tvati

იმედია, სტატუსის მონიჭებაზე გადაწყვეტილების მიღებამდე დარჩენილ რამდენიმე თვეში „ქართული ოცნება“ რუსული კანონების მსგავს საბოტაჟს არ მიმართავს, - ამის შესახებ ჟურნალისტებთან პარტია „საქართველოსთვის" წევრმა ანა ბუჩუკურმა განაცხადა. ბუჩუკური გამოეხმაურა ევროკავშირის საბჭოს განცხადებას და აღნიშნა, რომ დასავლელი პარტნიორები ხედავენ ქართველი ხალხის მისწრაფებებს და მათი განწყობაა, რომ საქართველო ევროკავშირის წევრობას იმსახურებს. "ის, რომ საქართველო ასოცირებული ტრიოს ფარგლებში ლიდერი იყო ბევრი წლის განმავლობაში, ეს არის ფაქტი. ასევე, კითხვარის შევსების შემდეგ შეფასებებით დასტურდება, რომ ტექნიკური მზაობის თვალსაზრისით საქართველოს მდგომარეობა ძალიან კარგია, პრობლემა არის პოლიტიკური ნაწილი. ამიტომ დიდი იმედი მაქვს, რომ სტატუსის მონიჭებაზე გადაწყვეტილების მიღებამდე დარჩენილ რამდენიმე თვეში რუსული კანონების მსგავს საბოტაჟს არ მიმართავს "ქართული ოცნება". ჩვენ ვიხილეთ განწყობები, რომ საქართველო იმსახურებს გახდეს ევროკავშირის სრულფასოვანი წევრი. მათ კარგად ესმით, რომ ქართველი ხალხის დაახლოებით 85 პროცენტი საკუთარ და საკუთარი შვილების მომავალს ევროკავშირს და ნატო-ს უკავშირებს,"- განაცხადა ბუჩუკურმა. ევროკავშირის საგარეო საქმეთა მინისტრებმა საქართველოს საგარეო საქმეთა მინისტრ ილია დარჩიაშვილთან არაფორმალური მოლაპარაკებები გამართეს. როგორც ევროკავშირის საბჭოს მიერ გამოქვეყნებულ პრესრელიზშია აღნიშნული, ყურადღება გამახვილდა საქართველოს ევროპულ პერსპექტივაზე და მისი დემოკრატიის გაძლიერების აუცილებლობაზე. „დისკუსიამ დაადასტურა, რომ საქართველომ მიაღწია მნიშვნელოვან პროგრესს ბევრ ძირითად რეფორმებში და ხაზი გაუსვა, რომ კანონის უზენაესობა, ადამიანის უფლებები, მედია, სამოქალაქო საზოგადოება და დამოუკიდებელი სახელმწიფო ინსტიტუტები მნიშვნელოვანი ელემენტებია ევროკავშირში გაწევრიანების მსურველი თითოეული ქვეყნისთვის”, - აღნიშნულია ინფორმაციაში. IPN

უკრაინის თავდაცვის ძალებმა, გასული დღის განმავლობაში, 3 მიმართულებით მოწინააღმდეგის 43 შეტევა მოიგერიეს, - ამის შესახებ უკრაინის შეიარაღებული ძალების გენერალური შტაბის ანგარიშშია აღნიშნული. „მტრის ძირითადი ძალისხმევა კვლავ კონცენტრირებულია შეტევითი ოპერაციების ჩატარებაზე ბახმუტის, ავდიივკასა და მარინსკის მიმართულებებით. ბოლო 24 საათის განმავლობაში უკრაინის თავდაცვის ძალების ნაწილებმა ფრონტის მითითებულ სექტორებში მტრის 43 შეტევა მოიგერიეს. სასტიკი ბრძოლა გრძელდება ბახმუტისა და მარინკასათვის“, - აცხადებენ გენშტაბში. ამასთან, უწყების ცნობით, რუსულმა ძალებმა, გასული დღის განმავლობაში, უკრაინის ტერიტორიაზე 6 სარაკეტო და 62 საჰაერო დარტყმა განახორციელეს, მრავალჯერადი სარაკეტო სისტემებიდან კი ცეცხლი 70-ჯერ გახსნეს. „უკრაინის მასშტაბით სარაკეტო და საჰაერო თავდასხმების ალბათობა კვლავ მაღალია“, - აცხადებენ გენშტაბში. უწყების ცნობით, მოწინააღმდეგის ქმედებების საპასუხოდ, უკრაინის თავდაცვის ძალების ავიაციამ, გასული დღის განმავლობაში, ოკუპანტების პერსონალისა და სამხედრო ტექნიკის კონცენტრაციის ტერიტორიებს 9 დარტყმა მიაყენა, საზენიტო-სარაკეტო სისტემებს კი 3-ჯერ დაარტყა. ამასთან, უკრაინის დამცველებმა მოწინააღმდეგის კუთვნილი სხვადასხვა ტიპის 10 უპილოტო საფრენი აპარატი ჩამოაგდეს. გარდა ამისა, გასული დღის განმავლობაში სარაკეტო და საარტილერიო დანაყოფებმა რუსული ძალების საზენიტო-სარაკეტო სისტემას დაარტყეს. IPN

საფრანგეთის საგარეო საქმეთა მინისტრი, კატრინ კოლონა, 28 აპრილს საქართველოს ეწვევა. ინფორმაციას საფრანგეთის საგარეო საქმეთა სამინისტრო ავრცელებს. „საქართველოს პრეზიდენტ სალომე ზურაბიშვილთან, პრემიერ-მინისტრ ირაკლი ღარიბაშვილთან და საგარეო საქმეთა მინისტრ ილია დარჩიაშვილთან მოლაპარაკებებს დროს კატრინ კოლონა გამოხატავს მხარდაჭერას კანონის უზენაესობის სფეროში რეფორმებისა და სამოქალაქო სივრცის შენარჩუნების მიმართ, რაც ქვეყნის ევროკავშირთან დაახლოებისთვის აუცილებელია“, - აღნიშნულია უწყების პრესრელიზში. საფრანგეთის საგარეო საქმეთა სამინისტროს ინფორმაციით, საქართველოში ვიზიტამდე, კატრინ კოლონა 26-28 აპრილს აზერბაიჯანსა და სომხეთს ეწვევა. IPN

საქართველოში მიწისძვრა მოხდა. დედამიწის შემსწავლელ მეცნიერებათა ინსტიტუტისა და სეისმური მონიტორინგის ეროვნული ცენტრის მიერ გავრცელებული ინფორმაციით, მიწისქვეშა ბიძგები ქუთაისიდან სამხრეთით 3 კმ-ში, სოფელ სარბევთან დაფიქსირდა. მიწისძვრის სიმძლავრე 3.6 მაგნიტუდა იყო.

