tvati

თბილისის საქალაქო სასამართლომ 2011 წლის 26 მაისის მოვლენების გაშუქებასთან დაკავშირებით ე.წ. ფოტოგრაფების საქმეზე საქართველოს პროკურატურას მორალური ზიანის ანაზღაურება დააკისრა. როგორც ფოტორეპორტიორმა ნათია გედენიძემ დღევანდელ ბრიფინგზე განაცხადა, სასამართლოს გადაწყვეტილება პრეცედენტულია. მისივე თქმით, მსგავს მუხლზე საქართველოში მორალური ზიანის ანაზღაურების პრაქტიკა ჯერ არ ყოფილა. „ჩვენ შეტანილი გვქონდა მოთხოვნა მორალური ზიანის ანაზღაურების თაობაზე და გუშინ საქალაქო სასამართლომ მიიღო გადაწყვეტილება, რომლის მიხედვით, საქართველოს პროკურატურას დაეკისრა წინა რეჟიმის მიერ დარღვეული დანაშაულებებისთვის ჩვენთვის მორალური ზიანის ანაზღაურება. მინდა განვმარტო, რომ სამწუხაროდ, დღევანდელ პროკურატურას უწევს გადაიხადოს ვალები იმისთვის, თუ რა რეჟიმში მუშაობდა მაშინდელი პროკურატურა. განვმარტავ, რომ პროკურატურამ 2016 წელს ხელახალი გამოძიება დაიწყო და ამის შედეგად დადგა ჩვენი გამამართლებელი განაჩენი. ამ მხრივ, ჩვენი რეაბილიტაცია ჯერ კიდევ 2016 წლიდან დაიწყო და გუშინ სასიხარულო გადაწყვეტილებით დასრულდა. აქ არ აქვს მნიშვნელობა კონკრეტულ ციფრებს, მნიშვნელობა აქვს იმას, რომ ეს არის პირველი პრეცედენტი საქართველოს სამართალწარმოების ისტორიაში. ეს არის პირველად, როცა არ არსებობდა არანაირი მექანიზმი, შაბლონი, ქეისი, არანაირი მსგავსი, მორალური ზიანი არ ანაზღაურებულა. მით უმეტეს, ასეთი მუხლით, რომელიც ჩვენ მიმართ იყო წარდგენილი. ძალიან დიდი მადლობა ამ გადაწყვეტილებისთვის და ჩვენ ყოველთვის გვჯეროდა, რომ სამართალი ყოველთვის იზეიმებდა. ეს შედეგი ჩვენ უკვე სახეზე გვაქვს და ამას ხმამაღლა ვაცხადებთ, ყველგან ვიტყვით, რომ სამართალი ყოველთვის იზეიმებს იქ, სადაც ტრიალებს სიმართლე“, – განაცხადა ნათია გედენიძემ. თბილისის სააპელაციო სასამართლომ 2018 წელს ე.წ. ჯაშუშობის საქმეზე გამამტყუნებელი განაჩენი გააუქმა და ფოტორეპორტიორები სრულად გაამართლა. სააპელაციო სასამართლო 2011 წლის საქალაქო სასამართლოს განაჩენს განიხილავდა, რომლის მიხედვით, ფოტორეპორტიორები ირაკლი და ნათია გედენიძეები, ზურაბ ქურციკიძე და გია აბდალაძე ჯაშუშობის ბრალდებით დამნაშავედ ცნეს. ავტორი - თამარ ჯალაღონია

რა თქმა უნდა, 2012 წელი გარდამტეხი იყო ჩვენი ქვეყნის უახლეს ისტორიაში. 2012 წლამდე ქვეყანაში იყო „დემოკრატიის შუქურა“, მოისმენდით ასეთ განცხადებებს, ახლა არის გარკვეული პრობლემები ამ მიმართულებით, თუმცა რეალურად აბსოლუტურად სხვა ვითარებაა ქვეყანაში, - ასე გამოეხმაურა „ქართული ოცნების“ გენერალური მდივანი კახა კალაძე ამერიკელი სენატორის, ჯინ შაჰინის მიერ ამერიკის სენატის საგარეო ურთიერთობათა კომიტეტის სხდომაზე გაკეთებულ განცხადებას იმასთან დაკავშირებით, რომ „საქართველოს მთავრობა მზარდად მიდის ავტოკრატიისკენ". როგორც კალაძემ აღნიშნა, მნიშვნელოვანი ის არის, თავად საქართველოს მოქალაქეები საკუთარ თავზე როგორ გრძნობენ 2012 წლამდე და მის შემდეგ არსებული ხელისუფლებების მიერ გადადგმულ ნაბიჯებს. „საოცრება იყო, "გადავსებული" დარბაზი და განცხადებები იმასთან დაკავშირებით, თუ რა ხდება დემოკრატიის თვალსაზრისით საქართველოში. ესეც ნათელი მაგალითია, მიუთითებს მათ დამოკიდებულებაზე საქართველოს მიმართ. სამი კაცი იყო დარბაზში, დავთალე“, - განაცხადა კალაძემ სენატის საგარეო ურთიერთობათა კომიტეტის სხდომასთან დაკავშირებით. მისივე თქმით, რეფორმები ჯერ კიდევ გასატარებელია და საქართველოს ხელისუფლება გადადგამს ყველა აუცილებელ ნაბიჯს. „2012 წლის შემდეგ დემოკრატიის თვალსაზრისით, გამოხატვის და სიტყვის თავისუფლების თვალსაზრისით, აბსოლუტურად რადიკალურად განსხვავებული ვითარება გვაქვს. გვაქვს წინ გადადგმული ნაბიჯები და ამას ჩვენი ქვეყნის მოსახლეობა გრძნობს საკუთარ თავზე. ეს არის ჩვენთვის პრინციპულად მნიშვნელოვანი, რომ ჩვენი ქვეყნის მოქალაქე, რას გრძნობს საკუთარ თავზე. ძალიან მარტივია გავაკეთოთ შედარება, რა ხდებოდა 2012 წლამდე და რა ხდება დღეს. არის რეფორმები გასატარებელი? - კი ბატონო, მაგაში გეთანხმებით, რეფომები უნდა გაგრძელდეს. გვაქვს წინ გადადგმული ნაბიჯები, გვაქვს მიღწევები და, რა თქმა უნდა, ეს გზა არის მნიშვნელოვანი და ჩვენ ყველაფერს გავაკეთებთ ევროინტეგრაციის ამ ურთულეს გზაზე, განსახორციელებელი რეფორმების თვალსაზრისით და ყველა იმ გასაკეთებელი საქმით, რომელიც მნიშვნელოვანია ჩვენთვის“, - განაცხადა კალაძემ. იპნ

უკრაინის პრეზიდენტი, ვოლოდიმირ ზელენსკი აცხადებს, რომ ევროპის საბჭოს საპარლამენტო ასამბლეის მიერ უკრაინელი ბავშვების დეპორტაციის გენოციდად აღიარება უკრაინის წინააღმდეგ გენოციდური პოლიტიკის გამო რუსეთისა და მისი ლიდერებისთვის პასუხისმგებლობის დაკისრებას შეუწყბს ხელს. „დღეს სტრასბურგში მნიშვნელოვანი პოლიტიკური შედეგი გვაქვს - ევროპის საბჭოს საპარლამენტო ასამბლეის სესიაზე. მიღებულ იქნა რეზოლუცია, რომელიც აღიარებს, რომ რუსეთის მიერ უკრაინელი ბავშვების დეპორტაცია შეიცავს გენოციდის ნიშნებს. პრაქტიკულად, ეს გადაწყვეტილება მნიშვნელოვნად შეუწყობს ხელს ჩვენს გლობალურ ძალისხმევას, რათა რუსეთმა და მისმა ოფიციალურმა პირებმა, მათ შორის ტერორისტული სახელმწიფოს მეთაურმა, პასუხი აგონ სწორედ გენოციდის, უკრაინის წინააღმდეგ განხორციელებული გენოციდური პოლიტიკის გამო”, - განაცხადა ზელენსკიმ. მისი თქმით, უკრაინელი ბავშვების დეპორტაცია არის რუსეთის მცდელობის ერთ-ერთი აბსოლუტურად მიზანმიმართული ელემენტი, წაშალოს უკრაინელი ხალხის იდენტობა და გაანადგუროს უკრაინელების არსი. „ეს არის რუსეთის ოფიციალური პირების მიერ ჩადენილი გენოციდის მიზანმიმართული დანაშაული. ასე უნდა იყოს კვალიფიცირებული როგორც პოლიტიკურად, ასევე იურიდიულად“, - აღნიშნა ზელენსკიმ. შეგახსენებთ, ევროპის საბჭოს საპარლამენტო ასამბლეამ უკრაინელი ბავშვების რუსეთში დეპორტაცია გენოციდად აღიარა. პალიტრა

