Jump to content
Planeta.Ge

tvati

სტუმარი
 View Profile  მათი აქტივობის ნახვა

  • პოსტები

    13.345

  • შემოუერთდა

  • ბოლო ვიზიტი

 Content Type 

ბლოგ პოსტები დაპოსტილი tvati -ს მიერ

  1. tvati
    რატი ბრეგაძის თქმით, პარლამენტს საგაზაფხულო სესიაზე წარედგინება კანონპროექტი, რომელიც ბინიდან მდგმურის გამოსახლებას გაამარტივებს.
    22 იანვარს, მთავრობის სხდომის დასრულების შემდეგ გამართულ ბრიფინგზე ბრეგაძემ თქვა, რომ კანონპროექტზე მუშაობა უკვე დასრულებულია. საკანონმდებლო ცვლილებების ძალაში შესვლლის შემდეგ კი მოქალაქეებს „გაუმარტივდებათ ის სამართლებრივი ურთიერთობები, რაც უკავშირდება ქირასა და იჯარას”.
    რაც შეეხება გამოსახლებას – დღეის მდგომარეობით მაშინ, როცა მდგმური არ იხდის ქირის საფასურს, ბინის მფლობელს არ აქვს სამართლებრივი მექანიზმი, გარდა სასამართლოში ჩივილისა.
  2. tvati
    ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, ჯოზეფ ბორელმა ევროკავშირის საგარეო საქმეთა მინისტრების შეხვედრის შემდეგ გამართულ პრესკონფერენციაზე განაცხადა, რომ თებერვლის დასაწყისში კიევს ეწვევა.
    „მინისტრები შეთანხმდნენ, რომ ახლა არ არის ის დრო, რომ უკრაინის მიმართ ჩვენი მხარდაჭერა შევასუსტოთ, პირიქით, დროა მეტი გავაკეთოთ და უფრო სწრაფად: ფინანსური რესურსებით, სამხედრო აღჭურვილობით, ჯარისკაცების წვრთნებით და ყველაფრით, რაც უკრაინას თავის დასაცავად სჭირდება“, - განაცხადა ჯოზეფ ბორელმა.
    ჯოზეფ ბორელმა აღნიშნა, რომ ევროკავშირის წევრ ქვეყნებს შორის რუსული გაყინული აქტივებიდან მიღებული შემოსავლების გამოყენების შესახებ პოლიტიკური შეთანხმება არსებობს. ასევე, მიმდინარეობს დისკუსიები უკრაინის იარაღით მხარდაჭერის ფონდის შესახებ.
    „იმედი მაქვს, ჩვენ მივაღწევთ შეთანხმებას, რომ ევროპის მშვიდობის ფონდი 5 მილიარდი ევროთი შევავსოთ, რათა უკრაინის დახმარების ფონდი შეიქმნას“, - აღნიშნა ბორელმა.

    იპნ
  3. tvati
    ჯორჯ ბუშის ქუჩაზე, დასუფთავების სამსახურის თანამშრომელს მსუბუქი ავტომობილი დაეჯახა. შემთხვევა დღეს დილით მოხდა.
    გავრცელებული ინფორმაციით, სასწრაფო სამედიცინო დახმარების ჯგუფმა დაშვებული ქალი კლინიკაში გადაიყვანა.
    მედიის ცნობით, ქალი უგონო მდგომარეობაში იმყოფებოდა.

    იპნ
  4. tvati
    დღესდღეობით, ყველა ვინც თავისუფალ სამყაროში თავს ნეიტრალურად წარმოაჩენს ან უკრაინისა და რუსეთის მიმართ თანაბარ დისტანციას ინარჩუნებს, პოლიტიკურ ჯოჯოხეთში ყველაზე ბნელ ადგილს იმსახურებს , - ამის შესახებ პოლონეთის პრემიერ-მინისტრმა, დონალდ ტუსკმა ვოლოდიმირ ზელენსკისთან ერთად გამართულ ბრიფინგზე განაცხადა.
    პოლონეთის პრემიერ-მინისტრმა აღნიშნა, რომ უკრაინა მთელი მსოფლიოს უსაფრთხოებისთვის იბრძვის.
    „ეს ლოზუნგი არ არის. ეს ცარიელი სიტყვები არ არის იმის შესახებ, რომ აქ თავისუფალი სამყაროს ბედი წყდება“, - აღნიშნა დონალდ ტუსკმა.
    დონალდ ტუსკმა ვოლოდიმირ ზელენსკისთან შეხვედრის შემდეგ განაცხადა, რომ პოლონეთი უკრაინის უსაფრთხოების გარანტიების შესახებ „დიდი შვიდეულის“ სახელმწიფოების დეკლარაციას შეუერთდა.

    იპნ
  5. tvati
    "კორუფცია და კორუფციასთან ბრძოლა იქნება ერთ-ერთი მთავარი საკითხი, რომელზეც ყოველთვის ვილაპარაკებთ და უკომპრომისოები ვიქნებით."

     მიშა დაუშვილი, პარტია "საქართველოსთვის" წევრი, დეპუტატი. 

    ვიდეო: https://www.facebook.com/ForGeoGe/videos/1459175771662307/
  6. tvati
    საქართველოს ყოფილი პრემიერ-მინისტრი და პარტია „საქართველოსთვის“ ლიდერი გიორგი გახარია აცხადებს, რომ 2024 წლის არჩევნებზე მისი პარტია არავისთან ალიანსს არ გეგმავს და მონაწილეობას მარტო მიიღებს.
    “არავისთან გაერთიანებას არ ვგეგმავთ, არ ვაპირებთ და არანაირი გაერთიანება არავისთან 2024 წლის არჩევნებისთვის არ იქნება. დაივიწყეთ ეს. ამათ ალაპარაკებთ შიში და მერე ცდილობენ ხან იქ მიგვაწებონ, ხან ამას მიგვაწებონ, იქ რაღაც ზღაპრები მოყვნენ. არანაირი გაერთიანებები არ იქნება. ამ არჩევნებზე ჩვენ წავალთ მარტო და ამ არჩევნებზე ჩვენ გავიმარჯვებთ მარტო”, – ამბობს გახარია ინსტაგრამის ოფიციალური გვერდით გავრცელებულ ვიდეო-ჩანაწერში.
    ამავე თემაზე:
    “პატარა მშიშარა ბიჭებს ივანიშვილი უკვე ბევრგან ჰყავთ ჩაშვებული”

