tvati

უკრაინის მიერ დაგეგმილი კონტრშეტევა, რამდენიმე დღეა, დაიწყო, – ამის შესახებ უკრაინის პრეზიდენტის ადმინისტრაციის მრჩეველმა, მიხაილ პოდოლიაკმა განაცხადა. „კონტრშეტევა რამდენიმე დღეა გრძელდება, საზღვრიდან 1 500 კილომეტრის მანძილზე ინტენსიური ომია, მაგრამ მოქმედებები უკვე დაწყებულია. ჩვენ არ გვინდა რუსეთის ტერიტორიაზე დარტყმა, ჩვენ გამოვიყენებთ იმ იარაღს, რომელიც მოგვცეს, რათა გავანადგუროთ რუსული პოზიციები მოსკოვის მიერ ოკუპირებულ ტერიტორიებზე, მათ შორის დონბასსა და ყირიმში“, – განაცხადა პოდოლიაკმა. უკრაინის პრეზიდენტის ადმინისტრაციის მრჩევლის თქმით, უკრაინას აქვს იტალიისა და საფრანგეთის მიერ მიწოდებული ანტისარაკეტო სისტემები და „ლეოპარდის“ ტიპის ტანკები. პოდოლიაკმა ხაზგასმით აღნიშნა, რომ F-16 ტიპის ავიაგამანადგურებლები ქვეყანას უკრაინის საჰაერო სივრცის დახურვის საშუალებას მისცემს. ავტორი - მარიამ ახალაია

კერძო რუსული სამხედრო კომპანია „ვაგნერის“ დამფუძნებელი, ევგენი პრიგოჟინი აცხადებს, რომ ბახმუტიდან ქვედანაყოფების გაყვანა უკვე დაიწყო. ინფორმაციას „ბიბისი“ ავრცელებს. „ჩვენ გავიყვანთ ბახმუტიდან ქვედანაყოფებს პირველ ივნისამდე და ძირითადი ნაწილი უკანა ბანაკებში გადავა. პოზიციებს სამხედროებს გადავცემთ, მაგრამ თუ სამხედროებს გაუჭირდებათ, ჩვენ დავტოვებთ იმ მებრძოლებს, რომლებმაც გადამწყვეტი როლი შეასრულეს ბახმუტის აღებაში“, – აღნიშნულია პრიგოჟინის პრესსამსახურის ტელეგრამარხზე გავრცელებულ ჩანაწერში. პრიგოჟინმა ბახმუტის აღების შესახებ 20 მაისს განაცხადა. უკრაინის ხელისუფლებას ქალაქ ბახმუტის აღების შესახებ ინფორმაცია არ დაუდასტურებია. ავტორი - მარიამ ახალაია

წლევანდელ დამოუკიდებლობის დღეს ევროკავშირის დროშა არ იქნება პარლამენტის შენობაზე, - ამის შესახებ სოციალურ ქსელში პარტია "საქართველოსთვის" თავმჯდომარის მოადგილე ნათია მეზვრიშვილი წერს. მისი ტქმით, ეს ფაქტი ალბათ ყურადღებას არ მიიქცევდა, რომ არა ხელისუფლების ანტი-ევროპული პოლიტიკა და ღიად შეცვლილი საგარეო კურსი. "საქართველოს თავისუფლებისთვის და დამოუკიდებლობისთვის ბრძოლის სიმბოლოდ ქცეულ გამზირზე, სადაც ქართველების სისხლია დაღვრილი, ხელისუფლებამ ევროკავშირის დროშა ჯერ დაწვა, ახლა საერთოდ არ დაკიდა. დაბრუნდება ევროკავშირის დროშაც და ევროპაც საქართველოში. ევროკავშირში აქვს საქართველოს გარანტირებული დამოუკიდებლობა, თავისუფლება და სუვერენიტეტი. არ ყოფილა ეს არასოდეს რუსეთში და ვერ იქნება!", - წერს მეზვრიშვილი.

ამერიკელი მომღერალი ტინა ტერნერი 83 წლის ასაკში გარდაიცვალა. „როკ-ენ-როლის დედოფალი“ შვეიცარიაში, ციურიხის მახლობლად მდებარე საკუთარ სახლში გარდაიცვალა. „მასთან ერთად, მსოფლიომ დაკარგა ლეგენდა და მისაბაძი ადამიანი“,- განაცხადა მისმა პრესსპიკერმა. ავტორი - სალომე თორაძე

