tvati

2021 წლის მონაცემებით, ქვეყანაში ფსიქიკური და ქცევითი აშლილობის მქონე 84 142 ადამიანია რეგისტრირებული. ამის შესახებ „ინტერპრესნიუსს“ დაავადებათა კონტროლის ეროვნული ცენტრიდან გამოთხოვილი საჯარო ინფორმაციის საპასუხოდ აცნობეს. რაც შეეხება ფსიქიკური და ქცევითი აშლილობის მქონე პირთა ასაკობრივ კატეგორიას, 2021 წლის მონაცემების თანახმად, 0-დან 15 წლამდე ბავშვებში ფსიქიკური და ქცევითი აშლილობების 4 392 შემთხვევაა აღრიცხული, ხოლო 71 525 შემთხვევა 25 წელზე მეტი ასაკის პირებში ფიქსირდება, საიდანაც 38 598 კაცია, ხოლო 32 927 ქალი. 2021 წლის მონაცემების თანახმად, ფსიქიკური და ქცევითი აშლილობის კლასიფიკაცია შემდეგნაირად გამოიყურება: ორგანული ბუნების აშლილობანი, სიმპტომატურ აშლილობათა ჩათვლით - 11 684; ფსიქოაქტიური ნივთიერებით განპირობებული ფსიქიკური და ქცევითი აშლილობანი -1884; შიზოფრენია, შიზოტიპური და ბოდვითი აშლილობანი-25 252, მათ შორის შიზოფრენია - 12961, ხანგრძლივი ბოდვითი აშლილობა- 3083; ნევროზული, სტრესთან დაკავშირებული და სომატოფორმული აშლილობანი - 11 731. იპნ

დიდუბის რაიონში, აკაკი წერეთლის გამზირისა და შოთა შალიკაშვილის სახელობის ხიდის რეაბილიტაცია იწყება, დაგეგმილი ინფრასტრუქტურული სამუშაოების გამო კი 19 აპრილს, 23:00 საათიდან წერეთლის გამზირზე საავტომობილო გადაადგილება ნაწილობრივ შეიზღუდება. ამის შესახებ ინფორმაციას თბილისის მერია ავრცელებს. „კერძოდ, მოძრაობა სავალი ნაწილის ორივე მხარეს მონაცვლეობით შეიზღუდება აკაკი წერეთლის გამზირზე, გიორგი ცაბაძის ქუჩიდან შოთა შალიკაშვილის სახელობის ხიდის ჩათვლით. რეაბილიტაციის პერიოდში, ავტომობილებისა და საზოგადოებრივი ტრანსპორტის გადაადგილებისთვის აკაკი წერეთლის გამზირზე მოძრაობა დარჩება ორმხრივი, თითო მიმართულებისთვის გამოყოფილი იქნება მხოლოდ ერთი სამოძრაო ზოლი. ავტომობილების მოძრაობა პერიოდულად შეიზღუდება საგურამოს, არჩილ ქურდიანის, ბათუმის, არჩილ კერესელიძის, სულიკო კოროშინაძისა და წყალტუბოს ქუჩებიდან წერეთლის გამზირის მიმართულებით და პირიქით. საგურამოს, არჩილ ქურდიანის და ბათუმის ქუჩებიდან ავტომობილები გადაადგილებას შეძლებენ, ვლადიმერ მაიაკოვსკის ქუჩიდან გიორგი ცაბაძის ქუჩის მიმართულებით. ასევე, დავით ყიფიანის ქუჩიდან, ვახუშტი ბაგრატიონის ქუჩის გავლით აკაკი წერეთლის გამზირის მიმართულებით. არჩილ კერესელიძის ქუჩიდან ავტომობილები გადაადგილებას შეძლებენ რაჟდენ გვენეტაძის ქუჩით, ან, რაფაელ აგლაძისა და ალექსი გოგოლაურის ქუჩების გამოყენებით, აკაკი წერეთლის გამზირის მიმართულებით. სულიკო კოროშინაძის ქუჩიდან ავტომობილები გადაადგილდებიან გოგოლაურის ქუჩის გავლით აკაკი წერეთლის გამზირის მიმართულებით. წყალტუბოს ქუჩიდან ავტომობილები იმოძრავებენ აგლაძის ქუჩის გავლით, როგორც მირცხულავას, ასევე, სამტრედიის ქუჩების გამოყენებით აკაკი წერეთლის გამზირის მიმართულებით. ამასთან, საჭიროების შემთხვევაში, პერიოდულად, ღამის საათებში, 00:00 საათიდან 07:00 საათამდე, გადაადგილება შეიზღუდება, როგორც გრიგოლ რობაქიძის გამზირიდან მარცხენა სანაპიროს მიმართულებით ჩამსვლელი ავტომობილებისთვის, ასევე, მარცხენა სანაპიროდან წერეთლის გამზირისკენ, დიდუბის ავტოსადგურის მიმდებარედ ამსვლელი ნაკადისთვის. აღნიშნული შეზღუდვის პერიოდში, ავტომობილები გადაადგილებას შეძლებენ ალტერნატიული გზის გამოყენებით, მარცხენა სანაპიროდან სამტრედიის ქუჩისა და წერეთლის გამზირის გავლით, შოთა შალიკაშვილის სახელობის ხიდისა და გრიგოლ რობაქიძის გამზირის მიმართულებით. ხოლო, გრიგოლ რობაქიძის გამზირიდან მარცხენა სანაპიროზე ჩამსვლელი ნაკადი გადაადგილებას შეძლებს აკაკი წერეთლის გამზირისა და სამტრედიის ქუჩების გამოყენებით. გიორგი ცაბაძის ქუჩიდან აკაკი წერეთლის გამზირისა და მარცხენა სანაპიროს მიმართულებით, ავტომობილების გადაადგილება დარჩება უცვლელი. სარეაბილიტაციო სამუშაოების სირთულიდან გამომდინარე, მიმდებარე ქუჩებიდან აკაკი წერეთლის გამზირის მიმართულებით მოძრაობა პერიოდულად შეიზღუდება, რის შესახებაც საზოგადოებას ინფორმაცია ეტაპობრივად მიეწოდება”, - ნათქვამია ინფორმაციაში.

მათ გაუგზავნეს მესიჯი სასამართლო სისტემაში მოქმედ კლანის წევრებს, რომ ყველანაირი გზით გადაეფარებიან და დაიცავენ, - ამის შესახებ პარტია „საქართველოსთვის" დეპუტატმა ბექა ლილუაშვილმა განაცხადა, რითაც შეაფასა უმრავლესობის გადაწყვეტილება მოსამართლეების მიმართ სოლიდარობის ნიშნად რეგისტრაცია არ გაევლოთ და კვორუმის არ არსებობის გამო საგამოძიებო კომისიის შექმნის საკითხზე კენჭისყრა არ შედგა. მისი თქმით, გუშინ ხელისუფლებამ საბოლოოდ დაუსვა წერტილი ქვეყანაში საპარლამენტო ზედამხედველობის პრაქტიკას და მის ინსტრუმენტებს. „ხელისუფლებამ, ფაქტობრივად, გააუქმა პარლამენტი და დაადასტურა, რომ კლანი, რომელიც ერთის მხრივ სასამართლოზე გავლენას ახდენს და მართავს მას, მეორეს მხრივ, პირდაპირ ექვემდებარება სახელისუფლებო შტოს და ბიძინა ივანიშვილს. პარადოქსულია ამბობდე, რომ დასამალი არაფერი გაქვს, სასამართლო თავისუფალია და უარს ეუბნებოდე ამ გზით საგამოძიებო კომისიის შექმნას და პარლამენტის საზედამხედველო ფუნქციის განხორციელებას. ერთის მხრივ ამბობდე, რომ ეს პროცესი გავლენას მოახდენს მოსამართლეების დამოუკიდებლობაზე, რასაც საგამოძიებო კომისია ითვალისწინებს და მეორეს მხრივ, მთელი სახელმწიფო საპარლამენტო რესურსით, მათ შორის, რეგლამენტით, პროცედურული თაღლითობით იცავდე სასამართლო ხელისუფლებას იმისგან, რომ გახდეს უფრო ანგარიშვალდებული და გამჭვირვალე - ეს ერთმანეთთან თავსებადი არ არის. მათ გაუგზავნეს მესიჯი სასამართლო სისტემაში მოქმედ კლანის წევრებს, რომ ყველანაირი გზით გადაეფარებიან და დაიცავენ", - განაცხადა ლილუაშვილმა. ცნობისთვის, კვორუმის არარსებობის გამო, სასამართლოსთან დაკავშირებით საგამოძიებო კომისიის შექმნის საკითხზე კენჭისყრა ვერ შედგა. უმრავლესობის გადაწყვეტილებით, მათ კენჭისყრისთვის რეგისტრაცია არ გაიარეს, რაც უმრავლესობის ლიდერმა ირაკლი კობახიძემ ქართველი მოსამართლეების მიმართ "სოლიდარობის აქტად" შეაფასა. სხდომაზე რეგისტრაცია მხოლოდ 51-მა დეპუტატმა გაიარა. IPN

