tvati

განათლების და მეცნიერების სამინისტროს ცნობით, 2023-2024 სასწავლო წლისთვის ზოგადსაგანმანათლებლო დაწესებულებებში პირველკლასელთა რეგისტრაციისა და სკოლაში ჩასარიცხად აუცილებელი დოკუმენტების წარდგენის ვადები შეიცვალა. უწყების ინფომაციით, 2023-2024 სასწავლო წელს პირველ კლასში დამატებით უნდა განხორციელდეს იმ ბავშვების ჩარიცხვა, რომელთაც 6 წელი 16 სექტემბრიდან 1-ელ ნოემბრამდე შეუსრულდებათ. „მოგეხსენებათ, პირველკლასელთა რეგისტრაციის მიმდინარეობისას საქართველოს განათლებისა და მეცნიერების სამინისტროსა და პარლამენტის განათლებისა და მეცნიერების კომიტეტის ერთობლივი გადაწყვეტილებით, „ზოგადი განათლების შესახებ კანონში“ შევიდა ცვლილება საქართველოს ზოგადსაგანმანათლებლო დაწესებულებებში დაწყებით საფეხურზე სწავლის დაწყების ასაკთან დაკავშირებით. აღნიშნული ცვლილების გათვალისწინებით 2023-2024 სასწავლო წელს პირველ კლასში დამატებით უნდა განხორციელდეს იმ ბავშვების ჩარიცხვა, რომელთაც 6 წელი 16 სექტემბრიდან 1-ელ ნოემბრამდე შეუსრულდებათ. აღნიშნულიდან გამომდინარე, საქართველოს განათლებისა და მეცნიერების მინისტრის 2023 წლის 15 მაისის N 543304 ბრძანების მიხედვით პირველკლასელთა რეგისტრაციისა და სკოლაში ჩასარიცხად აუცილებელი დოკუმენტების წარდგენის ვადები შემდეგნაირად განისაზღვრა: გახანგრძლივდა ამჟამად მიმდინარე II ეტაპი – მეორე ეტაპზე რეგისტრაცია 2023 წლის 19 მაისის ჩათვლით იქნება შესაძლებელი და სკოლაში დარეგისტრირდებიან ის ბავშვები, რომელთა: ა) და-ძმაც სწავლობს სასურველ სკოლაში; ბ) მშობელი/მეურვე/მზრუნველი სასურველი საჯარო სკოლის თანამშრომელია; გ) ოჯახიდან ერთდროულად ორი ან მეტი ბავშვი შედის პირველ კლასში. მეორე ეტაპზე რეგისტრაცია ხორციელდება საჯარო სკოლებში მშობლის/კანონიერი წარმომადგენლის მიერ ჩასარიცხად აუცილებელი დოკუმენტაციის წარდგენის საფუძველზე. რეგისტრაციას უზრუნველყოფს საჯარო სკოლა. 2023 წლის 22-23 მაისს დამატებით განხორციელდება რეგისტრაცია სპეციალური საგანმანათლებლო საჭიროების მქონე ბავშვებისთვის, რომლებიც რეგისტრაციის პირველი ეტაპისთვის თავდაპირველად განსაზღვრულ ვადებში ვერ დარეგისტრირდნენ სკოლებში. პირველ ეტაპზე დასარეგისტრირებელი ბავშვების მშობლებმა განცხადებით უნდა მიმართონ სასურველ საჯარო სკოლას. სკოლის ადმინისტრაცია ბავშვს განათლების მართვის საინფორმაციო სისტემაში (EMIS) დაარეგისტრირებს. სპეციალური საგანმანათლებლო საჭიროების დადასტურების მიზნით, მშობელი სკოლაში შესაბამის მიმართვის ფორმას ავსებს, რის შემდეგაც მულტიდისციპლინური გუნდის მიერ ბავშვის შეფასება და მისი საგანმანათლებლო საჭიროების დადგენა მოხდება. სპეციალური საგანმანათლებლო საჭიროების დადასტურების შემთხვევაში, სკოლა მოსწავლის ჩარიცხვას შესაბამისი დოკუმენტაციის საფუძველზე უზრუნველყოფს. პირველ ეტაპზე რეგისტრირებული ბავშვებისთვის დოკუმენტების წარდგენისა და ჩარიცხვის პერიოდია 2023 წლის 24 მაისიდან 2 ივნისის ჩათვლით. სპეციალური საგანმანათლებლო საჭიროების მქონე მოსწავლედ შესაძლოა, ჩაითვალოს ბავშვი, რომელსაც აქვს: ა) ფიზიკური შეზღუდვა; ბ) ინტელექტუალური განვითარების დარღვევა; გ) სწავლის უნარის დარღვევა; დ) სენსორული განვითარების დარღვევა (სმენის და/ან მხედველობის); ე) მეტყველების განვითარების დარღვევა; ვ) ქცევითი და ემოციური დარღვევა; ზ) გრძელვადიანი ჰოსპიტალიზაციის საჭიროება თ) სოციალური ფაქტორებით გამოწვეული სირთულეები სწავლაში, რის გამოც ვერ ძლევს ეროვნული სასწავლო გეგმის მოთხოვნებს; ი) აუტიზმის სპექტრი. იმ ბავშვებს, რომლებსაც არ დაუდასტურდებათ სპეციალური საგანმანათლებლო საჭიროება, საშუალება ექნებათ, რეგისტრაცია მომდევნო ეტაპებზე გაიარონ. III ეტაპი – საყოველთაო რეგისტრაცია 8 ივნისს დაიწყება და 23 ივნისის ჩათვლით გაგრძელდება. რეგისტრაცია განხორციელდება განათლების მართვის საინფორმაციო სისტემის ოფიციალურ ვებგვერდზე registration.emis.ge. რეგისტრაციას უზრუნველყოფს მშობელი/კანონიერი წარმომადგენელი. ელექტრონულად რეგისტრირებული მოსწავლის ჩასარიცხად აუცილებელი დოკუმენტაციის წარდგენა 26 ივნისიდან 12 ივლისის ჩათვლით განხორციელდება. დადგენილ ვადებში დოკუმენტაციის წარუდგენლობის შემთხვევაში, რეგისტრაცია ავტომატურად გაუქმდება. IV ეტაპი – 17 ივლისიდან 28 ივლისის ჩათვლით სკოლებში განხორციელდება. ამ ეტაპზე დარჩენილ თავისუფალ ადგილებზე ან წინა ეტაპებზე გამოთავისუფლებულ ადგილებზე იმ მოსწავლეების რეგისტრაცია მოხდება, რომლებიც ვერ დარეგისტრირდნენ I, II და III ეტაპებზე, ან სურთ რეგისტრაციის შეცვლა. მოსწავლის რეგისტრაციას მეოთხე ეტაპზე უზრუნველყოფს საჯარო სკოლა მშობლის/კანონიერი წარმომადგენლის მიერ წარდგენილი აუცილებელი დოკუმენტაციის საფუძველზე. პირველ კლასში ჩასარიცხად აუცილებელი დოკუმენტები: მოსწავლის კანონიერი წარმომადგენლის განცხადება, რომელიც უნდა შეიცავდეს კანონიერი წარმომადგენლის საცხოვრებელი ადგილისა და ტელეფონის ნომრის თაობაზე ინფორმაციას და უნდა აკმაყოფილებდეს საქართველოს ზოგადი ადმინისტრაციული კოდექსის 78-ე მუხლით დადგენილ სხვა მოთხოვნებს, კანონიერი წარმომადგენლის პირადობის დამადასტურებელი მოწმობის ასლი და საქართველოში ბინადრობის დამადასტურებელი დოკუმენტის ასლი (ასეთის არსებობის შემთხვევაში). დოკუმენტების უცხოურ ენაზე წარდგენის შემთხვევაში, მათ უნდა დაერთოს საქართველოს კანონმდებლობით დადგენილი წესით შესრულებული თარგმანი ქართულ ენაზე). მოსწავლის დაბადების მოწმობის ან პირადობის დამადასტურებელი დოკუმენტის ასლი და საქართველოში ბინადრობის დამადასტურებელი დოკუმენტის ასლი (ასეთის არსებობის შემთხვევაში). დოკუმენტების უცხოურ ენაზე წარდგენის შემთხვევაში, მათ უნდა დაერთოს საქართველოს კანონმდებლობით დადგენილი წესით შესრულებული თარგმანი ქართულ ენაზე). საქართველოს განათლებისა და მეცნიერების სამინისტრო მშობლებს მოუწოდებს, ყურადღებით გაეცნონ რეგისტრაციის ვადებსა და პირობებს, რათა ბავშვის სკოლაში შეყვანა დროულად და შეუფერხებლად შეძლონ“, - აღნიშნულია ინფორმაციაში.