მნიშვნელოვანია, რომ საქართველო იმ დემოკრატიულ ღირებულებებს შეესაბამებოდეს, რაც ჩვენ ყველას გვწამს. ამის შესახებ ნატო-ს გენერალურმა მდივანმა იენს სტოლტენბერგმა ბრიუსელის ფორუმზე განაცხადა. ნატოს გენმდივანმა ისაუბრა საქართველოს მაგალითზე, რუსეთის აგრესიული ქმედებების კონტექსტში. “საქართველო ქცევის მოდელის ნაწილია, ვინაიდან, როგორც ვთქვი, 2014 წელს უკრაინაში დაიწყო ომი, მაგრამ მეზობლების წინააღმდეგ რუსეთის აგრესიული ქმედებები 2014 წელს არ დაიწყო, როგორც მინიმუმ 2008 წელს დაიწყო საქართველოში შეჭრით. ასე რომ, ეს ქცევის მოდელი ისტორიული შეხსენებაა, რომ ეს მხოლოდ უკრაინაში ამ ომს არ ეხება, რომ ცივი ომის შემდეგ რუსეთთან უკეთესი, უფრო მეგობრული ურთიერთობების აწყობის მცდელობები ჩავარდა რუსეთის აგრესიული ქცევის გამო, რომელსაც გავლენის სივრცეების ხელახლა დამყარება სურდა, რათა მეზობლები ეკონტროლებინა. და, რა თქმა უნდა, ეს ის სამყარო არ არის, რომელშიც ჩვენ გვსურს ცხოვრება, ვინაიდან, ნატოს მეზობლებს, პოსტსაბჭოურ ქვეყნებს არ ექნებოდათ დამოუკიდებლობა, რომელიც, ჩვენი რწმენით, ყველა ქვეყანას უნდა ჰქონდეს. ასე რომ, ნატო ბევრი წლის განმავლობაში საქართველოსთან მუშაობდა რეფორმების გატარების, პრაქტიკული პოლიტიკური თანამშრომლობის მხრივ და, რა თქმა უნდა, ომის შემდეგ ვნახეთ, რომ “შუაში” მყოფი ქვეყნები მოწყვლადი არიან. ასე რომ, მადრიდის სამიტზე გადავწყვიტეთ, რომ გაგვეზარდა ის, რასაც ამ ქვეყნებისთვის ვაკეთებთ, და საქართველო ერთ-ერთი უმთავრესი მაგალითია. მაგრამ ასევე უნდა გვესმოდეს, რომ მნიშვნელოვანია საქართველო იმ დემოკრატიულ ღირებულებებს შეესაბამებოდეს, რომლებისაც ჩვენ ყველას გვწამს და, რა თქმა უნდა, ველით, რომ ნატოს არაწევრი მოკავშირეები დაიცავენ სანქციებს და რუსეთს უკრაინის წინააღმდეგ აგრესიული ომის დაფინანსებას და ორგანიზებას არ გაუადვილებენ”, - განაცხადა სტოლტენბერგმა.

ყურადღება 12 რეკომენდაციაზე გავამახვილეთ, ასევე, „ქართული ოცნების“ შეცვლილ რიტორიკაზე, რომელმაც სერიოზული საფრთხე გააჩინა, - ამის შესახებ პარტია „საქართველოსთვის“ წევრმა ბექა ლილუაშვილმა ნატო-ს გენერალური მდივნის სპეციალურ წარმომადგენელთან კავკასიასა და ცენტრალურ აზიაში, ხავიერ კოლომინასთან შეხვედრის შემდეგ განაცხადა. როგორც ლილუაშვილი განმარტავს, უცხოელ პარტნიორებს ქართველი ხალხის ხმა კარგად ესმით. „ბუნებრივია, კარგად უნდა გვესმოდეს ორი ასპექტი: ერთი - თავდაცვისუნარიანობა, მეორე - დემოკრატიული რეფორმები. ეს ჩვენი სახელმწიფოსთვის ნატო-სთან თანამშრომლობის ისტორიული კონტექსტია და ბუნებრივია, ორივე მიმართულებით იყო ინტერესიც და საუბარიც. განსაკუთრებით ყურადღება გავამახვილეთ 12 რეკომენდაციაზე, „ქართული ოცნების“ შეცვლილ რიტორიკაზე, რომელმაც სერიოზული საფრთხე გააჩინა, მათ შორის კონსტიტუციის 72-ე მუხლის დარღვევის ნაწილში. ხელისუფლებიდან არავის ჰქონდეს იმედი, ტყუილად ნუ გაიფიქრებენ, რომ ჩვენს პარტნიორებს ქართველი ხალხის შეიძლება არ ესმოდეთ. ქართველი ხალხის ხმა, მათ შორის, 90%-ის ევროკავშირის მხარდაჭერის ნაწილში, 80%-ის ნატო-ს წევრობის მხარდაჭერის ნაწილში, ძალიან კარგად აქვთ გაგებული... ჩვენ ბუნებრივია, ვილნიუსის სამიტთან დაკავშირებით ვთხოვეთ, რომ ოფიციალური პირების მხრიდან დაფიქსირდეს საქართველოს და ქართველი ხალხის, მათი ურყევი სურვილიდან გამომდინარე, ძალიან მკაფიო მხარდაჭერა ნატო-ს წევრობასთან დაკავშირებით, მათ შორის, ძალიან მკაფიოდ ჩაიწეროს ეს მხარდაჭერა“, - განაცხადა ლილუაშვილმა. ipn

უკრაინის გვერდით უნდა ვიყოთ, ამას ველით საქართველოსგან და ყველა სხვა პარტნიორისგან, - ამის შესახებ კავკასიასა და ცენტრალურ აზიაში ნატო-ს გენერალური მდივნის სპეციალურმა წარმომადგენელმა, ხავიერ კოლომინამ, რომელიც საქართველოში ვიზიტად იმყოფება, მედიასთან განაცხადა. მან ისაუბრა რუსეთის მიერ საქართველოსთან პირდაპირი ფრენების აღდგენის კონტექსტში და განაცხადა, რომ რეაქციები, რომელიც საქართველოს ხელისუფლების ზოგიერთი წარმომადგენლისგან ნახეს, შეშფოთების საგანია, რაც ქმნის „გარკვეულ სივრცეს“, რომ რუსეთმა სანქციებს გვერდი აუაროს. „ჩვენი პოზიცია შეშფოთების პოზიციაა. მოსკოვისგან ასეთი გადაწყვეტილება არ მოგვწონს, მაგრამ ეს ცალმხრივი გადაწყვეტილება იყო. შეშფოთება უფრო რეაქციებს ეხება, რომლებიც თქვენი პარლამენტის ზოგიერთი წევრისგან, მთავრობის წევრისგან ვნახეთ, ვინაიდან, კრიტიკული მომენტია, რომ უკრაინის მხარდაჭერა გავაგრძელოთ, რაც პრიორიტეტია ყველა ჩვენგანისთვის და პრიორიტეტი უნდა იყოს ყველა ჩვენი პარტნიორისთვისაც. მაგრამ ასევე იმიტომ, რომ გარკვეულ სივრცეს ქმნის რუსეთის მიერ სანქციებისთვის პოტენციური გვერდის ავლისთვის. თქვენ ხელისუფლებას ველაპარაკებოდით იმ სამუშაოზე, რომელსაც აკეთებენ სანქციების გვერდის ავლის არდასაშვებად, კარგ სამუშაოს აკეთებენ ბევრ ასპექტში, მაგრამ რეაქციები, რომლებიც ვნახეთ, როგორც მინიმუმ ჩრდილს ქმნის, იმ პოტენციალისთვის, რომ რუსეთი რაღაც სივრცეს იპოვის აქ, რათა სანქციებს გვერდი აუაროს. საკმაოდ მკაფიონი ვიყავით, რომ ეს არ უნდა მოხდეს და თქვენ ხელისუფლებას მოვუწოდეთ, რომ შესაბამისი ზომები მიიღოს, რათა ეს არ დაუშვას”, - განაცხადა კოლომინამ. ipn

