tvati

ორგანიზაციის „პატარა ადამიანები საქართველოდან“ წარმომადგენლებს, შესაძლებლობა ექნებათ, ჩაერთონ როგორც იშვიათი დაავადებების საკითხებზე მომუშავე საკოორდინაციო საბჭოს, ისე აქონდროპლაზიის საკითხებზე მომუშავე მულტიდისციპლინურ ჯგუფის მუშაობაში. ამის შესახებ ჯანდაცვის სამინისტროს პრესსამსახური მინისტრის მოადგილე თამარ გაბუნიას კომენტარს ავრცელებს. თამარ გაბუნია ასევე ამბობს, რომ აუცილებელია, პროცესები კონსტრუქციულ რეჟიმს დაუბრუნდეს, რათა არ შეფერხდეს აქონდროპლაზიის მართვის სისტემის დანერგვის მიზნით მიმდინარე მოლაპარაკებები, ვინაიდან ნებისმიერი დესტრუქციული ქმედება და ესკალაცია საფრთხეს უქმნის აქონდროპლაზიის მკურნალობის პროტოკოლის დანერგვის პროცესს. აქონდროპლაზიის დიაგნოზის მქონე ბავშვების მშობლები ამ წუთებში კანცელარიასთან საპროტესტო აქციას მართავენ, რომელიც მსვლელობით გაგრძელდება. აქონდროპლაზიის სამკურნალო მედიკამენტის შემოტანის მოთხოვნით მშობლები 11 დღეა კანცელარიასთან ღამეს ათევენ. publika

ფოთის, ხობისა და სენაკის მაჟორიტარი დეპუტატობის კანდიდატმა პოლიტიკური გაერთიანება „თავისუფალი საქართველოდან“ ბესიკ წულეისკირმა საკუთარი არჩევანი სენაკის # 64 ოლქში გააკეთა. მისი განცხადებით, ეს არჩევნები მნიშვნელოვანია და უნდა გაიმარჯვოს ისეთმა კანდიდატმა, რომელიც საქმის გაკეთებაზე იქნება ორიენტირებული. მისივე მტკიცებით, ამომრჩეველთა სიებში გარდაცვლილი ადამიანების მონაცემებიცაა. „ამომრჩევლებს მივმართავ მოახდინონ სრული მობილიზაცია, ეს არჩევნები მნიშვნელოვანია რათა გაიმარჯვოს იმ კანდიდატმა, რომელიც თითოეულ ადამიანზე იქნება ორიენტირებული და გააკეთებს საქმეს. ერთ-ერთ უბანზე 10-15 წლის წინ გარდაცვლილი ადამიანია სიაში, მიუხედავად იმისა, რომ გარდაცვალების ცნობა ვნახე. ეს ერთი ფაქტი არაა. ასეთი უამრავია, მიცვალებულებია სიებში. მე გამარჯვების მოლოდინი მაქვს, მაგრამ არც მეორე ტურს გამოვრიცხავ“, - განაცხადა ბესიკ წულეისკირმა. IPN

აქონდროპლაზიის დიაგნოზის მქონე ბავშვების მხარდასაჭერად, მთავრობის ადმინისტრაციიდან საქართველოს პარლამენტისკენ მსვლელობა მიმდინარეობს. მსვლელობაში მონაწილეობენ, როგორც აქონდროპლაზიის დიაგნოზის მქონე ბავშვების მშობლები და ახლობლები, ასევე ოპოზიციონერი პოლიტიკოსები, ჟურნალისტები და საზოგადოების სხვა წარმომადგენლები. აქონდროპლაზიის დიაგნოზის მქონე ბავშვების მშობლების თქმით, ისინი საქართველოს საკანონმდებლო ორგანოსთან მედიკამენტის მიღების მოთხოვნით სიტყვით გამოვლენ. მსვლელობის დასრულების შემდეგ, აქცია მთავრობის ადმინისტრაციასთან გაგრძელდება. IPN

ფრაქცია „ქართული ოცნების“ თავმჯდომარის, მამუკა მდინარაძის განცხადებით, თერჯოლა დღეს მანუჩარ რობაქიძეს მერის თანამდებობაზე აირჩევს, რომელიც აღნიშნულ პოზიციაზე წარმატებული იქნება. აღნიშნულის შესახებ მან ჟურნალისტებს თერჯოლაში განუცხადა, სადაც შუალედური არჩევნები ტარდება. ამასთან, მან ისაუბრა არჩევნებში ტექნოლოგიების გამოყენებაზე და აღნიშნა, რომ ამ მხრივ არჩევნები წარმატებით მიმდინარეობს. „გარკვეულწილად სატესტო რეჟიმშია ის ახალი ტექნოლოგია, რომელსაც ჩვენ კანონმდებლობით ვნერგავთ. ამ მიმართულებით არჩევნები წარმატებით მიმდინარეობს, რაც ძალიან მიხარია. თუ რაიმე ხარვეზი იქნება, ბუნებრივია, ეს ჩვენ გამოგვადგება შემდგომ პერსპექტივაში ამ ხარვეზების დახვეწისთვის, გამოწვევების გადასალახად იმისთვის, რომ ელექტრონული არჩევნები შემდეგისთვის არანაირ კითხვის ნიშანს არ ტოვებდეს და განსაკუთრებით 2024 წლის არჩევნებში. რამდენიმე დღის წინ გამოქვეყნდა IRI-ის კვლევა. დღეს ჩვენ შეგვიძლია თამამად ვთქვათ, რომ რა პროცენტიც ამ ორგანიზაციამ რომელიღაც კაბინეტში დაგვიწერა, იმიტომ, რომ რეალურად რაღაც გაყალბებული დოკუმენტი იყო, იმ პროცენტზე მეტი ამომრჩეველი მივა დღეს ქვეყნის მასშტაბით იმ ოლქებში, რომლებშიც არჩევნები მიმდინარეობს. ხაზგასმით ვამბობ, ამომრჩეველთა რაოდენობა იქნება იმ პროცენტულ მაჩვენებელზე მეტი, ვიდრე IRI-იმ „ქართულ ოცნებას“ დაუწერა და დღეს ეს მოხდება უკონკურენტო არჩევნებში- „ქართულ ოცნებას“ ვერ გაუბედეს, რომ კონკურენტები დაეყენებინათ. ამიტომ, ის პარადოქსი, რომელსაც ისინი კადრულობენ, რაიმენაირად გვერდზე უნდა გადაწიონ და ამ კვლევების ჩამტარებელი ორგანიზაციის ხელმძღვანელობა კარგად უნდა დაფიქრდეს, რასთან აქვთ საქმე, როდესაც ერთი მხრივ, ასეთი მტკიცებულებები ჩნდება და მეორე მხრივ ჩნდება კვლევები, რომელსაც საერთო რეალობასთან კი არ აქვს, არამედ 30%-იანი ცდომილებით არის ხოლმე გაყალბება", - განაცხადა მდინარაძემ. ცნობისთვის, საქართველოს 10 მუნიციპალიტეტში შუალედური/რიგგარეშე არჩევნები იმართება. ამომრჩევლები დღეს ირჩევენ: საქართველოს პარლამენტის ფოთი - სენაკი - ხობის მაჟორიტარ დეპუტატს, გურჯაანის, თიანეთის, ახალციხის, ტყიბულის, ქუთაისის საკრებულოების მაჟორიტარ დეპუტატებს, ასევე ცაგერისა და თერჯოლის მერებს. ipn

