ტერორისტულ რუსეთს, დღეს აქვს ორჯერ უფრო მეტი გავლენა ჩვენს ეკონომიკაზე, ვიდრე 2 წლის წინ ჰქონდა - ორიოდ დღის წინ გამოქვეყნდა საგარეო ვაჭრობის მაჩვენებლები, რომელიც კიდევ ერთხელ ადასტურებს თუ რამდენად დამოკიდებული ხდება ჩვენი ქვეყნის ეკონომიკა რუსეთზე, - ამის შესახებ სოციალურ ქსელში პარტია "საქართველოსთვის" წევრი, დეპუტატი ბექა ლილუაშვილი წერს.
მისივე განცხადებით, ეს ხელისუფლება უკიდურესად საშიში გახდა, როგორც სახელმწიფოებრიობისთვის, ასევე ხალხის კეთილდღეობისთვისაც.
"როგორც ჩანს, რუსეთის განზრახვა, რბილი ძალის განხორციელებით, ეკონომიკურად სრულად ჩაგვიბას სისრულეში მოდის და ამ მტრულ განზრახვას - მოსახლეობის კეთილდღეობის შირმის და ნარატივის გავრცელებით, ეს ხელისუფლებაც ხელს უწყობს! ქვემოთ ფოტოზე, წარმოდგენილია თუ როგორ გაიზარდა (გაორმაგდა) ჩვენი ქვეყნის ეკონომიკის პირდაპირი დამოკიდებულება რუსეთზე, რაც წარმოადგენს ჩვენი სახელმწიფოს დამოუკიდებლობისა და სუვერენიტეტზე გავლენის დამატებით მექანიზმს რუსეთის ხელში. ამ მექანიზმის შედეგები ყველას გვახსოვს. ყველას უნდა გვესმოდეს, რომ მას შემდეგ, რაც რუსეთმა ჩვენი მოქალაქეები სატვირთო თვითმფრინავებით გამოაგდო იქედან, რუსეთი კიარ "გაკეთილშობილდა", როგორც ამას ღარიბაშვილი და ოცნება ყიდის, არამედ მისი აგრესიის შედეგებით უდანაშაულო მოსახლეობის, ქალების და ბავშვების სისხლს დღემდე ღვრის უკრაინაში. "კეთილდღეობის" ნარატივი, რომლითაც ხელისუფლება ცდილობს სურათზე ნაჩვენები მოცემულობა გააპრავოს - ტყუილია. "აყვავებული" ქვეყნიდან ქართველები არ უნდა გარბოდნენ და რუსეთის მოქალაქეების არ უნდა გულაობდნენ.
სამწუხაროდ, ეს ხელისუფლება უკიდურესად საშიში გახდა სახელმწიფოებრიობისთვისაც და ხალხის კეთილდღეობისთვისაც.", - წერს ლილუაშვილი.
2023 წლის გასული 5 თვის მდგომარეობით, რუსეთში წყნარი ღვინოების მიწოდების კუთხით საქართველო ლიდერობს. ამ მაჩვენებელში საქართველომ იტალიას გაუსწრო.
ინფორმაციას ამის შესახებ, რუსეთის საბაჟო ორგანოებზე დაყრდნობით, რუსული გამოცემა „კომერსანტი“ ავრცელებს.
რუსეთში ქართული ღვინის იმპორტი 63%-ით გაიზარდა და 24 მილიონ ლიტრს გადააჭარბა. ამავე დროს რუსეთში იტალიური ღვინის 23,4 მილიონი ლიტრი შემოიტანეს - მიწოდება 31%-ით არის გაზრდილი. გაზრდილია იმპორტი სხვა ქვეყნებიდანაც - ესპანეთი, საფრანგეთი და პორტუგალია.
ექსპერტების აზრით, საქართველოდან ღვინის მიწოდების ზრდა განპირობებულია „გადახდასთან და ლოგისტიკასთან დაკავშირებული პრობლემების არარსებობით“, და ასევე იმ კონტრაქტებით, რომლებსაც რუსული სავაჭრო ქსელები პირდაპირ მწარმოებლებთან დებენ. ასევე ქართულ ღვინოზე ნულოვანი საიმპორტო ბაჟი ვრცელდება და მათი ფასი შედარებით სტაბილურია.
უკრაინის თავდაცვის მინისტრის მოადგილის, ანა მალიარის განცხადებით, რუსული ძალები უკრაინელებს მნიშვნელოვან წინააღმდეგობას უწევენ, რის გამოც, მათ მძიმე ბრძოლა ელით.
„უნდა გვესმოდეს, რომ მტერი ადვილად არ დანებდება. უნდა განვეწყოთ იმისთვის, რომ ეს იქნება ძალიან მძიმე ბრძოლა. რეალურად, ეს არის ის, რაც ახლა ხდება“, - აღნიშნა თავდაცვის მინისტრის მოადგილემ.
მისივე თქმით, უკრაინელ სამხედროებს უჭირთ სამხრეთით წინსვლა მტრის წინააღმდეგობისა და ნაღმების გამო. ამავე დროს, ანა მალიარმა ხაზი გაუსვა, რომ უკრაინის დამცველები „მოძრაობენ ისე, როგორც უნდა მოძრაობდნენ და ყველაზე დიდი შედეგები ჯერ კიდევ წინ არის“.
თავდაცვის მინისტრის მოადგილის თქმით, არ არის აუცილებელი სამხედროების წარმატებების გაზომვა მხოლოდ კილომეტრებით ან გათავისუფლებული დასახლებებით, რადგან ოპერაციას რამდენიმე ამოცანა აქვს, რომელიც უკვე ხორციელდება.
ილია ჭავჭავაძის გამზირზე ლევან ბერძენიშვილს თავს დაესხნენ. როგორც ბერძენიშვილმა „ინტერპრესნიუსს“ განუცხადა, შემთხვევა მაშინ მოხდა, როდესაც ის ილიას სახელმწიფო უნივერსიტეტიდან ქუჩაში გავიდა.
მისივე თქმით, თავს ახალგაზრდა მამაკაცი დაესხა, რომელმაც მიმართა სიტყვით „მოღალატე“ და კვერცხი ესროლა.
„ილიას უნივერსიტეტიდან გამოვედი, ლექციიდან, მივდიოდი მანქანისკენ. ქუჩაში შემხვდა მოქალაქე, დაახლოებით, „პიქსელის“ შენობასთან. მან დაიწყო ჩემი მისამართით - „მოღალატე“, „ერეკლე“, შენი დედა და ა.შ. როგორც ჩანს, მისი ამოცანა იყო, წყობიდან გამოვეყვანე - მეტ-ნაკლებად წარმატებულად. მე, რა თქმა უნდა, დედა არ მიგინებია. მოულოდნელად, ჯიბიდან კვერცხი ამოიღო. ჩვენთან, როგორც ჩანს, მოქალაქეები ასე დადიან, კვერცხით შეიარაღებულები. ეს არის ჩვეულებრივი ნაწილი იმ პროგრამისა, რომელიც მიმდინარეობს - ზურაბ ჯაფარიძე, ლევან ბერძენიშვილი - მე ვარ საქართველოს მტერი და ეს დებილი, წერა-კითხვის უცოდინარი, ვიღაც ამება, ეს კოსტავა, რომელიც მომიგზავნეს, საქართველოს პატრიოტი და მცველია?! ეს მოსწონს ბიძინა ივანიშვილს. ზუსტად მისი პორტრეტი იყო - წვერებიანი ბიძინა ივანიშვილი. ლექსიკა ისეთი ჰქონდა, როგორც ივანიშვილს აქვს, წერა-კითხვის უცოდინარი. მოსაგზავნიც აღარ ჰყავთ ისეთი, რომ გამართულად დედა მაინც შეგაგინოს. ეს იყო ახალგაზრდა, წვერებიანი მამაკაცი (სიტყვა მამაკაცი არ უხდება, მაგრამ რაცაა). რა თქმა უნდა, წინასწარ დაგეგმილი იყო, აბა, კვერცხით ვინ დადის? ყველაზე საინტერესო იყო ის, რომ მოქალაქეები ამას იღებდნენ, გამოსარჩლება არავის უცდია. ჩემი სტუდენტი ჩაერია და იმან ცოტა დისტანცირება გაუკეთა. გამოწევა იყო, უნდოდა [ფიზიკური დაპირისპირება], მაგრამ ვერ მოახერხა“, - განაცხადა ბერძენიშვილმა.
ამასთან, ბერძენიშვილი არ აპირებს საკითხზე სამართალდამცავებს მიმართოს.
„ვის უნდა მივმართო? მათზე მაქვს ეჭვი, ვისაც უნდა მივმართო და ბავშვი ხომ არ ვარ?“- განაცხადა ბერძენიშვილმა.
