tvati

საქართველოს პარლამენტის უმრავლესობის ექვსმა დეპუტატმა დაარეგისტრირა კანონპროექტი, რომლის მიღების შემთხვევაშიც საზოგადოებრივ მაუწყებელში გაიზრდება სამეურვეო საბჭოს წევრების რაოდენობა და მათი არჩევის წესი. ბიურომ კანონპროექტი დღევანდელ, 22 მაისის, სხდომაზე დაარეგისტრირა. კანონპროექტის მიხედვით: 9-დან 11-მდე იზრდება საზოგადოებრივი მაუწყებლის სამეურვეო საბჭოს წევრთა რაოდენობა, მათგან ორ კანდიდატს საქართველოს კომუნიკაციების ეროვნული კომისია წარადგენს. ამ დრომდე კანდიდატების დასახელების უფლება ჰქონდათ საპარლამენტო უმრავლესობას, უმრავლესობის მიღმა მყოფ დეპუტატებს, სახალხო დამცველსა და აჭარის უმაღლეს საბჭოს; საზოგადოებრივი მაუწყებლის სამეურვეო საბჭოს წევრი აირჩევა 6 წლის ვადით - ამ დრომდე თუ ახალი მეურვე აირჩეოდა წინას უფლებამოსილების დროზე ადრე შეწყვეტის გამო, ის მუშაობას აგრძელებდა წინამორბედის უფლებამოსილების ვადის ამოწურვამდე; სამეურვეო საბჭოს წევრს ამ თანამდებობაზე მუშაობა ერთზე მეტი ვადით შეეძლება; სამეურვეო საბჭოს თავმჯდომარეს აირჩევენ 6 წლის ვადით, ნაცვლად 3 წლისა. სხვა ცვლილებები: საზოგადოებრივმა მაუწყებელმა ბიუჯეტის მინიმუმ 10 პროცენტი უნდა დახარჯოს ქართული მხატვრული ტელეფილმების, ქართული დოკუმენტური ტელეფილმებისა და ქართული ტელესერიალების დაფინანსებაში; საზოგადოებრივი მაუწყებლის თანამშრომელს უფლება ექნება იმუშაოს საზოგადოებრივი მაუწყებლის აჭარის ტელევიზიაშიც; 2026 წლიდან აჭარის ტელევიზიის ბიუჯეტი საზოგადოებრივი მაუწყებლის ბიუჯეტის 17 პროცენტი გახდება - ამ დრომდე კანონით გათვალისწინებულია 15 პროცენტის გადაცემა; მკაცრდება დირექტორობის კანდიდატების შერჩევის კრიტერიუმები - მას მინიმუმ 10 წლიანი სამუშაო გამოცდილებიდან მინიმუმ 5 ხელმძღვანელად უნდა ჰქონდეს ნამუშევარი - კანონით 3 წელია გათვალისწინებული. კანონპროექტის ინიციატორები და ავტორები არიან: რატი იონათამიშვილი, დავით მათიკაშვილი, ირაკლი შატაკიშვილი, დავით სონღულაშვილი, ანტონ ობოლაშვილი, ალუდა ღუდუშაური. რადიო თავისუფლება

ანალიტიკური ცენტრი „ჯეოქეისი“ განცხადებას ავრცელებს და აღნიშნავს, რომ საქართველოს არ აქვს დასათმობი არც ტერიტორია და არც საგარეო ორიენტაცია. როგორც განცხადებაშია აღნიშნული, საქართველოს სახელმწიფოს დამოუკიდებლობა, ტერიტორიული მთლიანობა, ევროპული და ევრო-ატლანტიკური მისწრაფება არამხოლოდ ერთმანეთთან მჭიდროდ დაკავშირებული, არამედ ერთმანეთზე დამოკიდებული პრინციპებია. „ანალიტიკურ ცენტრს „ჯეოქეისი“ სურს, გამოეხმაუროს საზოგადოების ცალკეული წევრების მიერ იმგვარი დისკუსიის ინიცირების მცდელობას, რომლის შეგნებული მიზანი თუ უნებლიე შედეგია საქართველოს ტერიტორიულ მთლიანობასა და საქართველოს საგარეო პოლიტიკურ ვექტორს შორის არჩევანის გაკეთება. პირველ რიგში, აღვნიშნავთ, რომ საქართველოს სახელმწიფოს დამოუკიდებლობა, ტერიტორიული მთლიანობა, ევროპული და ევროატლანტიკური მისწრაფება არამხოლოდ ერთმანეთთან მჭიდროდ დაკავშირებული, არამედ, ერთმანეთზე დამოკიდებული პრინციპებია. არც საქართველოს კონსტიტუცია და არც ქართველი ერის ნება არ მოიაზრებს რომელიმე მათგანის ეჭვქვეშ დაყენების შესაძლებლობას. ამდენად, ხსენებული ფუძემდებლური პრინციპები ხელშეუხებელია და განხილვას არ ექვემდებარება. ამასთან, მიგვაჩნია, რომ ამგვარი ჰიპოთეტური დილემის წინაშე საზოგადოების დაყენებას არანაირი ფაქტობრივი და რაციონალური წინაპირობა არ გააჩნია. კერძოდ, ერთი მხრივ, ამგვარი არჩევანის გაკეთებას, არც საქართველოს დასავლელი პარტნიორები ითხოვენ საქართველოსგან და მეტიც, არც თავად საოკუპაციო ძალის მხრიდან გაცხადებულა, ან ახლა ან ოდესმე, თითქოს რუსეთის ფედერაცია მზად იყო ან არის ხელი აიღოს საქართველოს ოკუპაციასა და მცოცავ ანექსიაზე, საქართველოს მხრიდან რაიმე საგარეო პოლიტიკური დათმობის სანაცვლოდ. აქვე აღვნიშნავთ, რომ ნებისმიერი მოლოდინი ამ უკანასკნელი შესაძლებლობის შესახებ, უკეთეს შემთხვევაში, გულუბრყვილობაა. ამდენად, ხსენებული ტიპის დისკუსიის ინიცირების მცდელობა, რომელიც, ერთი მხრივ, ეწინააღმდეგება როგორც ქართველი ხალხისა და საქართველოს სახელმწიფოს გაცხადებულ ნებას, ხოლო, მეორე მხრივ, ფაქტობრივ საფუძვლებსა და რაციონალურ წინამძღვრებს მოკლებულია, ჩვენი მხრიდან ფასდება, როგორც სახელმწიფოს დამაზიანებელი, მავნებლური ქმედება. საქართველოს არ აქვს დასათმობი არც ტერიტორია და არც საგარეო ორიენტაცია, ხოლო კერძო ინიციატივის მქონე პირებს შეუძლიათ თავისუფლად მიიღონ გადაწყვეტილება იმის დათმობის შესახებ, რაც პირადად მათ ეკუთვნით, როგორც საკუთრების, ისე ორიენტაციის ნაწილში“, - აღნიშნულია გავრცელებულ განცხადებაში.