რუსული ძალების ძირითადი ძალისხმევა მიმართულია ლიმანის, ბახმუტის, ავდიივკასა და მარინკას მიმართულებებზე შეტევითი ოპერაციების ჩატარებაზე, - ამის შესახებ უკრაინის შეიარაღებული ძალების გენერალური შტაბის დილის ანგარიშშია აღნიშნული. უწყების ცნობით, უკრაინულმა ძალებმა გასული დღის განმავლობაში ფრონტის ამ მონაკვეთებზე 48 შეტევა მოიგერიეს. გენშტაბში აცხადებენ, ბახმუტი და მარინკა საომარი მოქმედებების ეპიცენტრში რჩებიან, სადაც უკრაინელი სამხედროები თავდაცვის ხაზს ინარჩუნებენ. „ბახმუტის მიმართულებით მტერი აგრძელებს შეტევითი ოპერაციების ჩატარებას. ქალაქ ბახმუტში ბრძოლა გრძელდება“, - აცხადებენ გენშტაბში. მათივე ინფორმაციით, ავდიივკას მიმართულებით, რუსულმა ძალებმა შეტევითი ოპერაციები განახორციელეს ავდიივკას, სევერნოესა და პერვომაისკოეს დასახლებების ტერიტორიებზე, მაგრამ წარმატებას ვერ მიაღწიეს. „მარინკას მიმართულებით, გასული დღის განმავლობაში, ჩვენმა დამცველებმა მოიგერიეს მტრის თავდასხმები მარინკასა და ნოვომიხაილოვკის დასახლებებში. ამავე დროს, მტერმა დონეცკის ოლქის კრასნოგოროვკას, მარინკას, პობედასა და ნოვომიხაილოვკას დასახლებები დაბომბა“, - აცხადებენ გენერალურ შტაბში. უწყების ცნობით, უკრაინელმა ჯარისკაცებმა, გასული დღის განმავლობაში, მოწინააღმდეგის რამდენიმე მნიშვნელოვანი ობიექტი გაანადგურეს. უკრაინის საარტილერიო ქვედანაყოფებმა და სამხედრო ავიაციამ მოწინააღმდეგის თავშეყრის ტერიტორიებს დაარტყეს. კერძოდ, გასული დღის განმავლობაში თავდაცვის ძალების თვითმფრინავებმა ოკუპანტების კონცენტრაციის ადგილებს 5 დარტყმა მიაყენეს. ამავდროულად, სარაკეტო და საარტილერიო ქვედანაყოფებმა 4 სამეთაურო პუნქტს, საბრძოლო მასალის საცავსა და მოწინააღმდეგის ცოცხალი ძალის თავშეყრის 4 ტერიტორიას დაარტყეს. ipn

უკრაინის პრეზიდენტის, ვოლოდიმირ ზელენსკის განცხადებით, ომში მყოფი ქვეყნის მართვის მამობასთან დაბალანსება შეუძლებელი ამოცანაა. „ხალხი ამბობს, რომ არ ვარ ცუდი პრეზიდენტი, მაგრამ მე ნამდვილად არ ვარ კარგი მამა ამ მომენტში. ჩემს შვილებს ჩემი ცოლი და ომი ზრდიან“, - აღნიშნა ზელენსკიმ. მისივე თქმით, არ აქვს უფლება, რომ ომისგან დაისვენოს, ასევე შეუძლებელია იმის თქმა, რომ უკრაინელები ომს შეჩვეულები არიან. „ყველა ტრაგედია გადამაქვს. არ მაქვს უფლება ვთქვა, რომ ომს მიჩვეულები ვართ“, - აღნიშნა ზელენსკიმ სკანდინავიელ ჟურნალისტებთან საუბარში. ამასთან, მისი თქმით, ომის შედეგებთან დაკავშირებით ოპტიმისტურადაა განწყობილი. ის იხსენებს მომენტს, როდესაც უკრაინელებმა ოკუპაციისგან პირველი რეგიონის გათავისუფლება შეძლეს. „პირველად, როცა რეგიონი გავათავისუფლეთ, ახალი ცხოვრების გემოს ჰგავდა“, - აღნიშნა ზელენსკიმ. ipn

ყოფილი პირველი ლედი, მაკა ჩიჩუა აცხადებს, რომ შვილისთვის ადრეული განვითარების ცენტრში შესაბამისი თერაპიის დაფინანსებას ითხოვს, თუმცა ჯანდაცვის სამინისტრო მესამე წელია უარს ეუბნება. ამის შესახებ მან დღეს, 27 აპრილს ტელეკომპანია “ფორმულას” ეთერში ისაუბრა. მაკა ჩიჩუას თქმით, აღნიშნულის თაობაზე ჯანდაცვის სამინისტროს არაერთხელ მიმართა განცხადებით, მაგრამ უშედეგოდ: “თემო დამყავს ადრეული განვითარების ცენტრში. აბსოლუტური უფლება მაქვს, რომ ჯანდაცვის სამინისტროში განაცხადი შევიტანო, რომ დამაფინანსონ, რადგან ამ ბავშვებს ეკუთვნით. 3 წელია შემაქვს ჯანდაცვის სამინისტროში განაცხადი იმიტომ, რომ ისეთი თანხაა [თერაპიებში გადასახდელი], რომ შეიძლება მე არ მქონდეს ასე მობილიზებული. არცერთ ჯერზე არ დაფინანსდა ჩემი მოთხოვნა, რომ ბავშვს ჰქონდეს თერაპია და დაუფინანსდეს”, — განაცხადა ჩიჩუამ. მაკა ჩიჩუასა და ექსპრეზიდენტ გიორგი მარგველაშვილის შვილს, თემოს დაუნის სინდრომი აქვს. ბავშვთა ადრეული განვითარების ქვეპროგრამა ბავშვებისა და ოჯახების მხარდამჭრი სახელმწიფო პროგრამაა, რაც ხელს უწყობს ბავშვის განვითარებას, მის სოციალიზაციასა და განათლებას. დაუნის სინდრომის ასოციაციის თანახმად, აღნიშნული პროგრამის მთავარი მიზანია, რომ ბავშვმა სხავდასხვა მნიშვნელოვანი უნარები განივითაროს მისთვის ბუნებრივ გარემოში, როგორიცაა ოჯახი, საბავშვო ბაღი, სკოლა და ა. შ. პროგრამა 0-დან 7 წალმდე ასაკის განვითარების შეფერხების, მისი რისკის ან შეზღუდული შესაძლებლობის მქონე ბავშვებისთვის არის განკუთვნილი. პროგრამა მოიცავს სპეციალისტების 8 ვიზიტს სახლში ან ბავშვის ვიზიტებს სპეციალიზებულ ცენტრში. პროგრამაში ჩართვისთვის ბავშვის კანონიერი წარმომადგენელი – მშობელი/მინდობით აღმზრდელი მიმართავს სოციალური მომსახურების სააგენტოს საცხოვრებელი ადგილის მიხედვით და წარადგენს შესაბამის დოკუმენტაციას, რის შემდეგაც მომსახურების სააგენტო გამოყოფს სპეციალურ ვაუჩერს, რომლითაც პროგრამის ბენეფიციარებს შეუძლიათ სარგებლობა. დაუნის სინდრომის ასოციაციის თანახმად, ვაუჩერის გაცემის პროცესი მოიცავს მოლოდინის პერიოდს. უპირატესობით სარგებლობენ ბავშვები: რომლებიც მომსახურებას იღებდნენ წინა 12 თვის განმავლობაში; არიან 3 წლამდე; არიან რეინტეგრაციის შემწეობის მიმღები ოჯახებიდან; იმყოფებიან მინდობით აღზრდაში; სოციალურად დაუცველი ოჯახების მონაცემთა ერთიან ბაზაში არიან რეგისტრირებული 100 001-მდე სარეიტინგო ქულით; სტატია განახლდება ჯანდაცვის სამინისტროსგან კომენტარის მიღების შემთხვევაში ამ საკითხის შესახებ მან “ფორმულას” ეთერში აქონდროპლაზიის სინდრომის მქონე ბავშვებისთვის მედიკამენტის შემოტანის თაობაზე საუბრისას ილაპარაკა. აქონდროპლაზიის სინდრომის მქონე ბავშვების მშობლები აქციებს მართავენ და მთავრობას მათი შვილებისთვის საჭირო მედიკამენტის დაფინანსებას სთხოვენ. საუბარია პრეპარატ Voxzogo-ს (აქტიური ნივთიერება – ვოსორიდიტი), რომელსაც 2021 წელს აშშ-ის წამლისა და საკვების ადმინისტრაციამ (FDA), ასევე ევროპის წამლის სააგენტომ (EMA) ავტორიზაცია მისცა. ეს პრეპარატი პირველია, რომელიც გამოიყენება სინდრომისა და მისგან გამოწვეული სიმპტომების სამკურნალოდ. მშობლები ამბობენ, რომ მისი მიღება ეფექტურია მხოლოდ გარკვეულ დრომდე, კერძოდ – 18 წლამდე. netgazeti

