tvati

ევროკავშირის წევრმა 27-მა ქვეყანამ საქართველოს ეკონომიკის მინისტრს დემარში გამოუცხადა. დიპლომატების დემონსტრაციული ქმედება რუსეთთან პირდაპირი ფრენის დაწყების საკითხს შეეხო. ევროკავშირის ელჩმა პაველ ჰერჩინსკიმ მედიასთან განაცხადა, რომ სამინისტროში შეხვედრაზე მინისტრ ლევან დავითაშვილს აცნობეს, რომ ფრენის დაწყების გადაწყვეტილება ეწინააღმდეგება 27-ვე წევრი ქვეყნის ერთხმად მიღებულ გადაწყვეტილებას, რომ არ ჰქონდეთ პირდაპირი ფრენები რუსეთში და რუსეთიდან, არ დაუშვან რუსული თვითმფრინავების მიერ ევროკავშირის საჰაერო სივრცის გადაკვეთა. ელჩის თქმით, შეშფოთება გამოთქვეს იმაზე, რომ ეს ეწინააღმდეგება რუსეთს იზოლაციაში მოქცევას და ზეწოლის გაძლიერებას. „შეხვედრაზე თან მახლდა თბილისში მყოფი ევროკავშირის ყველა ქვეყნის ელჩი. ჩვენ გადავეცით, რომ ვწუხვართ საქართველოს მთავრობის გადაწყვეტილების შესახებ, მიიღონ პირდაპირი ფრენები რუსეთიდან. ჩვენ გადავეცით, რომ ეს გადაწყვეტილება ეწინააღმდეგება 27-ვე წევრი ქვეყნის ერთხმად მიღებულ გადაწყვეტილებას, რომ არ ჰქონდეთ პირდაპირი ფრენები რუსეთში და რუსეთიდან, არ დაუშვან რუსული თვითმფრინავების მიერ ევროკავშირის საჰაერო სივრცის გადაკვეთა. ჩვენ ასევე გამოვთქვით შეშფოთება, რომ ეს გადაწყვეტილება ეწინააღმდეგება ჩვენს გადაწყვეტილებას, იზოლაციაში მოვაქციოთ რუსეთი და ზეწოლა განვახორციელოთ მასზე, რათა შევცვალოთ რუსეთის ქცევა, როდესაც საქმე ეხება სასტიკ, აგრესიულ ომს, რომელსაც რუსეთი ამ დრომდე განაგრძობს უკრაინაში. მართალია, რომ ეს იყო რუსეთის ცალმხრივი გადაწყვეტილება აღედგინა ფრენები საქართველოსთან, თუმცა ეს ასევე საჭიროებდა შეთანხმებას საქართველოს მთავრობის მხრიდან. სწორედ ამიტომ, მე დამავალეს გადამეცა გზავნილი, ევროკავშირის 27 წევრი ქვეყნისგან, რომ ჩვენ ვწუხვართ საქართველოს მთავრობის გადაწყვეტილების გამო, მიიღოს პირდაპირი ფრენები რუსეთსა და საქართველოს შორის“, – განაცხადა ჰერჩინსკიმ. პუბლიკა

რუსული ძალები უკრაინის დედაქალაქ კიევს ბალისტიკური რაკეტებით დაესხნენ თავს, - მედიის ინფორმაციით, ამის შესახებ უკრაინის შეიარაღებული ძალების საჰაერო ძალების პრესსპიკერმა, იური იგნატმა განაცხადა. „მტერმა ბალისტიკური ტრაექტორიის რაკეტები გამოიყენა - წინასწარი ინფორმაციით „ისკანდერები“. შესაძლოა, რომ S-300 და S-400 რაკეტებიც იყო გამოყენებული“, - განაცხადა იგნატმა. კიევის მერის, ვიტალი კლიჩკოს განცხადებით, თავდასხმის შედეგად სულ მცირე ერთი ადამიანი დაშავდა. მისი ინფორმაციით, დედაქალაქის პოდილსკის რაიონში რაკეტების ნამსხვრევების შედეგად ორსართულიან საცხოვრებელ სახლში ხანძარი გაჩნდა, თუმცა ამ დროისთვის ის ლოკალიზებულია. კიევის საქალაქო-სამხედრო ადმინისტრაციის ინფორმაციით, დედაქალაქის სხვადასხვა რაიონში რაკეტების 6 ნამსხვრევი ჩამოვარდა. იპნ

ვაფასებ მის ხუმრობას, - ასე გამოეხმაურა ყაზახეთის პრეზიდენტი ყასიმ-ჟომართ ტოყაევი ბელარუსის პრეზიდენტის, ალექსანდრე ლუკაშენკოს წინადადებას, რომ ყაზახეთი რუსეთ-ბელარუსის სამოკავშირო სახელმწიფოს შეუერთდეს. ტოყაევის თქმით, ყაზახეთს არ აქვს ალიანსში გაწევრიანების საჭიროება. „ცოტა ხნის წინ, ბელარუსის რესპუბლიკის პრეზიდენტმა, ალექსანდრე ლუკაშენკომ ყაზახეთს სამოკავშირეო სახელმწიფოში გაწევრიანება შესთავაზა. ვაფასებ მის ხუმრობას. არ ვფიქრობ, რომ [ყაზახეთისთვის] ამის საჭიროება დგას, რადგან არსებობს ინტეგრაციის სხვა გაერთიანებები, უპირველეს ყოვლისა, ევრაზიის ეკონომიკური კავშირი“, - განაცხადა ტოყაევმა. მანვე აღნიშნა, რომ ყაზახეთს, როგორც ბირთვული იარაღის გაუვრცელებლობის ხელშეკრულების ხელმომწერს, არ სჭირდება ბირთვული იარაღი. იპნ

