tvati

არსებული ინფორმაციით, ფოთის პორტში, ერთ-ერთ ნავმისადგომზე, ერთ-ერთ სატვირთოში დიდი ოდენობით ნარკოტიკული საშუალება “ჰეროინია“ აღმოჩენილი. გავრცელებული ინფორმაციით, ნარკოტიკები სატვირთოს მისაბმელში, სპეციალურად მოწყობილ საცავში იყო დამალული. არსებული ინფორმაციით, სატვირთო ირანის მოქალაქის მართვის ქვეშ იმყოფება. როგორც ,,ინტერპრესნიუსს“ შსს-ში განუცხადეს, დაწყებულია გამოძიება, ადგილზე მუშაობენ შინაგან საქმეთა სამინისტროს შესაბამისი დანაყოფების და საბაჟო დეპარტამენტის წარმომადგენლები.

საქართველოს პრეზიდენტმა, სალომე ზურაბიშვილმა 13 მსჯავრდებული შეიწყალა. პრეზიდენტის ადმინისტრაციის ინფორმაციით, 9 მსჯავრდებული სრულად გათავისუფლდა პენიტენციურ დაწესებულებაში თავისუფლების აღკვეთის სახით დანიშნული სასჯელის შემდგომი მოხდისაგან და პენიტენციურ დაწესებულებას დღესვე დატოვებს, ხოლო 4 მსჯავრდებულს პენიტენციურ დაწესებულებაში მოსახდელად დარჩენილი სასჯელის ვადა შეუმცირდა. შეწყალებულთა შორის 4 მსჯავრდებული ქალია. ipn

ომის შემდეგ უკრაინა ევროკავშირის წევრი გახდება. შესაბამისი განცხადება გერმანიის კანცლერმა ოლაფ შოლცმა გერმანიის სოციალ-დემოკრატიული პარტიის 160-ე წლისთავზე სიტყვით გამოსვლისას განაცხადა. “ჩვენი კონტინენტის ისტორიაში მწარე პერიოდი, რომელიც ვლადიმირ პუტინმა შექმნა თავის იმპერიალისტურ სიგიჟეში, თავისუფალი უკრაინის ევროკავშირში სრულუფლებიანი წევრის რანგში გაწევრიანებით დამთავრდება”, - განაცხადა შოლცმა. მან აღნიშნა, რომ გერმანიის სოციალ-დემოკრატიული პარტია მკაფიოდ უნდა დადგეს უკრაინის მხარეს, ვინაიდან, სწორედ ყოფილი კანცლერის ვილი ბრანდტის პოლიტიკის წყალობით ევროპაში ახლა ძალის გამოუყენებლობის, საზღვრების ურღვეობის, სახელმწიფოების ტერიტორიული მთლიანობისა და ერების თვითგამორკვევის უფლებების პრინციპები მუშაობს. “ჩვენ, სოციალ-დემოკრატები, ღრმა რწმენით ვიცავთ ამ პრინციპებს”, - განაცხადა შოლცმა. ipn

განათლების სამინისტროში მიიღეს გადაწყვეტილება, რომ ამ ეტაპზე, დროებით შეჩერდეს სპეციალური კომისიის საქმიანობა, რომელიც მასწავლებლებს გამოცდის ჩაბარების გარეშე, კომისიური წესით სტატუსის მინიჭების შესაძლებლობას აძლევდა. სამინისტრო ავრცელებს მინისტრის, გიორგი ამილახვრის კომენტარს, რომელშიც ნათქვამია, რომ მასწავლებლებთან შეხვედრებზე გამოიკვეთა ერთ-ერთი მნიშვნელოვანი საკითხი, რომელიც მასწავლებელთათვის სქემით გათვალისწინებული სტატუსის მინიჭების გზებს შეეხება. პუბლიკა

ე.წ. დონეცკის სახალხო რესპუბლიკის „უზენაესმა სასამართლომ“ მკაცრი რეჟიმის კოლონიაში უვადო პატიმრობა მიუსაჯა უკრაინის ეროვნული გვარდიის პოლკ „აზოვის“ სამხედრო მოსამსახურეს, ალექსეი კირკალოვს. რუსეთის საგამოძიებო კომიტეტის ცნობით, კირკალოვი შეიარაღებული კონფლიქტის დროს აკრძალული მეთოდების გამოყენებასა და მკვლელობაში ცნეს დამნაშავედ. კირკალოვი ბრალდებას უარყოფს და თავს უდანაშაულოდ მიიჩნევს. გამოძიების ვერსიით, 2022 წლის 15 აპრილს კირკალოვმა, რომლის მეტსახელი იყო „ფრიცი“, ქალაქ მარიუპოლში მდებარე ერთ-ერთ საკონტროლო-გამშვებ პუნქტ „აცტეკთან“ საკუთარი ხელით დახვრიტა 3 დღით ადრე დატყვევებული რუსი სამხედრო მოსამსახურე. მიუხედავად იმისა, რომ კირკალოვმა მთლიანად უარყო ამ დანაშაულში მის მიმართ გამოძიების მიერ წაყენებული ბრალდება, "საქმის ირგვლივ შეგროვებული ჩვენებები, გამოძიების შედეგები და საქმეში არსებული სხვა მტკიცებულებები ადასტურებს კირკალოვის ბრალეულობას", - ნათქვამია რუსეთის საგამოძიებო კომიტეტის მიერ გავრცელებულ განცხადებაში. 2023 წლის აპრილში ე.წ.დონეცკის სახალხო რესპუბლიკის " უზენაესმა სასამართლომ " უკრაინის შეიარაღებული ძალების სამხედრო მოსამსახურეს ანდრეი პეტრენკოს მკაცრი რეჟიმის კოლონიაში 22 წლით პატიმრობა მიუსაჯა. მას ბრალი წაუყენეს სისხლის სამართლის კოდექსის 356-ე მუხლის პირველი ნაწილით (ომის დროს აკრძალული საშუალებებისა და მეთოდების გამოყენება) და სისხლის სამართლის კოდექსის 105-ე მუხლის მე-2 ნაწილის "ლ" ქვეპუნქტით (მკვლელობა ჩადენილი პოლიტიკური და იდეოლოგიური სიძულვილისა და მტრობის ნიადაგზე) ჩადენილი დანაშაულისთვის, რასაც, სავარაუდოდ, სამოქალაქო პირის მკვლელობა მოჰყვა. გასული წლის მარტში, პრორუსული ლუგანსკის უმაღლესმა სასამართლომ 13 წლით პატიმრობა მიუსაჯა ეუთოს(ევროპის უშიშროებისა და თანამშრომლობის ორგანიზაცია) მისიის თანამშრომელ დმიტრი შაბანოვს, რომელსაც სახელმწიფო ღალატსა და ცენტრალური სადაზვერვო სამმართველოს სასარგებლოდ მუშაობაში ედება ბრალი. ასევე ნახეთ ეუთოს თანამშრომელს ლუგანსკის სეპარატისტულმა სასამართლომ 13 წლით თავისუფლების აღკვეთა მიუსაჯა ევროპის უშიშროებისა და თანამშრომლობის ორგანიზაციამ ივლისში განაცხადა, რომ შაბანოვისთვის წაყენებული ბრალდება უსაფუძვლო და შეთითხნილი იყო. ივნისში გამოცემა Politico-სთან კომენტარში ეუთოს წარმომადგენელმა სინანული გამოთქვა იმის გამო, რომ რუსეთი და სეპარატისტული ლუგანსკისა და დონეცკის "ხელისუფლებების" სათავეში მყოფები პატივს არ სცემენ საერთაშორისო მისიის თანამშრომლების ხელშეუხებლობას. რადიო თავისუფლება

