tvati

საკონსტიტუციო ცვლილებების განხორციელების ჩანაფიქრი მიმართულია ამ საკითხის კიდევ უფრო მეტ პროპაგანდაზე - პროცესში ჩავერთვებით, რათა პროპაგანდა არ გახდეს “ქართული ოცნების” პოლიტიკური იარაღი, - ამის შესახებ საპარლამენტო პოლიტიკური ჯგუფის “საქართველოსთვის” თავმჯდომარე ბექა ლილუაშვილმა ჟურნალისტებს განუცხადა, რითაც ოჯახურ ღირებულებათა შესახებ “ქართული ოცნების“ მიერ დაგეგმილი საკონსტიტუციო ცვლილებების ინიცირებას გამოეხმაურა. როგორც ლილუაშვილმა აღნიშნა, არავის მისცემენ საშუალებას, რომ ბავშვები პოლიტიკური პროპაგანდის ინსტრუმენტად გამოიყენონ. “ჩვენ ჩავერთვებით ამ პროცესში. ჩავერთვებით იმიტომ, რომ პროპაგანდა არ გახდეს ამ საკითხის ყველაზე დიდი პროპაგანდისტის - “ქართული ოცნების” (ეს ბოლო პერიოდში ძალიან კარგად ჩანს) პოლიტიკური იარაღი. საკონსტიტუციო ცვლილებების განხორციელების ჩანაფიქრიც მიმართულია ამ საკითხის კიდევ უფრო მეტ პროპაგანდაზე. უბრალოდ, რომ “დაგუგლოთ” “ლგბტ პროპაგანდა”, სიის დასაწყისში შეგხვდებათ მამუკა მდინარაძე, როგორც ამ საკითხის მთავარი პროპაგანდისტი. ამიტომ, ჩვენ არავის მივცემთ საშუალებას პროცესში ჩართვის გზითაც, რომ ბავშვები გამოიყენოს პოლიტიკური პროპაგანდის ინსტრუმენტად”, - განაცხადა ბექა ლილუაშვილმა. „ქართული ოცნება“ ოჯახურ ღირებულებათა შესახებ საკონსტიტუციო ცვლილებებს აინიცირებს. ამის შესახებ საპარლამენტო უმრავლესობის ლიდერმა მამუკა მდინარაძემ, პარტიის ოფისში გამართულ პრესკონფერენციაზე განაცხადა და კონკრეტული მუხლები დაასახელა, რომელსაც ცვლილებები ითვალისწინებს. “მუხლი 1. 1. კანონმდებლობით შეიძლება მოწესრიგდეს ქორწინებასთან მიმსგავსებული მხოლოდ იმგვარი ურთიერთობა, რომელიც არანაკლებ 18 წლის ერთი გენეტიკური მამაკაცისა და ერთი გენეტიკური ქალის კავშირს ითვალისწინებს; 2. არასრულწლოვანის შვილად აყვანა ან მინდობით აღზრდა დასაშვებია მხოლოდ საქართველოს კონსტიტუციისა და კანონმდებლობის შესაბამისად, ქორწინებაში მყოფი მეუღლეების ან ჰეტეროსექსუალი პირის მიერ; 3. აკრძალულია ადამიანის სქესის შეცვლასთან დაკავშირებული ნებისმიერი სამედიცინო ჩარევა; 4. სახელმწიფოს ან ადგილობრივი თვითმმართველობის მიერ გაცემულ დოკუმენტში მიეთითება მხოლოდ მდედრობითი ან მამრობითი სქესი, რომელიც მის გენეტიკურ მონაცემებს შეესაბამება. 5. ბათილია საჯარო ხელისუფლების ან კერძო პირის ნებისმიერი გადაწყვეტილება, რომელიც სქესობრივი ნიშნით განსაზღვრული ცნებების გამოყენებას პირდაპირი ან ირიბი ფორმით ზღუდავს; 6. აკრძალულია იმგვარი შეკრება, რომელიც ერთნაირსქესიანი ოჯახური ან ინტიმური ურთიერთობის, ინცესტის, ერთნაირსქესიანი წყვილის ან არაჰეტეროსექსუალი პირის მიერ არასრულწლოვანის შვილად აყვანის ან მინდობით აღზრდის, სქესის შეცვლასთან დაკავშირებული სამედიცინო ჩარევის ან სქესობრივი ნიშნით განსაზღვრული ცნებების არგამოყენების პოპულარიზაციისკენ არის მიმართული. 7. აკრძალულია იმგვარი შინაარსის ნაწარმოების, პროგრამის ან სხვა მასალის გავრცელება, რომელიც ერთნაირსქესიანი ოჯახური ან ინტიმური ურთიერთობის, ინცესტის, ერთნაირსქესიანი წყვილის ან არაჰეტეროსექსუალი პირის მიერ არასრულწლოვანის შვილად აყვანის ან მინდობით აღზრდის, სქესის შეცვლასთან დაკავშირებული სამედიცინო ჩარევის ან სქესობრივი ნიშნით განსაზღვრული ცნებების არგამოყენების პოპულარიზაციისკენ არის მიმართული. 8. აკრძალულია საჯარო ან კერძო საგანმანათლებლო დაწესებულების სასწავლო პროცესში იმგვარი ინფორმაციის მიწოდება, რომელიც ერთნაირსქესიანი ოჯახური ან ინტიმური ურთიერთობის, ინცესტის, ერთნაირსქესიანი წყვილის ან არაჰეტეროსექსუალი პირის მიერ არასრულწლოვანის შვილად აყვანის ან მინდობით აღზრდის, სქესის შეცვლასთან დაკავშირებული სამედიცინო ჩარევის ან სქესობრივი ნიშნით განსაზღვრული ცნებების არგამოყენების პოპულარიზაციისკენ არის მიმართული. მუხლი 2. ეს კანონი ამოქმედდეს გამოქვეყნებისთანავე“, - განაცხადა მდინარაძემ. ipn

"ოცნება" დაემსგავსა "ნაც. მოძრაობას", ზუსტად თვითმმართველობის არჩევნების წინ, 2010 წელს, მიხეილ სააკაშვილმაც გააუქმა საკრებულოს მაჟორიტადარ არჩევისთვის მინიმუმ 30%-იანი მხარდაჭერის აუცილებლობა. დღეს ძალაუფლების დაკარგვის ისტერიული შიშებით მართული "ოცნებაც" იგივეს აკეთებს, რასაც წარსულში აკეთებდა "ნაციონალური მოძრაობა". Მსგავსმა მხდალმა ნაბიჯებმა ვერც წინა ნაცებს უშველა, და ვერც თქვენ გიშველით. ნურც თქვენ კარგავთ დროს და ნურც ჩვენ გვაკარგვინებთ, დაუბრუნდით საქმეს!" ბექა ლილუაშვილი, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/1105770307513382/

პარტია "საქართველოსთვის" თავმჯდომარე გიორგი გახარია ახალი პრეზიდენტის არჩევაზე, წინასაარჩევნო თაღლითობაზე, ევრონესტზე. ვიდეო:

