tvati

A კატეგორიის იმ ტაქსებს, რომელთა ავტომობილის ასაკი 10 წელს არ აღემატება, 1-ელი ივნისიდან ავტობუსის ზოლში მოძრაობა თბილისის 19 ქუჩასა და გამზირზე შეეძლებათ, ხოლო 5 ქუჩა/გამზირზე გადაადგილებას ვერ შეძლებენ. როგორც "ინტერპრესნიუსს" თბილისის მერიიდან აცნობეს, 10 წელზე მეტი ასაკის A კატეგორიის ტაქსის მძღოლებს ავტობუსის ზოლში მოძრაობა თბილისის იმ 5 ქუჩაზე არ შეეძლებათ, სადაც საზოგადოებრივი ტრანსპორტი მოძრაობს სხვა ავტოსატრანსპორტო საშუალებების მოძრაობის საპირისპირო მიმართულებით. ესენია - ილია ჭავჭავაძის გამზირი, პეტრე მელიქიშვილის გამზირი, მერაბ კოსტავა ქუჩის ნაწილი, ილია ვეკუასა და ომარ ხიზანიშვილის ქუჩები. რაც შეეხება იმ ქუჩების ჩამონათვალს, სადაც ავტობუსის ზოლი სხვა სატრანსპორტო საშუალებების მოძრაობის მიმართულებითაა და ტაქსის მძღოლებს მხოლოდ ამ ავტობუსის ზოლზე შეუძლიათ გადაადგილება, ასე გამოიყურება: მოსკოვის გამზირი; ჯავახეთის ქუჩა; ვიქტორ კუპრაძის ქუჩა; სესილია თაყაიშვილის ქუჩა; ნიკოლოზ ბარათაშვილის აღმართი; ქეთევან დედოფლის გამზირი; გრიგოლ ორბელიანის მოედანი; რუსთაველის გამზირი; თამარ მეფის გამზირი; ჟიული შარტავას ქუჩა; ანა კალანდაძის ქუჩა; პეკინის გამზირი; ალექსანდრე ყაზბეგის გამზირი; მიხეილ თამარაშვილის ქუჩა; ქაქუცა ჩოლოყაშვილის გამზირი; ზურაბ ანჯაფარიძის (ყოფილი სანდრო ეულის) ქუჩა; გრიგოლ რობაქიძის გამზირი; მირიან მეფის ქუჩა; პეტრე იბერის ქუჩა. ამასთან, მერიის ინფორმაციით, A კატეგორიის იმ ტაქსების ოდენობა, რომელთა ასაკი 10 წელს აღემატება, 3500-ს შეადგენს. palitranews

მიგვაჩნია, რომ საქართველოს მომავალი წევრობა ევროკავშირსა და ნატო-ში არის არა მხოლოდ საქართველოს, არამედ ტრანსატლანტიკური გაერთიანების/საზოგადოების ინტერესიც. ევროპისთვის ეს არის შანსი და არა საფრთხე, –ამის შესახებ პოლონეთის საგარეო საქმეთა მინისტრმა ზბიგნევ რაუმ საგარეო საქმეთა მინისტრ, ილია დარჩიაშვილთან გამართული შეხვედრის შემდეგ განაცხადა. მისივე თქმით, დღევანდელი სამუშაო ვიზიტი თბილისში ინტენსიური დიპლომატიური და პოლიტიკური კომუნიკაციის ელემენტი და გამოხატულებაა. "მიგვაჩნია, რომ საქართველოს მომავალი წევრობა ევროკავშირსა და ნატო-ში არის არამხოლოდ საქართველოს, არამედ ტრანსატლანტიკური გაერთიანების/საზოგადოების ინტერესშიც. ევროპისთვის ეს არის შანსი და არა საფრთხე. იმისთვის, რომ ეს შანსი გამოვიყენოთ და საქართველომ შეძლოს შემდგომი ნაბიჯის გადადგმა ევროკავშირსა და ნატო-ში გაწევრიანებისკენ, აუცილებელია გაფართოებაში მონაწილე ყველა მხარის - როგორც ევროპული და ტრანსატლანტიკური ინსტიტუტების, ისე საქართველოს მთავრობისა და საქართველოს საზოგადოების ჩართულობა და ძალისხმევა. გვიახლოვდება ვილნიუსის, ნატო-ს სამიტი და წლის ბოლომდე ევროკავშირმა შესაძლოა, მიიღოს გადაწყვეტილება საქართველოსთვის ევროკავშირის კანდიდატი ქვეყნის სტატუსის მინიჭების შესახებ. აქედან გამომდინარე, აქტიურდება დაინტერესებულ მხარეთა დიპლომატიური ქმედებები, მათ შორის, ჩვენი პარტნიორების მხრიდან ვაიმარის სამკუთხედიდან. ცოტა ხნის წინ, საქართველოში შედგა გერმანიის საგარეო საქმეთა მინისტრის ვიზიტი და უახლოეს მომავალში დაგეგმილია საფრანგეთის საგარეო საქმეთა მინისტრის ვიზიტიც. ჩემი დღევანდელი სამუშაო ვიზიტი თბილისში დიპლომატიური და პოლიტიკური ინტენსიური კომუნიკაციის ელემენტი და გამოხატულებაა. მისი მიზანია საქართველო-პოლონეთის ტრადიციული მეგობრული სულისკვეთებით განვიხილოთ გამოწვევები, პრობლემები და შანსები, ასევე, პრობლემების გადაჭრის შესაძლებლობები, მათ შორის, პოლონეთის ჩართულობა გამოსავლის ძიების პროცესში," - აღნიშნა მინისტრმა. IPN

აქონდროპლაზიის დიაგნოზის მქონე ბავშვებისთვის პრეპარატის დაფინანსებით მოთხოვნით აქცია 29 აპრილს 15:00 საათზე მთავრობის ადმინისტრაციასთან გაიმართება: „მშობლები უკვე წელიწადნახევარია ველაპარაკებით სახელმწიფოს.წელიწადნახევარი გავიდა უშედეგო საუბარში. სახელმწიფოს გულგრილობამ მშობლები ქუჩაში გამოგვიყვანა. ჩვენ, კვირაზე მეტია, ღია ცის ქვეშ, ვათევთ ღამეს კანცელარიასთან, და ვითხოვთ ელემენტარულს – ყურადღებას ხელისუფლებისგან. ყურადღების ნაცვლად, მშობლები პასუხად ვიღებთ დეზინფორმაციის, დისკრედიტაციის და ცილისწამების კამპანიას! ეს არის ხელისუფლების წარმოუდგენლად სამარცხვინო მოპყრობა საკუთარ მოქალაქეებთან, მშობლებთან, დედებთან და არის ჩვენი, თითოეული ადამიანის ღირსების შემლახავი. ჩვენ უწყვეტად ვაგრძელებთ ჩვენს პროტესტს, ვითხოვთ ჩვენი შვილებისთვის კრიტიკულად მნიშვნელოვან წამალს, Voxzogo/Vosoritide, რომელიც ევროკავშირსა და ამერიკაში ლიცენზირებული და დამტკიცებულია. ჩვენ მთელი ძალით გვიპირისპირდება სახელისუფლებო პროპაგანდა. ახლა გვჭირდება თქვენი გვერდში დგომა მოქალაქეებო, მეგობრებო, მშობლებო, ექიმებო, მასწავლებლებო, სტუდენტებო, მოდით შაბათს კანცელარიასთან სამ საათზე, დაგვეხმარეთ შვილების გადარჩენაში“ — აცხადებენ აქონდროპლაზიის დიაგნოზის მქონე ბავსვების მშობლები. აქონდროპლაზიის დიაგნოზის მქონე ბავშვების მშობლები უკვე რამდენიმე თვეა საპროტესტო აქციებს მართავენ და საქართველოში მათი შვილებისთვის საჭირო მედიკამენტის შემოტანასა და სახელმწიფოს დაფინანსებას ითხოვენ. ამ მოთხოვნით დედები უკვე ერთი კვირაა მთავრობის ადმინისტრაციის შენობასთან 24- საათიან რეჟიმში იმყოფებიან და პრემიერ-მინისტრ ირაკლი ღარიბაშვილთან შეხვედრას ითხოვენ. მშობლების მოთხოვნის საპასუხოდ, ირაკლი ღარიბაშვილმა 24 აპრილის მთავრობის სხდომაზე განაცხადა, რომ წამლის დაფინანსების პრობლემა ქვეყანაში არ დგას, რადგან საუბარია დაახლოებით 10 მილიონზე. თუმცა მთავრობა ამ ნაბიჯს ჯერ არ გადადგამს, რადგან მას პრეპარატის შემოსატანად დამატებითი სამედიცინო მტკიცებულებები სჭირდება. საუბარია პრეპარატ Voxzogo-ს (აქტიური ნივთიერება – ვოსორიდიტი), რომელსაც 2021 წელს აშშ-ის წამლისა და საკვების ადმინისტრაციამ (FDA), ასევე ევროპის წამლის სააგენტომ (EMA) ავტორიზაცია მისცა. ეს პრეპარატი პირველია, რომელიც გამოიყენება სინდრომისა და მისგან გამოწვეული სიმპტომების სამკურნალოდ. მშობლები ამბობენ, რომ მისი მიღება ეფექტურია მხოლოდ გარკვეულ დრომდე, კერძოდ – 18 წლამდე. netgazeti

