tvati

თბილისის ვიცე-მერი ირაკლი ხმალაძე განმარტავს, თუ რატომ არ შეუძლია უცხოური ნომრის მქონე ავტომობილის მძღოლის დაჯარიმება „თბილისის პარკინგის“ თანამშრომლებს. როგორც ხმალაძემ აღნიშნა, პარკირების ოპერატორ კომპანიას არ აქვს წვდომა უცხოეთიდან შემოსული, მათ შორის, არც რუსული ნომრით მოძრავი ავტომობილების მფლობელი ფიზიკური პირების პერსონალურ მონაცემებზე და მითითება მხოლოდ რუსული ნომრით მოძრავი მანქანების არდაჯარიმებასთან დაკავშირებით არ არსებობს. მისივე თქმით, თბილისის მერია საკითხის მოსაწესრიგებლად მუშაობს. „არასწორი ინფორმაცია გავრცელდა, თითქოს, მითითება აქვთ თანამშრომლებს, რომ უცხოური და განსაკუთრებით, რუსული ნომრით მანქანები არ დააჯარიმონ. ეს არის მცდარი. იცით, რომ საათობრივი პარკირების სისტემა ახალი აწყობილი სისტემაა და ჩვენს პარკირების ოპერატორ კომპანიას არ აქვს წვდომა უცხოეთიდან შემოსულ მანქანებზე, არა მხოლოდ რუსეთზე, არამედ, სხვა ქვეყნიდან უცხოურ ნომრით მოძრავ მანქანასა და პერსონალურ მონაცემებზე დაშვება საერთოდ არ აქვთ. მანქანას ხომ არ აჯარიმებ, აჯარიმებ ფიზიკურ პირს, ვინც არის მისი მფლობელი ან მესაკუთრე. შესაბამისად, იმ ელექტრონული მოწყობილობებით, რომელსაც ფლობენ ჩვენი ოპერატორები, ვერ იღებენ ინფორმაციას უცხოური მანქანის მფლობელისა ან შემომყვანის შესახებ. შესაბამისად, როდესაც მძღოლი ადგილზე არაა, ვერ ხდება ამ მონაცემის მიღება და უშუალოდ მუნიციპალიტეტი მას ვერ აჯარიმებს. მაგრამ შსს-ის საპატრულო პოლიციას აქვს წვდომა ამ ინფორმაციაზე და ისინი აჯარიმებენ. ერთადერთი შემთხვევა, რა დროსაც შეუძლია თვითონ ჩვენს სატრანსპორტო კომპანიას ჯარიმა გამოწეროს, არის ის, როცა მძღოლი იქ იმყოფება. კატეგორიულად გამოვრიცხავ და მცდარია ის დაშვება და ის ინფორმაცია, რომ მითითებაა რუსულ მანქანებზე ჯარიმების არგამოწერასთან დაკავშირებით, ეს არის ტყუილი. ჩემი აზრით, ამ ვიდეოს გამავრცელებელმაც ცოტა მეტი სოციალური პასუხისმგებლობა უნდა აიღოს. ასეთი ინსტრუქცია არ არსებობს. ჩვენ ვმუშაობთ საკანონმდებლო ცვლილებებსა და შსს-სთან ელექტრონული ბაზების დამეგობრებაზე, რათა ჩვენც მივიღოთ უცხოური ნომრით მოსიარულე მანქანებთან დაკავშირებით მონაცემები და შევძლოთ ჯარიმის გამოწერა ისეთ შემთხვევაშიც, როცა მძღოლი ადგილზე არ იმყოფება. მაგრამ თუ მძღოლი ადგილზე იმყოფება ან ზის საჭესთან, ჩვენც შეგვიძლია ამ ადამიანის დაჯარიმება“, - განაცხადა ხმალაძემ. პალიტრა

ქვემო ქართლის მედია QvemoQartli.ge, მიმდინარე წლის თებერვლიდან დღემდე, უშედეგოდ ცდილობს მიიღოს საჯარო ინფორმაცია რუსთავის, გარდაბნის და მარნეულის თვითმმართველობებისგან. კერძოდ, ორგანიზაცია ითხოვს საჯარო უწყებებისგან, მათი შიდა აუდიტის სამსახურების, 2022 წლის, ანგარიშების/დასკვნების და რეკომენდაციების გაცნობას. მხოლოდ ადმინისტრაციული საჩივრის მომზადების შემდეგ, რუსთავის მერიამ საკითხზე საპასუხო წერილი გამოაგზავნა. საჯარო უწყება, უარს აცხადებს შიდა აუდიტის შემოწმების შედეგად მომზადებული ანგარიშების გასაჯაროებაზე. ორგანიზაციას ადმინისტრაციული საჩივრების მომზადებაში “ახალგაზრდა იურისტთა ასოციაციის” ქვემო ქართლის ოფისი დაეხმარა. ,,შიდა აუდიტორი ვალდებულია: დაწესებულების ხელმძღვანელის თანხმობის გარეშე არ გახადოს საჯარო შიდა აუდიტორული შემოწმების შედეგები, გარდა საქართველოს კანონმდებლობით გათვალისწინებული შემთხვევებისა. ზემოაღნიშნულის გათვალისწინებით, მუნიციპალიტეტის მერია უფლებამოსილია არ გაასაჯაროოს შიდა აუდიტორული შემოწმების ანგარიშები“, – ვკითხულობთ რუსთავის მერიის საპასუხო წერილში. QvemoQartli.ge საკითხზე სამართლებრივ დავას გეგმავს. ორგანიზაცია მიიჩნევს, რომ მოქალაქეთა გადახდილი გადასახადებით წარმოებულ ნებისმიერ პროცესზე, რომელიც არ წარმოადგენს სახელმწიფო საიდუმლოს, საზოგადოებას სრული უფლება აქვს ფლობდეს ინფორმაციას. რუსთავის მუნიციპალიტეტის მერიის წერილი http://qvemoqartli.ge/wp-content/uploads/01-3823093408_page-0001.jpg QvemoQartli.ge

ზუგდიდის რაიონულმა სასამართლომ „საქართველოს ბანკის“ დაყაჩაღებაში ბრალდებულ ბადრი ესებუას ცეცხლსასროლი იარაღისა და საბრძოლო მასალის უკანონო შეძენა-შენახვა ტარების მუხლით წარდგენილ ბრალდებაში დამნაშავედ ცნო. აღნიშნული გადაწყვეტილება ზუგდიდის რაიონული სასამართლოს მოსამართლე შოთა ბიჭიამ გამოაცხადა. მოსამართლემ ბადრი ესებუას 4 წლით თავისუფლების აღკვეთა მიუსაჯა. დაცვის მხარე ბრალდებულის მიერ ფაქტის გულწრფელი აღიარებიდან გამომდინარე სასჯელის მინიმუმის გამოტანას მოითხოვდა, რასაც ბრალდების მხარე არ დაეთანხმა. „გულწრფელობა არ ნიშნავს, აღიარო ფაქტი, რომ იარაღი მას ჰქონდა. აქ საუბარია იარაღის წარმომავლობაზე. მოგეხსენებათ, რომ იარაღი არის უკანონოდ შეძენილი. გამოძიება მიმდინარეობს ამ იარაღის გასაღების ფაქტთან დაკავშირებით. ამ კუთხით ბრალდებული დუმს, არ თანამშრომლობს გამოძიებასთან. ასევე განმარტება არ გაუკეთებია არც სასამართლო სხდომის დარბაზში არც პირადად და არც ადვოკატებს, შესაბამისად, ფაქტის აღიარება არ კმარა“,- განაცხადა პროკურორმა მირანდა წერეთელმა. შეგახსენებთ, „საქართველოს ბანკის“ ზუგდიდის ფილიალზე თავდასხმის საქმეზე ბრალდებულ ბადრი ესებუას მიმდინარე წლის 9 თებერვალს პროკურატურამ კიდევ ერთი ბრალი, ცეცხლსასროლი იარაღისა და საბრძოლო მასალის შეძენა და შენახვის მუხლით წარუდგინა. ცნობისთვის, გამოძიების ინფორმაციით, ზუგდიდში, „საქართველოს ბანკის“ შენობაში 2020 წლის 21 ოქტომბერს შეიარაღებული ბადრი ესებუა შეიჭრა. მას მძევლად 40-ზე მეტი მოქალაქე ჰყავდა აყვანილი და მათი გათავისუფლების სანაცვლოდ 500 ათას აშშ დოლარს და უსაფრთხოების გარანტიებს ითხოვდა. თანხის გადაცემის შემდეგ თავდამსხმელმა გაქცევა მოახერხა. ბადრი ესებუა მიმდინარე წლის 8 თებერვალს დააკავეს. აღნიშნულ საქმეზე გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს. ინტერპრესნიუსი