დღეს, 29 აპრილს, 15:00 საათზე მთავრობის ადმინისტრაციასთან აქცია გაიმართება, სადაც აქონდროპლაზიის დიაგნოზის მქონე ბავშვებისთვის პრეპარატის დაფინანსებას კიდევ ერთხელ მიოთხოვენ. „მშობლები უკვე წელიწადნახევარია ველაპარაკებით სახელმწიფოს. წელიწადნახევარი გავიდა უშედეგო საუბარში. სახელმწიფოს გულგრილობამ მშობლები ქუჩაში გამოგვიყვანა.ჩვენ, კვირაზე მეტია, ღია ცის ქვეშ, ვათევთ ღამეს კანცელარიასთან, და ვითხოვთ ელემენტარულს – ყურადღებას ხელისუფლებისგან. ყურადღების ნაცვლად, მშობლები პასუხად ვიღებთ დეზინფორმაციის, დისკრედიტაციის და ცილისწამების კამპანიას! ეს არის ხელისუფლების წარმოუდგენლად სამარცხვინო მოპყრობა საკუთარ მოქალაქეებთან, მშობლებთან, დედებთან და არის ჩვენი, თითოეული ადამიანის ღირსების შემლახავი. ჩვენ უწყვეტად ვაგრძელებთ ჩვენს პროტესტს, ვითხოვთ ჩვენი შვილებისთვის კრიტიკულად მნიშვნელოვან წამალს, Voxzogo/Vosoritide, რომელიც ევროკავშირსა და ამერიკაში ლიცენზირებული და დამტკიცებულია. ჩვენ მთელი ძალით გვიპირისპირდება სახელისუფლებო პროპაგანდა. ახლა გვჭირდება თქვენი გვერდში დგომა მოქალაქეებო, მეგობრებო, მშობლებო, ექიმებო, მასწავლებლებო, სტუდენტებო, მოდით შაბათს კანცელარიასთან სამ საათზე, დაგვეხმარეთ შვილების გადარჩენაში“, – აცხადებენ აქონდროპლაზიის დიაგნოზის მქონე ბავშვების მშობლები. აქონდროპლაზიის დიაგნოზის მქონე ბავშვების მშობლები უკვე რამდენიმე თვეა საპროტესტო აქციებს მართავენ და საქართველოში მათი შვილებისთვის საჭირო მედიკამენტის შემოტანასა და სახელმწიფოს დაფინანსებას ითხოვენ. ამ მოთხოვნით დედები უკვე ერთი კვირაზე მეტია მთავრობის ადმინისტრაციის შენობასთან 24- საათიან რეჟიმში იმყოფებიან და პრემიერ-მინისტრ ირაკლი ღარიბაშვილთან შეხვედრას ითხოვენ. მშობლების მოთხოვნის საპასუხოდ, ირაკლი ღარიბაშვილმა 24 აპრილის მთავრობის სხდომაზე განაცხადა, რომ წამლის დაფინანსების პრობლემა ქვეყანაში არ დგას, რადგან საუბარია დაახლოებით 10 მილიონზე. თუმცა მთავრობა ამ ნაბიჯს ჯერ არ გადადგამს, რადგან მას პრეპარატის შემოსატანად დამატებითი სამედიცინო მტკიცებულებები სჭირდება. საუბარია პრეპარატ Voxzogo-ს (აქტიური ნივთიერება – ვოსორიდიტი), რომელსაც 2021 წელს აშშ-ის წამლისა და საკვების ადმინისტრაციამ (FDA), ასევე ევროპის წამლის სააგენტომ (EMA) ავტორიზაცია მისცა. ეს პრეპარატი პირველია, რომელიც გამოიყენება სინდრომისა და მისგან გამოწვეული სიმპტომების სამკურნალოდ. მშობლები ამბობენ, რომ მისი მიღება ეფექტურია მხოლოდ გარკვეულ დრომდე, კერძოდ – 18 წლამდე. netgazeti

დღეს საქართველოს პარლამენტისა და მუნიციპალიტეტების საკრებულოების შუალედური, ასევე მერების რიგგარეშე არჩევნები იმართება. საარჩევნო უბნები გაიხსნა 10 მუნიციპალიტეტში, შესაბამის მაჟორიტარულ საარჩევნო ოლქებში. კენჭისყრა დაწყებულია. ნათია იოსელიანის განცხადებით, საარჩევნო ადმინისტრაცია სრულად მზად არის, კანონმდებლობის დაცვით, გამჭვირვალედ და მაღალ პროფესიულ დონეზე გაუწიოს ადმინისტრირება დღევანდელ არჩევნებს. მაგრამ, რა თქმა უნდა, ასევე ძალიან მნიშვნელოვანია ამომრჩევლების აქტიურობა. „პირველ რიგში გვინდა მოვუწოდოთ ამომრჩევლებს მივიდნენ საარჩევნო უბნებზე და გააკეთონ არჩევანი ტექნოლოგიების გამოყენებით. ერთად უნდა შევუწყოთ ხელი ელექტრონული ტექნოლოგიების გამოყენებით არჩევნების საერთაშორისო სტანდარტების შესაბამისად ჩატარებას, რადგან არჩევნები საერთო საქმეა. რაც შეეხება უშუალოდ საარჩევნო პროცედურებს, შეგახსენებთ, რომ ამომრჩეველმა საარჩევნო უბანზე მისვლისას, თან უნდა იქონიოს საქართველოს მოქალაქის პირადობის მოწმობა ან პასპორტი. მისი თქმით, დღეს, მთელი დღის მანძილზე, გაიმართება საინფორმაციო ბრიფინგები და ცესკო მიაწვდის ინფორმაციას საზოგადოებას, როგორც კენჭისყრის დღის მიმდინარეობის, ასევე ამომრჩეველთა აქტივობის შესახებ. publika

საქართველოს პრეზიდენტმა სალომე ზურაბიშვილმა საფრანგეთის საგარეო საქმეთა მინისტრთან კატრინ კოლონასთან საქართველოს ევროკავშირში ინტეგრაციის პროცესი და საფრანგეთის მხარდაჭერის საკითხი განიხილა. ამის შესახებ ინფორმაციას პრეზიდენტის ადმინისტრაცია ავრცელებს. პრეზიდენტის განცხადებით, საქართველოსათვის ასეთ მნიშვნელოვან ეტაპზე ჩვენი პარტნიორი ქვეყნების საგარეო საქმეთა მინისტრების ვიზიტები ძალიან მნიშვნელოვანია. მისი თქმით, ქვეყნის მოსახლეობა ურყევად უჭერს მხარს ქვეყნის ევროპაში ინტეგრაციას და სწორედ ამის დამადასტურებელი იყო 7-8 მარტის აქციები. პრეზიდენტის განცხადებით, დღეს საქართველო ევროკავშირის რეკომენდაციების შესრულების პროცესში იმყოფება და ამ მომენტისათვის ძალიან მნიშვნელოვანია ასევე გეოპოლიტიკური კონტექსტიც - საქართველო კანდიდატის სტატუსთან დაკავშირებით მეორე უარს ვერ მიიღებს, ეს რთულად გასაგები და კონტრპროდუქტიული გზავნილი იქნება. „შეხვედრისას საუბარი შეეხო რეგიონის უსაფრთხოების საკითხს და ამ მიმართულებით შავი ზღვის უსაფრთხოებას. საქართველო მნიშვნელოვან როლს თამაშობს ახალი სატრანზიტო - ენერგეტიკული კავშირების განვითარებაში“, - ნათქვამია პრეზიდენტის ადმინისტრაციის მიერ გავრცელებულ ინფორმაციაში. პრეზიდენტის განცხადებით, თუ საკითხს ისტორიული პერსპექტივით შევხედავთ, ის რაც რამდენიმე წლის წინ წარმოუდგენელი იყო, დღეს უკვე რეალობაა და ევროპა უკვე წარმოდგენილია რეგიონის ქვეყნებში. საფრანგეთის საგარეო საქმეთა მინისტრმა კიდევ ერთხელ დაადასტურა საქართველოს ტერიტორიული მთლიანობის, სუვერენიტეტისა და საქართველოს ევროპული ინტეგრაციის ურყევი მხარდაჭერა. მინისტრის თქმით, სასიამოვნოა, რომ მოსახლეობის აბსოლუტური უმრავლესობა სიღრმისეულად პროევროპული ორიენტაციისაა და თბილისის ქუჩებში ვხედავთ ევროკავშირის დროშებს. „საქართველოს ევროპული ოცნება უნდა გახდეს რეალობა!“ - აღნიშნა კოლონამ.