უკრაინის პრეზიდენტი, ვოლოდიმირ ზელენსკი ხარკოვის ოლქის ქალაქ კუპიანსკზე რუსების მიერ განხორციელებულ სარაკეტო თავდასხმას ეხმაურება და აცხადებს, რომ უკრაინა ტერორისტულ ქვეყანას პასუხს გასცემს. „კუპიანსკი, ქალაქის ცენტრი, მხარეთმცოდნეობის მუზეუმი. ტერორისტული ქვეყანა ყველაფერს აკეთებს იმისათვის, რომ მთლიანად გაგვანადგუროს, გაანადგუროს: ჩვენი ისტორია, კულტურა, ჩვენი ხალხი, კლავს უკრაინელებს აბსოლუტურად ბარბაროსული მეთოდებით. არ გვაქვს უფლება, ეს ერთი წამითაც კი დავივიწყოთ. ჩვენ გვაქვს უფლება და ვუპასუხებთ“, - აღნიშნა ზელენსკიმ. მისივე თქმით, ცნობილია მუზეუმის დაღუპული თანამშრომლისა და ათი დაშავებულის შესახებ. ნანგრევების ქვეშ ჯერ კიდევ არიან ადამიანები. „დაბომბვის შედეგების ლიკვიდაცია გრძელდება. ჩართულია ყველა საჭირო სამსახური", - განაცხადა პრეზიდენტმა. IPN

სახალხო დამცველი, ლევან იოსელიანი მოუწოდებს საქართველოს მთავრობის ადმინისტრაციას, რომ აქონდროპლაზიის დიაგნოზის მქონე ბავშვების მშობლებს პროტესტის გამოხატვისთვის ღირსეული პირობები შეუქმნან. როგორც იოსელიანმა განმარტა, მნიშვნელოვანია გამოხატვის თავისუფლება არ იყოს შეზღუდული, მეორე მხრივ კი ღირსებულ პირობებში შეეძლოთ ამის განხორციელება. „როდესაც პრობლემა დადგა, პირველი დღიდანვე ჩავერთეთ პროცესში. სახალხო დამცველის აპარატის მეცადინეობით სამუშაო ჯგუფი შეიქმნა. ჩვენ ამ სამუშაო ჯგუფში დღემდე აქტიურად ვმონაწილეობთ ჯანდაცვის სამინისტროსთან, რომ ეს პრობლემა გადაწყდეს ბავშვების ინტერესებიდან გამომდინარე. რაც შეეხება აქციას, ჩვენ ამ აქციის მიმართ მონიტორინგი არ შეგვწყვეტია, გამოხატვის თავისუფლების ნაწილში რაიმე ტიპის შეზღუდვას თუ ექნება ადგილი, ან რაიმე პრობლემა იქნება, აქაც ჩართულები ვართ და მონაწილეობენ ჩვენი აპარატის თანამშრომლები. მეც ადამიანურად ძალიან მაწუხებს, რომ ამ ადამიანებს კანცელარიაში არ ეძლევათ საშუალება პირადი ჰიგიენის საკითხები მოიწესრიგონ. მოვუწოდებდი კანცელარიის ადმინისტრაციას, რომ მისცენ მათ შესაძლებლობა ისარგებლონ საპირფარეშო იქნება, თუ ხელდასაბანი. მნიშვნელოვანია არ იყოს შეზღუდული გამოხატვის თავისუფლება, მეორე მხრივ კი ღირსებულ პირობებში შეეძლოთ ამის გაკეთება“,- აღნიშნავს იოსელიანი. იპნ

მე არ მგონია, რომ პროკურატურა უნდა ჩაანაცვლოს კომისიამ, რომელსაც ეს უსაქმური ადამიანები ჩაუდგებიან სათავეში, - ამის შესახებ ჟურნალისტებთან პარლამენტის პირველმა ვიცე-სპიკერმა გია ვოლსკიმ განაცხადა, რითაც გამოეხმაურა ე.წ. ქოლ ცენტრების საქმეზე საგამოძიებო კომისიის შექმნის შესახებ პარტია „საქართველოსთვის“ ინიციატივას. ვოლსკი ფიქრობს, რომ ოპოზიცია „რაღაცით თავის გამოჩენას ფიქრობს“. „პარლამენტში არაფერი უკეთებიათ და საგამოძიებო კომისიის შექმნა რაღაც სტრატეგიად ჩამოაყალიბეს, რომ როგორმე თავი გამოიჩინონ რაღაცით, კომისია შექმნან, რომელიც სკანდალურ თემებს წამოწევს. მე არ მგონია, რომ პროკურატურა უნდა ჩაანაცვლოს კომისიამ, რომელსაც ეს უსაქმური ადამიანები ჩაუდგებიან სათავეში მხოლოდ იმიტომ, რომ თავის პოლიტიკურ გეგმას მიაღწიონ და დივიდენდი მიიღონ. კომისიის შექმნას მყარი საფუძველი უნდა გააჩნდეს, როცა დანაშაული სახეზეა და თუნდაც ამ დანაშაულზე არ რეაგირებს შესაბამისი უწყება“, - განაცხადა ვოლსკიმ. რაც შეეხება ე.წ. ქოლ-ცენტრების საქმეზე უცხოეთში დაკავებულ რატი ალექსიძეს, ვოლსკის განმარტებით, ის თავდაცვის მოქმედი მინისტრის ყოფილი ქვისლი, თუმცა ყოფილი მინისტრის, დავით კეზერაშვილის ახლო მეგობარი და გუნდის წევრია. „რატი ალექსიძის თემას რაც შეეხება, ის მართლაც არის თავდაცვის მინისტრის ყოფილი ქვისლი და კეზერაშვილის უახლოესი მეგობარი და გუნდის წევრი. რადგან არ ვიფიქროთ იმაზე, რომ კეზერაშვილის გუნდის წევრია, ხმამაღალი ლაპარაკი დაიწყეს, რომ ეს ადამიანი ყოფილა ფეხბურთელი, კალაძეს იცნობს და ჯუანშერ ბურჭულაძის ყოფილი ქვისლია. ეს უსუსური და უნიათო მცდელობაა, რომ გადაიტანონ ყურადღება სხვაზე. უკვე ნაგავში თუ ტალახში მჯდომი ადამიანების უსუსური შეძახილებია,“ - განაცხადა ვოლსკიმ. იპნ