უკრაინის პრეზიდენტი ვოლოდიმირ ზელენსკი და პირველი ლედი ოლენა ზელენსკა პოლონეთში ოფიციალური ვიზიტით ჩავიდნენ. პოლონეთის პრეზიდენტის ოფისის განცხადებით, ლიდერები მოლაპარაკებებს გამართავენ საპრეზიდენტო სასახლეში, რის შემდეგაც დელეგაციები გამართავენ მოლაპარაკებებს. ეს ზელენსკის პირველი ოფიციალური ვიზიტია ვარშავაში მას შემდეგ რაც უკრაინაში ფართომასშტაბიანი ომი დაიწყო. უკრაინის პირველი პირი უცხოეთში ომის პერიოდში რამდენჯერმე იმყოფებოდა, რა დროსაც ის ვაშინგტონს, ლონდონსა და ბრიუსელს ეწვია. იპნ

წერეთლის გამზრის სრული რებალიტაცია აღდგომის დღესასწაულის შემდეგ დაიწყება - ამის შესახებ დედაქალაქის მერმა მთავრობის სხდომაზე განაცხადა. კალაძის თქმით, შეიძლება ადამიანთა ნაწილი ფიქრობს, რომ ამის საჭიროება არ არის და მხოლოდ საგზაო ინფრასტრუქტურის მოწყობა უნდა მოხდეს, მაგრამ სრული რეაბილიტაცია აუცილებელია. „აღდგომის დღესასწაულების შემდეგ დაიწყება წერეთლის გამზირის რეაბილიტაცია, განახლება. წერეთლის გამზირზე სხვა მსხვილი ინფრასტრუქტურული პროექტების მსგავსად სრული რეაბილიტაცია განხორციელდება. კერძოდ, შეიცვლება და განახლდება მიწისქვეშა კომუნიკაციები, რომელიც უმძიმეს მდგომარეობაშია, შეიცვლება წყალარინების, წყალმომარაგებისა და გაზმომარაგების ქსელები, მოეწყობა სანიაღვრე ქსელი. თვალითაც შესამჩნევია, რომ კონკრეტული ადგილებია, სადაც გზა ჩავარდნილია, რადგან დაზიანებულია მიწისქვეშა კომუნიკაციები და ხდება გზის გამორეცხვა. ძალიან კარგად გვესმის, რამდენად დიდი პრობლემაა აღნიშნული გამზირის გადაკეტვა, რომელიც დედაქალაქში გადაადგილების თვალსაზრისით ძალიან დიდ დისკომფორტს გამოიწვევს, თუმცა ალბათ ყველა ვთანხმდებით, რომ შეუძლებელია ამ მასშტაბის და ტიპის სამუშაოების წარმოება თუ არ მოხდება აღნიშნული გამზირის დროებით გადაკეტვა, იმისთვის რომ მიწისქვემოთ არსებულ კომუნიკაციებს, რომელიც ათეული წლებია არ შეცვლილა, რეაბილიტაცია ჩავუტაროთ. შეიძლება ადამიანთა ნაწილი ფიქრობს, რომ ამის საჭიროება არ არის და მხოლოდ საგზაო ინფრასტრუქტურის მოწყობა უნდა მოხდეს, ჩვენ ამაზეც ვფიქრობდით, რომ მხოლოდ საგზაო ინფრასტრუქტურა მოგვეწესრიგებინა, თუმცა ეს იქნება წყალში გადაყრილი თანხებით, რომ თუ ჩვენ დღეს არ შევცვლით მიწისქვეშა კომუნიკაციას, ხვალ ახალდაგებულ გზებზე იგივე პრობლემები გვექნება - გზების ჩავარდნა, ამორტიზირებული, გადაადგილება პრობლემა და ეს დიდ უკმაყოფილებას გამოიწვევს და რთული იქნება საზოგადოებისთვის ახსნა, რომ გუშინ შენ სარემონტო სამუშაოები აწარმოე და მიწისქვეშა კომუნიკაცია არ გამოგვიცვლია. ამიტომ ერთად უნდა გავიჭირვოთ და უნდა გავაკეთოთ, რაც აუცილებელია და გასაკეთებელია. შეიცვალოს აღნიშნულ მონაკვეთზე ყველა ის კომუნიკაცია, რომელიც დღეს პრობლემას წარმოადგენს და გარკვეული დისკომფორტია, მთლიანად ახალი კომუნიკაციით ჩანაცვლდეს“, - განაცხადა კალაძემ. ავტორი: თამარ მუკბანიანი

უნებართვო გარე ვაჭრობაზე, შესაძლოა, ადმინისტრაციული პასუხისმგებლობა გამკაცრდეს. ამას “ადმინისტრაციულ სამართალდარღვევათა კოდექსში“ დაგეგმილი ცვლილებების პროექტი ითვალისწინებს, რომელიც პარლამენტმა პირველი მოსმენით მიიღო. კანონის პროექტი მთავრობამ მოამზადა. მოქმედი კოდექსით დადგენილი ნორმის თანახმად, გარე ვაჭრობა შესაბამისი ნებართვის გარეშე იწვევს ფიზიკური და იურიდიული პირის დაჯარიმებას 20-დან 50 ლარამდე ოდენობით, სამართალდარღვევის საგნის კონფისკაციით. ამასთან, იგივე ქმედება, რომელიც დაკავშირებულია შესაბამისი ორგანოს უფლებამოსილი პირის განკარგულებისადმი ან მოთხოვნისადმი დაუმორჩილებლობასთან – იწვევს დაჯარიმებას 50-დან 100 ლარამდე ოდენობით ან ადმინისტრაციულ პატიმრობას 7 დღემდე ვადით, სამართალდარღვევის საგნის კონფისკაციით. არსებული რეგულაცია უცვლელი სახით რჩება, თუმცა პარლამენტში განსახილველად წარდგენილი კანონის პროექტის თანახმად, ნორმას ემატება სანქციები აღნიშნული ქმედების განმეორებით ჩადენისათვის და ასევე, აღნიშნული ქმედების სატრანსპორტო საშუალების, მასზე მისაბმელის ან ნებისმიერი სხვა მოძრავი საშუალების გამოყენებით ჩადენისთვის. უფრო კონკრეტულად, კანონის პროექტის თანახმად, უნებართვოდ გარე ვაჭრობის განმეორების შემთხვევაში ფიზიკური ან იურიდიული პირი დაჯარიმდებიან 100-დან 200 ლარამდე ოდენობით, სამართალდარღვევის საგნის კონფისკაციით. აღნიშნული ქმედების სატრანსპორტო საშუალების, მასზე მისაბმელის ან ნებისმიერი სხვა მოძრავი საშუალების გამოყენებით ჩადენა კი გამოიწვევს დაჯარიმებას 500 ლარის ოდენობით, სამართალდარღვევის საგნის (შესაბამისი საქონლის) კონფისკაციით. ამასთან, ეს უკანასკნელი ქმედება, რომელსაც თან ახლავს შესაბამისი ორგანოს ან უფლებამოსილი პირის კანონიერი განკარგულებისადმი ან მოთხოვნისადმი დაუმორჩილებლობა, ითვალისწინებს დაჯარიმებას 1 000 ლარის ოდენობით, სამართალდარღვევის საგნის კონფისკაციით ან ადმინისტრაციულ პატიმრობას 7 დღემდე ვადით - სამართალდარღვევის საგნის კონფისკაციით. იპნ