    ნეტგაზეთი
  7. tvati
    "წყალ­ტუ­ბოს ახა­ლი სი­ცო­ცხლე" პრო­ექ­ტის ფარ­გლებ­ში სა­ხელ­მწი­ფომ 6 ყო­ფი­ლი სა­ნა­ტო­რი­უ­მი უკვე გა­ყი­და. გა­ყი­დუ­ლი ობი­ექ­ტე­ბის ჯა­მურ­მა ღი­რე­ბუ­ლე­ბამ 31 257 300 ლარი შე­ად­გი­ნა.
    ქო­ნე­ბის ეროვ­ნუ­ლი სა­ა­გენ­ტოს მიერ "ბიზ­ნესპრეს­ნი­უ­სის­თვის“ მო­წო­დე­ბუ­ლი ინ­ფორ­მა­ცი­ის მი­ხედ­ვით, გას­ხვი­სე­ბულ სა­ნა­ტო­რი­უ­მებს შო­რი­საა - "წყალ­ტუ­ბო“, "მე­დეა“, "თბი­ლი­სი“, "ივე­რია“, "სამ­გუ­რა­ლი“ და "უშიშ­რო­ე­ბა. სა­ნა­ტო­რი­უ­მე­ბის ნა­წი­ლი უცხო­ელ­მა ინ­ვეს­ტო­რებ­მა, ნა­წი­ლი კი ად­გი­ლობ­რივ­მა ბიზ­ნეს­მე­ნებ­მა იყი­დეს.
    "ბიზ­ნესპრეს­ნი­უ­სი“ გთა­ვა­ზობთ, თუ ვის ეკუთ­ვნის კომ­პა­ნი­ე­ბი, რომ­ლებ­მაც წყალ­ტუ­ბოს სა­ნა­ტო­რი­უ­მე­ბი იყი­დეს:
      სა­ნა­ტო­რი­უ­მი "წყალ­ტუ­ბოს“, მფლო­ბე­ლია "გოლ­დენ თა­უ­ე­რი“. სა­მე­წარ­მეო რე­ესტრის მი­ხედ­ვით, კომ­პა­ნია 2021 წლის ივ­ლის­ში და­რე­გის­ტრირ­და. ბოლო მო­ნა­ცე­მე­ბით, კომ­პა­ნი­ის 49%-იან წილს ეგ­ვიპ­ტის მო­ქა­ლა­ქე საიდ მო­ჰა­მედ სა­ლაჰ აბ­დელ­რაჰ­მან აჰ­მე­დი ფლობს, 51% კი ეკუთ­ვნის ყა­ტა­რის მო­ქა­ლა­ქეს ნა­ი­ეფ ეიდ მ.ტ. ალ-ტა­ნის.
    სა­ნა­ტო­რი­უ­მი "მე­დეა“ კომ­პა­ნი­ამ "ასი გრუფ ჰო­თელს ჯორ­ჯი­ამ“ შე­ი­ძი­ნა. კომ­პა­ნია 2021 წელს და­რე­გის­ტრირ­და. 100%-იან წი­ლის მფლო­ბე­ლი ეგ­ვიპ­ტის მო­ქა­ლა­ქე ხა­ლედ მო­ჰა­მედ აბ­დელ­მო­ნებ კან­დილ­სია.

     
    სანატორიუმი "თბილისი", 2016 წელს დარეგისტრირებული შპს „აკას“ მფლობელობაშია. კომპანიის 97%-იან წილს ჯამათა ჩარკვიანი, 3%-იანს კი ლავრენტი ჯინჭარაძე ფლობს.
    სანატორიუმი "ივერია" შპს "ივერია პალასმა" შეიძინა. ეს უკანასკნელი ქართულ ბაზარზე 2017 წლიდან ოპერირებს. კომპანიის 40%-ს თურქეთის მოქალაქე ოქტაი კივანჩი ფლობს, 30%-ს - შპს „ლასკო კაპიტალ ჯორჯია“, რომლის 100%-იანი წილი კვიპროსში რეგისტრირებულ ლასკო კაპიტალ ლიმიტედს ეკუთვნის. "ივერია პალასის" დარჩენილ კიდევ 30%-ს „თიარჯი ფაუერი“ ფლობს, ამ უკანასკნელის მესაკუთრე კი გიორგი დევაძეა.
    სანატორიუმი "სამგურალის" შპს „ჰარმონია წყალტუბომ" იყიდა. რეესტრის მიხედვით, კომპანია 2023 წელს დარეგისტრირდა. „ჰარმონია წყალტუბოს" წილები კი ასე ნაწილდება: ნათია ნაცვლიშვილი - 41%; გერმანიის მოქალაქე ვიქტორი იგნატიევი - 51%; ნატალია წერეთელი, რომელიც საქართველო-რუსეთის მოქალაქეა, მხოლოდ 8%-იანი წილის მფლობელია.
    სანატორიუმი „უშიშროება“ შპს „ტანდემ ესთეიტიმ“ იყიდა. კომპანიის მფლობელია გერმანიის მოქალაქე ვიქტორ იგნატიევი.
    ცნობისთვის, წყალტუბოს კურორტის აღდგენისა და განვითარების კონცეპტუალური გეგმის ფარგლებში, საჭირო ინვესტიციების მოსაზიდად, ეკონომიკის სამინისტროს სახელმწიფო ქონების ეროვნულმა სააგენტომ ბიზნეს სექტორს წყალტუბოს 14 ყოფილი სანატორიუმის საპრივატიზებო პაკეტი წარუდგინა, რომელთა ღირებულება 50 მლნ ლარს შეადგენს. დღეის მდგომარეობით უკვე პრივატიზებულია ყოფილი სანატორიუმები „თბილისი“, „მედეა“, „წყალტუბო“, „ივერია“, „სამგურალი“ და „უშიშროება“. გაყიდული ობიექტების ჯამურმა ღირებულებამ 31 257 300 ლარი შეადგინა. ქონების ეროვნული სააგენტოს ცნობით, დარჩენილი სანატორიუმების პრივატიზების პროცესი აქტიურად გრძელდება.

    ამბები
  8. tvati
    კორუფციაზე საუბარი სურს ივანიშვილს? - მოიყვანოს გენერალური პროკურორი და წარადგინოს ანგარიში;

     ინსტიტუტების გაძლიერებაზე საუბრობს? - შეიტანოს კონსტიტუციაში ცვლილება და ხალხმა აირჩიოს პირდაპირი წესით პრეზიდენტი;

     პოლიტიკური პასუხისმგებლობა და დამბალანსებლის მითის გამყარება უნდა? - აქ არის გახარია, რომელმაც პოლიტიკური დებატები შესთავაზა, დაუჯდეს და ელაპარაკოს;

      არც ერთ საკითხთან დაკავშირებით, ივანიშვილს არ ეყო პოლიტიკური გამბედაობა გამოსულიყო და ეპასუხა.

     ბექა ლილუაშვილი, საპარლამენტო პოლიტიკური ჯგუფი "საქართველოსთვის" თავმჯდომარე.

    ვიდეო: https://www.facebook.com/ForGeoGe/videos/1076817200019688/
  9. tvati
    "ივანიშვილი ბიზნესიდანაც ისე წავიდა, როგორც ქართული პოლიტიკიდან ? დაარქვას ყველაფერს თავისი სახელი. სად არის საუბარი ლაგუნა ვერესთან, იპოდრომის მიმდებარე ტერიტორიებთან დაკავშირებით? როგორც ჩანს, ამაზე იმიტომ არ საუბრობს, რომ თავისივე ბიზნესინტერესებთან არის დაკავშირებული."      ბექა ლილუაშვილი, პარტია "საქართველოსთვის" წევრი, დეპუტატი. 

