tvati

ჩვენი მოსაზრებით, ეს ერთგვარი სპეცოპერაცია, რაც განხორციელდა საქართველოს სასამართლო ხელისუფლების მიმართ, წარმოადგენს წლების განმავლობაში წარმოებული ორკესტრირებული, ცილისმწამებლური კამპანიის ერთგვარ შეჯამებას, – ამის შესახებ საქართველოს პირველ არხს იუსტიციის უმაღლესი საბჭოს მოსამართლე წევრმა, დიმიტრი გვრიტიშვილმა განუცხადა. როგორც დიმიტრი გვრიტიშვილმა აღნიშნა, წლების განმავლობაში თუ საელჩო ერიდებოდა წინა პლანზე გამოსვლას და ამ პროცესის, კამპანიის სათავეში ჩადგომას, დღეს აღარ ერიდება. „ფორმალურადაც ავანსცენაზეა გამოსული ელჩი და ამერიკული მხარე ფაქტობრივად შანტაჟის მდგომარეობაში ამყოფებს ხელისუფლებასაც. მისი განცხადება, რომ აი, ახლა გაქვთ შესაძლებლობა, გამოიძიოთ კორუფციული ბრალდებები და თქვენ უნდა დაამტკიცოთ ერთგულება იმ პროცესის მიმართ, რომ ებრძვით კორუფციას, არის ოქსიმორონი. ელჩი, რომელიც იურისტი ბრძანდება, სახელმწიფო, რომელსაც ის წარმოადგენს და ასე პოზიციონირებს, ელემენტარული ჭეშმარიტება, რომ მტკიცების ტვირთი არის ბრალმდებელზე, მხარეს, რომელიც გააჟღერებს უმძიმეს ბრალდებას და მიიღებს სანქცირების შესახებ გადაწყვეტილებას, სულ მცირე იმის ვალდებულება ეკისრება, რომ რაღაცა მტკიცებულებები წარმოადგინოს. ბუნდოვნად რაღაც აბსტრაქტულ ინფორმაციაზე მითითება, მსგავსი ბრალდების წარსადგენად და დასანქცირების შესახებ გადაწყვეტილების მისაღებად არ არის საკმარისი. შენ თუ აცხადებ, რომ მოქმედებ როგორც პარტნიორი და მეგობარი სახელმწიფო, ორმაგი სტანდარტია, როდესაც შენი მეგობარი და პარტნიორი სახელმწიფოს მოსამართლე ლაშა ჩხიკვაძე აკეთებს განცხადებას, რომ აშშ-ს კონკრეტული თანამდებობის პირი, ასევე მეორე კონკრეტული თანამდებობის პირის, ელჩის დავალებით, სთხოვს მოსამართლეს ანგარიშს კონკრეტულ საქმესთან დაკავშირებით, მაშინ ამერიკულ მხარესაც უნდა გაუჩნდეს ობიექტური ინტერესი, საკუთარი წარმომადგენლების ქმედებების კანონიერება გამოიკვლიოს. თუნდაც იგივე საგამოძიებო კომიის შექმნით, რასაც პარლამენტისგან ითხოვენ. მეორე ფაქტი – აშშ-ს ყოფილი პრეზიდენტი დონალდ ტრამპი, რომელსაც დღესაც აქვს მრავალმილიონიანი მხარდაჭერა აშშ-ში და ოპოზიციური კანდიდატია მომავალ საპრეზიდენტო არჩევნებში, აცხადებს, რომ სასამართლო, მის საქმესთან მიმართებაში და ზოგადადაც, არის პოლიტიზირებული, კორუმპირებული, რატომ არ არის მიჩნეული მისი ეს განცახდება „სანდო ინფორმაციად“, რათა აშშ-ში დადგეს საამოძიებო კომისიის შექმნის საკითხი. ეს მიდგომები გვაძლევს დასკვნის საფუძველს, რომ სახეზეა ორმაგი სტანდარტით მოქმედება“, – განაცხადა გვრიტიშვილმა. მისივე თქმით, სურთ გარკვეული შოუს მოწყობა, რომ დაიბარონ მოქმედი მოსამართლეები და ანგარიში მოსთხოვონ საჯაროდ გამართულ პროცესებზე, ეს კონსტიტუციასთან შეუთავსებელია. „ამ ყველაფრის მიზანია, რომ მოხდეს ცალკეული მოსამართლეებისა და სასამართლო კორპუსის დისკრედიტაცია. მოხდეს სასამართლო სისტემის პარალიზება, რომ შემდგომში ადვილი იყოს ისეთი პროცესის განხორციელება, რომელიც ალბანეთში ან უკრაინაში განხორციელდა. ჩვენ წინააღმდეგ წარმოებული ეს კამპანია არის აბსოლუტურად უსაფუძვლო, ორკესტრირებული, ყოველგვარი მტკიცებულების გარეშე ხდება უმძიმესი დანაშაულის, კორუფციის დაბრალება. ერთ მიზანს ვხედავთ, რომ შემდგომში ჩვენი, ჩემი კოლეგებისა და იმ მოსამართლეების განდევნა მოხდეს სისტემიდან, რომლებიც უზრუნველყოფთ და ვიცავთ საქართველოს სუვერენიტეტს სასამართლო ხელისუფლების ნაწილში“, – განაცხადა გვრიტიშვილმა. ავტორი - ხატია ჯამალაშვილი

„ქართულმა ოცნებამ“ სასამართლოსთან დაკავშირებით საგამოძიებო კომისიის შექმნას ხელი კვლავ შეუშალა. სასამართლო სისტემაში კორუფციული და სხვა სახის სამართალდარღვევების შესწავლის მიზნით საგამოძიებო კომისიის შესაქმნელად კენჭისყრა ვერც დღეს შედგა. მიზეზი კვლავ საპარლამენტო უმრავლესობის გადაწყვეტილებაა. ისინი კენჭისყრამდე რეგისტრაციის გავლაზე უარს ამბობენ და ამიტომ, საჭირო ქვორუმი 76 დეპუტატით არ გროვდება. როგორც რეგისტრაციის დაწყებამდე „ქართული ოცნების“ თავმჯდომარემ ირაკლი კობახიძემ განაცხადა, უმრავლესობა რეგისტრაციას დღესაც არ გაივლიდა. შესაბამისად, ქვორუმის არარსებობის გამო სხვა საკითხებზე კენჭისყრაც აღარ გამართულა. „ჩვენი პოზიცია არის უცვლელი. მე მინდა შეგახსენოთ, რომ ყველა დეპუტატის ვალდებულებაა, გაუფრთხილდეს სახელმწიფო სუვერნიტეტს, სასამართლოს დამოუკიდებლობის პრინციპს და ჩვენ ვმოქმედებთ სწორედ ამ პრინციპების შესაბამისად. სამწუხაროდ, ჩვენ ამ შემთხვევაში, ამ პრინციპების დასაცავდ გვიწევს მოქმედება იმ ადამიანების წინააღმდეგ, რომლებსაც ეწოდებათ ოპოზიცია. ეს არის ძალიან სამწუხარო, თუმცა ჩვენ პრინციპულად ვდგავართ ამ პოზიციაზე. ჩვენი მხრიდან სასამართლოს დამოუკიდებლობის პრინციპი დაცული იქნება. შესაბამისად, დღესაც არ გავივლით რეგისტრაციას“, – განაცხადა ირაკლი კობახიძემ. საგამოძიებო კომისიის შექმნის ინიციატორი ოპოზიციაა, შესაბამისად, პლენარულ სხდომაზე მობილიზებული იყვნენ ოპოზიციონერი დეპუტატები, რათა კომისიის შექმნისთვის საჭირო 50 ხმა ჰქონოდათ. თუმცა, ვინაიდან უმრავლესობის წევრები საგამოძიებო კომისიის შექმნას არ ეთანხმებიან, მესამე დღეა ისინი კენჭისყრამდე რეგისტრაციას არ გადიან და ამით კომისიის შექმნას ხელს უშლიან. ნეტგაზეთი

პარტია "საქართველოსთვის" წევრები აქონდროპლაზიის დიაგნოზის მქონე ბავშვების მშობლებს მხარდაჭერას უცხადებენ. ცნობისთვის, მშობლები საერთაშორისოდ აღიარებული პრეპარატის ქვეყანაში შემოტანს და მათი ბავშვებისთვის უსასყიდლოდ გადაცემას მოითხოვენ.