მამაკაცს, რომელსაც არასრულწლოვანი შვილების თვალწინ ქალის სანადირო თოფით სასიკვდილოდ დაჭრა ედებოდა ბრალად, სიღნაღის რაიონულმა სასამართლომ უვადო პატიმრობა მიუსაჯა, – ამის შესახებ განცხადებას „უფლებები საქართველო” ავრცელებს. პროკურატურის ინფორმაციით, მსჯავრდებულმა ქალს 2022 წლის 23 ნოემბერს სასიკვდილო ჭრილობები მიაყენა, ორი თვის შემდეგ ქალი საავადმყოფოში გარდაიცვალა. შემთხვევა ბოდბეში მოხდა. გარდაცვლილის უფლებამონაცვლისა და არასრულწლოვანი ბავშვების ინტერესებს „უფლებები საქართველო“ იცავდა. პუბლიკა

პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძის განცხადებით, ევროკავშირის წევრი ქვეყნების ელჩების დემარში კარგი საშუალეებაა, რომ საქართველოს მთავრობის წარმომადგენელთან რუსეთთან ფრენების აღდგენის საკითხი განიხილონ. სამხარაძის თქმით, ლოგიკური იქნებოდა, ევროკავშირი რუსეთის გადაწყვეტილებებზე პასუხს რუსეთის ხელისუფლებისგან ითხოვდეს. “ჩვენ ისედაც ვიცოდით ევროკავშირის ამ პოზიციის შესახებ და რაც შეეხება დღევანდელ დემარშს, ეს იქნება ძალიან კარგი შესაძლებლობა ჩვენი მთავრობის წარმომადგენლისთვის, რომ დაწვრილებით ავუხსნათ ევროკავშირის ელჩებს იმ პოლიტიკის შესახებ, რომელსაც საქართველო აქამდე ატარებდა და ასევე იმ გადაწყვეტილების ლოგიკის შესახებ, რომელიც რუსეთის ხელისუფლებამ მიიღო. ასევე ცოტა უცნაურად შეიძლება ჟღერდეს, მაგრამ რუსეთის ხელისუფლების გადაწყვეტილებაზე საქართველოს ხელისუფლებისგან პასუხების მოთხოვნა შეიძლება რაღაც ლოგიკაში ჯდებოდეს, თუმცა ამ შემთხვევაში ევროკავშირი პასუხს ასევე რუსეთის ხელისუფლებისგან უნდა ითხოვდეს, თუ რატომ მიიღო მან ვიზების გაუქმების და ფრენების აკრძალვის გაუქმების გადაწყვეტილება ახლა”, – განაცხადა სამხარაძემ. სამხარაძის თქმით, კითხვები ევროკავშირის მიმართ მასაც აქვს. „კიდევ ერთი საკითხი, რომელიც როგორც საქართველოს მოქალაქეს და კანონმდებელს მაინტერესებს, არის ის თუ რატომ არ არის ევროკავშირის მიერ ყველა რუსული ავიაკომპანია დასანქცირებული. ალბათ, ამ კითხვასაც დასვამენ ჩვენი მთავრობის წარმომადგენლები და საინტერესოა ის პასუხი, რასაც ევროკავშირის ელჩები გასცემენ“, – განაცხადა სამხარაძემ. ევროკავშირის ელჩი საქართველოში პაველ ჰერჩინსკი, ევროკავშირის ყველა ელჩთან ერთად, რუსეთთან პირდაპირი ფრენების აღდგენის გამო დემარშის მიზნით ვიცე-პრემიერს, ეკონომიკის მინისტრ ლევან დავითაშვილს ხვდებიან.რუსეთმა 10 მაისს მოხსნა შეზღუდვა საქართველოსთან პირდაპირ ფრენებზე. მოსკოვში ამ გადაწყვეტილებას „ჰუმანიტარული ხასიათის“ უწოდეს. საქართველოს ხელისუფლება მოსკოვის გადაწყვეტილებას მიესალმება და ამბობს, რომ ეს გაუმარტივებს ცხოვრებას რუსეთში მცხოვრებ „მილიონ ქართველს“. მთავრობაში აგრეთვე აცხადებენ, რომ მხოლოდ არასანქცირებული კომპანიები და ხომალდები შეძლებენ ფრენას. პოლიტიკოსების და მოქალაქეთა ნაწილი ავიამიმოსვლის აღდგენას აპროტესტებს. ფრენების ნებართვა უკვე მიიღო სამმა კომპანიამ – რუსულმა „აზიმუტმა“, Red Wings-მა და ქართულმა „Georgian Airways-მა“. ფრენების აღდგენას კრიტიკულად უყურებენ აშშ და ევროკავშირი. ნეტგაზეთი

უკრაინის შეიარაღებული ძალების მთავარსარდლის, ვალერი ზალუჟნის განცხადებით, 29 მაისს, გამთენიისას უკრაინის შეიარაღებულმა ძალებმა რუსეთის მასშტაბური საჰაერო შეტევა მოიგერიეს და 67 სამიზნის ჩამოგდება შეძლეს. უკრაინელი გენერლის განცხადებით, რუსეთმა უკრაინის ქალაქების მიმართულებით 40-მდე ფრთოსანი რაკეტა ისროლა, ჩრდილოეთ და სამხრეთ მიმართულებებზე კი რუსეთმა ირანული წარმოების 35 საბრძოლო დრონი გამოიყენა. კიევის მერიის განცხადებით, გასული ღამის განმავლობაში უკრაინის შეიარაღებულმა ძალებმა კიევის თავზე რუსეთის 40-ზე მეტი ჭურვის ჩამოგდება შეძლეს. კიევის მერის, ვიტალი კლიჩკოს განცხადებით, ეს ამ თვეში კიევზე რუსეთის მე-15 საჰაერო იერიშია. კლიჩკოს თქმით, მიუხედავად მასშტაბური თავდასხმისა, უკრაინის მცველებმა შეძლეს სარაკეტო იერიშის მოგერიება იმგვარად, რომ შეტევას ნგრევა და სერიოზული ზიანი არ მოჰყოლია. კიევის მერის განცხადებით, უკრაინის თავდაცვის სისტემების მიერ ჩამოგდებული ერთ-ერთი საჰაერო ობიექტი კიევის პოდილსკის რაიონში ერთსართულიანი კერძო სახლის სახურავს დაეცა, თუმცა შემთხვევის შედეგად არავინ დაშავებულა. კიევის გარდა რუსეთის სამიზნეს წარმოადგენდა ოდესის, მიკოლაივის და ხერსონის ოლქები. უკრაინული მედიის ცნობით, ოდესაში ჩამოგდებული დრონის ნამსხვრევები საპორტო ინფრასტრუქტურას მოხვდა და მცირე ხანძარი გამოიწვია, რომლის ლიკვიდირებაც მალევე მოხდა. თავდასხმას მსხვერპლი არ მოჰყოლია არც მიკოლაივის რეგიონში, ხერსონში კი, უკრაინული მხარის ცნობით, რუსეთის სამიზნეს წარმოადგენდა საავადმყოფო და კრიტიკული ინფრასტრუქტურა — დაშავდა ერთი ადამიანი. ნეტგაზეთი

