სააღდგომო მიმართვისას სირიაც ახსენა, რომელიც ჯერ კიდევ მშვიდობის მოლოდინშია. პონტიფექსმა სირიასა და თურქეთში დამანგრეველი მიწისძვრის მსხვერპლებზეც გაამახვილა ყურადღება. გარდა ამისა, პაპმა ილოცა ისრაელელებსა და პალესტინელებს შორის დიალოგის განახლებისთვის. მანვე ილოცა ლიბანის დახმარებისთვის, რომელიც სტაბილურობისა და ერთიანობის აღსადგენად იბრძვის. კათოლიკე ეკლესიის მეთაურმა სააღდგომო გზავნილში ახსენა მიანმარიც. ამას გარდა, რომის პაპმა დახმარება ითხოვა ჰაიტისთვის, სადაც მძიმე სოციალურ-ეკონომიკური ვითარებაა. პონტიფექსმა ილოცა ტუნისისთვის, ისევე როგორც, საერთაშორისო ტერორიზმის მსხვერპლთა ნუგეშისცემისთვის, განსაკუთრებით ბურკინა ფასოში, მალიში, მოზამბიკსა და ნიგერიაში. „დაე, უფალმა მხარი დაუჭიროს მშვიდობისა და შერიგების ძალისხმევებს ეთიოპიაში, სამხრეთ სუდანსა და კონგოს დემოკრატიულ რესპუბლიკაში“, - აღნიშნა პაპმა. კათოლიკე ეკლესიის მეთაურმა ყურადღება გაამახვილა ნიკარაგუასა და ერიტრეაში ქრისტიანების მდგომარეობაზეც. პაპმა ფრანცისკემ მოწყვლადი ადამიანებისთვისაც ილოცა. მანვე შიმშილის, ნარკომანიის, ადამიანებით ვაჭრობისა და მონობის ყველა სხვა ფორმის მსხვერპლთათვის დახმარებაზეც ისაუბრა. „დაე, უფალმა ნუგეში მისცეს ლტოლვილებს, დეპორტირებულებს, პოლიტპატიმრებსა და მიგრანტებს“, - დასძინა პონტიფექსმა. იპნ

მათზე ჰყვებიან და საგულდაგულოდ შენახულ თითო-ოროლა ნივთს უფრთხილდებიან. ვინ როგორ ინახავს 9 აპრილის მსხვერპლთა მოგონებებს. ქურთუკის სახელოები ლაგოდეხის რაიონის სოფელ კართუბანში ერთი სახლია. სახლი იმ ქუჩაზე დგას, რომელსაც ახლა მამუკა ნოზაძის სახელი ჰქვია. მამუკა ამ სახლში ბოლოს 1989 წლის 1 აპრილს შევიდა. მის დას ეს ზუსტად ახსოვს. მამუკა სტუდენტი იყო, თბილისში ცხოვრობდა და მშობლებთან კვირაში ერთხელ თუ ჩავიდოდა ხოლმე. პირველში დაიბარა: მომავალ კვირას არ მელოდოთ, ქორწილში მივდივარო. მოიტყუა. თურმე აქციებზე დადიოდა. იმ დღეს, ცხრაში, მეგობრებს აცილებდა რუსთავში. გაცილებამდე რუსთაველზე აქციაზე შერჩნენ. მამუკას ჯინსის ქურთუკი სცმია - ის ქურთუკი, სახელოები რომ ეხსნებოდა. თბილი ამინდი იყო, ქურთუკის სარჩული და სახელოები სახლში დატოვა. 9 აპრილის ღამით მამუკა მოკლეს. მეგობარ გოგოებს იცავდა. უსაბუთო ცხედარი ნათესავებმა ამოიცნეს. ჯიბეში ფურცელზე წითელი კალმით მიწერილი მამიდის ტელეფონის ნომერი ედო. ამ ნომრით დაუკავშირდნენ მათ. ე. წ. არამიანცის საავადმყოფოში მიაგნეს. შეცვლილი იყო, 40 წლის კაცს ჰგავდა სახედასიებული. 