უკრაინის მართლმადიდებელი ეკლესია [არ ექვემდებარება რუსეთის მართლმადიდებელ ეკლესიას] ახალ კალენდარზე გადადის, განაცხადა კიევისა და მთელი უკრაინის მიტროპოლიტმა ეპიფანემ. უკრაინული მედიის ცნობით, გადაწყვეტილება ეკლესიის ხელმძღვანელობამ დღეს, 24 მაისს, ოფიციალურად მიიღო. შესაბამისად, ეკლესია დღესასწაულებს ახალი თარიღით აღნიშნავს – მაგალითად, შობა 7 იანვრის ნაცვლად 25 დეკემბერს აღინიშნება. აქამდე უკრაინის მართლმადიდებელი ეკლესია იულიუსის კალენდარს იყენებდა, რომელიც გრიგორიანულს 13 დღით უსწრებს. „ამ რეფორმის სისრულეში მოყვანა პირველ რიგში მოგვცემს საშუალებას, გადავიდეთ უფრო ზუსტ კალენდარზე და მომავალში თავიდან ავირიდოთ უძრავი დღესასწაულების თანდათანობით გადაწევა. მართალია, ამ გზაზე რჩება რიგი სირთულეები, მაგრამ დარწმუნებული ვარ, უფლის დახმარებით მათ მოვაგვარებთ“, – ამბობდა მიტროპოლიტი ეპიფანე. ნეტგაზეთი