თბილისში, ვაზისუბანში, ახალგაზრდა ქალი დაჭრეს. არსებული ინფორმაციით, დაჭრილი 30-წლამდე ქალია და შემთხვევის ადგილიდან კლინიკაში სასწრაფო სამედიცინო დახმარების მანქანით გადაიყვანეს. გავრცელებული ინფორმაციით, იგი მეზობელმა კაცმა ცივი იარაღით დაჭრა. ამასთან, არსებული ინფორმაციით, დანაშაულში ბრალდებული პირი სამართალდამცავებმა ცხელ კვალზე დააკავეს. ”ინტერპრესნიუსი" შსს-სთან დეტალებს არკვევს. შემთხვევის ადგილზე მობილიზებულია პოლიცია. იპნ

ისრაელი დათანხმდა აშშ-ის წინადადებას ისრაელში პატიმრობაში მყოფი 700-მდე პირის ღაზის სექტორში დაკავებული 40 მძევლის სანაცვლოდ გათავისუფლებასთან დაკავშირებით, - ინფორმაციას CNN-ი დიპლომატიურ წყაროზე დაყრდნობით ავრცელებს. აღნიშნულ პალესტინელ პატიმრებს შორის 100-ს სამუდამო პატიმრობა აქვს მისჯილი ისრაელის მოქალაქეების მკვლელობისთვის. CNN-ის ცნობით, ისრაელი დათანხმდა აშშ-ის ცენტრალური სადაზვერვო სააგენტოს დირექტორის, ბილ ბერნსის მიერ წარმოდგენილ წინადადებას, რომელიც იმყოფებოდა დოჰაში, სადაც „ჰამასი“ და ისრაელი შუამავლების მეშვეობით მოლაპარაკებებს აწარმოებენ. CNN-ის ანალიტიკოსის შეფასებით, „ჰამასის“ პასუხს, შესაძლოა, ერთიდან სამ დღემდე დასჭირდეს. CNN-ს დიპლომატიურმა წყარომ განუცხადა, რომ რჩება გადაუჭრელი საკითხები, მათ შორის, ჰუმანიტარული დახმარების შესვლა და ისრაელელი სამხედროების განლაგება ღაზაში. იპნ

დღეს, 24 მარტს, მოსამართლეთა რიგით 32-ე კონფერენციაზე ე.წ კლანის მოსამართლე დიმიტრო გვრიტიშვილმა „ვეტინგის” საწინააღდეგო პრეზენტაცია ჩაატარა. დიმიტრი გვტირიშვილმა ახსენა ნაზი ჯანეზაშვილი, „სასამართლოს გუშაგის” დამფუძნებელი და იუსტიციის საბჭოს ყოფილი არამოსამართლე წევრი, რომელიც „მოსამართლეთა კლანს” ეწინააღმდეგება. გვრიტიშვილმა ასევე ისაუბრა სხვა არასამთავრობო ორგანიზაციის წარმომადგენლებზე, ზოგ შემთვევაში კი მათი „ფეისბუქ-პოსტებიც” წარმოადგინა, რომლებშიც ასევე „კლანი” იყო გაკრიტიკებული. „კლანის მოსამართლეების” მტკიცებით, სამოქალაქო სექტორის წარმომადგენლები ცდილობენ, „მოსამართლეები სასამართლოდან გაყარონ და დაიქვემდებარონ”. კონფერენციაზე შეკრებილმა მოსამართლეებმა მხარი დაუჭირეს უზენაესი სასამართლოს მიერ წარმოდგენილ განცხადებას, რომლის მიხედვითაც, „მათთვის შემაშფოთებელია მოსამართლეთა კეთილსიდისიერების შემოწმება, ვინაიდან ის ერთმნიშვნელოვნად, არსებითად და პრინციპულად ლახავს სასამართლოსა და ინდივიდუალური მოსამართლის დამოუკიდებლობას”. „ვეტინგი” ევროკომისიის რეკომენდაციაა, რომელიც მოსამართლეთა კეთილსინდისიერების გადამოწმებას გულისხმობს. ის უნდა შეეხოს არა ყველა მოსამართლეს, არამედ იუსტიციის უმაღლესი საბჭოს წევრებს, სასამართლოებისა და კოლეგიების თავმჯდომარეებს, დაახლოებით 60 მოსამართლეს. თუმცა, „ქართული ოცნების” ხელისუფლება და „კლანის მოსამართლეების” მტკიცებით, „ვეტინგი” აბსოლუტურად ყველა მოსამართლეს შეეხება. „ვეტინგს” კატეგორიულად ეწინააღმდეგება როგორც „ქართული ოცნების” ხელისუფლება, ისე – სასამართლოების ლიდერები – ის პირები, რომლებსაც არასამთავრობო ორგანიზაციები „მოსამართლეთა კლანის” წევრებად მოიხსენიებენ. პუბლიკა

მოსკოვის შერემეტევოს აეროპორტში, მოსკოვი-ერევნის რეისის მგზავრმა განაცხადა, რომ მის ხელბარგში ბომბია, - ინფორმაციას რუსული მედია და „ტელეგრამ“ არხები ავრცელებენ. „ტელეგრამ“ არხ 112-ის ცნობით, ქალბატონმა თვითმფრინავში ასვლის შემდეგ ბორტგამცილებელს განუცხადა, რომ მის ხელბარგში ბომბი იყო. ფრენა გადაიდო. შემთხვევის ადგილზე ამ დროისთვის საგანგებო სიტუაციების ბრიგადებია მობილიზებული. იპნ

უკრაინის პრეზიდენტ ვოლოდიმირ ზელენსკის თქმით, რუსეთის მმართველი ვლადიმერ პუტინი და “სხვა ნაძირლები” ცდილობენ, მოსკოვის მახლობლად მომხდარი თავდასხმა “სხვას გადააბრალონ”. “პუტინი და სხვა ნაძირლები ცდილობენ, სხვას გადააბრალონ, რაც გუშინ მოხდა. მათ ყოველთვის ერთი და იგივე მეთოდები აქვთ. ეს ადრეც ვნახეთ – აფეთქებული სახლები, ჩაცხრილვა და აფეთქებები. და ისინი ყოველთვის ადანაშაულებენ სხვებს. ისინი მოვიდნენ უკრაინაში, დაწვეს ჩვენი ქალაქები და ცდილობდნენ უკრაინის დადანაშაულებას. ისინი აწამებენ და აუპატიურებენ ჩვენს ხალხს – და მათ ადანაშაულებენ. მათ ასიათასობით ტერორისტი ჩამოიყვანეს აქ, უკრაინის მიწაზე, იბრძვიან ჩვენ წინააღმდეგ და არ აინტერესებთ რა ხდება მათ ქვეყანაში”,- განაცხადა ზელენსკიმ თავის ვიდეომიმართვაში. მისი თქმით, ის ასიათასობით რუსი, რომლებიც ახლა უკრაინის მიწაზე იხოცებიან, საკმარისი იქნებოდა ნებისმიერი ტერორისტების შესაჩერებლად. “ეს აბსოლუტური არარაობა პუტინი, იმის ნაცვლად, რომ რუსეთის მოქალაქეებისთვის მიემართა, ერთი დღე დუმდა – ფიქრობდა, როგორ დაებრალებინა უკრაინისთვის. ყველაფერი სრულიად პროგნოზირებადია. და თუ რუსები მზად არიან ჩუმად მოკვდნენ “კროკუსებში” და არ დაუსვან კითხვები თავიანთ დაზვერვის სამსახურებს, მაშინ პუტინი შეეცდება, არაერთი ასეთი ვითარება გამოიყენოს თავისი პირადი ძალაუფლების სასარგებლოდ”, – დასძინა ზელენსკიმ. „კროკუსის“ საკონცერტო დარბაზში მომხდარი თავდასხმის მეორე დღეს, რუსეთის პრეზიდენტმა ვლადიმერ პუტინმა პირველი ვიდეომიმართვა გამოაქვეყნა და თქვა, რომ ტერაქტის ყველა შემსრულებელი და დამკვეთი დაისჯება. პუტინის თქმით, ოთხივე დამნაშავე, ვინც უშუალოდ მონაწილეობდა ტერაქტში, უკრაინაში მიმალვის მცდელობისას დააკავეს. ამ თემაზე:

რუსეთის ფედერაციის საოკუპაციო ძალებმა დღეს დილით უკრაინაზე ბოლო ოთხი დღის განმავლობაში მესამე მასიური სარაკეტო შეტევა განახორციელეს, ლვოვსა და კიევში აფეთქებების ხმები ისმოდა, დედაქალაქში განგაში 2 საათზე მეტხანს გაგრძელდა, - ინფორმაციას უკრაინული მედია ავრცელებს. „მტერმა კიდევ ერთხელ გამოიყენა X-101/X-555/X-55 ტიპის ფრთოსანი რაკეტები Tu-95MS სტრატეგიული ბომბდამშენებიდან. გაშვება განხორციელდა სარატოვის ოლქის ენგელსის ტერიტორიიდან. საჰაერო თავდასხმის მაუწყებელი განგაში დედაქალაქში 2 საათზე მეტ ხანს გაგრძელდა, რაკეტები კიევს ჯგუფურად, ჩრდილოეთის მიმართულებიდან მიუახლოვდნენ“, - აცხადებენ კიევის საოლქო-სამხედრო ადმინისტრაციაში. მათივე ინფორმაციით, საჰაერო თავდაცვის ძალებმა და საშუალებებმა კიევის თავზე და დედაქალაქის მიდამოებში ათობით რუსული რაკეტა გაანადგურეს. ამ დროისთვის არსებული ინფორმაციით, კიევში არავინ დაღუპულა, ან დაშავებულა. ნამსხვრევების ვარდნა დაფიქსირდა დესნიანსკის და შევჩენკოს რაიონებში. დაზიანდა მრავალსართულიანი საცხოვრებელი კორპუსის ფასადი, თუმცა ხანძარი არ გაჩენილა. ამასთან, რუსებმა ლვოვის ოლქს 20-ამდე რაკეტითა და „შაჰედის“ 7 დრონით შეუტიეს, ლვოვის მერის, ანდრეი სადოვისა და ლვოვის რეგიონული სამხედრო ადმინისტრაციის ხელმძღვანელის, მაქსიმ კოზიცკის თქმით, ოკუპანტების სამიზნე კრიტიკული ინფრასტრუქტურის ობიექტები იყო. იპნ

მე ვარ კეთილსინდისიერი მოსამართლე, - ამის შესახებ სააპელაციო სასამართლოს მოსამართლემ, იუსტიციის უმაღლესი საბჭოს წევრმა, ლევან მურუსიძემ ჟურნალისტებს ე.წ. ვეტინგთან დაკავშირებით განუცხადა. როგორც მან აღნიშნა, წლების განმავლობაში მიმდინარეობს სასამართლო სისტემის დისკრედიტაცია და მოსამართლეების დევნა, რომ სასამართლო სისტემიდან მოსამართლეები გაყარონ. „წლების განმავლობაში მიდის სასამართლო სისტემის დისკრედიტაცია, პირდაპირ მოსამართლეების დევნა, დემონიზაცია, ანუ ქმნიან ნოყიერ ნიადაგს იმისთვის, რომ მოხდეს სასამართლო სისტემიდან მოსამართლეების გაყრა. ვინც გამოდის და ამბობს, რომ ქვეყანას არ აქვს სასამართლო სისტემა და ესენი არიან კორუმპირებულები, სპეციალურად ქმნიან ამ აჟიოტაჟს და ამ საფუძველს, ზუსტად ეს ადამიანები ცდილობენ, რომ სასამართლო სისტემა დაიქვემდებარონ. მე ვარ კეთილსინდისიერი მოსამართლე. მოვუწოდებ ყველას, პოლიტიკოსები იქნებიან თუ არასამთავრობო სექტორის წარმომადგენლები, ზუსტად იმაზე რომ არის საუბარი, რომ აქ არავინ აპირებს კეთილსინდისიერების შემოწმებას, ჩანს, რომ ძალიან ბევრ მოსამართლეს წინასწარ გამოუტანეს განაჩენი. ხომ შეიძლება ჩატარდეს „ვეტინგი“ და გავიაროთ ეს კეთილსინდისიერების ტესტი?! წინასწარ როდესაც აცხადებ, რომ სასამართლო სისტემაში არიან კორუმპირებულები, წინასწარ გაქვს უკვე გამოთქმული მოსაზრება და მიზანმიმართულად ამბობს, რომ ეს მოსამართლეები არიან გასაყრელი სასამართლო სისტემიდან, აქედან გამომდინარე, შენ ის არ გაინტერესებს“,-განაცხადა მურუსიძემ. მისი შეფასებით, ე.წ. ვეტინგი არ ეხება კეთილსინდისიერებას. „კეთილსინდისიერება არის უბრალოდ შირმა, კეთილსინდისიერების მოტივით ცდილობენ, რომ სასამართლო დაიქვემდებარონ“,- განაცხადა მურუსიძემ. გარდა ამისა, მან აღნიშნა ისიც, რომ საქართველოს ევროკავშირში გაწევრიანება ე.წ. ვეტინგის განხორციელებას არ უკავშირდება. „მიმაჩნია, რომ საქართველო აუცილებლად უნდა გახდეს ევროკავშირის წევრი. საქართველომ სწორი გზით უნდა იაროს, სასამართლო უნდა იყოს დამოუკიდებელი, ჩემი აზრით, ეს არავითარ შემთხვევაში არ ეხება ევროკავშირში გაწევრიანებას, ვინაიდან, ალბანეთი, რომელშიც დაინგრა სასამართლო სისტემა „ვეტინგის“ საშუალებით, დღესაც არ არის ევროკავშირის წევრი. ამიტომ, ამ საკითხთან დაკავშირებით პირდაპირ კავშირს ვერ ვხედავ“,-განაცხადა მურუსიძემ. მან რამდენიმე ქვეყნის მაგალითი დაასახელა და აღნიშნა, რომ ე.წ. ვეტინგის ამოქმედების მიზანი რეალურად მოსამართლეების კეთილსინდისიერების შემოწმება არ არის. „ვეტინგთან" დაკავშირებით შემიძლია გითხრათ, რომ ზოგადად, როდესაც რაიმე ცუდი უნდა განხორციელდეს, ყოველთვის წინა პლანზე წამოწევენ ხოლმე კეთილშობილურ მიზანს. მოცემულ შემთხვევაში, საუბრობენ კეთილსინდისიერებაზე. „ვეტინგთან“ დაკავშირებით, რაც ჩვენ პრაქტიკაც გვაქვს ალბანეთში, უკრაინაში და ახლა მოლდოვაში, იქ მოსამართლეების შემოწმება არ ხდება კეთილსინდისიერების მიხედვით, რასაც პრაქტიკა გვაჩვენებს. ფაქტობრივად, მოხდა სპეცოპერაცია და სასამართლოს დაქვემდებარება კონკრეტული პოლიტიკური ძალის მიმართ“,-განაცხადა მურუსიძემ. იპნ

