tvati

რუსეთის საგარეო საქმეთა მინისტრი სერგეი ლავროვი ნიუ-იორკში ვიზიტით ჩაფრინდა. რუსეთი წელს გაეროს უშიშროების საბჭოს თავმჯდომარე ქვეყანაა, შესაბამისად საბჭოს სხდომას ლავროვი უხელმზღვანელებს. როგორც CNN განმარტავს, რუსეთი საბჭოს მხოლოდ და მხოლოდ პროცედურის გამო უხელმძღვანელებს. წესდების თანახმად, საბჭოს თავმჯდომარეობა წევრ ქვეყნებს შორის რიგითობით ნაწილდება. თუმცა, ამ ცნობას არ ჩაუვლია კრიტიკის გარეშე, მათ შორის, უკრაინის მხრიდან. ჯერ კიდევ აპრილის დასაწყისში, უკრაინის საგარეო საქმეთა მინისტრი დმიტრო კულება ამბობს, რომ ეს – „მსოფლიოში ყველაზე ცუდი საპირველაპრილო ხუმრობაა“. რაც შეეხება უშუალოდ ვიზიტს, კრემლში ამბობენ, რომ ლავროვი ასევე უნდა შეხვდეს გაეროს გენერალური მდივანს ანტონიუ გუტერეშს. netgazeti

დროებითი საგამოძიებო კომისიის შექნის თემით ოპოზიციას სურს, ის წარმატებული პროცესი გადაფაროს, რაც მმართველი გუნდის თაოსნობით 12 რეკომენდაციის თვალსაზრისით ხორციელდება, – ამის შესახებ საპარლამენტო უმრავლესობის წევრმა, გივი მიქანაძემ განაცხადა. მისივე თქმით, დამოუკიდებელი სასამართლოს დისკრედიტაციის უფლებას არავის მისცემენ. „დროებით საგამოძიებო კომისიასთან დაკავშირებით ძალიან მყარი და მტკიცე პოზიცია გვაქვს, რაც, პირველ რიგში, გამომდინარეობს იქიდან, რომ საქართველოს სასამართლოს დამოუკიდებლობაზე შეტევის მცდელობის საშუალებას არავის არ მივცემთ. ასევე არავის არ მივცემთ დამოუკიდებელი სასამართლოს დისკრედიტაციის უფლებას. ამ პროცესით ოპოზიციას სურს, რომ ის წარმატებული პროცესი გადაფაროს, რაც მმართველი გუნდის თაოსნობით 12 რეკომენდაციის თვალსაზრისით ხორციელდება. სუფთა სამართლებრივი თვალსაზრისით რომ ვიმსჯელოთ, პარლამენტის რეგლამენტი არ ცნობს მსგავსი საგამოძიებო კომისიის შექმნის საფუძველს. ამიტომ ყველანაირი საფუძველი არსებობს იმის, რომ ჩვენ ამ კომისიას არ დავუჭიროთ მხარი და არც დავუჭერთ. თუ საჭიროება იქნება, მაქსიმალურად გამოვიყენებთ ყველა პროცედურულ თუ სამართლებრივ მექანიზმებს, რითიც ოპოზიციას საშუალებას არ მივცემთ, რომ პარლამენტში ქვეყნისა და სასამართლო ხელისუფლების დისკრედიტაციის მიზნით ასეთი მავნებლური და ზიანზე ორიენტირებული კომისია შეიქმნას“, – განაცხადა გივი მიქანაძემ. ცნობისთვის, სასამართლოსთან დაკავშირებით დროებითი საგამოძიებო კომისიის შექმნის საკითხს პარლამენტში კვორუმის არარსებობის გამო კენჭი სამჯერ ვერ უყარეს. ავტორი - თეონა მანაგაძე

ისტორიაში პირველად, ლიეტუვა რუსეთის ელექტროქსელიდან სატესტო რეჟიმში მთლიანად გაითიშა, – ამის შესახებ ლიეტუვური მედია წერს. როგორც მედია იუწყება, ლიეტუვა რუსეთის ელექტროქსელიდან გათიშვას და ელექტრომომარაგების სისტემის იზოლირებულ მუშაობას ამოწმებდა. მედიის ცნობით, ტესტირება 10 საათს გაგრძელდა და ამ დროის განმავლობაში ლიეტუვას ელექტროენერგიას ადგილობრივი ელექტროსადგურები აწვდიდნენ, ასევე ელექტროენერგიის მიწოდება ხდებოდა პოლონეთიდან და შვედეთიდან. „ლიეტუვა სიამაყით აცხადებს, რომ ჩვენი ტესტირება წარმატებით დასრულდა. დღეს, ისტორიაში პირველად, ლიეტუვის ელექტროქსელმა სრულიად ავტონომიურად იმუშავა. ამასთან ერთად, აღსანიშნავია, რომ მომხმარებლებმა ეს ვერც კი შეამჩნიეს. ეს გზას უხსნის მომავალი წლისთვის რუსული ელექტროქსელისგან საბოლოო და სრულ გამოყოფას“, – განაცხადა ლიეტუვის საგარეო საქმეთა მინისტრმა, გაბრიელიუს ლანდსბერგისმა. ცნობისთვის, მიუხედავად იმისა, რომ რუსეთ-უკრაინის ომის დაწყების შემდეგ ბალტიისპირეთის ქვეყნები აღარ იყენებენ რუსეთის ენერგომომარაგებას, ისეთს, როგორებიცაა გაზი და ნავთობი, ისინი კვლავ რჩებიან დამოკიდებული რუსეთის ელექტროენერგიის სისტემაზე. 1tv

აშშ-ის მთავრობამ განაცხადა, რომ „ღრმად შეშფოთებულია“ აზერბაიჯანის მიერ სადავო რეგიონის, მთიანი ყარაბაღის ერთადერთ სახმელეთო გზაზე საგუშაგოს დაარსებით და ამბობს, რომ ეს ხელს უშლის რეგიონში მშვიდობისკენ მიმართულ ძალისხმევას, – ამის შესახებ სააგენტო „როიტერი“ წერს. „აშშ ღრმად შეშფოთებულია, რომ აზერბაიჯანმა ლაჩინის დერეფანზე საგუშაგო შექმნა. ეს ძირს უთხრის სამშვიდობო პროცესში ნდობის დამყარების მცდელობებს“, – ნათქვამია აშშ-ის სახელმწიფო დეპარტამენტის განცხადებაში. აშშ-მა მოუწოდა მხარეებს, განაახლონ სამშვიდობო მოლაპარაკებები და მისცენ ხალხს თავისუფალი გადაადგილებისა და ვაჭრობის საშუალება ლაჩინის დერეფანში. შეგახსენებთ, კვირას აზერბაიჯანმა განაცხადა, რომ ყარაბაღისკენ მიმავალ გზაზე საგუშაგო დააარსა იმის გამო, რომ სომხეთმა ეს გზა იარაღის გადასატანად გამოიყენა, რასაც მოჰყვა სროლები როგორც აზერბაიჯანის, ისე სომხეთის მხრიდან. სომხეთმა კი მოუწოდა რუსეთს შეთანხმების განხორციელებისკენ, რომელშიც ნათქვამია, რომ ლაჩინის დერეფანი, ერთადერთი გზა აზერბაიჯანის გავლით, რომელიც სომხეთს მთიან ყარაბაღთან აკავშირებს, უნდა იყოს რუსი სამშვიდობო ძალების კონტროლის ქვეშ.