ევროკავშირის ელჩი საქართველოში პაველ ჰერჩინსკი, ევროკავშირის ყველა ელჩთან ერთად, რუსეთთან პირდაპირი ფრენების აღდგენის გამო დემარშის მიზნით ვიცე-პრემიერს, ეკონომიკის მინისტრ ლევან დავითაშვილს შეხვდებიან. საქართველოში ევროკავშირის წარმომადგენლობის ინფორმაციით, შეხვედრა დღეს, 29 მაისს, 17:00 საათზე გაიმართება. დემარში ხორციელდება ევროკავშირის 27 ქვეყნის სახელით. რუსეთმა 10 მაისს მოხსნა შეზღუდვა საქართველოსთან პირდაპირ ფრენებზე. მოსკოვში ამ გადაწყვეტილებას „ჰუმანიტარული ხასიათის“ უწოდეს. საქართველოს ხელისუფლება მოსკოვის გადაწყვეტილებას მიესალმება და ამბობს, რომ ეს გაუმარტივებს ცხოვრებას რუსეთში მცხოვრებ „მილიონ ქართველს“. მთავრობაში აგრეთვე აცხადებენ, რომ მხოლოდ არასანქცირებული კომპანიები და ხომალდები შეძლებენ ფრენას. პოლიტიკოსების და მოქალაქეთა ნაწილი ავიამიმოსვლის აღდგენას აპროტესტებს. ფრენების ნებართვა უკვე მიიღო სამმა კომპანიამ – რუსულმა „აზიმუტმა“, Red Wings-მა და ქართულმა „Georgian Airways-მა“. ფრენების აღდგენას კრიტიკულად უყურებენ აშშ და ევროკავშირი. ნეტგაზეთი

აფხაზეთის დე ფაქტო საგარეო საქმეთა მინისტრი ინალ არძინბა ტრაგედიას უწოდებს სომხეთის პრემიერ-მინისტრის, ნიკოლ ფაშინიანის განცხადებას, რომლის შესაბამისად, სომხეთი მზადაა, მთიანი-ყარაბაღი აზერბაიჯანის ტერიტორიად აღიაროს. “სულ რამდენიმე წლის წინ ვერ წარმოვიდგენდით, რომ სომხეთის პრემიერი ასეთ რამეს იტყოდა. მითუმეტეს, 1992 წელს სომხეთის უმაღლესმა საბჭომ მიიღო დადგენილება, რომლის შესაბამისად, ნებისმიერი შიდა თუ სახელმწიფოთაშორისო ნორმატიულ სამართლებრივი აქტი, სადაც მთიანი ყარაბაღი აზერბაიჯანის ტერიტორიად არის მიჩნეული, სომხეთის რესპუბლიკაში დაუშვებელია. გამოდის, პრემიერ ფაშინიანის განცხადება წინააღმდეგობაში მოდის ამ დადგენილებასთან. ეს უპრეცედენტო განცხადებაა. ჩვენ ვცხოვრობთ ძალიან ხისტი გეოპოლიტიკის ეპოქაში. ის, რაც მთიან-ყარაბაღს დაემართა, გეოპოლიტიკური კონსესუსის შედეგია. შედეგები შეიძლება საკმაოდ ტრაგიკული იყოს. და ის, რაც დაემართა მთიან-ყარაბაღს ეს ტრაგედიაა, თუ გავითვალისწინებთ იმას, თუ რამდენი ბიჭი დაეცა და რა შედეგამდე მივიდა საქმე”, – ამბობს არძინბა. 22 მაისს ნიკოლ ფაშინიანმა განაცხადა, რომ მთიანი-ყარაბაღის მოსახლეობის უსაფრთხოებისა და უფლებების დაცვის გარანტიების მიღების შემდეგ, სომხეთი მზადაა, აზერბაიჯანის ტერიტორიული მთლიანობა ყარაბაღთან ერთად აღიაროს. ფაშინიანის მიერ მთიანი ყარაბაღის აზერბაიჯანის ნაწილად აღიარებას, სომხეთსა და მთიან-ყარაბაღში უკმაყოფილება მოჰყვა. ნეტგაზეთი