სახელმწიფო აუდიტის სამსახური თავდაცვის სამინისტროს და მის კონტროლს დაქვემდებარებული ერთეულების კონსოლიდირებული ფინანსური ანგარიშგების აუდიტში წერს, რომ 2021 წელს დაახლოებით 233 მოსამსახურეზე „საიდუმლო“ გრიფის მქონე ინდივიდუალური ადმინისტრაციულ – სამართლებრივი აქტის საფუძველზე დარიცხულია 5 160 000-ლარამდე დანამატი, მათ შორის 286 672 ლარი დარიცხულია სამინისტროს სსიპ-ების მოსამსახურეებზე. დასკვნაში აღნიშნულია, რომ დანამატები არ არის სათანადოდ დასაბუთებული. 2021 წელს 160 000 ლარზე მეტი დანამატი დარიცხულია 83 მოსამსახურეზე ზეგანაკვეთური მუშაობის ან/და დამატებითი ფუნქციების შესრულებისთვის მინისტრის ინდივიდუალურ-სამართლებრივი აქტების საფუძველზე. ზოგიერთ შემთხვევაში მოსამსახურეზე წლის განმავლობაში გარკვეული თვეების მიხედვით გაცემულია ერთი და იმავე ოდენობის დანამატი. მიუხედავად იმისა, რომ ყოველი თვის დანამატის გაცემის შემთხვევაში გამოცემულია მინისტრის ბრძანება, ბრძანებებში სათანადოდ არ არის დასაბუთებული დანამატის გაცემის საფუძველი. 2021 წელს „საიდუმლო“ გრიფის მქონე ინდივიდუალური ადმინისტრაციულ- სამართლებრივი აქტებით დარიცხულია 154 150 ლარის ფულადი ჯილდო. მათ შორის, 23 750 ლარი სსიპ-ზე: სსიპ-დავით აღმაშენებლის სახელობის საქართველოს ეროვნული თავდაცვის აკადემია – 11 250 და სსიპ- გენერალ გიორგი კვინიტაძის სახელობის კადეტთა სამხედრო ლიცეუმი 12 500 ლარი. აუდიტის ცნობით, აღნიშნულ ბრძანებებში ფულადი ჯილდოს გაცემის მოტივი და საფუძველი არასათანადოდ არის დასაბუთებული. აუდიტი ასკვნის, რომ დანამატების და ფულადი ჯილდოს გაცემის არსებული პრაქტიკა ვერ უზრუნველყოფს სათანადო დასაბუთებას. თავდაცვის სამინისტო აცხადებს, რომ 233 მოსამსახურეზე გრიფით „საიდუმლო“ წესით გაცემული დაახლოებით 5 მილიონი ლარის დანამატი გადაეცათ თავდაცვის სამინისტრის სამხედრო მოსამსახურეებსა და თანამშრომლებს მათ მიერ ეფექტურად შესრულებული სამუშაოს დაფასებისა და წახალისების მიზნით. „რაც შეეხება, უშუალოდ გაცემის ფორმას, აღნიშნული განხორციელდა საჯარო დაწესებულებებში შრომის ანაზღაურების შესახებ მოქმედი კანონის შესაბამისად. დანამატები გაცემულ იქნა იმ სამხედრო მოსამსახურეებსა და სპეციალური წოდების მქონე პირებზე, რომლებიც ასრულებენ გარკვეული ტიპის სპეციფიკურ სამუშაოს და ამავე დროს, შეხება აქვთ სახელმწიფო საიდუმლოებების შესახებ კანონით გათვალისწინებულ სენსიტიურ საქმიანობასთან და ინფორმაციასთან. ცხადია, ჩვენი სამხედროები იმსახურებენ ყველაფერს საუკეთესოს და მათ შორის, ფინანსურ წახალისებას, რაც მომავალშიც აუცილებლად გაგრძელდება“, – ნათქვამია სამინისტროს განცხადებაში. პუბლიკა

Reuters-ის ცნობით, რუსეთის ბელგოროდის ოლქის გუბერნატორმა ორშაბათს განაცხადა, რომ უკრაინის არმიის „დივერსიული ჯგუფი“ შევიდა რუსეთის ტერიტორიაზე გრაივორონის რაიონში, რომელიც ესაზღვრება უკრაინას. Telegram-ზე გამოქვეყნებულ განცხადებაში ვიაჩესლავ გლადკოვმა თქვა, რომ რუსეთის არმია, მესაზღვრეები, პრეზიდენტის დაცვა და FSB უსაფრთხოების სამსახური ზომებს იღებენ შეჭრის მოსაგერიებლად. მისი თქმით, არცერთი მშვიდობიანი მოქალაქე არ დაშავებულა და ევაკუაცია არ მიმდინარეობს. რუსეთის სახელმწიფო საინფორმაციო სააგენტო „რია ნოვოსტის“ ცნობით, კრემლის სპიკერმა დიმიტრი პესკოვმა განაცხადა, რომ რუსეთის პრეზიდენტი ვლადიმერ პუტინი ინფორმირებულია შეჭრის შესახებ და მიმდინარეობს მუშაობა „დივერსანტების“ განდევნაზე. Reuters იტყობინება, რომ მანამდე ტელეგრამის არხმა Baza, რომელიც რუსეთის უშიშროების სამსახურებთან არის დაკავშირებული, გამოაქვეყნა კადრები, სადაც ჩანს, რომ უკრაინული ჯავშანმანქანა მიიწევს გრაივორონის სასაზღვრო პუნქტისკენ. მათივე ცნობით, უკრაინიდან რუსეთისკენ მიმავალ მთავარ გზაზე სამ დასახლებაში შეტაკებები შეინიშნებოდა. „ღია ბელგოროდის“ ტელეგრამის არხზე ნათქვამია, რომ ელექტროენერგია და წყალი რამდენიმე სოფელს შეეზღუდა. უკრაინული მედია უკრაინის სამხედრო დაზვერვაზე დაყრდნობით იტყობინება, რომ თავდასხმის უკან „რუსეთის თავისუფლების ლეგიონი“ და „რუსი მოხალისეების კორპუსი“ დგას – ორივე გაერთიანება რუსეთის მოქალაქეებისგან შედგება. „რუსეთის თავისუფლების ლეგიონი“, რომელიც ამტკიცებს რომ რუსეთში თავდასხმებს გეგმავს, Twitter-ზე წერს, რომ „სრულად გაათავისუფლა“ სასაზღვრო ქალაქი კოზინკა და მიაღწიეს აღმოსავლეთით გრაივორონის რაიონულ ცენტრამდე. „გააგრძელეთ. რუსეთი თავისუფალი იქნება!“, – წერს ლეგიონი. ორშაბათს ამავე ჯგუფმა გაავრცელა ვიდეო, სადაც ნაჩვენებია ხუთი მძიმედ შეიარაღებული მებრძოლი – „ჩვენც თქვენნაირი რუსები ვართ. ჩვენც თქვენნაირი ხალხი ვართ. გვინდა, რომ ჩვენი შვილები მშვიდად გაიზარდონ… დროა ბოლო მოეღოს კრემლის დიქტატურას“, – ამბობს ერთ-ერთი მათგანი. პუბლიკა

4 ოქრო, 2 ვერცხლი და 2 ბრინჯაო - ალბანეთში, დურესში გამართულ ევროპის სასკოლო ჩემპიონატზე ქართველმა მოჭადრაკეებმა 8 მედალი მოიპოვეს. ევროპის ჩემპიონები მარიამ რეხვიაშვილი, ანასტასია ჭიჭინაძე, კესარია მგელაძე და ანასტასია კირთაძე გახდნენ, ვერცხლის მედლებს მარიამ ცეცხლაძე და სოფია ლიმარი დაეუფლნენ, ბრიჯაოს მედლები კი ემილი გოგოლაძემ და ლუკა კილაძემ მოიპოვეს. რუსთავი 2

ევროკავშირი ოფიციალურად იწყებს მისიას მოლდოვის უსაფრთხოების სექტორის გასაძლიერებლად. ამის შესახებ ევროკავშირის საბჭოს მიერ გავრცელებულ განცხადებაშია ნათქვამი. „დღეს საბჭო იწყებს ევროკავშირის პარტნიორობის მისიას მოლდოვის რესპუბლიკაში უსაფრთხოებისა და თავდაცვის პოლიტიკის ფარგლებში, რომლის მიზანიც არის, გააძლიეროს უსაფრთხოების სექტორი ქვეყანაში“, – ნათქვამია განცხადებაში. აღნიშნული მისია მოლდოვის ხელისუფლების მოთხოვნით შეიქმნა და მისი მიზანია, დაეხმაროს ქვეყანას, გააძლიეროს კრიზისის მართვის სტრუქტურები და ჰიბრიდული საფრთხეების მიმართ მექანიზმები. მისია გასცემს რჩევებს სტრატეგიულ დონეზე და გამოავლენს შესაძლებლობების განვითარებისთვის საჭიროებებს. როგორც ბრიუსელში განმარტავენ, მისიის შექმნის აუცილებლობა მოლდოვაში ქვეყნის დესტაბილიზაციის მცდელობების გაზრდამ გამოიწვია. ავტორი - თინათინ მიგინეიშვილი

ხონში ცოფის ვირუსი დაფიქსირდა. ვირუსი ძაღლს დაუდასტურდა. აღნიშნულის შესახებ „ინტერპრესნიუსს“ ცხოველთა დაცვის ფედერაციის პრეზიდენტმა, თემურ ლაჭყეპიანმა აცნობა. არსებული ინფორმაციით, ძაღლმა რამდენიმე ადამიანი დაკბინა, მათ შორის ბავშვი. თემურ ლაჭყეპიანის ინფორმაციით, ძაღლი რომელსაც ვირუსი დაუდასტურდა, მოკვდა.