რუსეთის საოკუპაციო ძალების წარმომადგენლებმა, გორის მუნიციპალიტეტის სოფელ ერგნეთის მიმდებარედ, ოკუპირებულ ტერიტორიაზე საქართველოს მოქალაქე უკანონოდ დააკავეს. ამის შესახებ ინფორმაციას სახელმწიფო უსაფრთხოების სამსახური ავრცელებს. უწყების ცნობით, აღნიშნული ინციდენტის შესახებ ინფორმაციის მიღებისთანავე, სახელმწიფო უსაფრთხოების სამსახურის მიერ გააქტიურდა ევროკავშირის სადამკვირვებლო მისიის მიერ ოპერირებული “ცხელი ხაზი”. „ინციდენტის შესახებ დაუყოვნებლივ ეცნობა საერთაშორისო პარტნიორებსა და ჟენევის საერთაშორისო დისკუსიების თანათავმჯდომარეებს. ამოქმედებულია ყველა არსებული მექანიზმი უკანონოდ დაკავებული საქართველოს მოქალაქის უმოკლეს ვადებში გასათავისუფლებლად. საქართველოს ოკუპირებულ ტერიტორიებზე, ისევე როგორც საოკუპაციო ხაზის გასწვრივ ჩადენილ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალა”, - აღნიშნულია ინფორმაციაში. ipn

პარლამენტის 19 მაისის პლენარულ სხდომაზე ინტერპელაციის წესით სამ მინისტრს მოუსმენენ. ოპოზიციონერი დეპუტატების მოთხოვნით ინტერპელაციით პარლამენტში დაბარებული არიან შს მინისტრი ვახტანგ გომელაური, განათლებისა და მეცნიერების მინისტრი გიორგი ამილახვარი და ეკონომიკისა და მდგრადი განვითარების მინისტრი ლევან დავითაშვილი. შინაგან საქმეთა მინისტრი ვახტანგ გომელაური ინტერპელაციის ფორმატში რვა ოპოზიციონერმა დეპუტატმა დაიბარა. მინისტრის მიმართ მათი კითხვა ეხება, თუ რამდენად პროპორციული იყო ძალა, რომელიც სამართალდამცავებმა მიმდინარე წლის 7-8 მარტს დემონსტრანტების წინააღმდეგ გამოიყენეს და წარმოადგენდა თუ არა ის შეკრებისა და გამოხატვის თავისუფლებაში უკანონო ჩარევას. ასევე, მოხდა თუ არა შესაბამისი წესის დაცვით სპეციალური საშუალებების (წყლის ჭავლის, ე.წ. წიწაკის სპრეის და ცრემლმდენი გაზის გამოყენება. განათლების მინისტრი გიორგი ამილახვარი ინტერპელაციით ფრაქცია “ნაციონალურმა მოძრაობამ“ სკოლებში ბავშვთა უფასო კვების საკითხთან დაკავშირებით დაიბარა. რაც შეეხება ეკონომიკისა და მდგრადი განვითარების მინისტრს ლევან დავითაშვილს, მათ ანაკლიის პორტთან დაკავშირებით გაგზავნილ კითხვებს უნდა უპასუხოს.

საპარლამენტო ოპოზიცია მიმდინარე კვირის პლენარულ სხდომაზე განსახილველად ე.წ. ქოლცენტრების საქმეზე საგამოძიებო კომისიის შექმნის საკითხის გატანას ითხოვს. ბიუროს მიერ განსაზღვრულ დღის წესრიგში “ქოლცენტრების“ საქმეზე საგამოძიებო კომისიის შექმნის ინიციატივა შეტანილია, თუმცა ბოლო - 108-ე საკითხად არის წარმოდგენილი. ბიუროს სხდომაზე პარტია “საქართველოსთვის“ დეპუტატმა ბექა ლილუაშვილმა, რომელიც ერთ-ერთი ინიციატორია, რიგითობის შეცვლა მოითხოვა. “რატომ ხდება ისე, რომ განსახილველად ახლადშემოტანილი საკითხები რიგითობით არის უფრო წინ, ვიდრე მანამდე ინიცირებული საკითხები. უცნაურია - საგამოძიებო კომისიის შექმნის საკითხი წინა პლენარულ სხდომაზე გადაიდო. ახლა კი რიგითობით მასზე წინ ახალი საკითხები “ჯდება“, ხოლო ეს საკითხი სულ ბოლო საკითხად არის ჩასმული. ეს ლოგიკას არ ექვემდებარება“, - მიმართა ბიუროს ბექა ლილუაშვილმა. საგამოძიებო კომისიის შექმნის საკითხის განხილვა ფრაქცია “ნაციონალური მოძრაობის“ დეპუტატმა თინა ბოკუჩავამაც მოითხოვა. ბოკუჩავას თქმით, ოპოზიციას კონსტიტუციური უფლების გამოყენების შესაძლებლობა უნდა მიეცეს. “ინიციატივა ძალიან მნიშვნელოვანია, რადგან “ქოლცენტრების“ საკითხზე საზოგადოებაში კითხვები არსებობს. გამოყენებული უნდა იყოს პარლამენტის უფლებამოსილება იმისთვის, რომ კითხვებს პასუხები გაეცეს, მით უფრო როცა საგამოძიებო უწყებების მიმართ ნდობა ძალიან დაბალია. იმედი გვაქვს სხვადასხვა პროცედურულ ხრიკებს არ გამოიყენებთ იმისთვის, რომ ამ საკითხზეც პარლამენტში საგამოძიებო კომისია არ შეიქმნას“, - განაცხადა თინა ბოკუჩავამ. ipn