უკრაინის ძალებმა გარკვეულ პროგრესს მიაღწიეს აღმოსავლეთ უკრაინის ქალაქ ბახმუტის ჩრდილოეთ და სამხრეთ ფლანგებზე, განაცხადა 23 მაისს უკრაინის სახმელეთო ჯარების სარდალმა, გენერალმა ოლექსანდრ სირსკიმ. „ბრძოლა გრძელდება. ჩვენი თავდაცვის ძალები წარმატებებს აღწევენ ფლანგებზე“, - დაწერა მან Telegram-ში. თავდაცვის მინისტრის მოადგილემ ჰანა მალიარმა ასევე დაწერა Telegram-ში, რომ ქალაქში ბრძოლები შემცირდა, მაგრამ გარეუბნებში კვლავაც გრძელდება. მალიარის თქმით, ბახმუტში უკრაინის წინსვლა „უმნიშვნელოა“, მაგრამ რუსეთი „დიდ დანაკარგებს“ განიცდის. 21 მაისს სირსკიმ აღიარა, რომ უკრაინის ძალები ბახმუტის მხოლოდ მცირე ნაწილს აკონტროლებდნენ. 20 მაისს, "ვაგნერის" დამფუძნებელმა ევგენი პრიგოჟინმა, ხოლო 21 მაისს - რუსეთის თავდაცვის სამინისტრომ გამოაცხადეს, რომ არტიომოვსკის აღების ოპერაცია დასრულებულია და ქალაქი "მთლიანად გაათავისუფლეს". რუსეთი ბახმუტს არტიომოვსკად მოიხსენიებს. 21 მაისს, პრეზიდენტმა პუტინმა "ვაგნერელებს" და რუსეთის არმიის სამხედროებს "მიულოცა არტიომოვსკის გათავისუფლების ოპერაციის დასრულება". უკრაინის ხელისუფლებას ბახმუტის დაკარგვა ოფიციალურად არ დაუდასტურებია. რუსეთის რეგულარული არმიის ქვედანაყოფებმა და კერძო სამხედრო კომპანია "ვაგნერმა" 2022 წლის აგვისტოდან დაიწყეს ინტენსიური შეტევა დონეცკის ოლქის ქალაქ ბახმუტზე, რომლის ფართობი დაახლოებით 42 კვადრატული კილომეტრია. ბახმუტი, სადაც ომის დაწყებამდე 72 000 ადამიანი ცხოვრობდა, მთლიანად დანგრეულია. რადიო თავისუფლება

„რუსეთის თავისუფლების ლეგიონი“ და „რუსეთის მოხალისეთა კორპუსი“ აგრძელებენ ბელგოროდის ოლქის გათავისუფლებას, - ამის შესახებ „რუსეთის თავისუფლების ლეგიონი“ „ტელეგრამზე“ წერს. მათივე მტკიცებით, რუსეთს სამხედრო კრიზისებზე რეაგირებისთვის საჭირო რესურსები არ აქვს. „რუსეთის ფედერაციის არმიამ ვერაფერი დაუპირისპირა პატრიოტ მოხალისეთა ჯგუფს, რომლებმაც იარაღი აიღეს და უშიშრად, ღიად დაუპირისპირდნენ მოსკოვის რეჟიმს რუსეთის თავისუფალი მომავლისთვის. კიდევ ერთხელ განადგურდა მითი იმის შესახებ, რომ რუსეთის ფედერაციის მოქალაქეები უსაფრთხოდ არიან და რუსეთის ფედერაცია ძლიერია. რუსეთს არ აქვს რეზერვები სამხედრო კრიზისებზე რეაგირებისთვის. ყველა სამხედრო მოსამსახურე დაღუპულია, დაჭრილია ან უკრაინაშია. რუსეთის ფედერაცია აბსოლუტურად დაუცველია. ბელგოროდში პანიკაა, ნაწილობრივ მიმდინარეობს ორგანიზებული ევაკუაცია, მაგრამ უმეტესწილად სპონტანური გაქცევა“, - ნათქვამია განცხადებაში. ამასთან, ბელგორიდის გუბერნატორმა, ვიაჩესლავ გლადკოვმა დღეს განაცხადა, რომ უკრაინის შეიარაღებულმა ძალებმა ორშაბათს ოლქის ტერიტორია ნაღმმტყორცნებიდან და არტილერიიდან რამდენჯერმე დაბომბეს. მისი თქმით, დაიჭრა 12 მშვიდობიანი მოქალაქე, დაზიანდა 29 საცხოვრებელი სახლი და 3 ავტომობილი, 14 დასახლებას კი ელექტროენერგია ამ დრომდე არ მიეწოდება. რუსეთის თავდაცვის სამინისტროს განცხადებით, ბელგოროდში ჩატარებული კონტრტერორისტული ოპერაციის ფარგლებში, რუსეთის ავიაციამ, არტილერიამ და ქვედანაყოფებმა „70-ზე მეტი უკრაინელი ტერორისტი“ გაანადგურეს, რომლებიც, უწყების მტკიცებით, ბელგოროდის ოლქის ტერიტორიაზე იყვნენ შეჭრილი. ipn

უკრაინელებმა ომის დაწყების შემდეგ რუსეთის დაახლოებით 204 360 ჯარისკაცი გაანადგურეს, მათ შორის 480 - ბოლო დღე-ღამის განმავლობაში, - ამის შესახებ ინფორმაციას უკრაინის შეიარაღებული ძალების გენერალური შტაბი ავრცელებს. ამასთან, უწყების ცნობით, უკრაინელებმა, ბოლო დღე-ღამის განმავლობაში, რუსების 40 საარტილერიო სისტემა, 34 დრონი და 4 ფრთოსანი რაკეტა გაანადგურეს. უკრაინაში შეჭრის დღიდან რუსების საერთო დანაკარგები მოიცავს: 3 789 ტანკს, 7 419 ჯავშანტექნიკას, 3 318 ერთეულ საარტილერიო სისტემას, 309 საბრძოლო თვითმფრინავს და 295 ვერტმფრენს, 6 139 ავტომობილსა და საწვავის ავზს, 18 გემს/ნავს, 2 864 უპილოტო საფრენ აპარატს, 433 ერთეულ სპეცტექნიკას და 1 015 ფრთოსან რაკეტას. იპნ