აქონდროპლაზიის დიაგნოზის მქონე ბავშვების მშობლებს კანცელარიასთან სახალხო დამცველი შეხვდა. ლევან იოსელიანი მშობლების აქციაზე მივიდა და მათი პრობლემები მოისმინა. ლევან იოსელიანმა აღნიშნა, რომ თუ მშობლების გამოხატვის თავისუფლება შეიზღუდება, ომბუდსმენის ინსტიტუტი მათ გვერდით იქნება, აპარატი კი მუშაობს მათ პრობლემებზე და აქვს კომუნიკაცია ჯანდაცვის სამინისტროსთან. სახლახო დამცველის წარმომადგენელი აქონდროპლაზიის შესახებ სამინისტროში შექმნილ სამუშაო ჯგუფშია ჩართული. აქონდროპლაზიის მქონე ბავშვთა მშობლები საპროტესტო აქციებს რამდენიმე თვეა, მართავენ. მათი მოთხოვნაა, სახელმწიფომ საქართველოში შემოიტანოს და დააფინანსოს ბავშვებისთვის აუცილებელი პრეპარატი Voxzogo, რომელიც ავტორიზებულია აშშ-ის წამლისა და საკვების ადმინისტრაციის (FDA), ასევე ევროპის წამლის სააგენტოს (EMA) მიერ. მშობლების პროტესტის პასუხად მარტში შეიქმნა აქონდროპლაზიის საკითხებზე მომუშავე უწყებათაშორისი ჯგუფი, რომელიც ამ იშვიათი დაავადების სამკურნალო სტრატეგიის ჩამოყალიბებას ისახავს მიზნად. პუბლიკა

მთავრობის სხდომის პარალელურად აქონდროპლაზიის მქონე ბავშვების მშობლების აქცია გრძელდება. აქციის მონაწილეებმა პრემიერის განცხადება, რომ ხელისუფლება ჯერჯერობით არ აპირებს მათთვის საჭირო მედიკამენტის დაფინანება, გააკრიტიკეს. მშობლები ამბობენ, რომ აგრძელებენ პროტესტს თავიანთი მოთხოვნის დაკმაყოფილებამდე და მოითხოვენ პრემიერთან შეხვედრას. ერთ-ერთი მშობლის თქმით, არასწორი იყო პრემიერის ის განმარტებაც, თითქოს სხვა ქვეყნები თავს იკავებენ ამ მედიკამენტის გამოყენებისგან. მისი თქმით, მათ შორის, აშშ-მა და საფრანგეთმა მისცეს საშუალება მოქალაქეებს, რომ პრეპარატი გამოიყენონ. „ამერიკის შეერთებულმა შტატებმა დაწია ამ მედიკამენტის ზღვარი ბატონო პრემიერო. 5 წლიდან იყო ნებადართული და 2 წლამდე დაწია. საფრანგეთის მაგალითს გეტყვით, იქ კვლევის მესამე ფაზის დასრულებამდე 6 თვით ადრე მისცა ბავშვებს საშუალება, ვისაც მაღალი ასაკობრივი ზღვარი ჰქონდა, რომ მიეღოთ ეს წამალი. რადგან ეს არის ერთადერთი მედიკამენტი. მე არ განვცვიფრებულვარ ამ პასუხით, არ გეგონოთ, რომ დავეცემით, პირიქით უფრო გავძლიერდებით და არ გავჩერდებით“, – განაცხადა ქეთევან ბედიაშვილმა. მშობლები ასევე გამოეხმაურნენ ირაკლი ღარიბაშვილის განცხადების იმ ნაწილს, რომელშიც მან განაცხადა, თითქოს პოლიტიკოსები აქონდროპლაზიის მქონე ბავშვების მშობლებს იყენებენ პოლიტიკური მიზნებისთვის. აქონდროპლაზიის მქონე ბავშვთა მშობლები საპროტესტო აქციებს რამდენიმე თვეა, მართავენ. მათი მოთხოვნაა, სახელმწიფომ საქართველოში შემოიტანოს და დააფინანსოს ბავშვებისთვის აუცილებელი პრეპარატი Voxzogo, რომელიც ავტორიზებულია აშშ-ის წამლისა და საკვების ადმინისტრაციის (FDA), ასევე ევროპის წამლის სააგენტოს (EMA) მიერ. ჯანდაცვის სამინისტროს განმარტებით, მედიკამენტთან დაკავშირებით, მწირი მონაცემების არსებობის გამო, მსოფლიოს განვითარებული ქვეყნები ფრთხილად ეკიდებიან აღნიშნულ საკითხს, რათა მაქსიმალურად გარანტირებული იყოს პაციენტის უსაფრთხოება. პუბლიკა

ფრაქცია "სენაკი საქართველოსთვის" ინიციატივით, სენაკის მუნიციპალიტეტში გრძელდება სამოქალაქო ბიუჯეტირების პროგრამა, რომლის მიზანია საჯარო ფინანსების მართვის საქმეში მოქალაქეთა ჩართულობისა და განსახორციელებელი პროექტების ადგილობრივი მოსახლეობის პრიორიტეტების შესაბამისად შერჩევის გზით, მუნიციპალიტეტის მერიის საქმიანობის ეფექტურობის გაზრდა. "შენ შეგიძლია დაწერო პროექტი, მიაწოდო იდეა სენაკის მუნიციპალიტეტის მერიას და შეცვალო გარემო შენს ირგვლივ!", - წერს საკუთარ ფეისბუქ გვერდზე სენაკის მუნიციპალიტეტის მერია. როგორც განცხადებაშია აღნიშნული, 2023 წლის ადგილობრივი ბიუჯეტიდან 150 000 ლარი სრულად მიიმართება სამოქალაქო ბიუჯეტის პროგრამისთვის. "მუნიციპალიტეტის სამოქალაქო ბიუჯეტირების პროგრამის ფარგლებში, ერთი საპროექტო წინადადების განსახორციელებლად საჭირო სავარაუდო თანხის მაქსიმალური ოდენობა არ უნდა აღემატებოდეს 50 000 ლარს. პროგრამის ფარგლებში, შესაძლებელია დაფინანსდეს მინიმუმ სამი საპროექტო წინადადება. 2023 საბიუჯეტო წლისთვის, პროგრამის ეტაპებისთვის განისაზღვრა: საპროექტო წინადადებების მიღების ეტაპი - 24 აპრილიდან 25 მაისამდე; საპროექტო წინადადებების პირველადი გადარჩევა - 29 მაისიდან 13 ივნისამდე; კენჭისყრის ეტაპი - 13 ივნისიდან 23 ივნისამდე; გამარჯვებული პროექტის გამოვლენა და პროექტის დამუშავება ბიუჯეტში გათვალისწინების მიზნით - 26 ივნისიდან 6 ივლისამდე. პროექტის წარმოდგენის უფლება აქვს საქართველოს ყველა მოქალაქეს, რომელიც რეგისტრირებულია სენაკის მუნიციპალიტეტის ტერიტორიაზე. საპროექტო წინადადებების მიღება დაიწყება 24 აპრილიდან და გაგრძელდება 25 მაისამდე. საპროექტო წინადადება შეგიძლიათ წარმოადგინოთ სენაკის მუნიციპალიტეტის მერიაში, ქ. სენაკი, ჭავჭავაძის ქუჩა 103 ან ელექტრონულ მისამართზე: senakismeria@gmail.com გახდით თანამონაწილეები და დაგეგმეთ თქვენი მუნიციპალიტეტის ბიუჯეტი!", - აღნიშნულია განცხადებაში.

