tvati

რუსეთის საგამოძიებო კომიტეტის ინფორმაციით, მოსკოვთან ახლოს მდებარე საკონცერტო დარბაზ „კროკუსში“ ტერაქტის შედეგად გარდაცვლილია 60-ზე მეტი ადამიანი. „სამწუხაროდ, მსხვერპლის რიცხვი შესაძლოა, გაიზარდოს“, — აცხადებენ კომიტეტში. რუსეთის ჯანდაცვის მინისტრ მიხაილ მურაშკოს ინფორმაციით, სროლის შედეგად დაშავებული 115 ადამიანი საავადმყოფოში გადაიყვანეს, მათგან ხუთი ბავშვია. 60 ზრდასრული პაციენტის მდგომარეობა მძიმეა. 22 მარტს, მოსკოვის რაიონში, Crocus City Hall-ში, სადაც „პიკნიკის“ კონცერტი უნდა ჩატარებულიყო, შეიარაღებულმა პირებმა ცეცხლი გახსნეს. ინტერნეტში გავრცელებულ კადრებში ჩანს, როგორ ესვრიან თავდამსხმელები ფოიეში და საკონცერტო დარბაზში მყოფ ადამიანებს. შეიარაღებული თავდასხმის შემდეგ საკონცერტო დარბაზში ცეცხლი გაჩნდა, მოხდა რამდენიმე აფეთქებაც. საკონცერტო დარბაზი თითქმის მთლიანად დაიწვა. რუსეთის საგამოძიებო კომიტეტმა სისხლის სამართლის საქმე „ტერორისტული აქტის“ მუხლით აღძრა. ნეტგაზეთი

ევროკავშირის საგარეო საქმეთა სამსახურის პრესსპიკერი პიტერ სტანო განცხადებით ეხმაურება საქართველოში სასამართლო რეფორმის საკითხებზე მიმდინარე მოვლენებს. პიტერ სტანოს განცხადებით, მართლმსაჯულების სიღრმისეული რეფორმა, რომელიც მათ შორის შეეხება იუსტიციის უმაღლეს საბჭოს და თანხვედრაში იქნება ევროკავშირის 2023 წლის გაფართოების ანგარიშსა და ვენეციის კომისიის რეკომენდაციებთან, ევროკომისიის ერთ-ერთი ფუნდამენტური რეკომენდაციაა საქართველოსთვის ევროკავშირში გაწევრების გზაზე. მისივე თქმით, ეს ასევე არის იმ 9 ნაბიჯის ჩამონათვალში, რომელიც ევროკომისიამ მოამზადა გაფართოების კომუნიკეში, რომელსაც ყველა წევრმა ქვეყანამ დაუჭირა მხარი და რომლის საფუძველზე საქართველოს კანდიდატის სტატუსი მიენიჭა. “იმისათვის, რომ უპასუხოს არსებულ სისტემურ გამოწვევებს, საქართველომ უნდა ჩამოაყალიბოს გადამოწმების ექსტრაორდინალური მექანიზმი, მასში ჩართოს საერთაშორისო ექსპერტები და პროცესში გადამწყვეტი როლი მიანიჭოს”, – ნათქვამია პიტერ სტანოს განცხადებაში და აღნიშნულია, რომ გადამოწმება უნდა შეეხოს მართლმსაჯულების სფეროში უკვე დანიშნულ და კანდიდატ პერსონებს, რომლებიც წამყვან თანამდებობებს იკავებენ, მათ შორის იუსტიციის უმაღლეს საბჭოში უზენაეს სასამართლოში, და ასევე სასამართლოების თავმჯდომარეებს. „ქართული ოცნება“ უარს ამბობს, დანერგოს მექანიზმი, რომელიც ითვალისწინებს სასამართლო სისტემაში მნიშვნელოვანი თანამდებობის მქონე მოსამართლეების კეთილსინდისიერების ხელახლა შეფასებას. მმართველ პარტიაში ცდილობენ ე.წ. ვეტინგი ოპოზიციისა და არასამთავრობო ორგანიზაციების ინიციატივად წარმოაჩინონ, თუმცა იმ ყველაფერს, რაც ამ ინსტრუმენტის უკან დგას, საქართველოსაგან სინამდვილეში ევროკომისია ითხოვს. “ოცნება” აცხადებს, რომ ამ მექანიზმის დანერგვას არ აპირებს და ეს საკითხი დაუხურულია. ვრცლად ნეტგაზეთი

„საქართველოსთვის“ არის პარტია, რომელიც თანაბრად დისტანცირებულია „ნაციონალური მოძრაობისგანაც“ და „ქართული ოცნებისგანაც“, ამ პარტიას აქვს გამოკვეთილი იდენტობა, - ამის შესახებ პარტია „საქართველოსთვის“ წევრმა, ლევან გოგიჩაიშვილმა „პალიტრანიუსის“ გადაცემა „რეზიუმეში“ განაცხადა. ლევან გოგიჩაიშვილის თქმით, მიხეილ სააკაშვილის და ბიძინა ივანიშვილის სისტემისგან თანაბრად დისტანცირება, სასიცოცხლოდ მნიშვნელოვანია. „ყველაზე მთავარი, რაც ამ პარტიამ მოახერხა, არის ის, რომ დიდი წნეხის მიუხედავად შეძლო ის, რომ შეენარჩუნებინა თავისი იდენტობა. ადამიანების წარმოდგენაში ის არის თანაბრად დისტანცირებული „ქართული ოცნებისგანაც“ და „ნაციონალური მოძრაობისგანაც“. პირადად ჩემთვის, როგორც ამომრჩევლისთვის და ასევე როგორც პოლიტიკოსისთვის, ამას ძალიან დიდი მნიშვნელობა აქვს. მიხეილ სააკაშვილის და ბიძინა ივანიშვილის სისტემისგან თანაბრად დისტანცირება, მე ვფიქრობ, რომ სასიცოცხლოდ მნიშვნელოვანია იმისათვის, რომ დაჩქარდეს ევროინტეგრაცია და პოლიტიკური პროცესი დაბრუნდეს ნორმალურ ჩარჩოში და ქვეყანაში დაბრუნდეს ზოგადად პოლიტიკა. პოლიტიკა რომ არ არსებობს სისტემიდან გამომდინარეობს. თავის დროზე სააკაშვილი ცდილობდა, რომ პოლიტიკური პროცესი მოეკლა პარლამენტში თავისი ძალადობით და ზუსტად მისი ანალოგიური მემკვიდრეა ივანიშვილი. დღეს ჩემთვის შინაარსობრივი განსხვავება „ნაციონალური მოძრაობისა“ და „ქართული ოცნების“ მიდგომებში, თემებში, დამოკიდებულებაში, ტექნოლოგიებში, აღარ არის“, - განაცხადა ლევან გოგიჩაიშვილმა. იპნ

მოსკოვის ცენტრში სამმა ადამიანმა ცეცხლი გახსნა, არიან დაჭრილები. ამის შესახებ ინფორმაციას რუსული სახელმწიფო გამოცემა “რია ნოვოსტი” ავრცელებს. გამოცემის ცნობით, სამმა შენიღბულმა პირმა საკონცერტო დარბაზ “კროკუს სითი ჰოლში” ცეცხლი გახსნა. ადგილზე არიან დაჭრილები, თუმცა მათი რიცხვი ამ მომენტისთვის უცნობია. “კროკუს სითი ჰოლის” პარტერში შენიღბული ადამიანები შევარდნენ, როგორც მინიმუმ სამი, ცეცხლი გახსნეს ავტომატური იარაღიდან. ნამდვილად არიან დაჭრილები… ამის შემდეგ ისროლეს ყუმბარა ან ბომბი, შედეგად ცეცხლი გაჩნდა… ადამიანები, რომლებიც დარბაზში იმყოფებოდნენ, ძირს დაწვნენ, რათა სროლას გადარჩენოდნენ, 15-20 წუთი იწვნენ, რის შემდეგაც ცოცვით დაიწყეს გასვლა. ბევრმა გასვლა შეძლო,” - წერს გამოცემა საკუთარ კორესპონდენტზე დაყრდნობით. გამოცემის ინფორმაციით, ადგილზე სამართალდამცავები იმყოფებიან. იპნ