თბილისში პარკირების წესების დარღვევისას უცხოურნომრიანი ავტომანქანები მძღოლის ადგილზე არყოფნის შემთხვევაში არ ჯარიმდებიან. ამის შესახებ ნეტგაზეთს თბილისის მერიაში დღეს, 5 აპრილს განუცხადეს. ნეტგაზეთი აღნიშნული საკითხით მას შემდეგ დაინტერესდა, რაც სოციალურ ქსელში ესმა გუმბერიძემ გამოაქვეყნა ვიდეო, სადაც ჩანს, რომ შშმ პირებისთვის განკუთვნილ პარკინგზე დგას ავტომანქანა რუსული ნომრებით. თბილისის პარკინგის თანამშრომელი მოქალაქეს ეუბნება, რომ “უცხო ნომრებზე, მით უმეტეს რუსულებზე”, ჯარიმას “არ აწერინებენ” და “ჯერ-ჯერობით შეზღუდვა აქვთ”. მოქალაქის შეკითხვაზე, რომ განუმარტოს, თუ რატომ აქვთ თბილისის პარკინგის თანამშრომლებს შეზღუდვა, ის ვერ პასუხობს და ეუბნება, რომ დაუკავშირდება კოორდინატორს, რათა ევაკუატორით გადაიყვანონ კანონდამრღვევის მანქანა. “არც თურქულზე ვწერთ, არც აზერბაიჯანულზე, არც უკრაინულზე… ჯერ-ჯერობით არ ვწერთ. ვწერდით… 200-ლარიანი ეკუთვნის”, – ამბობს თბილისის პარკინგის თანამშრომელი. თბილისის მერიის განცხადებით, უცხო ქვეყნის ნომრით რეგისტრირებულ ავტომანქანებს აჯარიმებენ და სპეციალურ სადგომზეც გადაჰყავთ, თუმცა თბილისის მერიას ჯარიმის დაწერა არ შეუძლია იმ შემთხვევაში, თუ ადგილზე არ იქნება სამართალდამრღვევი პირი. მერიის განამრტებით ამ შემთხვევაში ჯარიმის გამოწერა შეუძლია შინაგან საქმეთა სამინისტროს. მერიის ინფორმაციით იმისთვის, რომ მძღოლის არყოფნის შემთხვევაში თბილისის პარკინგის თანამსრომლებს ჯარიმის გამოწერის უფლება მიეცეთ, შესაბამისი სამართლებრივ აქტებში მზადდება ცვლილებები, რომელიც ძალაში “უახლოეს მომავალში” შევა. რაც შეეხება შსს-ის მიერ დაჯარიმების შემთხვევაში მის აღსრულებას, მიმდინარე წლის პირველი იანვრიდან უცხოურნომრიანი ავტომანქანისთვის გამოწერილი საჯარიმო ქვითარი შსს-ის ოფიციალურ გვერდზე გამოქვეყნდება და უცხოელის ან მოქალაქეობის არმქონე პირისთვის ჩაბარებულად მიიჩნევა გამოქვეყნებიდან 30-ე დღეს. ასევე, ქვითარი შესაძლოა ჩაარდეს სახელმწიფო საზღვრის გადაკვეთის დროსაც. ჯარიმის ან საურავის გადაუხდელობის შემთხვევაში კი შესაძლოა ცუხოელს უარი ეთქვას საქართველოს ვიზის გაცემაზე ან საქართველოში კვლავ შემოსვლაზე. თუ მოუნდებათ, ჯარიმას არ გადაიხდიან — როგორ აკონტროლებენ უცხოურ ავტომობილებს გზებზე ნეტგაზეთი

პერსონალურ მონაცემთა დაცვის სამსახურმა არაგეგმური შემოწმების შედეგად, ერთ-ერთ სამინისტროში დასაქმებულების კომპიუტერში გააქტიურებული პროგრამა აღმოაჩინა. სამსახურის ცნობით, ამ პროგრამით კომპიუტერით განხორციელებული ქმედებების დეტალური ინფორმაცია გროვდებოდა. სამსახურმა გამოარკვია, რომ ზემოაღნიშნულ პროცესში დამუშავებულ მონაცემებს შრომითი საქმიანობის ფარგლებში თანამშრომელთა მონიტორინგის მიზნით იყენებდა ერთ-ერთ დეპარტამენტი (მაგალითად, დეპარტამენტის უფროსი მივლინების დროს აკონტროლებდა თავისი თანამშრომლების აქტივობებს), ასევე, სამინისტროს განმარტებით, პროგრამის საშუალებით მოპოვებული მონაცემები დასაქმებულებისთვის წარმოადგენდა საკუთარი დროის თვითმონიტორინგის (იმის დადგენის, თუ რა დროს უთმობდნენ საქმეს და რა დროს – სხვა საკითხებს) საშუალებას, გარდა ამისა, მისი ფუნქციონირება განპირობებული იყო სამინისტროს ინფორმაციული უსაფრთხოების მიზნებითაც. საქმეში დასახელებულ მიზნებთან მონაცემთა დამუშავების პროცესის თავსებადობის შემოწმებისას კი გამოირკვა, რომ პრაქტიკაში სამინისტროს შესაბამისი მენეჯერები შეგროვებულ მონაცემებს არ იყენებდნენ, გარდა სამინისტროს ინფორმაციული ტექნოლოგიების დეპარტამენტის ხელმძღვანელისა. ასევე, თანამშრომლები არ იყვნენ ან არასათანადოდ იყვნენ ინფორმირებულნი ტექნიკური მხარდაჭერის პროგრამის საშუალებით მათი, მათ შორის, ხსენებული ინფორმაციის სტატისტიკური სახით ხელმისაწვდომობის თაობაზე. გარდა ამისა, მოპოვებული მონაცემების ნაწილი არ იყო საჭირო სამინისტროს ინფორმაციული უსაფრთოებისთვის. საკითხის შეფასებისას სამსახურმა იხელმძღვანელა, მათ შორის, დასაქმებულ პირთა მონაცემების დამუშავებასთან დაკავშირებით ადამიანის უფლებათა ევროპული სასამართლოს რამდენიმე გადაწყვეტილებებით და დაადგინა, რომ: სამინისტროს მიერ ტექნიკური მხარდაჭერის პროგრამის მეშვეობით დამუშავებული მონაცემების ნაწილი შესაძლოა შეიცავდეს ადამიანის არა სამსახურებრივ, არამედ პირად/პრივატულ ინფორმაციას, ვინაიდან სამსახურეობრივი საქმიანობის პროცესშიც არსებობს სხვა ადამიანებთან ურთიერთობის ისეთი ზონა, რომელიც მისი პირადი ცხოვრების ნაწილად უნდა იქნეს მოაზრებული. იმ პირობებში, როდესაც სამსახურებრივი მონიტორინგის მიზნების მიღწევა პირადი ცხოვრების უფლებაში ნაკლები ჩარევის გზითაც შესაძლებელია (მაგალითად, უშუალო ხელმძღვანელის მიერ თანამშრომელთან კომუნიკაციით, ან პერიოდული (მაგალითად, ყოველკვირეული) ზეპირი ან წერილობითი ანგარიშის წარდგენის პროცედურის დანერგვით, მივლინებების დროს მენეჯერული მოვალეობის სხვა შესაბამის თანამშრომელზე დელეგირების გზით და სხვა) თანმშრომლების პერსონალური მონაცემების მითითებული ფორმით მოპოვება და დამუშავება არ იქნა მიჩნეული თანამშრომელთა სამსახურებრივი მონიტორინგის მიზნის მიღწევის თანაზომიერ საშუალებად; ტექნიკური მხარდაჭერის პროგრამის საშუალებით შეგროვებული მონაცემების თანამშრომელთა თვითმონიტორინგის მიზნით დამუშავება არ ეფუძნებოდა აღნიშნულ პირთა სურვილსა და ნებას, არ იყვნენ ჯეროვნად ინფორმირებულნი და დასახელებული შესაძლებლობით აქტიურად არც სარგებლობდნენ. სამსახურის შეფასებით, თანამშრომელთა სათანადოდ ინფორმირების პირობებშიც კი მოპოვებული კომპიუტერული მონაცემების გამოყენებით სამუშაო დროის უკეთ ორგანიზება მხოლოდ დასაქმებულის ნებაზე იქნებოდა დამოკიდებული. შესაბამისად, თვითმონიტორინგის მიზნით ტექნიკური მხარდაჭერის პროგრამის საშუალებით კომპიუტერული აქტივობების შესახებ მონაცემების მოპოვება და შემდგომი დამუშავება მხოლოდ დასაქმებულების სურვილის, ინიციატივის საფუძველზე შეიძლებოდა განხორციელებულიყო; რაც შეეხება ინფორმაციული უსაფრთხოების მიზნით მონაცემების მოპოვებას, დადგინდა, რომ სამინისტრო იყო კრიტიკული ინსფრასტრუქტურის პირველი ხარისხის სუბიექტი, ის იყენებდა რამდენიმე სახის და სხვადასხვა დონის ლიცენზირებულ თანამედროვე მოწყობილობებს და პროგრამულ უზრუნველყოფას. შესაბამისად, სადავო პროგრამით მოპოვებული მონაცემები იშვიათად იქნებოდა გამოსადეგი ინფორმაციული უსაფრთხოების მიზნების მისაღწევად, რის გამოც, ამ გზით თანამშრომლების სამუშაო კომპიუტერებიდან მონაცემები მხოლოდ მინიმალური მოცულობით უნდა შეგროვებულიყო, ხოლო აღრიცხულ ინფორმაციაზე წვდომები მაქსიმალურად შეზღუდულიყო. პერსონალურ მონაცემთა დაცვის სამსახურის გადაწყვეტილებით დადგინდა, რომ სამინისტროს იდენტიფიცირებული ჰქონდა მონაცემთა დამუშავების რამდენიმე (თანამშრომელთა თვითმონიტორინგის და ინფორმაციული უსაფრთხოების) მიზანი, თუმცა თანამშრომელთა სურვილის და ინიციატივის, ამასთან, მათი ინფორმირების გარეშე გამოვლენილი მოცულობის მონაცემების დამუშავება თვითმონიტორინგის მიზნით გაუმართლებელი იყო, ინფორმაციული უსაფრთოების მიზნებისთვის კი სამინისტროს მიერ მიღებული ორგანიზაციულ-ტექნიკური ზომები მონაცემების უკანონო მოპოვების რისკებს ქმნიდა. აღნიშნული მიუთითებდა „პერსონალურ მონაცემთა დაცვის შესახებ“ საქართველოს კანონის მე-17 მუხლის (მონაცემების უსაფრთხოება) დარღვევაზე, რის გამოც სამინისტრო სამართლდამრღვევად იქნა ცნობილი, „პერსონალურ მონაცემთა დაცვის შესახებ“ საქართველოს კანონის 46-ე მუხლით გათვალისწინებული სამართალდარღვევისთვის. ამასთან, ტექნიკური მხარდაჭერის პროგრამის მეშვეობით მონაცემთა დამუშავების პროცესის კომპლექსურობის გათვალისწინებით, სამინისტროს მიეცა შესასრულებლად სავალდებულო დავალებები, მათ შორის დაევალა აღნიშნული პროგრამული საშუალებით სამინისტროს თანამშრომელთა მონიტორინგის/თვითმონიტორინგის მიზნით მონაცემების დამუშავების შეწყვეტა და უკვე დამუშავებული მონაცემების წაშლა”, – წერს პერსონალურ მონაცემთა დაცვის სამსახური. პუბლიკა