საქართველოს პრეზიდენტის საპარლამენტო მდივანი გიორგი მსხილაძე აცხადებს, რომ „ქართულმა ოცნებამ“ პრეზიდენტის ხასიათი ვერ გაიცნო და ვერ გაიგო, რომ მასზე ზემოქმედება ვერ მოხერხდება. მსხილაძე მმართველი პარტიის პოლიტსაბჭოს განცხადებას გამოეხმაურა. მან აღნიშნა, რომ „ოცნება“ ამ განცხადებით 26 მაისს პრეზიდენტის გამოსვლის გადაფარვას ცდილობს. „სამწუხაროდ, „ქართული ოცნების“ განცხადება, რომ მათი მიზანია პრეზიდენტის ინსტიტუტი დაიცვან, სიტყვით ერთია და ქმედებით აბსოლუტურად სხვაა. ამის ნათელი მაგალითი 26 მაისი იყო, რომელიც ყველასთვის გამაერთიანებელი უნდა იყოს, თუმცა პრეზიდენტს შეურაცხყოფა მიაყენეს, რაც ყოვლად დაუშვებელი იყო. პრეზიდენტის ინსტიტუტის დაცვაში რას გულისხმობენ, ვერ ვხდები, რადგან საქმით სხვას აკეთებენ. „ქართული ოცნება“ პრეზიდენტის კრიტიკას ძალიან მტკივნეულად აღიქვამს. თუ პრეზიდენტის კრიტიკა უსამართლოა, მაშინ მათ გარკვეული არგუმენტები უნდა გააჩნდეთ. თუ პრეზიდენტის კრიტიკა სამართლიანია, ჩვეულებრივად უნდა მიიღონ და ისე არ უნდა მოიქცნენ, ისე არ უნდა უპასუხონ, როგორც 26 მაისს. ჩემთვის პირადად, ეს ყველაფერი ნათელი მაგალითი იყო, როგორ შეიძლება, ადამიანმა ორ წუთში დაკარგოს ის პატივისცემა და ავტორიტეტი, რაც წლების განმავლობაში გააჩნდა. რა თქმა უნდა, ირაკლი ქადაგიშვილს ვგულისხმობ. „ქართული ოცნების“ განცხადებაში ბოლო წინადადება იყო, რომ შუამავლობა შეუძლიათ გაუწიონ პრეზიდენტს საზოგადოების ნაწილთან. პრეზიდენტი საზოგადოებას ნაწილებად არ ყოფს, ის ყველას პრეზიდენტია. დიდი მადლობა, როგორმე ჩვენ თვითონ გავაგრძელებთ საზოგადოებასთან ურთიერთობას. ბევრი ადამიანი ვიცი, ვინც ხმა „ქართულ ოცნებას“ მისცა და ახლა მათზე გაბრაზებული არიან. რა გავაკეთოთ?! „ქართული ოცნება“ ამ განცხადებით ცდილობს, რომ 26 მაისის ფაქტი რამენაირად გადაფაროს. სამწუხაროდ, „ქართულმა ოცნებამ“ პრეზიდენტი ვერ გაიცნო და მისი ხასიათი ვერ გაიგო. მასზე პრევენცია და ზემოქმედება არ მოქმედებს. არ ვიცი, სიჯიუტეს პრინციპულობას ეძახით? პრეზიდენტი პრინციპული ნამდვილად არის“, – განუცხადა მან ჟურნალისტებს. მის კომენტარს IPN ავრცელებს. „ქალბატონ სალომე ზურაბიშვილის ბოლოდროინდელი ქმედებები ხასიათდება უკიდურესი არაობიექტურობითა და პოლიტიკური მიკერძოებით”, – „ქართული ოცნების“ პოლიტსაბჭო განცხადებას ავრცელებს და ეხმაურება პრეზიდენტს სალომე ზურაბიშვილის განცხადებებს ხელისუფლების მისამართით. მათი თქმით, არ აპირებენ სალომე ზურაბიშვილთან პოლემიკაში შესვლას. როგორც განცხადებაში წერია, მათი პოზიციაა, რომ პრეზიდენტის კრიტიკისაგან პრინციპულად უნდა შეიკავონ თავი. პუბლიკა

„ძალიან თამამი და ძლიერი განცხადება“ – ასე შეაფასა ევროპარლამენტარმა მარია კალიურანდმა 26 მაისის ღონისძიებაზე საქართველო პრეზიდენტის, სალომე ზურაბიშვილის სიტყვით გამოსვლა. მან ამის შესახებ Twitter-ზე დაწერა და სალომე ზურაბიშვილის გამოსვლის ტექსტი გააზიარა. საქართველოს პრეზიდენტი სალომე ზურაბიშვილი 31 მაისს ევროპარლამენტში სიტყვით გამოვიდა. პუბლიკა

„დღეს უკვე „ოცნება“ ღიად ანტიდასავლურია” – ამის შესახებ ყოფილი პრემიერი, გიორგი გახარია facebook-პოსტში წერს, რომელიც მისი პარტიის დაფუძნების 2 წლისთავთან დაკავშირებით გამოაქვეყნა. მისი შეფასებით, რუსეთს ტერიტორიების მსგავსად, დღეს საქართველოს მთავრობაც ოკუპირებული ჰყავს. ის ასევე აღნიშნავს, რომ ეს დროებითია და რომ რუსეთი საქართველოში ვეღარასოდეს გაიმარჯვებს. ყოფილი პრემიერი ამბობს, „დღეს ვერთიანდებით საქართველოსთვის და ყველას წინააღმდეგ, ვინც ჩვენი ქვეყნის ევროპულ, თავისუფალ, ერთიან მომავალს უქმნის საფრთხეს“. „ერთიანი, დემოკრატიული, ევროპული, ქართული სახელმწიფოსთვის დაწყებული ბრძოლა გრძელდება და ამ ბრძოლაში, ჩვენ გავიმარჯვებთ!“ – წერს გიორგი გახარია. პუბლიკა

უკრაინის კიევის, ხარკოვის და ჩერნიგოვის ოლქებში საჰაერო განგაში გამოცხადდა, - ინფორმაციას უკრაინული მედია ავრცელებს. მათივე ინფორმაციით, საჰაერო განგაში გამოცხადდა დედაქალაქ კიევშიც, სადაც რამდენიმე აფეთქების ხმა გაისმა. შეგახსენებთ, საჰაერო განგაში დილით უკრაინის მთელ ტერიტორიაზე გამოცხადდა. რუსულმა ძალებმა ქვეყნის ტერიტორიას დრონებისა და რაკეტების გამოყენებით დაარტყეს. მოგვიანებით ცნობილი გახდა, რომ უკრაინის შეიარაღებული ძალების საჰაერო ძალებმა 37 ფრთოსანი რაკეტა და 29 ირანული ე.წ. „კამიკაძე“ დრონი გაანადგურეს. იპნ