რაც უფრო დიდი ხანი იქნება ოცნება ხელისუფლებაში, მით უფრო საშიში გახდება ქალაქში ცხოვრება, - ამის შესახებ სოციალურ ქსელში პარტია "საქართველოსთვის" თავმჯდომარის მოადგილე, ნათია მეზვრიშვილი წერს.
მისი განცხადებით, ხელისუფლება ორგანიზებულ ძალადობრივ დაჯგუფებად არის გადაქცეული.
"ერთადერთი მორალური უპირატესობა ჰქონდათ 2011-2012 წლების ნაცმოძრაობისგან და ისიც წაშალეს, უფრო მეტიც, გაცილებით საშიშები არიან ადამიანებს შორის ისეთ დონეზე აღვივებენ შუღლს.", - წერს მეზვრიშვილი.
უკრაინელმა ჯარისკაცებმა, ბოლო დღე-ღამის განმავლობაში, 1 010 რუსი ჯარისკაცის ლიკვიდაცია განახორციელეს და რუსული ცოცხალი ძალის საერთო დანაკარგებმა უკრაინაში 221 460-ს მიაღწია, - ამის შესახებ უკრაინის შეიარაღებული ძალების გენერალური შტაბი იუწყება.
ამასთან, უწყების ცნობით, უკრაინაში შეჭრის დღიდან რუსების საერთო დანაკარგები მოიცავს: 3 997 ტანკს, 7 750 ჯავშანმანქანას, 3 888 ერთეულ საარტილერიო სისტემას, 314 საბრძოლო თვითმფრინავს და 306 ვერტმფრენს, 6 645 ავტომობილსა და საწვავის ავზს, 18 გემს/ნავს, 3 393 უპილოტო საფრენ აპარატს, 531 ერთეულ სპეცტექნიკას, 1 214 ფრთოსან რაკეტას.
უკრაინის საჰაერო თავდაცვის ძალებმა 20 ივნისს ღამით რუსების მიერ გაშვებული Shahed-ის 30 დრონიდან 28 გაანადგურეს, - ამის შესახებ უკრაინის შეიარაღებული ძალების გენერალური შტაბი იუწყება.
„ღამით, რუსმა ტერორისტებმა უკრაინაზე კიდევ ერთი მასიური სარაკეტო და საჰაერო დარტყმა განახორციელეს. წინასწარი მონაცემებით, მტრის მიერ გაშვებული Shahed-ის 30 დრონიდან 28 განადგურებულია“, - აცხადებენ გენშტაბში.
ასევე, მათივე ინფორმაციით, ზაპოროჟიესა და მის შემოგარენში რუსულმა ძალებმა S-300 ტიპის 7 რაკეტა გამოიყენეს. სარაკეტო დარტყმის შედეგების შესახებ ინფორმაცია ზუსტდება.
შეგახსენებთ, უკრაინის რამდენიმე ოლქში საჰაერო განგაში იყო გამოცხადებული. დედაქალაქ კიევსა და კიევის ოლქში საჰაერო თავდაცვა ამოქმედდა და რუსების მიერ გაშვებული თითქმის 20 საჰაერო ობიექტი განადგურდა. რუსებმა ლვოვში კრიტიკულ ინფრასტრუქტურულ ობიექტს დაარტყეს, ზაპოროჟიესა და მის შემოგარენში კი კომუნიკაციები და კერძო საკუთრება დაზიანდა, მაგრამ თავდასხმას მსხვერპლი არ მოჰყოლია.
პარტიამ “საქართველოსთვის” ქალთა ორგანიზაცია დააფუძნა, - ამის შესახებ პარტიის ოფიციალურ "ფეისბუქ" გვერდზე ვკითხულობთ.
განცხადებას planeta.ge უცვლელად გთავაზობთ:
ქალთა გაძლიერების პლატფორმის ინიციატივითა და პარტია “საქართველოსთვის” პოლიტიკური საბჭოს გადაწყვეტილებით პარტიის ქალთა ორგანიზაცია დაფუძნდა.
ქალთა ორგანიზაცია 2022 წლიდან პლატფორმის სტატუსით იყო წარმორდგენილი, რომელმაც ქვეყნის 7 რეგიონში ქალთა საჭიროებების კვლევა განახორციელა.
ქალთა ორგანიზაციის შექმნის მიზანია:
ქალთა შესაძლებლობების განვითარება და გაძლიერება,
ქალთა პოლიტიკური ჩართულობის გაზრდა,
ქალთა საჭიროებების იდენტიფიცირება და შემდგომში მათი მოგვარების ადვოკატირება,
ქალთა უფლებების საკითხებზე მუშაობა.
დღეიდან პარტია “საქართველოსთვის” ქალთა ორგანიზაცია ოფიციალურად შეუდგება მუშაობას. დაკომპლექტდება ორგანიზაციის მმართველი საბჭო და მოხდება თავმჯდომარის არჩევა.
გვყავს ხელისუფლება, რომელიც უარს აცხადებს ყველაზე მნიშვნელოვანი რეკომენდაციების შესრულებაზე, აძლიერებს გირგვლიანის სანქცირებულ მოსამართლეს, იქვემდებარებს ცესკოს, სებ-ს, ვენეციის კომისიის დასკვნის მიუხედავად, იღებს დეოლიგარქიზაციის პროექტს - ეს ევროკომისიისგან დადებითი შეფასების მოლოდინს არ ქმნის, - ამის შესახებ პარტია „საქართველოსთვის“ წევრმა და პარლამენტის დეპუტატმა ანა ბუჩუკურმა ბრიუსელში და სტოკჰოლმში დაგეგმილი შეხვედრების კომენტირებისას განაცხადა, სადაც ევროკომისია ევროკავშირის ელჩებსა და ევროპის საქმეთა მინისტრებს საქართველოს მიერ 12 პრიორიტეტის შესრულების საკითხზე მოხსენებას წარუდგენს.
ბუჩუკურის განცხადებით, თუ ამის მიუხედავად, ქვეყანა კანდიდატის სტატუსს მიიღებს, ეს იქნება ქართველი ხალხის დამსახურება, რომელსაც ევროინტეგრაცია სურს.
„სამწუხაროდ, მძიმე ვითარებაა რეკომენდაციების შესრულების კუთხით და ეს კარგად არის ცნობილი ჩვენი პარტნიორებისთვის, იციან რა შესრულდა, რა არ შესრულდა, რაზე აქვს უარი ნათქვამი „ქართულ ოცნებას“ და რა აქვს გაფუჭებული. გვყავს ხელისუფლება, რომელიც უარს აცხადებს ყველაზე მნიშვნელოვანი რეკომენდაციების შესრულებაზე, იცავს და აძლიერებს გირგვლიანის სანქცირებულ მოსამართლეს, იქვემდებარებს ცესკოს, ეროვნულ ბანკს, ვენეციის კომისიის დასკვნის მიუხედავად იღებს დეოლიგარქიზაციის პროექტს, ეს დადებითი შეფასების მოლოდინს არ ქმნის, დაველოდოთ, ვნახოთ როგორ იქნება. სამწუხაროდ, მიმდინარე მოვლენების ფონზე დადებითი შეფასების მოლოდინი არ მაქვს. მძიმე გავლენა აქვს მათ რიტორიკას, ძალადობრივ მეთოდებს, რასაც ერთი-ერთში ახორციელებდა 2011- 2012 წლებში „ნაციონალური მოძრაობა". ხელისუფლება, რომელიც ძალადობაზე გადადის, მის დასასრულს ნიშნავს და მას აღარ აქვს პოლიტიკური ლეგიტიმაცია და სამართლიანობის რესურსი“, - აღნიშნა ბუჩუკურმა.
პარტია "საქართველოსთვის" თავმჯდომარე გიორგი გახარია - დღეს ქალთა ორგანიზაცია დავაფუძნეთ.
პარტია „საქართველოსთვის'' იქნება პარტია, რომელსაც 2024 წლის არჩევნებზე, საარჩევნო სიაში, ყველაზე მეტი ქალი ეყოლება წარმოდგენილი.
355378830_127148350399380_9178574582500596889_n.mp4
ჭიათურის მაღაროში დასაქმებულებმა, პარლამენტის შენობის წინ კარვები გაშალეს, სადაც ღამის გათენებას აპირებენ.
აქციის მონაწილეების თქმით, ისინი დარჩებიან პარლამენტის წინ იქამდე, მათი მოთხოვნები არ შესრულდება.
მაღაროელების მთავარი მოთხოვნაა, სამუშაო პირობების გაუმჯობესებაა.
აქციის მონაწილეების ინფორმაციით, აქცია 20 ივნისს, 18:00 საათზე, განახლდება.