პროკურატურის ცნობით, თბილისის საქალაქო სასამართლოში ნაფიცმა მსჯულებმა შურისძიებით ჩადენილ მკვლელობაში ბრალდებული დამნაშავედ ცნეს და სასამართლომ მას 13 წლით თავისუფლების აღკვეთა მიუსაჯა. უწყების ცნობით, ნაფიცი მსაჯულები, საქმის გარემოებებისა და მტკიცებულებების დეტალურად შესწავლის შემდეგ, დარწმუნდნენ პროკურატურის პოზიციის მართებულობაში და ბრალდებული სისხლის სამართლის კოდექსის 108-ე მუხლით, რაც განზრახ მკვლელობას გულისხმობს, დამნაშავედ ცნეს. publika

ეკონომიკის მინისტრმა ლევან დავითაშვილმა მთავრობის სხდომის დასრულების შემდეგ გამართულ ბრიფინგზე რუსეთიდან ფრენებთან დაკავშრებით ისაუბრა. მან კიდევ ერთხელ გაიმეორა, რომ ეს იყო ცალმხრივი გადაწყვეტილება იყო და საქართველოს ხელისუფლებას ამაში რამე წვლილი არ მიუძღვის. ლევან დავითაშვილის თქმით, პირდაპირი ფრენების აღგენის შესახებ პუტინის განკარგულებისთანავე, გასული კვირის ბოლოს უკვე საქართველომ მიიღო რამდენიმე განაცხადი, როგორც რუსული, ისე ქართული ავიაკომპანიებისგან. მისი თქმით, 3 ავიაკომპანიის განაცხადი აქვთ მიღებული, თუმცა ჯერ დოკუმენტაციის შესწავლა მიმდინარეობს. „…ახლა რაც შეეხება ჩვენს გადაწყვეტილებებს და მომართვებს. დიახ, ჩვენ მივიღეთ მომართვები, გასული კვირის ბოლოს, გადაწყვეტილების მიღებისთანავე, როგორც რუსული, ისე ქართული ავიაკომპანიებისგან. საკმაოდ ინტენსიური მუშაობა გვქონდა შიგნით ექსპერტებთან ერთად, სამინისტროსა და სამოქალაქო ავიაციის სააგენტოს ექსპერტებთან ერთად იმისთვის, რომ შეგვესწავლა თუ როგორი პრაქტიკა არსებობს რუსეთთან ფრენების კუთხით. ეკონომიკის მინისტრმა განაცხადა, რომ დღის განმავლობაში დაასრულებენ ისინი მღებული განაცხადების შესწავლას, რამდენად შესაბამისობაშია რომელიმე კომპანია მათ მიერ შეუშავებულ ამ ორ კრიტერუმთან და შემდეგ უკვე გაავრცელებენ ინფორმაციას ფრენაზე ნებართვის გაცემასთან დაკავშირებით. პუბლიკა

ამერიკის შეერთებული შტატების ელჩი საქართველოში, კელი დეგნანი, რუსეთიდან პირდაპირი ფრენების აღდგენის შესახებ აცხადებს, რომ მთავარი შეკითხვაა, რატომ მიიღო პუტინმა ეს გადაწყვეტილება ახლა. მისი თქმით, ქართველების უმრავლესობა უფრო ბედნიერი იქნებოდა, პუტინს რუსული ჯარი ოკუპირებული აფხაზეთიდან და ცხინვალის რეგიონიდან რომ გაეყვანა. „მე მესმის, რატომ აქვთ ქართველებს კითხვის ნიშნები პირდაპირი ფრენების აღდგენასთან დაკავშირებით რუსეთსა და საქართველოს შორის. მე ვფიქრობ, აქ კითხვა იმაში მდგომარეობს, რატომ აძლევს პუტინი ამ საჩუქარს საქართველოს ახლა. მე ვფიქრობ, ქართველების უმრავლესობა უფრო მეტად ბედნიერი იქნებოდა პუტინს რუსული ჯარები აფხაზეთიდან და ცხინვალის რეგიონიდან რომ გაეყვანა, შეესრულებინა ცეცხლის შეწყვეტის შეთანხმებით ნაკისრი ვალდებულებები და უკან გაეხმო აფხაზეთისა და ცხინვალის აღიარება. ეს იქნებოდა ნამდვილად ჟესტი, რომელსაც ექნებოდა მნიშვნელობა საქართველოსთვის. პუტინი უბრალოდ არაფერს გასცემს, აქედან გამომდინარე, ვფიქრობ, მნიშვნელოვანია კითხვის დასმა იმასთან დაკავშირებით, თუ რატომ გასცემს ის ამას ნაცვლად ისეთი რაღაცისა, რაც იქნებოდა ნამდვილად მნიშვნელოვანი საქართველოსთვის, რაც იქნებოდა აფხაზეთისა და ცხინვალის აღიარების გაუქმება და ცეცხლის შეწყვეტის შეთანხმებით ნაკისრი ვალდებულების შესრულება“, – განაცხადა დეგნანმა. მისი თქმით, ფრენების აღდგენა კომერციული გადაწყვეტილებაა. „ჩვენ ვმუშაობდით ამერიკის შეერთებულ შტატებსა და საქართველოს შორის ფრენებზე რამდენიმე წლის განმავლობაში. ეს არის კომერციული გადაწყვეტილება, რომელსაც ავიაკომპანია უნდა დათანხმდეს, მაგრამ ,რა თქმა უნდა, ჩვენ ამას მხარს დავუჭერთ და ვფიქრობ, რომ საქართველოს მთავრობაც იგივეს გააკეთებს“, – განაცხადა ელჩმა. პუბლიკა

მოსკოვის ოლქის ქალაქ კლიმოვსკში [54 კმ მოსკოვიდან] ელექტროგადამცემი ხაზების ბურჯები დანაღმეს – იუწყება სახელისუფლებო სააგენტო „ტასი“ სამართალდამცავ ორგანოებზე დაყრდნობით. მომხდართან დაკავშირებით ამ ეტაპზე სხვა დეტალები არ ხმაურდება. ბოლო კვირებში, გახშირდა ცნობები რუსეთის სხვადასხვა რეგიონში ელექტროგადამცემ ხაზებთან აღმოჩენილი ასაფეთქებელი ნივთიერებების შესახებ. ამჟამად ადგილზე მუშაობენ გამნაღმველები და უშიშროების ფედერალური სამსახურის [ფსბ] თანამშრომლები. ნეტგაზეთი