საქართველოს პრეზიდენტი სალომე ზურაბიშვილი სტრასბურგის სასამართლოს გადაწყვეტილებას ეხმაურება, რომლის მიხედვითაც რუსეთს საქართველოს მოქალაქეების სასარგებლოდ თანხის გადახდა დაეკისრა. „მორიგი გარდამტეხი გამარჯვება - „საქართველო რუსეთის წინააღმდეგ“. საერთაშორისო სამართალმა საქართველოს სიმართლე კიდევ ერთხელ დაადასტურა. სამართლიანობა ყოველთვის იმარჯვებს!“ - წერს სალომე ზურაბიშვილი „ტვიტერში“. ცნობისთვის, ადამიანის უფლებათა ევროპულმა სასამართლომ რუსეთს საქართველოსთვის, 2008 წლის აგვისტოს ომის შედეგად ადამიანის უფლებების ევროპული კონვენციის დარღვევებისა და მოქალაქეებისთვის მიყენებული ზარალისთვის კომპენსაციის სახით 129 მილიონ ევროზე მეტის გადახდა დააკისრა. იპნ

ახმეტელი მაცხოვრებლების უმრავლესობას წყლის გადასახადი მოსდით არა მრიცხველიდან აღებული ჩვენების მიხედვით(როგორც ირკვევა),არამედ ფაქტიური დანახარჯიდან მკვეთრად აცდენილი ციფრებით., - ამის შესახებ სოციალურ ქსელში პარტია "საქართველოსთვის" ახმეტის საკრებულოს წევრი თინანო მოზაიძე წერს. მისი თქმით, როგორც საკრებულოს დეპუტატი, ვალდებულია ამომრჩევლის წინაშე, მათი პრობლემები მიიტანოს ყველა ინსტანციამდე, შესაბამისად, აღნიშნული პრობლემის მოსაგვარებლად, განცხადებით ახმეტის წყალმომარაგების სერვის-ცენტრს მიმართა. "მე, როგორც საკრებულოს დეპუტატი, ვალდებული ვარ ამომრჩევლის წინაშე, რომ მათი პრობლემები მივიტანო ყველა ინსტანციამდე და მოვაგვარო შესაძლებლობების ფარგლებში. ეს საკითხი გავაჟღერე საკრებულოს სხდომაზე. განცხადებით მივმართე ახმეტის წყალმომარაგების სერვის-ცენტრს და მოვითხოვე დასაბუთებულად გაარკვიონ მოსახლეობა, რა პრევენციულ ღონისძიებებს ატარებენ პრობლემის მოსაგვარებლად. იმედია,გონივრულ ვადაში პასუხს მივიღებ,რომელსაც ასევე გაგაცნობთ დაინტერესებულ მოქალაქეებს. #ახმეტასაქართველოსთვის #საქართველოსთვის #თინანომოზაიძე", - წერს თინანო მოზაიძე.

პარტია „საქართველოსთვის“ ლიდერი და ყოფილი პრემიერ-მინისტრი გიორგი გახარია სტრასბურგის სასამართლოს გადაწყვეტილებას ეხმაურება, რომლის მიხედვითაც რუსეთს საქართველოს მოქალაქეების სასარგებლოდ თანხის გადახდა დაეკისრა. როგორც გიორგი გახარია სოციალურ ქსელ „ტვიტერში“ აღნიშნავს, ეს გადაწყვეტილება ისტორიულია. „საქართველოს კიდევ ერთი ისტორიული გამარჯვება ადამიანის უფლებათა ევროპულ სასამართლოში. სასამართლომ რუსეთს 130 მილიონამდე ევროს გადახდა დააკისრა საქართველოს მოქალაქეების სასარგებლოდ 2008 წლის ომის დროს ჩადენილი დანაშაულებისთვის, რითაც კიდევ ერთხელ ცნო რუსეთი აგრესორად. მადლობა საჯარო მოხელეებს მათი დაუღალავი შრომისთვის“, - წერს გიორგი გახარია.

საქართველოს მოსახლეობის 85 პროცენტი ემხრობა საქართველოს ევროკავშირში გაწევრიანებას, ეს არის ციფრი, რომელიც გვაფიქრებს და გვაძლევს მომავლის ხედვას, - ამის შესახებ საქართველოში ვიზიტად მყოფმა საფრანგეთის საგარეო საქმეთა მინისტრმა, კატრინ კოლონამ ქართველ კოლეგა ილია დარჩიაშვილთან შეხვედრის შემდეგ ერთობლივ პრესკონფერენციაზე განაცხადა. კატრინ კოლონას თქმით, ამ საკითხთან დაკავშირებით, საქართველო და ევროპა არის ერთიანი. „მე ჩამოვედი იმისთვის, რომ გადმოგცეთ მხარდაჭერის მესიჯი. ჩვენ ამ ვიზიტით გვსურს გაგიზიაროთ ჩვენი დამოკიდებულება თქვენს სუვერენიტეტთან, ტერიტორიულ მთლიანობასთან, რომელიც ამ რეგიონში არის კომპლექსური, რთული და ბოლო პერიოდში განსაკუთრებით დაძაბული, იმ აგრესიიდან გამომდინარე, რომელსაც რუსეთი უკრაინაში შეჭრით აწარმოებს. ჩვენ გვსურს, რომ რუსეთმა ეს ომი დაასრულოს. საქართველომ ეს ყველაფერი კარგად იცის, რადგან ის ახლაც იხდის ფასს იმ პოლიტიკის, რომელიც, რა თქმა უნდა, 2022 წლის 24 თებერვალს არ დაწყებულა, საქართველოში 2008 წელს დაიწყო. მინდა ვთქვა, რომ საქართველოს შეუძლია საფრანგეთის სოლიდარობის იმედი ჰქონდეს. ჩვენ ასევე განვიხილეთ საქართველოს ევროკავშირში გაწევრიანების კანდიდატის სტატუსის საკითხი. ქართველი ხალხისთვის ეს ძალიან მნიშვნელოვანია. როდესაც ჩამოვედი თბილისში, დიდი რაოდენობით ევროპული დროშები დავინახე. როგორც ვიცი, გაზაფხულზე იყო პროევროპული მანიფესტაციები. საქართველოს მოსახლეობის 85 პროცენტი ემხრობა საქართველოს ევროკავშირში გაწევრიანებას, ეს არის ციფრი, რომელიც გვაფიქრებს და გვაძლევს მომავლის ხედვას. ამ საკითხთან დაკავშირებით, საქართველო და ევროპა არის ერთიანი. ჩვენ გვსურს, რომ ეს მომავალი კონკრეტული გახდეს. ეს არის პროცესი, რომელიც არის კომპლექსური, რომელიც უკვე დაიწყო. მე ვფიქრობ, რომ ეს არის ისტორიული საშუალება. ჩვენ ვართ საქართველოსთან ერთად იმისთვის, რომ საქართველოს ამ გზაზე დავეხმაროთ. აუცილებელია პროგრესი, წინსვლა“,- განაცხადა მინისტრმა. მისივე თქმით, იმისათვის, რომ საქართველომ კანდიდატის სტატუსი მიიღოს, საჭიროა 12 პუნქტის შესრულება. „კანდიდატის სტატუსისთვის საჭიროა 12 პუნქტის შესრულება, რომელიც ევროპულმა კომისიამ განაწესა, რეფორმების გატარება, რომელიც ინსტიტუციების თავისუფლებას უზრუნველყოფს სხვადასხვა გავლენებისგან. მხოლოდ ამის შედეგად მოახერხებს საქართველო ევროკავშირში გაწევრიანებას. ქართველმა ხალხმა ბევრჯერ აჩვენა ევროპასთან თავისი კავშირი და მიჯაჭვულობა. ჩვენ თქვენთან ერთად ვართ, რომ დაგეხმაროთ ამ გზის გავლაში. მინისტრმა მომაწოდა ინფორმაცია იმ წინსვლასთან დაკავშირებით, რომელიც რამდენიმე თვის განმავლობაში ხორციელდება, განსაკუთრებით საკანონმდებლო სფეროში. ჩვენ ბედნიერები ვართ, როდესაც ვხედავთ, რომ საქართველო პროგრესისკენ მიდის, ავითარებს თავის პროექტებს პარტნიორებთან ერთად და ჩვენ ბედნიერები ვიქნებით, თუ ამ პარტნიორების რიცხვში ჩვენც ვიქნებით“,- განაცხადა საფრანგეთის საგარეო უწყების ხელმძღვანელმა. IPN

17 წლის ქართველმა ახალგაზრდამ ჩარიცხვის დამადასტურებელი წერილი და ჯამში $500 000-მდე სტიპენდიის შეთავაზება 7 უნივერსიტეტისგან (Webster University Geneva, Webster Leiden Campus (Netherlands), American University in Bulgaria, Alfred University, University of Kentucky, Concord University, Albion college) მიიღო. გურამ შენგელია სწავლას, ბიზნეს ადმინისტრირების განხრით, American University in Bulgaria-ში გააგრძლებს.

