tvati

სერია A-ს 33-ე ტურში „ნაპოლი“ გასვლაზე „უდინეზეს“ დაუზავდა (1:1) და სკუდეტო მოიპოვა. სტუმრები თავიდანვე დაეუფლენ ტერიტორიულ უპირატესობას, მასპინძლები კი კონტრშეტევისას ლოვრიჩმა დააწინაურა. პირველი მომენტი ნეაპოლელებმა 22-ე წუთზე შექმნეს, როდესაც საჯარიმოში შეჭრილი კვარაცხელია ბეკაოსთან კონტაქტისას წაიქცა, მაგრამ VAR-მა პენალტის დანიშვნა საჭიროდ არ მიიჩნია. შემდეგ ოსიმენმა თავით ოდნავ ააცილა მიზანს ბურთი. უდინელები საკმაოდ უხეშობდნენ, მეტადრე ხვიჩას მიმართ, თუმცა მსაჯი მათდამი ლოიალური იყო. მთავარი კი ისაა, რომ „ნაპოლი“ უნიათოდ უტევდა და დამაჯერებელი ვერ გახლდათ. მეორე ტაიმი სპალეტის გუნდმა აქტიურად დაიწყო, ქართველის დარტყმული ბურთი მეკარე სილვესტრიმ მოიგერია, ხოლო დამატებაზე ყველას ოსიმენმა დაასწრო და ანგარიში გაათანაბრა. მორიგი იერიშისას „კვარამ“ მეურვე ჩამოიცილა, საჯარიმოში ელმას პასი გაუკეთა, რომელმაც ვერ დაარტყა, ოსიმენმა გაიტანა, მაგრამ არბიტრმა ჯარიმა დააფიქსირა. ცოტა ხანში ზილენსკის გატანა სილვესტრიმ არ დაანება. კვარაცხელია 85-ე წუთზე შეცვალეს, გულშემატკივრები ფეხზე წამოუდგნენ და აპლოდისმენტებით გააცილეს. დარჩენილ დროში "ნაპოლიმ" მშვიდად მიიყვანა საქმე სასურველ დასასრულამდე და ოქროს მედლები მოიპოვა. „ნაპოლი“ შემდეგ შეხვედრას 7 მაისს სახლში „ფიორენტინასთან“ ჩემპიონის რანგში გამართავს. უდინე. „დაჩია არენა“ უდინეზე - ნაპოლი გოლები: 0:1 ლოვრიჩი (13), 1:1 ოსიმენი (52)

რამდენიმე წუთის წინ, ტვ პირველის ახალი ამბების პორტალმა, tvpirveli.ge - მ მოიპოვა სათვალთვალო კამერის ჩანაწერები, სადაც ვერაზე, გოგებაშვილის ქუჩაზე მომხდარი სისხლიანი გარჩევაა ასახული. კადრებში ჩანს, რომ "გიჩო", გივი მარგველაშვილი გოგებაშვილის ქუჩაზე ტელეფონზე საუბრობდა, რა დროსაც მასზე მოხდა თავდასხმა და ის დაჭრეს. ვიდეომასალით დგინდება, რომ მას რამდენიმე ტყვია აქვს მოხვედრილი. კადრების გაშიფვრის შედეგად დგინდება, რომ ამის შემდეგ უკვე გივი მარგველაშვილის დაცვა ახორციელებს საპასუხო გასროლას. tvpirveli.ge -ს ინფორმაციით, მოკლული 38 წლის საბა გახოკიაა. დედაქალაქის ცენტრი სისხლიანი ანგარიშსწორების ეპიცენტრად რამდენიმე სააათის წინ იქცა. "პირველების" ინფორმაციით, თბილისში, გოგებაშვილის ქუჩაზე დაჭრილი კაცი, გივი მარგველაშვილია. დაჭრილია კიდევ ერთი პირი, 40 წლამდე კაცი კლინიკაშია გადაყვანილი. გომელაურის უწყებამ მომხდარზე გამოძიება სისხლის სამართლის კოდექსის 108-ე მუხლით დაიწყო, რაც განზრახ მკვლელობას გულისხმობს.

ახლა გორში არის ასეთი სიტუაცია - ფერმერები ვაშლს ყრიან, მაგრამ იმპორტით ვაშლი მაინც შემოდის - ამის შესახებ რადიო ,,პალიტრასა" და „პალიტრანიუსის" გადაცემაში „საქმე“ ხილისა და ბოსტნეულის ექსპორტიორთა ასოციაციის თავმჯდომარემ ვახტანგ ბეჟიტაშვილმა განაცხადა. ცნობისათვის, 2023 წლის 3 თვეში საქართველომ 415.7 ათასი აშშ დოლარის 1 002 ტონა ვაშლი იყიდა. აქედან, 722 ტონა თურქეთიდან. „თუ სტატისტიკას გადავხედავთ, ჩვენ აბსოლუტურად ყველა პროდუქტი შემოგვაქვს. ახლა გორში არის ასეთი სიტუაცია - ფერმერები ვაშლს ყრიან, მაგრამ იმპორტით ვაშლი მაინც შემოდის. ეს გამოწვეულია იმით, რომ ჩვენი შემნახველი და სამაცივრე მეურნეობები არ არის განვითარებული, ისევე, როგორც არ არის დანერგილი ახალი ჯიშები. ახალი ტექნოლოგიებით არ ხდება პროდუქციის მოყვანა, შეფუთვა და შენახვა. ეს იწვევს ჩვენს მაღალ იმპორტდამოკიდებულებას. -0:03 გარკვეული პროგრამები ნამდვილად აქვს სახელმწიფოს, მაგრამ ეს არის მცირე რაოდენობა. სამუშაო კი, ბევრად დიდი მოცულობისაა. თვითონ სახელმწიფომ აუცილებლად ხელი უნდა შეუწყოს იმ კუთხითაც, რომ რაღაც მიმართულებებში იმპორტის შეზღუდვა აუცილებელი ხდება ხოლმე. პროტექციონიზმი მესმის, რომ არაპოპულარულად ჟღერს, მაგრამ სასწორის მეორე პინაზე სასურსათო უსაფრთხოებაა", - ამბობს ბეჟიტაშვილი. ავტორი: თამარ მუკბანიანი