ბურთი საქართველოს მოედანზეა, აქამდე გათამაშება არ მომხდარა, - ამის შესახებ ლიეტუვის საგარეო საქმეთა მინისტრმა, გაბრიელიუს ლანდსბერგისმა განაცხადა, რომელმაც უპასუხა შეკითხვას იმასთან დაკავშირებით, რომ საქართველო ევროკავშირის კანდიდატის სტატუსის მინიჭებას ელოდება. ლანდსბერგისმა ევროკავშირის საგარეო საქმეთა საბჭოს დაწყებამდე განაცხადა, რომ საქართველოს საგარეო საქმეთა მინისტრს ექნება შესაძლებლობა, რეფორმები წარადგინოს. „საქართველოს საგარეო საქმეთა მინისტრს, რა თქმა უნდა, ექნება შესაძლებლობა, რომ წარადგინოს რეფორმები. მჯერა მის მიმართ ბევრი შეკითხვა იქნება. ჩვენ აქამდე არ გვინახავს ის, რაც ოპტიმიზმს წინ წაწევდა. როგორც ყოველთვის, ჩვენ ერთგული ვრჩებით, განსაკუთრებით ლიეტუვაში, განსაკუთრებით ბალტიის ქვეყნებში, ჩვენ ერთგულები ვრჩებით საქართველოს ტრანსატლანტიკური კავშირებისკენ მიმავალი გზის მიმართ. ახლა ბურთი საქართველოს მოედანზეა, მათ უნდა გაათამაშონ," - აღნიშნა ლიეტუვის საგარეო უწყების ხელმძღვანელმა. იპნ

ევროკავშირი რუსეთის გავლით გარკვეული საქონლის ტრანზიტის აკრძალვას აპირებს. ინფორმაციას Bloomberg ევროკავშირის შიდა დოკუმენტსა და საკითხის მცოდნე წყაროებზე დაყრდნობით ავრცელებს. კერძოდ, პოლონეთი, ესტონეთი და ლატვია ევროკავშირს მოუწოდებენ, აკრძალოს რუსეთის გავლით საქონლისა და ტექნოლოგიების ტრანზიტი, რომელიც შესაძლოა, თავდაცვის, საავიაციო და კოსმოსურ ინდუსტრიებში იქნას გამოყენებული ან რუსეთს წარმოების სიმძლავრეების გაფართოებაში დაეხმაროს. ამასთან, არსებობს ინიციატივა, სანქციები დაუწესდეს იმ ტანკერებსა და გემებს, რომლებიც მათი მოძრაობის საზედამხედველო-სანავიგაციო სისტემებს თიშავენ. ნაკლებად მოელიან, რომ სანქციების ახალი პაკეტი შეიცავდეს შეზღუდვებს „როსატომის“ მიმართ, რადგან, Bloomberg-ის ცნობით, ევროკავშირის ბევრი ქვეყანა რუსეთის ბირთვული ინდუსტრიის დასანქცირების წინააღმდეგია. სააგენტოს ერთ-ერთი წყარო აცხადებს, რომ პერსონალური სანქციები შესაძლოა, დამატებით კიდევ 30-მდე ფიზიკურ და რამდენიმე იურიდიულ პირს დაუწესდეს. რიგი ტექნოლოგიების მიწოდებაში რუსეთმა ევროკავშირის აკრძალვებისთვის გვერდის ავლა შეძლო. კერძოდ, Bloomberg-ის სავაჭრო მონაცემებით, ევროკავშირში და სხვა მოკავშირე ქვეყნებში წარმოებული თანამედროვე ჩიპები, ასევე, ინტეგრირებული სქემები რუსეთს მესამე ქვეყნების, მათ შორის თურქეთის, არაბეთის გაერთიანებული საემიროებისა და ყაზახეთის გავლით მიეწოდება. ამდენად, სანქციების მე-11 პაკეტში ევროკავშირი აპირებს, სწორედ ამ ხარვეზების აღმოფხვრაზე მოახდინოს ფოკუსირება. მოამზადა ლადო სულაბერიძემ

პარლამენტმა შექმნა საგამოძიებო კომისიები, როგორც მექანიზმი, რომ გამოიკვლიოს ის საკითხები, რაც მნიშვნელოვანია ქართველი ხალხისთვის, ის საკითხები, რომელიც გამჭვირვალობას, მეტ ინფორმაციას მოითხოვს. რაც ქართველ ხალხს საშუალებას აძლევს, უფრო ინფორმირებული იყოს და მეტად გამჭვირვალე გახადოს საზოგადოებისთვის მნიშვნელოვანი საკითხები, - ამის შესახებ საქართველოში აშშ-ის ელჩმა კელი დეგნანმა სასამართლოსთან დაკავშირებით პარლამენტში დროებითი საგამოძიებო კომისიის შექმნის საკითხთან დაკავშირებით კომენტირებისას განაცხადა. „მიზეზი, რის გამოც ეს მექანიზმი შეიქმნა არის ის, რომ მოქალაქეებს მეტი ინფორმაცია მიეწოდოს. ვფიქრობ, ეს არის სასარგებლო მექანიზმი, რომელიც გამოიყენება ბევრ სხვადასხვა პარლამენტში, მათ შორის აშშ-ის კონგრესში და იმედი გვაქვს, რომ პარლამენტი და პარლამენტის წევრები სრულად გამოიყენებენ ამ ინსტრუმენტს, რომელიც მათ შექმნეს თავიანთი მოქალაქეების ინტერესებიდან გამომდინარე“, - აღნიშნა ელჩმა. ინტერპრესნიუსი

