tvati

ჩვენმა პარტნიორებმა უნდა გაიგონ, რომ დღეს სწორედ მტკიცე გადაწყვეტილების მიღების დროა და არა ყოყმანის - რუსეთის მიმართ გზავნილი მკაფიო და ერთგვაროვანი უნდა იყოს , - ამის შესახებ საქართველოს პრეზიდენტმა, სალომე ზურაბიშვილმა საქართველოს თავდაცვის ძალების დღესთან დაკავშირებით სიტყვით გამოსვლისას განაცხადა. მისივე თქმით, რუსეთი უნდა დარწმუნდეს, რომ მისი აგრესიული ქმედებები და მუქარით აღსავსე ტონი არანაირ გავლენას საქართველოს კონსტიტუციაში ასახულ გადაწყვეტილებაზე და ორიენტაციაზე არ ახდენს. „ახალი გეოპოლიტიკური მოცემულობა იმას ნიშნავს, რომ ქვეყნის მშვიდობისა და უსაფრთხოების განმტკიცებისთვის ყველა შესაძლებლობა გამოყენებული უნდა იყოს. ძალისხმევა არ უნდა დავიშუროთ, ატლანტიკურ ალიანსში ჩვენი ინტეგრაციის გზის განმტკიცებისთვის. ვიმედოვნოთ, რომ ვილნიუსის სამიტი ამ კუთხით საეტაპო აღმოჩნდება. რუსეთი უნდა დარწმუნდეს, რომ მისი აგრესიული ქმედებები და მუქარით აღსავსე ტონი არანაირ გავლენას არ ახდენს ჩვენს მუდმივ და კონსტიტუციაში ასახულ გადაწყვეტილებაზე და ორიენტაციაზე. ჩვენმა პარტნიორებმა უნდა გაიგონ, რომ დღეს სწორედ მტკიცე გადაწყვეტილების მიღების დროა და არა ყოყმანის. რუსეთის მიმართ გზავნილი უნდა იყოს მკაფიო და ერთგვაროვანი. ძალიან მნიშვნელოვანია და ძალიან ვაფასებთ წლების მანძილზე პარტნიორების მიერ გაწეულ უდიდეს დახმარებას, მათი ძალისხმევით, სწავლებებით და თანამედროვე აღჭურვილობით ამაღლდა ჩვენი ძალების პროფესიონალიზმი და საერთაშორისო სტანდარტებთან თავსებადობა. საერთაშორისო სამშვიდობო მისიებში ჩვენმა აქტიურმა მონაწილეობამ დიდი როლი ითამაშა ჯარის მოდერნიზაციასა და განვითარების გზაზე. სწორედ, იქ შევძელით, რომ მაგალითი საქართველოს ჯარის მზადყოფნის მიგვეცა, საერთაშორისო გამოწვევებთან გამკლავების და ამით საქართველო დამკვიდრდა, როგორც სანდო და საიმედო პარტნიორი. თქვენ მსოფლიოს აჩვენეთ, რომ ურთულეს პირობებში ღირსეული ადგილის დაკავება შეგიძლიათ“, - განაცხადა სალომე ზურაბიშვილმა. როგორც მან აღნიშნა, საერთაშორისო სამშვიდობო მისიებში საქართველოს აქტიურმა მონაწილეობამ ჯარის მოდერნიზაციასა და განვითარების გზაზე დიდი როლი ითამაშა. „ქართველებს კარგად გვესმის, რომ პარტნიორობა ორმხრივი გზაა და თქვენ ესეც დაამტკიცეთ. თავდაცვის ძალებს დღევანდელი გლობალური საფრთხეების წინაშე ქვეყნის უსაფრთხოების დასაცავად უფრო და უფრო განსხვავებული მისიები და ვალდებულებები ეკისრებათ, ამის არც თუ ისე შორი მაგალითი კოვიდ პანდემიაა, სადაც კარგად გამოჩნდა ჩვენი თავდაცვის ძალების დიდი წვრილი, მზადყოფნა და პროფესიონალიზმი. კლიმატური ცვლილებები და მისგან გამოწვეული საფრთხეები ჩვენი ძალებისთვის ახალ აღჭურვილობას და მზადყოფნას მოითხოვს, საზოგადოების ყველა საჭიროებისა და უსაფრთხოების დასაცავად. კიბერუსაფრთხოება ახალი მსოფლიოს ერთ-ერთი ურთულესი გამოწვევაა, რომელსაც ასევე უნდა გავუმკლავდეთ. მჯერა და ვიცი, რომ თქვენ ამას შეძლებთ, იქნებით ყველგან და ყოველთვის იქ, სადაც დაგიძახებთ თქვენი მოვალეობა და ამ ქვეყნის სამსახური. ამისთვის, მინდა კიდევ ერთხელ გამოვხატო ჩემი და ჩვენი საზოგადოების მადლიერება. გილოცავთ ფიცის დადებას, ამ ფიცის ერთგულნი იყავით მუდამ, ამ ფიცის და თქვენი სამშობლოს ღირსნი იყავით მუდამ, ამაყად ატარეთ ჩვენი ქვეყნის დროშა. თქვენ საქართველოს ჯარისკაცებო გილოცავთ თავდაცვის ძალების დღეს, თქვენ ემსახურებით საქართველოს და ამაზე დიდი საპატიო და საამაყო სამსახური არ არსებობს“, - განაცხადა სალომე ზურაბიშვილმა. IPN

სანქცირებული რუსული ონლაინ საცალო მოვაჭრე Wildberries საქართველოს ბაზარზე შესვლას განიხილავს. ამასთან, კომპანია აზერბაიჯანსა და ტაჯიკეთში შესვლასაც აპირებს. ამის შესახებ Wildberries-ის დამფუძნებელმა და აღმასრულებელმა დირექტორმა, ტატიანა ბაკალჩუკმა განაცხადა, რასაც „ტასი“ ავრცელებს. მისი თქმით, კომპანია მისთვის ახალი ქვეყნების ბაზარზე და ზოგადად, დსთ-ში გაფართოებას გეგმავს. მით უმეტეს, როგორც ბაკალჩუკი ამბობს, „ზოგიერთი ქვეყანა რუსეთსა და იმ ქვეყანას შორის მდებარეობს, სადაც Wildberries უკვე ოპერირებს.“ სწორედ ასეთ შუა რგოლებად განიხილავს ბაკალჩუკი საქართველოს, აზერბაიჯანსა და ტაჯიკეთს, თუმცა ამ ქვეყნებში შესვლის კონკრეტულ ვადებზე საუბარს ნაადრევად მიიჩნევს. ამ დროისთვის Wildberries რუსეთის გარდა, ბელარუსში, ყაზახეთში, ყირგიზეთში, სომხეთში, ისრაელსა და უზბეკეთში ოპერირებს. აღსანიშნავია, რომ ტატიანა ბაკალჩუკი გასული წლის ოქტომბერში უკრაინამ სანქცირებული 256 რუსი ბიზნესმენისა და მათი ოჯახის წევრების სიაში შეიყვანა. ასევე, 2022 წლის აპრილში პოლონეთმა რუსეთისა და ბელარუსის წინააღმდეგ სანქციების სია გამოაქვეყნა, რომელშიც 50 სუბიექტი, მათ შორის 35 კომპანია და 15 ფიზიკური პირი შეიყვანა. სიაში არის Wildberries და ტატიანა ბაკალჩუკიც. პოლონური სანქციები ამ კომპანიის ფინანსური აქტივებისა და ქონების გაყინვას ითვალისწინებს, ასევე, ტენდერებში მის მონაწილეობას გამორიცხვას, თავად ბაკალჩუკს კი პოლონეთში შესვლა აეკრძალა. ტატიანა ბაკალჩუკი „პარალელური იმპორტის“ ერთ-ერთი ინიციატორი და ამ იმპორტში წამყვანი ონლაინ კომპანიაა. გასული წლის მარტში, დასანქცირებამდე რამდენიმე დღით ადრე ბაკალჩუკი ანტიმონოპოლიური სამსახურის ხელმძღვანელს შეხვდა, რა დროსაც „პარალელური იმპორტის“ ლეგალიზების საკითხი განიხილეს. კერძოდ, ბაკალჩუკი მაშინ აცხადებდა, რომ „პარალელური იმპორტი“ მცირე და საშუალო ბიზნესს საშუალებას მისცემდა, ქვეყანაში უცხოური საქონელი, დამატებითი ნებართვის გარეშე ლეგალურად შეეტანა და მომხმარებელი საქონლის ფართო ასორტიმენტზე მიიღებდა წვდომას. „ეს იქნება მაღალი ხარისხი გონივრულ ფასებში,“ - ამბობდა Wildberries-ის აღმასრულებელი დირექტორი. როგორც ჩანს, „პარალელური იმპორტი“ ბაკალჩუკისთვის მაშველი რგოლი აღმოჩნდა, რადგან უკრაინის ომის დაწყებიდან ის ქონებას კატასტროფულად კარგავდა. კერძოდ, თუ 2022 წლის მარტამდე Wildberries-ის ოფისები 18 ქვეყანაში, მათ შორის აშშ-ში, დიდ ბრიტანეთში, გერმანიაში, საფრანგეთში, იტალიასა და ესპანეთში ჰქონდა, სანქციების შემდეგ, ანუ იმავე წლის ზაფხულისთვის ქვეყნების სია ექვსამდე შემცირდა და კომპანიას ყაზახეთის, ბელარუსის, სომხეთის, უზბეკეთის, ყირგიზეთისა და ისრაელის ბაზრები დარჩა. ტატიანამ Forbes-2022-ის ყველაზე გაღარიბებული რუსი მილიარდერების სიაში მეორე ადგილი დაიკავა. მან 8.3 მლრდ დოლარი დაკარგა და ოდნავ ჩამორჩა პირველ ადგილზე გასულ „სევერსტალის“ დამფუძნებელ ალექსეი მორდაშოვს, რომელმაც უკრაინის ომის წლისთავზე 11 მლრდ დოლარით იზარალა. ზარალის შემდეგ ბაკალჩუკის დარჩენილ ქონებას Forbes ორჯერ ნაკლებად, 4,7 მლრდ დოლარად აფასებდა. თუმცა Forbes-2023 წლის რეიტნგში 47 წლის ტატიანა ბაკალჩუკი ახლა უკვე 8,8 მლრდ დოლარით მე-17 ადგილზეა, მაშინ, როცა წინა წელს 39-ე პოზიციას იკავებდა. ჟურნალის მონაცემებით, გასულ წელს Wildberries-ის შეკვეთების რაოდენობამ საიტზე 1,5 მილიარდს მიაღწია და დღეში ვებგვერდი, დაახლოებით, 7 მილიონ შეკვეთას ამუშავებს. 2022 წელს, „პარალელური იმპორტის“ ლეგალიზების შემდეგ Wildberries-ის ბრუნვა, თითქმის, გაორმაგდა და 1,669 ტრლნ რუბლს (20,7 მლრდ დოლარს) მიაღწია. ბაკარჩუკმა ეს ბიზნესი ჯერ კიდევ 2004 წელს, ინგლისური ენის მასწავლებლად მუშაობის დროს წამოიწყო. ბავშვის გაჩენის შემდეგ, დეკრეტულ შვებულებაში მყოფმა ტატიანამ გერმანული კატალოგებით, Otto-თი და Quelle-ით ტანსაცმლის გაყიდვა და ამით დამატებითი შემოსავლის შოვნა გადაწყვიტა. მალე მეუღლესთან, ვლადისლავთან ერთად ინტერნეტ-მაღაზია, Wildberries გახსნა და პირველ ეტაპზე ამანათებს შემკვეთების მისამართზე თავად არიგებდა. 2019 წლის აგვისტოში Wildberries-მა რუსეთში 5000-ე გამცემი პუნქტი გახსნა. 2021 წლის დასაწყისში ტატიანა ბაკალჩუკი პატარა ბანკის, „სტანდარტ-კრედიტის“ მფლობელი გახდა, რომელსაც 2022 წელს „Wildberry Bank“-ით შეუცვალა სახელი. მან Wildberries-ზე წარმოდგენილი საქონლის 2%-იანი ფასდაკლებით შესყიდვისთვის ვირტუალური სადებეტო WB-ბარათის გაცემა დაიწყო. 2022 წელს, ზედიზედ მეორედ, Forbes-ის 20 ყველაზე მდიდარი self-made რუსი ქალის რეიტინგში ტატიანა ბაკალჩუკმა პირველი ადგილი დაიკავა. მოამზადა ლადო სულაბერიძემ

