tvati

საქართველოს პარლამენტის თავმჯდომარის განცხადებით, საარჩევნო ბარიერის დაწევის საკითხი არ განიხილება. ამის შესახებ პაპუაშვილმა „ღამის კურიერის“ ეთერში განაცხადა. წამყვანმა მას ჰკითხა, წლის ბოლოს ევროკავშირის წევრობის კანდიდატის სტატუსის მიღების შემთხვევაში, 2024 წლის საპარლამენტო არჩევნები ჩატარდება თუ არა 2%-იანი ბარიერით, როგორც ეს თავის დროზე ირაკლი კობახიძემ დააანონსა. პაპუაშვილის თქმით, კობახიძის პირობა გასული წლის ივნისში კანდიდატის სტატუსის მოლოდინში იყო დადებული და „მომავალთან კავშირი არ აქვს“. „არა, ბარიერის საკითხი არ განიხილება. მაშინ ის იყო იმ კონტექსტში ნათქვამი, ივნისში, როცა გადაწყვეტილებას ველოდით და ამას მომავალთან კავშირი არა აქვს“, — განაცხადა პაპუაშვილმა. სინამდვილეში კობახიძემ ბარიერის დაწევაზე განცხადება გააკეთა 2022 წლის 7 ივლისს, როდესაც უკვე ჩავლილი იყო ევროპული საბჭოს სხდომა, რომელზეც საქართველომ სტატუსი ვერ მიიღო. კობახიძემ განაცხადა, რომ „[2022 წლის] დეკემბერში ევროკავშირის მიერ საქართველოსთვის კანდიდატის სტატუსის მინიჭებიდან არაუგვიანეს 1 თვისა, საქართველოს პარლამენტი სამივე მოსმენით მიიღებს კონსტიტუციურ კანონს, რომლის თანახმად, 2024 წლის და მომდევნო საპარლამენტო არჩევნები სრულად პროპორციული სისტემით და 2%-იანი ბარიერით ჩატარდება“. მოგვიანებით ევროკავშირმა საქართველოს კანდიდატობის საკითხის ხელმეორედ გარკვევა, თავდაპირველად დაანონსებული 2022 წლის დეკემბრის ნაცვლად, 2023 წლის ბოლომდე გადადო. შალვა პაპუაშვილის თქმით, ბარიერის დაწევა სინამდვილეში მოიტანს არა პლურალიზმს, რისი მოლოდინიც ხელისუფლებას ჰქონდა 2020 წლის არჩევნებში, არამედ დესტრუქციულ „ნაციონალურ მოძრაობას“ და მისი სატელიტებს პარლამენტში. ჟურნალისტის რეპლიკაზე, პარლამენტში არიან „მოქალაქეები“ და „გირჩი“, რომელსაც ხელისუფლება კონსტრუქციულ ოპოზიციად მიიჩნევს, პაპუაშვილმა თქვა, რომ ამ პარტიებისგანაც „ბოლო პერიოდში ვხედავთ აბსოლუტური აჟიტირებას საგამოძიებო კომისიის მიმართ“. „დაბალი ბარიერი უზრუნველყოფს, ერთი მხრივ, ხელოვნურ პლურალიზმს და ამავე დროს, მარგინალი პოლიტიკური ორგანიზაციების შესვლას პარლამენტში. მარგინალური პარტიების წახალისება პოლიტიკური სისტემის ამოცანა არ უნდა იყოს“, — განაცხადა პაპუაშვილმა და დასძინა, რომ საქართველოს კონსტიტუცია 2024 წლის საპარლამენტო არჩევნები 5%-იანი ბარიერით ჩატარებას ითვალისწინებს. ბოლო, 2020 წლის საპარლამენტო არჩევნები, ერთჯერადად, ბუნებრივი ბარიერის ფარგლებში ჩატარდა [120 დეპუტატი აირჩიეს პროპორციული, 30 მაჟორიტარული წესით]. კონსტიტუციის მოქმედი რედაქციის თანახმად კი, 2024 წლის საპარლამენტო არჩევნები სრულად პროპორციული წესით, 5%-იანი ბარიერით უნდა ჩატარდეს. 2020 წლის არჩევნების შემდეგ დაწყებული პოლიტიკური კრიზისის გადაჭრის მიზნით დადებული „შარლ მიშელის“ [იგივე 19 აპრილის] შეთანხმებით, პოლიტიკურმა პარტიებმა აიღეს ვალდებულება, რომ გატარდებოდა საარჩევნო რეფორმა, რომლის ფარგლებშიც ბარიერი განისაზღვრებოდა „ბუნებრივიდან 2%-მდე“. თუმცა ეს შეთანხმება „ქართულმა ოცნებამ“ 2021 წლის აგვისტოში დატოვა. ამის მიუხედავად, „ქართული ოცნება“ აცხადებდა, რომ საარჩევნო ბარიერს დაწევდა, თუმცა მალევე დაიწყო საუბარი არა 2, არამედ 3%-იან ბარიერზე. ცვლილებები პარლამენტმა 2021 წლის სექტემბერში პირველი მოსმენით მიიღო, სადაც ბარიერად 2% განისაზღვრა, თუმცა მეორე-მესამე მოსმენა არ გამართულა და ძალაში არ შესულა. ნეტგაზეთი

სახალხო დამცველის აპარატის მიერ გავრცელებული ინფორმაციით, ყოფილი ნარკოლოგიური ცენტრის შენობაში განთავსებულ გორის სოციალურ საცხოვრისში 80-მდე ოჯახი ცხოვრობს. სახალხო დამცველის ცნობით, საცხოვრისს არ აქვს საკანალიზაციო და სადრენაჟო სისტემები; არ არის მოწყობილი სამზარეულო და ინდივიდუალური სველი წერტილები. მაცხოვრებლებს ხელი არ მიუწვდებათ სუფთა წყალზე, რაც განსაკუთრებულ საფრთხეს უქმნის მობინადრეთა სიცოცხლესა და ჯანმრთელობას. 2023 წლის 3 მაისს საქართველოს სახალხო დამცველმა ლევან იოსელიანმა გორის სოციალური საცხოვრისი მოინახულა, სადაც 300-მდე ადამიანი ცხოვრობს. სახალხო დამცველი შეხვდა მაცხოვრებლებს, გაეცნო მათ პირობებს, დაათვალიერა შენობა.