ევროკავშირმა საქართველოს კარი გაუღო. ახლა ქართველებმა უნდა გაიარონ ეს კარი. კარი ღიაა, მაგრამ თქვენ თავად უნდა გაიაროთ ეს კარი ერთად, - ამის შესახებ საქართველოში ევროკავშირის ელჩმა, პაველ ჰერჩინსკიმ განაცხადა. მისი თქმით, მოხარულია იმით, რომ საქართველომ ევროკავშირში გაწევრიანებასთან დაკავშირებით განაცხადი გააკეთა და კიდევ უფრო მოხარულია იმით, რომ ევროკავშირმა მას, კანდიდატის სტატუსის მინიჭებით, კარი გაუღო. „საქართველო ევროკავშირის წევრობის კანდიდატი ქვეყანაა. ახლა ქართველებმა უნდა გაიარონ ეს კარი. ასე რომ, კარი ღიაა, მაგრამ თქვენ თავად უნდა გაიაროთ ეს კარი ერთად. ევროკავშირის ინტეგრაციის პრიორიტეტზე ერთიანობა აბსოლუტურად აუცილებელია, საჭიროა ყველამ ერთად კონსტრუქციულად იმუშაოს, მაგრამ რამდენად სწრაფად გააკეთებთ ამას, თქვენი გადასაწყვეტია. მე ვგულისხმობ იმას, თუ რაიმე მიზეზით გრძნობთ, რომ გჭირდებათ მეტი დრო, ან რომ კიდევ მეტად უნდა დაფიქრდეთ, ან არსებობს სხვა პრიორიტეტები ევროკავშირში ინტეგრაციის გარდა, ეს თქვენი არჩევანია. როგორც ევროკავშირი, ჩვენ პატივს ვცემთ ნებისმიერ არჩევანს, რაც აქ, თბილისში გაკეთდება, მაგრამ რაშიც ნამდვილად მინდა დაგარწმუნოთ, არის, რომ კანდიდატის სტატუსის მონიჭებით, 27 წევრმა ქვეყანამ ხმამაღლა განაცხადა : კარი ღიაა, გელოდებით“, - აღნიშნა ელჩმა. კითხვაზე, ევროკომისიის მიერ განსაზღვრული 9 ნაბიჯიდან რომელია ყველაზე უფრო მნიშვნელოვანი, ელჩმა უპასუხა, რომ ყველა მათგანი მნიშვნელოვანია. „მე სრულად ვეთანხმები, რომ საქართველოს ყველა პოლიტიკური ძალის ერთგულებით, შეუერთდნენ ევროკავშირს, ძალიან მყარი, პროფესიონალური ადმინისტრირებით, ევროკავშირში გაწევრიანების უზარმაზარი სახალხო მხარდაჭერით, ცხრავე ნაბიჯი შეიძლება ძალიან სწრაფად განხორციელდეს, მაგრამ კიდევ გავიმეორებ, რომ დრო იწურება. როგორც ვიცით, საქართველოში არჩევნები ახლოვდება და საარჩევნო კამპანია არ არის საუკეთესო გარემო სერიოზული რეფორმების განსახორციელებლად. ასე რომ, დრო არ უნდა დაიკარგოს“, - აღნიშნა ელჩმა. დიპლომატის თქმით, ევროკავშირმა საქართველოს კარი გაუღო. „ევროკავშირმა, თავის მხრივ, საქართველოს კარი გაუღო. საქართველო ევროკავშირის წევრობის კანდიდატი ქვეყანაა. ახლა ქართველებმა უნდა გაიარონ ეს კარი. ასე რომ, კარი ღიაა, მაგრამ თქვენ თავად უნდა გაიაროთ ეს კარი ერთად. ევროკავშირის ინტეგრაციის პრიორიტეტზე ერთიანობა აბსოლუტურად აუცილებელია, საჭიროა ყველამ ერთად კონსტრუქციულად იმუშაოს, მაგრამ რამდენად სწრაფად გააკეთებთ ამას, თქვენი გადასაწყვეტია. მე ვგულისხმობ იმას, თუ რაიმე მიზეზით გრძნობთ, რომ გჭირდებათ მეტი დრო, ან რომ კიდევ მეტად უნდა დაფიქრდეთ, ან არსებობს სხვა პრიორიტეტები ევროკავშირში ინტეგრაციის გარდა, ეს თქვენი არჩევანია. როგორც ევროკავშირი, ჩვენ პატივს ვცემთ ნებისმიერ არჩევანს, რაც აქ, თბილისში გაკეთდება, მაგრამ რაშიც ნამდვილად მინდა დაგარწმუნოთ, არის, რომ კანდიდატის სტატუსის მონიჭებით, 27 წევრმა ქვეყანამ ხმამაღლა განაცხადა: კარი ღიაა, გელოდებით“, - აღნიშნა ელჩმა. ipn

საქართველოს პარლამენტმა საზოგადოებრივი მაუწყებლის სამეურვეო საბჭოს შევრების შესარჩევი კომისიის შემადგენლობა დაამტკიცა, რომელშიც „იმედის“ 4 თანამშრომელია. დადგენილების მიხედვით, რომელიც პარლამენტმა დღეს, 22 მარტს, 80 ხმით 2-ის წინააღმდეგ დაამტკიცა, კომისიის შემადგენლობაში არიან: დავით მაღლაფერიძე — რადიო „იმედის“ პროგრამების დირექტორი; მაკო ჯაოშვილი — მართვისა და კომუნიკაციის საერთაშორისო სასწავლო უნივერსიტეტის „ალტერბრიჯის“ ვიცე-რექტორი, ასოცირებული პროფესორი; გორედძი შარაშია — ჟურნალისტი, ტელეწამყვანი, „იმედის დილის“ წამყვანი; ნინო მეუნარგია — ჟურნალისტი, საავტორო გადაცემა „ჩვენ აქ ვართ“ წამყვანი და ავტორი, რომელიც რადიო „იმედის“ ეთერში გადაიცემა; ოთარ ტატიშვილი — კინომსახიობი, ტელე-რადიოწამყვანი, ექიმი, პროფესორი, „იმედის დილის“ წამყვანი; ნინო კაკულია — ივანე ჯავახიშვილის სახელობის თბილისის სახელმწიფო უნივერსიტეტის ჟურნალ „თბილისის“ რედაქტორი, ჟურნალისტი; გედევან ჭინჭარაძე — ანსამბლ „რუსთავის“ სოლისტი, ფოლკლორისტი; მარიამ გვიდიანი — არასამეწარმეო (არაკომერციული) იურიდიული პირის „ქალების ხმა – დემოკრატია და უსაფრთხოება“ – აღმასრულებელი დირექტორი; გივი აბესაძე — ფოლკლორული ანსამბლი „დიდგორის“ სოლისტი. საზოგადოებრივი მაუწყებლის სამეურვეო საბჭოში სამი ვაკანსიაა. ნეტგაზეთი