თბილისის სავაჭრო ცენტრების უმრავლესობაში პარკირება ფასიანია. ავტომობილის უფასოდ გაჩერება მხოლოდ “ისთ ფოინთსა” და „თბილისი“ მოლშია შესაძლებელი. რაც შეეხება სხვა ყველაზე დიდ სავაჭრო ობიექტებს, ფასები 1 ლარიდან იწყება და 40 ლარამდეც კი ადის. „ბიზნესპრესნიუსი“ გთავაზობთ ინფორმაციას პარკინგის საფასურის შესახებ. „სითი მოლში“ პარკინგი პირველი ერთი საათი – 1 ლარი ღირს, ყოველი მომდევნო საათი კი – 2 ლარი. ამასთან, მთელი დღით, ანუ 12 საათით ავტოსადგომზე პარკირების საფასური – 40 ლარის შეადგენს. „გალერეა თბილისში“ ავტომობილის გაჩერება ნახევარი საათით უფასოა, ყოველი მომდევნო საათი კი 3 ლარი ღირს. სტანდარტულად 3 ღირს „თბილისი ცენტრალში“ პარკირებაც. „ლილო მოლში“ კი, რომელიც საქართველოში ყველაზე დიდი სავაჭრო ობიექტია, ავტომობილის გაჩერება 5 ლარი ღირს. რაც შეეხება „თბილისი მოლსა“ და „ისთ ფოინთს“, ავტოსადგომით სარგებლობა უფასოა. ავტორი: ნინი ქეთელაური

უკრაინელების გამარჯვება განაპირობებს მსოფლიოს ხვალინდელ დღეს, მათი და ყველა ჩვენგანის თავისუფლებას , - ამის შესახებ საქართველოს პრეზიდენტმა სალომე ზურაბიშვილმა საქართველოს თავდაცვის ძალების დღისადმი მიძღვნილ ღონისძიებაზე სიტყვით გამოსვლისას განაცხადა. მისი თქმით, უკრაინაში დაუნდობელმა აგრესიამ რუსეთის იმპერიალიზმის ხასიათი ყველასთვის გამოააშკარავა და „საფრთხის ახალი აღქმა გამოიწვია“. „21-ეს საუკუნეში აგრესიული იმპერიალიზმი, რაც არ უნდა ანაქრომულად ჟღერდეს, ახალი სისასტიკით და დაუნდობლობით იჩენს თავს. უკრაინის მიმართ რუსეთის მიერ 14 თვის წინ გაჩაღებულმა ომმა მსოფლიო შეძრა, რამეთუ აბუჩად იქნა აგდებული ყველა საერთაშორისო სამართლის და ჰუმანიტარული პრინციპი. თუმცა სისასტიკისა და ძალთა შეფარდების მიუხედავად, უცხო, შემოჭრილი ძალა ქვეყნის დაცვისთვის და გადარჩენისთვის თავდადებულ ძალას ვერ ჯობნის, ვერ ამარცხებს. ეს ის მაგალითია, რომელიც ჩვენს ისტორიაში საქართველოს მიერ მრავალჯერ იქნა ნაჩვენები. ამდენად, უფრო მეტად გვესმის და ვგულშემატკივრობთ უკრაინას და მის ღირსეულ სამხედრო და სამოქალაქო მებრძოლებს. მათი გამარჯვება განაპირობებს მსოფლიოს ხვალინდელ დღეს, მათი და ყველა ჩვენგანის თავისუფლებას. ამ დაუნდობელმა აგრესიამ რუსეთის იმპერიალიზმის ხასიათი ყველასთვის გამოააშკარავა. მსოფლიოში და მითუმეტეს ევროპის კონტინენტზე გამოიწვია საფრთხის ახალი აღქმა, რასაც უკრაინის მიმართ არნახული დახმარების გაწევა, სამხედრო ბიუჯეტების ზრდა და ჩრდილო ატლანტიკური კავშირის მნიშვნელობის განმტკიცება მოჰყვა. შვედეთის და ფინეთის გაცხადებული კანდიდატურები სწორედ ამას ამტკიცებს“,- განაცხადა სალომე ზურაბიშვილმა. ინტერპრესნიუსი

მე, როგორც ამ ქვეყნის უმაღლესი მთავარსარდალი გიდასტურებთ ჩემს პატივისცემას, მადლიერებას და ნდობას, - ამის შესახებ საქართველოს პრეზიდენტმა სალომე ზურაბიშვილმა საქართველოს თავდაცვის ძალების დღესთან დაკავშირებით სიტყვით გამოსვლისას განაცხადა. მან ქვეყანაში თავდაცვის ძალების მნიშვნელობაზე და როლზე გაამახვილა ყურადღება. „დღეს,როგორც ყოველ წელს, თქვენთან ერთად შევიკრიბეთ და სიამაყით აღვნიშნავთ თავდაცვის ძალების დღეს, თუმცა, ეს დღე არ არის და არც უნდა იყოს მხოლოდ ფორმალური ცერემონიალური თუ პათეტიკით აღსავსე სიტყვების წარმოთქმის დღე. ეს დღე ქვეყნისთვის, რომელსაც საქართველოსნაირი ისტორია უდგას სათავეში, ნიშნავს იმას, რომ ჩვენ სრულად ვიაზრებთ და ვაფასებთ საუკუნეების მანძილზე თავდაცვის ძალების უდიდეს მნიშვნელობას ჩვენი ქვეყნის დამოუკიდებლობის მოპოვებაში, შენარჩუნებაში და დღეს უკვე მის გამყარებაში. ეს ის დღეა, როცა ვიაზრებთ, თუ რა არის თავდაცვის ძალების დანიშნულება ქვეყანაში. მათი შეუფასებელი სამსახური ქვეყნის წინაშე არა მხოლოდ ომის დროს, არამედ სწორედ მშვიდობის ჟამს. ყოველდღიურად თუ ყოველწუთიერად თქვენ ქვეყნის სადარაჯოზე დგახართ. პირველ რიგში, თავდაცვა კლასიკურად ნიშნავს ჩვენი საზღვრების, ტერიტორიული მთლიანობის და სუვერენიტეტის დაცვას, ეს არ არის მარტივი მოვალეობა“,-განაცხადა ზურაბიშვილმა. მან აღნიშნა, რომ ქვეყანა არ ივიწყებს დამოუკიდებლობის ბრძოლაში ქართველი ჯარისკაცების თავდადებულ ბრძოლებს. „დღეს მათთვის პატივის მიგების დღეა, მათი ოჯახების მიმართ მადლობის გამოცხადების დღეა. ასევე განსაკუთრებული მადლიერება ეკუთვნის ჩვენს ვეტერანებს. მე, როგორც ამ ქვეყნის უმაღლესი მთავარსარდალი გიდასტურებთ ჩემს პატივისცემას, მადლიერებას და ნდობას. თავდაცვის ძალების როლი მხოლოდ წარსულზე არ გვაფიქრებს, არამედ მომავალზე. ჩვენ ვცხოვრობთ ეპოქაში, სადაც საფრთხეები ძალიან გახშირდა. ძველ ფორმებთან ერთად, გაჩნდა მთელი რიგი ახალი საფრთხეები. ამდენად, თავდაცვის ძალების როლი კიდევ უფრო იზრდება და მოითხოვს კიდევ მეტ პროფესიონალიზმს, მეტ მოქნილობას და მეტ ცოდნას“, - განაცხადა სალომე ზურაბიშვილმა. ინტერპრესნიუსი