შინაგან საქმეთა სამინისტროს თბილისის პოლიციის დეპარტამენტის თანამშრომლებმა, 1981 წელს დაბადებული, წარსულში ნასამართლევი თ.ბ. ნათესავი ქალის განზრახ მკვლელობის ბრალდებით დააკავეს. ამის შესახებ ინფორმაციას შინაგან საქმეთა სამინისტრო ავრცელებს. დანაშაული 10-დან 15 წლამდე ვადით თავისუფლების აღკვეთას ითვალისწინებს. „გამოძიებით დადგინდა, რომ მიმდინარე წლის 29 აპრილს, ბრალდებულმა თბილისში, საკუთარ საცხოვრებელ სახლში, ეჭვიანობის ნიადაგზე, ნათესავზე - 1986 წელს დაბადებულ მ.ბ.-ზე ფიზიკურად იძალადა. თ.ბ.-მ ახალგაზრდა ქალს ხელკეტისა და ელექტროშოკის გამოყენებით სხეულზე სხვადასხვა სახის დაზიანებები მიაყენა, რის შედეგადაც იგი ადგილზე გარდაიცვალა. პოლიციამ, ჩატარებული ოპერატიული ღონისძიებებისა და საგამოძიებო მოქმედებების შედეგად, დანაშაულში ბრალდებული თ.ბ. ცხელ კვალზე დააკავა. განზრახ მკვლელობის ფაქტზე გამოძიება საქართველოს სისხლის სამართლის კოდექსის 108-ე მუხლით მიმდინარეობს“, - ნათქვამია შსს-ს მიერ გავრცელებულ განცხადებაში. პალიტრა

4 მაისის ღამეს, უკრაინის წინააღმდეგ საჰაერო თავდასხმის დროს, რუსულმა ძალებმა ოდესის მიმართულებით Shahed-131/136-ის ტიპის 15 „კამიკაძე“ დრონი გაუშვეს, - ინფორმაციას უკრაინული მედია ავრცელებს. მათივე ინფორმაციით, „სამხრეთის“ ოპერატიულ სარდლობაში აცხადებენ, რომ მოწინააღმდეგის უპილოტო საფრენი აპარატების უმეტესობა განადგურდა. „ოდესაში ღამით, მტერმა შეტევა Shahed-131/136 ტიპის 15 დრონით განახორციელა. 12 საჰაერო თავდაცვის ძალებმა გაანადგურეს", - აცხადებენ სარდლობაში. მათივე ინფორმაციით, სამი დრონი ქალაქის ერთ-ერთი სასწავლო დაწესებულების საერთო საცხოვრებელს მოხვდა და ხანძარი გაჩნდა, თუმცა ის ადგილობრივმა მაშველებმა სწრაფად ჩააქრეს. თავდასხმის შედეგად არავინ დაშავებულა. ოდესაში გაშვებულ „კამიკაძე“ დრონებზე ეწერა: „მოსკოვისთვის“ და „კრემლისთვის“. შეგახსენებთ, წუხელ უკრაინის რამდენიმე ოლქში საჰაერო განგაში გამოცხადდა. გავრცელდა ინფორმაცია, რომ კიევსა და ოდესაში აფეთქებების ხმები ისმოდა. ipn

თბილისის მერი კახა კალაძე აცხადებს, რომ ვიოლა ფონ კრამონი ან რომელიმე ევროპარლამენტარი „არ არის ევროპა“. „ამ ადამიანებს, ვინც დღეს ევროპის სახელით გველაპარაკებიან, საერთოდ ევროპულ ღირებულებებთან არანაირი კავშირი არ გააჩნიათ. ერთეული ევროპარლამენტარის განცხადებებიც მინდა აქ შემოვიტანო. მართლაც შეურაცხმყოფელია ის განცხადებები, რასაც ეს ადამიანები კადრულობენ. იგივე ოპოზიციის მიტინგებზე მისვლა… იმ ქალბატონის სახელი არ მახსოვს…“ — თქვა კალაძემ „იმედის“ ეთერში. წამყვანებმა მას შეახსენეს ვიოლა ფონ კრამონის სახელი. ევროპარლამენტარი 1-ელ აპრილს, თბილისში, მთავრობის ადმინისტრაციასთან ლაზარე გრიგორიადისის მხარდამჭერ აქციაზე მივიდა. „მე გულწრფელად ვამბობ, არ გამოვრიცხავ, რომ ხვალ-ზეგ შეიძლება, მოლოტოვის კოქტეილით ვიხილოთ დედაქალაქში. არც იმას გამოვრიცხავ, რომ ოპოზიციამ რომელიმე ევროპარლამენტარი რომელიმე ოლქში მაჟორიტარ კანდიდატად წარმოგვიდგინოს. არც ეს ქალბატონი — გვარი არ მახსოვს — ვიოლა არ არის ევროპა და არც რომელიმე ევროპარლამენტარი“, — დასძინა კალაძემ. მმართველი გუნდი მუდმივად აკრიტიკებს ევროპარლამენტარ ვიოლა ფონ კრამონს, რომელიც საქართველოს ევროინტეგრაციის აქტიური მხარდამჭერია, თუმცა კრიტიკული პოზიციებით გამოირჩევა „ქართული ოცნების“ ხელისუფლებისადმი, ისევე როგორც წარსულში „ნაციონალური მოძრაობის“ მიმართ. ცოტა ხნის ვიოლა ფონ კრამონმა ისაუბრა საქართველოში მის წინააღმდეგ წარმოებულ დეზინფორმაციულ კამპანიაზე და თქვა, რომ ქართველმა „ტროლებმა“ რუს „ტროლებსაც“ კი აჯობებს. ასე გამოეხმაურა იგი მტკიცებას, თითქოს ფონ კრამონი ნაცისტური გერმანიის მაღალჩინოსნის, ჰერმან გერინგის შთამომავალია, და ხელოვნური ინტელექტით შექმნილ ვიდეოს, რომელშიც თითქოს ნასვამ მდგომარეობაში იმყოფება. ფონ კრამონი ხაზს უსვამს, რომ ამ ყალბ ინფორმაციას „ძირითადად“ მმართველი პარტიის მხარდამჭერები აზიარებენ და ეჭვობს, რომ ფეიკების დამკვეთი, სავარაუდოდ, სწორედ მმართველი გუნდია. ევროპარლამენტარი „ქართული ოცნების“ პარტნიორი სოციალისტებისა და დემოკრატების პროგრესული ალიანსის ჯგუფიდან ტეის რეიტენი (ნიდერლანდები) მიუღებლად მიიჩნევს ევროპარლამენტარ ვიოლა ფონ კრამონზე თავდასხმებს. „ასეთი საზიზღარი თავდასხმა ვიოლა ფონ კრამონზე, საქართველოს ევროპული მომავლის უდიდეს მხარდამჭერზე, მიუღებელია. ჩვენ გვინდა, რომ საქართველომ წარმატებას მიაღწიოს. ქართველებს ეს უნდათ. ამიტომ საქართველოს ლიდერებმა უნდა შეწყვიტონ ამის წინააღმდეგ მუშაობა“, — აცხადებს ევროპარლამენტარი ტეის რეიტენი. ნეტგაზეთი