ემიგრანტების არჩევნებში მონაწილეობის საკითხზე საგარეო საქმეთა მინისტრ ილია დარჩიაშვილს პარლამენტის პლენარულ სხდომაზე, ინტერპელაციის წესით მოუსმინეს. ოპოზიციონერი დეპუტატების მიერ დასმული შეკითხვები საზღვარგარეთ მყოფი საქართველოს მოქალაქეების არჩევნებში მონაწილეობის საკითხს, საზღვარგარეთ საარჩევნო უბნების გაზრდის და საკონსულოების დამატების შესახებ საგარეო საქმეთა სამინისტროს პოზიციის მოსმენას უკავშირდებოდა. საგარეო საქმეთა მინისტრ ილია დარჩიაშვილის თქმით, საგარეო საქმეთა სამინისტრო ცესკოს აწვდის სტატისტიკას და ცენტრალური საარჩევნო კომისია თავად წყვეტს, სად გახსნას დამატებითი უბანი და სად — არა. მისი თქმით, საკონსულო ითხოვს მისამართს მოქალაქეებისგან, თუმცა არ სთხოვს მათ საბუთს, თუ სად ცხოვრობენ, რაც უზარმაზარი ბარიერი იქნებოდა საკონსულო აღრიცხვაზე დასადგომად. თუმცა ინტერპელაციის კითხვაზე მინისტრის წერილობითი პასუხიდან, რომელიც დარჩიაშვილმა თავის გამოსვლაშიც გაიმეორა, ცხადი ხდება, რომ საკონსულო აღრიცხვაზე დამდგარი მოქალაქეების რეგისტრაციის მისამართად განისაზღვრება არა მათი რეალური საცხოვრებლის, არამედ საქართველოს დიპლომატიური წარმომადგენლობის/საკონსულო დაწესებულების მისამართი. გამომდინარე იქიდან, რომ არსებობს ქვეყნები, რომელთა ადგილობრივი კანონმდებლობა არ ითვალისწინებს დიპლომატიური დაწესებულებების გარეთ საარჩევნო უბნების შექმნას, ინტერპელაციის კითხვა იყო, იგეგმება თუ არა დამატებითი საკონსულოების შექმნა, რათა მაქსიმალურად დიდი რაოდენობით გაიხსნას საარჩევნო უბნები საზღვარგარეთ, რომ მოქალაქეებს არ მოუწიოთ ერთი ქალაქიდან მეორეში ათასობით კილომეტრის გავლა არჩევნებში მონაწილეობისთვის? ილია დარჩიაშვილის თქმით, საკონსულო დაწესებულების გახსნა „კომპლექსური საკითხია“ და მხოლოდ არჩევნებს არ უკავშირდება. საქართველოს საარჩევნო კოდექსით, „სხვა სახელმწიფოში საარჩევნო უბნებს ქმნის ცესკო არჩევნების დღემდე არაუგვიანეს 30-ე დღისა საქართველოს საგარეო საქმეთა სამინისტროს მონაცემების საფუძველზე, არანაკლებ 50 და არაუმეტეს 3 000 ამომრჩევლისათვის“. გამომდინარე იქიდან, რომ დღევანდელი პრაქტიკით სხვა სახელმწიფოში შექმნილი საარჩევნო უბნები საზღვარგარეთ საქართველოს დიპლომატიურ წარმომადგენლობასა და საკონსულო დაწესებულებაში იხსნება, ემიგრანტებს, რომლებიც მათ ადგილსამყოფელ ქვეყანაში არსებული დიპლომატიური წარმომადგენლობისგან შორს ცხოვრობენ, არჩევნებში მონაწილეობა უჭირთ, რადგან საარჩევნო უბნამდე მისაღწევად დიდი დრო და შესაბამისი ფინანსები სჭირდებათ. რამდენიმე თვეა, ქართველი ემიგრანტები 2024 წლის საპარლამენტო არჩევნებისთვის საზღვარგარეთ საარჩევნო უბნების გახსნის მოთხოვნით ხელმოწერებს აგროვებენ. ამ თემაზე:

"როცა ჩვენ ვამბობთ, რომ ევროპული კეთილდღეობა სჭირდება საქართველოს მოქალაქეებს, აქ უნდა იყოს ხელმისაწვდომი და შესაბამისად უნდა დავნერგოთ ქვეყანაში მინიმალური ხელფასი, უმუშევრობის დაზღვევა, დიდი ინფრასტრუქტურული პროექტები, როგორიც არის მეტროს ახალი ხაზების მშენებლობა, ამ საკითხებს "ოცნება" გაურბის, რადგან თავად პოზიტიური ცვლილებების შეთავაზების რესურსი აღარ აქვს." ბექა ლილუაშვილი, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/432580332522195/

შეერთებული შტატების სახელმწიფო მდივანი, ენტონი ბლინკენი დღეს ისრაელში ჩადის, სადაც ქვეყნის პრემიერ-მინისტრ ბენიამინ ნეთანიაჰუს და ისრაელის ომის კაბინეტის წევრებს შეხვდება, - ინფორმაციას CNN-ი ავრცელებს. ბლინკენის ვიზიტი ემთხვევა დოჰაში მოლაპარაკებების განახლებას, რომელიც მიზნად ისახავს „ჰამასის“ მიერ დაკავებული მძევლების გათავისუფლებასთან დაკავშირებულ ცეცხლის შეწყვეტის შეთანხმების მიღწევას. ბლინკენის ისრაელში ჩასვლა, ასევე, ემთხვევა გაერო-ში აშშ-ის მიერ უშიშროების საბჭოსთვის წარდგენილ რეზოლუციის პროექტზე კენჭისყრის დღეს, რომელიც ღაზის კონფლიქტში ცეცხლის დაუყოვნებლივ შეწყვეტისკენ მოუწოდებს. CNN-ი იუწყება, რომ ისრაელში ბლინკენის შეხვედრები, სავარაუდოდ, დაძაბული იქნება იმ ფონზე, როცა ნეთანიაჰუმ პირობა დადო, რომ რაფაჰში სამხედრო შეჭრას განახორციელებს. ”ჩვენი პოზიცია, რომელიც ძალიან მკაფიოა, არის ის, რომ რაფაჰში დიდი სამხედრო ოპერაცია შეცდომა იქნება, რასაც ჩვენ მხარს არ ვუჭერთ”, - განაცხადა ბლინკენმა ხუთშაბათს. მისივე თქმით, აუცილებელია, რომ ღაზაში მცხოვრებ მოსახლეობას საჭირო რაოდენობის ჰუმანიტარული დახმარება მიაწოდონ. ”ისრაელმა მეტი უნდა გააკეთოს. ბოლო ორი კვირის განმავლობაში ჩვენ ვნახეთ გარკვეული გაუმჯობესება პალესტინელებისთვის ჰუმანიტარული დახმარების მიწოდებაში, მაგრამ ეს საკმარისი არ არის”, - აღნიშნა ბლინკენმა. ცნობისთვის, ენტონი ბლინკენი ოთხშაბათს ჯიდაში საუდის არაბეთის პრინც მოჰამედ ბინ სალმანს შეხვდა და ღაზაში საომარი მოქმედებების სწრაფად შეწყვეტის აუცილებლობა განიხილა. გუშინ კი ის ეგვიპტეში იმყოფებოდა. იპნ