წუხელ, გვიან ღამით ძლიერმა სეტყვამ და წვიმამ ლაგოდეხის ოთხი სოფლის - ნინიგორის, განათლების, გელათის და ცოდნისკარის მოსახლეობა დააზარალა. ადგილობრივებმა რადიო თავისუფლებას უთხრეს, რომ სეტყვა დაახლოებით 10 წუთი გაგრძელდა. „ვენახები, ხეხილის და საზამთროს ბაღები თითქმის 60-70 პროცენტით არის განადგურებული“, - ამბობს ფერმერი ნოდარ კაპანაძე. სტიქიისგან მიყენებული ზარალის რაოდენობა ამ ეტაპზე უცნობია. ფერმერთა დიდი ნაწილს მოსავალი დაზღვეული არ ჰქონდა. სოფელ ნინიგორში მერის წარმომადგენელი ზვიად შარიქაძე დაზარალებულ მოსახლეობას დახმარებას არ ჰპირდება, თუმცა რადიო თავისუფლებას უთხრა, რომ ზარალს აღწერენ და მონაცემებს შესაბამის სამსახურებს გადასცემენ. რადიო თავისუფლება

ბრიტანული დაზვერვის ცნობით, რუსმა სამხედრო მეთაურებმა, როგორც ჩანს, დაიწყეს დისციპლინური დარღვევებისთვის ხელქვეითების დასჯა და განთავსება ე.წ. ზინდანში, რაც წარმოადგენს მიწაში გათხრილ იმპროვიზირებულ საკანს, დახურულს რკინის ბადით. 30 აპრილს გამოქვეყნებულ ანგარიშში მითითებულია, რომ ბოლო პერიოდში რუსეთის სამხედრო პერსონალისგან მიღებული მრავალი ცნობის თანახმად, რუსი სამხედროების „ზინდანებში“ განთავსება ძირითადად ხდება სიმთვრალისა და კონტრაქტების გაწყვეტის მცდელობების გამო. ბრიტანეთის სამხედრო დაზვერვის ცნობებით, თუკი ომის დასაწყისში რუსი სამხედრო მეთაურები შედარებით ლოიალურად ეკიდებოდნენ სამხედროების ნებას - არ მიეღოთ მონაწილეობა ბრძოლებში და მათ თავისუფლად უშვებდნენ შინ; ვითარება დაიძაბა 2022 წლის შემოდგომიდან, მას შემდეგ, რაც რუსეთის ფედერაციაში, დისციპლინის ამაღლების მოტივით, რამდენიმე „დრაკონული ინიციატივა“ დაამტკიცეს. „[ეს ტენდენცია გაძლიერდა] განსაკუთრებით მას შემდეგ, რაც რუსეთის ჯარების გაერთიანებული დაჯგუფების სარდალი რუსეთის გენშტაბის უფროსი ვალერი გერასიმოვი გახდა“, - წერია ბრიტანეთის დაზვერვის მიერ 30 აპრილს გამოქვეყნებულ განცხადებაში. უკრაინის გენერალური შტაბის ინფორმაციით, მარინკის რაიონში რუსი სამხედროები სულ უფრო ხშირად ამბობენ უარს ბრძოლაში ჩართვაზე. ВВС-ის ცნობით, რუსეთში ტერმინი „ზინდანი“ ფართოდ გამოიყენებოდა 1990-იანი წლებიდან, ჩეჩნეთში მიმდინარე ომების დროს. "ზინდანს" მიწისქვეშა საპატიმროს, ციხეს უწოდებენ, რომელიც, სხვადასხვა წყაროს ინფორმაციით, ფართოდ იყო გავრცელებული ჩრდილოეთ კავკასიაში, ავღანეთში, პაკისტრანსა და ირანში. radio tavisupleba

ყველაფერს გავაკეთებთ, რომ ტერორისტულმა სახელმწიფომ რაც შეიძლება მალე აგოს პასუხი ყველაფერზე, რაც გააკეთა, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა. უკრაინის პრეზიდენტის თქმით, მზადდება სანქციების ახალი პაკეტი მათ წინააღმდეგ, ვინც რუსული აგრესიის გახანგრძლივებას უწყობს ხელს. „ჩვენ ვამზადებთ რამდენიმე მნიშვნელოვან, მძლავრ ნაბიჯს, რათა უფრო მეტად გავაერთიანოთ პარტნიორები და მივცეთ მეტი ენერგია რუსული აგრესიის დანაშაულისთვის ტრიბუნალის შესაქმნელად და რომ დაჩქარდეს ტერორისტული სახელმწიფოს დამარცხება. უკრაინისთვის და მსოფლიოსთვის საკმარისი არ არის, რომ რუსეთი იყოს სუსტი, როგორც ეს უკვე ხდება. ის უნდა იყოს პასუხისმგებელი ყველაფერზე, რაც მან გააკეთა. ჩვენ ასევე ვამზადებთ ახალ სანქციებს ტერორისტულ სამხედრო-სამრეწველო კომპლექსში მომუშავე პირებთან და კომპანიებთან, უცხოურ სუბიექტებთან მიმართებაში, რომელთა მიწოდება ეხმარება რუსეთს ამ აგრესიის გახანგრძლივებაში. ჩვენ ყველაფერს გავაკეთებთ, რომ ტერორისტულმა სახელმწიფომ რაც შეიძლება მალე აგოს პასუხი იმაზე, რაც გააკეთა. ვინც ამზადებს ასეთ სარაკეტო თავდასხმებს, არ შეიძლება არ იცოდეს, რომ ის გახდება მკვლელობის თანამონაწილე. ვინც სამიზნეში იღებს და უშვებს რაკეტებს, ვინც უზრუნველყოფს თვითმფრინავებს და გემებს ტერორისთვის, არა მხოლოდ ისინი, ვინც ბრძანებებს გასცემს, არამედ ყველა, თქვენ ყველანი ტერორისტები და მკვლელები ხართ და ყველა უნდა დაისაჯოთ“, – განაცხადა ვოლოდიმირ ზელენსკიმ. ავტორი - გივი ბარამიძე

აშშ-ის ევროპული სარდლობა საქართველოს თავდაცვის ძალების დღეს ულოცავს. „დღეს საქართველოს შეიარაღებული ძალების დღე აღინიშნება. ჩვენ მივესალმებით საქართველოს თავდაცვის ძალების ერთგულებას და წვლილს დემოკრატიული ღირებულებების დაცვაში“, – აღნიშნულია აშშ-ის ევროპული სარდლობის განცხადებაში. საქართველოს თავდაცვის ძალები 32 წლისაა. ავტორი - გივი ბარამიძე