უკრაინას არ შეუძლია ბახმუტზე უარის თქმა, რადგან მისმა ხელში ჩაგდებამ, შესაძლოა, გზა გაუხსნას რუსეთს კრამატორსკსა და სლავიანსკში წინსვლისთვის, – ამის შესახებ უკრაინის პრეზიდენტმა, ვოლოდიმირ ზელენსკიმ „ალ არაბიასთან“ ინტერვიუში განაცხადა. „ჩვენ არ შეგვიძლია, უარი ვთქვათ ბახმუტზე, რადგან ეს გამოიწვევს საომარი მოქმედებების ფრონტის გაფართოებას და რუსეთის ჯარს შესაძლებლობას მისცემს, დაიპყროს ჩვენი მიწების უფრო დიდი ნაწილი“, – აღნიშნა ზელენსკიმ. უკრაინის პრეზიდენტმა აღნიშნა, რომ უკრაინის არმია კონტრშეტევისთვის ემზადება და უფრო ძლიერია, ვიდრე ერთი წლის წინ იყო. მან ასევე განაცხადა, რომ მის წარმატებაში ეჭვი არ ეპარება. ამასთან, ზელენსკიმ მადლობა გადაუხადა მოკავშირეებს მხარდაჭერისთვის, მაგრამ აღნიშნა, რომ უკრაინის მხარდაჭერით ისინი საკუთარ თავსაც ეხმარებიან. ვოლოდიმირ ზელენსკის თქმით, ყველას ესმის, რომ რუსეთი არ გაჩერდება უკრაინაზე, თუმცა აღნიშნა, რომ უკრაინას შეუძლია რუსეთის შეჩერება. 1tv

კატეგორიულად უარვყოფთ სომხეთის საგარეო საქმეთა სამინისტროს განცხადებას აზერბაიჯან-სომხეთის საზღვარზე ლაჩინი-ხანქენდის გზის სასტარტო პუნქტზე სასაზღვრო გამშვები პუნქტის მოწყობის შესახებ, - ამის შესახებ აზერბაიჯანის საგარეო საქმეთა სამინისტროს განცხადებაშია აღნიშნული. „სომხეთის საგარეო საქმეთა სამინისტროს განცხადება აზერბაიჯანის საშინაო საქმეებში ჩარევის მორიგი მცდელობაა და მიუღებელია. სომხური მხარის მსგავსი განცხადებები, გარდა იმისა, რომ არ უწყობს ხელს რეგიონში მშვიდობასა და სტაბილურობას, აზერბაიჯანის საშინაო საქმეებში ჩარევაა და დაძაბულობის ზრდას იწვევს. აზერბაიჯანის ლეგიტიმური გადაწყვეტილება და ნაბიჯი მის სუვერენულ ტერიტორიაზე სასაზღვრო გამშვები პუნქტის გახსნის შესახებ საერთაშორისო სამართლის ყველა პრინციპსა და ნორმას შეესაბამება. ცნობილია, რომ პრაღასა და სოჭში გამართული შეხვედრების შედეგად, რომელსაც სომხური მხარე ხშირად აღნიშნავს, სომხეთმა გამოაცხადა აზერბაიჯანის სუვერენიტეტისა და ტერიტორიული მთლიანობის აღიარება. აქედან გამომდინარე, სომხეთმა უნდა მიიღოს და პატივი სცეს აზერბაიჯანის უფლებას უზრუნველყოს კონტროლი მის ტერიტორიაზე შესვლასა და გასვლაზე“, - აღნიშნულია აზერბაიჯანის საგარეო უწყების განცხადებაში. უწყების მტკიცებით, აზერბაიჯანს აქვს ვალდებულება, უზრუნველყოს მოქალაქეების, ავტომობილებისა და ტვირთების გადაადგილების უსაფრთხოება ლაჩინი-ხანქენდის გზაზე. „რაც შეეხება უსაფუძვლო განცხადებას, რომ აზერბაიჯანმა სამმხრივი განცხადებით ნაკისრი ვალდებულებები დაარღვია, გვსურს შევახსენოთ სომხურ მხარეს : სომხეთის ხელმძღვანელობამ, უმაღლეს დონეზე, დაადასტურა, რომ ამ ქვეყანას სამმხრივი განცხადების საფუძველზე არ აკისრია რაიმე ფუნქცია ლაჩინის გზაზე მოძრაობის რეგულირების შესახებ. ამ ფონზე, ალოგიკური და გაცხადებული პოზიციის საწინააღმდეგოა, რომ სომხეთის საგარეო საქმეთა სამინისტრო, როგორც სამმხრივი განცხადების მხარე, აზერბაიჯანის მიერ გადადგმულ ნაბიჯს მიუღებელს უწოდებს. სამმხრივი განცხადების თანახმად, აზერბაიჯანს აქვს ვალდებულება უზრუნველყოს მოქალაქეების, მანქანებისა და ტვირთების გადაადგილების უსაფრთხოება ლაჩინი-ხანქენდის გზაზე. აბსურდული განცხადება, რომ სასაზღვრო გამშვები პუნქტის შექმნა „ეთნიკურ წმენდას“ ისახავს მიზნად, უსაფუძვლო და მიუღებელია. ვიმეორებთ, რომ არსებობს შესაბამისი პირობები აზერბაიჯანის რესპუბლიკის ყარაბაღის რეგიონის ადგილობრივი სომეხი მოსახლეობის გამჭვირვალე, უსაფრთხო და მოწესრიგებული გადაადგილებისთვის“, - აღნიშნულია განცხადებაში. უწყება სომხურ მხარეს მოუწოდებს, სამშვიდობო მოლაპარაკებების პროცესის შეფერხების ნაცვლად კონსტრუქციული პოზიცია დაიკავოს. „ვურჩევთ სომხურ მხარეს, უარი თქვას მსგავს პროვოკაციებზე, პასუხისმგებლობით მოეკიდოს აზერბაიჯანთან ურთიერთობების დამყარებას ისეთი პრინციპების საფუძველზე, როგორიცაა ორივე ქვეყნის ტერიტორიული მთლიანობა და სუვერენიტეტი, და სამშვიდობო მოლაპარაკებების შეფერხების ნაცვლად კონსტრუქციული პოზიცია დაიკავოს“, - აღნიშნულია განცხადებაში. ცნობისათვის, მანამდე, სომხეთის საგარეო საქმეთა სამინისტრომ გაავრცელა განცხადება, სადაც აღნიშნულია, რომ სომხეთი, როგორც 9 ნოემბრის სამმხრივი განცხადების ხელმომწერი მხარე, მიუღებლად მიიჩნევს აზერბაიჯანის მიერ ლაჩინის დერეფანში საგუშაგოს მოწყობას და რუსეთის ფედერაციას მოუწოდებს, ლაჩინის დერეფნიდან აზერბაიჯანული ძალების გაყვანა უზრუნველყოს. „მოვუწოდებთ რუსეთის ფედერაციას, შეასრულოს სამმხრივი განცხადების მე-6 პუნქტით ნაკისრი ვალდებულება ლაჩინის დერეფნის უკანონო ბლოკადის აღმოფხვრით და დერეფნის მთელი უსაფრთხოების ზონიდან აზერბაიჯანული ძალების გაყვანის უზრუნველყოფით“, - აღნიშნულია განცხადებაში. palitranews

საქართველოს პრეზიდენტის გადასაწყვეტია, შეიწყალებს თუ არა ბატონ გვარამიას, მისი საკონსტიტუციო უფლებაა შეიწყალოს ის, ვისი შეწყალებაც სურს, - ამის შესახებ საქართველოში ევროკავშირის ელჩმა, პაველ ჰერჩინსკიმ ჟურნალისტებს განუცხადა, რომლებმაც მას დაუსვეს შეკითხვა იმასთან დაკავშირებით, უნდა შეიწყალოს თუ არა საქართველოს პრეზიდენტმა ნიკა გვარამია. კითხვაზე, რამდენად მნიშვნელოვანია ნიკა გვარამიას შეწყალება საქართველოს ევროპული მომავლისთვის, ელჩმა უპასუხა, რომ ევროკავშირის 12 პრიორიტეტიდან ერთ-ერთი მედიის თავისუფლებას, პროფესიონალიზმს და დამოუკიდებლობას ეხება. „როგორც იცით, 12 პრიორიტეტიდან ერთ-ერთი ეხება მედიის თავისუფლებას, პროფესიონალიზმს, დამოუკიდებლობას. თავისუფალი გამოხატვის უფლება არის ერთ-ერთი პრინციპი, რომელსაც ევროკავშირი ეფუძნება. ასე რომ, ჩვენ ამ და სხვა საქმეებს ძალიან ყურადღებით ვაკვირდებით. ჯერ კიდევ არის დრო, სანამ ევროკომისია შეფასებას წარადგენს ანგარიშის სახით. ეს ანგარიში გამოქვეყნდება ოქტომბერში და წევრი ქვეყნები, უმაღლეს პოლიტიკურ დონეზე, პრეზიდენტებისა და პრემიერ-მინისტრების დონეზე, მიიღებენ გადაწყვეტილებას საქართველოს ინტეგრაციის პროცესთან დაკავშირებულ შემდგომ ნაბიჯებზე მიმდინარე წლის დეკემბერში“, - აღნიშნა ელჩმა. ipn

