tvati

ქართული ავიაკომპანია Georgian Airways-ის პირველი თვითმფრინავი, რომელმაც ოთხწლიანი პაუზის შემდეგ თბილისი-მოსკოვი პირდაპირი რეისი შეასრულა, ვნუკოვოს აეროპორტში დაეშვა, - ინფორმაციას რუსული მედია ავრცელებს. მათივე ინფორმაციით, თვითმფრინავის დატვირთვა დაახლოებით 80 პროცენტი იყო. კომპანიამ ავიარეისების განხორციელების ნებართვა 16 მაისს მიიღო. ცნობისთვის, თბილისის საერთაშორისო აეროპორტში რუსული ავიაკომპანიის კუთვნილი თვითმფრინავი 19 მაისს, 13:00 საათისთვის დაჯდა, რომელმაც 2019 წლის შემდეგ საქართველოში პირველი პირდაპირი ავიარეისი შეასრულა. მოსკოვი-თბილისის რეისი ავიაკომპანია „აზიმუტმა” განახორციელა. პარალელურად აეროპორტის ტერიტორიაზე პროტესტის ნიშნად აქცია მიმდინარეობდა. აეროპორტის როგორც შიდა, ისე გარე პერიმეტრზე მობილიზებული იყო პოლიცია. ისინი აეროპორტში მგზავრთა ნაკადის შესვლას მკაცრად აკონტროლებდნენ. იპნ

თბილისის მერიამ რუსულ კომპანია „მეტროვაგონმაშთან“ გაფორმებული ხელშეკრულების გაუქმების პროცედურა დაიწყო, თუმცა იკვეთება ორი უმძიმესი დანაშაულის ნიშნები - სახელმწიფო ინტერესების ღალატი და მასშტაბური პოლიტიკური კორუფცია , - ამის შესახებ პარტია “საქართველოსთვის” წევრმა გიორგი შარაშიძემ თბილისის საკრებულოში გამართულ ბრიფინგზე განაცხადა. “გუშინ საღამოს ცნობილი გახდა, რომ თბილისის მერიამ რუსულ კომპანია „მეტროვაგონმაშთან“ დადებული ხელშეკრულების გაუქმების პროცედურა დაიწყო. შეგახსენებთ, რომ ეს გახლავთ ევროპის რეკონსტრუქციისა და განვითარების ბანკის („იბიარდის“) დაფინანსებით თბილისის მეტროს მოდერნიზაციისთვის გამოცხადებულ ტენდერში გამარჯვებული რუსული კომპანია. სამწუხაროდ, თბილისის მერიას ეყო თავხედობა, ჩვენი ევროპელი პარტნიორების ფულით რუსული ვაგონები შეესყიდა და თან ეს ფაქტი უტიფრად იმით გაემართლებინა, რომ თითქოს „იბიარდიმ“ თავად გადაწყვიტა, თუ ვისგან ეყიდა თბილისის მერიას მეტროს ვაგონები” , - განაცხადა გიორგი შარაშიძემ. მისი თქმით, ეს იყო ეს იყო თბილისის მერიის და კახა კალაძის მანიპულაცია, საზოგადოების შეცდომაში შეყვანის მცდელობა, თითქოს „იბიარდის“ მიერ დადგენილი წესებითა და პროცედურებით ჩატარებული ტენდერი გამორიცხავს მერიის პასუხისმგებლობას. “ეს იყო თბილისის მერიის და პირადად მერის კახა კალაძის ჩვეული მანიპულაცია, საზოგადოების შეცდომაში შეყვანის მცდელობა, თითქოს „იბიარდის“ მიერ დადგენილი წესებითა და პროცედურებით ჩატარებული ტენდერი გამორიცხავს მერიის პასუხისმგებლობას! საზოგადოებამ უნდა იცოდეს, რომ სიმართლე სრულიად საპირისპიროა –აქ პირველ რიგში მერიის პასუხისმგებლობა იკვეთება, რადგან სატენდერო კომისია, ვინც ხმა მისცა რუსულ კომპანიას, სწორედ მერიის თანამშრომლებით იყო დაკომპლექტებული. მიუხედავად იმისა, რომ რუსულ კომპანია „მეტროვაგონმაშთან“ გაფორმებული ხელშეკრულების გაუქმების პროცედურის დაწყება მისასალმებელია, ეს არ ათავისუფლებს თბილისის მერიას პასუხისმგებლობისგან, რადგან აქ იკვეთება ორი უმძიმესი დანაშაულის ნიშნები – სახელმწიფო ინტერესების ღალატი და მასშტაბური პოლიტიკური კორუფცია” , - განაცხადა გიორგი შარაშიძემ. პარტია “საქართველოსთვის” ასევე მოითხოვს, თბილისის მერიამ გააუქმოს მეორე რუსულ სანქცირებულ კომპანია “კამაზი”-სთან გაფორმებული ხელშეკრულება. “საზოგადოებას ასევე შევახსენებთ, რომ თბილისის მერიამ სულ ახლახან მეორე რუსულ სანქცირებულ კომპანიასთანაც გააფორმა ხელშეკრულება. ეს გახლავთ კომპანია „კამაზი“, რომელიც არის არა მხოლოდ ერთ–ერთი რიგითი რუსული კომპანია, ვისგანაც საქართველო პროდუქციას ყიდულობს, არამედ ეს კომპანია არის ევროკავშირის მიერ სანქცირებული იმის გამო, რომ რუსეთის ტერორისტულ არმიას აწვდის სამხედრო ტექნიკის კომპონენტებს, რომლის გამოყენებითაც იხოცება ათასობით უდანაშაულო ადამიანი უკრაინაში. დაუშვებლად მიგვაჩნია, რომ მაშინ, როცა მთელ ცივილიზებულ მსოფლიოს გაწყვეტილი აქვს ურთიერთობა აგრესორ სახელმწიფოსთან, თბილისის მერია სწორედ რუსული კომპანიებისგან ყიდულობს მილიონობით ლარის პროდუქციას და ამით ირიბად, ქართველი გადასახადის გადამხდელების ფულს მიმართავს უკრაინაში ომის დასაფინანსებლად. ამიტომ მოვითხოვთ: თბილისის მერიამ დაუყოვნებლივ დაიწყოს რუსულ სანქცირებულ კომპანია „კამაზთან“ გაფორმებული ხელშეკრულების გაუქმების პროცედურა. ამის შესახებ გუშინდელ საკრებულოს სხდომაზეც გამოვხატეთ პროტესტი და ამჯერად კატეგორიულად მოვითხოვთ რუსულ კომპანია „კამაზთან“ ხელშეკრულების გაუქმებას”, - განაცხადა გიორგი შარაშიძემ.

