tvati

რომის პაპმა იტალიის ეპისკოპოსთა კონფერენციის ხელმძღვანელს, კარდინალ მატეო ზუპის უკრაინაში „სამშვიდობო მისიის“ შესრულება დაავალა, – შესაბამის ინფორმაციას ვატიკანის პრესსამსახური ავრცელებს. როდის გაემგზავრება კარდინალი უკრაინაში, ჯერჯერობით უცნობია. წმინდა საყდრის პრესსამსახურის ცნობით, რომის პაპმა, ფრანცისკემ კარდინალ მატეო ზუპის დაავალა, უხელმძღვანელოს მისიას, რომელიც უკრაინაში მიმდინარე კონფლიქტში დაძაბულობის შემცირებას შეუწყობს ხელს. რომის პაპი იმედოვნებს, რომ აღნიშნული მისია მშვიდობას გაუხსნის გზას. ავტორი - ქეთი ჩოხელი

საგარეო საქმეთა სამინისტროს, სამხრეთ აფრიკაში საქართველოს საელჩოსა და საზღვაო ტრანსპორტის სააგენტოს ძალისხმევის შედეგად, 21 მაისს ქართველი მეზღვაურების ტყვეობიდან გათავისუფლება მოხერხდა, – ამის შესახებ საქართველოს საგარეო საქმეთა სამინისტროს მიერ გავრცელებულ ინფორმაციაშია ნათქვამი. უწყების ცნობით, ისინი სამედიცინო შემოწმებას ნიგერიაში გადიან და მათი ჯანმრთელობის მდგომარეობა დამაკმაყოფილებელია. „მეზღვაურები სამშობლოში უახლოეს დღეებში დაბრუნდებიან. მათ მგზავრობას დამსაქმებელი კომპანია უზრუნველყოფს. ქართველი მეზღვაურები ცენტრალური აფრიკის, გაბონის ტერიტორიულ წ####ბში ღუზაზე მდგომი მარშალის კუნძულების დროშის ქვეშ მცურავი გემიდან 2 მაისს გაიტაცეს. მას შემდეგ საქართველოს საგარეო საქმეთა სამინისტრო, სამხრეთ აფრიკაში საქართველოს საელჩო და საზღვაო ტრანსპორტის სააგენტო უწყვეტ რეჟიმში მუშაობდნენ საქართველოს მოქალაქეების დასახმარებლად. სამხრეთ აფრიკაში საქართველოს კონსული მუდმივ კონტაქტზე იყო ასევე პრეტორიაში გაბონის საელჩოსა და დამსაქმებელი კომპანიის წარმომადგენლებთან. ქართველი მეზღვაურები ტყვეობიდან 21 მაისს გაათავისუფლეს“, – ნათქვამია უწყების მიერ გავრცელებულ ინფორმაციაში.

დღეისთვის ბახმუტი არ არის დაპყრობილი რუსეთის ფედერაციის მიერ, – ამის შესახებ უკრაინის პრეზიდენტმა, ვოლოდიმირ ზელენსკიმ იაპონიის ქალაქ ჰიროსიმაში, „დიდი შვიდეულის“ სამიტის დასრულების შემდეგ გამართულ პრესკონფერენციაზე განაცხადა. უკრაინელი ლიდერის თქმით, უკრაინელი სამხედროები ბახმუტში ძალიან მნიშვნელოვან მისიას ასრულებენ. „ჩვენ ვუძლებთ და ვიბრძვით ჩვენი მეომრების სიმამაცისა და მათი ცოდნის წყალობით. ჩვენ არ ვტოვებთ ადამიანებს სასიკვდილოდ, ჩვენთვის ხალხი ძვირფასია, ეს მთავარია, რაც გაგვაჩნია. არანაირი გაურკვევლობა არ არსებობს. მკაფიოდ მესმის, რა ხდება ბახმუტში. ჩვენ ყველას ნათლად გვესმის, რისთვის კეთდება ეს. მე ვერ გაგიზიარებთ თქვენ ჩვენი სამხედროების ტაქტიკურ შეხედულებებს. ჩვენი სამხედროები დღეს ძალიან მნიშვნელოვან ამოცანებს ასრულებენ, ისინი ბახმუტში იმყოფებიან. არ გავასაჯაროებ, ზუსტად რომელ წერტილში, თუმცა ბახმუტი დღეისთვის არ არის დაპყრობილი რუსეთის ფედერაციის მიერ“, – განაცხადა ზელენსკიმ. პრესკონფერნციაზე ზელენსკიმ ასევე აღნიშნა, რომ 1945 წლის ბირთვული დაბომბვის შემდეგ ჰიროსიმას სურათებმა მას დღევანდელი ბახმუტი გაახსენა. უკრაინის პრეზიდენტის თქმით, მომავალში უკრაინის აღდგენა და რეკონსტრუქია მოხდება ისევე, როგორც ეს ჰიროსიმაში მოხდა. ავტორი - ქეთი ჩოხელი

გახარიას გუნდს და მის წარმომადგენლებს არ აქვთ ელემენტალური მორალური უფლება, რაღაცებზე ილაპარაკონ. გიორგი გახარია ნიკა მელიას, „ნაცების“ გამო, მათი გაძლიერების გამო გადადგა და ნუღარ ლაპარაკობენ მაინც, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა. აღნიშნული კომენტარით მდინარაძემ უპასუხა ჟურნალისტის კითხვას, რომლის თანახმადაც: „გააქტიურდა გახარიას პარტია ქოლცენტრების საქმეზე და ისმის ბრალდებები „ქართული ოცნების“ მიმართ, რას უპასუხებთ, რას უკავშირებთ გააქტიურებას?“ „გარკვეულ წარსულში საერთო პოლიტიკური მიმართულების გამო, მაგრამ ღალატის ხარისხის შემდეგ, კარგად ვნახეთ, „ნაცების“ ნარატივზე ჩაყოლილი საუბრების გამო, გახარიას ნაცვლად, ამ ქვეყანაში მაშინ გადადგა მთავარი პროკურორი, პარლამენტის თავმჯდომარე, მისი გაფუჭებული საქმეების გამო. შეიძლება, პიარულად უფრო იყო გაფუჭებული, ვიდრე რეალურად, მაგრამ მისი გაფუჭებული იყო და შემდეგ თვითონ გადადგა „ნაცების“ გამო. ამ გუნდს და მის წარმომადგენლებს არ აქვთ ელემენტალური მორალური უფლება, რაღაცებზე ილაპარაკონ. ნიკა მელიას, „ნაცების“ გამო, მათი გაძლიერების გამო გადადგა და ნუღარ ლაპარაკობენ მაინც“, – განაცხადა მამუკა მდინარაძემ. ავტორი - თათია მაყაშვილი

ვინ ეკითხება სალომე ზურაბიშვილს მე რაზე ვისაუბრებ?! მან სჯობს თავის უფლებამოსილებებს მიხედოს, - ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა, რითაც ის საქართველოს პრეზიდენტის, სალომე ზურაბიშვილის გუშინდელ განცხადებას გამოეხმაურა. მისივე თქმით, სალომე ზურაბიშვილს უფლება არ აქვს ქართველი ხალხის სახელით ისაუბროს, რადგან ქართველმა ხალხმა ქვეყანაში პოლიტიკის განსაზღვრის ლეგიტიმაცია „ქართული ოცნების“ ხელისუფლებას, პარლამენტს და მთავრობას მიანიჭა. „ვინ ეკითხება სალომე ზურაბიშვილს მე რაზე ვისაუბრებ?! მან სჯობია თავის უფლებამოსილებებს მიხედოს. მინდა, მისი გუშინდელი განცხადება გავიხსენო ქორწილთან დაკავშირებით, მან თქვა, რომ ქორწილის მეორე დღე ჩაიშალა და ეს არის ქართველი ხალხის ერთგვარი გამარჯვებაო. ჯერ ერთი სალომე ზურაბიშვილს უფლება არ აქვს ქართველი ხალხის სახელით ისაუბროს, როცა საქმე ნებისმიერ თემას ეხება, ერთი მარტივი მიზეზის გამო, ამ ქვეყანაში ხალხმა პოლიტიკის განსაზღვრის ლეგიტიმაცია „ქართული ოცნების“ ხელისუფლებას, პარლამენტს და მთავრობას მიანიჭა, ეს არის რეალობა. პრეზიდენტს უფლება არ აქვს ხალხის სახელით ისაუბროს. მით უმეტეს, რომ ის თავიდან ბოლომდე იმ ხალხის ნებას აცდენილია, რომელმაც მას მხარი 2018 წელს დაუჭირა. როდესაც თვითონ პრეზიდენტი აქეზებს ქსენოფობიურ განცხადებას, როდესაც ქორწილის მეორე დღის ჩაშლას აფასებს, ის ვითომ ხალხის გამარჯვებად, ეს არის უბრალოდ სამარცხვინო“, - განაცხადა კობახიძემ. ცნობისთვის, გუშინ, ბრიფინგზე საქართველოს პრეზიდენტმა, სალომე ზურაბიშვილმა „ქართული ოცნების“ თავმჯდომარის ირაკლი კობახიძის განცხადების საპასუხოდ აღნიშნა, რომ „ქსენოფობიის ადგილი საქართველოში არ არის.“ „ვერ დავუშვებ, რომ ბატონი კობახიძე თავს ნებას აძლევდეს, რომ საქართველოს ხალხზე, რომელმაც არაჩვეულებრივი ტოლერანტობის ახალი მაგალითი მისცა მსოფლიოს, როცა წელიწადნახევარია იღებს ოკუპანტი ქვეყნიდან მიგრანტებს, 70 ათასს თუ 80 ათასს, ისე, რომ არც ერთი ინციდენტი არ მომხდარა, ხალხზე, რომელმაც საუკუნეები გაიარა ისე, რომ არავინ არ დაგვწამა ქსენოფობია, მან დაიწყოს ამაზე საუბარი“, - განაცხადა ზურაბიშვილმა. პალიტრანიუსი