უკრაინაში რუსეთის სრულმასშტაბიანი შეჭრის ერთი წლის განმავლობაში, სულ მცირე 50 უფლებადამცველი, ჟურნალისტი და ჰუმანიტარული მისიების მოხალისე დაიღუპა. ასეთი რიცხვია მოტანილი საერთაშორისო პროექტ Front Line Defenders-ის ანგარიშში. პროექტში აღნიშნულია, რომ რუსეთს, ომის დასაწყისიდანვე, მიზანში ჰყავდა ამოღებული უკრაინელი უფლებადამცველები, რომლებიც უკრაინაში რუსი სამხედროების ქმედებების შესახებ დოკუმენტაციისა და მტკიცებულებების მოპოვებით იყვნენ დაკავებული. ეს ფაქტობრივი მასალა აუცილებელია მომავალი სასამართლო პროცესებისთვის. პროექტის თანახმად, 2022 წელს უკრაინა მეორე ადგილზე აღმოჩნდა მსოფლიოში ადამიანის უფლებათა დამცველებსა და ჟურნალისტებს შორის მსხვერპლთა რაოდენობის მიხედვით. ამ მხრივ იგი ჩამორჩება მხოლოდ კოლუმბიას, სადაც ანალოგიურ პერიოდში 186 ჟურნალისტი და უფლებადამცველი დაიღუპა. მანამდე უკრაინულმა უფლებადამცველმა ორგანიზაცია "ზმინამ" გამოთვალა, რომ რუსეთმა ასევე გაიტაცა ან უკანონოდ დააკავა მინიმუმ 386 უფლებადამცველი, ჟურნალისტი და მოხალისე. Front Line Defenders-ის ინფორმაციით, 2022 წელს 26 ქვეყანაში 401 უფლებადამცველი და ჟურნალისტი დაიღუპა. მათი თითქმის ნახევარი იცავდა გარემოს და მკვიდრი მოსახლეობის უფლებებს. დაღუპულთა 17% მდედრობითი სქესისაა. რადიო თავისუფლება

7-9 მარტის აქციების საქმეზე დაკავებული ლაზარე გრიგორიადისის დედა თამთა კალანდაძე მადლობას უხდის ყველა იმ ადამიანს, ვისაც მის შვილზე გული შესტკივა. ვიდეომიმართვა მან "TV პირველს" გაუგზავნა. "მე ვარ თამთა კალანდაძე - ლაზარეს დედა. ამას ვამბობ სრული სიამაყით იმიტომ, რომ ჩემი შვილი ჩემს თვალში გმირია, რომელსაც გული შესტკივა თავის სამშობლოზე და გულანთებული, ნათელი ადამიანია. მე ჩემს შვილს რომ ვუყურებ, მის თბილ და მოსიყვარულე გულს ვხედავ და არა დახატულ იმიჯს", - ამ სიტყვებით იწყებს ლაზარეს დედა ვიდეომიმართვაში საუბარს. ის ასევე ლაპარაკობს იმ მიზეზებზე, რაც შეიძლება გამხდარიყო მისი შვილის დაკავების წინაპირობა. "ის სრულიად გულწრფელი და თავისუფალი ადამიანია, რომელსაც სამართლიანობის გრძნობა მძაფრად აქვს განვითარებული და გამოხატული და მის ამ შინაგან გამოძახილს რა შეაჩერებს, ხალხო?!. ალბათ ეს იყო მიზეზი მისი ერთპიროვნული, თვალსაჩინო დასჯისა, ასეთი საშინელი, ბინძური კამპანიის აგორებისა. ჩემი აზრით, ეს არის შემაშინებელი თითის დაქნევა იმ ადამიანების მიმართ, ვინც გარეთ არის გამოსული და თავისი სამშობლო თავისთვის უნდა. გამკვირვებია იმათი, ვინც ასე ადვილად და დაუნდობლად ლაპარაკობს იმაზე, რაც თავისი თვალით არ დაუნახავს. ასეთ ადამიანებს, წესით, ლაზარეს საკნის გვერდით უნდა მიუჩინოთ ადგილი, ცილისწამებისთვისაც არსებობს ღვთის სასჯელი", - ამბობს თამთა კალანდაძე. გრიგორიადისის დედა თითქმის ორწუთიან ვიდეოს მადლობის გადახდით ასრულებს: "მე მინდა თითოეულ იმ პიროვნებას, ვინც ამ მძიმე დღეებში ჩვენს განსაცდელს იზიარებს, გულითადი მადლობა გადავუხადო, ერთიასად დაგიბრუნდეთ ყოველი კეთილი სიტყვა და საქმე. ჩემი შვილი სახლში მინდა, გულგატეხილი კი არა – ძლიერი, უსამართლობაზე გაბრაზებული კი არა – სამართალში დარწმუნებული. მოდით, მივანდოთ ჩვენს ახალგაზრდებს თავიანთი ცხოვრება, რომ თავისუფლად და ლაღად აშენონ თავიანთი მოსაწონი სამშობლო. კიდევ ერთხელ გიხდით უღრმეს მადლობას, ვისაც ლაზარეზე გული შეგტკივათ". 21 წლის ლაზარე გრიგორიადისს, რომელიც პოლიციამ 29 მარტს ე.წ. „აგენტების“ შესახებ კანონის საწინააღმდეგო აქციებისას პოლიციელზე თავდასხმისა და სხვისი ქონების განადგურების ბრალდებით დააკავა, ბრალი ოფიციალურად წინასწარი დაკავების იზოლატორში 30 მარტს, შუადღისას, წარუდგინეს. მას 31 მარტს საქალაქო სასამართლომ აღკვეთის ღონისძიებად პატიმრობა შეუფარდა. 12 მარტს ტელეკომპანია "იმედისთვის" მიცემულ ინტერვიუში 7-9 მარტის აქციაზე მყოფი ახალგაზრდების ნაწილს "სატანისტები" და "ანარქისტები" უწოდა საქართველოს პრემიერ-მინისტრმა, ირაკლი ღარიბაშვილმა. "რამდენიმე დღის წინ პოლიციამ დააკავა პოლიციაზე თავდამსხმელი - გახსოვთ, ყველამ ნახა კადრები, ერთ-ერთმა ანარქისტმა როგორ ესროლა პოლიციას "მოლოტოვის კოქტეილი". ამ ადამიანს განზრახული ჰქონდა პოლიციელის ცოცხლად დაწვა. მე გამოვედი და ვთქვი ჩემი პოზიცია, ამას არავის ვაპატიებთ - ეს არის წითელი ხაზი, რომელზეც ვიქნებით უკომპრომისო..." - თქვა ირაკლი ღარიბაშვილმა 3 აპრილს მთავრობის სხდომის დაწყებამდე, როცა საუბრობდა ლაზარე გრიგორიადისის შესახებ. რადიო თავისუფლება