ინიციატივები „საქართველოსთვის''

პოლიციამ განზრახ მკვლელობის ფაქტი ცხელ კვალზე გახსნა - დაკავებულია ერთი პირი. შინაგან საქმეთა სამინისტროს ცნობით, თბილისის პოლიციის დეპარტამენტის დიდუბე-ჩუღურეთის მთავარი სამმართველოს თანამშრომლებმა, ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, 2002 წელს დაბადებული გ.ი., განზრახ მკვლელობის ბრალდებით, თბილისში დააკავეს. უწყების ინფორმაციით, დანაშაული 10-დან 15 წლამდე ვადით თავისუფლების აღკვეთას ითვალისწინებს. „გამოძიებით დადგინდა, რომ მიმდინარე წლის 22 მაისს, ბრალდებული და 2003 წელს დაბადებულ შ.ქ. სოციალურ ქსელში დაწყებული უთანხმოების გარკვევის მიზნით, ერთმანეთს შეხვდნენ. ურთიერთშელაპარაკების ნიადაგზე, გ.ი.-მ, ცივი იარაღით დაჭრა ახალგაზრდა მამაკაცი და შემთხვევის ადგილიდან მიიმალა. დაჭრილი მამაკაცი სამედიცინო დაწესებულებაში გარდაიცვალა. სამართალდამცველებმა ბრალდებული მომხდარიდან მალევე, ცხელ კვალზე დააკავეს. განზრახ მკვლელობის ფაქტზე გამოძიება საქართველოს სისხლის სამართლის კოდექსის 108-ე მუხლით მიმდინარეობს“, - აღნიშნულია შსს-ის მიერ გავრცელებულ ინფორმაციაში. ინტერპრესნიუსი

ვფიქრობ, გადაწყვეტილება, რომელიც რუსეთის ფედერაციამ მიიღო, იმდენად ჩვენდამი განხორციელებული გამოწვევა არ არის, რამდენადაც ევროკავშირის მიმართ. მგონია, რომ ამ გადაწყვეტილების ფონზე, განსაკუთრებით მომწიფდა ევროკავშირის მხრიდან ერთადერთი სწორი გადაწყვეტილების მიღება, - ამის შესახებ „ჯეოქეისის“ თავმჯდომარემ, ვიქტორ ყიფიანმა „პალიტრანიუსის“ გადაცემა „ნიუსრუმში“ რუსეთ-საქართველოს ურთიერთობის ახალ ტენდენციებსა და პირდაპირ ფრენებზე საუბრისას განაცხადა. მისივე თქმით, რუსეთის ამ გამოწვევაზე ევროკავშირის პასუხი უნდა იყოს საქართველოსთვის კანდიდატის სტატუსის მინიჭება. „ჰუმანიტარული კუთხით გადაწყვეტილებას არაფერი დაეწუნება. ჩვენ ეს გადაწყვეტილება რომ ამოვგლიჯოთ პოლიტიკური კონტექსტიდან, რა თქმა უნდა, საღად მოაზროვნე ადამიანი, რთულად წარმოსადგენია, რომ წინააღმდეგი იყოს პირდაპირი ფრენების, უვიზო მიმოსვლის, მაგრამ ჩვენ, თავისთავად ცხადია, უნდა გავითვალისწინოთ ის რთული გეოპოლიტიკური კონტექსტი, როდის მოხდა ამ გადაწყვეტილების მიღება. საქართველო არის საკუთარი გეოგრაფიის ტუსაღი. რა თქმა უნდა, ასეთი მდგომარეობა გავლენას ახდენს მის პოლიტიკურ ხაზზე. ეს გადაწყვეტილებები, ცალმხრივი ნების გამოვლენის ფორმით, რუსეთს მხრიდან იქნა ამოქმედებული ჩვენთვის უხერხულ დროს. მე ვფიქრობ, რომ ეს გადაწყვეტილება, რომელიც რუსეთის ფედერაციამ მიიღო, იმდენად ჩვენდამი განხორციელებული გამოწვევა არ არის, რამდენადაც ევროკავშირის მიმართ. მგონია, რომ ამ გადაწყვეტილების ფონზე, განსაკუთრებით მომწიფდა და განსაკუთრებით საჭირბოროტო გახდა ევროკავშირის მხრიდან ერთადერთი სწორი გადაწყვეტილების მიღება. და ეს გადაწყვეტილება, მიუხედავად იმისა, რომ შესაძლოა, ჩვენი ქვეყანა დღეს იდეალურად, სრულფასოვნად ან სრულყოფილად ვერ ასრულებდეს იმ ცნობილ 12 რეკომენდაციას, მაგრამ პოლიტიკური მდგენელი იმ გადაწყვეტილებისა, რასაც ჩვენ ველოდებით, რუსეთის ქმედებების ფონზე, კიდევ უფრო მეტად აქტუალური გახდა. ალბათ, ამ გადაწყვეტილებებმა ევროკავშირის ბიუროკრატიას კიდევ უფრო მეტად შეუმცირა სივრცე იმ გადაწყვეტილების მისაღებად, რომელიც მეტწილად პოლიტიკური, პრაგმატული, გეოპოლიტიკური, მოსაზრებებით უნდა იყოს ნაკარნახევი. ფაქტია, რომ ამ ნაბიჯებით რუსეთმა გაზარდა რბილი ძალის პროეცირების ხარისხი და ამიტომ, ერთადერთი საპირწონე, ერთადერთი გამანეიტრალებელი და სწორი პასუხი, რაც შეიძლება ამას მოჰყვეს ევროკავშირის მხრიდან, ეს არის წლის ბოლოს კანდიდატის სტატუსზე დადებითი პასუხის მიღება. ეს იქნება ყველაზე სწორი, დამაბალანსებელი, რომ ქართული საზოგადოება უკვე მეორე ჯერზე არ იქნეს გაწბილებული თავის მოლოდინებში. ევროკავშირში გაწევრიანება - კანდიდატობა იქნება თუ სრულფასოვანი წევრობა, ეს ყოველთვის არის ორმხრივი მოძრაობის ქუჩა, ჩვენ დავალებებს ვასრულებთ ავად თუ კარგად, მაგრამ აუცილებელი მოთხოვნაა, რომ ამ ქუჩის საპირისპირო მხრიდან ჩვენკენ, ასევე, თანაბარი წარმატებით, თანაბარი დინამიკითა და ხარისხით მოძრაობდეს ევროკავშირიც“, - განაცხადა ვიქტორ ყიფიანმა. იპნ