წერეთლის გამზირის რეაბილიტაცია იანვარში დასრულდება, არ იციან, რა თქვან, როდესაც ქალაქისთვის მნიშვნელოვანი პროექტების განხორციელება მიმდინარეობს, – ამის შესახებ თბილისის მერმა, კახა კალაძემ ჟურნალისტებს განუცხადა კითხვაზე, რომ „ოპონენტების განცხადებით, სამუშაოები მერიას ზაფხულში უნდა დაეწყო“. კალაძის თქმით, „ეს არის ჩვეულებრივი პოლიტიკური სპეკულაცია, აბსურდი და სისულელე“. „კარგი, ვთქვათ, დავიწყეთ ზაფხულში. სექტემბერი, ოქტომბერი, ნოემბერი, დეკემბერი, იანვარი, თებერვალი ხომ გადაიწევდა? დღეს ჩვენ ვამბობთ, რომ სამუშაოები დასრულდება იანვრის თვეში. ეს რომ მოგვიანებით დაგვეწყო, ცხადია, მოგვიანებით დასრულდებოდა და მაშინ რას ვეუბნებოდით მოსახლეობას, არ იქნებოდნენ დაბრუნებული სექტემბრიდან შვებულებებიდან? ეს ჩვეულებრივი პოლიტიკური სპეკულაციაა. ისე არიან დაბოღმილები, არ იციან, რა თქვან, როდესაც ქალაქისთვის მნიშვნელოვანი პროექტების განხორციელება მიმდინარეობს. ათას სისულელეს მოიგონებენ. როგორ არ უნდა ესიამოვნოს ადამიანს, როდესაც ქალაქში ასეთი მნიშვნელოვანი სამუშაოები მიმდინარეობს. მას შემდეგ, რაც კომუნისტების დროს აქ სამუშაოები ჩატარდა. ამ ტიპის სამუშაოები არავის უწარმოებია. ხდებოდა მხოლოდ გზის საფარის შეცვლა და მეტი არაფერი. რა არის ამაში ცუდი, რომ კომუნიკაციების შეცვლა მიმდინარეობს, გვექნება ქუჩის ახალი დიზაინი. როგორიც არის ჭავჭავაძის, მელიქიშვილის, ქეთევან წამებულის გამზირები და ა.შ. ჩვენ ქალაქს სჭირდება განახლება და ასეთი მნიშვნელოვანი პროექტების განხორციელება“, – განაცხადა კახა კალაძემ. ავტორი - მაკა არჩევნიშვილი

მოსკოვის მახლობლად ასაფეთქებლით დატვირთული უპილოტო საფრენი აპარატი [იგივე დრონი] იპოვეს, იუწყება რუსული სამთავრობო მედია. როგორც „ტასსი“ წერს, დრონი 23 აპრილს ბოგოროდსკოეს ოლქში იპოვეს (დაახლოებით 10 კილომეტრი მოსკოვიდან) და ამჟამად ტარდება ექსპერტიზა, რომელიც დაადგენს დრონის გამშვებს და მისი დანიშნულების საბოლოო წერტილს. „ბაზას” ინფორმაციით, დრონი ადგილობრივმა მცხოვრებელმა იპოვა, თუმცა იფიქრა, რომ ეს „ვიღაცის სათამაშოა“ და მებაღეთა ჩათში ფოტო გააგზავნა. სწორედ ამ ჩათის ერთ-ერთმა მონაწილემ აცნობა პოლიციას. გარდა ამისა, გამოცემა წერს, რომ დრონს მიჰქონდა 17 კილოგრამი ასაფეთქებელი. სავარაუდოდ, მისი ჩამოვარდნის მიზეზი საწვავის გათავება გახდა. უკრაინაში რუსეთის სრულმასშტაბიანი შეჭრის შემდეგ ვრცელდება ცნობები რუსეთის სხვადასხვა რეგიონებში დრონების იერიშებზე, რაშიც მოსკოვი კიევს სდებს ბრალს. უკრაინა თავის მონაწილეობას უარყოფს. უკრაინის ამგვარ ოპერაციებს რუსეთის ტერიტორიაზე დასაშვებად მიიჩნევს გერმანიის თავდაცვის მინისტრი: ნეტგაზეთი

ვაპირებთ, რომ ევროკავშირის საგარეო საქმეთა საბჭოზე საქართველოზეც ვისაუბროთ. გვექნება შეხვედრა, განხილვა. ვისაუბრებთ შეერთების პერსპექტივაზე, უსაფრთხოებასთან დაკავშირებულ მდგომარეობაზე, - ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, ჯოზეფ ბორელმა ევროკავშირის საგარეო საქმეთა საბჭოს დაწყებამდე განაცხადა. „ჩვენთვის საქართველო ძალიან მნიშვნელოვანი ქვეყანაა და გვახსოვდეს, რომ მას აქვს უსაფრთხოების სპეციფიკური საკითხები, რადგან მისი ტერიტორია ნაწილობრივ ოკუპირებულია რუსეთის მიერ. ასე რომ, ეს მნიშვნელოვანი დღეა საქართველოს შესახებ სასაუბროდ“, - აღნიშნა ჟოზეფ ბორელმა. ინტერპრესნიუსი

„ქართული ოცნების“ დეპუტატი მიხეილ სარჯველაძე ე.წ. ქოლცენტრების საქმეზე პარლამენტში დროებითი საგამოძიებო კომისიის შექმნის საჭიროებას ვერ ხედავს. სარჯველაძის შეფასებით, ოპოზიციის ინიციატივა პოლიტიკურად ცხელი თემის შექმნას ისახავს მიზნად და არა კონკრეტულ საკითხზე ჭეშმარიტების დადგენას. მისივე განცხადებით, მოსაზრება იმის თაობაზე, თითქოს არსებობს რაღაც გარემოებები, რის გამოც პარლამენტის საგამოძიებო კომისიის შექმნა მიზანშეწონილია, დაუსაბუთებელი და არაარგუმენტირებულია. „პარლამენტში საგამოძიებო კომისია არ იქმნება ნებისმიერ დანაშაულთან და დანაშაულის შემცველ ფაქტთან დაკავშირებით. ამას კიდევ ბევრი სხვა დასაბუთება სჭირდება. კარგად უნდა გვესმოდეს, რომ საგამოძიებო კომისია არ შეიძლება განვიხილოთ როგორც საგამოძიებო ორგანოების ალტერნატივა. ეს არის განსხვავებული მიმართულებების შემსწავლელი მექანიზმი, მაგრამ არამც და არამც სტანდარტული გამოძიების ალტერნატივა. განცხადება იმის შესახებ, რომ სამართალდამცავი სტრუქტურები საკითხით არ ინტერესდებიან, სწორი არ არის. პოლიტიკოსები მსგავსი საკითხების შეფასებას მეტი პასუხისმგებლობით უნდა მოეკიდონ. ეს არის ტრანსნაციონალური დანაშაული, რომელსაც ტრანსსასაზღვრო ანუ სხვადასხვა სახელმწიფოთა სამართალდამცავი სტრუქტურების თანამშრომლობა სჭირდება. საქართველოს ევროპულ კოლეგა დაწესებულებებთან თანამშრომლობის ძალიან კარგი არხები აქვს. არ მგონია ვინმეს საიმისო მიზეზი ჰქონდეს, რომ ქართულ საგამოძიებო სტრუქტურების საქმიანობას კრიტიკულად მიუდგეს“, - განაცხადა მიხეილ სარჯველაძემ. ცნობისთვის, პარტია „საქართველოსთვის“ გამოდის ინიციატივით, პარლამენტში შეიქმნას დროებითი საგამოძიებო კომისია, რომელიც საქართველოს ტერიტორიაზე ჩადენილ ე.წ. თაღლითური ქოლ-ცენტრების საქმეს შეისწავლის.