უკრაინაში ჩეხეთის პრეზიდენტი, პეტრ პაველი და სლოვაკეთის პრეზიდენტი, ზუზანა ჩაპუტოვა ჩავიდნენ, - ამის შესახებ ინფორმაციას უკრაინული მედია ავრცელებს. გავრცელებული ინფორმაციით, ვიზიტის ფარგლებში ორივე პრეზიდენტი უკრაინელ კოლეგას, ვლადიმირ ზელენსკის შეხვდება. უკრაინაში ჩასვლის შემდეგ პეტრ პაველი და ზუზანა ჩაპუტოვა პირველად ბოროდიანკაში ჩავიდნენ, სადაც რუსული რაკეტებითა და საჰაერო დაბომბვით განადგურებული საცხოვრებელი კორპუსების ნანგრევები მოინახულეს. უკრაინული მედიის ინფორმაციით, ორი ქვეყნის პრეზიდენტების ვიზიტთან დაკავშირებით ქვეყანაში უსაფრთხოების ზომები გაძლიერებულია. იპნ

გამოცემა Goal-ის პროგნოზით ხვიჩა კვარაცხელია, თანაგუნდელ ვიქტორ ოსიმენთან ერთად, „ოქროს ბურთის“ კანდიდატთა საუკეთესო ათეულში მოხვდება. ჯილდოს მოგების ფავორიტი ლიონელ მესია, რომელსაც, საკლუბო მიღწევებთან ერთად, ზურგს არგენტინის ნაკრებში მსოფლიო ჩემპიონის ტიტული უმაგრებს. ნეაპოლელთა ნიგერიელი თავდამსხმელი რეიტინგში მეექვსე ადგილზეა, ხოლო კვარაცხელია მეშვიდე პოზიციაზეა. საინტერესოა, რომ ჩამონათვალში ნეაპოლელთა შემტევი დუეტი კევინ დე ბრუინზე, მარკუს რაშფორდსა და რობერტ ლევანდოვსკიზე წინ არიან. საუკეთესო ათეული ასეთია: ავტორი - მერაბ მამულაშვილი

საავტომობილო გზების დეპარტამენტის ინფორმაციით, საერთაშორისო მნიშვნელობის სენაკი-ფოთი (ასაქცევი)-სარფის საავტომობილო გზის 92-ე კმ-ზე არსებულ ჩაქვი-მახინჯაურის საავტომობილო გვირაბებში, ყოველწლიური გეგმური პროფილაქტიკური სამუშაოების ჩატარების მიზნით, 2023 წლის 2 მაისის 06:00 სთ-დან 5 მაისის 18:00 სთ-მდე გვირაბის – ქობულეთი-ბათუმის, ხოლო 15 მაისის 06:00 სთ-დან 18 მაისის 18:00 სთ-მდე გვირაბის ბათუმი-ქობულეთის მიმართულებაზე ყველა სახის ავტოტრანსპორტის მოძრაობა აიკრძალება. „გვირაბის ქობულეთი-ბათუმის მიმართულების ჩაკეტვის პერიოდში ავტოტრანსპორტის ნაკადი გადაერთვება გვირაბის ბათუმი-ქობულეთის მიმართულებაზე. ხოლო ბათუმი-ქობულეთის მიმართულების ჩაკეტვის პერიოდში ავტოტრანსპორტის ნაკადი გადაერთვება ქობულეთი-ბათუმის მიმართულებაზე. აღნიშნული რეჟიმით მოძრაობა განხორციელდება საპატრულო პოლიციის უშუალო ზედამხედველობით და კოორდინაციით“, – აღნიშნულია საავტომობილო გზების დეპარტამენტის ინფორმაციაში.

ავიაკომპანია „მაივეი ეარლაინსის“ 13 თანამშრომელი საქართველოში დაბრუნდა. როგორც ავიაკომპანიის გენერალურმა დირექტორმა, რატი ბაკურაძემ განაცხადა, საკმაოდ რთული პერიოდი გამოიარეს და მადლობას უხდის ყველას, ვინც წვლილი შეიტანა სუდანიდან ავიაკომპანიის თანამშრომლების გამოყვანაში. „პირველ რიგში, ვულოცავ ჩვენი თანამშრომლების ნათესავებს, მეგობრებს მათ საქართველოში ჩამოსვლას. ყველა ევაკუირებულია. ყველას მადლობას ვუხდით, ვინც ჩართული იყო ამ პროცესში. ჩვენ ყოველდღიური კონტაქტი გვქონდა თურქეთში საქართველოს კონსულთან. მასთან ხშირი კომუნიკაციის შედეგად გავედით ამ გზებზე. მადლობას ვუხდით ასევე საქართველოს საგარეო საქმეთა სამინისტროს. ეპიცენტრიდან ძალიან ძნელი იყო თავის დაღწევა. ასევე რთული იყო იქ ყოფნა საკვების, წყლისა და საწვავის დეფიციტის გამო. ჩვენი კონტაქტი დამოკიდებული იყო საწვავის შევსებაზე, რასთან დაკავშირებითაც ჩვენს სუდანელ პარტნიორებთანაც ვთანამშრომლობდით, მაგრამ ძალიან ძნელი იყო ადგილზე მიწოდება, იქიდან გამომდინარე, რომ ეპიცენტრში იყვნენ ჩარჩენილი ჩვენი თანამშრომლები“, – განაცხადა რატი ბაკურაძემ. სუდანის საზღვრიდან „მაივეი ეარლაინსის“ თანამშრომლების ტრანსპორტირება თავდაპირველად კაიროში განხორციელდა, რის შემდეგაც ისინი საქართველოში ჩამოიყვანეს. ამასთან, მეორე ავიაკომპანია „ჯეო სქაის“ 20 თანამშრომელი საქართველოში გუშინ დაბრუნდა. როგორც ავიაკომპანიაში განმარტეს, „ჯეო სქაიმ“ საქართველოს საგარეო საქმეთა სამინისტროს დახმარებით განახორციელა სუდანიდან ეკიპაჟის წევრების მშვიდობიანი ევაკუაცია ეგვიპტის საზღვრამდე, საიდანაც უკვე ისინი საქართველოში დაბრუნდნენ. ავტორი - სოფიო დემეტრაშვილი