სასტუმრო „ყვარლის ტბის“ ტერიტორიაზე ვითარება კიდევ ერთხელ დაიძაბა. სამართალდამცველებმა აქციის მონაწილეების დაკავება დაიწყო. ადგილზე რამდენჯერმე მოხდა ფიზიკური დაპირისპირება. ვითარება მას შემდეგ დაიძაბა, რაც სასტუმროს ტერიტორია ერთმა ავტომობილმა დატოვა, რომელსაც აქციის მონაწილეები შეძახილებით: „რუსები“ დახვდნენ. დაპირისპირების დროს აქციის ერთი მონაწილე შეუძლოდ გახდა. ტერიტორიაზე სამართალდამცველების განსაკუთრებული მობილიზებაა, მათ შორის ადგილზე იმყოფებიან განსაკუთრებულ დავალებათა დეპარტამენტის თანამშრომლები. გავრცელებული ინფორმაციის თანახმად, რუსეთის ფედერაციის საგარეო საქმეთა მინისტრის, სერგეი ლავროვის შვილი საქართველოშია და ის სასტუმრო „ყვარლის ტბაში“ იმყოფება. არსებული ინფორმაციით, რუსეთის საგარეო საქმეთა მინისტრის ოჯახი კახეთში გრანდიოზული ქორწილისთვის ემზადება. ქორწილი ლავროვის სიძის, ალექსანდრე ვინოკუროვის ძმას ექნება. სასტუმრო „ყვარლის ტბის“ ადმინისტრაციის განცხადებით, რუსეთის ფედერაციის საგარეო საქმეთა მინისტრის, სერგეი ლავროვის შვილის „ყვარლის ტბაზე“ სტუმრობა სიმართლე არ შეესაბამება. როგორც მათ მიერ გავრცელებულ განცხადებაშია აღნიშნული, ლავროვის გვარით სასტუმროში სტუმარი არ ფიქსირდება და არც აქამდე დაფიქსირებულა.

უკრაინის პრეზიდენტი, ვოლოდიმირ ზელენსკი, იაპონიის ქალაქ ჰიროსიმაში ჩავიდა. CNN-ის ინფორმაციით, უკრაინის პრეზიდენტი იაპონიაში საფრანგეთის მთავრობის თვითმფრინავით ჩავიდა, რომელიც ჰიროსიმაში ცოტა ხნის წინ ჩაფრინდა. ვოლოდიმირ ზელენსკი ჰიროსიმაში მიმდინარე „დიდი შვიდეულის“ სამიტში მიიღებს მონაწილეობას.

უკრაინის პრეზიდენტის, ვოლოდიმირ ზელენსკის განცხადებით იაპონიაში, „დიდი შვიდეულის“ ფარგლებში მნიშვნელოვან შეხვედრებს გამართავს. „იაპონია. „დიდი შვიდეული“. მნიშვნელოვანი შეხვედრები უკრაინის პარტნიორებთან და მეგობრებთან. უსაფრთხოება და გაძლიერებული თანამშრომლობა ჩვენი გამარჯვებისთვის. მშვიდობა დღეს უფრო მოგვიახლოვდება", - დაწერა ზელენსკიმ „ტვიტერზე“. შეგახსენებთ, ვოლიდიმირ ზელენსკი იაპონიაში საფრანგეთის სამთავრობო თვითმფრინავით ჩავიდა. ის ჰიროსიმაში მიმდინარე „დიდი შვიდეულის“ სამიტს დაესწრება. იპნ

აშშ-ის პრეზიდენტი, ჯო ბაიდენი გეგმავს, რომ უკრაინელ კოლეგასთან, ვოლოდიმირ ზელენსკისთან შეხვედრის შემდეგ, უკრაინისთვის სამხედრო დახმარების ახალი, 375 მილიონი აშშ დოლარის ღირებულების სამხედრო დახმარების პაკეტის შესახებ განაცხადოს, - ინფორმაციას Politico ამერიკელ და უკრაინელ ოფიციალურ პირებზე დაყრდნობით ავრცელებს. გამოცემა წერს, რომ პაკეტი მოიცავს საარტილერიო ჭურვებს, ჯავშანტექნიკას და ტანკსაწინააღმდეგო იარაღს - ყველა აღჭურვილობას, რომელიც აშშ-მა და მოკავშირეებმა წარსულში მიაწოდეს კიევს, მაგრამ ძალიან საჭირო იქნება ამ გაზაფხულსა და ზაფხულში მოსალოდნელი მძიმე ბრძოლების თვეებში. მანამდე, აშშ-ის პრეზიდენტმა განაცხადა, რომ აშშ „საბრძოლო თვითმფრინავების კოალიციაში” მიიღებს მონაწილეობას და უკრაინელ პილოტებს F-16-ებზე გაწვრთნის. ipn

საქართველოს პრეზიდენტი, სალომე ზურაბიშვილი საქართველოს მთავრობას ინიციატივით მიმართავს, 1923 წლის 20 მაისს, ბოლშევიკური რეჟიმის მიერ დახვრეტილ 15 ქართველს ეროვნული გმირის წოდება მიენიჭოს. „100 წელი სრულდება, რაც 1923 წლის 20 მაისს ბოლშევიკურმა რეჟიმმა 15 ქართველი სამხედრო დახვრიტა, რომელიც გენერალ კოტე აფხაზის მეთაურობით საქართველოს დამოუკიდებლობისათვის იბრძოდა. საქართველოს პრეზიდენტი გამოდის ინიციატივით და მიმართავს მთავრობას, რათა მათ ეროვნული გმირის წოდება მიენიჭოთ”, - წერს სალომე ზურაბიშვილი სოციალურ ქსელში.