ძაღლს, რომელმაც მარტვილში, სხვადასხვა ლოკაციაზე 22 ადამიანი დაკბინა, ცოფი დაუდასტურდა. ძაღლი მარტვილის მუნიციპალიტეტის მერიამ დაკვირვებისთვის ოზურგეთის თავშესაფარში გადაიყვანა. არსებული ინფორმაციით, ძაღლი გუშინ გარდაიცვალა. მარტვილის საზოგადოებრივი ჯანდაცვის ცენტრის დირექტორის, როზა ჯანაშიას ინფორმაციით, დაზარალებულ მოქალაქეებს პრევენციის მიზნით ცოფის საწინააღმდეგო ვაქცინით პირველი აცრა უკვე გაუკეთდათ. მისივე თქმით, 22 ადამიანიდან ორი პირი უარს აცხადებს მკურნალობაზე. იპნ

დიდ დიღომში გარდაცვლილი 12 წლის გოგონას სასამართლო-სამედიცინო ექსპერტიზის პირველადი დასკვნის მიხედვით, სხეულზე 40-მდე დაზიანება აღენიშნება. ამის შესახებ „ინტერპრესნიუსს“ ოჯახისა და „უფლებები საქართველოს“ ადვოკატმა, ელისო რუხაძემ განუცხადა. როგორც ადვოკატი განმარტავს, გოგონას ოჯახი აღნიშნული ექსპერტიზის პირველადი დასკვნის შემდეგ, უკვე დარწმუნებულია, რომ მოზარდი მოკლულია. რუხაძის თქმით, გარდაცვლილს სახეზე მრავლობითი დაზიანებები, ასევე მრავლობითი ექსკორაციები და სისხლნაჟღენთები აქვს. „ექსპერტიზის დასკვნით დადგინდა, რომ სიკვდილის მიზეზი მექანიკური ასფიქსიაა. თუმცა, ეს იმას არ ნიშნავს, რომ მოვლენები ბუნებრივად განვითარდა და თავისით მოკვდა პატარა გოგონა. 40-მდე დაზიანებაა ასახული ექსპერტიზის დასკვნაში, რაც ლეგიტიმურ ეჭვებს ბადებს, რომ სანამ გოგონა გარდაიცვლებოდა, წინ უსწრებდა რაღაც მძიმე ამბები, რაც შეიძლება იყოს მოძალადესთან ჭიდილი და ა.შ. მათ შორის, არის ყელზე და სახის მიდამოებში დაზიანებები, არის დეტალები, რასაც გამოძიების ინტერესებიდან გამომდინარე ვერ გავასაჯაროებ, თუმცა, ოჯახი დარწმუნებულია და ამ ექსპერტიზის დასკვნამ კიდევ უფრო განამტკიცა ვერსია, რომ გოგონა მოკლულია. სახეზე მრავლობითი დაზიანებებია, ასევე სახეზე აქვს შეშუპება, მრავლობითი ექსკორაციები, ყელზე დაზიანება, მაშინ, როცა გოგონას საკმაოდ სქელი „როლინგი“ ეცვა. ასევე დაზიანებები აქვს ზურგზე, ფეხზე და კიდურებზე. ყელზე დაზიანებები ძალიან მკაფიოა და საკმაოდ დიდი ზომისაა, ლეგიტიმურ ეჭვებს აჩენს, რომ ამას სადმე, რამეზე წამოდებით ვერ მიიღებდა, ეს არ არის ნაკაწრები, სისხლნაჟღენთები და ნაჭდევებია. ექსპერტიზას დასკვნაში გამოყენებული აქვს ტერმინი ბლაგვი, მკვრივი საგანი, თუმცა, როგორც წესი, არ აკონკრეტებს, რა შეიძლება ეს იყოს. ტერმინი - მიყენებული აქვს - არის გამოყენებული, ვინმემ მიაყენა, თუ თავისით მოხდა ეს ყველაფერი, მოქმედებით ფორმაში არ წერია - მიყენებულია, ეს ტერმინია გამოყენებული. კომპლექსური სამედიცინო ექსპერტიზის წინაშე გვაქვს კითხვები, ეს დაზიანებები რა გარემოებებში შეიძლებოდა ყოფილიყო მიყენებული, თავის შეშუპება რამ გამოიწვია და ა.შ. ძალიან ბევრი კითხვაა, რომელსაც ამ დღეებში ჩამოვაყალიბებთ და პროკურატურას მივმართავთ“, - განაცხადა რუხაძემ. 12 წლის გოგონას გარდაცვალების საქმეზე დანიშნულია ტოქსიკოლოგიური, ქიმიური, ბიოლოგიური, ტრასოლოგიური და სხვა სახის ექსპერტიზები, რაც ამ დრომდე არ დასრულებულა. „არანაირ ვადებს არ იცავს სამხარაულის ექსპერტიზის ბიურო და ეს დასკვნაც, რაც ახლა მივიღეთ, ძალიან დიდი ბრძოლისა და ბევრი მიმართვის შედეგადაა, რომელიც პროკურატურის წინაშე დავაყენეთ. ექსპერტიზის დასკვნაში წერია, რომ ეს მექანიკური ასფიქსიაა, რაც იმას ნიშნავს, რომ ეს მოვლენები ბუნებრივად არ განვითარებულა, ეს იმდენად სპეციფიკური ტერმინია, მნიშვნელოვანია, კრიტიკული კითხვები დაისვას, რადგან ამ პირველადი ექსპერტიზის დასკვნით სრული სურათის დანახვა შეუძლებელია. ამიტომ, ვარაუდებს და დასკვნებს მოვერიდები, თუმცა, ოჯახს პირველივე დღიდან სჯერა, რომ ბავშვი მოკლეს“, - განაცხადა რუხაძემ. ცნობისთვის, დიდ დიღომში გარდაცვლილი 12 წლის გოგონას საქმეზე, ბავშვის დედას და „უფლებები საქართველოს“ ადვოკატებს სსიპ ლევან სამხარაულის სახელობის სასამართლო ექსპერტიზის ეროვნული ბიუროს მიერ მომზადებული სასამართლო-სამედიცინო ექსპერტიზის პირველადი დასკვნის ასლი დღეს, 28 აპრილს გადაეცათ. დიდ დიღომში 12 წლის მოზარდი გარდაცვლილი მიმდინარე წლის 16 მარტს იპოვეს. გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს. ინტერპრესნიუსი

საქართველოს საფრანგეთის ევროპისა და საგარეო საქმეთა მინისტრი, კატრინ კოლონა ეწვია. საგარეო საქმეთა სამინისტროს ინფორმაციით, საფრანგეთის საგარეო უწყების ხელძმღვანელს თბილისის საერთაშორისო აეროპორტში საქართველოს საგარეო საქმეთა მინისტრის მოადგილე თეიმურაზ ჯანჯალია დახვდა. „ვიზიტის ფარგლებში, ფრანგი დიპლომატი შეხვედრას გამართავს საგარეო საქმეთა მინისტრთან, ილია დარჩიაშვილთან, რის შემდეგაც, გაკეთდება ერთობლივი განცხადებები პრესისთვის. საქართველოში ვიზიტის ფარგლებში, კატრინ კოლონა ასევე შეხვდება საქართველოს მთავრობის მეთაურს, ირაკლი ღარიბაშვილს. საფრანგეთის საგარეო საქმეთა მინისტრს მიიღებს საქართველოს პრეზიდენტი სალომე ზურაბიშვილი. აღსანიშნავია,რომ 2018 წლის შემდეგ, ეს გახლავთ საფრანგეთის საგარეო საქმეთა მინისტრის პირველი ვიზიტი საქართველოში“,- ნათქვამია საგარეო უწყების მიერ გავრცელებულ ინფორმაციაში. იპნ