სენატორი ჯინ შაჰინი არ არის კარგად ინფორმირებული საქართველოში მიმდინარე პროცესებისა და ტენდენციების შესახებ, – ამის შესახებ საპარლამენტო უმრავლესობის წევრმა, მიხეილ სარჯველაძემ განაცხადა. სარჯველაძეს კითხვა დაუსვეს აშშ-ის სენატის საგარეო ურთიერთობათა კომიტეტის სხდომაზე სენატორ ჯინ შაჰინის მიერ გაკეთებულ განცხადებაზე, რომლის თქმითაც, „საქართველოს მთავრობა მზარდად მიდის ავტოკრატიისკენ“. დეპუტატის თქმით, დღეს საქართველო ისეთი დემოკრატიულია, როგორც არასდროს. „საჭიროა გაკეთებული შეფასებების ახსნა, რომლებსაც კატეგორიულად ვერ დავეთანხმები. დღეს საქართველო, ისე, როგორც არასდროს, დემოკრატიულია, ეს შემიძლია, დაზუსტებით ვთქვა. გაცილებით მეტი აქვს თავისუფლების ხარისხი, ვიდრე ეს ოდესმე შეიძლება, ჰქონოდა. აქედან გამომდინარე, ეს შეფასება კატეგორიულად მიუღებელია“, – განაცხადა მიხეილ სარჯველაძემ. მისივე თქმით, სენატორს თუ სურვილი ექნება, საქართველოს ხელისუფლების ინტერესში ნამდვილად არის, რომ მეტი ინფორმაცია მიაწოდოს ქვეყანაში არსებულ ვითარებაზე. „ჩემი აზრით, ეს აიხსნება იმით, რომ არ არის სწორად ან სრულად ინფორმირებული. ცხადია, არ მაქვს საფუძველი, გამოვთქვა ვარაუდი იმის შესახებ, რომ შეგნებულად არასწორ ინფორმაციას ავრცელებს. აქედან გამომდინარე, სხვა ახსნა არ მექნება, თუ მას სურვილი და ინტერესი ექნება, ჩვენს ინტერესში ნამდვილად არის, რომ მეტი ვუამბოთ ჩვენ შესახებ, რა ვითარებაა საქართველოში“, – განაცხადა სარჯველაძემ. ავტორი - ლიზი ჩიმჩიური

საქართველოს მართლმადიდებელი ეკლესიის დელეგაცია კვიპროსს ეწვია, – ინფორმაციას ამის შესახებ საქართველოს საპატრიარქო ავრცელებს. მათივე ცნობით, საქართველოს მართლმადიდებელი ეკლესიის დელეგაციას შეხვედრები ჰქონდა როგორც პირველიერქთან, ისე სხვა მღვდელმთავრებთან. „2023 წლის 8 იანვარს შედგა მისი უნეტარესობის, ახალი იუსტინიანესა და სრულიად კვიპროსის ეკლესიის ახალი მეთაურის, მთავარეპისკოპოს გიორგის ინტრონიზაცია, რომელსაც საქართველოს ეკლესიის წარმომადგენლები ვერ დაესწრნენ. მისი უნეტარესობა გიორგისთვის აღსაყდრების მისალოცად და საქართველოსა და კვიპროსის ეკლესიებს შორის ტრადიციული მეგობრობის განსამტკიცებლად, სრულიად საქართველოს კათოლიკოს-პატრიარქის კურთხევით, კვიპროსს ეწვია ჩვენი ეკლესიის დელეგაცია შემდეგი შემადგელობით: სრულიად საქართველოს კათოლიკოს-პატრიარქის ქორეპისკოპოსი, ახალციხისა და ტაო-კლარჯეთის მიტროპოლიტი თეოდორე (ჭუაძე); საქართველოს საპატრიარქოს საგარეო საქმეთა განყოფილების ხელმძღვანელი, ზუგდიდისა და ცაიშის მიტროპოლიტი გერასიმე (შარაშენიძე); საქართველოს საპატრიარქოს მომლოცველობის (რელიგიური ტურიზმის) სამსახურის უფროსი, ხონისა და სამტრედიის მიტროპოლიტი საბა (გიგიბერია); თბილისის სასულიერო აკადემიისა და სემინარიის რექტორი, პროტოპრესვიტერი გიორგი ზვიადაძე; მათ შეხვედრები ჰქონდათ როგორც პირველიერქთან, ისე სხვა მღვდელმთავრებთან, რამაც ფრიად გულთბილ ვითარებაში ჩაიარა. განსაკუთრებული იყო სტუმრობა უნეტარეს გიორგისთან; მან დიდი სითბოთი და სიყვარულით მოიკითხა სრულიად საქართველოს კათოლიკოს-პატრიარქი და ჩვენი ეკლესიების საუკუნეებით განმტკიცებული ურთიერთობის გაღრმავებაზე ისაუბრა. დელეგაცია სამშობლოში შაბათს დაბრუნდება“, – აღნიშნულია საპატრიარქოს ინფორმაციაში.

მწერალმა, ჟურნალ Elle-ს ყოფილმა მიმომხილველმა, ელიზაბეთ ჯინ კეროლმა, რომელიც აშშ-ის ყოფილ პრეზიდენტს, დონალდ ტრამპს გაუპატიურების ბრალდებით უჩივის, ნიუ-იორკის სასამართლოს ჩვენება მისცა. „მე აქ ვარ, რადგან დონალდ ტრამპმა გამაუპატიურა და როდესაც მე ამის შესახებ დავწერე, მან მოიტყუა, თქვა, რომ ეს არ მომხდარა. მან მოიტყუა და გაანადგურა ჩემი რეპუტაცია. მე აქ ვარ იმისთვის, რომ ვცადო და დავიბრუნო ჩემი ცხოვრება“, – განუცხადა 79 წლის კეროლმა მანჰეტენის ფედერალურ სასამართლოს. მისი გაცხადებით, აღნიშნული შემთხვევის შემდეგ მან რომანტიკული ცხოვრების გაგრძელება ვეღარ შეძლო. ელიზაბეთ ჯინ კეროლის მტკიცებით, დონალდ ტრამპმა მასზე სექსუალურად იძალადა 1996 წელს მანჰტენის ერთ-ერთი მაღაზიის გასახდელ ოთახში. თავად დონალდ ტრამპმა არაერთხელ უარყო კეროლის ბრალდება. 26 აპრილს თავის სოციალურ ქსელში დონალდ ტრამპმა კეროლის განცხადება „თაღლითური და ცრუ ისტორია“ უწოდა. „ის არ ყვიროდა? მოწმეები არ არიან? არავის უნახავს ეს?“ – დაწერა ტრამპმა. „ბიბისის“ ცნობით, სასამართლო განხილვა სავარაუდოდ ორ კვირას გაგრძელდება. ჯერჯერობით უცნობია, წარდგება თუ არა დონალდ ტრამპი სასამართლოს წინაშე აღნიშნული საქმის ფარგლებში. ელიზაბეთ ჯინ კეროლი ჟურნალ ELLE-ში მიმომხილველად 1993-2019 წლებში მუშაობდა. მან დონალდ ტრამპის მხრიდან სავარაუდო სექსუალური ძალადობის შესახებ ბრალდება პირველად 2019 წელს გაასაჯაროვა. ავტორი - ქეთი ჩოხელი