ასევე, მაღაროელები და მათი მხარდამჭერები, 20 ივნისს,16:00 საათზე, პარლამენტის შენობიდან “ჯორჯიან მანგანეზის” ოფისამდე მსვლელობას გამართავენ.
თბილისის ღვინის მუზეუმი ავრცელებს განცხადებას, რომლიდანაც ვიგებთ, რომ თბილისის ისტორიის მუზეუმის დირექტორის, ნინო ჭიპაშვილის გადაწყვეტილებით, თბილისის ღვინის მუზეუმს სამუშაო საათები უნდა შეუმცირდეს.
„აღნიშნულის შესახებ მუზეუმის ხელმძღვანელობას სამუშაო კვირის ბოლო დღეს პირადად მუზეუმის დირექტორმა, ნინო ჭიპაშვილმა მოულოდნელად აცნობა.
ჭიპაშვილმა გვითხრა, რომ მისი გადაწყვეტილებით, თბილისის ღვინის მუზეუმის სამუშაო საათები უნდა შემცირდეს 20:00-დან 18:00 საათამდე. ასევე, უნდა შემცირდეს სამუშაო დღეები. გადაწყვეტილების მიზეზად იმ შენობის ცენტრალური შესასვლელი დაგვისახელა, რომლის ერთ სართულზეც, ჩვენი სამუზეუმო სივრცეა. საუბარია სიონის ქუჩის 8 ნომერში მდებარე ქარვასლის ისტორიულ შენობაზე, რომლის ორი სართულიც სახელმწიფო საკუთრებას კერძოდ კი „თბილისის ისტორიის მუზეუმს“ წარმოადგენს. ვინაიდან სახელმწიფო მუზეუმი წყვეტს მუშაობას 18:00-ზე, ნინო ჭიპაშვილის გადაწყვეტილებით, ჩვენი სამუშაო საათებიც 18:00-მდე უნდა შემცირდეს. წინააღმდეგ შემთხვევაში, 18:00-ის შემდეგ მოსულ ვიზიტორებს მუზეუმის ცენტრალური შესასვლელი კარი დაკეტილი დახვდებათ“. – ამბობენ ღვინის მუზეუმში.
„საზოგადოებას გვსურს, ვაცნობოთ, რომ აღნიშნული გადაწყვეტილება ჩვენთვის მიუღებელია, ხოლო არგუმენტები – აბსურდული. მიგვაჩნია, რომ ეს გადაწყვეტილება ემსახურება მუზეუმის დისკრედიტაციას, სახელმწიფოსგან დამოუკიდებელ ბიზნესში უხეშ ჩარევას და ხელოვნური მიზეზებით მუზეუმის ფუნქციონირების შეფერხებას.
თბილისის ღვინის მუზეუმი ვიზიტორებს 2020 წლიდან მასპინძლობს. სამი წლის განმავლობაში იყო არაერთი წარმატებული პროექტი, რომელსაც მნიშვნელოვანი როლი აქვს შეტანილი როგორც ქვეყნის კულტურულ განვითარებაში, ასევე საერთაშორისო ცნობადობის ამაღლების კუთხით.
თბილისის ღვინის მუზეუმი 2022 წელს დასახელდა მსოფლიოს 10 საუკეთესო მუზეუმთა შორის. ეს არის სივრცე, სადაც ვიზიტორებს არა მხოლოდ ქართულ ღვინოზე და კულტურაზე შეუძლიათ სანახაობრივი, თეორიული თუ პრაქტიკული ცოდნის მიღება, არამედ შეუძლიათ ქართული სამზარეულოს გაცნობა, რომელიც ჩვენ სივრცეში რესტორან არქივის სახით არის წარმოდგენილი. რესტორნის, რომელიც ქალაქის 10 საუკეთესო რესტორანს შორის პირველ ადგილზეა.
ქვე უნდა აღინიშნოს, რომ ეს ყველაფერი ჩვენ მარტოს არ მიგვიღწევია, მხარში გვიდგას სახელმწიფო სტრუქტურები. ეს პროექტი არის კარგი მაგალითი იმისა, თუ როგორ შეიძლება სახელმწიფოს შესაბამისი სტრუქტურებისა და კერძო სექტორის მჭიდრო თანამშრომლობით მიღწეულ იქნას წარმატება, როგორც ადგილობრივ ისე საერთაშორისო დონეზე, კიდევ ერთხელ დიდ მადლობას ვუხდით მათ. სამწუხაროა, რომ მათ სიაში არ შედის კულტურის სამინისტრო.
მიგვაჩნია, რომ აღნიშნული გადაწყვეტილება შეაფერხებს და ხელს შეუშლის ყველა იმ კერძო სივრცის განვითარებას, რომელიც ჩვენს შენობაშია განთავსებული.
თბილისის ღვინის მუზეუმს დღის განმავლობაში ბევრ ვიზიტორი სტუმრობს. მათ შორის არიან ტურისტული ჯგუფები მსოფლიოს სხვადასხვა ქვეყნიდან. გვაქვს წინასწარი ჯავშნები მთელი სეზონის განმავლობაში. სტუმრების უდიდეს ნაწილი მუზეუმში ვიზიტს დღის მეორე ნახევარში გეგმავს. დღის მეორე ნახევარში გვაქვს მიღებული ჯავშნების უმეტესი რაოდენობაც. ნინო ჭიპაშვილის ეს გადაწყვეტილება ნიშნავს, რომ უარი უნდა ვუთხრათ ყველა იმ სტუმარს, რომელთა მასპინძლობისთვისაც ჩვენი გუნდი მთელი წელი ემზადებოდა.
აქვე გვინდა აღვნიშნოთ, რომ ეს არ არის პირველი შემთხვევა, როდესაც კულტურის სამინისტრო უხეშად ცდილობს თბილისის ღვინის მუზეუმის საქმიანობაში ჩარევას. მიმდინარე წლის მარტის თვიდან კულტურის სამინისტრომ ჩვენთან შეუთანხმებლად ქარვასლის შენობაში შესვლა ფასიანი გახადა. აღნიშნულის შესახებ შევიტყვეთ მხოლოდ იმ მანიშნებელი ბანერიდან, რომელიც შენობის შესასვლელში დაგვხვდა განთავსებული, შედეგად კი თბილისის ღვინის მუზეუმს სტუმრების რაოდენობა შეუმცირდა.
საქართველო ღვინის სამშობლოა და თბილისის ღვინის მუზეუმი წარმოადგენს სივრცეს, რომელიც აცნობს თბილისის სტუმრებს ამ უდიდეს კულტურას. მუზეუმის საქმიანობაში ხელშეშლა არარაციონალური ქმედება და პიროვნული ინტერესების დაკმაყოფილების მცდელობაა. მოვუწოდებთ სახელმწიფოს შესაბამის სტრუქტურებს გამოიჩინონ გულისხმიერება და დაგვეხმარონ ხელოვნური ბარიერების მოხსნაში“. – ვკითხულობთ განცხადებაში.
„ჩვენი ფინანსური ზარალი ამ მომენტისთვის ჭიათურაში 12 მლნ დოლარს შეადგენს და ამ ფონზე, მათი მხრიდან 10 მლნ დოლარის ხელფასის ზრდის მოთხოვნა არის ძალიან ალოგიკური“, – განაცხადა კომპანია „ჯორჯიან მანგანეზის” გენერალურმა დირექტორმა, ლაშა თუთბერიძემ პრესკონფერენციაზე.
მისივე თქმით, კომპანიამ დასაქმებულებს ხელფასის 5%-იანი მატება შესთავაზა, თუმცა გაფიცულები ანაზღაურების 20%-ით გაზრდას მოითხოვენ.
როგორც თუთბერიძემ აღნიშნა, კომპანია გამოთქვამს მზადყოფნას, შეიქმნას კომისია, რომელიც სხვა საკითხებთან ერთად, იმსჯელებს იმაზე, თუ როგორ გამოიყვანონ კომპანია არსებული ფინანსური კრიზისიდან.
ლაშა თუთბერიძის თქმითვე, დასაქმებულებს შესთავაზეს 12 საათის ნაცვლად 8-საათიან სამუშაო გრაფიკზე გადასვლა, რადგან მიაჩნიათ, რომ დღეში 12 საათის განმავლობაში მუშაობის შემთხვევაში „შრომის ნაყოფიერება დაბალია, მით უფრო, როცა ეს ადამიანები მიწის ქვეშ მუშაობენ და საკმაოდ მძიმე ვითარებაში არიან”.