საქართველოს პრეზიდენტი სალომე ზურაბიშვილი ებრაელებს პასექის დღესასწაულს ულოცავს. აღნიშნულის შესახებ საქართველოს პრეზიდენტი სოციალურ ქსელში წერს. „ჩვენს ებრაელ თანამოქალაქეებსა და ყველა ებრაელს მსოფლიოში ვულოცავ პასექის დღესასწაულის დადგომას. თავისუფლების სიყვარულის, ერთგულებისა და მადლიერების, ღვთის სამართლიანობისა და მფარველობის გამომხატველი ეს დღესასწაული სიმბოლურია ყველა იმ ერისათვის, რომელსაც თავი დაუღწევია ტირანიისათვის ან აგრძელებს ბრძოლას მის წინააღმდეგ. ვუერთდები თქვენს სიხარულს, მშვიდობისა და კეთილდღეობის მომტანი ყოფილიყოს პასექის შემობრძანება ყოველი თქვენგანისათვის“, – წერს სალომე ზურაბიშვილი.

პირველი აპრილიდან ამოქმედდა ტქსების რეფორმის მესამე ეტაპი, რომლის ფარგლებშიც, ხელმისაწვდომი გახდა ვებგვერდის, taxi.tbilisi.gov.ge განახლებული ვერსია, – ამის შესახებ თბილისის მერმა, კახა კალაძემ მუნიციპალიტეტის მთავრობის დღევანდელ სხდომაზე განაცხადა. „პირველი აპრილიდან ამოქმედდა ტაქსების რეფორმის მესამე ეტაპი, შესაბამისად, უკვე ხელმისაწვდომია ვებგვერდის, taxi.tbilisi.gov.ge განახლებული ვერსია მთელი რიგი შესაძლებლობებით, რომელსაც ეს ეტაპი ითვალისწინებს. ვებგვერდზე განთავსებულია მოხმარების ინსტრუქცია. მინდა, თითოეულ ტაქსის მძღოლს და ნებართვის მფლობელს წარმატებები ვუსურვო და მადლობა გადავუხადო თანამშრომლობისთვის. დარწმუნებული ვარ, ამ ადამიანებისთვის წარმატების მომტანი იქნება აღნიშნული ცვლილება“, – განაცხადა კახა კალაძემ. მისივე თქმით, პირველი აპრილიდან ამოქმედდა ცვლილებები, რომელიც A კატეგორიის ტაქსებს შესაძლებლობას აძლევს, მგზავრი აიყვანოს და ჩამოსვას ე.წ. ბასლაინში. „ავტობუსის ზოლის გადაკვეთა შესაძლებელია შემდეგ გამზირებსა და ქუჩებზე: მოსკოვის გამზირი, ჯავახეთის ქუჩა, ვიქტორ კუპრაძის ქუჩა, სესილია თაყაიშვილის ქუჩა, ნიკოლოზ ბარათაშვილის აღმართი, ქეთევან დედოფლის გამზირი, გრიგოლ ორბელიანის მოედანი, რუსთაველის გამზირი, პეტრე მელიქიშვილის გამზირი, მერაბ კოსტავას ქუჩა, თამარ მეფის გამზირი, ჟიული შარტავას ქუჩა, ანა კალანდაძის ქუჩა, პეკინის გამზირი, ალექსანდრე ყაზბეგის გამზირი, მიხეილ თამარაშვილის ქუჩა, ქაქუცა ჩოლოყაშვილის გამზირი, სანდრო ეულის ქუჩა, გრიგოლ რობაქიძის გამზირი, მირიან მეფის ქუჩა, პეტრე იბერის ქუჩა. მძღოლებმა უნდა გაითვალისწინონ შემდეგი წესები: ავტობუსის ზოლის გადაკვეთა შესაძლებელია მხოლოდ მოძრაობის მიმართულებით, სადაც განთავსებულია შესაბამისი საგზაო ნიშანი. მგზავრთა ჩასხდომის ან ჩამოსმის მიზნით, ავტობუსის ზოლში გადაადგილება და მოძრაობა დასაშვებია მხოლოდ წყვეტილი ხაზიდან მომდევნო წყვეტილ ხაზამდე. გზის გაგრძელების შემთხვევაში, მძღოლი დაჯარიმდება. რაც შეეხება უწყვეტ ხაზს, მისი გადაკვეთა აკრძალულია“, – აღნიშნა კალაძემ.

78 წლის ასაკში გარდაიცვალა ცნობილი კომენტატორი და საკალათბურთო სპეციალისტი ჯამლეტ ხუხაშვილი. ის ბოლო რამდენიმე წლის განმავლობაში მძიმედ ავადმყოფობდა. ჯამლეტ ხუხაშვილი 1963 წლიდან იყო საქართველოს პირველი არხის სპორტული კომენტატორი. 1980-1992 წლებში მუშაობდა სხვადასხვა მედიასაშუალებებში; იყო საზოგადოება „დინამოს“ მწვრთნელი. 1994 წლიდან საქართველოს ეროვნული საკალათბურთო ნაკრების უფროსი. 1990 წლიდან „მაქაბის“ კლუბის პრეზიდენტი. ავტორი საიუბილეო წიგნისა „ყურადღება“ (2004). დასახელებულია „დინამოს“ საუკეთესო მწვრთნელად (1986), საუკეთესო სპორტულ კომენტატორად (2004). იყო სპორტული რადიო „ჯაკოს“ გენერალური დირექტორი. ჯამლეტ ხუხაშვილი გახლდათ თბილისის საპატიო მოქალაქე, საქართველოს ებრაელთა მსოფლიო კონგრესის თავმჯდომარე და სპორტის დამსახურებული მოღვაწე. 1998 წელს იგი დაჯილდოვდა ღირსების ორდენით, ქართული სპორტის განვითარების, მისი პოპულარიზაციის, ქართველი და ებრაელი ხალხების ურთიერთობათა განმტკიცების საქმეში შეტანილი პირადი წვლილისათვის. 1tv