„ერთიანი ნაციონალური მოძრაობის“ თავმჯდომარე ლევან ხაბეიშვილი აცხადებს, რომ ენმ პარლამენტში ე.წ. ქოლ-ცენტრებთან დაკავშირებით საგამოძიებო კომისიის შექმნას მხარს დაუჭერს და გამოძიებაშიც აქტიურად ჩაერთვება: „ჩვენ მზად ვართ, მათ შორის, მხარი დავუჭიროთ ინიციატივას ქოლ-ცენტრების საგამოძიებო კომისიასთან დაკავშირებით. არათუ მხარს დავუჭერთ, ჩავერთვებით გამოძიებაში. ამ საქმეზე მე ერთი წლის წინ სუს-ის უფროსს მივწერე, პროკურორს მივწერე. ცხადია, ეს დოკუმენტები არსებობს. თავად [ხელისუფლების წარმომადგენლები] არიან ამ საქმეშიც გარეული და კლანთან შესისხლხორცებულები“ ,— ამბობს ლევან ხაბეიშვილი. ე.წ. ქოლცენტრების საქმეზე პარლამენტში საგამოძიებო კომისიის შექმნის ინიციატივა თავდაპირველად პარტიიის „საქართველოსთვის“ წევრებმა გაახმიანეს. დეპუტატი ბექა ლილუაშვილი ამბობდა, რომ თუ BBC-ს საგამოძიებო რეპორტაჟში მოყვანილი ფაქტები დადასტურდება, ქვეყანას მძიმე პოლიტიკური ქარიშხალი დაატყდება თავს და გაჩნდება კითხვები იმასთან დაკავშირებით, თუ რატომ ვერ ან არ გამოძია და აღკვეთა მსგავსი თაღლითური სქემების მუშაობა ქვეყნის ტერიტორიაზე საქართვეოს საგამოძიებო უწყებებმა. მისი თქმით, საგამოძიებო კომისიის მიზანი უნდა იყოს, დადგინდეს, ვინ არის პასუხისმგებელი ამ მასშტაბის დანაშულის არ/ვერ აღკვეთაზე და ასევე ხელი შეუწყოს გამოძიებას სქემაში მონაწილე და მათი მფარველი პირების გამოსავლენად. ხაბეიშვილი კი აცხაებს, რომ ე.წ. ქოლცენტრების უკან ხელისუფლების მაღალჩინოსნები დგანან. რას ამბობს BBC კეზერაშვილზე BBC-ს ჟურნალისტური გამოძიების თანახმად, მათ იდენტიფიცირებული აქვთ თაღლითური ქსელის 152 ბრენდი. პოლიციისთვის ეს ქსელის „მილტონ გრუპის“ სახელითაა ცნობილი, რომელიც თავდაპირველად 2020 წლამდე გამოიყენებოდა. BBC-ის ჟურნალისტების გამოძიების თანახმად, „მილტონ გრუპთან“ დაკავშირებულ კომპანიებში დირექტორებად ფიგურირებს ხუთი ადამიანი – დავით თოდუა, რატი ჭელიძე, გურამ გოგეშვილი, ჯოზეფ მგელაძე და მაიკლ ბენიმინი. გამომძიებელმა ჟურნალისტებმა ეს სახელები და გვარები „პანამის დოკუმენტებში“ მოძებნეს და აღმოაჩინეს, რომ ოთხი მათგანი იყო ან დირექტორი, ან უფროსი ფიგურა კომპანიებში, რომლებიც „მილტონ გრუპამდე“ არსებობდა. გამოძიების მიხედვით, საბოლოო ჯამში, ამ ინფორმაციამ ისინი დავით კეზერაშვილის სახელთან და გვართან მიიყვანა. გამოძიების მიხედვით, საჯაროდ ხელმისაწვდომი დოკუმენტაცია, რომელიც ქსელთან კეზერაშვილის კავშირს ადასტურებს, არ არის. აგრეთვე, არ არის მტკიცებულება, რომ კეზერაშვილს პირდაპირი ფინანსური ინტერესი აქვს „მილტონ გრუპის“ ბრენდებში, თუმცა, როგორც ჟურნალისტებმა მოიკვლიეს, „პანამის დოკუმენტების“ თანახმად, „მილტონ გრუპამდე“ არსებულ ქსელში დამფუძნებლად ან აქციონერად ფიგურირებდა დავით კეზერაშვილი. ასევე „მილტონ გრუპთან“ დაკავშირებული კომპანიების რამდენიმე ყოფილი თანამშრომელი ყვება, რომ მათ პირდაპირი კავშირი ჰქონდათ კეზერაშვილთან და იციან, რომ იგი ჩართულია ქსელის საქმიანობაში. „ბი-ბი-სი“-ს ცნობითვე, კეზერაშვილი ხშირად აპიარებდა თაღლითურ სავაჭრო პლატფორმებს თავის სოციალურ ქსელებში, ხოლო მისი რამდენიმე კომპანია იყენებდა ელექტრონული ფოსტის კერძო სერვერებს, რომლებიც ასევე გამოიყენებოდა „მილტონ გრუპის“ კომპანიების მერე. კეზერაშვილის პასუხი თავად კეზერაშვილი საპასუხო განცხადებაში აღნიშნავს, რომ BBC-ის საგამოძიებო მასალაში აღწერილ ე.წ. ქოლ-ცენტრებთან კავშირი არასდროს ჰქონია. კეზერაშვილის თქმით, აპირებს გამოიყენოს ყველა სამართლებრივი ბერკეტი BBC-ის საგამოძიებო მასალაში „ფაქტების უზუსტობის“ გამო. დავით კეზერაშვილის სიტყვებით, ყოველთვის გამოთქვამდა მზადყოფნას და დღესაც მზადაა ე.წ. ქოლ-ცენტრების თემაზე ევროპული ქვეყნების საგამოძიებო სტრუქტურებთან თანამშრომლობისთვის. ნეტგაზეთი

ევროპარლამენტარი სოციალისტებისა და დემოკრატების პროგრესული ალიანსის ჯგუფიდან ტეის რეიტენი (ნიდერლანდები) მიუღებლად მიიჩნევს ევროპარლამენტარ ვიოლა ფონ კრამონზე თავდასხმებს ქართველი ინტერნეტ ტროლების მხრიდან. რეიტენი, რომელიც ევროპარლამენტში “ქართული ოცნების” პარტნიორ პოლიტიკურ ჯგუფს წარმოადგენს, ეხმაურება ვიოლა ფონ კრამონის ვიდეომიმართვას ქართველი ტროლების მიერ მის წინააღმდეგ აგორებულ დეზინფორმაციებზე. „ასეთი საზიზღარი თავდასხმა ვიოლა ფონ კრამონზე, საქართველოს ევროპული მომავალის უდიდეს მხარდამჭერზე, მიუღებელია. ჩვენ გვინდა, რომ საქართველომ წარმატებას მიაღწიოს. ქართველებს ეს უნდათ. ამიტომ საქართველოს ლიდერებმა უნდა შეწყვიტონ ამის წინააღმდეგ მუშაობა“, — წერს ევროპარლამენტარი ტეის რეიტენი. ევროპარლამენტის დეპუტატი ვიოლა ფონ კრამონი აცხადებს, რომ ქართველმა „ტროლებმა“ რუს „ტროლებსაც“ კი აჯობებს. ასე გამოეხმაურა იგი მტკიცებას, თითქოს ფონ კრამონი ნაცისტური გერმანიის მაღალჩინოსნის, ჰერმან გერინგის შთამომავალია, და ხელოვნური ინტელექტით შექმნილ ვიდეოს, რომელშიც თითქოს ნასვამ მდგომარეობაში იმყოფება. ფონ კრამონი ხაზს უსვამს, რომ ამ ყალბ ინფორმაციას „ძირითადად“ მმართველი პარტიის მხარდამჭერები აზიარებენ და ეჭვობს, რომ ფეიკების დამკვეთი, სავარაუდოდ, სწორედ მმართველი გუნდია. ნეტგაზეთი

ევროპარლამენტთან მიღწეული შეთანხმებით, საქართველოს პრეზიდენტი ევროპარლამენტს ბრიუსელში 31 მაისს მიმართავს. ინფორმაციას საქართველოს პრეზიდენტის ადმინისტრაცია ავრცელებს. აღნიშნულთან დაკავშირებით საქართველოს პრეზიდენტმა ევროპარლამენტის პრეზიდენტის, რობერტა მეცოლას ოფიციალური წერილი დღეს მიიღო. „ბრიუსელში ვიზიტთან დაკავშირებით თანხმობის მისაღებად საქართველოს პრეზიდენტის წერილი მთავრობას დღეს გაეგზავნა”, - ნათქვამია პრეზიდენტის ადმინისტრაციის განცხადებაში.