ჭიათურელი მაღაროელებისთვის კი „ჯორჯიან მანგანეზის” შეთავაზება, რომლის მიხედვითაც, კომპანია გაფიცულებს ხელფასის მხოლოდ 5%-ით მატებას სთავაზობს, მიუღებელია. ამბობენ, რომ იქამდე გააგრძელებენ პროტესტს, სანამ ყველა მათი მოთხოვნა არ დაკმაყოფილდება.
ჭიათურიდან თბილისში გაფიცული მაღაროელები ჩამოვიდნენ და პარლამენტის წინ საპროტესტო აქციას მართავენ.
„ხელფასის 20%-იანი მატება, ძველი სამუშაო გრაფიკის დაბრუნება, ტექნიკის განახლება, ბიულეტენით სარგებლობის უფლება, შრომის უსაფრთხოების გაკონტროლება“, – ამ და სხვა მოთხოვნებით ჭიათურის 3 000-ზე მეტი მაღაროელი უკვე მე-14 დღეა საპროტესტო აქციებს მართავს. 10 მათგანი კი მე-8 დღეა შიმშილობს. ისინი საკვების მიღებაზე უარს აცხადებენ.
გუშინ, პროტესტის მონაწილე ერთ-ერთმა მაღაროელმა თვალები ამოიკერა, გარდა ამისა, ერთ მაღაროელს პირი აქვს ამოკერილი.
ჰამბურგში დაგეგმილ მარტა არგერიჰის ფესტივალზე 27 ივნისს გიორგი გიგაშვილი მარტა არგერიჰთან ერთად დაუკრავს.
კონსერვატორიის სახელით წარმატებებს ვუსურვებთ ქართველ მუსიკოსს და კონსერვატორიელს!, - ინფორმაციას თბილისის სახელმწიფო კონსერვატორია ავრცელებს.
არასამთავრობო ორგანიზაცია „საერთაშორისო გამჭვირვალობა – საქართველო“ (TI) წერს, რომ მათ სახელმწიფო ელექტროსისტემაში სავარაუდო ნეპოტიზმისა და ფავორიტიზმის შემთხვევები გამოავლინეს. სავარაუდო ნეპოტიზმი „ქართული ოცნების“ ყოფილ დეპუტატს და სასამართლოს ე.წ. კლანთან დაახლოებულ ვანო ზარდიაშვილს უკავშირდება.
როგორც არასამთავრობო ორგანიზაცია წერს, ვანო ზარდიაშვილი სს „საქართველოს სახელმწიფო ელექტროსისტემის“ დირექტორთა საბჭოს წევრი და დირექტორია იურიდიულ, გარემოს დაცვის, სოციალურ და ნებართვების საკითხებში. მის დაქვემდებარებში ორი დეპარტამენტია.
„ამ ორ დეპარტამენტში ზარდიაშვილთან, ხელისუფლებასთან და სასამართლოს კლანის წარმომადგენლებთან დაკავშირებული 6 ადამიანია დასაქმებული.
1. თამთა თაბუკაშვილი – ვანო ზარდიაშვილის რძალი
თამთა თაბუკაშვილი სახელმწიფო ელექტროსისტემაში გარემოს დაცვის, სოციალური საკითხებისა და ნებართვების დეპარტამენტშია დასაქმებული. იგი ვანო ზარდიაშვილის ცოლის, თინათინ აბრალავას ძმის, გრიგოლ აბრალავას, ცოლია.
2. გიორგი კიკნაძე – ვანო ზარდიაშვილის ოჯახის ახლობელი და ნათესავი
გიორგი კიკნაძე სახელმწიფო ელექტროსისტემაში დირექტორის, ვანო ზარდიაშვილის მოადგილეა. როგორც ცნობილია, ვანო ზარდიაშვილი გიორგი კიკნაძის შვილის ნათლიაა.
3. გიორგი კვარაია – ვანო ზარდიაშვილის ოჯახის ახლობელი და ნათესავი
გიორგი კვარაია სახელმწიფო ელექტროსისტემაში გარემოს დაცვის, სოციალური საკითხებისა და ნებართვების დეპარტამენტშია დასაქმებული.
4. სალომე დათუაშვილი-გვრიტიშვილი – გავლენიანი მოსამართლის, თბილისის სააპელაცო სასამართლოს მოსამართლისა და ადმინისტრაციულ საქმეთა პალატის თავმჯდომარის დიმიტრი გვრიტიშვილის ცოლი;
სალომე დათუაშვილი გარემოს დაცვის, სოციალური საკითხებისა და ნებართვების დეპარტამენტშია დასაქმებული. იგი საერთაშორისო პროექტების კოორდინატორია.
5. ნიკა მიქაუტაძე – გავლენიანი მოსამართლის, უზენაესი სასამართლოს მოსამართლისა და საქართველოს უზენაესი სასამართლოს თავმჯდომარის მოადგილის გიორგი მიქაუტაძის ბიძაშვილი
გიორგი მიქაუტაძე და ვანო ზარდიაშვილი კურსელები და ახლო მეგობრები არიან. გიორგი მიქაუტაძე ერთ-ერთი იყო იმ გავლენიან მოსამართლეთა შორის, რომლებიც ზარდიაშვილს პარლამენტის ეზოს სკვერში ხვდებოდა. როგორც „საერთაშორისო გამჭვირვალობა-საქართველოსთვის“ გახდა ცნობილი ნიკა მიქაუტაძე, გარემოს დაცვის, სოციალური საკითხებისა და ნებართვების დეპარტამენტშია დასაქმებული, იგი სოციალური საკითხების მართვის სამსახურის უფროსია.
6. გელა ოხანაშვილი – საქართველოს პარლამენტის წევრის, იურიდიულ საკითხთა კომიტეტის თავმჯდომარის ანრი ოხანაშვილის მამა;
როგორც „საერთაშორისო გამჭვირვალობა – საქართველოსთვის“ გახდა ცნობილი, იგი გარემოს დაცვის, სოციალური საკითხებისა და ნებართვების დეპარტამენტშია დასაქმებული“, – ნათქვამია არასამთავრობო ორგანიზაციის მოკვლევაში.
ვინ არის ვანო ზარდიაშვილი?
„საერთაშორისო გამჭვირვალობა – საქართველოს“ ინფორმაციით, ვანო ზარდიაშვილი სხვადასხვა თანამდებობას იკავებდა წინა ხელისუფლების პერიოდშიც, „ქართული ოცნების“ ხელისუფლებაში მოსვლის შემდეგ კი მუშაობდა იუსტიციის უმაღლეს საბჭოში, სახელმწიფო აუდიტის სამსახურში, 2016 წელს გახდა პარლამენტის დეპუტატი.
2019 წელს მანდატი შეუწყდა და თავდაპირველად სახელმწიფო შპს-ს ენერგოტრანსის დირექტორის მოადგილედ დაინიშნა. იქ თვენახევარში ზარდიაშვილის 22 307 ლარი აიღო ხელფასის სახით. 2020 წელს კი ენერგოტრანსი საქართველოს სახელმწიფო ელექტროსისტემას შეუერთდა და ზარდიაშვილმაც იქ განაგრძო მუშაობა.
„ვანო ზარდიაშვილი წლების განმავლობაში იუსტიციის უმაღლეს საბჭოს გავლენიან მოსამართლეებსა და ხელისუფლებას შორის საკონტაქტო პირად მიიჩნეოდა. იგი ყველაზე გავლენიანი მოსამართლის მიხეილ ჩინჩალაძის ახლო მეგობარია“, – წერს TI.
დღეს, 19 ივნისს 16:00 საათზე გაფიცული მაღაროელები პარლამენტთან აქციას გამართავენ. ამის შესახებ მაღაროელებმა ფეისბუკ გვერდზე დაწერეს.
დღეს მათი გაფიცვის მე-15, ხოლო შიმშილობის მე-8 დღეა.
„დღეს ოთხ საათზე გელოდებით პარლამენტის წინ. ვმართავთ მშვიდობიან პროტესტს, მოვდივართ ჭიათურიდან,“ – წერენ მაღაროელები.
ჭიათურაში მაღაროელები 2 კვირაა, რაც გაფიცულები არიან. მათი ნაწილი შიმშილობს. გუშინ, 18 ივნისს პროტესტის ნიშნად ერთმა მაღაროელმა თვალები ამოიკერა, ერთმა კი თვითდაზიანებები მიიყენა.
მაღაროელების მთავარი მოთხოვნა ანაზღაურების გაზრდა და უსაფრთხო, ღირსეული შრომითი პირობებია.
პარტია "საქართველოსთვის" თავმჯდომარის მოადგილე, ნათია მეზვრიშვილი მიხეილ სააკაშვილს მიმართავს, - "თუ მართლა ქვეყანა გიყვარს (და არა მხოლოდ საკუთარი თავი), შეწყვიტე ეგომანიაკობა, გაწყვიტე ყველანაირი კავშირი პოლიტიკასთან, ღირსეულად მოიხადე სასჯელი, შეეგუე, რომ არის წარსული და გზა დაუთმე მომავალს".