სასტუმრო „ყვარლის ტბასთან“ სამართალდამცველები არიან მობილიზებული. ადგილზე იმყოფებიან განსაკუთრებულ დავალებათა დეპარტამენტის თანამშრომლებიც. სასტუმროს მიმდებარე ტერიტორიაზე მხარდამჭერებთან ერთად იმყოფება „ნაციონალური მოძრაობის“ ყოფილი თავმჯდომარე ნიკა მელია. ტერიტორიაზე ელოდებიან სხვა ოპოზიციონერ პოლიტიკოსებსაც. ინფორმაციისთვის, გავრცელებული ინფორმაციის თანახმად, რუსეთის ფედერაციის საგარეო საქმეთა მინისტრის, სერგეი ლავროვის შვილი საქართველოშია და ის სასტუმრო „ყვარლის ტბაზე“ იმყოფება. არსებული ინფორმაციით, რუსეთის საგარეო საქმეთა მინისტრის ოჯახი კახეთში გრანდიოზული ქორწილისთვის ემზადება. ქორწილი ლავროვის სიძეს, ალექსანდრე ვინოკუროვის ძმას ექნება. სასტუმრო „ყვარლის ტბის“ ადმინისტრაციის განცხადებით, რუსეთის ფედერაციის საგარეო საქმეთა მინისტრის, სერგეი ლავროვის შვილის „ყვარლის ტბაზე“ სტუმრობა სიმართლეს არ შეესაბამება. როგორც მათ მიერ გავრცელებულ განცხადებაშია აღნიშნული, ლავროვის გვარით სასტუმროში სტუმარი არ ფიქსირდება და არც აქამდე დაფიქსირებულა. „გვსურს გამოვეხმაუროთ დეზინფორმაციას, რომელიც მედიაში ვრცელდება! ვაცხადებთ, რომ ლავროვის შვილის სტუმრობა „ყვარლის ტბაზე“ არ შეესაბამება სიმართლეს, არც ლავროვის გვარით გვიფიქსირდება სტუმარი და არც აქამდე დაფიქსირებულა. სამწუხაროდ მედიის საშუალებით ვრცელდება ინფორმაცია, რომელიც არ შეესაბამება სიმართლეს!“, - ნათქვამია განცხადებაში. ipn

რაც ვახტანგ გომელაური შინაგან საქმეთა მინისტრი გახდა, ყველა შესაბამისი ოპერაცია უმაღლეს დონეზე ჩატარდა - 2012 წლამდე ევროპა დემონსტრანტების მხარეს იყო ხოლმე, 7-8 მარტს პირიქით - ევროპა იყო შინაგან საქმეთა სამინისტროს და არა მოძალადე დემონსტრანტების მხარეს,- ამის შესახებ „ქართული ოცნების“ თავმჯდომარე ირაკლი კობახიძემ პარლამენტის პლენარულ სხდომაზე განაცხადა, სადაც შინაგან საქმეთა მინისტრ ვახტანგ გომელაურს ინტერპელაციის წესით უსმენენ. მისივე თქმით, მოძალადეები, რომლებმაც 7-8 მარტის აქციებზე დანაშაული ჩაიდინეს, „კოლექტიური „ნაცმოძრაობის“ მსხვერპლნი იყვნენ. „მოძალადეები, რომლებიც დანაშაულს ჩადიოდნენ, არიან დანაშაულის ჩამდენი პირები, მაგრამ ასევე არიან თქვენი, კოლექტიური „ნაცმოძრაობის“ მსხვერპლნი. „სირცხვილია“ - ლიბერალურ ფაშისტური ორგანიზაცია, „ნაცმოძრაობის“ ახალგაზრდული დანაყოფი, „ფრანკლინის კლუბი“ და ა.შ. ლიბერალურ- ფაშისტური ორგანიზაციები თქვენი მხრიდან იმართებიან და თქვენ აქეზებთ ამ ადამიანებს ძალადობისკენ. შესაბამისად, ეს ადამიანები, რომლებიც 7-8 მარტს ძალადობაში მონაწილეობდნენ, არიან თქვენი, კოლექტიური „ნაცმოძრაობის“ მსხვერპლნი. 19 აპრილს გაფორმდა შეთანხმება, რომლის საფუძველზეც გათავისუფლდნენ ის ადამიანები, რომლებიც მანამდე იჭრებოდნენ პარლამენტის შენობაში. მაშინვე ვამბობდით, რომ შეთანხმება და ეს პუნქტი არ მოგვწონდა და ამ ჩანაწერს ექნებოდა ანტიპრევენციული ეფექტი, წაახალისებდა მოგვიანებით იგივე დანაშაულს და ეს მოხდა - გათავისუფლდნენ დამნაშავეები და ამან წაახალისა პარლამენტში კიდევ ერთხელ შეჭრის მცდელობა. არასდროს აღარ მოხდება ისეთი შეთანხმების ხელმოწერა, როგორიც 19 აპრილის შეთანხმება იყო. ეს არის მკაფიო პოზიცია და ამას ბოლომდე დავიცავთ. მადლობა მინდა გადავუხადო შინაგან საქმეთა სამინისტროს, თითოეულ პოლიციელს, შინაგან საქმეთა მინისტრს. მას შემდეგ, რაც ვახტანგ გომელაური შინაგან საქმეთა მინისტრი გახდა, ყველა შესაბამისი ოპერაცია უმაღლეს დონეზე ჩატარდა, არა მარტო პროპორციულობის პრინციპის შესაბამისად და სათანადო წესების დაცვით. ეს პირადად ვახტანგ გომელაურის დამსახურებაა და მადლობა მას. მადლობა ასევე, თითოეულ პოლიციელს. 7-8 მარტს დადასტურდა, რომ პოლიციელი გმირია და ქართველი პოლიციელი მოქმედებს იმ სტანდარტების შესაბამისად, რაც კლასიკური ევროპისთვისაა დამახასიათებელი. 2012 წლამდე არაერთი შემთხვევა იყო, როდესაც ერთმანეთს უპირისპირდებოდნენ შინაგან საქმეთა სამინისტრო და დემონსტრანტები. მაშინ ევროპა დემონსტრანტების მხარეს იყო ხოლმე. მაშინ დემონსტრანტები ევროპულად იქცეოდნენ, „ნაციონალური მოძრაობის“ სააკაშვილის სისხლიანი რეჟიმის სპეცრაზმი კი არაევროპულად იქცეოდა. მაშინ ევროპა იყო მომიტინგეების და არა შინაგან საქმეთა სამინისტროს მხარეს. 7-8 მარტს პირიქით იყო - ევროპა იყო შინაგან საქმეთა სამინისტროს, პოლიციელის მხარეს და არა მოძალადე დემონსტრანტების მხარეს. აქედან ჩანს პრინციპული სხვაობა წინა და მოქმედ ხელისუფლებას შორის; მაშინდელ პოლიციელს და დღევანდელ პოლიციელს შორის. მადლობა თითოეულ პოლიციელს ევროპული სახის ჩვენებისთვის და კიდევ ერთხელ მადლობა ვახტანგ გომელაურს“,- განაცხადა ირაკლი კობახიძემ. ipn

