tvati

საქართველოს პრეზიდენტი სალომე ზურაბიშვილი ლიეტუვაში ვიზიტით იმყოფება. ვიზიტის ფარგებში სალომე ზურაბიშვილმა შეხვედრა გამართა ლიეტუვის პრეზიდენტ გიტანას ნაუსედასთან. როგორც პრეზიდენტების შეხვედრის შემდეგ გამართულ პრესკონფერენციაზე გიტანას ნაუსედამ განაცხადა, მათ განიხილეს საქართველოში არსებული სიტუაცია, ასევე, ქვეყნის ევროინტეგრაცია და გამოწვევები, რომლის წინაშეც ქვეყანა დგას. გიტანას ნაუსედას თქმით, სალომე ზურაბიშვილის ვიზიტი კიდევ ერთი დადასტურებაა იმისა, რომ ლიეტუვა მხარს უჭერს საქართველოს ევროპულ გზაზე. თუმცა, მისი თქმით, ამისთავის ქვეყანამ უნდა გაატაროს საჭირო რეფორმები. „გულწრფელად გვსურს საქართველოს წარმატება, რომ მან მიაღწიოს მიზანს და გახდეს ევროკავშირის წევრი. ევროკავშირის წევრობისკენ სწრაფვა არ არის მოკლე და მარტივი გზა, ეს არის ქვეყნის ტრანსფორმაციის გზა, ეს არის ხელშესახები რეფორმები, რომლებსაც სარგებელი მოაქვს მოქალაქეებისთვის და ქვეყნის კეთილდღეობისთვის. გვწამს ქვეყნის ევროპული პერსპექტივის და გვჯერა, რომ ეს გახდება მთავრობისთვის მაკონსოლიდირებელი, რომ განახორციელოს რეფორმები“, – განაცხადა გიტანას ნაუსედამ. ამასთან, ლიეტუვის პრეზიდენტის განცხადებით, პოლიტიკურად მოტივირებული საქმეები და მედიასა და არასამთავრობო ორგანიზაციებზე ზეწოლა დემოკრატიას არ აძლიერებს. „შეხვედრაზე, ასევე, ვისაუბრეთ უსაფრთხოების გამოწვევებზე, ჰიბრიდულ საფრთხეებსა და დეზინფორმაციაზე, აუცილებლობაზე, რომ გაიზარდოს საზოგადოების მედეგობა, გაძლიერდეს ქვეყნის ინსტიტუციების შესაძლებლობები და გაძლიერდეს პროევროპული მისწრაფებები. პოლიტიკურად მოტივირებული საქმეები და მედიაზე ზეწოლა, ასევე, არასამთავრობო ორგანიზაციებზე, არ არის გზა, რომელიც დემოკრატიასა და მოქალაქეობის მედეგობას აძლიერებს“, – განაცხადა გიტანას ნაუსედამ. ნეტგაზეთი

ეს სახელმწიფოსა და ქართველი ხალხის უპატივცემულობაა. ე.წ. ჩვენი მეგობრები, პოლარიზაციას, რადიკალური ჯგუფების დაფინანსებას ხელს თავად უწყობენ, - ამის შესახებ თბილისის მერმა, კახა კალაძემ ევროპარლამენტარ ვიოლა ფონ კრამონის მთავრობის ადმინისტრაციასთან ლაზარე გრიგორიადისის მხარდამჭერ აქციაზე მისვლასთან დაკავშირებით განაცხადა. კახა კალაძის თქმით, ისეთ ადამიანებს, როგორიც ვიოლა ფონ კრამონია, საქართველოს განვითარებისა და წინსვლის არანაირი სურვილი არ აქვთ. „ეს სახელმწიფოსა და ქართველი ხალხის უპატივცემულობაა. 12 პუნქტიან გეგმაში პირველი რაც წერია, ეს არის დეპოლარიზაცია. ერთი მხრივ, ამისკენ მოგვიწოდებენ და მეორე მხრივ, ეს ადამიანები, ე.წ. ჩვენი მეგობრები, პოლარიზაციას, რადიკალური ჯგუფების დაფინანსებას ხელს უწყობენ. რბილად რომ ვთქვათ, ეს ძალიან დიდი უპატივცემულობაა. ვფიქრობ, ქართველი ხალხი კარგად ხედავს არსებულ ვითარებას. ისეთ ადამიანებს, როგორიც ქალბატონი ვიოლაა, საქართველოს განვითარებისა და წინსვლის არანაირი სურვილი არ აქვთ. ამ ადამიანებს თავიანთი ინტერესები ამოძრავებთ”, - აღნიშნა კახა კალაძემ. ინტერპრესნიუსი

ფეოლა თუ რა ჰქვია იმას, ფონ კრამონი რომ დარბის ხოლმე აქ მიტინგებზე - „მოლოტოვის კოქტეილი" თავის ქვეყანაში ესროლონ ახალგაზრდებმა პოლიციელებს და შემდეგ მხარი დაუჭიროს, აბა რას უზამენ, დაჯდება თუ არა ევროპარლამენტში? - ამის შესახებ ჟურნალისტებთან საპარლამენტო უმრავლესობის წევრმა ირაკლი ზარქუამ განაცხადა. ზარქუას განცხადებით, ფონ კრამონს „ამ ტონალობაში საუბარი შეეშალა და იმედია ბოდიშს მოიხდის". „ფეოლა თუ რა ჰქვია იმას, ფონ კრამონი რომ დარბის ხოლმე აქ მიტინგებზე, ასეთი მოუწყოს თავის ქვეყანაში, „მოლოტოვის კოქტეილი" ისროლონ და აბა მხარდაჭერას ვუცხადებო... ამას ჰგონია, რომ აქ იმაში მოხვდა... ეს არის სამართლებრივი სახელმწიფო, უძველესი ცივილიზაციის, კულტურის, ტრადიციების, აკადემიური საზოგადოებით და ამ ტონალობაში საუბარი ძალიან შეეშალა ქალბატონ კრამონს, იმედია ამას გაიაზრებს და ბოდიშს მოიხდის", - განაცხადა ზარქუამ. ზარქუას განცხადებით, მისთვის „კრამონი, კუბილიუსი და კიდევ რამდენიმე არასდროს ყოფილან პოლიტიკოსები და ისინი არიან ჩვეულებრივი ფასიანი ლობისტები". „ამ ქალბატონმა იკადრა, გამოვიდა და თქვა, სადაც „მოლოტოვის კოქტეილს" ისვრიან, მათ მხარდაჭერა აღუთქვა. ეს გააკეთოს თავის ქვეყანაში, "მოლოტოვის კოქტეილი" თავის ქვეყანაში ესროლონ ახალგაზრდებმა პოლიციელებს და შემდეგ გამოვიდეს და მხარი დაუჭიროს, აბა რას უზამენ მერე და დაჯდება თუ არა ევროპარლამენტში, მაგრამ აქ მოსულა, საქართველოა და მოსულა?! კეთილი ინებოს პატივი სცეს ამ ქვეყნის ავტორიტეტს, კულტურას, სუვერენიტეტს, ხალხს და სამართლებრივ სახელმწიფოს,"- განაცხადა ზარქუამ.