თბილისში, გოგებაშვილის ქუჩაზე სროლის შედეგად მოკლული ერთი პირი. არსებული ინფორმაციით, დაჭრილია კიდევ ერთი ადამიანი. პოლიციას შემთხვევის ადგილი ყვითელი ლენტით აქვს შემოსაზღვრული. ადგილზე იმყოფება სასწრაფო სამედიცინო დახმარების ეკიპაჟი. როგორც ერთ-ერთი ადგილობრივი აცხადებს, სროლა ორმხრივი იყო და მათ რვამდე გასროლის ხმა გაიგეს. „ერთი დაჭრილი სასწრაფომ წაიყვანა. გავიგე სროლის ხმა და გამოვედი. 6-8 გასროლა იქნებოდა. ორმხრივი სროლა იყო. იარაღის სხვადასხვა ხმა იყო“, - აცხადებს ადგილობრივი "რუსთავი2"-თან. მომხდართან დაკავშირებით ოფიციალური ინფორმაცია ჯერჯერობით არ ვრცელდება. „ინტერპრესნიუსი“ დამატებთ ინფორმაციას მიღებისთანავე შემოგთავაზებთ. იპნ

არსებული ინფორმაციით, თბილისში, იაკობ გოგებაშვილის ქუჩაზე სროლა იყო. ინფორმაცია სოციალურ ქსელში ვრცელდება. სოციალური ქსელის მომხმარებლები ადგილიდან ვიდეომასალასაც ავრცელებენ, სადაც ჩანს, რომ ადგილზე მობილიზებულია სახანძრო-სამაშველო სამსახური, საპატრულო პოლიცია და სასწრაფო სამედიცინო დახმარების ჯგუფი. „ინტერპრესნიუსი“ დეტალებს საქართველოს შინაგან საქმეთა სამინისტროში არკვევს და მიღებისთანავე შემოგთავაზებთ. იპნ

საქართველოს პრეზიდენტი სალომე ზურაბიშვილი 5 მაისს სამუშაო ვიზიტით დიდი ბრიტანეთისა და ჩრდილოეთ ირლანდიის გაერთიანებულ სამეფოს ეწვევა და ლონდონში, მეფე ჩარლზ III-ის კორონაციის ცერემონიას დაესწრება. პრეზიდენტის ადმინისტრაციის ინფორმაციით, საქართველოს პრეზიდენტი მონაწილეობას მიიღებს ასევე მიღებაში, რომელიც ბუკინგემის სასახლეში გაერთიანებული სამეფოს მეფე ჩარლზ III-ისა და დედოფალ კონსორტის სახელით ცერემონიაზე მიწვეული უცხო ქვეყნის ლიდერების პატივსაცემად გაიმართება.

ილია ჭავჭავაძეს ლიბერალს ეძახდნენ, მაგრამ სწორედ მისი ლოზუნგია “მამული, ენა, სარწმუნოება“ - ჩვენი პოლიტიკა ამ ლოზუნგის იქეთ არ წასულა, - ეს განცხადება ჟურნალისტებთან პარლამენტის პირველმა ვიცე-სპიკერმა გია ვოლსკიმ გააკეთა. მისივე თქმით, “არაფერია ახალი იმაში, რომ ეროვნული ფასეულობები, ისტორიული მემკვიდრეობა, ტრადიციები “ქართული ოცნებისთვის“ და საზოგადოების უდიდესი ნაწილისთვის საგანგებოდ მნიშვნელოვანია“. “ხელისუფლებაში მყოფი პოლიტიკური ძალისთვის მნიშვნელოვანი სწორედ ის ფასეულობებია, რაზეც დღეს ირაკლი ღარიბაშვილმა ისაუბრა. თუკი ვინმესთვის ეს თემა პრორუსულობის მაჩვენებელია, კონკრეტული ადამიანისთვის, ვინც ასე ფიქრობს, ძალიან დიდი ტრაგედიაა. საზოგადოებისთვისაც საკმაოდ დამაზიანებელია პოლიტიკურ ველზე ასეთი მოსაზრებების წარმოჩენა, მით უფრო რომ არასდროს, არც ერთ შემთხვევაში არ ყოფილა რაიმე საწინააღმდეგო პოზიცია ტოლერანტობასთან, უმცირესობების უფლებების დაცვასთან დაკავშირებით არა მხოლოდ გამოხატული, ეს საქმიანობით კონსტიტუციაშია ასახული და წინა პლანზე წამოწეული. ჩვენი ოპონენტების ნაწილის გააფთრებული მცდელობაა, რომ ამ რეალობიდან წინააღმდეგობის წინაპირობა შექმნან და სამოქალაქო საზოგადოება ერთმანეთს გარკვეული ნიშნით დაუპირისპირდეს. ეს ნიშანი, რაც უნდათ, რომ ყალბმა და ცრუ ლიბერალებმა შემოგვაჩეჩონ ისაა, რომ ერეკლე მეფე მოღალატედ გამოვაცხადოთ, პატრიარქსა და ეკლესიას ვაგინოთ - ლიბერალიზმთან გათანაბრებული ასეთი მიდგომა ქვეყნისთვის დამაზიანებელია“, - განაცხადა გია ვოლსკიმ. იპნ