უკრაინის შეიარაღებული ძალების სახმელეთო ჯარების მეთაური, ალექსანდრე სირსკი ლიმანის მიმართულებით უკრაინელი სამხედროების პოზიციებზე იმყოფებოდა, - ინფორმაციას უკრაინული მედია ავრცელებს. სირსკის განცხადებით, ის იმ ქვედანაყოფების მეთაურებს შეხვდა, რომლებიც ახლა ყველაზე ცხელ წერტილებში ასრულებენ დავალებებს. „ჩვენ ერთობლივად განვიხილეთ მოვლენების განვითარების შესაძლო სცენარები და ფრონტზე არსებული ვითარება. აღვნიშნე, რომ მალე მოვა დრო, როცა გადავალთ აქტიურ შეტევით მოქმედებებზე და განვსაზღვრეთ კონკრეტული ამოცანები მათთვის მოსამზადებლად“, - აღნიშნა სირსკიმ. ამასთან, მან ლიმანის მიმართულებით ის ტერიტორიები დაასახელა, სადაც უკრაინელები მტრის შეტევას იგერიებენ. ”ჩვენი ქვედანაყოფები სტაბილურად აგრძელებენ დაკავებული საზღვრებისა და პოზიციების შენარჩუნებას, იგერიებენ მტრის ყველა მცდელობას, რომელიც მიმართულია ბელოგოროვკის, სპორნოეს, ნოვოსელოვკის, ტორსკის მიდამოებში, რამაც მნიშვნელოვანი ზარალი მიაყენა მტრის პერსონალს და აღჭურვილობას”, - აღნიშნა უკრაინის შეიარაღებული ძალების სახმელეთო ჯარების მეთაურმა. იპნ

„ქართული ოცნების“ პოლიტიკური საბჭო განცხადებას ავრცელებს. როგორც მმართველ პარტიაში განმარტავენ, საქართველოს პრეზიდენტის, სალომე ზურაბიშვილის ბოლოდროინდელი ქმედებები ხასიათდება „უკიდურესი არაობიექტურობითა და პოლიტიკური მიკერძოებით, რაც უხეშად ეწინააღმდეგება ზეპარტიული კონსტიტუციური თანამდებობის პირის ფუნქციას“. როგორც „ქართულ ოცნებაში“ აღნიშნავენ, მათი პასუხისმგებლობაა, ხელი არ შეუწყონ პრეზიდენტის ინსტიტუტის დაკნინებას. ამასთან განმარტავენ, რომ ამავე მიზნით, თავს ვალდებულად მიიჩნევენ, რომ არავის მისცენ პოლიტიკური კონფრონტაციის გაღრმავების საშუალება. „უკანასკნელი ორი წლის მანძილზე, საქართველოს პრეზიდენტის, ქალბატონ სალომე ზურაბიშვილის მხრიდან სულ უფრო ხშირად კეთდება განცხადებები, რომლებიც უარყოფითად აღიქმება და ფასდება, უპირველეს ყოვლისა, ქართული საზოგადოების იმ ნაწილის მიერ, რომელმაც მას, ჩვენი მოწოდების საფუძველზე, 2018 წლის საპრეზიდენტო არჩევნებში დაუჭირა მხარი. მიუხედავად იმისა, რომ ამგვარ აღქმასა და შეფასებას აქვს მყარი ობიექტური საფუძველი, არ მიგვაჩნია მიზანშეწონილად, გამოვეხმაუროთ ქალბატონ სალომე ზურაბიშვილის პოლიტიკურ განცხადებებს. ჩვენ, როგორც მმართველ პარტიას, გვეკისრება განსაკუთრებული პასუხისმგებლობა საქართველოს უმაღლესი კონსტიტუციური ინსტიტუტების, მათ შორის საქართველოს პრეზიდენტის ინსტიტუტის დაცვაზე. 2018 წლის საპრეზიდენტო არჩევნებში, ჩვენ მხარი დავუჭირეთ სალომე ზურაბიშვილის კანდიდატურას სწორედ იმ მოლოდინით, რომ ის სათანადოდ შეასრულებდა ზეპარტიული პრეზიდენტის ფუნქციას საპარლამენტო მმართველობის სისტემაში. მივიჩნიეთ, რომ უპარტიო ქალბატონი, რომელიც იყო საქართველოს პირველი რესპუბლიკის სახელოვანი მოღვაწეების შთამომავალი და ამით, განასახიერებდა კავშირს საქართველოს პირველი რესპუბლიკის ისტორიასა და თანამედროვე საქართველოს შორის, იქნებოდა საუკეთესო კანდიდატი ამ მისიისათვის. თუმცა, სამწუხაროდ, ქალბატონმა სალომე ზურაბიშვილმა სხვა გზა აირჩია და უკანასკნელი ორი წლის მანძილზე, მან მკაფიოდ გამოავლინა პოლიტიკური მიკერძოება რადიკალური ოპოზიციური ძალების დღის წესრიგის სასარგებლოდ. 2018 წელს, საქართველოს პრეზიდენტის თანამდებობაზე არჩევისას, „ქართული ოცნების“ ხელმძღვანელობამ ქალბატონ სალომე ზურაბიშვილს მკაფიოდ განუმარტა საკუთარი დამოკიდებულება იმასთან დაკავშირებით, რომ არჩევნებში მხარდაჭერის მიუხედავად, მას არ უნდა ჰქონოდა არავითარი ვალდებულება მმართველი პარტიის წინაშე. „ქართული ოცნება“ ამ მიდგომას სალომე ზურაბიშვილის მიერ ფიცის დადების დღიდან სრულად იცავდა და დღემდე იცავს. აქედან ჩანს, რომ 2018 წლის საპრეზიდენტო არჩევნებში სალომე ზურაბიშვილის კანდიდატურის მხარდაჭერისას, ჩვენი ერთადერთი მიზანი საპარლამენტო მმართველობის სისტემაში საქართველოს პრეზიდენტის ზეპარტიული ინსტიტუტის სათანადოდ დამკვიდრება იყო. მიუხედავად იმისა, რომ ქალბატონ სალომე ზურაბიშვილის ბოლოდროინდელი ქმედებები ხასიათდება უკიდურესი არაობიექტურობითა და პოლიტიკური მიკერძოებით, რაც უხეშად ეწინააღმდეგება ზეპარტიული კონსტიტუციური თანამდებობის პირის ფუნქციას, ჩვენი პოზიციაა, რომ საქართველოს პრეზიდენტის კრიტიკისაგან პრინციპულად უნდა შევიკავოთ თავი. ჩვენი პასუხისმგებლობაა, ჩვენი მხრივ ხელი არ შევუწყოთ პრეზიდენტის ინსტიტუტის დაკნინებას. ამავე მიზნით, თავს ვალდებულად მივიჩნევთ, არავის მივცეთ პოლიტიკური კონფრონტაციის გაღრმავების საშუალება. ჩვენ უნდა დავიცვათ პრეზიდენტის ინსტიტუტი მაშინაც კი, როდესაც ამ ინსტიტუტის პრესტიჟს თავად მოქმედი პრეზიდენტი უქმნის საფრთხეს. იმ პირობებში, როდესაც საქართველოს პრეზიდენტი კარგავს ლეგიტიმაციას საზოგადოების იმ ნაწილის თვალში, რომელმაც მას 2018 წლის არჩევნებში დაუჭირა მხარი და ვერც საზოგადოების იმ ნაწილში იძენს ლეგიტიმაციას, რომელიც მას 2018 წელს მოღალატედ და რეზიდენტად აცხადებდა, ჩვენი ვალია, ქალბატონ სალომე ზურაბიშვილს უფლებამოსილების დარჩენილი წელიწადნახევრის მანძილზე შევუნარჩუნოთ თუნდაც მინიმალური ლეგიტიმაცია საპრეზიდენტო უფლებამოსილების განსახორციელებლად. ამითაც არის ნაკარნახევი ჩვენი გადაწყვეტილება, არ შევიდეთ პოლემიკაში ქალბატონ სალომე ზურაბიშვილთან. დასასრულს, გამოვთქვამთ იმედს, რომ ქალბატონი სალომე ზურაბიშვილი ქართული საზოგადოების უმრავლესობასთან კიდევ უფრო მძაფრ კონფრონტაციაში არ შევა. „ქართული ოცნება“ მზადაა, საქართველოს პრეზიდენტს, ხალხთან კონფრონტაციის გაღრმავების თავიდან ასაცილებლად, მაქსიმალური დახმარება გაუწიოს“,- აღნიშნულია განცხადებაში. იპნ