ამერიკის პრეზიდენტმა, ჯო ბაიდენმა ბიუჯეტს მოაწერა ხელი და კონგრესს უკრაინის დახმარების შესახებ შეახსენა. ამის შესახებ აშშ-ის პრეზიდენტის, ჯო ბაიდენის განცხადებაში წერია, რომელიც თეთრი სახლის ვებ-გვერდზეა გამოქვეყნებული. ბაიდენის თქმით, 1,2 ტრილიონი აშშ დოლარის ოდენობის დაფინანსების ორპარტიული კანონპროექტი, რომელსაც მან ხელი მოაწერა, მთავრობას მუშაობის გაგრძელების საშუალებას აძლევს, ამერიკელ ხალხში აკეთებს ინვესტირებას, და აძლიერებს აშშ-ის ეკონომიკასა და ეროვნულ უსაფრთხოებას. „ეს შეთანხმება კომპრომისს წარმოადგენს, რაც იმას ნიშნავს, რომ არც ერთმა მხარემ არ მიიღო ყველაფერი, რაც სურდა… მაგრამ მინდა ნათლად ვთქვა: კონგრესის მუშაობა დასრულებული არ არის. წარმომადგენელთა პალატამ უნდა მიიღოს [უკრაინის, ისრაელისა და ტაივანის] დამატებითი დაფინანსების შესახებ ორპარტიული კანონპროექტი, რათა წინ წაწიოს ჩვენი ეროვნული უსაფრთხოება”, - ამბობს ბაიდენი. ცნობისთვის, აქამდე აშშ-ის კონგრესის ქვედა პალატის - წარმომადგენელთა პალატის - სპიკერმა, მაიკ ჯონსონმა განაცხადა, რომ უკრაინის დამატებითი დაფინანსების შესახებ კანონპროექტს წარმომადგენელთა პალატაში მას შემდეგ განიხილავდნენ, რაც მოგვარებული იქნებოდა ფედერალური მთავრობის დაფინანსების საკითხი. იპნ

უკრაინაში კიდევ ერთი ქართველი მებრძოლი დაიღუპა, -აღნიშნულ ინფორმაციას უკრაინაში ქართველი მებრძოლი, ვანო ნადირაძე სოციალურ ქსელში ავრცელებს. მისი ინფორმაციით, ქართველი მებრძოლი ბრძოლის ველზე დაეცა. „ბრძოლაში გმირულად დაეცა ჩვენი ძმა თენგო ჭანია, „აზოვის“ მესამე მოიერიშე ბრიგადა“, - წერს ნადირაძე სოციალურ ქსელში. იპნ

"შინაარსობრივი განსხვავება "ნაც.მოძრაობასა" და "ოცნებას" შორის მიდგომებში, დამოკიდებულებებში დღეს აღარ არის." ლევან გოგიჩაიშვილი, პარტია "საქართველოსთვის" წევრი. ვიდეო: https://www.facebook.com/ForGeoGe/videos/1443880706537899/

კრემლის პრესსამსახურის ცნობით, FSB-ს დირექტორმა ვლადიმიტ პუტინს შეატყობინა 11 ადამიანის დაკავების შესახებ, მათ შორის, 4 ტერორისტის. ინფორმაციას რუსული მედია ავრცელებს. ინფორმაციის მიხედვით, ალექსნადრ ბორტნიკოვმა პუტინს შეატყობინა, რომ ის პირები არიან დაკავებულნი, ვინც უშუალოდ მონაწილეობდნენ „კროკუს სითი ჰოლში“ მომხდარ ტერაქტში. დასავლური მედიის ცნობით, მოსკოვში „კროკუს სითი ჰოლზე” თავდასხმაზე პასუხისმგებლობა „ისლამურმა სახელმწიფომ” (ISIS) აიღო. პასუხისმგებლობის აღების შესახებ ISIS-ის მოკლე განცხადება ტერორისტულ დაჯგუფებასთან აფილირებულმა სააგენტო Amaq-მა Telegram-ის არხზე გამოაქვეყნა. როგორც გამოცემა Reuters-ი წერს, ცნობა დამოუკიდებლად გადამოწმებული არ არის. „ბიბისის“ ცნობით კი, ამერიკელი მაღალჩინოსნები აცხადებენ, რომ აშშ-ის აქვს დაზვერვის მონაცემები, რომლებიც ადასტურებს, რომ მოსკოვში თავდასხმა „ისლამურმა სახელმწიფომ“ განახორციელა. როგორც „ბიბისი“ ამერიკულ „სიბიესზე“ დაყრდნობით იუწყება, გასული წლის ნოემბრიდან მოყოლებული არსებობს ინფორმაციის მუდმივი ნაკადი, რომ „ისლამურ სახელმწიფოს“ სურდა რუსეთზე დარტყმის მიყენება. როგორც „ბიბისი“ აღნიშნავს, კონკრეტული ინფორმაცია მიწოდებული იყო რუსეთის მთავრობისთვისაც, ვაშინგტონსა და მოსკოვს შორის არსებული ცივი ურთიერთობების მიუხედავად. გუშინ მოსკოვში, „კროკუს სითი ჰოლის“ საკონცერტო დარბაზში სულ მცირე, სამმა პირმა ცეცხლი გახსნა. როგორც მედია წერს, თავდამსხმელებმა ასაფეთქებელი მოწყობილობაც აამოქმედეს, რის შედეგადაც ტერიტორიაზე მასშტაბური ხანძარი გაჩნდა. ბოლო ინფორმაციით, დაღუპულია 60-ზე მეტი ადამიანი, მათგან 3 ბავშვია. ჰოსპიტალიზებულია – 115 ადამიანი. თავდასხმა ჯგუფ „პიკნიკის“ კონცერტის დროს მოხდა. პუბლიკა