საქართველოს პროკურატურის ინფორმაციით, ოჯახში ძალადობის ბრალდებით დააკავეს რენატა ბეგიაშვილის ქმარი. პროკურატურის ინფორმაციით, ბრალდებულმა 22 აპრილს ქალზე ფიზიკურად იძალადა, რა დროსაც, სახის არეში მიაყენა დაზიანებები. სამართალდამცველებმა დანაშაულის ჩამდენი პირი 25 აპრილს დააკავეს. მას ბრალდება საქართველოს სისხლის სამართლის კოდექსის 126 პრიმა მუხლის პირველი ნაწილით (ოჯახის ერთი წევრის მიერ ოჯახის სხვა წევრის მიმართ ძალადობა, რამაც ფიზიკური ტკივილი გამოიწვია) წარედგინა. უწყების თქმით, პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით, სასამართლოს კანონით დადგენილ ვადაში მიმართავს. 24 აპრილს რენატა ბეგიაშვილმა საკუთარ ფეისბუკ გვერდზე ფოტო გამოაქვეყნა. ფოტოსთან ერთად, ქალი ჰყვებოდა, რომ მასზე ქმარმა იძალადა. netgazeti

ლუნდის უნივერსიტეტის მედიცინის ფაკულტეტის პროფესორმა, ზაალ კოკაიამ გიორგი თარგამაძის ფორმულას ეთერში აქონდროპლაზიის დიაგნოზის მედიკამენტის შესახებ ისაუბრა - მისი თქმით, პრეპარატი შვედეთში დარეგისტრირებულია და საჭიროების შემთხვევაში გამოიყენება. "მე გიდასტურებთ, რომ ეს პრეპარატი დარეგისტრირებულია შვედეთში, გაყიდვაშიც არის და გიდასტურებთ იმას, რომ ნებისმიერი მკურნალობა, რაც ტარდება შვედეთის ტერიტორიაზე, შვედეთის მოქალაქეებისთვის, ბავშვებისთვის 18 წლამდე აბსოლუტურად ნებისმიერი მკურნალობა არის უფასო და სახელმწიფო დაზღვევა აფინანსებს ამას სრულად", - აღნიშნა მან. მისივე განცხადებით, კომპანია ბიომარინმა, რომელიც პრეპარატის შექმნაზე მუშაობდა, 8 სამედიცინო კლინიკური კვლევა ჩაატარა. ის აღნიშნავს, რომ მსგავსი სარწმუნო კვლევებისა და მონაცემების საფუძველზე, ამერიკამ მედიკამენტი დაჩქარებული წესით მიიღო. "ასევე ევროკავშირის ტერიტორიაზე [იყენებენ], ასევე, თავისუფლად შვედეთშიც დარეგისტრირებულია ეს პრეპარატიც და საჭიროების შემთხვევაში გამოიყენება. ერთი საინტერესო კვლევა ჩატარდა, რომელიც მარტში გამოქვეყნდა - მინდა ხაზი გავუსვა, რომ ეს იშვიათი დაავადებაა და იშვიათი დაავადებების კვლევა, როგორც წესი, ევროპაში როცა ხდება, ქვეყნები ერთიანდება, რომ სათანადო რაოდენობის პაციენტები და მონაცემები ჩართონ, ზუსტად 6 ქვეყნის სამედიცინო დაწესებულებაში ჩატარდა ეს კვლევა და დადგინდა, რომ ამ დაავადების მქონე პაციენტებში ცხოვრების ხარისხი მნიშვნელოვნად დაქვეითებულია. ასევე, კლინიკური სიმპტომები, რომლებიც გამოვლინდა, ეს არის ქრონიკული ტკივილები, სუნთქვის პრობლემები და მრავალი სხვა, დაკავშირებულია ზუსტად ამ ცხოვრების ხარისხის მკვეთრ დაქვეითებასთან. ასევე, ძალიან მნიშვნელოვანია, რომ ამერიკამ დაჩქარებული წესით მიიღო ეს პრეპარატი, რაც მიუთითებს საჭიროებაზე ამ პრეპარატის გამოყენების და სარწმუნოებაზე. იმ მონაცემებზე დაყრდნობით, რომელზეც ეს პრეპარატი მიიღეს, მიუთითებს, რომ თუკი ამ ორგანიზაციისთვის - რომელიც ზოგიერთი პრეპარატის დამტკიცებას წლები უნდება - მე არანაირი ეჭვი არ მაქვს, რომ ეს პრეპარატი ეფექტურია", - განაცხადა მან. დღეს დაავადებათა კონტროლის ეროვნულ ცენტრში იშვიათი დაავადებების საკითხზე მომუშავე საკოორდინაციო საბჭოს შეხვედრა გაიმართა. შეხვედრის თემა აქონდროპლაზიას ეხებოდა, კერძოდ, პრეპარატ ვოზორიტიდის დანერგვის ეტაპებს და ამ მიმართულებით, საერთაშორისო გამოცდილებას. ჯანდაცვის ორგანიზაციის საქართველოს ოფისის წარმომადგენელმა სილვიუ დომენტემ კომენტარი გააკეთა და თქვა, რომ პრეპარატის დასამტკიცებლად "რამდენიმე გადაწყვეტილებაა მისაღები, რთული პროცესია". აქონდროპლაზიის დიაგნოზის მქონე ბავშვების მშობლები მე-9 დღეა, მთავრობის კანცელარიასთან ღამეს ათევენ - ისინი მოითხოვენ, სახელმწიფომ ბიუჯეტიდან მედიკამენტისთვის საჭირო თანხები გამოყოს, რათა ბავშვებმა მკურნალობა შეძლონ. სახელმწიფოსგან მიტოვებული მშობლები შვილებისთვის 19 აპრილს აქონდროპლაზიის დიაგნოზის მქონე ბავშვების მშობლებს ჯანდაცვის მინისტრი ზურაბ აზარაშვილი შეხვდა, თუმცა შეხვედრა მშობლებისთვის უშედეგო აღმოჩნდა. ერთ-ერთმა მშობლემა შეხვედრის დასრულების შემდეგ თქვა, რომ მინისტრი მის მიერ გაკეთებულ განცხადებებში ცრუობს. მისივე თქმით, სხდომაზე არ მიეცათ კონკრეტული კითხვების დასმის შესახლებლობა და მინისტრმა მხოლოდ მისთვის საჭირო შეკითხვებს უპასუხა. შეხვედრის შემდეგ ზურაბ აზარაშვილმა ჟურნალისტებთან თქვა, რომ მშობლებს დეტალურად გააცნო საკოორდინაციო საბჭოს მიერ მიღებული გადაწყვეტილება. მინისტრი ირწმუნება, რომ არც ერთ ქვეყანაში მედიკამენტ ვოზორიტიდის სახელმწიფო ბიუჯეტიდან დაფინანსება არ ხდება. აქონდროპლაზია ყველაზე გავრცელებული ფორმაა სკელეტური დისპლაზიისა [ძვლოვანი სტრუქტურის ზრდის შეფერხება, ანომალიური განვითარება]. იგი 40000-ში ერთ ახალშობილს უდგინდება და ხასიათდება კიდურების ზრდის შეფერხებით და იწვევს ხერხემლისა და თავის ქალის ანომალიურ განვითარებას. მედიკამენტ ვოზორიტიდს შეუძლია დაეხმაროს აქონდროპლაზიის მქონე ადამიანებს. ამ მედიკამენტით ამერიკასა და ევროპაში უკვე სარგებლობენ. ის ბოჭავს სპეციფიკურ რეცეპტორს, რომელსაც ეწოდება ნატრიურეზული პეპტიდური რეცეპტორ-B, რომელიც ამცირებს ზრდის რეგულაციის გენის აქტივობას და ასტიმულირებს ძვლის ზრდას. კომპანია BioMarin, რომელმაც შექმნა წამალი ვოზორიტიდი და რომლის მედიკამენტიც VOXZOGO (vosoritide) დადასტურებულია, როგორც ამერიკის სურსათისა და წამლის სააგენტოს (FDA)-ის ასევე ევროკავშირში სამედიცინო პროდუქტების ზედემხედველის - ევროპის მედიცინის სააგენტოს (EMA) მიერ, წამლით 1-წლიანი მკურნალობის საშუალო ფასად 2021 წელს $300 000 დოლარს ასახელებდა. formulanews