საქართველოს სამოქალაქო ავიაციის სააგენტო აცხადებს, რომ რუსეთ-საქართველოს შორის პირდაპირი ავიამიმოსვლის დაწყება რამდენიმე კომპანიას უნდა. საქართველოს სახელმწიფო უწყება არ აკონკრეტებს, აქვს თუ არა ნებართვა გაცემული. "სამოქალაქო ავიაციის სააგენტოში წარმოდგენილ თითოეულ მომართვასთან დაკავშირებით, გადაწყვეტილება მიღებული იქნება მას შემდეგ, რაც დეტალურად იქნება შესწავლილი ავიაკომპანიების თუ მათი საჰაერო ხომალდების არსებული სტატუსი საერთაშორისო სანქციებთან თუ შეზღუდვებთან მიმართებაში და ფრენის ნებართვები ზემოთ აღნიშნული პრინციპით იქნება გაცემული", - წერია სამოქალაქო ავიაციის სააგენტოს განცხადებაში. უწყებაში განმარტავენ, რომ ფრენების უფლებას მისცემენ მხოლოდ იმ კომპანიებს, რომლებიც არ არიან სანქცირებული: "შემოსული ყველა განაცხადი, ავიაკომპანიების მიერ წარმოდგენილი ინფორმაცია თუ დოკუმენტაცია იქნება დეტალური შესწავლის და სხვადასხვა მექანიზმებით გადამოწმების საგანი სანქციებთან მიმართებაში". რადიო თავისუფლებამ საქართველოს სამოქალაქო ავიაციის სააგენტოში ამ დროისთვის ვერ შეძლო იმ კომპანიების ჩამონათვალის მოპოვება, რომლებსაც საქართველო-რუსეთს შორის პირდაპირი ფრენების დაწყება უნდათ. radio tavisupleba

მმართველი პარტიის თავმჯდომარემ ირაკლი კობახიძემ გუშინ ჟურნალისტებთან საუბრისას განაცხადა, რომ ფრენებთან დაკავშირებით ტექნიკური დოკუმენტების არგაგზავნა „როსავიაციაში“ ნიშნავს სანქციების დაწესებას. „როსავიაცია“ რუსეთის საჰაერო ტრანსპორტის ფედერალური სააგენტოა. 15 მაისიდან ძალაში შევიდა კრემლის განკარგულება საქართველოსთან უვიზო რეჟიმის გაუქმების შესახებ. ასევე, ვლადიმერ პუტინის გადაწყვეტილებით აღდგა პირდაპირი ფრენები საქართველოსთან. დღეს განცხადება გაავრცელა სამოქალაქო ავიაციის სააგენტომ. მათი ცნობით, დღეის მდგომარეობით საქართველოს სამოქალაქო ავიაციის სააგენტოში შემოსულია რამდენიმე ავიაკომპანიის განაცხადი საქართველოსა და რუსეთს შორის რეგულარული საჰაერო მიმოსვლის განხორციელების მოთხოვნით. „ხაზგასმით ვაცხადებთ, რომ სამოქალაქო ავიაციის სააგენტოში წარმოდგენილ თითოეულ მომართვასთან დაკავშირებით, გადაწყვეტილება მიღებული იქნება მას შემდეგ, რაც დეტალურად იქნება შესწავლილი ავიაკომპანიების თუ მათი საჰაერო ხომალდების არსებული სტატუსი საერთაშორისო სანქციებთან თუ შეზღუდვებთან მიმართებაში და ფრენის ნებართვები ზემოთ აღნიშნული პრინციპით იქნება გაცემული“, – ნათქვამია საავიაციო სააგენტოს მიერ გავრცელებულ განცხადებაში.

თურქეთის არჩევნებისთვის საქართველოში გახსნილ საარჩევნო უბნებზე ოპოზიციამ მოიგო როგორც საპრეზიდენტო, ისე საპარლამენტო კენჭისყრა. ამის შესახებ თურქეთის სახელმწიფო საინფორმაციო სააგენტოს, “ანადოლუს” პარალელური დათვლის შედეგებიდან ვიგებთ. სააგენტოს თანახმად, გახსნილია საარჩევნო ყუთების 100%. “ანადოლუს” ცნობით, საქართველოში მყოფ თურქეთის მოქალაქეთა შორის აქტივობამ, ჯამში, 43.93% შეადგინა. 1013 საპრეზიდენტო ბიულეტენიდან 8 გაბათილდა. ამ მონაცემებით, ამომრჩეველთა 63.58%-მა თურქეთის უმსხვილესი ოპოზიციური პარტიის ლიდერსა და ერდოღანის მთავარ კონკურენტს, ქემალ ქილიჩდაროღლუს მისცა ხმა. ერდოღანს 31.34% აქვს, მესამე კანდიდატს, სინან ოღანს კი — 3.88%. მუჰარემ ინჯეს, რომელმაც არჩევნებამდე 3 დღით ადრე მოხსნა კანდიდატურა, 1.20% აქვს. “ანადოლუს” მიხედვით, საპარლამენტო კენჭისყრაში, რომელშიც 1013-დან 10 ბიულეტენი გაბათილდა, ქილიჩდაროღლუს “რესპუბლიკურმა სახალხო პარტიამ”(CHP) 43.07% დააგროვა, მისმა მოკავშირემ, “კარგმა პარტიამ”(IYI) კი — 9.17%. ერდოღანის “სამართლიანობისა და განვითარების პარტიას”(AKP) 22.23% აქვს, მის მოკავშირეს, “ნაციონალისტური მოძრაობის პარტიას”(MHP) — 5.48%. ოპოზიციურმა “მწვანე მემარცხენე პარტიამ”(YSP) საქართველოში 6.88% დააგროვა. მისი სახელით არჩევნებში თურქეთის მთავარი პრო-ქურთული პარტია, “ხალხთა დემოკრატიული პარტია”(HDP) მონაწილეობდა. HDP-მ ეს გადაწყვეტილება სასამართლოში მისი დახურვის მოთხოვნით მიმდინარე საქმის თანმდევი რისკის გამო მიიღო. საქართველოში მცხოვრებ თურქეთის მოქალაქეთა შორის ერდოღანმა და მისმა პარტიამ 2018 წელსაც წააგეს არჩევნები. თურქეთის უმაღლესი საარჩევნო საბჭოს წინასწარი შედეგებით, საპრეზიდენტო არჩევნებში ერდოღანი ლიდერობს, თუმცა ვერც ერთი კანდიდატი აგროვებს ხმათა 50%-ზე მეტს. ეს მეორე ტურს ნიშნავს. რაც შეეხება საპარლამენტო არჩევნებს: თურქეთის “ცესკოს” შედეგი ჯერ არ გამოუქვეყნებია, თუმცა პარალელური დათვლის მიხედვით, ერდოღანის პარტია და მისი მოკავშირეები უმრავლესობას კრავენ. 20 წელია, რეჯეფ თაიფ ერდოღანი თურქეთს მართავს. რიგი ფაქტორების, მათ შორის, ქვეყანაში გამწვავებული ეკონომიკური პრობლემებისა და ოპოზიციის ერთიანობის ფონზე, 14 მაისის არჩევნები ყველაზე რთულად პროგნოზირებადი იყო უკანასკნელ ათწლეულებში. თუ ოფიციალურად დადასტურდა, საპრეზიდენტო არჩევნების მეორე ტური თურქეთში 28 მაისს უნდა ჩატარდეს. ნეტგაზეთი