1 ლარი და 60 თეთრი დაუჯდა აფხაზეთის მე-10 საჯარო სკოლას [მდებარეობს ჩხოროწყუში] ერთი პირველკლასელის გამოკვება. ექსპერიმენტის სახით სკოლამ უზრუნველყო 1 კვირის განმავლობაში 24 პირველკლასელის უფასო კვება – მენიუში შედიოდა როგორც ბოსტნეული, ასევე ხილი და ბურღულეული. ამავე სკოლის სამოქალაქო განათლების პედაგოგი მელორ ცქვიტაია, რომელიც ამ იდეის ერთ-ერთი განმახორციელებელია, ნეტგაზეთთან ამბობს, რომ ჯამში, 1 კვირის პროდუქტები დაახლოებით 211 ლარი დაჯდა, რაც სკოლის სამეწარმეო კლუბმა დააფინანსა. ჩხოროწყუს გამოცდილება მელორ ცქვიტაია, რომელიც მასწავლებლის არაერთი პრიზის მფლობელი და „მასწავლებლის ეროვნული ჯილდოს“ ფინალისტია, გვიყვება, რომ სკოლებში კვების საკითხებით მაშინ დაინტერესდა, როდესაც „განათლების კოალიციის“ ტრენინგებს დაესწრო. მასწავლებელი ამბობს, რომ სანამ უფასო კვების ექსპერიმენტს ჩხოროწყუში ჩაატარებდნენ, მან ბევრი სხვა ქვეყნის გამოცდილებაც შეისწავლა. რაც შეეხება თანხებს, პროდუქტებისა და ერთჯერადი თეფშების ჯამურმა ხარჯმა დაახლოებით 211 ლარი შეადგინა, თანხა კი სკოლის სამეწარმეო კლუბმა დაფარა. სამეწარმეო კლუბში სხვადასხვა ნივთები იქმნება, მათ შორის, როგორც მასწავლებელი განმარტავს – ეკოჩანთებიც. ამ ნივთების გაყიდვის შედეგად მობილიზებული თანხებით კი სკოლის სხვადასხვა პროექტი ფინანსდება – „მაგალითად, შარშან 1500 ლარი ავაგროვეთ უკრაინელი ბავშვებისთვის“. სხვა მიზნებთან ერთად, უფასო კვების ამ ექსპერიმენტს უთანასწორობისა და უხერხულობის აღმოფხვრა სურდა ბავშვებს შორის, რადგან ზოგს სკოლაში საკვები დააქვს, ზოგი კი ამას ვერ ახერხებს. მასწავლებლის თქმით, აფხაზეთის მე-10 საჯარო სკოლაში ბუფეტი არ არის, შესაბამისად, ყველაზე ოპტიმალური ფორმატი სკოლისთვის ე.წ. ლანჩბოქსები ანუ „სადილის ყუთებია“. „მშობლებიც გვეხმარებიან საჭმლის მომზადებაში – მონაწილეობას იღებენ მოსწავლეთა თვითმმართველობის და სამოქალაქო კლუბის წევრებიც”, – გვიყვება მელორ ცქვიტაია. თავდაპირველად იგეგმებოდა, რომ სკოლაში კვების პროგრამა 1 კვირას გასტანდა, თუმცა, მშობლებისა და ადგილობრივი ბიზნესის მხარდაჭერის წყალობით, მასწავლებელი ამბობს, რომ ბავშვებს წლის ბოლომდე უზრუნველყოფენ საკვებით – „თუ ყოველდღიურად არა, კვირაში 2-3-ჯერ მაინც წლის ბოლომდე პირველკლასელთათვის გარანტირებულად გვაქვს საკვები“. „ეს, რა თქმა უნდა, საცდელი ექსპერიმენტია. ჩვენი მიზანია დავანახოთ საზოგადოებას, რომ ეს შესაძლებელია. აქ არამარტო კვების ასპექტია, მე, როგორც მასწავლებელმა, დავაფიქსირე სხვა რაღაცაც: ერთმა ბავშვმა ჭამისას გადაულაპარაკა მეორეს – შენც გიყვარს სტაფილოო? მეორემ უპასუხა, კი, მეც მიყვარს და მაშინ უფრო მეტად ვიმეგობროთო.. შევამჩნიე, რომ ბავშვები ასე უკეთ სოციალიზდებიან. რაც შეეხება მენიუს, არსებობს კვების სახელმწიფო დღიური სტანდარტი – იქ დათვლილია გრამები და საჭირო პროდუქტები, ასევე, სხვადასხვა სპეციალისტს ვესაუბრე და ასე შევადგინეთ რაციონიც“, – აცხადებს მასწავლებელი. მელორ ცქვიტაია. ფოტო: პირადი ფეისბუკი კითხვაზე, ხომ არ გამოხმაურება სკოლის ამ გამოცდილებას განათლების სამინისტრო, მელორ ცქვიტაია განმარტავს, რომ აფხაზეთის მე-10 საჯარო სკოლა, რომელიც ამჟამად ჩხოროწყუში ფუნქციონირებს, აფხაზეთის ა/რ-ის განათლების სამინისტროს ექვემდებარება, რომლისგანაც მხარდაჭერას გრძნობენ. უფასო სასკოლო კვების შეუსრულებელი დაპირება უცნობია, როდის დანერგავს სახელმწიფო სკოლებში უფასო კვების პროგრამას, რომელზეც წელიწად-ნახევარზე მეტია, რაც მუშაობს. ასევე უცნობია, უფასო კვების რა მოდელს შეარჩევს სახელმწიფო და რა დაუჯდება ის. სკოლებში უფასო კვების დანერგვის მიზნით უწყებათაშორისი საბჭოა შექმნილი. არც საბჭოსგან და არც სამინისტროსგან საზოგადოებას ამ დრომდე არ მიუღია პროგრამის შესახებ დეტალური გეგმა. „ხმა“ სამოქალაქო ორგანიზაციაა, რომელიც სკოლებში უფასო კვების პროგრამას ლობირებს. დეკემბერში მოძრაობამ გამოაქვეყნა ანგარიში, რომლის თანახმადაც, წლიურად სკოლებში კვება, ყველა ხარჯის გათვალისწინებით, ბიუჯეტს დაახლოებით 198 მილიონი ლარი დაუჯდება. ფოტო: სქრინშოტი „ხმის“ გაანგარიშებიდან წალენჯიხაში, რომელიც საქართველოში ერთადერთი მუნიციპალიტეტია ოპოზიციონერი მერით, უკვე ჩაეშვა სკოლაში მოსწავლეთა კვების პირველი, საპილოტე ვერსია. პროგრამა ჯერჯერობით მხოლოდ პირველკლასელებისთვის არის განკუთვნილი. ნეტგაზეთი