მოსკოვში, „კროკუს სითი ჰოლში“ მომხდარ თავდასხმას მსოფლიო ლიდერები გმობენ. რუსეთს მიუსამძიმრეს და ტერაქტი დაგმეს, აშშ-სა და დიდი ბრიტანეთის საგარეო საქმეთა სამინისტროებმა. თავდასხმა დაგმო ევროპული საბჭოს პრეზიდენტმა, შარლ მიშელმაც. გაერო-ს გენერალურმა მდივანმა, ანტონიო გუტიერეშმა დაღუპულთა ოჯახის წევრებს, რუს ხალხსა და დაშავებულებს მალე გამოჯანმრთელება უსურვა. განცხადება ასევე გაავრცელა გაერო-ს უსაფრთხოების საბჭომ, რომელმაც თავდასხმას „საშინელი და მხდალი“ უწოდა. მომხდარს გამოეხმაურა საფრანგეთის პრეზიდენტი ემანუელ მაკრონი, რომელიც სოლიდარობას უცხადებს დაშავებულებს და დაღუპულთა ოჯახის წევრებს. რუსეთის პრეზიდენტს, ვლადიმირ პუტინს მიუსამძიმრა ჩინეთის პრეზიდენტმა, სი ძინპინმა და განაცხადა, რომ ჩინეთი ეწინააღმდეგება ტერორიზმის ყველა ფორმას, მკაცრად გმობს ტერორისტულ თავდასხმას და მხარს უჭერს რუსეთის ხელისუფლების ქმედებებს ეროვნული უსაფრთხოების უზრუნველყოფის მიმართულებით. თავდასხმა დაგმო გერმანიის კანცლერმა, ოლაფ შოლცმაც. მომხდარს გამოეხმაურა მოლდოვას პრეზიდენტი, მაია სანდუც, რომელიც ამბობს, რომ მოლდოვა გმობს ტერორიზმის ყველა ფორმას. ნიდერლანდების პრემიერ-მინისტრმა, მარკ რუტემ დაწერა: „შოკირებულები ვართ საშინელი კადრებით მოსკოვიდან, სადაც უდანაშაულო ადამიანები ემსხვერპლნენ ტერაქტს, რომელზეც პასუხისმგებლობა „ისლამურმა სახელმწიფომ“ აიღო. ფიქრებით დაღუპულთა ოჯახებთან და რუს ხალხთან ვარ“, – წერს მარკ რუტე. რუსეთის მოსახლეობას მიუსამძიმრა უნგრეთის პრემიერ-მინისტრმა, ვიქტორ ორბანმაც. „მინდა, ღრმა მწუხარება გამოვხატო რუსეთის ფედერაციის მოსახლეობის მიმართ დღეს საღამოს მოსკოვის მახლობლად მომხდარი საშინელი ტერაქტის გამო. ვლოცულობთ დაღუპულთა ოჯახებისთვის“, – აღნიშნა ორბანმა. მომხდარი დაგმო ინდოეთის პრემიერ-მინისტრმა, ნარენდრა მოდიმ, ასევე საუდის არაბეთის ტახტის მემკვიდრე მუჰამედ ბინ სალმანმა. „კროკუს სითი ჰოლში”, მომხდარი სროლისა და აფეთქების შედეგად დაღუპულთა რიცხვი 115-მდე გაიზარდა. რაც შეეხება დაშავებულებს, მათი რიცხვი 140-ს აჭარბებს. კრემლის პრესსამსახურის ცნობით, FSB-ს დირექტორმა ვლადიმიტ პუტინს შეატყობინა 11 ადამიანის დაკავების შესახებ, მათ შორის, 4 ტერორისტის. დასავლური მედიის ცნობით, მოსკოვში „კროკუს სითი ჰოლზე” თავდასხმაზე პასუხისმგებლობა „ისლამურმა სახელმწიფომ” (ISIS) აიღო. კროკუს სითი ჰოლის“ საკონცერტო დარბაზში სულ მცირე, სამმა პირმა ცეცხლი გახსნა. როგორც მედია წერს, თავდამსხმელებმა ასაფეთქებელი მოწყობილობაც აამოქმედეს, რის შედეგადაც ტერიტორიაზე მასშტაბური ხანძარი გაჩნდა. თავდასხმა ჯგუფ „პიკნიკის“ კონცერტის დროს მოხდა. პუბლიკა

არასამთავრობო ორგანიზაციების განცხადებით, 24 მარტს დაგეგმილი მოსამართლეთა კონფერენცია მიზნად ისახავს ე.წ. ვეტინგის თავიდან აცილებას, რაც პირდაპირ წინააღმდეგობაში მოდის ევროკომისიის მიერ განსაზღვრულ 9 ნაბიჯთან. როგორც მესამე სექტორის მიერ ერთობლივად გავრცელებულ განცხადებაშია აღნიშნული, კონფერენციის დღის წესრიგით პირველ საკითხად განსაზღვრულია „სასამართლოს ირგვლივ განვითარებული მოვლენების განხილვა“. სამოქალაქო საზოგადოების აზრით, „მოსამართლეები, რომლებსაც კეთილსინდისიერების შემოწმების მექანიზმის მიმართ მკვეთრად ნეგატიური დამოკიდებულება აქვთ, შეეცდებიან, კონფერენციის მონაწილე სხვა მოსამართლეების ზურგს უკან ამოფარებით, თავი დააღწიონ კეთილსინდისიერების ტესტის გავლას“. ამრიგად, როგორც განცხადებაშია აღნიშნული, ხელმომწერი ორგანიზაციები მიმართავენ თითოეულ მოსამართლეს, არ მისცენ საშუალება, იარაღად იყვნენ გამოყენებულნი საქართველოს ევროკავშირში ინტეგრაციის წინააღმდეგ. „2024 წლის 24 მარტს მოსამართლეთა კონფერენცია გაიმართება, სადაც, არსებული ინფორმაციით, კლანი გეგმავს, წარადგინოს მიმართვის პროექტი და მოიპოვოს მოსამართლეთა კორპუსის მხარდაჭერა მათი კეთილსინდისიერების შემოწმების თავიდან ასაცილებლად, რაც პირდაპირ წინააღმდეგობაში მოდის ევროკომისიის მიერ განსაზღვრულ 9 ნაბიჯთან. როგორც საზოგადოებისთვის ცნობილია, ევროკავშირის წევრობის კანდიდატის სტატუსის მიღების შემდეგ, ევროკომისიის მიერ საქართველოსთვის განსაზღვრული 9 ნაბიჯის ფარგლებში, საქართველო ვალდებულია, განახორციელოს მართლმსაჯულების ყოვლისმომცველი რეფორმა, რომელიც ასევე მოიცავს სასამართლო სისტემაში მხოლოდ წამყვან თანამდებობებზე მყოფი პირებისა და მოსამართლეობის კანდიდატების კეთილსინდისიერების შემოწმების საგანგებო მექანიზმის შექმნას. ნაცვლად იმისა, რომ ხელისუფლებას სასწრაფოდ შეემუშავებინა ევროკომისიის ზემოაღნიშნული მოთხოვნის შესრულების გეგმა, პრემიერ-მინისტრმა და პარლამენტის თავმჯდომარემ მოსამართლეთა კეთილსინდისიერების შემოწმების საკითხი „დახურულად“ გამოაცხადეს. ევროკავშირმა 2024 წლის 22 მარტის საგანგებო განცხადებით კიდევ ერთხელ დაადასტურა, რომ სასამართლო სისტემაში არსებული სისტემური ხარვეზების გამოსასწორებლად, საქართველოსგან ელიან მოსამართლეთა კეთილსინდისიერების შესამოწმებელი საგანგებო სისტემის შექმნას, რომელშიც გადამწყვეტი როლი ექნებათ საერთაშორისო ექსპერტებს. ევროკავშირმა ამავე განცხადებით მოუწოდა საქართველოს ხელისუფლებას, შეწყვიტოს იმ ინდივიდუალურ მოსამართლეებზე თავდასხმები, ვინც კეთილსინდისიერების შემოწმებასთან დაკავშირებით მოსაზრება გამოთქვა. ევროკავშირის მოთხოვნის მიუხედავად, კეთილსინდისიერების შემოწმების მექანიზმის შექმნის იდეას, ხელისუფლების ლიდერებთან ერთად, კატეგორიულად ეწინააღმდეგება სასამართლო სისტემაში გაბატონებული გავლენიანი მოსამართლეების ჯგუფიც, რომელთა კეთილსინდისიერება დიდი ხანია, ეჭვქვეშ დგას როგორც ქვეყნის შიგნით, ისე მის ფარგლებს გარეთ. სავარაუდოდ, სწორედ ამ ჯგუფის მოთხოვნით გაავრცელა 11 მარტს უზენაესი სასამართლოს პლენუმმა განცხადება, რომელშიც მოსამართლის კეთილსინდისიერების შემოწმება „ღირსების, დამოუკიდებლობის, ინსტიტუციური რეპუტაციის შემლახველ პროცედურად“ იქნა გამოცხადებული. 24 მარტს გასამართი კონფერენციის დღის წესრიგით პირველ საკითხად განსაზღვრულია „სასამართლოს ირგვლივ განვითარებული მოვლენების განხილვა“. როგორც ჩანს, გავლენიანი მოსამართლეები, რომლებსაც კეთილსინდისიერების შემოწმების მექანიზმის მიმართ მკვეთრად ნეგატიური დამოკიდებულება აქვთ, შეეცდებიან, კონფერენციის მონაწილე სხვა მოსამართლეების ზურგს უკან ამოფარებით, თავი დააღწიონ კეთილსინდისიერების ტესტის გავლას. საქართველოს კონსტიტუციის 78-ე მუხლის საფუძველზე, კონსტიტუციური ორგანოები თავიანთი უფლებამოსილების ფარგლებში ვალდებულნი არიან, მიიღონ ყველა ზომა ევროპის კავშირსა და ჩრდილოატლანტიკური ხელშეკრულების ორგანიზაციაში საქართველოს სრული ინტეგრაციის უზრუნველსაყოფად. მოსამართლეთა კონფერენციამდე ორი დღით ადრე ევროკავშირის საგანგებო განცხადება, რომელშიც ხაზგასმულია ინდივიდუალური მოსამართლეების დამოუკიდებლობის მნიშვნელობა, კიდევ ერთხელ ადასტურებს ყველა მოსამართლის მხარდაჭერას, ვინც მზაობა გამოხატა ხელმძღვანელ პოზიციაზე მომუშავე მოსამართლეების კეთილსინდისიერების შემოწმებისთვის. ჩვენთვის ცნობილია მოსამართლეთა მნიშვნელოვანი ნაწილის განწყობა და მხარდაჭერა ევროინტეგრაციისადმი. შესაბამისად, გვსურს, შევახსენოთ მათ, რომ სასწორზე, ერთი მხრივ, ჩვენი ქვეყნის ევროპული მომავალი, მეორე მხრივ კი, მოსამართლეთა გავლენიანი ჯგუფის პირადი ინტერესები დევს. მათ პოზიციას შეიძლება არსებითი გავლენა ჰქონდეს საქართველოს ევროინტეგრაციის პროცესზე. ამიტომაც მოვუწოდებთ თითოეულ მათგანს, არ დაუშვათ, რომ კლანმა მოსამართლეთა კორპუსი ევროკავშირისკენ საქართველოს წინსვლის შესაფერხებლად გამოიყენოს“-ნათქვამია ერთობლივ განცხადებაში, რომელსაც ხელს აწერენ ორგანიზაციები: „ქალი და განვითარება“, „ფემინისტური ინიციატივების ფონდი“, „ადამიანის უფლებათა ცენტრი“, „საერთაშორისო გამჭვირვალობა - საქართველო”, „სამოქალაქო იდეა“, „ოჯახები დისკრიმინაციის წინააღმდეგ” (FAD); „დემოკრატიის მცველები“, „სასამართლოს გუშაგი (Court Watch)“, „ქვემო ქართლის ქალთა ასოციაცია “ქალი და სამყარო”,“ ბათუმის დამოუკიდებელი ცხოვრების ცენტრი“, „ყვარლის ევროკლუბი“ „შშმ ქალთა ალიანსი“, „დამოუკიდებელი იურისტების ჯგუფი“, „საქართველოს დემოკრატიული ინიციატივა“, „ილიას სამართლის სახლი (ილიასი)“, „დემოკრატიის კვლევის ინსტიტუტი (DRI)“, „მედიაომბუდსმენი“, „საზოგადოება და ბანკები“, „საქართველოს ატლანტიკური საბჭო’, „რეფორმებისა და კვლევის ჯგუფი (RRG)“, ‘სამოქალაქო საზოგადოების ფონდი“, „უფლებები საქართველო“, „ეკონომიკური პოლიტიკის კვლევის ცენტრი“, „სამოქალაქო ჩართულობისა და აქტივიზმის ცენტრი (CEAC)“, „გურიის სამოქალაქო ცენტრი“. იპნ