თბილისის საქალაქო სასამართლომ მეუღლის მიმართ განხორციელებულ ძალადობაში ბრალდებულ შალვა იაშვილს აღკვეთის ღონისძიების სახით პატიმრობა შეუფარდა. ბრალდების მხარემ სასამართლოს პატიმრობის შუამდგომლობით მიმართა, ვინაიდან, მისი მტკიცებით, ბრალდებულმა ძალადობის ფაქტი ჩაიდინა. პროკურორის თქმით, სოფელ ტაბახმელაში, სადაც საცხოვრებელ სახლში შალვა იაშვილი და რენატა ბეგიაშვილი მეგობრებთან ერთად იმყოფებოდნენ, ყოფილ მეუღლეებს შორის მოხდა კონფლიქტი, რაც ფიზიკურ დაპირისპირებაში გადაიზარდა. შალვა იაშვილმა რენატა ბეგიაშვილს სახის არეში მუშტი დაარტყა. ბრალდების მხარის განმარტებით, გამოძიების დაწყებას საფუძვლად დაედო პატაკი, რომლის თანახმად, რენატა ბეგიაშვილმა სოციალურ ქსელში გამოაქვეყნა ფოტომასალა, სადაც მიუთითა, რატომ მიიღო დაზიანებები. ბბრალდების მხარის განმარტებით, ერთადერთი შემაკავებელი აღკვეთის ღონისძიება არის პატიმრობა, რათა შალვა იაშვილმა არ მოახდინოს მოწმეებზე ზემოქმედება და არ ჩაიდინოს ახალი დანაშაული. დაცვის მხარე კი სასამართლოს 5 000 ლარის ოდენობით გირაოს გამოყენების შუამდგომლობით მიმართავდა. ადვოკატის განმარტებით, იაშვილის მხრიდან მიმალვის საფრთხე არ არსებობს, რადგანაც მომხდარის შემდეგ შალვა იაშვილი არსად წასულა. მისი თქმით, ის, რომ ბრალდების მხარე პატიმრობის შეფარდებისთვის მიმალვის საფრთხეს არ მიუთითა, ეს ნიშნავს იმას, რომ შალვა იაშვილის მიმართ დაკავება არასწორადაა გამოყენებული. ადვოკატის თქმით, იმ დღეს შემთხვევის ადგილზე იმყოფებოდნენ ნეიტრალური პირები, ოთხი მოწმე დაპირისპირების დღეს მომხდარ დეტალებზე საუბრობს. “ვინმე ამბობს, რომ შალვა იაშვილმა დაარტყა ბეგიაშვილს? პირიქით, ოთხივე ადამიანი ამბობს, რომ რენატა ბეგიაშვილი აყენებდა სიტყვიერ შეურაცხყოფას შალვა იაშვილს… რენატა ბეგიაშვილმა შალვა იაშვილს დეკორაციული ჯაჭვი შემოხვია კისერზე, ახრჩობდა, შალვა იაშვილმა შეძლო და მოიშორა რენატა ბეგიაშვილი”, - განაცხადა სხდომაზე ბრალდებულის ადვოკატმა, თეონა გვაზამ. ადვოკატის თქმით, ასევე, საგამოძიებო ორგანოების მიერ ამოღებულია დანა დაზიანებულ მდგომარეობაში, რომლის გამოყენებასაც რენატა ბეგიაშვილი შალვა იაშვილის მიმართ აპირებდა. ადვოკატ თეონა გვაზავას განმარტებით, რომ არა ოთხი ადამიანი, არავინ იცის, რა შედეგი დადგებოდა. გარდა ამისა, როგორც ადვოკატმა აღნიშნა, შემაკავებელი ორდერი ჰქონდა თავად რენატა ბეგიაშვილს. მისვე თქმით, შალვა იაშვილი მოძალადე არ არის. ადვოკატის განმარტებით, იაშვილს სამედიცინო შემოწმება ჩაუტარდა. სიტყვით ისარგებლა ბრალდებულმა, შალვა იაშვილმა. “რენატა ბეგიაშვილისგან მონაყოლი ვიცი, რომ რამდენჯერმე გააუპატიურეს და აქედან გამომდინარე ფიქრობს, რომ ყველა კაცი უნდა გაანადგუროს. ვფიქრობ, რომ აქედან გამომდინარე რაღაცას გეგმავს. ანუ მსხვერპლი ვარ მე”, - განაცხადა შალვა იაშვილმა.

მცხეთის მუნიციპალიტეტის სოფელ ჯიღაურაში, სააპელაციო სასამართლოს გადაწყვეტილებით, დასრულდა უკანონო საწარმოს - ბეტონის ქარხნის დემონტაჟი, - ამის შესახებ სოციალურ ქსელში პარტია "საქართველოსთვის" წევრი და დეპუტატი შალვა კერესელიძე წერს. მისივე თქმით, პარტია „საქართველოსთვის“ ყოველთვის დაიცავს საზოგადოების ინტერესს და ჯანსაღ აზრს. "წელიწადნახევარია სოფელ ჯიღაურას მოსახლეობას ტოქსიკურ გარემოში უხდებოდა ცხოვრება. მოხარული ვარ, რომ ამ ხნის განმავლობაში, მათ არ დაუკარგავთ იმედი, რომ ერთად დგომით სამართალს მიაღწევდნენ. ეს გამარჯვება პირველ რიგში ეკუთვნის ხალხს. რომ არა მათი ერთიანობა და თავდაუზოგავი ბრძოლა უსამართლობის წინააღმდეგ, დღეს ამ შედეგს ვერც მივაღწევდით. სოფელ ჯიღაურას მოსახლეობამ შექმნეს პრეცედენტი, რომ ბრძოლას ყოველთვის აქვს აზრი, მით უფრო, როდესაც მართალი ხარ და სიმართლე შენს მხარესაა. მადლობა მინდა გადავუხადო გარემოს დაცვისა და სოფლის მეურნეობის სამინისტროს და მინისტრს ბატონ ოთარ შამუგიას სახელმწოფოებრივი დამოკიდებულებისთვის. მე, როგორც მცხეთა-მთიანეთის რეგიონის მაჟორიტარი დეპუტატი მოხარული ვარ, რომ ამ დიდ ბრძოლაში გარკვეული წვლილი პირადად მე და ჩვენს გუნდსაც მიგვიძღვის, როგორც საქართველოს პარლამენტის, ასევე მცხეთის მუნიციპალიტეტის საკრებულოს სადეპუტატო მანდატების აქტიური გამოყენებით პრინციპულად დაგვესვა საკითხი და ყველა შესაბამისი უწყებებისთვის მიგვეწდინა ჩვენი და ხალხის ხმა. გიორგი გახარიას გუნდი და პარტია „საქართველოსთვის“ ყოველთვის დავიცავთ საზოგადოების ინტერესს, ჯანსაღ აზრს და ყოველთვის თავდაუზოგავად შევებროძოლებით ნებისმიერი ფორმის უკანონობას.", - წერს შალვა კერესელიძე.

„სოციალური სამართლიანობის ცენტრის“ ცნობით, ბათუმის საქალაქო სასამართლომ „აჭარის ტელევიზიიდან“ გადაცემა „ჰეშთეგის” წამყვანის, მალხაზ რეხვიაშვილის, გათავისუფლების გადაწყვეტილება უკანონოდ სცნო. სასამართლოს გადაწყვეტილებით, აღნიშნული გადაწყვეტილება არღვევდა მალხაზ რეხვიაშვილის შრომით უფლებებს და მის გამოხატვის თავისუფლებას. გათავისუფლების ერთადერთი მიზეზი კი – მის მიერ პირად სოციალურ ქსელში საჯაროდ გამოხატული კრიტიკული მოსაზრებები, სრულად დაცული იყო გამოხატვის თავისუფლებით, არ არსებობდა ამ უფლების შეზღუდვის საფუძვლები. სატელევიზიო გადაცემა „ჰეშთეგის“ წამყვანი არხის დირექტორმა, გიორგი კოხრეიძემ 2020 წლის 11 მაისს სამსახურიდან facebook-პოსტის გამო გაათავისუფლა. პოსტი, რომელიც მალხაზ რეხვიაშვილის გათავისუფლების საფუძველი გახდა, facebook-ზე 21 აპრილს დაიდო. ის ეხებოდა თეო თურმანიძის ეთერიდან მოხსნის საკითხს. თეო თურმანიძეც, ასევე სოციალურ ქსელში გაკეთებული პოსტის გამო, გიორგი კოხრეიძემ მაუწყებელის დისკრადიტაციაში დაადანაშაულა და მოხსნა ეთერიდან.