პარლამენტის საგამოძიებო კომისიის შექმნა არ გულისხმობს საგამოძიებო უწყების ჩანაცვლებას. კომისიას და საგამოძიებო უწყებას ერთმანეთისგან დამოუკიდებელი მიზნები აქვთ, - ამის შესახებ პარტია "საქართველოსთვის" თავმჯდომარის მოადგილე ნათია მეზვრიშვილი სოციალურ ქსელში წერს. მისი განცხადებით, კომისიის შექმნის აუცილებლობა დგება მაშინ, როცა არსებობს ინფორმაცია სახელმწიფო ორგანოს ან თანამდებობის პირის მხრიდან კანონის დარღვევაზე და სახელმწიფო (საგამოძიებო) უწყებები სათანადოდ არ რეაგირებენ. " ამ შემთხვევაში, კომისიის შექმნის მიზანია, კანონის დარღვევის ფაქტის გამოკვლევა შესაბამისი რეაგირების (გამოძიების ან დევნის დაწყების) მიზნით. კომისიას არ აქვს არც გამოძიების და არც დევნის დაწყების უფლება. შესაბამისად, გამოკვლევის შედეგები რეაგირებისთვის უნდა გააგზავნოს სათანადო უწყებაში. - ისმის კითხვა - მაშინ რა საჭიროა კომისია? საჭიროა იმისთვის, რომ ხალხმა, მის მიერ არჩეული პარლამენტის მეშვეობით, განახორციელოს იმ ხელისუფლების კონტროლი, რომელიც უარს ამბობს დანაშაულზე რეაგირებაზე ან არასათანადოდ რეაგირებს. - შესაბამისად, კომისია შეიძლება შეიქმნას მაშინაც, როცა დანაშაულის ფაქტზე გამოძიება ფაქტობრივად მიმდინარეობს და მაშინაც, როცა საგამოძიებო უწყება გამოძიებას არ იწყებს. ამის ნათელი მაგალითია უახლოესი წარსულიდან ხორავას საქმე (სადაც კომისია შეიქმნა მიუხედავად იმისა, რომ შსს გამოძიებას აწარმოებდა) და დღეს უკვე სანქცირებული მოსამართლეების შესაძლო კორუფციის საქმე (რაზეც პროკურატურა გამოძიებას არ იწყებს) და ქოლ-ცენტრების ტრანსნაციონალური დანაშაულის საქმე (რაზეც პროკურატურა არასათანადო გამოძიებას აწარმოებს). - კომისიის შექმნის ინიცირების უფლება აქვს 30 დეპუტატს და შესაქმნელად აუცილებელია 50 დეპუტატის მხარდაჭერა. - კომისიას უფლება აქვს სხდომაზე ახსნა-განმარტება ჩამოართვას ნებისმიერ პირს (მათ შორის მოსამართლეს), ინფორმაცია გამოითხოვოს ნებისმიერი სახელმწიფო (მათ შორის საგამოძიებო) ორგანოდან, მოითხოვოს სისხლის სამართლის საქმის მასალები (როგორც ეს მოითხოვა ხორავას საქმეზე, რაც კიდევ ერთი დასტურია, რომ აბსოლუტურად სხვადასხვა პროცესია) და ა.შ. სხდომაზე გამოცხადება სავალდებულოა. - კომისიის შექმნაზე უარი ნიშნავს, რომ არ არსებობს მოსამართლეთა კორუფციული დანაშაულისა და ქოლ-ცენტრების ტრანსნაციონალურ დანაშაულში ხელისუფლების მონაწილეობის გამოკვლევის/გამოძიების პოლიტიკური ნება.", წერს ნათია მეზვრიშვილი.

ამერიკის შეერთებული შტატების საელჩო ევროპაში მიმდინარე სამხედრო სწავლებაში საქართველოს არმონაწილეობაზე განცხადებას ავრცელებს. აშშ-ის საელჩოს განმარტებით, სწავლებაში არმონაწილეობასთან დაკავშირებით შეერთებულმა შტატებმა და საქართველომ გადაწყვეტილება ერთობლივად მიიღეს და ძალისხმევას სხვა სწავლებებისკენ მიმართავენ. „შეერთებული შტატები აშშ-საქართველოს სტრატეგიული პარტნიორობის გაღრმავების ერთგული რჩება და ერთობლივ მუშაობას განაგრძობს, რათა ორივე ქვეყანა გახდეს უფრო უსაფრთხო და დაცული. 2023 წელს შეერთებული შტატები და საქართველო ერთობლივი სამხედრო აქტივობების ფართო სპექტრის განხორციელებას აგრძელებს. წელს შეერთებული შტატები და საქართველო ერთობლივად ორიენტირებული არიან, რომ მაქსიმალურად გაზარდონ ურთიერთსასარგებლო სწავლებები საქართველოს კრიტიკულად მნიშვნელოვანი შესაძლებლობების გაძლიერებისთვის. სამხედრო სწავლება – Defender 23 (მცველი 23) ბოლო წლებია, აშშ-ის ევროპული სარდლობის ლიდერობით იმართება და მრავალეროვნულ, ერთობლივ წვრთნებს მოიცავს. 5 აპრილს პენტაგონმა განაცხადა, რომ წვრთნები 22 აპრილიდან დაიწყებოდა და მასში აშშ-ის 9 000 ჯარისკაცთან ერთად მისი მოკავშირე სახელმწიფოების 17 000 სამხედრო მიიღებდა მონაწილეობას, სწავლება კი ევროპის 10 ქვეყანაში ჩატარდებოდა. აშშ-ის ევროპული სარდლობის მიერ გავრცელებულ ინფორმაციაში წვრთნების მონაწილე ქვეყნებს შორის საქართველოც იყო დასახელებული. 28 აპრილს კი ქართულ მედიაში გავრცელდა ინფორმაცია, რომ საქართველო წელს სწავლებაში მონაწილეობას აღარ მიიღებდა. ეს ინფორმაცია ჟურნალისტებთან დაადასტურა თავდაცვის მინისტრმა ჯუანშერ ბურჭულაძემ. მაგრამ მინისტრმა უარზე გადაწყვეტილება „ლოგისტიკური ხარჯებით“ ახსნა. publika

Meta-ს ახალი ანგარიშის მიხედვით, მათ გამოავლინეს არაავთენტური ქცევის ათობით მომხმარებელი და ჯგუფი, რომელიც ჩართული იყო საქართველოში პროსახელისუფლებო გზავნილების პოპულარიზაციასა და ოპოზიის კრიტიკაში, განსაკუთრებით ე.წ. უცხუური გავლენის აგენტებზე კანონის მიღებისას დაწყებული აქციების დროს. Meta-ს განცხადებით, მათ წაშალეს 80 Facebook-მომხმარებელი, 26 გვერდი, 9 ჯგუფი და 2 Instagram-მომხმარებელი. ქსელი იყენებდა Facebook-ს, Instagram-სა და TikTok-ს და ცდილობდა გაეზარდა თავიანთი მასალების გავრცელება, მომხმარებელთა ჩართულობა და პოპულარობა. Meta-ს ანგარიშის მიხედვით, Facebook-თან ერთად ქსელში იყო ჩართული სამი TikTok-ანგარიშიც, ორი მათგანი კი პოზიციონირებდა, როგორც პრემიერ-მინისტრ ირაკლი ღარიბაშვილთან დაკავშირებული ანგარიში: http://tiktok[.]com/@juurnalistebi http://tiktok[.]com/@igaribashvili https://www.tiktok[.]com/@irakli4georgia „ქსელი ფუნქციონირებდა 24 საათის განმავლობაში, რათა გაეზარდა მასალებზე ცნობადობა საქართველოს ამჟამინდელი ხელისუფლების მხარდასაჭერად, მათ შორის ოფიციალური სამთავრობო გვერდების და პროსამთავრობო მედიის ანგარიშების გადაზიარების ჩათვლით. ისინი ასევე ავრცელებდნენ კრიტიკას ოპოზიციის მიმართ, განსაკუთრებით ბოლოდროინდელი საპროტესტო გამოსვლების დროს, რაც ე.წ. უცხოური აგენტების შესახებ კანონპროექტის განხილვას მოჰყვა. ეს ქსელი რეალურ დროში მიჰყვებოდა საპროტესტო მოვლენებს, მათ შორის შუაღამისასაც კი. ქსელის უკან მყოფი პირები აქვეყნებდნენ მიმებს, ტექსტურ მასალებსა და კომენტარებს, ძირითადად, ქართულ ენაზე. მიუხედავად იმისა, რომ ამ ოპერაციის უკან მყოფი პირები ცდილობდნენ თავიანთი ვინაობისა და კოორდინაციის დამალვას, ჩვენმა გამოძიებამ აღმოაჩინა მათი კავშირი საქართველოს მთავრობის ადმინისტრაციის სტრატეგიული კომუნიკაციების დეპარტამენტთან“, – ნათქვამია Meta-ს ანგარიშში. ასევე Meta-ს განცხადებით, ქსელს 33 500 დოლარი ჰქონდა დახარჯული Facebook-სა და Instagram-ზე რეკლამირებაში. publika