თეთრი სახლის ეროვნული უსაფრთხოების საბჭოს სტრატეგიული კომუნიკაციების კოორდინატორის ჯონ კირბის განცხადებით, კრემლის პრესსპიკერის, დიმიტრი პესკოვის განცხადება, რომ მოსკოვზე დრონით თავდასხმის უკან ვაშინგტონი დგას, ტყუილია. „შემიძლია დაგარწმუნოთ, რომ შეერთებული შტატები ჩართული არ ყოფილა. ჩვენ არაფერი გვაქვს ამასთან საერთო. პესკოვი უბრალოდ იტყუება“, - აღნიშნა ჯონ კირბიმ. მისი თქმით, აშშ არ წაახალისებს და არ აძლევს უკრაინას რუსეთის ტერიტორიაზე დარტყმის საშუალებას და არ კარნახობს ოპერაციებს, რომლებსაც ის ატარებს. „ჩვენ ნამდვილად არ ვკარნახობთ პირობებს, რომლითაც ისინი თავს იცავენ ან ოპერაციებს, რომლებსაც ისინი ატარებენ“, - აღნიშნა ჯონ კირბიმ. რუსეთის პრეზიდენტის პრესსპიკერის, დიმიტრი პესკოვის განცხადებით, კრემლზე დრონით თავდასხმისა და პრეზიდენტ ვლადიმერ პუტინის წინააღმდეგ განხორციელებული მკვლელობის მცდელობის უკან ვაშინგტონი დგას. „ასეთი გადაწყვეტილებები, მიზნების განსაზღვრა, საშუალებების განსაზღვრა – ამ ყველაფერს კიევს ვაშინგტონიდან კარნახობენ. ჩვენ ეს კარგად ვიცით. ჩვენ კარგად ვიცით, რომ გადაწყვეტილებებს მსგავს ქმედებებზე და მსგავს ტერაქტებზე არა კიევში, არამედ ვაშინგტონში იღებენ. კიევი აღასრულებს იმას, რასაც ეუბნებიან“, - აღნიშნა პესკოვმა. იპნ

12 არასამთავრობო ორგანიზაცია საქართველოს პარლამენტს მოუწოდებს, გამოიყენოს მის ხელთ არსებული საზედამხედველო მექანიზმები დეზინფორმაციული სქემების შესასწავლად, მათ შორის შექმნას დროებითი საგამოძიებო კომისია ან/და მიმართოს სახელმწიფო აუდიტის სამსახურს. საქმე ეხება Facebook-ის მფლობელი კომპანიის, META-ს, მიერ გამოქვეყნებულ ანგარიშს, რომლის თანახმად, კოორდინირებული არაავთენტური ქცევის გამო კომპანიამ Facebook-ის 80 ანგარიში, 26 გვერდი, 9 ჯგუფი და ინსტაგრამის 2 ანგარიში წაშალა. წაშლილია პრემიერ-მინისტრ ირაკლი ღარიბაშვილის მხარდამჭერი ჯგუფები და სხვა პროსახელისუფლებო ანგარიშები. META-მ მთავრობის მიერ დაფინანსებული ანგარიშები გუშინ, 3 მაისს, წაშალა. კომპანიის განცხადებით, მიუხედავად იმისა, რომ ამ ოპერაციის უკან მყოფი პირები ცდილობდნენ საკუთარი ვინაობისა და კოორდინაციის დამალვას, META-ს გამოძიებამ „აღმოაჩინა კავშირი საქართველოს მთავრობის ადმინისტრაციის სტრატეგიული კომუნიკაციების დეპარტამენტთან“. მათ გამოავლინეს არაავთენტური ქცევის ათობით მომხმარებელი და ჯგუფი, რომელიც ჩართული იყო საქართველოში პროსახელისუფლებო გზავნილების პოპულარიზაციასა და ოპოზიის კრიტიკაში, განსაკუთრებით ე.წ. უცხოური გავლენის აგენტებზე კანონის მიღებისას დაწყებული აქციების დროს. Meta-ს განცხადებით, მათ წაშალეს 80 Facebook-მომხმარებელი, 26 გვერდი, 9 ჯგუფი და 2 Instagram-მომხმარებელი. ქსელი იყენებდა Facebook-ს, Instagram-სა და TikTok-ს და ცდილობდა გაეზარდა თავიანთი მასალების გავრცელება, მომხმარებელთა ჩართულობა და პოპულარობა. Meta-ს ანგარიშის მიხედვით, Facebook-თან ერთად ქსელში იყო ჩართული სამი TikTok-ანგარიშიც, ორი მათგანი კი პოზიციონირებდა, როგორც პრემიერ-მინისტრ ირაკლი ღარიბაშვილთან დაკავშირებული ანგარიში. ასევე Meta-ს განცხადებით, ქსელს 33 500 დოლარი ჰქონდა დახარჯული Facebook-სა და Instagram-ზე რეკლამირებაში. პუბლიკა

რუსეთის ფედერაციის პრეზიდენტის, ვლადიმერ პუტინის პრესსპიკერი დიმიტრი პესკოვი ამბობს, რომ კრემლზე დრონების თავდასხმის უკან აშშ დგას. მისი განცხადებით, მსგავს გადაწყვეტილებებს უკრაინა ამერიკის მითითებებით იღებს. გუშინ, 3 მაისს რუსეთის პრეზიდენტის ადმინისტრაციიდან გავრცელდა ცნობა იმის შესახებ, რომ უკრაინამ კრემლზე დრონებით იერიში მიიტანა. რუსული პროსახელისუფლებო გამოცემა „რია ნოვოსტი“ წერდა, რომ კრემლს ორი უპილოტო საფრენი აპარატი დაესხა თავს, მაგრამ ვლადიმერ პუტინს საფრთხე არ შეჰქმნია. შეტევას არ მოჰყოლია მსხვერპლი და ნგრევა. უკრაინა კავშირს კრემლზე დრონებით თავდასხმაზე უარყოფს. პუბლიკა

2022 წლის მარტთან შედარებით, 2023 წლის მარტში 8.3-ჯერ გაიზარდა ფულადი გზავნილების ოდენობა რუსეთიდან საქართველოში და შეადგინა 224 მილიონი ამერიკული დოლარი, იუწყება საქართველოს ეროვნული ბანკი. 40.4%-ით გაიზარდა აშშ-დან გადმორიცხული თანხის ოდენობა, ასევე ზრდაა დაფიქსირებული ყაზახეთიდან და ყირგიზეთიდან გადმორიცხული თანხის მოცულობაში. სებ-ის ინფორმაციით, მარტში ფულადი გზავნილების ძირითად წყაროს რუსეთი (51.0%), ევროკავშირის ქვეყნები (24.6%) და აშშ (8.2%) წარმოადგენდა. ევროკავშირის ქვეყნებიდან აღსანიშნავია იტალიის, საბერძნეთისა და გერმანიის მაღალი წილი მთლიან ფულად გზავნილებში. ნეტგაზეთი