მოსკოვში მომხდარ თავდასხმაში ტაჯიკეთის მოქალაქეების მონაწილეობის შესახებ გავრცელებული ინფორმაცია სიცრუეა, - ამის შესახებ ინფორმაციას ტაჯიკეთის საგარეო საქმეთა სამინისტრო ავრცელებს. „ხაზს ვუსვამთ, რომ ტაჯიკეთის მხარეს ტაჯიკეთის მოქალაქეების მონაწილეობის შესახებ ამჟამად გავრცელებულ ყალბ ინფორმაციასთან დაკავშირებით რუსეთის ოფიციალური ხელისუფლებისგან არანაირი დადასტურება არ მიუღია. ამასთან დაკავშირებით, გთხოვთ, რუსეთის სამთავრობო ხელისუფლების მიერ გავრცელებულ ოფიციალურ ინფორმაციას დაეყრდნოთ“, - აცხადებს ტაჯიკეთის საგარეო საქმეთა სამინისტრო. ტაჯიკეთის საგარეო უწყებაში ასევე აღნიშნავენ, რომ გადაუმოწმებელმა ინფორმაციამ შეიძლება ტაჯიკეთის მოქალაქეებისთვის ზიანის მიყენება გამოიწვიოს. ცნობისთვის, რუსეთის უშიშროების ფედერალური სამსახურის განცხადებით 11 ადამიანი დააკავეს, მათ შორის 4 „კროკუს სითი ჰოლზე“ განხორციელებულ თავდასხმაში მონაწილეობდა. რუსულმა მედიამ 4 ეჭვმიტანილის ვინაობა გაავრცელა, რომლის მიხედვით, ისინი ტაჯიკეთის მოქალაქეები არიან. იპნ

მოსკოვში, „კროკუს სითი ჰოლზე“ განხორციელებული თავდასხმის შედეგად დაღუპულთა რაოდენობა 115-მდე გაიზარდა, - ამის შესახებ ინფორმაციას რუსეთის საგამოძიებო კომიტეტი ავრცელებს. „ნანგრევების გაწმენდისას სასწრაფო დახმარების სამსახურებმა კიდევ რამდენიმე ცხედარი აღმოაჩინეს. დაღუპულთა რიცხვი ახლა 115 ადამიანს შეადგენს", - ნათქვამია რუსეთის საგამოძიებო კომიტეტის განცხადებაში. „ტერორისტებმა საკონცერტო დარბაზში ცეცხლის გასაჩენად, სადაც მაყურებლები, მათ შორის დაჭრილები იყვნენ, აალებადი სითხე გამოიყენეს“, - აცხადებს რუსეთის საგამოძიებო კომიტეტი. ცნობისთვის, რუსეთის უშიშროების ფედერალური სამსახურის განცხადებით, 11 ადამიანი დააკავეს, მათ შორის 4 „კროკუს სითი ჰოლზე“ განხორციელებულ თავდასხმაში მონაწილეობდა. იპნ