21 წლის იყო. მამუკა სოფლის სასაფლაოზეა დაკრძალული. ოჯახი ინახავს ქურთუკის სახელოებსა და მოსაქოქ თეთრ მაღვიძარას, რომელიც 30 წელია აჩვენებს ერთსა და იმავე დროს, 12-ის 5 წუთს. მამუკას დამ, ინგა ნოზაძემ, ზუსტად არ იცის, როდის გაჩერდა საათი, როდის მოქოქა ის მამუკამ ბოლოს. ოთახი 9 აპრილის აქციაზე წასვლის წინ საღეჭი რეზინი თაროზე მიაწება. მამა ხალხში ღეჭვას უკრძალავდა, უზრდელობააო. თამრიკოს საღეჭ რეზინს მამამისი, არკადი ჭოველიძე, დღემდე ინახავს. სახლის მესამე სართულზე ორ დიდ ოთახში, სადაც ყველაფერი თამრიკოსია, თვითონ იშვიათად შედის. „პრანჭიაც იყო. ყველაფერი უყვარდა, რაც ახალგაზრდა გოგოს უნდა უყვარდეს“, - ამბობს. მისი სამკაულები ისევ ისე აწყვია ზარდახშაში, როგორც თამრიკომ დატოვა. მაგნიტოფონს მტვერს გადაწმენდენ ხოლმე, კარადის თავზე შემოწყობილი თოჯინები 30 წლისწინანდელ პოზაში სხედან. „საქართველოში არ ვიყავი, სკანდინავიის ქვეყნებში ვიყავი. იქ გავიგე... ამოვწყდით... აქ რომ ვყოფილიყავი, როგორ არ გავუშვებდი? გავუშვებდი - ეგრე ვზრდიდით, პატრიოტი იყო. სულ პატარა იყო, ლექსს რომ ამბობდა: „ცხრა ლახვარი რომ ჩამარტყან ცხრაჯერ გულშიო“ და აჰაა... მეც გავყვებოდი და ეს არ მოხდებოდა“,- თამრიკოს ოთახში კარადას აღებს და თეთრწინსაფრიან, მუქ ყავისფერ საბჭოთა სკოლის ფორმას კარადის კარზე კიდებს. თამრიკოს მამა ოთახიდან გამოსვლას ჩქარობს. „ძნელია თამრიკოს მამა იყო“, - ცრემლს ჩვენგან მალულად ყლაპავს. თამრიკო ჭოველიძე 9 აპრილს რუსთაველის გამზირზე მოკლეს. კინო რუსთაველისკენ გარბოდა, ზურგიდან ხელკეტი ჩაარტყეს. 16 წლის იყო. ჭიქა თამრიკო და ნათია კლასელები იყვნენ. ნათია ბაშალეიშვილიც 16 წლისა იყო. 9 აპრილის აქციაზე აკაკი ბაქრაძის სიტყვის მოსასმენად მიდიოდნენ. სოხუმიდან მის ჩამოსვლას ელოდნენ. კლასელები ერთმანეთს ნათიას დედამ, მაული ლატარიამ, შეახვედრა. მათთან ერთად იყო კიდევ ერთი კლასელი, ნინო ანდღულაძეც. მაული სახლში წავიდა. “ვფიქრობდით, რომ შეიძლებოდა რაღაც მომხდარიყო. ჩემი ხელით შევუკერე მარლისგან პირბადე. მაგრამ... რას დაიცავდა. ის არ გვეგონა, რომ ასეთ ძლიერ შხამს გამოიყენებდნენ. ისეთი შხამი იყო გამოყენებული, სახლში მიცვალებული რომ მოვასვენეთ, წაბლისფერი თმა თითქოს წითლად ჰქონდა შეღებილი“. 30 წელია ნათიას დედას ყოველ ღამით 4 საათზე ეღვიძება. იმ ღამითაც კარზე კაკუნმა გააღვიძა. ნინო ანდღულაძის დედა, ლია იყო კართან: „დაგვარბიეს და წავიდეთ, ბავშვები ვეძებოთო“. 1 საავადმყოფოში მიაგნეს. ნინო გადარჩა, მოწამლული ნათია მეშვიდე დღეს გარდაიცვალა. დედამ ნათიას პირადი ნივთები სულ გააჩუქა. ორი რამ ვერ გაიმეტა: ჭიქა, რომელიც მისი დაბადების დღისთვის იყიდა. „2 წლის ხდებოდა და ისეთი დრო იყო, არაფერი იშოვებოდა. ოქროულობის მაღაზიაში ვიყიდე 6 ცალი ჭიქა. სახლში რომ მივიტანე, მეუღლემ მითხრა, ამ ჭიქით ჩვენს ოჯახში მხოლოდ ნათიას და სიყვარულის სადღეგრძელო დაილევაო. დღემდე ასეა“. პირველკლასელ ნათიას სკოლის ფორმა ბაბუამ მოსკოვიდან ჩამოუტანა, „ მოსკოვის ფორმა უფრო ლამაზი იყო. უხაროდა, ეს ფორმა, ჩანთა, ყველაფერი ლამაზი რომ ჰქონდა. ვერ გავიმეტე ეს ფორმა. ვინახავ. თან სწავლის დაწყებასთან ასოცირდება“. ერთადერთი ვიდეო გია ქარსელაძე 9 აპრილის ღამით რუსთაველზე იყო. აქციაზე მისული მეუღლე და ძმა აიძულა სახლში წასულიყვნენ. „თქვენ ახლა აქედან უნდა წახვიდეთ , აქ რაღაც მოხდებაო“,- გვითხრა“, ჰყვება გიას ყოფილი მეუღლე, ირინა ზაქარეიშვილი. „თვითონ დილით 9 საათზე მოვიდა. შოკში იყო: ეს სად ვიყავი, ეს რა ვნახეო! - მიყვებოდა. - ქაშვეთში გადაგვყავდა დაჩეხილი პატარა გოგოებიო“. - მერე მთელი დღე ვერ მოისვენა. მეგობრებთან იყო მისული. ორჯერ მიუყვანიათ სახლთან, მაგრამ არ ავიდა. 