ხელისუფლება სანქცირებული მოსამართლეების ტყვეა, მათზე დგას ოცნების ძალაუფლება და ბუნებრივია, ძალაუფლების ამ ტოტს ნებაყოფლობით არ მოიჭრის, - ამის შესახებ სოციალურ ქსელში პარტია "საქართველოსთვის" თავმჯდომარის მოადგილე ნათია მეზვრიშვილი წერს. როგორც მან აღნიშნა, ოცნებას ფერი არ უცვლია და ისევ აქტიურად მუშაობს ევროინტეგრაციის წინააღმდეგ "ოცნების დღევანდელი ქცევა არ გამკვირვებია. შეგახსენებთ, ხელისუფლებამ სასამართლოს „გავლენის ჯგუფის“ (ჩინჩალაძე-მურუსიძის) დასაცავად: - დაარღვია შარლ მიშელის შეთანხმება - გააჩერა სასამართლოს რეფორმა, უარი თქვა მე-5 ტალღაზე - ქვეყანას დააკარგვინა ევროკავშირის 75 მლნ ევროს დახმარება - ლევან მურუსიძე მეორედ აირჩია იუსტიციის უმაღლეს საბჭოში - რეაგირების გარეშე დატოვა ყოფილი მოსამართლეების და სუს-ის უფროსის ყოფილი მოადგილის ყველა საჩივარი - არ შეასრულა ევროკავშირის რეკომენდაციების მე-3 პუნქტი მართლმსაჯულებაზე - უარი თქვა პოლიტიკური/ელიტური კორუფციის წინააღმდეგ ბრძოლაზე და შექმნა ფიქტიური ბიურო - სანქცირების შემდეგ სრული მხარდაჭერა გამოუცხადა სანქცირებულებს - პრემიერი ეახლა „გავლენის ჯგუფს“ ამ ყველაფრის ფონზე, საგამოძიებო კომისიაზე ქვორუმის ჩაგდება სრულიად ლოგიკური იყო - ხელისუფლება სანქცირებული მოსამართლეების ტყვეა, მათზე დგას ოცნების ძალაუფლება და ბუნებრივია, ძალაუფლების ამ ტოტს ნებაყოფლობით არ მოიჭრის. არ დაგვავიწყდეს, რომ ამ პარტიამ სულ რაღაც ერთი თვის წინ რუსული კანონი დააინიცირა. საგამოძიებო კომისიაზე კვორუმის ჩამგდებმა დეპუტატებმა, სულ რაღაც ერთი თვის წინ სახელმწიფო ინტერესების ღალატს მოაწერეს ხელი. არ დარჩა არაფერი, რასაც არ იკადრებენ. რუსული კანონის უკან გაწვევის შემდეგ, ოცნებას ფერი არ უცვლია, ისევ აქტიურად მუშაობს ევროინტეგრაციის წინააღმდეგ. რა თქმა უნდა, ძალიან კარგია, რომ კიდევ ერთხელ დავინახეთ ხელისუფლების სახე. ამ ყველაფერში და კიდევ იმაში, რასაც მომავალში იკადრებენ, მძიმე პოლიტიკური ფასი არჩევნებზე უნდა გადავახდევინოთ.", - წერს ნათია მეზვრიშვილი.

პარტია "საქართველოსთვის" წევრები, სოციალურ ქსელში, უმრავლესობის გადაწყვეტილებას ეხმაურებიან, რომლის მიხედვითაც, მმართველმა პარტიამ, მოსამართლეების მიმართ სოლიდარობის ნიშნად, რეგისტრაცია არ გაიარა და კვორუმის არარსებობის გამო, საგამოძიებო კომისიის შექმნის საკითხზე კენჭისყრა ჩააგდო: Anna Buchukuri ოცნებამ კვორუმი ჩააგდო. სანდრო გირგვლიანის მოსამართლის დასაცავად ქართული ოცნება / Georgian Dream ბრავო! ბექა ლილუაშვილი დღის პარადოქსი: საქართველოს პარლამენტის ისტორიაში პირველად, ხელისუფლებამ ბოიკოტი გამოუცხადა და რეგისტრაციაში არ მიიღო მონაწილეობა იმ საგამოძიებო კომისიის შექმნის პროცედურას, რომელიც მათივე განცხადებით, უსაფუძვლოდ შეიქმნება და შედეგზე ვერ გავა. ანუ ხელისუფლებამ, დაიცვა ოპოზიცია პოლიტიკური კრახისგან?! ჰმ, გჯერათ ხომ? არც მე. Berdia Sitchinava ჩინჩალაძე-მურუსიძის კორუფციულ სინდიკატს გადაფარებული ქართული ოცნება / Georgian Dream, როგორ უღირსად და სამარცხვინოდ გამოიყურებოდით პარლამენტის დარბაზში, ნეტავ განახათ ობიექტური ადამიანის თვალით. ირინა ენუქიძეს კიდევ ერთხელ მოკლავდით მორალურად, ცოცხალი რომ იყოს! - ცნობისთვის, საქართველოს პარლამენტმა სასამართლო სისტემაში არსებულ ვითარებაზე საგამოძიებო კომისიის შექმნას დღევანდელ სხდომაზე კენჭი ვერ უყარა. ამის მიზეზი „ქართული ოცნების“ გადაწყვეტილება გახდა, რომლის ფარგლებშიც დღის წესრიგში არსებული საკითხების განხილვის შემდეგ, კენჭისყრამდე უმრავლესობის დეპუტატებმა რეგისტრაცია არ გაიარეს და შესაბამისად ვერ შედგა კვორუმი.

ვირს კრიალოსანზე კომისიას არ შევაქმნევინებთ, ეს არის ჩვენი პრინციპული პოლიტიკური პოზიცია, - ამის შესახებ „ქართული ოცნების“ თავმჯდომარე, ირაკლი კობახიძემ ჟურნალისტებს განუცხადა. როგორც მან განმარტა, ხელისუფლება სასამართლოსთან დაკავშირებით „ნაციონალური მოძრაობის“ მიერ კომისიის შექმნას ვერ განიხილავს. „ჩვენ მზად ვართ, ნებისმიერ თემასთან დაკავშირებით განვიხილოთ საგამოძიებო კომისიის შექმნა, მაგრამ ვერავითარ შემთხვევაში ვერ განვიხილავთ კოლექტიური „ნაცმოძრაობის“ მიერ კომისიის შექმნას სასამართლოსთან დაკავშირებით. ვირს კრიალოსანზე კომისიას არ შევაქმნევინებთ, ეს არის ჩვენი პრინციპული პოლიტიკური პოზიცია“, - განაცხადა კობახიძემ. რაც შეეხება სასამართლოს დამოუკიდებლობას, ირაკლი კობახიძის თქმით, ეს არის კონსტიტუციური პრინციპი, რომელიც ბოლომდე უნდა იყოს დაცული. „ეს კონკრეტული ადამიანები ვერ ეგუებიან იმას, რომ მათ დაკარგეს კონტროლი სასამართლო სისტემაზე. ვგულისხმობ კოლექტიურ „ნაცმოძრაობას“. რა თქმა უნდა, საქართველოში არავინ დაუშვებს იმას, რომ სასამართლოზე „ნაციონალური მოძრაობის“ კონტროლი თუნდაც მინიმალური დოზით აღდგეს. ამაზე ჩვენ ვართ პასუხისმგებელი. ჩვენ ვართ პასუხისმგებელი სასამართლოს დამოუკიდებლობის დაცვაზე, საქართველოს მოქალაქეების ინტერესების დაცვაზე და ბოლომდე ამ ინტერესების მიხედვით ვიმოქმედებთ“ , - განაცხადა კობახიძემ. კობახიძის თქმით, რეგისტრაციის არ გავლით საპარლამენტო უმრავლესობამ განახორციელა მხარდაჭერის აქტი სასამართლოს დამოუკიდებლობის მიმართ და ყველა კეთილსინდისიერი ქართველი მოსამართლის მიმართ. „რეგისტრაციის არ გავლით, ჩვენ განვახორციელეთ კონკრეტული პოლიტიკური აქტი. ეს იყო მხარდაჭერის აქტი სასამართლოს დამოუკიდებლობის მიმართ და ეს იყო სოლიდარობის აქტი ყველა კეთილსინდისიერი ქართველი მოსამართლის მიმართ. ეს იყო ჩვენი გადაწყვეტილების მიზეზი. საქართველოში ჩვენ ერთხელ უკვე ვიხილეთ ვითარება, როდესაც „ნაციონალური მოძრაობა“ უტევდა სასამართლო სისტემას, მათ გადამწყვეტი კონტროლი მოიპოვეს სასამართლო ხელისუფლებაზე და კარგად გვახსოვს თუ როგორ დასრულდა ეს ყველაფერი ჩვენი ქვეყნისთვის და ჩვენი მოქალაქეებისთვის. ჩვენ მეორედ ვერ დავუშვებთ იმას, რომ თუნდაც მინიმალური წარმატებული დოზით განხორციელდეს შეტევა დამოუკიდებელ სასამართლოზე კოლექტიური „ნაციონალური მოძრაობის“ მხრიდან. აქედან გამომდინარე ჩვენ კვლავაც გვექნება პრინციპული პოზიცია, ნებისმიერი ასეთი მცდელობის მიმართ. ჩვენ ყველაფერს გავაკეთებთ იმისათვის, რომ პოზიცია ბოლომდე გავიტანოთ. ყველაფერს გავაკეთებთ იმისათვის, რომ „ნაციონალურმა მოძრაობამ“ სასამართლოსთან დაკავშირებით არ შექმნას კომისა. ეს არის პრინციპული პოზიცია ჩვენი მხრიდან“,- განაცხადა კობახიძემ. მან ასევე დასძინა, რომ საქართველოში არ შეიძლება „ნაციონალურმა მოძრაობამ“ შექმნას კომისა სასამართლო საკითხებთან დაკავშირებით. „ნაციონალური მოძრაობა“ არის სისხლიანი, კრიმინალური პოლიტიკური პარტია, რომელმაც სისხლიანი სასამართლო სისტემა შექმნა. ამ სისტემამ 9 წლის განმავლობაში უამრავი ადამიანის ჯანმრთელობა და სიცოცხლე შეიწირა, შესაბამისად ჩვენ ამ კრიმინალური პოლიტიკურ ძალას სასამართლო თემებზე ვერ მივცემთ საგამოძიებო კომისიის შექმნის შესაძლებლობას“, - განაცხადა კობახიძემ. ცნობისთვის, კვორუმის არარსებობის გამო სასამართლოსთან დაკავშირებით საგამოძიებო კომისიის შექმნის საკითხზე კენჭისყრა ვერ შედგა. უმრავლესობის გადაწყვეტილებით, მათ კენჭისყრისთვის რეგისტრაცია არ გაიარეს, რაც უმრავლესობის ლიდერმა ირაკლი კობახიძემ ქართველი მოსამართლეების მიმართ "სოლიდარობის აქტად" შეაფასა. სხდომაზე რეგისტრაცია მხოლოდ 51 -მა დეპუტატმა გაიარა. "ჩვენ მივიღეთ გადაწყვეტილება, არ გავიაროთ რეგისტრაცია კენჭისყრამდე. ეს არის სოლიდარობის აქტი ქართველი მოსამართლეების მიმართ“, - განაცხადა კობახიძემ. უმრავლესობის გადაწყვეტილებას სხდომათა დარბაზში ხმაური მოჰყვა. ოპოზიციონერმა დეპუტატებმა პროტესტის ნიშნად ამ გადაწყვეტილებას ტაშიც დაუკრეს. იპნ