უკრაინის მომავალში ევროატლანტიკურ ოჯახშია, უკრაინის მომავალი ნატო-შია, – ამის შესახებ ნატო-ს გენერალურმა მდივანმა, იენს სტოლტენბერგმა კიევში ვოლოდიმირ ზელენსკისთან შეხვედრის შემდეგ განაცხადა. მისი თქმით, აღნიშნული საკითხი ნატო-ს მომდევნო სამიტზე იქნება განხილული. „უკრაინის მომავალი ევროატლანტიკურ ოჯახშია, უკრაინის მომავალი ნატო-შია. ამაზე ყველა მოკავშირე თანხმდება“,- განაცხადა იენს სტოლტენბერგმა. ამასთან, ნატო-ს გენერალურმა მდივანმა უკრაინისთვის სამხედრო აღჭურვილობის მიწოდების აუცილებლობაზე ისაუბრა. „ძალიან მნიშვნელოვანია იმის უზრუნველყოფა, რომ ყველა სისტემა, ყველა იარაღი, რომელიც უკვე უკრაინაშია, მუშაობდეს ისე, როგორც საჭიროა. ვგულისხმობ, რომ მათ სჭირდებათ აღჭურვილობა, დიდი რაოდენობით საბრძოლო მასალა. მათ სჭირდებათ სათადარიგო ნაწილები, ტექნიკური მხარდაჭერა, შეკეთების შესაძლებლობები. ამიტომ, დიახ, ჩვენ უნდა ვიმსჯელოთ, სად არის ახალი პლატფორმების საჭიროება, თუმცა ასევე უნდა უზრუნველვყოთ, რომ ყველა პლატფორმა მუშაობდეს, როგორც საჭიროა, ეს არის უზარმაზარი ამოცანა. ეს საკითხი ასევე ხვალ რამშტაინის შეხვედრაზეც განიხილება“, -განაცხადა სტოლტენბერგმა. იენს სტოლტენბერგმა და ვოლოდიმირ ზელენსკიმ უკრაინის თავდაცვის საკითხებზე, ვილნიუსში ნატო-ს მომდევნო სამიტსა და ხვალ დაგეგმილ რამშტაინის შეხვედრაზე ისაუბრეს. ეს ომის დაწყების შემდეგ ნატო-ს გენერალური მდივნის პირველი ვიზიტია უკრაინაში. 1ტვ

1-ელი ივლისიდან, სოციალურად დაუცველი ბავშვები, ყოველთვიური დახმარების სახით, 200 ლარს მიიღებენ. გაზრდილ დახმარებას დაახლოებით, 230 000-ზე მეტი ბავშვი მიიღებს, - ამის შესახებ ჯანდაცვის მინისტრის მოადგილემ, თამარ ბარკალაიამ განაცხადა. მინისტრის მოადგილემ სტატისტიკის ეროვნული სამსახურის მიერ გაეროს ბავშვთა ფონდის მხარდაჭერით ჩატარებული ბავშვთა კეთილდღეობის კვლევა შეაფასა და აღნიშნა, რომ ბოლო წლებში განხორციელებული ცვლილებები მიმართულია ბავშვთა კეთილდღეობის გაზრდაზე, ოჯახების გაძლიერებასა და სოციალურ-ეკონომიკური მდგომარეობის გაუმჯობესებაზე. მისივე განცხადებით, გამოწვევები რჩება, რომელთა დასაძლევად ხელისუფლება აქტიურად მუშაობს. „2022 წელს, სოციალურად დაუცველ ბავშვთა ფულადი დახმარება 50 ლარით გაიზარდა და 150 ლარი შეადგინა. 2023 წლის 1-ელი ივლისიდან, სოციალურად დაუცველი ბავშვები, ყოველთვიური დახმარების სახით, 200 ლარს მიიღებენ. პროგრამის ბიუჯეტი 500 მილიონი ლარია. გაზრდილ დახმარებას კი, დაახლოებით, 230 000-ზე მეტი ბავშვი მიიღებს. გაიზარდა შშმ ბავშვებისა და მკვეთრად გამოხატული შშმ პირების სოციალური გასაცემელიც. 2023 წლიდან, მკვეთრად გამოხატული შეზღუდული შესაძლებლობის სტატუსის მქონე პირებისა და შშმ სტატუსის მქონე ბავშვებისთვის, სოციალური პაკეტი 65 ლარით გაიზარდა და 340 ლარით განისაზღვრა. ბავშვთა კეთილდღეობა სახელმწიფოს ერთ-ერთი პრიორიტეტია. ამ მიმართულებით მნიშვნელოვანი ცვლილებები განხორციელდა. საზოგადოებისთვის ცნობილია, რომ მსგავსი ტიპის სოციალური გასაცემელი 2012 წლამდე არ არსებობდა, დღეს მნიშვნელოვანი პროგრესი გვაქვს“, - განაცხადა თამარ ბარკალაიამ. ინფორმაციას ჯანდაცვის სამინისტრო ავრცელებს. იპნ

საქართველოს ბანკი, როგორც ძლიერი კერძო ფინანსური ინსტიტუტი აგრომიმართულებით პროექტების აქტიური მხარდამჭერია. სწორედ ამ მიზნით, ბანკთან პარტნიორობით, კომპანია „აგრითაჩი“ მცირე და საშულო ზომის აგრობიზნესებს კვალიფიციურ კონსულტაციას გაუწევს და მათ საჭიროებებზე მორგებულ მომსახურებას შესთავაზებს. კომპანია „აგრითაჩი“ ბაზარზე 2018 წლიდან ოპერირებს და საქართველოში მოქმედ მცირე და საშუალო ზომის ბიზნესებს დახმარებას აგრო კონსულტაციის, მეურნეობის მენეჯმენტისა და ექსპორტის განვითარების მიმართულებით უწევს. ამ პროცესში მათი ძირითადი აქცენტი სოფლის მეურნეობაში არსებულ იმ გამოცდილებასა და ინოვაციურ მიდგომებზე კეთდება, რაც მეურნეობის წარმადობასა და მის მომგებიანობას ზრდის. „2017 წლიდან, კომპანია ბაზარზე იყო პირველი, რომელმაც მოცვის ექსპორტი აზიის ბაზარზე სამი ექსპერიმენტული ბაღიდან განახორციელა. ამის შემდეგ, გლობალურმა მოთხოვნამ გვიბიძგა, აღნიშნული სექტორი კიდევ უფრო განგვევითარებინა. მივხვდით, რომ ქვეყანაში დადგა მაღალი ხარისხის ლურჯი მოცვის ნერგების მიწოდებისა და დარგვის შემდგომი რეკომენდაციის გაცემის საჭიროება. სწორედ ამიტომ, გადავწყვიტეთ ფერმერებისთვის კონსულტაციის გაწევა. ჩვენი კომპანია მწარმოებლებს კონსულტაციას შემდეგი მიმართულებით სთავაზობს: ბიუჯეტირება და ფინანსური ანალიზი; ნერგების შერჩევა, საირიგაციო მომსახურება, მექანიზმის განსაზღვრა; სახარჯი მასალების მოძიება და შესყიდვა; საგრანტო და საბანკო დოკუმენტაციის მომზადება; ბაღის მენეჯმენტი; სარეალიზაციო არხების მოძიება, სამაცივრე მეურნეობის მოწყობა და სხვა მრავალი. დარგის განვითარებაში საკმაოდ დიდი წვლილი გვაქვს შეტანილი, რაზეც საქართველოში ასეულობით ჰა-ზე გაშენებული ლურჯი მოცვის ბაღი და სხვადასხვა ბაზარზე განხორციელებული ექსპორტი მეტყველებს. „აგრითაჩი“ წლებია თანამშრომლობს ისეთ ცნობილ სანერგე მეურეობებთან, როგორებიცაა: Polka borowka, De Kemp, Plant 365, FallCreek. ასევე ვთანამშრომლობთ ქოთნების მწარმოებელ კომპანია San San-თან. კომპანია „აგრითაჩი“ არის International Blueberry Organization-ის ერთადერთი წევრი საქართველოდან“, - აღნიშნავს კომპანია „აგრითაჩის“ დამფუძნებელი და დირექტორი, ეკატერინე ვეფხვაძე. „საქართველოს ბანკისთვის ერთ-ერთ მნიშვნელოვან ფაქტორს აგროსექტორის მხარდაჭერა წარმოადგენს. სწორედ ამიტომ, აღნიშნული ინიციატივის ფარგლებში, ჩვენთან პარტნიორობით, კომპანია „აგრითაჩი“ მცირე და საშუალო ზომის ბიზნესებს ეხმარება, როგორც საკონსულტაციო მიმართულებით, ასევე ბაღის გაშენებისა თუ მოვლის მხრივ. ეს მათ შესაძლებლობას აძლევს, აგრომიმართულებით მიიღონ ის სიღრმისეული ცოდნა, რაც ფერმერისთვის აუცილებელი და მნიშვნელოვანია. მიღებული ცოდნით ისინი მომავალში შეძლებენ ახალი საწარმოების გახსნას, სხვა ბიზნესებისთვის დახმარების გაწევასა და საკუთარი გამოცდილების გაზიარებას. რაც კიდევ უფრო მეტად განავითარებს და გააძლიერებს სოფლის მეურნეობას“, - აღნიშნავს საქართველოს ბანკის აგრო პროდუქტების განვითარების ხელმძღვანელი, ალექსანდრე მელქაძე. ცნობისთვის, კომპანია „აგრითაჩი“ ადგილობრივ მწარმოებლებს საკუთარი პროდუქციის ექსპორტზე გატანის, გაყიდვისა და შემოსავლის ზრდის მიზნით დახმარებას ბაზრის განვითარებისა და ლოგისტიკის მიმართულებითაც უწევს. ამ ეტაპზე კომპანიას ექსპორტი განხორციელებული აქვს როგორც კატარში, ასევე არაბთა გაერთიანებულ საამიროებში, ჰონგ კონგში, ბაჰრეინში, პოლონეთში და ა.შ. (რ) BM.GE