ავტორი:თამთა ჯიჯავაძე დღეს, 15 მაისს, 19:00 ზე პარლამენტის უკან დაგეგმილია აქცია - "უარი რუსეთთან პირდაპირ ფრენებს". აქციის ორგანიზატორი მოქალაქეთა საინიციატივო ჯგუფია, რომლებმაც რამდენიმე დღის წინ შექმნეს პეტიცია „უარი ეთქვას რუსეთთან პირდაპირი ფრენების აღდგენას და შემოღებული იქნას სავიზო რეჟიმი რუსეთის მოქალაქეებისთვის“. პეტიციას უკვე 6000-ზე მეტი ხელმომწერი ჰყავს. „ჩვენ არ ვართ პოლიტიკოსები, ჩვენ ვართ ჩვეულებრივი მოქალაქეები რომლებიც ვაპროტესტებთ რუსეთთან პირდაპირი ფრენების აღდგენას. • მაშინ როდესაც რუსული რაკეტები დაფრინავენ უკრაინაში და ოკუპირებულია საქართველოს ტერიტორიის 20 პროცენტი, ჩვენ არ გვაქვს უფლება ვიფრინოთ რუსული თვითმფრინავებით. • რუსეთთან დაახლოება გამოიწვევს საქართველოს დასანქცირებას და ევროპისგან დაშორებას. 15 მაისს, 19:00 ზე პარლამენტის უკან ვაორგანიზებთ მშვიდობიან აქციას - უარი რუსეთთან პირდაპირ ფრენებს“, - აცხადებენ პეტიციის და დაგეგმილი აქციის ორგანიზატორები. შეგახსენებთ: რუსეთის პრეზიდენტმა ვლადიმირ პუტინმა 10 მაისს ხელი მოაწერა საქართველოსთვის დაწესებული ავიაემბარგოს გაუქმებას. აღნიშნული ემბარგო 20 ივნისს განვითარებული მოვლენების შემდეგ იყო დაწესებული, რის გამოც, რუსეთთან ავიამიმოსვლა მესამე ქვეყნების (ძირითადად სომხეთის) გავლით ხორციელდებოდა. პირდაპირი ფრენების ნებართვა 15 მაისიდან გაიცა. 10 მაისს რუსეთის პრეზიდენტმა ასევე საქართველოს მოქალაქეებისთვის სავიზო რეჟიმი გააუქმა. საქართველოს მოქალაქეები რუსეთში შესვლას 90 დღემდე ვადით უვიზოდ შეძლებენ.

საქართველოსთვის მნიშვნელოვანი დროა. დანია მხარს უჭერს საქართველოს ევროპულ მისწრაფებებს, რომელიც ეფუძნება ადამიანის უფლებებს, კანონის უზენაესობას და დამოუკიდებელ დემოკრატიულ ინსტიტუტებს, – ამის შესახებ დანიის საგარეო საქმეთა მინისტრმა, ლარს ლოკე რასმუსენმა საქართველოს საგარეო საქმეთა მინისტრ, ილია დარჩიაშვილთან ერთად გამართულ ბრიფინგზე განაცხადა. როგორც ლარს ლოკე რასმუსენმა აღნიშნა, საქართველოში მის ვიზიტს სამი მიზანი აქვს. „პირველი, გამოვხატო ჩემი მხარდაჭერა საქართველოს ტერიტორიული მთლიანობის და სუვერენიტეტის მიმართ. გუშინ მოვინახულე ადმინისტრაციული გამყოფი ხაზი ცხინვალის რეგიონთან და რუსეთის ბორდერიზაციის პროცესი, რომელიც ჰყოფს ოჯახებს. თქვენ შეიძლება, იფიქროთ, რომ საქართველოს მსგავსად, დანია პატარა ქვეყანაა და ჩვენი ქვეყნების მსგავს ქვეყნებს სჭირდებათ ძლიერი, სანდო ალიანსები, პარტნიორობა. სწორედ ამიტომ ჩვენ ვაძლიერებთ ჩართულობას ამ პერიოდში, როდესაც ჩვენი მხარდაჭერა მნიშვნელოვანია, ვიდრე ოდესმე. სწორედ ამის გათვალისწინებით, დღეს გავხსნი საქართველოში დანიის საელჩოს, რომელიც მხარს დაუჭერს საქართველოს თავისუფლების, დემოკრატიისა და ევროატლანტიკური ინტეგრაციის მისწრაფებას. მეორე, ჩემი ვიზიტი ხაზს უსვამს დანიის პარლამენტში საგარეო ურთიერთობების კომიტეტის ისტორიულად ძლიერ ორმხრივ ურთიერთობას საქართველოსთან. მას შემდეგ, რაც დანიის საელჩოს გახსნის შესახებ გახდა ცნობილი, კულტურულმა, პოლიტიკურმა და ბიზნესკავშირებმა ისტორიული იმპულსი შეიძინა. კიდევ ერთი სიგნალი არის, რომ გვექნება პირდაპირი ფრენები კოპენჰაგენსა და საქართველოს შორის. საქართველოსთვის მნიშვნელოვანი დროა. მოქალაქეებმა დიდი ხნის წინ ცხადად თქვეს, რომ მათ სურთ ევროპული მომავალი. ისინი ამ მიზანთან უფრო ახლოს არიან, ვიდრე ოდესმე. დანია მხარს უჭერს საქართველოს ევროპულ მისწრაფებებს, რომელიც ეფუძნება ადამიანის უფლებებს, კანონის უზენაესობასა და დამოუკიდებელ დემოკრატიულ ინსტიტუტებს. ასე რომ, ახლა საქართველოზეა დამოკიდებული, ამბიციებისა და მისწრაფებების რეალიზება განახორციელოს. მინდა, დაგარწმუნოთ, რომ დანია მხარს დაგიჭერთ ამ გზაზე. მსურს, გამოვიყენო შესაძლებლობა და გითხრათ, რომ კანდიდატის სტატუსთან დაკავშირებით ჩემი ქვეყნის პასუხი იქნება – დიახ. თქვენ მიიღებთ კანდიდატის სტატუსს შემოდგომაზე, როდესაც ვნახავთ რეკომენდაციებს ევროკომისიისგან. ეს არის დამსახურებაზე დაფუძნებული გზა ევროკავშირისკენ. ეს ყველაფერი უკავშირდება კოპენჰაგენის კრიტერიუმებს. ჩვენ გვსურს, დავეხმაროთ საქართველოს, შეასრულოს ეს კრიტერიუმები. საქართველო რეკომენდაციებსა და გადაწყვეტილებებზე დაფუძნებულ ამ კრიტერიუმებს თუ შეასრულებს, დანია მხარს დაუჭერს კანდიდატის სტატუსის მინიჭებას“, – განაცხადა ლარს ლოკე რასმუსენმა. ავტორი - გივი ბარამიძე, ანა ბროლაძე

საქართველოს პარლამენტის თავმჯდომარე, შალვა პაპუაშვილი 15 – 16 მაისს ოფიციალური ვიზიტით აზერბაიჯანის რესპუბლიკას ეწვევა, – ამის შესახებ ინფორმაციას საქართველოს პარლამენტის პრესსამსაური ავრცელებს. მათივე ცნობით, საქართველოს პარლამენტის თავმჯდომარე შეხვედრებს გამართავს აზერბაიჯანის რესპუბლიკის პრემიერ-მინისტრთან ალი ასადოვთან და მილი მეჯლისის თავმჯდომარესთან საჰიმა გაფაროვასთან. შალვა პაპუაშვილი მონაწილეობას მიიღებს აზერბაიჯანის რესპუბლიკის მილი მეჯლისის სპეციალურ სხდომაზე, რომელიც ჰეიდარ ალიევი 100 წლის იუბილეს მიეძღვნება.