როდესაც თვითონ პრეზიდენტი აქეზებს ქსენოფობიურ კამპანიას, როდესაც ქორწილის მეორე დღის ჩაშლას აფასებს ვითომ ხალხის გამარჯვებად, ეს არის უბრალოდ სამარცხვინო, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა. კობახიძის თქმით, სალომე ზურაბიშვილს არ აქვს უფლება, ისაუბროს ქართველი ხალხის სახელით. ვინ ეკითხება სალომე ზურაბიშვილს, რაზე ვისაუბრებ. მან თავის უფლებამოსილებას მიხედოს, ეს ჯობია. მე მისი გუშინდელი განცხადება მინდა, გავიხსენო. ქორწილთან დაკავშირებით მან თქვა, რომ ქორწილის მეორე დღე ჩაიშალა და ეს არის ქართველი ხალხის ერთგვარი გამარჯვებაო. ჯერ ერთი, სალომე ზურაბიშვილს არ აქვს უფლება, ისაუბროს ქართველი ხალხის სახელით, როცა საქმე ეხება ნებისმიერ თემას ერთი მარტივი მიზეზის გამო, საქართველოში ხალხმა ამ ქვეყანაში პოლიტიკის განსაზღვრის ლეგიტიმაცია მიანიჭა „ქართული ოცნების“ ხელისუფლებას, პარლამენტს, მთავრობას, ეს არის რეალობა და პრეზიდენტს არ აქვს უფლება, ხალხის სახელით ისაუბროს. მით უმეტეს, რომ ის არის თავიდან ბოლომდე აცდენილი ინ ხალხის ნებას, რომელმაც მას დაუჭირა მხარი 2018 წელს. მეორე, როდესაც თვითონ პრეზიდენტი აქეზებს ქსენოფობიურ კამპანიას, როდესაც ქორწილის მეორე დღის ჩაშლას აფასებს ვითომ ხალხის გამარჯვებად, ეს არის უბრალოდ სამარცხვინო. მე ერთი რამ მინდა გითხრათ, აქ იყო კონკრეტული ადამიანის ქორწილი, რომელიც თავად გამოირჩევა ომის საწინააღმდეგო გზავნილებით, მას პირდაპირ ბანერი უდევს ამ კონკრეტულ რუსეთის მოქალაქეს საკუთარ „ფეისბუქზე“, რითიც ის გმობს რუსეთის სამხედრო აგრესიას უკრაინაში. ამ კაცის ქორწილის ჩაშლა საქართველოში მან განიხილა, როგორც ქართველი ხალხის გამარჯვება. ქორწილის ჩაშლა, მით უმეტეს იმ ადამიანის ქორწილის ჩაშლა რომელსაც არც დანაშაული აქვს კონკრეტული რაიმეში ჩადენილი და არც არაფერი, საქართველოში არის უბრალოდ ჩვენ კულტურასთან შეუთავსებელი მოვლენა. თავის დროზე იცით „სტუმარ-მასპინძელი“ ვაჟა ფშაველამ დაწერე მე-19 საუკუნეში მაშინ ზოგადად მსოფლიოში შედარებით ნაკლებად ცივილიზებული იყო საზოგადოება და მათ შორის ეხებოდა ეს საქართველოსაც, ბევრად უფრო მეტი სალომე ზურაბიშვილი და ელენე ხოშტარია ცხოვრობდა მაშინ საქართველოში. ასეთი ბნელებისთვის დაწერა ვაშა ფშაველამ მე-19 საუკუნეში „სტუმარ-მასპინძელი“. მინდა, საზოგადოებას ვთხოვო, რომ დააკვირდეს მოვლენებს, ვინ რა დონეზე ავლენს სიბნელეს. ეს არის ძალიან მნიშვნელოვანი. რაც შეეხება ქვეყნის დატოვებას, ამაზეც გააკეთა ზურაბიშვილმა სპეკულაციური განცხადება, რამაც შეიძლება, გამოიწვია არასწორი ინტერპრეტაციები. ისე გამოიყვანა, თითქოს მან მოსთხოვა შს მინისტრს ქორწილის მეორე დღის ჩაშლა და ეს მოთხოვნა გაითვალისწინა მინისტრმა. აქ მკაფიოდ უნდა განიმარტოს შემდეგი რამ, რეალურად შსს ვერც მოაწყობს ქორწილს და ვერც ჩაშლის. ამაზე საერთოდ არ იყო საუბარი და ეს იყო სპეკულაციური განცხადება პრეზიდენტის მხრიდან. სინამდვილეში, კონკრეტულმა სტუმრებმა გადაწყვიტეს, თავად დაეტოვებინათ ის ლოკაცია, სადაც იმართებოდა პროტესტი. რატომ გაკეთდა ეს, როგორ, ჩვენი საქმე არ არის. კომუნიკაცია შეიძლება, გვქონდა შს მინისტრთან, მაგრამ კომუნიკაციის შინაარსი არ იყო მოთხოვნის დაყენება ქორწილის მეორე დღის ჩაშლის თაობაზე და ამ მოთხოვნის გათვალისწინება, ეს არ იყო კომუნიკაციის შინაარსი. ავტორი - თეო ბარბაქაძე

თბილისის მერის კახა კალაძის განცხადებით, თუ მოქალაქეს „ოკუპაციის შესახებ“ კანონი დარღვეული არ აქვს, საქართველოში შემოსვლა შეუძლია. კალაძე სასტუმრო „ყვარლის ტბასთან“ დაკავშირებულ მოვლენებს გამოეხმაურა და აღნიშნა, რომ ამ საკითხზე ცალკეული პირები სპეკულირებენ, რაც ორმაგი სტანდარტია. „არ ვიცი ლავროვის სიძე იყო თუ სხვა ადამიანი, ამას არსებითი მნიშვნელობა არ აქვს, მნიშვნელოვანია ერთი რამ, ამ ადამიანებს ჰქონდათ თუ არა დარღვეული “ოკუპაციის შესახებ“ კანონი. შესაბამისად, თუ ამ ადამიანებს არ ჰქონდათ აღნიშნული კანონი დარღვეული, მათ სრული უფლება ჰქონდათ შემოსულიყვნენ საქართველოში", - განაცხადა კალაძემ. მისი განმარტებით, განვითარებული მოვლენები სპეკულაციაა. „ეს არის ჩვეულებრივი სპეკულაციები, ესენი არიან ფარისევლები, საერთოდ არანაირი დემოკრატია, ქვეყნის არავითარი სიყვარული, უბრალოდ, ძალიან დიდი დაშორებაა ამ ადამიანებსა და ზოგადად, დემოკრატიულ ღირებულებებს შორის. ესენი გახლავთ ადამიანები, ვინც ქვეყანას გარკვეული წლების განმავლობაში მართავდნენ, ჩვენ გვახსოვს ამ ადამიანების განცხადებები 2008 წლის ომის შემდეგ, როდესაც ღიად მოუწოდებდნენ რუსებს ჩამოსულიყვნენ, საქართველოში ემოგზაურათ, ბიზნესი ეკეთებინათ. ასევე, გვახსოვს ოფიციალური წერილები ომიდან რამდენიმე დღის შემდეგ, როდესაც იწვევდნენ რუსებს საქართველოში ჩამოსასვლელად. დღეს ვისმენთ მათ განცხადებებს. ესენი არიან ჩვეულებრივი ფარისევლები, სპეკულირებენ. ნებისმიერმა ადამიანმა შეიძლება ნახოს, რომ ეს არის ჩვეულებრივი ორმაგი სტანდარტი“, - განაცხადა კალაძემ. ცნობისთვის, სასტუმრო „ყვარლის ტბასთან“ აქცია გუშინ, დილიდან მიმდინარეობდა. აქციის მონაწილეები სასტუმრო „ყვარლის ტბაში“ რუსეთის საგარეო საქმეთა მინისტრის, სერგეი ლავროვის ოჯახის წევრების ყოფნას აპროტესტებდნენ. საპროტესტო აქციაზე ვითარება პოლიციასა და აქციის მონაწილეებს შორის რამდენჯერმე დაიძაბა, ადგილზე ბოლო ოფიციალური ინფორმაციით, დაკავებულია 16 პირი. მიმდინარე მოვლენებთან დაკავშირებით ბრიფინგი გამართა საქართველოს პრეზიდენტმა, სალომე ზურაბიშვილმა. პრეზიდენტის თქმით, მან პირობა მიიღო საქართველოს შინაგან საქმეთა მინისტრისგან, რომ „წასულია ის ოჯახი, ის ადამიანები, რომლებიც აპირებდნენ დღეს ქორწილის მეორე ნახევრის გადახდას და ამდენად, დღეს ქორწილი აღარ ჩატარდება“. მოგვიანებით, კიდევ ერთი აქცია „ნაციონალური მოძრაობის“ წევრებმა და მხარდამჭერებმა საგარეჯოს პოლიციის შენობასთან გამართეს და სასტუმრო „ყვარლის ტბის“ მიმდებარე ტერიტორიაზე საპროტესტო აქციაზე დაკავებულების გათავისუფლება მოითხოვეს. აქციის მონაწილეებსა და პოლიციას შორის სიტუაცია აქაც დაიძაბა. „ერთიანი ნაციონალური მოძრაობის“ ინფორმაციით, პარტიის პოლიტსაბჭოს წევრი ლაშა ფარულავა და გიორგი ლომიძე მას შემდეგ დააკავეს, რაც მათ საგარეჯოს პოლიციასთან სიმღერა „მიშა მაგარიას“ ჩართეს. იპნ