კვორუმის არარსებობის გამო, პარლამენტის პლენარული სხდომა, სადაც სასამართლო სისტემაში კორუფციული და სხვა სახის სამართალდარღვევების შესწავლის მიზნით საგამოძიებო კომისიის შექმნის საკითხს განიხილავდნენ, კენჭისყრების გარეშე დასრულდა. უმრავლესობის გადაწყვეტილებით, მათ კენჭისყრისთვის რეგისტრაცია არ გაიარეს, რაც უმრავლესობის ლიდერმა ირაკლი კობახიძემ ქართველი მოსამართლეების მიმართ "სოლიდარობის აქტად" შეაფასა. სხდომაზე რეგისტრაცია მხოლოდ 51 - მა დეპუტატმა გაიარა. "ჩვენ მივიღეთ გადაწყვეტილება, არ გავიაროთ რეგისტრაცია კენჭისყრამდე. ეს არის სოლიდარობის აქტი ქართველი მოსამართლეების მიმართ“, - განაცხადა კობახიძემ. უმრავლესობის გადაწყვეტილებას სხდომათა დარბაზში ხმაური მოჰყვა. ოპოზიციონერმა დეპუტატებმა პროტესტის ნიშნად ამ გადაწყვეტილებას ტაშიც დაუკრეს. როგორც ცნობილია, დღევანდელ სხდომაზე სხვა საკითხებთან ერთად დაგეგმილი იყო სასამართლო სისტემაში კორუფციისა და სხვა დარღვევების შემსწავლელი საორგანიზაციო კომისიის შექმნა. საუბარია პარლამენტში ჯერ კიდევ ივნისის თვეში ინიცირებული დადგენილების პროექტის დამტკიცებაზე, რომელიც სწორედ სასამართლოსთან დაკავშირებით სპეციალური საგამოძიებო კომისიის შექმნას ითვალისწინებს. აღნიშნული პროექტი პარლამენტში „რეფორმების ჯგუფმა“ დააინიცირა. საგამოძიებო კომისიის შექმნის საკითხი პარლამენტში, აშშ-ის მიერ 4 ქართველი მოსამართლის სანქცირების შემდეგ გააქტიურდა. IPN

თბილისის საქალაქო სასამართლოს გადაწყვეტილებით, „პუბლიკის“ თანადამფუძნებელი და დირექტორი, ზურაბ ვარდიაშვილი სამართალდამრღვევად იქნა ცნობილი და 2200 ლარით დაჯარიმდა. ზურა ვარდიაშვილი 2 მარტს პარლამენტთან მიმდინარე აქციაზე ადმინისტრაციული წესით დააკავეს. შინაგან საქმეთა სამინისტრო მას წვრილმან ხულიგნობასა და პოლიციის მოთხოვნისადმი დაუმორჩილებლობას ედავებოდა. მის მიმართ შედგენილ სამართალდარღვევის ოქმში წერია, რომ „ვარდიაშვილი იგინებოდა ხმამაღლა, იყენებდა უწმაწურ სიტყვებს, არ ემორჩილებოდა პოლიციის არაერთგზის კანონიერ მოთხოვნას, რომ გაეთავისუფლებინა გზა“. ზურა ვარდიაშვილი ბრალდებას არ იზიარებს და აცხადებს, რომ ოქმში მოყვანილი არცერთი გარემოება, ასევე, საქმის განხილვაზე შსს-ს წარმომადგენელთა განცხადებები სიმართლეს არ შეესაბამება. ის უარყოფს მათ განცხადებებს, რომ იგინებოდა და წინააღმდეგობას უწევდა პოლიციას. 2 მარტს იმავე ბრალდებით დააკავეს ასევე „ტაბულას“ ჟურნალისტი ბექა ჯიქურაშვილი, რომლის საქმეზე გადაწყვეტილება ხვალ გამოცხადდება. პუბლიკა

ეროვნული ბანკის მიერ გამოქვეყნებული მონაცემებისთანახმად,დღევანდელი ვაჭრობის შედეგად 1 აშშ დოლარის ღირებულება 2.5197 ლარი გახდა. კურსი, რომელიც დღეს მოქმედებდა, 2.5229 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0032 ლარი შეადგინა. რაც შეეხება ევროს, მისი კურსი 2.7651 ლარია. მაშინ, როცა დღეს მოქმედი კურსი 2.7795 ლარს შეადგენდა. შესაბამისად, ევროს ცვლილებამ 0.0144 ლარი შეადგინა. დღევანდელი ვაჭრობის შედეგად მიღებული კურსები ძალაში ხვალ შევა. IPN

სრულიად ვაღიარებთ აზერბაიჯანის ტერიტორიულ მთლიანობას და ველით, რომ ბაქოც იგივეს გააკეთებს. ამის შესახებ სომხეთის პრემიერ-მინისტრმა ნიკოლ ფაშინიანმა პარლამენტში სიტყვით გამოსვლისას განაცხადა. “სომხეთსა და აზერბაიჯანს შორის სამშვიდობო შეთანხმება რეალური გახდება, თუ ორივე მხარე მკაფიოდ, ორაზროვნების გარეშე, ერთმანეთის ტერიტორიულ მთლიანობას აღიარებს და ერთხელ და სამუდამოდ ვალდებულებას აიღებს ერთმანეთს ტერიტორიული პრეტენზიები არ წაუყენოს”, - განაცხადა ფაშინიანმა. მისი თქმით, აღნიშნული დებულება აზერბაიჯანულ მხარესთან 2022 წლის ოქტომბერში პრაღასა და სოჭში უმაღლესი დონის ბოლო შეხვედრებზე შეთანხმდა. “მინდა განმეორებით ვთქვა, რომ სომხეთის რესპუბლიკა სრულიად აღიარებს აზერბაიჯანის ტერიტორიულ მთლიანობას და ველით, რომ აზერბაიჯანიც იგივეს გააკეთებს და აღიარებს სომხეთის სსრ-ის ტერიტორიას როგორც სომხეთის რესპუბლიკას”, - აღნიშნა ფაშინიანმა. როგორც მედია წერს, აღნიშნული ნაბიჯი ფაქტობრივად მთიან ყარაბაღზე აზერბაიჯანის სუვერენიტეტის აღიარებას ნიშნავს, რომელიც საბჭოთა დროს აზერბაიჯანის სსრ-ში შედიოდა. ცნობისთვის, სომხეთი უარყოფს აღნიშნულ რეგიონში თავის სამხედრო ჩართულობას და ამტკიცებს, რომ იქ ყარაბაღის ადგილობრივი თავდაცვის ძალები არიან განლაგებული. პალიტრა