საქართველოს სამივე საერთაშორისო აეროპორტიდან ფრენები შესრულდება მხოლოდ იმ ავიაკომპანიების მიერ და იმ ბორტებით, რომლებიც არ არიან სანქცირებულთა სიაში. აღნიშნულის შესახებ საქართველოს აეროპორტების გაერთიანება განცხადებას ავრცელებს. „მაღალი საზოგადოებრივი ინტერესის გამო, გვსურს, კიდევ ერთხელ განვმარტოთ. გადაწყვეტილება ვრცელდება საქართველოს ყველა საერთაშორისო აეროპორტზე: შოთა რუსთაველის სახელობის თბილისის საერთაშოროსო აეროპორტზე, დავით აღმაშენებლის სახელობის ქუთაისის საერთაშორისო აეროპორტსა და ალექსანდრე ქართველის სახელობის ბათუმის საერთაშორისო აეროპორტზე. კიდევ ერთხელ დავაზუსტებთ: აეროპორტებში ფრენები შესრულდება მხოლოდ იმ ავიაკომპანიების მიერ და იმ ბორტებით, რომლებსაც სანქციები არ შეხებიათ. განსხვავებული მიდგომა არცერთ საერთაშორისო აეროპორტს შორის არ იქნება“, – ნათქვამია განცხადებაში.

ბახმუტის დაცვა გრძელდება და ბოლო დღეებმა აჩვენა, რომ უკრაინას შეუძლია წინ წაიწიოს და რუსულ ძალებს დაუპირისპირდეს, - ამის შესახებ უკრაინის სახმელეთო ჯარების მეთაურმა, გენერალმა ალექსანდრე სირსკიმ განაცხადა. „ჩვენი ჯარების წინსვლა ბახმუტის მიმართულებით - ეს არის პირველი წარმატებული შეტევითი ოპერაცია ქალაქის თავდაცვაში“, - აღნიშნა სირსკიმ. მისი თქმით, ქალაქის დასაცავად ყველა საჭირო გადაწყვეტილება მიღებულია. „ბოლო დღეებმა აჩვენა, რომ ასეთ უკიდურესად მძიმე პირობებშიც კი შეგვიძლია წინსვლა და მტრის განადგურება. ბახმუტის დაცვის ოპერაცია გრძელდება. დაცვისთვის ყველა საჭირო გადაწყვეტილება მიღებულია“, - აღნიშნა უკრაინის სახმელეთო ჯარების მეთაურმა. იპნ

დღეს პარლამენტი განიხილავს ცვლილებებს საერთო სასამართლოების კანონში და ცესკოს დაკომპლექტების წესში, რომლითაც ხელისუფლება არ თმობს უკანონო გავლენებს სასამართლოზე და საკანონმდებლო დონეზე იქვემდებარებს ცესკოს., - ამის შესახებ სოციალურ ქსელში პარტია "საქართველოსთვის" თავმჯდომარის მოადგილე ნათია მეზვრიშვილი წერს. მისი, თქმით, ორივე ცვლილება პირდაპირ უკავრშირდება ევროკავშირის 12 რეკომენდაციას და თავისუფალ და სამართლიან არჩევნებს ქვეყანაში. "სასამართლოს ნაწილში, იუსტიციის უმაღლესი საბჭოს ფუნდამენტური რეფორმა იყო 19 აპრილის შეთანხმების, მოგვიანებით ევროკავშრის 12 პუნქტის და ბოლოს უკვე ვენეციის კომისიის დასკვნის მთავარი რეკომენდაცია. წარმოდგენილი ცვლილებები არც ამჯერად ეხება საბჭოს ფუნდამენტურ რეფორმას. შესაბამისად, არ სრულდება ვენეციის კომისიის რეკომენდაციები და 12 პუნქტიანი რეკომენდაციის მე-3 პუნქტი. ცესკოს ნაწილში, ცესკოს თავმჯდომარეს და 7 წევრს პარლამენტს ასარჩევად წარუდგენს პარლამენტის თავმჯდომარე, პრეზიდენტის ნაცვლად. როგორც თავმჯდომარე, ისე წევრები, ხმების 2/3-ის (ანუ 100 ხმის) ნაცვლად, აირჩევა უბრალო უმრავლესობით (76 ხმით). ამასთან, უბრალო უმრავლესობით ცესკოს თავმჯდომარე და წევრები სრული ვადით - 5 წლით აირჩევიან. დღეს მოქმედი რედაქციით, სრული ვადით ასარჩევად საჭიროა ხმების 2/3. წინააღმდეგ შემთხვევაში, თანამდებობაზე ყოფნის ვადაა 6 თვე. ანუ, შემოთავაზებული ცვლილებით ცესკოს თავმჯდომარის და წევრების სრული ვადით არჩევა მხოლოდ მმართველი პარტიის ხელში გადადის და გამოირიცხება ყველანაირი დებულება, რაც ცესკოს დამოუკიდებლობას საკანონმდებლო დონეზე მაინც უზრუნველყოფდა. ცვლილებები ეწინააღმდეგება ევროკავშირის 12 პუნქტიანი რეკომენდაციის მე-2 პუნქტს. ცვლილებებს ორივე მიმართულებით აქვს ერთადერთი მიზანი - გავლენის შენარჩუნება/განმტკიცება სასამართლოზე და ცესკოზე, რომლებიც არჩევნებზე სასურველი შედეგის მისაღწევად და ძალაუფლების საბოლოოდ შესანარჩუნებლად მნიშვნელოვანი ინსტრუმენტებია.", - წერს მეზვრიშვილი.