    ვიდეო:  https://www.facebook.com/ForGeoGe/videos/3608842902777510/ 
  10. tvati
    საქართველოს სახალხო დამცველმა არაქართულენოვანი სკოლების/სექტორების მასწავლებელთა კარიერული ზრდის მიმართულებით გამოკვეთილი პრობლემების აღმოფხვრისა და დისკრიმინაციის თავიდან აცილების მიზნით, ზოგადი წინადადებით მიმართა საქართველოს განათლებისა და მეცნიერების სამინისტროს.
    ინფორმაციას ომბუდსმენის აპარატი სოციალურ ქსელში ავრცელებს.
    აპარატის ცნობით, სახალხო დამცველის აპარატს არაქართულენოვანი სკოლების/სექტორების 461 მასწავლებელმა მიმართა, ისინი მიუთითებდნენ რომ განათლების სისტემაში გატარებული რეფორმები სათანადოდ ვერ პასუხობს ეთნიკური უმცირესობების წინაშე მდგარ მთელ რიგ სისტემურ გამოწვევებს.
    „განსაკუთრებით აქტუალურად იკვეთება პრაქტიკოსი მასწავლებლების მიერ, უფროსი, წამყვანი და მენტორი მასწავლებლის სტატუსის მოპოვების სირთულე, რაც მათი პრაქტიკოსი მასწავლებლების კატეგორიიდან ამორიცხვას და მასწავლებლის სტატუსის ჩამორთმევას გამოიწვევს.
    სპეციფიკური საჭიროებების გამოვლენის მიზნით და მათზე საპასუხოდ, განიხილოს პროფესიული განვითარების სქემა და შესაბამის უწყებებთან კოორდინირებული თანამშრომლობით, დაგეგმოს აქტივობები, რომლებიც დროულად და ეფექტიანად უზრუნველყოფს არაქართულენოვანი სკოლების/სექტორების მასწავლებლებისთვის სტატუსების ცვლის შესაძლებლობას; სახელმწიფო ენის სწავლების პროგრამის პოპულარიზაციის მიზნით, გააფართოოს პროგრამის განხორციელების გეოგრაფიული არეალი, ეთნიკური უმცირესობებით კომპაქტურად დასახლებულ ყველა ტერიტორიულ ერთეულში და დანერგოს ეთნიკური უმცირესობების წარმომადგენელი უფროსი თაობის საჭიროებებზე მორგებული სწავლების კომპონენტები.

    publika
  11. tvati
    19 იანვრიდან აია სოფიაში  ახალი წესები მოქმედებს, ერთმანეთისგან განცალკევებულია შესასვლელები მომლოცველთათვის და ტურისტებისთვის, რომელთაც აია სოფიას დათვალიერება უნდათ.
    ცვლილებები თურქეთის კულტურისა და ტურიზმის სამინისტროს მიერ წამოწყებული სარესტავრაციო სამუშაოების ფარგლებში განხორციელდა. ისინი, ვინც მოსალოცად მიდიან აია-სოფიაში, სულთანაჰმეთის მოედნის იმპერიული კარიბჭიდან შევლენ. ისინი კი, ვისაც ისტორიული აია სოფიას მონახულება სურს, ტურს აჰმედ III-ის შადრევნის მოპირდაპირე მხარეს კარიდან დაიწყებენ და სვლას გალერეის სართულზე გააგრძელებენ.
    ტურისტული მიზნებით აია სოფიაში სტუმრობის საფასური 25 ევრო 15 იანვარს გახდა, მანამდე უფასო იყო. 
    “მაგრამ მაშინაც კი, თუ თქვენ მზად ხართ გადაიხადოთ 25 ევრო აია სოფიას ტურისტული სექციის მოსანახულებლად, გზად ოფიციალური განცხადება გადაგეღობებათ: ”ამ სექციაში თურქები არ დაიშვებიან”. თუ ეცდებით, რომ მეჩეთის სექციაში მოსალოცად შეხვიდეთ, გეტყვიან, რომ პარასკევის ლოცვაზე მიხვიდეთ, თუ ქალი ხართ, 14:30 საათის შემდეგ”, — წერს თურქი ჟურნალისტი ადგილობრივ მედიაში.
    პარასკევის ლოცვაზე დასწრება ქალებს აკრძალული არ აქვთ, ოფიციალურად, ეს “სავალდებულო არაა”, თუმცა არც მიღებულია.
    “აია სოფიას ტოვებთ და თავში მრავალი შეკითხვა გიტრიალებთ: თუ თან თურქეთის რესპუბლიკის მოქალაქე ხართ და თან ადგილობრივი ტურისტი, რომელი შესასვლელით უნდა ისარგებლოთ? როგორ უნდა მოიქცნენ თურქეთის მოქალაქე ქალები ლოცვის დროს? შეიძლება უცხოელმა ტურისტმა ბილეთები შეიძინოს და გალერეას ლოცვის დროს ესტუმროს?” — კითხულობს თურქი ჟურნალისტი.
    აია სოფიას დანიშნულება რამდენჯერმე შეეცვალა. დღემდე ის თურქეთის ერთ-ერთ ყველაზე პოპულარული ტურისტული ღირსშესანიშნაობაა. ისტორიულად უმნიშვნელოვანესი გუმბათოვანი ნაგებობა სტამბოლში, ფათიჰის უბანში, სულთანაჰმეთის მოედანზე მდებარეობს და ყოველწლიურად მილიონობით ტურისტს მასპინძლობს. 532 წელს, როდესაც იუსტინიანე I-მა მისი მშენებლობის ნებართვა გასცა, ქალაქს კონსტანტინოპოლი ერქვა და ბიზანტიის იმპერიის დედაქალაქის სტატუსი ჰქონდა.
    აია სოფია 9 საუკუნის განმავლობაში იყო აღმოსავლეთის მართლმადიდებელი საპატრიარქოს ცენტრი. 1204 წელს კათოლიკურ ტაძრად გადაკეთდა ჯვაროსანთა მეოთხე ლაშქრობის შემდეგ. ტაძარი 1261 წელს კვლავ დაიბრუნა მართლმადიდებელმა ეკლესიამ. სურათი შეიცვალა 1453 წელს, როდესაც ოტომანებმა, მეჰმედ II-ის მმართველობის ქვეშ, დაიკავეს კონსტანტინოპოლი და აია სოფია მეჩეთად გადააკეთეს.
    I მსოფლიო ომის, ოსმალეთის იმპერიის დაშლისა და თურქეთის რესპუბლიკის დაარსების შემდეგ, 1934 წლის გადაწყვეტილებით, ახალი რესპუბლიკის პირველმა, სეკულარული რეფორმებით ცნობილმა პრეზიდენტმა, მუსტაფა ქემალ ათათურქმა აია სოფია მუზეუმად გადააკეთა. შენობას მუზეუმის სტატუსი ჰქონდა 2020 წლამდე, 1985 წლიდან კი იუნესკოს მსოფლიო მემკვიდრეობის ძეგლების ნუსხაშია.
    აია სოფიას მეჩეთად გადასაკეთებლად ნაბიჯების გადადგმა 2020 წლის ივნისში დაიწყო. სახელმწიფო საბჭომ გააუქმა 1934 წლის გადაწყვეტილება, რომლითაც აია სოფიას მუზეუმის სტატუსი მიენიჭა. ამას მოჰყვა 2020 წლის 10 ივლისს “სამართლიანობისა და განვითარების პარტიის” თავმჯდომარისა და პრეზიდენტ რეჯეფ თაიფ ერდოღანის გადაწყვეტილება, აია სოფია გადასცემოდა რელიგიურ საქმეთა დირექტორატს და კვლავ გახსნილიყო მუსლიმი მომლოცველებისთვის. 1500- წლიანი ისტორიის მქონე აია სოფია კვლავ მეჩეთად იქცა. 2020 წლის 24 ივლისს, 86-წლიანი პაუზის შემდეგ, აია-სოფიაში პირველი პარასკევის ლოცვა ჩატარდა.
    ურბანულ გეგმებსა და რუკებზეც დასახელება მუზეუმი შეიცვალა, როგორც “აია სოფიას დიდი მეჩეთი და კომპლექსი”.
    მეჩეთად გადაკეთების შემდეგ, 2020 წლიდან დღემდე, აია სოფიაში შესვლა უფასო იყო ტურისტებისთვის.