დღეს 2 წელი გავიდა პარტია “საქართველოსთვის” დაფუძნებიდან და უკვე კარგად ჩანს, რომ ყველაფერი, რის გამოც გადავდექი და პარტია დავაფუძნეთ, სამწუხაროდ, გამართლდა, - ამის შესახებ სოციალურ ქსელში ყოფილი პრემიერი და პარტია "საქართველოსთვის" თავმჯდომარე გიორგი გახარია წერს. როგორც გახარია აღნიშნავს, დღეს უკვე „ოცნება“ ღიად ანტიდასავლური, ანტიდემოკრატიული ძალაა, რომელიც აუფასურებს ისეთ ღირებულებებს, როგორიცაა თავისუფლება და დამოუკიდებლობა, და ქვეყნისთვის ყველაზე წმინდა - ტერიტორიული მთლიანობის საკითხითაც კი ცდილობს მანიპულირებას. "მე მაშინ გავაკეთე ჩემი არჩევანი საქართველოსთვის, ივანიშვილმა და „ოცნების" მაშინდელმა ბოსებმა - თავისი, ძალაუფლებისთვის და პირადი კეთილდღეობისთვის. დღეს, როდესაც უკრაინაში ბრძოლის ველზე რუსეთი მარცხდება, ჩვენთან იგებს “ჰიბრიდულ” ომს და ტერიტორიებთან ერთად ოკუპირებული აქვს საქართველოს მთავრობა. დღეს უკვე „ოცნება“ ღიად ანტიდასავლური, ანტიდემოკრატიული ძალაა, რომელიც აუფასურებს ისეთ ღირებულებებს, როგორიცაა თავისუფლება და დამოუკიდებლობა, და ქვეყნისთვის ყველაზე წმინდა - ტერიტორიული მთლიანობის საკითხითაც კი ცდილობს მანიპულირებას. რა თქმა უნდა, ეს დროებითია, რუსეთი საქართველოში ვეღარასოდეს გაიმარჯვებს! 2 წლის წინ ჩვენ ვთქვით, რომ "ვერთიანდებით საქართველოსთვის, არავის წინააღმდეგ". დღეს ვამბობთ, რომ ვერთიანდებით საქართველოსთვის და ყველას წინააღმდეგ, ვინც ჩვენი ქვეყნის ევროპულ, თავისუფალ, ერთიან მომავალს უქმნის საფრთხეს. ერთიანი, დემოკრატიული, ევროპული, ქართული სახელმწიფოსთვის დაწყებული ბრძოლა გრძელდება და ამ ბრძოლაში, ჩვენ გავიმარჯვებთ!", - წერს გიორგი გახარია.

თურქეთის პრეზიდენტობის ოპოზიციონერი კანდიდატის, ქემალ ქილიჩდაროღლუს განცხადებით, იგი "ნამდვილ დემოკრატიამდე" გააგრძელებს ბრძოლას. ამის შესახებ მან პარტიის სათაო ოფისში განაცხადა. "ამ არჩევნებში ყველა ზეწოლის მიუხედავად ავტორიტარული ხელისუფლების შესაცვლელად ხალხის სურვილი ნათელი გახდა,"- განაცხადა ქილიჩდაროღლუმ. მიუხედავად იმისა, რომ ქილიჩდაროღლუმ მარცხი არ აღიარა, მისი თქმით "ჩვენი ქვეყნის წინაშე არსებული რთული დღეები ნამდვილად მამწუხრებს... ჩვენი ქვეყნის ისტორიაში ეს ყველაზე არასამართლიანი არჩევნების პერიოდია... შიშის კლიმატის წინაშე თავს არ ვხრით", - განაცხადა ქილიჩდაროღლუმ. იპნ