მოსამართლეების პროფესიონალიზმი, სრული დამოუკიდებლობა და მყარი, ჯანსაღი სასამართლო სისტემა 12 პრიორიტეტიდან ერთ-ერთია, - ამის შესახებ საქართველოში ევროკავშირის ელჩმა, პაველ ჰერჩინსკიმ ქართველი მოსამართლეების სანქცირებასთან დაკავშირებით დასმული შეკითხვის საპასუხოდ განაცხადა. მისი თქმით, ჯერ კიდევ არის დრო იმის უზრუნველყოფისთვის, რომ სასამართლო სისტემის რეფორმებმა, რომელიც რთული და გამოწვევებით სავსეა, პროგრესი განიცადოს. „ჩვენ ქართულ მხარესთან, საქართველოს იუსტიციის სამინისტროსთან ერთად ვმუშაობთ რეფორმების განხორციელებაზე. სასამართლო სისტემის რეფორმაზე მუშაობა პარლამენტშიც მიმდინარეობს. ჩვენ ყოველთვის მხარს ვუჭერდით ამ რეფორმას. კვლავ ვიტყვი, რომ მიღწეული პროგრესის შეფასება მოხდება მიმდინარე წლის ოქტომბერში გაფართოების ანგარიშის ფორმით და შემდეგ, 27 წევრი სახელმწიფო, უმაღლეს პოლიტიკურ დონეზე, სახელმწიფოებისა და მთავრობების მეთაურების დონეზე, შეაფასებს საქართველოს პროგრესს, მათ შორის სასამართლო სისტემის რეფორმის კუთხით, მიმდინარე წლის დეკემბერში. ჯერ კიდევ არის დრო წინსვლისთვის, იმის უზრუნველყოფისთვის, რომ რეფორმებმა, რომელიც რთული და გამოწვევებით სავსეა, პროგრესი განიცადოს“, - აღნიშნა ელჩმა. ipn

საქართველოში The Killers-ის კონცერტის ბილეთის ფასები 100-დან – 500 ლარამდე ფარგლებში მერყეობს. ბილეთების გაყიდვა ხვალიდან დაიწყება, შესაბამისი ინფორმაცია ბლექ სი არენამ გამოაქვეყნა, სადაც უნდა ჩატარდეს ეს კონცერტი 15 აგვისტოს. 2023 წლის ზაფხულში საქართველოში სამთავრობო პროგრამის ფარგლებში Imagine dragons-ისა და The Killers-ის კონცერტები გაიმართება. იმეჯინ დრაგონსის კონცერტი 31 აგვისტოსაა დაგეგმილი თბილისში, მიხეილ მესხის სტადიონზე, ხოლო ქილერსის – 15 აგვისტოს ბლექ სი არენაზე. გარდა ამისა ზაფხულში, სხვადასხვა დროს ჩატარდება დამიან ლაზარუსის, ნაი როჯერს & შიკი-ისა და FKJ-ის კონცერტები. პრემიერ-მინისტრ ირაკლი ღარიბაშვილის განცხადებით, მთავრობა 2023 წლის მაისის ბოლოდან, ივნისში, ივლისსა და აგვისტოში, უცხოელი მომღერლების ჩამოყვანას გეგმავს. მისი თქმით, კონცერტები გაიმართება თბლისში, ბათუმსა და „ბლექ სი არენაზე“: „ასევე გეტყვით, რომ კულტურის ნაწილში ჩვენი მოქალაქეებისთვის, ახალგაზრდებისთვის ვგეგმავთ მსოფლიო ვარსკვლავების ჩამოყვანას. იგეგმება მაისის ბოლოდან, ივნისი, ივლისი, აგვისტო, მსოფლიო დონის ვარსკვლავების ჩამოყვანა, თბილისის სტადიონზე, ბათუმში, „ბლექ სი არენაზე“, ყველგან უნდა იყოს მსოფლიო დონის ვარსკვლავების კონცერტები. ამ პროგრამაზეც ვმუშაობთ და ამის თაობაზე მოგვიანებით საზოგადოება მიიღებს ინფორმაციას“,- განაცხადა ირაკლი ღარიბაშვილმა. ნეტგაზეთი

“მე აქ არ მოვსულვარ იმისთვის, რომ ჩემთვის მოვითხოვო წამალი, მე დავაგვიანე, არ მჭირდება. აქ ვარ, რომ ამ ბავშვებს ჰქონდეთ ის და არ განიცადონ ის ტკივილები, რაც მე თავის დროზე განვიცადე,” – ამის შესახებ ლაზარე ლელაძემ განაცხადა საპროტესტო აქციაზე, სადაც აქონდროპლაზიის მქონე ბავშვებისთვის საჭირო წამლის შემოტანა და დაფინანსება კიდევ ერთხელ მოითხოვეს სახელმწიფოს მხრიდან. ლაზარე ლელაძეს, თავადაც აქვს აქონდროპლაზიის დიაგნოზი, თუმცა ის 18 წელს გადაცილებულია და წამალი, რომელსაც მომიტინგეები ითხოვენ, მისთვის არ არის განკუთვნილი. მან აუდიტორიას მოუყვა იმ სირთულეების შესახებ, რომელიც ზემოხსენებულ დიაგნოზთან არის დაკავშირებული. “ეს დედები წელიწადზე მეტია ითხოვენ იმ მედიკამენტს, რომელიც ასეთ საყვარელ ბავშვებს სიცოცხლესა და ჯანმრთელობაში შეუწყობს ხელს. თქვენ იცით, დედები რა ტკივილს განიცდიან და რა სტრესის ქვეშ არიან, როდესაც იციან, რომ სამწუხაროდ არსებობს მათი შვილების ღამით გაგუდვის საშიშროება უჰაერობის გამო. თქვენ იცით დედის გული როგორი მწარეა, როცა იცის, რომ შვილი ავადმყოფობს. ერთი კვირის რესტორნებისა და კონცერტების ხარჯი შეგიძლიათ გამოყოთ, რომ ასეთი საყვარელი ბავშვები ჯანმრთელად იყვნენ”, – განაცხადა ლაზარემ. “თქვენ იცით რამდენს ნიშნავს ეს დედებისთვის?! რადგანაც თქვენი შვილები კარგად და თბილად არიან, იგივე პრობლემას არ განიცდიან, ეს იმას ნიშნავს რომ წელიწადზე მეტი უნდა სჭირდებოდეს [სხვა] მშობლებს აქცია?! როგორც არ გრცხვენიათ, ეს არის თქვენი მეცენატობა, ეს არის ხალხის მხარდაჭერაზე თქვენი დანაპირები? თქვენ გამოხვალთ და ჩვენ პოლიტიკურ მოძრაობას მოგვაწერთ. ჩვენ არც ერთი პარტია არ გვაინტერესებს. ამ მშობლებს ერთადერთი რამ სტკივათ, რომ მათი შვილები ბედნიერები იყვნენ”, – თქვა მან. რამდენიმე თვეა, რაც აქონდროპლაზიის მქონე ბავშვთა მშობლები საპროტესტო აქციებს მართავენ და ითხოვენ, სახელმწიფომ საქართველოში შემოიტანოს და დააფინანსოს ბავშვებისთვის აუცილებელი პრეპარატი Voxzogo. 2021 წელს პრეპარატ Voxzogo-ს (აქტიური ნივთიერება – ვიზოდორიტით) აშშ-ის წამლისა და საკვების ადმინისტრაციამ (FDA), ასევე ევროპის წამლის სააგენტომ (EMA) ავტორიზაცია მისცა. ეს პრეპარატი პირველია, რომელიც გამოიყენება სინდრომისა და მისგან გამოწვეული სიმპტომების სამკურნალოდ. მშობლები ამბობენ, რომ მისი მიღება ეფექტურია მხოლოდ გარკვეულ დრომდე, კერძოდ – 18 წლამდე. ჯანდაცვის სამინისტრო ამბობს, რომ თუ მიმდინარე წლის სექტემბრის ბოლომდე ევროკავშირის რამდენიმე ქვეყანაში დადასტურდება სახელმწიფოს მიერ პაციენტებისათვის ამ მედიკამენტით უზრუნველყოფა, საქართველო მზადაა, დაიწყოს მედიკამენტის შემოტანისთვის საჭირო პროცედურები. საქართველოს სახალხო დამცველ ლევან იოსელიანის თქმით, აქონდროპლაზიის მქონე ბავშვების საკითხი დროულად უნდა მოგვარდეს, რადგან ბავშვების ჯანმრთელობისთვის ყოველი დღე გადამწყვეტია. ნეტგაზეთი