წამლების ჩამონათვალი, რომელზეც რეფერენტული ფასი მოქმედებს, გაიზარდა. ამის შესახებ ინფორმაციას ჯანდაცვის სამინისტრო ავრცელებს. მათივე ცნობით, ფასის ზედა ზღვარი 1600-ზე მეტ ქრონიკულ და ონკოლოგიურ მედიკამენტზე განისაზღვრა. უწყების განმარტებით, რეფერენტული ფასწარმოქმნის მექანიზმი, წლის ბოლომდე, 7000-მდე მედიკამენტზე გავრცელდება. „რეფორმის მიზანი ქვეყანაში წამლის ღირებულების შემცირებაა. ცვლილების მიხედვით ფარმაცევტულმა კომპანიებმა დადგენილი ფასებით უნდა იხელმძღვანელონ. იმ შემთხვევაში, თუ აფთიაქები მედიკამენტებს, აღნიშნულ ფასზე ძვირად გაყიდიან დაჯარიმდებიან. შეგახსენებთ, რომ მოსახლეობისთვის წამლებზე ხელმისაწვდომობის გაზრდის მიზნით, სახელმწიფომ, ქრონიკული და ონკოლოგიური მედიკამენტების ღირებულების ის მაქსიმალური ზღვარი დაადგინა, რომელზე მაღალ ფასადაც, მათი რეალიზაცია აიკრძალა. ცვლილების შედეგად, ფარმაცევტული პროდუქტის ფასი, საშუალოდ 40%-ით შემცირდება. მედიკამენტების ჩამონათვალისა და მაქსიმალური ზღვრული ფასის შესახებ ინფორმაცია აღნიშნულ გვერდზეა განთავსებული: https://referenceprice.moh.gov.ge/ui/#/main“, - ნათქვამია გავრცელებულ ინფორმაციაში. იპნ

აზერბაიჯანის ტერიტორია, 86.6 ათასი კვადრატული კილომეტრი, რომლის აღიარებისთვის ერევანი მზადაა, მოიცავს მთიან ყარაბაღს, - განაცხადა სომხეთის პრემიერ-მინისტრმა ნიკოლ ფაშინიანმა პრესკონფერენციაზე. „ეს 86.6 ათასი კვადრატული კილომეტრი მოიცავს მთიან ყარაბაღსაც. მაგრამ ისიც უნდა ითქვას, რომ მთიანი ყარაბაღის სომხების უფლებებისა და უსაფრთხოების საკითხი ბაქო-სტეფანაკერტის ფორმატში უნდა განიხილებოდეს“, - აღნიშნა ფაშინიანმა. ამავდროულად, მან იმედი გამოთქვა, რომ აზერბაიჯანთან მშვიდობის შესახებ შეთანხმების ტექსტზე შეთანხმება მალე მოხდება. „საერთაშორისო საზოგადოების აღქმა სულ უფრო მეტად იხრება იმ ფორმულისკენ, რომ სომხეთმა და აზერბაიჯანმა დათქმის გარეშე აღიარონ ერთმანეთის ტერიტორიული მთლიანობა - 29 800 და 86 600 კვადრატულ კილომეტრებზე. სომხეთი მზადაა აღიაროს აზერბაიჯანის ტერიტორიული მთლიანობა 86 600 კვადრატული კილომეტრის ფარგლებში. ჩვენი აზრით, აზერბაიჯანი მზადაა აღიაროს სომხეთის ტერიტორიული მთლიანობა 29800 კვადრატულ კილომეტრზე. თუ ამ საკითხში ერთმანეთს სწორად გავუგებთ, მაშინ სომხეთი, დიახ, აღიარებს აზერბაიჯანის ტერიტორიულ მთლიანობას 86 600 კვადრატული კილომეტრის ფარგლებში იმ გაგებით, რომ აზერბაიჯანი აღიარებს სომხეთის ტერიტორიულ მთლიანობას 29 800 კვადრატული კილომეტრის ფარგლებში", - განაცხადა ფაშინიანმა. ინტერპრესნიუსი

გასულ კვირას რუსეთსა და საქართველოს შორის პირდაპირი ფრენა დაიწყო. პირველი რეისი მოსკოვიდან თბილისში 19 მაისს შესრულდა, რასაც მოქალაქეების პროტესტი მოჰყვა. აქცია გაიმართა თბილისის აეროპორტთან, იმავე საღამოს კი პროტესტი პარლამენტის წინ გაგრძელდა. 19 მაისს ასევე გავრცელდა ინფორმაცია, რომ საქართველოში რუსეთის საგარეო საქმეთა მინისტრის, სერგეი ლავროვის ოჯახის წევრები იმყოფებოდნენ. ლავროვის სიძის ძმა საქართველოში დაქორწინდა და ქორწილს ყვარელში, ერთ-ერთ სასტუმროში იხდიდა. მედიაში გავრცელებული ინფორმაციით, საქართველოში იყო ლავროვის ქალიშვილიც, ეკატერინა ვინოკუროვა, რომელსაც დასავლეთმა სანქციები დაუწესა. ეს ინფორმაცია მოგვიანებით დადასტურდა, ყვარელსა და თბილისში კი ლავროვის სანქცირებული შვილის სტუმრობა აქციებით გააპროტესტეს. ყვარელში სასტუმროსთან აქციაზე პოლიციამ ადმინისტრაციული წესით 16 მოქალაქეც დააკავა. რუსულ წამყვან სამთავრობო მედიაგამოცემებში, ძირითადად, საქართველოში პირდაპირი ფრენის დაწყების წინააღმდეგ გამართული აქციები გაშუქდა, ისიც მოკლედ. რაც შეეხება ლავროვის შვილის ჩამოსვლას და მის წინააღმდეგ მიმართულ პროტესტს, რუსული სამთავრობო მედიიდან ეს ამბავი სააგენტო ТАСС-მა გააშუქა, მაგრამ ლავროვის ოჯახის წევრები არ დაუსახელებია. ინტერნეტში არ იძებნება РИА Новости-ის, Russia Today-ის, Sputnik-ის და სხვა რუსული სამთავრობო გამოცემების მიერ მომზადებული მასალები ლავროვის შვილის სტუმრობაზე, მის წინააღმდეგ პროტესტსა და ზურაბიშვილის მიერ გავრცელებულ ინფორმაციაზე, რომ ეს ქორწილი რუსებმა, საბოლოოდ, ვერ აღნიშნეს. რამდენიმე პროსამთავრობო სააგენტო და გამოცემა კი ТАСС-ის მოკლე ინფორმაციას დაეყრდნო. ლავროვის შვილის სტუმრობის გარშემო განვითარებულ მოვლენებს კრიტიკულად არ გამოხმაურებია არც რუსეთის ხელისუფლება. ასევე, რუსულენოვან ვებგვერდებზე, სოციალურ არხებსა და საძიებო სისტემებში არ ჩანს არც რუსი პროპაგანდისტების კრიტიკა საქართველოს მიმართ. არადა, 2019 წელს გავრილოვის ვიზიტისა და 2021 წელს პოზნერის სტუმრობის გამო დაწყებულ პროტესტს მოსკოვში მძაფრი კრიტიკა მოჰყვა. პირდაპირი ფრენა რუსეთის ხელისუფლებამ სწორედ 2019 წელს დაწყებული აქციების გამო შეწყვიტა, როგორც სანქცია საქართველოს მიმართ. პოზნერის ვიზიტის შემდეგ კი პუტინის პრესსპიკერმა დიმიტრი პესკოვმა მოუწოდა რუსებს, თავი შეეკავებინათ საქართველოში მოგზაურობისგან. რუსული სამთავრობო მედიისგან განსხვავებით, უფრო ვრცლად გააშუქა ლავროვის შვილის ვიზიტი რუსულმა ოპოზიციურმა მედიამ. რამდენიმე რუსული გამოცემა, ძირითადად, ქართულ მედიაზე დაყრდნობით წერდა, რომ საქართველოში იმყოფებოდა ლავროვის შვილი, რასაც მოქალაქეთა პროტესტი მოჰყვა. პუბლიკა