„მოვდივარ“ — ამ სახელწოდების აქცია-შეკრებას აანონსებს გიორგი გაჩეჩილაძე („უცნობი“) 30 აპრილს. ანონსის მიხედვით, აქცია 18:00 საათზე რესპუბლიკის მოედანზე გაიმართება. სარეკლამო ბანერად აქციისა, რომლის სლოგანია „არა ომს — მშვიდობა ჩვენს ქვეყანას“, უცნობის გვერდი სოციალურ ქსელში იყენებს რუსეთ-საქართველოს ომის გმირის, გიორგი ანწუხელიძის შვილის ფოტოს. გიორგი ანწუხელიძის ცოლი მაკა ჩიკვილაძე აცხადებს, რომ მისი შვილების ფოტოების გამოყენება აქციის მოწოდებებში არასწორია. „15 წელი გავიდა 2008 წლის აგვისტოს ომიდან. ამ ომში მონაწილე ჩვენი ჯარისკაცები საკუთარი სიცოცხლით, რისკის ფასად იცავდნენ სამშობლოს, ღირსებას, თავისუფლებას. ესაა ჯარისკაცის ვალი, რომელიც ჩემმა მეუღლემ ღირსეულად მოიხადა. მიუხედავად ჩემი პირადი ტრაგედიისა, არასოდეს მიფიქრია, რომ გიორგის სხვაგვარად შეეძლო მოქცევა ან მოიქცეოდა, დღეს ცოცხალი რომ ყოფილიყო და სამშობლოს კვლავ დასჭირვებოდა მისი სიცოცხლე“, — წერს მაკა ჩიკვილაძე. ის ამბობს, რომ მეუღლის სტატუსიდან გამომდინარე, მაქსიმალურად ცდილობს, საჯაროდ ნაკლებად დააფიქსიროს სუბიექტური მოსაზრებები სხვადასხვა თემებზე და მხოლოდ ისეთი შეხედულებები გამოხატოს, რომლებიც არ დატოვებს ინტერპრეტაციის საშუალებას და არ დაემთხვევა რომელიმე საზოგადოებრივი თუ პოლიტიკური ჯგუფის დღის წესრიგს. „მიმაჩნია, რომ მით უმეტეს არაა მიზანშეწონილი, ვინმემ ჩემი არასრულწლოვანი შვილები, თუნდაც ირიბად, მათგან დამოუკიდებლად ჩართოს რამე პოლიტიკურ დღის წესრიგში. არ ვფიქრობ, სწორი იყოს კონკრეტულად ჩემი შვილების ფოტოების გამოყენება აქციებზე და აქციის მოწოდებებში. დღეს მათ არ აქვთ და ვერ ექნებათ ყველა ფაქტსა და მოსაზრებაზე საკუთარი შეხედულება, ამიტომ ჩემი მოვალეობაა, სხვათა მოსაზრებებისგან მათი დისტანცირება მანამ, სანამ თავად არ ექნებათ სრულყოფილი საშუალება, გადაწყვიტონ და დააფიქსირონ თავიანთი პოზიცია სხვადასხვა თემებზე. გთხოვთ, გაითვალისწინოთ ბავშვების უფლებები და ჩემი დამოკიდებულება. იმედი მაქვს, ეს საჯარო თხოვნა მიაღწევს ადრესატამდე, კონკრეტული ფაქტებისა და ადამიანების დასახელების, ზედმეტი განხილვების გარეშე“, — წერს მაკა ჩიკვილაძე. ის კონკრეტულ მაგალითს არ ასახელებს, თუმცა გიორგი ანწუხელიძის ვაჟის ფოტო გამოყენებული აქვს გვერდს აი უცნობი • i ucnobi. მაკა ჩიკვილაძეს საჯარო პოსტი გუშინ ღამით აქვს გამოქვეყნებული, თუმცა უცნობს პოსტი ამ დრომდე არ წაუშლია. netgazeti

საქართველოში მიწისძვრა მოხდა. სეისმური მონიტორინგის ეროვნული ცენტრის პირველადი მონაცემებით, მიწისძვრის ეპიცენტრი თბილისიდან 63 კმ-ში, ქალაქ დმანისის დასავლეთით, სოფელი პანტიანში იყო. მიწისძვრის სიმძლავრემ 3.2 მაგნიტუდა შეადგინა.

საქართველოს შინაგან საქმეთა მინისტრი ვახტანგ გომელაური გერმანიის ფედერაციულ რესპუბლიკაში ოფიციალური ვიზიტის ფარგლებში გერმანიის ფედერალურ შინაგან საქმეთა მინისტრს, ნენსი ფეზერს შეხვდა. საქართველოს შინაგან საქმეთა სამინისტროს ინფორმაციით, შეხვედრაზე მხარეებმა სამართალდაცვით სფეროში არსებული თანამშრომლობის საკითხები განიხილეს და სამომავლო ურთიერთობის პერსპექტივებზე ისაუბრეს. ვახტანგ გომელაურმა ხაზი გაუსვა გერმანიის სამართალდამცავ უწყებებთან ნაყოფიერი თანამშრომლობის მნიშვნელობას და გერმანულ მხარეს საქართველოს შინაგან საქმეთა სამინისტროს შესაძლებლობების განვითარებაში მუდმივი მხარდაჭერისათვის მადლობა გადაუხადა. განსაკუთრებული ყურადღება გამახვილდა არალეგალური მიგრაციისა და ორგანიზებული დანაშაულის წინააღმდეგ ბრძოლის მიმართულებით განხორციელებულ ღონისძიებებზე, ასევე ამ კუთხით პოლიციის ატაშეების როლზე. ვახტანგ გომელაურმა ქართველი პოლიციის ოფიცრების გერმანიის შინაგან საქმეთა სამინისტროს შესაბამის დანაყოფებში წარგზავნისთვის მზაობა გამოთქვა და განმარტა, რომ აღნიშნული ხელს შეუწყობს, ერთი მხრივ, ორგანიზებული დანაშაულის წინააღმდეგ ეფექტიან ბრძოლას, მეორე მხრივ, უკანონო მიგრაციული ნაკადების კონტროლს. გერმანულმა მხარემ აღნიშნა, რომ საქართველო წარმატებით ახორციელებს ევროკავშირთან რეადმისიის შეთანხმების იმპლემენტაციას. აგრეთვე აღინიშნა, რომ გერმანიასა და საქართველოს შორის ამ მიმართულებით თანამშრომლობა ეფექტიანად ხორციელდება. ამასთანავე, დადებითად შეფასდა საქართველოს მიერ განხორციელებული ღონისძიებები და მიმდინარე რეფორმები, რომლებიც ევროკავშირთან უვიზო მიმოსვლის გამოწვევებზე საპასუხოდ განხორციელდა. გერმანულმა მხარემ სურვილი გამოთქვა, შეიქმნას ორმხრივი სამუშაო ჯგუფები, რათა სხვადასხვა პროფესიის მქონე საქართველოს მოქალაქეებს დამატებით მიეცეთ გერმანიაში ლეგალურად დასაქმების შესაძლებლობა. შეხვედრას ესწრებოდნენ საქართველოს საგანგებო და სრულუფლებიანი ელჩი გერმანიის ფედერაციულ რესპუბლიკაში ლევან იზორია, საქართველოს შინაგან საქმეთა მინისტრის მოადგილე ალექსანდრე დარახველიძე, ცენტრალური კრიმინალური პოლიციის დეპარტამენტის დირექტორი თეიმურაზ კუპატაძე და საქართველოს პოლიციის ატაშე გერმანიის ფედერაციულ რესპუბლიკაში სერგო თურმანიძე. შეხვედრას ასევე ესწრებოდნენ გერმანული მხარის წარმომადგენლები: გერმანიის ფედერალური მთავრობის სპეციალური რწმუნებული მიგრაციის საკითხებში იოახიმ შტამპი, გერმანიის ფედერალური შინაგან საქმეთა სამინისტროს სახელმწიფო მდივანი ბერნდ კრიოსერი, მართვის, დაგეგმვისა და კომუნიკაციის დეპარტამენტის უფროსი ბასტიან ფლაიგი, მიგრაციის, ინტეგრაციის, ლტოლვილებისა და ევროპული ჰარმონიზაციის დეპარტამენტის უფროსი ულრიხ ვაინბრენერი და საერთაშორისო და ევროკავშირის საკითხების შტაბის უფროსი მიხაელ ნიმაიერი. შეხვედრის დასასრულს ვახტანგ გომელაურმა ფედერალურ შინაგან საქმეთა მინისტრს მადლობა გადაუხადა მასპინძლობისთვის და საპასუხო ვიზიტით საქართველოში მოიწვია. ინფორმაციას საქართველოს შინაგან საქმეთა სამინისტრო ავრცელებს.