ფრაქცია „მარტვილი საქართველოსთვის“ სოციალურ ქსელში განცხადებას ავრცელებს, რომელსაც planeta.ge უცვლელად გთავაზობთ: "მიმდინარე წლის 24 აპრილს ქ. მარტვილში მიუსაფარმა ძაღლებმა დაკბინეს ადამიანები. მიუსაფარ ცხოველთა მოვლა-პატრონობის საკითხი მარტვილის მუნიციპალიტეტში დღემდე ერთ-ერთ მნიშვნელოვან პრობლემას წარმოადგენს. მარტვილის მუნიციპალიტეტში მომრავლებული მიუსაფარი ძაღლების პრობლემის მოგვარების სწორი პოლიტიკის შესამუშავებლად, აუცილებელია შეიქმნას დროებითი სამუშაო ჯგუფი საკრებულოში, რომლის მუშაობაშიც მონაწილეობას მიიღებენ როგორც მერიის და საკრებულოს წარმომადგენლები, ცხოველთა უფლებადამცველები, ასევე სხვა დაინტერესებული მხარეები. აღნიშნული პრობლემის მოსაგვარებლად ასევე მნიშვნელოვანია არასამთავრობო სექტორთან ურთიერთობა. ფრაქცია „მარტვილი საქართველოსთვის“ წევრებს მიგვაჩნია, რომ პრობლემის დროულად გადაჭრის მიზნით სამუშაო ჯგუფმა დაუყონებლივ უნდა დაიწყოს მუშაობა შესაბამისი რეკომენდაციების გათვალისწინებით. კონკრეტულად: ფრაქცია „მარტვილი საქართველოსთვის“ გამოვთქვამთ ინიციატივას მარტვილის მუნიციპალიტეტის საკრებულოს მიერ მიღებულ იქნეს მარტვილის მუნიციპალიტეტის ტერიტორიაზე ბინადარი შინაური ცხოველების ყოლის, მოვლა-პატრონობისა და მათი პოპულაციის მართვის წესი. მარტვილის მუნიციპალიტეტის ტერიტორიაზე ბინადარი შინაური ცხოველების მოვლა-პატრონობის და მათი პოპულაციის მართვის წესი დაადგენს მუნიციპალიტეტის ტერიტორიაზე ბინადარი შინაური ცხოველების ყოლის, მოვლა-პატრონობისა და მათი პოპულაციის მართვის პირობებს. წესი აგრეთვე განსაზღვრავს ცხოველებისათვის, როგორც ნერვული სისტემის მქონე ცოცხალი არსებებისათვის მინიჭებულ ბუნებრივ უფლებებს და მათი დაცვის მექანიზმებს. წესში ასევე დეტალურად იქნება ინფორმაცია წესის დარღვევაზე პასუხისმგებლობისა და ხარჯების შესახებ. წესში უნდა დაკონკრეტდეს, აღნიშნული ნორმების დარღვევის ფაქტებზე მუნიციპალიტეტის მხრიდან დაჯარიმებაზე პასუხისმგებელი სამსახური. წესის მიღების მიზანია მუნიციპალიტეტის ტერიტორიაზე ბინადარი ცხოველების მოვლა-პატრონობისა და მათი პოპულაციის მართვის თანამედროვე, მსოფლიოში აპრობირებული, ჰუმანური პრინციპებისა და მეთოდების გამოყენებით ურბანულ გარემოში ადამიანისა და ცხოველის თანაარსებობის უსაფრთხო, საიმედო და მეგობრული გარემოს შექმნა. ფრაქცია „მარტვილი საქართველოსთვის“ წევრები მზად ვართ აქტიურად ვიყოთ ჩართულნი ზემოთ აღნიშნული წესის შემუშავების პროცესში და საჭიროების შემთხვევაში წარმოვადგინოთ ჩვენ მიერ შემუშავებული პროექტი მარტვილის მუნიციპალიტეტის ტერიტორიაზე ბინადარი შინაური ცხოველების ყოლის, მოვლა-პატრონობისა და მათი პოპულაციის მართვის წესის შესახებ.", - წერია განცხადებაში.

ვაკის რაიონში, ირაკლი უჩანეიშვილის ქუჩაზე დაგეგმილი სამუშაოების გამო 28 აპრილის 16:00 საათიდან 26 აგვისტოს 00:00 საათამდე ირაკლი უჩანეიშვილის ქუჩის ნაწილზე საავტომობილო მოძრაობა შეიზღუდება, – ინფორმაციას ამის შესახებ თბილისის მერია ავრცელებს. მერიის ცნობით, გადაადგილების შეზღუდვა უჩანეიშვილის ქ. N8-დან უჩანეიშვილის I გასასვლელამდე არსებულ საგზაო მონაკვეთს შეეხება. „ტრანსპორტი გადაადგილებას შეძლებს უჩანეიშვილის II გასასვლელის, მალხაზ დოლიძის ქუჩისა და წყნეთის გზატკეცილის გამოყენებით. შეზღუდვის პერიოდში N450 მიკროავტობუსი წყნეთის გზატკეცილიდან უჩანეიშვილის ქუჩას დაუკავშირდება ჯანსუღ კორძაიას ქუჩით და შემდეგ გზას არსებული სქემის მიხედვით გააგრძელებს“, – აღნიშნულია მერიის ინფორმაციაში.

გერმანიამ უკრაინას უკვე გადასცა „ლეოპარდ 2“ ტიპის 18 ტანკი და „მარდერის“ ტიპის ქვეითთა 40 საბრძოლო მანქანა. ზაფხულში იგეგმება 80 ერთეული „ლეოპარდ 1“ ტიპის ტანკის მიწოდება, – ამის შესახებ გერმანიის თავდაცვის მინისტრმა, ბორის პისტორიუსმა განაცხადა. გერმანიის თავდაცვის უწყების ხელმძღვანელმა ხაზგასმით აღნიშნა, რომ გერმანია სიტყვას ასრულებს და მხარს უჭერს უკრაინას ჯავშანტექნიკის და სხვა იარაღის, ასევე, საჭირო სათადარიგო ნაწილებისა და საბრძოლო მასალის სასწრაფო მიწოდებით. პისტორიუსის ინფორმაციით, ამ კვირაში დაიწყო 100-ზე მეტი უკრაინელი სამხედროს წვრთნა „ლეოპარდ 1“-ის ტანკებზე. „ტანკების მიწოდების შესახებ გამოაცხადეს ნიდერლანდებმა და დანიამ. „ლეოპარდ 1“-ის ძირითადი საბრძოლო ტანკების მიწოდება ახლა იწყება. ეს არის გერმანიასთან ერთად ქვეყნების ინიციატივის შედეგი. 80-მდე „ლეოპარდ 1“-ის მთავარი საბრძოლო ტანკის მიწოდება წლის შუა რიცხვებში დაიწყება“, – განაცხადა ბორის პისტორიუსმა. ავტორი - გივი ბარამიძე

ბლაგვი საგნით მიყენებული 39 დაზიანება და ასფიქსია, რომელიც გაგუდვამ გამოიწვია. დიდ დიღომში გარდაცვლილი 12 წლის გოგონას საქმე თავდაყირა დგება. სამედიცინო ექსპერტიზის პირველადი შედეგები ცნობილია. სამხარაულის ეროვნულმა ბიურომ გარდაცვლილი არასრულწლოვანის სხეულზე 39 სხვადასხვა სახის დაზიანება აღწერა. როგორც ირკვევა, 12 წლის მოზარდს დაზიანებები ჯერ ბლაგვი საგნით მიაყენეს, შემდეგ კი მოგუდეს. ოჯახი და ადვოკატები ახლა კომპლექსური სამედიცინო ექსპერტიზის ხელმეორედ ჩატარებას, გამოძიებისგან კი დამნაშავის უმკაცრესად დასჯას ითხოვენ. ცნობისთვის, მოზარდს სულ 5 ექსპერტიზა ჩაუტარდა და ჯერ მხოლოდ სამედიცინო დასკვნის ნაწილია ცნობილი. შეგახსენებთ, რომ დიდ დიღომში 12 წლის მოზარდი გარდაცვლილი 17 მარტს ნახეს. მას მთელი ღამის განმავლობაში ეძებდნენ. tvpirveli.ge