მეტი სამუშაო და მეტი დრო სჭირდება „ვოსორიდიტის“ ქვეყანაში დანერგვის ეტაპების დადგენას, ასევე მოლაპარაკებას მწარმოებელთან და ჩვენ პარტნიორებთანაც, იმისთვის რომ ქვეყანაში პრეპარატის შემოტანა იყოს უსაფრთხო, – ამის შესახებ ჯანდაცვის მინისტრის მოადგილემ, თამარ გაბუნიამ განაცხადა. თამარ გაბუნიას თქმით, მედიკამენტმა დაადასტურა, რომ მას შეუძლია დადებითი ზეგავლენა ჰქონდეს ძვლის ზრდის ტემპზე და გარკვეული ზომიერი კლინიკური ეფექტი აქვს, რაც აღნიშნულია ევროპის სხვადასხვა ქვეყნის ჯანმრთელობის ტექნოლოგიების შეფასების ანგარიშებში, თუმცა იქვე არის აღნიშნული, რომ გრძელვადიანი შედეგები არ არის დადგენილი, შესაბამისად ამ მიმართულებით კვლევები გრძელდება. „ჩვენ ჯანმრთელობის მსოფლიო ორგანიზაციას ხშირად მივმართავთ სხვადასხვა შემთხვევებში. დღეს, იქიდან გამომდინარე, რომ „ვოსორიდიტი“ ადრეული ეტაპის პრეპარატია, ჯანმრთელობის მსოფლიო ორგანიზაციას მასთან მიმართებაში ჯერჯერობით არ აქვს არც რეკომენდაცია და არც გაიდლაინი სტანდარტული სახით შეტანილი არ არის. სწორედ ამიტომ არის მეტი სამუშაო და მეტი დრო სჭირდება „ვოსორიდიტის“ ქვეყანაში დანერგვის ეტაპების დადგენას, ასევე მოლაპარაკებას მწარმოებელთან და ჩვენ პარტნიორებთანაც, იმისთვის რომ ქვეყანაში პრეპარატის შემოტანა იყოს უსაფრთხო. ეს პროცესი დაიწყო უკვე რამდენიმე თვეა, ჩვენ აქტიურად ვმუშაობთ ამაზე და კიდევ გარკვეული ეტაპები უნდა გავიაროთ იმისთვის, რომ თამამად გადავდგათ „ვოსორიდიტის“ ქვეყანაში შემოტანის ნაბიჯი“, – აღნიშნა თამარ გაბუნიამ. ჯანდაცვის მინისტრის მოადგილის განცხადებით „ვოსორიდიტი“ ინოვაციური და პირველი მედიკამენტია, რომელიც აქონდროპლაზიისთვის გაჩნდა. მისივე თქმით, ძალიან დიდი ინტერესია დღეს ამ მედიკამენტის გარშემო და სწორედ ამით იხსნება ის ფაქტი, რომ ამერიკის წამლის სააგენტომ „ვოსორიდიტს“ მიანიჭა დაჩქარებული წესით ავტორიზაცია. თამარ გაბუნიამ აღნიშნა, რომ ავტორიზაცია, ქვეყნების დონეზე, უპირობოდ მის აღიარებას არ ნიშნავს, რადგან თითოეული ქვეყანა კიდევ უფრო დეტალურად სწავლობს მედიკამენტის მოსალოდნელ ეფექტსა და გვერდით რეაქციებს.

საქართველოს საგარეო საქმეთა სამინისტროს განცხადებით, სუდანში არსებული რთული და არაპროგნოზირებადი ვითარების გამო, ჯერ არ არის ცნობილი ზუსტი დრო, როდის მოხდება საქართველოს მოქალაქეების გამოყვანა. საგარეო უწყებაში განმარტავენ, რომ მუდმივ კონტაქტზე რჩებიან სუდანში მყოფ ქართველებთან. „საგარეო საქმეთა სამინისტრო, სხვადასხვა აქტორებთან ერთად, კვლავ აქტიურად მუშაობს სუდანიდან საქართველოს მოქალაქეების გამოყვანაზე, მაგრამ ვითარება არის უკიდურესად რთული და არაპროგნოზირებადი, გრძელდება შეტაკებები. შესაბამისად, ზუსტი დრო, როდის მოხდება საქართველოს მოქალაქეების გამოყვანა, არ არის ჯერ ცნობილი. ვრჩებით მუდმივ კონტაქტზე იქ მყოფ ქართველებთან“, – აღნიშნავენ საქართველოს საგარეო საქმეთა სამინისტროში. სუდანში ქვეყნის არმიასა და „სწრაფი მხარდაჭერის ძალების“ მებრძოლებს შორის დაპირისპირება 15 აპრილიდან მიმდინარეობს.

ერევანში გამართულ ევროპის ჩემპიონატზე ქართველმა მძიმეწონოსანმა ლაშა ტალახაძემ კონტინენტის ჩემპიონობა მეშვიდედ იზეიმა. ტალახაძემ ატაცში 210, 217 და 222 კგ დაძლია, რითიც ოქროს მედალი მოიპოვა. საქართველოს ნაკრების კიდევ ერთმა წევრმა ბაქარ თურმანიძემ 170 და 176 კგ დააფიქსირა და მეოთხე იყო. ლაშა ტალახაძემ აკვრაში ჯერ 246, შემდეგ კი 252 კგ დააფიქსირა და ოქროს მედლის მფლობელი გახდა. აკვრაში თურმანიძის შედეგი 210 და 216 კგ იყო, ის მეხუთე ადგილზე გავიდა. ორჭიდის ჯამში ტალახაძემ 474 კგ-ით ევროპის ჩემპიონის ტიტული მოიპოვა, ხოლო თურმანიძემ 392 კგ-ით მეხუთე ადგილი დაიკავა. ლაშამ ევროპის ჩემპიონატზე პირველი გამარჯვება 2016 წელს მოიპოვა. იგი მსოფლიოს ექვსგზისა და ოლიმპიური თამაშების ორგზის ჩემპიონია. ერევანში ევროპის ჩემპიონატის გახსნის საზეიმო ცერემონიაზე ტალახაძეს ევროპის 2022 წლის საუკეთესო ძალოსნის ტიტული გადაეცა. ეს იყო პირველი შემთხვევა, როდესაც ქართველი საუკეთესოდ საერთაშორისო სპორტულმა ჟურნალისტებმა აღიარეს. ერევანში საქართველოს ნაკრების წევრებმა სულ 17 სხვადასხვა სინჯის მედალი მოიპოვეს, მათგან შვიდი ოქროსია. ძალოსნობაში მსოფლიოს 2023 წლის ჩემპიონატი 2 დან 17 სექტემბრის ჩათვლით საუდის არაბეთში გაიმართება. ავტორი - ელენე ბილიხოძე

საფრანგეთმა სუდანიდან საკუთარი მოქალაქეების ევაკუაცია დაიწყო. ქვეყნის საგარეო საქმეთა სამინისტროს განცხადებით, სუდანის არმიამ და სწრაფი რეაგირების დაჯგუფებამ ფრანგულ მხარეს გარანტიები მისცეს, რომ ევაკუაცია უსაფრთხოდ განხორციელდება. საგარეო საქმეთა სამინისტროს მონაცემებით, სუდანში საფრანგეთის 250 მოქალაქე ცხოვრობდა. საფრანგეთთდან ერთად, სუდანიდან საკუთარი მოქალაქეების ევაკუაცია დაიწყო ნიდერლანდებმაც. შეგახსნებთ, მანამდე დიპლომატების და მათი ოჯახის წევრების ევაკუაცია განახორციელა ამერიკის შეერთებულმა შტატებმა. გავრცელებული ინფორმაციით, ამერიკელებმა სუდანი ექვსი სამხედრო თვითმფრინავით დატოვეს. ავტორი - თამთა რუხაძე