რუსული ქორწილი კახეთის შუაგულში - მაშინ, როდესაც მთელი საქართველო პირდაპირი ავიარეისების აღდგენას აპროტესტებს, გურჯაანში გრანდიოზული ქორწილის სამზადისი მიმდინარეობს. რუსეთის მოქალაქეების წყვილმა დღეს უკვე გააფორმა სამოქალაქო ქორწინება თბილისში და ხვალ სასტუმრო კომპლექს "ახაშენი ვაინ რისორთ ენდ სპა"-ში გრანდიოზულ წვეულებას გამართავს. სტუმრების უმეტესობა რუსეთის მოქალაქეა და მათი უმრავლესობა უკვე საქართველოშია - ნაწილი ახაშენის სასტუმროში, ნაწილი კი ყვარლის ტბის პირას. კიდევ უფრო სკანდალური ამ ისტორიაში მეუღლეებისა და მათი სტუმრების ვინაობაა. "მთავარმა არხმა" გაარკვია, რომ საქართველოში ქორწინებისთვის ჩამოსულია რუსეთის საგარეო საქმეთა მინისტრის სიძის ძმა. ანუ ეკატერინე ლავროვას ქმრის, ალექსანდრე ვინოკუროვის ძმა გადაიხდის ქორწილს ახაშენში. დიდი ალბათობით, ხვალ კახეთში სერგეი ლავროვის ქალიშვილსა და სიძესაც ელოდებიან და ცნობილი ფაქტია, რომ ორივე მათგანი დასავლეთის მიერ არის დასანქცირებული. მთავარი

საქართველოს პარლამენტში, სადაც შინაგან საქმეთა მინისტრ ვახტანგ გომელაურს ინტერპელაციის წესით უსმენენ, ფიზიკური დაპირისპირება მოხდა. დაპირისპირება მოჰყვა „სტრატეგია აღმაშენებლის“ წევრის, გიორგი ვაშაძის ტრიბუნასთან სიტყვით გამოსვლას, სადაც მან „ქართული ოცნება“ რუსეთის ინტერესების გატარებაში დაადანაშაულა. „ქართველ ხალხს არ სჯერა რუსული მშვიდობის. ჩვენ გვინდა ნატოს და ევროკავშირის მიერ გარანტირებული მშვიდობა. ჩვენ გვინდა ეკონომიკური კეთილდღეობა ევროკავშირთან ერთად. დღეს გაწევრიანების შანსი გვაქვს და ამ შანს უკარგავთ ჩვენს ქვეყანას. ეს არის რეალობა. არა რუსულ ფრენებს, არა რუსეთს საქართველოში, წინ ევროპისკენ, წინ ნატოსკენ, აი, ეს არის ჩვენი მომავალი.“ – თქვა გიორგი ვაშაძემ. მას შემდეგ, რაც ვაშაძე დარბაზში საკუთარ ადგილს დაბრუნდა, დაჩი ბერაიამ გიორგი ვაშაძეს სიტყვიერი შეურაცხყოფა მიაყენა, რის შემდეგაც დეპუტატებს შორის ფიზიკური დაპირისპირება მოხდა. publika

თბილისში რუსული კლინიკების ქსელ „ჩაიკის“ სამედიცინო ცენტრის ფილიალი გაიხსნა. ინფორმაცია რადიო თავისუფლების პროგრამა „ეხო კავკაზა“ ავრცელებს. კლინიკა ჭავჭავაძის გამზირზე მდებარეობს. „ჩაიკის“ კლინიკების ქსელის მიერ ეს საზღვარგარეთ გახსნილი პირველი სამედიცინო ცენტრია. ინვესტიციის საერთო ღირებულება 200 ათასი დოლარია. კლინიკის ვებგვერდზე გამოქვეყნებული ინფორმაციით, თბილისის კლინიკა პაციენტებს თერაპევტის, პედიატრის, დერმატოლოგის და მეან-გინეკოლოგის მომსახურებას სთავაზობს. საქართველოში არსებული ლიბერალური სავიზო რეჟიმის პირობებში, ქვეყანაში შემოსულია რუსეთის დაახლოებით 120 000 მოქალაქე. არსებული მონაცემების მიხედვით, რუსეთის მოქალაქეთა მიერ საქართველოში არსებული უძრავი ქონების შეძენის ტენდენცია მზარდია. publika