როგორც ნათია მეზვრიშვილი აღნიშნავს, ხალხმა "ნაციონალურ მოძრაობას" და სააკაშვილს სამართლიანად არ აპატია - გირგვლიანი და სხვა მძიმე დანაშაულები, წამება და არაადამიანური მოპყრობა ციხეებში, 26 მაისი, იმედის დარბევა და ა.შ. და ისინი ხელისუფლებიდან გაუშვა.
"ვარდების რევოლუციის დროს სტუდენტი ვიყავი. უნივერსიტეტის დამთავრებისთანავე, კორუფციის და ნეპოტიზმის გარეშე, ღია კონკურსით მოვხვდი პროკურატურაში. ბევრი ჩემნაირი ახალგაზრდისთვის გაიხსნა სახელმწიფო უწყებების კარი. უამრავი კარგი გაკეთდა საპატრულო პოლიციის რეფორმით დაწყებული ქურდული სამყაროს წინააღმდეგ ბრძოლით დამთავრებული. მაგრამ ... ხალხმა ვერ და სამართლიანად არ გაპატიათ გირგვლიანი და სხვა მძიმე დანაშაულები, წამება და არაადამიანური მოპყრობა ციხეებში, 26 მაისი, იმედის დარბევა და ა.შ. და გაგიშვათ ხელისუფლებიდან. არ გაპატიათ გარყვნა და ძალაუფლების შესანარჩუნებლად ხალხის ტერორი (ზუსტად ისე, როგორც ოცნებას არ აპატიებენ). დანაშაულები იმდენად მასშტაბური და სისტემური იყო, რომ ყველა კარგი საქმე გადაწონა. შესაბამისად, ამაოა მცდელობა ხალხს დაავიწყოთ ცუდი, მითუმეტეს, როცა თავად ეს ცუდი არასოდეს გადაგიფასებიათ და მინიმუმ ბოდიში არ მოგიხდიათ.
ამ ფონზე, ნებისმიერი მისი პოლიტიკური აქტიურობა არის საჩუქარი ოცნებისთვის. 11 წელია ამ საჩუქრებს ჩუქნის და ოცნების ხელისუფლებაში ყოფნას ახანგრძლივებს. ბოლო 2 წელია საზოგადოება და საკუთარი ამომრჩეველი მისი ცხოვრებით და როგორც აღმოჩნდა, ტყუილებში აცხოვრა. ესეც არ იკმარა და გადაწყვიტა ოცნებას კიდევ ერთხელ, ამჯერად ყველაზე კრიტიკულ მომენტში, გაუწოდოს დახმარების ხელი. ახლა ოცნების დახმარება, ღალატის ტოლფასია იმიტომ, რომ სასწორზე ქვეყნის ევროპული მომავალი დევს.
შესაბამისად, როგორც ჩამოვიდა, ისე მოიხადოს სასჯელი და დაეხსნას ქართულ პოლიტიკას. შეუძლებელია წარსულმა, რომელიც აწმყოს ვერ ქმნის, შექმნას მომავალი. გაიაზროს, რომ არის წარსული და იქნებ შემდეგ ხალხმა ის კარგიც დაინახოს, რაც ცუდის კეთებამდე უკეთებია.", - წერს ნათია მეზვრიშვილი.
19 ივნისს დღის ბოლოდან 22 ივნისამდე, საქართველოს უმეტეს რაიონში მოსალოდნელია ხანმოკლე წვიმა, ზოგან ძლიერი, ელჭექი და ქარი, აღმოსავლეთ საქართველოში ზოგან სეტყვა.
ინფორმაციას გარემოს ეროვნული სააგენტო ავრცელებს.
მათივე ცნობით, მოსალოდნელმა ძლიერმა წვიმებმა საქართველოს პატარა მდინარეებზე შესაძლებელია წყალმოვარდნები, ხოლო ქვეყნის მთიან ზონებში მეწყრულ-ღვარცოფული პროცესების ჩასახვა - გააქტიურება გამოიწვიოს.
უკრაინის თავდაცვის ძალებსა და რუსულ ძალებს შორის, გასული დღის განმავლობაში, 4 მიმართულებით 24 საბრძოლო შეტაკება მოხდა, - ამის შესახებ უკრაინის შეიარაღებული ძალების გენერალური შტაბის დილის ანგარიშშია აღნიშნული.
„მტერი აგრძელებს ძირითადი ძალისხმევის კონცენტრირებას ლიმანის, ბახმუტის, ავდიივკასა და მარინკას მიმართულებებზე - დღის განმავლობაში 24 საბრძოლო შეტაკება მოხდა“, - აცხადებენ გენშტაბში.
უწყების ცნობით, რუსებმა, გასული დღის განმავლობაში, 59 საჰაერო დარტყმა განახორციელეს და უკრაინის ჯარების პოზიციებსა და მშვიდობიან დასახლებებს მრავალჯერადი სარაკეტო სისტემებიდან ცეცხლი 100-ზე მეტჯერ გაუხსნეს.
„ღამით, რუსეთის ფედერაციამ რაკეტებითა და Shahed-ის ტიპის ირანული უპილოტო საფრენი აპარატებით უკრაინის ტერიტორიაზე მორიგი იერიში მიიტანა. გასული დღის განმავლობაში მტერმა 59 საჰაერო დარტყმა განახორციელა და ჩვენი ჯარების პოზიციებსა და მშვიდობიან დასახლებებს მრავალჯერადი სარაკეტო სისტემებიდან ცეცხლი 100-ზე მეტჯერ გაუხსნა. მშვიდობიან მოსახლეობაში არიან დაღუპულები და დაჭრილები, კერძოდ, ბავშვები, დაზიანებულია კრიტიკული ინფრასტრუქტურის ობიექტები, დანგრეულია და დაზიანებულია 20-ზე მეტი საცხოვრებელი სახლი და სკოლა“, - აღნიშნულია გენშტაბის ანგარიშში.
უწყებაში აცხადებენ, რომ უკრაინის მასშტაბით სარაკეტო და საჰაერო თავდასხმების ალბათობა კვლავ მაღალია.
ამასთან, უკრაინის თავდაცვის ძალების ავიაციამ, გასული დღის განმავლობაში, რუსეთის პირადი შემადგენლობის დისლოცირების ადგილებს 10 დარტყმა მიაყენა. ამასთან, განადგურებულია 2 საზენიტო-სარაკეტო კომპლექსი.
„ჩვენმა დამცველებმა გაანადგურეს მტრის Ka-52 ტიპის ვერტმფრენი, 3 ირანული უპილოტო საფრენი აპარატი Shahed-ი და 7 სადაზვერვო უპილოტო საფრენი აპარატი. გასული დღის განმავლობაში, სარაკეტო და საარტილერიო ქვედანაყოფებმა მართვის 2 პუნქტს, 4 საზენიტო-სარაკეტო სისტემას, პირადი შემადგენლობის დისლოცირებისა და სამხედრო ტექნიკის განლაგების 2 ადგილსა და საბრძოლო მასალის 2 საწყობს დაარტყეს“, - აცხადებენ გენშტაბში.
უკრაინელმა დამცველებმა, ბოლო ორი კვირის განმავლობაში, ბერდიანსკისა და მელიტოპოლის მიმართულებით ოკუპაციისგან 8 დასახლება გაათავისუფლეს, - ამის შესახებ თავდაცვის მინისტრის მოადგილე, ანა მალიარი „ტელეგრამ“ არხზე წერს.
მისი თქმით, გასული კვირის განმავლობაში, მოწინააღმდეგემ ბახმუტის მიმართულებით უკრაინული ძალების შეჩერება სცადა, იქ დამატებითი ქვედანაყოფები გადაიყვანა და დაბომბვის რაოდენობაც გაზარდა. მისი თქმით, ამ მიმართულებით გასული კვირის განმავლობაში ბრძოლების საერთო ინტენსივობა შემცირდა.
„ბერდიანსკისა და მელიტოპოლის მიმართულებით ორი კვირის განმავლობაში შეტევითი ოპერაციების დროს, ჯარების გაერთიანებულმა სტრატეგიულმა დაჯგუფება „ტავრიას“ ნაწილებმა გაათავისუფლეს 8 დასახლება: ნოვოდაროვკა, ლევადნოე, სტოროჟევოე, მაკაროვკა, ბლაგოდატნოე, ლობკოვოე, ნესკუჩნოე, პიატიხატკი. სამხრეთით გათავისუფლებული ტერიტორია 113 კვადრატული კილომეტრს შეადგენს“, - განაცხადა მალიარმა.