ნიურბერგის ლიტერატუტურლმა სახლმა მეორედ გასცა გიზელა ელსნერის პრემია. წელს დაჯილდოების ლაურეატი გახდა გერმანულენოვანი ქართველი მწერალი ნინო ხარატიშვილი. „საქართველოს ისტორიის ევროპული ისტორიის ნაწილად წარმოჩენასთან ერთად, საკუთარ ნაწარმოებებში ავტორი ახერხებს გადმოსცეს ქართული ლიტერატურისა და კულტურის ევრპული ხასიათი. სწორედ პირადი ბედისწერისა და ისტორიული მოვლენების ერთობლიობის ასახვაა ის, რაც აქტუალობას ანიჭებს ხარატიშვილის ტექსტებს უკრაინაში მიმდინარე სასტიკი ომის კონტექსტში, რომლის გადმოცემასაც ძნელად თუ შეძლებდა სხვა ლიტერატურული ხმა”, — ნათქვამია ჟიურის განცხადებაში. დაჯიდლოების ცერემონია გაიმართა 2 მაისს, სადაც ნინო ხარატიშვილმა წარადგინა თავისი ახალი რომანი „უკმარი სინათლე”. ნეტგაზეთი

ქალაქ რუსთავის, შოთა რუსთაველის სახელობის N2 საჯარო სკოლის მე-12 კლასის მოსწავლე, მარიამ ძაძამია ნიუ იორკში Adelphi University-ში სახვითი ხელოვნების ფაკულტეტზე ჩაირიცხა $80 000-იანი დაფინანსებით. Entrepreneur Georgia

საქართველოს განათლებისა და მეცნიერების მინისტრმა, გიორგი ამილახვარმა კერძო სკოლების დირექტორებსა და ასოციაციების წარმომადგენლებთან სამუშაო შეხვედრა გამართა, რომლის ფარგლებშიც ზოგადსაგანმანათლებლო დაწესებულებებში არსებულ გამოწვევებსა და მათი გადაჭრის გზებზე იმსჯელა. განათლების სამინისტროს პრესსამსახურის ინფორმაციით, გიორგი ამილახვარმა შეხვედრის მონაწილეებს ზოგადი განათლების განვითარების მიმართულებით საკუთარი ხედვები გააცნო და მათგან არსებული პრობლემების შესახებ ინფორმაცია მიიღო. მინისტრმა შეხვედრის მონაწილეების მხრიდან დასმულ შეკითხვებსაც უპასუხა. „საუბრისას გიორგი ამილახვარმა აღნიშნა, რომ განათლების ნებისმიერ საფეხურზე, იქნება ეს საჯარო თუ კერძო საგანმანათლებლო დაწესებულება, ხარისხის გაუმჯობესებაზე ზრუნვა სამინისტროსთვის უმთავრეს პრიორიტეტსა და პასუხისმგებლობას წარმოადგენს. შესაბამისად, კონკრეტული გადაწყვეტილებების მიღების პროცესში კერძო სექტორის აქტიური ჩართულობა განსაკუთრებით მნიშვნელოვანია. მინისტრმა ასევე განაცხადა, რომ ზოგადი განათლების განვითარების საქმეში მნიშვნელოვანია კერძო სკოლების განვითარებაზე ზრუნვა და სამინისტრო ამ კუთხით მათი აქტიური მხარდამჭერი იქნება. თავის მხრივ, კერძო სკოლებისა და ასოციაციების წარმომადგენლებმა მადლობა გადაუხადეს განათლებისა და მეცნიერების მინისტრს თანამშრომლობისთვის და სამინისტროსთან კოორდინირებული მუშაობის მზაობა გამოთქვეს“, – ნათქვამია განათლების სამინისტროს ინფორმაციაში. ამასთან, უწყებაში აღნიშნავენ, რომ გიორგი ამილახვარის ინიციატივით, კერძო სკოლებისა და ასოციაციების წარმომადგენლებთან შეხვედრებს პერმანენტული ხასიათი ექნება. 1ტვ