ეს არის მთავარი საკითხი, რაზეც დღეს საგარეო საქმეთა სამინისტრო და ცენტრალური საარჩევნო კომისია ერთმანეთს უნდა ეთანამშრომლებოდნენ და ამ მიმართულებით დგამდნენ ნაბიჯებს, - ამის შესახებ პარტია „საქართველოსთვის“ დეპუტატმა, ბექა ლილუაშვილმა ჟურნალისტებთან საუბრისას განაცხადა. ლილუაშვილის თქმით, ყველა ცდილობს, რომ გვერდი აუქციოს მთავარ საკითხს და იმ ხალხს, რომელიც ამ ქვეყანაში ეკონომიკის ძალიან დიდ ნაწილს საზღვარგარეთ და არა საქართველოში ქმნის. “ბუნებრივია, რომ ერთ-ერთი მთავარი საკითხი არის ემიგრაციისთვის ხმის მიცემის შესაძლებლობების უზრუნველყოფა. ყველა ცდილობს, რომ რაღაც სპეკულაციები მოახდინონ ამ ციფრებით. გამოსავალი მარტივია: ჩვენი ემიგრაციისთვის გავაკეთოთ, მაგალითად, ონლაინ რესურსი, სადაც ადამიანები დიდი ხნით შეძლებენ თავიანთი პოზიციის დაფიქსირებას, უნდათ თუ არა მონაწილეობის მიღება არჩევნებზე. ეს რესურსი ხელმისაწვდომი გავხადოთ მათთვის და დავინახავთ რამდენი ადამიანი, რომელ ქალაქში და რა ინტენსივობით აპირებს არჩევნებში მონაწილეობას და შესაბამისად, უნდა გაიხსნას ხელისუფლების მხრიდან საარჩევნო უბნები. ეს არის მთავარი საკითხი, რაზეც დღეს საგარეო საქმეთა სამინისტრო და ცენტრალური საარჩევნო კომისია ერთმანეთს უნდა ეთანამშრომლებოდნენ და ამ მიმართულებით დგამდნენ ნაბიჯებს. სამწუხაროდ, ყველა ცდილობს, რომ გვერდი აუქციოს ამ მთავარ საკითხს და იმ ხალხს, რომელიც ამ ქვეყანაში ეკონომიკურ ძალიან დიდ ნაწილს თავისი შრომით საზღვარგარეთ და არა საქართველოში ქმნიან, იმის ნაცვლად, რომ ხელისუფლებამ პოლიტიკურ ცხოვრებაში მათ მონაწილეობაზე იზრუნოს, მათ იგნორირებას უკეთებს”, - განაცხადა ბექა ლილუაშვილმა. ცნობისთვის, დღეს, პარლამენტში, ინტერპელაციის წესით, საგარეო საქმეთა მინისტრს ილია დარჩიაშვილს უსმენენ. დარჩიაშვილი საზღვარგარეთ მყოფი საქართველოს მოქალაქეების არჩევნებში მონაწილეობის საკითხზე ოპოზიციონერმა დეპუტატებმა დაიბარეს. როგორც ოპოზიცია განმარტავს, საზღვარგარეთ არალეგალურად მცხოვრები საქართველოს მოქალაქეების რაოდენობა ძალიან დიდია, მათ კი, ძირითადად, არჩევნებში მონაწილეობის შიში აქვთ, რადგან ფიქრობენ, რომ ეს მათ დეპორტირებას გამოიწვევს. ოპოზიციის ინფორმაციით, ემიგრანტების უმეტესობა ინფორმირებული არ არის, რომ უცხო ქვეყანაში არჩევნებში რეგისტრაცია მხოლოდ საარჩევნო მიზნებისთვის ხდება და ის ამა თუ იმ ქვეყანაში ამა თუ იმ პირის სამართლებრივ მდგომარეობაზე ვერანაირ გავლენას ვერ მოახდენს. იპნ

ევროპული საბჭო მიესალმება უკრაინისა და მოლდოვას რესპუბლიკის პროგრესს ევროკავშირის გზაზე აუცილებელი რეფორმების კუთხით წინსვლის საქმეში. ევროპული საბჭო ყურადღებას აპყრობს საქართველოს მიმდინარე ძალისხმევას და ქვეყანას პრიორიტეტული რეფორმების კუთხით წინსვლისკენ მოუწოდებს, - ამის შესახებ ევროპული საბჭოს დასკვნაშია აღნიშნული, რომელიც გუშინ, საბჭოს ორდღიანი სამიტის პირველი დღის დასრულების შემდეგ გამოქვეყნდა. „ევროპულმა საბჭომ შეაფასა გაფართოებისა და შიდა რეფორმებისთვის მზადება და განაცხადა, რომ ორივე გზაზე მუშაობა პარალელურად უნდა განვითარდეს, რათა უზრუნველყოფილ იქნას, რომ როგორც მომავალი წევრი სახელმწიფოები, ასევე ევროკავშირი მზად იქნებიან გაწევრიანების დროს. ევროპული საბჭო მომავალ შეხვედრაზე შიდა რეფორმებს განიხილავს, რათა 2024 წლის ზაფხულისთვის მიღებულ იქნეს დასკვნები მომავალი მუშაობის საგზაო რუკის შესახებ“, - აღნიშნულია ევროპული საბჭოს დასკვნის იმ თავში, რომელიც გაფართოების საკითხს ეხება. დოკუმენტის თანახმად, კომისიის 2024 წლის 12 მარტის რეკომენდაციის საფუძველზე, ევროპული საბჭო იღებს გადაწყვეტილებას გახსნას გაწევრიანების მოლაპარაკებები ბოსნია და ჰერცეგოვინასთან. „ევროპული საბჭო იწვევს კომისიას, მოამზადოს მოლაპარაკებების ჩარჩო, მისი მიღების მიზნით იმ მომენტში, როდესაც გადაიდგმება ყველა შესაბამისი ნაბიჯი, რომელიც მითითებულია კომისიის 2022 წლის 12 ოქტომბრის რეკომენდაციაში“, - აღნიშნულია დოკუმენტში. ipn

საქართველო-ლუქსემბურგს შორის მატჩი საქართველოს ნაკრების გამარჯვებით დასრულდა. შეხვედრაში საქართველოს ნაკრებმა ლუქსემბურგი ანგარიშით - 2:0 დაამარცხა და საკვალიფიკაციო ეტაპის პლეი ოფის ფინალში გავიდა. მატჩში ორივე გოლი ბუდუ ზივზივაძემ გაიტანა. ევროპის ჩემპიონატის პლეი ოფის ნახევარფინალის მატჩი თბილისში, „დინამო არენაზე“ ჩატარდა. ლუქსემბურგთან მატჩის შემდეგ საქართველოს ეროვნული ნაკრები საბერძნეთსა და ყაზახეთს შორის გამარჯვებულს შეხვდება. მატჩი, ასევე, თბილისში შედგება, სადაც საქართველოს ნაკრები უკვე ევრო 2024-ის ფინალური ეტაპის საგზურისთვის იბრძოლებს. ipn

საქართველო ლუქსემბურგს ანგარიშით - 2:0 ამარცხებს, გოლი კვლავ ბუდუ ზივზივაძემ გაიტანა. მატჩში ანგარიშის გახსნა, სწორედ ზივზივაძემ მოახერხა და საქართველოს ნაკრებს პირველივე ტაიმში პირველი გოლი მოუტანა. ევროპის ჩემპიონატის პლეი ოფის ნახევარფინალის მატჩი თბილისში, „დინამო არენაზე“ მიმდინარეობს. ლუქსემბურგთან მატჩის შემდეგ საქართველოს ეროვნული ნაკრები საბერძნეთსა და ყაზახეთს შორის გამარჯვებულს შეხვდება. მატჩი, ასევე, თბილისში შედგება, სადაც საქართველოს ნაკრები უკვე ევრო 2024-ის ფინალური ეტაპის საგზურისთვის იბრძოლებს. იპნ

საქართველოს პრეზიდენტმა, სალომე ზურაბიშვილმა სპორტსმენი ილია თოფურია ღირსების ორდენით დააჯილდოვა. ინფორმაციას პრეზიდენტის ადმინისტრაცია ავრცელებს. პრესსამსახურის ინფორმაციით, აბსოლუტური საბრძოლო ჩემპიონატის (Ultimate Fighting Championship, UFC) გამარჯვებული ქვემსუბუქ წონაში, ქართველი პროფესიონალი მებრძოლი ილია თოფურია საქართველოში შერეული საბრძოლო ხელოვნების პოპულარიზაციის საქმეში შეტანილი განსაკუთრებული პირადი წვლილისა და წარმატებული სპორტული საქმიანობისთვის დაჯილდოვდა. დაჯილდოების ცერემონია ორბელიანების სასახლეში გაიმართა და სახელმწიფო ჯილდო საქართველოს პრეზიდენტმა ილია თოფურიას პირადად გადასცა. იპნ

