tvati

გიორგი შაქარაშვილის მკვლელობის საქმეზე, საქართველოს უზენაესმა სასამართლომ დაუშვებლად ცნო დამამძიმებელ გარემოებებში ჯგუფურად ჩადენილი განზრახ მკვლელობაში მსჯავრდებულთა საჩივრები და უცვლელად, ძალაში დატოვა თბილისის სააპელაციო და მცხეთის რაიონული სასამართლოების გამამტყუნებელი განაჩენები. როგორც გენერალური პროკურატურის მიერ გავრცელებულ ინფორმაციაშია ნათქვამი, აღნიშნული გადაწყვეტილებით კიდევ ერთხელ დადასტურდა, რომ მსჯავრდებულებმა 2020 წლის 18 ივნისს, გვიან ღამით, მცხეთაში მდებარე აგარაკზე მომხდარი დაპირისპირების გამო, შურისძიების მოტივით მდინარე არაგვის ნაპირთან სასტიკად სცემეს გიორგი შაქარაშვილს და მდინარეში გადააგდეს, რის შედეგადაც ეს უკანასკნელი გარდაიცვალა. „აღნიშნული პირები მსჯავრდებულნი არიან სისხლის სამართლის კოდექსის 109-ე მუხლის მეორე ნაწილის „ე“ ქვეპუნქტით, რაც გულისხმობს დამამძიმებელ გარემოებებში ჯგუფურად ჩადენილ განზრახ მკვლელობას. სასამართლომ სამ პირს სასჯელის სახედ და ზომად 16-16 წლით თავისუფლების აღკვეთა, ხოლო ორ პირს, როგორც არასრულწლოვნებს, 10 წლით და 6 თვით თავისუფლების აღკვეთა განუსაზღვრა“,- ნათქვამია ინფორმაციაში. IPN

უკრაინის პრეზიდენტი ვოლოდიმირ ზელენსკი რუსეთისგან დასაცავად კიდევ უფრო ძლიერ იარაღს ელოდება. გასულ ღამით, უკრაინელებისადმი ვიდეომიმართვისას ზელენსკიმ თქვა, რომ ცის დასაცავად უკვე აქვთ ძალიან სერიოზული საჰაერო თავდაცვის სისტემები და სხვა იარაღი. „მაგრამ უნდა იყოს, და დარწმუნებული ვარ, იქნება კიდევ უფრო ძლიერი“, - განაცხადა პრეზიდენტმა ზელენსკიმ. 19 აპრილს, უკრაინის თავდაცვის მინისტრმა ოლექსი რეზნიკოვმა დაადასტურა, რომ გერმანიისგან მიიღეს საზენიტო-სარაკეტო კომპლექსი Patriot-ი. რეზნიკოვის განცხადებით, უკრაინის ცა კიდევ უფრო დაცული ხდება. ასევე ნახეთ პუტინმა Patriot-ს „მოძველებული“ სისტემა უწოდა და "განადგურებით" დაემუქრა პირველი ქვეყანა, რომელმაც უკრაინის არმიას რუსეთთან საბრძოლველად სარაკეტო კომპლექსები Patriot-ი გადასცა, ამერიკის შეერთებული შტატები იყო. უკრაინისთვის Patriot-ის გაგზავნას აპირებს ნიდერლანდიც. რადიო თავისუფლება

უკრაინის შეიარაღებული ძალების გენერალური შტაბის მიერ დღეს დილით გამოქვეყნებული მონაცემებით, გასულ 24 საათში, რუსეთის საოკუპაციო ძალებმა უკრაინის ტერიტორიაზე განახორციელეს 57 საავიაციო და 3 სარაკეტო დარტყმა და ზალპური ცეცხლის რეაქტიული სისტემების გამოყენებით 69-ჯერ დაცხრილეს თავდაცვის ძალების პოზიციები და სამოქალაქო ინფრასტრუქტურა. გენშტაბის ცნობით, მსხვერპლია მშვიდობიან მოსახლეობაში, დანგრეული და დაზიანებულია სახლები და სამოქალაქო ინფრასტრუქტურის სხვა ობიექტები. უკრაინის გენერალური შტაბის ინფორმაციით, გასულ 24 საათში მოწინააღმდეგემ გამოიყენა 26 უპილოტო საფრენი აპარატი(Shahed-136) და მათგან 21 თავდაცვის ძალებმა გაანადგურეს. უკრაინის არმიის სარდლობის განცხადებით, რუსეთს ძირითადი ძალისხმევა კონცენტრირებული აქვს შეტევებზე აღმოსავლეთში - ლიმანის, ბახმუტის, ავდეევკის, მარინკის და შახტარსკის მიმართულებებით, სადაც გასულ 24 საათში მოგერიებულია 55-ზე მეტი შეტევა. უკრაინის გენშტაბის თანახმად, ყველაზე სასტიკი ბრძოლა მიმდინარეობს ბახმუტისა და მარინკისთვის. რადიო თავისუფლება

თელავის რაიონულმა სასამართლომ 18-წლიანი პატიმრობა შეუფარდა დამამძიმებელ გარემოებაში, მეუღლის განზრახ მკვლელობისა და შემაკავებელი ორდერით გათვალისწინებული მოთხოვნების შეუსრულებლობისთვის ბრალდებულს. ბრალდების მხარე აცხადებს, რომ აღნიშნულ განაჩენს, სასჯელის დამძიმების მიზნით, თბილისის სააპელაციო სასამართლოში გაასაჩივრებს. პროკურატურის ინფორმაციით, სასამართლო პროცესზე გამოკვლეული მტკიცებულებებით დადგინდა, რომ 2022 წლის 9 ოქტომბერს თელავში ბრალდებულს ყოფილ მეუღლესთან სიტყვიერი დაპირისპირება მოუვიდა, რა დროსაც მან, შურისძიების მოტივით, დაზარალებულს საცხოვრებელი სახლის სააბაზანო ოთახში დანის გამოყენებით მრავლობითი ჭრილობები მიაყენა და შემთხვევის ადგილიდან მიიმალა. მიყენებული დაზიანების შედეგად დაზარალებული შემთხვევის ადგილზე გარდაიცვალა. მკვლელობამდე სამი დღით ადრე ბრალდებულის მიმართ გამოცემული იყო შემაკავებელი ორდერი, რომლითაც ამ უკანასკნელს აეკრძალა ყოფილი მეუღლის სახლთან მიახლოება და ნებისმიერი სახის კომუნიკაცია. პროკურატურა ხაზს უსვამს, რომ განზრახ მკვლელობის ჩადენამდე, ბრალდებული სისტემატურ სიტყვიერ შეურაცხყოფას აყენებდა დაზარალებულს, ასევე, ფიზიკურად გაუსწორდა ყოფილ მეუღლეს, მეუღლის დედას და ყოფილ მეუღლეს სიცოცხლის მოსპობით დაემუქრა. აღნიშნული დანაშაულისთვის ბრალდებული შინაგან საქმეთა სამინისტროს თანამშრომლებმა 2022 წლის 4 ოქტომბერს დააკავეს და 5 ოქტომბერს პროკურატურამ მას ბრალდება წარუდგინა საქართველოს სისხლის სამართლის კოდექსის 126-ე პრიმა მუხლის პირველი ნაწილით, ორი ეპიზოდი (ოჯახში ძალადობა); 126-ე პრიმა მუხლის მე-2 ნაწილის „გ“ ქვეპუნქტით (ოჯახში ძალადობა ორი პირის მიმართ) და 11-151-ე მუხლის მეორე ნაწილის „დ“ ქვეპუნქტით (ოჯახის წევრის მიმართ განხორციელებული მუქარა) და აღკვეთის ღონისძიების სახით მოითხოვა პატიმრობის შეფარდება. „თუმცა 6 ოქტომბერს თელავის რაიონული სასამართლოს მოსამართლემ, მიუხედავად იმისა, რომ დაზარალებული პირდაპირ მიუთითებდა ბრალდებულის მხრიდან სიცოცხლის მოსპობის მუქარის თაობაზე, დაუსაბუთებლად არ გაიზიარა პროკურატურის პოზიცია, სათანადოდ ვერ შეაფასა ბრალდებულიდან მომდინარე რისკები და საფრთხეები, მათ შორის ახალი დანაშაულის ჩადენისა და მისი მიმალვის საფრთხე, უკანონოდ ცნო ბრალდებულის დაკავება, გაათავისუფლა დაკავებიდან და აღკვეთის ღონისძიების სახით გირაო – 2 000 ლარი შეუფარდა. პროკურატურა კატეგორიულად არ დაეთანხმა სასამართლოს პოზიციას და თბილისის სააპელაციო სასამართლოს საჩივრით მიმართა. ბრალდებულს, რომელსაც არ შეეფარდა პატიმრობა, მიეცა შესაძლებლობა სისრულეში მოეყვანა თავისი მუქარა და სასტიკად გაუსწორდა ყოფილ მეუღლეს, რამაც ეს უმძიმესი შედეგი გამოიწვია“, — ნათქვამია პროკურატურის განცხადებაში. netgazeti