ევროპარლამენტარი ვიოლა ფონ კრამონი უნგრეთში დაგეგმილ კონსერვატორთა საერთაშორისო კონფერენციის მომხსენებლებს შორის ირაკლი ღარიბაშვილის ყოფნას ეხმაურება. ვიოლა ფონ კრამონი ევროპარლამენტში „ქართული ოცნების“ პარტნიორ პოლიტიკურ ჯგუფს მიმართავს და სვამს კითხვას, რამდენად მართებულია მათთვის ისეთ პარტიასთან ალიანსი, რომელიც ულტრამემარჯვენე ჯგუფებთან ერთად მართავს კამპანიას. „ქართული ოცნება“ ევროპარლამენტში არსებულ პოლიტიკური ჯგუფში „სოციალ-დემოკრატების პროგრესულ ალიანსში“ (S&D) შემავალი პარტიის „ევროპის სოციალისტური პარტიის“ (PES) დამკვირვებელი წევრია. ინფორმაცია, რომ საქართველოს პრემიერ-მინისტრი, ირაკლი ღარიბაშვილი უნგრეთში დაგეგმილი კონსერვატორთა საერთაშორისო კონფერენციის მომხსენებლებს შორისაა, გუშინ გავრცელდა. კონსერვატორთ საერთაშორისო კონფერენცია ბუდაპეშტში 4-5 მაისს გაიმართება. კონსერვატიული პოლიტიკური სამოქმედო კონფერენცია (CPAC) 1974 წელს აშშ-ში დაფუძნებული კონსერვატორთა ყოველწლიური ყრილობაა. სპიკერების შესახებ ინფორმაცია ოფიციალურ ვებგვერდზეა გამოქვეყნებული. სოციალურ ქსელში განთავსებული ტექსტი კი ჰომოფობიურ შინაარსს შეიცავს. ასევე იხილეთ ღარიბაშვილი უნგრეთში დაგეგმილი კონსერვატორთა ჰომოფობიური კონფერენციის სპიკერებს შორისაა 26 აპრილი, 2023

ვატიკანში რომის პაპი ფრანცისკე უკრაინის პრემიერ-მინისტრს დენის შმიგალს შეხვდა. როგორც დენის შმიგალმა პონტიფიკოსთან აუდიენციის შემდეგ განაცხადა, რომის პაპთან განიხილა უკრაინის მშვიდობის ფორმულა, ასევე, აღნიშნული ფორმულის ყველა პუნქტის შესრულებაში პაპ ფრანცისკეს დახმარება. მედიის ცნობით, უკრაინის პრემიერ-მინისტრმა რომის პაპს რუსეთში უკანონოდ დეპორტირებული ბავშვების დაბრუნებაში დახმარება სთხოვა და პაპი ფრანცისკე უკრაინაში მიიწვია. ავტორი - ქეთი ჩოხელი

პრესტიჟული ბრიტანული ონლაინ გამოცემა INDEPENDENT-ი ბათუმს ზაფხულის 10 საუკეთესო ტურისტულ მიმართულებას შორის ასახელებს, – ამის შესახებ დღეს აჭარის მთავრობის თავმჯდომარემ, თორნიკე რიჟვაძემ მთავრობის სხდომაზე განაცხადა. „მინდა, აღვნიშნო, ყველას გახსოვთ, შარშან მიმდინარეობდა მიზანმიმართული დისკრედიტაცია საზღვაო ტურისტული სეზონის. პირველ რიგში, „ნაციონალური მოძრაობა“ და მათთან დაკავშირებული რადიკალური ჯგუფები და მათ შორის აქ წარმოდგენილი ზოგიერთი მედიასაშუალებები, რომლებიც ფინანსდებიან ევროპელი პენსიონერების და ასევე ქართული ჯარის ნაძარცვი ფულით, ცდილობდნენ, მაქსიმალურად მოეხდინათ სეზონის გაფუჭება, დისკრედიტაცია, თუმცა ხელისუფლება ძალიან მყარად აგრძელებს სამშვიდობო პოლიტიკის გატარებას. შესაბამისად, ჩვენ გვექნება წარმატებული ტურისტული სეზონი და ასევე, რა თქმა უნდა, შევინარჩუნებთ დადებით ეკონომიკურ ტენდენციას. ასევე, მინდა, აღვნიშნო, რომ ეს კონკრეტული ჯგუფები ახდენენ გარკვეულწილად იმ ევროპული არჩევანის დისკრედიტაციას, რომელიც არის ქართველი ხალხის ისტორიული ნება და ეს მძარცველები ჩვენ გვიწუნებენ ჩვენს საგარეო კურს. თუმცა, ვფიქრობ, მოსახლეობისთვის ცხადია, რასთან გვაქვს საქმე და ჩვენ იმ რეკომენდაციების შესრულების შემდეგ აუცილებლად შევძლებთ, რომ გვქონდეს დადებითი შედეგები ყველა მიმართულებით“, – განაცხადა თორნიკე რიჟვაძემ. ამასთან, აჭარის მთავრობის ინფორმაციით, ევროპული ქვეყნების ჩამონათვალში, საფრანგეთის, პორტუგალიის, ესპანეთის, ხორვატიისა და შვეიცარიის გვერდით, ბათუმი მეორე ადგილს იკავებს. „ათი შთამაგონებელი იდეა აქტიური მოგზაურებისთვის“, – ამ სათაურით გამოქვეყნებულ სტატიაში მაღალრეიტინგული ონლაინ გამოცემა INDEPENDENT-ი აქტიურ მოგზაურებს ურჩევს, სხვა ევროპულ ქვეყნებთან ერთად ზაფხული ბათუმში გაატარონ. „ევროპისა და აზიის გზაჯვარედინზე მდებარე ბათუმი თავად არის კულტურების, გემოების, თავგადასავლებისა და ემოციების გზაჯვარედინი, რომელიც აერთიანებს შუა საუკუნეების ხიდებს, უძველეს კულტურულ არტეფაქტებს, თვალწარმტაც ტბებსა და ავთენტურ სტუმართმოყვარე სოფლებს“, – წერს ბრიტანული გამოცემა INDEPENDENT-ი, რომელსაც მსოფლიოს მასშტაბით 100 მილიონამდე მკითხველი ჰყავს. „ნამდვილი სილამაზე, ბათუმი – საქართველოს მეორე ქალაქი შავი ზღვის მდიდრულ სანაპიროზე – სულ უფრო მეტ მოგზაურს იზიდავს. რატომ? 2000-წლიანი მომხიბვლელი ისტორიის განმავლობაში ის შთამაგონებელი ადგილი იყო ისეთი ცნობილი მწერლებისთვის, როგორებიც იყვნენ ჯონ სტეინბეკი, კნუტ ჰამსუნი, ჯორჯ სიმენონი და მსოფლიოს წამყვანი ფიგურები – ძმები ნობელები და ალფონს როტშილდი. მსოფლიო დონის ქალაქის ცენტრში თავმოყრილია ძვირადღირებული სასტუმროები, საუკეთესო რესტორნები, სპორტული ნაგებობები და გაჟღენთილია უტყუარი ემოციებით, კლასიკური ტრადიციების პატივისცემითა და მომხიბვლელი ხელოვნების ნიმუშებით. გადაუხვიეთ ჩვეულ მარშრუტს და აღმოაჩინეთ შეუდარებელი ბათუმი“, – ნათქვამია გამოცემის სტატიაში, რომელსაც აჭარის მთავრობა ავრცელებს. ამასთან, აჭარის მთავრობის ცნობით, World Travel Awards-ის ევროპის გალაცერემონიას ბათუმი 30 სექტემბერს უმასპინძლებს. „მსოფლიოში ტურიზმის ოსკარის სახელით ცნობილი ღონისძიების ევროპის გალაცერემონიას ბათუმში მსოფლიოს სხვადასხვა ქვეყნიდან ტურიზმის ინდუსტრიის წამყვანი კომპანიების, სასტუმროების, ტურსააგენტოების, ბიზნეს და სახელმწიფო ორგანიზაციების, ასევე საერთაშორისო მედიის 300-ზე მეტი წარმომადგენელი დაესწრება. 2023 წლის განმავლობაში ბათუმის, როგორც WORLD TRAVEL AWARDS-ის მასპინძელი ქალაქის პოზიციონირება ორგანიზაციის მიერ ჩატარებულ ყველა მარკეტინგულ კამპანიაში ხორციელდება. World Travel Awards-ის დაჯილდოების ყველა ცერემონიაზე, რომლებიც, ევროპის გარდა, სხვა კონტინენტებზეც გაიმართება, ბათუმი ევროპელი პარტნიორის სტატუსით იქნება მოხსენიებული. გასულ წელს ბათუმმა World Travel Awards-ის პრესტიჟული ჯილდო, როგორც ევროპის, და შემდეგ უკვე, როგორც მსოფლიოს სწრაფად მზარდმა ტურისტულმა მიმართულებამ მოიპოვა. წელს კი ტურიზმის მთავარი მოთამაშეები ევროპის სხვადასხვა ქვეყნებიდან უკვე ბათუმში WORLD TRAVEL AWARDS-ის ევროპის გალაცერემონიაზე მოიყრიან თავს, სადაც ევროპის წამყვანი ტურისტული მიმართულებები, ქალაქები და კომპანიები გამოვლინდება“, – ნათქვამია აჭარის მთავრობის მიერ გავრცელებულ ინფორმაციაში. ავტორი - მერაბ წულუკიძე