10-ში ღამის 12-ის ნახევარზე საავადმყოფოდან დარეკეს. გია დაჭრილი იყო. „ქვები ედო ჯიბეში. არ ვიცი, ვერც წარმომიდგენია. საერთოდ არ იყო ეგეთი. ეტყობა, სიმწრისგან წინააღმდეგობას სხვანაირად რომ ვერ უწევდა, ქვებით აპირებდა რაღაცას. ალბათ, ბედი იყო. იმ მანქანაში, სადაც გიას მოხვდა ტყვია, სამი ბიჭი იჯდა უკანა სავარძელზე, გია მძღოლის გვერდით იჯდა. რომ მოიხედა, მაშინ ჰქონდა ტყვია მოხვედრილი“. EMBED SHARE გია ქარსელაძის ერთადერთი ვიდეო EMBED SHARE The code has been copied to your clipboard. width px height px Facebook-ზე გაზიარება Twitter-ზე გაზიარება The URL has been copied to your clipboard No media source currently available 0:001:340:00 გადმოწერა 25 წლის გია ქარსელაძე კომენდანტის საათის გამოცხადების შემდეგ კაპიტანმა ლოხინმა მოკლა. სამი თვის ქალიშვილი დარჩა. ოჯახში ინახება ერთადერთი ვიდეოჩანაწერი. ვიდეო გადაღებულია 1987 წლის ზაფხულში. გია და მისი ყოფილი მეუღლე ჯერ დაქორწინებული არ არიან. ეს გიას ოჯახისთვის ყველაზე ძვირფასი ჩანაწერია, ჩანაწერი, სადაც გია ცოცხალია. „გიას მეგობრის, ჯაბა ონიანის, გადაღებული იყო. მაგრამ ვიდეომაგნიტოფონიც არ გვქონდა მაშინ ყველას, რომ გვენახა, და მეზობელთან შევიკრიბეთ ყველანი, - მე, გიას დედა, გიას ძმა, -რომ გვენახა... და ახლაც, 30 წლის შემდეგაც, მახსოვს ეს საშინელი შეგრძნება. ურთულესი იყო. მერე და მერე, დრო რომ გავიდა, უკვე სიამოვნებად იქცა ამ ვიდეოს არსებობა, მაგრამ მაშინ ეს იყო საშინელი სანახავი. ეს ერთადერთი ჩანაწერია, სადაც ისმის გიას ხმა, ჩანს მოძრაობა“. თოჯინა 16 წლის ეკა ბეჟანიშვილს დედამ აქციაზე ცოცხალს მიუსწრო. „ვიცოდით, რომ აქციებზე დადიოდა, მაგრამ იმ დღეს თუ წავიდოდა, არ ვიცოდით. ფიზიკის მასწავლებელთან იყო და იქიდან ისე წასულა, არავინ ვიცოდით. ჩანთაში თბილი ტანსაცმელიც კი ედო“. ეკა დედამ, ლალი ყანჩაველმა, ხანგრძლივი ძებნის მერე იპოვა. „ხელჩაკიდებული მყავდა, დარბევა რომ დაიწყო. ვერ ვიხსენებ, მერე რა მოხდა“. 9 აპრილის ღამით ლალი თავადაც მძიმედ დაშავდა. შვილის სიკვდილის და დაკრძალვის ამბავი საავადმყოფოში მყოფმა გაიგო. ოჯახი ინახავს ეკას საყვარელ თოჯინას, რომელიც ნათესავმა გერმანიიდან ჩამოუტანა. „დიდ ვარდისფერ ყუთში იდო, ძალიან უყვარდა, სულ თან ჰქონდა. ვინახავ, ტანსაცმელს ვურეცხავ და ისევ ვაცმევ ხოლმე“, - ამბობს ეკას დედა. ეკას დღიურიც დარჩა და პატარა ჩანაწერების ბლოკნოტიც, სადაც ეკა საყვარელი მწერლების ციტატებს