დეპუტატმა “ერთიანი ნაციონალური მოძრაობიდან”, თინა ბოკუჩავამ, საქართველოს განათლების მინისტრს შვილების განათლებაზე დახარჯული თანხა შეახსენა. ბოკუჩავამ გიორგი ამილახვარს მოსწავლეთა უფასო კვების პროგრამის კონტექსტში ჰკითხა, მისი ან მმართველი პარტიის სხვა რომელიმე დეპუტატის შვილები თუ დადიან საჯარო სკოლაში. მინისტრმა დეპუტატის ეს კითხვა გააკრიტიკა. ამილახვრის ბოლო ფინანსური დეკლარაციის მიხედვით, გასულ წელს მისმა ოჯახმა, ჯამში, 40 000 ლარამდე დახარჯა შვილების განათლებაზე. “მინდა თქვენ გკითხოთ, თქვენი შვილები საჯარო სკოლებში დადიან? …მინდა გითხრათ, რომ გაკვირვებული ვარ და სრულიად აღშფოთებული: მაშინ, როდესაც თქვენ ამბობთ, რომ იმ პროგრამის განხორციელების საშუალება და [მისი] ინფრასტრუქტურული მზაობა საჯარო სკოლებში არ არსებობს, თქვენ პირადად, თქვენი დეკლარაციის მიხედვით, 40 ათას ლარზე მეტს ხარჯავთ წელიწადში ბავშვების განათლებაზე. [ეს] ძალიან კარგია და ვისურვებდი, რომ ყველა ოჯახს ჰქონდეს ამის საშუალება, მაგრამ საქართველოში, სადაც ბავშვები შიმშილობენ საგაკვეთილო სკოლაზე, ამის შესაძლებლობა არ აქვთ. მაინტერესებს, ან აქ მსხდომი უმრავლესობის წევრების შვილები თუ დადიან საჯარო სკოლებში… ან შვილებს ვკითხოთ, მათ სურთ უფასო კვება სასწავლო პროცესის დროს? დარწმუნებული ვარ, რომ ჩვენი და თქვენი შვილების უმრავლესობა ვინც საჯარო სკოლებში დადის, ყველა ბავშვს სურს ჰქონდეს შესაძლებლობა, რომ სკოლაში იყოს უფასო კვება”, — თქვა ბოკუჩავამ. საპასუხოდ, განათლების მინისტრმა დეპუტატი გააკრიტიკა და კითხვა უპასუხოდ დატოვა: “ქალბატონ თინას რა ვუპასუხოთ, სად არის, ან რა ილაპარაკა? ან თვითონ იცის, რა ილაპარაკა? არ ვიცი, როდის გაახსენდა სასკოლო კვება ან სკოლა როდის გაახსენდა. გაერთიანდნენ ქალბატონი თინა და ჩვენი ხაბე [ლევან ხაბეიშვილი რედ.], როგორც მას ირაკლი ზარქუა ეძახის. რა იყოს ახლა ეს?!.. ან ინტერპელაციის პირობებში ჯდება ეს, ან რაღაცა სტატისტიკოსი რომ გახდა და დეკლარაციებს არჩევს… რა შუაშია აქ შვილები, რა შუაშია აქ ბავშვები, როდესაც ვლაპარაკობთ საჭირბოროტო, ქვეყნისთვის მნიშვნელოვან საკითხზე? რომელიმეს მოგეწონათ “ნაციონალური მოძრაობიდან” მისი გამოსვლა? არა, რა თქმა უნდა, მაგრამ ამას ხომ არ იტყვით? ამიტომ ამას უპასუხოდ დავტოვებ”. სკოლებში უფასო კვების საკითხი დღეს საქართველოს პარლამენტში სიტყვით გამოვიდა განათლების ახლად დანიშნული მინისტრი – გიორგი ამილახვარი. მთავარი კითხვა, რომელიც მას ოპოზიციონერმა დეპუტატებმა დაუსვეს სკოლაში უფასო კვების პროგრამას ეხებოდა. საქართველოს მთავრობა, უკვე წელიწად-ნახევარზე მეტია, რაც სკოლაში კვების პროგრამაზე მუშაობს, თუმცა, ჯერჯერობით უცნობია, როდის დაინერგება სკოლებში აღნიშნული პროგრამა. ამილახვარი პარლამენტში ინტერპელაციის ფარგლებში მივიდა – ის ოპოზიციის დეპუტატებმა მიიწვიეს სკოლაში კვების პროგრამასთან დაკავშირებული კითხვებზე საპასუხოდ. UNICEF-ის კვლევის მიხედვით, მოსწავლეთა 35% სკოლაში არასდროს იკვებება. ამილახვარმა თქვა, რომ ამ 35%-ში შემავალი მოქალაქეების მიზეზი სხვადასხვაა, მათ შორის, 27% ამბობს, რომ არ სურს სკოლაში ჭამა, რადგან არ მოსწონს საკვები და მხოლოდ 20% ასახელებს მიზეზად ფინანსების არარსებობას. მინისტრის განცხადებით, სამინისტრო სკოლებში კვების პროგრამის დასანერგად ინტენსიურად მუშაობს და ხაზი გაუსვა, რომ ეს არ არის მხოლოდ საქართველოს პრობლემა. გამოსვლისას მან რამდენჯერმე გაუსვა ხაზი იმას, რომ უფასო კვება კომპლექსური საკითხია და მიემართება, მათ შორის, სკოლებში ინფრასტრუქტურის არარსებობის საკითხს. NETGAZETI

თბილისის მერიის განცხადებით, ხელშეკრულებას აუქმებს თავისი საერთაშორისო პარტნიორების მიერ 19 მაისს სანქცირებულ რუსულ კომპანიასთან, რომლისგანაც თბილისის მეტროპოლიტენისთვის ახალი ვაგონები უნდა ეყიდა. საუბარია “მეტროვაგონმაშზე”, რომელიც, როგორც მერია 2021 წელს ამბობდა, “ევროპის რეკონსტრუქციისა და განვითარების ბანკის”(EBRD) დაფინანსებით და მათივე წესებით გამოცხადებულ ორეტაპიან ტენდერში გამოვლინდა გამარჯვებულად. მაშინ მერია აცხადებდა, რომ ვაგონების ეტაპობრივი მოწოდება 2022 წლიდან უნდა დაწყებულიყო. ხელშეკრულების გაუქმების პროცედურის დაწყების შესახებ განცხადება უწყებამ პარასკევს, 19 მაისს გაავრცელა. “საზოგადოების მაღალი ინტერესის გათვალისწინებით, გვინდა გაცნობოთ, რომ თბილისის მუნიციპალიტეტმა დაიწყო კომპანია „მეტროვაგონმაშთან“ დადებული ხელშეკრულების გაუქმების პროცედურა. შეგახსენებთ, 2021 წლის მარტს, ევროპის რეკონსტრუქციისა და განვითარების ბანკის დაფინანსებით და მისივე ორგანიზებით, გამოცხადდა ტენდერი თბილისის მეტროპოლიტენისთვის 40 ახალი ვაგონის შესასყიდად. ჩატარებული ტენდერის შედეგად, 2021 წლის ნოემბერში, გამარჯვებულად გამოცხადდა კომპანია „მეტროვაგონმაში“და დაიდო ხელშეკრულება ვაგონების მოწოდებაზე. 2023 წლის 19 მაისს, ჩვენი საერთაშორისო პარტნიორების მხრიდან მოხდა აღნიშნული კომპანიის სანქცირება. როგორც საზოგადოებისთვის ცნობილია, საქართველო ახორციელებს საერთაშორისო ფინანსური სანქციების აღსრულებას. შესაბამისად, თბილისის მუნიციპალიტეტი არ აპირებს სანქცირებულ კომპანიასთან თანამშრომლობას და „მეტროვაგონმაშთან“ დადებული ხელშეკრულება გაუქმდება”, — ნათქვამია განცხადებაში. ნეტგაზეთი