საქართველოს პოლონეთის საგარეო საქმეთა მინისტრი ზბიგნევ რაუ ეწვია. პოლონეთის საგარეო უწყების ხელმძღვანელს თბილისის საერთაშორისო აეროპორტში საქართველოს საგარეო საქმეთა მინისტრის მოადგილე დახვდა. თეიმურაზ ჯანჯალიას განცხადებით, საქართველოს საგარეო პრიორიტეტებიდან გამომდინარე, პოლონეთის საგარეო საქმეთა მინისტრის ზბიგნევ რაუს ვიზიტი და პოლონეთის მხარდაჭერა საქართველოსთვის ძალიან მნიშვნელოვანია. „შეხვედრების დროს განხილული იქნება ჩვენი სტრატეგიული მიმართულებები, რაც არის ევროკავშირსა და ნატოში საქართველოს ინტეგრაცია. პოლონელ კოლეგას მივაწვდით სრულყოფილ ინფორმაციას ოკუპირებულ ტერიტორიაზე არსებულ მძიმე მდგომარეობასთან დაკავშირებით. იმედი გვაქვს, რომ კიდევ ერთი მნიშვნელოვანი პარტნიორი ქვეყანა გააგრძელებს საქართველოს მხარდაჭერას როგორც საგარეო პოლიტიკური მიმართულებით, ასევე საქართველოს ტერიტორიული მთლიანობის მხრივ“, – განაცხადა საგარეო საქმეთა მინისტრის მოადგილემ. აღსანიშნავია, რომ ვიზიტის ფარგლებში პოლონეთის საგარეო საქმეთა მინისტრი შეხვედრას გამართავს ქართველ კოლეგასთან, ილია დარჩიაშვილთან. ზბიგნევ რაუ შეხვდება საქართველოს მთავრობის მეთაურს, ირაკლი ღარიბაშვილს. პოლონეთის საგარეო საქმეთა მინისტრს მიიღებს საქართველოს პრეზიდენტი სალომე ზურაბიშვილი. ზბიგნევ რაუ ასევე გვირგვინით შეამკობს საქართველოს ერთიანობისთვის ბრძოლაში დაღუპულ გმირთა მემორიალს. ინფორმაციას საქართველოს საგარეო საქმეთა სამინისტროს პრესსამსახური ავრცელებს.

უკრაინისთვის სამართლიან და მყარ მშვიდობაზე ვისაუბრეთ. ამის შესახებ უკრაინის პრეზიდენტმა ვოლოდიმირ ზელენსკიმ ჩინეთის პრეზიდენტ სი ძინპინთან გამართული სატელეფონო საუბრის შემდეგ განაცხადა. “ერთსაათიანი საუბრის დროს ორმხრივი ურთიერთობების აქტუალური საკითხების მთელი კომპლექსი განვიხილეთ. განსაკუთრებული ყურადღება უკრაინისთვის სამართლიანი და მყარი მშვიდობის დამყარებისთვის შესაძლო ურთიერთქმედების გზებს დავუთმეთ. უკრაინელ ერზე მეტად მშვიდობა არავის არ სურს. ჩვენ მიწაზე ვართ და ჩვენი მომავლისთვის ვიბრძვით, თავდაცვის განუყოფელ უფლებას ვიყენებთ. მშვიდობა სამართლიანი და მყარი უნდა იყოს, საერთაშორისო სამართლის პრინციპებსა და გაეროს ქარტიას უნდა ეყრდნობოდეს. არანაირი მშვიდობა არ შეიძლება იყოს ტერიტორიული კომპრომისების ხარჯზე. უკრაინის ტერიტორიული მთლიანობა 1991 წლის საზღვრებში უნდა აღდგეს”, - წერია უკრაინის პრეზიდენტის ოფისის მიერ გავრცელებულ განცხადებაში. ზელენსკიმ ასევე აღნიშნა, რომ საუბრისას მან და სი ძინპინმა უკრაინულ-ჩინური პარტნიორობის გამყარების გზებიც განიხილეს, ვინაიდან რუსეთის სრულმასშტაბიანი შემოჭრის დაწყებამდე ჩინეთი უკრაინის მთავარი სავაჭრო პარტნიორი იყო. იპნ

აქონდროპლაზიის დიაგნოზის მქონე ბავშვების მშობლების პროტესტი გრძელდება. აქციის მონაწილეები სახელმწიფოსგან პრეპარატ "ვოსორიდიტის" ქვეყანაში შემოტანას და დაფინანსებას ითხოვენ. მშობლებმა მთავრობის ადმინისტრაციასთან გამართულ აქციაზე 3 მოთხოვნა დააყენეს. ერთ-ერთი მშობლის, ლია შავიშვილის განცხადებით, მათი მოთხოვნაა, საკოორდინაციო საბჭოს მუშაობასა და ყველა პროცესში, რაც მედიკამენტ “ვოსორიდიტის“ საქართველოში ჩამოტანას უკავშირდება, ჩართული იყოს მინიმუმ სამი მშობელი. “ჩვენი მოთხოვნაა საკოორდინაციო საბჭოს მუშაობაში და ზოგადად ყველა პროცესში ჩართული იყოს მინიმუმ სამი მშობელი. დღეს, საკოორდინაციო საბჭო სხდომა ისე ჩატარდა, რომ მშობლები არ დაგვიბარეს. თამარ გაბუნია დაგვპირდა, რომ საკოორდინაციო საბჭოში ჩართული ვიქნებოდით, მაგრამ საბჭოს მუშაობაში დღემდე არ ვართ ჩართულნი. ამიტომ, ვითხოვთ იყოს მშობელთა ჩართულობა, არა მხოლოდ საკოორდინაციო საბჭოს მუშაობაში, არამედ თითოეულ იმ ნაბიჯში, რაც “ვოსორიდიტის” საქართველოში შემოტანისთვის კეთდება. მეორე მოთხოვნა არის ის, რომ ჩვენ ველოდებით ოფიციალურ გადაწყვეტილებას, პრემიერ-მინისტრის განკარგულებას, სადაც აღნიშნული იქნება მედიკამენტის საქართველოში შემოტანის და მკურნალობის დაწყების კონკრეტული ვადები. ამ შემთხვევაში გადაწყვეტილება სწრაფად არის მისაღები. ჯანმოს რეკომენდაციების დალოდების გარეშე შეუძლია აღნიშნული მედიკამენტი შემოიტანონ საქართველოში და სწრაფად დაიწყონ ჩვენი შვილების მკურნალობა,”- განაცხადა შავიშვილმა. აქონდროპლაზიის დიაგნოზის მქონე ბავშვების მშობლებმა და მხარდაჭერებმა მთავრობის ადმინისტრაციის შენობიდან პარლამენტამდე საპროტესტო მსვლელობა გამართეს. პარლამენტის წინ გამართულ აქციაზე პრემიერ-მინისტრ, ირაკლი ღარიბაშვილს მიმართეს თხოვნით, რომ მშობლებს გადასცეს მის მიერვე ხელმოწერილი დოკუმენტი, სადაც მედიკამენტ “ვოსორიდიტის” საქართველოში შემოტანის კონკრეტული თარიღი იქნება მითითებული. “ბატონო, პრემიერო ჩვენ რომ ვიყოთ დარწმუნებულები იმაში, რომ ისევ მოტყუებულები არ ვიქნებით, ამიტომ ერთადერთი დოკუმენტი გვინდა, რომელიც იქნება მთავრობის განკარგულება და რომელსაც ხელს თქვენ მოაწერთ. ეს იქნება მთავრობის განკარგულება, რომლითაც დარეგულირდება ამ მედიკამენტის ბავშვებისთვის მიწოდება და მითითებული იქნება კონკრეტული თარიღი. სანამ ამ აქტს ხელში არ დავიჭერთ არ დავიშლებით”, - განაცხადა ლია შავიშვილმა. აქციის დასასრულს მშობლებმა, 27 აპრილს, 19:00 საათზე აქცია კვლავ დაანონსეს. იპნ