ქართული ოცნება და ეჭვი გვაქვს მათთან პირდაპირ უკვე შეზრდილი რუსეთის სპეც-სამსახურები, ქართულ საზოგადოებაზე ახალ ფსიქოლოგიურ ოპერაციას ახორციელებენ აქტიური საინფორმაციო ოპერაციის/ღონისძიების ფორმით, - ამის შესახებ აცხადებს პარტია "საქართველოსთვის" პოლიტიკური მდივანი კახაბერ ქემოკლიძე. მისი თქმით, მნიშვნელოვანია, რუსების მიერ ამ საკმაოდ “ჭკვიანურად” დაგეგმილ ფსიქო-საინფორმაციო ოპერაციას ქართულმა საზოგადოებამ ადეკვატურად უპასუხოს. "მათ მიერ შემუშავებულია და როგორც ჩანს პროპაგანდის ყველა აქტიურ ინსტრუმენტსს “ჩაშლილი” აქვს, რომ განავითარონ ახალი სტრატეგიული ნარატივი/გზავნილი თითქოსდა “რუსეთმა აფხეთის და ცხინვალის რეგიონის მიმართ ყურადღება გაანელა და გამოთქვამს მზადყოფნას, რომ საქართველოსთვის გახსნილი ევროპული პერსპექტივის ნაცვლად მას ოკუპ. რეგიონებთან ურთიერთობების აღდგენაში უნდა დაეხმაროს”. - ჩემი დაკვირვებით აღნიშნული სტრატეგიული ნარატივის ფორმირება ბოლო რამდენიმე თვეა მიმდინარეობდა, მაგრამ უშუალო გზავნილების ფორმირების ფაზა სულ რამდენიმე დღეა რაც აქტიურად დაიწყო. - სინამდვილეში შემდეგი მოცემულობა გვაქვს: უკრაინის ომში აბსოლუტური კრახისკენ (სტრატეგიულ-ტაქტიკურ დონეზე) განწირული რუსეთი ცდილობს საქართველოს ხელისუფლების და როგორც ჩანს მასში, სხვადასხვა დონეზე ჩანერგილი აგენტურის მეშვეობით ქვეყნისთვის შექმნილი გეოპოლიტიკური ფანჯრის ხელოვნურ საბოტირებას! - აფხაზეთის და ცხინვალის რეგიონის მიმართ საქართველოს მოსახლეობის ცრუ სენტიმენტალიზება მიზნად ისახავს რუსეთის მიერ საქართველოს (მათ შორის ოკუპ. რეგიონების) საკუთარი გავლენის სფეროში გრძელვადიანად ან საბოლოოდ “ჩაბეტონებას”!!! -საეთაშორისო და ადგილობრივი მაგალითები, როდესაც - ა) კონსტიტუციით ნეიტრალურ ქვეყანას მოლდოვას ათწლეულების განმავლობაში დნესტნისპირეთის კუთხით რუსეთის მეშვეობით ნულოვანი პროგრესი ჰქონდა (მაშინაც კი როდესაც მოლდოვა პრო-რუსული ხელისუფლების მმართველობაში იყო), - ბ) 2014 წელს როდესაც უკრაინას ნატოში გაწევრიანების ამბიცია საერთოდ არ ჰქონია და ტყვიის გასროლის გარეშე მაინც დაკარგა ყირიმი და მიიღო 8 წლიანი განგრძობადი ომი საკუთარ ორ რეგიონში, - გ) საქართველოსთან მიმართებაში როდესაც ოცნების “დაბალანსებული” პოლიტიკის ფონზე აგრესიული ბორდერიზაცია და სხვა მძიმე ფაქტები ხორციელდებოდა ჩვენს წინააღმდეგ, - დ) მათთდამი სრულ მორჩილებაში მყოფ დე ფაქტო აფხაზებს სხვადასხვა ტერიტორიულ სეგმენტებს უბრალოდ ართმევენ და - ე) სულ ახლახან მათი სტრატეგიული მოკავშირე სომხეთი უბრალოდ “გაყიდეს” მოწმობს იმას, რომ რუსეთს არათუ ჩვენი ტერიტორიული მთლიანობის აღდგენა სურს არამედ პირიქით!!! - რეალურად აფხაზეთში ფსბ-ს და გრუ-ს დანაყოფების მიერ დღემდე ხორციელდება აქტიური ოპერატიული ღონისძიებების გატარება სამეგროლოსა და სვანეთში სეპარატისტული და სესეციური განწყობების გასაღვივებლად. რუსეთის უსაფთხოების სამსახურების მიზანი, რომ საქართველო უნდა დაიყოს ეთნო-ტერიტორიულ ანკლავებად არ შეცვლილა და ისინი მათ სტრატეგიულ გეგმას სხვადასხვა ტემპით მიუყვებიან… რუსეთს ეშინია საქართველოს (ისევე როგორც უკრაინის და მოლდოვის) ევროკავშირში გაწევრიანება, რადგან ყველა რუსი პოლიტ. ელიტის წარმომადგენელი ხვდება, რომ ნებისმიერი კონფლიქტის მშვიდობიანად დასრულების წარმატებული ფორმულა ევროკავშირში სრული ინტეგრირებაა (ბალკანეთის მაგალითი). ეს კი მათ სტრატეგიულ ინტერესს პირდაპირ ეწინააღმდეგება. მათ სჭირდებათ “გაწელილი კონფლიქტების” დუღილის სხვადასხვა ტემპერატურაზე შენარჩუნება. ამას აკეთებდნენ ბოლო 30 წელი და ამ კუთხით მათი სტრატეგიული მიზანი არ შეცვლილა… ! ამიტომ მნიშვნელოვანია, რუსების მიერ ამ საკმაოდ “ჭკვიანურად” დაგეგმილ ფსიქო-საინფორმაციო ოპერაციას ქართულმა საზოგადოებამ (მედია, ანალიტ. ცენტრები, სოც. ქსელების აქტიური მომხმარებლები, სასწავლო დაწესებულებები, პროფესიული წრეები და ა.შ.) ადეკვატურად უპასუხოს. ჩვენ ვერ ვათვითცნობიერებთ ოცნების უკვე სრულად რუსული პროპაგანდის ძალას საშუალო და გრძელვადიან პერსპექტივაში. უკვე არახალია, რომ ნებისმიერი მცირე “სხვა პრიზმაში” გაკეთებული განცხადება აქტიურად გამოიყენება არა მარტო განმცხადებლის ინდივიდუალურ დონეზე პიარაულად დაზიანების მიზნით, არამედ მთლიანად ინტეგრირებულია ანტი-დასავლური და პრო-რუსული ფსიქო-საინფორმაციო ოპერაციის დიდ ჯაჭვში… რუსები “master-mind”-ები არიან “სასარგებლო იდიოტების”, როგორც სოციალურ-პროპაგანდისტული ფენომენის აქტიურ უტილიზებაში… ! ეს კრიტიკულ დონეზეა გასათვალისწინებელი ყველა შიდა თუ გარე აქტორის (საქართველოს მოქალაქე, რიგითი ჟურნალისტი, დიპლომატი, ცნობადი სახე, ქვეყანაში მცხოვრები უცხოელი და ა.შ.) მიერ დღეს. ვინც ამას დღეს კვლავ აკეთებს ან მომავალში გააკეთებს, ან თავად არის “გავლენის აგენტი”, ან უბრალოდ კომპეტენცია და ინტელექტუალური დიაპაზონი არ ჰყოფნის, რომ შექმნილი საინფორმაციო და პროპაგანდისტული კონტექსტი გაითვალისწინოს…", - აცხადებს კახაბერ ქემოკლიძე.

დათა თავაძის მიერ ლატვიაში, თეატრში „Dailes”, დადგმული „კავკასიური ცარცის წრე” მოხვდა ყოველწლიური, ლატვიის საზოგადოებრივი მედიის ჯილდოს 5 ნომინანტს შორის. სპექტაკლის სცენოგრაფია ეკუთვნის ქეთი ნადიბაიძეს, ხოლო მუსიკალური გაფორმება — ნიკა ფასურს. სპექტაკლის პრემიერა შედგა 2023 წლის 24 მარტს. ფოტო გარეკანზე: Dailes teātris ნეტგაზეთი