სახალხო დამცველმა, ლევან იოსელიანმა აქონდროპლაზიის დიაგნოზის მქონე ბავშვების მშობლებთან შეხვედრის მზაობა გამოთქვა, თუმცა არ დაუკონკრეტებია, როდის აპირებს მათთან აქციაზე მისვლას. როგორც ლევან იოსელიანი აღნიშნავს, მას პოლიტიკოსები უკავშირდებიან და მშობლების აქციაზე მისვლას სთხოვენ, თუმცა ის „პოლიტიკოსებთან ერთად აქციაზე მისვლას არ აპირებს". „ეს არ არის ჩემი საქმიანობის ნაწილი, რომ პოლიტიკოსებთან ერთად მივიდე რამე აქციაზე. რაც შეეხება მშობლებს - მშობლებთან მისვლის ნაწილში მე არანაირი პრობლემა არ მაქვს და მივალ," - განაცხადა იოსელიანმა. მისივე თქმით, პრობლემის გადაწყვეტა ჯანდაცვის სამინისტროს პრეროგატივაა და ამაზე სახალხო დამცველი ვერ იქნება პასუხისმგებელი. „დიდი ხანია უკვე, რაც ჩართული ვართ მათი პრობლემის მოგვარების პროცესში. ჩვენი ინიციატივით შეიქმნა სამუშაო ჯგუფი ჯანდაცვის სამინისტროსთან და ჩვენი მანდატის ფარგლებში ვუწევთ ამ პროცესს მედიაციას. ჩართულები ვართ ამ ყველაფერში. მთელი ეს პერიოდი ჩვენი თანამშრომლები არიან მათთან ხაზზე და დღესაც ჩემი დეპარტამენტის უფროსი იმყოფებოდა მათთან, კიდევ ერთხელ დაათვალიერა და ნახა ის გარემო, სადაც მათ უწევთ თავიანთი პროტესტის გამოხატვა და ხომ არ აქვს რაიმე ხელშეშლა პროტესტის გამოხატვის თვალსაზრისით. რაც შეეხება პრობლემის გადაწყვეტას - ეს არის შესაბამისი უწყების მიერ გადასაწყვეტი პრობლემა და სახალხო დამცველი ამ გადაწყვეტილებას ვერ მიიღებს, მაგრამ ჩვენ შეგვიძლია მათ დავეხმაროთ ამ კომუნიკაციაში და რა თქმა უნდა, გამოხატვის ნაწილში მათი უფლებები რომ იყოს უზრუნველყოფილი," - განაცხადა სახალხო დამცველმა.

ეს სასწავლო ვიზიტები ნამდვილად პოპულარული და წარმატებულია, ვინაიდან ის ერთად კრებს მოსამართლეებს აშშ-დან, საქართველოდან და აძლევს მათ შესაძლებლობას, რომ გაუზიარონ ერთმანეთს ცოდნა, საუკეთესო პრაქტიკა, - ამის შესახებ საქართველოში აშშ-ის ელჩმა, კელი დეგნანმა განაცხადა, როდესაც უპასუხა შეკითხვას ოთხ ქართველ მოსამართლესთან დაკავშირებით, რომლებიც აშშ-ში სასწავლო ვიზიტით გაემგზავრნენ. როგორც ელჩმა აღნიშნა, „აშშ-ს პროგრამები ღიაა მათთვის, ვინც არის კვალიფიცირებული, ასევე ვისაც შეუძლია სარგებელი მიიღოს ამ გაცვლითი პროგრამებისგან და თავიანთ სასამართლო დარბაზებში ჩამოიტანონ იდეები“. „ღიაა ასევე მათთვის, ვისაც შეუძლია წასვლა, რადგან ეს დაკავშირებულია დიდ დროსთან და ზოგჯერ 2 კვირაზე მეტხანსაც გრძელდება. ასე რომ, ჩვენ ყოველთვის მოხარული ვართ, როდესაც ქართველი მოსამართლეები ირჩევენ ჩვენს პროგრამებს და დიდ ინტერესს ვიჩენთ და მოუთმენლად ველით ქართველი და ამერიკელი მოსამართლეების ამ შესანიშნავი გაცვლით პროგრამების გაგრძელებას“, - აღნიშნა ელჩმა. ინტერპრესნიუსი

ივნისიდან, ტრანსპორტის გამონაბოლქვის შემადგენლობის კონტროლი დაიწყება. როგორც სოფლის მეურნეობის სამინისტროს გარემოსდაცვითი ზედამხედველობის დეპარტამენტის წარმომადგენელმა, ტარიელ ირემაძემ აღნიშნა, პირველ ეტაპზე კანონი 4 ქალაქში ამოქმედდება - თბილისში, ქუთაისში, ბათუმსა და რუსთავში; სანქციები კი შემდეგნაირად განისაზღვრება: დამრღვევი ფიზიკური პირი პირველ ჯერზე დაჯარიმდება 100 ლარით, განმეორების შემთხვევაში კი - 300 ლარით. „გარემოსდაცვითი ზედამხედველობის დეპარტამენტი, 2023 წლის ივნისიდან გეგმავს გზებზე, ავტოსატრანსპორტო საშუალებებზე ხილული გამონაბოლქვის კონტროლის განხორციელებას. კერძოდ, გარემოსდაცვითი ზედამხედველობის დეპარტამენტის პატრულირების და სწრაფი რეაგირების თანამშრომლები, პირველ ეტაპზე საქართველოს 4 დიდ ქალაქში ( თბილისი, ბათუმი, რუსთავი, ქუთაისი) საპილოტე რეჟიმში განახორციელებენ გზებზე ნებისმიერი ტიპის ავტოსატრანსპორტო საშუალების გაჩერებას და მავნე ნივთიერებების გამონაბოლქვზე შემოწმებას. სპეციალური ხელსაწყოებით გაზომვის შემდეგ, თუ დადგინდება კონკრეტული მავნე ნივთიერებების გადაჭარბება, ფიზიკური პირის შემთხვევაში, თავდაპირველად სანქცია განისაზღვრება 100 ლარით, ხოლო 30 დღის განმავლობაში განმეორების შემთხვევაში ჯარიმა გასამმაგდება და 300 ლარი გახდება. რა თქმა უნდა, პირველ ეტაპზე აქცენტი გაკეთდება ხილულ გამონაბოლქვზე, ნებისმიერი ტიპის ავტოსატრანსპორტო საშუალებაზე. ამასთან, შემოწმებას გაივლის ის ავტოსატრანსპორტო საშუალებაც, რომელიც გზაზე მოძრაობს და ხილული გამონაბოლქვი არ გააჩნია. ჩვენს ეკიპაჟს ნებისმიერი ტიპის ავტოსატრანსპორტო საშუალების გაჩერების უფლება ექნება. თუ კონკრეტულ ავტოსატრანსპორტო საშუალებას ადგილზე დაუდგინდება მავნე ნივთიერებების გადაჭარბება და ავტომობილის მესაკუთრე არ დაეთანხმება შედეგებს, მას უფლება აქვს ავტომობილის გადაყვანა მოითხოვოს უახლოეს ტექინსპექტირების ცენტრში. ტექინსპექტირების ცენტრში ახლიდან გადის ავტომობილი ტექნიკურ დათვალიერებას, ოღონდ არამარტო გამონაბოლქვზე. თუ დადასტურდება ჩვენს მიერ წარდგენილი შედეგები, შედგენილი ოქმი ძალაში რჩება. თუ არ დადასტურდა და სხვა შედეგი იქნება, ჯარიმის ანულირება მოხდება. ამ შემთხვევაში, ტექინსპექტირების საფასურის გადახდა არ ეკისრება ავტოსატრანსპორტო საშუალების მესაკუთრეს. საპილოტე რეჟიმის დასრულების შემდეგ, ეს არეალი გაიზრდება. კონტროლი მკაცრი იქნება, ამასთან, მაქსიმალურად დაიფარება დიდი წერტილები. საპილოტე რეჟიმში დაგეგმილია, რომ გვყავდეს 10 ეკიპაჟი. შესაძლოა, ეს არ იყოს დიდი რაოდენობა, თუმცა საპილოტე რეჟიმში მივიღებთ იმ მონაცემებს, რომელიც შეფასებისთვის საკმარისი იქნება“,- აღნიშნა ტარიელ ირემაძემ მედიაცენტრ „მთავარში“. იპნ