ირაკლი კობახიძეს (პატრონის თოჯინას), თურმე, ვაჟა-ფშაველას შემოქმედება ჰყვარებია, ხოდა ესეც იქნებ გავაგებინოთ, - ამის შესახებ სოციალურ ქსელში პარტია "საქართველოსთვის" აღმასრულებელი მდივანი ბერდია სიჭინავა წერს. მისი თქმით, 1905 წელს, ასე მიმართავდა ვაჟა რუსეთს: “მოგვშორდი, წადი! ნუთუ თვით არა ჰგრძნობ, ღირსი არა ხარ აქ ყოფნისა? რა მარგე? რა გამიკეთე? არაფერი. დაღუპვისა და ზარალის მეტი. გამატიტვლე, გამაშიშვლე, წამართვი ლუკმაპური. მხედავდი მშიერ-ტიტველს, გეხვეწებოდი, გემუდარებოდი: შემიბრლე, მეც ადამიანი ვარ, მეც გრძნობა მაქვს, ნუ მიცქერი, როგორც პირუტყვსო. რომ გაგიჭირე საქმე თხოვნითა და ლაქუცით, ვფიქრობდი შენთვის გული მომელბო, ჩემზე ცოტა რამ მოწყალება მოგეღო, შენ მოწყალების ნაცვლად მოინდომე ჩემთვის ენაც მოგეკეთა, ენა, რომლითაც ჩემს ტანჯვა-ვაებას გიცხადებდი. სულ ის გინდოდა, გაჩუმებული, დადუმებული ვყოფილიყავი და ასე ნელ-ნელა, ჩუმად დამელია სული. შვილები ჩაგაბარე, – გაგინათლებო დამპირდი. ისე შენ მოგცას განათლებული, როგორც შენ ჩემი შვილები გაანათლე. რაც იცოდნენ, ისიც დაავიწყე, საღი ტვინი, საღი ჯან-ღონე, საღი გრძნობა მოუწამლე, მოუშხამე და ისეთები დამიბრუნე: “ჰა, შენი შვილები, გაიხარე იმათ სიკეთითაო!” არათუ გარეშე მტრებისგან დამიფარე, შენ თვით გადაიქეც ჩემს მტრად, შინაურ ჯალათად – დამადგი რკინის უღელი, ხელ-ფეხზე ბორკილი, დამიგე ქვეშაგებად ეკალი!”, - წერს ბერდია სიჭინავა.

2023 წლის 21 მაისის მონაცემებით, საქართველოში, ინფექციური პათოლოგიის, შიდსის და კლინიკური იმუნოლოგიის ცენტრში რეგისტრირებულია 9998 აივ ინფიცირებული პირი. ამის შესახებ ინფორმაციას თბილისის ინფექციური პათოლოგიის, შიდსისა და კლინიკური იმუნოლოგიის ს/პ ცენტრი ავრცელებს. მათივე ცნობით, აივ ინფიცირებულთა შორის 7464 – მამაკაცია და 2534 – ქალი, პაციენტთა უმრავლესობა 29-დან 39 წლამდეა. „თბილისის ინფექციური პათოლოგიის, შიდსისა და კლინიკური იმუნოლოგიის ს/პ ცენტრის წარმომადგენლებმა შიდსით გარდაცვლილთა საერთაშორისო დღე აქცია-პერფორმანსით და პრესკონფერენციით აღნიშნეს. შიდსით გარდაცვლილთა ხსოვნის საერთაშორისო დღეს მსოფლიოს 90-ზე მეტ ქვეყანა აღნიშნავს. თბილისის ინფექციური პათოლოგიის, შიდსისა და კლინიკური იმუნოლოგიის ს/პ ცენტრი აღნიშნულ თარიღს ტრადიციულად 1996 წლიდან მაისის ყოველ მესამე კვირა დღეს აღნიშნავს. წლევანდელი წლის საერთაშორისო დევიზია „გვახსოვდეს და ვიმოქმედოთ!“ მსოფლიოში აივ პანდემიის დაწყებიდან დღემდე აივ ინფექციით სულ 84,2 მლნ ადამიანი დაავადდა და 40,1 მლნ-ზე მეტი გარდაიცვალა. რაც შეეხება საქართველოს, 2023 წლის 21 მაისის მონაცემებით ინფექციური პათოლოგიის, შიდსის და კლინიკური იმუნოლოგიის ცენტრში რეგისტრირებულია 9998 აივ ინფიცირებული პირი. მათ შორის 7464 – მამაკაცია და 2534 – ქალი. პაციენტთა უმრავლესობა 29-დან 39 წლამდეა. შიდსი 4885 პაციენტს განუვითარდა, 2122 გარდაიცვალა. 30 აპრილის მონაცემებით არვ მკურნალობას იტარებს 6149 (5484 + 665 აფხაზეთი) პაციენტი, მათ შორის 41 (32 + 9 (აფხაზი ბავშვი)) - ბავშვია. რეგისტრირებულ შემთხვევათა განაწილება გადაცემის გზების მიხედვით ასეთია: 32.8 % (3275) - ნარკოტიკების ინფექციური მომხმარებელია; 52.2 % (5222) - დაინფიცირდა ჰეტეროსექსუალური კონტაქტის შედეგად; 12.8 % (1281) - მამაკაცები რომელთაც სექსი აქვთ მამაკაცთან; 1.2 % (121) - დაინფიცირდა ვერტიკალური გადაცემის გზით; 0.4 % (42) - სისხლის რეციპიენტია; 0.6 % (57) - გადაცემის გზა დაუდგენელია; აივ ინფიცირების ყველაზე მეტი შემთხვევა რეგისტრირებულია თბილისში (3771 შემთხვევა, მათგან 100 უცხოეთის მოქალაქეა 2 დაუდგენელი); სამეგრელოში 1285; შემდეგ იმერეთში 1212; აჭარაში 1165; აფხაზეთში (554); კახეთში (494); ქვემო ქართლში (599); შიდა ქართლში (392); გურიაში (217); სამცხე-ჯავახეთში (141) და ა.შ. 2023 წლის 21 მაისის მონაცემებით დაფიქსირებულია – 219 ახალი შემთხვევა. შარშან შესაბამის პერიოდში გამოვლინდა 229 ახალი შემთხვევა. 2023 წელს დარეგისტრირდა - 28 აივ ინფიცირებულის გარდაცვალების შემთხვევა (25 მამაკაცია და 2 ქალი). 2022 წელს - 139 2021წ -144, 2020 წ - 157, 2019წ - 116, 2018 წ. - 135, 2017 წ. - 127, 2016 წ. - 168, 2015 წ. - 94, 2014 წ. - 84 პირი. სულ საქართველოში გამოვლენილია 129 აივ ინფიცირებული ბავშვი. მათ შორის 76 - ვაჟი, 53 - გოგონა. 32 გარდაიცვალა. 3 გავიდა ქვეყნიდან. აივ/შიდსზე გამოკვლევა შეგიძლიათ ჩაიტაროთ ინფექციური პათოლოგიის და შიდსის ცენტრში. აივ ტესტირება უფასო და კონფიდენციალურია“, - აღნიშნულია თბილისის ინფექციური პათოლოგიის, შიდსისა და კლინიკური იმუნოლოგიის ს/პ ცენტრის მიერ გავრცელებულ ინფორმაციაში. მათივე ცნობით, შიდსის ცენტრის მედიკოსებმა ტრადიციულად გარდაცვლილი პაციენტების ხსოვნის პატივსაცემად სანთლები აანთეს და ჰაერში ბუშტები გაუშვეს. „შიდსით გარდაცვლილთა ხსოვნის დღე პირველად სან-ფრანცისკოში აღინიშნა 1983 წელს ენთუზიასტთა ჯგუფის მიერ. მოგვიანებით ამ დღის აღნიშვნა საერთაშორისო ტრადიციად იქცა და ყოველი წლის მაისის მესამე კვირას ათასობით ადამიანი ხელში ანთებული სანთლებით გამოდის ქუჩებში, რათა სოლიდარობა გამოუცხადოს შიდსით დაავადებულებს და მათ ახლობლებს. აღნიშნული თარიღის აღნიშვნის მიზანია, არ შემოვიფარგლოთ მხოლოდ გარდაცვლილთა მოგონებით, არამედ აქტიურად ჩავებათ მოქმედებაში ამ დაავადების პროფილაქტიკის, მკურნალობის და შიდსთან ასოცირებული სხვა პრობლემების გადასაწყვეტად. საქართველოში ჯერ კიდევ არის ეპიდემიის თავიდან აცილების შესაძლებლობა, ოღონდ საჭიროა ამ პრობლემის მიმართ უფრო სერიოზული ყურადღება როგორც სახელმწიფოს, ისე თითოეული ჩვენგანის მხრიდან“, - ნათქვამია გავრცელებულ ინფორმაციაში. იპნ