ფრთხილად იყავით, გვჭირდებით, – ასე მიმართა უკრაინის პრეზიდენტმა, ვოლოდიმირ ზელენსკიმ ნატო-ს გენერალურ მდივან იენს სტოლტენბერგს, რომელმაც კიევში პრესკონფერენციის დაწყებისას, სადენებს ფეხი წამოჰკრა და წაბორძიკდა. ნატო-ს გენერალური მდივანი იენს სტოლტენბერგი კიევში დღეს ჩავიდა. იენს სტოლტენბერგის ვიზიტი დაანონსებული არ ყოფილა. ავტორი - ქეთი ჩოხელი

დანია და ნიდერლანდები უკრაინას გერმანული წარმოების „ლეოპარდ 2-ის“ ტიპის 14 ტანკს გადასცემენ. ამის შესახებ დანიის თავდაცვის მინისტრის მოვალეობის შემსრულებელმა ტროელს ლუნდ პოულსენმა განაცხადა. მისი თქმით, ეს თანამედროვე ტანკები უკრაინაში 2024 წლის დასაწყისში ჩავა. ამავე დროს, დანია უკრაინის შეიარაღებულ ძალებს „ლეოპარდ 1-ის“ მოდელის ასამდე ტანკს გადასცემს. აქედან 80 ტანკი უკრაინის შეიარაღებული ძალების განკარგულებაში წლის ბოლომდე იქნება. „დანიის ხელისუფლება მიისწრაფვის იმისკენ, რომ ჩვენი ქვეყნის სიდიდის გათვალისწინებით, ჩვენ ვიყოთ ერთ-ერთი უმსხვილესი დონორი, რადგან ძალიან მნიშვნელოვანია, უკრაინაში ჩვენი მეგობრები მაქსიმალურ მხარდაჭერას იღებდნენ“, – განაცხადა მინისტრმა. 1ტვ

საქართველოს პარლამენტის საპროცედურო საკითხთა კომიტეტის თავმჯდომარის, ირაკლი ქადაგიშვილის განცხადებით, მოსამართლეებთან დაკავშირებით კელი დეგნანის გუშინდელმა განცხადებამ ხალხს დაანახა, რომ აშშ-ის მხრიდან მოსამართლეების დასანქცირების ინიციატორი ელჩი დეგნანი ყოფილა. მისივე თქმით, ეს ინიციატივა სასამართლო სისტემაში პოლიტიკური ჩარევის წახალისებას ემსახურება. „ამ განცხადებამ დაგვანახა, რომ სავიზო შეზღუდვის სანქციის ინიციატორი ყოფილა ელჩი დეგნანი. მან ეს პირადად განაცხადა. ასევე განაცხადა, რომ მან მხოლოდ და მხოლოდ საჯარო წყაროებით იხელმძღვანელა, ანუ მედიაში გამოქვეყნებული გარკვეული ინფორმაციით, რომელთა უკან არაფერი იყო ნათქვამი, რამდენად არის სანდოობა, რამდენად არის ფაქტებით გამყარებული ან რამდენად შეესაბამება რეალობას, როდესაც საუბარია კორუფციულ ბრალდებაზე. საქართველოს მედია ისეთი დონის პლურალიზმით, მასალების სიჭრელით, სიმრავლით გამოირჩევა, რომ თუ ჩვენი მედიის ან რომელიმე ექსპერტის განცხადების საფუძველზე შეიძლება ნებისმიერ ადამიანს რამე ვერდიქტი გამოვუტანოთ, მერწმუნეთ, საქართველოში არც ერთი მოქალაქე არ დარჩება, რომელიც სანქციებს ასცდება, თუ ვინმე ამას მოინდომებს. მიმაჩნია, რომ ქალბატონი ელჩის ინიციატივა სინამდვილეში, მოემსახურა არა სასამართლო სისტემის მდგრადობისა და შემდგომი განვითარების რეფორმირების საკითხს, არამედ უფრო მოემსახურა სასამართლო სისტემაში პოლიტიკური ჩარევის წახალისებას. ასეთი ნაბიჯით კიდევ უფრო გაიზარდა შიდა პოლიტიკური რადიკალიზმი და პოლარიზაცია 12 რეკომენდაციის შესრულების პროცესში“, – განაცხადა ირაკლი ქადაგიშვილმა. ამასთან, ქადაგიშვილს კითხვით მიმართეს, არის თუ არა ორმაგი სტანდარტი, როდესაც მოსამართლეების დასანქცირების პარალელურად, ელჩი დავით კეზერაშვილს არ აკრიტიკებს. „ამის შთაბეჭდილება აშკარად იკვეთება და ეს ყოველთვის ძალიან ცუდია. ასეთი დიდი პარტნიორი ქვეყნის ელჩის მხრიდან ორი ურთიერთგამომრიცხავი განცხადება, ქმედება საზოგადოებაში გარკვეულ უკმაყოფილებას, გაუგებრობას იწვევს, რაც საქართველოსა და ამერიკის შეერთებულ შტატებს შორის ურთიერთობისთვის დაუშვებელია“, – აღნიშნა ქადაგიშვილმა. საქართველოში აშშ-ის ელჩმა, კელი დეგნანმა დავით კეზერაშვილთან დაკავშირებით გუშინ განაცხადა: „კეზერაშვილმა გაავრცელა განცხადებები, რომლებშიც უარყოფს ბრალდებებს. ცხადია, მეტი ინფორმაცია და სამართლებრივი პროცესია საჭირო. დარწმუნებული ვარ, ასე იქნება“. ავტორი - მანანა დევაძე