პარტია „საქართველოსთვის“ გამოდის ინიციატივით, პარლამენტში შეიქმნას დროებითი საგამოძიებო კომისია, რომელიც საქართველოს ტერიტორიაზე ჩადენილ ე.წ. თაღლითური ქოლ-ცენტრების საქმეს შეისწავლის. შესაბამისი დადგენილების პროექტის შესახებ პარტია „საქართველოსთვის“ აღმასრულებელმა მდივანმა ბერდია სიჭინავამ და პარტიის წევრმა დეპუტატებმა პარლამენტში გამართულ ბრიფინგზე განაცხადეს. მათივე ინფორმაციით, პარტია უახლოეს დღეებში საკონსტიტუციო სარჩელს წარადგენს, რათა ხელისუფლებამ რეგლამენტში არსებული ჩანაწერის ბოროტად გამოყენებით პარლამენტის წევრების მიერ კონსტიტუციური უფლების რეალიზებისთვის უკანონო ბარიერების შექმნა ვერ შეძლოს. პარტია „საქართველოსთვის“ როგორც „ქართულ ოცნებას“, ასევე „ნაციონალურ მოძრაობას“, სხვა პარტიების წარმომადგენლებსა და დამოუკიდებელ დეპუტატებს დროებითი საგამოძიებო კომისიის შექმნის ინიციატივის მხარდაჭერისკენ მოუწოდებს. „ფაქტია, რომ საერთაშორისო გამოძიება აღნიშნულ საკითხთან დაკავშირებით უახლოეს მომავალში კონკრეტულ შედეგებამდე მივა. ამ სქემის დადასტურების შემთხვევაში ქვეყანას ელოდება მძიმე პოლიტიკური შედეგები, იმ რეპუტაციულ ზიანთან ერთად, რომელიც უკვე ყოველდღიურად გვიდგას იმ დანაშაულის გამო, რომელიც ჩვენი ქვეყნის ტერიტორიიდან ხორციელდება და რის შედეგადაც ევროკავშირის მოქალაქეებს ასობით მილიონი დოლარს ჰპარავენ დღემდე“, - განაცხადა ბერდია სიჭინავამ. ბერდია სიჭინავა აღნიშნავს, რომ ამ მძიმე, კრიმინალურ „ქეისს“, პოლიტიკური პარტიების ნაწილი ერთმანეთის წინააღმდეგ პოლიტიკური თავდასხმისთვის იყენებს. „საზოგადოებაში ლეგიტიმურად ისმის კითხვები, როგორ მოხდა, რომ საქართველოში უკვე მესამე წელია საკითხზე გამოძიება მიმდინარეობს და BBC-ის ჟურნალისტურმა გამოძიებამ უფრო მეტი შედეგი აჩვენა, ვიდრე ჩვენმა სამართალდამცავმა ორგანოებმა?! როგორ ვიგებთ ასეთ ფაქტებს უცხოეთიდან და არა ჩვენი სამართალდამცავი ორგანოებისგან?! რამდენად შესაძლებელია, ხორციელდებოდეს ამ მასშტაბის ორგანიზებული დანაშაული დედაქალაქში, ათასობით დასაქმებული პირის ჩართულობით და ამის შესახებ არ ფლობდეს ინფორმაციას არც ერთი სახელმწიფო უწყება?! ვინ იღებს პოლიტიკურ პასუხისმგებლობას იმაზე, რომ სახელმწიფოს ინტერესებისა და საერთაშორისო რეპუტაციის ხარჯზე, ქვეყნის ტერიტორიაზე ჩადენილი ტრანსნაციონალური დანაშაულით მდიდრდებიან საერთაშორისო კრიმინალები და მათი გავლენიანი მფარველები სახელისუფლებო წრეებიდან და მათი ახლო გარემოცვიდან?! ყველანი ვხედავთ, რომ ამ მძიმე კრიმინალურ „ქეისს“, პოლიტიკური პარტიების ნაწილი ერთმანეთის წინააღმდეგ პოლიტიკური თავდასხმისთვის იყენებს. ზოგიერთი ამით ცდილობს ევროკავშირის მოქალაქეებისგან მოპარული ფულის დაცვას და საკუთარი რეპუტაციის გადარჩენას, საერთაშორისო სანქციებისა და სისხლისსამართლებრივი პასუხისმგებლობისგან თავის არიდებას. ამიტომ, გთავაზობთ, პარლამენტში შევქმნათ დროებითი საგამოძიებო კომისია, რომელიც უზრუნველყოფს გამოძიების პროცესში სახელმწიფო ინსტიტუტების სისტემური ჩავარდნების გადაზღვევას და მიმართული იქნება საქართველოს ტერიტორიაზე ჩადენილ შესაძლო ტრანსნაციონალური თაღლითური ქოლ-ცენტრების საქმის გამოძიების ხელშეწყობისკენ, დაადგენს სახელმწიფო ინსტიტუტების უმოქმედობის მიზეზებს, გამოავლენს ამ დანაშაულის ორგანიზატორებს და ხელისუფლებასთან დაკავშირებულ გავლენიან მფარველებს“, - განაცხადა ბერდია სიჭინავამ. იპნ

სუდანიდან საქართველოს მოქალაქეების ევაკუაციის პროცესი დაიწყო. აღნიშნულის შესახებ ინფორმაციას საქართველოს საგარეო საქმეთა სამინისტრო ავრცელებს. „სუდანიდან საქართველოს მოქალაქეების ევაკუაციის პროცესი დაწყებულია. მათ უკვე დატოვეს ადგილი, სადაც გუშინ იქნენ გადაყვანილი და ხორციელდება მათი ქვეყნიდან გამოყვანის პროცესი“, – ნათქვამია ინფორმაციაში.