ის კადრები, რაც გავრცელდა, არის სწორედ გაჩერებული მოძრაობის და პროვოცირების შედეგად მიღებული - ქვათაცვენა და მეწყერი, რომ იცოდეთ, ზამთრის პერიოდში 150 მდებარეობაზე გვაქვს, არა მარტო რიკოთზე, - ამის შესახებ ინფრასტრუქტურისა და მდგრადი განვითარების მინისტრმა, ირაკლი ქარსელაძემ განაცხადა. მინისტრმა განმარტა, თუ რა პროცესები განვითარდა რიკოთზე, 147-ე კილომეტრზე. „147-ე კილომეტრზე განვითარდა ქვათაცვენა. ეს შეფასდა მომატებულ საფრთხედ გამომდინარე იქიდან, რომ ვიზუალურად თვალნათელი ხდებოდა წვიმის და სხვა კლიმატური ზეგავლენის შედეგად ძალიან დიდი ქვის მასების კონცენტრაცია. მიღებული იქნა ეს {საგზაო მოძრაობის ჩაკეტვის} გადაწყვეტილება და მყისიერად დავიწყეთ პროვოცირება დიდი ქვის მასების ჩამოშლის. რეალურად ამას ვეძახით ჩვენ ფერდის ჩამოწმენდას, რაც არის აუცილებელი იმისთვის, რომ მაქსიმალურად შეამცირო საფრთხე. ამას მოვუნდით 2 დღისა და ერთი ღამის განმავლობაში. 11:27 წუთზე უკვე გაჩერებული იყო მოძრაობა. ის კადრები, რაც გავრცელდა, არის სწორად გაჩერებული მოძრაობის და პროვოცირების შედეგად მიღებული. ასეთი ლოდი კიდევ ბევრი ჩამოვაგდეთ ამ პერიოდის განმავლობაში. აქაც ეს ყველაფერი იმისთვის კეთდებოდა, რომ 24-საათიანი მონიტორინგის შედეგად, თუკი რაიმე განვითარდებოდა, ჩვენ ყოველთვის გვექნებოდა, გვაქვს და გვექნება იმის რესურსი, რომ ჩავკეტოთ მოძრაობა და არავითარი უბედური შემთხვევა ამის გამო არ მოხდეს. შესაბამისად, ჩამოიწმინდა, ჩამოვიდა ის დიდი მასები, რაც დათვალიერების შედეგად ჩანდა. ასევე მიღებული იქნება შესაბამისი გადაწყვეტილება და კლდესთან მანძილი გაიზარდა. შესაბამისად, ნებისმიერი ტიპის ქვათაცვენას ექნებოდა ის ეფექტი, რომ ჩვენ გვექნებოდა სიგნალი დროული და დროული რეაგირება ამაზე, რომ რაიმე უბედურება არ მომხდარიყო. ქვათაცვენა და მეწყერი, რომ იცოდეთ, ზამთრის პერიოდში 150 მდებარეობაზე გვაქვს ჩვენ, არა მარტო რიკოთზე. რა თქმა უნდა, მძიმეა მდგომარეობა, როდესაც ასეთ გადაწყვეტილებას იღებ, მაგრამ ამას სჭირდება ადეკვატური შეფასება. ახლა მე რაც მოგიყევით იმ ვადებიდან გამომდინარე, რაც იყო, ამას შეიძლება ეწოდოს კოლაფსი? ეკონომიკური კოლაფსი? ზოგჯერ შთაბეჭდილება მრჩება, რომ ხალხი, რომელიც ამ სიტყვებს იყენებს, მათი რეალური მნიშვნელობა არ იცის. ან გამძაფრებული აქვს რაღაც გრძნობა, რომელიც ტყუილებს ეფუძნება,“ - განაცხადა ქარსელაძემ. მინისტრის განმარტებით, 147-ე კილომეტრზე მომხდარს მოსახლეობის უსაფრთხოებასთან არავითარი კავშირი არ ჰქონდა. „ბევრ სხვა არსებულ გზასთან გვაქვს ანალოგიური შემთხვევა და იმასაც ვმართავთ. აქამდე არ დამდგარა ეს საკითხი, მაგრამ როდესაც სურვილი გაქვს, რომ შენი მოსახლეობა დაძაბო, დააშინო, ამით გამოიწვიო მათი უკმაყოფილება, დისკრედიტაცია, როგორც პროექტს, ამ პროექტში ჩართულ ექსპერტს, ადამიანს, მუშას ასე ყოველგვარი დასაბუთების გარეშე, არგუმენტების, მტკიცებულებების გარეშე აკეთო, მიუღებელია. ეს არის რეალურად „მოდელირებული ქრონიკა“ რიკოთთან მიმართებაში. საზოგადოებას რომ ეტყვი, „ვაიმე, არაფერი ეშველება, დავიღუპეთ, არ იციან ამათმა“, ეს შეიძლება? მეტი კი არაფერი იყო ტანკის სურათი რომ აჩვენეს, აი, შემოიჭრნენო,“ - განაცხადა ქარსელაძემ. ამასთან, როგორც ქარსელაძემ განმარტა, ნაპრალები არსებული გზიდან 200 მეტრში განვითარდა, რომელიც შეიძლებოდა მეწყრულ პროცესებში გადასულიყო. ქარსელაძის თქმითვე, აღნიშნულს არანაირი კავშირი არ აქვს ახალ მშენებლობასთან. „რიკოთთან დაკავშირებით ფაქტობრივ გარემოებებზე მინდა განმარტებები გავაკეთო და ასევე, გესაუბროთ, თუ რა ფაქტებია ყოველგვარი ლოგიკური, ან სხვა მსჯელობების გარეშე, რომელიც აბსოლუტურად ლოგიკამოკლებული, აბსოლუტურად დაუსაბუთებელია და საბოლოო ჯამში ვიხილეთ ძალიან ბევრი ტყუილი, ამ ტყუილზე დაყრდნობით მოსახლეობის კიდევ უფრო ხელოვნურად დაძაბვა, დაშინება, რომ რაღაც უსაფრთხო არ არის, რომ რაღაც ვერ ხერხდება. თუ ვინმე ამასთან კავშირში იყო, აბსოლუტურად ყველა გალანძღეს, ასე უმიზეზოდ. ამას აკეთებდა ხალხი, რომელსაც ნახევარი სარაია არ აქვს აშენებული, უხერხულია, ამაზე რომ ვლაპარაკობ, ეს არის საცოდაობა მთელი ამ სიტუაციის. ისედაც, როცა ასეთი გადაწყვეტილებები მიიღება, არ სჭირდება ამას ხელოვნური დაძაბვა და მითუმეტეს, ხელოვნური დაძაბვა თუ ეს ხდება ტყუილების, დამახინჯებული, ბოლომდე არ ნათქვამი, მანიპულირებადი მონაცემებიდან და ჰაერიდან მოტანილი ამბიდან. ასე არ შეიძლება! ამას რომ აკეთებ და პირდაპირ ეთერშიც აცხადებ, რომ ახლა დამირეკეს, გზა დაკეტეს, რადგან მეწყერი ჩამოვიდაო, ამ დროს არაფერი ხდება, ამას რა ჰქვია? მოდელირებული რეალობა, მოდელირებული „ქრონიკა“, ამას ვერ გაცდა ეს ხალხი. საზოგადოება უნდა დააშინონ - არ შეიძლება იქ გადაადგილება, როგორი უსუსურები და უნიათოები არიანო. 149-ე კილომეტრი, ეს არის რიკოთის უღელტეხილი, თოვლის ლღობის შედეგად, დაფიქსირდა არსებული გზიდან 200 მეტრში ნაპრალები. ეს მონიტორინგის შედეგად გამოვლინდა და აქ მონიტორინგი გაგრძელდა, ისევე, როგორც დაიგეგმა შესაბამისი დამატებითი საჭირო ღონისძიებები კვლევების ჩათვლით, რათა გაგვეგო, რასთან გვქონდა საქმე. 29-ში მნიშვნელოვნად დამძიმდა აღნიშნული ვითარება, რადგან პოტენციურმა მეწყერმა დაიწყო იმგვარად მოძრაობა, რომ ნაპრალები გაიზარდა. შესაბამისად, სიტუაცია სპეციალისტებისა და ექსპერტების მიერ მომეტებულ საფრთხედ შეფასდა. გადაწყვეტილება იქნა მიღებული, რომ მომეტებული საფრთხის თავიდან აცილების მიზნით აუცილებელ გარემოებად შეფასდა, რომ აღნიშნული გზა დაკეტილიყო და წინსწრებად მოხდა მოძრაობის დაკეტვა. შედეგად, მოძრაობა გომი-საჩხერე-ჭიათურა-ზესტაფონის მიმართულებით გადაერთო. ეს გადაწყვეტილება 29-ში, 23:45 საათზე იყო მიღებული. ეს იყო ყველაზე სწორი გადაწყვეტილება და ეს იყო სწორედ იმის შედეგი, საავტომობილო გზების დეპარტამენტი, შესაბამისი კონტრაქტორი, შესაბამისი საზედამხედველო ორგანიზაცია თუ როგორი პროფესიონალიზმით მართავდა აღნიშნულ პროექტს. მეორე დღესვე მოხდა, დეტალური განცხადების გაკეთება და გაზიარებული იქნა ის გეგმა, თუ რა ხორციელდება, როგორც მოკლევადიან, ასევე საშუალოვადიან პერსპექტივაში. სასწრაფო წესით გაგრძელდა კვლევების წარმოება, შესაბამისი ანალიტიკური დოკუმენტი შედგა, რომელიც პირველად გეოლოგიურ ინფორმაციებს საჭიროებდა. არსებული გზიდან 200 მეტრში განვითარებული ნაპრალებია, რომელიც შეიძლებოდა მეწყრულ პროცესებში გადასულიყო, ამას არაფერი კავშირი აქვს ახალ მშენებლობასთან. 7-ში საღამოს, პირველადი გეოლოგიები მივიღეთ და წინასწარი მონაცემები შევიყვანეთ სისტემაში, რომლითაც გამოვიანგარიშეთ რისკფაქტორი, რომელიც მეწყერის გააქტიურებას უკავშირდებოდა. დასაშვებად იქნა მიჩნეული, რომ შესაბამისი რეჟიმის დაწესებით - 8-ში 07:00 საათიდან მოძრაობა გაიხსნა მსუბუქი ავტომობილებისათვის და უკვე 21:00 საათიდან სატვირთო ავტომობილებისთვის. ვიდრე ეს შეფასება გვექნებოდა, 31-ში, დღის მეორე ნახევარში უკვე სატვირთო მანქანები მოძრაობდნენ, აქაც სპეციალური რეჟიმი იყო დაწესებული. ამ მოცემულობაში, არავითარი რისკი და საფრთხე არ არსებობდა. მეწყრის ჩამოშლა არ მომხდარა, მეწყრის განვითარების მომეტებული საფრთხე იყო, რის გამოც, წინმსწრებად იყო აღნიშნული გადაწყვეტილება მიღებული. პირველი შეფასებები ისიც კი იყო, თურმე, 9 აპრილის აქციის გამო გაგვიკეთებია ეს, რა თქმა უნდა, ეს არ დადასტურდა, ეს ისეთივე უსაფუძვლო, აბსურდული და ისეთივე ტყუილი იყო, რომელიც მერე ვიხილეთ“, - განაცხადა ქარსელაძემ. IPN

ოკუპირებული აფხაზეთის თვითგამოცხადებული რესპუბლიკის ე.წ. პრეზიდენტი ასლან ბჟანია სამუშაო ვიზიტით მოსკოვში გაემგზავრა. ამის შესახებ მისი ე.წ. პრესსამსახური იუწყება. მათივე ცნობით, დაგეგმილია ბჟანიას შეხვედრები რუსეთის პრეზიდენტის ადმინისტრაციასთან, მთავრობასთან და რუსეთის ფედერაციის უშიშროების საბჭოსთან. შეხვედრების შესახებ დეტალები არ ვრცელდება. ცნობისთვის, ბჟანია მოსკოვს თებერვალშიც ეწვია. გარდა ამისა, ის მინსკშიც იმყოფებოდა, სადაც ბელარუსის ლიდერს ალექსანდრე ლუკაშენკოს შეხვდა.

საქართველოს განათლებისა და მეცნიერების მინისტრის, გიორგი ამილახვრის განცხადებით, ბავშვებს, რომლებსაც 1-ელ ნოემბრამდე 6 წელი შეუსრულდებათ, უფლება ექნებათ, სკოლაში 2023 წლის სექტემბრიდან შევიდნენ. მისივე თქმით, პროცესი ნებაყოფლობითი იქნება და მშობლებს შეეძლებათ ბავშვები სკოლაში წაიყვანონ ან საბავშვო ბაღში დატოვონ. „სასკოლო ინფრასტრუქტურის განვითარებასთან ერთად, შესაძლებლობა გვაქვს, მშობლების მომეტებული მოთხოვნა, რომელიც ბავშვის სასკოლო ასაკს ეხება, ეტაპობრივად დავაკმაყოფილოთ. წელს, ბავშვებს, რომლებსაც 1-ელ ნოემბრამდე 6 წელი შეუსრულდებათ, უფლება ექნებათ, სკოლაში შევიდნენ. მოგეხსენებათ, ეს წესი აქამდე 1-ელ ოქტომბრამდე მოქმედებდა და ის ერთი თვით გავახანგრძლივეთ. იმ ინფრასტრუქტურულ ღონისძიებებთან ერთად, რომელიც 800 სკოლის აშენებასა და რეაბილიტაციას გულისხმობს, ჩვენ ნელ-ნელა ამ ვადას გავახანგრძლივებთ. მაქსიმალური გადაწევის საშუალება 31 დეკემბრამდეა. გადაწყვეტილება ნებაყოფლობითი იქნება. მშობლები არჩევანში სრულად თავისუფლები იქნებიან. შეუძლიათ ბავშვი სკოლაში შეიყვანონ ან საბავშვო ბაღში დატოვონ“, - განაცხადა გიორგი ამილახვარმა.