სკვერების თვითნებური გადათხრა-დაზიანებისთვის, ასევე მათი სამშენებლო მასალებით ჩახერგვისა და გადათხრის ადგილების პირვანდელ მდგომარეობაში მოყვანის გარეშე მიტოვების გამო, ფიზიკური პირი - 200 ლარის ოდენობით, ხოლო იურიდიული პირი – 1 000 ლარით დაჯარიმდება. იგივე ქმედება, რომელიც კულტურული მემკვიდრეობის ზონაში იქნება ჩადენილი, გამოიწვევს ფიზიკური პირის - 1 000 ლარის ოდენობით, ხოლო იურიდიული პირის 3 000 ლარის ოდენობით დაჯარიმებას. „ადმინისტრაციულ სამართალდარღვევათა კოდექსში“ ცვლილებები, პარლამენტს განსახილველად მთავრობამ წარუდგინა, პირველი მოსმენით მიიღეს. მოქმედი კოდექსის თანახმად, ადმინისტრაციული ჯარიმა დადგენილია ეზოების, ქუჩებისა და მოედნების თვითნებური გადათხრისა და მათი სამშენებლო მასალებით ჩახერგვის შემთხვევებზე. საკანონმდებლო ინიციატივით კი ეზოების, ქუჩებისა და მოედნების გარდა, აღნიშნული ქმედებები ადმინისტრაციულ პასუხისმგებლობად სკვერების დაზიანების შემთხვევაშიც განისაზღვრება. ამასთან, დაჯარიმებას დაექვემდებარა არამხოლოდ თვითნებური გადათხრა ან დაზიანება, მათი სამშენებლო მასალებით ჩახერგვა და გადათხრის ადგილების პირვანდელ მდგომარეობაში დაბრუნების გარეშე მიტოვება, არამედ უფლებამოსილი ორგანოს მიერ სამუშაოების წარმოებისათვის დადგენილი პირობების დარღვევა და შეუსრულებლობა. IPN

უკრაინის პრეზიდენტი, ვოლოდიმირ ზელენსკი დღეს პოლონეთში ჩადის, - ამის შესახებ პოლონეთის პრეზიდენტის მრჩეველმა საგარეო საკითხებში მარკინ პრჟიდაჩმა ორი დღის წინ განაცხადა. „ვიზიტი პრეზიდენტ დუდას მოწვევით გაიმართება. იქნება ხანგრძლივი, ფართო მოლაპარაკებები, არა მხოლოდ უსაფრთხოებასთან დაკავშირებით არსებულ ვითარებაზე, არამედ ეკონომიკურ და პოლიტიკურ მხარდაჭერაზე“, - განაცხადა პრჟიდაჩმა. ვიზიტის ფარგლებში, ვოლიდიმირ ზელენსკი პრეზიდენტ ანჯეი დუდას და პრემიერ-მინისტრ მატეუშ მორავიეცკის შეხვდება. ასევე, ვარშავის ციხის მოედანზე საჯაროდ გაესაუბრება პოლონელებს და იმ უკრაინელებს, რომლებმაც პოლონეთს შეაფარეს თავი.

„ლატვია ხელს შეუწყობს საქართველოს ყველა მიმართულებით, რაც ევროინტეგრაციაში დაეხმარება. ჩვენ ქვეყნებს შორის წარმატებული თანამშრომლობა არსებობს როგორც აგრარული, ასევე გარემოს დაცვის მიმართულებით. თუმცა, შეგვიძლია უფრო გავაღრმაოთ ურთიერთობები, გავაკეთოთ კიდევ უფრო მეტი და კიდევ უფრო უკეთესად“, - განაცხადა ლატვიის ელჩმა ედიტ მედნიმა საქართველოს გარემოს დაცვისა და სოფლის მეურნეობის მინისტრ ოთარ შამუგიასთან შეხვედრის დროს. მხარეებმა ორ ქვეყანას შორის აგრარული და გარემოსდაცვითი მიმართულებებით თანამშრომლობის გაღრმავების საკითხები განიხილეს. ოთარ შამუგიამ ხაზი გაუსვა საქართველო-ლატვიას შორის არაერთი მიმართულებით წარმატებული თანამშრომლობის და ევროინტეგრაციის პროცესში საქართველოს მხარდაჭერის მნიშვნელობას. „ლატვია არის საქართველოს ძლიერი მხარდამჭერი ევროინტეგრაციის გზაზე, რისთვისაც მადლობას გიხდით. დღეს, როდესაც ჩვენ მნიშვნელოვან ეტაპს გავდივართ ამ გზაზე, ვემზადებით კანდიდატის სტატუსის მისაღებად, ჩვენი პარტნიორების, მეგობარი ქვეყნების გვერდში დგომა განსაკუთრებით მნიშვნელოვანია. მინდა აღვნიშნო, რომ ჩვენ გვაქვს პროგრესი როგორც ასოცირების შეთანხმებით აღებული ვალდებულების შესრულების, ასევე რეფორმების განხორციელების მიმართულებით და ყველაფერს გავაკეთებთ, რომ ეს პროგრესი ყველას დავანახოთ“, - განაცხადა ოთარ შამუგიამ. მინისტრმა ორ ქვეყანას შორის სოფლის მეურნეობის მიმართულებით გაფორმებული მემორანდუმის ფარგლებში თანამშრომლობაზე ისაუბრა და წარმატებულ სავაჭრო ურთიერთობებს გაუსვა ხაზი. ლატვიის რესპუბლიკის ელჩმა საქართველოში, ედიტ მედნიმ, ლატვიის მხარის სახელით, საქართველოს ევროკავშირში ინტეგრაციის პროცესში მხარდაჭერის და გამოცდილების გაზიარების მიმართულებით მზაობა დაადასტურა. „ლატვიის მეცნიერებისა და ტექნოლოგიების უნივერსიტეტში საკმაოდ მაღალ დონეზე ისწავლება აგრარული მიმართულებები და მოხარული ვიქნებით, თუ ქართველი სტუდენტები განათლებას ჩვენთან მიიღებენ. მზად ვართ, გაგიზიაროთ წარმატებული გამოცდილება ნარჩენებისა და ტყის რესურსების მართვის, სურსათის უვნებლობის და თანამედროვე ტექნოლოგიების დანერგვის მიმართულებით. იმედი მაქვს, ჩვენ ქვეყნებს შორის ურთიერთობები კიდევ უფრო გააქტიურდება და ევროინტეგრაციის მიმართულებით საქართველო მიზანს მიაღწევს“, - აღნიშნა ედიტ მედნიმ. BM.GE

ევროსაბჭოს საპარლამენტო ასამბლეის თანამომხსენებლები შეშფოთებას გამოთქვამენ იმასთან დაკავშირებით, რომ „დეოლიგარქიზაციის“ შესახებ კანონპროექტით გათვალისწინებული ე.წ. პერსონალური მიდგომის ადამიანის უფლებათა ევროპულ კონვენციასთან შესაბამისობაში მოყვანა რთული იქნება, - ამის შესახებ ევროპის საბჭოს საპარლამენტო ასამბლეის (PACE) მონიტორინგის კომიტეტის თანამომხსენებლების, კლოდ კერნისა და ედიტ ესტრელას განცხადებაშია აღნიშნული, რომელიც მათ საქართველოში ვიზიტის შემდეგ გამოაქვეყნეს. „თანამომხსენებლები ხაზს უსვამენ სასამართლო სისტემის რეფორმის გაგრძელების აუცილებლობას, რათა უზრუნველყოფილ იქნას მისი, როგორც ჭეშმარიტად დამოუკიდებელი და მიუკერძოებელი არბიტრის როლი. მიუხედავად იმისა, რომ ასამბლეის მიერ 2438 (2022) რეზოლუციის მიღების შემდეგ ნაწილობრივი რეფორმები განხორციელდა, ასამბლეის მიერ რეკომენდებული ჰოლისტიკური რეფორმა, რომელიც ეფუძნება სასამართლო რეფორმების წინა ტალღების მიერ მიღწეული პროგრესის სიღრმისეულ და დამოუკიდებელ შეფასებას, ჯერ კიდევ მისაღებია. ამასთან დაკავშირებით, თანამომხსენებლებმა ხაზი გაუსვეს იუსტიციის უმაღლესი საბჭოს შემდგომი რეფორმის აუცილებლობას იმ მიზნით, რომ მოაგვაროს მისი კორპორატივიზმი, გადაწყვეტილების მიღების პროცესების გამჭვირვალობის ნაკლებობა და მართლმსაჯულების სისტემაზე გადაჭარბებული კონტროლი, რაც ძირს უთხრის სასამართლოს დამოუკიდებლობას. ეს განსაკუთრებით მნიშვნელოვანია ე.წ. „დეოლიგარქიზაციის“ შესახებ კანონის კონტექსტში. მიუხედავად იმისა, რომ თანამომხსენებლები აქებდნენ ხელისუფლების მზაობას, ებრძოლონ ეკონომიკურ, პოლიტიკურ და საზოგადოებრივ ცხოვრებაში კერძო ინტერესების გადაჭარბებულ გავლენას, მათ გამოთქვეს შეშფოთება, რომ ამ კანონით გათვალისწინებული ე.წ. პერსონალური მიდგომის ადამიანის უფლებათა ევროპულ კონვენციასთან შესაბამისობაში მოყვანა რთული იქნება“, - აღნიშნულია განცხადებაში. გარდა ამისა, მომხსენებლების აზრით, პოლიტიკური გარემოს უკიდურესი პოლარიზაციის კონტექსტში და სასამართლო სისტემაზე იუსტიციის უმაღლესი საბჭოს კონტროლთან დაკავშირებით არსებული კითხვების ფონზე, პერსონალურმა მიდგომამ შეიძლება კანონი დაუცველი გახადოს პოლიტიკური მიზნით ბოროტად გამოყენების მიმართ, რაც ეწინააღმდეგება კანონის დადგენილ მიზნებს. „თანამომხსენებლები რეკომენდაციას იძლევიან, რომ ხელისუფლებამ უარი თქვას კანონპროექტში ე.წ. პერსონალურ მიდგომაზე ე.წ. სისტემური მიდგომის სასარგებლოდ არსებული მექანიზმების გაძლიერების მიზნით, კერძო ინტერესების არასათანადო გავლენის წინააღმდეგ საბრძოლველად, მიდგომა, რომელსაც ასევე აშკარად ანიჭებს უპირატესობას ვენეციის კომისია“, - აღნიშნულია განცხადებაში. ინტერპრესნიუსი