ალბათ, ყველა დამეთანხმებით, რომ ცივილიზებული მსოფლიოს ნებისმიერ წერტილში, დაუშვებელია პოლიციელის სიტყვიერი შეურაცხყოფა, მასზე თავდასხმა და მის მიმართ ძალადობრივი ქმედებების განხორციელება - ამის შესახებ შინაგან საქმეთა მინისტრმა ვახტანგ გომელაურმა პარლამენტში, ინტერპელაციის ფორმატში სიტყვით გამოსვლისას განაცხადა. როგორც ვახტანგ გომელაურმა აღნიშნა, 7-8 მარტის აქციების მიმდინარეობისას საზოგადოებამ, ნათლად ნახა არაერთი ძალადობრივი ქმედება, უკანონობა, თავდასხმები, რასაც შედეგად 60-მდე პოლიციელის ჯანმრთელობის დაზიანება მოჰყვა. „შინაგან საქმეთა სამინისტროს შესაბამისი დანაყოფის წარმომადგენლები მიმდინარე წლის 7 მარტს, აქციის დაანონსების შემდეგ, საზოგადოებრივი წესრიგის დაცვის მიზნით, საკანონმდებლო ორგანოს მიმდებარედ განლაგდნენ და საპროტესტო აქციის მშვიდობიანად ჩატარებას უზრუნველყოფდნენ. დღის ბოლოს, საქართველოს პარლამენტში კენჭისყრის პროცედურის დასრულების შემდეგ, საქართველოს პარლამენტის წინ მიმდებარე აქციაზე, ერთ-ერთი გამომსვლელის მიერ გაკეთდა მოწოდება, რომ აქციის მონაწილეებს უნდა გადაენაცვლათ პარლამენტის შესასვლელებთან და წრე შემოერტყათ პარლამენტის შენობისთვის. არსებული ინფორმაციით, აქციის მონაწილეების გარკვეული ნაწილი მზად იყო მოეწყო საკანონმდებლო შენობის ბლოკირება რათა არ მისცემოდათ იქ მყოფ დეპუტატებს და პარლამენტის თანამშრომლებს შენობის უსაფრთხოდ დატოვების საშუალება. მოეწყოთ მათთვის „სირცხვილის კორიდორები“ და ასევე განეხორციელებინათ ინდივიდუალური თავდასხმები დეპუტატებზე. მოწოდების შესაბამისად აქციის მონაწილეები გაიყვნენ ორ ჯგუფად, დაიწყეს მოძრაობა 9 აპრილის და ჭიჭინაძის ქუჩების მიმართულებით“, -განაცხადა შინაგან საქმეთა მინისტრმა. როგორც ვახტანგ გომელაურმა აღნიშნა, ვინაიდან არსებობდა რეალური საფრთხე, რომ მომხდარიყო პარლამენტის შესასვლელების ბლოკირება და პარლამენტის შენობის დატოვების დროს საკანონმდებლო ორგანოს დეპუტატებსა და თანამშრომლებზე განხორციელებულიყო მიზანმიმართული ფიზიკური ანგარიშსწორება, შინაგან საქმეთა სამინისტროს მხრიდან მიღებული იქნა გადაწყვეტილება დამატებითი საპოლიციო ძალების გამოყვანის შესახებ. „საპოლიციო კორდონებით განხორციელდა ჭიჭინაძისა და 9 აპრილის ქუჩების გადაკეტვა, რათა დაცული ყოფილიყო პარლამენტის გამოსასვლელები. დაახლოებით 21:00 საათზე, საქართველოს პარლამენტის შენობასთან შეკრებილმა მოქალაქეებმა პოლიციის თანამშრომლების მიმართ, რომლებიც განლაგებულნი იყვნენ 9 აპრილისა და ჭიჭინაძის ქუჩებზე, დაიწყეს აგრესიული ქმედებები, რაც გამოიხატებოდა სიტყვიერ შეურაცხყოფაში, ფიზიკურ დაპირისპირებასა და თავდასხმებში“, - აღნიშნა ვახტანგ გომელაურმა. იპნ

პარტია "საქართველოსთვს" თავმჯდომარის მოადგილე ნათია მეზვრიშვილი ირაკლი კობახიძეზე - ეს კაცი დაიმახსოვრეთ - დღეს ხელისუფლების მხრიდან სახელმწიფო ღალატის სიმბოლო და ხვალ, ევროკავშირის წევრ საქართველოში, დამოუკიდებელი მართლმსაჯულების პირობებში, სახელმწიფო ღალატის საქმის გამოძიების ერთ-ერთი მთავარი ფუგურანტი! "არ ვაპირებ შევეგუო ისეთ საქართველოში ცხოვრებას, სადაც რუსეთისთვის ქვეყნის ჩამბარებლები პასუხისმგებლობას გაექცევიან! ირაკლი კობახიძე / Irakli Kobakhidze ხელს ვერ გაიშვერ პატრონისკენ! ორგანიზატორი, თანამონაწილე და ამსრულებელი თანაბრად დაისჯება!", - წერს ნათია მეზვრიშვილი.

დღეს გიგა ოთხოზორიას მკვლელობიდან 7 წლის თავზე, მისი მკვლელების ჩამოყვანისა და პასუხისმგებლობაში მიცემის ნაცვლად, მოსკოვიდან თბილისში შესრულდა პირდაპირი რეისი, რომელსაც ოცნება სიამაყით ხვდება და ამას საკუთარ წარმატებადაც ასაღებს., - აცხადებს ყოფილი პრემიერი და პარტია "საქართველოსთვის" თავმჯდომარე გიორგი გახარია. მისი თქმით, ქართველი ხალხი აუცილებლად დაიცავს ქვეყნის თავისუფლებას, მშვიდობას და ევროპულ მომავალს. "ვინმეს თუ გონია, რომ ხალხის მიერ არჩეული ქვეყნის განვითარების ვექტორის შეცვლას ეცდება და პასუხისმგებლობას დაემალება, ცდება. პასუხისმგებლობა იქნება პერსონიფიცირებული და ეს ეხება ყველას და უპირველეს ყოვლისა დამალულ ივანიშვილს, რომელიც თავისი მარიონეტებით ამ პროცესს მართავს. ქართველი ხალხი აუცილებლად დავიცავთ ჩვენი ქვეყნის თავისუფლებას, მშვიდობას და ევროპულ მომავალს.", - აღნიშნავს გახარია.