ისტორიას უკან ვერ დავაბრუნებთ, თუმცა 2008 წლის აგვისტოსა და 2014 წლის ყირიმის აგრესიის დროს, საერთაშორისო თანამეგობრობას დღევანდელის მსგავსი ერთიანობა და სოლიდარობა რომ გამოეჩინა, შესაძლოა, თავიდან ყოფილიყო აცილებული დღევანდელი ძალიან მძიმე აგრესია. ევროპის ერთიანობა, იმ დროს, ალბათ, დაგვაკლდა - ამის შესახებ საქართველოს პრეზიდენტმა სალომე ზურაბიშვილმა ლიეტუველ კოლეგასთან შეხვედრის შემდეგ გამართულ პრესკონფერენციაზე განაცხადა. მისივე თქმით, რუსეთი ერთხელ და სამუდამოდ უნდა დაუბრუნდეს თავის ტერიტორიას და შეწყვიტოს მეზობლების ტერიტორიების ოკუპაცია. „როგორც საქართველოს პრეზიდენტი, უკვე მესამედ ვარ ლიეტუვაში. მეორე ოფიციალური ვიზიტია ვილნიუსში, რაც საქართველო - ლიეტუვას მეგობრობისა და პარტნიორობის განსაკუთრებულობაზე მიუთითებს. ჩვენი, ორი ქვეყნის ისტორია გუშინ არ დაწყებულა და გავლილი გვაქვს არაერთი ბრძოლა დამოუკიდებლობისთვის, თავისუფლებისა და ევროპული მომავლისთვის. რამდენიმე დღეში საქართველოში გავიხსენებთ 1989 წლის 9 აპრილს, მაგრამ ასევე, ჩვენ არ გაგვიწყდება 1989 წლის 23 აგვისტო, ბალტიის გზა, რომელიც, როგორც ჩვენი 9 აპრილი, ასახავდა თქვენი ხალხის მიდრეკილებასა და მისწრაფებას, რომ ეს დამოუკიდებლობა მოეპოვებინათ და მოვიპოვეთ დამოუკიდებლობა, თავისუფლება, საშუალება, რომ გვევლო ევროპულ გზაზე. ამ გზაზე, თქვენმა ქვეყანამ ჩვენზე ადრე მიაღწია მიზანსა და შედეგს. ეს გვაძლევს საფუძველს გულწრფელად, პარტნიორულად და მომავალი მხარდაჭერის იმედით ვისაუბროთ ერთად და ყველა საკითხზე, რამეთუ საქართველოს მეგობრებისა და იმ ქვეყნების გარეშე, რომელთაც გავლილი აქვს ეს ძალიან რთული გზა, არ შეიძლება ჰქონდეს მომავალი. უკვე ერთ წელზე მეტია, რაც რუსეთის უსასტიკესი აგრესია დაიწყო და უკრაინაში ომი მიმდინარეობს. ომმა იმსხვერპლა ათასობით მშვიდობიანი მოქალაქე, მათ შორის ბავშვების სიცოცხლე. ბუჩა, მარიუპოლი, ხერსონი, ბახმუტი, ეს მხოლოდ რამდენიმე მაგალითია უსასტიკესი აგრესიის და შეუპოვარი გამძლეობის, რაც გვაჩვენა უკრაინელმა ხალხმა“, - განაცხადა ზურაბიშვილმა. ამასთან, მან საქართველოსა და ქართველი ხალხის სრული სოლიდარობა გამოხატა უკრაინისადმი, რომელმაც, როგორც ზურაბიშვილმა აღნიშნა, საქართველოსავით მძიმე წარსული გაიარა. „ამ ომმა შეძლო ის, რაც ვერ შეძლო ვერც ჩვენთან ჩატარებულმა 1992-1993 წელს რუსულმა აგრესიამ, ვერც 2014 წელს ყირიმში, ვერც 2008 წელს საქართველოში რუსეთის აგრესიამ და იმპერიალისტური ამბიციების ჩვენებამ. მთელი ევროპისთვის ნამდვილი სახე, რაც არის რუსეთის სახე დაანახა მსოფლიოს [უკრაინამ].ეს არის პირველი და უდიდესი მიღწევა უკრაინელი ხალხის ბრძოლის. ისტორიას უკან ვერ დავაბრუნებთ, თუმცა შეიძლება ითქვას, რომ 2008 წლის აგვისტოში და 2014 წლის ყირიმის აგრესიის დროს, საერთაშორისო თანამეგობრობას დღევანდლის მსგავსი ერთიანობა და სოლიდარობა რომ გამოეჩინა, შესაძლოა, თავიდან ყოფილიყო აცილებული დღევანდელი ძალიან მძიმე აგრესია. მე თქვენი ქვეყნის მხარდაჭერა და თანადგომაც მახსოვს, 2008წლის აგრესიისა და ომის შემდგომ, მაგრამ ეს არ იყო მთლიანად ევროპის ერთიანობა, რომელიც იმ დროს, ალბათ, დაგვაკლდა. დღეს ამ ომის შედეგად, მსოფლიო იყოფა რეალურად ორ ბანაკად. საზოგადოება იყოფა ორ ბანაკად. ვისაც სჯერა, რომ დაუმარცხებელი არავინაა და სჯერა, რომ უკრაინამ უკვე ერთგვარად გაიმარჯვა, გაიმარჯვა მორალურად, გაიმარჯვა იმიტომ, რომ რუსეთმა ომის მიზნებს ვერ მიაღწია და გაიმარჯვა იმიტომ, რომ თავის ტერიტორიებს დაიცავს. ყველამ უნდა ვიცოდეთ, რომ როცა დადგება სამშვიდობო მოლაპარაკებების დრო, რაც უკრაინის და მხოლოდ უკრაინის გადასაწყვეტი იქნება, რუსეთმა უნდა გაიგოს, სად არის მისი საზღვრები და ეს არის ყველას ერთიანი მიზანი - რუსეთი, ერთხელ და სამუდამოდ, დაუბრუნდეს თავის ტერიტორიას და შეწყვიტოს მეზობლების ტერიტორიების ოკუპაცია“, - განაცხადა ზურაბიშვილმა. IPN

სერიოზულად მეკითხებით, დავით კეზერაშვილი გვაფინანსებს თუ არა?! - სისულელეა! ჩვენთან არანაირი კავშირი არ აქვს, - ასე უპასუხა ჟურნალისტებს პარტია „საქართველოსთვის“ წევრმა დეპუტატმა, მიხეილ დაუშვილმა. მისივე თქმით, საინტერესოა, რას ემსახურებოდა თავდაცვის ყოფილი მინისტრის ინტერვიუ, რადგან კითხვა უფრო მეტი გაჩნდა, ვიდრე საზოგადოებამ რაიმეზე პასუხი გაიგო. „პოლიტიკაში მონაწილეობის უფლება ყველას აქვს. მიუღებელია ჩრდილიდან გაურკვეველი წარმომავლობის ფულით პროცესების მართვა და კეთება. ამას უნდა ვებრძოლოთ როგორც ხელისუფლებაში, ასევე ოპოზიციაში - ორივე მხარეს მიუღებელია. ვინც პოლიტიკაში ღიად ჩაერთვება, ეს ყველას უფლებაა. პროცესების არაფორმალურად მართვა ყველა მხარეს - როგორც ხელისუფლების, ასევე ოპოზიციის მხარეს მიუღებელია“, - განაცხადა მიხეილ დაუშვილმა. ინტერპრესნიუსი

პარტია "საქართველოსთვის" წევრი და დეპუტატი ბექა ლილუაშვილი, მთავრობას მიმართავს, გაორმაგდეს ონკოპაციენტებისა და დიაბეტით დაავადებული ბავშვების საყოველთაო ჯანდაცვის პროგრამით განსაზღვრული ლიმიტები. მისი თქმით, ქვეყანაში არსებული გამოწვევის პირობებში ხელისუფლებამ უწყვეტად უნდა გააგრძელოს საზოგადოების ყველაზე მოწყვლადი ნაწილის მხარდაჭერა. "დღეისთვის ონკოპაციენტების და მათი ოჯახის მდგომარეობა, მნიშვნელოვნად დამძიმდა. ეს გამოიწვია საჭირო წამლებზე ფასების 4-ჯერ ზრდამ და მათი მკურნალობის სქემით გათალისწინებული პრეპარატების შეზღუდულმა რაოდენობამ. რაც თავის მხრივ, საყოველთაო ჯანდაცვის ფარგლებში მათთვის 25 000 ლარიან ლიმიტთანაა დაკავშირებული. ეს ზღვარი, არასაკმარისია. დანაკლისი პრეპარატების და პროცედურების ტარიფები მძიმე ფინანსურ ტვირთად აწვება ამ ადამიანების ოჯახებს. ამ საკითხთან დაკავშირებით, შექმნილია საქართველოს მოქალაქეთა პეტიციაც, რომელიც მიზნათ ისახავს, დაწესებული ლიმიტის არსებითად ზრდას. პარტია საქართველოსთვის, მხარს უჭერს მოქალაქეების პეტიციას. ჩვენ უკვე წერილობით მივმართეთ მთავრობას, რომ: 1 - გაზარდოს დაწესებული ლიმიტი, ამასთან მოხდეს მუნიციპალური - რეფერალური მიზნობრივი პროგრამების ხელმისაწვდომობის ზრდა ადგილობრივი ბიუჯეტის ზრდით. 2 - განახორციელოს პროდუქტების საერთაშორისო ტენდერით მწარმოებლისგან შესყიდვა. შესაბამისი კონკურენციისა და ხარისხის კონტროლის დაცვით. 3 - აამოქმედოს ჯიემპი სტანდარტის ლაბორატორია, ყველა იმპორტირებული, თუ ადგილზე წარმოებული პროდუქციის ხარისხის კონტროლისთვის. - ონკოპაციენტების საჭიროებებთან ერთად, უდიდეს გამოწვევად რჩება დიაბეტით დაავადებული ბავშვების ამბულატორიული მკურნალობისთვის აუცილებელი მედიკამენტების და საანალიზო-ტექნიკური საშუალებების ხელმისაწვდომობა, როგორც ფინანსური, ისე გეოგრაფიული კუთხით. - აქაც, თითოეული პაციენტისთვის, ვაუჩერული სისტემა მოქმედებს, მხოლოდ 2000 ლარიანი ლიმიტის ფარგლებში, რაც არ არის საკმარისი. შეზღუდულია სადიაგნოსტიკო საშუალებები და მშობლებს უწევთ ჯიბიდან გადახდები, რაც დიდი ფინანსური ტვირთია. - პრობლემა მწვავედ დგას რაიონებსა და სოფლებში, საიდანაც სერვისის მისაღებად ბავშვებს უწევთ დიდ ქალაქებში ტრანსპორტირება; - ამ პრობლემების გადასაჭრელად ბიუჯეტში ფული საკმარისადაა. 2023 წლის ბიუჯეტი 5% - იან ეკ. ზრდაზე დაიგეგმა, რეალური ზრდა დაგეგმილზე მაღალია და ინფლაციის ჯერ ისევ მაღალი მაჩვენებლის გამო, ბიუჯეტის მთლიანმა სალდომ, 166 მლნ. ლარი შეადგინა. - შესაბამისად, არსებობს ფინ. რესურსი. მოვუწოდებთ ხელისუფლებას, ეს რესურსი მიმართოს ჩვენი მოქალაქეების, ონკოპაციენტებისა და დიაბეტით დაავადებული ბავშევების საჭიროებების დასაკმაყოფილებლად!", - აღნიშნავს ლილუაშვილი.