თბილისში საღებავი შეასხეს და კვერცხები ესროლეს ავტობუსს, რომლის სალონშიც ჩამოკიდებულია ემბლემა, წარწერით “რუსეთის ფედერაციის პრეზიდენტის უსაფრთხოების სამსახური”. ავტობუსს რუსულენოვანი ნომერი აქვს. სანომრე ნიშანზე მითითებულია რუსეთში მოქმედი სატრანსპორტო კომპანიის, BBUS-ის ვებგვერდის მისამართი. ემბლემის შესახებ, რომლის მსგავსი აქსესუარები ონლაინ სივრცეშიც იყიდება, დამატებითი დეტალები უცნობია. “ნეტგაზეთი” შსს-სგან ელის პასუხს. ფოტოები: Tite Gedenidze/Facebook; დავით ქაცარავა/Facecook სოციალურ მედიაში ჯერ ავტობუსის ფოტოები გავრცელდა, შემდეგ კი აქტივისტებმა გამოაქვეყნეს ფოტომასალა, რომელშიც წითელი საღებავით დაფარული საქარე მინა ჩანს. “დავკვერცხეთ და გავალამაზეთ”, — წერს “შეცვალეს” აქტივისტი ტიტე გედენიძე. ნეტგაზეთი

მიხაილ პოდოლიაკის, უკრაინის პრეზიდენტის ოფისის ხელმძღვანელის მრჩევლის, განცხადებით, თავდასხმა კრემლზე, რომელშიც მოსკოვი უკრაინას სდებს ბრალს, სავარაუდოდ „წინააღმდეგობის ადგილობრივმა ძალებმა“ მოაწყვეს. პოდოლიაკი ხაზს უსვამს, რომ უკრაინა აწარმოებს მხოლოდ თავდაცვით ომს და არ ესხმის თავს ობიექტებს რუსეთის ტერიტორიაზე. მისივე თქმით, უკრაინისთვის მსგავსი თავდასხმები „არანაირ სამხედრო ამოცანას არ ხსნის“, რუსეთს კი უკრაინელ სამოქალაქო პირებზე თავდასხმის გამართლების საფუძველს აძლევს. გირჩევთ: თავდასხმა კრემლზე? – რა (არ) ვიცით იგი არც იმას გამორიცხავს, რომ თავდასხმა თავად რუსეთმა მოაწყო:

აფხაზეთის დე ფაქტო საგარეო საქმეთა სამინისტრო გაეროს პროგრამებს გამჭვირვალობის მოთხოვნის შეუსრულებლობის გამო, დახურვით ემუქრება. როგორ უწყების განცხადებაშია ნათქვამი, პროექტების შესახებ ინფორმაციის კონტროლის მიზნით აფხაზეთის საგარეო საქმეთა სამინისტრომ აფხაზეთში UNDP-ის ოფისის ხელმძღვანელთან შეხვედრა მოითხოვა. 2021 წელს, რუსეთის პრეზიდენტის ადმინისტრაციის თანამშრომლის, ინალ არძინბას აფხაზეთის დე ფაქტო საგარეო საქმეთა მინისტრად დანიშვნის შემდეგ, საგარეო უწყება აფხაზეთის ტერიტორიაზე მომუშავე საერთაშორისო არასამთავრობო ორგანიზაციების პროექტებს პერიოდულად დახურვით ემუქრება. ნეტგაზეთი

უკრაინის მართლმადიდებელი ეკლესია [არ ექვემდებარება რუსეთის მართლმადიდებელ ეკლესიას] განიხილავს ახალ, გრიგორიანულ კალენდარზე გადასვლას. ასეთ შემთხვევაში, მაგალითად, შობა 7 იანვრის ნაცვლად 25 დეკემბერს აღინიშნება. როგორც ეკლესიის ხელმძღვანელმა, მიტროპოლოტმა ეპიფანემ უკრაინულ „გაზეტა.უა“-ს უთხრა, გადაწყვეტილება ამ თვეში იქნება მიღებული. მიუხედავად იმისა, რომ საბოლოო გადაწყვეტილება გადასვლის შესახებ მიღებული არაა, მიტროპოლიტი ამბობს, რომ ეკლესიამ უკვე დაიწყო მუშაობა მრევლისთვის ლიტერატურის ახალი რედაქციის შემუშავებაზე. უკრაინის მართლმადიდებელი ეკლესია, საქართველოს მართლმადიდებელი ეკლესიის მსგავსად, ამჟამად იულიუსის კალენდარს იყენებს, რომელიც გრიგორიანულს 13 დღით უსწრებს. ნეტგაზეთი

რუსეთის ხელისუფლება ამბობს, რომ უკრაინამ კრემლზე დრონებით იერიში მიიტანა. უკრაინა ამ ინფორმაციას უარყოფს. რუსული პროსახელისუფლებო გამოცემა „რია ნოვოსტი“ წერს, რომ კრემლს ორი უპილოტო საფრენი აპარატი დაესხა თავს, მაგრამ ვლადიმერ პუტინს საფრთხე არ შექმნია. შეტევას არ მოჰყოლია მსხვერპლი და ნგრევა. კრემლზე თავდასხმის ფოტო და ვიდეოკადრები გუშინ ინტერნეტსა და რუსულ მედიაში გავრცელდა. კადრებში ჩანს საფრენი აპარატი, კრემლის ნაწილში მომხდარი აფეთქება და კვამლი. მოსკოვში ამ იერიშს „კრემლზე თავდასხმის და პრეზიდენტის მკვლელობის მცდელობა“ უწოდეს და ამტკიცებენ, რომ რუსეთის შეიარაღებულმა ძალებმა დროულად იმოქმედეს თავდასხმის გასანეიტრალებლად. პუტინის პრესსპიკერის დმიტრი პესკოვის განცხადებით, რუსეთის პრეზიდენტი თავდასხმის დროს კრემლში არ იმყოფებოდა და მოსკოვთან ახლოს თავის რეზიდენციაში მუშაობდა. პესკოვი ასევე დაემუქრა უკრაინას, რომ მოსკოვი იტოვებს უფლებას, მიიღოს შესაბამისი საპასუხო ზომები, იქ და იმ დროს, როცა თავად გადაწყვეტს. მოსკოვში 9 მაისს მეორე მსოფლიო ომში გამარჯვების აღსანიშნავად ემზადებიან. კრემლის წინ უკვე ამზადებენ სცენასა და ტრიბუნებს. პუბლიკა