ელენე ნავერიანის ფილმი „შაშვი შაშვი მაყვალი” შვეიცარიის კინოდაჯილდოების გამარჯვებულია. ფილმმა ჯილდო მიიღო საუკეთესო მხატვრული ფილმის, საუკეთესო სცენარისა და მონტაჟის კატეგორიებში. დაჯილდოების ცერემონია 22 მარტს გაიმართა ციურიხში. შვეიცარიის კინოდაჯილდოება ყოველწლიურად ტარდება და მასში მონაწილეობას იღებენ ფილმები, რომლებიც შეიქმნა შვეიცარიაში ან შვეიცარიის თანადაფინანსებით. სწორედ ამ უკანასკნელი ნიშნით მოხვდა ელენე ნავერიანის ფილმი კონკურსში. „შაშვი შაშვი მაყვალი” ელენე ნავერიანის მესამე სრულმეტრაჟიანია ფილმია, რომლის პრემიერაც გაიმართა წლევანდელ კანის კინოფესტივალზე დამოუკიდებელ სექციაში – „Quinzaine des cinéastes“.სარაევოს ფესტივალზე ფილმმა მოიპოვა მთავარი პრიზი, ეკა ჩავლეიშვილი კი დასახელდა საუკეთესო მსახიობ ქალად.ბელფასტის 23-ე საერთაშორისო კინოფესტივალზე ეკა ჩავლეიშვილს გადაეცა პრიზი „საუკეთესო შესრულებისთვის”, მსახიობი ასევე ნომინირებული იყო ევროპული კინოაკადემიის ჯილდოზეც. ფილმმა მოიპოვა პრიზები კოტბუსისა და ხიხონის კინოფესტივალებზეც. ნეტგაზეთი

საარჩევნო სიების ფორმირებისას, ესა თუ ის დეპუტატობის კანდიდატი შესაძლოა, ერთი ან რამდენიმე მუნიციპალიტეტის დელეგატად განისაზღვროს. ასეთია ინიციატივა, რომელიც „ქართულმა ოცნებამ“ მოამზადა და პარლამენტის ბიუროს უახლოეს სხდომაზე წარედგინება. კერძოდ, მომზადებული კანონპროექტის გათვალისწინებით “საარჩევნო კოდექსს“ ახალი მუხლი ემატება, რომლის თანახმად, პარტიას უფლება ექნება პარტიული სიის შედგენისას, პარლამენტის წევრობის კანდიდატი საარჩევნო ოლქის ტერიტორიაზე რეგისტრირებულ ამომრჩეველთა დელეგატად განსაზღვროს. პროექტის მიხედვით, პარლამენტის წევრობის კანდიდატი შესაძლებელია მხოლოდ ერთი საარჩევნო ოლქის ტერიტორიაზე რეგისტრირებულ ამომრჩეველთა დელეგატი იყოს. ასეთ შემთხვევაში, პარტიულ სიაში პარლამენტის წევრობის კანდიდატის გასწვრივ იმ საარჩევნო ოლქის ნომერი მიეთითება, რომელი საარჩევნო ოლქის ამომრჩეველთა დელეგატადაც იქნება წარდგენილი. აღნიშნულ ინიციატივას „ქართული ოცნება“ მაჟორიტარების ინსტიტუტის გაუქმებით ხსნის. „პროპორციული საარჩევნო სისტემის დანერგვის შემდეგ, რეგიონალური პრინციპით დანერგილი წარმომადგენლების - მაჟორიტარების ინსტიტუტი აღარ იარსებებს. შესაბამისად, საქართველოს რეგიონებში არსებული განსხვავებული გარემო-პირობებიდან გამომდინარე, მოსახლეობისთვის შექმნილ საჭიროებებზე მყისიერი და შესაბამისი კომპეტენციის რეაგირების მიზნით, პარტიები უფლებამოსილნი იქნებიან პარტიული სიების ფორმირებისას, ერთი ან რამდენიმე მუნიციპალიტეტის ან მუნიციპალიტეტის ნაწილის დელეგატი განსაზღვროს“, - აღნიშნულია კანონის პროექტის განმარტებით ბარათში. იპნ

„ქართული ოცნება“ საკრებულოს მაჟორიტარობის კანდიდატებისთვის დაწესებული 40%-იანი საარჩევნო ბარიერის გაუქმებას გეგმავს - პარლამენტში ინიცირებულია პროექტი, რომლის მიღების შემთხვევაში, მაჟორიტარული საარჩევნო სისტემის საფუძველზე საკრებულოში არჩეულად ის კანდიდატი ჩაითვლება, ვინც სხვებზე მეტ ხმას მიიღებს. „საარჩევნო კოდექსის“ ჯერ კიდევ მოქმედი რედაქციის თანახმად, მაჟორიტარული წესით არჩეულად ის კანდიდატი ითვლება, რომელიც ხმების 40%-ზე მეტს მიიღებს. წინააღმდეგ შემთხვევაში, არჩევნების მეორე ტური ინიშნება. „ქართული ოცნების“ პროექტის მიღების შედეგად, საკრებულოს არჩევნების მეორე ტური აღარ გაიმართება. როგორც „ქართული ოცნება" განმარტავს, აღნიშნული ინიციატივა საკრებულოებს უფლებამოსილებების დროული და ეფექტური განხორციელების შესაძლებლობას მისცემს და მათ შეუფერხებელ და ორგანიზებულ მუშაობას უზრუნველყოფს. „არსებული რეგულაციიდან გამომდინარე, ხშირია შემთხვევები, როდესაც საჭირო ხდება საკრებულოს არჩევნების მეორე ტურის გამართვა, რაც თავის მხრივ, აფერხებს საკრებულოს, როგორც წარმომადგენლობითი ორგანოს, სწრაფად დაკომპლექტებასა და შესაბამისად, მის მყისიერ ეფექტურ ფუნქციონირებას. ცვლილებების შედეგად, მუნიციპალიტეტების საკრებულოების პირველი სხდომის მოწვევის შესაძლებლობა გაცილებით მოკლე ვადებში იქნება შესაძლებელი“, - ვკითხულობთ კანონის პროექტის განმარტებით ბარათში. კანონპროექტი პარლამენტის ბიუროს უახლოეს სხდომაზე წარედგინება. იპნ