სახალხო დამცველმა საქართველოს პარლამენტში 2022 წელს საქართველოში ადამიანის უფლებათა და თავისუფლებათა დაცვის მდგომარეობის შესახებ წლიური ანგარიში წარადგინა. 347-გვერდიან დოკუმენტში წარმოდგენილია კონსტიტუციით გარანტირებული ადამიანის უფლებების დაცვის მიმართულებით არსებული გამოწვევები და პროგრესი, ასევე, მიმოხილულია გაცემული რეკომენდაციების შესრულების მდგომარეობა. ომბუდსმენის აპარატის შეფასებით, 2022 წელს ადამიანის უფლებების დაცვის მდგომარეობა არსებითად არ გაუმჯობესებულა, მეტიც, რიგი მიმართულებებით მნიშვნელოვანი გაუარესებაც კი შეინიშნებოდა. ანგარიშის მიხედვით, გამოწვევად რჩება პოლიტიკურად ნეიტრალური პროკურატურის სისტემის ჩამოყალიბება. „არაერთი გამოძიების პროცესში გამოვლინდა მნიშვნელოვანი ხარვეზები, რომლებიც არ შეესაბამება ეფექტიანი გამოძიების კრიტერიუმებს, ან იკვეთება სამართლიანი სასამართლოს უფლების დარღვევა. მაგალითად, აშკარა პოლიტიკური ელფერი ჰქონდა ნიკა გვარამიას და ასევე, ე.წ. კარტოგრაფების საქმეზე მიმდინარე გამოძიებას“, – ვკითხულობთ ანგარიშში. სახალხო დამცველის აპარატი აღნიშნავს, რომ „ბოლო წლებში ქვეყანაში გამოხატვის თავისუფლების უფრო მეტად შეზღუდვის ტენდენცია შეინიშნება, მათ შორის, პროფესიულ საქმიანობაში უკანონოდ ხელის შეშლა, ნივთის დაზიანება, თავდასხმა, დევნა, მუქარა, პირადი ცხოვრების საიდუმლოების ხელყოფა, სავარაუდო არაკანონიერი მიყურადება. გამოხატვის თავისუფლების შეზღუდვის საფრთხეს აღრმავებს ასევე, „მაუწყებლობის შესახებ“ საქართველოს კანონში გატარებული ცვლილებებიც, რასაც მედია ორგანიზაციების და მათი წარმომადგენლების წინააღმდეგ სასამართლოში წარდგენილი სარჩელების სიმრავლეც ადასტურებს. საანგარიშო პერიოდში კვლავ ადგილი ჰქონდა შეკრების უფლების შეზღუდვას. გრძელდებოდა შეკრების მონაწილეთა ადმინისტრაციული დაკავება წვრილმანი ხულიგნობისა და სამართალდამცავი ორგანოს თანამშრომლის კანონიერი მოთხოვნის დაუმორჩილებლობის მიზეზით. ეს პრაქტიკა 1984 წელს მიღებულ ადმინისტრაციულ სამართალდარღვევათა კოდექსს ეფუძნება და იგი ადამიანის უფლებებთან და ძირითად თავისუფლებებთან თავსებადობის მინიმალურ სტანდარტსაც კი ვერ აკმაყოფილებს. ანგარიშის მიხედვით, „განსაკუთრებით შემაშფოთებელი იყო“ ე.წ. მოსმენების კანონი. ფარული მიყურადების კანონმდებლობასთან დაკავშირებით საქართველოს სახალხო დამცველის სარჩელზე საკონსტიტუციო სასამართლოს დღემდე არ გამოაქვს გადაწყვეტილება. ხაზგასმითაა აღნიშნული, რომ კულტურული მემკვიდრეობის დაცვაზე პასუხისმგებელია სახელმწიფო და გელათის სამონასტრო კომპლექსის სარეაბილიტაციო სამუშაოების საქართველოს საპატრიარქოსთვის გადაბარება არ შეესაბამება არსებულ საკანონმდებლო მოწესრიგებას. ანგარიშში კვლავ საუბარია პენიტენციურ დაწესებულებებში არაფორმალურ მმართველობაზე. ასევე გამოწვევად რჩება დახურულ დაწესებულებებში პატიმართა დეესკალაციის ოთახებსა და სამარტოო საკნებში კანონით გათვალისწინებული საფუძვლების გარეშე, ხანგრძლივად მოთავსების მანკიერი პრაქტიკა. ასევე, პრობლემურია პატიმრებისათვის სომატურ და ფსიქიატრიულ ჯანდაცვის სერვისებზე ხელმისაწვდომობა, რაც ზოგიერთ შემთხვევაში შესაძლოა პატიმრის გარდაცვალების მიზეზიც გახდეს. ომბუდსმენის შეფასებით, კვლავ გაუმართავია პატიმართა პირობით ვადაზე ადრე გათავისუფლების მექანიზმი. ანგარიშის მიხედვით, შინაგან საქმეთა სამინისტროს სისტემაში, კვლავ გამოწვევად რჩება სამხრე კამერების გამოყენების ვალდებულების არარსებობა, აუდიო და ვიდეოჩანაწერების წარმოება. „პოლიციის სივრცეები, სადაც დაკავებულს უწევს ყოფნა, ვიდეო მეთვალყურეობის სისტემებით სრულად კვლავ არ არის დაფარული. მეტიც, პრევენციის ეროვნული მექანიზმის მიერ შემოწმებულ პოლიციის დაწესებულებაში კამერების რაოდენობა მკვეთრად შემცირებულია. ეს ტენდენცია არასათანადო მოპყრობის პრევენციის თვალსაზრისით განსაკუთრებულად საგანგაშო და მკვეთრად უკან გადადგმული ნაბიჯია“, – ნათქვამია ანგარიშში. ომბუდსმენის რეკომენდაციაა, რომ გაიზარდოს სათემო სერვისების რაოდენობა და გეოგრაფიული დაფარვის არეალი ფსიქიატრიულ დაწესებულებებშ მოთავსებული პაციენტებისთვის, რომლებსაც აქტიური მკურნალობა აღარ სჭირდებათ თუმცა დაწესებულებას ვერ ტოვებენ, რადგან წასასვლელი არსად აქვთ. ანგარიშში განხილულია ნინოწმინდის პანსიონის საქმე. სახალხო დამცველის შეფასებით, გამოძიების პროცესში მნიშვნელოვანი ხარვეზებია. ომბუდსმენი წერს, რომ გენდერული თანასწორობის კონტექსტში საკანონმდებლო დონეზე მნიშვნელოვანი ცვლილებები განხორციელდა, თუმცა ნეგატიურადაა შეფასებული, რომ წლებია არ გაუმჯობესებულა გენდერული ნიშნით მოტივირებული ქალთა მკვლელობების (ფემიციდის) კუთხით არსებული ვითარება, და არც შემთხვევების კლების ტენდენცია შეინიშნება. მნიშვნელოვანი გამოწვევაა სექსუალური და რეპროდუქციული ჯანმრთელობის სერვისებზე წვდომა, განსაკუთრებით, სოფლად მცხოვრები და შშმ ქალებისათვის. „ჯერ კიდევ არის შეუსაბამობები ქალთა მიმართ ძალადობისა და ოჯახში ძალადობის პრევენციისა და აღკვეთის შესახებ ევროპის საბჭოს კონვენციით გათვალისწინებულ სტანდარტებთან (მაგალითიც სს კოდექსში გაუპატიურების პრობლემური ჩანაწერი). კვლავ არ დამტკიცებულა „ქალთა მიმართ ძალადობის ან/და ოჯახში ძალადობის მსხვერპლთა გამოვლენის, მათი დაცვის, დახმარებისა და რეაბილიტაციის ეროვნული რეფერირების პროცედურები,“ – აღნიშნულია ანგარიშში. სიღარიბე, და განსაკუთრებით ბავშვთა სიღარიბე კვლავ ქვეყნის ერთ-ერთ უმთავრეს გამოწვევად რჩება. „შეზღუდული შესაძლებლობის მქონე პირთა უფლებების დაცვის მიმართულებით კვლავ პრობლემურია ინკლუზიური განათლების ხარისხი და უწყვეტობა, სკოლის პერსონალისა და მშობლების ინფორმირებულობა ინკლუზიურ განათლებასთან დაკავშირებით, დასაქმების სირთულეები, დამსაქმებლების მხრიდან სტიგმის შემცველი დამოკიდებულება; სხვადასხვა დონეზე, გადაწყვეტილების მიღების პროცესში შშმ პირთა და მათი ორგანიზაციების არსებითი მონაწილეობა. მათ შორის, შშმ პირთა საკითხებზე მომუშავე ადგილობრივი საბჭოების საქმიანობა. კვლავ არ შემუშავებულა უსახლკარო პირის სრულფასოვანი საკანონმდებლო განმარტება და სათანადო საცხოვრებლის უფლების რეალიზაციისთვის აუცილებელი ჩარჩო კანონმდებლობა. არ არსებობს უსახლკარო პირთა ერთიანი, ხოლო რიგ მუნიციპალიტეტებში – ადგილობრივ მონაცემთა ბაზები. ერთ-ერთ ყველაზე გარიყული და დაუცველი ჯგუფის – ხანდაზმულთა 36% სოციალურად დაუცველი ოჯახების მონაცემთა ერთიან ბაზაშია რეგისტრირებული. სამწუხაროდ, მიუხედავად სახალხო დამცველის რეკომენდაციებისა, „საქართველოში მოსახლეობის დაბერების საკითხებზე სახელმწიფო კონცეფციის 2017-2018 წლების ეროვნული სამოქმედო გეგმის“ შესრულების ანგარიშის შედეგების განხილვა და გათვალისწინება კვლავ არ მომხდარა. დღემდე არ შემუშავებულა ე.წ. ნგრევად შენობებში მცხოვრებ დევნილთა განსახლების სპეციალური წესები. 2022 წლის ბოლოსთვის სიცოცხლისა და ჯანმრთელობისათვის მომეტებული საფრთხის შემცველ 35 ობიექტში 716 ოჯახი ცხოვრობს. ოკუპირებულ ტერიტორიებზე გრძელდება მოქალაქეთა უკანონო დაკავებები და არასათანადო მოპყრობა. ოფიციალური მონაცემებით, 2022 წელს, საოკუპაციო ხაზზე, ცხინვალის რეგიონის მიმართულებით 42, ხოლო ოკუპირებული აფხაზეთის მიმართულებით – 13 პირი დააკავეს. დაფიქსირდა უკანონო „ბორდერიზაციის“69 შემთხვევა. უმნიშვნელოვანეს გამოწვევად რჩება ოკუპირებულ რეგიონებში მშობლიურ ენაზე განათლების ხელმისაწვდომობის საკითხი, რის გამოც, ორივე რეგიონში ყოველწლიურად იკლებს მოსწავლეთა რაოდენობა. ქართულ ენაზე სწავლის გაგრძელების მიზნით, მშობლებს მუდმივი საცხოვრებლის დატოვება და შვილების საქართველოს კონტროლირებად ტერიტორიაზე გადმოყვანა უწევთ. ეროვნული უმცირესობების წარმომადგენელთათვის რთულია განათლების უფლებაზე ხელმისაწვდომობა, მათი სახელმწიფო უწყებებში გადაწყვეტილების მიღების პროცესში პროპორციული და თანასწორი ჩართულობა და სხვ. პირველადი ჯანდაცვის სისტემის გამოწვევას წარმოადგენს ექთნების დეფიციტი, ძველი ინფრასტრუქტურა, სუსტი კავშირები სოფლის ექიმებსა და სხვა სპეციალისტებს შორის, ასევე, პირველადი ჯანდაცვის დაწესებულებების დაფინანსების გართულებული და ფრაგმენტული სისტემა“, – აღნიშნულია ანგარიშში. პუბლიკა