    netgazeti
  12. tvati
    საქართველოს მთავრობის სხდომაზე რესპუბლიკური საავადმყოფოს შენობის დემონტაჟზე იმსჯელეს.
    პრემიერ-მინისტრ ირაკლი ღარიბაშვილის განცხადებით, შენობის რეკონსტრუქცია ძირითად შემთხვევაში შეუძლებელი და არარენტაბელურია, შესაბამისად, იგეგმება ძველი შენობის დემონტაჟი და რესპუბლიკური საავადმყოფოს ბაზაზე აშენდება მრავალპროფილური, მაღალტექნოლოგიური სამედიცინო დაწესებულება.
    მისი თქმით, რესპუბლიკური საავადმყოფოს თანამშრომელთა ნაწილი სხვადასხვა სახელმწიფო კლინიკაში უკვე დასაქმდა, ნაწილი დასაქმდება და „არცერთი თანამშრომელი არ დარჩება სამსახურის გარეშე“.
    საქართველოს მთავრობის ინფორმაციით, ჯანდაცვის სამინისტრო იწყებს შენობის სადემონტაჟო პროექტისა და კლინიკის საპროექტო სამუშაოების შესყიდვის პროცედურებს. საავადმყოფოს ბაზაზე ახალი, თანამედროვე, საერთაშორისო სტანდარტების სახელმწიფო კლინიკა აშენდება და მრავალპროფილური, მაღალტექნოლოგიური სამედიცინო დაწესებულება ყველა ძირითად სამედიცინო მიმართულებას დაფარავს.
    საპროექტო სამუშაოების შესყიდვები მსოფლიო ბანკის პროცედურების  დაცვით უნდა განხორციელდეს, რაც საერთაშორისო კომპანიებს პროცესში მონაწილეობის შესაძლებლობას მისცემს.
    მთავრობის ინფორმაციით, ახალი მულტიფუნქციური, საერთაშორისო სტანდარტების სახელმწიფო კლინიკა 500-ზე მეტ საწოლზე იქნება გათვლილი. ამასთან, მოეწყობა ამბულატორია და 100-ზე მეტ საწოლზე გათვლილი დღის სტაციონარი. კლინიკაში განთავსდება ბავშვთა ონკო-ჰემატოლოგიური ცენტრი; გაიხსნება თანამედროვე სტანდარტების ცენტრალური სისხლის ბანკი; ტერიტორიაზე მოეწყობა GDP სტანდარტის აფთიაქი, სასწავლო სივრცეები, სამედიცინო ბიბლიოთეკა, ტელემედიცინის სივრცეები და სხვა. ასევე რესპუბლიკური საავადმყოფო შეინარჩუნებს საუნივერსიტეტო კლინიკის სტატუსს, რაც კლინიკურ აქტივობებში მომავალი მედიკოსების სრულ ინტეგრაციასა და შესაბამისი ინფრასტრუქტურის უზრუნველყოფას გულისხმობს.
    ჯანდაცვის სამინისტროს განცხადებით, ახალი მულტიფუნქციური საავადმყოფოს მშენებლობის დასრულებამდე ჯანდაცვის სამინისტრო უზრუნველყოფს შესაბამისი ახალგაზრდა კვალიფიციური კადრების მომზადება-გადამზადებას სპეციალური პროგრამით როგორც ქვეყნის შიგნით, ისე მის ფარგლებს გარეთ.
    საქართველოს მთავრობა ბოლო ერთი წელია აქტიურად საუბრობს რესპუბლიკური საავადმყოფოს ძველი შენობის დემონტაჟის საჭიროებაზე. მედიკოსები აქციებს მართავდნენ საავადმყოფოს დანგრევის წინააღმდეგ.