ფრენების აღდგენა ვერ იქნება განხილული, როგორც პუტინის ზრუნვა ჩვენს მოქალაქეებზე, ეს არის აბსურდი იმ ქვეყნის მხრიდან, რომელსაც 20 პროცენტი აქვს ოკუპირებული, – ამის შესახებ პარტია „საქართველოსთვის“ წევრმა, ბექა ლილუაშვილმა განაცხადა. ლილუაშვილის თქმით, რუსეთის მთავარი მიზანია, ხელი შეუშალოს სტატუსის მიღებას და ევროინტეგრაციას. „ფრენების აღდგენას ხელისუფლება ურცხვად ასაღებს, როგორც ქართველების დაკმაყოფილების საჭიროებას, როცა ეს საჭიროება გუშინ არ დამდგარა, იდგა ბოლო 10-15 წლის განმავლობაში. ამიტომ ეს ვერ იქნება განხილული ცალკე აღებულ მოვლენად, როგორც პუტინის ზრუნვა ჩვენს მოქალაქეებზე. ეს არის აბსურდი იმ ქვეყნის მხრიდან, რომელსაც 20 პროცენტი აქვს ოკუპირებული. ჩვენ რომ აშშ-თან გაღრმავებული სტრატეგიული პარტნიორობა გვქონდეს, გაჩანაგების ნაცვლად, რასაც „ქართული ოცნება“ ყოველდღიურად აკეთებს; რომ გვქონდეს კანდიდატის სტატუსი და უკრაინასთან და მოლდოვასთან ერთად განიხილებოდეს საქართველო, როგორც სწრაფი, დაჩქარებული გაწევრიანების პროცესის მონაწილე, ამ მოცემულობაში მისასალმებელი იქნებოდა რუსეთის მხრიდან ჩვენი მოქალაქეების საჭიროებების დაკმაყოფილება, მაგრამ ეს არ გაკეთდება, რადგან რუსეთის მთავარი მიზანია, ხელი შეუშალოს სტატუსის მიღებას და ევროინტეგრაციას. ჩვენი ხელისუფლების პოზიცია, რომ ეს არის ჰუმანიტარული გადაწყვეტილება, ჩრდილს აყენებს იმ ადამიანების ისტორიულ წვლილს, რომლებმაც საკუთარი სიცოცხლე მიუძღვნეს ამ ქვეყნის დამოუკიდებლობას და სუვერენიტეტს“, – განაცხადა ლილუაშვილმა. ავტორი - მანანა დევაძე

თუ მტერი ხარ, მაშინ აიღე იარაღი და ისროლე, - ამის შესახებ „ქართული ოცნების“ თავმჯდომარე ირაკლი კობახიძემ პარლამენტში ჟურნალისტებთან განაცხადა. ამით უპასუხა შეკითხვას იმის შესახებ, არის თუ არა რუსეთი საქართველოს მტერი. მისი თქმით, მსგავსი კითხვების დასმა მიანიშნებს იმაზე, რომ ქვეყანაში გლობალური ომის პარტია არსებობს, რომელიც ქვეყნის „უკრაინიზაციას“ ცდილობს. „არის თუ არა რუსეთი მტერი, ეს არის სპეკულაციური შეკითხვა, რომლის მიზანიც ესკალაციაა. ეს მიანიშნებს იმაზე, რომ არსებობს გლობალური ომის პარტია, რომელიც ყველაფერს აკეთებს იმისათვის, რომ საქართველოს უკრაინიზაცია მოხდეს. რუსეთი, რა თქმა უნდა, ოკუპანტია, მაგრამ თუ მტერი ხარ, მაშინ აიღე იარაღი და ისროლე“, - განაცხადა კობახიძემ. ინტერპრესნიუსი

საპარლამენტო უმრავლესობის დეპუტატებმა კენჭისყრის წინ რეგისტრაცია არ გაიარეს - შედეგად, „ქოლ - ცენტერების“ საქმეზე დროებითი საგამოძიებო კომისიის შექმნის საკითხს კენჭი ვერ ეყარა. რეგისტრაციის პროცედურა 54 ოპოზიციონერმა დეპუტატმა გაიარა, რაც დროებითი საგამოძიებო კომისიის შესაქმნელად საკმარისი რაოდენობა იყო, თუმცა თავად კენჭისყრის დაწყების წინ სულ მცირე 76 დეპუტატის რეგისტრირება იყო საჭირო. უმრავლესობის დეპუტატებმა რეგისტრაცია არ გაიარეს და ამ გზით კენჭისყრა "ჩააგდეს". აღსანიშნავია, რომ მმართველმა გუნდმა ანალოგიურ მეთოდს მაშინაც მიმართა, როცა კენჭისყრაზე სასამართლო ხელისუფლებასთან დაკავშირებით დროებით საგამოძიებო კომისიის შექმნის საკითხი უნდა გასულიყო და ოპოზიციას აღნიშნული კომისიის შესაქმნელად ხმები ჰყოფნიდა. იპნ

Berdia Sitchinava (პარტია "საქართველოსთვის" აღმასრულებელი მდივანი) პრემიერმა რუსეთთან ახლო ურთიერთობებზე კომენტარისას განაცხადა, ეს 700 მილიონი ლარი საიდან ვიშოვეთ აბაო, ეხლა რომ დევნილებს ვუშენებთ სახლებსო. რუსეთისგან დევნილი ჩვენი მოქალაქეებისთვის სახლების აშენებაზე საუბრობს, რუსეთისგან დევნილებისთვის!

თბილისის საერთაშორისო აეროპორტში მიმდინარე აქციაზე რამდენიმე ადამიანი დააკავეს. ამ დროისთვის უცნობია მათი ვინაობა. აქციის მონაწილეები რუსეთთან პირდაპირი ფრენების აღდგენის შემდეგ საქართველოში პირველი თვითმფრინავის ჩამოფრენას აპროტესტებენ. აქციის ერთ-ერთი მონაწილის, ცირა ელისაშვილის თქმით, საქართველოსთვის რუსული თვითმფრინავის ჩამოფრენა ღირსების საკითხია: “ღირსების საკითხია. მარტო ცემი არა. ჩემი ოჯახის, ჩემი ქვეყნის ღირსების საკითხია, რომ რუსული თვითმფრინავი აქ არ უნდა დაჯდეს არც დღეს და არც ხვალ იმიტომ, რომ ჩვენ არ ვართ მშვიდობიან პერიოდში. განსხვავება ერთადერთია — უკრაინაში შედიან ტანკები და ჩვენთან ჩამოდიან თვითმფრინავები. ექსპანსია და ოკუპაცია ხდება ცემი ქვეყნის”, — განაცხადა ელისაშვილმა “ფორმულასთან”. აქციის პარალელურად აეროპორტთან მობილიზებულია პოლიციაც. აქცია თავდაპირველად პარტია “დროას” ლიდერმა, ელენე ხოშტარიამ დააანონსა. ის აცხადებდა, რომ რუსეთთან პირდაპირი ფრენების აღდგენა საფრთხეს უქმნის საქართველოს კანდიდატის სტატუსს და ქვეყნის ეროვნული ინტერესების ღალატია. დაკავების შესახებ ინფორმაციის დაზუსტებას “ნეტგაზეთი” შინაგან საქმეთა სამინისტროსთან ცდილობს. რუსეთმა 10 მაისს მოხნა შეზღუდვა საქართველოსთან პირდაპირ ფრენებზე. მოსკოვში ამ გადაწყვეტილებას „ჰუმანიტარული ხასიათის“ უწოდეს. საქართველოს ხელისუფლება მოსკოვის გადაწყვეტილებას მიესალმება და ამბობს, რომ ეს გაუმარტივებს ცხოვრებას რუსეთში მცხოვრებ „მილიონ ქართველს“. მთავრობაში აგრეთვე აცხადებენ, რომ მხოლოდ არასანქცირებული კომპანიები და ხომალდები შეძლებენ ფრენას. პოლიტიკოსების და მოქალაქეთა ნაწილი ავიამიმოსვლის აღდგენას აპროტესტებს. ფრენების ნებართვა უკვე მიიღო სამმა კომპანიამ – რუსულმა „აზიმუტმა“, Red Wings-მა და ქართულმა „Georgian Airways-მა“. ფრენების აღდგენას კრიტიკულად უყურებენ აშშ და ევროკავშირი. ნეტგაზეთი