საავტომობილო გზების დეპარტამენტის თავმჯდომარის გიორგი წერეთლის განცხადებით, 30 მარტიდან რიკოთის უღელტეხილზე მოძრაობა მეწყრული პროცესების გამო შეზღუდეს. ავტომობილებს ახლა გომი-საჩხერე-ჭიათურა-ზესტაფონის გზით უწევთ გადაადგილება, რიკოთზე კი მიმდინარეობს გეოლოგიური კვლევა და კვირის ბოლოს წინასწარი შედეგებით იმსჯელებენ მოძრაობის აღდგენის შესაძლებლობაზე. „დაკვირვების შედეგად, გამოვლინდა ბზარების ზრდის და აღნიშნულ მონაკვეთზე მეწყრული პროცესების განვითარების და ჩამოსვლის ტენდენცია. ამიტომ, სპეციალისტების დაკვირვების შემდეგ და მათი რეკომენდაციით, მივიღეთ გადაწყვეტილება შეგვეზღუდა რიკოთის მონაკვეთზე ავტოტრანსპორტის მოძრაობა. ამ ეტაპზე რიკოთის 149-ე კილომეტრზე გზის გაფართოების სამუშაოები დასრულებულია, მიმდინარეობს შესაბამისი გეოლოგიური კვლევებისთვის გზის მიყვანის სამუშაოები, ასევე, აქტიურად მიმდინარეობს გეოლოგიური, გეოფიზიკური კვლევები საერთაშორისო და ადგილობრივი სპეციალისტების მიერ. საავტომობილო გზების დეპარტამენტის თავმჯდომარის განცხადებით, რაც შეეხება გომი-საჩხერე-ჭიათურა-ზესტაფონის 109 კილომეტრიან მონაკვეთს, რომელზეც ამჟამად გადართულია ავტოტრანსპორტის მოძრაობა, ამ ეტაპზე იქ გზის 6 კილომეტრზე მიმდინარეობს გეგმიური სარეაბილიტაციო სამუშაოები, რაც აფერხებს მოძრაობას. „ტარდება ზამთრის პერიოდში დაზიანებული გზის საფარის და დამეწყრილი ადგილების რეაბილიტაცია, რაც ხელს უშლის მოძრაობას და შეფერხებით ხდება გადაადგილება მხოლოდ და მხოლოდ ამ 6 კილომეტრიან მონაკვეთზე. ამ დისკომფორტისთვის, საავტომობილო გზების დეპარატმენტი კიდევ ერთხელ უხდის ბოდიშს მოსახლეობას, მგზავრებს, სატრანსპორტო საშუალებების მძღოლებს“, – თქვა გიორგი წერეთელმა. პუბლიკა

ლაზარე გრიგორიადისს, რომელსაც პოლიციელის ჯანმრთელობის ხელყოფასა და სახელმწიფო ქონების განადგურებაში ედება ბრალი, ადვოკატი ციხეში დღეს პირველად მოინახულებს. როგორც ადვოკატმა ლიკა ბითაძემ ჟურნალისტებს განუცხადა, მისი დაცვის ქვეშ მყოფის პოზიციას მოისმენს იმასთან დაკავშირებით, რაზეც ბრალდება აქვს წარდგენილი. „ლაზარეს 15:30 საათზე, გლდანის მე-8 პენიტენციურ დაწესებულებაში ვნახავთ. რა მოხდა, ყველაფერს გავიგებთ დღეს. რაც შეეხება სააპელაციო სასამართლოს, საჩივრით გუშინ მივმართეთ. სასამართლოს განხილვის ვადა, 72 საათი აქვს და ამ დროის განმავლობაში უნდა გადაწყვიტოს მისი დასაშვებობის საკითხი. თუ დასაშვებად ცნობს, ასეთ შემთხვევაში, დანიშნავს ზეპირ მოსმენას და ზეპირ მოსმენაზეც განხილული იქნება ის გარემოებები, თუ რატომ არ უნდა შეფარდებოდა მას ყველაზე მკაცრი აღკვეთის ღონისძიება პატიმრობა“, - განაცხადა ლიკა ბითაძემ. ცნობისთვის, ლაზარე გრიგორიადისს, აღკვეთის ღონისძიების სახით პატიმრობა შეეფარდა. გამოძიების ინფორმაციით, ბრალდებულმა 7 მარტს, რუსთაველის გამზირზე გამართული აქციის მიმდინარეობისას, 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, რომლებიც სამსახურებრივ მოვალეობას ასრულებდნენ, ორჯერ ისროლა ე.წ. „მოლოტოვის კოქტეილი“. ასევე, ბრალდებულმა 9 მარტს, ჭანტურიას ქუჩაზე, განზრახ წაუკიდა ცეცხლი შინაგან საქმეთა სამინისტროს კუთვნილ „ტოიოტა კოროლას“ მოდელის ავტომანქანას, რომელიც ადგილზე დაიწვა. ამ ქმედების შედეგად, სახელმწიფო ბიუჯეტს 39 500 ლარის ქონებრივი ზიანი მიადგა. ლაზარე გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის „ა“ ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს.