ევროკავშირის უმაღლესი წარმომადგენელი საგარეო პოლიტიკისა და უსაფრთხოების საკითხებში, ჯოზეფ ბორელი აცხადებს, რომ F-16 ტიპის გამანადგურებლების მართვაზე უკრაინელი პილოტების წვრთნები პოლონეთში უკვე დაიწყო. „F-16-ებზე პილოტების მომზადება რამდენიმე ქვეყანაში დაიწყო. ამას დრო დასჭირდება, მაგრამ რაც მალე, მით უკეთესი“, - აღნიშნა ევროკავშირის უმაღლესმა წარმომადგენელმა ბრიუსელში, ევროკავშირის წევრი ქვეყნების თავდაცვის მინისტრების შეხვედრის დაწყებამდე. კითხვაზე, კონკრეტულად რომელ ქვეყნებში დაიწყო წვრთნები, ჯოზეფ ბორელმა უპასუხა: „მაგალითად, პოლონეთში“. იპნ

იაშვილის კლინიკის დირექტორი, ივანე ჩხაიძე ამბობს, რომ ქვეყანაში ჩუტყვავილას ინფექციის შემთხვევები მომატებულია. 2023 წლის იანვრიდან აპრილის თვის ჩათვლით, 4 თვეში ინფექციის 3 118 შემთხვევა გამოვლინდა. ივანე ჩხაიძე არ გამორიცხავს, რომ წლის ბოლოსთვის ჩუტყვავილას შემთხვევების რაოდენობამ 10 000-ს მიაღწიოს. ამის შესახებ ივანე ჩხაიძემ მედიაჰოლდინგ „კვირას“ ოფისში გამართულ შეხვედრაზე ისაუბრა. ის ამბობს, რომ იშვიათია ჩუტყვავილას გართულებული შემთხვევები, 10 000 ინფიცირებულზე 1 გარდაცვლილი ფიქსირდება. იაშვილის კლინიკაში ჩუტყვავილას გართულებით წელს 4 პაციენტი შევიდა, დღეს კი მაღალი ცხელებით კლინიკაში 1 პაციენტი რჩება. „მცირე ასაკის ბავშვებში გართულების რისკი მეტია“, – განაცხადა ივანე ჩხეიძემ. რაც შეეხება, ჩუტყვავილას საწინააღმდეგო ვაქცინაციას, ჩხაიძე ამბობს, რომ ჯანდაცვის სამინისტროს ვაქცინაციის შემოღებასთან დაკავშირებით იმუნიზაციის ტექნიკურ მრჩეველთა საბჭომ უნდა მიმართოს, თუმცა ეს აქამდე არ მომხდარა, ვინაიდან, მისი თქმით, ჯანდაცვის მსოფლიო ორგანიზაცია არ იძლევა რეკომენდაციას, ყველა ქვეყანამ ჩაატაროს ჩუტყვავილას საწინააღმდეგო ვაქცინაცია. მისივე თქმით, ჩუტყვავილას საწინააღმდეგო ვაქცინაცია აუცილებელ ვაქცინაციათა ჩამონათვალში ევროპის 12 ქვეყანას ჰყავს შეყვანილი. მაგალითად, საფრანგეთი, ჰოლანდია, დიდი ბრიტანეთი, ნორვეგია და შვედეთი ამ ვაქცინაციას არ აკეთებს. ჩხაიძე ამბობს, რომ ვინც დაავადება ერთხელ გადაიტანა, მას „მთელი ცხოვრება აქვს იმუნიტეტი“. ივანე ჩხაიძემ, პარალელურად ისაუბრა წითელას ვაქცინაციაზე. მისი თქმით, მშობლები ბოლო წლებში შვილებს წითელას საწინააღმდეგო ვაქცინაციას არ უკეთებენ, რაც, მისი თქმით, მძიმე შედეგებს მოიტანს. ივანე ჩხაიძემ ისიც თქვა, რომ კორონავირუსის შემთხვევები ისევ ფიქსირდება ქვეყანაში და „ის არსად გამქრალა“. „მიმართვიანობა გრძელდება. დადასტურებულ შემთხვევებში საკმაოდ მოულოდნელი ციფრები გვაქვს, 8 პროცენტი დადასტურებული შემთხვევების საკმაოდ დიდი რიცხვია.“ – ამბობს ივანე ჩხაიძე. პუბლიკა

საქართველოსა და რუსეთს შორის პირდაპირი ფრენების აღდგენას აშშ-ის სახელმწიფო დეპარტამენტიდან კიდევ ერთხელ გამოეხმაურნენ. უწყების პრესსპიკერმა, მეთიუ მილერმა, ამ თემაზე ჟურნალისტის კითხვის საპასუხოდ ისაუბრა. “ჩვენი ბოლო პრესკონფერენციის შემდეგ არაერთი რამ მოხდა. პირველ რიგში, ჩვენ გავარკვიეთ, რომ ლავროვის სანქცირებული ქალიშვილი საქართველოში იმყოფებოდა, ხოლო რუსული თვითმფრინავი — თბილისში [ჩაფრინდა]. ახლა ქართული თვითმფრინავი მოსკოვში აპირებს გაფრენას. სად იყო ამ დღეებში აშშ? არანაირი რეაქცია და სანქცია არ არის”, — ჰკითხეს პრესკონფერენციაზე მილერს. სახდეპის პრესსპიკერს ლავროვის ქალიშვილის ვიზიტზე არ უსაუბრია, თუმცა ფრენების აღდგენასთან დაკავშირებით შეშფოთება გამოხატა და თქვა, რომ “ბევრი დასავლური ქვეყანა, მათ შორის შეერთებული შტატები, კრძალავს რუსული თვითმფრინავების შესვლას [თავის] საჰაერო სივრცეში”. “ჩვენ შეშფოთებული ვართ რუსეთსა და საქართველოს შორის პირდაპირი ფრენების აღდგენით. ეს ნიშნავს – შეიძლება ნიშნავდეს, რომ საქართველოს კომპანიებს საქართველოს აეროპორტებში, შეიძლება, სანქციები დაემუქროს. ჩვენ – მთელი დასავლური საზოგადოება ვდისტანცირდით ამ რეჟიმისგან და ახლა არ არის რუსეთთან ურთიერთობის გაზრდის დრო”, — დასძინა მეთიუ მილერმა. პირდაპირი ფრენები და ლავროვის ქალიშვილი საქართველოში მოსკოვმა 10 მაისს მოხნა შეზღუდვა საქართველოსთან პირდაპირ ფრენებზე. რუსეთში ამ გადაწყვეტილებას „ჰუმანიტარული ხასიათის“ უწოდეს. ფრენების აღდგენას კრიტიკულად უყურებენ აშშ და ევროკავშირი. პირდაპირი ფრენების აღდგენის შემდეგ პირველი რეისი თბილისში 19 მაისს ჩამოფრინდა. ის უკრაინის მიერ სანქცირებულმა რუსულმა კომპანიამ, “აზიმუტმა” შეასრულა. საქართველოს ხელისუფლება მოსკოვის გადაწყვეტილებას მიესალმება და ამბობს, რომ ეს გაუმარტივებს ცხოვრებას რუსეთში მცხოვრებ „მილიონ ქართველს“. მთავრობაში აგრეთვე აცხადებენ, რომ მხოლოდ არასანქცირებული კომპანიები და ხომალდები შეძლებენ ფრენას. პოლიტიკოსების და მოქალაქეთა ნაწილი ავიამიმოსვლის აღდგენას სხვადასხვა ფორმით, მათ შორის, აქციებით აპროტესტებს. “აზიმუტის” პირველი რეისი უკვე დასრულებული იყო, როცა მედიაში ინფორმაცია გავრცელდა რუსეთის საგარეო საქმეთა მინისტრის, სერგეი ლავროვის ქალიშვილისა და მისი ქმრის ვიზიტზე საქართველოში. ეკატერინა ვინოკუროვა(ლავროვა) და მისი მეუღლე, ალექსანდრ ვინოკუროვი ნათესავების ჯვრისწერაზე ჩამოვიდნენ, რომლებიც ასევე რუსეთის მოქალაქეები არიან და ყვარელში იხდიდნენ ქორწილს. 20 მაისს, პოლიტიკოსების, აქტივისტებისა და სხვა მოქალაქეების პროტესტის შემდეგ, საქართველოს პრეზიდენტმა თქვა, რომ შინაგან საქმეთა მინისტრისგან მიიღო ინფორმაცია, რომლის თანახმადაც ლავროვის ნათესავების ქორწილი ყვარელში არ გაიმართება და „ის ოჯახი უკვე წასულია“. ლავროვის სანქცირებული ქალიშვილის ვიზიტი “ქართულ ოცნებაში” დაადასტურეს, თუმცა ამაში პრობლემა ვერ დაინახეს. “ქართული ოცნების” თავმჯდომარემ თქვა, რომ ოჯახის წევრის სანქცირება ადამიანის უფლებებს ეწინააღმდეგება”. მისივე სიტყვებით, “სირცხვილია”, როცა პრეზიდენტი სალომე ზურაბიშვილი ხსენებული ქორწილის ჩაშლას ხალხის გამარჯვებად აფასებს. ნეტგაზეთი