ეროვნულ-დემოკრატიული ინსტიტუტის (NDI) ახალი კვლევის თანახმად, მოსახლეობისთვის ფასების ზრდა (29%), სამუშაო ადგილები (28%) და სიღარიბე (27%) კვლავ ყველაზე დიდი გამოწვევებია – ასე უპასუხეს მოქალაქეებმა შეკითხვას, თუ რომელი ეროვნული საკითხებია მათთვის, ან მათი ოჯახისთვის ყველაზე მნიშვნელოვანი. ამავე კვლევის თანახმად, ყოველი მეორე მოქალაქე (48%) საქართველოს ეკონომიკურ მდგომარეობას „ცუდად“ აფასებს. გარდა ამისა, მოსახლეობის ნახევარს ეჭვი ეპარება, რომ მთავრობა ეკონომიკური პრობლემების მოგვარებას შეძლებს. მოსახლეობის 34% ამბობს, რომ ახლა ნაკლები ფინანსური შესაძლებლობა აქვს, ვიდრე 5 წლის წინ; 35% კი აღნიშნავს, რომ მათი ფინანსური მდგომარეობა იგივეა, რაც 5 წლის წინ იყო. კვლევის თანახმად, მოსახლეობის 16%-ს, ანუ თითქმის ყოველ მეექვსე მოქალაქეს ჰყავს უცხოეთში მცხოვრები ოჯახის წევრი, რომელიც მას რეგულარულად უგზავნის ფულს. ეს მაჩვენებელი 2019 წლის ივლისთან შედარებით 4%-ით არის გაზრდილი. მოსახლეობის 15% მომდევნო 12 თვის განმავლობაში საზღვარგარეთ სამუშაოდ წასვლაზე ფიქრობს. კვლევა NDI-ის დაკვეთით CRRC-მა 17-23 მარტის პერიოდში ჩაატარა. ჩატარდა 1 032 დასრულებული ინტერვიუ (14% გამოპასუხება). საშუალო ცდომილების ზღვარი +/- 2% და ცდომილების ზღვარი იცვლება სხვადასხვა პასუხის მიხედვით. პუბლიკა

ბუნდესტაგის ევროპულ საკითხებში საპარლამენტო ჯგუფის სპიკერი ქრისტიან პეტრი აცხადებს, რომ თუ საქართველოს პარლამენტი ფრიდონ ინჯიას ინიციატივას კანონად აქცევს, ეს ევროპულ გზაზე ნამდვილი დაბრკოლება იქნება. „ძალიან მნიშვნელოვანია, როცა კანონპროექტები საზოგადოებიდან მოდის და პარლამენტში მოსახლეობიდან შემოდის. თუმცა, რაც შეეხება ლგბტ საკითხს, ვფიქრობ, ქვეყანა იმით ფასდება, თუ როგორ ექცევა სხვადასხვა ჯგუფებს. თავისუფლება უნდა ჰქონდეს ყველა ადამიანს, განურჩევლად მისი შეხედულებებისა, ეს უნდა იყოს დისკრიმინაციის გარეშე. თუ ასეთი კანონი მიიღება, ეს იქნება ნამდვილი დაბრკოლება საქართველოს ევროპულ გზაზე“, – განაცხადა მან პარლამენტში ჟურნალისტებთან. ფრაქცია „ქართული ოცნების“ თავმჯდომარე, მამუკა მდინარაძე ჟურნალისტების შეკითხვის პასუხად, რომელიც ახალი კანონპროექტის მომზადების შესახებ ევროპელი სოციალისტების ლიდერის, ფრიდონ ინჯიას მიერ გაჟღერებულ ინფორმაციას შეეხებოდა, აცხადებს, რომ „ხელისუფლებაში ასეთი კანონპროექტის მიღება არ განიხილება“. პარლამენტში „ოცნების” სატელიტური პარტიის „ევროპელი სოციალისტების” ლიდერი, ფრიდონ ინჯია ამბობს, რომ 30 აპრილის აქციის მოთხოვნათა შესაბამისად მიმდინარე კვირაში პარლამენტს საკანონმდებლო პაკეტით მიმართავენ. აღსანიშნავია, რომ ამ აქციაზე გაჟღერებული იყო ჰომოფობიური და ანტიდასავლური შეფასებებიც. პუბლიკა

პარლამენტში „ოცნების” სატელიტური პარტიის „ევროპელი სოციალისტების” ლიდერი, ფრიდონ ინჯია ამბობს, რომ 30 აპრილის აქციის მოთხოვნათა შესაბამისად მიმდინარე კვირაში პარლამენტს საკანონმდებლო პაკეტით მიმართავენ. აღსანიშნავია, რომ ამ აქციაზე გაჟღერებული იყო ჰომოფობიური და ანტიდასავლური შეფასებებიც. ინჯიამ პლენარულ სხდომაზე კიდევ ერთხელ გაახმოვანა აქციის მოთხოვნები, რომელთა შორის იყო ასევე „ლგბტ-პროპაგანდის” კანონით აკრძალვაც და აღნიშნა, რომ უერთდება მათ. „ყველა გამომსვლელს მადლობა მინდა ვუთხრა, ეს იყო ხალხი – გულანთებული. მთელი სულითა და გულით საუბრობდნენ იმაზე, რა უნდა გაკეთდეს. და პირველ რიგში აქ იყო მოთხოვნა ხელისუფლების მიმართ. მოთხოვნები, რომლებმაც იქ გაიჟღერა, ჩავთვალე, რომ აქ კიდევ ერთხელ წამეკითხა, რათა გაიგოს პირველ რიგში მმართველმა პარტიამ: კანონი ყველას მიმართ თანაბრად აღსრულდეს. მიუხედავად პოლიტიკური, სექსუალური ან სხვა ორიენტაციისა… პოლარიზაციის და პოლიტიკური კრიზისის შემთხვევაში ქართველ ხალხს პლებისციტის გზით აზრის გამოხატვის შესაძლებლობა მიეცეს… მოხდეს 2004-2012 წლებში „ნაციონალური მოძრაობის” დიქტატორული რეჟიმის პოლიტიკურ-სამართლებრივი შეფასება… უმუშევრობასა და სიღარიბეზე გამარჯვება; ევროკავშირისა და სხვა ქვეყნების პოლიტიკოსებისგან საქართველოს სუვერენიტეტის პატივისცემა. კატეგორიულად უნდა მოეთხოვოს მათ შიდა საზოგადოებრივ-პოლიტიკურ საკითხებში ჩაურევლობა; დაინერგოს სკოლაში ფუნდამენტური განათლება; დემოგრაფიული მდგომარეობის გამოსწორება; ლგბტ-პროპაგანტის კანონით აკრძალვა და მრავალი სხვა. ყველა ამ კითხვებს, რომლებიც იქ დაისვა და მოთხოვნაა მთავრობის მიმართ, მე, როგორც ერთი მოქალაქე ვუერთდები მას და ამ კვირაში წარმოვადგენთ კანონების პაკეტს [მოთხოვნებზე], რომელიც იკვეთება საქართველოს მოსახლეობის უმრავლესობის სახით წარმოდგენილი საზოგადოების შეკრებიდან, რომელთა ზემოთჩამოთვლილი მოთხოვნები გააჟღერა მონატრებულ კრებაზე მისმა წამყვანმა ზაზა პაპუაშვილმა”, – განაცხადა ინჯიამ. ასევე იხილეთ „გვმართებს, ამაზე სერიოზულად ვიფიქროთ" - მდინარაძის ჰომოფობიური განცხადება „ლგბტ-პროპაგანდაზე" 01 მაისი, 2023 პუბლიკა