უკრაინის საგარეო საქმეთა მინისტრი დმიტრო კულება უკრაინასა და რუსეთს შორის მოლაპარაკებების დაწყების შესახებ ბოლო დროს გაკეთებულ მოწოდებებს გამოეხმაურა. კულება ამბობს, რომ მოლაპარაკებების შესახებ მსოფლიოს სხვადასხვა კუთხიდან გაკეთებულ განცხადებებში არ არის გათვალისწინებული ის ფაქტი, რომ რუსეთი მშვიდობისადმი მზაობის არანაირ დემონსტრირებას არ ახდენს. „მსოფლიოს არც ერთი ქვეყანა არ მიისწრაფვის მშვიდობისკენ ისე, როგორც უკრაინა, მაგრამ ასევე ვიცით, რომ ნამდვილი მშვიდობა უნდა იყოს სამართლიანი და გრძელვადიანი“, – განაცხადა კულებამ. კულებას თქმით, უკრაინული მხარე სამშვიდობო შეთავაზებებს განიხილავს და მიესალმება ნებისმიერ ინიციატივას, რომელიც გულისხმობს უკრაინის ტერიტორიული მთლიანობის პატივისცემას. „არ იქნება ნამდვილი მშვიდობა არც უკრაინისთვის და არც დანარჩენი მსოფლიოსთვის, თუ რუსეთი არ აიღებს სრულ პასუხისმგებლობას ჩადენილ დანაშაულზე“, – განაცხადა კულებამ. კულებას თქმით, ევროატლანტიკური უსაფრთხოების მომავალი ახლა უკრაინაში, ბრძოლის ველზე წყდება. ავტორი - თამთა რუხაძე

მეოთხე დღეა, აქონდროპლაზიის დიაგნოზის მქონე ბავშვების მშობლები მთავრობის ადმინისტრაციასთან ათენებენ. მათი მოთხოვნა უცვლელია - პრემიერმინისტრ ირაკლი ღარიბაშვილთან შეხვედრა და საქართველოში მათი შვილებისთვის საჭირო მედიკამენტის - VOXZOGO-ს შემოტანა და დაფინანსება. მშობლების ინფორმაციით, ქვეყანაში აქონდროპლაზიის დიაგნოზი 17 ბავშვს აქვს დასმული, მათგან მედიკამენტი 12-ს სჭირდება. იმის გათვალისწინებით, რომ მედიკამენტი ძვირადღირებულია და ერთწლიან დოზას 200 000$ სჭირდება, ამ დიაგნოზის მქონე ბავშვების ოჯახები მის დამოუკიდებლად შეძენას ვერ ახერხებენ. მნიშვნელოვანია, რომ მოთხოვნის დაკმაყოფილება დროში არ გაიწელოს, რადგან იმისთვის, რომ პრეპარატმა იმოქმედოს, ის ბავშვმა ზრდის ზონების დახურვამდე უნდა მიიღოს, დაახლოებით, 14 წლამდე. დაახლოებით, სამი თვეა, პროტესტს პერმანენტული ფორმა აქვს. მანამ, სანამ ამ გადაწყვეტილებას მიიღებდნენ, მშობლები ჯანდაცვის სამინისტროს წარმომადგენლებს შეხვდნენ, არაერთხელ მიიღეს დაპირებები, თუმცა, როგორც ტაბულასთან საუბარში ყვებიან, დაპირება დაპირებად დარჩა - საბოლოოდ, ჯანდაცვის სამინისტრო მათ ეუბნება, რომ VOXZOGO-ს სხვა ქვეყნების გამოცდილების მიხედვით შემოიტანენ და იზრუნებენ, რომ მის შესაძენად თანხა მომავალი წლის ბიუჯეტში გაიწეროს. შეთავაზება პროტესტის მონაწილეებისთვის მიუღებელია, რადგან მათი შვილებისთვის დღეებსა და თვეებს დიდი მნიშვნელობა აქვს. რას ჰპირდებოდა სამინისტრო მშობლებს? აქონდროპლაზიის დიაგნოზის მქონე ბავშვების მშობლებმა ჯანდაცვის სამინისტროს პირველად 2022 წელს, აპრილში მიმართეს - როგორც ერთ-ერთი მშობელი, ქეთევან ბეგიაშვილი გვიყვება, აცნობეს, რომ იშვიათი დაავადების ერთადერთმა მედიკამენტმა FDA-სა და EMA-ს ლიცენზია მიიღო და აშშ-ს ყველა შტატსა და ევროპის ქვეყნებში შევიდა. ჯანდაცვის სამინისტრომ ინფორმაცია თავად გადაამოწმა. "მიიღეს პასუხი, რომ არსებობს იშვიათი დაავადება აქონდროპლაზია და არსებობს მედიკამენტი ვოზორიტიდი. მას შემდეგ, ჩვენ კიდევ გავუგზავნეთ წერილი, მოგვმართეს, რომ ვინაიდან 2022 წლის ბიუჯეტი იყო დასრულებული, 2023 წლის ბიუჯეტისთვის აუცილებლად განიხილავდნენ და ამავდროულად გაეცნობოდნენ ყველა სიახლეს, რათა დაგვხმარებოდნენ". - გვიყვება ქეთევან ბეგიაშვილი. მიუხედავად დამაიმედებელი პასუხისა, მშობლები არ გაჩერებულან - შექმნეს პეტიციები, მიმართეს ფინანსთა სამინისტროს, პრეზიდენტს, საპატრიარქოს, პარლამენტსა და პარლამენტის ჯანდაცვის კომიტეტს. მშობლებმა არაერთხელ მიმართეს პრემიერმინისტრ ირაკლი ღარიბაშვილსაც - პირველ წერილზე მიიღეს პასუხი, რომ პრემიერმა მოთხოვნა ჯანდაცვის სამინისტროს გაუგზავნა. როგორც ქეთევან ბეგიაშვილი გვიყვება, მშობლების სახელით ჯანდაცვის დეპარტამენტის საზოგადოებრივი ჯანმრთელობის დაცვისა და პროგრამების სამმართველოს უფროს ეკატერინე ადამიას წერილობით მიმართა დეპუტატმა ლადო კახაძემ. "5 ოქტომბერს ეკატერინე ადამიამ წერილი მისწერა ლადო კახაძეს, რომ 2023 წლის ბიუჯეტში მოთხოვნილ იქნა აქონდროპლაზიის ერთადერთ მედიკამენტ ვოზორიტიდისთვის შესაძენი თანხები". - გვიყვება ბეგიაშვილი. პარალელურად, 2022 წლის 25 ოქტომბერს ჯანდაცვის კომიტეტის თავმჯდომარემ, ზაზა ლომინაძემ ჟურნალისტებს უთხრა, რომ იძიებდნენ პრეპარატის მწარმოებელ ფარმაცევტულ კომპანიას, რომელთანაც მოლაპარაკებას გამართავდნენ - სამინისტრო ბავშვებისთვის მედიკამენტის გადაცემას 2023 წლიდან გეგმავდა. "ჯანდაცვისა და სოციალურ საკითხთა კომიტეტს პარლამენტში პირველი მოსმენით ჰქონდა გასაუბრება ბატონ გიორგი კაკაურიძესთან, რომელმაც წარმოადგინა ჯანდაცვისა და სოციალურ საკითხთა სამინისტროს ბიუჯეტი. აქ, რა თქმა უნდა, აქტიურად იყო განხილული იმ 82 იშვიათი დაავადების დაფინანსება. მოთხოვნა არის 10 მილიონზე, ვნახოთ, რამდენზე შევჯერდებით ფინანსთა სამინისტროსთან. ფაქტია, რომ ჩვენ ვცდილობთ, მაქსიმალურად დავაფინანსოთ ყველა ეს იშვიათი დაავადება, მათ შორის, აქონდროპლაზია. არის მოძიება ფარმაცევტული კომპანიის, რომელიც აწარმოებს ამას [წამალს] და მასთან მოლაპარაკება გაიმართება. როდესაც მოხდება შესყიდვა, ეგრევე, 2023 წლიდან ვგეგმავთ, რომ ბავშვებმა მიიღონ ეს მედიკამენტი. ეს მედიკამენტი იქნება ამ ბავშვებისთვის, სულ რამდენიმე ბავშვია - მედიკამენტი რომ იყოს ბავშვებისთვის ხელმისაწვდომი, მას სახელმწიფო უფასოდ გადასცემს ამ ბავშვებსა და ოჯახებს". - ამბობდა ზაზა ლომინაძე. როგორც მშობელი გვიყვება, ზაზა ლომინაძის კომენტართან ერთად, მათთვის სასიხარულო იყო იშვიათი დაავადების ფონდის ბიუჯეტის ზრდაც - 22 მილიონის 30 მილიონამდე. 1 თვეში მშობლებმა პირველი უარი მიიღეს. "ნოემბერში ყველა გაჩუმდა. აღარავის ხმა აღარ ამოუღია. შემდეგ დავიწყეთ ქუჩაში გამოსვლები. პირველი არაოფიციალური უარი დეკემბერში გვითხრეს. გვითხრეს, რომ ჯერ ახალი მედიკამენტია და მისი დანერგვა პატარა სახელმწიფოსთვის, როგორიც საქართველოა, არ არის ადვილი. გვითხრეს, რომ ადვილი არაა ამ ძვირადღირებული მედიკამენტის შეძენა. მერე გამოვიდნენ და დაიწყეს ლაპარაკი, რომ გვერდითი მოვლენები აქვს". - გვიყვება მშობელი. ქეთევან ბეგიაშვილის თქმით, მას შემდეგ, რაც სამინისტრომ უარი მედიკამენტის გვერდითი მოვლენებით ახსნა, მშობლებმა ბავშვების მკურნალი ექიმების მოწვევა მოითხოვეს. მშობლებს ასევე ჰქონდათ რეცეპტი, რომელიც ჯანმრთელობის მძიმე მდგომარეობის მქონე ერთ-ერთ ბავშვს აჯიბადემის კლინიკაში თურქმა გენეტიკოსმა გამოუწერა. აქონდროპლაზიის დიაგნოზის მქონე ბავშვს წამალი ვოზორიტიდის 6-თვიანი მიღება ჰქონდა დანიშნული. "ქალბატონი თამარ გაბუნია დაინტერესდა ამ დოკუმენტით. თურქეთში ბავშვს ეუბნებოდნენ, რომ ვინაიდან არ იყო ქვეყნის მოქალაქე, წამალი უნდა შეესყიდა და ვერ დააფინანსებდნენ". - ამბობს ის. 2023 წლის 9 იანვარს მშობლებმა ჯანდაცვის სამინისტროს წარუდგინეს იმ ექიმების ხელმოწერებიც, რომლებიც, ბეგიაშვილის ინფორმაციით, განმარტავდნენ, რომ მედიკამენტი არის უსაფრთხო და ეფექტური - ექიმები ითხოვდნენ, შექმნილიყო მულტიდისციპლინარული საბჭო, რომელიც ბავშვებს მონიტორინგს გაუწევდა. დოკუმენს, რომელიც ბეგიაშვილმა მოგვცა, სხვა ექიმებს შორის ხელს აწერს იაშვილის კლინიკის დირექტორი, ივანე ჩხაიძეც, თუმცა, დღეს ჩხაიძის პოზიცია მედიკამენტზე განსხვავებულია. "ეს არ არის დაავადება, რომელიც გავლენას ახდენს ინტელექტუალურ განვითარებაზე, ეს არ არის დაავადება, რომელიც გავლენას ახდენს სიცოცხლის ხანგრძლივობაზე. ძირითადი აქცენტი, რაც კეთდება სხვადასხვა ქვეყანაში, ეს არის სხვადასხვა თანაარსებული დაავადებების აქტიური მართვა. არ არსებობს არცერთი ქვეყანა, რომელსაც ჰქონდეს რაიმე კონკრეტული პროტოკოლი ამ მედიკამენტთან დაკავშირებით ან იყოს სახელმწიფო დაფინანსება სრულად დაფარული". - თქვა მან 21 აპრილს იმედთან ინტერვიუში. "ივანე ჩხაიძე ახლა ჩვენს საწინააღმდეგოდ ლაპარაკობს. პირადად მე შემიძლია თვალებში შევხედო და ვუთხრა - მან მითხრა, რომ იაშვილის კლინიკას დამითმობდა ამ ბავშვებისთვის ყურადღების მისაქცევად. დღეს ყველაფერს უარყოფს". - გვეუბნება მშობელი. მრავალი დაპირებისა და არაერთხელ გაცრუებული იმედის შემდეგ, მშობლებმა აქციების გამართვა ჯერ ჯანდაცვის სამინისტროსთან, შემდეგ კი მთავრობის ადმინისტრაციასთან გადაწყვიტეს. მიუხედავად პრემიერთან შეხვედრის მოთხოვნისა, მათ მთავრობის ადმინისტრაციიდან ამ დრომდე არავინ დაკავშირებიათ. 20 აპრილს აქციის მონაწილე დედებს შეხვდა ჯანდაცვის მინისტრი, ზურაბ აზარაშვილი და მისი მოადგილე, თამარ გაბუნია და დაპირდნენ, რომ თუ 2023 წლის სექტემბერში ექნებათ ინფორმაცია, რომ რომელიმე ქვეყანამ დაფინანსება საკუთარ თავზე აიღო, ეცდებიან, რომ ვოზორიტიდის შემოტანა 2024-ის ბიუჯეტში იყოს გათვალისწინებული. "ჩვენთვის ყველა კარი დაიხურა. რა ვქნა მე? - ჩემი შვილი 14 წლის ხდება და ზრდის ზონები ძალიან მალე დაეხურება. მშობლებსაც გვაშტერებენ, ქართველ ექიმებსაც არ სცემენ პატივს, მარიონეტებად ჰყავთ ქცეული - დღეს ხელს აწერენ და ხვალ ეუბნებიან, უარყავიო. დედებს დაგვცინიან, სახელმწიფო დაგვცინის. ჩვენ გვერდით არ დგანან - არც პრემიერი, არც სახალხო დამცველი, არც პრეზიდენტი. მინისტრმა მითხრა, როგორ გგონია, მე ახლა თანხა აქ მილაგიაო?“. - ამბობს ქეთევან ბეგიაშვილი. დაპირების მიუხედავად, მშობლები ამბობენ, რომ არ აძლევენ ჯანდაცვის სამინისტროში გამართული შეხვედრის ჩანაწერსაც - „იმიტომ, რომ იქ არის ვაჭრობა მხოლოდ ფულზე“. ტაბულა