პარლამენტის წევრის მიერ პლენარულ სხდომაზე რეგისტრაციის არგავლა, მის დასანქცირებას იწვევს. რეგლამენტით გათვალისწინებული ეს პასუხისმგებლობა პარლამენტის წევრს კალენდარული თვის განმავლობაში ოთხზე მეტი რეგისტრაციის გაუვლელობის შემთხვევაში ეკისრება. დეპუტატი მხოლოდ იმ შემთხვევაში არ სანქცირდება თუ პოლიტიკური შეხედულებების გამო პარლამენტის სხდომას პოლიტიკურ ბოიკოტს უცხადებს. პარლამენტის რეგლამენტის თანახმად, თუ პარლამენტის წევრი პლენარული სხდომის დღის განმავლობაში რომელიმე რეგისტრაციას არ გაივლის, მას თითოეულ ასეთ შემთხვევაში ხელფასის 5% (მაგრამ არაუმეტეს დღის განმავლობაში 10%-ისა) დაუკავდება. როგორც ცნობილია, პარლამენტის პლენარულ სხდომაზე კენჭისყრის პროცედურის დასაწყებად საჭირო კვორუმი ორჯერ არ შედგა. საპარლამენტო უმრავლესობა კენჭისყრის წინ რეგისტრაციას არ გადის, ტაბლოზე კი მხოლოდ ოპოზიციონერ დეპუტატთა რაოდენობა ფიქსირდება. შედეგად კენჭისყრის პროცესი ორჯერ უკვე ჩაიშალა, მათ შორის კენჭი ვერ ეყარა მოსამართლეებთან დაკავშირებით დროებითი საგამოძიებო კომისიის შექმნის საკითხს. ინტერპრესნიუსი

დასავლეთი არ დაღლილა უკრაინის დახმარებით, ევროპაში მის სასოფლო-სამეურნეო პროდუქციასთან დაკავშირებული პრობლემები გადაწყვეტადია. ამის შესახებ ნატოს გენერალურმა მდივანმა იენს სტოლტენბერგმა ბრიუსელში გამართულ პრეს-კონფერენციაზე განაცხადა. “საუბარია საკითხზე, რომელზეც, რა თქმა უნდა, უნდა ვიმუშაოთ, მაგრამ არ მჯერა, რომ ეს სურვილის უკმარისობის და უკრაინისადმი მხარდაჭერის არგაგრძელების სურვილის ნიშანია”, - განაცხადა სტოლტენბერგმა. მისი თქმით, ევროპასა და ჩრდილოეთ ამერიკაში უკრაინის მხარდაჭერის დიდი სურვილი არსებობს, რისი ნიშანიცაა უპრეცედენტო ფინანსური და სამხედრო დახმარება. სტოლტენბერგმა აღნიშნა, რომ შესამჩნევია “სირთულეები, რომელთა მოგვარება ზოგიერთ მოკავშირეს უწევს” შავი ზღვისა და სხვა გზებით სასურსათო პროდუქციისა და მარცვლეულის ტრანსპორტირებასთან დაკავშირებით, თუმცა მისი თქმით, ეს პირდაპირ არ ეხება ნატოს, არამედ ევროკავშირისა და ევროპული სახელმწიფოების საკითხია. “დარწმუნებული ვარ, რომ ამ გამოწვევებზე პასუხისა და ამ სირთულეების გადალახვის საშუალებები არსებობს”, - განაცხადა სტოლტენბერგმა და აღნიშნა, რომ “ევროპაში უკრაინის დახმარების სურვილი არ სუსტდება”. იპნ

"25-ში ერთნი გავხდებით" - წერს ფეისბუქზე გიორგი მახარაშვილი და კლინიკის წინ, დათო ევგენიძესთან ერთად გადაღებულ ფოტოს აქვეყნებს. მუსიკოსები სტამბულში არიან, დათო ღვიძლის გადასანერგად ემზადება. როგორც სოციალურ ქსელში, მუსიკოსების სტატუსებიდან ვიტყობთ, გიორგი დათოს დონორია და უფროს კოლეგასა და შვილის ნათლიას, თავისი ღვიძლი უნდა გადაუნერგოს. დათოს და გიორგის გამამხნევებელ კომენტარებს უწერენ": "უდიდესი ისტორიის დასაწყისი. წარმატებები, ჯენტლემენებო" - ნინო ქათამაძე. "ღვიძლი ძმა გეყოლება, დათო" - ნანა გიორგობიანი. "ჯანმრთელად დაბრუნდით ორივე" - თემურ თათარაშვილი. "წარმატებები" - კახა მამულაშვილი. აი, როგორ გვიყვება ამ ამბავს გარითმულად თავად დათო. "თუ არ გაქვს გონორი - ვერ გახდები დონორი." "ჩემმა ღვიძლმა ძმამ მახარამ - ახალი ღვიძლი მახარა. აღდგომა მოდის, იხარეთ, ცამ მადლი გადმოგვაყარა." "ოპერაციის მერე აკრძალული გვაქვს ალკოჰოლი და გადავწყვიტეთ თითო ჭიქა ჩაგვერტყა." "მე გვერდით მყავს მახარა, მზის ამოსვლა მახარა." ამდენად, 25 აპრილს სტამბულის კლინიკაში დათო ევგენიძე ღვიძლის ტრანსპლანტაციას იკეთებს. მშვიდობით დაბრუნება მუსიკოსსა და პოეტს. primetime.ge