საქართველო როგორც აქამდე ასევე მომავალშიც გააგრძელებს საერთაშორისო დონეზე პოლიტიკურად უკრაინის მხარდაჭერას, – ამის შესახებ საპარლამენტო უმრავლესობის წევრმა, გივი მიქანაძემ განაცხადა. როგორც გივი მიქანაძემ აღნიშნა, მხოლოდ 38 ქვეყანამ მიმართა ჰააგის საერთაშორისო სასამართლოს, რომ დაწყებულიყო ომის დანაშაულებთან დაკავშირებით კონკრეტული საქმეების გამოძიება და მათ შორის ერთ-ერთი საქართველო იყო, რაც ცალსახად მიუთითებს იმ პოლიტიკურ სიმყარესა და პოზიციაზე, რომელიც საქართველოს ხელისუფლებას უჭირავს უკრაინის მხარდასაჭერად. „ნებისმიერი მანიპულაცია და ნებისმიერი მცდელობა არის პირველ რიგში ქვეყნისთვის დამაზიანებელი და ეს არის იმის მცდელობა, რომ როგორღაც რადიკალური ოპოზიციის დღის წესრიგში რიგი ტელევიზიები ჩასხდნენ, მათი მხრიდან ნაკარნახევი უსაფუძვლო განმარტებებზე სიუჟეტები გააკეთონ და შეკითხვები დასვან. ამოიღეთ უკრაინის მხარდამჭერი რეზოლუციები, რომლებიც ევროსაბჭოს დონეზე იყო მიღებული და თქვენ ნახავთ არაერთ რეზოლუციას, სადაც „ნაციონალური მოძრაობის“ წარმომადგენლები იქ ესწრებოდნენ და ხმა არ ჰქონდათ მიცემული. საქართველო როგორც აქამდე, ასევე მომავალშიც გააგრძელებს საერთაშორისო დონეზე პოლიტიკურად უკრაინის მხარდაჭერას. ის, რომ რაღაც კონკრეტულ რეზოლუციაზე ამბობთ, მხარი არ დავუჭირეთ, ამაზეც ძალიან მარტივად გიპასუხებთ. არა ერთ რეზოლუციას, ფაქტობრივად ყველას მხარი დავუჭირეთ და ამ შემთხვევაში ქართულმა დელეგაციამ ვიზიტი დაასრულა. ამ რეზოლუციას ჩვენ ძალიან წარმატებული ვიზიტი გვქონდა და არაერთი მნიშვნელოვანი შეხვედრა შედგა ორმხრივ და მრავალმხრივ ფორმატში. რაც შეეხება ამ კონკრეტულ რეზოლუციას, ის ერთ-ერთ კომიტეტზე იყო გასული, სადაც ჩვენი დელეგაციის წევრმა კომიტეტზე დააფიქსირეს თავისი მხარდაჭერა რეზოლუციის მიმართ. შეგიძლიათ, გადაამოწმოთ და ნახოთ დაუჭირა თუ არა მხარი ჩვენი დელეგაციის წარმომადგენელმა, ხატია წილოსანმა კომიტეტზე, როდესაც იხილებოდა ეს რეზოლუცია“, – განაცხადა მიქანაძემ. ავტორი - მანანა დევაძე

ანა ბუჩუკური: ფინანსური დავალიანების გამო, ბაკალავრიატის სტუდენტების 12%-ს სტატუსი აქვს შეჩერებული ვერდიქტი: „ფაქტ-მეტრის“ დასკვნით, ანა ბუჩუკურის განცხადება არის სიმართლე. რეზიუმე: განათლების სამინისტროს ინფორმაციით, 2023 წლის თებერვლის მდგომარეობით, განათლების მართვის საინფორმაციო სისტემის მონაცემთა ბაზაში ბაკალავრიატის საფეხურზე 178 450 სტუდენტი ფიქსირდება, რომელთაგან სტატუსი 59 750 სტუდენტს აქვს შეჩერებული, ხოლო მათგან 21 137-ს - ფინანსური მდგომარეობის გამო. შესაბამისად, სტატუსი სულ სტუდენტთა მთლიანი რაოდენობის 33.5%-ს აქვს შეჩერებული, ფინანსური დავალიანების გამო კი - მათ 11.8%-ს, ხოლო სტატუსშეჩერებული სტუდენტების 35.4%-ს სტატუსი სწორედ ფინანსური დავალიანების გამო აქვს შეჩერებული, რაც საკმაოდ დიდი რიცხვია. რაც შეეხება სტუდენტთა დასაქმების მაჩვენებელს, 2021 წლისთვის სტუდენტთა ასაკობრივ კატეგორიაში დასაქმების დონემ 31.6% შეადგინა, რაც დაბალი მაჩვენებელია. აქედან გამომდინარე, ანა ბუჩუკურის განცხადება არის სიმართლე. ანალიზი პარლამენტის დეპუტატის, პარტია „საქართველოსთვის“ წევრის, ანა ბუჩუკურის განცხადებით, ბაკალავრიატის საფეხურზე თითქმის 12%-ს სტუდენტის სტატუსი აქვს შეჩერებული. „ბაკალავრიატის საფეხურზე სულ რეგისტრირებულია 178 450 სტუდენტი და აქედან ფინანსური დავალიანების გამო, თითქმის 12%-ს სტუდენტის სტატუსი აქვს შეჩერებული. საუბარია 21 137 სტუდენტზე, რომელიც საკმაოდ მაღალი მაჩვენებელია.ეს ის ახალგაზრდები არიან, რომლებსაც სწავლის საფასურის ვერ გადახდის გამო, სწავლის გაგრძელებაზე ფაქტობრივად ოფიციალურად უარი ეთქვათ. ამას ემატება ისიც, რომ „საქსტატის“ მონაცემებით, სტუდენტების ასაკობრივ კატეგორიაში დასაქმების დაბალი მაჩვენებელია და სამწუხაროდ, სახელმწიფო ხელს არ უწყობს სტუდენტური სამუშაო ადგილების შექმნას“,- განაცხადა ანა ბუჩუკურმა. კანონმდებლობის მიხედვით, სტუდენტის სტატუსის შეჩერების საფუძველი შესაძლოა იყოს: სტუდენტის პირადი განცხადება (მიზეზის მითითების გარეშე); უცხო ქვეყანაში, უმაღლეს საგანმანათლებლო დაწესებულებაში სწავლა, გარდა გაცვლითი საგანმანათლებლო პროგრამის ფარგლებში სწავლისა; ორსულობა, მშობიარობა, ბავშვის მოვლა ან ჯანმრთელობის მდგომარეობის გაუარესება; ფინანსური დავალიანება ან უმაღლესი საგანმანათლებლო დაწესებულების წესდებით გათვალისწინებული სხვა გარემოება. განათლების სამინისტროს ინფორმაციით (იხილეთ: დანართი1), 2023 წლის თებერვლის მდგომარეობით, განათლების მართვის საინფორმაციო სისტემის მონაცემთა ბაზაში ბაკალავრიატის საფეხურზე 178 450 სტუდენტი ფიქსირდება, რომელთაგან სტატუსი 59 750 სტუდენტს აქვს შეჩერებული, ხოლო მათგან 21 137-ს - ფინანსური მდგომარეობის გამო. ფინანსური დავალიანების გამო სტატუსშეჩერებული სტუდენტებიდან 1064 პირი არის უცხო ქვეყნის მოქალაქე, 851 პირს აქვს აქტიური სტატუსი სხვა უმაღლეს საგანმანათლებლო პროგრამაზე, 1031 სტუდენტის სტატუსის შეჩერებიდან 5 წელზე მეტია გასული, 754 სტუდენტს სტატუსი ორ ან მეტ საგანმანათლებლო პროგრამაზე აქვს შეჩერებული, 2702 სტუდენტს სასწავლო-სოციალური გრანტი აქვს მოპოვებული; ხოლო 1051 პრიორიტეტული პროგრამული დაფინანსებით სარგებლობს. როგორც სტატისტიკური მონაცემებით დასტურდება, 2023 წლისთვის სტატუსი 59 750 სტუდენტს შეუჩერდა, საიდანაც ფინანსური დავალიანების გამო - 21 137 სტუდენტს, რას სტატუსშეჩერებული სტუდენტების მთლიანი რაოდენობის 35.4%-ს შეადგენს. ამავე მონაცემებით, სტატუსი სტუდენტთა მთლიანი რაოდენობის 33.5%-ს აქვს შეჩერებული, ფინანსური დავალიანების გამო კი - მათ 11.8%-ს. 2013 წლიდან სტატუსშეჩერებულ სტუდენტთა რაოდენობა და მათ შორის ფინანსური დავალიანების გამო სწავლაშეჩერებულ სტუდენტთა რაოდენობა შემდეგნაირია: ცხრილი1: სტატუსშეჩერებულ სტუდენტთა რაოდენობა 2013-2023 წლებში (13.02.2023-ის მდგომარეობით) წყარო: სსიპ განათლების მართვის საინფორმაციო სისტემა როგორც მონაცემებიდან ჩანს სტატუსშეჩერებულ სტუდენტთა, მათ შორის ფინანსური დავალიანების გამო, რაოდენობის ზრდა 2018 წლიდან ფიქსირდება. 2022/2023 წლებში, როგორც აღვნიშნეთ, ფინანსური დავალიანების გამო სტატუსი სტატუსშეჩერებული სტუდენტების 35.4%-ს შეუჩერდა, რაც საკმაოდ მაღალი მაჩვენებელია. რაც შეეხება სტუდენტთა დასაქმების საკითხს, რასაც განცხადების ავტორი ასევე ეხება, საქსტატის 2021 წლის (ამ დროისთვის ცნობილი ბოლო მონაცემი) მონაცემის მიხედვით, სტუდენტურ ასაკობრივ კატეგორიაში (20-24 წელი) დასაქმების დონე 31.6%-ს შეადგენს, რაც საკმაოდ დაბალი მაჩვენებელია. წინა წელს იმავე კატეგორიაში დასაქმების დონე 34.5% იყო. შესაბამისად, 2021 წელს სტუდენტთა დასაქმების დონე 2.9 პროცენტული პუნქტით გაუარესდა. თუმცა 2021 წელს დასაქმების დონა ყველა ასაკობრივ კატეგორიაში შემცირდა, რაც პანდემიით და მასთან დაკავშირებული შეზღუდვებით იყო განპირობებული. ასევე უნდა აღვნიშნოთ, რომ დასახელებულ კატეგორიაში დასაქმების 2021 წლის მაჩვენებელს წინა წლებს ვერ ვადარებთ, რადგან 2019 წლამდე ასაკობრივი კატეგორია 15-24 ერთად იყო გაერთიანებული და მხოლოდ 2020 წლიდან გაიყო ორ ასაკობრივ კატეგორიად - 15-19 და 20-24-ად. აქედან გამომდინარე, 2019 წლამდე მონაცემების 2020 წლის შემდეგ მონაცემებთან შედარება რელევანტური არ არის. განხილულ სტატისტიკურ მონაცემებზე დაყრდნობით, ანა ბუჩუკურის განცხადება არის სიმართლე. factcheck.ge