საზღვაო ტრანსპორტის სააგენტოს ცნობით, სომხეთის ცალკეული მედიასაშუალებებით გავრცელებული ინფორმაცია ბათუმსა და რუსეთის ქალაქ ნოვოროსიისკს შორის მიმდინარე წლის აპრილიდან რეგულარული საზღვაო გადაზიდვის დაწყების შესახებ, ინტერპრეტირებულია და სინამდვილეს არ შეესაბამება. სომხური მედიის ინფორმაციით, მათი ტვირთის გადაზიდვა რუსეთში უკვე ბათუმიდანაც შესაძლებელია. აპრილში ბათუმსა და რუსულ პორტ ნოვოროსიისკს შორის ორმხრივი საზღვაო გადაზიდვა დაიწყო. სომხური მედია წერს, რომ დარიალის ხეობის გავლით რუსეთში ტვირთის გადაზიდვა გარემო პირობების გამო ზოგჯერ ფერხდებოდა. სატვირთო ავტომობილები რამდენიმე კვირის განმავლობაშიც კი იდგნენ რიგში. ამ პრობლემების აღმოსაფხვრელად ამოქმედდა ახალი, საზღვაო მარშრუტი. სომხეთის ხელისუფლებამ ამ გადაზიდვების ოპერატორად კომპანია CE&M INTERNATIONAL შეარჩია. სომხურ გამოცემა Armenpress-თან კომპანიის დირექტორი დავით ილოიანი ამბობს, რომ ბათუმსა და ნოვოროსიისკს შორის უკვე ორმა სატვირთო გემმა გაიარა. პუბლიკა

100 წლის წინ საბჭოთა რუსეთმა დახვრიტა ქართველი სამხედრო პირები, რომლებიც ოკუპანტების წინააღმდეგ შეიარაღებულ აჯანყებას ამზადებდნენ. ეს მოხდა საქართველოს ძალისმიერი გასაბჭოებიდან 2 წლის შემდეგ, 1923 წელს, როცა საოკუპაციო რეჟიმმა წინააღმდეგობის მოძრაობის წარმომადგენელთა დაპატიმრება მოახერხა. “1921 წელს საბჭოთა რუსეთის მიერ საქართველოს დაპყრობისთანავე ქვეყანაში წინააღმდეგობის მოძრაობა გაიშალა. საქართველოს დემოკრატიულად არჩეულ, ლეგიტიმურ მთავრობასთან კოორდინაციაში მოქმედი მოძრაობის მიზანს საბჭოთა რუსული ოკუპაციის წინააღმდეგ შეიარაღებული აჯანყების მომზადება და ქვეყნის დეოკუპაცია შეადგენდა. აჯანყების უშუალო დაგეგმარება და წარმართვა ევალებოდა პროფესიონალი სამხედროებისგან შემდგარ სამხედრო ცენტრს. 1923 წელს საოკუპაციო რეჟიმმა შეძლო სამხედრო ცენტრის წევრთა დაპატიმრება. ქართული სამხედრო კლასის საუკეთესო წარმომადგენლები, მათ შორის სამი გენერალი, 1923 წლის 21 მაისს სიკვდილით დასაჯეს”, — წერს “საბჭოთა წარსულის კვლევის ლაბორატორია”(Sovlab). ერთ-ერთი დახვრეტილის, იასონ კერესელიძის ძმა დასძენს: Sovlab-ის თანახმად: როგორც “საბჭოთა წარსულის კვლევის ლაბორატორია” აღნიშავს, 1923 წლის 21 მაისს დახვრეტილ ოფიცერთა საძმო სამარხის რეალური ადგილმდებარეობა უცნობია. კოლექტიურ მეხსიერებაში დამკვიდრდა წარმოდგენა, რომ ეს დღევანდელი ვაკის პარკის ტერიტორიაზე მოხდა, სადაც ამჟამად მემორიალია აღმართული. მათი სახელებია: გენერალი ალექსანდრე ანდრონიკაშვილი გენერალ-მაიორი ვარდენ წულუკიძე პოლკოვნიკი გიორგი ხიმშიაშვილი პოლკოვნიკი როსტომ მუსხელიშვილი გენერალი კონსტანტინე აფხაზი უმცროსი ოფიცერი ნიკოლოზ ზანდუკელი როტმისტრი სიმონ ბაგრატიონ-მუხრანელი როტმისტრი ფარნაოზ ყარალაშვილი იასონ კერესელიძე სამხედრო ექიმი ივანე ქუთათელაძე სიმონ ჭიაბრიშვილი პოლკოვნიკი ალექსანდრე მაჭავარიანი პოლკოვნიკი ელიზბარ გულისაშვილი ლეიტენანტი ლევან კლიმიაშვილი პოლკოვნიკი დიმიტრი ჩრდილელი გარეკანის ფოტოები ამოღებულია IDFI-ს სტატიიდან, რომელიც 1921 წელს დახვრეტილ სამხედრო პირებს ეხება ნეტგაზეთი

2022 წლის განმავლობაში თითქმის 101 ათასმა საქართველოს მოქალაქემ დატოვა ქვეყანა!, - ამის შესახებ სოციალურ ქსელში პარტია "საქართველოსთვის" წევრი და დეპუტატი ბექა ლილუაშვილი წერს. მისი თქმით, სამაგიეროდ, 62 ათასზე მეტი რუსეთის მოქალაქე შემოვიდა და ქვეყანაში დარჩა. "სურათზე მოცემულია - რეალური, ხელშესახები შედეგი იმ პოლიტიკის, რასაც ხელისუფლება ახორციელებს. სამაგიეროდ, 62 ათასზე მეტი რუსეთის მოქალაქე შემოვიდა და ქვეყანაში დარჩა, საქმიანობს, ყიდულობს უძრავ ქონებას, დადის ქორწილებსა და სხვა წვეულებებზე და ა.შ. ჩვენი მოქალაქეები კი სხვა ქვეყანაში მიდიან "ორნიშნა" ეკონომიკური ზრდის და "საყოველთაო კეთილდღეობის" გამო. ეს არის 2013 წლის შემდეგ, უმაღლესი მიგრაციის მაჩვენებელი...", - წერს ბექა ლილუაშვილი.