    netgazeti
  13. tvati
    24 წლის ერნა შკოიანი თბილისის სახელმწიფო უნივერსიტეტის მედიცინის ფაკულტეტის მეექვსე კურსის სტუდენტია.  ნეტგაზეთთან იგი საკუთარ ამბავს ჰყვება იმის შეახებ, თუ რა გამოწვევების წინაშე დგანან ეთნიკური სომხებით დასახლებულ მუნიციპალიტეტებსა და სოფლებში ახალგაზრდები და რისი ცოდნა აშორებთ მათ საქართველოს სხვა მოქალაქეებისგან. 
    სოფელში ცხოვრება და ქართული ენა
    დავიბადე ნინოწმინდაში, სოფელ ეშტიაში, ტრადიციულ სომხურ ოჯახში. იქ გავიზარდე და სკოლაც იქ დავამთავრე. ჩვენთვის, ბავშვებისთვის სოფელში ცხოვრება რთული იყო. ელემენტარულად, რაიმე წრეზე რომ გვევლო, მუნიციპალიტეტში უნდა ჩავსულიყავით, რასაც ცალკე დრო და ცალკე ფული სჭირდებოდა. ჩემი ბავშვობის პერიოდში გზებიც არ იყო ნორმალური, რომ ეშტიიდან ნინოწმინდაში წავსულიყავით. განსაკუთრებით, დიდი პრობლემა იყო ზამთარში საავადმყოფომდე ჩასვლა. 
    ახლა უკეთესი მდგომარეობაა, ბოლო წლებში გზებიც გაკეთდა და სოფელსაც მეტი რესურსი გაუჩნდა, იქვე ასწავლოს ბავშვებს რამე. ჩვენს სოფელში ქართული ენის შემსწავლელი ცენტრიც კი გაიხსნა, რაც ჩემს ბავშვობაში არ ყოფილა.
    ეშტია საკმაოდ დიდი სოფელია, ორი სრულიად სომხურენოვანი სკოლით. ქართულს, როგორც საგანს, ისე ვსწავლობდით.  თუმცა ელემენტარულ სიტყვებს მაინც ვერ გავცდით. სამი წელი ვსწავლობდით მხოლოდ მარტივ ფრაზებს – მე დილით რვა საათზე გავიღვიძე, ვისაუზმე, სკოლაში წავედი და და ა.შ. 
    შემდეგ სოფელში ახალი მასწავლებელი ჩამოვიდა, ჩვენი თანასოფლელი, თბილისში განათლებამიღებული სომეხი გოგო, რომელიც ჩვენი სოფლის ერთ-ერთი სკოლის დირექტორი გახდა. მე და ჩემი და დედამ მასთან მიგვიყვანა ქართულის შესასწავლად. დედაჩემმა თავად არ იცის ქართული ენა, თუმცა ძალიან უნდოდა, შვილებს გვცოდნოდა. 
    მე მაშინ მეშვიდე კლასში ვიყავი, ჩემი და – მერვეში. ჩვენმა მასწავლებლმა დედაჩემს სთხოვა, მის სკოლაში გადავსულიყავით, რომ ქართული უკეთესად გვესწავლა. ასე შევიცვალე სკოლა ჩვენსავე სოფელში. იქ მოსწავლეებმა უკვე საკმაოდ კარგად იცოდნენ ქართული. მათ დონემდე ასასვლელად ერთი ორი წელი დამჭირდა. 
    ნინოწმინდაში ენის სწავლას ისიც უშლის ხელს, რომ ქართულ ენას პრაქტიკულად ვერ ვიყენებთ ვერსად. მშობლების სახლში ტელევიზორი დღემდე მხოლოდ რუსულ არხებზეა ჩართული. ბავშვობიდან მხოლოდ რუსულად და სომხურად ვსაუბრობდით გამართულად. დღესაც ოჯახში ქართული მხოლოდ მე და ჩემმა დამ ვიცით. 
    რუსეთის ფაქტორი
    ზუსტად ქართულის არცოდნის გამო, ბევრი ახალგაზრდა რუსეთში  აგრძელებს სწავლას და ცხოვრებას. მამაჩემსაც ძალიან უნდოდა, რომ ჩვენც, მთელი ოჯახი საცხოვრებლად რუსეთში წავსულიყავით, იქ გვესწავლა მე და ჩემს დას, მაგრამ დედამ უარი თქვა იმ მიზეზით, რომ ცხოვრების თავიდან დაწყება სხვა ქვეყანაში, მაშინ, როდესაც აქ სახლ-კარი გვქონდა, უკვე არ უნდოდა. 
    მამაჩემი რუსეთის მოქალაქეა. იქ მიიღო განათლება საბჭოთა კავშირის დროს, ჯარიც იქ გაიარა და მუშაობაც იქ დაიწყო. მხოლოდ დაქორწინების შემდეგ დაბრუნდა საქართველოში, ნინოწმინდაში. თუმცა, ისევე როგორც თითქმის ყველა კაცი ჩვენს რეგიონში, წელიწადის უმეტესი დრო ისიც რუსეთში მუშაობს და ფულს გვიგზავნის. ჩვენი რეგიონიდან კაცები აპრილ-მაისიდან დეკემბრამდე რუსეთში არიან. სოფლები, ფაქტობრივად, ცარიელდება კაცებისგან. ვრჩებით მხოლოდ ქალები და ის თითზე ჩამოსათვლელი კაცები, ვისაც სოფელშივე აქვს რამე სამუშაო – ან სკოლაში მუშაობენ, ან სადმე ქარხანაში. ქალებისთვის განსაკუთრებით მძიმე ტვირთია ზაფხულში შვილების მოვლა და სამეურნეო სამუშაოები. 
    რუსეთში წასვლაზე უარის შემდეგ მამამ გადაწყვიტა, სომხეთში წავსულიყავით და იქ გვესწავლა მე და ჩემს დას. მართლაც წავედით, მეთერთმეტე კლასში უკვე იქ დავდიოდი და ვემზადებოდი ერევნის სამედიცინო სასწავლებელში საბუთების ჩასაბარებლად. თუმცა, მოულოდნელად, ჩემმა დამ საქართველოში დაბრუნება და თბილისში, პედაგოგიურზე ჩაბარება გადაწყვიტა. 
    თბილისი
    ასე აღმოვჩნდი თბილისში მეც. 2018 წელი იყო. ქართულ ენაში მომზადება დავიწყე 4+1 საგანმანათლებლო პროგრამით. ერთი წელი ვისწავლე ქართული ენა, რომ გამეუმჯობესებინა უნარები. როგორც წესი, ეთნიკური უმცირესობებით დასახლებული რეგიონებიდან ჩამოსულ ახალგაზრდებს სჭირდებათ იმ დონემდე მომზადება, რომ შემდეგ სწავლა არ გაუჭირდეთ ქართულად. პროგრამის გავლის შემდეგ სამოცი კრედიტი ჩავაბარე და თსუ-ში ჩავირიცხე. 
    რამდენიმე წელია, სწავლის პარალელურად, თბილისის ერთ-ერთი კლინიკის ლაბორატორიაში ვმუშაობ. ძალიან მინდა რეზიდენტურაზე ჩაბარება კარდიოლოგიის მიმართულებით, თუმცა კონკურსი იმდენად დიდია, არ მაქვს იმედი, რომ მოვხვდები. ამ შემთხვევაში ალტერნატივად ისევ სომხეთი რჩება. იქ ბევრად მარტივია ამის გაკეთება. სწავლა დასავლეთში, გერმანიაშიც მინდოდა, მაგრამ ამისთვის სრულყოფილად ენის ცოდნაა საჭირო. 
    ინფორმაცია, რომელიც არ მქონდა ნინოწმინდაში ცხოვრების დროს
    ჯერ კიდევ ენის მოსამზადებელ კურსზე ვიყავი, როდესაც ჩემმა ხელმძღვანელმა ლექტორმა ტრენინგში მონაწილეობა შემომთავაზა. ტრენინგი შეეხებოდა თვითპრეზენტაციას, გუნდურ მუშაობას და მსგავს საკითხებს. შემდეგ, უკვე პირველ კურსზე ვიყავი, თსუ-სა და ილიას უნივერსიტეტის თანამშრომლობის ფარგლებში ახალგაზრდა ევროპელი ელჩების პროექტში შემომთავაზეს მონაწილეობა. ეს იყო NATO-სა და ევროკავშირის საინფორმაციო ცენტრის ფართომასშტაბიანი ტრენინგი. წავედი, მაგრამ წარმოდგენაც არ მქონდა, სად მივდიოდი, ან რა უნდა მესწავლა. ამ საკითხებზე საერთოდ არაფერი მქონდა გაგონილი. აღმოჩნდა, რომ ტრენინგი იყო ევროკავშირთან და NATO-სთან დაკავშირებულ მითებსა და რეალობაზე. თავიდან არ მესმოდა, ვფიქრობდი, ნეტავ რაზე ლაპარაკობს ეს ხალხი-მეთქი. 
    ტრენინგის ფარგლებშივე ოკუპაციის მუზეუმში წაგვიყვანეს. არც ამ მუზეუმზე და არც ოკუპაციაზე მქონდა იქამდე რამე ინფორმაცია. სოფლის სკოლაში კედელზე საქართველოს რუკა ეკიდა, ვიცოდით, რომ ესა და ეს ტერიტორია ოკუპირებულია, მაგრამ რას ნიშნავს ეს, რატომ და რა მოხდა, ამაზე არასოდეს არავის უსაუბრია. 
    ჩვენი ტრენინგი ითვალისწინებდა ასევე რეგიონებში, ჩვენს თემებთან შეხვედრას და მათთვის ამ მითებზე და რეალობებზე ინფორმაციის მიწოდებას. ასევე, წიგნებსა და ბროშურებს ვარიგებდით ევროკავშირზე და NATO-ზე. მიზანი იყო, მიგვეწოდებინა ახალგაზდებისთვის ის ინფორმაცია, რაც, წესით, თავის დროზე ჩვენც უნდა გვცოდნოდა. მიხაროდა, ამას რომ ვაკეთებდი, რადგან მერე ჩემსავით პირღია არ დარჩეილიყო ვინმე, როდესაც ამ საკითხებზე საუბარს მოკრავდა ყურს. 
    იმდენი ვისწავლე ამ მიმართულებით, დღეს უკვე ჩემით ვეძებ დამატებით ინფორმაციას. ორი წლის წინ ესეიების კონკურსშიც მივიღე მონაწილეობა, სადაც უნდა დაგვეწერა ესეი მითზე – “დაკარგავს თუ არა საქართველო თავის ტერიტორიებს, თუ იქნება ევროკავშირის წევრი?” გავიმარჯვე. 
    ნინოწმინდაში დღესაც არავინ გეტყვით რამე ცუდს რუსეთზე, თუნდაც უკრაინაში რუსეთის ომის კონტექსტში საჯაროდ ყველა რუსეთს გაამართლებს. რატომ? იმიტომ, რომ რუსეთია დღეს ამ ოჯახების შემოსავლის წყარო. იქაური რუბლით “ჭამს” სომეხი ხალხი აქ პურს. ჩვენი ოჯახიც ხომ მამაჩემის ფულით ცხოვრობს, რომელიც რუსეთიდან იგზავნება. და რუსული ეკონომიკაც, რომელიც უკრაინაში ომის შემდეგ ცუდ მდგომარეობაში აღმოჩნდა, უშუალოდ ჩვენი ოჯახების კეთილდღეობაზე ახდენს გავლენას. 