„ქართული ოცნების“ თავმჯდომარე ირაკლი კობახიძე აცხადებს, რომ „საერთაშორისო რესპუბლიკური ინსტიტუტის“ (IRI) მიერ ჩატარებული კვლევის მონაცემები გაყალბებულია. კობახიძე აღნიშნულს სამწუხარო ფაქტად აფასებს. „დეტალებში არ შევალ. სამწუხაროა, შემაშფოთებელია და იძლევა დასკვნების გამოტანის საშუალებას ის ფაქტი, რომ სამწუხაროდ, IRI-ის ხელით გაყალბდა სოციოლოგიური კვლევის მონაცემები. კვლევები ადრეც სხვადასხვა მიმართულებით ყალბდებოდა ხოლმე. მაგალითად, წინა კვლევაში განსაკუთრებით თვალშისაცემი იყო პერსონალური რეიტინგების გაყალბება. საინტერესო ის არის, რომ ვინც, წინა კვლევაში ფავორიტები იყვნენ, მაგალითად, [დავით] უსუფაშვილი, [ნინო] ლომჯარია, [ანა] დოლიძე, რომლებსაც თითქოს ჰქონდათ წარმოუდგენელი რეიტინგები, რამდენიმე თვის შემდეგ, საერთოდ ვეღარ აღმოჩნდნენ IRI-ის კვლევაში. აქედან ჩანს, რომ თავიდან ბოლომდე მანიპულაციაა ეს ყველაფერი - რაც იდება ხოლმე, სამწუხაროდ, IRI-ის სახელით. ეს ყველაფერი იმაზე მიანიშნებს, რომ უნდა ველოდოთ გარკვეულ სირთულეებს მომავალშიც, თუმცა კიდევ ერთხელ ვიტყვი, რომ ძალიან სამწუხაროა კვლევების ასეთ დონეზე გაყალბება“, - განაცხადა კობახიძემ IRI-ის ბოლო კვლევენთან დაკავშირებით დასმულ კითვაზე პასუხად. IPN

ვიდრე გადაწყვეტილებები იქნება მიღებული, სახელმწიფომ ვალდებულება აიღო, რომ აქონდროპლაზიის დიაგნოზის მქონე ბავშვებს ყველა სხვა სერვისი მიეწოდებათ. ამის შესახებ ჯანდაცვის მსოფლიო ორგანიზაციის საქართველოს წარმომადგენლობის ხელმძღვანელმა, სილვიუ დომენტემ აქონდროპლაზიასა და მედიკამენტ “ვოსორიტიდის” თაობაზე საკოორდინაციო საბჭოს შეხვედრის შემდეგ განაცხადა. “ხელისუფლებამ ორი მნიშვნელოვანი ნაბიჯი გადადგა. პირველი, იშვიათ დაავადებებზე მათ საბჭო შექმნეს, რომელსაც ხელმისაწვდომი მონაცემების ანალიზი და კლინიკურ გამოყენებაზე და კომპენსაციაზე გადაწყვეტილების მიღება ევალება. მეორე მნიშვნელოვანი ნაბიჯი არის ის, რომ მთავრობამ [მედიკამენტის] მწარმოებელთან მოლაპარაკებების ინიცირება მოახდინა, მაგრამ ეს კონფიდენციალური მოლაპარაკებებია, ამიტომ არავინ იცის, რამდენ ხანს გაგრძელდება ის, რა შედეგი ექნება, მაგრამ მნიშვნელოვანია, რომ ასეთი მოლაპარაკებები ინიცირებულია. პროცესი საკმაოდ ხანგრძლივი შეიძლება იყოს, მაგრამ ხელისუფლება, საბჭო და ექსპერტები არ აპირებენ მხოლოდ საბოლოო გადაწყვეტილებისთვის ლოდინს. დღეს მოვისმინეთ, რომ ექსპერტებმა უკვე დაიწყეს ასეთი მკურნალობისთვის კლინიკურ პროტოკოლზე მუშაობა. ვიდრე პროტოკოლი და გადაწყვეტილებები იქნება მიღებული, სამინისტრომ, მთავრობამ, პარლამენტმა ვალდებულება აიღო, რომ ამ ბავშვებს ყველა სხვა საჭირო სერვისი მიეწოდებათ. ეს არა მხოლოდ სამედიცინო, არამედ სხვა პროცედურებსაც ეხება, მათ შორის სხვა ქვეყნებში- ევროკავშირში, აშშ-ში, იაპონიაში. მაგალითად, ქირურგიულ პროცედურებს, ჰორმონალურ პროცედურებს. გადაწყდა, რომ ბავშვები კომპლექსურად იქნებიან გამოკვლეული და მათ ამ გართულებებისთვის პროცედურებს შესთავაზებენ”, - განაცხადა დომენტემ. ინტერპრესნიუსი

უკრაინაში კიდევ ერთი ქართველი მებრძოლი, ზურაბ ოდიშვილი დაიღუპა. აღნიშნულ ინფორმაციას კავკასიური ლეგიონის მეთაური ლადო გამსახურდია ავრცელებს. უკრაინაში 2022 წლის 24 თებერვლის, რუსეთის ფართომასშტაბიანი შეჭრის შემდეგ, 43 ქართველის მებრძოლია დაღუპული. იპნ

კომპანია „ცემენტ ინვესტმა“, რომელიც ბიძინა ივანიშვილის მიერ დაფუძნებული თანაინვესტირების ფონდის, ირაკლი რუხაძის „ჰანიველ პარტნერზისა“ და დავით ბეჟუაშვილის ოჯახის ინტერესებს წარმოადგენს, სრულად გამოისყიდა Heidelberg Materials-ის წილი „ჰაიდელბერგცემენტ ჯორჯიასა“ და „თერჯოლა კარიერში“ (ერთობლივად „ჰაიდელბერგცემენტ საქართველო“). ინფორმაციას ამის შესახებ „ჰაიდელბერგცემენტ საქართველო“ ავრცელებს. „მას შემდეგ, რაც 2017 წელს Heidelberg Materials და „ცემენტ ინვესტი“ პარტნიორები გახდნენ, ერთობლივი მენეჯმენტის ქვეშ „ჰაიდელბერგცემენტ საქართველომ“ წარმატებით განახორციელა მრავალი მნიშვნელოვანი პროექტი წარმადობისა და ეფექტურობის გაუმჯობესების მიმართულებით, მათ შორის კლინკერის წარმოების ახალი მშრალი მეთოდით მოქმედი ქარხანა კასპში. ამ უკანასკნელმა ინვესტიციამ, რომლის მოცულობამ 100 მილიონ აშშ დოლარს გადააჭარბა, კომპანიას ტექნოლოგიურ გარდატეხასთან ერთად მოუტანა ხარისხის მკვეთრი გაუმჯობესება და უპრეცედენტო ზრდა“, — აცხადებს „ჰაიდელბერგცემენტ საქართველო“ და დასძენს, რომ მიმდინარე წლის განმავლობაში შეინარჩუნებს სავაჭრო სახელსა და ყველა იმ ტექნიკურ მხარდაჭერას, რომელსაც კომპანიას აქამდე „ჰაიდელბერგ მატერიალზი“ უწევდა. სამომავლოდ შესაძლოა, ბრენდის ცვლილება მოხდეს. ცემენტისა და ბეტონის მწარმოებელი კომპანია „ჰაიდელბერგცემენტი“ მსოფლიოს 60 ქვეყანაში 3000 ქარხნითა და 60000-ზე მეტი დასაქმებულითაა წარმოდგენილი. „ჰაიდელბერგცემენტი“ საქართველოში 2017 წელს შემოვიდა და კომპანიის ცნობით, 200 მილიონ ევროზე მეტი ინვესტიცია განახორციელა. „ჰაიდელბერგცემენტ საქართველო“ მართავს ცემენტის სრული ციკლის წარმოების ქარხნებს კასპსა და რუსთავში, ცემენტის წისქვილს ფოთში, ინერტული მასალების ორ საწარმოს, ცემენტის ტერმინალს სუფსაში და ბეტონის თოთხმეტ სტაციონალურ და მობილურ ქარხანას მთელი საქართველოს მასშტაბით. კომპანია „ცემენტ ინვესტის“ ინვესტორები ფლობენ და მართავენ კომპანიებს მთელი საქართველოს მასშტაბით სხვადასხვა სექტორებში, მათ შორის: წარმოების, სასტუმრო ინდუსტრიის, ფინანსური ინსტიტუტების, მედია და ტელეკომუნიკაციების, უძრავი ქონების, სოფლის მეურნეობისა და ენერგეტიკის მიმართულებით. ნეტგაზეთი