UFC-ის ქართველმა ჩემპიონმა, ილია თოფურიამ საქართველოსა და ლუქსემბურგის მატჩის დაწყებამდე „დინამო არენაზე“ საჩემპიონო ქამარი წარადგინა. როგორც ცნობილია, ილია თოფურიამ ქამრისთვის ავსტრალიელი მებრძოლი ალექსანდერ ვოლკანოვსკი ნოკაუტით დაამარცხა. ილია თოფურია საქართველოს პრეზიდენტმა, სალომე ზურაბიშვილმა ღირსების ორდენით დააჯილდოვა. იპნ

შვეიცარიული ორგანიზაცია IQAir მყარი ნაწილაკებით ატმოსფერული ჰაერის დაბინძურებაზე 2023 წლის ანგარიშს აქვეყნებს, რომელშიც მოხვდა 134 ქვეყნის 7 812 ქალაქი, მათ შორის, თბილისი და რუსთავი. ანგარიშის მიხედვით, ჰაერის PM 2.5 ნაწილაკების დაბინძურებით, რომელიც ჰაერში 2,5 მიკრომეტრის დიამეტრის მქონე ნაწილაკების არსებობას გულისხმობს, თბილისმა 7 812 ქალაქს შორის 1 658-ე ადგილი დაიკავა, რუსთავმა მასზე უარესი შედეგი აჩვენა – 909-ე. რეიტინგში პირველი ადგილი ყველაზე ცუდი შედეგია. კვლევა ჰაერის მონიტორინგის 30 000 სადგურის მონაცემებს ეყრდნობა, რომლებიც მთავრობების, უნივერსიტეტებისა და საგანმანათლებლო დაწესებულებების, არასამთავრობო და კერძო ორგანიზაციებისა და მოქალაქეების მიერ არის დამონტაჟებული. თბილისის ჰაერში PM ნაწილაკების კონცენტრაცია 2023 წელს 15.5 იყო, რუსთავში კი — 23.9. ანგარიშის ავტორები ჯანმრთელობის მსოფლიო ორგანიზაციის მიერ დადგენილი სტანდარტით ხელმძღვანელობენ, რომლის მიხედვითაც, PM 2.5 ნაწილაკების კონცენტრაცია ჰაერში 5 ერთეულს არ უნდა აჭარბებდეს. შესაბამისად, ამ ნიშნულით თბილისი და რუსთავი იმ ქალაქების ჩამონათვალში მოხვდა, სადაც ჰაერი მყარი ნაწილაკებით WHO-ის სტანდარტს 3-5-ჯერ აჭარბებს. ამავე კვლევის მიხედვით, ჯანმრთელობის მსოფლიო ორგანიზაციის მიერ დადგენილ ნორმას მსოფლიოს მხოლოდ 10 ქვეყანა და შემოწმებული ქალაქების მხოლოდ 9% აკმაყოფილებს. ანგარიშის მიხედვით, ჰაერში PM 2.5 ნაწილაკების კონცენტრაციით საქართველომ 134 გამოკვლეულ ქვეყანას შორის 62-ე ადგილი დაიკავა (16.4). PM 2.5 ნაწილაკებით ყველაზე ნაკლებად დაბინძურებული ჰაერია: ამ მაჩვენებლით ყველაზე დაბინძურებული ქვეყნების ათეული კი ასე გამოიყურება: Რაც შეეხება ქალაქების მონაცემებს, კვლევის მიხედვით P.M. 2.5 ნაწილაკებით ყველაზე დაბინძურებული ქალაქი ინდოეთის დედაქალაქი ნიუ დელია (92.7) — ყველაზე ნაკლებად დაბინძურებული კი- პუერტო რიკოს დედაქალაქი სან ხუანი (2.7). ჯანმრთელობის მსოფლიო ორგანიზაციის მონაცემებით, მსოფლიოში 9 გარდაცვლილიდან ერთი ჰაერის დაბინძურებით გამოწვეული დაავადებით იღუპება. WHO-ის მონაცემებით, სწორედ ჰაერის დაბინძურების გამო ყოველწლიურად 7 მილიონი ადამიანი იღუპება. ორგანიზაციაში აღნიშნავენ, რომ PM2.5 ნაწილაკებით დაბინძურება იწვევს ისეთ დაავადებებს, როგორიცაა ასთმა, სიმსივნე, გულის შეტევა და ფილტვების დაავადებები. ბავშვებში შესაძლოა მენტალური ჯანმრთელობის პრობლემებიც კი გამოიწვიოს. რას აკეთებს სახელმწიფო? „ნეტგაზეთი“ საქართველოში ატმოსფერული ჰაერის მყარი ნაწილაკებით დაბინძურების შესამცირებლად გადადგმულ და სამომავლოდ დაგეგმილ ნაბიჯებზე გარემოს დაცვის სამინისტროს ატმოსფერული ჰაერის სამმართველოს ხელმძღვანელს ნოე მეგრელიშვილს ესაუბრა. მეგრელიშვილის თქმით, ქვეყანა ჰაერის ხარისხის ევროპული სტანდარტით ხელმძღვანელობს. აღნიშნული ზღვარი ჯანმრთელობის მსოფლიო ორგანიზაციის სტანდარტზე ლმობიერია და თუ WHO-ის შემთხვევაში P.M. 2.5 ნაწილაკების დაშვებული კონცენტრაცია 5 მიკროგრამია, ევროკავშირის მიხედვით 25 მიკროგრამს არ უნდა აჭარბებდეს. მეგრელიშვილის განმარტებით, ამის მიზეზი ისაა, რომ ევროკავშირის სტანდარტი 2008 წელს შემუშავდა, WHO-მ კი 2021 წელს განაახლა: მეგრელიშვილი ჩვენთან საუბრისას აცხადებს, რომ საქართველომ უკვე დაიწყო მუშაობა იმისათვის, რომ ევროკავშირის სტანდარტის გამკაცრების შემთხვევაში ქვეყანა მზად იყოს. მეგრელიშვილი აღნიშნავს, რომ საქართველოში, ისევე როგორც ევროპის უმეტეს ნაწილში, ჰაერის მთავარი დამაბინძურებელი სწორედ PM ნაწილაკები და აზოტის ჟანგეულებია. მყარი ნაწილაკებით ჰაერის დაბინძურების მთავარი წყარო საქართველოს შემთხვევაში არის სამრეწველო სექტორი, შეშის მოხმარება, სამშენებლო სექტორი, ავტოტრანსპორტი, ღია გრუნტი და ტრანსსასაზღვრო დაბინძურება. მისი თქმით, გარემოს ეროვნული სააგენტო აფართოებს მონიტორინგის სისტემას, რაც ჰაერის მონიტორინგის ავტომატური სადგურების დამატებაში გამოიხატება. მეგრელიშვილის განცხადებით, ამ ეტაპზე საქართველოში მონიტორინგის 14 ავტომატური სადგურია და ევროკავშირის დახმარებით კიდევ 9 სადგურის შეძენა იგეგმება. ამასთან, სააგენტო