უკრაინას სურს გახდეს ნატო-ს შემდეგი წევრი მას შემდეგ, რაც შვედეთი შეუერთდება ალიანსს, - ამის შესახებ უკრაინას უმაღლესი რადას სპიკერმა, რუსლან სტეფანჩუკმა „უკრაინსკაია პრავდასთან“ ინტერვიუში განაცხადა.
„ძალიან დიდი ხანია ვსაუბრობთ უკრაინის „ფინეთიზაციაზე“. მას შემდეგ, რაც ფინეთი ნატო-ში მიიღეს, მზად ვართ ფინეთის გზას დავადგეთ, ჩვენ მზად ვართ ასეთი „ფინეთიზაციისთვის". 24 თებერვლის შემდეგ ფინეთი გახდა ნატო-ს 31-ე ქვეყანა, იმედი მაქვს უახლოეს მომავალში შვედეთი 32-ე ქვეყანა გახდება. ჩვენ გვინდა გავხდეთ ნატო-ს 33-ე წევრი და გვსურს ეს გზა გავიაროთ ისე, როგორც ფინეთმა და შვედეთმა გაიარეს“, - განაცხადა სტეფანჩუკმა.
მისი თქმით, ნატო-სა და ევროკავშირის ქვეყნები ნებისმიერ გადაწყვეტილებას კონსენსუსით იღებენ და ყველა წევრს შორის კონსენსუსის მისაღწევად, უკრაინამ უნდა აჩვენოს მინიმუმ გარკვეული შესაბამისობა და პოტენციური პროგრესი. ვფიქრობ, ეს იქნება მათი გადაწყვეტილების საფუძველი", - დასძინა სტეფანჩუკმა.
ის 33 წლისაა და უკვე საკმაოდ მდიდარი ბიოგრაფიით. კარიერული თვალსაზრისით ზრდას გამართლებას უმადლის, იმას, რომ საჭირო დროს საჭირო ადგილას მოხვდა. "გულწრფელად რომ გითხრათ, ცხოვრებაში ორ რამეს არ ვუშვებდი - მემუშავა ძალოვან სტრუქტურაში და გავმხდარიყავი საჯარო პირი. ისე წავიდა ჩემი ცხოვრება, ერთმაც მომიწია და მეორემაც“, - ამბობს, მაგრამ მაინც მადლიერია, ვინაიდან ამ ყველაფერმა პროფესიულ ზრდაში შეუწყო ხელი. როგორც ამბობს, ბავშვობიდან დამოუკიდებელ და ბრძოლისუნარიანს მთის ხასიათი აქვს, ცოტა სიხისტეც ახასიათებს, რასაც მერე "მეგრული დიპლომატია შველის“. არც შინაგანი თავისუფლების ხარისხს უჩივის... მის ლიდერთან (ვისზეც "დაგუგვლით“ შეექმნა წარმოდგენა) საერთო ღირებულებებში თანხვედრით ხსნის იმას, აქამდე ერთად რომ მოდიან.
"გიორგის მენტორად აღვიქვამ, ბევრი რამ მისწავლია და დღესაც ვსწავლობ მისგან“, - ამბობს პარლამენტარი, საქართველოს მთავრობის ადმინისტრაციაში ადამიანის უფლებათა სამდივნოს ყოფილი უფროსი და საპარლამენტო პოლიტიკური ჯგუფის - "საქართველოსთვის“ წევრი ანა ბუჩუკური და ambebi.ge-სთან მისი ცხოვრების აქამდე უცნობ დეტალებზე ჰყვება.
"დღემდე მამას გოგო ვარ...“
- დავიბადე თბილისში, 1990 წელს და დაახლოებით 1 წელი მომიწია სსრკ-ში ცხოვრება. 90-იანების ბავშვი ვიყავი, ამიტომ მთელი სიმძაფრით მახსოვს, რა გამოვიარეთ თითოეულმა ოჯახმა. ერთი ძმა მყავს, 4 წლით უფროსი.
მიუხედავად მძიმე პერიოდისა, მშობლებმა მოახერხეს და ბავშვობა ტკბილად დამამახსოვრდა. დღევანდელი გადმოსახედიდან რომ ვაფასებ, ეს ძალიან მაკვირვებს. უშუქობის გარდა, პურის რიგებიც მახსოვს და ტალონებიც კადრებად, არა - შინაარსობრივად. მამა მხატვარ-რესტავრატორია და თვეობით უწევდა ექსპედიციებში სიარული, დედას დამხმარე არავინ ჰყავდა და ორი პატარა ბავშვით, ფაქტობრივად, მარტო უმკლავდებოდა ყველაფერს. დედა თერაპევტია, მაგრამ ჩვენს გამო გახდა იძულებული, არჩევანი შვილების სასარგებლოდ გაეკეთებინა - სამსახურზე უარი თქვა. მამას ძალიან საინტერესო პროფესია აქვს, ხშირად რისკებზეც წასულა იმისთვის, რომ ქართული ძეგლები და ჩვენი კულტურული მემკვიდრეობა გადაერჩინა. ჩემთვის ორივე მისაბაძია, ოღონდ, სხვადასხვა მიზეზის გამო. როცა მეუბნებიან, მამას ჰგავხარო, ეს ჩემთვის უდიდესი კომპლიმენტია და მიუხედავად იმისა, რომ 33 წლის ვარ, დღემდე მამას გოგო ვარ.
ასევე დაგაინტერესებთ
11:02 / 01-04-2023
"მარტოხელა დედა ვარ და სულ მქონდა შიში, რა იქნებოდა მომავალში... მამის დაკარგვის შემდეგ დედაზე ვნერვიულობ" - პოლიტიკოსის აპოლიტიკური ცხოვრება: ხატია დეკანოიძე ოჯახსა და შვილზე
10:59 / 25-05-2023
"მეუღლე მეხუმრება ხოლმე, კონსტიტუციური სიმშვიდის გარანტი ხომ ვარ შენთვისო“ - ვინ არის ახალბედა პარლამენტარი ქეთი თურაზაშვილი: დეპუტატის აპოლიტიკური პორტრეტი
ჩემი ძმა პირიქით, დედასთან უფრო ახლოს იყო. დედ-მამა ყოველთვის იდეალური მეგობრები იყვნენ, ასე ვთქვათ, პარტნიორები, სრული ამ სიტყვის მნიშვნელობით. სკოლაში კარგად ვსწავლობდი, 6 კლასი 186-ე სკოლაში ვისწავლე, შემდეგ კი მე-6 გიმნაზიაში (ახლა 21-ე საჯარო ჰქვია) გადავედი. თუ სწორად მახსოვს, 9 კლასის ჩათლით სრულად ფრიადოსანი ვიყავი, მერე მომავალ ლიდერთა გაცვლითი პროგრამით აშშ-ში წავედი და ერთი კლასი იქ დავხურე. დაბრუნების შემდეგ უკვე შერეული ნიშნები მყავდა. ზოგადად, მასწავლებელი ან ლექტორი თუ მიყვარდა, მის საგანს კარგად ვსწავლობდი, ვისაც თვალს ცუდად დავადგამდი, იმის საგანს - მოვალეობის მოხდის მიზნით. ასეთი ხასიათი მქონდა...
რატომ ავირჩიე იურისტობა
- ბუჩუკურები წარმოშობით ხევსურები ვართ. ჩვენი სოფელი ხევსურეთში - ბუჩუკურთა დღეს, სამწუხაროდ, დაცლილია. სოფელი გვაქვს ტირძნისში, გორის მუნიციპალიტეტში, ცხინვალთან 7 კმ-ში. დედა მეგრელი მყავს - ადამია, სენაკელია, ნახევრად მეგრელი ვარ, მაგრამ ხასიათი მთის მაქვს. სიხისტეც მახასიათებს, თუმცა, როგორც მეუბნებიან, მეგრულ დიპლომატიასაც არ ვუჩივი. არ მიყვარს, როცა ვბრაზდები, მაგრამ ეს თუ მოხდა, ჩემს მტერს! ჩემს ოჯახს მაინც და მაინც არ უნდოდა ჩემი იურისტობა, თუმცა თსუ-ს სამართალმცოდნეობის ფაკულტეტი ავირჩიე, გამომდინარე იქიდან, რომ ძალიან ჯიუტი ვარ, მაინც ჩემი გავიტანე. ადრე, სხვათა შორის, მამას პროფესიაზე - რესტავრატორობაზე ვფიქრობდი. ბავშვობაში ჩემი მშობლებისთვის ფული არასდროს მითხოვია, არ მომწონდა სხვაზე დამოკიდებულება. როცა გავიზარდე, გავაცნობიერე, მამას პროფესიას რომ გავყვე, მე არ ვიქნებოდი რესტავრატორი ანა ბუჩუკური, არამედ ვიქნებოდი რესტავრატორ მერაბ ბუჩუკურის შვილი. მიუხედავად იმისა, რომ მამა ჩემს ცხოვრებაში ერთ-ერთი ყველაზე საამაყო ადამიანია, ჩემი დამოუკიდებელი გზა მინდოდა მომენახა, ამიტომ გადავიფიქრე. ბაკალავრიატიც და მაგისტრატურაც თსუ-ში დავამთავრე და 2014 წელს ჩავაბარე დოქტორანტურაში "ნიუ-ვიჟენ“ უნივერსიტეტში. დღეს ამ უნივერსიტეტში ვასწავლი, თან PHD სტუდენტი ვარ.