შინაგან საქმეთა სამინისტროს ინფორმაციით, ქვემო ქართლის პოლიციის დეპარტამენტის თანამშრომლებმა, ცხელ კვალზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, 2001 წელს დაბადებული ნ.ა. და 2005 წელს დაბადებული ა.ა. ჯგუფურად ჩადენილი განზრახ მკვლელობის ბრალდებით დააკავეს. დანაშაული 16-დან 20 წლამდე ან უვადო თავისუფლების აღკვეთას ითვალისწინებს. შსს-ს ცნობით, დაკავებულებმა და თანმხლებმა პირებმა ტაქსით გადაადგილებისას აღნიშნული ავტომობილის დაუფლების და ფინანსური სარგებლის მიღების მიზნით, ტაქსის მძღოლის – 1969 წელს დაბადებული შ.ლ.-ს მოკვლა განიზრახეს. ბრალდებულებმა მას ავტომანქანა გააჩერებინეს, რის შემდეგაც მოკლეს, კვალის დაფარვის მიზნით კი მოკლული მამაკაცის ცხედარი ქვემო ქართლის მუნიციპალიტეტში, ერთ-ერთი მდინარის ნაპირზე დამარხეს. ამის შემდეგ, შსს-ს თანახმად, ბრალდებულებმა ავტომობილი საკუთარ ავტოსახელოსნოში მიიყვანეს, კვალის დაფარვის მიზნით, აღნიშნული ავტომობილის ნაწილებად დაშლა დაიწყეს. სამართალდამცველებმა ნ.ა.-ს და ა.ა. -ს კვალს მიაკვლიეს, რის შემდეგაც ისინი ბრალდებულის სახით დააკავეს. ამავე დანაშაულში მონაწილე კიდევ ერთი პირის ადგილსამყოფელის დადგენისა და დაკავების მიზნით ტარდება შესაბამისი ღონისძიებები. ჯგუფურად ჩადენილ განზრახ მკვლელობის ფაქტზე გამოძიება საქართველოს სისხლის სამართლის კოდექსის 109-ე მუხლის “ი” ქვეპუნქტით მიმდინარეობს. ნეტგაზეთი

საქართველოს კავკასიასა და ცენტრალურ აზიაში ჩრდილოატლანტიკური ალიანსის გენერალური მდივნის სპეციალური წარმომადგენელი ხავიერ კოლომინა ეწვევა. ის ქვეყანაში რეგიონული ვიზიტის ფარგლებში დღეს ჩამოვა. სამუშაო შეხვედრებს კი ხვალ გამართავს. ხავიერ კოლომინას სამუშაო ვიზიტი საქართველოში ერთ დღეს გაგრძელდება. ამის შემდეგ ის სომხეთსა და აზერბაიჯანს ეწვევა. ქართველ მაღალჩინოსნებთან შეხვედრების შემდეგ დაგეგმილია ბრიფინგი მედიასთან. იპნ

უკრაინის პრეზიდენტი ვოლოდიმირ ზელენსკი ფრონტის ხაზზე იმყოფებოდა და ჯარისკაცებს უკრაინის შეიარაღებული ძალების სამხედრო-საზღვაო ძალების საზღვაო ქვეითთა დღე მიულოცა. „ჩვენი დამცველები. ფრონტის ზონა ვუჰლედარში - მარინკას თავდაცვის ხაზი. დღეს აქ ვარ, რათა მივულოცო ჩვენს მეომრებს უკრაინის შეიარაღებული ძალების სამხედრო-საზღვაო ძალების საზღვაო ქვეითთა დღე. დიდება ყველას, ვინც იცავს უკრაინას!“- დაწერა ზელენსკიმ „ტელეგრამზე“. იპნ