2008 წლის ომის სარჩელზე, ადამიანის უფლებათა ევროპულმა სასამართლომ რუსეთს საქართველოსთვის კომპენსაციის სახით 129 მილიონი ევროს გადახდა დააკისრა. სტრასბურგის სასამართლოს ოფიციალური ინფორმაციით, რუსეთს 2008 წელს საქართველოში შეჭრის შედეგად მოქალაქეების მიმართ მიყენებული დარღვევებისა და ზარალისთვის საქართველოსთვის კომპენსაცია სამი თვის ვადაში უნდა გადაეხადა. ევროპის სასამართლოს დიდმა პალატამ 2008 წლის ომთან დაკავშირებით საქართველოს სარჩელის შესახებ სამართლიანი კომპენსაციის ნაწილთან მიმართებაში დამატებითი გადაწყვეტილება მიიღო ევროპული კონვენციის 41-ე მუხლის მიხედვით, რომელიც არ იყო გათვალისწინებული 2021 წლის მთავარი გადაწყვეტილებით. სასამართლოს დადგენილების მიხედვით, მას აქვს იურისდიქცია, განიხილოს საქართველოს მოთხოვნა კომპენსაციის თაობაზე, მიუხედავად იმისა, რომ რუსეთი ევროსაბჭოდან 2022 წელს გააძევეს და რუსულმა მხარე არ ითანამშრომლა სასამართლოსთან საკითხის განხილვისას. სასამართლომ დაადგინა, რომ კონვენციის 41-ე მუხლი გამოიყენებოდა წინამდებარე საქმეზე სამხრეთ ოსეთის ქართულ სოფლებში და „ბუფერულ ზონაში“ მშვიდობიანი მოსახლეობის მკვლელობის ადმინისტრაციული პრაქტიკის მსხვერპლთა მიმართ. ასევე, „ბუფერულ ზონაში“ სახლების გადაწვისა და გაძარცვის ადმინისტრაციული პრაქტიკის, არაადამიანური და ღირსების შემლახველი მოპყრობის ადმინისტრაციული პრაქტიკის და ქართველი მშვიდობიანი მოქალაქეების თვითნებური დაკავების მსხვერპლთა მიმართ „სამხრეთ ოსეთის ძალების“ მიერ „სამხრეთ ოსეთის შინაგან საქმეთა სამინისტროს“ სარდაფში, ცხინვალში დაახლოებით 2008 წლის 10-27 აგვისტოს პერიოდში. ასევე, 2008 წლის 8-17 აგვისტოს ცხინვალში სამხრეთ ოსეთის ძალების მიერ დაკავებული ქართველი სამხედრო ტყვეების წამების ადმინისტრაციული პრაქტიკის მსხვერპლთა, ე.წ. სამხრეთ ოსეთსა და აფხაზეთში საქართველოს მოქალაქეებისთვის საკუთარ სახლებში დაბრუნების აღკვეთის ადმინისტრაციული პრაქტიკისა და მოპასუხე სახელმწიფოს მსხვერპლთა მიმართ, პროცედურულ ვალდებულების შეუსრულებლობისთვის, ჩაეტარებინა სათანადო და ეფექტური გამოძიება გარდაცვალების ფაქტებზე, რომელიც მოხდა საომარი მოქმედებების აქტიურ ფაზაში ან საომარი მოქმედებების შეწყვეტის შემდეგ. სტრასბურგის სასამართლო ადგენს, რომ მოპასუხე სახელმწიფოს სამი თვის განმავლობაში უნდა გადაეხადა მომჩივანი სახელმწიფოს სასარგებლოდ 3 250 000 ევრო არამატერიალური ზიანისთვის, რომელიც განიცადა სულ მცირე 50-მა ადამიანმა ე.წ. სამხრეთ ოსეთის ქართულ სოფლებში მშვიდობიანი მოსახლეობის მკვლელობის შედეგად „ბუფერულ ზონაში“; ასევე, მოპასუხე მთავრობის მიერ თავისი პროცედურული ვალდებულების შეუსრულებლობის გამო, ჩაეტარებინა ადეკვატური და ეფექტური გამოძიება ამ მკვლელობებზე. სასამართლო ადგენს, რომ მოპასუხე სახელმწიფოს უნდა გადაეხადა მომჩივანი მთავრობისთვის სამი თვის ვადაში 2 697 500 ევრო არამატერიალური ზიანის გამო, რომელიც განიცადა სულ მცირე 166-მა ადამიანმა, საქართველოს მოქალაქეების არაადამიანური და დამამცირებელი მოპყრობის ადმინისტრაციული პრაქტიკის და თვითნებური დაკავების შედეგად, ე.წ. სამხრეთ ოსეთის ძალების მიერ ცხინვალში, 2008 წლის 10-27 აგვისტოს პერიოდში. სასამართლოს გადაწყვეტილებით, მოპასუხე სახელმწიფოს სამი თვის ვადაში უნდა გადაეხადა 640 000 ევრო არამატერიალური ზიანისთვის, რომელიც განიცადა ქართველი სამხედრო ტყვეების წამების ადმინისტრაციული პრაქტიკის მსხვერპლმა სულ მცირე 16-მა ადამიანმა. ევროპული სასამართლოს გადაწყვეტილებით, მოპასუხე სახელმწიფოს უნდა გადაეხადა მომჩივანი მთავრობისთვის სამი თვის ვადაში 115 000 000 ევრო არამატერიალური ზიანისთვის, სულ მცირე 23 000 ადამიანისთვის სახლში დაბრუნების აღკვეთის ადმინისტრაციული პრაქტიკის საფუძველზე, ე.წ. სამხრეთ ოსეთსა და აფხაზეთში. სასამართლოს გადაწყვეტილებით, მოპასუხე სახელმწიფოს სამი თვის განმავლობაში მოსარჩელე ქვეყნისთვის უნდა გადაეხადა 8 240 000 ევრო მოპასუხე მთავრობის სულ მცირე 412 მსხვერპლისთვის პროცედურულ ვალდებულების შეუსრულებლობისთვის, ჩაეტარებინა სათანადო და ეფექტური გამოძიება გარდაცვალების ფაქტებზე, რომელიც მოხდა საომარი მოქმედებების აქტიურ ფაზაში ან საომარი მოქმედებების შეწყვეტის შემდეგ. ავტორი - გივი ბარამიძე