ევროკომისიის პრეზიდენტი ურსულა ფონ დერ ლაიენი აცხადებს, რომ რუსეთის წინააღმდეგ ევროკავშირის სანქციების ახალი პაკეტი 90-ზე მეტ უცხოურ კომპანიას შეეხება, რომლებიც მოსკოვს სანქციების გვერდის ავლაში ეხმარებიან. ამის შესახებ იაპონიაში „დიდი შვიდეულის“ სამიტზე მყოფმა ევროკომისიის პრეზიდენტმა გერმანულ მაუწყებელს, ZDF-ს განუცხადა. ურსულა ფონ დერ ლაიენმა აღნიშნა, რომ ევროკავშირი სერიოზულად არის მოწოდებული, აღკვეთოს რუსეთის მხრიდან სანქციების თავის არიდება. „სანქციების მე-11 პაკეტში ჩვენ გვყავს 90-ზე მეტი კომპანია მთელი მსოფლიოდან, რომელთა დაკავშირებითაც გვაქვს მკაფიო მტკიცებულებები, რომ ისინი სანქციებს არღვევენ და ევროკავშირიდან რუსეთში სანქცირებული საქონელი ჩააქვთ მესამე ქვეყნებიდან“, – აღნიშნა ფონ დერ ლაიენმა. ევროკომისიის ხელმძღვანელის თქმით, ამ კომპანიებს შორის დაახლოებით რვა ჩინეთშია რეგისტრირებული. „ეს არ ნიშნავს, რომ ისინი უნდა იყვნენ ჩინური კომპანიები. ეს არიან კომპანიები, რომლებიც ნაწილობრივ ქაღალდზე არსებობენ და ჰყავთ მფლობელები, რომლებიც სხვა ქვეყნებიდან არიან. თუმცა, ისინი რეგისტრირებული არიან ჩინეთში“, – განმარტა მან. ავტორი - ქეთი ჩოხელი

კათოლიკე ეკლესია საქართველოს მართლმადიდებელი ეკლესიის საპატრიარქოს მიერ გავრცელებულ განცხადებას პასუხობს, რომელიც ბუზმარეთში მომხდარ ინციდენტს შეეხება. საქართველო–თურქეთის სასაზღვრო ზონაში, ბუზმარეთის ეკლესიასთან, მართლმადიდებელი ბერი შეეცადა, ხელი შეეშალა კათოლიკე მორწმუნეებისთვის ტაძრის მიმდებარედ წირვის აღვლენაში. საქართველოს მართლმადიდებელი ეკლესიის საპატრიარქო ხსენებულ ამბავს 19 მაისს, განცხადებით გამოეხმაურა. უწყების პრესსამსახურის თქმით, “ინფორმაცია ცალმხრივად და ტენდენციურად გაშუქდა კათოლიკე ეკლესიის წარმომადგენელთა მიერ, ამასთან, მასში მართლმადიდებელი სასულიერო პირი დისკრედიტებულად იქნა წარმოჩენილი”. კათოლიკე ეკლესიის პასუხს უცვლელად გთავაზობთ: “ა.წ. 18 მაისს, ადიგენის მუნიციპალიტეტში, სასაზღვრო ზოლში მდებარე ბუზმარეთში მომხდარ ინციდენტთან დაკავშირებით, საქართველოს საპატრიარქოს მიერ გამოქვეყნებული განცხადებით კათოლიკე ეკლესია სრულიად გაკვირვებულია. ინციდენტის შემდეგ გვეგონა, რომ ეს მხოლოდ ერთეული მართლმადიდებელი სასულიერო პირის მცდარი შეხედულება და ქმედება იყო, მაგრამ რაკი ბერს, რომელიც კათოლიკე სასულიერო პირს ამგვარი ლექსიკით ესაუბრება („ტო“, „ბიჭო“, „ძმაო“) მხარს უჭერს საქართველოს საპატრიარქო, გვაფიქრებინებს, რომ ის მძიმე შეცდომის მსხვერპლი გამხდარა არაკეთილმოსურნე შინაურის ხელით დაწერილი ამ ტექსტით. კათოლიკე ეკლესიას სურს ყურადღება გაამახვილოს იმ რამდენიმე საკითხზე, რაც უტყუარ მტკიცებულებადაა მოყვანილი ამ განცხადებაში . პირველ რიგში, გვინდა ღიად ვთქვათ, რომ დიახ, კათოლიკე ეკლესია აცხადებს ლეგიტიმურ პრეტენზიას ბუზმარეთის ტაძარზე ორი მიზეზით: ჯერ ერთი, ამ საყდრის ამაღლება დღეს (კათოლიკური კალენდრით) მოლოცვის ადათი უხსოვარ წარსულში იღებს სათავეს, რასაც ამ მხარის ყველაზე უხუცესი მკვიდრნიც მოწმობენ; ეს სალოცავი არასოდეს მიუტოვებიათ ადგილობრივ კათოლიკეებს. და მეორე: 2006-07 წლებში კათოლიკე მორწმუნეთა – უდელი წარმოშობის ორი ოჯახის – სახსრებით და შრომით მოხდა მისი აღდგენა. რასაკვირველია, რომ ეკლესიის ერთობის პერიოდის ტაძრები ჩვენი ზიარი სიწმიდეებია. საქართველოს მართლმადიდებელი ეკლესიის ოფიციალურ ტექსტში არაკეთილმოსურნე შინაურის მიზეზით გაპარული ასეთი ფრაზა: „კათოლიკური ეკლესია, როგორც ცალკე ერთეული, XI საუკუნიდან იწყებს ჩამოყალიბებას“, უცნაურ შეცდომად მოჩანს მისი უწმიდესობისა და უნეტარესობის, სრულიად საქართველოს კათოლიკოს-პატრიარქის ბოლო 25 წლის მანძილზე გამონათქვამების ფონზე, ორივე პაპის ვიზიტების დროს. მიუხედავად იმისა, რომ არაერთი ვითომ თეოლოგისგან შეიძლება მოისმინო კიდეც ასეთი აჯამობა, ვერც ერთი მართლმადიდებელი ეკლესია ოფიციალურ ტექსტებში ვერც კი შეჰბედავს რომის საყდარს მსგავს რამეს. ასეთი უვიცობის როშვა მხოლოდ მდარე პრესას თუ ეპატიება. ვიმედოვნებთ, რომ ეს უნებლიე შეცდომა გასწორდება და სამების ტაძრის გუნდის მიერ პაპისათვის ლათინურად ნაგალობები „შენ ხარ პეტრე“ კვლავაც დარჩება საქართველოს მართლმადიდებელ ქრისტიანთა რწმენის ნამდვილ გამოხატულებად. განცხადებაში ასევე წერია, რომ თითქოსდა ყოველ წელს კათოლიკე მრევლი ბუზმარეთის ტაძარში შეჭრას ცდილობს, რაც სიმართლეს არ შეესაბამება. კათოლიკე მომლოცველები უკვე მრავალი წელია შევიწროებული არიან აქ დამკვიდრებული ბერების მხრიდან. საგულისხმოა, რომ სანამ ამ ადგილზე მართლმადიდებლური მონასტერი დაარსდებოდა, კათოლიკური წესით წირვა ნასაყდრალზე უკვე აღევლინებოდა. საბჭოთა პერიოდშიც ყოველწლიურად იხსნებოდა სასაზღვრო ზოლი ხალხისათვის. კომუნისტური პერიოდის შემდეგ აქ წირვის აღვლენა განაახლა კათოლიკე სასულიერო პირმა, ვალის მკვიდრმა მამა ზურაბ კაკაჩიშვილმა. მხოლოდ ამის შემდეგ ხდება აქ მართლმადიდებლური მონასტრის შექმნა, ტერიტორიის შემოღობვა, კათოლიკეთა მიერ აღდგენილი ტაძრის მისაკუთრება და წლიდან წლამდე კათოლიკე მომლოცველთა სულ უფრო მეტად გარიყვა. გვინდა ხაზგასმით აღვნიშნოთ, რომ გასულ 18 მაისს, საუბარი იყო არა ტაძრის შიგნით ან ტაძრის ეზოში წირვის აღვლენაზე, როგორც განცხადებაშია ნათქვამი სრულებით შეუსაბამოდ, არამედ ტაძრის ეზოს გარეთ, ადგილზე, სადაც შარშან აღევლინა წმიდა წირვა. ჩნდება კითხვა, რატომ დააყენა მაინც და მაინც ამ ადგილზე ბერმა იოანემ თავისი მანქანა? კათოლიკე სასულიერო პირების მიზანი კონფლიქტი და დაძაბულობა არასდროს ყოფილა. რა გასაკვირია აღშფოთების გრძნობა გაუჩნდეს ადამიანს, რომელსაც საკუთარ ტაძარში არ უშვებენ. „უსაფუძვლო პრეტენზია ამ ტაძარზე“ – როგორცაა ნათქვამი განცხადებაში – უნდა გვაფიქრებინებდეს, რომ საფუძვლიანი პრეტენზია უდის, ივლიტის, გორის, ქუთაისისა და ბათუმის ეკლესიების შემთხვევაში სამართლიან გამოძახილს პოვებს ამ ტაძრებში ამჟამად მლოცველთა გულებში და იმის გათვალისწინებით, რომ ევროპაში არაერთი კათოლიკური ტაძარია ქართველი მართლმადიდებლების განკარგულებაში, გააჩენს იმ აბსურდის ცოცხალ განცდას, რისი მოწმენიც ყოველწლიურად ვხდებით ხოლმე ბუზმარეთში? და არც კი გვრცხვენია ქრისტიანებს ორიათასი წლის შემდეგაც ერთმანეთს ასე რომ ვექცევით? კარგად ვამოწმებთ ჩვენი უფლის რწმენას… აქვე გვსურს მადლობა გამოვხატოთ მესაზღვრეებისა და სამართალდამცავებისადმი, რომლებმაც უზრუნველყვეს სასაზღვრო ზოლში მორწმუნეების თავისუფალი გადაადგილება და ამ დღესასწაულის აღნიშვნა”, – ნათქვამია ლათინ კათოლიკეთა კავკასიის სამოციქულო ადმინისტრაციის მიერ გავრცელებულ განცხადებაში. მთავარი © www.catholic.ge ნეტგაზეთი