უკრაინაში 15 რუს ჯარისკაცს გაასამართლებენ, რომელსაც ჩერნიგოვის ოლქში, იაგოდნოეს სკოლის სარდაფში 368 ადამიანი თითქმის ერთი თვე ჰყავდა დაკავებული. გენერალური პროკურატურის ცნობით, 15 რუს სამხედრო მოსამსახურეს ბრალი ომის კანონებისა და წეს-ჩვეულებების დარღვევისთვის წაუყენეს. „რუსეთის ფედერაციის 15 სამხედრო მოსამსახურეს ჩერნიგოვის ოლქში მშვიდობიანი მოსახლეობის მიმართ სასტიკი მოპყრობისთვის გაასამართლებენ. გამოძიებამ დაადგინა, რომ 2022 წლის მარტის დასაწყისში, ჩერნიგოვის ოლქის ოკუპირებულ სოფელ იაგოდნოეში, რუსეთის შეიარაღებული ძალების შეიარაღებულმა სამხედოებმა სკოლის სარდაფში თავისუფლება აღუკვეთეს და იძულებით დააკავეს, „ცოცხალ ფარად“ გამოყენების მიზნით, 368 ადამიანი, მათ შორის 69 არასრულწლოვანი“, - აცხადებენ უკრაინის გენერალურ პროკურატურაში. ინტერპრესნიუსი

პარტია „მოქალაქეების“ ლიდერმა ალექსანდრე ელისაშვილმა „პალიტრანიუსის“ ეთერში დასმულ შეკითხვებს უპასუხა. მას ჟურნალისტმა ჰკითხა, უქმნიდა თუ არა უხერხულობას, რომ მისი დისშვილი ომბუდსმენის მოადგილედ დაინიშნა. ალექსანდრე ელისაშვილი ამბობს, რომ მას არ აქვს უხერხულობა ამის გამო, რადგან ნათია ჯულაყიძე კვალიფიციური კადრია და ის პარტიაშიც ბევრ საქმეს აკეთებდა. სახალხო დამცველმა ლევან იოსელიანმა გუშინ მოადგილეები წარადგინა – ნათია ჯულაყიძე და ელენე ღუდუშაური. ნათია ჯულაყიძე პარტია „მოქალაქეების“ წევრი იყო, ხოლო ელენე ღუდუშაური ლევან იოსელიანთან მუშაობდა პარლამენტის აპარატში. პუბლიკა

აშშ-ის პრეზიდენტმა დონალდ ტრამპმა სასამართლოს შენობა დატოვა. ის დღეს მანჰეტენის საოლქო პროკურატურის ოფისში დაკითხვაზე გამოცხადდა, სადაც ფორმალურად დააკავეს სასამართლოს სხდომამდე, რომელიც დღესვე გაიმართა. დონალდ ტრამპს 34-პუნქტიანი ბრალდება წარუდგინეს. დონალდ ტრამპი ბრალს არ აღირებს. CNN-ის ცნობით, სასამართლოს შენობის დატოვების შემდეგ დონალდ ტრამპს მედიასთან კომენტარი არ გაუკეთებია. publika

დონალდ ტრამპი დააკავეს. როგორც დასავლური მედია წერს, სასამართლოში მისვლის შემდეგ, დონალდ ტრამპი ოფიციალურად არის დაკავებული და პოლიციის პატიმრობაში იმყოფება მომავალ სასამართლო სხდომამდე. ტრამპი ამერიკის პირველი პრეზიდენტია, რომელსაც სისხლის სამართლის ბრალდება წაუყენეს. ipn

საქართველოს პრეზიდენტი სალომე ზურაბიშვილი ფინეთის ნატო-ში გაწევრიანებას სოციალურ ქსელ „ტვიტერში“ ეხმიანება. „ფინეთი ნატო-ს წევრი 31-ე ქვეყანა გახდა, ასე დაიწერა ისტორია. გილოცავთ! ეს არის ძლიერი წახალისება და საქართველო ერთგულად გააგრძელებს ევროატლანტიკური ინტეგრაციის გზას“, – წერს სალომე ზურაბიშვილი. ფინეთი ნატოს 31-ე წევრი დღეს ოფიციალურად გახდა. ცერემონია ნატო-ს შტაბბინაში გაიმართა. ფინეთის საგარეო საქმეთა მინისტრმა, პეკა ჰაავისტომ აშშ-ის სახელმწიფო მდივანს, ენტონი ბლინკენს ოფიციალური დოკუმენტი გადასცა.

პრეზიდენტის ადმინისტრაციის განცხადებით, 9 აპრილს საქართველოს პრეზიდენტი სალომე ზურაბიშვილი თბილისის ოპერისა და ბალეტის სახელმწიფო თეატრში სხვადასხვა სფეროს წარმომადგენელ ქალებს უმასპინძლებს. პრეზიდენტის ადმინისტრაციაში განმარტავენ, რომ აღნიშნული ღონისძიება აპოლიტიკურია და მიზნად არ ისახავს არანაირი მოძრაობის დაფუძნებასა თუ ჩამოყლიბებას. „9 აპრილს, საქართველოს თანამედროვე ისტორიაში ერთ-ერთ ყველაზე მნიშვნელოვან დღეს, საქართველოს პრეზიდენტი თბილისის ოპერისა და ბალეტის სახელმწიფო თეატრში სხვადასხვა სფეროს წარმომადგენელ ქალებს მასპინძლობს, რათა ერთად აღვნიშნოთ ეს მნიშვნელოვანი თარიღი და ერთად გამოვხატოთ მხარდაჭერა საქართველოს ევროპული მომავლის მიმართ. საზოგადოების შეცდომაში შეყვანის მცდელობების გამო, აქვე განვმარტავთ, რომ ისევე როგორც სხვა, დანარჩენი ღონისძიებები, რომლებიც პრეზიდენტის ეგიდით ტარდება, ეს ღონისძიებაც აპოლიტიკურია და მიზნად არ ისახავს არანაირი მოძრაობის დაფუძნებასა თუ ჩამოყალიბებას“, – ნათქვამია პრეზიდენტის ადმინისტრაციის განცხადებაში.