პროცედურული ომი ლეგიტიმური ინსტრუმენტი, რომელსაც დეპუტატები იყენებენ ხოლმე, ამ შემთხვევაში უკანონობასთან გვაქვს საქმე - რეალურად კონსტიტუციის დარღვევას აქვს ადგილი! - ასე აფასებს კონსტიტუციური სამართლის სპეციალისტი ვახუშტი მენაბდე მმართველი უმრავლესობის გადაწყვეტილებას, კენჭისყრის წინ რეგისტრაციის არგავლის გზით არ მისცეს ოპოზიციას დროებითი საგამოძიებო კომისიის შექმნის შესაძლებლობა. მენაბდის თქმით, ხელისუფლების ეს ნაბიჯი ფორმალურად პროცედურული ომია, თუმცა რეალურად კონსტიტუციის დარღვევაა. "ისინი ოპოზიციას უბრალოდ არ აძლევენ საშუალებას, ისარგებლოს მისთვის უზენაესი კანონით მინიჭებული პრეროგატივით - ნებისმიერ საკითხზე წამოიწყოს გამოძიება, დასვას კითხვები შეაფასოს მიღებული პასუხები. პროცედურული ომი არის ლეგიტიმური ინსტრუმენტი, რომელსაც დეპუტატები იყენებენ ხოლმე, ამ შემთხვევაში კი უკანონობასთან გვაქვს საქმე", - განუცხადა "ინტერპრესნიუსს" ვახუშტი მენაბდემ. პარლამენტის პლენარულ სხდომაზე კენჭისყრის პროცედურის დასაწყებად საჭირო კვორუმი ორჯერ არ შედგა. საპარლამენტო უმრავლესობა კენჭისყრის წინ რეგისტრაციას არ გადის, ტაბლოზე კი მხოლოდ ოპოზიციონერ დეპუტატთა რაოდენობა ფიქსირდება. შედეგად კენჭისყრის პროცესი ორჯერ ჩაიშალა, მათ შორის კენჭი ვერ ეყარა მოსამართლეებთან დაკავშირებით დროებითი საგამოძიებო კომისიის შექმნის საკითხს. იპნ

ირაკლი კობახიძე, რომლის მოწოდებითაც „მოსამართლეების მიმართ სოლიდარობის“ ნიშნად საპარლამენტო უმრავლესობა ოპოზიციას უკვე მეორე დღეა საგამოძიებო კომისიის შექმნის შესაძლებლობას არ აძლევს, წარსულში მის მიერ დაწერილ სახელმძღვანელოში ოპოზიციის მიერ კომისიის შექმნის შესაძლებლობის მნიშვნელობაზე წერდა. კონსტიტუციური სამართლის სახელმძღვანელო, რომელიც ირაკლი კობახიძის ავტორობითაა მომზადებული, 2019 წელსაა გამოცემული და სამართლის სტუდენტებისთვისაა განკუთვნილი. კობახიძე სახელმძღვანელოში წერს, რომ „დროებითი საგამოძიებო კომისია პარლამენტის საზედამხედველო უფლებამოსილების განხორციელების უმნიშვნელოვანესი ინსტრუმენტია“. წიგნში ავტორი აღნიშნავს, რომ დროებითი საგამოძიებო კომისიის შექმნა შესაძლებელია როგორც საპარლამენტო უმრავლესობის, ისე ოპოზიციის გადაწყვეტილებით, პარლამენტის სრული შემადგენლობის 1/3-ის მხარდაჭერით. ირაკლი კობახიძე სახელმძღვანელოში წერს, რომ „დემოკრატიულ სისტემებში დროებითი საგამოძიებო კომისიების შექმნა როგორც წესი, ოპოზიციის განსაკუთრებულ პრივილეგიად განიხილება“. მისი თქმით, სწორედ ამ მიდგომას ეფუძნება საქართველოს კონსტიტუციის ახალი ნორმა, რომელიც კომისიის შექმნის უფლებას არანაკლებ 50 დეპუტატს ანიჭებს: დღეს, 19 აპრილს, პარლამენტის პლენარულ სხდომაზე კვორუმის არარსებობის გამო სასამართლო სისტემაში კორუფციული და სხვა სახის სამართალდარღვევების შესწავლის მიზნით საგამოძიებო კომისიის შესაქმნელად კენჭისყრა ისევ ვერ შედგა. საგამოძიებო კომისიის შექმნის ინიციატორი ოპოზიციაა, შესაბამისად, პლენარულ სხდომაზე მობილიზებული იყვნენ ოპოზიციონერი დეპუტატები, რათა კომისიის შექმნისთვის საჭირო 50 ხმა ჰქონოდათ. თუმცა, ვინაიდან უმრავლესობის წევრები საგამოძიებო კომისიის შექმნას არ ეთანხმებიან, იმისვის, რომ კომისიის შექმნისთვის ხელი შეეშალათ, კენჭისყრამდე რეგისტრაცია, 18 აპრილის მსგავსად, ისევ არ გაიარეს და კენჭისყრის გასამართად საჭირო ქვორუმი – 76 დეპუტატი ვერ მოგროვდა. შესაბამისად, კენჭისყრაც აღარ შედგა. 18 აპრილის სხდომაზე კენჭისყრების დაწყებამდე ირაკლი კობახიძემ თანაგუნდელებს „ქართველი მოსამართლეების სოლიდარობის“ ნიშნად მოუწოდა რეგისტრაციაში მონაწილეობა არ მიეღოთ: „სასამართლოს დამოუკიდებლობის დაცვის ინტერესებიდან გამომდინარე მინდა შემოგთავაზოთ კონკრეტული აქტი. ესაა სასამართლოს მხარდამჭერი აქტი, ჩვენი კონსტიტუციური პრინციპი, რაც უნდა იყოს დაცული და ეს არის ჩენი სოლიდარობის აქტი ქართველი მოსამართლეების მიმართ. ჩვენ მივიღეთ გადაწყვეიტლება, საპარლამენტო უმრავლესობაში არ გავიაროთ რეგისტრაცია კენჭისყრამდე, ეს არის სოლიდარობის აქტი ქართველი მოსამართლეების მიმართ“, — განაცხადა ირაკლი კობახიძემ. სხდომის დასრულების შემდეგ კი ჟურნალისტებთან საუბრისას კობახიძემ განაცხადა, რომ საპარლამენტო უმრავლესობა ამ საკითხზე საგამოძიებო კომისიის შექმნას არ განიხილავს და ეს მათი პრინციპული პოლიტიკური პოზიციაა — „ვირს კრიალოსანზე კომისიას არ შევამქნევინებთ“, განაცხადა ირაკლი კობახიძემ: „ჩვენ მზად ვართ, ნებისმიერ თემასთან დაკავშირებით განვიხილოთ საგამოძიებო კომისიის შექმნა, მაგრამ ვერავითარ შემთხვევაში ვერ განვიხილავთ კოლექტიური ნაცმოძრაობის მიერ კომისიის შექმნას სასამართლოსთან დაკავშირებით. ვირს კრიალოსანზე კომისიას არ შევაქმნევინებთ. ეს არის ჩვენი პრინციპული პოლიტიკური პოზიცია“, — თქვა ირაკლი კობახიძემ. ნეტგაზეთი