აშშ-ის პრეზიდენტმა ჯო ბაიდენმა დღეს, იაპონიაში უკრაინის პრეზიდენტთან ვოლოდიმირ ზელენსკისთან შეხვედრის შემდეგ, უკრაინისთვის სამხედრო დახმარების ახალი პაკეტი გამოაცხადა. „შეერთებული შტატები აგრძელებს რაც შეუძლია ყველაფრის გაკეთებას, რათა გააძლიეროს უკრაინის უნარი, დაიცვას საკუთარი თავი“, - განაცხადა ბაიდენმა. ბაიდენის თქმით, ახალი პაკეტი 375 მილიონი აშშ დოლარის ღირებულებისაა და მოიცავს საბრძოლო მასალას, არტილერიასა და სატრანსპორტო საშუალებებს. გარდა ამისა, თეთრი სახლის ლიდერმა უკრაინაში „სამართლიანი მშვიდობისადმი“ მხარდაჭერა გამოხატა და აღნიშნა, რომ უკრაინის ტერიტორიულ მთლიანობასა და სუვერენიტეტზე „მოლაპარაკება შეუძლებელია“. როგორც მედია წერს, ბაიდენსა და ზელენსკის შორის ეს პირველი პირისპირ შეხვედრა იყო მას შემდეგ, რაც თეთრი სახლის ლიდერი კიევს თებერვალში ეწვია. ცნობისთვის, შეერთებული შტატების პრეზიდენტმა ჯო ბაიდენმა F16-ტიპის გამანადგურებლების უკრაინაში გაგზავნა და F16-ების მართვაში უკრაინელი მფრინავების აშშ-ში წვრთნა დაუშვა.

უკრაინის უსაფრთხოება ჩვენი უსაფრთხოებაა, - ამის შესახებ დიდი ბრიტანეთის პრემიერ-მინისტრმა რიში სუნაკმა განაცხადა. იაპონიის ქალაქ ჰიროსიმაში, ბრიტანეთის პრემიერმა დღეს განაცხადა, რომ გაერთიანებული სამეფო უკრაინელი მფრინავების წვრთნას F-16-ის ტიპის გამანადგურებლების მართვაში ამ ზაფხულს დაიწყებს. „უკრაინამ არა მხოლოდ ომი უნდა მოიგოს, არამედ სამართლიანი და ხანგრძლივი მშვიდობაც“, - აღნიშნა დიდი ბრიტანეთის პრემიერ-მინისტრმა. ამასთან, სუნაკმა უკრაინის პრეზიდენტის, ვოლოდიმირ ზელენსკის ჰიროსიმაში, „დიდი შვიდეულის“ სამიტზე ყოფნას „ძალიან ძლიერი მომენტი“ უწოდა. ipn

“ქართული ოცნების” ერთ-ერთი ლიდერი გია ვოლსკი ადასტურებს, რომ საქართველოში ნამდვილად იმყოფებოდა სერგეი ლავროვის შვილი. ამის შესახებ ვოლსკიმ იმედის ეთერში განაცხადა. “ლავროვის შვილი იყო, როგორც მოგვიანებით გავიგეთ. ვინოკუროვაა, სხვა გვარით არის. ქმრის გვარზეა. მისი ქმრის ძმის ქორწილი იყო, როგორც მეუბნებიან”, – განაცხადა ვოლსკიმ. ვოლსკის განცხადებით, ლავროვის შვილის ქმრის ძმა საკმაოდ ანტირუსული განცხადებებით არის ცნობილი და ფეისბუკზე წერს “არა ომს”, “არა უკრაინაზე თავდასხმას” და ა.შ. “მთლად რადიკალური განცხადებები არ აქვს: ძირს პუტინი, მაგრამ საკმაოდ თავისუფლად მოაზროვნე ხალხია”. მისივე თქმით, ლავროვის შვილმა აშშ-ში დაამთავრა უმაღლესი სასწავლებელი და შესაძლოა ამერიკული პასპორტიც აქვს. “არ არის სასიამოვნო ისეთ რაღაცებზე ვჭორაობ”, – განაცხადა ვოლსკიმ. მან უსიამოვნო უწოდა ლავროვის შვილის, პოზნერის (2021 წელს) თუ მიხალკოვის ვიზიტს (2011 წელს) საქართველოში, მაგრამ “ჯოხით რომ გამოეკიდები არ არის ის რეალობა, რაც უნდა აისახოს”. ტელეკომპანია „მთავარის“ ინფორმაციით, კახეთში, ყვარლის ტბაზე, სერგეი ლავროვის სიძის ძმა ქორწილს იხდის. ის, რომ საქართველოში იმყოფება, დასტურდება მიკა ვინოს, (იგივე მოშე ვინოკუროვის) და მისი მეუღლის ინსტაგრამ გვერდებიდან. მათ საქორწილო ცერემონიის ამსახველი ფოტოები გამოაქვეყნეს, სადაც იუსტიციის სახლის მიერ გაცემული ქორწინების მოწმობებიც ჩანს. „მთავარი არხის“ ინფორმაციით, ყვარელში იმყოფებიან სერგეი ლავროვის შვილი ეკატერინა ვინოკუროვა (ლავროვა) და მისი ქმარი ალექსანდრ ვინოკუროვი. ორივე მათგანი სანქცირებულია. ორივე სასტუმრო — „ახაშენი ღვინის კურორტი და სპას“ და „ყვარლის ტბა“ — იდენტური განცხადებებით უარყოფენ ლავროვის შვილის სტუმრობასა და საქორწილო ღონისძიებასთან დაკავშირებით გავრცელებულ ინფორმაციას და ამბობენ, რომ „ლავროვის გვარით სტუმარი არ უფიქსირდებათ“. თუმცა ეკატერინა ლავროვი ქმრის გვარს — ვინოკუროვას ატარებს. ამასთან, „მთავარმა არხმა“ ჩაატარა ექსპერიმენტი: ჟურნალისტმა სასტუმროში დარეკა, როგორც ყვავილების მაღაზიის კურიერმა და იკითხა, იყო თუ არა „ყვარლის ტბაში” ადამიანი, სახელით და გვარით ეკატერინა ლავროვა, ვინაიდან მისთვის ყვავილების თაიგული იყო შეკვეთილი. „მთავარი არხის” ჩანაწერის თანახმად, სასტუმროში უთხრეს, რომ სახელსა და გვარს ჩაინიშნავდნენ და დაუკავშირდებოდნენ. შემდგომ ჩანაწერში, რომელიც ეთერში გავიდა, ტელეარხის ცნობით, სასტუმროს წარმომადგენელი კურიერად წარდგენილ ჟურნალისტს ეუბნება: „…გავარკვიეთ, რომ სწორად მოგაქვთ თაიგული”. „ნამდვილად თქვენთანაა ხომ სტუმარი?” — კითხულობს ჟურნალისტი, რასაც ხსენებული პირი პასუხობს: „კი, კი”. სასტუმრო „ახაშენი ღვინის კურორტმა“ კი მოგვიანებით მორიგი განმარტება გაავრცელა და თქვა, რომ მისი „პრეროგატივა არ არის მოახდინოთ სტუმრების იდენტიფიცირება“. „სასტუმროს ამის არც რესურსი და არც ვალდებულება არ გააჩნია. შესაბამისად, სასტუმროს ადმინისტრაცია არ და ვერ იქნება ინფორმირებული, ჩვენი სტუმრების ვიზიტის მიზანთან ან მათ გადაადგილებასთან დაკავშირებით“, — ნათქვამია სასტუმროს განცხადებაში. ჟურნალისტებმა ლავროვის შვილის და სიძის საქართველოში შესაძლო ყოფნაზე კითხვები დაუსვეს შინაგან საქმეთა მინისტრს ვახტანგ გომელაურს, რომელიც 19 მაისს პარლამენტში, ინტერპელაციის წესით იყო მისული. გომელაურმა კითხვას არ უპასუხა. netgazeti