როდესაც ევროპარლამენტმა ევროკომისიას შესთავაზა, რომ ჩვენთვის კანდიდატის სტატუსი არ მოეცათ, ფაქტობრივად, რუსეთზე მიგვაბა და ახლა რუსი რას გააკეთებს, ვინ ჩავიხედავთ მათი პირველი პირების თავში, - ამის შესახებ ბოდბელმა მთავარეპისკოპოსმა, მეუფე იაკობმა დღევანდელი ქადაგებისას განაცხადა. მისი შეფასებით, „დაბრმავებული რამდენიმე ევროპარლამენტარი საქართველოს ძალიან ცუდად ექცევა“. „კარგად ვიცით, რომ ამ გაჭირვების ჟამს, დღეს მსოფლიოში ისეთი სიტუაციაა, გარკვეულწილად, ქართველები თუ კონკრეტულ ძალებთან არ ვიყავით, ისე ძალიან გაჭირდება. ხედავთ როგორი სიტუაციაა. არის ცივილიზაციების ომი. არის რუსული ცივილიზაცია, რუსული იმპერიალიზმი და არის ასევე, სხვა დახვეწილი ფორმის, უკვე სხვა იმპერიალიზმი ვუწოდოთ, თავი არ მოვიტყუოთ. უკრაინაში რა ხდება, რუსმა რა იცის, რომ შიშველი ძალით დაეჯახოს. მიწები არ ჰყოფნის, დაავადებულია მიწებით. ამხელა სახელმწიფო რომ გაქვს, მსოფლიოს მერამდენედია რომ ავიღოთ, საბჭოთა კავშირის დროს მეექვსედი იყო და კიდევ აქეთ-იქით იწევდა. დღეს ახლა მერვედი ხომ მაინც იქნება. უკრაინა მოინდომა, უკრაინასთან ერთად მანამდე საქართველოსთან გზა გახსნილი ჰქონდა.1989 წელსაც შეგვიტია, შემდეგ საქართველოში სამოქალაქო ომი გამოიწვია, არაეროვნული ძალები რომ მოეყვანა სათავეში და საბოლოოდ, ამას მიაღწია. დადგა დრო და ჩვენს ერს ჩვენი ხელისუფლების ზოგიერთი წევრი არ ექცეოდა ისე, როგორც საკუთარ ერს უნდა მოქცეოდნენ და ქართველმა ერმა განაჩენიც გამოიტანა და მოიშორა. ეს არ იყო მარტო არჩევნებით გაშვება, ეს იყო გაგდება და გაძევება. თვალი გავუსწოროთ სიმართლეს. რა ხდება დღეს, საქართველოს გზა ევროკავშირში არისო. გითხარით, რომ პირველ რიგში, ქართველმა აირჩია უფლის გზა და ჩვენი გზა ქრისტესთან არის. ეს ევროკავშირმაც იცოდეს და პირველ რიგში, იმ დაბრმავებულმა რამდენიმე ევროპარლამენტარმა, რომელიც ძალიან ცუდად გვექცევა ხოლმე. შეხედეთ დღეს რაც ხდება, რუსეთმა გააუქმა სავიზო შეზღუდვები, აღადგინა ფრენა. რატომ მოხდა ეს? თავიდან ვთქვი, როდესაც ევროპარლამენტმა ევროკომისიას შესთავაზა, რომ ჩვენთვის კანდიდატის სტატუსი არ მოეცათ, ფაქტობრივად, რუსეთზე მიგვაბა და ახლა რუსი რას გააკეთებს, ვინ ჩავიხედავთ მათი პირველი პირების თავში, უნდა შეგზღუდავს, უნდა მიგიშვებს. რა უნდა გააკეთო, შენ დაუწესო რამე? აბა შევხედოთ მსოფლიოში რა ხდება. მინდა უკრაინის ომზე ჩემი შეხედულება გითხართ და სხვებმაც იფიქრონ იმაზე, რა ხდება, ვინ და რატომ იბრძვის უკრაინაში. რა თქმა უნდა, რუსეთი შეიჭრა და ძალიან მძიმე დღეში ჩააგდო უკრაინა“,-განაცხადა მეუფე იაკობმა. მისი შეფასებით, უკრაინაში „არაადამიანური რამ ხდება“, რადგან რუსეთი თავისი შეიარაღებით ქვეყანას ანადგურებს. „როდის დამთავრდება ომი? ახლა ვინმეს უნდა, რომ რუსეთი სულ გაანადგუროს? მაგის ილუზია გვაქვს? თუ რუსეთ-უკრაინის ომი რომ დამთავრდება, მაგით მთავრდება ყველაფერი. სხვა გეგმები არ არის? არ გაგრძელდება სხვაგან? აბა გადავხედოთ. მიზანი იკვეთება თუ არა ნელ-ნელა. ამიტომ, საქართველოსაც მოუწევს დადგომა. სადაც ძალადობაა, იქ დადგომა არ გინდა ხომ. უკრაინას რომ უჭირდა, გაზსაც იღებდა რუსეთისგან, რუსეთთან, მოლაპარაკებაზე მიდის, რომ თავის ხორბალი გაიტანოს და გაყიდოს, ჩვენი ხელისუფლება ხომ არ იტყუება. ჩვენმა ხელისუფლებამ ბრძანა, ხალხს რომ უჭირს და მძიმე სიტუაცია გვაქვს, ყველასთან ვვაჭრობთო. ხორბალიც გვინდა და პურიც, სამწუხაროდ, ჩვენ თვითკმარობა არ გვაქვს. დაგვეხმაროს დასავლეთი, უკრაინაში რომ იმდენ ფულს დებს. თუ ჩვენც პარტნიორები ვართ, დაგვეხმაროს და მათგან ვიყიდით. რასაც რუსეთს ვუხდით ფულს, დანამატი რაც იქნება, თვითონ გადაიხადონ და მათგან ვიყიდით. ახლა შეცვალა რუსეთის პრეზიდენტმა რაღაც, ჩვენთან გამოვარდნენ, რა ხდებაო. რა ხდება და შენ ის არ ხარ, 20% რომ ჩააბარე? პირდაპირ ვიტყვი, ჩააბარეს, გაყვეს საქართველო. რუსეთს მისცეს ბაზები და აქეთ არის დანარჩენი საქართველო დარჩენილი. ჩვენ ხომ ჩვენს ძმა აფხაზებთან და ოსებთან არ გვინდა ომი და დავიდარაბა. აბა წარმოიდგინეთ, უკრაინაში რაც ხდება, საქართველოც რომ მოხდეს. რუსეთის ბაზებიდან დანარჩენი საქართველო დაბომბონ და აქედან კიდევ რუსეთის ბაზები. ხომ მარტო საქართველო ნადგურდება? რამდენი კაცი დარჩება საქართველოში მცხოვრები, ამას ხომ უნდა ვუყუროთ“,-განაცხადა მეუფე იაკობმა. იპნ

"ქართული ოცნების" გენერალური მდივნის, თბილისის მერის, კახა კალაძის განცხადებით, რუსეთთან არანაირი სავიზო რეჟიმის დაწესება არ არის საჭირო და ხელისუფლება მიესალმება რაც შეიძლება მეტი ტურისტის საქართველოში ჩამოსვლას და ბიზნესკომპანიებს, რომლებიც არ არიან სანქცირებულები. მისივე თქმით, ოპოზიცია, რომელიც ახლა მოითხოვს რუსეთთან სავიზო რეჟიმის დაწესებას, თავის დროზე ქვეყანაში რუსი ტურისტების ჩამოსვლას მიესალმებოდა. „მე ვფიქრობ, რომ არანაირი სავიზო რეჟიმის დაწესება არ არის საჭირო. ამ შემთხვევაში გავიმეორებ მშვილდაძის, ხოშტარიას, სააკაშვილის სიტყვებს, რომ რაც შეიძლება მეტი ტურისტი ჩამოვიდეს საქართველოში, ჩვენ ამას მივესალმებით. ჩამოვიდნენ ბიზნესკომპანიები, რომლებიც არ არიან სანქცირებულები. მივესალმებით ამას, არანაირი პრობლემა არ არის“, - განაცხადა თბილისის მერმა.