ხვალ რომ საპარლამენტო არჩევნები ტარდებოდეს, „ქართულ ოცნებას“ გამოკითხული მოსახლეობის 20% დაუჭერდა მხარს, „ერთიან ნაციონალურ მოძრაობას“ - 5%, სხვა პარტიებს ჯამურად გამოკითხულთა 6% მისცემდა ხმას. ამის შესახებ ინფორმაციას ეროვნულ-დემოკრატიული ინსტიტუტი (NDI) საზოგადოებრივი აზრის კვლევის შედეგებზე დაყრდნობით ავრცელებს. კითხვაზე ხვალ, რომ საპარლამენტო არჩევნები ტარდებოდეს, გამოკითხულთა უმეტესობა - 34% აცხადებს, რომ არც ერთ პარტიას არ მისცემდა ხმას, 26% კი გადაუწყვეტელი ამომრჩეველია და ამბობს, რომ არ იცის ვის მისცემდა ხმას. ამასთან, კითხვაზე, რომელი პარტია დგას თქვენს შეხედულებებთან ყველაზე ახლოს, 57% პასუხობს, რომ არც ერთი, 17%-ის შეხედულებებთან ყველაზე ახლოს „ქართული ოცნებაა“, 5%-თან - „ერთიანი ნაციონალური მოძრაობა, 6%-თან სხვა პარტიები, 10%-მა კი არ იცის. ცნობისთვის, გამოკითხვა 2023 წლის 17-23 მარტის პერიოდში, სატელეფონო გამოკითხვის მეთოდით ჩატარდა. კვლევა მოიცავს 1,032 დასრულებულ ინტერვიუს (14% გამოპასუხება). საშუალო ცდომილების ზღვარი +/- 2% -ია. IPN

უკრაინის პრეზიდენტი ვოლოდიმირ ზელენსკი ჰელსინკში ჩავიდა. ფინური მედიის ცნობით, მოგვიანებით, უკრაინის პირველი პირი ფინეთის პრეზიდენტთან საული ნიინისტოსთან ერთად ერთობლივ პრესკონფერენციას გამართავს. ფინეთში ვიზიტისას ზელენსკი შვედეთის, ნორვეგიის, დანიისა და ისლანდიის პრემიერ-მინისტრებსაც შეხვდება. ინტერპრესნიუსი

საბოლოოდ დადასტურდა, რომ ოცნების ნარატივი, ქვეყნის ევროკავშირის, დასავლური განვითარების გზიდან გადახვევის "გაპრავებაზე" პასუხიმგებლობის გადაბრალებაზე, არ მუშაობს!, - აცხადებს პარტია "საქართველოსთვის" წევრი და დეპუტატი ბექა ლილუაშვილი. მისივე განცხადებით, "ქართული ოცნების" "ნარატივის გადალება", ტყუილზეა დაფუძნებული. "საზოგადოებაში, ვფიქრობ, კარგადაა გააზრებული, ვინ არის პასუხისმგებელი და მთავარი შემაფერხებელი იმის, რომ დღეს ევროკავშირი საუბრობს უკრაინის, მოლდოვის წევრობის საკითხზე, საქართველოსთვის კი, კანდიდატის სტატუსის მიღებაზე კვლავ დისკუსიაა. ეს მაშინ, როდესაც, ორი წლის წინ, ჩვენ ვიყავით ლიდერი ქვეყანა ასოცირებულ სამეულში, რომელსაც ჰქონდა ყველაზე დიდი მხარდაჭერა ევროპის მხრიდან. ახლა ვაკვირდებით ოცნების ნარატივის გადალაგებას, რომელიც ასევე ეფუძნება ტყუილს - "ცუდ და ანტიეროვნულ ევროპაზე", რომლის მთავარი მიზანი, კანდიდატის სტატუსის ვერ მიღება და ძალაუფლების შენარჩუნებაა.", - აღნიშნავს ბექა ლილუაშვილი.

შალვა პაპუაშვილი არის პარლამენტის “ტექნიკური თავმჯდომარე”, - წერს სოციალურ ქსელში პარტია "საქართველოსთვის" აღმასრულებელი მდივანი ბერდია სიჭინავა. მისი თქმით, საპარლამენტო რესპუბლიკაში პარლამენტის სპიკერი უფუნქციოა. "საპარლამენტო რესპუბლიკაში პარლამენტის სპიკერი ფორმალურად ჰქვია, თორემ ოცნებაში “დიდი ბიჭები” ისე წყვეტენ საკითხებს, პერსონალურად მას არაფერს ეკითხებიან. დარწმუნებული ვარ, ბატონ პაპუაშვილს, ამასთან დაკავშირებით პრობლემა არ აქვს, რადგან “ოცნებაში” თანამდებობის პირების ლეგიტიმაციის წყარო მხოლოდ ბატონი ივანიშვილის კეთილგანწყობა და ღიმილია. ასე გამოიყურება ერთი ადამიანის მიერ მიტაცებული საქართველოს “საპარლამენტო რესპუბლიკა”!", - წერს ბერდია სიჭინავა.

„ქართულ ოცნებას“ გაუქმებული აქვს საქართველოს პარლამენტის რეგლამენტი - იცავენ გირგვლიანის სანქცირებულ მოსამართლე მურუსიძეს, ჩინჩალაძეს, ახლა უკვე კეზერაშვილს, საინტერესოა, ვინ იქნება შემდეგი, - ამის შესახებ ჟურნალისტებთან პარტია „საქართველოსთვის“ წევრმა ანა ბუჩუკურმა განაცხადა. როგორც ბუჩუკურმა აღნიშნა, მსგავსი რამ ახასიათებდა „ნაციონალურ მოძრაობას“ მმართველობის ბოლოს. „არნახული რამ მოიფიქრა „ქართულმა ოცნებამ“, ასე იქცეოდა „ნაციონალური მოძრაობა“ თავის მმართველობის ბოლო ჟამს. ფაქტია, რომ სანდრო გირგვლიანის სანქცირებული მოსამართლის მურუსიძის დასაცავად ბუნებაში არნახულ მეთოდებს იყენებს „ქართული ოცნება“. საინტერესოა შემდეგს ვის დაიცავს, რადგან მამუკა მდინარაძემ გააკეთა განცხადება, რომ არ აპირებს მხარი დაუჭირონ ჩვენს დაინიცირებულ კომისიას, ანუ ჯერ იცავდნენ გირგვლიანის სანქცირებულ მოსამართლე მურუსიძეს, ჩინჩალაძეს, ახლა კეზერაშვილს და ვინ იქნება შემდეგი საინტერესოა. პროცედურას რაც შეეხება, ერთია, რა წერია და მეორე - რას აკეთებენ. „ქართულ ოცნებას“ ფაქტობრივად გაუქმებული აქვს საქართველოს პარლამენტის რეგლამენტი. შესაბამისად, ნებისმიერი სცენარია მოსალოდნელი, რას ველოდებით აღარ აქვს მნიშვნელობა, „ქართულმა ოცნებამ“ უკვე დაადასტურა, რომ იცავენ გირგვლიანის სანქცირებულ მოსამართლე მურუსიძეს, ჩინჩალაძეს, ახლა კეზერაშვილს და ვინ იქნება შემდეგი საინტერესოა”, - განაცხადა ბუჩუკურმა. ინტერპრესნიუსი