    netgazeti
  14. tvati
    საქართველოს პრეზიდენტი, სალომე ზურაბიშვილი ოკუპირებულ აფხაზეთში, სოხუმის გალერეაში გაჩენილ ხანძარს ეხმაურება და საერთაშორისო თანამეგობრობას მოუწოდებს, ოკუპირებულ ტერიტორიებზე საქართველოს კულტურული მემკვიდრეობის დაცვაზე იზრუნოს.
    „ხანძარი, რომელმაც ოკუპირებულ აფხაზეთში სოხუმის ეროვნული გალერეა გაანადგურა, ყველა ჩვენგანისთვის ტრაგედიაა. ვწუხვარ იმის გამო, რაც როგორც დე ფაქტო ხელმძღვანელობის, ისე რუსი ოკუპანტების მხრიდან კულტურული იდენტობის უგულებელყოფის პირდაპირი შედეგია. მოვუწოდებ საერთაშორისო თანამეგობრობას, აღადგინოს ყურადღება ოკუპირებულ ტერიტორიებზე ჩვენი კულტურული მემკვიდრეობის დაცვაზე“, - წერს პრეზიდენტი სოციალურ ქსელ X-ში გამოქვეყნებულ პოსტში.
    შეგახსენებთ, გუშინ, აფხაზურმა მედიამ გაავრცელა ინფორმაცია, რომ სოხუმში სამხატვრო გალერეაში ხანძარი გაჩნდა, რის შედეგადაც 4000-ზე მეტი ნამუშევარი განადგურდა.

    ipn
  15. tvati
    პოლონეთი უკრაინას სამხედრო დახმარების ახალ პაკეტს გადასცემს. ამის შესახებ უკრაინის პრეზიდენტმა, ვოლოდიმირ ზელენსკიმ პოლონეთის პრემიერ-მინისტრ, დონალდ ტუსკთან შეხვედრის შემდეგ განაცხადა.
    „ჩვენ პოლონეთის ურყევ მხარდაჭერას და სამხედრო დახმარების ახალ პაკეტს ვაფასებთ, ისევე როგორც თანამშრომლობის ახალ ფორმას, რომელიც უკრაინის საჭიროებებიდან გამომდინარე იარაღის უფრო მასშტაბურ შესყიდვას ისახავს მიზნად - ეს არის პოლონური სესხი უკრაინისთვის“, - განაცხადა ვოლოდიმირ ზელენსკიმ.
    ზელენსკიმ დონალდ ტუსკს მხარდაჭერისთვის მადლობა გადაუხადა და აღნიშნა, რომ უკრაინა-პოლონეთის ორმხრივი ურთიერთობების შესახებ პროდუქტიული მოლაპარაკებები შედგა.
    „ასევე, მე და პრემიერ-მინისტრმა ტუსკმა იარაღის ერთობლივად წარმოების შესაძლებლობები განვიხილეთ. მადლობა პოლონეთს უკრაინის მხადაჭერისთვის“, - აღნიშნა უკრაინის პრეზიდენტმა.

    ipn
  16. tvati
    გასული წლის ბოლო სამ თვეში (ოქტომბერი, ნოემბერი, დეკემბერი) რეადმისიის ფარგლებში, ევროკავშირის ქვეყნებიდან საქართველოში დაბრუნების შესახებ თანხმობა 971 პირზე გაიცა.
    შინაგან საქმეთა სამინისტროს სტატისტიკური მონაცემების თანახმად, აღნიშნულ სამ თვეში რეადმისიის სულ 978 განცხადებაა განხილული, საიდანაც 971-ზე თანხმობა გაიცა, 7-ზე კი - უარი.
    აღსანიშნავია, რომ ყველაზე მეტი - 565 მოქალაქის საქართველოში დაბრუნების შესახებ გადაწყვეტილება გერმანიაში მიიღეს. შემდეგ მოდის საფრანგეთი (166); საბერძნეთი (38); პოლონეთი (37); იტალია (2); შვეიცარია (25); ესპანეთი (17).
    შეგახსენებთ, რომ საქართველოსა და ევროკავშირს შორის „უნებართვოდ მცხოვრებ პირთა რეადმისიის შესახებ“ შეთანხმება 2011 წლის 1-ელ მარტს ამოქმედდა. შეთანხმების საფუძველზე ხდება ევროკავშირის ტერიტორიაზე არალეგალურად მცხოვრები საქართველოს მოქალაქეების საქართველოში დაბრუნება. შეთანხმება ასევე ითვალისწინებს მესამე ქვეყნების მოქალაქეთა საქართველოში დაბრუნებას შეთანხმებით დადგენილი პირობების საფუძველზე. შეთანხმების შესაბამისად, რეადმისიასა და ტრანზიტთან დაკავშირებულ ყველა სატრანსპორტო ხარჯს საბოლოო დანიშნულების სახელმწიფოს საზღვრამდე აანაზღაურებს მოთხოვნის წარმდგენი სახელმწიფო.

    ipn
  17. tvati

    დონალდ ტუსკი კიევში ჩავიდა

    By tvati,


    ახალი ამბები
    პოლონეთის ახალი პრემიერ-მინისტრი, დონალდ ტუსკი კიევში ჩავიდა, - ინფორმაციას პოლონეთის პრემიერის ოფისი სოციალურ ქსელში ავრცელებს.
    აღსანიშნავია, რომ ეს ტუსკის პირველი ვიზიტია უკრაინაში მას შემდეგ, რაც მან პოლონეთის პრემიერის თანამდებობა დაიკავა.
    პოლონური მედია იუწყება, რომ დონალდ ტუსკი, ვიზიტის ფარგლებში უკრაინის პრეზიდენტ ვოლოდიმირ ზელენსკის და პრემიერ-მინისტრ დენის შმიგალს შეხვდება.