პარლამენტის წინ, რუსეთთან პირდაპირი ფრენების წინააღმდეგ მიმდინარე აქციის მონაწილეებმა საკუთარი მოთხოვნები დაასახელეს, რომელთა შესასრულებლად ხელისუფლებას ერთსაათიანი ვადა მისცეს. კერძოდ, აქტივისტები ითხოვენ, რომ გათავისუფლდნენ დღეს, ყვარელში გამართულ აქციაზე დაკავებულები და "ქართულმა ოცნებამ" რუსეთთან ფრენების გაუქმების გადაწყვეტილება მიიღოს. "ბიძინა ივანიშვილი 22:00 საათზე იძინებს ხოლმე, ამიტომ ერთ საათში, 21:00-დან 22:00 საათამდე გვინდა პასუხი, უშვებენ თუ არა პატიმრებს და აუქმებენ თუ არა ფრენებს. მოქალაქეები ელოდებიან “ქართული ოცნების” გადაწყვეტილებას. კიდევ მეტნი ვიქნებით და გავაგრძელებთ დისკომფორტის შექმნას “ქართული ოცნებისთვის”. ერთ საათში გეტყვით, რა შეიძლება გავაკეთოთ დღეს და ხვალ”, - განაცხადა ერთ-ერთმა აქტივისტმა. იპნ

მედიის ადვოკატირების კოალიცია კატეგორიულად გმობს სასტუმრო ყვარლის ტბასთან მიმდინარე პროცესების გაშუქებისას მედიის წინააღმდეგ ფიზიკური ძალადობის, ტექნიკის წართმევისა და პროფესიული საქმიანობის განხორციელებაში უკანონოდ ხელშეშლის ფაქტებს. მედიით გავრცელებული ინფორმაციით, ყვარლის ტბაზე, სასტუმროში რუსეთის საგარეო საქმეთა მინისტრის ნათესავი ქორწილის გადახდას აპირებს, სადაც, სავარაუდოდ, სერგეი ლავროვის სანქცირებული შვილი, ეკატერინა ლავროვა და მისი ქმარი იმყოფებიან. პროტესტი ორი დღეა მიმდინარეობს და მედია კახეთში მიმდინარე პროცესებს აქტიურად აშუქებს. სასტუმროს ადმინისტრაცია უარყოფს სტუმრებს შორის რუსეთის საგარეო საქმეთა მინისტრის შვილის ყოფნას. ტელეკომპანია “ფორმულას” ინფორმაციით, სასტუმრო “ყვარლის ტბის” უსაფრთხოების სამსახურის თანამშრომელმა ტელევიზიის ჟურნალისტს ფიზიკური შეურაცხყოფა მიაყენა და პროფესიული საქმიანობის განხორციელებაში ხელი შეუშალა. “TV პირველის” ინფორმაციით, კახეთის სამხარეო პოლიციის წარმომადგენლებმა მაუწყებლის ჯგუფს აპარატურა წაართვეს, კერძოდ, ვიდეო ოპერატორის ტელეფონი, რომლის მეშვეობითაც გადამღები ჯგუფი პირდაპირ ჩართვას ახორციელებდა. ტელევიზიის ცნობით, მიმდინარეობს საკომუნიკაციო არხების ჩახშობა, რათა შეიქმნას საინფორმაციო კომუნიკაციის შეფერხება. “სამწუხაროდ, ეს არ არის პირველი შემთხვევა, როდესაც მედიის წარმომადგენლებს პროტესტის თავისუფლად და უსაფრთხოდ გაშუქების საშუალება არ ეძლევათ. ძალადობასა და უკანონო ჩარევაზე სახელმწიფოს უმოქმედობისა თუ თავად ხელისუფლების მხრიდან ჟურნალისტების საქმიანობის ხელშეშლის შედეგად, სახეზე გვაქვს უკვე დამკვიდრებული ნეგატიური პრაქტიკა. საქართველოს კონსტიტუცია და კანონმდებლობა იცავს ჟურნალისტების უფლებებს, შეასრულონ თავიანთი მოვალეობები ძალადობისა თუ საქმიანობაში ხელშეშლის გარეშე. შესაბამისად, მედიის ადვოკატირების კოალიცია მოუწოდებს საქართველოს ხელისუფლებას, დაუყოვნებლივ შეწყვიტოს მედიის საქმიანობაში უკანონო ჩარევა, უზრუნველყოს თავდასხმასა და ხელშეშლაში პასუხისმგებელი პირების კანონის მთელი სიმკაცრით დასჯა და უსაფრთხო სამუშაო პირობების შექმნა”, – ნათქვამია მედიის ადვოკატირების კოალიციის განცხადებაში. ნეტგაზეთი

თბილისში რუსეთთან პირდაპირი ფრენების შეწყვეტის მოთხოვნით საპროტესტო აქცია მიმდინარეობს. აქციის მონაწილეებმა შეკრება 18:00 საათზე დაიწყეს. შემდგომში რუსთაველის გამზირი გადაიკეტა. “რუსული თვითმფრინავი ევროკავშირში არ ჯდება” – აცხადებენ აქციის მონაწილეები. რუსეთსა და საქართველოს შორის ფრენები გუშინ განახლდა. 19 მაისს თბილისში პირველი რუსული თვითმფირნავი დაჯდა 2019 წლის შემდეგ, როდესაც გავრილოვის ღამის გამო პუტინის ფრენებით ქვეყნებს შორის ფრენები აიკრძალა. გარდა ფრენებისა, მომიტინგეები აპროტესტებენ რუსეთის საგარეო უწყების სიძის ოჯახის წევრის ქორწილს, რომელიც საქართველოში იგეგმებოდა და გავრცელებული ინფორმაციით ჩაიშალა. ყვარელში დღეს არაერთი ადამიანი დააკავეს სასტუმროსთან დემონსტრაციისას. დღევანდელი აქციის ერთ-ერთი მოთხოვნა სწორედ მათი გათავისუფლებაცაა. ტელეკომპანია „მთავარის“ ინფორმაციით, კახეთში, ყვარლის ტბაზე, სერგეი ლავროვის სიძის ძმა ქორწილს იხდის. ის, რომ საქართველოში იმყოფება, დასტურდება მიკა ვინოს, (იგივე მოშე ვინოკუროვის) და მისი მეუღლის ინსტაგრამ გვერდებიდან. მათ საქორწილო ცერემონიის ამსახველი ფოტოები გამოაქვეყნეს, სადაც იუსტიციის სახლის მიერ გაცემული ქორწინების მოწმობებიც ჩანს. „მთავარი არხის“ ინფორმაციით, ყვარელში იმყოფებიან სერგეი ლავროვის შვილი ეკატერინა ვინოკუროვა (ლავროვა) და მისი ქმარი ალექსანდრ ვინოკუროვი. ორივე მათგანი სანქცირებულია. ორივე სასტუმრო — „ახაშენი ღვინის კურორტი და სპას“ და „ყვარლის ტბა“ — იდენტური განცხადებებით უარყოფენ ლავროვის შვილის სტუმრობასა და საქორწილო ღონისძიებასთან დაკავშირებით გავრცელებულ ინფორმაციას და ამბობენ, რომ „ლავროვის გვარით სტუმარი არ უფიქსირდებათ“. თუმცა ეკატერინა ლავროვი ქმრის გვარს — ვინოკუროვას ატარებს. ამასთან, „მთავარმა არხმა“ ჩაატარა ექსპერიმენტი: ჟურნალისტმა სასტუმროში დარეკა, როგორც ყვავილების მაღაზიის კურიერმა და იკითხა, იყო თუ არა „ყვარლის ტბაში” ადამიანი, სახელით და გვარით ეკატერინა ლავროვა, ვინაიდან მისთვის ყვავილების თაიგული იყო შეკვეთილი. „მთავარი არხის” ჩანაწერის თანახმად, სასტუმროში უთხრეს, რომ სახელსა და გვარს ჩაინიშნავდნენ და დაუკავშირდებოდნენ. შემდგომ ჩანაწერში, რომელიც ეთერში გავიდა, ტელეარხის ცნობით, სასტუმროს წარმომადგენელი კურიერად წარდგენილ ჟურნალისტს ეუბნება: „…გავარკვიეთ, რომ სწორად მოგაქვთ თაიგული”. „ნამდვილად თქვენთანაა ხომ სტუმარი?” — კითხულობს ჟურნალისტი, რასაც ხსენებული პირი პასუხობს: „კი, კი”. სასტუმრო „ახაშენი ღვინის კურორტმა“ კი მოგვიანებით მორიგი განმარტება გაავრცელა და თქვა, რომ მისი „პრეროგატივა არ არის მოახდინოთ სტუმრების იდენტიფიცირება“. „სასტუმროს ამის არც რესურსი და არც ვალდებულება არ გააჩნია. შესაბამისად, სასტუმროს ადმინისტრაცია არ და ვერ იქნება ინფორმირებული, ჩვენი სტუმრების ვიზიტის მიზანთან ან მათ გადაადგილებასთან დაკავშირებით“, — ნათქვამია სასტუმროს განცხადებაში. ჟურნალისტებმა ლავროვის შვილის და სიძის საქართველოში შესაძლო ყოფნაზე კითხვები დაუსვეს შინაგან საქმეთა მინისტრს ვახტანგ გომელაურს, რომელიც 19 მაისს პარლამენტში, ინტერპელაციის წესით იყო მისული. გომელაურმა კითხვას არ უპასუხა. ნეტგაზეთი