დღეს ევროკავშირის კანდიდატი ქვეყნის სტატუსის მოპოვება არის ჩვენი უალტერნატივო მიზანი - დიახ, საქართველო და ქართველი ხალხი დიდ ევროპულ ოჯახში ისტორიული ადგილის დაბრუნებას იმსახურებენ, - ამის შესახებ საქართველოს პრეზიდენტმა, სალომე ზურაბიშვილმა ლიეტუვის პრეზიდენტთან, გიტანას ნაუსედასთან გამართულ პრესკონფერენციაზე განაცხადა. მისი თქმით, საქართველომ და ქართველმა ხალხმა ევროპული ფასეულობებისადმი თავისი ურყევი ერთგულება არაერთხელ დაამტკიცა. როგორც საქართველოს პრეზიდენტმა აღნიშნა, ქვეყნის მოსახლეობა ევროკავშირში ინტეგრაციის იდეის ირგვლივ კონსოლიდირებულია. „დამოუკიდებლობის აღდგენიდან, საქართველომ სირთულეებით სავსე 32 წელი გაიარა. ქართველმა ხალხმა მრავალი სიძნელე და გამოწვევა გადალახა თავისუფლებისა და ევროპული ღირებულებების არჩევანის დასაცავად. ეს ბრძოლა დღესაც გრძელდება. საქართველომ და ქართველმა ხალხმა კიდევ ერთხელ ამ დღეებში და არა ერთხელ გასული წლების მანძილზე დაამტკიცა ევროპული ფასეულობებისადმი თავისი ურყევი ერთგულება. საქართველოს მოსახლეობის 80%-ის არჩევანია ევროკავშირში ინტეგრაცია. ეს არჩევანი საქართველოს კონსტიტუციით არის გამყარებული. გასული ათწლეულის მანძილზე საქართველომ უდიდესი ძალისხმევა გასწია ევროინტეგრაციის გზაზე. ჰქონდა მრავალი წარმატება, თუმცა სირთულეც ბევრი იყო თუ არის დღესაც. 2022 წელს საქართველოსთვის ევროპული პერსპექტივის მინიჭება იყო ისტორიული გადაწყვეტილება. ეს იმას ნიშნავდა, რომ ის გეოგრაფიული კედელი, რომელიც იყო აღმართული ჩვენსა და ევროპას შორის, საბოლოოდ დაინგრა და კითხვა - საქართველო ეკუთვნის თუ არა ევროპულ ოჯახს და ევროპულ პერსპექტივას უკვე აღარ არსებობს ჩვენს წინაშე. ეს არის ძალიან დიდი მიღწევა. დღეს კი კანდიდატი ქვეყნის სტატუსის მოპოვება არის ჩვენი უალტერნატივო მიზანი და მე ამას ვამბობ, როგორც საქართველოს პრეზიდენტი და როგორც ხმა მთელი ქართველი ერისა. დღეს საქართველოს საზოგადოება კონსოლიდირებულია ევროკავშირში ინტეგრაციის იდეის ირგვლივ. ბატონო პრეზიდენტო, 14 მარტს ევროპარლამენტისადმი მიმართვაში თქვენ საქართველოს ევროპულ მომავალს მხარი დაუჭირეთ და ამისთვის მინდა ჩემი უდიდესი მადლიერება გამოვხატო, რამეთუ ლიეტუვა იმ ადგილას დგას, სადაც იდგა მთელ ამ პერიოდის დროს და ამ გზაზე გვიჭერს მხარს. დიახ, საქართველო და ქართველი ხალხი იმსახურებენ დიდ ევროპულ ოჯახში ისტორიული ადგილის დაბრუნებას. საქართველომ უნდა მიიღოს ევროკავშირის წევრობის კანდიდატის სტატუსი. ეს იქნება ჩვენი ერთობლივი გამარჯვება. ეს იქნება ევროპის სიძლიერისა და ერთობის კიდევ ერთი დადასტურება,“ - განაცხადა ზურაბიშვილმა. ინტერპრესნიუსი

ევროკავშირის წევრობისკენ სწრაფვა მოკლე და მარტივი გზა არაა - გვწამს თქვენი ქვეყნის ევროპული პერსპექტივის და გვჯერა, რომ ეს გახდება მთავრობისთვის მაკონსოლიდირებელი, რათა რეფორმები განახორციელოს, - ამის შესახებ ლიეტუვის პრეზიდენტმა გიტანას ნაუსედამ საქართველოს პრეზიდენტთან სალომე ზურაბიშვილთან შეხვედრის შემდეგ ერთობლივ პრესკონფერენციაზე განაცხადა. როგორც ნაუსედამ აღნიშნა, ქართველ კოლეგასთან შეხვედრაზე ისაუბრეს იმის აუცილებლობაზე, რომ გაიზარდოს საზოგადოების მედეგობა, გაძლიერდეს ქვეყნის ინსტიტუციების შესაძლებლობები და პროევროპული, პრო ატლანტიკური მისწრაფებები. „ლიეტუვა და მისი ხალხი არის საქართველოს ევროპული და ევროატლანტიკური ინტეგრაციის მხარდამჭერი. ეს ვიზიტი კიდევ ერთხელ ადასტურებს ჩვენს განწყობას და სიმტკიცეს. შეხვედრაზე შესაძლებლობა გვქონდა დეტალურად განგვეხილა პერსპექტივები ლიეტუვას და საქართველოს ორმხრივი თანამშრომლობის სფეროებში - პოლიტიკური დიალოგი, ევროატლანტიკური ინტეგრაციის მხარდაჭერა, ინსტიტუციური თანამშრომლობა. იპნ

ვ ილნიუსში, პრეზიდენტის სასახლეში საქართველოს პრეზიდენტის დახვედრის ოფიციალური ცერემონია გაიმართა. საქართველოს პრეზიდენტის ადმინისტრაციის ინფორმაციით, ცერემონიის ფარგლებში შესრულდა საქართველოს და ლიეტუვის ჰიმნები. საქართველოს პრეზიდენტმა გიტანას ნაუსედას თანმხლები დელეგაციის წევრები წარუდგინა. საქართველოს ოფიციალური დელეგაციის შემადგენლობაში არიან: საქართველოს პარლამენტის დეპუტატები: ალექსანდრე ელისაშვილი და თეონა აქუბარდია, საქართველოს პრეზიდენტის ადმინისტრაციის უფროსი ნათია სულავა, საქართველოს პრეზიდენტის მრჩეველი საერთაშორისო ორგანიზაციებთან ურთიერთობისა და სოციალურ-ეკონომიკურ საკითხებში ქეთევან თათოშვილი. ამასთან, მათივე ცნობით, დახვედრის ოფიციალური ცერემონიის შემდეგ საქართველოს პრეზიდენტმა საპატიო სტუმართა წიგნში შემდეგი ჩანაწერი გააკეთა: „ჩემთვის, როგორც საქართველოს პრეზიდენტისთვის, დიდი პატივია ლიეტუვაში კვლავ ჩამოსვლა. ეს ოფიციალური ვიზიტი კიდევ ერთხელ ხაზს უსვამს იმ ღრმა მეგობრულ ურთიერთობებს, რომლებიც ჩვენს ორ დიდ ერს ერთმანეთთან აკავშირებს. მსურს, ქართველი ხალხის სახელით, გულითადი მადლიერება გამოვხატო ლიეტუვას მიმართ საქართველოსადმი მტკიცე მხარდაჭერისათვის და იმედს გამოვთქვამ, რომ კიდევ მრავალი წელი გაგრძელდება ჩვენი ძლიერი პარტნიორობა“. იპნ

სახალხო დამცველმა ლევან იოსელიანმა ახალი მოადგილეები წარადგინა. როგორც მან აღნიშნა, მისი მოადგილეები იქნებიან ელენე ღუდუშაური და ნათია ჯულაყიძე. „როგორც იცით, გიორგი ბურჯანაძემ და ეკა სხილაძემ დატოვეს სახალხო დამცველის მოადგილის თანამდებობები. მინდა წარმოგიდგინოთ ჩემი მოადგილეები ელენე ღუდუშაური და ნათია ჯულაყიძე, ორივე მათგანი ჩემთან ერთად გააგრძელებს მუშაობას,“- განაცხადა იოსელიანმა. იპნ

უკრაინის პრეზიდენტი, ვოლოდიმირ ზელენსკი 5 აპრილს პოლონეთს ეწვევა, - ამის შესახებ პოლონეთის პრეზიდენტის აპარატის საერთაშორისო პოლიტიკის ბიუროს ხელმძღვანელმა მარკინ პრჟიდაჩმა ადგილობრივ მედიას განუცხადა. „ოთხშაბათს, 5 აპრილს, ველოდებით უკრაინის პრეზიდენტის ოფიციალურ ვიზიტს პოლონეთში“, - განაცხადა პრჟიდაჩმა. მისი თქმით, ზელენსკი პოლონეთში პრეზიდენტ ანჯეი დუდას მიწვევით ჩადის. ვიზიტის ფარგლებში, პრეზიდენტი ზელენსკი პოლონელებთან და პოლონეთში მცხოვრებ უკრაინელებთან შეხვედრას გეგმავს. იპნ

მონტენეგროს პრეზიდენტის არჩევნების მეორე ტურში გაიმარჯვა ქვეყნის ეკონომიკის ყოფილმა მინისტრმა, მემარჯვენე-ცენტრისტული მოძრაობის „ევროპა ახლა“ ერთ-ერთმა ლიდერმა იაკოვ მილატოვიჩმა. არჩევნების წინასწარი შედეგებით, მას მხარი დაუჭირა კენჭისყრაში მონაწილეთა 60%-მა. არჩევნებში დამარცხება აღიარა ქვეყნის მოქმედმა პრეზიდენტმა, სოციალისტმა მილო ჯუკანოვიჩმა. 61 წლის ჯუკანოვიჩი მონტენეგროს 30 წელზე მეტხანს მართავდა. 1991 წლიდან ხუთჯერ იყო პრემიერ-მინისტრი, ხოლო 1998-2002 წლებში და 2018 წლიდან დღემდე - პრეზიდენტი. მილო ჯუკანოვიჩის მმართველობისას, ყოფილი იუგოსლავიის შემადგენლობაში მყოფმა მონტენეგრომ მიიღო ევროკავშირის წევრობის კანდიდატის სტატუსი, ხოლო 2017 წელს ნატოს წევრი გახდა. ოპონენტები მილო ჯუკანოვიჩის ხელისუფლებას ადანაშაულებდნენ კორუფციასა და ორგანიზებულ კრიმინალურ ჯგუფებთან კავშირში. საპრეზიდენტო არჩევნების მეორე ტურის წინასწარი შედეგების გამოცხადების შემდეგ, მილო ჯუკანოვიჩმა განაცხადა, რომ მონტენეგრომ გააკეთა თავისი არჩევანი, რომელსაც პატივს სცემს და ახალ პრეზიდენტს წარმატებას უსურვებს. არჩეული პრეზიდენტი, 37 წლის იაკოვ მილატოვიჩი 2020-2022 წლებში იყო მონტენეგროს ეკონომიკის მინისტრი. მილატოვიჩი მოქალაქეებს დაჰპირდა, რომ მომდევნო 5 წლის განმავლობაში მონტენეგრო ევროკავშირის წევრი გახდება. ქვეყანას 2008 წლიდან აქვს წევრობის კანდიდატის სტატუსი. მილატოვიჩმა, რომელსაც მხარს უჭერენ პროსერბული ძალებიც, განაცხადა, რომ კავშირებს ბელგრადთანაც განამტკიცებს. რადიო თავისუფლება