არის კვალიფიციური ორგანიზაცია, რომელიც გვეხმარება სოციოლოგიური კვლევების ჩატარებაში და ამ კვლევების მიხედვით, ჩვენი რეიტინგი არის გაზრდილი წინა თვითმმართველობის არჩევნებთან შედარებით, ამის დასტურია ცესკო-ს დაანგარიშებული შედეგები, რომლებიც დღეს გამოვაცხადეთ, – ამის შესახებ პარტია „ქართული ოცნების“ თავმჯდომარე ირაკლი კობახიძემ ბრიფინგზე განაცხადა. კობახიძის თქმით, ასეთ პირობებში ვხედავთ გაყალბებულ კვლევის შედეგებს, რომლის მიზანია, ვითარების ისე წარმოჩენა, თითქოს „ქართულ ოცნებას“ აქვს რადიკალურად შემცირებული რეიტინგი. „ჩვენი შედეგები ხმებში არის რადიკალურად გაზრდილი, რაც იმის ძალიან მკაფიო მტკიცებულება, რომ ჩვენი რეიტინგი მნიშვნელოვნად გაზრდილია. ეს ნიშნავს, რომ ქართულ საზოგადოებას მოსწონს ის საერთო პოლიტიკა, რომელიც წარმოებს დღეს ქვეყანაში. სწორედ ეს განაპირობებს მხარდაჭერის ზრდას. ასეთ პირობებში ვხედავთ გაყალბებულ კვლევის შედეგებს, რაც, ერთი მხრივ, სამწუხარო და დასანანია, მეორე მხრივ, გვაძლევს დასკვნების გამოტანის საშუალებას. კონკრეტული გაყალბება ხორციელდება კონკრეტული მიზნით. ამ გაყალბების ერთ-ერთი მიზანია, ვითარების ისე წარმოჩენა, თითქოს „ქართულ ოცნებას“ აქვს რადიკალურად შემცირებული რეიტინგი. სინამდვილეში „ქართულ ოცნებას“ აქვს მხარდაჭერა მიღებული წინა საპარლამენტო არჩევნებზე, შემდეგ თვითმმართველობის არჩევნებზე – 48%, 47%. ეს რეიტინგი არის კიდევ მეტად გაუმჯობესებული მოცემულ მომენტში, დაახლოებით 50%, ყოველი მეორე ამომრჩეველი მხარს უჭერს „ქართულ ოცნებას“. ასეთ პირობებში საუბარი, რომ ერთია ხელისუფლება და მეორე ხალხი, ძალიან არასწორი გზავნილია. ეს მიუთითებს, რომ ვიღაცას სურს, ხელოვნურად დელეგიტიმაციის წარმოჩენა ქართული საზოგადოების წინაშე. ამის მცდელობა იყო 2021 წელს და ეს გრძელდება წელსაც. ჩვენ საზოგადოებას ვეტყვით სიმართლეს და ერთ-ერთი სიმართლე არის სწორედ დღეს წარმოდგენილი. ერთ-ერთი მთავარი, რაც საბოლოო ჯამში, ხაზს უსვამს ხოლმე კონკრეტული კვლევის შედეგების გაყალბებას, არის არჩევნების შედეგები. თქვენ არაერთხელ გახსოვთ NDI-ის, IRI-ის მიერ გამოცხადებული კვლევების შემდეგ ოპოზიციის აჟიოტაჟი, სიხარული, რომელიც არჩევნების შედეგების გამოცხადებისას იცვლებოდა მათი გულის ტკენით. ასე იქნება 2024 წლის ოქტომბერშიც. ყველა დაინახავს, რომ საზოგადოების, ხალხის ნდობა არის „ქართული ოცნების“ და არა რადიკალების თუ აგენტების მხარეს“, – განაცხადა კობახიძემ. ავტორი - მარიამ ბერძენიშვილი

სახელმწიფო უსაფრთხოების სამსახურის ინფორმაციით, რუსეთის საოკუპაციო ძალების წარმომადგენლებმა ქარელის მუნიციპალიტეტის სოფელ დვანის მიმდებარედ ოკუპირებულ ტერიტორიაზე უკანონოდ დააკავეს საქართველოს ორი მოქალაქე. სუს-ის ცნობით, ინციდენტის შესახებ დაუყოვნებლივ ეცნობა საერთაშორისო პარტნიორებსა და ჟენევის საერთაშორისო დისკუსიების თანათავმჯდომარეებს. „30 აპრილს, რუსეთის საოკუპაციო ძალების წარმომადგენლებმა, ქარელის მუნიციპალიტეტის, სოფელ დვანის მიმდებარედ ოკუპირებულ ტერიტორიაზე უკანონოდ დააკავეს საქართველოს ორი მოქალაქე. აღნიშნული ინციდენტის შესახებ ინფორმაციის მიღებისთანავე, სახელმწიფო უსაფრთხოების სამსახურის მიერ გააქტიურდა ევროკავშირის სადამკვირვებლო მისიის მიერ ოპერირებული ცხელი ხაზი. ინციდენტის შესახებ დაუყოვნებლივ ეცნობა საერთაშორისო პარტნიორებსა და ჟენევის საერთაშორისო დისკუსიების თანათავმჯდომარეებს. ამოქმედებულია ყველა არსებული მექანიზმი უკანონოდ დაკავებული პირების უმოკლეს ვადებში გასათავისუფლებლად. საქართველოს ოკუპირებულ ტერიტორიებზე, ისევე როგორც საოკუპაციო ხაზის გასწვრივ ჩადენილ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას“, – ნათქვამია სუს-ის განცხადებაში. ავტორი - ნინო ფისაძე

„წამალი ბავშვებს“ – ამ მოთხოვნით დღეს აქონდროპლაზიის დიაგნოზის მქონე ბავშვების მხარდამჭერი აქცია გაიმართა. აქცია მთავრობის კანცელარიასთან დაიწყო და მსვლელობით პარლამენთან გაგრძელდა. მშობლები სიტყვით გამოვიდნენ და შეკრებილ მოქალქეებს მიმართვეს, შემდეგ კი ისევ კანცელარიასთან დაბრუნდნენ. მშობლები მე-12 დღეა კანცელარიასთან არიან და ღამეს ათევენ. მშობლები დაშლას არ აპირებენ და ორშაბათს, 14:00 საათზე, მთავრობის სხდომის პარალლეურად, აქციის გამართვას გეგმავენ. დღეს აქციის დაწყებამდე ჯანდაცვის სამინისტრომ გაავრცელა მინისტრის მოადგილის თამარ გაბუნიას კომენტარი, სადაც ის ამბობს, რომ სამინისტრო მზად არის დაჩქარებულ ვადებში, უზრუნველყოს აქონდროპლაზიის მართვისთვის აუცილებელი პროტოკოლისა და გაიდლაინების შექმნა. publika

პარტია „ქართული ოცნების“ აღმასრულებელი მდივნის მამუკა მდინარაძის განცხადებით, შესაძლოა, მათ თავად გადახედონ „ევროპელი სოციალისტების პარტიასთან“ (PES) თანამშრომლობას, თუკი ისინი უნგრეთში დაგეგმილ კონფერენციაზე ირაკლი ღარიბაშვილის მონაწილეობის გამო, „ქართულ ოცნებას“ გააკრიტიკებენ და იფიქრებენ თანამშრომლობის შეჩერებაზე. მამუკა მდინარაძის თქმით, „ქართული ოცნება“ ყველა ჯგუფის უფლებებს იცავს, მაგრამ მისი შეფასებით, პარტია „უარს არ ამბობს ეროვნულ იდენტობაზე“ და „არ ეწევა პროპაგანდას“. ამ მიზეზების გამო კი მიუღებელია მათთან თანამშრომლობის შეჩერება. „ევროპელი სოციალისტების პარტიამ“ 28 აპრილს გაავრცელა პრესრელიზი, რომელშიც ნათქვამია, რომ პარტიის წარმომადგენლებმა სხვა საკითხებთან ერთად „ქართულ ოცნებასთან“ დაკავშირებული სიტუაციაც განიხილეს. პრესრელიზში ნათქვამია, რომ პარტია ღრმა შეშფოთებას გამოთქვამს ირაკლი ღარიბაშვილის ბოლოდროინდელი განაცხადებებისა და მოქმედებების შესახებ, მათ შორის, ბუდაპეშტში დაგეგმილი კონსერვატიულ ფორუმში მონაწილეობის და ვიქტორ ორბანის პოზიციის გაზიარების გამო. 26 აპრილს გავრცელდა ინფორმაცია, რომ საქართველოს პრემიერ-მინისტრი, ირაკლი ღარიბაშვილი უნგრეთში დაგეგმილი კონსერვატორთა საერთაშორისო კონფერენციის მომხსენებლებს შორისაა. მოგვიანებით კი მთავრობის ადმინისტრაციამ დაადასტურა, რომ ირაკლი ღარიბაშვილი კონფერენციაში მონაწილეობას მიიღებს. კონსერვატორთა საერთაშორისო კონფერენცია ბუდაპეშტში 4-5 მაისს გაიმართება. კონსერვატიული პოლიტიკური სამოქმედო კონფერენცია (CPAC) 1974 წელს აშშ-ში დაფუძნებული კონსერვატორთა ყოველწლიური ყრილობაა. სპიკერების შესახებ ინფორმაცია ოფიციალურ ვებგვერდზეა გამოქვეყნებული. სოციალურ ქსელში განთავსებული ტექსტი კი ჰომოფობიურ შინაარსს შეიცავს. publika publika

ვაზისუბანში ავტოსაგზაო შემთხვევის შედეგად 3 ადამიანი დაიღუპა. არსებული ინფორმაციით, მსუბუქი ავტომობილი მოცურდა და ხევში გადავარდა. ასევე ვრცელდება ინფორმაცია ორი დაშავებულის შესახებ, რომლებიც კლინიკაში არიან გადაყვანილი. როგორც „ინტერპრესნიუსს“ შინაგან საქმეთა სამინისტროში განუცხადეს, მომხდარ ფაქტზე გამოძიება სსკ-ის 276-ე მუხლი დაიწყო, რაც ტრანსპორტის მოძრაობის ან ექსპლუატაციის წესების დარღვევას გულისხმობს. IPN

რუსებო, წადით სახლში, სანამ გვიან არ არის - ეს წარწერა ჩეხეთის პრეზიდენტმა პეტრ პაველმა უკრაინაში ვიზიტისას სამხედრო აღჭურვილობაზე გააკეთა, რითაც რუსებს უკრაინის დატოვებისკენ მოუწოდა. აღნიშნულის ამსახველი ფოტო პაველმა Twitter-ის საკუთარ გვერდზე გამოაქვეყნა. მედიის ცნობით, ჩეხმა ლიდერმა წარწერა იმ სამხედრო აღჭურვილობაზე დატოვა, რომლითაც უკრაინა მომავალ კონტრშეტევაში მიიღებს მონაწილეობას. ცნობისთვის, ჩეხეთის პრეზიდენტი პეტრ პაველი უკრაინაში 28 აპრილის სლოვაკეთის პრეზიდენტთან ერთად ჩავიდა. IPN