საქართველოს პრეზიდენტი სალომე ზურაბიშვილი პოლონეთის საგარეო საქმეთა მინისტრს, ზბიგნევ რაუს შეხვდა. პრეზიდენტის ადმინისტრაციის ინფორმაციით, ორბელიანების სასახლეში გამართულ შეხვედრაზე საუბარი შეეხო საქართველოს ევროკავშირში გაწევრიანების პროცესის მიმდინარეობასა და ამ კუთხით პოლონეთის მტკიცე მხარდაჭერის მნიშვნელობას. „აღინიშნა, რომ საქართველოს ევროპული ინტეგრაცია ქართველი ხალხის დაკვეთა და მისი ურყევი არჩევანია. საქართველოს პრეზიდენტმა მადლობა გადაუხადა პოლონეთს საქართველოს ევროპული ინტეგრაციის ურყევი მხარდაჭერისათვის, რომელიც ევროპისათვის ასევე გეოპოლიტიკური მნიშვნელობის მატარებელია. საუბარი შეეხო რეგიონში უსაფრთხოების გამოწვევებს და შავი ზღვის უსაფრთხოების გაძლიერების მნიშვნელობას, ასევე უკრაინაში მიმდინარე ომსა და საქართველოს ოკუპირებულ ტერიტორიებს“, – ნათქვამია ინფორმაციაში, რომელსაც პრეზიდენტის ადმინისტრაცია ავრცელებს.

საქართველოს პრემიერ-მინისტრი, ირაკლი ღარიბაშვილი უნგრეთში დაგეგმილი კონსერვატორთა საერთაშორისო კონფერენციის მომხსენებლებს შორისაა. კონსერვატორთ საერთაშორისო კონფერენცია ბუდაპეშტში 4-5 მაისს გაიმართება. კონსერვატიული პოლიტიკური სამოქმედო კონფერენცია (CPAC) 1974 წელს აშშ-ში დაფუძნებული კონსერვატორთა ყოველწლიური ყრილობაა. სპიკერების შესახებ ინფორმაცია ოფიციალურ ვებგვერდზეა გამოქვეყნებული. სოციალურ ქსელში განთავსებული ტექსტი კი ჰომოფობიურ შინაარსს შეიცავს. კონსერვატორთა საერთაშორისო კონფერენციაში მონაწილეობაზე ორგანიზაცია „The Center“, რომელიც უნგრული კვლევითი ინსტიტუტია და ამ კონფერენციის მასპინძელი. მათი ცნობით, ღარიბაშვილი მიიჩნევს, რომ საქართველოში აქტივისტები და პოლიტიკოსები ვალდებული არიან პატივი სცენ უმრავლესობის ნებას. უცნობია დაესწრება თუ არა საქართველოს პრემიერ-მინისტრი ირაკლი ღარიბაშვილი უნგრეთში დაგეგმილ კონსერვატორთა საერთაშორისო კონფერენციას. პუბლიკა

სუდანის დედაქალაქ ხარტუმში 15 აპრილს დაწყებული შეიარაღებული დაპირისპირების დროს მყოფი საქართველოს მოქალაქეების ნაწილი თბილისში ჩამოფრინდა. საქართველოს 33-ვე მოქალაქე სუდანიდან ევაკუირებულია, თუმცა ამ ეტაპზე სამშობლოში დაბრუნებულთა შორის არიან მხოლოდ ავიაკომპანია GeoSky-ის თანამშრომლები. კომპანია MyWay-ის დირექტორმა რადიო თავისუფლებას უთხრა, რომ მათი თანამშრომლები ქვეყანაში ხვალ, 28 აპრილს, დაბრუნდებიან. 15 აპრილს, როცა სუდანში შეიარაღებული დაპირისპირება დაიწყო, ქვეყნის დედაქალაქ ხარტუმში მივლინებით იმყოფებოდა ავიაკომპანიების, Geo Sky-სა და MyWay-ს 33 თანამშრომელი. მოგვიანებით ისინი ხარტუმიდან სხვა, შედარებით უსაფრთხო რაიონში გადაიყვანეს. მსოფლიოს სახელმწიფოებმა სუდანში მყოფი მოქალაქეების ევაკუაციის დაწყება რამდენიმე დღის წინ, მას შემდეგ შეძლეს, რაც დაპირისპირებულმა მხარეებმა დროებით ზავი გამოაცხადეს. ძალაუფლების მოსაპოვებლად შეიარაღებული დაპირისპირებაა სუდანის არმიასა და გასამხედროებულ დაჯგუფება „სწრაფი რეაგირების ძალებს“ შორის, რომლებსაც ყოფილი თანამოაზრეები ხელმძღვანელობენ. არმიის მეთაურია სუდანის სუვერენული გარდამავალი საბჭოს ხელმძღვანელი, გენერალი ალ-ბურჰანი, ხოლო „სწრაფი რეაგირების ძალების“ - გენერალი დაგალო. შეიარაღებულ დაპირისპირებას უკვე ემსხვერპლა 400-ზე მეტი ადამიანის სიცოცხლე. ღრმა ეკონომიკურ კრიზისში მყოფ სუდანში 2019 წელს დაამხეს ავტორიტარი პრეზიდენტი ომარ ალ-ბაშირი, რომელიც ქვეყანას ათწლეულების განმავლობაში მართავდა. მის წინააღმდეგ დაწყებულ მასობრივ საპროტესტო გამოსვლებს მხარი დაუჭირეს სამხედროებმა. ალ-ბაშირის დამხობის შემდეგ, სამხედრო და სამოქალაქო ჯგუფები შეთანხმდნენ გარდამავალი მთავრობის შექმნაზე, თუმცა, 2021 წელს პუტჩის შედეგად ძალაუფლება ხელში აიღო გენერალმა ალ-ბურჰანმა. მას დაუპირისპირდა „სწრაფი რეაგირების ძალების“ ლიდერი, გენერალი დაგალო, რომელიც სუდანს დემოკრატიისკენ წაყვანას ჰპირდება. რადიო თავისუფლება