საგარეო საქმეთა მინისტრმა ილია დარჩიაშვილმა საქართველოში ევროკავშირის ელჩს, პაველ ჰერჩინსკის ევროკომისიისთვის განკუთვნილი ანგარიში გადასცა, რომელიც გაფართოების პაკეტის ფარგლებში მომზადდა. სამინისტროს ცნობით, დოკუმენტი 35 თავს მოიცავს და მასში ასახულია ევროკავშირთან დაახლოების კუთხით, ბოლო ერთი წლის განმავლობაში საქართველოს მიერ განხორციელებული საკანონმდებლო, ინსტიტუციური და სხვა სახის აქტივობები და ამ კუთხით სახელმწიფოს მიერ მიღწეული პროგრესი.

„ეს არის შესაძლებლობა საქართველოს ხელისუფლებისთვის, გამოიძიოს კორუფციის შესახებ ბრალდებები სასამართლო სისტემაში, რაც ფართოდ იყო ცნობილი წლების განმავლობაში – არავითარ შეცდომას ადგილი არ აქვს, ამერიკის შეერთებული შტატები აბსოლუტურად დარწმუნებულია იმაში, რაც დაედო საფუძვლად ამ ოთხი ინდივიდისთვის სანქციის დაწესებას”, – ამის შესახებ ამერიკის შეერთებული შტატების ელჩმა საქართველოში კელი დეგნანმა განაცხადა. ის უმრავლესობის მიერ კვორუმის ჩაგდების საკითხს გამოეხმაურა. მან ასევე ისაუბრა აშშ-ის სასამართლოს პროგრამებში მოსამართლეთა მონაწილეობასთან დაკავშირებით. პუბლიკა

არასამთავრობო ორგანიზაციები საპარლამენტო უმრავლესობის მიერ საგამოძიებო კომისიის შექმნის თავიდან აცილების მიზნით კვორუმის ჩაგდებას ეხმაურებიან. საპარლამენტო უმრავლესობამ კვორუმი უკვე ორჯერ ჩააგდო და ხელი შეუშალა დროებითი საგამოძიებო კომისიის შექმნას, რომელსაც სასამართლო სისტემაში კორუფციული და სხვა სახის დარღვევები უნდა შეესწავლა. ირაკლი კობახიძემ ეს მოსამართლეების მიმართ „სოლიდარობის აქტად“ შეაფასა. „საერთაშორისო გამჭვირვალობა – საქართველოს“ განცხადებით კი, ამ გადაწყვეტილებით საპარლამენტო უმრავლესობა მხარს უჭერს სასამართლოში არსებულ კლანს და უგულებელყოფს კონსტიტუციას. „ეს გადაწყვეტილება, ფაქტობრივად, სასამართლო სისტემაში გავლენიანი მოსამართლეების მიერ ჩადენილ კორუფციულ გარიგებებზე პოლიტიკური პასუხისმგებლობის აღებასაც ნიშნავს. სასამართლო ხელისუფლებაში არსებულ პრობლემებზე წლებია, საუბრობენ ადგილობრივი და საერთაშორისო ორგანიზაციები. 5 აპრილს მნიშვნელოვან კორუფციულ საქმიანობაში ჩართულობის გამო ამერიკის შეერთებული შტატების (აშშ) სახელმწიფო დეპარტამენტმა მოქმედი და ყოფილი მოსამართლეები – მიხეილ ჩინჩალაძე, ლევან მურუსიძე, ირაკლი შენგელია, ვალერიან ცერცვაძე და მათი ოჯახის წევრები დაასანქცირა და აშშ-ში შესვლა აუკრძალა. კვორუმის ჩაგდებას გამოეხმაურა დღეს „სასამართლოს გუშაგიც“. ორგანიზაციის განცხადებით, საპარლამენტო უმრავლესობის ეს ნაბიჯი სასამართლოს დამოუკიდებლობის წინააღმდეგ მიმართული აქტია. ამასთან, ეს ნაბიჯი კიდევ ერთხელ ადასტურებს, რომ საპარლამენტო უმრავლესობის წევრების ინტერესში არ შედის სასამართლო სისტემაში არსებულ ვითარების გამოსწორება“, – ნათქვამია „სასამართლოს გუშაგის“ განცხადებაში. პარლამენტს დღეს სასამართლო სისტემაში კორუფციულ და სხვა კანონსაწინააღმდეგო ქმედებათა შემსწავლელი დროებითი საგამოძიებო კომისიის შექმნისთვის უნდა ეყარა კენჭი, მაგრამ უმრავლესობამ რეგისტრაცია არ გაიარა და კვორუმი კიდევ ერთხელ ჩააგდო. მსგავსად დღევანდელი დღისა, მათ რეგისტრაცია არც გუშინ გაიარეს. კვორუმის ჩაგდების მიზეზი ისაა, რომ საგამოძიებო კომისიის შექმნა ოპოზიციას „ქართული ოცნების“ მხარდაჭერის გარეშეც შეუძლია, ამიტომ უმრავლესობა ცდილობს, ეს საკითხი კენჭისყრაზე საერთოდ არ დადგეს. 6 აპრილს აშშ-ის სახელმწიფო დეპარტამენტის მიერ 4 ქართველი მოსამართლის სანქცირების შემდეგ საპარლამენტო ოპოზიცია სასამართლო „კლანზე“ საგამოძიებო კომისიის შექმნის ინიციატივით გამოვიდა. სახელმწიფო დეპარტამენტმა სანქციები დაუწესა იუსტიციის საბჭოს წევრ ლევან მურუსიძეს, თბილისის სააპელაციო სასამართლოს თავმჯდომარე მიხეილ ჩინჩალაძეს, თბილისის სააპელაციო სასამართლოს ადმინისტრაციულ საქმეთა პალატის თავმჯდომარეს, ირაკლი შენგელიას და თბილისის სააპელაციო სასამართლოს ყოფილი თავმჯდომარესა და იუსტიციის უმაღლესი საბჭოს ყოფილი მდივანს, ვალერი ცერცვაძეს. პუბლიკა