როდესაც მოქმედმა მოსამართლემ, ლაშა ჩხიკვაძემ გააკეთა განცხადება, რომ მასზე ზეწოლა იყო, უკანონო კომუნიკაცია განხორციელდა, რატომ მაშინ არ შეიქმნა საგამოძიებო კომისია? რატომ არ დაინტერესდა აშშ, გაერკვია მისი კანონიერი წარმომადგენლის ქმედების კანონიერება? – ამის შესახებ იუსტიციის უმაღლესი საბჭოს მოსამართლე წევრმა, დიმიტრი გვრიტიშვილმა „იმედს“ განუცხადა. მისივე თქმით, საპარლამენტო კონტროლი არ შეიძლება, მოიცავდეს სასამართლო ხელისუფლების გაკონტროლებას. „სამართლებრივ პრობლემასაც ვხედავ. საქართველო არის დემოკრატიული რესპუბლიკა. აქ რეალიზებულია სახელმწიფოს დანაწილების პრინციპი, რაც ნიშნავს იმას, რომ ერთი სახელისუფლებო შტო არ არის უფლებამოსილი, გააკონტროლოს მეორე სახელისუფლებო შტო. ანუ, საპარლამენტო კონტროლი არ შეიძლება, მოიცავდეს სასამართლო ხელისუფლების გაკონტროლებას. ამ შემთხვევაში, როდესაც საუბარია პოლიტიკოსების მხრიდან საგამოძიებო კომისიის შექმნაზე, რაღაც შოუს ელემენტებს ვხედავ, საზოგადოების დასანახად რაღაც მასკარადის მოწყობას, ამ საგამოძიებო კომისიის ფარგლებში დაიბარონ მოსამართლეები და მოითხოვონ მათგან ანგარიში მათ მიერ გაწეულ საქმიანობაზე; ვხედავ, რომ ხელყოფილი იქნება ზუსტად ეს ფუძემდებლური პრინციპი ხელისუფლების დანაწილების, რამეთუ სასამართლო ხელისუფლება არ შეიძლება იყოს ამ ფორმით საპარლამენტო კონტროლის ადრესატი. როდესაც მოქმედმა მოსამართლემ, ლაშა ჩხიკვაძემ გააკეთა განცხადება, რომ მასზე ზეწოლა იყო, უკანონო კომუნიკაცია განხორციელდა, რატომ მაშინ არ შეიქმნა ასეთი საგამოძიებო კომისია? რატომ არ დაინტერესდა აშშ, გაერკვია მისი კანონიერი წარმომადგენლის ქმედების კანონიერება? უპირველესი ოპოზიციური კანდიდატი მომავალ საპრეზიდენტო არჩევნებში, რომელსაც აშშ-ში მრავალმილიონიანი მხარდაჭერა აქვს, აკეთებს განცხადებას, რომ სასამართლო არის კორუმპირებული და პოლიტიზებული. მაშინ რატომ იქ არ იქმნება მსგავსი საგამოძიებო კომისიები?“ – განაცხადა გვრიტიშვილმა. 1ტვ

უნგრეთმა უკრაინიდან მარცვლეულის გარდა თაფლისა და გარკვეული ხორცპროდუქტების იმპორტიც აკრძალა, - ამის შესახებ უნგრეთის პრემიერ-მინისტრის აპარატის უფროსმა, გერგლი გულიაშმა განაცხადა. მისი თქმით, უნგრეთის მიერ მარცვლეულისა და სოფლის მეურნეობის პროდუქტების იმპორტზე დაწესებული აკრძალვა 25 პროდუქტს მოიცავს, რომელთაგან ყველაზე მნიშვნელოვანია მარცვლეული, რაფსის და მზესუმზირის თესლი, ფქვილი, ზეთი, თაფლი და გარკვეული ხორცპროდუქტები“. იმპორტზე დაწესებული აკრძალვა 30 ივნისამდე იმოქმედებს. ცნობისათვის, მას შემდეგ რაც ცენტრალური ევროპის ზოგიერთმა ქვეყანამ უკრაინიდან საკვები პროდუქტების იმპორტის აკრძალვის გადაწყვეტილება მიიღო, ევროკომისიამ განაცხადა, რომ ხორბლის, სიმინდის, მზესუმზირის და რაფსის თესლთან დაკავშირებით პრევენციულ ზომებს მიიღებს. Reuters-ის ინფორმაციით, ევროკავშირი უკრაინული მარცვლეულის იმპორტის შედეგად უკრაინის მეზობელი ხუთი ქვეყნის დაზარალებული ფერმერებისთვის კომპენსაციის სახით 100 მილიონი ევროს გამოყოფს. ასევე იგეგმება უკრაინული მარცვლეულის იმპორტზე შეზღუდვების შემოღება. ინტერპრესნიუსი

სახალხო დამცველის, ლევან იოსელიანის განცხადებით, საზოგადოება იმსახურებს, რომ კითხვები, რომლებიც სასამართლო სისტემასთან დაკავშირებით არსებობს, საგამოძიებო კომისიის ფარგლებში დაისვას. მისი თქმით, ამ პროცესებს გამჭვირვალობა და ღიაობა წაადგება. „თქვენ იცით, რომ დღეს ერთ-ერთი მნიშვნელოვანი საკითხი მოსამართლეებთან დაკავშირებული თემაა. ამ საკითხის პარლამენტში გარკვევა მეც მიმაჩნია, რომ მნიშვნელოვანია. მესმის ეს პროცედურული ომი, რომელიც მმართველ პარტიასა და ოპოზიციას შორის მიმდინარეობს, მაგრამ ვფიქრობ, საზოგადოება იმსახურებს, რომ ის კითხვები, რომლებიც საზოგადოებაში არსებობს, საგამოძიებო კომისიის ფარგლებში დაისვას. პროცესს გამჭვირვალობა და ღიაობა წაადგება. თუ რამე კითხვის ნიშნები არსებობს ერთი ან მეორე მხარის მიმართ, ამ გზით კითხვებზე პასუხი გაცემული იქნება”, - განაცხადა იოსელიანმა. ინტერპრესნიუსი