ნახვამდის, ქემალ, – ასე მიმართა თურქეთის პრეზიდენტმა, რეჯეფ თაიფ ერდოღანმა საპრეზიდენტო არჩევნებში თავის მთავარ მოწინააღმდეგეს, ოპოზიციონერ კანდიდატს, ქემალ ქილიჩდაროღლუს. „ჩვენ ჯერ კიდევ ველოდებით ქემალ ქილიჩდაროღლუს, რომ უპასუხოს შედეგებს, რომლებიც მხოლოდ ერთი მიმართულებით მიდის“, – აღნიშნა ერდოღანმა. რეჯეფ თაიფ ერდოღანის განმარტებით, „შედეგები მისი მმართველობის მომდევნო ხუთი წლისკენ მიდის“. „ერთადერთი გამარჯვებული არის თურქეთი“, – მიმართა ედროღანმა მხარდამჭერებს სტამბოლში. თურქეთში საპრეზიდენტო არჩევნების მეორე ტური გაიმართა. თურქეთის უმაღლესი საარჩევნო საბჭოს წინასწარი მონაცემებით, არჩევნებში რეჯეფ თაიფ ერდოღანი ლიდერობს. ავტორი - მარიამ ახალაია

აზერბაიჯანის პრეზიდენტი ილჰამ ალიევი თურქეთის პრეზიდენტ რეჯეფ თაიფ ერდოღანს ტელეფონით ესაუბრა და საპრეზიდენტო არჩევნებში გამარჯვება მიულოცა, – ამის შესახებ აზერბაიჯანის პრეზიდენტის ადმინისტრაციის მიერ გავრცელებულ ინფორმაციაშია ნათქვამი. ადმინისტრაციის ცნობით, ილჰამ ალიევმა აღნიშნა, რომ ის დარწმუნებულია, თურქეთის „ყოვლისმომცველი განვითარება“ რეჯეფ თაიფ ერდოღანის ხელმძღვანელობით მომდევნო წლებშიც გაგრძელდება. „აზერბაიჯანის პრეზიდენტმა წარმატებები უსურვა ერდოღანს ქვეყნის წინსვლაში და ოფიციალური ვიზიტით აზერბაიჯანში მიიწვია. თურქეთის პრეზიდენტმა მადლობა გადაუხადა ილჰამ ალიევს მილოცვისთვის“, – აღნიშნულია ინფორმაციაში. აზერბაიჯანის პრეზიდენტის ადმინისტრაციის ცნობით, სატელეფონო საუბრისას ქვეყნის ლიდერებმა შემდგომი თანამშრომლობის პერსპექტივები განიხილეს. თურქეთში საპრეზიდენტო არჩევნების მეორე ტური გაიმართა. თურქეთის უმაღლესი საარჩევნო საბჭოს წინასწარი მონაცემებით, არჩევნებში რეჯეფ თაიფ ერდოღანი ლიდერობს. ავტორი - მარიამ ახალაია

თურქეთის უმაღლესი საარჩევნო საბჭოს თავჯდომარემ, აჰმედ იენერმა არჩევნების მეორე ტურის შედეგებთან დაკავშირებით განცხადება გააკეთა. მისი თქმით, ამ მომენტისთვის დათვლილია ხმების 75,42 პროცენტი. საპრეზიდენტო არჩევნებში ლიდერობს რეჯეფ თაიფ ერდოღანი, რომელსაც ხმათა 53,41 პროცენტი აქვს, მის კონკურენტ ქემალ კილიჩდაროღლუს კი 46,65 პროცენტი. თურქეთში საპრეზიდენტოი არჩევნების მეორე ტური დღეს გაიმართა. მასში 14 მაისს გამართულ არჩევნებში საუკეთესო შედეგის მქონე ორი კანდიდატი, მოქმედი პრეზიდენტი რეჯეფ თაიფ ერდოღანი და მისი ოპოზიციონერი კონკურენტი ქემალ კილიჩდაროღლუ მონაწილეობდნენ. ავტორი - მარიამ ახალაია

ამერიკელი ხალხის სახელით თქვენ და ქართველ ერს, რომელიც დამოუკიდებლობის დღეს აღნიშნავთ, ყოველივე საუკეთესოს გისურვებთ, - ამის შესახებ ამერიკის შეერთებული შტატების პრეზიდენტმა, ჯო ბაიდენმა, საქართველოს დამოუკიდებლობის დღესთან დაკავშირებით, პრეზიდენტ სალომე ზურაბიშვილისადმი გაგზავნილ მისალოც წერილში განაცხადა. ბაიდენის თქმით, საქართველოსა და აშშ-ს შორის სამ ათეულ წელზე მეტი ხნის განმავლობაში არსებული პარტნიორობა ხელს უწყობს რეგიონისა და მსოფლიოს მასშტაბით მშვიდობისა და კეთილდღეობის წინწაწევას. „ჩვენი ორი ქვეყნის ხალხს აქვს მტკიცე და უტეხი კავშირი, რომელიც დაფუძნებულია ჩვენს ხალხთა შორის არსებულ ახლო კავშირებსა და ჩვენს საზიარო ღირებულებებზე, რაც მოიცავს დემოკრატიასა და კანონის უზენაესობას. ჩვენ ერთად ვდგავართ, რათა დავეხმაროთ საქართველოს სწრაფვას ევროატლანტიკურ სივრცეში, მათ შორის ევროკავშირსა და ნატოში, შემდგომ ინტეგრაციას. შეერთებული შტატები გააგრძელებს საქართველოს სუვერენიტეტისა და ტერიტორიული მთლიანობის მხარდაჭერას და წინააღმდეგობას გაუწევს რუსეთის აგრესიას, რაც მოიცავს საქართველოს ტერიტორიის უსამართლო ოკუპაციასა და კონფლიქტისა და დაყოფის გაღვივების მცდელობებს. მომდევნო წლებში, მოუთმენლად ველი საქართველოსა და ამერიკის შეერთებულ შტატებს შორის პარტნიორობის გაძლიერებას, რათა კიდევ უფრო უსაფრთხო და წარმატებული მომავალი შევუქმნათ ჩვენს ხალხებს. გისურვებთ ბედნიერ ეროვნულ დღესასწაულს“, - აღნიშნავს ბაიდენი ზურაბიშვილისადმი გაგზავნილ წერილში, რომელსაც სოციალურ ქსელში სალომე ზურაბიშვილი აქვეყნებს. იპნ