საქართველოს პარლამენტის პრესსამსახურის უფროსი მიშა ფეიქრიშვილი ტელეკომპანია "იმედის" საინფორმაციო სამსახურს უხელმძღვანელებს. მან რადიო თავისუფლებას უთხრა, რომ მუშაობას დღეიდან, 22 მაისიდან, იწყებს. "დავუბრუნდი ჩემს პროფესიას", - ასე პასუხობს ის კითხვას, რატომ დასთანხმდა ტელეკომპანიის შეთავაზებას. მიშა ფეიქრიშვილი 2019 წლიდან 2021 წლამდე პარლამენტის თავმჯდომარის მრჩეველი იყო, 2021 წლიდან კი პარლამენტის პრესსამსახურის უფროსი გახდა, როცა ამ თანამდებობაზე მყოფი მაგდა ანიკაშვილი ასევე დასაქმდა ტელეკომპანია "იმედში". ბოლო [2022 წლის იანვარი-მარტი] მედიამონიტორინგის შედეგებით, რომელიც საქართველოს ჟურნალისტურმა ეთიკის ქარტიამ ჩაატარა, "იმედი" ხელისუფლების მიმართ მიკერძოებით გამორჩეული არხია. ამ ტელეარხზე "ოპოზიცია მაქსიმალურად დისკრედიტირებულია." ფეიქრიშვილი წლების წინ მუშაობდა "რადიო იმედში", შემდეგ იყო ტელეკომპანია "იმედის" ჟურნალისტი. ის ასევე საქმიანობდა საზოგადოებრივი მაუწყებლის პირველ არხზე და საგანგებო სიტუაციების მართვის სამსახურის პრესსამსახურში. რადიო თავისუფლება

ამერიკის შეერთებული შტატების პრეზიდენტი დათანხმდა დასავლური ქვეყნების კოალიციას, რომლებსაც თანამედროვე საბრძოლო თვითმფრინავების, F-16-ების სამართავად უკრაინელი პილოტების გაწვრთნა სურთ. უკრაინა დიდი ხანია ითხოვს მისთვის ამერიკული წარმოების საბრძოლო თვითმფრინავების გადაცემას. რამდენიმე ევროპული ქვეყანა თანახმაა თვითმფრინავების გადაცემაზე, თუმცა საბოლოო გადაწყვეტილებისთვის აშშ-ის გადაწყვეტილებაა მთავარი. უკრაინელი პილოტების წვრთნაზე ბაიდენმა იაპონიაში, დიდი შვიდეულის შეკრებაზე ისაუბრა. უკრაინის პრეზიდენტი ზელენსკი მიესალმა ბაიდენის გადაწყვეტილებას და ტვიტერზე დაწერა: „ეს გადაწყვეტილება ჩვენს არმიას ცაში ძალიან გააძლიერებს. ვიმედოვნებ, აღნიშნული გადაწყვეტილების პრაქტიკული აღსრულების განხილვა მოხდება ჰიროშიმაში, დიდი შვიდეულის სამიტზე“. F-16 თანამედროვე საბრძოლო თვითმფრინავია, რომელსაც რაკეტის გასროლა 800 კილომეტრის მანძილზე შეუძლია. აღნიშნული უკრაინას ბრძოლის ველზე მიანიჭებს დიდ უპირატესობას და შესაძლებლობა ექნება, ფრონტის ხაზიდან მოშორებით შეუტიოს მტრის პოზიციებს. ნეტგაზეთი

ტაილანდის სამი მოქალაქის ტრეფიკინგის ფაქტზე საქართველოში უცხო ქვეყნის ერთი მოქალაქეს ბრალი წარუდგინეს. ინფომაციას ამის შესახებ პროკურატურა ავრცელებს. უწყების ცნობით, გამოძიებით დადგინდა, რომ ტაილანდში ერთ-ერთი დასამების სააგენტო დაზარალებულებს ბათუმში, სილამაზის სალონში დასაქმებას დაჰპირდა. საქართველოში ჩამოსვლის შემდეგ კი სააგენტოს წარმომადგენელმა ტაილანდის სამი მოქალაქე ბათუმის ნაცვლად მოტყუებით წაიყვანა ზესტაფონში, ჩამოართვა პასპორტები და არ აძლევდა დამოუკიდებლად გადაადგილების საშუალებას. “ბრალდებული მუქარით და ფსიქოლოგიური ზეწოლით დაზარალებულებს აიძულებდა გარკვეული ანაზღაურების სანაცვლოდ სექსუალური მომსახურება გაეწიათ უცხო ქვეყნის მოქალაქეებისთვის, ხოლო ექსპლუატაციის გზით გამომუშავებული თანხის დიდ ნაწილს ისაკუთრებდა და თავისი შეხედულებისამებრ განკარგავდა”, — ნათქვამია პროკურატურის განცხადებაში. ბრალდებულს სისხლის სამართლის კოდექსის 143-ე პრიმა მუხლის მესამე ნაწილის ბ ქვეპუნტქით წარედგინა ბრალი, რაც გულისხმობს ტრეფიკინგს, რომელიც ჩაედნილია ორი ან მეტი პირის მიმართ. აღნიშნული დანაშაული 12-დან 15 წლამდე თავისუფლების აღკვეთას ითვალისწინებს. პროკურატურის ინფორმაციით, სისხლის სამართლის საქმეზე გამოძიება გრძელდება. ნეტგაზეთი

პარლამენტის თავმჯდომარემ, შალვა პაპუაშვილის პოზიციით, რუსეთთან ფრენების აკრძალვა და სავიზო რეჟიმის შემოღება იგივეა, რაც რუსეთისთვის სანქციების დაწესება. სანქციების დაწესება კი, პაპუაშვილის თქმით, მოიტანს ესკალაციას და შესაძლო სამხედრო დაპირისპირებას რუსეთთან. პარლამენტის თავმდჯომარის თქმით, თუკი საქართველო რუსეთს ფრენებს აუკრძალავს და სანქციებს შეუერთდება „რუსეთის მხრიდან საპასუხო ზომების და შედეგების წინასწარ განჭვრეტა შეუძლებელი იქნება.“ შალვა პაპუაშვილის თქმით, „ის ადამიანები, ვინც საქართველოს სანქციების დაწესებას სთხოვს რუსეთისთვის, არ აძლევს უსაფრთხოების გარანტიებს”.

სომხური მედიის ინფორმაციით, მათი ტვირთების გადაზიდვა რუსეთში უკვე ბათუმიდანაც შესაძლებელია. აპრილში ბათუმსა და რუსულ პორტს ნოვოროსიისკს შორის ორმხრივი საზღვაო გადაზიდვები დაიწყო. სომხური მედია წერს, რომ დარიალის ხეობის გავლით რუსეთში ტვირთების გადაზიდვა გარემო პირობების გამო ზოგჯერ ფერხდებოდა. სატვირთო ავტომობილები რამდენიმე კვირის განამვლობაშიც კი იდგნენ რიგში. ამ პრობლემების აღმოსაფხვრელად ამოქმედდა ახალი, საზღვაო მარშრუტი. სომხეთის ხელისუფლებამ ამ გადაზიდვების ოპერატორად კომპანია CE&M INTERNATIONAL შეარჩია. სომხურ გამოცემა Armenpress-თან კომპანიის დირექტორი დავით ილოიანი ამბობს, რომ ბათუმსა და ნოვოროსიისკს შორის უკვე ორმა სატვირთო გემმა გაიარა. „დღეისთვის, ჩვენს გემს 350 კონტეინერის გადატანა შეუძლია, პირველი ტვირთი 18 აპრილს გადავიტანეთ. ვგეგმავთ, რომ ნოვოროსიისკიდან ბათუმში და პირიქით ყოველვკირეული მიმოსვლა იყოს. მოთხოვნის შესაბამისად კი, გადაზიდვების 2-3-ჯერ გაზრდა შეგვიძლია“, – ამბობს დავით ილოიანი. „პუბლიკამ“ კომენტარისთვის ეკონომიკისა და მდგრადი განვითარების სამინისტროს მიმართა. სამინისტროში აცხადებენ, რომ ამ საკითხზე კომენტარს მათ დაქვემდებარებაში მყოფი საზღვაო ტრანსპორტის სააგენტო მოგვიანებით გააკეთებს. სომხურ მედიაში გასული თვეების განმავლობაში რამდენჯერმე გავრცელდა ინფორმაცია, რომ სომხური ტვირთების გადასატანად საქართველოსა და რუსეთს შორის შესაძლოა, საზღვაო გადაზიდვები ამოქმედებულიყო. საუბარი უფრო მეტად ფოთიდან საბორნე გადაზიდვებს შეეხებოდა. პუბლიკა