ზელენსკის ყოფნა ჰიროსიმაში დიდი შვიდეულის სამიტზე, შესაძლოა, გარდამტეხი მომენტი იყოს. ამის შესახებ საფრანგეთის პრეზიდენტმა, ემანუელ მაკრონმა უკრაინელ კოლეგასთან შეხვედრისას განაცხადა. შესაბამის ინფორმაციას „ფრანს 24“ ავრცელებს. როგორც ემანუელ მაკრონმა აღნიშნა, ვოლოდიმირ ზელენსკის ჩასვლა დიდი შვიდეულის ლიდერებთან შესახვედრად არის „უნიკალური შესაძლებლობა, გადასცეს თავისი გზავნილები და გაუზიაროს თავისი მოსაზრებები“. „მჯერა, რომ ეს შეიძლება იყოს გარდამტეხი მომენტი“, – განაცხადა ემანუელ მაკრონმა. თავის მხრივ, უკრაინის პრეზიდენტის ადმინისტრაციის ცნობით, ვოლოდიმირ ზელენსკიმ მადლობა გადაუხადა საფრანგეთის ლიდერს უკრაინის სამხედრო და ჰუმანიტარული მხარდაჭერის თაობაზე მნიშვნელოვანი გადაწყვეტილებებისთვის. ასევე, მან ხაზი გაუსვა საფრანგეთის მიერ „გამანადგურებლების კოალიციის“ მხარდაჭერისა და უკრაინელი მფრინავების მომზადების პროგრამაში მონაწილეობის მნიშვნელობას. ავტორი - ქეთი ჩოხელი

მე ჩემთვის ვაწესებ, ეს ბევრს არ ნიშნავს, მაგრამ მოგიწოდებთ, რომ თქვენც გაიზიაროთ, ბოიკოტს აირზენაზე, - ამის შესახებ საქართველოს პრეზიდენტმა სალომე ზურაბიშვილმა განაცხადა. მისი თქმით, აირზენა არის კომპანია, რომელიც „სულ სარგებლობს ამ სახელმწიფოთი, რომ გამდიდრდეს“. „აირზენა არის კომპანია, რომელიც სულ სარგებლობს ამ სახელმწიფოთი, რომ გამდიდრდეს. ეს იყო ყველა ხელისუფლების დროს, გაგრძელდა კოვიდის დროს და ახლა უნდა ისარგებლოს ამ ახალი რეალობით, რომელიც არის მიუღებელი ჩვენი მოსახლეობის ძალიან დიდი ნაწილისთვის. და კიდევ ერთი რამ, მე ასევე თავს შევიკავებ ბორტის გამოყენებისგან, ვიდრე ეს იქნება აირზენას ხელში, რომ კიდევ ამით არ გავამდიდრო ის კომპანია, რომელიც ფულისთვის ყველაფერზე მზად არის და ვნახეთ მისი ხელმძღვანელის გახარებული განცხადებები“, - განაცხადა ზურაბიშვილმა. იპნ

საქართველოს პრეზიდენტის სალომე ზურაბიშვილის განცხადებით, დღეს საქართველოში სერგეი ლავროვის სიძის ძმის ქორწილი აღარ ჩატარდება და ოჯახი საქართველოდან გასულია. როგორც პრეზიდენტმა აღნიშნა, ეს ქართველი ხალხის გამარჯვებაა. „დღევანდელ ინციდენტზე, თუმცა საკმაოდ გამიჭირდა დაკავშირება, მაგრამ ბოლოს მივიღე პირობა შს მინისტრისგან, რომ წასულია ის ოჯახი, ის ადამიანები, რომლებიც აპირებდნენ დღეს ქორწილის მეორე ნახევრის გადახდას და ამდენად , ქორწილი აღარ ჩატარდება დღეს. ეს არის საზოგადოების გამარჯვება, როგორც თავის დროზე იყო გავრილოვის ამ ქვეყნიდან გასვლა“, - განაცხადა სალომე ზურაბიშვილმა. ცნობისთვის, 19 მაისს მედიით გავრცელდა ინფორმაცია, რომ რუსეთის ფედერაციის საგარეო საქმეთა მინისტრის, სერგეი ლავროვის შვილი საქართველოშია და ის სასტუმრო „ყვარლის ტბაზე“ იმყოფება. მათივე ცნობით, რუსეთის საგარეო საქმეთა მინისტრის ოჯახი კახეთში გრანდიოზული ქორწილისთვის ემზადება. ქორწილი ლავროვის სიძის, ალექსანდრე ვინოკუროვის ძმას ექნება. სასტუმრო „ყვარლის ტბის“ ადმინისტრაციის განცხადებით, რუსეთის ფედერაციის საგარეო საქმეთა მინისტრის, სერგეი ლავროვის შვილის „ყვარლის ტბაზე“ სტუმრობა სიმართლე არ შეესაბამება. როგორც მათ მიერ გავრცელებულ განცხადებაშია აღნიშნული, ლავროვის გვარით სასტუმროში სტუმარი არ ფიქსირდება და არც აქამდე დაფიქსირებულა. იპნ

საქართველოს ახალგაზრდა იურისტთა ასოციაცია ყვარელში მიმდინარე მოვლენებზე განცხადებას ავრცელებს. ორგანიზაციის განცხადებით, ყვარელში მიმდინარე აქციაზე მედიას ხელი ეშლება მოვლენების გაშუქებაში და ადგილი ჰქონდა პოლიციის მიერ ადმინისტრაციული წესით დაკავებული პირების მიმართ ღირსების შემლახავი მოპყრობის ფაქტებს. „შემაშფოთებელია, რომ კადრებში ჩანს, როგორ ეშლება მედიას ხელი მოვლენების გაშუქებაში. [a]კერძოდ, ვრცელდება ინფორმაცია, როგორც სიგნალის ჩახშობის, ასევე, გადამღები აპარატურის, კერძოდ, ტელეფონების, ჩამორთმევის/სხვაგვარი ხელშეშლის შესახებ. კადრებში, ასევე, ჩანს პოლიციის მიერ ადმინისტრაციული წესით დაკავებული პირების მიმართ ღირსების შემლახავი მოპყრობის ფაქტები. [b]ამჟამინდელი ინფორმაციით დაკავებულია 10-მდე აქტივისტი. საქართველოს ახალგაზრდა იურისტთა ასოციაცია მოუწოდებს სამართალდამცავებს: ️ხელი არ შეუშალონ მედიას განახორციელოს პროფესიული საქმიანობა; არ გამოიყენოს მშვიდობიანი დემონსტრანტების მიმართ გძალა და არ დაუშვას უკანონო ადმინისტრაციული დაკავების პრაქტიკა; საქართველოს ახალგაზრდა იურისტთა ასოციაცია მოუწოდებს სპეციალურ საგამოძიებო სამსახურს: დროულად შეისწავლოს და მოახდინოს შესაბამისი რეაგირება მედია წარმომადგენლების ჟურნალისტურ საქმიანობაში ხელშეშლის ფაქტებზე, როგორც ინდივიდუალურ შემთხვევებში, ისე, სიგნალის ჩამხშობი აპარატურის შესაძლო დამონტაჟების ფაქტზე. საქართველოს ახალგაზრდა იურისტთა ასოციაცია განაგრძობს მიმდინარე მოვლენების მონიტორინგს.“ – ვკითხულობთ განცხადებაში. ——————— ყვარელში, მოქალაქეები რუსეთის საგარეო საქმეთა მინისტრ, სერგეი ლავროვის, სიძის ძმის ქორწილის საქართველოში გადახდას აპროტესტებენ. აქციას მართავენ სამოქალაქო აქტივისტები და ოპოზიციური პარტიების წარმომადგენლები. აქციის მონაწილეებმა კვერცხები ესწროლეს „ყვარლის ტბის“ ტერიტორიიდან გამოსულ მიკროავტობუსებს. ადგილზე მობილიზებულია პოლიცია და სპეციალური დანიშნულების რაზმი. აქციის მონაწილეებსა და პოლიციას შორის ადგილი ჰქონდა დაპირისპირებას. მედიაში გავრცელებული ინფორმაციით დაკავებულია 20-მდე ადამიანი პუბლიკა