პარტია "საქართველოსთვის" წევრი და დეპუტატი ბექა ლილუაშვილი პარლამენტის თავმჯდომარეს მიმართავს. განცხადებას planeta.ge უცვლელად გთავაზობთ : “ბატონო შალვა, როდის ველოდოთ პოლტიტიკური განცხადებების აკრძალვას და მიკროფონის უზურპაციას თქვენი თავმჯდომარეობის პოირობებში ამ პარლამენტში? ეს კითხვა არც თუ ისე რიტორიკულია, რადგან ერთადერთი, რასაც თქვენი ნაბიჯები ემსახურება ჯერჯერობით - ეს არის კონსტიტუციის დარღევევა, რეგლამენტის დარღევვა და პრეცენდენტის შექმნა, რომელიც საფრთხეს უქმნის არამხოლოდ საგამოძიებო კომისიის შექმნას, არამედ ნევისმიერ ისეთ საკანონმდებლო ინიციატივას, რომელიც შეიძლება არ მოგეწონოთ მმართველ პარტიას” - - ასე მიმართა პარტია „საქართველოსთვის“ წევრმა დეპუტატმა ბექა ლილუაშვილმა პარლამენტის თავმჯდომარეს შალვა პაპუაშვილს. მისი თქმით, საგამოძიებო კომისიის შექმნისთვის ხელის შეშლით იქმნება ძალიან ცუდი პრეცედენტი, რომელიც საფრთხეს უქმნის არა მხოლოდ საგამოძიებო კომისიის საკითხს, არამედ ნებისმიერ ისეთ საკანონმდებლო ინიციატივას, რომელიც შეიძლება არ მოეწონოს მმართველ პარტიას. “რაში უცვლით ამ ჩიხში საკუთარი თავის შეყვანას ან მოსამართლეებს, ან კეზერაშვილს? ბოლო ბოლო ვის ინტერესებს იცავთ? ხალხის? ნაციონალური მოძრაობის მოსამართლეების და კეძერაშვილის? ივანიშვილის? რა დევს სავაჭროდ მაგიდაზე, გაგვაგებინეთ. დღეს, ასევე მოვისმინეთ ბატონი მდინარაძის განცხადება, რომ თურმე საერთააშორისო გამოძიებას ხელი შეეშლება კომისიის შექმნით. იქნებ აუხსნათ საზოგადოებას ვინ აწვდის მასალებს საერთაშორისო საგამოძიებო როგანოებს? საქართველოს პროკურატურა, ამიტომ მოსახლეობა შეცდომაში ნუ შეგყავთ. აქ არის სწორედ კითხვის ნიშნები და თქვენ კრებსითად, ხელისუფლებას თუ არაფერი გაქვთ დასამალი, თუ ვინმეს მიერ ნაშოვნ მილიონებს არ ეფარებით, არ იცავთ, არანაირი ლოგიკური ან სამართლებრივი არგუმენტი არ გაქვთ არ შექმნათ კომისია. როდესაც პარლამენტში მმართველი პარტია ოპოზიციას ართმევს კანონით მინიჭებულ უფლებას - არღვევს კანონს, კონსტიტუციას, რომ პირდაპირ თუ ირიბად საკუთარი თავი, საკუთარი ძალაუფლება შეინარჩუნოს, ვინ უნდა დაიჯეროს თქვენი შესრულებული რეკომენდაციების? მოქმედ კანონს და კონსტიტუციას არღვევთ პირდაპირ და თქვენ დაწერთ ახალ კანონს სასამართლოზე ან არჩევნებზე? ან რომ დაწეროთ ვის უნდა დააჯეროთ, რომ გაქვთ პოლიტიკური ნება დაიცვათ ეს კანონები? რა ფასი აქვს თქვენი მმართველობის პირობებში სამართლიანობის აღსრულებას ან სამართლიანობის გარანტორად თქვენს ყოფნას, როცა სანქცირებულ, კორუფციაში მხილებულ მოსამართლეებს ეფარებით ფარად? მოკლედ, თქვენ, ალბათ გგონიათ, რომ თუ კონტიტუციას კი არ “ჭრი და კერავ” როგორც ამას წინა ხელლისუფლება აკეთებდა, არამედ პირდაპირ არღვევთ და თქვენს ინტერესებში აქცევთ, ეს უკეთესია, გგონიათ, რომ ხალხს როგორც გინდათ ისე გადაწ-გადმოწევთ და გადაადგილებთ, ფაქტია, რომ ვერც ერთი პოლიტიკური დაკვეთა ამ ხალხის ვერ შეასრულეთ. ვერ შეინარჩუნეთ თქვენი, როგორც პარტიის ვერც ერთი იდენტობა. თქვენ, რომ გგონიათ ისე არ იქნება, აგერ ნახავთ. დღეს, თქვენი კოლექტიური პასუხიმგებლობის იმედად ხართ, როგორც პარტიის ალბათ - ხვალ ყველა პასუხისმგებლობა პერსონალიზებული იქნება - აგერ მოსამართლეების ქეისი. პირველ რიგში, ხალხი გაჩვენებთ ამას” - განაცხადა ბექა ლილუაშვილმა

გიორგი გახარია რეგიონული მიმართულებით პარტიის საქმიანობის გაძლიერების მიზნით შეხვედრებს აგრძელებს. პარტია “საქართველოსთვის” თავმჯდომარე გიორგი გახარია კახეთის რეგიონის საკრებულოების და პარტიის წევრებს შეხვდა, რომლებსაც პარტიის რეგიონული მდივანი შალვა კერესელიძე წარუდგინა. შეხვედრაზე საქმიანობის და წარმომადგენლობის გაძლიერება და რეგიონებში პარტიის სამომავლო სამოქმედო გეგმით გათვალისწინებული მუშაობის განახლება განიხილეს. შეხვედრას გიორგი გახარიასთან ერთად პარტიის აღმასრულებელი მდივანი - ბერდია სიჭინავა ესწრებოდა.

გერმანელი ევროპარლამენტარის ვიოლა ფონ კრამონის განცხადებით, თუ ევროკავშირი საქართველოს კანდიდატის სტატუსს მიანიჭებს, ეს იმიტომ კი არ მოხდება, რომ „მთავრობამ და მმართველმა პარტიამ ყველა ის პრიორიტეტი განახორციელეს, რაც ევროკავშირმა საქართველოს მისცა, არამედ იმიტომ, რომ მას ქართველი ხალხი იმსახურებს და ამას გეოპოლიტიკური ლოგიკა ითხოვს“. ამის შესახებ კრამონმა „ტვიტერის“ საკუთარ გვერდზე დაწერა, სადაც „დროას“ ლიდერის, ელენე ხოშტარიას „ტვიტი“ გააზიარა. ხოშტარიამ აღნიშნულ „ტვიტში“ თბილისის მერის ციტირება მოახდინა, სადაც კახა კალაძე აცხადებს, რომ "თუ კანდიდატის სტატუსს მოგვანიჭებენ, მოხარული ვიქნებით, მაგრამ თუ არა, არც ესაა პრობლემა". „დროას“ ლიდერი „ტვიტერზე“ აღნიშნავს, რომ კალაძე საფეხბურთო კლუბ "მილანის" ყოფილი ფეხბურთელია, რომლის ოთხივე შვილიც ევროკავშირში დაიბადა. ვიოლა ფონ კრამონმა ხოშტარიას „ტვიტის“ საპასუხოდ დაწერა, რომ „ზუსტად პირიქითაა“. interpressnews