საქართველოში ევროკავშირის ელჩი, მააიკე ვან კოლდამი აცხადებს, რომ ნიდერლანდები, როგორც ევროკავშირის წევრი სახელმწიფო სრულად იზიარებს იმ შეშფოთებას, რაც რუსეთ-საქართველოს შორის პირდაპირი ავიარეისების აღდგენასთან დაკავშირებით ევროკავშირის განცხადებებშია გამოხატული. „რუსეთთან ფრენებთან დაკავშირებით ევროკავშირმა გაავრცელა ორი განცხადება. ნიდერლანდები არის ევროკავშირის წევრი და რა თქმა უნდა, ვუერთდები ევროკავშირის ამ განცხადებებს, რომელიც შეშფოთებას გამოხატავს ფრენების აღდგენასთან დაკავშირებით, რადგან ევროკავშირი საქართველოსგან ელოდება, რამდენადაც შესაძლებელია ევროკავშირის საგარეო პოლიტიკასთან შესაბამისობაში ყოფნა და ასევე გამოხატავს შეშფოთებას ფრენების უსაფრთხოებასთან დაკავშირებით. ასე რომ, ჩვენ ევროკავშირის ამ განცხადებებს ვიზიარებთ“, - აღნიშნა ელჩმა. ამასთან, მისი თქმით, რაც შეეხება საქართველოსთვის ევროკავშირის წევრის კანდიდატის სტატუსის მინიჭებას, აუცილებელია ევროკომისიის რეკომენდაციების შესრულება. „რაც შეეხება კანდიდატის სტატუსს, არსებობს 12 პრიორიტეტი, რომელიც სრულად უნდა შესრულდეს. ყველა პარტიამ უნდა გააკეთოს მაქსიმუმი, ამ პრიორიტეტების შესასრულებლად, იმისთვის, რომ იმუშაონ ერთად, დაძლიონ უთანხმოება და პოლარიზაცია“, - აღნიშნა ელჩმა. იპნ

კრემლის ფანდურზე მობუქნავე პარტიის წარმომადგენლები საუბრობენ ვინმეს ღალატსა და მორალზე!, - ამის შესახებ სოციალურ ქსელში პარტია "საქართველოსთვის" აღმასრულებელი მდივანი ბერდია სიჭინავა წერს და მამუკა მდინარაძის განცხადებას ეხმაურება იმის შესახებ, რომ - "გახარიას გუნდის წარმომადგენლებს არ აქვთ მორალური უფლება, რაღაცებზე ილაპარაკონ" "ზუსტად იციან თვითონ, როგორ დაიმახსოვრებს მათ სახელებს საქართველოს ისტორია!", - წერს სიჭინავა. გთავაზობთ მამუკა მდინარაძის განცხადებას: გახარიას გუნდს და მის წარმომადგენლებს არ აქვთ ელემენტალური მორალური უფლება, რაღაცებზე ილაპარაკონ. გიორგი გახარია ნიკა მელიას, „ნაცების“ გამო, მათი გაძლიერების გამო გადადგა და ნუღარ ლაპარაკობენ მაინც, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა. აღნიშნული კომენტარით მდინარაძემ უპასუხა ჟურნალისტის კითხვას, რომლის თანახმადაც: „გააქტიურდა გახარიას პარტია ქოლცენტრების საქმეზე და ისმის ბრალდებები „ქართული ოცნების“ მიმართ, რას უპასუხებთ, რას უკავშირებთ გააქტიურებას?“ „გარკვეულ წარსულში საერთო პოლიტიკური მიმართულების გამო, მაგრამ ღალატის ხარისხის შემდეგ, კარგად ვნახეთ, „ნაცების“ ნარატივზე ჩაყოლილი საუბრების გამო, გახარიას ნაცვლად, ამ ქვეყანაში მაშინ გადადგა მთავარი პროკურორი, პარლამენტის თავმჯდომარე, მისი გაფუჭებული საქმეების გამო. შეიძლება, პიარულად უფრო იყო გაფუჭებული, ვიდრე რეალურად, მაგრამ მისი გაფუჭებული იყო და შემდეგ თვითონ გადადგა „ნაცების“ გამო. ამ გუნდს და მის წარმომადგენლებს არ აქვთ ელემენტალური მორალური უფლება, რაღაცებზე ილაპარაკონ. ნიკა მელიას, „ნაცების“ გამო, მათი გაძლიერების გამო გადადგა და ნუღარ ლაპარაკობენ მაინც“, – განაცხადა მამუკა მდინარაძემ.