ევროკავშირი სანქციების ახალ პაკეტში აფართოებს რუსეთზე ტვირთების გატარების აკრძალვას. ამის შესახებ სააგენტო Bloomberg-ი წერს ახალი სანქციების საკითხებში გათვითცნობიერებულ ანონიმურ წყაროებზე დაყრდნობით. ვარაუდობენ, რომ მესამე ქვეყნებში რუსეთის გავლით ტვირთის გადაზიდვა მთლიანად არ აიკრძალება. შეზღუდვები, როგორც ჩანს, შეეხება ზოგიერთ ტექნოლოგიასა და ტექნიკის სახეობას. როგორც სააგენტო წერს, პოლონეთი, ესტონეთი და ლიეტუვა ევროკავშირისგან მოითხოვენ, მთლიანად აიკრძალოს რუსეთის გავლით ისეთი ტვირთების გადატანა, რომლებიც შესაძლოა გამოიყენონ რუსეთის სამხედრო-სამრეწველო მრეწველობამ, საავიაციო და კოსმოსურმა დარგებმა. ზუსტი სია სააგენტოს არ მოჰყავს. ადრე ჟურნალისტურ გამოძიებაში აღნიშნული იყო, რომ რუსეთის მოსაზღვრე ევროკავშირის ქვეყნებს გაეზარდათ საქონელბრუნვა ცენტრალური აზიის ქვეყნებთან. სავარაუდოდ ეს შეიძლება იმას მოწმობდეს, რომ ხდება შეზღუდვების გვერდის ავლა სანქციებში მოხვედრილი საქონლის ფიქციური გაგზავნით ამ ქვეყნებში. 2022 წელს რუსეთის რკინიგზის ქსელით ტვირთების გადაზიდვის მოცულობა 2021 წელთან შედარებით 3,9%-ით შემცირდა, იტყობინება „ინტერფაქსი“. ამასთან, „რუსეთის რკინიგზამ“ გამოაცხადა, რომ კონტეინერული ტვირთების ტრანზიტი შესაძლოა მეოთხედით შემცირდა. რადიო თავისუფლება