მონაცემებს იღებს ინდიკატორული სადგურებიდანაც. რაც შეეხება ჰაერის დაბინძურების ხარისხის შემცირების ღონისძიებებს, მეგრელიშვილი რამდენიმე საკანონმდებლო ცვლილებას გამოყოფს: მისი თქმით, აღნიშნული ცვლილების შემდეგ ქალაქ რუსთავში მყარი ნაწილაკებით დაბინძურების მაჩვენებელი შემცირდა და ევროკავშირის სტანდარტს მიუახლოვდა. ამასთან, ნოე მეგრელიძის თქმით, პარლამენტმა შარშან მიიღო კანონი სამრეწველო ემისიების შესახებ, რომელიც ავალდებულებს მოქმედ საწარმოებს, ეტაპობრივად დანერგონ საუკეთესო ხელმისაწვდომი ტექნოლოგიები ან კიდევ უფრო შეამცირონ გამონაბოლქვი. გარემოს დაცვის სამინისტროს ატმოსფერული ჰაერის სამმართველოს ხელმძღვანელი ასევე აცხადებს, რომ გაუმჯობესდა საწვავის ხარისხიც. საბოლოოდ კი სანქციები გამკაცრდა როგორც საწვავის ხარისხის შეუსაბამობაზე, ასევე სამრეწველო საწარმოების მიერ ემისიებზეც, რამაც ვითარება გააუმჯობესა: PM2.5 ნაწილაკებით რუსთავის ჰაერის დაბინძურების შემცირებაზე IQAir-ის კვლევაც მიუთითებს. ანგარიშის მიხედვით, 2020 წელს რუსთავში 1 კუბურ მეტრ ჰაერში ამ დამაბინძურებლის კონცენტრაცია 31.3 მიკროგრამი იყო, 2021 წელს 34.8 მიკროგრამამდე გაიზარდა, 2022 წელს 26.5-მდე შემცირდა, 2023-ში კი 23.9 მიკროგრამი დაფიქსირდა. ამავე კვლევით, PM2.5 ნაწილაკებით ჰაერის დაბინძურების მაჩვენებელი წლების მიხედვით დაკლებულია თბილისის შემთხვევაშიც. კერძოდ, 2019 წელს 1 კუბურ მეტრ ჰაერში ამ დამაბინძურებლის კონცენტრაცია ანგარიშის მიხედვით 20.1 მიკროგრამი იყო, 2020 წელს – 20.4 და ეს მაჩვენებელი 2021 წელსაც შენარჩუნდა. 2022 წელს 16.3 მიკროგრამამდე შემცირდა, 2023-ში კი 15.5 მიკროგრამს მიაღწია. მეგრელიძის თქმით, ამჟამად სააგენტო თბილისის ჰაერის ხარისხის გეგმაზე მუშაობს, რომელიც ბოლო ფაზაშია და მალე დამტკიცდება. მეგრელიძის თქმით, გეგმაში იქნება განსაზღვრული მიმართულებები საზოგადოებრივი ტრანსპორტის განვითარებაზე, ველოსიპედით გადაადგილების და ელექტრომობილების წახალისებაზე. კიდევ რისი გაკეთებაა საჭირო? „ეკო ცენტრის“ დამფუძნებელი და წევრი მოძრაობისა „გავიგუდეთ“ – თინათინ მაღედანი, რომელიც თავადაც რუსთავის მკვიდრია, ამბობს, რომ ცვლილებების შემდეგ ჰაერის ხარისხი რუსთავში მართლაც გაუმჯობესდება და ამას კვლევებიც ადასტურებს, თუმცა ყურადღების გამახვილება რამდენიმე საკითხზე კიდევაა საჭირო. მათ შორის, მაღედანის თქმით, აღნიშნულზე გავლენა შეიძლება ჰქონდეს რუსთავის ფეროშენადნობი საწარმოების ნაწილის მიერ ფუნქციონირების შეჩერებასაც, რაც მათი პროდუქციის საბაზრო ღირებულების კლებითაა გამოწვეული. ამასთან, აქტივისტი აღნიშნავს, რომ რუსთავის 50-მდე საწარმოდან 24- საათიან მონიტორინგს მხოლოდ 15 ექვემდებარება, საიდანაც აღნიშნული სისტემა ამ დროისთვის 13-ს აქვს დანერგილი. კანონის აღსრულება კი, მაღედანის თქმით, კანონმდებლობის ამოქმედებიდან ერთი წლის შემდეგ კვლავ საზოგადოებისა და სამოქალაქო მოძრაობის პროტესტის შემდეგ დაიწყო. თინათინ მაღედანის თქმით, აუცილებელია ინსპექტირების რაოდენობების ზრდაც, რაც აიძულებს ქარხნებს, მეტად დაიცვან რეგულაციები და დარღვევების გამოვლენის გარდა სახელმწიფოს პრევენციულ მექანიზმსაც მისცემს. აქტივისტი აღნიშნავს, რომ ინსპექტირების დროსაც, ხშირად ზედამხედველობის დეპარტამენტის ჯგუფს თან არ აქვს საჭირო მოწყობილობა, ან შესაბამისი სპეციალისტი არ იმყოფება ადგილზე და უწევთ მისთვის დალოდება, ამასობაში კი საეჭვო გაფრქვევას შესაძლოა ვეღარ დააკვირდე. მისი თქმით, საწარმოების მიერ ჰაერის დაბინძურების ეფექტიანი მონიტორინგისთვის მხოლოდ ავტომატური მონიტორინგის სისტემის ფუნქციონირება საკმარისი არაა, რადგანაც საეჭვო გაფრქვევა შესაძლოა არ მოხდეს ჰაერშემკრები ნაგებობის გავლით, საიდანაც ემისიები ფილტრების გავლით მიდის თვითმონიტორინგის სისტემამდე და ატმოსფეროში გამოიფრქვევა. ამასთან, აქტივისტი აღნიშნავს, რომ ხშირ შემთხვევაში პრობლემურია ნედლეულის არასათანადო დასაწყობებაც, ვინაიდან რუსთავი ქარიანი ქალაქია და მტვერი ათობით კილომეტრზე ვრცელდება. რაც შეეხება თბილისს, თინათინ მაღედანი აღნიშნავს, რომ დედაქალაქში ატმოსფერულ ჰაერს ძირითადად საავტომობილო ტრანსპორტი აბინძურებს აზოტის დიოქსიდით, რაც თავის მხრივ მოძველებული ავტოპარკითაა მეტწილად გამოწვეული. რაც შეეხება მყარი ნაწილაკებით ჰაერის დაბინძურებას, მაღედანი აღნიშნავს, რომ აქ გამოსაკვეთია სამშენებლო სექტორის როლი. აქტივისტი აღნიშნავს, რომ მნიშვნელოვანია სამშენებლო არეალები შეფუთული იყოს, რასაც სამშენებლო კომპანიები იშვიათად ასრულებენ. ნეტგაზეთი