საქართველოს პრეზიდენტი სალომე ზურაბიშვილი ოფიციალური ვიზიტით ლიეტუვაში ჩავიდა. დახვედრის ცერემონია ვილნიუსის საერთაშორისო აეროპორტში გაიმართა. ინფორმაციას და ფოტომასალას საქართველოს პრეზიდენტის პრესსამსახური ავრცელებს. "წლის ბოლოსკენ ევროკავშირი მიიღებს გადაწყვეტილებას ქვეყნის კანდიდატის სტატუსთან დაკავშირებით და ამ კონტექსტში, რა თქმა უნდა, მნიშვნელოვანია თითოეული მისი წევრის და ლიეტუვის მხარდაჭერაც. ასევე, მნიშვნელოვანია ვიზიტი ქვეყნის ნატოში ინტეგრაციის კუთხითაც, რადგან სწორედ ნატოს სამიტის მოსამზადებელ პერიოდში ვიმყოფებით და სამიტი სწორედ ლიეტუვაში, ქალაქ ვილნიუსში მიმდინარე წლის 11-12 ივლისს გაიმართება", - აღნიშნავს ლიეტუვაში საქართველოს ელჩი სალომე შაფაქიძე. ვიზიტის ფარგლებში დაგეგმილია უმაღლესი დონის შეხვედრები ლიეტუვის პრეზიდენტ გიტანას ნაუსედასთან, პრემიერ-მინისტრ ინგრიდა შიმონიტესთან, სეიმის თავმჯდომარე ვიქტორია ჩმილიტე-ნიელსენისთან. საქართველოს და ლიეტუვის პრეზიდენტები პირისპირ და გაფართოებულ ფორმატში გამართული შეხვედრის შემდეგ მედიისათვის ერთობლივ განცხადებებს გააკეთებენ. საქართველოს პრეზიდენტის ვიზიტის ფარგლებში გათვალისწინებულია ანტაკალნისის სასაფლაოზე ლიეტუვის რესპუბლიკის დამოუკიდებლობისათვის ბრძოლაში დაღუპულ გმირთა მემორიალის გვირგვინით შემკობა და ლიეტუვის ოკუპაციისა და თავისუფლებისთვის ბრძოლის მუზეუმის დათვალიერება. საქართველოს პრეზიდენტი ლიეტუვაში დელეგაციასთან ერთად გაემგზავრა, რომლის შემადგენლობაშიც არიან საქართველოს პარლამენტის დეპუტატები ალექსანდრე ელისაშვილი და თეონა აქუბარდია, საქართველოს პრეზიდენტის ადმინისტრაციის უფროსი ნათია სულავა, საქართველოს პრეზიდენტის მრჩეველი საერთაშორისო ორგანიზაციებთან ურთიერთობისა და სოციალურ-ეკონომიკურ საკითხებში ქეთევან თათოშვილი. პრეზიდენტს ვილნიუსის საერთაშორისო აეროპორტში დახვდნენ ლიეტუვის რესპუბლიკის პრეზიდენტის კანცლერი აგილა ბარჯიენე, ლიეტუვის რესპუბლიკის საგანგებო და სრულუფლებიანი ელჩი საქართველოში ანდრიუს კალინდრა, საქართველოს საგანგებო და სრულუფლებიანი ელჩი ლიეტუვის რესპუბლიკაში სალომე შაფაქიძე და სამხედრო ატაშე ირაკლი უჩაძე. რადიო თავისუფლება

რუსეთის ქალაქ სანქტ-პეტერბურგში მომხდარ აფეთქებას ცნობილი რუსი სამხედრო ბლოგერი, ვლადენ ტატარსკი ემსხვერპლა. ინფორმაციას რუსეთის შინაგან საქმეთა სამინისტრო ადასტურებს. აფეთქება ერთ-ერთ კაფეში მოხდა. დაშავებულია, სულ მცირე, 25 ადამიანი. როგორც BBC წერს, სამხედრო ბლოგერი სპიკერად იყო მიწვეული ზემოხსენებული კაფეს მიერ ორგანიზებულ ღონისძიებაზე, როცა აფეთქება მოხდა. ვლადენ ტატარსკი, რომლის ნამდვილი სახელი და გვარი მაქსიმ ფომინია, რუსეთის მიერ უკრაინის წინააღმდეგ წარმოებული ომის აქტიური მხარდამჭერი იყო. ტატარსკი არაერთგზის იმყოფებოდა ფრონტის ხაზზე რუს სამხედროებთან ერთად. გასულ წელს ის კრემლში, ოკუპირებული უკრაინული მიწების ანექსიის გამოცხადების ცერემონიასაც ესწრებოდა. იქ გადაღებულ ვიდეოში ტატარსკი ამბობს: “ჩვენ ყველას დავამარცხებთ, ყველას მოვკლავთ, გავძარცვავთ ყველას, ვისი [გაძარცვაც] დაგვჭირდება და ყველაფერი ისე იქნება, როგორც ჩვენ გვსურს”. რუსული საინფორმაციო ვებგვერდის, Fontanka-ს მიხედვით, კაფე, რომელშიც აფეთქება მოხდა, უწინ “ვაგნერის” კერძო სამხედრო კომპანიის ხელმძღვანელს, ევგენი პრიგოჟინს ეკუთვნოდა. როგორც რუსული პროპაგანდისტული სააგენტო TASS წერს სამართალდამცავ ორგანოში წყაროზე დაყრდნობით, კაფეში აფეთქებული მოწყობილობა იმ ბიუსტში იყო ჩამალული, რომელიც ტატარსკის საჩუქრად გადასცეს. BBC-ის ჟურნალისტის, ოლგა რობინსონის თანახმად, უკრაინაში, დონეცკის ოლქის ქალაქ მაკიივკაში დაბადებული ტატარსკი 2014 წელს იმავე ოლქში გააქტიურებულ პრორუს სეპარატისტებს შეუერთდა. მანამდე ის ციხეში იხდიდა სასჯელს შეიარაღებული ძარცვისთვის. როცა 2022 წელს რუსეთმა სრულმასშტაბიანი ომი დაიწყო უკრაინის წინააღმდეგ, ტატარსკი სოციალურ მედიასა და რუსეთის სახელმწიფო მედიაში აქტიურობდა. ის ასევე ამტკიცებდა, რომ საბრძოლო დრონების გაშვებასა და სიმაგრეების აშენებაში მიიღო მონაწილეობა. მეორე მხრივ, ტატარსკი მწვავედ აკრიტიკებდა რუსეთის თავდაცვის სამინისტროს, უკრაინაში რუსეთის სამხედრო მიზნების შეუსრულებლობის გამო. როგორც The Guardian წერს, ერთხელ მან ტრიბუნალიც კი მოითხოვა ქვეყნის სამხედრო ხელმძღვანელობისთვის, წამყვანი ოფიცრები კი “გაუწვრთნელ იდიოტებად” მოიხსენია. სამხედრო ბლოგერთა წრეში, რომელშიც ტატარსკი ერთიანდებოდა, ძირითადად ყოფილი ვეტერანები შედიან. გამოცემის თანახმად, მათ საკმაო სივრცე ეძლევათ ომის წარმართვის პროცესის კრიტიკისათვის, თუმცა უშუალოდ ვლადიმერ პუტინს იშვიათად აკრიტიკებენ. პუტინმა გასულ წელს სამუშაო ჯგუფიც ჩამოაყალიბა მთავრობასა და ბლოგერებს შორის კომუნიკაციისთვის. უკრაინის პრეზიდენტის, ვოლოდიმირ ზელენსკის მრჩეველმა, მიხაილო პოდოლიაკმა, ტატარსკის აფეთქების შემდეგ დაწერა, რომ “ობობები ერთმანეთს ჭამენ ქილაში”. მივე თქმით, რუსეთის შიდა პოლიტიკური დაპირისპირება “შიდა ტერორისტულ აქტებში” გადაიზარდა. მეორე მხრივ, რუსეთის საგარეო საქმეთა სამინისტროს სპიკერმა მარია ზახაროვამ თქვა, რომ “რუსი ჟურნალისტები მუდმივად გრძნობენ კიევის რეჟიმისგან რეპრესიების საფრთხეს”. გასულ წელს მოსკოვმა სწორედ კიევი დაადანაშაულა პროპაგანდისტ ალექსანდრ დუგინის შვილის, დარია დუგინას მკვლელობაში. დუგინა მოსკოვში მომხდარ აფეთქებას ემსხვერპლა. მიხაილო პოდოლიაკმა რუსეთის ბრალდებები უარყო. გარეკანის ფოტო: VLADLEN TATARSKY/TELEGRAM; Fontanka ნეტგაზეთი