რუსებისთვის ბახმუტი ერთ-ერთი ყველაზე ძვირადღირებული ოპერაცია გახდა. ამის შესახებ უკრაინის თავდაცვის მინისტრის მოადგილემ ანა მალიარმა განაცხადა. “მათთვის ეს, ალბათ, ერთ-ერთი ყველაზე ძვირადღირებული ოპერაციაა, ვინაიდან, მასზე ტექნიკის, შეიარაღების დიდი რაოდენობაა დახარჯული, რომელიც უკრაინის შეიარაღებულმა ძალებმა დიდწილად გაანადგურეს, და ისინი იქ უდიდეს დანაკარგებს განიცდიან. და ეს დანაკარგები რამდენჯერმე აღემატება ჩვენ დანაკარგებს”, - განაცხადა მალიარმა. მისი თქმით, უკრაინის სამხედრო ხელმძღვანელობის დაგეგმარებას დანაკარგები მინიმუმამდე დაჰყავს, იმის გათვალისწინებით , “როგორი შესაძლოა ყოფილიყო ისინი ასეთ ბრძოლებში.” მალიარმა აღნიშნა, რომ ქუჩის ბრძოლებში მტერი უფრო სუსტია, ამიტომ “ნაცად სირიულ ტაქტიკას” იყენებს და შენობებს მთლიანად ანადგურებს. “ფაქტობრივად შეუძლებელია ასეთ ვითარებაში მათი შეკავება. ამიტომ გარკვეულ მონაკვეთებზე, სამწუხაროდ, არის მტრის უმნიშვნელო წინსვლა”, - განაცხადა მალიარმა. IPN

კეზერაშვილმა გაავრცელა განცხადებები, სადაც ბრალდებებს უარყოფს, აშკარაა, მეტი ინფორმაციაა საჭირო, იურიდიული პროცესი უნდა დაიწყოს და დარწმუნებული ვარ, დაიწყება , - ამის შესახებ საქართველოში აშშ-ის ელჩმა კელი დეგნანმა ჟურნალისტებთან საუბარში განაცხადა. ელჩის თქმით, კეზერაშვილთან დაკავშირებით საჯარო ინფორმაციაზე დაყრდნობით ხელისუფლებას საკუთარი გამოძიების ჩატარება შეუძლია და ბრალდებების მხრივ მეტი სამუშაოა გასაწევი. “საშუალება არ მქონდა [ქოლცენტრებზე BBC-ის] გადაცემა მენახა. მის შესახებ ქართულ პრესაში მესმოდა... და კვლავ, ეს არის საგამოძიებო ჟურნალისტიკა, რომელიც ძალიან მნიშვნელოვანია, რათა მთავრობა ანგარიშვალდებულებაში გყავდეს, რათა მნიშვნელოვანი ინფორმაცია გამოააშკარაო, მაგრამ ეს მხოლოდ დასაწყისია, ეს საჯარო ინფორმაციის ის ფორმაა, რომელზე დაყრდნობითაც შემდგომ ხელისუფლებას საკუთარი გამოძიების ჩატარება შეუძლია. მნიშვნელოვანი ელემენტია ამაში და, რა თქმა უნდა, ამ ბრალდებების მხრივ მეტი სამუშაოა ჩასატარებელი. როგორც მესმის, ბატონმა კეზერაშვილმა გაავრცელა განცხადებები, სადაც ამ ბრალდებებს უარყოფს, ასე რომ აშკარაა, რომ მეტი ინფორმაციაა საჭირო და იურიდიული პროცესი უნდა დაიწყოს და დარწმუნებული ვარ, რომ დაიწყება”, - განაცხადა დეგნანმა. იპნ

ევროკავშირი გეგმავს, შეზღუდვები დააწესოს უკრაინიდან სოფლის მეურნეობის გარკვეული სახეობის პროდუქტის იმპორტზე და ასევე, უკრიანის მეზობელი ევროპული ქვეყნების ფერმერების დასახმარებლად 100 მილიონი ევროს ოდენობის კომპენსაციას ამზადებს. სააგენტო „როიტერის“ ცნობით, ამის შესახებ ევროკომისიის პრესსპიკერმა განაცხადა. აღნიშნული ზომების განხილვა ევროკავშირმა მას შემდეგ დაიწყო, რაც პოლონეთმა, უნგრეთმა, სლოვაკეთმა და ბულგარეთმა უკრაინიდან მარცვლეულისა და სასურსათო პროდუქტის იმპორტი აკრძალეს. ევროკომისია გეგმავს, მიიღოს „პრევენციული ზომები“ მარცვლეული და ზეთოვანი კულტურების გარკვეული კატეგორიის იმპორტთან დაკავშირებით, კერძოდ, ხორბლის, სიმინდის, მზესუმზირისა და რაფსის თესლის. ვაჭრობის საკითხებში ევროკომისარი ვალდის დომბროვსკისი აღნიშნულ გეგმავს დღეს დაზარალებული ქვეყნების – ბულგარეთის, უნგრეთის, პოლონეთის, რუმინეთისა და სლოვაკეთის მინისტრებთან, ასევე უკრაინელ კოლეგებთან განიხილავს. ავტორი - ქეთი ჩოხელი