პარტია „გახარია საქართველოსთვის“ წევრები, მიშა დაუშვილი და ნათია მეზვრიშვილი საუბრობენ მართლმსაჯულების სისტემურ პრობლემებზე და იმაზე, თუ რა კონკრეტული ცვლილებები გარდაქმნის ამ სისტემას რეალურად; რატომ არის აუცილებელი კომპლექსური რეფორმა და არა ცალკეული ნაბიჯები მხოლოდ სასამართლოს ან სხვა მიმართულებით; რას ნიშნავს „სამართლიანი წესრიგი“ და რატომ ვერ მივაღწევთ მას „ოცნების“ და ნაციონალების“ პირობებში. ეპიზოდი #1: როგორ შეცვლის გახარიას გუნდი მართლმსაჯულების სისტემას.

"იმ პარტიას წარმოვადგენ, რომელსაც ოლიგარქი არ მართავს, ამ შემთხვევაში მხოლოდ "ოცნებას" არ ვგულისხმობ, იგივე შემიძლია ვთქვა კოლექტიურ "ნაც.მოძრაობაზე". ამ ორი პარტიის დაფინანსება მოდის ერთობლივად ნაშოვნი კორუფციული ფულიდან, ამის ნათელი მაგალითია ქოლ-ცენტრების საქმე, რომელზეც საგამოძიებო კომისია მოვითხოვეთ, "ოცნებამ" და "ნაც.მოძრაობამ" კი ერთად არ შეგვაქმნევინა კომისია." ანა ბუჩუკური, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/1474959339781971/

"კალაძეს, როგორც ჩანს თბილისის მერობა მხოლოდ სკვერების გახსნა ჰგონია. არანაირი ამბიცია ამ ხელისუფლებას აღარ შემორჩა, რომ თბილისი გახადოს ევროპული ქალაქი. სწორედ ამიტომ ჰქონდათ მათ ისტერიული რეაქცია ჩვენი პროგრამის მნიშვნელოვან ნაწილზე, რომელიც მეტროს გაფართოვებას ეხება." ანა ბუჩუკური, საპარლამენტო პოლიტიკური ჯგუფი "საქართველოსთის" წევრი. ვიდეო: https://www.facebook.com/ForGeoGe/videos/299535202950983/

“ჩვენი შვილების ევროპული მომავალი არ არის დამოკიდებული სააკაშვილის გათავისუფლებაზე, მსგავსი რიტორიკით საუბარი არის ანტიეროვნული საქმე, რომელიც არ უნდა აკეთოს არავინ. სააკაშვილს მისჯილი აქვს კონკრეტული სასჯელი, რომელიც უნდა მოიხადოს. მეორეს მხრივ "ოცნებასაც" გაუხარდა, რომ რეზოლუცია ვერ მივიღეთ და ფარისევლური წუხილით ოპოზიციის დისკრედიტაციისთვის იყენებს ამ საკითხს.” ბერდია სიჭინავა, პარტია “გახარია საქართველოსთვის” აღმასრულებელი მდივანი. ვიდეო: https://www.facebook.com/ForGeoGe/videos/419680467413046/

დღეს თბილისის საკრებულოს დეპუტატები ზაზა თავაძე, სალომე კობალაძე, გიორგი შარაშიძე პოლიტსაბჭოს წევრ რუსუდან თევზაძესთან ერთად ნინოშვილის 48-ს მაცხოვრებლებს შეხვდნენ და ადგილზე გაეცნენ სიტუციას. მოსახლეობა შველას ითხოვს და ამ დრომდე უიმედოდ ელოდება მერიის გადაწყვეტილებას, თუ რა ბედი ეწევა აღნიშნულ შენობას. “მერიამ ხუთი დღით გადაგვიყვანა სასტუმროში, უკვე სამი დღეა გასული, აქ კი არაფერი გაკეთებულა და არც ვიცით როდის და რა გაკეთდება. გაუსაძლის მდგომარეობაში ვართ. სახლში ვერ შევდივართ, რადგან არსებობს შენობის ჩამონგრევის საფრთხე” - უთხრეს დაზარალებულებმა გახარიას გუნდის წევრებს. მოვუწოდებთ თბილისის მერიას, სასწრაფოდ მიიღოს ზომები და მოსახლეობას, რომელიც აქამდე ქუჩაში ელოდება შესაბამისი სამსახურების გამოჩენას, აუხსნან, რა ბედი ეწევა მათ ავარიულ სახლს.

ბიძინა ივანიშვილის მიერ დაფუძნებულ ბანკ ქართუს თბილისში ჭავჭავაძის გამზირზე მდებარე უძრავი ქონება სიმბოლურ ფასად, 1 ლარად გადასცა, რის სანაცვლოდაც ამ უკანასკნელმა უარი თქვა სახელმწიფოსთან ყოველგვარ დავაზე ბანკის გაკოტრების საქმის ფარგლებში. ამის შესახებ ცნობილი გახდა BM.GE-ის მხრიდან ქონების სააგენტოდან გამოთხოვილი საჯარო ინფორმაციიდან, რომელიც 2023 წელს სიმბოლურ ფასად – 1 ლარად გასხვისებულ სახელმწიფო ქონებებს ეხება. ირკვევა, რომ ქონების სააგენტომ “ქართუს” 1 ლარად 7 მილიონი ლარის ღირებულების ქონება გადასცა. ქართუს საქმე 2012 წლის დეკემბერში შინაგან საქმეთა სამინისტროში გამართულ ბრიფინგზე პრესსამსახურის ხელმძღვანელმა ნინო გიორგობიანმა განაცხადა, რომ შსს–მ გამოიძია და გაშიფრა ორგანიზებულ- დანაშაულებრივი სქემა, რომელშიც სახელმწიფო, პოლიტიკური თანამდებობის პირები და აღმასრულებელი და საკანონმდებლო ხელისუფლების წარმომადგენლები მონაწილეობდნენ. გიორგობიანის განცხადებით, გეგმა მიზნად ისახავდა ამჟამინდელი პრემიერ–მინისტრის ბიძინა ივანიშვილის მიმართ ანგარიშსწორების მიზნით ბანკი “ქართუს” გაკოტრებას. “დანაშაულებრივი სქემა რამდენიმე ეტაპისგან შედგებოდა, მას შემდეგ, რაც ივანიშვილმა საჯაროდ გააკეთა განცხადება პოლიტიკურ პროცესებში ჩართვის შესახებ, ყოფილი ხელისუფლების მაღალჩინოსნებმა პირველ ეტაპზე შეიმუშავეს და პარლამენტმა დაამტკიცა საკანონმდებლო ცვლილებები, რომლის თანახმადაც, საგადასახადო დავალიანების აღმოჩენის შემთხვევაში სახელმწიფო უფლება ექნებოდა, აუქციონის წესით გაეყიდა იურიდიული პირების ქონება, მიუხედავად იმისა, რომ ეს ქონება ბანკის სასარგებლოდ იპოთეკით იყო დატვირთული”– განაცხადა გიორგობიანმა მისივე თქმით, იმ მიზნით, რომ ქართუს ქონება გონივრულ ფასში არ გამოესყიდათ, აღსრულების ეროვნული ბიუროს ხელმძღვანელის ნიკა მელიას ხელმძღვანელობით აუქციონის ჩაშლა ხდებოდა. რის შემდეგაც აღსრულების ეროვნული ბიურო ქონებას ეკონომიკის სამინისტროს გადასცემდა, ეკონომიკის სამინისტრო კი პრეზიდენტის განკარგულებით ქონებებს ასხვისებდა პირდაპირი მიყიდვის წესით. “დანაშაულებრივი სქემის თანახმად, ხელისუფლებისადმი ლოიალურად განწყობილი ბიზნესმენებს, რომელთაც საკრედიტო დავალიანება გააჩნდათ ბანკ ქართუში, უნდა ეღიარებინათ არარსებული საგადასახადო დავალიანება. ამის შემდეგ იმ ქონებას, რომელიც ბანკის მიერ იპოთეკით იყო დატვირთული, გაიტანდნენ აუქციონზე, სადაც მყიდველი არ დაფიქსირდებოდა, შემდეგ კი ეკონომიკის სამინისტრო პირდაპირი მიყიდვის წესით, სიმბოლურ ფასებში გაყიდდა იმ კომპანიებზე, რომლებსაც სინამდვილეში ამავე ქონების ყოფილი მეპატრონეები აკონტროლებდნენ” შსს აცხადებდა, რომ ამ გზით ხელისუფლებასთან დაახლოებულ ბიზნესმენებს ქონებაც არ ეკარგებოდათ და დანაშაულებრივ სქემაში მონაწილეობით უუქმდებოდათ ბანკი ქართუს საკრედიტო დავალიანება, რომლის უზრუნველყოფასაც იპოთეკით დატვირთული ქონება წარმოადგენდა. “შესაბამისად, დაზარალებული რჩებოდა ბანკი ქართუ, რომელსაც იმ დროისათვის მეწარმე სუბიექტებისათვის მიცემული ჰქონდა 59 997 000 დოლარისა და 3 757 000 ლარის კრედიტები”. მელიას ადვოკატი გიორგი კონდახაშვილი მაშინ ამბობდა, რომ ამ საქმეში სხვა პირების მიმართ, კერძოდ 25 ადამიანის მიმართ შეწყდა გამოძიება და ხელისუფლების მიზანი ნიკა მელიას პოლიტიკიდან ჩამოშორება იყო. შემდგომში ცნობილი გახდა, რომ ბანკის გაკოტრების სქემაში მონაწილეობაში ერთ-ერთი ბრალდებული თანამდებობაზეც კი დაინიშნა. საბოლოო ჯამში იუსტიციის ყოფილ მინისტრ ზურაბ ადეიშვილი, რომელიც “ქართუ ბანკის” გაკოტრების საქმეში იყო ბრალდებული, სასამართლომ ყველა ეპიზოდში დამნაშავედ ცნო და საერთო ჯამში, ძირითად სასჯელად 5 წლისა და 3 თვის ვადით პატიმრობა შეუფარდა. ამავე საქმეზე ენმ-ის ლიდერ ნიკა მელიას 25 000 ლარის ოდენობის ჯარიმა და სამი წლის ვადით თანამდებობის დაკავების უფლება მიუსაჯა სასამართლომ. ეს სასჯელი ამნისტიით 2 წელსა და სამი თვემდე დავიდა. მელია მისთვის წარდგენილ ერთ მუხლში გამართლდა, რომელიც პატიმრობას ითვალისწინებდა. სასამართლომ ამ საქმეზე დაწყებული გამოძიებიდან მე-7 წელს გამოიტანა გადაწყვეტილება. გამოძიება კი 2012 წლის დეკემბერში დაიწყო – მას შემდეგ, რაც ხელისუფლებაში “ქართული ოცნება” მოვიდა. ნეტგაზეთი