ჩეხეთის რესპუბლიკის საგარეო საქმეთა მინისტრის, იან ლიპავსკის განცხადებით, საჭიროა გაერო-ს უშიშროების საბჭოს რეფორმირება. „ვეთანხმები ვოლოდიმირ ზელენსკის, რომ გაერო-ს უშიშროების საბჭოს რეფორმირება სჭირდება. ამის უახლესი მტკიცებულებაა ის ფაქტი, რომ ორგანოს, რომელიც უნდა უზრუნველყოფდეს მშვიდობას, თავმჯდომარეობს სახელმწიფო, რომელიც არღვევს გაერო-ს წესდებას და საფრთხეს უქმნის მთელი მსოფლიოს უსაფრთხოებას“, - დაწერა იან ლიპავსკიმ „ტვიტერზე“. შეგახსენებთ, 1-ელ აპრილს, გაერო-ს უშიშროების საბჭოში რუსეთმა თავმჯდომარეობა გადაიბარა. საბჭოს 15 წევრიდან თითოეული თავმჯდომარეობას ერთი თვით, მონაცვლეობით იკავებს. რუსეთი ბოლოს თავმჯდომარე ქვეყანა 2022 წლის თებერვალში იყო. 24 თებერვალს მან უკრაინაში სრულმასშტაბიანი შეჭრა დაიწყო. ipn

გერმანიის ვიცე-კანცლერი რობერტ ჰაბეკი დღეს დილით უკრაინის დედაქალაქ კიევში ჩავიდა, - ინფორმაციას „დოიჩე ველე“ ავრცელებს. გამოცემის ცნობით, ვიზიტი წინასწარ დაანონსებული არ ყოფილა. რობერტ ჰაბეკის განცხადებით, კიევში დაგეგმილი პოლიტიკური მოლაპარაკებების მიზანია, უკრაინას მისცენ იმის იმედი, რომ ქვეყანა ომის შემდგომ აღდგება. გავრცელებული ინფორმაციით, მოლაპარაკებები უკრაინის ენერგეტიკული ინფრასტრუქტურის განახლებასთან დაკავშირებულ საკითხებზე იქნება ფოკუსირებული. რობერტ ჰაბეკს, რომელიც გერმანიის ეკონომიკის მინისტრიცაა, კიევში ბიზნესის სფეროს წარმომადგენლებიც ახლავს, მათ შორის გერმანიის მრეწველობის ფედერაციის პრეზიდენტი ზიგფრიდ რუსვურმი. რუსვურმის განცხადებით, ვიზიტი არის „სიგნალი უკრაინელებისთვის“, რომ გერმანიის ბიზნეს სექტორი მათ გვერდით დგას. ipn

დღეს, 2 აპრილს თბილისში ქალთა სოლიდარობის მარში გაიმართა. მსვლელობა აღმაშენებლის გამზირიდან დაიწყო. „ნდობა ქალებს, უნდობლობა მოძალადეს“, „სოლიდარობა ქალებს, თანასწორობა ქალებს, ძალაუფლება ქალებს, თავისუფლება ქალებს, სამართალი ქალებს“ – ასეთი იყო მარშის ძირითადი გზავნილები. მსვლელობაში მონაწილეობის მისაღებად ვასო აბაშიძის სახელობის ახალი თეატრის წინ შეიკრიბნენ ქალები, უფლებადამცველები, აქტივისტები, პოლიტიკოსები, ჟურნალისტები, ასევე სახალხო დამცველი ლევან იოსელიანი და სამოქალაქო საზოგადოების სხვა წევრები. მათ ხელში ეჭირათ დროშები და ბანერები, რომლებიც თანასწორობასა და სოლიდარობაზე სხვადასხვა გზავნილს ატარებდა. ქალთა სოლიდარობის მარში აღმაშენებლის გამზირიდან „დედაენის ბაღის“ მიმართულებით დაიწყო. მსვლელობის მიმდინარეობისას საავტომობილო მოძრაობის შეზღუდვას საპატრულო პოლიცია აკონტროლებდა. ვიდეო დამკვრელი 00:00 00:10 დედაენის ბაღში აქციის ორგანიზატორებმა შეკრებილ საზოგადოებას სიტყვით მიმართეს. „მმართველი პარტია და მათ მიერ კონტროლირებადი მედია უკვე ღიად და საჯაროდ არის ჩართული ქალთა დემორალიზების, დეჰუმანიზების, დამცირების და გაჩუმების ხელშეწყობაში. სექსუალური და ფსიქოლოგიური შევიწროების წინააღმდეგ ამხედრებულ ქალებს ღირსების შემლახავ პროპაგანდას უპირისპირებენ და ჰგონიათ, დაშინებით და ტერორით გატეხენ იმ ქალებს, ვინც ხმა აიმაღლა უსამართლობის წინააღმდეგ. ქალებზე ხშირი ძალადობის შემთხვევების გამოძიების და პრევენციის ნაცვლად, უნდობლობას უცხადებენ ქალებს და მზად არიან ყველაფრის ფასად დაიცვან ძალაუფლების მხარეს მყოფი მჩაგვრელები.ძალადობის მამხილებელ ქალთა მიმართ სისტემის ამგვარი პასუხი კიდევ ერთხელ გვაჩვენებს, რომ ყველა სამართლიან წინააღმდეგობას მსგავსი პასუხი ელის. მტრული და შეურაცხმყოფელი გარემოს შექმნის მიუხედავად, ჩვენ ვერ გაგვაჩუმებს მუქარა და სიძულვილი! ჩვენ არ მოვითმენთ ჩაგვრას! ჩვენ მარტო არ დავტოვებთ არცერთ ქალს ძალადობის და ტერორის წინაშე!“, – განაცხადა თამარ ჯაყელმა. მანვე მარშის მონაწილეებს ოთხი მოთხოვნა გააცნო: ქალთა სოლიდარობის მარშის მოთხოვნების გაცნობის შემდეგ სცენა იმ ქალებმა დაიკავეს, რომლებიც აცხადებენ, რომ შალვა რამიშვილის მხრიდან სექსუალური შევიწროვება განიცადეს, მათ შორის „აიისას“ დამფუძნებელმა ანანია გაჩეჩილაძემ და ჟურნალისტმა მაკო ჯაბუამ, ასევე თათია სამხარაძემ, რომელმაც რამიშვილის წინააღმდეგ სასამართლო ორ ინსტანციაში მოიგო. თათია სამხარაძემ წაიკითხა გზავნილები გვანცა ბუდაღაშვილისგან, რომელიც შალვა რამიშვილს სექსუალურ შევიწროვებაში ამხელს და ნეკა დოროყაშვილისგან, რომელმაც ყოფილი ქმრის, ნიკოლოზ ბასილაშვილის მხრიდან ძალადობაზე სასამართლოს მიმართა და საქმე პირველ ინსტანციაში წააგო. ქალთა სოლიდარობის მარში მას შემდეგ დაიგეგმა, რაც პროპაგანდისტულმა არხმა POSTV-მ, რომლის ერთ-ერთი მფლობელი და წამყვანი სექსუალურ შევიწროებაში მხილებული შალვა რამიშვილია, ქალთა უფლებადამცველი აქტივისტის, თათია სამხარაძის წინააღმდეგ მადისკრედიტირებელი კამპანია წამოიწყო. თათია სამხარაძე ამბობს, რომ მისი, როგორც ქალთა უფლებადამცველის უსაფრთხოება საქართველოში საფრთხეშია. მან სახალხო დამცველსაც მიმართა და საქართველოს პრეზიდენტსაც. საქართველოს პრეზიდენტი სპეციალური ბრიფინგით გამოეხმაურა ამ კამპანიას, რომელიც ქალი აქტივისტის წინააღმდეგ მიმდინარეობს. მან თქვა, რომ ხელისუფლება ძალადობას კი არ ემიჯნება, არამედ აგულიანებს მას. თათია სამხარაძე პირველია, ვინც პროპაგანდისტული POSTV-ის მფლობელი და წამყვანი, შალვა რამიშვილი სექსუალურ შევიწროებაში ამხილა. შალვა რამიშვილს 2018 წელს სექსუალურ შევიწროების საქმეზე თათია სამხარაძემ საქალაქო სასამართლოში დავა მოუგო, რომელიც შემდგომმა ინსტანციამაც ძალაში დატოვა. შალვა რამიშვილს მორალური ზიანის ასანაზღაურებლად კომპენსაციის გადახდა დაეკისრა. ბოლო რამდენიმე დღის განმავლობაში შალვა რამიშვილი სექსუალურ შევიწროებაში არაერთმა ქალმა ამხილა. 25 მარტს, ტელეკომპანია „ფორმულამ“ გამოაქვეყნა აუდიოჩანაწერი, რომელიც, სავარაუდოდ, შალვა რამიშვილის მხრიდან სექსუალური შევიწროების ფაქტს ასახავს. პუბლიკა