თეა მეფარიშვილის 8 წლის შვილს აქონდროპლაზია აქვს. ლიზის აღმოაჩნდა დიაგნოზის თანმდევი არაერთი ისეთი სიმპტომი, რომელიც მის ცხოვრებას ართულებს. მათგან განსაკუთრებით რთულია ძილის აპნოე [ძილისას სუნთქვის შეჩერება], სმენისა და გადაადგილების პრობლემები და სხვა. ლიზის ოჯახმა რამდენიმე წლის წინ მიიღო რთული გადაწყვეტილება და დატოვა სამშობლო. ახლა ოჯახი ბარსელონაში ცხოვრობს. დედა ამბობს, რომ ესპანეთი მათ სრულად უფარავს ჯანდაცვის ხარჯებს, ივნისიდან ლიზის უფასოდ მისცემენ აქონდროპლაზიის რევოლუციურ პრეპარატს Voxzogo-საც, რომელსაც საქართველოში მყოფ ბავშვებს ამ დროისთვის არ უფინანსებენ. როგორ იბრძოლა ოჯახმა ლიზის უკეთესი ცხოვრებისთვის თეა გვიყვება იმ სირთულეების შესახებ, რომელიც აქონდროპლაზიის დიაგნოზს ახლავს თან. თეა აღწერს, რომ ძილის აპნოე ერთ-ერთი ყველაზე მძიმე სიმპტომია, რადგან ამის გამო მშობელს ღამე საერთოდ არ უნდა ეძინოს, მან უნდა ამონიტორინგოს, სუნთქავს თუ არა მისი შვილი – „ბავშვი ძილში ისე შეიძლება გაიპაროს, რომ ვერც გაიგო“. ამასთანავე, თვითონ ბავშვსაც უწყდება ნორმალური ძილის რეჟიმი, განიცდის სტრესს და ფიზიკურ დისკომფორტს. თეა ყვება, რომ ლიზიმ მას შემდეგ დაიწყო ნორმალურად ძილი, რაც 2-3 წლის წინ ოჯახი ესპანეთში გადავიდა საცხოვრებლად ესპანეთმა ლიზის უფასოდ გადასცა სასუნთქი აპარატი, რომლითაც ბავშვს ღამით სძინავს. იმ შემთხვევაში, თუ აპარატი დაზიანდა, სახელმწიფო მას უსასყიდლოდ შეაკეთებს. ლიზი. ფოტო: თეას კოლექცია დედა გვიყვება, რომ საქართველოში ამ სიმპტომს ექიმები ჯეროვნად ვერ მართავდნენ. ქუთაისში გენეტიკოსი არ იყო, შესაბამისად, თეა ყოველ ვიზიტზე თბილისში დადიოდა. თუმცა აქაც ვერ ნახა შესაბამისი სამედიცინო სერვისი. ექიმები მას ურჩევდნენ, რომ სუნთქვის გართულებისას ლიზის დექსამეტაზონი მიეღო, ამასთანავე, დანიშნული ჰქონდა ბევრი ანტიბიოტიკი. თეა ამბობს, რომ საქართველოდან ანალიზის პასუხებს საზღვარგარეთ გზავნიდა ხოლმე. მათ შორის, უგზავნიდა აშშ-ში მომუშავე ექიმებს. დედის თქმით, ლიზის აქვს კიდევ ერთი პრობლემა – კისრის მალაში მოყოლილია ზურგის ტვინის ნაწილი, რასაც სერიოზული ოპერაცია სჭირდება. ლიზის საავადმყოფოში ამხნევებს სამედიცინო პერსონალი. ფოტო: თეა მეფარიშვილის ფოტოკოლექცია ლიზის ამ დრომდე დაახლოებით 6-7 ოპერაცია აქვს გაკეთებული. ყველა მათგანი უფასოდ. ამასთანავე, ყველა წამალი, რომელიც ბავშვს სჭირდება, მშობლებს ან კლინიკაში აძლევენ, ან ექიმი რეცეპტს წერს, შედეგად, მედიკამენტს ოჯახი შეღავათიან ფასში ყიდულობს. ესპანეთში ლიზის დაუფინანსეს სმენის და ჰიდროცეფალიის ოპერაციაც. პოსტოპერაციული პერიოდის შემდეგ, ივნისში ბავშვს დანიშნული აქვს ვიზიტი ენდოკრინოლოგთან და დაგეგმილია, რომ ლიზი მალე დაიწყებს ვოსორიტიდითაც მკურნალობას. „ჩვენმა ენდოკრინოლოგმა ამიხსნა, რომ ჩემს შვილს ეს წამალი სჭირდება აუცილებლად და მე არ ვინერვიულო ფინანსებზე, ეს წამალი საკმაოდ ძვირადღირებულია, მაგრამ სახელმწიფო დაუფინანსებს ბავშვს ამ მედიკამენტებს იმიტომ, რომ მას ეს სასიცოცხლოდ სჭირდება, რათა ყოველდღიური ყოფა შეუმსუბუქოს. ვოსორიტიდმა უნდა შეუმსუბუქოს ტკივილები, ასევე დაეხმაროს ცხვირის ხრტილის ამოვსებაში, რის გამოც მას ძილის აპნოე აქვს. ყველა სიმპტომი, რაც ბავშვს აქვს, მოსალოდნელია, რომ შეუმსუბუქდება. ამიტომაც მითხრა ექიმმა, შენ არ ინერვიულო, მართალია, ეს ფასიანია, მაგრამ ჩვენი სახელმწიფო ამას აანაზღაურებს, ბავშვს ეკუთვნის და ბავშვი მიიღებს აბსოლუტურად უსასყიდლოდ“, – გვიყვება დედა. პრეპარატ Voxzogo-ს (აქტიური ნივთიერება – ვოსორიტიდით) 2021 წელს აშშ-ის წამლისა და საკვების ადმინისტრაციამ (FDA), ასევე ევროპის წამლის სააგენტომ (EMA) ავტორიზაცია მისცა. ეს პრეპარატი პირველია, რომელიც გამოიყენება სინდრომისა და მისგან გამოწვეული სიმპტომების სამკურნალოდ, თუმცა მის მიღება ეფექტურია მხოლოდ გარკვეულ დრომდე, მანამ, სანამ ე.წ. ზრდის პლატებია ღია ანუ დაახლოებით, 18 წლამდე. აქონდროპლაზიის მქონე ბავშვების მშობლები თბილისში საპროტესტო აქციებს მართავენ მოთხოვნით, რომ სახელმწიფომ შემოიტანოს და დააფინანსოს პრეპარატი. ნეტგაზეთი