„ქართული ოცნების“ თავმჯდომარის ირაკლი კობახიძის განცხადებით, წინა ხელისუფლების პერიოდთან შედარებით, დღეს სასამართლო სისტემაში რადიკალური ცვლილებებია. როგორც მან პარლამენტში საგამოძიებო კომისიის განხილვისას განაცხადა, დღეს სასამართლო პოლიტიკური კონტროლისგან თავისუფალია. „რადიკალური ცვლილება გვაქვს. თქვენი აზრით, რამ გამოიწვია ეს ამხელა ცვლილება. ხომ არ არის ამის მიზეზი ის, რომ გათავისუფლდა პოლიტიკური კონტროლისგან სასამართლო სისტემა. მიზეზი ხომ არა არის ის, რომ სასამართლო არის რეალურად დამოუკიდებელი და მოსამართლეები გათავისუფლებული არიან წნეხისგან. ეს არის რეალობა, რასთან დაკავშირებითაც მინდა დაგისვათ შეკითხვა, რას დაარქმევდით ამას, რა ხდებოდა 2012 წლამდე და რა ხდება 2012 წლის შემდეგ“, - განაცხადა კობახიძემ. მან 2012 წლამდე არსებული პერიოდი და ამჟამინდელი მდგომარეობა ერთმანეთს შეადარა. „2012 წლიდან 3-ჯერ შემცირდა წინასწარი პატიმრობის შეფარდების მაჩვენებელი საქართველოში. ასევე, 3-ჯერ შემცირდა ადმინისტრაციული პატიმრობის შეფარდების მაჩვენებელი ჩვენს ქვეყანაში. 5-ჯერ ნაკლებია ჯარიმების მოცულობა, რაც საქართველოს მოქალაქეებს გამოუწერეს. 18-ჯერ შემცირდა გირაოს მაჩვენებელი. 2-ჯერ შემცირდა საგამოძიებო მოქმედებებზე შუამდგომლობები“, - განაცხადა კობახიძემ. პარლამენტის პლენარულ სხდომაზე სასამართლო სისტემაში კორუფციული და სხვა სახის სამართალდარღვევების შესწავლის მიზნით საგამოძიებო კომისიის შექმნის საკითხს განიხილავენ. ინტერპრესნიუსი

ევროკავშირის გზაზე პროგრესის ტემპი დამოკიდებულია საკვანძო რეფორმების განხორციელებაზე , - ამის შესახებ ევროკომისარ ოლივერ ვარჰეის წერილშია ნათქვამი. შესაბამის წერლს ევროპული სამეზობლო პოლიტიკისა და გაფართოების საკითხებში ევროკომისარი ოლივერ ვარჰეის სამოქალაქო საზოგადოების ორგანიზაციებს უგზანვის, რომელთაც მას ევროკავშირის მიერ საქართველოსთვის ევროპული პერსპექტივის მინიჭების შესახებ მიმართეს. წერილში ასევე აღნიშნულია, რომ კომისია ყურადღებით აკვირდება საქართველოს მიერ გადადგმულ ნაბიჯებს 12 პრიორიტეტის იმპლემენტაციის მიმართულებით და ხელს უწყობს საქართველოს ძირითადი საკითხების რაც შეიძლება სწრაფად და ეფექტიანად მოგვარებაში. „საქართველოს სამოქალაქო საზოგადოებრივი ორგანიზაციების ძვირფასო წარმომადგენლებო, მადლობას გიხდით თქვენი 2023 წლის 24 მარტის წერილისთვის საქართველოს მიერ ევროკომისიის 2023 წლის 17 ივნისის მოსაზრებაში განსაზღვრული 12 პრიორიტეტის შესრულებასთან დაკავშირებით. ნება მომეცით, პირველ რიგში ხაზი გავუსვა ჩვენს ერთგულებას ევროპულ გზაზე საქართველოს მხარდაჭერის შესახებ. სამოქალაქო საზოგადოება მნიშვნელოვან როლს თამაშობს ამ ძალისხმევაში და ასევე არსებითი როლი აქვს დემოკრატიული სახელმწიფოს დაცვის კუთხით. ჩვენ მადლიერი ვართ საქართველოს სამოქალაქო საზოგადოების ევროკავშირი-საქართველოს ასოცირების შეთანხმების იმპლემენტაციის მონიტორინგის პროცესში ჩართულობისთვის, ისევე როგორც, მისი წვლილისთვის პოლიტიკის ფორმირებაში. როგორც თქვენს წერილშია აღნიშნული, 2022 წლის 23-24 ივნისს ევროპულმა საბჭომ მიანიჭა საქართველოს ევროპული პერსპექტივა. ამ გადაწყვეტილების შემდგომ კომისია ყურადღებით აკვირდება საქართველოს მიერ გადადგმულ ნაბიჯებს 12 პრიორიტეტის იმპლემენტაციის მიმართულებით და ხელს უწყობს საქართველოს ძირითადი საკითხების რაც შეიძლება სწრაფად და ეფექტიანად მოგვარებაში. ამავდროულად, ისევე როგორც გაფართოების პოლიტიკის მონაწილე ყველა ქვეყნის შემთხვევაში, ევროკავშირის გზაზე პროგრესის ტემპი დამოკიდებულია საკვანძო რეფორმების განხორციელებაზე. კომისია 2023 წლის გაზაფხულზე ზეპირად წარუდგენს საბჭოს განახლებულ ინფორმაციას საქართველოს მიერ 12 პრიორიტეტის შესრულების თაობაზე. ამ განახლების ვადები და მოდალობები კვლავ განხილვის სტადიაზეა. ოფიციალური ანგარიში პრიორიტეტების იმპლემენტაციის შესახებ იქნება კომისიის გაფართოების ყოველწლიური პაკეტის ნაწილი შემოდგომაზე”, - ნათქვამია ევროკომისარის წერილში. სამოქალაქო საზოგადოების ნაწილმა მიმდინარე წლის მარტში, სამეზობლო პოლიტიკისა და გაფართოების საკითხებში ევროკომისარს ოლივერ ვარჰეის განცხადებით მიმართა და სთხოვა, ევროკომისიის შუალედური შეფასება იყოს საჯარო და ხელმისაწვდომი დაინტერესებული მხარეების, მათ შორის ქვეყნის სამოქალაქო საზოგადოებისთვის. IPN