საქართველოს პარლამენტის შუალედური/რიგგარეშე არჩევნების წინასწარი შედეგი ცნობილია. მონაცემები ცესკოს თავმჯდომარემ გამართულ ბრიფინგზე წარადგინა. მისივე ინფორმაციით, ამომრჩეველთა აქტივობას, ათივე მუნიციპალიტეტში არჩევნებში მონაწილეობა სულ 55 363 ამომრჩეველმა მიიღო. „ყველაზე მაღალი აქტივობა დაფიქსირდა ახალციხეში, სადაც საარჩევნო უბანზე ამომრჩეველთა 47.8 % მივიდა. ახლა კი გაგაცნობთ 117 უბნის ხმის მთვლელი აპარატებიდან ამობეჭდილ წინასწარ შედეგებს. საქართველოს პარლამენტის შუალედური არჩევნების წინასწარი შედეგი შემდეგია: № 21 - ბესიკი წულეისკირი („თავისუფალი საქართველო”) 1 208 ხმა, 4.67 % №41 გიორგი ხახუბია ( „ქართული ოცნება-დემოკრატიული საქართველო“) 24 646 ხმა, 95.33 % რაც შეეხება საკრებულოების შუალედური არჩევნების შედეგად წინასწარ მონაცემებს, შემდეგია: გურჯაანი -№ 41 ზურაბი მუხულიშვილი („ქართული ოცნება-დემოკრატიული საქართველო“) 1 347 ხმა თიანეთი №41 იოსებ მათურელი („ქართული ოცნება-დემოკრატიული საქართველო“) 345 ხმა ახალციხე № 41 როინი ნებაძე („ქართული ოცნება-დემოკრატიული საქართველო“) 463 ხმა ტყიბული №41 გიორგი კერესელიძე („ქართული ოცნება-დემოკრატიული საქართველო“)-1 321 ხმა 86.62 % №51 გიორგი გაგოშიძე (საინიციატივო ჯგუფი ) 204 ხმა, 13.38 % ქუთაისი № 41 მიხეილი გიორგაძე („ქართული ოცნება-დემოკრატიული საქართველო“) 5 331 ხმა. მერების რიგგარეშე არჩევნების წინასწარი შედეგები შემდეგია: ცაგერი №41 ლევან ზალკალიანი („ქართული ოცნება-დემოკრატიული საქართველო“) 2 158 ხმა თერჯოლა №41 მანუჩარ რობაქიძე („ქართული ოცნება-დემოკრატიული საქართველო“ - 9 559 ხმა კიდევ ერთხელ აღვნიშნავ, რომ ეს იყო წინასწარი მონაცემები იმ 117 საარჩევნო უბნიდან, სადაც არჩევნები ელექტრონული ტექნოლოგიების გამოყენებით ჩატარდა“, - განაცხადა კალანდარიშვილმა. იპნ

„ქართული ოცნების“ თავმჯდომარის ირაკლი კობახიძის განცხადებით, მმართველმა ძალამ შუალედურ არჩევნებზე ყველა ოლქში გააუმჯობესა 2021 წლის არჩევნებზე დაფიქსირებული შედეგები. მან ამის შესახებ „ქართული ოცნების“ ოფისში გამართულ ბრიფინგზე ისაუბრა. ირაკლი კობახიძემ არჩევნებში გამარჯვებულ „ქართული ოცნების“ წარმომადგენლებს მიულოცა და საქმიანობაში წარმატება უსურვა. „მიუხედავად იმისა, რომ არჩევნები შეზღუდული კონკურენციის პირობებში წარიმართა, დაფიქსირდა მაღალი აქტივობა, რისთვისაც თითოეულ ამომრჩეველს მადლობას ვუხდით. უნდა აღინიშნოს, რომ ყველა საარჩევნო ოლქში "ქართულმა ოცნებამ" გააუმჯობესა 2021 წლის მუნიციპალურ არჩევნებში მიღებული შედეგები. კერძოდ, ფოთი-ხობი-სენაკის საარჩევნო ოლქში ჩვენმა კანდიდატმა მიიღო 27 ათასზე მეტი ხმა, როდესაც 2021 წელს მივიღეთ 23 ათასი ხმა. თერჯოლის მუნიციპალიტეტში ჩვენმა კანდიდატმა მიიღო 11 500 ხმა, როდესაც 2021 წელს მივიღეთ 9000 ხმა. ცაგერის მუნიციპალიტეტში ჩვენმა კანდიდატმა მიიღო 4500 ხმა, როდესაც 2021 წლის არჩევნების შედეგი იყო 3200 ხმა. ქუთაისში ჩვენმა კანდიდატმა მიიღო 5 300-ზე მეტი ხმა, როდესაც 2021 წელს მივიღეთ 3600 ხმა. ტყიბულში ჩვენმა კანდიდატმა მიიღო 1500 ხმა, როდესაც 2021 წელს მივიღებთ 1300-ზე ნაკლები ხმა. გურჯაანში ჩვენმა კანდიდატმა მიიღო 1350 ხმა, როდესაც 2021 წელს მივიღეთ 1000 ხმა, ახალციხეში ჩვენმა კანდიდატმა მიიღო 450-ზე მეტი ხმა, როდესაც 2021 წელს მივიღეთ 300 ხმა და ბოლოს, თიანეთში ჩვენმა კანდიდატმა მიიღო 350 ხმა, როდესაც 2021 წლის შედეგი იყო 150 ხმა. ვულოცავ გიორგი ხახუბიას პარლამენტის წევრად არჩევას, მანუჩარ რობაქიძეს თერჯოლის მერად არჩევას, ლევან ზალკალიანს ცაგერის მერად არჩევას, მიხეილ გიორგაძეს ქუთაისის საკრებულოს წევრად, გიორგი კერესელიძეს ტყიბულის საკრებულოს წევრად, ზურად მუხულიშვილს გურჯაანის საკრებულოს წევრად, როინ ნებაძეს ახალციხის საკრებულოს წევრად, ხოლო იოსებ მათურელს თიანეთის საკრებულოს წევრად არჩევას. წარმატებებს ვუსურვებ ჩვენი გუნდის თითოეულ წევრს. ასევე, მინდა აღვნიშნო, რომ ეს იყო არჩევნები, რომლებიც ჩატარდა ელექტრონული წესით და ეს იყო პირველი მასშტაბური ტესტი, რომელიც გაიარა ახალმა სისტემამ, რომელიც დაინერგა ახალი საარჩევნო კოდექსის საარჩევნო რეფორმის ფარგლებში და ეს ტესტი მნიშვნელოვანი იყო იმისთვის, რომ 2024 წლის საპარლამენტო არჩევნები ჩატარდეს სათანადო ხარისხით. მადლობას ვუხდით, რა თქმა უნდა, საარჩევნო ადმინისტრაციის თითოეულ წარმომადგენელს, კომისიის წევრებს იმისთვის, რომ სათანადოდ ჩატარდა ეს არჩევნები და კიდევ ერთხელ გვსურს მადლობა გადავუხადოთ თითოეულ ამომრჩეველს არჩევნებზე გამოცხადებისთვის, ჩვენთვის ნდობის გამოცხადებისა და ჩვენი გუნდის მხარდაჭერისთვის“,- განაცხადა კობახიძემ. ამასთან, როგორც მან აღნიშნა, „რადიკალურმა ოპოზიციამ“ არც ერთ ოლქში არ დააყენა საკუთარი კანდიდატურა, რაც იმას ნიშნავს, რომ ისინი აცნობიერებენ საკუთარ დაბალ რეიტინგებს. „რადიკალურმა ოპოზიციამ ვერც ერთ ოლქში ვერ გაბედა კანდიდატურის დაყენება, რაც იმის დასტურია, რომ ისინი „ქართული ოცნების“ მაღალ და საკუთარ დაბალ რეიტინგს კარგად აცნობიერებენ. დღეს რადიკალურ ოპოზიციას აქვს რადიკალურად შემცირებული რეიტინგი, შესაბამისად, მათ ვერ გაბედეს საკუთარი კანდიდატურების დაყენება. 2024 წელსაც ასეთი სურათი გვექნება. მათ კარგად აქვთ გაცნობიერებული საკუთარი დაბალი რეიტინგი. წინააღმდეგ შემთხვევაში, ისინი ამ შესაძლებლობას გამოიყენებდნენ. ნებისმიერი არჩევნები არის ტესტი ნებისმიერი პოლიტიკური პარტიისთვის. როდესაც ამ ტესტზე უარს ამბობ მოახლოებული საპარლამენტო არჩევნებისთვის, ეს ნიშნავს იმას, რომ ამ ტესტის ძალიან გეშინია. ეს იყო რეალური მიზეზი, რის გამოც მათ კანდიდატურა არ დააყენეს”, - განაცხადა კობახიძემ. ipn