    იპნ
  18. tvati
    მოვუწოდებთ „ოცნებას“, პარლამენტში მოიწვიოს გენერალური პროკურორი და მისი მონაწილეობით განიხილოს ელიტური კორუფციის ფაქტების გამოძიებაზე, კორუფციონერთა დაკავებასა და ბრალდებაზე პასუხისმგებელი მთავარი უწყების - პროკურატურის საქმიანობის ანგარიში, - ამის შესახებ პარტია „საქართველოსთვის“ თავმჯდომარის მოადგილე ნათია მეზვრიშვილმა ბრიფინგზე განაცხადა.
    მეზვრიშვილის განცხადებით, იმ პირობებში, როდესაც საქართველოს მმართველ პარტიასთან დაახლოებული ელიტური ოჯახები სულ უფრო მეტად მდიდრდებიან, საქართველოს პარლამენტი არღვევს კანონს და არ ახორციელებს პროკურატურაზე ზედამხედველობას. მეზვრიშვილის ინფორმაციით, პარლამენტს წლებია არ განუხილავს პროკურატურის საქმიანობის ანგარიში.
    „პოლიტიკური კორუფციის ფაქტებზე ჩვენი გუნდის მიერ თვეების განმავლობაში პროკურატურაში არაერთი განცხადების შეტანამ შედეგი არ მოიტანა. „ოცნების“ კორუმპირებულები და „ოცნებასთან“ დაახლოებული 25 ელიტური ოჯახი აგრძელებს ბიუჯეტიდან ხალხის ფულის მოპარვას - ნაწილი სახლში მიაქვთ, ნაწილი - პარტიის სალაროში. ხალხი ღარიბდება, ცხოვრების პირობები უარესდება, ელიტები კი კიდევ უფრო მდიდრდებიან.
    ამ ფონზე, პარლამენტი არღვევს კანონს და არ ახორციელებს პროკურატურაზე ზედამხედველობას - პარლამენტს წლებია არ განუხილავს პროკურატურის საქმიანობის ანგარიში და არ დაინტერესებულა როგორ ებრძვის კორუფციას პროკურატურა.
    ფორმალურია საპროკურორო საბჭოს სხდომებიც და ფიქტიურია პარლამენტის წარმომადგენლობა საბჭოში - საბჭოზე არ ისმის კრიტიკული ხმა პროკურატურის იმ გამოწვევებზე, რასაც პირდაპირ გავლენა აქვს მოქალაქეთა უფლებებზე. ხელისუფლების და ოპოზიციის წარმომადგენლები საბჭოს სხდომას ან არ ესწრებიან, ან კითხვებს არ სვამენ. საბჭოსადმი პარლამენტის არასერიოზული დამოკიდებულება კარგად გამოვლინდა „ოცნების“ მხარდაჭერით ოპოზიციის წარმომადგენლის არჩევისას.
     
    პროკურატურის ფუნქციაა ხალხის დაცვა კრიმინალისგან და არა კორუმპირებული ელიტებისთვის ხალხის ფულის მოსაპარად კომფორტული პირობების შექმნა და მათი დაცვა სასჯელისგან. მოქმედი გენერალური პროკურორის არჩევიდან 4 წელი გავიდა. 4 -წლიანი დუმილის შემდეგ მაინც, ხალხს უფლება აქვს, მის მიერ არჩეული პარლამენტის მეშვეობით, გენერალურ პროკურორს დაუსვას კითხვები და გაიგოს, რატომ არის დღეს პროკურატურა უმოქმედო სისტემური ელიტური კორუფციის ფაქტებზე? რატომ უწყობს პროკურატურა ხელს ხალხის ხარჯზე 25 ელიტური კორუმპირებული ოჯახის კიდევ უფრო მეტად გამდიდრებას?
    პროკურატურის დამოუკიდებლობისადმი არსებული ლეგიტიმური კითხვების ფონზე (რაც დეტალურად აისახა ევროკავშირის გაფართოების ანგარიშში), გენერალური პროკურორის მიერ საზოგადოებისთვის ხედვის წარდგენა, მათ შორის რეფორმებზე, კრიტიკულად მნიშვნელოვანია საზოგადოებისადმი პროკურატურის ანგარიშვალდებულების, ქვეყანაში წესრიგისა და მოქალაქეთა დაცულობის უზრუნველყოფისთვის.
    მოვუწოდებთ „ოცნებას“, საგაზაფხულო სესიის გახსნისთანავე, დაუყოვნებლივ დანიშნოს პროკურატურის საქმიანობის ანგარიშის მოსმენა გენერალური პროკურორის მონაწილეობით. ეს მათთვის მითუმეტეს არ უნდა იყოს პრობლემა, როცა „ოცნების“ საპატიო თავმჯდომარემ აღიარა კორუფციული რისკების მატება.
    მოვუწოდებთ გენერალურ პროკურორს, შეასრულოს საზოგადოების წინაშე ანგარიშვალდებულების და გამჭვირვალობის ფუნქცია - მოითხოვოს და პირადად წარსდგეს ანგარიშით პარლამენტის წინაშე. იმედს გამოვთქვამთ, რომ კორუფციის ფაქტების გამოძიებაზე პასუხისმგებელი მთავარი სახელმწიფო უწყება კითხვებს არ გაექცევა“,- განაცხადა ნათია მეზვრიშვილმა.

    ipn
  19. tvati
    ავღანეთში ჩამოვარდა სამგზავრო ჯეტი, რომელიც ინდოეთიდან რუსეთში ჩარტერულ რეისს ასრულებდა. რუსული მედიის ცნობით, ხომალდი რუსეთის სამოქალაქო თვითმფრინავების სახელმწიფო რეესტრში ირიცხება.
    მედიაში გავრცელებული ინფორმაციით, კატასტროფის დროს ბორტზე ეკიპაჟის 4 წევრი და 2 მგზავრი იმყოფებოდა. ავიაკატასტროფის ზუსტი მიზეზების დასადგენად შემთხვევის ადგილზე უკვე გაემგზავრა გამომძიებელთა ჯგუფი. თუმცა, პირველადი ცნობებით, თვითმფრინავმა კურსიდან გადაუხვია და მთას შეეჯახა.

    ნეტგაზეთი
  20. tvati
    საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის ინფორმაციით, თოვის და ლიპყინულის გამო, საერთაშორისო მნიშვნელობის მცხეთა–სტეფანწმინდა–ლარსის საავტომობილო გზის გუდაური(ფოსტა)-კობის მონაკვეთზე მისაბმელიანი და ნახევრადმისაბმელიანი ავტოტრანსპორტის მოძრაობა აკრძალულია, ხოლო დანარჩენი სახის ავტოტრანსპორტის მოძრაობა თავისუფალია.
    „გარემოს ეროვნული სააგენტოს ცნობით, მლეთა-გუდაურის და გუდაური(ფოსტა)–კობის მონაკვეთებზე ავტოტრანსპორტის მოძრაობა განხორციელდება გაუჩერებლად გავლის რეჟიმში, გუდაური(ფოსტა)–კობის მონაკვეთზე მხოლოდ ზვავდამცავი გვირაბების გავლით.
    აღნიშნული რეჟიმით მოძრაობა განხორციელდება საპატრულო პოლიციის უშუალო ზედამხედველობით და კოორდინაციით“, - აღნიშნულია ინფორმაციაში.
  21. tvati
    რუსეთის პრეზიდენტი, ვლადიმერ პუტინი მთელი უკრაინის ოკუპაციას ცდილობს და არასოდეს სურდა მშვიდობა,- ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.
    „მას უკრაინასთან არანაირი მშვიდობა არ სურს“, - განაცხადა ზელენსკიმ.
    გარდა ამისა, მისი თქმით, არ განიხილავს ისეთი სამშვიდობო შეთანხმების ხელმოწერას, რომლის მიხედვითაც დონბასის და ყირიმის დროებით ოკუპირებული ტერიტორიები რუსეთის ფედერაციას გადაეცემა.
    „თუ ჩვენ გვინდა შევაჩეროთ პუტინი, თუ მსოფლიოს არ სურს, რომ ეს განმეორდეს, იმისთვის, რომ ეს აგრესია რამდენიმე წელიწადში არ განმეორდეს, მაშინ ჯობია ახლავე გავუმკლავდეთ მას“, - განაცხადა ზელენსკიმ.
    მისი თქმით, ევროპაში მშვიდობა მხოლოდ მას შემდეგაა შესაძლებელი, როცა ყველა გაიგებს, რომ უკრაინა მართლაც დამოუკიდებელია.
    ამასთან, უკრაინის პრეზიდენტმა ხაზი გაუსვა, რომ დამოუკიდებლობის დასაბრუნებლად უმჯობესი, უდავოდ, პოლიტიკური გზის გამონახვაა.