რა ხდება? მმართველი პარტიის წარმომადგენლები 2012 წლის შემდეგ ადამიანის უფლებათა ევროპული სასამართლოსადმი (ECtHR) საქართველოდან მიმართვების რაოდენობის შემცირებას ხშირად ხსნიან მათი მმართველობის პერიოდში მართლმსაჯულების სისტემაში განხორციელებული რეფორმების წარმატებით. მართლა ასეა? ევროპული სასამართლოსადმი მიმართვების შემცირებას სხვადასხვა მიზეზი აქვს და ავტომატურად არ გულისხმობს ქვეყანაში მართლმსაჯულების სრულყოფას, ანდა ადამიანის უფლებათა დაცვის მხრივ მდგომარეობის გაუმჯობესებას. სწორედ ამ საკითხზე 2022 წელს გამოქვეყნდა GnomonWise-ის სიღრმისეული კვლევა “ადამიანის უფლებათა ევროპულ სასამართლოში საქართველოს წინააღმდეგ წარმოებული საქმეების დინამიკა სასამართლო ინსტიტუციური ევოლუციის ჭრილში,” ვეცდებით, ამ კვლევის დახმარებით და მასზე დაყრდნობით ავხსნათ, თუ რამ გამოიწვია საქართველოდან სტრასბურგის სასამართლოში მიმართვების კლება უკანასკნელი წლების განმავლობაში. რა საქმეები ხვდება სტრასბურგში? რას განიხილავს სტრასბურგი? ადამიანის უფლებათა ევროპული სასამართლო საჩივარს განსახილველად იღებს მხოლოდ მაშინ თუ განმცხადებელმა ამოწურა სამართლებრივი დაცვის ყველა შიდასახელმწიფოებრივი საშუალება, ანუ გაიარა ყველა სასამართლო ინსტანცია. როდის განიხილავს? 2022 წლამდე ევროსასამართლოსთვის საჩივრის წარდგენა ხდებოდა ეროვნულ დონეზე საბოლოო გადაწყვეტილების გამოტანიდან 6 თვეში, რაც შემდგომ შემცირდა 4 თვემდე. როგორ განიხილავს? აი, სწორედ აქაა ძაღლის თავი დამარხული: თავდაპირველად, სასამართლოში საჩივრის შეტანა მეტად მარტივი პროცედურების გავლით ხდებოდა, შესაბამისად, მიმართვების რაოდენობა ყოველწლიურად იზრდებოდა. შედეგად, სასამართლო გადაიტვირთა და საჩივრები წლობით რჩებოდა განუხილველი. აუცილებელი გახდა სისტემის ძირეული რეფორმა და გამფილტრავი მექანიზმის შექმნა. სწორედ ეს შეიცვალა 2009-2010 წლებში. რა შეიცვალა 2009 წლის შემდეგ? 2009 – რიგითობა: 2009 წელს შეიცვალა საქმეების განხილვის რიგითობა. თუ მანამდე სასამართლო საქმეებს ქრონოლოგიური თანმიმდევრობით განიხილავდა, 2009 წლიდან რიგითობა დგინდება საქმის მნიშვნელობისა და სწრაფი გადაწყვეტის აუცილებლობის კრიტერიუმების მიხედვით. 2010 – ინტერლაკენის შეთანხმება: “ინტერლაკენის შეთანხმებამ” განსაზღვრა ფუნდამენტური რეფორმების აუცილებლობა აღსრულების, საქმეთა ფილტრაციის, ეროვნული სასამართლოების როლის და ევროსასამართლოს ეფექტიანობის გაძლიერების კუთხით. ინტერლაკენის შეთანხმება სასამართლოსთვის იმდენად მნიშვნელოვანი აღმოჩნდა, რომ განასხვავებენ სასამართლოს ინტერლაკენამდე და ინტერლაკენის შემდგომ პერიოდებს. ამ პროცესის შედეგად მიღებული გადაწყვეტილებები მომდევნო წლების განმავლობაში, ეტაპობრივად შევიდა ძალაში. ალტერნატიული გადაწყვეტის მექანიზმები: ინტერლაკენის შეხვედრაზე განსაკუთრებული ყურადღება გამახვილდა დავის ალტერნატიული – ანუ სასამართლო განხილვის გარეშე – გადაწყვეტის ფორმების მნიშვნელობაზე. ასეთი წესით მოგვარებული საჩივრები ამოირიცხება სასამართლოს მიერ განსახილველ საქმეთა ნუსხიდან და აღარ არის გათვალისწინებული საერთო სტატისტიკაში. კერძოდ, დაწესდა: ცალმხრივი დეკლარაცია, როცა მთავრობა აღიარებს, რომ მან დაარღვია დეკლარაცია. მეგობრული მორიგება – ურთიერთშეთანხმება მომჩივანსა და სახელმწიფოს შორის ზიანის ანაზღაურებაზე. საქართველომ ალტერნატიული მექანიზმების გამოყენება 2012 წლიდან დაიწყო. 2014 – საჩივრის შეტანის წესები: ამ წლის პირველი იანვრიდან გართულდა საჩივრის შეტანის წესები. მათი დაუცველობა საქმის განუხილვევლად დატოვების საფუძველია. ამასთან, ამიერიდან განმცხადებელი ვალდებული გახდა სრულად წარედგინა საჩივარი ექვსი თვის ვადაში. ამ ვადის გახანგრძლივება აიკრძალა. როგორ აისახა ეს რეფორმები საქართველოზე? რეფორმების შედეგად სასამართლოში ნაკლები საქმეები შედის ნებისმიერი ქვეყნიდან, მათ შორის რუსეთიდანაც, რომელსაც სტრასბურგში ყველაზე ხშირად უჩიოდნენ. არადა, რუსეთში არც სასამართლო სისტემა გაუმჯობესებულა და არც ადამიანის უფლებების მდგომარეობა. “ინტერლაკენის შემდეგ” პერიოდი დაემთხვა 2012 წელს საქართველოში ხელისუფლების ცვლილებას, შესაბამისად, თუკი საქართველოში სტატისტიკურ წყალგამყოფად 2013 წელს ავიღებთ, სასამართლოსადმი მიმართვების რაოდენობის ცვლილება მნიშვნელოვნად იქნება განპირობებული ევროპულ სასამართლოში განხორციელებული რეფორმებით. კერძოდ, რას გვეუბნება სტატისტიკა? საქართველო ადამიანის უფლებათა ევროპული სასამართლოს კონვენციის ხელშემკვრელი 1999 წლიდან გახდა. საქართველოსთან დაკავშირებით პირველი გადაწყვეტილება სასამართლომ 2004 წელს მიიღო. ეს იყო საქმე “ასანიძე საქართველოს წინააღმდეგ (Asanidze v. Georgia)”, რომელმაც პრეცედენტი შექმნა თავად კონვენციის სისტემისთვის: სასამართლომ პირველად მოითხოვა უკანონო პატიმრობაში მყოფი პირის დაუყოვნებელი გათავისუფლება გადაწყვეტილების სარეზოლუციო ნაწილში. დაუშვებელი სარჩელების რაოდენობა იკლებს ამგვარი საჯარო პოპულარობისა და გამოუცდელობის გამო საქართველოდან სასამართლოში ბევრი ისეთი საჩივარი შედიოდა, რომელიც შეიცავდა პროცედურულ დარღვევებს (ვადის დაუცველობა, შიდა სამართლებრივი დაცვის საშუალებების არ ამოწურვა, უსაფუძვლო და კონვენციასთან შეუსაბამო) და ამდენად არ იყო დაშვებელი განსახილველად. საჩივრების დაუშვებლად ცნობის შესახებ გადაწყვეტილებების 97% – სულ 143 გადაწყვეტილება – სწორედ 2013 წლამდე პერიოდში მოდის. 2013 წლის შემდეგ შეტანილ საჩივრებთან დაკავშირებით კი დაუშვებლად ცნობის შესახებ მხოლოდ 3% (სულ ხუთი) გადაწყვეტილება იყო მიღებული. რუსული, პოლიტიზებული სარჩელები 2008 წლის 11 აგვისტოს საქართველომ ადამიანის უფლებათა ევროპულ სასამართლოს რუსეთის წინააღმდეგ სახელმწიფოთაშორისი საჩივრით მიმართა. ამის საპასუხოდ 2008 წელს, რუსეთმა საქართველოს წინააღმდეგ 3 300-მდე ინდივიდუალური საჩივარი წარადგინა, რასაც კარგად ორგანიზებული კამპანიის ხასიათს ატარებდა. ამგვარი ტაქტიკით, რუსეთი შეეცადა საკუთარი დანაშაულიდან ყურადღება გადაეტანა და სასამართლო კიდევ უფრო გადაეტვირთა საქმეებით. ამ სარჩელების უდიდესი ნაწილი, 2010 და 2022 წლებში სასამართლომ დაუშვებლობის საფუძვლით ამორიცხა განსახილველი საქმეების ნუსხიდან. თუმცა, ამდენი საქმის ერთდროულად წარდგენამ საქართველოსთან დაკავშირებულ სტატისტიკურ სურათზე სერიოზული გავლენა იქონია – 3 300-ზე მეტი საჩივარი, საქართველოს მიერ ადამიანის უფლებათა ევროპული კონვენციის რატიფიცირებიდან დღემდე შესული საერთო საჩივრების დაახლოებით ნახევარია. თუმცაღა, ბუნებრივია, ეს საჩივრები საქართველოს სასამართლო სისტემის ხარისხიანობის შესაფასებლად ვერ გამოდგება. ამ კონკრეტული საჩივრების სტატისტიკაში გამოყენება, სტატისტიკური მონაცემებით მანიპულირებაა. სარჩელები სასჯელაღსრულების პირობების შესახებ 2012 წლამდე საქართველოს წინააღმდეგ წარმოებულ საქმეთა რაოდენობის მზარდ ტენდენციაზე გავლენა ასევე ჰქონდა სასჯელაღსრულების დაწესებულებებში პირობებთან დაკავშირებულ დავებს. გამომდინარე იქედან, რომ სასჯელაღსრულების დაწესებულებაში უფლებების დარღვევზე რეაგრებისთვის არ არსებობდა ეფექტური შიდა დაცვის საშუალება, პატიმრებს პირდაპირ შეეძლოთ მიემართათ ევროპული სასამართლოსთვის. თუმცა, ევროპულმა სასამართლომ 2010 წლის პირველ ოქტომბერს პატიმრობის კოდექსში განხორციელებული ცვლილებები დადებითად შეაფასა და ამ ცვლილებების შედეგად მიღებული საჩივრის განხილვის მექანიზმი მიიჩნია ეფექტურ ეროვნულ მექანიზმად. შესაბამისად 2011 წლიდან პატიმრების მხრიდან ევროსასამართლოსთვის მიმართვიანობამაც იკლო. გასათვალისწინებელია ისიც, რომ განსახილველ საქმეთა ამორიცხვის შესახებ მიღებული გადაწყვეტილებების (2022 წლის მდგომარეობით ჯამში 237 გადაწყვეტილება) 46% სწორედ სასჯელაღსრულების დაწესებულებებში არსებულ პირობებს ეხება. ჯამური სურათი: ქვემოთ წარმოდგენილ გრაფიკზე ჩანს, რომ წლების მიხედვით ევროსასამართლოში საქართველოს წინააღმდეგ შეტანილი საჩივრების რაოდენობა პიკს აღწევს სწორედ 2008 წელს რუსეთის მხრიდან შეტანილი საჩივრების ხარჯზე. 2013 წლიდან მართლაც შეინიშნება კლების ტენდენცია, რაზეც გავლენა შეიძლება ჰქონოდა როგორც პატიმრების საჩივრების ამორიცხვას, ასევე დაუშვებელი გადაწყვეტილებების მნიშვნელოვან შემცირებას 2013 წლის შემდგომ პერიოდში. გრაფიკი მოყვანილია GnomonWise-ს კვლევაში, სადაც აღნიშნულია, რომ სასამართლო 2006 წლიდან მოყოლებული ოფიციალურად აღარ ავრცელებს შეტანილი საჩივრების შესახებ მონაცემებს, შესაბამისად, საქართველოსთან მიმართებითაც 2006 წლის შემდეგ ამ სახის მონაცემები ოფიციალურად ხელმისაწვდომი არ არის და ეყრდნობა სტრასბურგის სასამართლოში საქართველოს ყოფილი წარმომადგენლის, მოსამართლე ნონა წოწორიას მონაცემებს. დასკვნის სახით საბოლოო ჯამში, ევროპული სასამართლოსადმი მიმართვის სტატისტიკაზე მსჯელობისას შიდა ფაქტორებთან ერთად მნიშვნელოვანია გავითვალისწინოთ უფრო ფართო კონტექსტი, კერძოდ კი ECtHR-ში განხორციელებული რეფორმების მნიშვნელოვანი როლი ამ პროცესში. ადამიანის უფლებათა მდგომარეობის შესაფასებლად არ შეიძლება ვიხელმძღვანელოთ მხოლოდ სტატისტიკით. ხარისხობრივი ზომები, როგორიცაა ცალკეული ადამიანებისა და თემების ცხოვრებისეული გამოცდილება, ადამიანის უფლებათა მდგომარეობის შესახებ მომზადებული ანგარიშები სტატისტიკაზე უფრო მნიშვნელოვანი მაჩვენებელია. GnomonWise კვლევაში ხაზგასმულია, რომ „რიცხვებით თამაშის“ ნაცვლად, არსობრივი ანალიზის აუცილებლობაზე გაამახვილა ყურადღება თავად ევროპული სასამართლოს პრეზიდენტმაც და „სასამართლოს წარმატების საზომად უარი ითქვა ძირითადად მოცემულ პერიოდში განხილული საქმეების საერთო რაოდენობის განსაზღვრაზე და ახალ ინდიკატორად განისაზღვრა, ის თუ როგორ განიხილავს სასამართლო ყველაზე მნიშვენლოვან საქმეებს პრიორიტეტულობის პოლიტიკის გათვალისწინებით”. civil.ge