სტატისტიკის ეროვნული სამსახური საქართველოს მოსახლეობის რაოდენობასა და მიგრაციასთან დაკავშირებით ახალ ანგარიშს აქვეყნებს. საქსტატის მიხედვით, საქართველოდან 2022 წელს 125 269 ადამიანი წავიდა ემიგრაციაში, მათ შორის 80.5% საქართველოს მოქალაქე იყო. იმიგრანტების რაოდენობამ კი 179 778 ადამიანი შეადგინა და მათ შორის, საქართველოს მოქალქეების წილი მხოლოდ 30.3%-ია. განსხვავებულია მონაცემები საქართველოს მოქალაქეებთან დაკავშირებით. საქსტატის მიხედვით, 2022 წელს ემიგრაციაში საქართველოს 100 802 მოქალაქე წავიდა. იმიგრანტების რაოდენობა კი 54 405 იყო. შესაბამისად, გასულ წელს მინიმუმ 6 თვის საცხოვრებლად საქართველოს 46 000-ზე მეტი მოქალაქით მეტი გავიდა, ვიდრე შემოვიდა. იმიგრანტების 84.3% და ემიგრანტების 86.7% შრომისუნარიან ასაკში მყოფი მოსახლეობაა (15-64 წლის ასაკობრივი ჯგუფი). რუსეთის მოქალაქეების შემოდინებამ გავლენა იქონია მიგრაციის სალდოსა და მოსახლეობის რაოდენობაზეც. საქსტატის მიხედვით, 2023 წლის 1 იანვრის მდგომარეობით, საქართველოს მოსახლეობის რაოდენობა 3 736 400 ადამიანია, რაც წინა წლის შესაბამისი პერიოდის მაჩვენებელთან შედარებით 1.3%-ით მეტია. საქსტატის მიხედვით, 2023 წლის 1 იანვრის მდგომარეობით, საქართველოს მოსახლეობის 60.4% ქალაქში ცხოვრობს. თბილისის მოსახლეობა კი მთლიანი მოსახლეობის თითქმის მესამედს შეადგენს. საქართველოს მოსახლეობის 48% კაცი, ხოლო 52% – ქალია. საქსტატის მეთოლოგიით: ემიგრანტია პირი, რომელმაც დატოვა საქართველო და ბოლო 12 თვის განმავლობაში სულ მცირე 6 თვით (183 დღე) იმყოფებოდა სხვა სახელმწიფოს ტერიტორიაზე. შესაძლებელია დღეების ეს რაოდენობა რამდენიმე გასვლის ჯამიც იყოს. ამასთან ქვეყნიდან გასული ამ პირისთვის საქართველო უნდა ყოფილიყო მუდმივი საცხოვრებელი ქვეყანა (ე.ი. მას ქვეყნიდან გასვლამდე წინა 12 თვეში საქართველოში გატარებული უნდა ჰქონოდა სულ მცირე 6 თვე). იმიგრანტია პირი, რომელმაც გადმოკვეთა საქართველოს საზღვარი და ბოლო 12 თვის განმავლობაში სულ მცირე 6 თვით იმყოფებოდა საქართველოს ტერიტორიაზე. ამ შემთხვევაშიც შესაძლებელია, ეს რამდენიმე შემოსვლის ჯამიც იყოს. ამასთან საქართველო არ იყო მისთვის მუდმივი საცხოვრებელი ქვეყანა (ე.ი. მას საქართველოს საზღვრებს გარეთ წინა 12 თვეში გატარებული ჰქონდა სულ მცირე 6 თვე). პუბლიკა

2022 წლის 1-ელი თებერვლიდან 2023 წლის 24 აპრილის ჩათვლით პერიოდში, თბილისში, მუნიციპალური ტრანსპორტის სამივე სახეობით: მეტროპოლიტენით, მიკროავტობუსითა და ავტობუსით უბილეთოდ მგზავრობისას, ჯამში, 155 556 ჯარიმაა გამოწერილი. როგორც „ინტერპრესნიუსს“ თბილისის სატრანსპორტო კომპანიიდან გამოთხოვილი ინფორმაციის პასუხად აცნობეს, გამოწერილი ჯარიმების ოდენობა 3 111 120 ლარს შეადგენს. ოფიციალური ინფორმაციის მიხედვით, 2022 წლის განმავლობაში 105 692 ჯარიმაა გამოწერილი. 2023 წლის 4 თვეში კი 49 864. 2022 წელს, ყველაზე მეტი 64 850 ჯარიმა ავტობუსით უბილეთოდ მგზავრობისას გაიცა, ხოლო ყველაზე ცოტა 10 650 მეტროპოლიტენით სარგებლობისას. წლის განმავლობაში, მიკროავტობუსით მგზავრობისას 30192 ჯარიმაა გამოწერილი. რაც შეეხება 2023 წელს, მიღებული ინფორმაციის მიხედვით, ამ შემთხვევაშიც, ყველაზე მეტი 25144 ჯარიმაა გაცემული ავტობუსით უბილეთოდ მგზავრობისას, ხოლო ყველაზე ცოტა 867 ჯარიმა მეტროპოლიტენით გადაადგილებისას. მიკროავტობუსით უბილეთოდ მგზავრობისას კი 23853 ჯარიმაა გამოწერილი. ცნობისთვის, თბილისში, მუნიციპალური ტრანსპორტით უბილეთოდ მგზავრობაზე 20-ლარიანი ჯარიმაა დაწესებული. პალიტრა

თუ ვადამდელი არჩევნები ჩატარდება, ეს დიდი პოლიტიკური შეთანხმების ნაწილი უნდა იყოს, წინააღმდეგ შემთხვევაში ვადამდელმა შეიძლება მეტი რისკი შექმნას, მათ შორის ხელისუფლების მხრიდან არჩევნებზე გავლენის გზით, - ამის შესახებ ჟურნალისტებთან პარტია "საქართველოსთვის" დეპუტატმა, ბექა ლილუაშვილმა განაცხადა. ლილუაშვილი გამოეხმაურა "ნაციონალური მოძრაობის" წევრის, კობა ნაყოფიას განცხადებას და აღნიშნა, რომ ვადამდელ არჩევნებზე მოლოდინების წინასწარ შექმნა სწორი არ არის, თუმცა, ოპოზიცია მსგავსი შემთხვევისთვის მზად უნდა იყოს. „ჩვენი პარტნიორების განწყობა ქართველი ხალხის მიმართ იმედს გვიტოვებს, რომ კანდიდატის სტატუსს მოგვცემენ. თუ ისე მოხდა, რომ ქვეყანას კანდიდატის სტატუსი არ მისცეს, ამ შემთხვევაში, ვფიქრობ, არც ნაყოფიას, არც ლილუაშვილის, არც ივანიშვილის გადასაწყვეტი არ იქნება რიგგარეშე არჩევნების საკითხი, თუ ეს დღის წესრიგი დადგა, ამას ქართველი ხალხი დააყენებს. შესაბამისად, რიგგარეშე არჩევნებზე მოლოდინების შექმნა სწორი არ მგონია. ნებისმიერ შემთხვევაში ოპოზიცია იმის ოპოზიციაა, რომ ნებისმიერ დროს მზად უნდა იყოს მსგავსი მომენტებისთვის. მე სხვის ნაცვლად ვერ ვილაპარაკებ, ჩვენი პარტია ნამდვილად ემზადება და შეხვდება და ამ გამოწვევას. ძალიან ბევრი კითხვის ნიშანია ხოლმე როცა ვადამდელზე საუბარი გვესმის, რა სისტემით უნდა ჩატარდეს? ახლა რომ ჩატარდეს, ჩანაწერი გვაქვს, რომ 2024 - ში კიდევ უნდა ჩატარდეს, ამიტომ ბევრი კითხვაა და თუ ვადამდელი ჩატარდება ეს დიდი პოლიტიკური შეთანხმების ნაწილი უნდა იყოს და ყველა კითხვას პასუხი გაეცეს, წინააღმდეგ შემთხვევაში ვადამდელის ჩატარებამ შეიძლება უფრო მეტი რისკი შექმნას, მათ შორის ხელისუფლების მხრიდან არჩევნებზე გავლენის გზით, რადგან რეკომენდაციები არ სრულდება და ყველა მექანიზმი რჩებათ, რაც კანონის მიღმა შეუძლიათ გამოიყენონ, "- განაცხადა ლილუაშვილმა. ინფორმაციისთვის, "ნაციონალური მოძრაობის" წევრმა, კობა ნაყოფიამ "პალიტრანიუსის" გადაცემაში "360 გრადუსი" განაცხადა, რომ თუ ქვეყანა კანდიდატის სტატუსს ვერ მიიღებს, ვადამდელი არჩევნები იქნება და ოპოზიცია ამისთვის მზად უნდა იყოს.