მრავალწლიანი სტაგნაციის შემდეგ, ალცჰაიმერის სამკურნალო პრეპარატებზე მუშაობა განახლდა. ფარმაცევტული გიგანტის, Eli Lilly-ს განცხადებით, მისმა ექსპერიმენტულმა პრეპარატმა Donanemab-მა წარმატებით შეანელა კოგნიტური და ფუნქციური დაქვეითება ალცჰაიმერის ადრეული ეტაპის მქონე პაციენტებში, რაც დიდ იმედს წარმოადგენს იმ ფონზე, როდესაც დღეს ამ დაავადების სამკურნალო კარგი მედიკამენტი არ არსებობს. კომპანიის განცხადებით, აშშ-ის მარეგულირებლებს მონაცემებს ივნისის ბოლომდე გაუგზავნის და იმედი აქვს, რომ მომავალი წლის პირველ ნახევარში, ავტორიზაციასაც მიიღებს. მსგავსი: სისხლის ტესტით ალცჰაიმერის დაავადება შეიძლება სიმპტომების გამოჩენამდე 10 წლით ადრე დაფიქსირდეს — #1tvმეცნიერება აღსანიშნავია, რომ რამდენიმე თვის წინ, აშშ-ის სურსათისა და მედიკამენტების ადმინისტრაციამ (FDA) დაჩქარებული წესით დაამტკიცა ალცჰაიმერის ასეთივე პრეპარატი, სახელად Leqembi, რომელიც კომპანია Biogen-მა და Eisai-მ შექმნეს. ეს პრეპარატი ზომიერად ანელებს ალცჰაიმერის პროგრესს ადამიანებში, რომლებსაც დაავადების ადრეული ეტაპი აქვთ. ალცჰაიმერის დიაგნოზი დაახლოებით 6,5 მილიონ ამერიკელს აქვს და ამჟამად არ არსებობს პრეპარატი, რომელიც ადამიანს მისგან ბოლომდე განკურნავს. Eli Lilly-მ ცდებში ძირითადად შეისწავლა, რა გავლენა მოახდინა მისმა პრეპარატმა პაციენტების მიერ ყოველდღიური ამოცანების შესრულებაზე, მაგალითად, მანქანის მართვასა და სადილის მომზადებაზე, როგორც ამას ალცჰაიმერის დაავადების რეიტინგის სკალა (iADRS) ზომავს. ბოლო ფაზის კვლევაში 1182 ადამიანი მონაწილეობდა და აღმოჩნდა, რომ 18 თვის განმავლობაში, დაავადების მაჩვენებელი 35 პროცენტით შემცირდა. მსგავსი: სულ უფრო მეტი მტკიცებულება მიუთითებს, რომ ალცჰაიმერის დაავადებას ორი საკმაოდ გავრცელებული ვირუსის „შეამხანაგება“ იწვევს — #1tvმეცნიერება „ეს გახლავთ ალცჰაიმერის დაავადების პრეპარატის კლინიკური ცდების მესამე ფაზის პირველი კვლევა, რომელმაც 35-პროცენტიანი კლინიკური და ფუნქციური შემცირება აჩვენა. შედეგად, ეს ამ სფეროში ყველაზე კარგი მაჩვენებელია ამ დროისათვის. ნაკლები პროგრესირება ნიშნავს მეტ დროს პაციენტებისთვის“, — ამბობს კომპანიის წარმომადგენელი დაუნ ბრუკსი. ცდებში, პაციენტების ნახევარს, რომლებმაც Donanemab-ი მიიღეს, მკურნალობის დაწყებიდან ერთი წლის შემდეგ არ აღენიშნებოდათ ალცჰაიმერის სიმპტომების გაუარესება, მაშინ, როცა პლაცებომიღებულ პაციენტთა 71 პროცენტს დაავადების პროგრესირება აღენიშნათ. პაციენტებს და მათ ექიმებს მოუწევთ შეაფასონ პრეპარატის სარგებელი გარკვეული სერიოზული გვერდითი ეფექტების წინააღმდეგ. ცდებისას დადგინდა, რომ პრეპარატი მიღებამ შეიძლება გამოიწვიოს თავის ტვინის შეშუპება ან სხვა პათოლოგიები. მიუხედავად იმისა, რომ შემთხვევათა უმეტესობა სერიოზული არ არის, კომპანია აცხადებს, რომ სულ მცირე ორი პაციენტის სიკვდილი სწორედ ამ გვერდით ეფექტებთან იყო დაკავშირებული. მსგავსი: მეცნიერებმა რამდენიმე პაციენტში ალცჰაიმერის დაავადება უკუაქციეს - შედეგები იმედისმომცემია Leqembi-ის მსგავსია Donanemab-ის მოქმედების პრინციპიც — თავის ტვინში ამცირებს იმ ცილების დონეს, რომლებიც ალცჰაიმერის პროგრესირებას იწვევენ. ცდებში პაციენტები Donanemab-ს იქამდე იღებდნენ, ვიდრე სკანირება არ აჩვენებდა, რომ მათ ტვინში უკვე აღარ იყო ეს ცილები, სახელად ბეტა-ამილოიდები. მეორე მხრივ, პრეპარატი Leqembi უფრო ხანგრძლივი გამოყენებისთვის არის განკუთვნილი. donanemab-ის მიღება ოთხ კვირაში ერთხელ ხდება, Leqembi-ს კი ორ კვირაში ერთხელ. კლინიცისტები და ანალიტიკოსები, Leqembi-სა და donanemab-ის მონაცემებს გამოიკვლევენ, რათა გამოავლინონ თითოეული წამლის უპირატესობები და უარყოფითი მხარეები. ცდების ბოლო ფაზაში, 18-თვიანი მკურნალობის შემდეგ, Leqembi-მ კოგნიტური გაუარესების მაჩვენებელი პაციენტებში 27 პროცენტით შეანელა. ამავე საზომით, რომელსაც CDR-SB-ს უწოდებენ, donanemab-ის მაჩვენებელი 36 პროცენტია. მომზადებულია Business Insider-ის მიხედვით. ავტორი - მიხეილ ჭაბუკაშვილი

ბულგარეთი სოფლის მეურნეობის უკრაინული პროდუქციის იმპორტზე აკრძალვას მოხსნის. შეზღუდვები მას შემდეგ გაუქმდება, რაც ბაზრის სტაბილიზაციასთან დაკავშირებით ევროკავშირის მხრიდან დაწესებული ზომები ძალაში შევა, – ამის შესახებ ბულგარეთის მთავრობის პრესსამსახურში განაცხადეს. პოლონეთის, უნგრეთის, ბულგარეთის, რუმინეთისა და სლოვაკეთის მიერ დაწესებული შეზღუდვების შემდეგ ევროკომისიამ სოფლის მეურნეობის საბჭოს სხდომაზე ბაზრის სტაბილიზაციის მიზნით ახალი ზომები წარადგინა. ევროკავშირის ზომები მოიცავს დაზარალებული ქვეყნების ფერმერების მხარდასაჭერად 100 მილიონი ევროს ოდენობის მეორე ფინანსურ პაკეტს; ასევე, უკრაინიდან ხორბლის, რაფსის, მზესუმზირისა და სიმინდის იმპორტის აკრძალვას. ევროკომისია ასევე განახორციელებს რეგულარულ მონიტორინგს სხვა საქონელზე და საბაზრო მდგომარეობის ცვლილების შემთხვევაში, აამოქმედებს დამცავ მექანიზმებსაც. გარდა ამისა, მიიღებს ზომებს უკრაინიდან საქონლის ტრანზიტის გასაუმჯობესებლად. ბულგარეთმა 19 აპრილს ორი თვით აკრძალა უკრაინიდან 20-ზე მეტი პროდუქტის იმპორტი, მათ შორის ხორბლის, მზესუმზირის ზეთის, კვერცხის და სხვა. ხუთი ქვეყნის მხრიდან უკრაინული პროდუქტების იმპორტირებაზე შეზღუდვების დაწესების მიზეზი პროდუქტების შემოდინების გამო ადგილობრივი ბაზრის დაცვაა.