ეს არის შესაძლებლობა საქართველოს ხელისუფლებისთვის, გამოიძიოს სასამართლოს სისტემაში არსებულ კორუფციასთან დაკავშირებული ბრალდებები, რომელიც ფართოდ იყო ცნობილი წლების განმავლობაში, – ამის შესახებ საქართველოში აშშ-ის ელჩმა კელი დეგნანმა, პარლამენტში სასამართლოსთან დაკავშირებით დროებითი საგამოძიებო კომისიის შექმნის საკითხზე ჟურნალისტებს განუცხადა. დეგანის თქმით, „ოთხი ადამიანის დაცვა, რომლებზეც არის სანდო ინფორმაცია კორუფციულ ქმედებებში მონაწილეობასთან დაკავშირებით, არ არის სოლიდარობა პროფესიონალი მოსამართლეების მიმართ“. „აშშ ყოველთვის მოუწოდებს საქართველოს ყველა პოლიტიკურ პარტიას, მივიდნენ პარლამენტში და იზრუნონ თავისი ხალხის მნიშვნელოვან საქმეებზე. სწორედ ამიტომ შექმენით ეს ინსტიტუტი. სარგებელი არასდროს მოაქვს პარტიების მხრიდან საპარლამენტო სესიების ბოიკოტს. ამ საქმესთან დაკავშირებით რაც ჩვენ არაერთხელ ვთქვით, ეს არის შესაძლებლობა საქართველოს ხელისუფლებისთვის, გამოიძიოს სასამართლოს სისტემაში არსებულ კორუფციასთან დაკავშირებული ბრალდებები, რომელიც ფართოდ იყო ცნობილი წლების განმავლობაში. მსურს, ცხადად ვთქვა, რომ ამ საქმესთან დაკაშირებით შეცდომა არ არსებობს. აშშ-ს აქვს სრული ნდობა ვიზების აკრძალვის საფუძვლებთან მიმართებით ამ ოთხ ადამიანთან დაკავშირებით, კორუფციულ ქმედებებში ჩართულობის გამო. ვიზის აკრძალვამდე ჩვენ ჩავატარეთ ძალიან საფუძვლიანი მიმოხილვა და შევაგროვეთ ინფორმაცია, რომლის უმრავლესობა საჯაროდ იყო ხელმისაწვდომი. სახელმწიფო მდივანმა ბლინკენმა დაამტკიცა ვიზის აკრძალვა, რადგან ჩვენ გვაქვს სრული ნდობა ვიზის აკრძალვის საფუძვლებთან დაკაშირებით. როგორც ვთქვი, ეს არის შესაძლებლობა საქართველოს მთავრობისთვის, თავად გამოიძიოს ბრალდებები ადგილობრივი კანონმდებლობის შესაბამისად, საჯარო და სხვა სახის ინფორმაციის გათვალისწინებით. ასევე არ არის შეცდომა აშშ-ის სასამართლოს პროგრამებში მონაწილეობასთან დაკავშირებით. ეს პროგრამები ღიაა მოსამართლეებისთვის, რომლებიც კვალიფიციურები არიან, ვისაც აქვს დრო მონაწილეობისთვის და რომლებიც სარგებელს მიიღებენ ამ პროგრამებით თავიანთ სასამართლო ოთახებში იდეების ჩამოტანით. ჩვენ არასდროს დაგვიბარებია მოსამართლეები და არც არაფერი მოგვითხოვია მათგან, ეს სრული სიცრუეა და არასწორად ინფორმირებული ადამიანებისგან ვრცელდება. ჩვენ გვაქვს ძალიან პოპულარული და წარმატებული გაცვლითი პროგრამები, რომელშიც ბევრმა ქართველმა მოსამართლემ მიიღო მონაწილეობა. უცნაურად ჩანს სოლიდარობის გამოცხადება იმ ქართველი მოსამართლეების მიმართ, რომელთა უმრავლესობა ძალიან პროფესიონალია, რომლებსაც სურთ, იმუშაონ კანონის შესაბამისად. ოთხი ადამიანის დაცვა, რომლებზეც არის სანდო ინფორმაცია კორუფციულ ქმედებებში მონაწილეობასთან დაკავშირებით, არ არის სოლიდარობა პროფესიონალი მოსამართლეების მიმართ. ვიმედოვნებ, მთავრობა გამოიყენებს ამ შესაძლებლობას ბრალდებებთან დაკავშირებით გამოძიების ჩასატარებლად“, – განახადა კელი დეგნამა. ცნობისთვის, კვორუმის არარსებობის გამო, სასამართლოსთან დაკავშირებით დროებითი საგამოძიებო კომისიის შექმნის საკითხზე პარლამენტის პლენარულ სხდომაზე კენჭისყრა ვერც დღეს შედგა. კენჭისყრის დაწყებამდე საპარლამენტო უმრავლესობის ლიდერმა, ირაკლი კობახიძემ განაცხადა, რომ კიდევ ერთხელ უცხადებენ მხარდაჭერას სასამართლოს დამოუკიდებლობას და სოლიდარობას ქართველ მოსამართლეებს და დღესაც საპარლამენტო უმრავლესობა არ გაივლის რეგისტრაციას. ავტორი - გივი ბარამიძე

რომის სტატუტის ყველა ხელმომწერმა უნდა შეასრულოს ვლადიმერ პუტინის დაკავების ორდერი, – ამის შესახებ ევროკომისიის ვიცე-პრეზიდენტმა, ვერა იუროვამ ევროპარლამენტის პლენარულ სესიაზე სიტყვით გამოსვლისას განაცხადა, რომელიც რუსი სამხედროების მიერ უკრაინელი ბავშვების იძულებით დეპორტაციას უკავშირდებოდა. იუროვამ აღნიშნა, რომ რუსეთის მიერ უკრაინელი ბავშვების დეპორტაციის მიმდინარე ქმედებები ადასტურებს რუსეთის განზრახვას, სამუდამოდ გაიყვანოს ეს ბავშვები უკრაინიდან. ევროკომისიის ვიცე-პრეზიდენტის თქმით, ევროკავშირმა უკვე აღიარა ვლადიმერ პუტინისა და რუსეთის ბავშვთა უფლებების კომისრის, მარია ლვოვა-ბელოვას დაკავების ორდერის მოქმედება და მიესალმება ყოველგვარ შემდგომ ნაბიჯს, რათა უზრუნველყოფილი იყოს სამხედრო დანაშაულებისა და სხვა მძიმე დანაშაულებებისთვის პასუხისმგებელი პირების დაპატიმრება. ვერა იუროვამ აღნიშნა, რომ ამჟამად ევროკავშირმა სანქციები გამოიყენა 16 პირის მიმართ, რომლებიც პასუხისმგებელნი არიან უკრაინელი ბავშვების იძულებით დეპორტაციასა და იძულებით შვილად აყვანაზე, რომლებიც გაიყვანეს უკრაინის დროებით ოკუპირებული ტერიტორიებიდან. ავტორი - გივი ბარამიძე

კიევ-პეჩერის ლავრის ტერიტორიაზე მოსკოვის საპატრიარქოს უკრაინის მართლმადიდებელი ეკლესიის მრევლი სამართალდამცავებს დაუპირისპირდა. უკრაინული მედიის ინფორმაციით, ადგილზე მყოფმა მოქალაქეებმა კულტურის სამინისტროს მიერ დალუქული შენობის დამცავი ჟალუზები დააზიანეს. მოსკოვის საპატრიარქოს მრევლმა შენობაში შესვლა სცადა, რომელიც დღეს დილით კულტურის სამინისტროს კომისიამ დალუქა. უკრაინული მედიის ინფორმაციით, სამართალდამცავების ჯგუფმა კიევ-პეჩერის ლავრის ტერიტორია უკვე დატოვა. კიევის პოლიციის ინფორმაციით, ამჟამად ინციდენტის იურიდიული კვალიფიკაციის საკითხი წყდება. უკრაინის კულტურისა და საინფორმაციო პოლიტიკის მინისტრმა, ალექსანდრ ტკაჩენკომ განაცხადა, რომ კომისიამ უკვე მოახერხა კიევ-პეჩერის ლავრის სამი შენობის შემოწმება. კიევ-პეჩერის ლავრის ტერიტორიაზე მისულმა მოქალაქეებმა სასამართლოს გადაწყვეტილების ჩვენება მოითხოვეს, რომელიც მათ ქმედებას ამართლებს. ავტორი - გივი ბარამიძე

საქართველოს პარლამენტმა „პერსონალურ მონაცემთა დაცვის შესახებ“ კანონპროექტზე პირველი მოსმენით იმსჯელა. ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, მიხეილ სარჯველაძის განმარტებით, კანონპროექტით წესრიგდება მონაცემთა დამუშავების კანონიერებასთან, მონაცემთა სუბიექტის უფლებებთან, მონაცემთა დამმუშავებლისა და უფლებამოსილი პირის ვალდებულებებთან, მონაცემთა საერთაშორისო გადაცემასთან, საქმის წარმოებასთან, ადმინისტრაციული სამართალდარღვევის განხილვასთან, ადმინისტრაციულ პასუხისმგებლობასთან და სახდელის დაკისრებასთან დაკავშირებული სამართლებრივი ურთიერთობები. „ჩვენს ეპოქაში ტექნოლოგიურმა პროგრესმა განაპირობა სრულიად ახალი საფრთხეები და წარმოუდგენლად გაზარდა საფრთხეები პერსონალური მონაცემების დაცვის მიმართულებით. დრომ მოიტანა საჭიროება, რომ მოქმედი კანონმდებლობა დაახლოებოდა საუკეთესო ევროპულ გამოცდილებას, ევროპულ სტანდარტებს“, – განაცხადა მიხეილ სარჯველაძემ. კანონპროექტის სამივე მოსმენით მიღების შემთხვევაში, ძალადაკარგულად გამოცხადდება „პერსონალურ მონაცემთა დაცვის შესახებ“ 2011 წლის 28 დეკემბერს მიღებული კანონი.