საქართველოს სტატისტიკის ეროვნული სამსახურის მიერ გაეროს ბავშვთა ფონდის მხარდაჭერით ჩატარებული ბავშვთა კეთილდღეობის 2022 წლის კვლევის თანახმად, საქართველოში ბავშვების 38% მატერიალურ და სოციალურ დანაკლისს განიცდის. კვლევის მიხედვით, სოფლად მცხოვრებ ბავშვებში 7-ჯერ და მეტად მაღალია ალბათობა იმისა, რომ ხელი სკოლამდელ განათლებაზე არ მიუწვდებოდეთ, ვიდრე ქალაქში მაცხოვრებელ ბავშვებში. „სკოლამდელი ასაკის ბავშვების 28% საბავშვო ბაღში არ დადის. მათგან, ბავშვების 22% მშობლის არჩევანის საფუძველზე არ დადის, ხოლო 6% - ბარიერების გამო. ყველაზე გავრცელებული ბარიერებია ზოგიერთ სოფელში სკოლამდელი დაწესებულებების არარსებობა და ბავშვის მომლოდინეთა სიაში მოთავსება. 2021-2022 სასწავლო წელს, 6-17 წლის ასაკის ბავშვების 98% სკოლას, უნივერსიტეტს ან/და პროფესიულ განათლებას ესწრებოდა, ხოლო ბავშვების 2%-ამდე განათლების სისტემის მიღმა იყო დარჩენილი. კერძო მასწავლებლების მომსახურებას იყენებს 6-17 წლის ასაკის ბავშვების 19% და ამდენივეს სურს, მაგრამ ვერ ახერხებს, აღნიშნული სერვისით ისარგებლოს. კერძო მასწავლებლების მომსახურების მიღების ყველაზე გავრცელებული ბარიერი ფინანსების ნაკლებობაა, რომელიც შემთხვევების 87%-შია აღნიშნული. საგანმანათლებლო მასალების ნაკლებობა მნიშვნელოვანი პრობლემაა; ბავშვების 45%-ს არ აქვს ერთი საგანმანათლებლო ნივთი მაინც, რომელიც ისურვეს, მაგრამ ხელი არ მიუწვდებათ. საგანმანათლებლო ნივთები, რომლებიც ბავშვებს ყველაზე ხშირად აკლიათ არის ლეპტოპები/კომპიუტერები (29%) შემდეგ სახატავი მასალები, წიგნები და მუსიკალური ინსტრუმენტები მოდის. მშობლების უმრავლესობა სკოლამდელი და სასკოლო განათლებისა და ჯანდაცვის მომსახურებით კმაყოფილია. გარდა ამისა, კვლევის მიხედვით, მნიშვნელოვანი გამოწვევაა სასკოლო პერიოდში კვებაც, რადგან ბავშვების ერთ მეოთხედზე ოდნავ მეტი (27%) სკოლაში საკვებს ყოველდღიურად იღებს, ხოლო 35% სკოლის პერიოდში არასდროს იკვებება. საკვების მიღების ბარიერები მატერიალური დანაკლისის მქონე ბავშვებს შორის უფრო მეტადაა გავრცელებული (45%) ვიდრე ასეთი დანაკლისის არმქონე ბავშვებს შორის (28%) სკოლაში საკვების მიღების ერთ-ერთი ყველაზე გავრცელებული ბარიერი სკოლის სიახლოვეს საკვები ობიექტის არარსებობაა (ეს მიზეზი დასახელდა შემთხვევების 36%-ში). ფინანსური ბარიერები ასევე მატერიალური დანაკლისის მქონე ბავშვების შემთხვევაშია დასახელებული, რომლებიც სასკოლო საათებში საერთოდ არ იკვებებიან. ასევე, ბავშვების 12%-მა საჭირო სამედიცინო მკურნალობა (სრულად ან ნაწილობრივ), ხოლო 5%-მა საჭირო მედიკამენტები ვერ მიიღო. ორივე შემთხვევაში ძირითადი ბარიერები ფინანსური იყო. „ბავშვების 62%-ის მშობლებმა/ოჯახის წევრებმა განაცხადეს, რომ ბავშვების აღზრდის მხოლოდ არაძალადობრივ მეთოდებს იყენებენ. ფსიქოლოგიური აგრესია, როგორიცაა ყვირილი და ბავშვისთვის დამამცირებელი სახელების წოდება ბავშვების 29%-ის შემთხვევაში დაფიქსირდა, ხოლო ბავშვების 5% ფიზიკურ დასჯას დაექვემდებარა, როგორიცაა ცემა, სილის გაწნა, ყურის აწევა ან დარტყმა. სასტიკი ფიზიკური დასჯა, მაგალითად - მთელი ძალით ცემა, ბავშვების ერთ%-ზე ნაკლებს შეეხო”,- აღნიშნულია კვლევაში. იხილეთ კვლევა სრულად: https://uni.cf/3mEQ8Al

ამერიკული როკჯგუფი Imagine Dragons 31 აგვისტოს თბილისში, მიხეილ მესხის სტადიონზე კონცერტს გამართავს. გარდა ამისა,უცხოელი შემსრულებლების კონცერტები აგვისტოში კიდევ რამდენიმე ლოკაციაზე, მათ შორის „ბლექ სი არენაზეც“ იგეგმება. კერძოდ, თავად "ბლექ სი არენას" ინფორმაციით, აგვისტოში კონცერტები შემდეგი გრაფიკით ჩატარდება: NILE RODGERS & CHIC - 5 აგვისტო (Black Sea Arena) FKJ - 6 აგვისტო (Black Sea Arena) Damian Lazarus - 10 აგვისტო (The Social Space) THE KILLERS - 15 აგვისტო (Black Sea Arena) All Day I Dream - 18 აგვისტო (The Social Space) Imagine Dragons - 31 აგვისტო (მიხეილ მესხის სტადიონი). უცხოელი შემსრულებლების, მათ შორის Imagine Dragons-ის კონცერტზე დასასწრებად ბილეთების შეძენა 24 აპრილიდან ვებ-გვერდ BSA.ge -ზე იქნება შესაძლებელი. ინტერპრესნიუსი

16 აპრილის შემდეგ პირველი ღამე იყო, როცა მშვიდად ეძინათ ჩვენს თანამშრომლებს, იქიდან გამომდინარე, რომ ფაქტობრივად შეწყვეტილია მოკლევადიან პერიოდში სროლები, – ამის შესახებ ავიაკომპანია „მაივეი ეარლაინსის“ გენერალურმა, დირექტორმა, რატი ბაკურაძემ განაცხადა. ბაკურაძის თქმით, ამ დროისთვის ავიაკომპანიის თანამშრომლებს საკვების მარაგი აქვთ. „ერთადერთ პრობლემად რჩება, რომ ელექტროენერგია არ მიეწოდებათ, არ არის დიზელის მიწოდება, რადგან ჩახერგილია გზები და რისკი იყო გადაადგილება. პარტნიორებთან გვაქვს მოლაპარაკება, რომ თუ შესაძლებელი იქნება, მიაწოდონ საწვავი. საჭმელი და წყალი მომარაგებულია და არსებობს გარკვეული მარაგი. გვინდა, რომ სწრაფად აღვუდგინოთ ელექტროენერგიის მიწოდება, საჭიროა, შეივსოს დიზელგენერატორი საწვავით, რომ მათ მოახერხონ ტელეფონების დატენვა მაინც. იქ ახლა ძალიან ცხელა, 40 გრადუსზე მეტია ტემპერატურა, ფანჯრებს ვერ აღებენ, უსაფრთხოების ნორმებს იცავენ და მოშორებით დგანან ფანჯრებიდან. არადასალევი წყლის მიწოდებაც კი დენზეა დამოკიდებული რადგან ნასოსები მუშაობს იქ და როცა დენი არ არის, შესაბამისად დადგა ეს პრობლემაც. ამ დრომდე ჩვენი 13 თანამშრომელი რჩება ადგილზე“, – განაცხადა ბაკურაძემ. ავტორი - რეზი ხუციშვილი