რუსეთის დუმამ „რუსეთის ფედერაციიდან გასვლისა და რუსეთის ფედერაციაში შესვლის წესის შესახებ“ კანონში ცვლილება მიიღო. ქვეყნის პარლამენტმა მესამე და საბოლოო მოსმენით დაამტკიცა კანონი, რომლის მიხედვითაც წვევამდელები საზღვარგარეთის პასპორტებს პოლიციის მიგრაციის დეპარტამენტს გადასცემენ. ცვლილებების თანახმად, სამხედრო სამსახურში გაწვეულმა ან ალტერნატიულ სამოქალაქო სამსახურში გაგზავნილმა მოქალაქეებმა პასპორტები შინაგან საქმეთა სამინისტროს მიგრაციის დეპარტამენტს უნდა ჩააბარონ. კანონი გავრცელდება 18-დან 27 წლამდე ასაკის მამაკაცებზე (2024 წლიდან გაწვევის ასაკობრივი ზღვარი 30 წლამდე გაიზრდება), რომლებიც არ არიან რეზერვში და რომლებზეც სამსახურში გაწვევის შესახებ გადაწყვეტილება კოლეგიის პროექტმა მიიღო. პასპორტების დაბრუნება მომსახურების დასრულების შემდეგ მოხდება. იურისტები აღნიშნავენ, რომ ცვლილებები გავლენას არ მოახდენს 2023 წლის შემოდგომის პროექტზე, რადგან ისინი ძალაში ოფიციალური გამოქვეყნებიდან მხოლოდ 180 დღის შემდეგ შევა. ავტორი: ეკა დარჩიაშვილი

საერთაშორისო ორგანიზაცია Freedom House-ის ანგარიშის მიხედვით, საქართველოში დემოკრატიის ხარისხი კიდევ გაუარესდა. 2023 წელს, წინა წლის მაჩვენებელთან შედარებით, საქართველოს შედეგი ერთი ქულით გაუარესდა და 34 ქულა შეადგინა. ქვეყნის ინდექსი მედიის თავისუფლების შეზღუდვის ხარჯზე შემცირდა: ანგარიშის მიხედვით, მედიის საჯარო ინფორმაციაზე ხელმისაწვდომობის დაბალი ხარისხი არის კიდევ ერთი საგანგაშო ტენდენცია საქართველოში, რომელიც აფერხებს მმართველი ორგანოების ანგარიშვალდებულებას და გაშუქების შესაძლებლობას მედიისთვის. საერთაშორისო ორგანიზაციის ანგარიშში საქართველო კვლავ ჰიბრიდული რეჟიმის მქონე ქვეყნების სიაშია. publika

26 მაისს საქართველოში დამოუკიდებლობის დღე აღინიშნება. ქვეყნის სხვადასხვა სახელმწიფო უწყება ამ დღისთვის 16 ქალაქში ღონისძიებებს მართავს. დამოუკიდებლობის დღის აღნიშვნა დაიწყება დილის 11:00 საათზე - საქართველოს 10 რეგიონში და თბილისშიც წვევამდელების ფიცის დადების ცერემონია გაიმართება. თბილისის პროგრამა მარნეულის პროგრამა მესტიის პროგრამა მცხეთის პროგრამა ოზურგეთის პროგრამა რუსთავის პროგრამა ტყიბულის პროგრამა ფოთის პროგრამა ქუთაისის პროგრამა ამბროლაურის პროგრამა ახალციხის პროგრამა ახალქალაქის პროგრამა ბათუმის პროგრამა გორის პროგრამა ზუგდიდის პროგრამა თელავის პროგრამა 26 მაისს საქართველო დამოუკიდებლობის დღეს აღნიშნავს. 1918 წლის 26 მაისს საქართველოს ეროვნულმა საბჭომ ნოე ჟორდანიას ხელმძღვანელობით, დამოუკიდებლობის აქტი მიიღო თბილისში, გოლოვინის პროსპექტზე, ახლანდელ რუსთაველის გამზირზე მდებარე კავკასიის მეფისნაცვლის ყოფილ რეზიდენციაში, სადაც დღეს მოსწავლე-ახალგაზრდობის სასახლეა. რუსეთისგან დამოუკიდებელმა საქართველოს პირველმა რესპუბლიკამ არსებობა 1921 წლის თებერვალში შეწყვიტა, საბჭოთა რუსეთის სამხედრო აგრესიის და ოკუპაციის შედეგად. საქართველომ დამოუკიდებლობა 1991 წლის 9 აპრილს აღიდგინა. რადიო თავისუფლება

უკრაინის პივდენის (სამხრეთის) პორტმა შეწყვიტა მუშაობა, რადგან რუსეთი ხომალდებს არ აძლევს იქ შესვლის საშუალებას, რითაც, ფაქტობრივად, ამ პორტს თიშავს ხელშეკრულებიდან, რომელიც მიმართულია შავი ზღვის გავლით მარცვლეულის უსაფრთხოდ გადაზიდვაზე, განაცხადა უკრაინის წარმომადგენელმა 23 მაისს. შავი ზღვის მარცვლეულის შეთანხმებას რუსეთმა და უკრაინამ გასული წლის ივლისში მოაწერეს ხელი. შემდეგ, წინა კვირაში, შეთანხმება კიდევ ორი თვით გახანგრძლივდა. ხელშეკრულების მიზანია, ომის პირობებში უსაფრთხოდ განხორციელდეს მარცვლეულისა და საკვები პროდუქტების ექსპორტი უკრაინის სამი პორტიდან - ოდესიდან, ჩორნომორსკიდან და პივდენიდან. რადიო თავისუფლება