22 მაისის დილიდან, მედია და ტელეგრამ-არხები აქტიურად წერენ უკრაინის მოსაზღვრე ბელგოროდის ოლქში მიმდინარე მოვლენებზე. ვრცელდება ცნობები, რომ უკრაინის მხარეს მებრძოლი რუსების ლეგიონმა რუსეთის ტერიტორიაზე რამდენიმე დასახლებული პუნქტი დაიკავა, ხოლო იქამდე – რუსული სასაზღვრო პუნქტი გაანადგურა. ინფორმაცია ამ მოვლენებზე საკმაოდ სწრაფად ვრცელდება, მისი გადამოწმება კი საკმაოდ რთულია. ამ მასალაში „ნეტგაზეთი“ შეეცადა თავი მოეყარა აქტუალური და გადამოწმებული ცნობებისთვის. მასალა პერიოდულად განახლდება. სასაზღვრო პუნქტის განადგურება უკრაინული ტელეგრამ-არხების ცნობით, რუსეთის ტერიტორიაზე, ბელგოროდის ოლქის დაბა გრაივორონში არტილერიული ცეცხლით განადგურებულია სასაზღვრო პუნქტი, მოგვიანებით კი გავრცელდა ვიდეო, სადაც პუნქტზე უკრაინული ტანკიც გადაადგილდება. რუსული მხარე აქედან მხოლოდ გრაივორონის რაიონის რამდენიმე სოფლის დაბომბვას ადასტურებს, თუმცა, ამ სოფლებს შორისაა კაზინკაც, რომელიც უშუალოდ უკრაინის საზღვართანაა და რომელშიც მდებარეობს ხსენებული პუნქტი. ბელგოროდის ოლქის გუბერნატორი გლადკოვი იმასაც ამბობს, რომ რაიონში უკრაინული სადაზვერვო-დივერსიული ჯგუფია შესული, რომელსაც რუსული ძალები ებრძვიან. რუსული ტელეგრამ-არხების ინფორმაციით, ჯგუფთან საბრძოლველად გააგზავნეს ვერტმფრენებიც. ამის შესახებ, დიმიტრი პესკოვის თქმით, პუტინსაც მოახსენეს. გუბერნატორ ვიაჩესლავ გლადკოვის ცნობით, დაშავებულია ჯამში ექვსი ადამიანი. „თავისუფლება ახლოსაა“ უკრაინული მხარე კი ამბობს, რომ ბელგოროდში არა უკრაინის შეიარაღებული ძალების ნაწილები, არამედ ლეგიონი „რუსეთის თავისუფლება“ მოქმედებს [ლეგიონში რუსები არიან გაწევრიანებული და იბრძვის უკრაინის მხარეს]. პრეზიდენტ ზელენსკის ადმინისტრაციაშიც თქვეს, რომ მიმდინარე მოვლენებთან უკრაინას უშუალო შეხება არ აქვს. ბელგოროდში ბრძოლაზე მრავლადაა ცნობები თავად ლეგიონის ტელეგრამ-არხშიც. უკანასკნელი ცნობებით, ლეგიონის მეომრებმა, „რუსულ მოხალისეობრივ კორპუსთან“ ერთად, დაიწყეს ქალაქ გრაივორონის შტურმი. კრემლის პროპაგანდისტული „რაშა თუდეის“ ცნობით, „უკრაინელმა დივერსანტებმა“ დაიკავეს კულტურის სახლი სოფელ გორა-პოდოლში. ლეგიონი აგრეთვე აცხადებს, რომ გათავისუფლებულ დასახლებულ პუნქტებში უკვე ფრიალებს რუსეთის ალტერნატიული დროშა, წითელი ფერის გარეშე [იხილეთ გარეკანის ფოტოზე], ადგილობრივებს კი მოუწოდებენ, სახლში დარჩნენ და წინააღმდეგობა არ გაუწიონ – „პუტინის ზომბებისგან განსხვავებით, სამოქალაქო პირებს არ ვეხებით“. „დემილიტარიზებული ზონა“ ლეგიონი „რუსეთის თავისუფლება“ [ასევე ცნობილი, როგორც ლეგიონი L], „რუსულ მოხალისეობრივ კორპუსთან“ ერთად, გეგმავს, უკრაინა-რუსეთის საზღვარზე დემილიტარიზებული ზონა შექმნას. „ვითარება რთულია. ლეგიონი და „რუსული მოხალისეობრივი კორპუსი“ ქმნიან დემილიტარიზებულ ზონას რუსეთის საზღვართან, საიდანაც ისინი [რუსეთის ჯარი] ვეღარ შეძლებენ უკრაინის დაბომბვას. შემდგომ, მივდივართ მთელი რუსეთის პუტინის დიქტატის გათავისუფლებისკენ და დანაშაულებრივი ომის შეწყვეტისკენ“, – განუცხადა ლეგიონმა უკრაინულ გამოცემა „სუსპილნეს“. ნეტგაზეთი

ნატოს საპარლამენტო ასამბლეამ უკრაინის წინააღმდეგ რუსეთის დანაშაულები გენოციდად, ხოლო რუსეთში ტერორისტული რეჟიმი კი “რაშიზმად“ ერთხმად აღიარა. ინფორმაციას უკრაინული მედია ავრცელებს. მათივე ცნობით, დოკუმენტი გმობს „რაშიზმის“ იდეოლოგიას, მხარს უჭერს უკრაინის ტერიტორიული მთლიანობის აღდგენას, საერთაშორისო ტრიბუნალს, სანქციებს, რეპარაციებს, ისევე როგორც, უკრაინისთვის „მარშალის გეგმას“. „ლუქსემბურგში, ასამბლეის სესიაზე, ჩვენ ძალიან ძლიერი დეკლარაციის მიღებას მივაღწიეთ, რომელსაც შორს მიმავალი პოლიტიკური შედეგები ექნება“, - განაცხადა ეგორ ჩერნიევმა, ნატოს საპარლამენტო ასამბლეაში უკრაინის მუდმივი დელეგაციის ხელმძღვანელმა. როგორც ჩერნიევმა აღნიშნა, უკრაინის ყველა მთავარი მოთხოვნა დეკლარაციის საბოლოო ტექსტთან დაკავშირებით გათვალისწინებულია. მან აღნიშნული უკრაინის დიპლომატიურ გამარჯვებად შეაფასა. IPN

ბელგოროდის რაიონში კონტრტერორისტული ოპერაციის რეჟიმი დაწესდა. ამის შესახებ რუსული მედია იუწყება. „დღეიდან ბელგოროდის რაიონში „მოქალაქეების უსაფრთხოების უზრუნველსაყოფად“ შემოღებულ იქნა კონტრტერორისტული ოპერაციის რეჟიმი“, - განაცხადა რეგიონის გუბერნატორმა ვიაჩესლავ გლადკოვმა. მან გაიხსენა, რომ კონტრტერორისტული რეჟიმი აწესებს სპეციალურ ზომებს და დროებით შეზღუდვებს - მოქალაქეების დოკუმენტების შემოწმებიდან დაწყებული ფეთქებადი, რადიოაქტიური, ქიმიურად და ბიოლოგიურად სახიფათო ნივთიერებების მრეწველობის საქმიანობის შეჩერებამდე. იპნ

„ირაკლი კობახიძე ახლა მთლიანად იხსნის ნიღაბს. ქართველებს არ სურთ, რომ რუსეთის საკუთრება იყვნენ, ირაკლის სურს“,- ამის შესახებ „ტვიტერში“ ყოფილი კონგრესმენი ადამ კინზინგერი წერს. ამით კინზინგერი რუსეთის საგარეო საქმეთა მინისტრის, სერგეი ლავროვის ოჯახის საქართველოში ვიზიტზე „ქართული ოცნების“ თავმჯდომარის, ირაკლი კობახიძის განცხადებებს გამოეხმაურა. კობახიძემ განაცხადა, რომ ქვეყანა არ უერთდება სანქციებს და საბაჟო სამსახური მხოლოდ ოკუპაციის შესახებ კანონით ხელმძღვანელობს. მისივე თქმით, ოჯახის წევრების სანქცირება ეწინააღმდეგება ადამიანის უფლებების სტანდარტებს. სალომე ზურაბიშვილის შესახებ დასმული შეკითხვის საპასუხოდ მან განაცხადა, რომ პრეზიდენტს არავინ ეკითხება თავად რაზე ისაუბრებს და მას არ აქვს უფლება ხალხის სახელით ილაპარაკოს. პუბლიკა