17:00 საათის მდგომარეობით, ათივე ოლქში, სადაც არჩევნები მიმდინარეობს, საკუთარი არჩევანი 45 285-მა ამომრჩეველმა დააფიქსირა, რაც 24.47%-ია. როგორც ცესკოს სპიკერმა ნათია იოსელიანმა ბრიფინგზე განაცხადა, ყველაზე მაღალი აქტივობა კვლავ ცაგერშია და შეადგენს 41,4%-ს შეადგენს. „უბნების დახურვამდე დარჩენილია სულ რაღაც ორი საათი. ამიტომ, კიდევ ერთხელ მოვუწოდებთ ამომრჩევლებს აქტიურობისკენ. რაც შეეხება ამომრჩეველთა აქტივობას 17:00 საათის მდგომარეობით. ათივე ოლქში მოსულია 45 285 (24.47%) ამომრჩეველი. ყველაზე მაღალი აქტივობა კვლავ ცაგერშია და შეადგენს 41,4 პროცენტს. ზოგადად საარჩევნო პროცესი მშვიდ ვითარებაში მიმდინარეობს. 20:00 საათზე კენჭისყრის პროცესის დასრულების შემდეგ დაიწყება ხმის დათვლის პროცედურები. იმ საარჩევნო უბნებზე, სადაც კენჭისყრა ელექტრონული ტექნოლოგიების გამოყენებით მიმდინარეობდა, გადასატან საარჩევნო ყუთში არსებული საარჩევნო ბიულეტენების ძირითად საარჩევნო ყუთში მოთავსების პროცედურის დასრულების შემდეგ, ხმის დათვლის სპეციალური ელექტრონული აპარატიდან საუბნო კომისიის თავმჯდომარე ამობეჭდავს წინასწარი შედეგების შესახებ ამონაწერს და ინფორმაცია უმოკლეს ვადაში გადმოიგზავნება ცესკოში. რის შემდეგაც ჩვენ გვექნება საშუალება აღნიშნული უბნებიდან მიღებული მონაცემების საფუძველზე გამოვაქვეყნოთ წინასწარი, პირველად შედეგები. რაც შეეხება იმ საარჩევნო უბნებს, სადაც კენჭისყრა ტრადიციული წესით მიმდინარეობს, მას შემდეგ რაც 20:00 საათზე დაიხურება უბნები, ხმის დათვლის პროცედურები დაიწყება. სიახლეა შემაჯამებელი ოქმების გადმოგზავნასთან დაკავშირებითაც, ოქმები პლანშეტის საშუალებით საოლქო საარჩევნო კომისიის გვერდის ავლით, პირდაპირ ცესკოში გადმოიგზავნება, რაც კიდევ უფრო ამცირებს შედეგების დამუშავებისა და შემდგომი გამოქვეყნების დროს. საუბნო შემაჯამებელი ოქმები აიტვირთება სპეციალურ ვებგვერდზე results.cec.gov.ge. აქვე შეგახსენებთ, რომ ნებისმიერ მსურველს შესაძლებლობა აქვს ონლაინ დააკვირდეს არჩევნების წინასწარი შედეგების შეჯამების პროცესს ცესკოში ინტერნეტ ტრანსლირების საშუალებით. ტრანსლაცია 360 გრადუსიანი ტექნოლოგიის გამოყენებით ცესკოს ოფიციალურ გვერდზე Facebook-ში, Youtube-სა და საიტზე განხორციელდება. რაც შეეხება ინფორმაციას საჩივრებთან დაკავშირებით, ამ დროისთვის მხოლოდ 1 საჩივარია დაფიქსირებული, რომელიც შესულია ფოთის საოლქო საარჩევნო კომისიაში და ეხება პროცედურულ დარღვევას. აღნიშნულის შესახებ კანონით დადგენილ ვადაში იმსჯელებს საოლქო საარჩევნო კომისია და მიიღებს შესაბამის გადაწყვეტილებას”, - განაცხადა ბრიფინგზე ნათია იოსელიანმა.

10 მუნიციპალიტეტში შუალედური და რიგგარეშე არჩევნები დასრულდა. რა უნდა გვახსოვდეს 2024 წლის გადამწყვეტი არჩევნებისთვის?, - წერს სოციალურ ქსელში პარტია "საქართველოსთვის" თავმჯდომარის მოადგილე ნათია მეზვრიშვილი და აღნიშნავს, რომ 2024 წლის არჩევნების გაყალბების პროცესი ხელისუფლებამ დიდი ხანია დაიწყო. მისი თქმით, კრიტიკულად მნიშვნელოვანია - ყველა ძალისხმევა მიმართული იყოს კანდიდატის სტატუსის მიღებისკენ, ხელისუფლებისთვის უკანონო ძალაუფლების ინსტრუმენტების გამოცლისკენ და თავისუფალი და სამართლიანი არჩევნების ჩატარებისკენ. "1. 2021 წლის ადგილობრივი თვითმმართველობის არჩევნების მეორე ტურამდე პრემიერმა და მეორე ტურის შემდეგ მმართველი პარტიის თავმჯდომარემ თქვეს, რომ მნიშვნელობა არ ჰქონდა ვინ გაიმარჯვებდა, ოპოზიციას მაინც არ მისცემდნენ მართვის შესაძლებლობას და იმ მუნიციპალიტეტებში, სადაც ოცნებამ უმრავლესობა დაკარგა, „ნებისმიერ ფასად“ დაიბრუნებდნენ უმრავლესობას. 2. არჩევნების დასრულებისთანავე პირობა შეასრულეს: - საკრებულოს 2022 წლის ბიუჯეტი, რომელიც მათ შორის ოპოზიციას უნდა დაემტკიცებინა, 2017 წელს არჩეულ ერთპარტიულ საკრებულოს დაამტკიცებინეს. ოთხი წლის ვადით არჩეულმა საკრებულომ, მეხუთე წლის ბიუჯეტი დაამტკიცა; - ოპოზიციურ საკრებულოებში ოპოზიციის წარმომადგენლებს ზოგს დაემუქრნენ, ზოგი მოისყიდეს, ზოგი დაიჭირეს, ზოგი გაიტაცეს, ზოგი ზეწოლის შედეგად გაუჩინარდა; - ოპოზიციურ საკრებულოებში გამოაცხადეს ბოიკოტი (ზუსტად ისე, როგორც ახლა საგამოძიებო კომისიებს უცხადებენ), რასაც თავად „პროცედურული ომი“ უწოდეს და საკრებულოს საქმიანობის პარალიზება მოახდინეს; - დააინიცირეს საკანონმდებლო ცვლილება, რომელიც მხოლოდ ბათუმის საკრებულოში ოცნების ინტერესს მოარგეს - გააუქმეს შუალედურ არჩევნებში მაჟორიტარული წესით არჩეული ოცნების წევრის უფლებამოსილების ცნობის ვალდებულება საკრებულოს მიერ, რათა პროცესში ოპოზიციას არ მიეღო მონაწილეობა; ოპოზიციის და უფლებადამცველი ორგანიზაციების ზეწოლის შედეგად, ეს ცვლილება მოგვიანებით სენაკზეც გაავრცელეს, მაგრამ სენაკში ახალი „გამოსავალი“ მოძებნეს და ოპოზიციის წარმომადგენელი კრიმინალების ჩართულობით გააქრეს. 3. ამგვარი უკანონო მეთოდებით დაიბრუნეს უმრავლესობა ბათუმისა და სენაკის საკრებულოებში. 4. ამ უკანონო პროცესებში აქტიურად მონაწილეობდა: - ცესკო, რომელმაც ჯერ ახალი საკრებულოების უფლებამოსილების ცნობა გააჭიანურა, ხოლო შემდეგ სენაკში ხელახალი მთლიანი საკრებულოს რიგგარეშე არჩევნების ნაცვლად შუალედური არჩევნები დანიშნა; - სასამართლო - რომელმაც ჯერ ოცნების სასარგებლოდ ბათილად ცნო სენაკის საკრებულოს თავმჯდომარის არჩევა (რომლითაც რეალურად ოპოზიციამ კრიზისი დაასრულა სენაკში) და შემდეგ უარი თქვა სენაკში შუალედური არჩევნების უკანონოდ დანიშვნის შესახებ ცესკოს განკარგულების გაუქმებაზე; - სამართალდამცავი ორგანოები, რომლებმაც არც ერთი დანაშაული (მოსყიდვა, მუქარა, ზეწოლა და ა.შ) არათუ არ გამოიძიეს, გამოძიებაც არ დაიწყეს. 5. 2024 წლის არჩევნები არის დემორკატიული პოლიტიკური ცვლილების ერთადერთი ინსტრუმენტი. გადამწყვეტია ამ არჩევნების თავისუფალ და სამართლიან გარემოში ჩატარება. შესაბამისად, გადამწყვეტია ამ მიზნით: - ცესკოს დამოუკიდებლობა; - კორუფციის (განსაკუთრებით ელიტური/პოლიტიკური კორუფციის) აღმოფხვრა; - სასამართლოს და სამართალდამცავი ორგანოების დამოუკიდებლობა; - ადგილობრივი სადამკვირვებლო მისიების მიმართ ნდობა; - სახალხო დამცველის დამოუკიდებლობა. 6. როგორია ამ მხრივ რეალობა? - ცესკოს თავმჯდომარეს და ორ წევრს თითქმის ერთი წელია ვადა გაუვიდათ და ხელისუფლება აჭიანურებს მათი არჩევის პროცესს - ანუ გვყავს თავმჯდომარე, რომელსაც არ აქვს პარლამენტის სრული შემადგენლობის 2/3-ის ლეგიტიმაცია; - ხელისუფლებას არ შეუქმნია რეალურად დამოუკიდებელი ანტიკორუფციული სააგენტო, რომელიც კორუფციის (მათ შორის საარჩევნო მოსყიდვის) ფაქტებს გამოიძიებს; - ხელისუფლებას არ დაუწყია სასამართლოს რეფორმა მთავარი აქცენტით იუსტიციის უმაღლესი საბჭოზე (როგორც უკანონო ძალაუფლების ცენტრზე); კორუფციისთვის სანქცირებული მოსამართლეები სისტემიდან არათუ არ მიდიან, ხელისუფლება სანქცირებულ მოსამართლეებს იცავს; - ხელისუფლებას არ დაუწყია/გაჩერებული აქვს სამართალდამცავი სისტემის რეფორმა - მთავარი აქცენტით დამოუკიდებლობაზე და ხარისხზე; - ხელისუფლება ცდილობს დაასუსტოს ნდობა ადგილობრივი სადამკვირებლო მისიების მიმართ; - ხელისუფლებამ დააინიცირა ე.წ. აგენტების შესახებ კანონი, რითაც მიზანში ამოიღო ადგილობრივი და საერთაშორისო სადამკვირვებლო და მათი დამფინანსებელი ორგანიზაციები, მათ გარეშე არჩევნების ჩატარების მიზნით; - ხელისუფლებამ (და ოპოზიციის ნაწილმა) გაუმჭვირვალე პროცესით აირჩია სახალხო დამცველი, რომელსაც დამოუკიდებლობის ტესტი ჯერ არ ჩაუბარებია; - გაუქმებულია სამართალდამცავების და სხვა მოხელეთა დანაშაულის აღმკვეთი დამოუკიდებელი ორგანო - სახელმწიფო ინსპექტორის სამსახური და მის უფლებამონაცვლეს ჯერ არ ჩაუბარებია დამოუკიდებლობის ტესტი; - ხელისუფლება ყველაფერს აკეთებს, რომ ქვეყანამ არ მიიღოს კანდიდატის სტატუსი, რომელიც შექმნის თავისუფალი და სამართლიანი არჩევნების ჩატარების და დემოკარტიის გადარჩენის მნიშნელოვან გარანტიებს ქვეყანაში. 7. ზემოაღნიშნული კიდევ ერთხელ ცხადყოფს, რა მიზნები აქვს ხელისუფლებას 2024 წლის არჩევნებზე და რისთვის ინარჩუნებს უკანონო კონტროლის ქვეშ „არჩევნების გაყალბების ინსტრუმენტებს“. 2024 წლის არჩევნების გაყალბების პროცესი ხელისუფლებამ დიდი ხანია დაიწყო. დაიწყო მაშინ, როცა: - უარი თქვა რეალურად დამოუკიდებელი ანტიკორუფციული სააგენტოს შექმნაზე (საგამოძიებო ფუნქციით) ელიტური/პოლიტიკური კორუფციის აღმოსაფხვრელად; - უარი თქვა სასამართლოს და სამართალდამცავი სისტემის დამოუკიდებლობაზე და მოგვიანებით კორუფციისთვის სანქცირებულ მოსამართლეებს გადაეფარა; - დაიწყო ადგილობრივი სადამკვირებლო მისიებისადმი ნდობის დასუსტება და ადგილობრივი თუ საერთაშორისო სადამკვირვებლო მისიების დაფინანსებაში გადამწყვეტი როლის მქონე ორგანიზაციებზე (მაგ.: USAID-ზე) თავდასხმა; - დააინიცირა ე.წ. აგენტების შესახებ კანონი; - აირჩია სახალხო დამცველი, რომლის დამოუკიდებლობის მიმათ სერიოზული კითხვებია; - უარი თქვა საპარლამენტო საგამოძიებო კომისიების შექმნაზე. 8. ამიტომ არის კრიტიკულად მნიშვნელოვანი ყველა ძალისხმევა მიმართული იყოს კანდიდატის სტატუსის მიღებისკენ, ხელისუფლებისთვის უკანონო ძალაუფლების ინსტრუმენტების გამოცლისკენ და თავისუფალი და სამართლიანი არჩევნების ჩატარებისკენ.", - წერს ნათია მეზვრიშვილი.