ყვარელში ადმინისტრაციული წესით 16 ადამიანი დააკავეს. ინფორმაცია „პუბლიკას“ შინაგან საქმეთა სამინისტროში დაუდასტურეს. მედიაში გავრცელებული ინფორმაციით, დაკავებულებს შორის არიან, შუშანა მაცაბერიძე, გელა ხასაია, გიორგი გოგიტიძე, დიმა ჩიქოვანი, ტიტე გედენიძე, ნიკა ჩხობაძე, ბექა პაპაშვილი, ლადო ხუსკივაძე და გიორგი ყაველაშვილი. ენმ-ის ინფორმაციით, დაკავებულია „ნაციონალური მოძრაობის“ ლიდერი დიმიტრი ჩიქოვანი. საგარეჯოს საკრებულოს წევრი „ნაციონალური მოძრაობიდან“ დავით დიღმელაშვილი. გურჯაანის საკრებულოს წევრი ენმ რამაზ ქერეჭაშვილი. ყვარლის საკრებულოს წევრი ენმ-დან ნიკა ღონიაშვილი. ყვარელში, მოქალაქეები რუსეთის საგარეო საქმეთა მინისტრის, სერგეი ლავროვის, სიძის ძმის ქორწილის საქართველოში გადახდას აპროტესტებენ. აქციას მართავენ სამოქალაქო აქტივისტები და ოპოზიციური პარტიების წარმომადგენლები. აქციის მონაწილეებმა კვერცხები ესწროლეს „ყვარლის ტბის“ ტერიტორიიდან გამოსულ მიკროავტობუსებს. ადგილზე მობილიზებულია პოლიცია და სპეციალური დანიშნულების რაზმი. აქციის მონაწილეებსა და პოლიციას შორის დაპირისპირებას მოხდა. ————————————————————– 19 მაისს გავრცელდა ინფორმაცია, რომ საქართველოშია ლავროვის სანქცირებული შვილი, რომელიც მეუღლესთან ერთად, მაზლის ქორწილს აღნიშნავდა. „ყვარლის ტბამ“ ოფიციალურ განცხადებაში ლავროვას სტუმრობა უარყო. „მთავარის“ ინფორმაციით, ქორწილის სტუმრებს კახეთში ორი სასტუმრო მასპინძლობს, უშუალოდ საქორწინო ღონისძიება, ტელეკომპანიის ინფორმაციით, ყვარლის ტბაზე იმართება. საქართველოში ქორწილს იხდის სემიონოვიჩ ვინოკუროვი, მან საკუთარ ინსტაგრამზე საქორწილო ცერემონიის ამსახველი ფოტოები გამოაქვეყნა. ის სერგეი ლავროვის სიძის, ალექსანდრე ვინოკუროვის ძმაა. პუბლიკა

სანქციების მოხსნის შემდეგ, ქართულმა ავიაკომპანია „აირზენამ“ თბილისი-მოსკოვის მიმართულებით პირველი პირდაპირი რეისი შეასრულა. რუსული საინფორმაციო სააგენტო „რია ნოვოსტი“ წერს, რომ ფრენა უფრო რუტინული იყო, ვიდრე გუშინდელი პირველი რუსული რეისი [თბილისში], სადაც მგზავრებს შამპანურით გაუმასპინძლდნენ. „ქართული ავიაკომპანია „ჯორჯიან ეარვეისის“ პირველი თვითმფრინავი, რომელიც ოთხწლიანი შესვენების შემდეგ პირდაპირ რეისს თბილისი-მოსკოვს ახორციელებდა, აეროპორტ „ვნუკოვოში“ დაეშვა. ფრენა, პირველი რუსული რეისისგან განსხვავებით, რუტინული იყო, დაფრენის შემდეგ ტაშიც კი არ მოჰყოლია“, — წერს „რია ნოვოსტი“. ამავდროულად, საქართველოში შვეიცარიის საელჩოში რუსეთის ინტერესების სექცია ავრცელებს „ჯორჯიან ეარვეისის“ დირექტორთა საბჭოს თავმჯდომარე თამაზ გაიაშვილის კომენტარს, რომ ფრენების აღდგენა „მნიშვნელოვნად გააუმჯობესებს ბიზნეს კლიმატს საქართველოსა და მის დღეისთვის უმსხვილეს სავაჭრო პარტნიორს შორის“. „მივესალმები რუსეთის პრეზიდენტის გადაწყვეტილებას საქართველოს მოქალაქეებისთვის სავიზო რეჟიმის გაუქმებისა და ჩვენს ქვეყანასთან პირდაპირი ფრენების აღდგენის შესახებ. ეს ნანატრი ნაბიჯები პასუხობს მილიონობით ადამიანის მისწრაფებებს რუსეთსა და საქართველოში, რომლებიც დაკავშირებულია ისტორიის, ეკონომიკისა და კულტურის მრავალსაუკუნოვანი კავშირებით“, — აცხადებს გაიაშვილი. „ნეტგაზეთი“ დაუკავშირდა თამაზ გაიაშვილს, რომელმაც დაადასტურა, რომ რუსეთის ინტერესების სექციის მიერ გავრცელებული განცხადება მას ეკუთვნის. მოსკოვმა 10 მაისს მოხნა შეზღუდვა საქართველოსთან პირდაპირ ფრენებზე. მოსკოვში ამ გადაწყვეტილებას „ჰუმანიტარული ხასიათის“ უწოდეს. საქართველოს ხელისუფლება მოსკოვის გადაწყვეტილებას მიესალმება და ამბობს, რომ ეს გაუმარტივებს ცხოვრებას რუსეთში მცხოვრებ „მილიონ ქართველს“. მთავრობაში აგრეთვე აცხადებენ, რომ მხოლოდ არასანქცირებული კომპანიები და ხომალდები შეძლებენ ფრენას. პოლიტიკოსების და მოქალაქეთა ნაწილი ავიამიმოსვლის აღდგენას აპროტესტებს. ფრენების ნებართვა უკვე მიიღო სამმა კომპანიამ – რუსულმა „აზიმუტმა“, Red Wings-მა და ქართულმა „Georgian Airways-მა“. ფრენების აღდგენას კრიტიკულად უყურებენ აშშ და ევროკავშირი. ნეტგაზეთი

გავრცელებული ინფორმაციით, სასტუმრო ,,ყვარელი ლეიკ რეზორთი" დღეს სანქცირებულ რუს სტუმრებს მასპინძლობს. მათ შორის არიან, რუსეთის საგარეო საქმეთა მინისტრის, სერგეი ლავროვის ოჯახის წევრებიც. ,,ბიზნესპრესნიუსი" დაინტერესდა, ვის ეკუთვნის სასტუმრო საჯარო რეესტრის ეროვნული სააგენტოს მონაცემებით, სასტუმრო "ყვარელი ლეიკ რეზორთი", შპს "ყვარელი პალასის" საკუთრებაა. თავის მხრივ, "ყვარელი პალასის" 100%-ს, 2009 წელს რეგისტრირებული შპს "აგროგანვითრება" ფლობს, რომლის საკონტროლო პაკეტის მფლობელი ბიზნესმენი არჩილ გეგენავა და მის ძმა არიან. წილები კი ასე ნაწილდება: არჩილ გეგენავა - 37.8%; 23-23% ეკუთვნით ივანე ნიკოლაიშვილს და გიორგი ჩუბინიშვილს; 16.15% კი, ანდრო გეგენავას საკუთრებაა. ავტორი: თამარ მუკბანიანი ავტორის სხვა სტატიები

საუბარი როდესაც არის კონკრეტული რუსი ვიზიტორების საქართველოში ჩამოსვლაზე, თუ დააკვირდებით, პირველი ინფორმაცია ყოველთვის ხოშტარიას აქვს, საინტერესოა, ასეთი რა კავშირები აქვს მას, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ ჟურნალისტებს განუცხადა. მისი თქმით, დღევანდელი ლიბერალ-ფაშისტების პოლიტიკური მიზანია ესკალაცია, პროვოკაციების მოწყობა და მთავარი პროვოკატორები – ხოშტარია, მელია და სხვები დღეს სცენაზე არიან. „თქვენ გახსოვთ მათი დამოკიდებულება 2008 წლის შემდეგ, როდესაც იგივე სააკაშვილი პირადად ესტუმრა მიხალკოვს, შვილის ქორწილში და ასევე გვახსოვს დღევანდელი ლიბერალ-ფაშისტების აღელვებული პოსტები. იგივე ლაშა ბუღაძე როგორ ცრემლნარევი პოსტით გამოეხმაურა ამ ქორწილს, სააკაშვილის იქ სტუმრობას და ასე შემდეგ. დღეს ზუსტად იგივე ადამიანები გამოდიან ამ ქსენოფობიური კამპანიით. ეს არის ორმაგი სტანდარტი, რაც მიანიშნებს, რომ ამ ყველაფერს აქვს მხოლოდ პოლიტიკური მიზანი. ეს პოლიტიკური მიზანი არის ესკალაცია, პროვოკაციების მოწყობა და მთავარი პროვოკატორები არიან დღეს სცენაზე. ესენი არიან ხოშტარია, მელია და ასე შემდეგ. ერთი საინტერესო დეტალია კიდევ. როდესაც საუბარია კონკრეტული რუსი ვიზიტორების საქართველოში ჩამოსვლაზე, პირველი სახელობითი ინფორმაცია აქვს ხოლმე ყოველთვის ხოშტარიას, თუ დააკვირდებით. პოზნერის შემთხვევაშიც ასე იყო. ახლაც ამტკიცებს, რომ ზუსტად იცის, საქართველოში კონკრეტული ადამიანია ჩამოსული. საინტერესოა, რა კავშირები აქვს ასეთი ელენე ხოშტარიას, რომ პირველი იგებს რუსი ვიზიტორების საქართველოში ჩამოსვლასთან დაკავშირებით“, – განაცხადა ირაკლი კობახიძემ. ავტორი - მარიამ ბერძენიშვილი