„არჩევნებში კოორდინატორი ქალები სხვადასხვა ტიპის რისკისა და გამოწვევების წინაშე დგანან”, – ამის შესახებ საუბარია კვლევაში – „ქალი კოორდინატორების გამოწვევები არჩევნებში”, რომელიც ქალთა უფლებათა დაცვის ორგანიზაცია „საფარმა“ და ორგანიზაცია ISFED-მა მოამზადა. ჯამში, კვლევაში მონაწილეობა 31-მა კოორდინატორმა ქალმა მიიღო სახელისუფლებო და ოპოზიციური პარტიებიდან. კვლევაში ვკითხულობთ, რომ კოორდინატორი ქალების კვლევები ირღვევა ყველგან: როგორც პარტიის შიგნით, ასევე – გარეთ, რაც კოორდინატორების მიმართ მოსახლეობის ნეგატიური დამოკიდებულების, მათზე საჯარო მოხელეებისა და სხვადასხვა აქტორების მხრიდან განხორციელებული ფიზიკური და ფსიქოლოგიური ძალადობის, პარტიებში არარეგულირებული სამუშაო პირობების, მოუწესრიგებელი შრომითი ხელშეკრულებებისა და სხვა სამართლებრივი გარანტიების ნაკლებობითაა გამოწვეული. კვლევაში მონაწილე ქალები საუბრობენ შემთხვევებზე, როდესაც ადგილი ჰქონდა მათზე სიტყვიერ, ფსიქოლოგიურ და ფიზიკურ ძალადობასაც კი. ემუქრებიან სამსახურისა და სოციალური დახმარების დაკარგვით. კვლევით დოკუმენტში ასევე ვკითხულობთ, რომ ბევრი ქალი იძულებულია, დათანხმდეს ამ ტიპის პოლიტიკურ ჩართულობას მწირი ანაზღაურების სანაცვლოდ, ზოგიერთი კი ამას თანხმდება სამუშაოს დაკარგვის შიშით, რაც იძულებითი შრომაა. კვლევის მიხედვით, ქალი კოორდინატორებისგან ხშირად ითხოვენ ამომრჩეველთა მობილიზებას ხმის მისაცემად, საპროტესტო აქციების მოწყობას და ა.შ., რა დროსაც ქალები ხშირად აწყდებიან სიტყვიერ შეურაცხყოფას, ზოგჯერ კი – ფიზიკურ ძალადობასაც კი. „სოციალური დახმარების მოხსნით დაშინება” კვლევაში მონაწილე ქალი კოორდინატორები, რომლებიც ძირითადად ოპოზიციურ პარტიებს წარმოადგენენ ჰყვებიან, რომ ხშირად სოციალური დახმარების მოხსნით ემუქრებიან. მათი თქმით, „ბევრ კოორდინატორ ქალს უთქვამს, რომ დაემუქრნენ სოციალური დახმარების მოხსნით, თუ გააგრძელებდა აგიტაციას ოპოზიციური პარტიის მხარდასაჭერად”. კვლევიდან იკვეთება ისიც, რომ შესაძლოა ადგილი ჰქონდეს ზეწოლას კოორდინატორების ოჯახის წევრებზეც კი. კვლევაში მონაწილე კოორდინატორების თქმით, „თუ მათ ოპოზიციური პარტიის მხარდამჭერი ჰყავთ ოჯახში, სოციალურ დახმარებას მოუხსნიან.“ ავტორთა თქმით, წინასაარჩევნოდ ოჯახის ბერკეტად გამოყენება გავრცელებულია ქალი კოორდინატორების მიმართ ძალადობის ერთ-ერთ ფორმად. კვლევის მიხედვით, ხშირია კოორდინატორის, ან მისი ოჯახის დასაქმებული წევრის/ახლო ნათესავის სამსახურიდან გათავისუფლებით მუქარაც. ერთ-ერთმა რესპონდენტმა თქვა, რომ ოჯახის დასაქმებული წევრებით მანიპულაციაში ჩართულია სახელმწიფო უსაფრთხოების სამსახური. ისინი ისე იქცევიან, რომ თავად ოჯახის წევრებმა უთხრან კოორდინატორებს, დაანებონ მსგავს საქმიანობას თავი, რათა მათ არ შეექმნათ საფრთხე. ერთ-ერთი რესპონდენტი იხსენებს, როგორ დააშინეს ის მის არასრულწლოვან შვილზე მუქარით: კვლევის მიხედვით, განსაკუთრებით, სამთავრობო მხრიდან გავრცელებულია ბაღისა და სკოლის მასწავლებლების გამოყენება კოორდინატორებად, ან პირიქით, სამსახურის დაკარგვის მუქარით მათი განეიტრალება. ფიზიკური ძალადობის შემთხვევები ქალ კოორდინატორებზე კვლევაში მონაწილე ქალი კოორდინატორები ამბობენ, რომ ადგილი აქვს ფიზიკურ ძალადობასაც. ერთ-ერთი კოორდინატორი ამბობს, რომ ქუჩაში აგიტაციის გაწევისას, რაიონის გამგებელმა მასზე საცემად გაიწია. მანამდე ის მასზე ფსიქოლოგიურ ძალადობასაც ახორციელებდა. აღნიშნული რესპონდენტი ჰყვება, რომ მას მერე, რაც მან გამოააშკარავა ამომრჩევლების მოსყიდვის ფაქტი, რომელშიც პოლიციელი იყო ჩართული, აღნიშნული პოლიციელი იარაღით დაემუქრა მას. კვლევის შედეგად გამოვლინდა, რომ ქალ კოორდინატორებზე ფსიქოლოგიურ და ფიზიკურ ძალადობას ადგილი აქვს მერიის თანამშრომლების მხრიდან. ერთ-ერთი რესპოდენტის თქმით, მას მერე, რაც მან გამოააშკარავა ამომრჩევლის მოსყიდვის ფაქტი, როდესაც მერიის წარმომადგენლები საარჩევნო შტაბში შევიდნენ ფულის დასარიგებლად და ხალხის მოსასყიდად, მერიის მაღალჩინოსანმა მასზე საცემად გაიწია და ხალხმა მოახერხა მისი შეჩერება. კოორდინატორები აცხადებენ რომ წინასაარჩევნო პერიოდში ხშირია მათ მიმართ დაშინება და მუქარა. ასევე, კვლევამ გამოავლინა, რომ მთავარი აქტორი, რომელიც ქალი კოორდინატორების დაშინებასა და ძალადობაშია ჩართული, არის ე.წ. უბნის „კაი ბიჭი“. რესპონდენტების თქმით, მმართველმა პარტიამ მათ განუსაზღვრელი თავისუფლება მიანიჭა. ბიულეტენისთვის ფოტოს გადაღება კვლევამ გამოავლინა, რომ კოორდინატორ ქალთა მიმართ ძალადობის კიდევ ერთი ტიპის აქტორია ე.წ. „პარტიული პოლიცია“, რომელიც კოორდინატორებს აიძულებს, მოიტანონ ამომრჩეველთა პირადობის მოწმობები, პირადი ნომრები, ბიულეტენის ფოტოები და ა.შ. ეს განსაკუთრებულ დისკომფორტს, უხერხულობასა და დაძაბულობას უქმნით ქალ კოორდინატორებს, რომლებსაც ინფორმაცია არ აქვთ, როგორ დაიცვან თავი საკუთარი პარტიის წევრი ე.წ. „პარტიული პოლიციისგან“. როგორც ერთ-ერთი კოორდინატორი ამბობს, პარტიები ხშირად ბიულეტენის ფოტოს გადაღებას სთხოვენ კოორდინატორ ქალებს, რომ მართლა დარწმუნდნენ მათი აგიტაციის შედეგიანობაში. ამის სანაცვლოდ, ხშირად ხდება კოორდინატორების მოსყიდვა – როგორც რესპონდენტი ამბობს, არიგებენ ზეთს, მაკარონს, ხორცს. კვლევის ბოლოს წარმოდგენილია „საფარისა“ და ISFED-ის ერთობლივად შემუშავებული რეკომენდაციები პოლიტიკური პარტიებისთვის, ასევე პარტიის გარეთ არსებული ორგანიზაციებისა და სახელმწიფო სტრუქტურებისთვის, რომელთა ჩართულობასაც შეუძლია არჩევნებში ქალი კოორდინატორების მიმართ გენდერული ნიშნით ძალადობის პრევენცია. რეკომენდაციები პოლიტიკური პარტიებისთვის: პოლიტიკურმა პარტიებმა ქალი კოორდინატორების შრომითი უფლებების დაცვის მიზნით, მათთან ინდივიდუალური შრომით ხელშეკრულებები უნდა გააფორმონ, რითიც მხარეთა უფლება-მოვალეობები დარეგულირდება. ანაზღაურება უნდა მოხდეს უნაღდო ანგარიშსწორებით. პარტიებმა ქალ კოორდინატორებს უნდა მიაწოდონ ინფორმაცია, როგორ მიმართონ შესაბამის ორგანოებს საფრთხეში აღმოჩენის ან/და მათი უფლებების დარღვევის შემთხვევაში. მმართველმა პარტიამ უარი უნდა თქვას კოორდინატორებად საჯარო მოხელეთა, მათ შორის, სკოლისა და ბაღის მასწავლებლების დასაქმების პრაქტიკაზე, რაც ამ სექტორის პოლიტიზაციისა და სახელმწიფოსა და პარტიას შორის ზღვრის წაშლის ერთ-ერთი მიზეზია. პარტიებმა უარი უნდა თქვან კოორდინატორებისთვის ისეთი დავალებების მიცემაზე, რომელიც საფრთხის შემცველია ქალი კოორდინატორებისთვის. რეკომენდაციები არასამთავრობო ორგანიზაციებს: არასამთავრობო ორგანიზაციებმა უნდა დაიწყონ ცნობიერების ამაღლების კამპანიები პარტიის კოორდინატორი ქალების როლისა და მდგომარეობის შესახებ, რათა შემცირდეს არჩევნებისას კოორდინატორი ქალების მიმართ აგრესია საზოგადოების მხრიდან. აუცილებელია, ქალ კოორდინატორებს არჩევნებისას გაუწიონ უფასო იურიდიული დახმარება, მათ მიმართ გამოვლენილი გენდერული ნიშნით ძალადობის ფაქტებთან დაკავშირებით. კვლევა 2022 წლის ოქტომბერში ჩატარდა ფოკუს-ჯგუფებისა და არაფორმალური ინტერვიუს მეთოდებით. ინტერვიუები ჩატარდა ონლაინ, დიალოგური მოდელით ინტერვიუერსა და სხვადასხვა პოლიტიკური პარტიის კოორდინატორ ქალებს შორის. პუბლიკა