ევროკავშირი საქართველოს თავდაცვის სექტორის მხარდასაჭერად 30 მილიონ ევროს გამოყოფს. ამის შესახებ ნათქვამია ევროკავშირის საბჭოს მიერ გავრცელებულ განცხადებაში. „დღეს საბჭომ მიიღო დახმარების ორი ზომა ევროპის მშვიდობის ფონდის ფარგლებში მოლდოვის შეიარაღებული ძალებისა და საქართველოს თავდაცვის ძალების მხარდასაჭერად, ორი ქვეყნის თავდაცვის სექტორში ეროვნული უსაფრთხოების, სტაბილურობისა და მედეგობის გასაძლიერებლად“, – ნათქვამია ევროკავშირის საბჭოს განცხადებაში. ევროპული საბჭოს ცნობით, საქართველოსთვის დამტკიცებული 30 მილიონი ევროს ოდენობის დახმარების პაკეტი მოიცავს 36-თვიან პერიოდს. აღნიშნული თანხით დაფინანსდება საქართველოს თავდაცვითი ძალების დანაყოფებისთვის არალეტალური აღჭურვილობა, მომარაგება და მომსახურება, მათ შორის ტექნიკური მომზადება მოთხოვნის შემთხვევაში. დამტკიცებული აღჭურვილობა მოიცავს საინჟინრო, სამეთაურო-საკონტროლო, სამედიცინო, ლოგისტიკურ და კიბერთადაცვით აღჭურვილობას. „ამ ახალი დახმარებით, ჩვენ ვაგრძელებთ მოლდოვის შეიარაღებული ძალებისა და საქართველოს თავდაცვის ძალების შესაძლებლობების მოდერნიზების მხარდაჭერას. რთულ გეოპოლიტიკურ კონტექსტში და ევროპული მისწრაფებების შესაბამისად, ჩვენ ვეხმარებით მათ თავდაცვის სექტორების გაძლიერებაში და ევროკავშირის სამხედრო მისიებსა და ოპერაციებში მონაწილეობის უნარების განვითარებაში. ეს არის ორივე ქვეყნისთვის ევროპის მშვიდობის ფონდის ფარგლებში გამოყოფილი დახმარების მესამე პაკეტი, რაც მკაფიოდ ხაზს უსვამს ევროკავშირის ურყევ მხარდაჭერას რეგიონის მშვიდობისა და სტაბილურობის მიმართ“, – განაცხადა საგარეო პოლიტიკისა და უსაფრთხოების საკითხებში ევროკავშირი უმაღლესმა წარმომადგენელმა, ჟოზეფ ბორელმა. ევროპული საბჭოს ცნობით, დახმარების ბოლო პაკეტი, წინა პაკეტებთან ერთად, ხელს შეუწყობს მოლდოვისა და საქართველოს ძალების ოპერატიული ეფექტურობის გაზრდას, დააჩქარებს ევროკავშირის სტანდარტებთან შესაბამისობაში მოყვანას და ურთიერთთავსებადობას შეუწყობს ხელს, შესაბამისად, უზრუნველყოფს მოქალაქეების უკეთეს დაცვას კრიზისებისა და საგანგებო მდგომარეობების დროს. ასევე, დახმარების პაკეტის მიზანია მოლდოვისა და საქართველოს შესაძლებლობების გაძლიერება მესამე ქვეყნებში ევროკავშირის სამხედრო მისიებსა და ოპერაციებში მათი მონაწილეობის კუთხით. საბჭოს ცნობით, დახმარება საქართველომ 2023 წლის 8 თებერვალს მოითხოვა. მანამდე, 2022 წლის დეკემბერში საბჭომ დაამტკიცა 20 მილიონი ევროს ოდენობის დახმარების პაკეტი, ხოლო 2021 წლის დეკემბერში 12,75 მილიონი ევროს ოდენობის პაკეტი. ანალოგიური მიზნებისთვის ევროკავშირის საბჭომ მოლდოვის შეიარაღებული ძალების მხარდასაჭერად 40 მილიონი ევროს გამოყოფის გადაწყვეტილება მიიღო. ავტორი - ქეთი ჩოხელი

ჩვენ ყველას გვინდა აქ სულ სხვა ვლადიმერის ნახვა. იმის, ვინც იმსახურებს განაჩენს დანაშაულებრივი ქმედებებისთვის. დარწმუნებული ვარ, ამას დავინახავთ, როცა გავიმარჯვებთ, - ამის შესახებ უკრაინის პრეზიდენტმა, ვოლოდიმირ ზელენსკიმ ჰააგაში სიტყვით გამოსვლისას განაცხადა. მისი თქმით, ომში სასწორზე უფრო მეტი რამე დევს, ვიდრე ერთი ქვეყნის ბედი. „ჩვენ არ შეგვიძლია შევაჩეროთ აგრესიული ომები, მაგრამ შეგვიძლია დავამარცხოთ აგრესია, როგორც კრიმინალური იდეა, რომელიც სათავეს იღებს დაუსჯელობას მიჩვეული ადამიანის აზროვნებაში. თუ გადავხედავთ ნებისმიერ აგრესიულ ომს, ყველა მათგანს ერთი რამ აქვს საერთო - ომის ჩამდენს არ სჯეროდა, რომ მათ მოუწევდათ პასუხისგება იმის გამო, რაც გააკეთეს“, - აღნიშნა ზელენსკიმ. მისი თქმით, რუსებმა მხოლოდ აპრილში 6 139 ომის დანაშაული ჩაიდინეს და ამ დანაშაულებს 207 უკრაინელი მშვიდობიანი მოქალაქე, მათ შორის 11 ბავშვი ემსხვერპლა. ვოლოდიმირ ზელენსკის განცხადებით, ამ აგრესიის დანაშაულების გამო პასუხისმგებლობის დაკისრება მხოლოდ ტრიბუნალს შეუძლია. ipn