ის, რაც ჩვენ ბოლო დღეებში ვიხილეთ, ეს არის სრული ავტოკრატიის გაფორმება საქართველოს პარლამენტში - ოპოზიციამ პერმანენტულად უნდა აჩვენოს ერთიანობა, იმიტომ, რომ ოლიგარქი შეშინებულია. როგორც იტყვიან მეფე შიშველია, - ამის შესახებ საკონსტიტუციო სასამართლოს ყოფილმა თავმჯდომარემ, პარტია "საქართველოსთვის" წევრმა, ზაზა თავაძემ „პალიტრანიუსის“ გადაცემა „ნიუსრუმში“ განაცხადა. მისივე თქმით, „ქართული ოცნების“ დამფუძნებელმა, ბიძინა ივანიშვილმა ბოლო რესურსი გამოიყენა იმისთვის, რომ იმ "კორუფციულ სინდიკატს გადაჰფარებოდა", რომლის ორგანიზატორიც თავად არის. ამასთან, როგორც ზაზა თავაძე აღნიშნავს, „ქართული ოცნება“ ამერიკის შეერთებული შტატების სახელმწიფო დეპარტამენტის მიერ დასანქცირებულ ოთხ ქართველ მოსამართლეს იმიტომ „ეფარება“, რომ მოსამართლეები ბიძინა ივანიშვილს აშანტაჟებენ. „მე პარლამენტში ორჯერ ხელოვნურად შეჩერებულ პროცესს დემოკრატიის კიდევ ერთ უკუსვლას დავარქმევდი. ფაქტობრივად, „ქართულმა ოცნებამ“ მათი მმართველი ოლიგარქის დავალებით, "კლანზე" გადაფარებით, ბოლო რესურსებს მოუხმო და მათ თვითლუსტრაციაც გააკეთეს, რომ ისინი მათზე [მოსამართლეებზე] არიან ამბრაზურასავით გადაფარებულები. ისმის კითხვა, რატომ? იმიტომ, რომ ისინი აშანტაჟებენ ოლიგარქს, რომ ისინი დაიწყებენ იმ ბნელ საქმეებზე ლაპარაკს, რაც აქვთ გაკეთებული, რა თქმა უნდა, არაკანონიერად. ამით აშანტაჟებენ ოლიგარქს და ოლიგარქიც ფიქრობს, რომ თუ ეს ასე განხორციელდა, მისი ხელისუფლება შეირყევა. არადა, რეალურად, ეს ხელისუფლება შერყეულია. ის, რაც ჩვენ ბოლო დღეებში ვიხილეთ, ეს არის სრული ავტოკრატიის გაფორმება საქართველოს პარლამენტში,“ - აღნიშნა თავაძემ. მისივე თქმით, დღეს საქართველოში ავტოკრატია ბობოქრობს და ეს დასასრულებელია. „დაახლოებით ორი წელია ვსაუბრობთ, რომ ისინი გასული არიან კონსტიტუციის ფარგლებიდან, გასული არიან რეგლამენტის ჩარჩოებიდან, ისინი საქართველოს კანონმდებლობას ტოტალურად არღვევენ. რა უნდა დაუპირისპიროს ამას ოპოზიციამ? ოპოზიციამ პერმანენტულად უნდა გააგრძელოს ასეთი ქმედებები, ერთიანობა უნდა აჩვენოს, იმიტომ, რომ ოლიგარქი შეშინებულია. როგორც იტყვიან, მეფე შიშველია. მან ბოლო რესურსი გამოიყენა იმისთვის, რომ გადაჰფარებოდა ამ კორუფციულ სინდიკატს, რომლის ორგანიზატორიც თვითონ არის. ამ ნაბიჯზე მოუწია წასვლა, იმიტომ, რომ მან დაინახა ოპოზიციის სიძლიერე, ოპოზიციის ერთობა და ეს უნდა გაგრძელდეს,“ -განაცხადა ზაზა თავაძემ. ამასთან, როგორც თავაძე აღნიშნავს, ოპოზიციამ თავის დროზე სიები ძალიან არაგონივრულად ჩახსნა და დღეს სწორედ ამის შედეგებს ვიმკით. „მინდა გავიხსენო ის პერიოდი, როდესაც ოპოზიციურმა პარტიებმა თავიანთ მანდატებზე ძალიან არაგონივრულად თქვეს უარი და ჩახსნეს სიები. დღეს ჩვენ ზუსტად ვიმკით ამ შედეგებს და „ქართულ ოცნებას“ ვაძლევთ იმის საშუალებას, რასაც აკეთებენ - აფორმებენ ფაქტობრივად, ავტოკრატიას. დამერწმუნეთ, აქ რომ იყოს უფრო მეტი ოპოზიციონერი, თუნდაც 5-ით, თუნდაც 10-ით, უფრო დიდი ძალა იქნებოდა, უფრო მარტივი იქნებოდა ამ ხელოვნურად შექმნილი ბარიერის გადატეხა და გადალახვა,“ - აღნიშნა თავაძემ. ინტერპრესნიუსი

რიკოთზე მიმდინარე სამშენებლო სამუშაოებზე დასაქმებულთა ნაწილი მეორე დღეა გაფიცულია. ავტობანის მშენებლობაზე დასაქმებული მძღოლები დაბალ ხელფასს და არასათანადო სამუშაო პირობებს აპროტესტებენ. მათი განცხადებით, მინიმალურ ანაზღაურებაზე მუშაობენ და არ არის დაცული უსაფრთხოება. „ჩინეთის სამშენებლო კორპორაციის“ მძღოლები გუშინ გაიფიცნენ. მათი თქმით, გაფიცვას მოთხოვნების შესრულებამდე არ შეწყვეტენ. კომპანიის პრესსამსახურში აცხადებენ, რომ კომენტარს მოთხოვნების გაცნობამდე ვერ გააკეთებენ. gurianews.ge

ევროკავშირის წარმომადგენლობა და ევროპის საბჭო საქართველოში 2023-2027 წლებში განსახორციელებელ ახალ პროექტებს იწყებენ. როგორც აღინიშნა, ოთხი ახალი პროექტი „პარტნიორობა კარგი მმართველობისთვის“ მესამე ეტაპის ფარგლებში განხორციელდება, რომლის ბიუჯეტი 3 მილიონ ევროს შეადგენს. ევროკავშირის წარმომადგენლობის განცხადებით, ახალი პროექტები პროგრამის წინა ეტაპების შედეგების საფუძველზეა შემუშავებული და მისი მიზანია, დაეხმაროს ხელისუფლებას მართლმსაჯულების დამოუკიდებლობის გაძლიერებასა და სასამართლოს მენეჯმენტის მოდერნიზაციაში, მხარი დაუჭიროს სიძულვილის ენის წინააღმდეგ ბრძოლას, ხელი შეუწყოს ინსტიტუციური და ოპერატიული ჩარჩოების გაძლიერებას და ბრძოლას კორუფციის, ფულის გათეთრებისა და ტერორიზმის დაფინანსების წინააღმდეგ. გარდა ამისა, პროგრამა ხელს შეუწყობს საქართველოს თანხვედრას ქვეყნის ევროპული პერსპექტივის დღის წესრიგთან. ამასთან, ევროკავშირის წარმომადგენლობაში განმარტავენ, რომ დამატებით, რეგიონულ დონეზე განხორციელდება სამი პროექტი, რომელშიც საქართველოც მონაწილეობს და ის მოიაზრებს ეკონომიკურ დანაშაულთან ბრძოლას, თანასწორობის ხელშეწყობას, დისკრიმინაციასთან ბრძოლასა და ქალთა მართლმსაჯულების ხელმისაწვდომობის მხარდაჭერას. პრეზენტაცია დღეს ადგილობრივი მმართველი კომიტეტის პირველ სხდომაზე გაიმართა. „დღევანდელი ღონისძიება არის ორგანიზებული საქართველოში ევროკავშირისა და ევროსაბჭოს მიერ, დისკრიმინაციის წინააღმდეგ ბრძოლასთან, სასამართლო სისტემის რეფორმის ხელშეწყობასა და კორუფციის წინააღმდეგ ბრძოლასთან დაკავშირებით ხელისუფლებისა და საზოგადოების ძალისხმევის მხარდასაჭერად. რაც შეეხება სისხლის სამართლის და სისხლის სამართლის საპროცესო კოდექსების რეფორმას, ინტენსიურად ვმუშაობთ საქართველოს ხელისუფლებასთან. ჩვენ წარვუდგინეთ საექსპერტო დასკვნა პარლამენტს და ველოდებით, რომ ეს მნიშვნელოვანი კანონპროექტები მიღებული იქნება ადამიანის უფლებათა ევროპული პრეცედენტული სამართლის და ვენეციის კომისიის შეფასებების შესაბამისად. რაც შეეხება დისკრიმინაციის წინააღმდეგ ბრძოლას, ჩვენ ვმუშაობთ სხვადასხვა პარტნიორთან ქართულ საზოგადოებაში ცნობიერების ასამაღლებლად. ჩვენ ვმუშაობთ უმცირესობის სხვადასხვა ჯგუფთან და ეს არის ის მნიშვნელოვანი ასპექტი, რასაც ვაკეთებთ საქართველოში. გენდერული ძალადობა ჯერ კიდევ რჩება მნიშვნელოვან საკითხად საქართველოში და ის უნდა იყოს ევროსაბჭოს სტამბულის კონვენციასთან შესაბამისობაში მოყვანილი“, – განაცხადა ევროპის საბჭოს საქართველოს ოფისის ხელმძღვანელმა, ნატალია ვუტოვამ. შეხვედრას ესწრებოდა საქართველოს საგარეო საქმეთა სამინისტროს საერთაშორისო ორგანიზაციების დეპარტამენტის დირექტორი შალვა ცისკარიშვილი. „თანამშრომლობის ფორმატი ეფუძნება იმ პრიორიტეტულ მიმართულებებს, რომლებიც კონკრეტულად არის გაწერილი ევროპის საბჭოსთვის საქართველოს სამოქმედო გეგმასა და საქართველო-ევროკავშირის ასოცირების დღის წესრიგში და ხორციელდება კონკრეტული მნიშვნელოვანი მიმართულებების კუთხით, რაც განსაკუთრებით მნიშვნელოვანია დღეს საქართველოს ევროინტეგრაციის გზაზე“, – აღნიშნა შალვა ცისკარიშვილმა. ავტორი - თათია ტაბეშაძე