რუსეთის გასამხედროებული, კერძო ჯგუფის, "ვაგნერის" ხელმძღვანელი, ევგენი პრიგოჟინი აცხადებს, რომ მისი მეომრები აღმოსავლეთ უკრაინის ქალაქ ბახმუტს დატოვებენ 25 მაისიდან 1 ივნისამდე პერიოდში. პრიგოჟინი ახლახან აცხადებდა, რომ მისმა მებრძოლებმა ბახმუტი დაიკავეს, ყველაზე ხანგრძლივი და სისხლიანი ბრძოლის მერე მას შემდეგ, რაც 2022 წლის თებერვალში რუსეთი უკრაინაში შეიჭრა - თუმცა კიევი უარყოფს ცნობას ბახმუტის დაცემაზე. 22 მაისს გავრცელებულ აუდიომიმართვაში პრიგოჟინი იმეორებს მის მიერ უკვე გამოთქმულ განცხადებას, რომ დანგრეული ქალაქი გადაეცემა რუსეთის რეგულარულ არმიას და დასძენს, რომ ბახმუტში რუსეთის პოზიციების შესანარჩუნებლად თავდაცვის სამინისტრომ უნდა შექმნას "გენერლების ქვედანაყოფი". რადიო თავისუფლება

რუსეთის ბელგოროდის რეგიონში რთული ვითარებაა. ინფორმაციას უკრაინული მედია „რუსეთის თავისუფლების ლეგიონის“ პრესსამსახურზე დაყრდნობით ავრცელებს. მათი ცნობით, ლეგიონი და „რუსეთის მოხალისეთა კორპუსი” რუსეთის ფედერაციის საზღვარზე დემილიტარიზებულ ზონას ქმნიან, საიდანაც რუსული არმია უკრაინაზე თავდასხმას ვერ შეძლებს. რუსეთის თავისუფლების ლეგიონის განცხადებითვე, ისინი გააგრძელებენ „სვლას სრულიად რუსეთის განთავისუფლებისკენ“. იპნ

ხონში დადასტურებული ცოფის შემთხვევა ქვეყნის მასშტაბით მიმდინარე წელს ვირუსის გავრცელების პირველი ფაქტი არ არის, - ამის შესახებ სოციალურ ქსელში პარტია "საქართველოსთვის" წევრი და დეპუტატი ანა ბუჩუკური წერს. მისი თქმით, ცოფის 3 შემთხვევა მანამდე ამბროლაურში, შემდეგ კი მარტვილში გამოვლინდა. "ჯანდაცვის მსოფლიო ორგანიზაციის რეკომენდაციაა, რომ ქვეყანაში ძაღლების 70%-ის აცრაა საჭირო ჯოგური იმუნიტეტის მისაღწევად. ასეთ დროს წყდება ცოფის გადაცემა ძაღლებში და საბოლოოდ - ადამიანში. ასამოქმედებელია მიუსაფარი ძაღლების მასობრივი აცრის და სტერილიზაციის პროგრამები!", - წერს ბუჩუკური.