მორიგი ტყუილი, რომ თითქოს ფასები შემცირდა..., - ამის შესახებ სოციალურ ქსელში პარტია "საქართველოსთვის" წევრი და დეპუტატი, ბექა ლილუაშვილი წერს. მისი თქმით, შემცირდა არა ფასები, არამედ ფასების ზრდის ტემპი. "ვინმემ აუხსნას ქვეყნის პრემიერ მინისტრს, რომ ფასები კი არ შემცირდა, ფასების ზრდის ტემპი შემცირდა. თუმცა შეცდომაზე მეტად, უბრალოდ პროპაგანდასთან გვაქვს საქმე! ხალხს, რომელიც ყოველდღიურად მაღაზიაში შედის და ჯიბიდან ფულს იხდის - ვერ მოატყუებთ ასეთი მარტივი ხერხებით. რაც შეეხება კონკრეტული პროდუქციის ფასებს, რომელიც შეიძლება ითქვას, რომ ჩვენი მოსახლეობისთვის ყოველდღიურ საჭიროებას წარმოადგენს - ძალიან კარგად ჩანს, რომ 2023 წლის მარტს თუ ავიღებთ და შევადარებთ 2020 წლის მარტთან, ფასები გაზრდილია ძალიან მაღალი მაჩვენებლით. ეს ქვემოთ მოყვანილ სურათზე (ცხრილზე) კარგად არის მოცემული. ეხლა აქ გამოთვლის მეთოდოლოგიასაც მოვიყვანდი, რომ შემდეგ ჯერზე არავის "შეეშალოს" მაგრამ მეეჭვება, რომ ამ ხალხმა კარგად გაიგოს არითმეტიკული ნიუანსები", - წერს ბექა ლილუაშვილი.

პატარა კაცები ხართ. თქვენ ესაუბრებოდით ქართველ ხალხს მხოლოდ იმაზე, როგორ დაიჭერდით, აწამებდით, ციხეში როგორ ჩაყრიდით, ამიტომ ტყუილად ნუ გაქვთ მომზირალი თვალები ხელისუფლებაში მოსვლის, - ამის შესახებ საპარლამენტო უმრავლესობის წევრმა ალუდა ღუდუშაურმა დღევანდელ პლენარულ სხდომაზე ოპოზიციის მისამართით განაცხადა. ღუდუშაურმა ოპოზიცია გააკრიტიკა, რომ „არაფერს აკეთებენ ევროკავშირის 12 რეკომენდაციის შესასრულებლად და ყველანაირად ცდილობენ, რომ საქართველომ კანდიდატის სტატუსი არ მიიღოს“. „მე ვფიქრობ, რომ საქართველოს პატრიარქის ეპისტოლე იყო ძალიან მნიშვნელოვანი და როგორც ყოველთვის, იყო ძალიან დიდი სიბრძნით განმსჭვალული. აქ კანტიკუნტად ადამიანები საუბრობდნენ შემწყნარებლობაზე, მაგრამ ერთი სიტყვა არ უთქვამთ იმასთან დაკავშირებით, რა აზრი გამოიტანეს ამ ყველაფრიდან. მე მინდა მართლაც შევეხო იმ მნიშვნელოვან გზავნილებს, რომლებიც ამ ეპისტოლეში იყო და ველოდები, იმასაც კი იკადრებენ ჩვენი რადიკალი ოპოზიციის წარმომადგენლები, პატრიარქს ეტყვიან, რომ „მშვიდობა საქილიკო საქმეა“, ეტყვიან, თუ როგორი მაგრები არიან და სიყვარულშიც შეეჯიბრებიან. სინამდვილეში ხდება ის, რომ ადამიანები, რომლებიც საუბრობენ სამართლიანობაზე, სასამართლოზე, ბიზნესზე, საუბრობენ ყველაფერ იმაზე, რასაც ეს ადამიანები ცოცხებით და ყავარჯნიანი კაცით აკეთებდნენ. თქვენ აკეთებთ ერთადერთ რამეს, ამიტომ გეძახით რადიკალებს, პოლიტიკურ ტურებს. ეს არის სინდრომი. როცა ქვეყანაში სიტუაცია მოგცემთ საფუძველს და საშუალებას, რომ თავი გამოამჟღავნოთ, გამოცვივდებით და კადრულობთ ყველაფერს. თქვენ ხართ ადამიანები, რომლებიც ერთი მხრივ არაფერს არ აკეთებთ 12 რეკომენდაციის შესრულებისთვის, მაგრამ აკეთებთ ყველაფერს იმისთვის, რომ ქვეყანამ არ მიიღოს კანდიდატის სტატუსი. დიახ, ეპისტოლეში არის, პრაქტიკულად, დეპოლარიზაციაზე საუბარი და გამოდიხართ კოლექტიური „ქურქუმალები“ და საუბრობთ იმაზე, რომ თურმე ქვეყანა არასწორი მიმართულებით მიდის. რა უფლებით საუბრობთ ამაზე? აკეთებთ ყველაფერს, მათ შორის საჯარო განცხადებებით ამბობთ, რომ თურმე საქართველო არ იმსახურებს კანდიდატის სტატუსს იქამდე, სანამ „ქართული ოცნება“ არის ხელისუფლებაში“,- განაცხადა ღუდუშაურმა. მისი თქმით, „რადიკალური ოპოზიცია“ ქვეყნის პროგრესსა და წინსვლას საკუთარ კრახად განიხილავს. „თქვენ ქართველ ხალხთან არასდროს ხართ, თქვენ ქართველი ხალხი დააწიოკეთ და ქართველ ხალხს განიხილავთ, როგორც საშუალებას ბიზნესის ტერორისა, შევიწროებისა, ჩაგვრისა, აბუჩად აგდებისა. ასეთი პატარა კაცები ხართ. თქვენ მხოლოდ ესაუბრებოდით ქართველ ხალხს როგორ დაიჭერდით, აწამებდით, ციხეში როგორ ჩაყრიდით. ვინ მოგცათ იმის გამბედაობა, კაცობა და ადამიანობა, რომ საკუთარ ხალხს და ქვეყანას ესაუბროთ და პროგრესი შესთავაზოთ? ამიტომ, ტყუილად ნუ გაქვთ მომზირალი თვალები ხელისუფლებაში მოსვლის. რაც არ უნდა გააკეთოთ, სულ რომ ყირაზე გადახვიდეთ, თქვენ ქართველი ხალხი, ჩვენ არ მოგცემთ საშუალებას, რომ ხელისუფლებაში დაბრუნდეთ და ატეროროთ ეკლესიიდან დაწყებული, ბიზნესი და ქართული საზოგადოება. ეს კარგად დაიმახსოვრეთ ყველამ!“- განაცხადა ღუდუშაურმა. იპნ

„ინტერესის არსებობის პირობებში, მზად ვარ, ვითანამშრომლო ევროპის ნებისმიერ საგამოძიებო უწყებასთან და მივაწოდო ჩემ ხელთ არსებული ინფორმაცია იმ მაღალჩინოსნებზე, რომლებიც რეალურად არიან ჩართულნი საქართველოში ე.წ. ქოლ-ცენტრების ჰაბის მფარველობაში,“ — დავით კეზერაშვილი განცხადება სრულად: formulanews.ge/News/89056

საპარლამენტო უმრავლესობის დეპუტატის, არჩილ თალაკვაძის განცხადებით, სასამართლოსთან დაკავშირებით საგამოძიებო კომისიის შექმნის ინიციატივა სასამართლო დამოუკიდებლობის წინააღმდეგ მიმართული ნაბიჯია. მისივე თქმით, ინიციატივა ასევე, ევრორეკომენდაციების საბოტაჟია, რადგან ოპოზიციამ იცის, რომ სასამართლოს დაზიანებით და ამ პროცესის წამოწყებით, ისინი რეკომენდაციების შესრულებას და ევროკავშირის კანდიდატი ქვეყნის სტატუსის მიღებას ეფექტურად შეუშლიან ხელს. ამასთან, როგორც თალაკვაძე აღნიშნავს, საგამოძიებო კომისიის შექმნის ერთ-ერთი მიზეზი მოსამართლეებზე შურისძიების მორიგი მცდელობაა. „მე ყურადღებით გავეცანი განმარტებით ბარათს, რომელიც ამ ინიციატივას ახლავს და პირდაპირ და პრინციპულად უნდა ითქვას, რომ ეს ინიციატივა არა სასამართლოს დამოუკიდებლობით და თავისუფლებით დაინტერესებული ოპოზიციის ნაბიჯია, არამედ რეალურად, ეს ინიციატივა არის სასამართლო დამოუკიდებლობის წინააღმდეგ მიმართული ნაბიჯი, ევრორეკომენდაციების საბოტაჟი, ვინაიდან ახლა, როდესაც ევრორეკომენდაციების შესრულება მიმდინარეობს და მისი მთავარი ნაწილი სწორედ სასამართლო რეფორმებია, ჩვენმა კოლეგებმა ძალიან კარგად იციან, რომ სასამართლოს დაზიანებით და ამ პროცესის წამოწყებით ისინი ეფექტურად შეუშლიან ხელს რეკომენდაციების შესრულებას და მაშასადამე, ხელს შეუშლიან საქართველოსთვის კანდიდატის სტატუსის მიცემას. მესამე - ეს ინიციატივა არის მოსამართლეებზე შურისძიების მორიგი მცდელობა. რადიკალური ოპოზიცია ვერანაირად ვერ ეგუება იმას, რომ მათი ხელისუფლების დროს დანიშნულმა და შემდგომში ჩვენი ხელისუფლების დროს დანიშნულმა მოსამართლეებმა არა ერთხელ და რეალურ ფაქტებზე და მტკიცებულებებზე დაყრდნობით გაასამართლეს მათი ყოფილი პოლიტიკური ლიდერები,“ - განაცხადა თალაკვაძემ. იპნ