ბუნებრივია, ჩვენ გუშინდელი გადაწყვეტილება არ შევცვალეთ და სოლიდარობა ქართულ სასამართლოს! - ამის შესახებ ფრაქცია „ქართული ოცნების" თავმჯდომარემ, მამუკა მდინარაძემ ჟურნალისტებს განუცხადა. მისივე თქმით, სასამართლოსთან დაკავშირებული საგამოძიებო კომისიის შექმნით ოპოზიცია ცდილობს ევროინტეგრაციის პროცესი შეაფერხოს. „ბუნებრივია, ჩვენ გუშინდელი გადაწყვეტილება არ შევცვალეთ და სოლიდარობა ქართულ სასამართლოს! თქვენ იცით, რომ წლის ბოლოს ევროკავშირმა შეფასების კრიტერიუმებზე დაყრდნობით გადაწყვეტილება უნდა მიიღოს, საქართველოს კანდიდატის სტატუსს მისცემს თუ არა. ერთხელ ჩვენ უსამართლოდ კანდიდატის სტატუსი არ მოგვეცა და ეს ევროკავშირის მიერ გამოქვეყნებული კრიტერიუმებით დამტკიცდა. სხვას რას შეიძლება ემსახურებოდეს ახლა სასამართლოს თემაზე კომისიის შექმნა, თუ არა საბოტაჟს. „ნაცმოძრაობას“ და მის მთელ კლასტერს ვერ წარმოუდგენია, რომ „ქართული ოცნების“ პირობებში საქართველომ კანდიდატის სტატუსი მიიღოს, ყველაფერს აკეთებენ ამის გამოსარიცხად. საზოგადოებამ გადაწყვიტოს რას შეიძლება ემსახურებოდეს სასამართლოსთან დაკავშირებული კომისიის შექმნა, მაშინ როდესაც საქართველოში გატარებული რეფორმების და არსებული პროგრესის საფუძველზე ევროკავშირმა გადაწყვეტილება უნდა მიიღოს. ქართველ მოსამართლეებს სავიზო შეზღუდვებს უწესებენ და შენ ოპოზიციონერი რომ გქვია, ნაცვლად იმისა, რომ ქვეყნის გვერდით დადგე და თქვა, რომ მტკიცებულების გარეშე ეს დაუშვებელია, პირიქით ამის საფუძველზე ამბობ, რომ ჩვენ უნდა შევქმნათ მტკიცებულებები და კომისია. საზოგადოების რომელიმე წევრს მიგაჩნიათ, თუნდაც „ნაციონალური მოძრაობის“ მომხრეს, მათ კომისიის შექმნა იმისთვის უნდათ, რომ სასამართლოში მიღწეული პროგრესი დაადასტურონ?“ - განაცხადა მდინარაძემ. მისი თქმით, ამის მიზანია რამენაირად შეაფერხონ ევროინტეგრაციის პროცესი. „ეს არის მათი მიზანი, გარდა იმ მიზნებისა, რომელიც სასამართლოს დამოუკიდებლობის ხელყოფას, მის საქმიანობაში ჩარევას ეხება, რაც სხვათა შორის თავადვე ჩაწერეს განმარტებით ბარათში, რაც არ უნდა გასაკვირი იყოს“, - განაცხადა მდინარაძემ. იპნ

შეუძლებელი შესაძლებელია, დღეს ჩვენი მშვენიერი ცა უფრო დაცული ხდება, - ამის შესახებ უკრაინის თავდაცვის მინისტრმა ალექსეი რეზნიკოვმა განაცხადა. მან დაადასტურა, რომ უკრაინაში გერმანიის მიერ გადაცემული Patriot-ის ტიპის ჰაერსაწინააღმდეგო თავდაცვის სისტემები ჩავიდა. „ტვიტერის“ გვერდზე გავრცელებულ განცხადებაში, რეზნიკოვი აღნიშნავს, რომ ჯერ კიდევ 2021 წელს, როდესაც ის იკავებდა ვიცე-პრემიერის თანამდებობას, აშშ-ში ვიზიტის დროს, მან ამერიკელ პარტნიორებს უთხრა, რომ უკრაინას სჭირდებოდა Patriot-ის ტიპის საზენიტო-სარაკეტო სისტემები. მისი თქმით, უკრაინის თავისუფლება და დამოუკიდებლობა ჯერ კიდევ მაშინ იდგა საფრთხის ქვეშ, თუმცა მაშინ მან მიიღო პასუხად, რომ მსგავსი სისტემების უკრაინისთვის გადაცემა შეუძლებელი იყო. „შეუძლებელი შესაძლებელია, დღეს ჩვენი მშვენიერი ცა უფრო დაცული ხდება, რადგან Patriot-ის ტიპის ჰაერსაწინააღმდეგო თავდაცვის სისტემები უკრაინაში ჩამოვიდა“,- განაცხადა რეზნიკოვმა. ამასთან, თავდაცვის მინისტრმა აღნიშნა, რომ უკრაინის დამცველებმა ეს სისტემები იმდენად სწრაფად აითვისეს, რამდენადაც ეს შესაძლებელი იყო. „ჩვენმა პარტნიორებმა კი თავისი სიტყვა შეასრულეს. ეს თავდაუზოგავი შრომის შედეგია, რომელსაც ქვეყნის პრეზიდენტი ვოლოდიმირ ზელენსკი ხელმძღვანელობს“, - აღნიშნა თავდაცვის მინისტრმა. მან აშშ-ის, გერმანიისა და ნიდერლანდების თავდაცვის მინისტრებსა და ხალხს მადლობა გადაუხადა. „ჩვენ ერთად გავიმარჯვებთ“,- განაცხადა მინისტრმა. რეზნიკოვმა ასევე გამოაქვეყნა გერმანიის თავდაცვის სამინისტროს ფოტო, რომელზეც Patriot-ის სამი სისტემაა გამოსახული. იპნ