„საერთაშორისო გამჭვირვალობა — საქართველოს“ ინფორმაციით, სენაკის მერიის მიერ 2022 წლის მარტში გამოცხადებულ 5 ტენდერში, რომელთა ჯამური ღირებულება 2 614 550 ლარია, სენაკის მერ ვახტანგ გადელიას ბიძის, დემურ გადელიას კომპანია „არქეოპოლისმა” და ბიძაშვილ იოსებ გადელიას კომპანია „ინდიკომ” უკონკურენტოდ გაიმარჯვეს. სენაკის მერიის ვებ-გვერდზე განთავსებული ინფორმაციით, ვახტანგ გადელია ადრე თავადაც მუშაობდა „არქეოპოლისში”. 2009-2013 წლებში სააქციო საზოგადოების სამეთვალყურეო საბჭოს წევრი იყო. „არქეოპოლისმა” სამ ტენდერში გაიმარჯვა. ქალაქ სენაკის ორ ქუჩაზე და ხუთი სოფლის სხვადასხვა დასახლებაში გზის საფარი უნდა აღადგინოს, „ინდიკო” კი ორი ტენდერის გამარჯვებულია — მას სენაკში, სამხედრო დასახლებაში არსებული კორპუსების ეზოების კეთილმოწყობის, შიდა გზების რეაბილიტაციისა და მოედნის მოწყობის სამუშაოები აქვს შესასრულებელი. „საერთაშორისო გამჭვირვალობა — საქართველოს“ თანახმად, აღნიშნულ მომსახურებათა შესყიდვა სენაკის მერიამ თავდაპირველად 2022 წლის იანვარში სცადა, თუმცა მხოლოდ ორი ტენდერის მეშვეობით. ტენდერებში „არქეოპოლისმა“ და „ინდიკომ“ გაიმარჯვა, თუმცა მერიამ მათთან ხელშეკრულებები ვერ გააფორმა, რადგანაც ორივე შემთხვევაში ხელშეკრულების ღირებულება სენაკის მუნიციპალიტეტის ბიუჯეტის გადასახდელების 5%-ს აღემატებოდა და ამ ღირებულების ხელშეკრულების გაფორმებას საკრებულოს თანხმობა სჭირდება. სენაკში საკრებულოს ამ დრომდე არ დაუწყია ფუნქციონირება პარტიათა შორის არსებული დაპირისპირების გამო. შესაბამისად, სატენდერო კომისიამ ორივე ტენდერი შეწყვიტა. სენაკის მერიამ ორი შეწყვეტილი ტენდერის ნაცვლად ექვსი ახალი ტენდერი გამოაცხადა. ტენდერი, რომელშიც „არქეოპოლისი” გამოვლინდა გამარჯვებულად, ამჯერად 3 შესყიდვად დაიყო, ასევე 3 შესყიდვად დაიყო „ინდიკოს” მიერ მოგებული ტენდერიც. „საერთაშორისო გამჭვირვალობა — საქართველოს“ ცნობით, ამ გზით მერიამ შეამცირა მომსახურებათა ღირებულება, რითაც ხელშეკრულების გაფორმებაზე საკრებულოს თანხმობის საჭიროება აირიდა. „არქეოპოლისმა” მონაწილეობა მიიღო და უკონკურენტოდ გაიმარჯვა იმ შესყიდვებში, რომლებშიც წინა ჯერზეც გამოვლინდა გამარჯვებულად, რაც შეეხება „ინდიკოს”, მან სამიდან ორ ტენდერში, უკონკურენტოდ გაიმარჯვა, მესამე შესყიდვის გამარჯვებულად (ასვე უკონკურენტოდ) კი პარტია „ქართული ოცნების” შემწირველი კომპანია „მშენებელი” გამოვლინდა. „როგორც წინა ორ შემთხვევაში, ასევე ახალ ტენდერებზე სენაკის მერიამ ფინანსური გამოცდილების საკმაოდ მაღალი მოთხოვნები წამოაყენა, რამაც, ჩვენი შეფასებით, მნიშვნელოვნად შეზღუდა ბაზარზე მოქმედი სხვა ალტერნატიული მიმწოდებლები და კონკურენცია, რადგანაც ამ მოთხოვნებს სენაკსა და რეგიონში მოქმედი კომპანიების უმეტესობა ვერ აკმაყოფილებს“, — აცხადებს „საერთაშორისო გამჭვირვალობა — საქართველო“. არასამთავრობო ორგანიზაციის ცნობით, „არქეოპოლისთან” დაკავშირებულია სენაკის მერიის ადმინისტრაციული სამსახურის უფროსი ნანა ზარანდიაც — იგი 2019 წლის 8 თებერვლიდან 2020 წლის 12 ივნისამდე “არქეოპოლისის” დირექტორი იყო. ნანა ზარანდია ამავე დროს სენაკის მერიის სატენდერო კომისიის თავმჯდომარის მოადგილეცაა, როგორც წინა, შეწყვეტილი ორი შესყიდვის, ასევე ახალი ექვსივე შესყიდვის დოკუმენტებში ხელს აწერს, რომ არ აქვს ინტერესთა კონფლიქტი არც „არქეოპოლისთან” და არც „ინდიკოსთან”. ვახტანგ გადელიამ ხუთივე შესყიდვაზე აღნიშნა, რომ გააჩნია ინტერესთა კონფლიქტი როგორც „ინდიკოსთან”, ასევე „არქეოპოლისთან” და ხელშეკრულებათა გაფორმებაზე უფლებამოსილება მერის პირველი მოადგილისთვის აქვს დელეგირებული. მიუხედავად ამისა, TI-საქართველოს შეფასებით, ზემოთ მოყვანილი გარემოებები აჩენს ეჭვებს პროცესის გამჭვირვალობასთან დაკავშირებით. „სატენდერო დოკუმენტაციისა და პირობების შესწავლა, ასევე, აღნიშნულ შესყიდვათა პროცესი გვაფიქრებინებს, რომ ისინი შესაძლოა, კონკრეტულ მიმწოდებლებზე იყოს მორგებული“, — აცხადებს „საერთაშორისო გამჭვირვალობა — საქართველო“. „საერთაშორისო გამჭვირვალობა-საქართველო” სახელმწიფო უსაფრთხოების სამსახურის ანტიკორუფციულ სააგენტოს მოუწოდებს, შეისწავლოს სენაკის მერიის ტენდერებში „არქეოპოლისისა” და „ინდიკოს” მონაწილეობის პროცესი და დაადგინოს, შეიცავს თუ არა კორუფციის შესაძლო ნიშნებს. სენაკის მერიაში აღნიშნულ საკითხზე ჯერჯერობით კომენტარი არ გაუკეთებიათ. ნეტგაზეთი

რუსებმა, გარკვეულწილად, სცადეს მათ გარშემო შიშის შექმნა, მაგრამ ჩვენ არ გვეშინია , - ამის შესახებ ფინეთის პრეზიდენტმა საული ნიინისტომ ნატოს გენერალურ მდივანთან, იენს სტოლტენბერგთან ფინეთის ალიანსში გაწევრიანებასთან დაკავშირებით გამართულ ერთობლივ ბრიფინგზე განაცხადა. “მადლობა მინდა გადაგიხადოთ. მახსოვს, რომ ფინეთის გაწევრიანებას ჯერ კიდევ 2021 წელს განვიხილავდით, მას შემდეგ კიდევ ლამის 10-ჯერ გვისაუბრია. ძალიან მნიშვნელოვანი დღეა ფინეთისთვის. ვხედავ, რომ ნატოსთვისაც მნიშვნელოვანია. უსაფრთხოება და სტაბილურობა - ამ ელემენტებს ჩვენ ძალიან ძლიერად ვგრძნობთ. გვსურს, რომ ხალხი უსაფრთხო გარემოში ცხოვრობდეს, რათა ბედნიერი ცხოვრება შეძლონ, ფინელები კი უკვე ბედნიერები არიან. მსურს ამ პროცესში მალე 32 ვიყოთ, თქვენთან შვედეთთან ერთად. მსურს, რომ ამ თავდაცვით ალიანსში ჩვენი წვლილი სტაბილურობა და უსაფრთხოება შევიტანოთ… ბევრი ისტორიული მომენტი გვინახავს, მაგრამ დღევანდელი დღე ყველაზე ისტორიულია ჩვენთვის და ჩვენი პარტნიორებისთვისაც… არ გვსურს სხვები გვკარნახობდნენ რა უნდა ან არ უნდა გავაკეთოთ. რუსებმა, გარკვეულწილად, სცადეს მათ გარშემო შიშის შექმნა, მაგრამ ჩვენ არ გვეშინია”, - განაცხადა ნიინისტომ. ინტერპრესნიუსი