უკრაინის პრეზიდენტი, ვოლოდიმირ ზელენსკი გაერთიანებულ სამეფოს ეწვია, - ინფორმაციას BBC-ი ავრცელებს. ამასთან, ვოლოდიმირ ზელენსკი „ტვიტერზე“ წერს, რომ ვიზიტის ფარგლებში ის გაერთიანებული სამეფოს პრემიერ-მინისტრს, რიში სუნაკს შეხვდება. "დღეს - ლონდონი. გაერთიანებული სამეფო არის ლიდერი, როდესაც საქმე ეხება ჩვენი შესაძლებლობების გაფართოებას ხმელეთსა და ჰაერში. ეს თანამშრომლობა დღეს გაგრძელდება. მე შევხვდები ჩემს მეგობარ რიშის. ჩვენ ჩავატარებთ არსებით მოლაპარაკებებს პირისპირ და დელეგაციებთან ერთად“,- დაწერა ზელენსკიმ. იპნ

უახლოეს კვირებში, საფრანგეთი უკრაინას გადასცემს ათეულობით ჯავშანმანქანას და მსუბუქ ტანკს, მათ შორის AMX-10RC-ს და საჰაერო თავდაცვის სისტემის გაძლიერებაში დაეხმარება. ამ პუნქტს შეიცავს საფრანგეთის და უკრაინის პრეზიდენტების, ემანუელ მაკრონის და ვოლოდიმირ ზელენსკის ერთობლივი დეკლარაცია, რომელიც წუხელ გამოქვეყნდა. მაკრონის და ზლენსკის შეხვედრა 14 მაისს, პარიზში გაიმართა. დეკლარაციაში ნათქვამია ისიც, რომ რუსეთმა დაუყოვნებლივ, სრულად და უპირობოდ უნდა გაიყვანოს საკუთარი ჯარები უკრაინის ტერიტორიიდან და დატოვოს ზაპოროჟიეს ატომური ელექტროსადგური. საფრანგეთი კვლავ ადასტურებს ურყევ მხარდაჭერას უკრაინის დამოუკიდებლობის, სუვერენიტეტისა და ტერიტორიული მთლიანობისადმი საერთაშორისოდ აღიარებულ საზღვრებში და აცხადებს, რომ განაგრძობს უკრაინის პოლიტიკურ, ფინანსურ, სამხედრო და ჰუმანიტარულ დახმარებას იმდენ ხანს, რამდენიც საჭირო იქნება. საფრანგეთი მხარს უჭერს უკრაინის ინიციატივას სამართლიანი და მდგრადი მშვიდობის შესახებ, რომლის საფუძველია უკრაინის სუვერენტეტი და ტერიტორიული მთლიანობა. საფრანგეთი და უკრაინა ადასტურებენ, რომ პასუხისმგებლობა უნდა დაეკისროს რუსეთის აგრესიის დროს, ომის და სხვა სასტიკი დანაშაულის ჩამდენ პირებს. საფრანგეთის და უკრაინის პრეზიდენტების დეკლარაციაში საუბარია სანქციების გზით რუსეთზე ზეწოლის გაძლიერების აუცილებლობაზეც. პრეზიდენტ ზელენსკისთან შეხვედრის შემდეგ, პრეზიდენტ მაკრონის ტვიტერის ოფიციალურ გვერდზე გამოქვეყნდა უკრაინული ტექსტი სრული მხარდაჭერის შესახებ. საფრანგეთამდე უკრაინის პრეზიდენტი სტუმრობდა იტალიას და გერმანიას. ვოლოდიმირ ზელენსკის უკრაინის შემდგომი მხარდაჭერა დაუდასტურეს იტალიის პრემიერ-მინისტრმა და გერმანიის კანცლერმა. რადიო თავისუფლება

თურქეთის საპრეზიდენტო არჩევნებში გამოყენებული ბიულეტენების 94.24%-ის დამუშავების შედეგად, ქვეყნის მოქმედ პრეზიდენტს, რეჯეპ ტაიპ ერდოანს ხმების 49.59% აქვს, მის მთავარ კონკურენტს ოპოზიციური სახალხო ალიანსიდან ქემალ ქილიჩდაროღლუს კი - 44.67%. 5,28%-ით მესამე ადგილზეა პოლიტიკური ბლოკის, „ალიანსს ატას“ კანდიდატი სინან ოღანი. ხმების დათვლა გრძელდება. თუ საბოლოოდ, ერდოანი 50%-ზე მეტს მოიპოვებს, თურქეთის პრეზიდენტის პოსტს შეინარჩუნებს. თუ ვერცერთი კანდიდატი ვერ მიიღებს ხმების 50%-ზე მეტს, არჩევნების მეორე ტური 28 მაისს გაიმართება. რაც შეეხება თურქეთში კვირას გამართული საპარლამენტო არჩევნების წინასწარ შედეგებს, 50.11%-ით ლიდერობს ერდოანის „სახალხო ალიანსი“. 34.76%-ით მეორე ადგილზეა ოპოზიციის ეროვნული ალიანსი. 9.79%-ით მესამე ადგილს იკავებს მემარცხენე ძალების ალიანსი. არჩევნების საბოლოო შედეგები რამდენიმე დღეში გამოცხადდება. რადიო თავისუფლება

ნატალია საბანაძე, ევროკავშირში ყოფილი ელჩი, პარტია „საქართველოსთვის“ ლიდერის, გიორგი გახარიას მრჩეველი საერთაშორისო საკითხებში გადაცემაში „360 გრადუსი“ 345650232_202295782616684_2181425551974946664_n.mp4

დღეიდან, 15 მაისიდან ოფიციალურად ამოქმედდა რუსეთის პრეზიდენტ ვლადიმირ პუტინის მიერ ხელმოწერილი ბრძანებულება, საქართველოსთან 2000 წლიდან მოქმედი სავიზო რეჟიმის გაუქმების შესახებ. დღეიდან, საქართველოს მოქალაქეებს შეუძლიათ 90 დღით, რუსეთში უვიზოდ ყოფნა. პუტინმა ამ ბრძანებულებას ხელი 10 მაისს მოაწერა. რუსეთის პრეზიდენტის მიერ იმავე დღეს გამოცემული მეორე დოკუმენტით, გაუქმდა საქართველოსთან პირდაპირი ავიამომოსვლის აკრძალვა, რომელიც 2019 წლის ზაფხულიდან მოქმედებდა. პუტინის ეს გადაწყვეტილება ძალაში ხელმოწერისთანავე, ანუ 10 მაისს შევიდა. პირდაპირი ავიარეისები შესაძლოა, 16 მაისიდან განახლდეს. ასევე ნახეთ როგორ იყენებს რუსეთი ვიზებს, მიმოსვლას, ვაჭრობას ბერკეტად - ფაქტები საქართველოს ახლო წარსულიდან საქართველომ რუსეთთან დიპლომატიური ურთიერთობები 2008 წლის აგვისტოს ომის შემდეგ შეწყვიტა. 2012 წლის თებერვალში საქართველომ, პრეზიდენტ მიხეილ სააკაშვილის გადაწყვეტილებით, რუსეთის მოქალაქეებისთვის სავიზო რეჟიმი ცალმხრივად გააუქმა. რუსეთმა საქართველოსთან პირდაპირი ავიამიმოსვლა შეწყვიტა პრეზიდენტ ვლადიმირ პუტინის მიერ 2019 წლის ივნისში გამოცემული ბრძანებულებით, რასაც წინ უძღოდა რუსული ოკუპაციის საწინააღმდეგო აქციები. თბილისში საპროტესტო გამოსვლები დაიწყო მას შემდეგ, რაც ცნობილი გახდა, რომ მართლმადიდებლობის საპარლამენტთაშორისო ასამბლეის სხდომა საქართველოს პარლამენტის თავმჯდომარის სავარძლიდან მიჰყავდა რუსეთის დუმის დეპუტატ სერგეი გავრილოვს. რადიო თავისუფლება