“წელს ხალხის სიცოტავე შესამჩნევი იყო, რადგან საბაგიროს ბილეთი, რომელიც 70 ლარი გახდა, ქართველისთვისაც და უცხოელისთვისაც საკმაოდ ძვირია” – “ტრეფიკ თრეველის“ დამფუძნებელმა, ცოტნე ჯაფარიძემ წლევანდელი ზამთრის სეზონი შეაჯამა. „სეზონი არ დასრულებულა, რაც გვაძლევს იმის იმედს, რომ ის აპრილამდე გაგრძელდება. გუდაურში მაღალმხარჯველი ტურისტების 90% სპარსეთის ქვეყნებიდან იყვნენ ჩამოსულები, რომლებსაც ევროპაში სასრიალოდ წასვლას ისევ საქართველოში ჩამოსვლა ურჩევიათ. პირდაპირ ევროპიდან ჩამოსული ტურისტები, რომლებიც პანდემიამდე საკმაოდ ბევრნი იყვნენ, დღეს არ ჩანან. ზოგადად, წელს ხალხის სიცოტავე შესამჩნევი იყო, რადგან საბაგიროს ბილეთი, რომელიც 70 ლარი გახდა, ქართველისთვისაც და უცხოელისთვისაც საკმაოდ ძვირია. საბაგირო კარგია, თოვლიც წელს ძალიან კარგი იყო, მაგრამ ხალხი არ იყო“, - ამბობს ჯაფარიძე. „ტრეფიკ თრეველის“ დამფუძნებელი მესტიის საკითხსაც შეეხო და განაცხადა, რომ ჯერ-ჯერობით, ეს მხარე ვერ გახდება ტურისტულად აქტიური რეგიონი. „მესტია ვერასოდეს გახდება ისეთი ადგილი, სადაც ბევრი ტურისტი ჩავა, სანამ ქვემო და ზემო სვანეთის დამაკავშირებელი გვირაბი არ გაიჭრება. თბილისიდან რომ ჩახვიდე სვანეთში, გინდა დაახლოებით 10 საათი და ის მონაკვეთი, სადაც უნდა ასცდე ენგურის წყალსაცავს, საკმაოდ საშიშია ზვავის ან ქვათაცვენის გამო. ჯამში 2 დღე გჭირდება სვანეთში რომ ჩახვიდე და ჩამოხვიდე“. ცოტნე ჯაფარიძის თქმით, დიდი სირთულეა სვანეთში თვითმფრინავის წასვლის მხრივაც, რადგან რეისები შესაძლებელია, ამინდის გამო გაუქმდეს. „გარდა იმისა, რომ თვითმფრინავი არის 16-17 ადგილიანი, ანუ ძალიან პატარა, როგორც კი ამინდი ფუჭდება, რეისები უქმდება. წინა დღესაც კი ვერ გეუბნებიან ზუსტ პასუხს, შესრულდება თუ არა ფრენა მეორე დღეს. ანუ მიდიხარ გამზადებული ნატახტარში და სრულიად შესაძლებელია, რომ ფრენა არ შესრულდეს. წლებია მიმდინარეობს ლაპარაკი, რომ სხვა კომპანია შემოიყვანონ, რომელიც ცუდ მეტეოროლოგიურ პირობებშიც შეძლებს ფრენას, მაგრამ დაზუსტებით პასუხი არ გვაქვს. სწორედ ამ მიზეზების გამო, ზამთარში სვანეთი თითქმის სულ ამოღებული გვაქვს“, - განაცხადა „ტრეფიკ თრეველის“ დამფუძნებელმა რადიო „პალიტრისა“ და „პალიტრანიუსის“ გადაცემაში „საქმე“. ავტორი: ეკა დარჩიაშვილი

საინფორმაციო სააგენტო „როიტერსი“ იუწყება, რომ მოსკოვის "კროკუს სითი ჰოლზე" თავდასხმაზე პასუხისმგებლობა "ისლამურმა სახელმწიფომ" აიღო. სააგენტო აღნიშნავს, რომ ინფორმაცია "ისლამურმა სახელმწიფომ“ საკუთარ "ტელეგრამის არხზე" გაავრცელა. ამასთან, როგორც BBC- ი წერს, ინფორმაცია დამოუკიდებლად არ არის გადამოწმებული. BBC-ის კორესპონდენტი გორდონ კორერა აღნიშნავს, რომ ჯგუფმა წარსულში აიღო პასუხისმგებლობა ისეთ თავდასხმებზე, რომლებთანაც მას საერთო არაფერი ჰქონდა. ცნობითვის, 7 მარტს რუსეთის უშიშროების ფედერალურმა სამსახურმა (FSB) განაცხადა, რომ აღკვეთა თავდასხმა მოსკოვში სინაგოგაზე, რომელსაც "ისლამური სახელმწიფოს" დანაყოფი გეგმავდა. რუსეთის "ეფესბე"-მ განაცხადა, რომ თავდამსხმელებმა გახსნეს ცეცხლი დაკავების მცდელობის დროს და ისინი "განეიტრალდნენ საპასუხო ცეცხლით". შეგახსენებთ, მოსკოვში, "კროკუს სითი ჰოლში" სროლისა და ხანძრის შედეგად, ოფიციალური ცნობებით დაიღუპა 40 და დაშავდა 100-ზე მეტი ადამიანი. იპნ

უკრაინას მოსკოვში მომხდარ თავდასხმასთან კავშირი არ აქვს. ამის შესახებ უკრაინის პრეზიდენტის ადმინისტრაციის ხელმძღვანელის მრჩეველმა, მიხაილო პოდოლიაკმა განაცხადა. “რუსეთის მოსკოვის ოლქში “კროკუს სითიში” მომხდარ მოვლენებთან დაკავშირებით, სადაც ამ წამს გარკვეული მოვლენები, გარკვეული სროლა, დაუდგენელი პირების მხრიდან გარკვეული ტერორისტული ქმედებები მოხდა - მოდით, დავაფიქსიროთ: უკრაინას ნამდვილად არანაირი კავშირი არ აქვს ამ მოვლენებთან", - განაცხადა პოდოლიაკმა. მან აღნიშნა, რომ უკრაინას არასდროს არ გამოუყენებია ომის წარმოების ტერორისტული მეთოდები და განაცხადა, რომ დასავლეთის ქვეყნების საელჩოები მარტის დასაწყისში რუსეთის ტერიტორიაზე დაგეგმილ ექსტრემისტულ აქციებთან დაკავშირებით გაფრთხილებებს ავრცელებდნენ. “ამიტომ კიდევ ერთხელ ხაზს ვუსვამ, რომ “კროკუს სითიში” ტერაქტებთან ან სროლასთან, ან როგორც დაარქმევთ, უკრაინას ნამდვილად არანაირი კავშირი არ აქვს”, - განაცხადა პოდოლიაკმა. შეგახსენებთ, მოსკოვში, "კროკუს სითი ჰოლში" სროლისა და ხანძრის შედეგად, ოფიციალური ცნობებით დაიღუპა 40 და დაშავდა 100-ზე მეტი ადამიანი. რუსეთის უშიშროების სამსახურმა მომხდარი ტერაქტად შეაფასა. დიმიტრი მედვედევმა მომხდართან დაკავშირებულ განცხადებაში კიევი ახსენა და განაცხადა, რომ ტერორისტებს მხოლოდ საპასუხო ტერორიზმი ესმით. მისი თქმით, თუ დადგინდება, რომ ისინი "კიევის რეჟიმის ტერორისტები იყვნენ", მათთან და მათ შთამაგონებლებთან სხვანაირად მოქცევა შეუძლებელია. იპნ

უელსის პრინცესა ქეით მიდლტონი აცხადებს, რომ სიმსივნე აღმოაჩნდა და დაავადებასთან ბრძოლას იწყებს. გავრცელებულ ვიდეომიმართვაში მიდლტონმა დიდი შოკი უწოდა დაავადების ტესტებით დადასტურებას, მაგრამ განაცხადა, რომ კარგადაა და ყოველდღე უფრო გაძლიერდება. BBC-ის თანახმად, დეტალები სიმსივნის თაობაზე უცნობია, თუმცა კენსიგნტონის სასახლეში დარწმუნებული არიან, რომ პრინცესა სრულად გაჯანმრთელდება. ქეით მიდლტონი აცხადებს, რომ ქიმიოთერაპიის დაწყებით სტადიაზეა. “ყველას, ვინც ამ დაავადებას ებრძვის, გთხოვთ, არ დაკარგოთ იმედი. თქვენ მარტო არ ხართ”, – განაცხადა ქეით მიდლტონმა. ნეტგაზეთი