დღეს, 6 საათზე, მთავრობის კანცელარიასთან „მშობლების მარში“ გაიმართება. აქცია აქონდროპლაზიის სამკურნალო მედიკამენტების დაფინანსების მოთხოვნით გაიმართება. „აქონდროპლაზიის სამკურნალო მედიკამენტის მოთხოვნა გრძელდება. ვითხოვთ, სახელმწიფომ შეასრულოს პირობა და გამოყოს ბიუჯეტიდან თანხა მედიკამენტისთვის, რომელიც სასიცოცხლოდ მნიშვნელოვანი და სასწრაფოა ჩვენი შვილებისთვის.“ – ვკითხულობთ აქციის ანონსი. აქონდროპლაზიის მქონე ბავშვთა მშობლები საპროტესტო აქციებს რამდენიმე თვეა, მართავენ. მათი მოთხოვნაა, სახელმწიფომ საქართველოში შემოიტანოს და დააფინანსოს ბავშვებისთვის აუცილებელი პრეპარატი Voxzogo, რომელიც ავტორიზებულია აშშ-ის წამლისა და საკვების ადმინისტრაციის (FDA), ასევე ევროპის წამლის სააგენტოს (EMA) მიერ. ჯანდაცვის სამინისტროს განმარტებით, მედიკამენტთან დაკავშირებით, მწირი მონაცემების არსებობის გამო, მსოფლიოს განვითარებული ქვეყნები ფრთხილად ეკიდებიან აღნიშნულ საკითხს, რათა მაქსიმალურად გარანტირებული იყოს პაციენტის უსაფრთხოება. პუბლიკა

უკრაინის პრეზიდენტმა ვოლოდიმირ ზელენსკიმ ხელი მოაწერა კანონს უკრაინაში რუსული იმპერიული პოლიტიკის პროპაგანდის აკრძალვისა და ტოპონიმიკის დეკოლონიზაციის შესახებ. უკრაინული მედიის ცნობით, კანონი აკრძალავს უკრაინაში რუსეთის იმპერიული პოლიტიკის სიმბოლოების წარმოებას, გავრცელებასა და საჯარო გამოყენებას. რუსეთის იმპერიული პოლიტიკის სიმბოლოებში იგულისხმება: ძეგლები, რომლებიც ეძღვნებოდა იმ პირებს, რომლებსაც ეკავათ მაღალი თანამდებობები მთავრობასა და ადმინისტრაციაში, პოლიტიკურ ორგანიზაციებში, პარტიებში, რუსეთის სახელმწიფო ფორმირებების შეიარაღებულ ფორმირებებში და მონაწილეობდნენ ან წვლილი შეიტანეს რუსეთის იმპერიული პოლიტიკის განხორციელებაში; ძეგლები, რომლებიც ეძღვნება იმ პირებს, რომლებიც საჯაროდ უჭერდნენ მხარს, ადიდებდნენ ან ამართლებდნენ რუსეთის იმპერიულ პოლიტიკას, მოუწოდებდნენ რუსიფიკაციისკენ ან აღვივებდნენ უკრაინოფობიას; გეოგრაფიული ობიექტების და ადგილობრივი ტოპონიმიკის ობიექტების სახელები ზემოაღნიშნული პირების პატივსაცემად, ან სახელები რუსეთის ქალაქებისა და რუსეთის სხვა გეოგრაფიული, ისტორიული და კულტურული ობიექტების პატივსაცემად; ამ კანონის მოთხოვნების შესაბამისად, საჯარო ხელისუფლებამ და ადგილობრივმა თვითმმართველობის ორგანოებმა საჯარო სივრციდან უნდა ამოიღონ რუსული იმპერიული პოლიტიკის განხორციელებაში მონაწილე პირებისადმი მიძღვნილი ძეგლები, ასევე გადაარქვან სახელები ქუჩებს, მოედნებს, პარკებს, სკვერებს, გეოგრაფიული ობიექტებს, რომლებიც შეიცავს რუსეთის იმპერიული პოლიტიკის სიმბოლოებს. იურიდიულმა პირებმა, პოლიტიკურმა პარტიებმა, მოქალაქეთა სხვა გაერთიანებებმა, რომლებსაც აქვთ რუსეთის იმპერიული პოლიტიკის სიმბოლოები ან ნორმატიული დოკუმენტები, კანონის ძალაში შესვლიდან ერთი თვის ვადაში მასთან შესაბამისობაში უნდა მოიყვანონ სახელწოდებები და დოკუმენტები. გარდა ამისა, კანონი ითვალისწინებს, რომ გეოგრაფიულმა ობიექტებმა, რომლებსაც აქვთ რუსიფიცირებული სახელები (კერძოდ, Южное, Северодонецк, Южноукраинск) თავიანთი სახელები უნდა შეესაბამონ უკრაინულ მართლწერას ან დაიბრუნონ ისტორიული სახელი. კანონი ძალაში შედის გამოქვეყნებიდან სამი თვის შემდეგ, ამ დროის განმავლობაში მინისტრთა კაბინეტმა უნდა მოამზადოს მარეგულირებელი ჩარჩო მისი დებულებების განსახორციელებლად. ნეტგაზეთი

აქონდროპლაზიის მქონე ბავშვების მშობლები კანცელარიასთან მთავრობის ადმინისტრაციასთან უწყვეტ პროტესტს აგრძელებენ. მშობლების მთავარი მოთხოვნაა, სახელმწიფომ საქართველოში შემოიტანოს და დააფინანსოს ბავშვებისთვის აუცილებელი პრეპარატი. „ლელოს“ ლიდერმა მამუკა ხაზარაძემ დღეს მთავრობას აქონდროპლაზიის მქონე ბავშვებისთვის მედიკამენტის შესაძენად სპეციალური ფონდის შექმნისკენ მოუწოდა და მზადყოფნა გამოთქვა, ფონდის დაფინანსებისთვის პირველი შენატანი 100 000 ლარის ოდენობით თავად გააკეთოს. „ხაზარაძის 100 000-ს აზრი მაშინ ექნება, თუკი მთავრობა შექმნის ფონდს და ბიუჯეტიდან ნაწილს მაინც გამოყოფს, გრძელვადიან ლოჯისტიკას და პასუხისმგებლობას თავის თავზე აიღებს. სხვა მხრივ, ჩვენ გვაწვება ტვირთად ამ თანხის მენეჯმენტი და მოკლე ვადაში უკვე ჩიხში შევყავართ“, — წერს აქციის მონაწილე მაკუნა გოჩიაშვილი. მისი თქმით, მშობლები პრინციპულად არ აპირებენ თანხის შეგროვებას მედიკამენტების შესაძენად და ამის მენეჯმენტი მხოლოდ სახელმწიფოს ორგანიზებით არის შესაძლებელი. რამდენიმე თვეა, რაც აქონდროპლაზიის მქონე ბავშვთა მშობლები საპროტესტო აქციებს მართავენ და ითხოვენ, სახელმწიფომ საქართველოში შემოიტანოს და დააფინანსოს ბავშვებისთვის აუცილებელი პრეპარატი Voxzogo. 2021 წელს პრეპარატ Voxzogo-ს (აქტიური ნივთიერება – ვიზოდორიტით) აშშ-ის წამლისა და საკვების ადმინისტრაციამ (FDA), ასევე ევროპის წამლის სააგენტომ (EMA) ავტორიზაცია მისცა. ეს პრეპარატი პირველია, რომელიც გამოიყენება სინდრომისა და მისგან გამოწვეული სიმპტომების სამკურნალოდ. მშობლები ამბობენ, რომ მისი მიღება ეფექტურია მხოლოდ გარკვეულ დრომდე, კერძოდ – 18 წლამდე. ჯანდაცვის სამინისტრო ამბობს, რომ თუ მიმდინარე წლის სექტემბრის ბოლომდე ევროკავშირის რამდენიმე ქვეყანაში დადასტურდება სახელმწიფოს მიერ პაციენტებისათვის ამ მედიკამენტით უზრუნველყოფა, საქართველო მზადაა, დაიწყოს მედიკამენტის შემოტანისთვის საჭირო პროცედურები. საქართველოს სახალხო დამცველ ლევან იოსელიანის თქმით, აქონდროპლაზიის მქონე ბავშვების საკითხი დროულად უნდა მოგვარდეს, რადგან ბავშვების ჯანმრთელობისთვის ყოველი დღე გადამწყვეტია. ნეტგაზეთი