ეს არის ანტიდასავლური პროპაგანდის ნაწილი. მთელი ეს პროპაგანდა უმცირესობებთან დაკავშირებით მხოლოდ და მხოლოდ ანტიდასავლური პროპაგანდის გაღვივებას ემსახურება, - ასე ეხმიანება პარტია "საქართველოსთვის" წევრი ანა ბუჩუკური პრემიერ-მინისტრის გამოსვლას ბუდაპეშტში კონსერვატორთა კონფერენციაზე. ბუჩუკურმა ღარიბაშვილის გამოსვლის კომენტირებისას ასევე აღნიშნა, რომ კორუფცია და ადამიანების დაჩაგვრა ქრისტიანული ღირებულებები არ არის. "ღარიბაშვილისთვის ამის შეხსენებას აზრი არ აქვს, მაგრამ საზოგადოებას მინდა ვუთხრა, რომ ევროპა არის ქრისტიანული სამყაროს ნაწილი. პირველ კურსზე ისწავლება, რომ ადამიანის უფლებები, როგორც ღირებულება სწორედ ქრისტიანული იდეოლოგიიდან მოდის. ღარიბაშვილს და "ქართულ ოცნებას" არაფერი საერთო ქრისტიანულ ღირებულებებთან არ აქვთ, ფულის მოპარვა, კორუფცია, ადამიანები დაჩაგვრა ქრისტიანული ღირებულებები არ არის," - განაცხადა ბუჩუკურმა.

უკრაინის პრეზიდენტი ვოლოდიმირ ზელენსკი, რომელიც ნიდერლანდებს სტუმრობს, ჰააგის სისხლის სამართლის საერთაშორისო სასამართლოში მივიდა, - ინფორმაციას ადგილობრივი მედია ავრცელებს. მათივე ინფორმაციით, ვოლოდიმირ ზელენსკი სასამართლოში შეხვედრებს გამართავს. ჰააგის სისხლის სამართლის საერთაშორისო სასამართლო ამჟამად იძიებს რუსეთის სავარაუდო სამხედრო დანაშაულებს უკრაინაში. ცნობილია, რომ მარტში სასამართლომ რუსეთის პრეზიდენტ ვლადიმერ პუტინისა და ბავშვთა საქმეებში რუსეთის ფედერაციის პრეზიდენტის სრულუფლებიანი წარმომადგენლის, მარია ლვოვა-ბელოვას დაკავების ორდერები გასცა, რომლებსაც უკრაინის ოკუპირებული რაიონებიდან რუსეთის ფედერაციაში ბავშვების უკანონო დეპორტაციის სამხედრო დანაშაულში ედებათ ბრალი. იპნ

ნათია მეზვრიშვილი: "ხო, ასევე, საინტერესოა ის ხალხი რატომ არ ითხოვს ქოლ-ცენტრებზე საგამოძიებო კომისიის შექმნას (ან თუნდაც ელემენტარულ გამოძიებას), ვინც ხორავას საქმეზე ითხოვდა. ა ალბათ ხელისუფლების მხრიდან ტრანსნაციონალური დანაშაულის მფარველობის მასშტაბს ვერ ხედავენ ან იქნებ ხედავენ და თავადაც ხეირობენ უკანონო ფულით" იხილეთ ბმული: https://www.facebook.com/natia.mezvrishvili.9/posts/9381579718548732

ქოლ-ცენტრების საგამოძიებო კომისიაზე ხელისუფლების ნარატივი მაგონებს “ქურდს ქუდი ეწვის”, - აცხადებს პარტია "საქართველოსთვის" თავმჯდომარის მოადგილე ნათია მეზვრისვილი. მისი თქმით, კომისიის მიზანი არ არის მიმდინარე გამოძიების რევიზია. კომისიის მიზანია, გამოავლინოს სახელმწიფო ორგანოების ან თანამდებობის პირების კანონსაწინააღმდეგო ქმედება და დასკვნა გაუგზავნოს საგამოძიებო უწყებას რეაგირებისთვის. "გადაშალეთ კონსტიტუცია და რეგლამენტი) არანაირი მიმდინარე საქმის მასალების გახმაურებას არ ითვალისწინებს კომისიის შექმნა, ნუ თუ გენპროკურორი არ გადაწყვეტს რომ გაახმაუროს:) კომისიის მიზანი არ არის მიმდინარე გამოძიების რევიზია. კომისიის მიზანია, გამოავლინოს სახელმწიფო ორგანოების ან თანამდებობის პირების კანონსაწინააღმდეგო ქმედება და დასკვნა გაუგზავნოს საგამოძიებო უწყებას რეაგირებისთვის - ამ შემთხვევაში გამოავლინოს ქოლ-ცენტრების ტრანსნაციონალური დანაშაულის მფარველობა ოცნების მხრიდან. კომისია არის ხალხის მიერ ხელისუფლების უკანონობის კონტროლის ბერკეტი (მითუმეტეს, როცა არსებობს ეჭვი, რომ საგამოძიებო უწყებები არ რეაგირებენ ან არასათანადოდ რეაგირებენ) მის მიერ არჩეული პარლამენტის მეშვეობით. შეგახსენებთ, ხორავას საქმეზე საგამოძიებო კომისიას. ამიტომ, დასკვნა მარტივია რატომ არ უნდა ოცნებას კომისიის შექმნა - იცავენ კეზერაშვილს და ეშინიათ თავად იმიტომ, რომ დაშავებული აქვთ. კარგი, ამერიკული FARA ინგლისურად იყო, მაგრამ კონსტიტუცია და რეგლამენტი ქართულად იგუგლება და რაზე ფიქრობთ ამ მესიჯების დალაგებისას. ქართული ოცნება / Georgian DreamTV Imedi რაღაცა მაინც წაიკითხეთ ქართულად, სანამ თავს მოიჭრით.", - წერს სოციალურ ქსელში ნათია მეზვრიშვილი.