ქვეყანაში ქალთა მიმართ ძალადობა და ჩაგვრა ერთხელ და სამუდამოდ უნდა დასრულდეს , - ამის შესახებ სახალხო დამცველმა ლევან იოსელიანმა სოციალურ ქსელ “ფეისბუქზე“ დაწერა. ლევან იოსელიანი ეხმაურება თბილისში გამართულ ქალთა სოლიდარობის მარშს, რომელსაც თავადაც ესწრებოდა და აღნიშნავს, რომ ყველამ ერთად უნდა დავგმოთ ქალთა მიმართ ნებისმიერი სახის ძალადობა და მუდმივად ვიყოთ ამ უფლებების დაცვის სადარაჯოზე. “დღეს, არა მხოლოდ როგორც სახალხო დამცველი, არამედ როგორც ამ ქვეყნის მოქალაქე და გოგოს მამა მივედი და სოლიდარობა გამოვხატე დღევანდელი აქციის იდეის მიმართ. ამ ქვეყანაში ქალთა მიმართ ძალადობა და ჩაგვრა ერთხელ და სამუდამოდ უნდა დასრულდეს. ჩვენი ქვეყნისთვის, ჩვენი კულტურისთვის სრულიად უცხოა ქალთა მიმართ მსგავსი ტიპის მოპყრობა. ჩვენი ისტორიული წარსული სხვა არაფერია თუ არა თანასწორუფლებიანობის ერთგულება და პატივისცემა, რაც დღესაც ჩვენი ქვეყნის იდენტობის მთავარ ღირსებად მიმაჩნია. სწორედ ამიტომ, ყველამ ერთად უნდა დავგმოთ ქალთა მიმართ ნებისმიერი სახის ძალადობა და მუდმივად ვიყოთ ამ უფლებების დაცვის სადარაჯოზე“ , - წერს იოსელიანი. ipn

პარლამენტის პირველი ვიცე-სპიკერი, გიორგი ვოლსკი აცხადებს, რომ ლაზარე გრიგორიადისი აჩვენებს იმ „ოპოზიციური თუ ექსტრემისტული დაჯგუფების შინაარსს, ვისთანაც დღეს გვაქვს საქმე“. ამის შესახებ მან მედიასთან ისაუბრა, როდესაც გამოხმაურა პოლიციელზე თავდასხმის და ნივთის დაზიანების ფაქტებზე დაკავებული ლაზარე გრიგორიადისის ირგვლივ განვითარებულ მოვლენებს. ვოლსკის განცხადებით, საზოგადოებისთვის ნათელია, რომ გრიგორიადისმა „მოლოტოვის კოქტეილის“ სროლით, პოლიციელები ცოცხლად დაწვისთვის გაიმეტა. რაც შეეხება დაკავებულის მხარდასაჭერ კამპანიას, მისი თქმით, მიმდინარე პროცესები უკვე აღარ ეხება კონკრეტულ პიროვნებას და აჩვენებს რადიკალური ოპოზიციის მხრიდან რევოლუციური სცენარის განვითარების სურვილს. „მე მგონია, რომ საზოგადოებისთვის უკვე ნათელია, რომ ეს არ ეხება ერთ კონკრეტულ პიროვნებას, რომელმაც ჩაიდინა ასეთი სახის დანაშაული - შეიძლება თავის თანატოლს, ან თავისზე უმცროსს, მისი თაობის წარმომადგენელს, ამ შემთხვევაში - პოლიციელს, რომელიც სახელმწიფო ინტერესების სადარაჯოზე დგას, ესროლა „მოლოტოვის კოქტეილი“ და ცოცხლად დაწვა დაუპირა. არა მარტო ერთ პოლიციელს, არამედ რამდენიმეს, რომელსაც შესაძლოა, ეს ცეცხლი მოსდებოდა. რეალურად, ეს იმ ოპოზიციური თუ ექსტრემისტული დაჯგუფების შინაარსს აჩვენებს, ვისთანაც დღეს გვაქვს საქმე და რომლებიც გვარწმუნებენ, რომ თითქოს, მზად არიან, პარლამენტში შემოვიდნენ და 12 რეკომენდაციის შესრულებაზე დაიწყონ მუშაობა. საფრთხე აშკარაა და ამ საფრთხეს ჰქვია რევოლუციური პროცესის განვითარების მცდელობა, რომელიც ყოველთვის დღის წესრიგში იყო, მათ შორის, სააკაშვილის რესურსის გამოყენებით. ეს სცენარი უკვე ჩვენს თვალწინ ვითარდება და ისეთი სახე შეიძინა, რომელსაც არ შეიძლება სხვა რამე ეწოდოს, თუ არა შეთქმულება საქართველოს წინააღმდეგ“, - განაცხადა გიორგი ვოლსკიმ. იპნ

უკრაინის უსაფრთხოებისა და თავდაცვის საბჭოს მდივანმა, ალექსეი დანილოვმა ყირიმის დეოკუპაციის 12 ნაბიჯი წარადგინა. დოკუმენტი რუსეთის მეირ ანექსირებული ნახევარკუნძულის უკრაინის იურისდიქციაში დაბრუნებას ითვალისწინებს. პროგრამა მოიცავს ყირიმის ხიდის სრულ დემონტაჟს, იმ რუსი მოქალაქეების გასახლებას, რომლებიც ყირიმში 2014 წლის შემდეგ ჩავიდნენ, სევასტოპოლისთვის სახელის გადარქმევას. დანილოვის თქმით, სევასტოპოლისთვის სახელის შეცვლა აუცილებელია, რადგანაც „ის გარკვეულ როლს თამაშობს რუსულ იდეოლოგიაში და რუსეთის მიერ ისტორიის გადაწერის პროცესში“. დანილოვი წერს, რომ ყირიმის დეოკუპაციის პროგრამა უსაფრთხოებისა და თავდაცვის საბჭომ ექსპერტების მონაწილეობის შეიმუშავა. ავტორი - ლევან ახალაია

საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი, ევროკომისიის ვიცე-პრეზიდენტი ჯოზეფ ბორელი გაეროს უშიშროების საბჭოში რუსეთის თავმჯდომარეობას გამოეხმაურა და აღნიშნა, რომ ეს საპირველაპრილო ხუმრობას შეეფერება. „მიუხედავად იმისა, რომ რუსეთი უშიშროების საბჭოს მუდმივი წევრია, ის მუდმივად არღვევს გაეროს სამართლებრივი სისტემის არსს“, - დაწერა ბორელმა „ტვიტერის“ საკუთარ ოფიციალურ გვერდზე. ამასთან, ბორელმა აღნიშნა, რომ ევროკავშირი იმუშავებს იმისთვის, რომ რუსეთმა უშიშროების საბჭოში საკუთარი ერთთვიანი თავმჯდომარეობა ბოროტად არ გამოიყენოს.

ფონ კრამონი საქართველოს წინააღმდეგ შეთქმულებაში მონაწილეობას იღებს,- ამის შესახებ პარლამენტის პირველმა ვიცე-სპიკერმა გია ვოლსკიმ ჟურნალისტებთან საუბრისას განაცხადა, რითაც ევროპარლამენტარი ვიოლა ფონ კრამონის საქართველოში ვიზიტი შეაფასა. მისივე თქმით, ვიოლა ფონ კრამონი იმისთვის ჩამოვიდა, რომ დასავლური პოლიტიკის დისკრედიტაცია მოახდინოს. "ვიოლა ფონ კრამონი ამ სადისტური მოქმედებების მხარდაჭერით ყველაფერს ხაზს უსვამს. იგი იმისთვის ჩამოვიდა, რომ დასავლური პოლიტიკის დისკრედიტაცია მოახდინოს, რაზეც სალომე ზურაბიშვილი ხმამაღალ განცხადებებს აკეთებდა. ყველაფერი ნათელი გახდა. ეს არის სტრატეგია, რომელიც აქციებიდან უნდა გადაიზარდოს ფიზიკურ დაპირისპირებასა და ისეთი სახის სამოქალაქო დაპირისპირებაში, რომელიც დაკავშირებულია სისხლთან, ადამიანურ მსხვერპლთან. ფონ კრამონი არის ერთ-ერთი მათ შორის, ვინც ევროპარლამენტის ტრიბუნიდან ამას უჭერს მხარს. საქართველოს წინააღმდეგ შეთქმულებაში მონაწილეობას იღებს ფონ კრამონი და ასევე, ის ადამიანები, ვინც ევროპარლამენტში რეზოლუციის შემქმნელები, ლობისტები არიან და საქართველოს წინააღმდეგ არიან მიმართულები“,- აღნიშნავს ვოლსკი. ცნობისთვის, ევროპარლამენტარი ვიოლა ფონ კრამონი საქართველოში იმყოფება. ის გუშინ, მთავრობის ადმინისტრაციასთან, ლაზარე გრიგორიადისის მხარდასაჭერად მიმდინარე აქციაზე მივიდა. როგორც ევროპარლამენტარმა კრამონმა აღნიშნა, მიუღებელია პარლამენტარების მიერ, ლაზარე გრიგორიადისის „იმიჯის გამოცალკევება და აშკარად სპეკულირება, რომ იგი და ხალხის კონკრეტული ჯგუფი ძირს უთხრიან ამ პროტესტს“. იპნ