გიორგი გახარიამ რეგიონული მიმართულებით პარტიის საქმიანობის გაძლიერების მიზნით შეხვედრები დაიწყო. პარტია “საქართველოსთვის” თავმჯდომარე გიორგი გახარია მცხეთა-მთიანეთის, შიდა ქართლის და სამცხე-ჯავახეთის რეგიონის საკრებულოების და პარტიის წევრებს შეხვდა. შეხვედრების მთავარი მიზანია პარტიის საქმიანობის და წარმომადგენლობის გაძლიერება, საკრებულოებში არსებული პლატფორმების აქტიურად გამოყენება, რეგიონებში პარტიის სამომავლო სამოქმედო გეგმით გათვალისწინებული მუშაობის განახლება, რომლის ფარგლებშიც უფრო აქტიური კომუნიკაცია იქნება მოსახლეობასთან. შეხვედრებს გიორგი გახარიასთან ერთად პარტიის აღმასრულებელი მდივანი, ბერდია სიჭინავა და პარტიის რეგიონული მდივანი, მცხეთა-მთიანეთის მაჟორიტარი დეპუტატი შალვა კერესელიძე ესწრებოდნენ.

უკონკურენტო არჩევნებში, ამომრჩევლების, ანუ პრაქტიკულად ყველა რომ ჩვენი მომხრეა, მათი რაოდენობა სამი საათისთვის გადასცდა ამომრჩეველთა საერთო რაოდენობის 20%-ს, – ამის შესახებ პარტია „ქართული ოცნების“ აღმასრულებელი მდივანი, მამუკა მდინარაძე, სოციალურ ქსელში წერს. მისი განცხადებით, რადიკალურმა ოპოზიციამ ვერ გაბედა საქართველოს პარლამენტისა და მუნიციპალიტეტების საკრებულოების შუალედური, ასევე მერების რიგგარეშე მიმდინარე არჩევნებში „ქართული ოცნების“ წინააღმდეგ კანდიდატების დაყენება. მდინარაძე ყურადღებას ამახვილებს იმ ფაქტზეც, რომ IRI-ის მიერ გამოქვეყნებული კვლევის შედეგები, რომელშიც „ქართულ ოცნებას“ 19% დაუწერეს, კითხვის ნიშნის ქვეშ დგება იმ ფონზე, რომ ამომრჩეველთა საერთო სიის 20%-ზე მეტი უკვე მივიდა მიმდინარე არჩევნებზე. „რამდენიმე დღის წინ IRI-ს კვლევით „ქართულ ოცნებას“ 19% დაუწერეს. დღეს, მიმდინარე არჩევნებში, სადაც რადიკალურმა ოპოზიციამ ვერ გაბედა ჩვენი კანდიდატების წინააღმდეგ თავიანთი კანდიდატების დაყენება, 15:00 საათის მონაცემებით, ამომრჩევლების აქტივობა 20%-ს გადასცდა. ვიმეორებ, უკონკურენტო არჩევნებში, ამომრჩევლების, ანუ პრაქტიკულად ყველა რომ ჩვენი მომხრეა, მათი რაოდენობა სამი საათისთვის გადასცდა ამომრჩეველთა საერთო რაოდენობის 20%-ს! კიდევ ვიმეორებ, იმ უბნებში და ოლქებში, სადაც დღეს არჩევნები ტარდება, ამომრჩეველთა საერთო სიის(!) 20%-ზე მეტი უკვე მივიდა, მიუხედავად იმისა, რომ ოპოზიციას კანდიდატები არ ყავს დაყენებული… აი რაია?“ – წერს მამუკა მდინარაძე.

უკრაინა დაიწყებს კონტრშეტევას და არ დაელოდება პარტნიორებისგან სამხედრო თვითმფრინავების მიღებას, – ამის შესახებ უკრაინის პრეზიდენტმა, ვოლოდიმირ ზელენსკიმ უცხოურ მედიასთან ინტერვიუში განაცხადა. ვოლოდიმირ ზელენსკის თქმით, დასავლეთის სამხედრო თვითმფრინავები უკრაინას ომში დაეხმარებოდა, თუმცა ქვეყანა კონტრშეტევას მანამდე დაიწყებს, ვიდრე „ეფ 16“-ის ტიპის ან სხვა ტიპის სამხედრო თვითმფრინავებს მიიღებს. ვოლოდიმირ ზელენსკის თქმით, უკრაინის კონტრშეტევისთვის კვლავ საჭიროა ის იარაღი, რომელსაც პარტნიორები ქვეყანას დაჰპირდნენ. უკრაინის პრეზიდენტის განცხადებით, კონტრშეტევა ითვალისწინებს ყირიმის განთავისუფლებას, თუმცა, უკრაინის წარმატება დიდწილად დამოკიდებულია დასავლეთის მიერ იარაღის მიწოდებაზე. უკრაინის პრეზიდენტმა ასევე აღნიშნა, რომ ომი შეიძლება, გაგრძელდეს წლები და ათწლეულებიც კი. ავტორი - გივი ბარამიძე