გერმანიის ხელისუფლებამ დააკმაყოფილა თავშესაფრის მინიჭების თხოვნა რუსეთის 55 მოქალაქისგან, რომლებიც სამხედრო მობილიზაციას გაექცნენ. უარი ეთქვა 88 მსგავს განაცხადს, კიდევ 1500-ზე მეტი განაცხადი განხილვის პროცესშია - ამის შესახებ გერმანიის შინაგან საქმეთა სამინისტროს მონაცემებზე დაყრდნობით იუწყება Redaktions Netzwerk Deutschland-ი. უკრაინაში რუსეთის შეჭრიდან 2023 წლის აპრილის ბოლომდე თავშესაფრის გამოყოფის თხოვნით გერმანიას მიმართა რუსეთის 2485-მა მოქალაქემ, რომლებიც მობილიზაციის საფრთხეს გაექცნენ. აპრილის ბოლოსთვის გადაწყვეტილებები მიღებულ იქნა 814 განაცხადზე. როგორც რუსეთის 671 მოქალაქეს გერმანიის ხელისუფლებამ უთხრა, მათი განაცხადები ევროკავშირის იმ სახელმწიფოებმა უნდა განიხილონ, რომელთაგანაც ეს მოქალაქეები პირველად შევიდნენ ბლოკში. გასული წლის სექტემბერში - მას მერე, რაც რუსეთში მობილიზაცია გამოცხადდა - გერმანიის რამდენიმე მინისტრმა გამოაცხადა, რომ ქვეყანა განიხილავს მობილიზაციისგან გაქცეული რუსეთის მოქალაქეებისთვის დროებითი თავშესაფრის გამოყოფას. "დეზერტირები, რომლებსაც სერიოზული რეპრესიები ემუქრება, შეძლებენ გერმანიაში საერთაშორისო დაცვის მოპოვებას" - განაცხადა მაშინ შინაგან საქმეთა მინისტრმა, ნენსი ფეზერმა. პარალელურად, ევროკავშირის რამდენიმე ქვეყანა - მაგალითად ჩეხეთი, ესტონეთი და ლატვია - გამოდიოდა ამგვარი ინიციატივის წინააღმდეგ. ჩეხეთის საგარეო საქმეთა მინისტრი, იან ლიპავსკი აცხადებდა, რომ სახელმწიფოს კანონიერი მოთხოვნების შესრულებაზე უარის თქმა არ წარმოადგენს ჰუმანიტარული ვიზის გაცემის საფუძველს. რადიო თავისუფლება

დიდი ბრიტანეთის თავდაცვის სამინისტროს დაზვერვის მონაცემებით, რუსულ არმიაში დისციპლინის მხრივ არსებული ვითარება კიდევ უფრო გაუარესდა. ბრიტანეთის დაზვერვა მისთვის სანდო, დამოუკიდებელი რუსი ჟურნალისტების კვლევის საფუძველზე წერს, რომ 2023 წლის ხუთ თვეში რუსეთის სამხედრო სასამართლოებმა განიხილეს სამხედრო ნაწილის თვითნებურად დატოვების 1053 საქმე, რაც 2022 წლის მთლიან მონაცემებზე მეტია. ამასთან, დამნაშავედ აღიარებულთა უმრავლესობას პირობითი სასჯელი აქვს, რაც იმას ნიშნავს, რომ შესაძლოა, უკრაინაში საომრად მოხვდნენ. გაერთიანებული სამეფოს თავდაცვის სამინისტროს დაზვერვის თანახმად, რუსი სამხედროები უკრაინაში ოპერაციის დაწყებიდან, ყველა საშუალებით ცდილობდნენ დისციპლინის შენარჩუნებას, თუმცა, პრობლემა გამწვავდა 2022 წლის სექტემბერში გამოცხადებული „ნაწილობრივი მობილიზაციის“ შემდეგ. ბრიტანეთის სამხედრო დაზვერვის შეფასებით, რუსეთის თავდაცვის სამინისტრო დისციპლინის უზრუნველსაყოფად ფოკუსირებული იყო პატრიოტულ აღზრდაზე და არა ჯარისკაცების იმედგაცრუების რეალური მიზეზების დაძლევაზე. რადიო თავისუფლება

ეს მშვიდობის პოლიტიკა კი არა, ეშმაკთან კონტრაქტია, რუსეთი ოცნების ხელისუფლებას სულს წაართმევს, - ბერდია სიჭინავა - პარტია „საქართველოსთვის" აღმასრულებელი მდივანი გადაცემაში "რეაქცია". 349021695_990981662265471_1034419452118372918_n.mp4

რუსული კერძო სამხედრო დაჯგუფების, „ვაგნერის“ ხელმძღვანელი, ევგენი პრიგოჟინი აცხადებს, რომ უკრაინელებს მსოფლიოში ერთ-ერთი უძლიერესი არმია ჰყავთ. „შემიძლია საკუთარი გამოცდილებიდან გამომდინარე ვიმსჯელო, ვიცი, როგორ იბრძვიან სხვადასხვა ქვეყნები. დღეს „ვაგნერი“ არის საუკეთესო არმია მსოფლიოში და ამის შემდეგ, რა თქმა უნდა, იმისთვის, რომ პოლიტიკურად სწორი ვიყო, უნდა ვთქვა, რომ ეს უნდა იყოს რუსული არმია, მაგრამ მიმაჩნია, რომ უკრაინელები დღეს ერთ-ერთი უძლიერესი არმიაა მსოფლიოში“, - აღნიშნა პრიგოჟინმა. მისი თქმით, უკრაინელები არიან „უაღრესად ორგანიზებულები და მაღალკვალიფიციურები და მათი დაზვერვა უმაღლეს დონეზეა. „მათ შეუძლიათ ნებისმიერი სამხედრო სისტემა, საბჭოთა თუ ნატო-სი, თანაბარი წარმატებით მართონ“, - აღნიშნა პროგოჟინმა. ინტერპრესნიუსი