    იპნ
  22. tvati
    უკრაინის პრეზიდენტის, ვოლოდიმირ ზელენსკის განცხადებით, ამ დროისთვის ვერ ხედავს კონკრეტულ დეტალებს გენერალური შტაბიდან, რომ საჭიროა 500 000 უკრაინელის მობილიზება.
    „პირადად მე, დღეს ვერ ვხედავ ნახევარი მილიონი ადამიანის მობილიზების აუცილებლობას. ჯერ არ მინახავს საკმარისი მკაფიო დეტალები, რომ ვთქვა, ნახევარი მილიონის მობილიზებაა საჭირო“, - აღნიშნა უკრაინის პრეზიდენტმა.
    ამასთან, ზელენსკიმ ხაზი გაუსვა, რომ ქვეყანაში მობილიზაცია საჭიროა, რათა მოხდეს ფრონტზე მყოფი ჯარისკაცების ჩანაცვლება.
    უკრაინის პრეზიდენტმა ასევე განმარტა, რომ სამხედროების ხელფასი და წვრთნა უკრაინის ბიუჯეტიდან ფინანსდება.

    იპნ
  23. tvati
    წერეთლის გამზირზე მიმდინარე სარეაბილიტაციო სამუშაოების გამო, დღეს, 21:00 საათიდან 22 იანვრის 07:00 საათამდე, თორნიკე ერისთავის ქუჩაზე საავტომობილო მოძრაობა ორმხრივად შეიზღუდება. ინფორმაციას თბილისის მერია ავრცელებს.
    აღნიშნულ პერიოდში, საზოგადოებრივი ტრანსპორტის მოძრაობა დროებით შეიცვლება, კერძოდ:
    „ავტობუსი N308 და მიკროავტობუსები N512 და N531 გლდანიდან იმოძრავებენ მეტროსადგურ „დიდუბის“ ზედა გასასვლელამდე და უკან;
    ავტობუსი N381 და მიკროავტობუსი N431 ავჭალის დასახლებიდან იმოძრავებენ მეტროსადგურ „დიდუბის“ ზედა გასასვლელამდე და უკან;
    ავტობუსი N333 „თბილისი მოლის“ მიმართულებით, ცოტნე დადიანის ქუჩიდან მოძრაობას გააგრძელებს მეტროსადგურ „სარაჯიშვილისკენ“, რის შემდეგაც დაუკავშირდება ჯორჯ ბალანჩინის ქუჩას და იმოძრავებს დადგენილი სქემით. უკუმიმართულებისას შეცვლილი განრიგით იმოძრავებს მეტრო „სარაჯიშვილისკენ“ და გურამიშვილის გამზირით დაუკავშირდება ცოტნე დადიანის ქუჩას, შემდეგ იმოძრავებს დადგენილი სქემით;
    ავტობუსი N386 სადგურის მოედნისკენ გადაადგილებისას, დავით გურამიშვილის გამზირიდან მოძრაობას გააგრძელებს ცოტნე დადიანის ქუჩისკენ და ფიროსმანის ქუჩით დაუკავშირდება სადგურის მოედანს. უკუმიმართულებისას ცოტნე დადიანის ქუჩით დაუკავშირდება გურამიშვილის გამზირს და შემდეგ დადგენილი სქემით იმოძრავებს. მიკროავტობუსი N550 ვარკეთილის დასახლებიდან იმოძრავებს მეტროსადგურ „დიდუბის“ ზედა გასასვლელამდე და უკან.
    თბილისის მერია ბოდიშს გიხდით შექმნილი დისკომფორტის გამო!“, - ნათქვამია თბილისის მერიის განცხადებაში.
  24. tvati
    ბათუმში, ოთხ სავაჭრო ცენტრში - “გრანდ მოლი”, “ მეტრო სითი” “ბათუმი მოლი” და "პლაზა" კინოლოგები მივიდნენ. ისინი შესაბამის სამუშაოებს ახორციელებენ.
    ოთხივე სავაჭრო ცენტრიდან მოქალაქეებისა და თანამშრომელთა სრული ევაკუაცია ცოტა ხნის წინ განხორციელდა.
    სავაჭრო ცენტრებთან მყოფი თანამშრომლები აცხადებენ, რომ ტერიტორიაზე სამართალდამცავები დაახლოებით 17:30 წუთზე გამოჩნდნენ, ბათუმის ოთხივე სავაჭრო ცენტრში მუშაობა შეჩერებულია და შენობები ყვითელი ლენტითაა შემოსაზღვრული, სადაც შესვლა დროები აკრძალულია.
    შინაგან საქმეთა სამინისტროს ჯერჯერობით ოფიციალური განცხადება არ გაუვრცელებია.

    იპნ
  25. tvati
    ბათუმში, სავაჭრო ცენტრებიდან - “გრანდ მოლი”, “ მეტრო სითი” და "პლაზა" ევაკუაცია მიმდინარეობს.
    როგორც “გრანდ მოლის” ერთ-ერთი მაღაზიის თანამშრომელმა “ინტერპრესნიუსს” განუცხადა, უსაფრთხოების სამსახურის თანამშრმლებმა დროულად შენობის დატოვება სთხოვეს, თუმცა მიზეზი არ დაუსახელებიათ.
    ერთ-ერთი ვერსიით, სავაჭრო ცენტრებიდან ევაკუაცია ნაღმის არსებობის შესახებ შეტყობინებას უკავშირდება.
    “რამდენიმე წუთის წინ, ადმინისტრაციის უსაფრთხოების თანამშრომელი მოვიდა და მკაცრად გაგვაფრთხილა, რომ სასწრაფოდ დაგვეტოვებია შენობა. მიზეზი არ გვითხრეს. მანამდე ხმაური შემოგვესმა ერთ-ერთ მაღაზიაში. გვეგონა ქურდობის ფაქტი მოხდა, ვერ გეტყვით, დეტალები არ ვიცით, ნაღმს ეძებენ, თუ რას. ერთ-ერთი ვერსიით , რომელიც სოციალურ ქსელში გავრცელდა, ალბათ ეს არის. მოქალაქეებს შენობიდან ავტომობილები გამოჰყავთ. ჩვენ შენობიდან შორს ვიმყოფებით”,- აღნიშნა ერთ-ერთი მაღაზიის თანამშრომელმა.

    იპნ
×
×
  • შექმენი...