პარლამენტი ცესკოს ფორმირების წესში ცვლილებების განხილვას იწყებს. "ქართული ოცნების" დეპუტატების ინიციატივით, "საარჩევნო კოდექსსა" და პარლამენტის რეგლამენტში შესატანი ცვლილებების პროექტებს, 15 მაისის სხდომაზე, საპროცედურო საკითხთა და წესების კომიტეტი და იურიდიულ საკითხთა კომიტეტი განიხილავს. დაგეგმილი ცვლილებებით, ცესკოს თავმჯდომარეობის და ე.წ. პროფესიული წევრობის კანდიდატების შერჩევის და პარლამენტისთვის წარდგენის პრეროგატივა პრეზიდენტის ნაცვლად, პარლამენტის თავმჯდომარეს ექნება. ასევე იცვლება მათ არჩევასთან დაკავშირებული პროცედურა და კვორუმი - თუკი პარლამენტი ცესკოს თავმჯდომარესა და წევრებს სრული შემადგენლობის უმრავლესობით (76 ხმა) მხარს დაუჭერს, თანამდებობას 5 წლის ვადით დაიკავებენ. კანონის პროექტების თანახმად, ცესკოს თავმჯდომარისა და წევრების შესარჩევ კონკურს გამოაცხადებს და საკონკურსო კომისიას შექმნის პარლამენტის თავმჯდომარე. პარლამენტის თავმჯდომარე წარუდგენს პარლამენტს ცესკოს თავმჯდომარის და ცესკოს წევრების კანდიდატურებს. ცესკოს თავმჯდომარესა და წევრებს კი პარლამენტი სრული შემადგენლობის უმრავლესობით აირჩევს. უმრავლესობის საკანონმდებლო ინიციატივაში გათვალისწინებულია საკონკურსო კომისიის შემადგენლობაში პრეზიდენტის ერთი წარმომადგენლის ყოფნა. ამავე პროექტის მიხედვით, იმ შემთხვევაში, თუ კენჭისყრის შედეგად ყველა ვაკანსია არ შეივსო, პრეზიდენტი შესაბამის კონკურსში მონაწილე სხვა კანდიდატს წარადგენს და კენჭი პრეზიდენტის წარდგენილ კანდიდატურას ეყრება. კანონპროექტის ავტორები პარლამენტის წევრები: მამუკა მდინარაძე, გივი მიქანაძე, დავით მათიკაშვილი, რატი იონათამიშვილი და ირაკლი შატაკიშვილი არიან. ინიციატორთა განმარტებით, ცესკოს წევრობისა და ცესკოს თავმჯდომარეობის კანდიდატების შერჩევის დღეს მოქმედი წესის ანალოგიური სამართლებრივი პრაქტიკა არცერთ განვითარებულ ქვეყანაში არ არსებობს. ცნობისთვის, მოქმედი კანონმდებლობის გათვალისწინებით, ცესკოს თავმჯდომარეობისა და წევრობის კანდიდატები პარლამენტს ასარჩევად პრეზიდენტმა უნდა წარუდგინოს, რომელიც მანამდე საკონკურსო კომისიას ქმნის და აცხადებს კონკურსს. რაც შეეხება პარლამენტის მიერ მათი არჩევის წესსა და პროცედურას, ცესკოს თავმჯდომარის და წევრების ასარჩევად პლენარულ სხდომაზე კენჭისყრა თავდაპირველად 2/3-იანი კვორუმით ტარდება. იმ შემთხვევაში, თუკი ცესკოს თავმჯდომარის 2/3-ით არჩევა ვერ ხდება, კენჭი მათ სრული შემადგენლობის უმრავლესობით ეყრება. 2/3-იანი კვორუმით არჩეული ცესკოს თავმჯდომარე თანამდებობას 5-წლიანი ვადით იკავებს, უბრალო უმრავლესობით დამტკიცებული – 6 თვის ვადით. ცესკოს დაკომპლექტების მოქმედი მოდელი შარლ მიშელის შეთანხმების ნაწილია. პალიტრანიუსი

უკრაინის თავდაცვის ძალებსა და რუს ოკუპანტებს შორის, გასული დღის განმავლობაში, 46 შეტაკება მოხდა, - ამის შესახებ უკრაინის შეიარაღებილი ძალების გენერალური შტაბის ანგარიშშია აღნიშნული. ამასთან, უწყების ცნობით, რუსულმა ძალებმა, გასული დღის განმავლობაში, უკრაინის ტერიტორიაზე 11 სარაკეტო და 41 საჰაერო დარტყმა განახორციელეს, მრავალჯერადი სარაკეტო სისტემებიდან კი ცეცხლი 74-ჯერ გახსნეს. „თავდასხმების შედეგად დაზარალდა მშვიდობიანი მოსახლეობა, განადგურდა და დაზიანდა კერძო სახლები და სხვა სამოქალაქო ინფრასტრუქტურა. უკრაინის მასშტაბით სარაკეტო და საჰაერო თავდასხმების ალბათობა კვლავ მაღალია“, - აცხადებენ გენშტაბში. უწყების ცნობით, მოწინააღმდეგის ძირითადი ძალისხმევა კონცენტრირებულია ლიმანის, ბახმუტის, ავდიივკასა და მარინკას მიმართულებებზე. ამ მიმართულებებით, უკრაინელებსა და რუსებს შორის 46 საბრძოლო შეტაკება. ბახმუტი და მარინკა საომარი მოქმედებების ეპიცენტრში რჩებიან. „ბახმუტის მიმართულებით მტერი აგრძელებს შეტევითი მოქმედებების წარმოებას. ქალაქ ბახმუტისთვის მძიმე ბრძოლები გრძელდება. დღის განმავლობაში მტერმა წარუმატებელი შეტევითი ოპერაციები ჩაატარა გრიგორევკას, ბოგდანოვკასა და პრედტეჩინოს დასახლებების მიმართულებით“, - აცხადებენ გენშტაბში. რაც შეეხება მარინკას მიმართულებას, გენშტაბის ცნობით, უკრაინის თავდაცვის ძალების ნაწილებმა ქალაქ მარინკას მიდამოში მტრის მრავალი შეტევა მოიგერიეს. „ამავდროულად, მტერმა დაბომბა დონეცკის ოლქის კრასნოგოროვკას, გეორგიევკას, პობედასა და ნოვომიხაილოვკას დასახლებები“, - აცხადებენ გენშტაბში. იპნ

ქუთაისი(ჭომა)-ალპანა-მამისონის უღელტეხილის გზის მე-18 კმ-ზე ავტოტრანსპორტის მოძრაობა დროებით აკრძალულია. საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის ინფორმაციით, შიდასახელმწიფოებრივი მნიშვნელობის ქუთაისი(ჭომა)-ალპანა-მამისონის უღელტეხილის საავტომობილო გზის მე-18 კმ-ზე ინტენსიური ნალექების შედეგად, მდინარე რიონის ადიდების და გზის სავალ ნაწილზე გადმოსვლის გამო, აღნიშნულ მონაკვეთზე დროებით აკრძალულია ყველა სახის ავტოტრანსპორტის მოძრაობა.