იწერდა. პატარა, გაცრეცილი ბლოკნოტის თავფურცელზე სკოლის მოსწავლის ხელით აწერია: ბეჟანიშვილი ეკა. სამკაულები მანანა ლოლაძე 33 წლის იყო. სულ რუსთაველზე იყო, ყველა აქციას ესწრებოდა. მანანა 9 აპრილის ღამით მოკლეს. მის პანაშვიდზე მისულმა ქალმა თქვა, რომ ის იყო მილიციელი, რომლის დაცვაშიც მანანა მოკლეს. მანანას მამიდაშვილის შვილი, მაკა ბაქარაძე, იხსენებს: „მანანას და იმ ქალს ერთმანეთი აქციაზე გაუცნიათ. პანაშვიდიდან ყველა რომ წავიდა, მაშინ მოგვიყვა, მანანა გადამეფარაო. ასე უთქვამს: შენ ოჯახი გყავს, შვილები გასაზრდელიო“. მანანა პირველი რესპუბლიკური საავადმყოფოს პროზექტურაში იპოვეს, „მაშინ ბრძანება იყო, რომ მიცვალებულები ოჯახისთვის არ ეჩვენებინათ. არ უნდა გაეგო ხალხს, რომ დაჩეხილები იყვნენ. ვიღაც მადლიანმა ექიმმა უკანა გასასვლელიდან ჩუმად გამოგვატანა მანანას ცხედარი“. მაკა მანანას ნაჩუქარ სამკაულებს ინახავს: ბროშს, ბეჭედს, სამაჯურსა და მძივს. ყველა სამკაული მანანას ნაქონია. „ასე იცოდა: თუ მოგეწონებოდა, მოიხსნიდა და გაჩუქებდა, ოღონდ იმ პირობით, რომ შენც ატარებდი. ვატარებ და ვინახავ“. ნინო ხარაძე

პარტია "საქართველოსთვის" წევრებმა საქართველოს პარლამენტთან, 9 აპრილის მემორიალი გვირგვინით შეამკეს და 1989 წლის 9 აპრილს დაღუპულებს პატივი მიაგეს. 9 აპრილის ტრაგედიიდან 34 წელი შესრულდა. როგორც პარტიის წევრებმა აღნიშნეს, 9 აპრილს, ქართველი ხალხის ერთიანობამ და თავგანწირვამ მოიტანა გამარჯვება - ერთიანი, დამოუკიდებელი და თავისუფალი საქართველო და ამის დასაცავად ქვეყანას ისევ უწევს ბრძოლა.

ის 19 წლის გოგონა ჩემში ისევ ცოცხლობს და მე ამაყი ვარ, რადგან ვიდექი იქ, სადაც იყო სიმართლე, თავისუფლება და ჩემი ქვეყნის მომავალი. დღეს ჩვენ ისევ ვაგრძელებთ ბრძოლას და ჩვენი მომავალი, რა თქმა უნდა, ევროპისკენ არის. ყოველთვის ვიქნები ჩემი ქვეყნის სამსახურში, - ამის შესახებ 9 აპრილის სიმბოლომ ნანა მახარაძემ პრეზიდენტის ორგანიზებულ ღონისძიებაზე სიტყვით გამოსვლისას განაცხადა, სადაც ის ღირსების მედლით დაჯილდოვდა. მან პრეზიდენტს მადლობა გადაუხადა. „ძალიან დიდი მადლობა პრეზიდენტ სალომე ზურაბიშვილს და თქვენ, დამსწრე საზოგაოდებას. გიყურებთ მსოფლიოში ყველაზე ლამაზ მანდილოსნებს და მე ვიცი, რომ თქვენ ხართ საქართველოს ზურგის მთრევი ქალბატონები, ამისთვის უდიდესი მადლობა თქვენ. ეს 19 წლის გოგონა ჩემში ისევ ცოცხლობს და მე ამაყი ვარ იმიტომ, რომ ვიდექი იქ, სადაც იყო სიმართლე, თავისუფლება და ჩემი ქვეყნის მომავალი. დღეს ჩვენ ისევ ვაგრძელებთ ბრძოლას და ჩვენი მომავალი, რა თქმა უნდა, ვეროპისკენ არის. ყოველთვის ვიქნები ჩემი ქვეყნის სამსახურში“, - განაცხადა ნანა მახარაძემ. საქართველოს პრეზიდენტმა სალომე ზურაბიშვილმა 9 აპრილის სიმბოლო, ქალი საქართველოს დროშით, ნანა მახარაძე და მიმდინარე წლის მარტის აქციებზე, ქალი ევროკავშირის დროშით ნანა მალაშხია ღირსების მედლით დააჯილდოვა. იპნ