Anna Buchukuri - ახლა პარლამენტში განიხილება ქოლ-ცენტრების საგამოძიებო კომისიის შექმნის საკითხი. ამდენი კითხვა ოცნების დეპუტატებს არასოდეს დაუსვამთ ამ მოწვევის პარლამენტში. სრულად მობილიზებულები არიან, მაგრამ “შეკითხვები” ძირითადად ეხება გახარიას. გახარია ხო იყო იქო. მართლა არ ვიცოდი, ასე თუ ნერვიულობდნენ გახარიაზე. ხოდა, გამოიძიეთ ბატონო. სხვას კი არაფერს ვითხოვთ ჩვენ. 1975 წლიდან გამოიძიეთ - აი, გახარია რომ დაიბადა, მაგ წლიდან. ქართული ოცნება / Georgian Dream

ზუგდიდის მუნიციპალიტეტის სოფელ ხურჩაში, საოკუპაციო ხაზის მიმდებარედ ე.წ საზღვართან, 30 წლის საქართველოს მოქალაქის გიგა ოთხოზორიას მკვლელობიდან დღეს 7 წელი გავიდა. გიგა ოთხოზორიას დედის ჯულიეტა ჭანტურიას თქმით, მისი შვილის მკვლელს პასუხი ამ დრომდე არ გაეცა. მისივე თქმით, სამართლის პოვნა უფრო მეტად გართულდა. „ამ 7 წლის განმავლობაში იმედით ვცოცხლობ. დღეს კიდევ რომ წამოვწიეთ ჩემი შვილის მკვლელობის საკითხი, მერიდება, ჩემი ქართველი ხალხის მერიდება. სამართალს ვერ ვხედავ, მგონია, რომ ახლა უფრო გაჭირდება სამართლის პოვნა და მიღწევა. მე დღეს ჩემ შვილთან ერთად დავტირი ყველა იმ ახალგაზრდას, რომელიც სამშობლოს სიყვარულს შეეწირა. ვინც იბრძოლა თავისი სამშობლოსთვის. პირტიტველა ბიჭები გმირები გახდნენ და ამ დროს, მგონი, ცოტა გასაკვირია, რომ რუსებს ზარ-ზეიმით დავხვდით. ამ ხნის განმავლობაში ყოველდღე ვფიქრობ, რომ დღეს შეიძლება რაღაც მოხდეს და პასუხი გაეცეს ჩემი შვილის მკვლელს და ათასობით ქართველის მკვლელს, მაგრამ როგორც ხედავთ, დღეები მიდის. ახლა იმედის ნაპერწკალიც გამიქრა”, - განაცხადა ჯულიეტა ჭანტურიამ. გიგა ოთხოზორიას დედის თქმით, ის, რომ საქართველოში მოსკოვიდან მომავალი პირველი რეისი დღეს ჩამოფრინდება, უხერხულობას უნდა უქმნიდეს მათ, ვინც ამ ფაქტს მესალმება. „დღეს პირველად, რომ ჩამოვაფრენთ რუსეთის თვითმფრინავს, ალბათ, მას დელეგაცია ჩამოჰყვება, რომელსაც ისევ ჩვენები დახვდებიან. რატომღაც მგონია, რომ ცოტა უხერხულობას უნდა უქმნიდეთ არა იმიტომ, რომ ჩემი შვილი დღეს მოკვდა, არა! საერთოდ ვინც დადებითად ჩავთვლით, რომ ეს მოვლენა კარგია, მათ ცოტა უხერხულობის მომენტი უნდა ჰქონდეთ”, - აღნიშნა ჯულიეტა ჭანტურიამ. ცნობისთვის, გიგა ოთხოზორია ე.წ. მესაზღვრემ რაშიდ კანჯი-ოღლიმ 2016 წლის 19 მაისს, დაახლოებით, 15:00 საათზე, ხურჩა-ნაბაკევის ე.წ საზღვართან, საქართველოს მიერ კონტროლირებად ტერიტორიაზე ცეცხლსასროლი იარაღიდან გასროლით მოკლა. ინტერპრესნიუსი

შსს-ს ინფორმაციით, ვანში პოლიციამ დააკავა პირი, რომელსაც ბრალად სკოლის მოსწავლეზე სექსუალური ძალადობა ედება. უწყება ამბობს, დაკავებული სკოლის მიკროავტობუსის მძღოლია. სამინისტრო ამბობს, რომ გამოძიების თანახმად, 62 წლის მძღოლმა მგზავრობის დროს არასრულწლოვან გოგონას, სექსუალური ხასიათის მატარებელი საუბარი დაუწყო და მისი ნების საწინააღმდეგოდ სხეულზე შეეხო. სამართალდამცველებმა, ჩატარებული საგამოძიებო მოქმედებების შედეგად, დანაშაულის ჩამდენი პირი, მოსამართლის განჩინების საფუძველზე დააკავეს. გამოძიება წინასწარი შეცნობით არასრულწლოვანის მიმართ სექსუალური ხასიათის სხვაგვარი ქმედების იძულების ფაქტზე საქართველოს სისხლის სამართლის კოდექსის 139-ე მუხლის მე-4 ნაწილის “ბ” ქვეპუნქტით მიმდინარეობს. ეს დანაშაული 9-დან 15 წლამდე ვადით თავისუფლების აღკვეთას ითვალისწინებს. ნეტგაზეთი