კონტრშეტევა მალე დაიწყება, იარაღის საჭირო მინიმუმი გვაქვს. ამის შესახებ უკრაინის დაზვერვის მთავარი სამმართველოს ხელმძღვანელმა კირილო ბუდანოვმა იაპონურ ტელეარხ NHK-სთან ინტერვიუში განაცხადა. “ბევრი მშვიდობიანი მოქალაქე ჯერ კიდევ რუსეთის ოკუპაციის ქვეშ იმყოფება, დროის დაკარგვა აღარ შეიძლება. შეიარაღების საჭირო მინიმუმი უკვე გვაქვს. მხოლოდ იმის თქმა შეიძლება, რომ ეს [კონტრშეტევა] მალე დაიწყება”, - განაცხადა ბუდანოვმა. ამავდროულად მან აღნიშნა, რომ ტერიტორიის ოკუპანტებისგან გასათავისუფლებლად მეტი იარაღია საჭირო, კერძოდ კი დასავლური ავიაგამანადგურებლები. “რუსეთი უნდა გავაგდოთ ჩვენი ტერიტორიიდან. მთელი ჩვენი ძალა და საშუალებები უნდა გამოვიყენოთ ამ მიზნის მისაღწევად. იარაღისა და საბრძოლო მასალის დიდი მარაგები გვჭირდება ოპერაციის წარმატებით გასაგრძელებლად”, - აღნიშნა ბუდანოვმა. პალიტრანიუსი

გერმანიამ უკრაინის შეიარაღებულ ძალებს სამხედრო დახმარების კიდევ ერთი პაკეტი გადასცა, - ინფორმაციას უკრაინული მედია გერმანიის მთავრობაზე დაყრდნობით ავრცელებს. გერმანიის მთავრობაში აცხადებენ, რომ უკრაინას გადაეცა TRML-4D ტიპის საჰაერო სათვალთვალო რადარი, Biber-ის ტიპის ხიდის გამდები ორი ტანკი, Vector -ის ტიპის სადაზვერვო დრონები, დრონების საწინააღმდეგო სისტემები, სასაზღვრო ავტომობილები და Zetros-ის სატვირთო მანქანები. გერმანიის კანცლერმა, ოლაფ შოლცმა 14 მაისს უკრაინისთვის სამხედრო დახმარების ახალი პაკეტი გამოაცხადა, რომლის ჯამური ღირებულება 2.7 მილიარდ ევროს შეადგენს. მისი თქმით, დახმარების პაკეტში შედიოდა Leopard-1 საბრძოლო ტანკები, Marder-ის ქვეითთა საბრძოლო მანქანები და Iris-T ტიპის საჰაერო თავდაცვის სისტემები. გერმანიის მთავრობაში განმარტავენ, რომ ქვეყანამ უკრაინას სრულმასშტაბიანი შეჭრის დაწყებიდან 17 მილიარდი ევროს ოდენობის დახმარება გაუწია. იპნ

სლოვენიის პარლამენტმა 1932-1933 წლების ჰოლოდომორი უკრაინელი ხალხის გენოციდად აღიარა. მედიის ინფორმაციით, გადაწყვეტილებას მხარი 67-მა დეპუტატმა დაუჭირა, 8 კი წინააღმდეგი წავიდა. სლოვენიის პარლამენტის მიერ ჰოლოდომორის უკრაინელი ხალხის გენოციდად აღიარებას უკრაინის პრეზიდენტი, ვოლოდიმირ ზელენსკი გამოეხმაურა და სლოვენიელ პარლამენტარებს მადლობა გადაუხადა. „ისტორიული სამართლიანობის აღდგენისკენ მოწოდებული სახელმწიფოების საერთაშორისო კოალიცია აგრძელებს გაძლიერებას. ერთად სიმართლისთვის და შესაბამისად პასუხისმგებლობის დაკისრებისთვის!“- დაწერა ზელენსკიმ „ტვიტერზე“. 17 მაისს, საფრანგეთის პარლამენტის ზედა პალატამ 1932-1933 წლების ჰოლოდომორი უკრაინელი ხალხის გენოციდად აღიარა. მარტში ასეთი გადაწყვეტილება ისლანდიის პარლამენტმა მიიღო. იმავე თვეში ბელგიის წარმომადგენელთა პალატამ 1932-1933 წლების ჰოლოდომორი უკრაინელი ხალხის გენოციდად აღიარა. მიმდინარე წლის თებერვალში, იტალიის პრემიერ-მინისტრმა ჯორჯია მელონიმ პრეზიდენტ ვოლოდიმირ ზელენსკისთან საუბარში განაცხადა, რომ იტალიის პარლამენტის შესაბამისმა კომიტეტმა ჰოლოდომორი უკრაინელი ხალხის გენოციდად აღიარა. პალიტრა

26 მაისი, საქართველოს დამოუკიდებლობის დღე, ფიცის დადების ცერემონიასთან ერთად, რუსთაველის გამზირზე სხვადასხვა ღონისძიებით აღინიშნება, რომლის თემაც იქნება „ეს დღე ჩვენია“. როგორც „ინტერპრესნიუსს“ მთავრობის ადმინისტრაციაში განუცხადეს, წელს პირველად, ფიცს წვევამდელები თბილისსა და 10 ქალაქში დადებენ. ამასთან, მათივე ინფორმაციით, რუსთაველის გამზირზე მოეწყობა სხვადასხვა სივრცეები, მათ შორის შემეცნებითი, გასართობი, სპორტული, საბავშვო. მოეწყობა ლიტერატურული კაფეები, სადაც მწერლები და პოეტები იქნებიან წარმოდგენილები. მთელი დღის განმავლობაში, რუსთაველის გამზირზე ასევე მოეწყობა სტარტაპერების პროდუქციის გამოფენა-გაყიდვა. რაც შეეხება სხვა მუნიციპალიტეტებს, მთავრობის ადმინისტრაციის ინფორმაციით, 15 ქალაქში სხვადასხვა უწყებების სტენდები იქნება წარმოდგენილი. მათ შორის, შინაგან საქმეთა სამინისტრო საკუთარ კუთხეს აჭარაში წარმოადგენს. ეკონომიკისა და მდგრადი განვითარების სამინისტრო, ტურიზმის ეროვნულ ადმინისტრაციასთან ერთად კი ზუგდიდსა და თელავში იქნება წარმოდგენილი. 17:10 საათზე კი, საქართველოს დამოუკიდებლობის გამოცხადების დროს, თავისუფლების მოედანზე 300 ბავშვი საქართველოს ჰიმნს შეასრულებს. დამოუკიდებლობის დღისადმი მიძღვნილი ღონისძიებები 20:00 საათზე, პირველი რესპუბლიკის მოედანზე, გალა -კონცერტით დასრულდება. იხილეთ 26 მაისის ღონისძიების პროგრამა. იპნ