"გამიმართლა - საჭირო დროს საჭირო ადგილას და სწორ ადამიანებთან მოვხვდი"
- ჩემი პირველი სამსახური განათლების ხარისხის განვითარების ეროვნული ცენტრი იყო - უნივერსიტეტი დავამთავრე თუ არა, იქ ჩემმა ლექტორებმა დამასაქმეს, მათ გამიწიეს რეკომენდაცია, მათი მადლიერი ვარ. სხვათა შორის, ცხოვრებაში რაშიც გამიმართლა ისაა, რომ საჭირო დროს სწორ ადამიანებს შევხვდი, კარიერულად ასე მჭირს, რაც ძალიან მნიშვნელოვანია. იმას არ ვამბობ, რომ გამოწვევები არ მქონია, ბევრჯერ დავცემულვარ, რამაც მიმახვედრა, რამდენად დროებითია ყველაფერი - აღმავლობაც, დაცემაც, თანამდებობაც, ბენეფიტები და ყველაფერი. ამის გააზრება ახალგაზრდა ასაკში მნიშვნელოვანია, შემდგომში იგივე შეცდომები რომ აღარ დაუშვა. პასიურად პოლიტიკა სულ მაინტერესებდა, როგორც მოქალაქეს, უნდა იცოდე, შენს ქვეყანაში რა ხდება, მაგრამ გულწრფელად რომ გითხრათ, ცხოვრებაში ორ რამეს არ ვუშვებდი - მემუშავა ძალოვან სტრუქტურაში და გავმხდარიყავი საჯარო პირი. ისე წავიდა ჩემი ცხოვრება, ერთმაც მომიწია და მეორემაც.
"დავგუგლე და გიორგი გახარია ამომიგდო“
- 2017 წლის დასაწყისში, როცა განათლების სისტემაში ვმუშაობდი (იურიდიულ სამსახურში სამართალ შემოქმედების სამმართველოს უფროსი ვიყავი. მანამდე ვიმუშავე სახალხო დამცველის აპარატშიც ), რაღაც გარემოებების გამო არ მომწონდა სამსახური და ცვლილებაზე ვფიქრობდი. ერთ მშვენიერ დღეს, თანამშრომელმა მითხრა, რომ ეკონომიკის სამინისტროში იყო ვაკანსია და მირჩია, ბედი მეცადა. მივედი გასაუბრებაზე, 2-ჯერ შევხვდი იურიდიული სამსახურის უფროსს, მოვეწონე და მინისტრთან შეხვედრა შემომთავაზა. წარმოდგენა არ მაქვს, ვინაა მინისტრი, ამიტომ ვიფიქრე, დავგუგლავ, სახელი და გვარი მაინც ვიცოდე-მეთქი. დავგუგლე და გიორგი გახარია ამომიგდო. ასე "დაგუგლული“ მივედი გახარიასთან, ვერ შემხვდა, თანაშემწემ ბოდიში მომიხადა, ფიზიკურად ვერ გხვდებათ, მაგრამ გადაწყდა თქვენი აყვანა, გილოცავთ სამსახურის დაწყებასო. მერე ისე მოხდა, კვირაში ერთხელ გვიწევდა მინისტრთან სამართლებრივი აქტების ექსპერტიზების გავლა და ჩემს უფროსთან ერთად ავდიოდი მინისტრ გახარიასთან. ვინც გიორგის იცნობს იცის, რომ მას ძალიან უყვარს დეტალებში ჩასვლა-ჩაძიება, ზედაპირულობა მისთვის მიუღებელია და, შესაბამისად, სულ მომზადებულები შევდიოდით. მახსოვს, ერთხელ რაღაც კანონპროექტი გამოჰქონდა, ჩვენთან შეაფასა და შევეწინააღმდეგე, ჩემი აზრის ახსნა დავიწყე, გავმართეთ დისკუსია. ისეთი პერიოდია, მარტო სახელი იცის და ზოგჯერ ავიწყდება, რომ ანა ვარ, რიგითი თანამშრომელი. გიორგის სულ მოსწონდა თანამშრომლებთან ურთიერთობა, მარტო მენეჯმენტთან არა, რაც მენეჯერში ძალზე დასაფასებელია. ბოლოს ის თავის, მე კი ჩემს აზრზე დავრჩით და გავაგრძელეთ მუშაობა.
მას მერე გამოხდა ხანი, ერთ-ერთ მორიგ შეხვედრაზე ვართ მინისტრთან სამართლებრივ საკითხებზე და მეუბნება, - შენ დარჩიო. ცოტა არ იყოს, გამიკვირდა. გიორგი მეუბნება, შენზე მომიყევიო, კითხვებს მისვამს ოჯახზე, მეგობრებზე... ცდილობს, უკეთ გამიცნოს, ბლიც ინტერვიუსავით გამოუვიდა. ბოლოს მითხრა, კაი, ახლა გაიქეციო. ვერ მივხვდი, რა უნდოდა. ორ დღეში საინფორმაციოდან ვიგებ, რომ გახარია გადაჰყავთ შსს მინისტრად. დილით ვერაზე სახლიდან ეკონომიკის სამინისტროსკენ ფეხით მივკაკუნობ, გვერდით მანქანა ჩერდება და გიორგის მოადგილე მაწვდის ტელეფონს, ყურმილში გახარიას თანაშემწე მეუბნება, მინისტრი გიბარებს, პირდაპირ შსს-ში მოდიო. როგორც კი წავიდა, გიორგიმ თან წამიყვანა და იურიდიული დეპარტამენტის უფროსის მოადგილედაც დავინიშნე, მალევე ადმინისტრაციის დირექტორის მოადგილედ გადამიყვანა. შსს დღემდე ჩემი საყვარელი სამსახურია, ეს წლები ყველაზე რთული, მაგრამ საინტერესო იყო. მერე გიორგი პრემიერად გადავიდა და, რა თქმა უნდა, იმავე დღეს მეც გავყევი - თავიდან პრემიერის აპარატის უფროსის მოადგილე ვიყავი, შემდეგ ადამიანის უფლებათა სამდივნოს ხელმძღვანელი.
"წუწუნ-წუწუნით მივედი პარტიაში“
- კოვიდი ცოტა განელებული იყო და "ქართულმა ოცნებამ“ გადახალისების მიზნით ახალი სახეების ძებნა დაიწყო. ერთ-ერთი, ვისაც პრემიერმა რეკომენდაცია გაუწია, მე ვიყავი, ოღონდ, როცა ეს პირველად მითხრა, პარტიაში უნდა გაგესაუბრონო, ვუთხარი - არ მინდა-მეთქი. მანამდე ხომ მტკიცედ მქონდა გადაწყვეტილი, რომ პოლიტიკოსი არ გავხდებოდი და ამიტომ. მოკლედ, გახარიას გამოსდის ადამიანის დარწმუნება და წუწუნ-წუწუნით მივედი პარტიაში, გავიარე გასაუბრება, ტესტები, და "მუღამშიც“ კი შევედი, ნეტა, რამდენს გადავლახავ-მეთქი. ბოლოს მოხდა ისე, რომ გიორგიმ გამომიცხადა, შენ უკვე სიაში ხარ, გენაცვალეო. 2020 წლის დეკემბერში გავხდით პარლამენტარები და თებერვალში გიორგი გადადგა. მაშინვე ვფიქრობდი იქაურობის დატოვებას, ვინაიდან მიუხედავად იმისა, რომ წლების განმავლობაში ვიყავი მხარდამჭერი, ის "ოცნება“ უკვე აღარ მომწონდა, ის პარტია აღარ იყო, რომელსაც თავის დროზე ხმას ვაძლევდი. "ოცნებიდან“ აპრილში გამოვედით და მერე ისე მოხდა, რომ მალევე გადავწყვიტეთ ახალი პარტიის - "საქართველოსთვის“ შექმნა.