საქართველოს ფეხბურთის ფედერაციის მიერ დაგეგმილ ღონისძიებასთან დაკავშირებით, პირველი რესპუბლიკის მოედანზე ტრანსპორტის გადაადგილება დროებით შეზღუდულია. მერიის ინფორმაციით, შეზღუდვა რუსთაველის გამზირისა და პირველი რესპუბლიკის მოედნის კვეთიდან პირველი რესპუბლიკის მოედნისა და მერაბ კოსტავას ქუჩის კვეთამდე არსებულ საგზაო მონაკვეთში, 21 მარტის 01:00-დან დაიწყო და 22 მარტის 07:00 საათამდე იმოქმედებს. „დროის აღნიშნულ მონაკვეთში რუსთაველის გამზირიდან კოსტავას ქუჩის მიმართულებით მოძრავი ავტომობილები გადაადგილებას შეძლებენ მხოლოდ მიხეილ ჯავახიშვილისა და მერაბ კოსტავასა ქუჩების მიმართულებით. ჯავახიშვილის ქუჩიდან მოძრავი ავტომობილები თბილისის სახელმწიფო საკონცერტო დარბაზის მიმართულებით იმოძრავებენ, კოსტავას ქუჩიდან კი გადაადგილებას შეძლებენ მხოლოდ რუსთაველის გამზირისა და თავისუფლების მოედნის მიმართულებით. რაც შეეხება საზოგადოებრივ ტრანსპორტს, N359 ავტობუსი ვაკის მიმართულებით მოძრაობისას ჯავახიშვილის ქუჩიდან კოსტავას ქუჩის მიმართულებით გადაადგილდება, შემდეგ კი იმოძრავებს დადგენილი სქემით. N457 მიკროავტობუსი ბესიკის ქუჩის მიმართულებით მოძრაობისას ჯავახიშვილის ქუჩიდან რევაზ თაბუკაშვილის ქუჩისკენ იმოძრავებს, რევაზ ლაღიძის ქუჩით დაუკავშირდება რუსთაველის გამზირს და შემდეგ სვლას დადგენილი სქემით განაგრძობს“, – ნათქვამია განცხადებაში. პუბლიკა

1-ელი აპრილიდან წერეთლის გამზირსა და მიმდებარე ქუჩებზე ზონალურ-საათობრივი პარკინგი ამოქმედდება. ამის შესახებ თბილისის მერმა კახა კალაძემ დღეს გამართულ თბილისის მთავრობის სხდომაზე განაცხადა. კალაძემ დიდუბის რაიონის მცხოვრებლებს მოუწოდა, უფასო პარკირებით სარგებლობასთან დაკავშირებული შეფერხებების პრევენციისთვის, მუნიციპალურ პავილიონებს დროულად მიმართონ და საკუთარი ავტომობილები ზონალურ-საათობრივი პარკირების სისტემაში დაარეგისტრირონ. თბილისის მერიის ინფორმაციით, მუნიციპალური პავილიონები 31 მარტის ჩათვლით, განთავსებულია შემდეგ მისამართებზე: წერეთლის გამზირი N118 (საგამოფენო ცენტრ „ექსპო ჯორჯიას“ მიმდებარედ); წერეთლის გამზირი N12ა-ს მიმდებარედ; წერეთლის გამზირი N116; წერეთლის გამზირი N76; წერეთლის გამზირი N48; წერეთლის გამზირი N140 (მეტროსადგურ „დიდუბის“ მიმდებარედ); წყალტუბოს ქუჩა N10. აღნიშნული პავილიონები მუშაობს ყოველდღე, კვირისა და ორშაბათის გარდა, 09:00-დან 18:00 საათამდე. publika

ტყის საერთაშორისო დღესთან დაკავშირებით, გარემოს დაცვისა და სოფლის მეურნეობის სამინისტროს ეროვნული სატყეო სააგენტოს ინიციატივით, ქუთაისში, წმ. ნინოს სახელობის მესამე საჯარო სკოლის მოსწავლეებთან საინფორმაციო შეხვედრა გაიმართა. აღნიშნულის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს. უწყების ცნობით, სახელმწიფო ტყის ტერიტორიაზე დარგვის აქციაც მოეწყო. მოსწავლეებმა ტყის მნიშვნელობის, მისი დაცვა-აღდგენის შესახებ ინფორმაცია მიიღეს და, სიმბოლურად, 21 ძირი წიწვოვანი და ფოთლოვანი სახეობის ნერგი დარგეს. დარგვის აქციას დაუნის სინდრომის მქონე ბავშვები, ქუთაისის დღის ცენტრის - „ჯადოსნური სამყარო“ ბენეფიციარები შეუერთდნენ. „საზოგადოების ჩართულობა და პროცესის გამჭვირვალობა ტყის მდგრადი მართვის ერთ-ერთი წინაპირობაა. განსაკუთრებული მნიშვნელობა აქვს ახალგაზრდების დაინტერესებას და მათ აქტიურობას. აქვე მინდა აღვნიშნო, რომ პროფესიული განათლების ხელშეწყობა და დარგში ახალგაზრდა კადრის მოზიდვა ეროვნული სატყეო სააგენტოს ძირითად პრიორიტეტს წარმოადგენს. იმედი გვაქვს, რომ სულ უფრო მეტი დაინტერესება იქნება როგორც ამ პროფესიით, ისე, ტყის ეკოსისტემის მოვლით და შენარჩუნებით“, - აღნიშნა ეროვნული სატყეო სააგენტოს უფროსის მოადგილემ ნათია იორდანიშვილმა. 21 მარტი ტყის საერთაშორისო დღედ გაეროს გენერალურმა ასამბლეამ 1971 წელს აღიარა. ამ დღის აღნიშვნის მიზანი ტყის მნიშვნელობის შესახებ საზოგადოების ცნობიერების ამაღლებაა. იპნ