უკრაინისა და ჩინეთის პრეზიდენტებს შორის უკრაინაში ომის დაწყების შემდეგ პირველი სატელეფონო საუბარი გაიმართა. როგორც უკრაინის პრეზიდენტი ვოლოდიმირ ზელენსკი სოციალურ ქსელში წერს, დიალოგი იყო შინაარსიანი და ხანგრძლივი. უკრაინის პრეზიდენტი იმედოვნებს, რომ სატელეფონო საუბარი, ისევე როგორც ჩინეთში უკრაინის ელჩის დანიშვნა, „ძლიერ ბიძგს მისცემს ორ ქვეყანას შორის ურთიერთობების განვითარებას“. აღსანიშნავია, რომ ოფიციალური პეკინი ნეიტრალიტეტს ემხრობა და ღიად არ განიხილავს რუსეთ-უკრაინის ომს. თუმცა გასულ თვეს სი ძინპინი მოსკოვს სტუმრობდა. ავტორი - სალომე თორაძე

საქართველოს ჯანდაცვის მინისტრის მოადგილის, თამარ გაბუნიას განცხადებით, „ვოსორიტიდთან“ დაკავშირებით ქართულ პროტოკოლში, რომელიც ერთი თვის განმავლობაში უნდა შეიქმნას, განსაზღვრული იქნება მედიკამენტის გამოყენების პირობები იმ მონაცემებიდან გამომდინარე, რაც დღეს არსებობს. მისივე თქმით, მედიკამენტთან დაკავშირებით სამუშაო პროცესი გრძელდება. „სამუშაო ჯგუფი, რომელიც აქონდროპლაზიის პროტოკოლზე მუშაობს, ესწრებოდა საბჭოს შეხვედრას. მათ გამოთქვეს თავიანთი პოზიციები და აღნიშნეს, რომ მზად არიან, პროტოკოლი ერთი თვის ვადაში ჩამოაყალიბონ. პროტოკოლი იქნება ბევრი მიმართულებით – ჩამოყალიბებული იქნება სრულყოფილი მართვის სქემა, მათ შორის განისაზღვრება მედიკამენტის ადგილი და გამოყენების პირობები იმ მონაცემებიდან გამომდინარე, რაც დღეს არსებობს. შემდეგ საბჭო და სამუშაო ჯგუფი მიიღებს გადაწყვეტილებას, უშუალოდ მედიკამენტის ადმინისტრირების შესახებ. პროცესი მიმდინარეობს და ვფიქრობთ, მომდევნო რამდენიმე კვირის განმავლობაში ექსპერტებთან ერთად ჩვენც მეტი სიცხადე გვექნება, რა გზას მივმართოთ უშუალოდ მედიკამენტთან დაკავშირებით. ამავე დროს, აქცენტი გაკეთდა იმაზე, რომ მრავლობითი საჭიროებები, რაც ბავშვებს შეიძლება ჰქონდეთ, უნდა შეფასდეს დღესვე და მოხდეს ამ საჭიროებების დაკმაყოფილება, იქნება ეს ჩვენს ქვეყანაში თუ უცხოეთის. შეხვედრა დათმობილი იყო პროფესიული წრეებისთვის და ტექნიკური საკითხები იყო განხილული, მათ შორის მედიკამენტის ანაზღაურების მექანიზმები“, – განაცხადა თამარ გაბუნიამ. ამასთან, თამარ გაბუნიამ აღნიშნა, რომ სამუშაო ჯგუფის შემდეგ შეხვედრაზე დასწრების საშუალება ექნებათ აქონდროპლაზიის დიაგნოზის მქონე ბავშვების მშობლებსაც. „ზოგადად, მშობლების წარმომადგენელი არის სამუშაო ჯგუფში. მშობლებს მონაწილეობის მიღების საშუალება სამუშაო ჯგუფის შემდეგ სხდომაზე ექნებათ. როგორც მოგეხსენებათ, ორი ჯგუფი მუშაობს – იშვიათი დაავადებების საბჭო, რომელსაც ფართო პროფილი აქვს, სადაც მხოლოდ აქონდროპლაზიაზე არ არის მსჯელობა და მეორე – სამუშაო ჯგუფი, რომელიც უშუალოდ აქონდროპლაზიის პროტოკოლის მიმართულებით მუშაობს. პრეპარატის შესახებ გადაწყვეტილების მიღებას გარკვეული დრო დასჭირდება. არ მინდა, ცრუ მოლოდინები შევქმნა. კონსულტაციები გრძელდება, სამუშაო პროცესი აქტიურად მიმდინარეობს. ვფიქრობთ, ერთი თვე, ასევე ევროკავშირის ქვეყნების გამოცდილება იქნება გადამწყვეტი გადაწყვეტილების მითებისთვის“, – აღნიშნა თამარ გაბუნიამ. ავტორი - მარიამ სეთურიძე

A კატეგორიის ტაქსებისთვის, რომელთა გამოშვების ვადა 10 წელს არ აღემატება, კიდევ ერთი სიახლე ამოქმედდება. როგორც დედაქალაქის მერმა, კახა კალაძემ მუნიციპალიტეტის მთავრობის სხდომაზე აღნიშნა, მსგავს ავტოსატრანსპორტო საშუალებებს პირველი ივნისიდან ავტობუსის ზოლში მოძრაობა შეეძლებათ. „ტაქსების რეფორმის ფარგლებში, არაერთი კონკრეტული ნაბიჯი გადაიდგა. გვაქვს კიდევ ერთი სიახლე, რომელიც შეეხება მხოლოდ A კატეგორიის იმ ტაქსებს, რომელთა გამოშვების ვადა არ აღემატება 10 წელს. ამ ავტოსატრანსპორტო საშუალებებს ექნებათ უფლება, პირველი ივნისიდან იმოძრაონ ავტობუსის ზოლში. აქამდე შეეძლოთ, რომ აღნიშნულ ზოლში მგზავრი აეყვანათ ან ჩამოესვათ. აქტიურად ვმუშაობთ შინაგან საქმეთა სამინისტროსთან ერთად, რისთვისაც კიდევ ერთხელ მინდა, მადლობა გადავუხადო უშუალოდ მინისტრს, ვახტანგ გომელაურს და უწყებას“, – განაცხადა კახა კალაძემ. ამასთან, კალაძის თქმით, მიმდინარე წლის მაისიდან მუნიციპალურ სერვისცენტრებში ე.წ. სტიკერების დარიგება დაიწყება A კატეგორიის იმ ტაქსებისთვის, რომელთაც ავტობუსის ზოლში მოძრაობის უფლება აქვთ. მერის თქმით, ტაქსი დაიშვება ავტობუსის ზოლში მხოლოდ იქ, სადაც საზოგადოებრივი ტრანსპორტი გადაადგილდება სხვა ავტოსატრანსპორტო საშუალებების მოძრაობის მიმართულებით. „იმისთვის, რომ მარტივად იდენტიფიცირებადი იყოს ასეთი საშუალებები, მათ შორის მგზავრებისთვის, შემოვიღეთ ე.წ. სტიკერები, რომელთა დარიგებას უკვე მაისიდან დავიწყებთ მუნიციპალურ სერვისცენტრებში. ეს ე.წ. სტიკერი იქნება იმის მანიშნებელი, რომ ტაქსი დაშვებულია ავტობუსის ზოლში. შესაბამისად, მისი გადაადგილების დრო გაცილებით ნაკლები იქნება. ეს „სტიკერი“ განთავსდება ტაქსის საქარე მინაზე, მარჯვენა ზედა კუთხეში. A კატეგორიის ტაქსი დაიშვება მხოლოდ იმ საავტობუსო ზოლში, სადაც საზოგადოებრივი ტრანსპორტი მოძრაობს სხვა ავტოსატრანსპორტო საშუალებების მოძრაობის და არა – საპირისპირო მიმართულებით. ეს მნიშვნელოვანი დეტალია“, – აღნიშნა თბილისის მერმა.

26-28 აპრილს, საქართველოს ვიზიტით პოლონეთის რესპუბლიკის საგარეო საქმეთა მინისტრი, ზბიგნევ რაუ ეწვევა. ამის შესახებ ინფორმაციას საქართველოს საგარეო საქმეთა სამინისტრო ავრცელებს. მათივე ცნობით, პოლონელ კოლეგას საქართველოს საგარეო საქმეთა მინისტრი, ილია დარჩიაშვილი უმასპინძლებს. გაიმართება შეხვედრა, როგორც პირისპირ ფორმატში, ასევე ორი ქვეყნის დელეგაციებს შორის. „ვიზიტის ფარგლებში, პოლონეთის საგარეო საქმეთა მინისტრთან შეხვედრას საქართველოს პრემიერ-მინისტრ, ირაკლი ღარიბაშვილთან გამართავს. ასევე, ზბიგნევ რაუს საქართველოს პრეზიდენტი სალომე ზურაბიშვილი მიიღებს. საქართველოში ვიზიტის ფარგლებში, პოლონეთის საგარეო უწყების ხელმძღვანელი პატივს მიაგებს საქართველოს ერთიანობისთვის ბრძოლაში დაღუპულ გმირებს და მემორიალს გვირგვინით შეამკობს“, - ნათქვამია გავრცელებულ ინფორმაციაში.