ბ-ნო შალვა, უკვე არაერთგზის გაცხადდა, რომ ქართულ ოცნებას (ასევე ცნობილს როგორც - ტროლ-ბოტების ხელისუფლებას), უყვარს საზოგადოების თვალში ნაცრის შეყრა, რაც კიდევ ერთხელ დადასტურდა, ფეისბუქის მიერ, თქვენი ფეიკ ანგარიშების, გვერდებისა და ჯგუფების წაშლის ფაქტით., - ასე პასუხობს პარტია "საქართველოსთვის წევრი და დეპუტატი ბექა ლილუაშვილი შალვა პაპუაშვილის განცხადებას იმის შესახებ, რომ ერთადერთი ვის ინტერესშიც საგამოძიებო კომისიის შექმნაა, თავად კეზერაშვილია. როგორც ლილუაშვილი აღნიშნავს, სინამდვილეში, "ნაც. მოძრაობის" მოსამართლეებსაც ეფარება "ქართული ოცნება", იმიტომ რომ მათი გამოაშკარავება - კორუფციაში, სასამართლოზე ზეგავლენაში ამხელთ და საფრთხეს შეუქმნის მათ ძალაუფლებას. "ამიტომ მეგონა, მსგავსი მასშტაბის არალოგიკურ, ფეიკ ბრალდებას, ჯერ ტროლ-ბოტებით დატესტავდით, მაგრამ როგორც ჩანს ეს ინფრასტრუქტურა ჩამოშლის პირას გაქვთ და თქვენ, პირადად იტვირთეთ ამ ფეიკის გავრცელების ტვირთი. ეხლა, კი ქოლ-ცენტრებზე კომისიის არ შექმნა, უკვე პირდაპირ ემუქრება ოცნებასთან დაკავშირებული პირების მიერ სავარაუდოდ ნაშოვნ ასობით მილიონ დოლარს. სასაცილოა, როდესაც საუბარია ამ სქემით მოპარულ 1 მილიარდ დოლარზე - საქართველოს პროკურატურას კი მხოლოდ 30 მლნ. დოლარის მოცულობის ზარალზე აქვს გამოძიებიდან შედეგები. ვინ უნდა დაიჯეროს, რომ 3 წელი გამოძიებას აწარმოებდე ეფექტიანად და გამოიძიო მხოლოდ მთლიანი საქმის 3%, თუ ამ პროცესს ხელოვნურად არ აფერხებ. ეს შესაძლოა ნიშნავდეს მხოლოდ ერთს: ოცნება ყველაფერს გააკეთებს, რომ არ გამოააშკარავდეს ვისთან ყოფდა კეზერაშვილი ამ ტრანსნაციონალური დანაშაულის შედეგად ნაშოვნ ასობით მილიონ დოლარს.", - აცხადებს ლილუაშვილი.

“ოცნების” აწ. უკვე ტროლად აღიარებული ხელისუფლება ხელს აფარებს სასამართლოს კორუფციულ სინდიკატს და ტრანსნაციონალური დანაშაულის ორგანიზატორებს, მათთან საკუთარი ალიანსების დასაფარად და ევროპელი მოქალაქეების ძარცვით ნაშოვნი ფულის შესანარჩუნებლად, - წერს სოციალურ ქსელში პარტია "საქართველოსთვის" აღმასრულებელი მდივანი ბერდია სიჭინავა. ბერდია სიჭინავას განცხადებით, საერთაშორისო საგამოძიებო ჯგუფი მნიშვნელოვანწილად დამოკიდებულია ჩვენი სამართალდამცავი ორგანოების მიერ ჩვენი ქვეყნის ტერიტორიაზე მოპოვებულ და მათთვის მიწოდებულ ინფორმაციასა და მტკიცებულებებზე. “ოცნების” სპიკერები: - მურუსიძე-ჩინჩალაძის კორუფციულ სინდიკატზე საგამოძიებო კომისიას არ შეგაქმნევინებთ, სასამართლოს “დამოუკიდებლობის ხელყოფას” ვერ დავუშვებთ. - “ქოლ-ცენტრებზე” საგამოძიებო კომისიას არ შეგაქმნევინებთ, კეზერაშვილმა შეიძლება ყველაფერი გაიგოს, მასალები გასაჯაროვდეს და გამოძიების ინტერესები დაზიანდეს (წლებია იძიებენ BBC უფრო შორს წავიდა, ვიდრე ამათი გამოძიება). P.S. საერთაშორისო საგამოძიებო ჯგუფი მნიშვნელოვანწილად დამოკიდებულია ჩვენი სამართალდამცავი ორგანოების მიერ ჩვენი ქვეყნის ტერიტორიაზე მოპოვებულ და მათთვის მიწოდებულ ინფორმაციასა და მტკიცებულებებზე. იმ ფონზე, როდესაც საუბარია ამ მასშტაბის ტრანსნაციონალური დანაშაულებრივი ქსელის ქვეყნის ტერიტორიაზე მოქმედებასა და გავლენიანი პირების მხრიდან მფარველობაზე, იმაზე საუბარი, დაველოდოთ ჩვენს სამართალდამცავ უწყებებს რა ინფორმაციას მიაწვდიან ჩვენს პარტნიორებს, არის სრული სიბეცე.", - წერს ბერდია სიჭინავა.

ესეიგი, ორი კვირაა “ოცნება” თავგამოდებით იცავს სანდრო გირგვლიანის სანქცირებულ მოსამართლე მურუსიძეს, ახლა უკვე ღიად კეზერაშვილს, - ამის შესახებ სოციალურ ქსელში პარტია "საქართველოსთვის" წევრი და პარლამენტის დეპუტატი, ანა ბუჩუკური წერს. მისივე თქმით, "ქართულ ოცნებას" არ უნდა მისი დანაშაულებრივი კავშირების გამოვლენა კორუფციულ საქმეებში. "რატომ იცავს მათ? პასუხი მარტივია - “ოცნებას” არ უნდა მისი დანაშაულებრივი ალიანსები გამოვლინდეს ამ კორუფციულ საქმეებში და ევროპელი მოქალაქეების ძარცვაში.", - წერს ბუჩუკური.