ავიაკომპანია „ჯეო სქაის“ ხელმძღვანელი შალვა კიკნაძე აცხადებს, რომ კომპანიის თანამშრომლები, რომლებიც სუდანში იმყოფებიან ამ ეტაპზე თავს უსაფრთხოდ გრძნობენ. როგორც კიკნაძემ საქართველოს პირველ არხს განუცხადა, ავიაკომპანია ელოდება დასტურს, რომ თანამშრომლების შენობიდან გასვლა უსაფრთხოა, რის შემდეგაც დაიწყება მათი ევაკუაცია. „ჩემი თანამშრომლების ინფორმაციით, სუდანში დღეს დილიდან სროლები შეწყვეტილია. ვრცელდება სხვადასხვა ინფორმაცია, თითქოს დაიწყეს ევაკუაცია სხვადასხვა ქვეყნის საელჩოებმა. ჩვენ მუდმივ კავშირზე ვართ საგარეო საქმეთა სამინისტროსთან და ველოდებით უკვე ოფიციალურ დადასტურებას, რომ მხარეები საბოლოოდ შეთანხმდნენ და შესაძლებელია შენობიდან გამოსვლა. ველოდებით გაერო-დან დადასტურებას, რომ ერთობლივი ევაკუაცია განხორციელდეს. ჩვენ შემთხვევაში, უნდა მოხერხდეს საჰაერო ხომალდთან მისვლა, დათვალიერება და ამის შემდეგ მივიღებთ გადაწყვეტილებას მოვფრინავთ თუ ალტერნატიული გზით ვახორციელებთ ჩვენი თანამშრომლების ევაკუაციას. ეს დამოკიდებულია უსაფრთხო დერეფანზე, თუ გვექნება ოფიციალური დადასტურება, რომ შესაძლებელია შენობის დატოვება. ყოველ წუთს ველოდებით პასუხს. 72-საათიანი ზავი დაიწყო პარასკევს, მაგრამ სამწუხაროდ, არ შეუწყვეტიათ სროლა, ეს ზავი ჯერ კიდევ ძალაშია, თუ არ ჩავთვლით, რომ პარასკევი და შაბათი მაინც ისროდნენ. ჩვენს თანამშრომლებს არანაირი პრობლემა არ აქვთ, წყალი საკვები აქვთ, ელოდებიან, რაც შეიძლება სწრაფად გამოვიდნენ“, – განაცხადა შალვა კიკნაძემ. სუდანში ქვეყნის არმიასა და „სწრაფი მხარდაჭერის ძალების“ მებრძოლებს შორის დაპირისპირება 15 აპრილიდან მიმდინარეობს. ავტორი - თეო ბარბაქაძე

სუდანში სროლისა და აფეთქების ხმა ისმის, დედაქალაქ ხართუმში მოსახლეობის დიდ ნაწილს ელექტროენერგია და წყალი არ მიეწოდება. სუდანიდან რამდენიმე საათის წინ ამერიკელი დიპლომატების და მათი ოჯახის წევრების ევაკუაცია განხორციელდა. ამ ინფორმაციას თავად ამერიკის პრეზიდენტი ჯო ბაიდენი ადასტურებს. „დღეს, ჩემი ბრძანებით, შეერთებული შტატების სამხედროებმა ჩაატარეს ოპერაცია ხართუმიდან ამერიკის მთავრობის პერსონალის გამოყვანის მიზნით“, – აღნიშნულია ბაიდენის განცხადებაში. გავრცელებული ინფორმაციით, სუდანი 100-მდე ამერიკის მოქალაქემ სამი ვერტმფრენით დატოვა. შეგახსენებთ, ეს სუდანიდან უცხო ქვეყნის მოქალაქეების უკვე მეორე ევაკუაციაა. სუდანის დედაქალაქში არმიასა და გასამხედროებულ დაჯგუფება „სწრაფი მხარდაჭერის ძალებს“ შორის შეტაკებები გასულ კვირას დაიწყო. ავტორი - თამთა რუხაძე

რუსეთი ქვეყნიდან 20-ზე მეტი გერმანელი დიპლომატის გაძევებას გეგმავს. რუსული მედიის ინფორმაციით, ამის შესახებ ქვეყნის საგარეო საქმეთა სამინიტროს პრესსპიკერმა, მარია ზახაროვამ განაცხადა. მისივე თქმით, აღნიშნული გადაწყვეტილება გერმანიიდან რუსეთის დიპლომატიური მისიის თანამშრომლების გაძევების საპასუხოდ მიიღეს. მანამდე, რუსულმა მედიამ გაავრცელა ინფორმაცია, რომ გერმანიის ხელისუფლებამ ქვეყნიდან რუსი დიპლომატების მასობრივი გაძევების გადაწყვეტილება მიიღო. რუსეთის საგარეო უწყების შეფასებით, ამ ნაბიჯით ბერლინი რუსეთ-გერმანიის ურთიერთობების განადგურების კურსს აგრძელებს. იპნ

24-25 აპრილს, პრაღაში (ჩეხეთის რესპუბლიკა) ევროკავშირის პარლამენტების სპიკერების ყოველწლიური კონფერენცია (EUSC) გაიმართება. ამის შესახებ ინფორმაციას საქართველოს პარლამენტი ავრცელებს. მათივე ცნობით, ღონისძიების ფარგლებში დაგეგმილია საქართველოს პარლამენტის თავმჯდომარის სიტყვით გამოსვლა. ასევე, შალვა პაპუაშვილის ორმხრივი შეხვედრები იგეგმება, როგორც ჩეხეთის რესპუბლიკის მთავრობის წარმომადგენლებთან, ისე პარლამენტის წევრებთან. „საქართველოს პარლამენტის თავმჯდომარე ევროკავშირის წევრი ქვეყნების პარლამენტების სპიკერებთან შეხვედრებს გამართავს. ვიზიტში, შალვა პაპუაშვილთან ერთად, ევროპასთან ინტეგრაციის კომიტეტის თავმჯდომარე, მაკა ბოჭორიშვილი მონაწილეობს. წელს, კონფერენციის განხილვის მთავარი თემა უკრაინის წინააღმდეგ რუსული აგრესია და ფართო გეოპოლიტიკურ კონტექსტში, ევროკავშირის რეაგირება იქნება. ყოველწლიური ფორუმი, მიზნად ისახავს პარლამენტარიზმის როლის გაძლიერებას საერთაშორისო დონეზე“, - ნათქვამია გავრცელებულ განცხადებაში. იპნ

უკრაინის შეიარაღებულმა ძალებმა, სავარაუდოდ, ხერსონის ოლქის მარცხენა (აღმოსავლეთ) სანაპიროზე შესვლა მოახერხეს, - „ომის შემსწავლელი ინსტიტუტის“ ანალიტიკოსების შეფასებით ამას რუსი სამხედრო კორესპონდენტებისა და ბლოგერების მიერ 22 აპრილს გამოქვეყნებული გეოლოკაციური კადრები აჩვენებს. ფოტოების მიხედვით, უკრაინის შეიარაღებულმა ძალებმა დაიკავეს პოზიციები ოლეშკის ჩრდილოეთით დნეპრის ნაპირებზე (ქალაქ ხერსონიდან დაახლოებით 7 კმ სამხრეთ-დასავლეთით) და დასახლებული პუნქტის ჩრდილოეთის გარეუბანში, ასევე სოფელ დაჩის დასავლეთით (ხერსონიდან სამხრეთით 10 კმ) წინსვლა შეძლეს. „კიდევ ერთი სამხედრო საბრძოლო მოქმედებების რუკის თანახმად, რუსული ძალები, 22 აპრილის მდგომარეობით, არ აკონტროლებენ ზოგიერთ კუნძულს მდინარე დნიპროს დელტაში, ხერსონის სამხრეთ-დასავლეთით, რაც მიუთითებს უკრაინელების შესაძლო წინსვლაზე ამ კუნძულებზე“, - აცხადებენ ორგანიზაციაში. ანალიტიკოსების შეფასებით, უკრაინის შეიარაღებულმა ძალებმა ხერსონის ოლქის აღმოსავლეთ სანაპიროზე უპირატესობის მოპოვება, შესაძლოა, რუსული ჯარების საარტილერიო ცეცხლის დაბალი ინტენსივობის გამო შეძლეს. მანამდე ზოგიერთი რუსი „სამხედრო კორესპონდენტი“ აცხადებდა, რომ საარტილერიო ცეცხლის დაბალი ინტენსივობა რუსული სამხედრო სარდლობის გადაჭარბებული ცენტრალიზაციით იყო გამოწვეული. ამავდროულად, „ომის შემსწავლელი ინსტიტუტის“ ანალიტიკოსები მიიჩნევენ, რომ რუსული ძალები, შესაძლოა, პრიორიტეტს ანიჭებენ თავდაცვის შენარჩუნებას ისეთ ქალაქებში, როგორიცაა ოლეშკი და ნოვა კახოვკა. პალიტრა