საგამოძიებო კომისიის შექმნას, რომელსაც ჩვენი ოპონენტები ცდილობენ და აანონსებენ, არაფერი კავშირი არ აქვს რაიმეს გამოძიებასთან, – ამის შესახებ საქართველოს განათლებისა და მეცნიერების მინისტრმა, გიორგი ამილახვარმა განაცხადა. მისივე თქმით, ოპოზიციას უნდა, უფრო მეტი ჩირქი მოსცხოს დამოუკიდებელი მართლმსაჯულების სისტემას. „იმ სისტემას, რომელსაც ხელშესახები შედეგები აქვს. ჩვენ თუ ბოლო ათ წელს გავაანალიზებთ, შევადარებთ წინა ხელისუფლების მართლმსაჯულების სისტემის შედეგებს და დღევანდელს, მათ შორის დამოუკიდებლობის ხარისხს, სტრასბურგში მიმართვიანობის რიცხვს, მოქალაქეთა საანდოობის კუთხით გაკეთებულ კვლევებს, საერთაშორისო კვლევებს – ეს არის ის შედეგები, რაც დღეს ხელშესახებია. სწორედ ამ საგამოძიებო კომისიით, მაშინ, როდესაც მოახლოებულია კანდიდატის სტატუსის მინიჭების ვადა, პირიქით, უნდათ, დისკრედიტაცია მოახდინონ და ჩირქი მოსცხონ იმ მართლმსაჯულების სისტემას, რომელიც დღეს დიახ, ხელისუფლების ვალია და ამას აკეთებს, რომ დაიცავს ნებისმიერ ფასად, როგორც გარე, ასევე შიდა ნებისმიერი ძალის ჩარევისგან“, – განაცხადა გიორგი ამილახვარმა. ავტორი - სოფიო დემეტრაშვილი

საქართველოს განათლებისა და მეცნიერების მინისტრის, გიორგი ამილახვარის განცხადებით, საგამოძიებო უწყებები ყველა ზომას მიმართავენ, რომ ე.წ. ქოლცენტრების საქმე სათანადოდ იყოს გამოძიებული. მისივე თქმით, ოპოზიციონერ კოლეგები არაფერს ამბობენ იმის შესახებ, რომ ევროპელი პენსიონერებისთვის მოპარულ ფულს მისგან დღემდე იღებენ. „ოპოზიცია რაზე წუხს, არ ვიცი, რა ადარდებთ, რატომ არ ვიძიებთ ამ საქმეს? ბუნებრივია, საგამოძიებო უწყებები, კომპეტენციის ფარგლებში, ყველა ზომას მიმართავენ, რომ შესაბამისი საქმე სათანადოდ იქნას გამოძიებული. ჩვენი ოპონენტები რატომ არ ღელავენ კეზერაშვილზე, რატომ არ ამბობენ და აკეთებენ კომენტარს, რომ ევროპელი პენსიონერებისთვის მოპარულ ფულს მისგან დღემდე იღებენ? რატომ არ აკეთებს ის ტელევიზია განცხადებას, რომელიც პირდაპირ ფინანსდება ევროპელი პენსიონერებისგან მოპარული ფულით და ასე შემდეგ. ჩვენს კოლეგებს ოპოზიციაში ვურჩევდი, პირველ რიგში, ამ საკითხებით დაინტერესდნენ. ბუნებრივია, საგამოძიებო უწყებები ყველა ზომას მიმართავენ კანონის ფარგლებში, რომ გამოძიება წარიმართოს ობიექტურად და დადგეს შესაბამისი სამართლებრივი შედეგი“, – განაცხადა გიორგი ამილახვარმა. ავტორი - სოფიო დემეტრაშვილი

სასკოლო ინფრასტრუქტურაში რა წამს იქნება შესაბამისი კვების ინფრასტრუქტურა განვითარებული და უკვე გარკვეულ სკოლებში არის, ჩვენ პარალელურად ვიწყებთ მსჯელობას და ფიქრს იმ სისტემაზე, როგორ დავფაროთ ყველა სკოლაში საბავშვო კვება, - ამის შესახებ განათლებისა და მეცნიერების მინისტრმა, გიორგი ამილახვარმა ჟურნალისტებთან საუბრისას განაცხადა. მისივე თქმით, სკოლების მშენებლობა-რეაბილიტაციის პროექტის ფარგლებში ერთ-ერთი მნიშვნელოვანი კომპონენტი სწორედ სასადილოების მოწყობას უკავშირდება. „რა თქმა უნდა, გამოწვევები არის და მე და ჩვენ ამას არ გავურბივართ. ამაზე ღიადაც ვლაპარაკობთ. მათ შორის, არის, რა თქმა უნდა, სასკოლო კვებასთან დაკავშირებული საკითხი, რომელიც სამი ათწლეულია ჩვენს სისტემას მოსდევს. რას ვაკეთებთ ჩვენ? ის უპრეცედენტო ინფრასტრუქტურული პროექტები, რომლებიც ახლა მიმდინარეობს და უკვე 400 სკოლის მშენებლობა-რეაბილიტაცია დაპროექტებულია 2-3 წლის განმავლობაში და ამას კიდევ გადაბმულად მოსდევს 400 სკოლა, სადაც ერთ-ერთი მნიშვნელოვანი და მთავარი კომპონენტი არის სასადილო ინფრასტრუქტურა ანუ, სკოლებში იმ ინფრასტრუქტურის მოწყობა, რომელიც შემდგომ აუცილებელია სერვისისთვის, რომ ჩვენი შვილები უზრუნველვყოთ ხარისხიანი, უსაფრთხო კვების მიწოდებით. პარალელურად, სამინისტრო მუშაობს სხვადასხვა საერთაშორისო გამოცდილებაზე და კვლევაზე, იმ მიდგომებზე და მეთოდოლოგიაზე, თუ როგორ შეგვიძლია ჩვენ სისტემურად მივუდგეთ ამ მნიშვნელოვან და მტკივნეულ საკითხს,“ - განაცხადა მინისტრმა. ipn