"მისგან ბევრი რამ მისწავლია და დღესაც ვსწავლობ“
- გიორგის უფრო მენტორად აღვიქვამ. როცა მასთან "დაგუგლული“ მივედი, მაშინ ჩემთვის მხოლოდ მინისტრი იყო. დრომ მოიტანა და ამ ადამიანს ჩემს ცხოვრებაზე დღემდე დიდი გავლენა აქვს, არა მხოლოდ კარიერული ზრდის თვლასაზრისით, მისგან ბევრი რამ მისწავლია და დღესაც ვსწავლობ. თქვენ რომ გენახათ ანა გიორგი გახარიამდე და მას მერე, ის აბსოლუტურად განსხვავებულია, ამ წლების განმავლობაში ძალიან გავიზარდე. ამიტომაც აღვიქვამ მას მენტორად. რატომ ამირჩია? სხვათა შორის, ჩვენს გუნდში გამონაკლისი არ ვარ, ბევრს აქვს მსგავსი ისტორია - ნათიას, ბექას, მიშას... გიორგის გარშემო ბირთვი ვინცაა, ყველა სხვადასხვა დროს შემოკრებილი, ამასთანავე, მისთვის უცხო ადამიანები არიან. ვფიქრობ, იმიტომ დავამახსოვრდი, თავის დროზე წინააღმდეგობა რომ გავუწიე, მერე დამაკვირდა, შემისწავლა... გიორგის ზოგადად უყვარს ახალგაზრდობა, ის უბრალოდ უფროსი არაა, სიამოვნებას იღებს იმით, რომ გზრდის. ბევრი მიზეზის გამო ვცემ გიორგის პატივს და ჩემთვის ყველაზე დიდი ღირებულება, რასაც გახარიაში ვხედავ, ეს არის შინაგანი თავისუფლების ძალიან დიდი ხარისხი - არა კომპლექსები, არა - თანამდებობას გამოკიდება და მასზე დამოკიდებულება.
ლაქი, კოჭლიკო და კიდევ - ორნი
- ციმბირული ჰასკი - ლაქი ჩემთვის დადებითი ემოციების წყარო და ჩემი თერაპევტია. სამი კვირის იყო, როცა მაჩუქეს, ახლა მე-8-ე წელშია. მის გარდა, კიდევ სამი ძაღლი გვყავს. როდესაც პანდემია დაიწყო და ყველაფერი ჩაიკეტა, ჩვენთან, საგურამოში (ეზო ჯერ შემოღობილი არ გვქონდა), მოვიდა კოჭლი, გაუბედურებული ძაღლი, რომელსაც ფიზიკური დაზიანებები ჰქონდა, ყელზეც, სავარაუდოდ, მავთულის ნაჭდევი ჰქონდა, როგორც ჩანს, ახრჩობდნენ. მამა და ძმა მაშინ საგურამოში იყვნენ ჩაკეტილები, აჭამეს, ასვეს და სააქაოს მოაბრუნეს. ძაღლი თავიდან აგრესიული იყო, სავარაუდოდ, ადამიანებისგან სიმწარე ახსოვდა... ძაღლს კოჭლობის გამო კოჭლიკო დავარქვით. მერე მოხდა ისე, მამაჩემმა ღობე რომ გააკეთა, კოჭლიკო ღობის შიგნით მოხვდა, ანუ შინ დავიტოვეთ. კოჭლიკო ეპილეპტიკია, მაგრამ უსაყვარლესი, აგრესიამ სრულად გადაუარა და არის ფისოსავით. გარდა ამისა, ეზოს გარეთ ორი მოკედლებული პატარა ძაღლიც გვყავს, მამამ მათ სახლი გაუკეთა, ვუვლით, დაგვყავს ვეტთან და ა.შ. ლაქი მათთან არ მეგობრობს, როგორ იმეგობრებს, როცა მიიჩნევს, რომ ძაღლი კი არა, ჩვეულებრივი ადამიანია, ზოგადად, ძალიან დომინანტურია, სხვებს ზემოდან უყურებს და ფიქრობს, - ესენი ვინ მომითრიეს ოჯახშიო.
"წესად მექცა თვითმფრინავებში და აეროპორტებში კითხვა“
- ბევრი რამ მიტაცებს - მუსიკა, კინო, მოგზაურობა თავის აეროპორტ-თვითმფრინავიანად. ბოლო დროს, ჩემი გრაფიკიდან გამომდინარე, წიგნებს ვეღარ ვკითხულობ, ამიტომ მოგზაურობისას ჩანთაში მუდმივად მიდევს წიგნი და წესად მექცა, თვითმფრინავებში და აეროპორტებში უნდა ვიკითხო. სასაცილოა, რომ სანიშნედ ვიყენებ ბოლო ბილეთის Boarding pass (ჩაჯდომის ბილეთს). ახლაც, რემარკს ვკითხულობ და სანიშნედ ბოლოს სადაც ვიყავი, იმის ბილეთი მიდევს, ესეც რაღაცნაირად სიმბოლურად ვაქციე ჩემს ცხოვრებაში.
ძალიან ტურბულენტურ მდგომარეობაში ვართ, მაგრამ ოპტიმისტი ვარ. რომ არ მწამდეს, იქ არ ვიქნებოდი, სადაც ახლა ვარ. მჯერა, რომ ამ ქვეყნის რუსეთისკენ შემობრუნება შეუძლებელია. დღეს ნიჰილიზმი და ტურბულენცია დიდია, ადამიანები გაღიზიანებულები არიან, მაგრამ უარესებიც გამოგვივლია. ოპტიმიზმის გარდა, ლოგიკასაც ვიშველიებ და ვრწმუნდები, ყველაფერი იქნება კარგად, მაგრამ ეს მალე და უბრძოლველად არ მოვა.
ჭიათურელმა მაღაროელმა პროტესტის ნიშნად თვალები ამოიკერა. ამის შესახებ ცნობილი გახდა მაღაროელების ფეისბუკ გვერდზე გამოქვეყნებული ჩართვიდან.
გიორგი კუპატაძე მაღაროში აღდგენა ვენტილაციის ცვლის უფროსია.
ის ამბობს, რომ გადაწყვეტილება პირადად მიიღო და სხვა მაღაროელები ამის წინააღმდგენი იყვნენ.
ძალიან სასიხარულოა, რომ ედმონდ ფრიკის შენობის რეაბილიტაცია სრულდება, მაგრამ არავინ არ აღნიშნა ის ფაქტი, რომ წლების განმავლობაში აღნიშნული შენობა ეკუთვნოდა ვისოლ ჯგუფს და უპატრონოდ იყო მიტოვებული - ინგრეოდა, ასევე მინდა აღვნიშნო სამეგრელო-ზემო სვანეთის გუბერნატორის ,ალექსანდრე მოწერელიას ინიციატივით და გიორგი გახარიას უშუალო მონაწილეობით, როგორ მოხდა ამ შენობის სახელმწიფოსთვის დაბრუნება, - ამის შესახებ სოციალურ ქსელში ლაშა კილასონია წერს.
როგორც ლაშა კილასონია აცხადებს, დღეს არც გახარიაა პრემიერი და არც მოწერელია - გუბერნატორი, მაგრამ ობიექტურობა მოითხოვს ამ ადამიანებს არ დავუკარგოთ ნანგრევებად ქცეული შენობა-ნაგებობის აღდგენაში შეტანილი წვლილი.
"მახსოვს შეხვედრა, სადაც მოწერელიას თხოვნით ჩამოვიდა ნიკო ჩხეტიანი (ქართუ ფონდის ხელმძღვანელი) რა დროსაც გადაწყდა 2 შენობის სამხატვრო სასწავლებლის და ყოფილი უშიშროების შენობის სრული რეაბილიტაცია. ამ დროს მე და ჯემალი გიგიბერია ვაპროექტებდი ფოთის კულტურისა და დასვენების ცენტრალურ პარკს, ასევე აქტიურად მიმდინარეობდა ჰიდროტექნიკუმის სრული რეაბილიტაცია, ასევე მრავალ საესკიზო პროექტზე ვიმუშავე ალექსანდრე მოწერელიასთან ერთად, მაგრამ სამწუხაროდ ვერ მოვასწარით ყველა ესკიზის პროექტად გარდაქმნა და დასრულება. დღეს არც გახარია არის პრემიერი და არც მოწერელია არის მმართველ გუნდში და არც გუბერნატორია, მაგრამ ობიექტურობა მოითხოვს, რომ ამ ადამიანებს არ დავუკარგოთ ეს დამსახურება და წვლილი, რომლებმაც ნანგრევებად ქცეულ შენობა-ნაგებობებს მეორე სიცოცხლე აჩუქეს.", - წერს ლაშა კილასონია.