დაავადებათა კონტროლისა და საზოგადოებრივი ჯანმრთელობის ეროვნულ ცენტრში იშვიათი დაავადებების საკითხებზე მომუშავე საკოორდინაციო საბჭოს შეხვედრა მიმდინარეობს. ჯანდაცვის სამინისტროს ინფორმაციით, შეხვედრა დაეთმობა აქონდროპლაზიის გაიდლაინის მომზადების სტატუსის მიმოხილვას, მედიკამენტ „ვოსორიტიდის“ დანერგვის ეტაპებს და ამ მიმართულებით, საერთაშორისო გამოცდილებას. პარალელურად, საქართველოს მთავრობის ადმინისტრაციასთან აქონდროპლაზიით დიაგნოზის მქონე ბავშვების მშობლების მორიგი აქცია მიმდინარეობს. ერთ-ერთი მშობლის, თამუნა გელაშვილის განცხადებით, აქციები 24-საათიან რეჟიმში კვლავ გაგრძელდება. აღსანიშნავია, რომ მთავრობის ადმინისტრაციიდან რუსთაველის გამზირისკენ დღეს, 19:00 საათზე მსვლელობაც გაიმართება. IPN

ხელისუფლებას აღარ ჰყავს დასავლეთში პარტნიორი, რომელიც მას ენდობა, პარტნიორების წინააღმდეგ შტურმით ანადგურებს წლების განმავლობაში მიმდინარე ურთიერთობებს, - ამის შესახებ „საქართველოსთვის" წევრმა, ბექა ლილუაშვილმა განაცხადა, რითაც ირაკლი ღარიბაშვილის შარლ მიშელთან შეხვედრას გამოეხმაურა. მისივე თქმით, ხელისუფლება ამ შეხვედრით კმაყოფილია, თუმცა, მიშელის განცხადება საწინააღმდეგოზე მეტყველებს. „ხელისუფლების წარმომადგენლების, პრემიერ-მინისტრის მხრიდან მოვისმინეთ, რომ ფანტასტიკური შეხვედრები ჰქონდათ შინაარსობრივად და ძალიან კმაყოფილები არიან მაშინ, როცა შარლ მიშელთან შეხვედრის შემდეგ დაგეგმილი პროცედურებიც გაუქმდა და პირდაპირ ვნახეთ მოწოდება, რომ დემოკრატიული რეფორმების გარეშე, მართლმსაჯულების სისტემაში წინგადადგმული ნაბიჯების გარეშე, უბრალოდ მეგობრობაც შეუძლებელი იქნება ჩვენ ქვეყანას და ევროკავშირს შორის. ეს ხდება იმ მოცემულობის ფონზე, რომ ხელისუფლება ანადგურებს სტრატეგიულ პარტნიორებთან წლების განმავლობაში მიმდინარე ურთიერთობებს შტურმით პარტნიორების წინააღმდეგ, აღარ ჰყავს დასავლეთში პარტნიორი, რომელიც მას ენდობა“, - განაცხადა ბექა ლილუაშვილმა. IPN

უკრაინის პრეზიდენტმა ვოლოდიმირ ზელენსკიმ ჩერნობილის ატომურ ელექტროსადგურზე მომხდარი კატასტროფის 37 წლისთავთან დაკავშირებით განცხადება გაავრცელა და აღნიშნა, რომ აუცილებელია გაკეთდეს ყველაფერი, რათა რუსეთს არ მიეცეს ატომური ენერგიის ობიექტების მსოფლიოს შანტაჟისთვის გამოყენების შესაძლებლობა. აღნიშნული განცხადება ქვეყნის პირველმა პირმა „ტელეგრამის“ გვერდზე გაავრცელა. „37 წლის წინ ჩერნობილის ატომურ სადგურზე მომხდარმა ავარიამ უდიდესი დაღი დაასვა მთელს მსოფლიოს. რადიაციის გაჟონვამ ერთ დროს მყუდრო და განვითარებული ტერიტორია განყენებულ ზონად გადააქცია. დღეს ჩერნობილის ატომური ელექტროსადგურის ირგვლივ 30-კილომეტრიანი ზონა სახიფათო ადგილად რჩება რადიაციის მაღალი კონცენტრაციით. გასულ წელს ოკუპანტებმა არა მხოლოდ დაიპყრეს ატომური სადგური, არამედ ახლიდან დააყენეს საფრთხის წინაშე მთელი მსოფლიო. ჩვენ უნდა გავაკეთოთ ყველაფერი, რათა არ მივცეთ ტერორისტ სახელმწიფოს არანაირი შანსი გამოიყენოს ატომური ენერგიის ობიექტები უკრაინისა და მთელი მსოფლიოს შანტაჟისთვის", - განაცხადა ზელენსკიმ. მისივე თქმით, უკრაინამ და მსოფლიომ გადაიხადეს მაღალი ფასი კატასტროფის შედეგების ლიკვიდაციისთვის. IPN

თურქეთის პრეზიდენტმა რეჯეფ თაიფ ერდოღანმა „უმაღლესი თავდადების ორდენი“ გადასცა მამუკა სეფაშვილს, რომელიც თურქეთში მიწისვრის სალიკვიდაციო-სამაშველო ღონისძიებებში მონაწილეობის მისაღებად გამგზავრებულ ქართველ მაშველებს ხელმძღვანელობდა, იუწყება საქართველოს შინაგან საქმეთა სამინისტრო. უწყების ცნობით, პრეზიდენტის სასახლეში, სპეციალურ ღონისძიებაზე, ერდოღანმა ყველა ქვეყნის მაშველებს გაწეული დახმარებისა და თავდადებისთვის მადლობა პირადად გადაუხადა. „ქართული სამაშველო ჯგუფი თურქეთში საქართველოს პრემიერ-მინისტრის გადაწყვეტილებით კატასტროფის პირველივე დღეს გაემგზავრა და ჯამში 200-მდე მაშველმა სამაშველო მისია 18 დღის განმავლობაში ორ ქალაქში შეასრულა“ – აღნიშნავენ შსს-ში. netgazeti

ევროპარლამენტის დეპუტატი ვიოლა ფონ კრამონი აცხადებს, რომ ქართველმა „ტროლებმა“ რუს „ტროლებსაც“ კი აჯობებს. ასე ის გამოეხმაურა დიტო ჩუბინიძის მტკიცებას, თითქოს ფონ კრამონი ნაცისტური გერმანიის მაღალჩინოსნის, ჰერმან გერინგის შთამომავალია და ხელოვნური ინტელექტით შექმნილ ვიდეოს, რომელშიც იგი თითქოს ნასვამ მდგომარეობაში იმყოფება. ფონ კრამონი ხაზს უსვამს, რომ ამ ყალბ ინფორმაციას „ძირითადად“ მმართველი პარტიის მხარდამჭერები აზიარებენ და ეჭვობს, რომ ფეიკების დამკვეთი სავარაუდოდ სწორედ მმართველი გუნდია. ფონ კრამონმა ამ „ფეიკებთან“ დაკავშირებით ვიდეომიმართვაც ჩაწერა, რომელსაც ქართული სუბტიტრებიც ახლავს. როგორც ევროპარლამენტარი ამბობს, მისი ქალიშვილობის გვარის Gehring და ნაცისტი მაღალჩინოსანის გვარის Göring გაიგივება მხოლოდ ამ ორის რუსული თარგმანის გამოყენების შემთხვევაში შეიძლება. ფონ კრამონი ხაზს უსვამს, რომ არაფერი აქვს საერთო გერინგთან. გარდა ამისა, ფონ კრამონი ამბობს, რომ მეორე ვიდეო, რომელშიც იგი თითქოს ნასვამ მდგომარეობაშია, ხელოვნური ინტელექტის, „დიფფეიკის“ გამოყენებითაა შექმნილი. netgazeti