ახალციხეში, საქართველოს ცხრა მუნიციპალიტეტის მსგავსად, არჩევნები ტარდება - ამ ქალაქის საკრებულოში მაჟორიტარ დეპუტატს ირჩევენ. ხმა უკვე მისცა არჩევნებში მონაწილე ერთადერთმა კანდიდატმა როინ ნებაძემ, რომელიც მმართველმა პარტიამ "ქართულმა ოცნებამ" წარადგინა. "არჩევნები მნიშვნელოვანია მარტო ჩვენთვის არა, ხალხისთვისაც. ჩემთვის პირადად იმიტომ, რომ არჩევნებზე მხარდაჭერას ველოდები. კონკურენტი არ მყავს, მაგრამ ეს არ ნიშნავს, რომ ხალხი არ უნდა მოვიდეს. ხალხის მხარდაჭერა მეც და მმართველ პარტიასაც სჭირდება, ძალიან ბევრი გასაკეთებელი გაკეთდა... შემოთავაზება მქონდა მმართველი პარტიიდან, ისედაც მხარდამჭერი ვიყავი. 2013 წლიდან "ოცნების" აგიტატორად ვმუშაობდი და უარიც არ მითქვამს, არც დავფიქრებულვარ ბევრს", - ამბობს ახალციხის საკრებულოში ერთადერთი მაჟორიტარი კანდიდატი "ქართული ოცნებიდან". ასევე ნახეთ ქუთაისის საკრებულოში მაჟორიტარს ირჩევენ - კანდიდატი ერთია ასევე ნახეთ გურჯაანის ორ სოფელში საკრებულოს მაჟორიტარ დეპუტატს ირჩევენ ასევე ნახეთ დღეს ფოთის, სენაკისა და ხობის ოლქში პარლამენტის მაჟორიტარ დეპუტატს ირჩევენ ახალციხის მუნიციპალიტეტში არჩევნები მინაძის თემის სამ სოფელში - ღრელში, ჭაჭარაქსა და მინაძეში ტარდება. სოფელ ჭაჭარაქის საჯარო სკოლაში გახსნილ საარჩევნო უბანში ხმის მისაცემად პირველი, 75 წლის თინა ნებაძე კი, სოფელ ღრელიდან მივიდა. ახალციხეში არჩევნების ჩატარება მას შემდეგ გახდა საჭირო, რაც საკრებულოს მოქმედი დეპუტატი ზაალ ბერიძე გარდაიცვალა. იგი მინაძის თემის დეპუტატი იყო. საკრებულოში ზაალ ბერიძე 2017 წლის არჩევნების შემდეგ შევიდა. დღეს, 29 აპრილს, საქართველოს პარლამენტისა და მუნიციპალიტეტის საკრებულოების შუალედური, ასევე მერების რიგგარეშე არჩევნები იმართება. ამომრჩევლები აირჩევენ: საქართველოს პარლამენტის ფოთი-სენაკი-ხობის მაჟორიტარ დეპუტატს, გურჯაანის, თიანეთის, ახალციხის, ტყიბულის, ქუთაისის საკრებულოების მაჟორიტარ დეპუტატებს, ასევე ცაგერისა და თერჯოლის მერებს. რადიო თავისუფლება

ორგანიზაციის „პატარა ადამიანები საქართველოდან“ წარმომადგენლებს, შესაძლებლობა ექნებათ, ჩაერთონ როგორც იშვიათი დაავადებების საკითხებზე მომუშავე საკოორდინაციო საბჭოს, ისე აქონდროპლაზიის საკითხებზე მომუშავე მულტიდისციპლინურ ჯგუფის მუშაობაში. სწორედ სამუშაო ჯგუფებში ჩართულობა იყო აქონდროპლაზიის დიაგნოზის მქონე ბავშვების მშობლების მხრიდან გაჟღერებული მოთხოვნა, - ამის შესახებ ოკუპირებული ტერიტორიებიდან დევნილთა შრომის, ჯანმრთელობისა და სოციალური დაცვის მინისტრის მოადგილე თამარ გაბუნიამ განაცხადა. მისივე თქმით, სამინისტრო მზად არის, ასევე ბავშვების საუკეთესო ინტერესებიდან გამომდინარე, დაჩქარებულ ვადებში, უზრუნველყოს აქონდროპლაზიის მართვისთვის აუცილებელი პროტოკოლისა და გაიდლაინების შექმნა. „პრემიერ-მინისტრისა და ჯანდაცვის მინისტრის განცხადებების შესაბამისად, დარგის სპეციალისტების ჩართულობით, აქტიური მუშაობა მიმდინარეობს აქონდროპლაზიის პროტოკოლში შემავალი სხვადასხვა ღონისძიების პროაქტიულ დაგეგმვისა და მოლაპარაკებების მიმართულებით. ამასთან, უწყება განაგრძობს კომუნიკაციას მედიკამენტ „ვოსორიტიდის“ მწარმოებელ კომპანიასთან, რათა პროტოკოლისა და მართვის მექანიზმების შემუშავებისთანავე, მოხდეს ბავშვებისათვის ყველა საჭირო პროცედურის უზრუნველყოფა“, - განაცხადა თამარ გაბუნიამ და დასძინა, რომ ძალაშია ჯანდაცვის სამინისტროს შეთავაზება, დააფინანსოს აქონდროპლაზიის თანმდევი დაავადებების დიაგნოსტიკა, მკურნალობა და რეაბილიტაცია როგორც საქართველოში, ისე - საზღვარგარეთ. თამარ გაბუნიას განცხადებით, აუცილებელია, პროცესები კონსტრუქციულ რეჟიმს დაუბრუნდეს, რათა არ შეფერხდეს აქონდროპლაზიის მართვის სისტემის დანერგვის მიზნით მიმდინარე მოლაპარაკებები, ვინაიდან ნებისმიერი დესტრუქციული ქმედება და ესკალაცია საფრთხეს უქმნის აქონდროპლაზიის მკურნალობის პროტოკოლის დანერგვის პროცესს. IPN

ევროპის სოციალისტური პარტია(PES), რომლის დამკვირვებელი წევრიც „ქართული ოცნებაა“, საქართველოს მმართველ პარტიასთან პარტნიორობის გადახედვას განიხილავს. „ქართული ოცნების“ შესახებ PES-ის ლიდერებმა გუშინ, 28 აპრილს ვიდეოკონფერენციაზე იმსჯელეს. კერძოდ, ევროპის სოციალისტური პარტია ღრმად შეშფოთებულია საქართველოს პრემიერ-მინისტრის ირაკლი ღარიბაშვილის ბოლო განცხადებებითა და „ქართული ოცნების“ ქმედებებით. „ოცნების“ პარტნიორების შეშფოთებას იწვევს უნგრეთში დაგეგმილი კონსერვატორთა საერთაშორისო კონფერენცია(CPAC), რომელშიც მონაწილეობასაც საქართველოს პრემიერ-მინისტრის ირაკლი ღარიბაშვილიც მიიღებს. „თუ PES-ის დამკვირვებელი წევრი პარტიიდან პრემიერ-მინისტრს სურს ღირებულებების გაზიარება ვიქტორ ორბანთან და ამერიკელ კონსერვატიულ კონფერენციასთან, მაშინ ჩვენ ოფიციალურად უნდა ვიმსჯელოთ ამ პარტიის სტატუსზე“, – განაცხადა PES-ის აღმასრულებელმა გენერალურმა მდივანმა ჯაკომო ფილიბეკმა. ამასთან, ევროპის სოციალისტური პარტიის ცნობით, „ქართული ოცნების“ დამკვირვებელთა წევრობასთან დაკავშირებით საკითხი ჯერ კიდევ მარტში PES-ის პრეზიდენტის სტეფან ლოფვენმის მიერ წამოიჭრა. ეს ის პერიოდია, როცა „ქართული ოცნება“ რუსული კანონის მიღებას აპირებდა. PES-ის ცნობით, „ქართული ოცნების“ დამკვირვებელი წევრის სტატუსის გადახედვას ივნისში განიხილავენ. საქართველოს პრემიერ-მინისტრი ირაკლი ღარიბაშვილი 4-5 მაისს უნგრეთში დაგეგმილ კონსერვატორთა საერთაშორისო კონფერენციის სპიკერებს შორისაა. „ასოშიეტიდ პრესის“ თანახმად, ორდღიანი კონფერენცია ასახავს კავშირების გაღრმავებას ამერიკის მემარჯვენე ფრთასა და ვიქტორ ორბანის ავტოკრატიულ მთავრობას შორის. კონსერვატიული პოლიტიკური სამოქმედო კონფერენცია (CPAC) არის 1974 წელს აშშ-ში დაფუძნებული კონსერვატორთა ყოველწლიური შეკრება. ევროპაში კი CPAC მეორე წელია, უნგრეთში ტარდება. შარშან ბუდაპეშტში კონფერენციას „ფუნდამენტურ უფლებათა ცენტრმა“ უმასპინძლა. CPAC-უნგრეთის ვებ-გვედის თანახმად, ღონისძიება ორიენტირებული იყო „ღმერთის, სამშობლოს, ოჯახის“ ღირებულებებზე. წლევანდელი კონფერენციის დევიზია „ერთად ჩვენ ძლიერები ვართ“. ღარიბაშვილი უნგრეთში დაგეგმილ კონსერვატორთა საერთაშორისო კონფერენციის სპიკერებს შორისაა netgazeti