სასამართლო სისტემაში კორუფციული და სხვა სახის სამართალდარღვევების შესწავლის მიზნით საგამოძიებო კომისიის შექმნის საკითხზე კენჭისყრა კვროუმის არარსებობის გამო დღესაც ვერ შედგა. კენჭისყრის დაწყებამდე „ქართული ოცნების“ თავმჯდომარე ირაკლი კობახიძემ მოსამართლეებს სოლიდარობა კიდევ ერთხელ გამოუცხადა, რის კონტექსტშიც უმრავლესობის წევრმა დეპუტატებმა რეგისტრაცია ისევ არ გაიარეს. "კოლეგებო, ჩვენ კიდევ ერთხელ ვუცხადებთ მხარდაჭერას სასამართლოს დამოუკიდებლობას და სოლიდარობას ქართველ მოსამართლეებს. აქედან გამომდინარე, დღესაც არ გაივლის საპარლამენტო უმრავლესობა რეგისტრაციას", - აღნიშნა კობახიძემ. რეგისტრაცია მხოლოდ 52-მა ოპოზიციონერმა დეპუტატმა გაიარა, კვორუმისთვის კი პარლამენტის 76 წევრის დასწრება იყო საჭირო. საუბარია პარლამენტში ჯერ კიდევ ივნისის თვეში ინიცირებული დადგენილების პროექტის დამტკიცებაზე, რომელიც სწორედ სასამართლოსთან დაკავშირებით სპეციალური საგამოძიებო კომისიის შექმნას ითვალისწინებს. აღნიშნული პროექტი პარლამენტში „რეფორმების ჯგუფმა“ დააინიცირა. საგამოძიებო კომისიის შექმნის საკითხი პარლამენტში, აშშ-ის მიერ 4 ქართველი მოსამართლის სანქცირების შემდეგ გააქტიურდა. გუშინ, კვორუმის არარსებობის გამო, პარლამენტის პლენარული სხდომა, სადაც სხვა საკითხებთან ერთად, სასამართლო სისტემაში კორუფციული და სხვა სახის სამართალდარღვევების შესწავლის მიზნით საგამოძიებო კომისიის შექმნის საკითხს განიხილავდნენ, კენჭისყრების გარეშე დასრულდა. უმრავლესობის გადაწყვეტილებით, მათ კენჭისყრისთვის რეგისტრაცია არ გაიარეს, რაც უმრავლესობის ლიდერმა ირაკლი კობახიძემ ქართველი მოსამართლეების მიმართ "სოლიდარობის აქტად" შეაფასა. გუშინ სხდომაზე რეგისტრაცია მხოლოდ 51-მა ოპოზიციონერმა დეპუტატმა გაიარა. იპნ

ხვიჩა კვარაცხელიას „ნაპოლიმ“ „მილანთან“ ჩემპიონთა ლიგის საპასუხო მეოთხედფინალურ შეხვედრაში მიზანს ვერ მიაღწია (1:1) და გათამაშებას დაემშვიდობა. ამის მიუხედავად, მატჩის საუკეთესო მოთამაშედ ავტორიტეტულმა საერთაშოროსო საფეხბურთო ანალიტიკურმა გვერდებმა მაინც ქართველი ფეხბურთელი დაასახელეს. Whoscored-მა კვარაცხელიას 8.2 ქულა დაუწერა, როდესაც გამარჯვებული „მილანის“ შეტევის ლიდერის, რაფაელ ლეაოს თამაში 8.0 ქულით შეაფასა. რაც შეეხება მეორე საერთაშორისო გვერდს, Sofascore-ს, მან ქართველის გრაფაში 7.6 ქულა დაწერა, ხოლო ლეაოს 7.5 ქულა მიანიჭა. შეგახსენებთ, რომ მატჩის მეორე ტაიმის დასაწყისში კვარაცხელიამ ორი საგოლე მომენტი შექმნა, სამჯერ კი თანაგუნდელებს მისი გადაცემით გატანა შეეძლოთ, მაგრამ უშედეგოდ. 82-ე წუთზე ხვიჩამ პენალტი შეასრულა და, სამწუხაროდ, მეკარემ აჯობა. საბოლოოდ, ორი მატჩის ჯამში „მილანმა“ მოიგო 2:1 (1:0, 1:1) და ჩემპიონთა ლიგის ნახევარფინალში თამაშის უფლება მოიპოვა. ავტორი - მერაბ მამულაშვილი

საქართველოს ფინანსთა სამინისტროს საგამოძიებო სამსახურის თანამშრომლებმა, ქვემო ქართლის საოლქო პროკურატურის თანამშრომლებთან კოორდინაციით გატარებული ღონისძიებების შედეგად, წინასწარი შეთანხმებით ჯგუფის მიერ ყალბი ფულის გასაღების ფაქტზე ორი პირი დააკავეს. ინფორმაციას საქართველოს ფინანსთა სამინისტროს საგამოძიებო სამსახური ავრცელებს. „გამოძიებით დადგინდა, რომ 2023 წლის მარტი-აპრილის პერიოდში სხვადასხვა პირზე საქონლის შეძენისას გასაღებულ იქნა, ჯამში, 2 200 აშშ დოლარის ოდენობის ყალბი 100-დოლარიანი კუპიურა. გატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად მოხდა დანაშაულის ჩამდენ პირთა იდენტიფიცირება და დაკავება. გამოძიების პროცესში ერთ-ერთი ბრალდებულისაგან დამატებით ამოღებულ იქნა 1 800 ევროს ოდენობის ცხრა ცალი ყალბი კუპიურა და ერთი ცალი ყალბი 50-დოლარიანი კუპიურა. გამოძიება მიმდინარეობს საქართველოს სისხლის სამართლის კოდექსის 212-ე მუხლის მე-2 ნაწილით, რაც სასჯელის სახით 7-დან 10 წლამდე ვადით თავისუფლების აღკვეთას ითვალისწინებს. აღნიშნულ დანაშაულში თანამონაწილე პირების დადგენა-მხილების მიზნით შესაბამისი ღონისძიებები ტარდება“, – ნათქვამია ინფორმაციაში.

უკრაინის საგარეო საქმეთა სამინისტრომ მინსკიდან კონსულტაციისთვის გამოიძახა ბელარუსში უკრაინის ელჩი იჰორ კიზიმი. გადაწყვეტილება მას შემდეგ მიიღეს, რაც 18 აპრილს, ბელარუსის ავტორიტარმა მმართველმა ლუკაშენკამ მინსკში უმასპინძლა რუსეთის მიერ დონეცკის ე.წ. სახალხო რესპუბლიკის მეთაურის მოვალეობის შემსრულებლად დანიშნულ დენის პუშილინს. უკრაინის საგარეო საქმეთა სამინისტრომ შეხვედრა დაგმო და დონეცკში რუსეთის საოკუპაციო ადმინისტრაციის წარმომადგენლის ლეგიტიმაციის მცდელობად შეაფასა. კიევში განაცხადეს, რომ არაერთ მძიმე დანაშაულში ეჭვმიტანილ, უკრაინის და საერთაშორისო სანქციების ქვეშ მყოფ პუშილინთან შეხვედრა იყო ბელარუსის მხრიდან მორიგი არამეგობრული აქტი, რომელიც მიმართულია აგრესორი სახელმწიფოს, რუსეთის მხარდაჭერისკენ. ასევე ნახეთ კულება განმარტავს, რატომ არ წყვეტს უკრაინა ბელარუსთან დიპლომატიურ ურთიერთობებს მიუხედავად იმისა, რომ ლუკაშენკა რუსეთის პრეზიდენტ პუტინის მოკავშირეა და რუსეთი უკრაინის წინააღმდეგ ომისთვის ბელარუსის ტერიტორიასაც იყენებს, კიევი მინსკთან დიპლომატიურ ურთიერთობებს ინარჩუნებს. რადიო თავისუფლება