დიდი ხანია, ჩვენი მფრინავები უარს აცხადებენ მასთან ფრენაზე, მაგრამ მე მაინც მიმაჩნდა, რომ არ იყო ეს სწორი, მინდოდა, ყველაფერი ყოფილიყო, როგორ წესია, მაგრამ წესები ქალბატონმა დაარღვია. ვფიქრობ, რომ ის ქართველების პრეზიდენტი არ არის და არ ყოფილა, – ამის შესახებ „ჯორჯიან ეარვეისის“ დირექტორმა, თამაზ გაიაშვილმა „კურიერს“ განუცხადა. მანამდე მედიით გავრცელდა თამაზ გაიაშვილის განცხადება, სადაც ნათქვამია, რომ სალომე ზურაბიშვილს პერსონა ნონ გრატად აცხადებენ და ქართველი ხალხის წინაშე ბოდიშს ვიდრე არ მოიხდის, ბორტზე არ დაუშვებენ. „არ მსურდა, ქალბატონ პრეზიდენტზე რამე მეთქვა, თუნდაც იმიტომ, რომ ქალბატონია, მაგრამ მისმა სრულიად უპასუხისმგებლო განცხადებამ სხვა გზა არ დამიტოვა. ქალბატონმა პრეზიდენტმა საკუთარი ქვეყნის ავიაკომპანიას, რომელსაც მიმდინარე წლის 15 სექტემბერს ოცდაათი წელიწადი უსრულდება და, რომელმაც საქართველოსთან ერთად მრავალი ჭირ-ვარამი გამოიარა, ბოიკოტი გამოუცხადა. იმ დროს, როდესაც ქალბატონი სალომე პარიზის ქუჩებში დასეირნობდა, ქართველი მფრინავები ხანძარმოდებულ აფხაზეთში დაფრინავდნენ და სამშობლოს ერთიანობის იდეას ეწირებოდნენ. იმ დროს კი, როდესაც 2008 წლის ტრაგედიის შემდეგ მსოფლიოს ყველა ავიაკომპანიამ უარი თქვა ორად გახლეჩილ საქართველოში ფრენების განხორციელებაზე, ქართველი ავიატორები, მიუხედავად სალიზინგო და სადაზღვევო კომპანიების კატეგორიული წინააღმდეგობისა, მსოფლიოს მრავალ ქვეყანაში დაფრინავდნენ და პოლიტიკოსები, დიპლომატები და ჟურნალისტები ჩამოჰყავდათ, რამაც ჩვენი ქვეყანა პრაქტიკულად იხსნა იზოლაციისგან. ამდენ უბედურებას სასწაულებრივად გადარჩენილი ავიაკომპანიის წინააღმდეგ განხორციელებული ეს შტურმი უსინდისობაა და სხვა არაფერი, მითუმეტეს, იმ პრეზიდენტისგან, რომელსაც ერთპროცენტიანი რეიტინგიც კი არ გააჩნია. გასაკვირია, თუ რატომ იხარჯება მილიონები საქართველოს ბიუჯეტიდან იმ ქალბატონის ყოვლად უმიზნო ვოიაჟებისთვის საზღვარგარეთის ქვეყნებში, ვისაც ცხოვრების არცერთ მონაკვეთში საქართველოსთვის სასიკეთო არაფერი გაუკეთებია. იგი დღესაც ავადსახსენებელ გახარიას სიტყვებს იმეორებს, რომ ავიაკომპანია პანდემიის დროს ვითომ მდიდრდებოდა. საქართველოს პრეზიდენტმა ისიც კი არ იცის, რომ პანდემიის დროს კომპანია გაჩერებული იყო და გაკოტრების რეჟიმში იმყოფებოდა, დღეს კი რეაბილიტაციის რეჟიმშია. ეს იმ დროს, როდესაც სახელმწიფოთა პრეზიდენტებმა უზარმაზარი თანხები ჩაასხეს ეროვნული ავიაკომპანიების გადარჩენის საქმეში, „ჯორჯიან ეარვეისს“ კი არავისგან არაფერი მიუღია, გარდა ხელისშეშლისა. გამდიდრებაზე თუ არის საუბარი, ქალბატონმა საკუთარ წინაპრებზე ილაპარაკოს, რომლებმაც საქართველოს ხაზინასთან ერთად ეკლესია-მონასტრები და ეროვნული მუზეუმები გაძარცვეს და საქართველოდან გაიქცნენ, ქართველი ხალხი კი მშიერი დატოვეს. მაშინ ბეწვზე ვართ გადარჩენილი, ისე უმოწყალოდ ვიყავით გაძარცვული. რა უნდა ელაპარაკო ადამიანს, რომელიც ორი წლის წინათ, ფრანგულ ავიაკომპანია „ეარ ფრანსის“ კუთვნილ თვითმფრინავს ტაშ-ფანდურით დახვდა, შემდეგ კი, პიარის გასაკეთებლად, პარიზში გაჰყვა. მას არასოდეს გასჩენია სურვილი, რომ ქართულ ავიაკომპანიას დახმარებოდა. თუმცა, რა არის გასაკვირი, იგი არ არის საქართველოს პრეზიდენტი. ყველამ იცის, რომ ნებისმიერ ქართველს უფრო მეტი აქვს საქართველოსთვის გაკეთებული, ვიდრე ქალბატონ ზურაბიშვილს. მას საქართველოში, როგორც ადრე იტყოდნენ, არცერთი შრომადღე არა აქვს გამომუშავებული. მოღალატედ დაბადებული ადამიანი, როგორც ჩანს, ვერც გრძნობს ხოლმე, თუ როგორ ღალატობს ადამიანებს, საქვეყნო ინტერესებს, სამშობლოს. დიდი მადლობა ქალბატონო სალომე ყველაფრისთვის, აფერუმ, რომ ასე უდგახართ გვერდში ქართულ ავიაკომპანიას. ავიარეისები არ განახორციელოთო, მოგვიწოდებს ქალბატონი სალომე. გასული საუკუნის 80-იანი წლების მიწურულის საქართველო მახსენდება, როდესაც სამტრედიაში სარკინიგზო მაგისტრალი გადაკეტეს, საბჭოთა ეკონომიკა უნდა დავანგრიოთო. ქალბატონი სალომე ახლა, როგორც ჩანს, იმავე აზროვნების ინერციით მოქმედებს და ჰგონია, რომ ქართული ავიაკომპანიის გაჩერებით რუსეთის ეკონომიკას დაანგრევს. ან რა ტიპის დემოკრატიაა ის, რომ უმრავლესობამ აგრესიული უმცირესობის ჭკუაზე იაროს. დემოკრატია საკითხების უმრავლესობით გადაწყვეტას ნიშნავს, უმცირესობის ჭკუაზე სიარულს კი დიქტატურა ჰქვია. ბედის ირონიაა, როდესაც ქალბატონ ზურაბიშვილსაც პრეზიდენტი ჰქვია და ერდოღანსაც, რომელმაც „თურქიშ ეარვეისი“ მსოფლიოს ერთ-ერთ უდიდეს ავიაკომპანიად ჩამოაყალიბა, სტამბოლში კი რეგიონის უდიდესი აეროპორტი ააშენა. ბევრს აღარ გავაგრძელებ. ქალბატონმა სალომემ ეროვნულ ავიაკომპანიას ბოიკოტი გამოუცხადა, ჩვენ მას პერსონა ნონ გრატად ვაცხადებთ და, ვიდრე ქართველი ხალხის წინაშე ბოდიშს არ მოიხდის, ჩვენს ბორტზე არ დავუშვებთ“, – აღნიშნულია თამაზ გაიაშვილის განცხადებაში. საქართველოს პრზიდენტმა სალომე ზურაბიშვილმა ორბელიანების სასახლეში გუშინ გამართულ ბრიფინგზე განაცხადა, რომ „აირზენას“ ბოიკოტს უცხადებს. როგორც პრეზიდენტმა აღნიშნა, თავს შეიკავებს „აირზენას“ ბორტით სარგებლობისგან.

სასტუმრო „ყვარლის ტბის“ მიმდებარე ტერიტორიაზე დაკავებული 17 პირიდან, 17-ვე თავისუფალია. აქედან, გურჯაანის რაიონულმა სასამართლო აქციის ორ მონაწილეს სიტყვიერი გაფრთხილება მისცა. დანარჩენ 14-ის სასამართლო პროცესი კი, დაცვის მხარის მოთხოვნის საფუძველზე გადაიდო. როგორც ადვოკატები განამარტავდნენ, მათ ვერ შეძლეს საქმის მასალების და მტკიცებულებების დროულად გაცნობა. „ყვარლის ტბაზე“ დაკავებული 14 პირის საქმეზე გურჯაანის სასამართლო 19 ივნისს, 13:00 საათზე იმსჯელებს. ცნობისთვის, სასტუმრო „ყვარლის ტბასთან“ აქცია გუშინ, დილიდან მიმდინარეობდა. აქციის მონაწილეები სასტუმროში რუსეთის საგარეო საქმეთა მინისტრის, სერგეი ლავროვის ოჯახის წევრების ყოფნას აპროტესტებდნენ. საპროტესტო აქციაზე ვითარება პოლიციასა და აქციის მონაწილეებს შორის რამდენჯერმე დაიძაბა, დააკავეს 17 პირი. მიმდინარე მოვლენებთან დაკავშირებით ბრიფინგი გამართა საქართველოს პრეზიდენტმა, სალომე ზურაბიშვილმა. პრეზიდენტის თქმით, მან პირობა მიიღო საქართველოს შინაგან საქმეთა მინისტრისგან, რომ „წასულია ის ოჯახი, ის ადამიანები, რომლებიც აპირებდნენ დღეს ქორწილის მეორე ნახევრის გადახდას და ამდენად, დღეს ქორწილი აღარ ჩატარდება“. მოგვიანებით, კიდევ ერთი აქცია „ნაციონალური მოძრაობის“ წევრებმა და მხარდამჭერებმა საგარეჯოს პოლიციის შენობასთან გამართეს და სასტუმრო „ყვარლის ტბის“ მიმდებარე ტერიტორიაზე საპროტესტო აქციაზე დაკავებულების გათავისუფლება მოითხოვეს. აქციის მონაწილეებსა და პოლიციას შორის სიტუაცია აქაც დაიძაბა. დაკავებული იყო „ერთიანი ნაციონალური მოძრაობის“ პოლიტსაბჭოს წევრი ლაშა ფარულავა და გიორგი ლომიძე. მათი საქმის განხილვა სიღნაღის რაიონულმა სასამართლომ 28 მაისამდე გადადო. იპნ

გურჯაანის მუნიციპალიტეტში მკვლელობა მოხდა. არსებული ინფორმაციით, მოკლულია 32 წლის კაცი, რომელსაც სასიკვდილო ჭრილობა სანადირო თოფიდან აქვს მიყენებული. ადგილობრივების ინფორმაციით, შემთხვევა სოფელ ვაზისუბანში სასოფლო-სამეურნეო სავარგულების ტერიტორიაზე მოხდა. რა გახდა მკვლელობის მიზეზი, ჯერჯერობით უცნობია. მიმდინარეობს გამოძიება. იპნ