რუსული კერძო სამხედრო კომპანია „ვაგნერის“ დამფუძნებელი ევგენი პრიგოჟინი აცხადებს, რომ რუსეთის მიერ უკრაინის „დენაციფიკაციისა და დემილიტარიზაციისთვის“ დაწყებულმა „სპეციალურმა სამხედრო ოპერაციამ“ მოიტანა სულ სხვა შედეგი, ვიდრე ეს მოსკოვს ეგონა. ომის არაერთ დანაშაულში ეჭვმიტანილი „ვაგნერის“ დამფუძნებელი ამბობს, რომ უკრაინის "დენაციფიკაციამ" ის გამოიწვია, რომ უკრაინა მთელმა მსოფლიომ გაიცნო, "დემილიტარიზაციის" შედეგი კი ის არის, რომ დღეს უკრაინას ერთ-ერთი უძლიერესი არმია ჰყავს. პრიგოჟინმა ვრცელი ინტერვიუ მისცა უკრაინაში დაბადებულ პრორუს აქტივისტს და პოლიტტექნოლოგს, კონსტანტინ დოლგოვს. როგორც „ვაგნერის“ დამფუძნებელმა თქვა, უკრაინაში „თავხედურად მივიდნენ“ და ნაცისტების ძებნაში მთელ ტერიტორიას "ჩექმით გადაუარეს", შემდეგ კიევს მიუახლოვდნენ, მაგრამ „ჩაისვარეს“ და უკან დაიხიეს და იგივე მოხდა ხერსონის და სხვა მიმართულებებითაც. პრიგოჟინის განცხადებით, „დენაციფიკაციით“ უკრაინა აქციეს ნაციად, რომელიც ცნობილი გახდა მთელ მსოფლიოში. რაც შეეხება „დემილიტარიზაციას“, პრიგოჟინის თქმით, თუ „სპეცოპერაციის“ დაწყებამდე უკრაინას პირობითად ჰქონდა 500 ტანკი, დღეს აქვს 5 000 და თუ ბრძოლა 20 000-ს ადამიანს შეეძლო, დღეს შეუძლია 400 000-ს. „ვაგნერის“ დამფუძნებლის განცხადებით, შედეგი საპირისპიროა - არა დემილიტარიზაცია, არამედ მილიტარიზაცია. პრიგოჟინის თქმით, დღეს უკრაინელებს ჰყავთ ერთ-ერთი უძლიერესი, კარგად ორგანიზებული არმია, მომზადების მაღალი დონით, კარგი დაზვერვით, სხვადასხვა შეიარაღებით და ერთნაირი წარმატებით იყენებენ როგორც საბჭოთა, ისე ნატოს ნებისმიერ სისტემას. რადიო თავისუფლება

კახეთში, საგარეჯოს მუნიციპალიტეტში ქალის ცხედარი იპოვეს. დაღუპული უზბეკეთის მოქალაქეა. როგორც „ნეტგაზეთს“ საქართველოს შინაგან საქმეთა სამინისტროში განუცხადეს, მომხდარზე გამოძიება საქართველოს სისხლის სამართლის კოდექსის 108-ე მუხლით დაიწყო, რაც განზრახ მკვლელობას გულისხმობს. არსებული ინფორმაციით განზრახ მვკლელობის ბრალდებით დაკავებულია ერთი პირი. ნეტგაზეთი

საქართველოს მთავრობის დადგენილებაში ცვლილება შევიდა და იშვიათი დაავადებების ამბულატორიული მეთვალყურეობის ნუსხას აქონდროპლაზია დაემატა. ცვლილება „2023 წლის ჯანმრთელობის დაცვის სახელმწიფო პროგრამების დამტკიცების შესახებ“ დადგენილებაში შევიდა. როგორც მოგვიანებით აქონდროპლაზიის დიაგნოზის მქონე ბავშვის დედამ, მაკუნა გოჩიაშვილმა დააზუსტა – „პრემიერმა ხელი მოაწერა დადგენილებას, რომ აქონდროპლაზიის მქონე ადამიანებზე სახელმწიფო იღებს პასუხისმგებლობას პროტოკოლით გათვალისწინებული მკურნალობის უზრუნველყოფაზე. ეს გულისხმობს წამლის გარდა სხვა, ყველა საჭირო პროცედურასა თუ თერაპიას. აქამდე აქონდროპლაზია არ შედიოდა ამ სიაში სხვა იშვიათი დაავადებებისგან განსხვავებით”. აქონდროპლაციის დიაგნოზის მქონე ბავშების მშობლებმა კანცელარიასთან 24-საათიანი პროტესტი, რომელიც თითქმის 20 დღე გრძელდებოდა, 5 მაისს შეწყვიტეს. მშობლები ჩართულები არიან სამუშაო ჯგუფში და მიიღეს დაპირება, რომ პროტოკოლი ივნისის დასაწყისში იქნება უკვე შემუშავებული. მშობლების მოთხოვნაა, სახელმწიფომ საქართველოში შემოიტანოს და დააფინანსოს ბავშვებისთვის აუცილებელი პრეპარატი Voxzogo, რომელიც ავტორიზებულია აშშ-ის წამლისა და საკვების ადმინისტრაციის (FDA), ასევე ევროპის წამლის სააგენტოს (EMA) მიერ. პუბლიკა