პარტია „საქართველოსთვის“ წევრი ბექა ლილუაშვილი ე.წ. ქოლცენტრების საქმეზე პარლამენტში საგამოძიებო კომისიის შექმნის ინიციატივით გამოდის. დეპუტატის თქმით, თუ BBC-ს საგამოძიებო რეპორტაჟში მოყვანილი ფაქტები დადასტურდება, ქვეყანას მძიმე პოლიტიკური ქარიშხალი დაატყდება თავს და გაჩნდება კითხვები იმასთან დაკავშირებით, თუ რატომ ვერ ან არ გამოძია და აღკვეთა მსგავსი თაღლითური სქემების მუშაობა ქვეყნის ტერიტორიაზე საქართვეოს საგამოძიებო უყებებმა: „მძიმე პოლიტიკურ შედეგებამდე, შესაძლოა მიგვიყვანოს ხელისუფლების უმოქმედობამ, რომელიც უკავშირდება ტრანსნაციონალურ დანაშაულს, რომელიც შესაძლოა ხორციელდებოდა საქართველოში ძებნილი პირის მიერ, წარმოუდგენელი მასშტაბის თაღლითური სქემის ქვეყნის ტერიტორიაზე შექმნით, შესაძლო ხელმძღვანელობით და ჩვენი პარტნიორი სახელმწიფოების მოქალაქეების ასობით მილიონი დოლარის შესაძლო მოპარვით. შეგახსენებთ, რომ რამდენიმე სახელმწიფოს საგამოძიებო უწყება მუშაობს ამ მიმართულებით. საერთაშორისო გამოძიების ფარგლებში და თუ ვინმეს ჰგონია რომ ამ სქემის არსებობა თუ დადასტურდა ამას ქვეყნისთვის არ ექნება მძიმე პოლიტიკური შედეგები წარმოუდგენლად ცდება“ — აცხადებს ბექა ლილუაშვილი. მისი თქმით, საგამოზიებო კომისიის მიზანი უნდა იყოს დადგინდეს ვინ არის პასუხისმგებელი ამ მასშტაბის დანაშულის არ/ვერ აღკვეთაზე და ასევე ხელი შეუწყოს გამოძიებას სქემაში მონაწილე და მათი მფარველი პირების გამოსავლენად: „ვფიქრობ, ლეგიტიმურად ისმის კითხვები თუ რატომ მოხდა ისე, რომ საქართველოში უკვე მესამე წელია ამ საკითხზე გამოძიება მიმდინარეობს და ბიბისის ჟურნალისტებმა მეტი შესაძლო შედეგი აჩვენეს ვიდრე საქართველოს პროკურატურამ. რამდენად შესაძლებელია, რომ ქვეყანაში ძებნილი პირის მიერ ასობით დასაქმებული პირის ჩართულობით ხორციელდებოდეს ამ მასშტაბის დანაშაული ქვეყნის ტერიტორიაზე და ამის შესახებ ინფორმაციას არ ფლობდეს არცერთი სახელმწიფო უწყება. ფაქტია, რომ საერთაშორისო საგამოძიებო მოქმედებები დრეს თუ ხვალ კონკრეტულ შედეგებზე გავა და იმ პოლიტიკურ ქარიშხალს, რომელიც ამ სქემის დადასტურების შემთხვევაში ქვეყანას ელოდება, აქ სჭირდება რაიმე მინიმალური დამზღვევი წინაპირობები მაინც, მინიმუმ სიმართლის გამოვლენა ამ საქმის მიმართ შიდა ინტერესებთან დაკავშირებით და იმის დასადგენად ვინ არის პასუხისმგებელი ამ მასშტაბის დანაშაულის ვერ ან არ აღკვეთაზე. ამიტომ, გთავაზობთ რომ შევქმნათ საგამოძიებო კომისია, რომელიც უზრუნველყოფს მიმდინარე საგამოძიებო პროცესში სისტემური ჩავარდნების გარკვეულ გადამზღვევ მექანიზმს და მიმართული იქნება საქართველოს ტერიტორიაზე ჩადენილ შესაძლო თაღლითურ ქოლცენტრების საქმის გამოძიების ხელშეწყობაზე რის შედეგადაც გამოვლინდება ამ დანაშაულში მონაწილე და მათი მფარველი პირები“ — ამბობს დეპუტატი. ლილუაშვილი მოუწოდებს „ქართულ ოცნებას“ და ოპოზიციურ პარტიებს, მათ შორის „ერთიან ნაციონალურ მოძრაობს“ მხარი დაუჭირონ ამ ინიციატივას. netgazeti

საქართველოს განათლებისა და მეცნიერების მინისტრმა გიორგი ამილახვარმა ზოგადი განათლების საკითხებში კონსულტანტად ფილოლოგიის დოქტორი და პედაგოგი გია მურღულია დანიშნა. ინფორმაციას მინისტრის გადაწყვეტილებაზე სამინისტრო ავრცელებს. გიორგი ამილახვარის გადაწყვეტილებით სამინისტროში ზოგადი განათლების მიმართულებით სამუშაო ჯგუფი იქმნება, რომელსაც თავად მინისტრი უხელმძღვანელებს, კოორდინაციას კი – გია მურღულია გაუწევს. სამინისტროს ცნობით, აღნიშნული ჯგუფი აქტიურად იმუშავებს სკოლებში სასწავლო პროცესის გაუმჯობესებისა და განათლების ხარისხის განვითარების ხელშეწყობის კუთხით. კერძოდ, გიორგი ამილახვარის დავალებით, ჯგუფის წევრები სწრაფ და მოქნილ რეჟიმში იმსჯელებენ მასწავლებელთა პროფესიული განვითარების სქემის დახვეწაზე, ეროვნული სასწავლო გეგმისა და სახელმძღვანელოების ხარისხის გაუმჯობესებაზე, გრიფირების პროცესსა და სკოლასთან დაკავშირებულ მნიშვნელოვან სხვა საკითხებზე. გია მურღულია საზოგადოებრივი მაუწყებლის საბჭოს მოქმედი წევრია. ის 2020 წელს უმრავლესობის კვოტით აირჩიეს მაუწყებლის საბჭოში. მურღულია უმრავლესობის მიერ იყო წარდგენილი და მხარი 92-მა დეპუტატმა დაუჭირა. გია მურღულიას განათლების სფეროში მოღვაწეობის მრავალწლიანი გამოცდილება აქვს. სხვადასხვა წელს ის გახლდათ პედაგოგი, სკოლის დირექტორი, საქართველოს პედაგოგთა კვალიფიკაციის ამაღლებისა და გადამზადების ცენტრალური ინსტიტუტის რექტორი, საქართველოს სკოლის ადმინისტრატორთა ასოციაციის თავმჯდომარე, თბილისის საკრებულოს წევრი და სხვა. publika

„ფორმულას” დამფუძნებელი დავით კეზერაშვილი ე.წ. ქოლ-ცენტრების საკითხზე ბრალდებასთან დაკავშირებით განცხადებას ავრცელებს. მისივე თქმით, ის უარს ვამბობ „ფორმულას“ საკონტროლო პაკეტზე და არსებული წილის ნახევარს გადასცემს ტელეკომპანიის კოლექტივს. როგორც ის წერს, „მას შემდეგ კი, რაც დასრულდება ოლიგარქიული მმართველობა, „ფორმულას“ კოლექტივსვე სრულად გადასცემს დარჩენილ წილსაც”. გთავაზობთ განცხადებას უცვლელად:

შინაგან საქმეთა სამინისტროს კახეთის პოლიციის დეპარტამენტის თანამშრომლებმა ცხელ კვალზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად 2005 წელს დაბადებული ბ.ხ. განზრახ მკვლელობის ბრალდებით დააკავეს. სამინისტროს ცნობით, დანაშაული 10-დან 15 წლამდე ვადით თავისუფლების აღკვეთას ითვალისწინებს. „გამოძიებით დადგინდა, რომ ბრალდებულმა ქალაქ ახმეტაში საყოფაცხოვრებო ნიადაგზე მომხდარი კონფლიქტის შედეგად მეზობელი – 1952 წელს დაბადებული ლ.ხ. სანადირო თოფიდან გასროლით სახის არეში დაჭრა და შემთხვევის ადგილიდან მიიმალა. დაჭრილი ლ. ხ. სამედიცინო დაწესებულებაში გადაიყვანეს, თუმცა მისი გადარჩენა ვერ მოხერხდა. ოპერატიული-სამძებრო ღონისძიებებისა და საგამოძიებო მოქმედებების შედეგად სამართალდამცველებმა ბ.ხ. მომხდარიდან მალევე, ცხელ კვალზე ბრალდებულის სახით დააკავეს. პოლიციამ დანაშაულის ჩადენის იარაღი – სანადირო თოფი ნივთმტკიცების სახით ამოიღო. განზრახ მკვლელობის ფაქტზე გამოძიება საქართველოს სისხლის სამართლის კოდექსის 108-ე მუხლით მიმდინარეობს“, – აღნიშნულია შსს-ს ინფორმაციაში.

უკრაინის შეიარაღებული ძალების სახმელეთო ჯარების მეთაური, გენერალ-პოლკოვნიკი ალექსანდრ სირსკი აცხადებს, რომ ბახმუტისთვის ბრძოლა გრძელდება, სიტუაცია ქალაქში ამჟამად კონტროლირებადია. ამის შესახებ სირსკი „ტელეგრამში“ წერს. როგორც სირსკიმ აღნიშნა, მტერი დასახლებას ნანგრევებად აქცევს. „საბრძოლო მოქმედებების ეპიცენტრად ბახმუტის მიმართულება რჩება. მოწინააღმდეგე იქ მთელი თავისი ძალისხმევის კონცენტრირებას ახდენს და ნებისმიერი ფასით ცდილობს, ქალაქზე კონტროლი დაამყაროს. ახლა მტერი ზრდის მძიმე არტილერიის აქტიურობას და საავიციო დარტყმების რაოდენობას, რითიც ქალაქს ნანგრევებად აქცევს. ბრძოლები ბახმუტისთვის გრძელდება. სიტუაცია ამჟამად კონტროლირებადია“, – განაცხადა უკრაინის შეიარაღებული ძალების სახმელეთო ჯარების მეთაურმა. სირსკის თქმით, ოკუპანტები შეტევით მოქმედებებს ერთდროულად რამდენიმე მიმართულებით აწარმოებენ, თუმცა ფრონტის უმეტეს მონაკვეთზე მტრის მოქმედებები წარუმატებელია. ავტორი - ქეთი ჩოხელი