ადამიანის უფლებათა ევროპულმა სასამართლომ საქართველოს საჩივარი საქმეზე „საქართველო რუსეთის წინააღმდეგ“ ერთხმად დასაშვებად ცნო. გადაწყვეტილება საბოლოოა და შემდგომ ეტაპზე მას გადაწყვეტილება მოჰყვება. საქმე ეხება საქართველოს მიერ კონტროლირებად ტერიტორიასა და საქართველოს რეგიონებს, აფხაზეთსა და სამხრეთ ოსეთს შორის ადმინისტრაციულ სასაზღვრო ხაზებს გასწვრივ ადამიანის უფლებების მდგომარეობის სავარაუდო გაუარესებას. სარჩელი საქართველოს ხელისუფლებამ სტრასბურგის სასამართლოში 2018 წლის 22 აგვისტოს წარადგინა. ეს „საქართველო რუსეთის წინააღმდეგ“ სახელმწიფოთაშორისი მეოთხე განაცხადია. ავტორი - ქეთი ჩოხელი

ნატო-ს გენერალური მდივანი იენს სტოლტენბერგი მოულოდნელი ვიზიტით კიევში ჩავიდა, - ინფორმაციას უკრაინული მედია ავრცელებს. მათივე ინფორმაციით, იენს სტოლტენბერგი დღეს დილით კიევის ცენტრში, „მიხაილოვსკაიას მოედანზე“ მდებარე მემორიალთან მივიდა და დაღუპული უკრაინელი ჯარისკაცების ხსოვნას პატივი მიაგო. მედიის ცნობით, ნატო-ს გენერალური მდივანი უკრაინის პრეზიდენტთან, ვოლოდიმირ ზელენსკისთან მოლაპარაკებებს გამართავს. თუმცა, ვიზიტის დეტალური გეგმა ამ დროისთვის უცნობია. იენს სტოლტენბერგის უკრაინაში ვიზიტი, უსაფრთხოების დაცვის მიზნით, წინასწარ არ გამოცხადებულა. ინტერპრესნიუსი

სასამართლოსთან დაკავშირებულ საგამოძიებო კომისიას, როგორც ჩანს, დღის სინათლე არ უწერია, მაგრამ ხელისუფლებამ დაადასტურა, რომ ბევრი აქვს დასამალი, - ამის შესახებ პარტია „საქართველოსთვის“ წევრმა, დეპუტატმა ანა ბუჩუკურმა განაცხადა. მისივე თქმით, ის, რასაც უმრავლესობა ორი დღის განმავლობაში აკეთებდა, არაკონსტიტუციურია. „ამ კომისიას როგორც ჩანს, დღის სინათლე არ უწერია. ამას ადასტურებს ღიად „ქართული ოცნება“, მაგრამ კომისია რომ შეიქმნას, შეიძლება იმაზე უკეთესი მტკიცებულება ვერ დავდოთ მაგიდაზე, ვიდრე გუშინ და გუშინწინ თავად „ქართულმა ოცნებამ“ გააკეთა, რომელმაც დაადასტურა, რომ დასამალი ძალიან ბევრი აქვს. ჩვენ ვიხილეთ ხელისუფლება, რომელსაც ეშინია, რომ მურუსიძე და ჩინჩალაძე ალაპარაკდებიან. ფაქტობრივად, რასაც „ქართული ოცნება“ აკეთებს, არის პირდაპირ ხელის შეშლა კონსტიტუციით გათვალისწინებული მანდატის გამოყენების პროცესში. შესაბამისად, ეს არაკონსტიტუციურია და ეს არ არის პროცედურული ომი,“ - განაცხადა ბუჩუკურმა. ამასთან, როგორც ოპოზიციონერმა დეპუტატმა აღნიშნა, მათ კომუნიკაცია აქვთ კოლეგებთან ე.წ. ქოლ-ცენტრების საქმესთან დაკავშირებით საგამოძიებო კომისიის შექმნაზეც. ბუჩუკური იმედს გამოთქვამს, რომ კომისიას მისი კოლეგების მხარდაჭერა ექნება. რაც შეეხება მიხეილ სააკაშვილთან დაკავშირებულ საკითხზე საგამოძიებო კომისიის შექმნას, კითხვაზე: გადახედავს თუ არა მათი გუნდი საკუთარ დამოკიდებულებას და დაუჭერს თუ არა ამ კომისიას მხარს, ბუჩუკური აცხადებს, რომ ჯერ მნიშვნელოვანია ამ საკითხზე სტრასბურგის სასამართლოს გადაწყვეტილებას დაელოდონ. „რაც შეეხება სააკაშვილის საკითხზე კომისიის შექმნას, ამაზე კომუნიკაცია მქონდა „ნაცმოძრაობის“ წარმომადგენლებთან და იციან ჩვენი დამოკიდებულება, რომ მნიშვნელოვანია დაველოდოთ, რას იტყვის სტრასბურგის სასამართლო. ამის შემდეგ ვნახოთ, რა იქნება დღის წესრიგში,“ - განაცხადა ბუჩუკურმა. ინფორმაციისთვის, პარლამენტის პლენარულ სხდომაზე კენჭისყრის პროცედურის დასაწყებად საჭირო კვორუმი ორჯერ არ შედგა, რადგან საპარლამენტო უმრავლესობა კენჭისყრის წინ რეგისტრაციას არ გადის. შესაბამისად, კენჭი ვერ ეყარა მოსამართლეებთან დაკავშირებით დროებითი საგამოძიებო კომისიის შექმნის საკითხს. იპნ

შეერთებულმა შტატებმა უკრაინის შეიარაღებული ძალებისთვის დახმარების ახალი, 325 მილიონი დოლარის ღირებულების პაკეტი გამოაცხადა. დახმარების პაკეტი მოიცავს HIMARS-ის საბრძოლო მასალებს, 155 მმ და 105 მმ-იან საარტილერიო ჭურვებს, TOW-ის ტიპის ტანკსაწინააღმდეგო მართვად რაკეტებს, АТ-4 ტიპის ტანკსაწინააღმდეგო ყუმბარმტყორცნებს, ტანკსაწინააღმდეგო ნაღმებს, 9 მილიონზე მეტ ვაზნას, ლოგისტიკური მხარდაჭერის 4 მანქანას, მაღალი სიზუსტის საავიაციო საბრძოლო მასალებს. ამასთან, დახმარების ახალი პაკეტის ფარგლებში უკრაინა მიიღებს: საკონტროლო და სადიაგნოსტიკო აღჭურვილობას სატრანსპორტო საშუალებების მოვლისა და შეკეთებისთვის, აღჭურვილობას პორტებისა და ნავსადგურების დაცვისთვის, სათადარიგო ნაწილებს და სხვა საველე აღჭურვილობას. „შეერთებული შტატები გააგრძელებს მუშაობას თავის მოკავშირეებთან და პარტნიორებთან, რათა უკრაინა უზრუნველყოს შესაძლებლობებით, რომელიც დააკმაყოფილებს ბრძოლის ველზე მის გადაუდებელ საჭიროებებს და უკრაინის უსაფრთხოებისთვის გრძელვადიანი დახმარების მოთხოვნებს“, - აღნიშნულია პენტაგონის განცხადებაში. palitra

20 აპრილს პლენარულ სხდომაზე პარლამენტი გარემოს დაცვისა და სოფლის მეურნეობის მინისტრს ოთარ შამუგიას მოუსმენს. ოთარ შამუგია პარლამენტში „მინისტრის საათის“ ფორმატში მივა. მოხსენების შემდეგ მინისტრი დეპუტატების კითხვებს უპასუხებს. "მინისტრის საათი" საპარლამენტო კონტროლის მექანიზმია, რომელიც წელიწადში ერთხელ, პარლამენტის პლენარულ სხდომაზე მინისტრების ანგარიშით გამოსვლას გულისხმობს. palitra

დიდუბის რაიონში, აკაკი წერეთლის გამზირისა და შოთა შალიკაშვილის სახელობის ხიდის რეაბილიტაცია დაიწყო. დაგეგმილი ინფრასტრუქტურული სამუშაოების გამო, წუხელ, 23:00 საათიდან წერეთლის გამზირზე საავტომობილო გადაადგილება ნაწილობრივ შეიზღუდა, კერძოდ, გამზირის ნაწილი ბარიერებით გაიმიჯნა. თბილისის მერიის ცნობით, მოძრაობა სავალი ნაწილის ორივე მხარეს მონაცვლეობით მოხდება აკაკი წერეთლის გამზირზე, გიორგი ცაბაძის ქუჩიდან შოთა შალიკაშვილის სახელობის ხიდის ჩათვლით. რეაბილიტაციის პერიოდში, ავტომობილებისა და საზოგადოებრივი ტრანსპორტის გადაადგილებისთვის აკაკი წერეთლის გამზირზე მოძრაობა ორმხრივი დარჩება, თითო მიმართულებისთვის გამოყოფილი იქნება მხოლოდ ერთი სამოძრაო ზოლი. „ავტომობილების მოძრაობა პერიოდულად შეიზღუდება საგურამოს, არჩილ ქურდიანის, ბათუმის, არჩილ კერესელიძის, სულიკო კოროშინაძისა და წყალტუბოს ქუჩებიდან წერეთლის გამზირის მიმართულებით და პირიქით. საგურამოს, არჩილ ქურდიანის და ბათუმის ქუჩებიდან ავტომობილები გადაადგილებას შეძლებენ, ვლადიმერ მაიაკოვსკის ქუჩიდან გიორგი ცაბაძის ქუჩის მიმართულებით. ასევე, დავით ყიფიანის ქუჩიდან, ვახუშტი ბაგრატიონის ქუჩის გავლით აკაკი წერეთლის გამზირის მიმართულებით. არჩილ კერესელიძის ქუჩიდან ავტომობილები გადაადგილებას შეძლებენ რაჟდენ გვენეტაძის ქუჩით, ან, რაფაელ აგლაძისა და ალექსი გოგოლაურის ქუჩების გამოყენებით, აკაკი წერეთლის გამზირის მიმართულებით. სულიკო კოროშინაძის ქუჩიდან ავტომობილები გადაადგილდებიან გოგოლაურის ქუჩის გავლით აკაკი წერეთლის გამზირის მიმართულებით. წყალტუბოს ქუჩიდან ავტომობილები იმოძრავებენ აგლაძის ქუჩის გავლით, როგორც მირცხულავას, ასევე, სამტრედიის ქუჩების გამოყენებით აკაკი წერეთლის გამზირის მიმართულებით. ამასთან, საჭიროების შემთხვევაში, პერიოდულად, ღამის საათებში, 00:00 საათიდან 07:00 საათამდე, გადაადგილება შეიზღუდება, როგორც გრიგოლ რობაქიძის გამზირიდან მარცხენა სანაპიროს მიმართულებით ჩამსვლელი ავტომობილებისთვის, ასევე, მარცხენა სანაპიროდან წერეთლის გამზირისკენ, დიდუბის ავტოსადგურის მიმდებარედ ამსვლელი ნაკადისთვის. აღნიშნული შეზღუდვის პერიოდში, ავტომობილები გადაადგილებას შეძლებენ ალტერნატიული გზის გამოყენებით, მარცხენა სანაპიროდან სამტრედიის ქუჩისა და წერეთლის გამზირის გავლით, შოთა შალიკაშვილის სახელობის ხიდისა და გრიგოლ რობაქიძის გამზირის მიმართულებით. ხოლო, გრიგოლ რობაქიძის გამზირიდან მარცხენა სანაპიროზე ჩამსვლელი ნაკადი გადაადგილებას შეძლებს აკაკი წერეთლის გამზირისა და სამტრედიის ქუჩების გამოყენებით. გიორგი ცაბაძის ქუჩიდან აკაკი წერეთლის გამზირისა და მარცხენა სანაპიროს მიმართულებით, ავტომობილების გადაადგილება დარჩება უცვლელი. სარეაბილიტაციო სამუშაოების სირთულიდან გამომდინარე, მიმდებარე ქუჩებიდან აკაკი წერეთლის გამზირის მიმართულებით მოძრაობა პერიოდულად შეიზღუდება, რის შესახებაც საზოგადოებას ინფორმაცია ეტაპობრივად მიეწოდება”, - ნათქვამია მერიის მიერ გავრცელებულ ინფორმაციაში.

მიზანი, რატომაც ოპოზიციას უნდა, ან უნდოდა ამ საგამოძიებო კომისიის შექმნა ისაა, რომ ის მიღწევები და რეფორმები დააზიანონ, რომელიც 12 - პუნქტიანი გეგმის შესასრულებლად ხორციელდება, მათ შორის, სასამართლო ხელისუფლების ნაწილში, - ამის შესახებ განათლებისა და მეცნიერების მინისტრმა, გიორგი ამილახვარმა ჟურნალისტებთან საუბრისას განაცხადა. მისივე თქმით, საქართველოს მთავრობამ და პარლამენტმა ევროკომისიის 12 - პუნქტიანი გეგმის თითქმის ყველა პუნქტი უკვე შეასრულა, მათ შორის, სასამართლოსთან დაკავშირებული საკითხები. რაც შეეხება სანქცირებულ მოსამართლეებს, როგორც ამილახვარი აღნიშნავს, არ ჰგონია, რომ „ვინმეს რამე დასაცავი ჰქონდეს“, მაგრამ მნიშვნელოვანია, ამერიკის შეერთებულმა შტატებმა წარმოადგინოს ის მტკიცებულებები, რატომაც ოთხი მოსამართლის დასანქცირების გადაწყვეტილება მიიღო. „საგამოძიებო კომისიას არანაირი საფუძველი და არანაირი დანიშნულება, რომელიც უნდოდა, რომ რადიკალურ ოპოზიციას შეექმნა, არ ჰქონდა რაიმეს გამოძიებასთან. პირიქით, საქართველოს მთავრობამ და პარლამენტმა 12 პუნქტიანი გეგმის თითქმის ყველა პუნქტი უკვე შეასრულა, მათ შორის, სასამართლოსთან დაკავშირებული საკითხები. ამიტომ, ერთ-ერთი მთავარი მიზანი რატომაც მათ უნდათ, ან უნდოდათ ამ საგამოძიებო კომისიის შექმნა ეს არის პირიქით - რომ დააზიანონ ის მიღწევები და რეფორმები, რომელიც საქართველოში 12 პუნქტიანი გეგმის შესასრულებლად ხორციელდება, მათ შორის, სასამართლო ხელისუფლების ნაწილში. რაც შეეხება სანქცირებულ მოსამართლეებს, მე არ მგონია, ვინმეს რამე დასაცავი ჰქონდეს. აქ არის ერთი მთავარი კითხვა, რომ ის ბრალდება, რომელიც მათ ერთ-ერთმა ქვეყანამ წაუყენა, ალბათ, ნათელი და კარგი იქნებოდა, რომ საჯაროდ საზოგადოებას ენახა ის საფუძვლები, რატომაც მიიღო შესაბამისმა მხარემ ეს გადაწყვეტილება. ეს არის ჩვენი და საზოგადოების საჯარო შეკითხვა", - განაცხადა ამილახვარმა. IPN