საქართველოს დამოუკიდებლობისა და ქართული დიასპორის დღეების ფარგლებში, საქართველოში ქართველი პოლიტიკური, სახელმწიფო და საზოგადო მოღვაწის, ამიერკავკასიის სეიმის, საქართველოს ეროვნული საბჭოსა და საქართველოს რესპუბლიკის დამფუძნებელი კრების თავმჯდომარის მოადგილის, ალექსანდრე ლომთათიძის ცხედარი დიდუბის მწერალთა და საზოგადო მოღვაწეთა პანთეონში დაკრძალეს. წმინდა სამების საკათედრო ტაძარში ალექსანდრე ლომთათიძის სამოქალაქო პანაშვიდი გაიმართა, რომელსაც საქართველოს აღმასრულებელი და საკანონმდებლო ხელისუფლების უმაღლესი პირები და საპატრიარქოს წარმომადგენლები დაესწრნენ. სამების საკათედრო ტაძარში პანაშვიდი საპატრიარქო ტახტის მოსაყდრე შიომ აღავლინა. პანაშვიდის დასრულების შემდეგ ტახტის მოსაყდრემ დამსწრეებს სრულიად საქართველოს კათოლიკოს-პატრიარქის წერილი გააცნო. ალექსანდრე ლომთათიძე 1912 წელს პოლიტიკური საბაბით დააპატიმრეს და გადაასახლეს ვოლოგდის გუბერნიაში. 1913 წელს ის გაემგზავრა საზღვარგარეთ, ცხოვრობდა ლაიფციგში. 1913 წელსვე დაბრუნდა ტფილისში და მუშაობდა პედაგოგად. 1917 წლის მარტში ის მონაწილეობდა საქართველოს ეკლესიის ავტოკეფალიის აღდგენის საქმეში. 1917 წლის ნოემბრიდან ლომთათიძე იყო ჯერ საქართველოს ეროვნული საბჭოს წევრი, ხოლო 1918 წლის თებერვლიდან ამიერკავკასიის სეიმის წევრი. მან ხელი მოაწერა საქართველოს დამოუკიდებლობის აქტს. 1918 წელს იგი იყო საქართველოს პარლამენტის წევრი „სოციალ-დემოკრატიული პარტიიდან“. 1919 წლის თებერვალში ის აირჩიეს თბილისის საქალაქო საბჭოს თავმჯდომარედ. 1919 წელს ალექსანდრე ლომთათიძე აირჩიეს საქართველოს დამფუძნებელი კრების პრეზიდიუმის წევრად და დამფუძნებელი კრების თავმჯდომარის მოადგილედ. 1921 წელს, საბჭოთა რუსეთის მიერ საქართველოს დემოკრატიული რესპუბლიკის ოკუპირების შემდეგ იგი არ წავიდა ემიგრაციაში, დარჩა საქართველოში და ჩაბმული იყო წინააღმდეგობის მოძრაობაში. 1921 წლის 13 ივლისს იგი დააპატიმრეს, მოგვიანებით კი გადაასახლეს. საქართველოში 1924 წლის აგვისტოს ანტისაბჭოთა აჯანყების შემდეგ ალექსანდრე ლომთათიძე კვლავ დააპატიმრეს ტაშკენტში და მოათავსეს ციხეში, სადაც მალევე გარდაიცვალა 42 წლის ასაკში. დაკრძალეს იქვე, ტაშკენტში, ქრისტიანთა სასაფლაოზე. აღსანიშნავია, რომ ალექსანდრე ლომთათიძის საფლავი უზბეკეთში საქართველოს საელჩოს მიერ იქნა მოძიებული. მისი ნეშტის გადმოსვენება კი საქართველოს მთავრობის ადმინისტრაციის, საგარეო საქმეთა სამინისტროს, თბილისის მერიის ჩართულობითა და საქართველოს პარლამენტის მხარდაჭერით განხორციელდა. 1ტვ

პარლამენტის ვიცე სპიკერის არჩილ თალაკვაძის განცხადებით, იმ შემთხვევაში, თუ ოპოზიცია მხარს არ დაუჭერს იუსტიციის უმაღლესი საბჭოს სრულად დაკომპლექტებას, ხელისუფლება ევროპელ კოლეგებს მიაწვდის სრულ არგუმენტაციას, თუ რის გამო ვერ შესრულდა ეს საკითხი. როგორც თალაკვაძემ ჟურნალისტებს განუცხადა, ოპოზიციური ძალები ყველაფერს აკეთებენ, რომ საქართველოსთვის კანდიდატის სტატუსის მინიჭება დაბლოკონ. „ეს არის ევრორეკომენდაციების შესრულების ნაწილი. სწორედ ამ პასუხისმგებლობით მიუდგა ხელისუფლება და პარლამენტი საკითხს. ჩვენ ყველაფერი გავაკეთეთ იმისთვის, რომ ეს რეკომენდაცია ბოლომდე შესრულებულიყო. მოგეხსენებათ, რადიკალურმა ოპოზიციამ საკითხი დაბლოკა, მათ დარბაზი დატოვეს და ამით ბოიკოტი გამოუცხადეს ევრორეკომენდაციების შესრულებას. ეს პირდაპირ ემთხვევა მათ განცხადებებს, ფარულს თუ ღიას, როდესაც ისინი ყველაფერს აკეთებენ, რომ საქართველოსთვის კანდიდატის სტატუსის მინიჭება დაბლოკონ. იმ შემთხვევაში, თუ კონსულტაციები შედეგს არ გამოიღებს და ოპოზიცია მხარს არ დაუჭერს საბჭოს სრულად დაკომპლექტებას, მაშინ ჩვენ ევროპელ კოლეგებს მივაწვდით სრულ არგუმენტაციას, თუ რის გამო ვერ მივიდა ეს კონკრეტული საკითხი ბოლომდე. დარწმუნებული ვარ, ეს არგუმენტები იქნება გაზიარებული, ეს ხელს არ შეუშლის საქართველოსთვის კანდიდატის სტატუსის მინიჭებას, თუმცა, შემდეგ სესიაზე ჩვენ კიდევ ერთხელ შევეცდებით, ეს საკითხიც წარმატებით დავხუროთ“,- განაცხადა თალაკვაძემ. მისი შეფასებით, რადიკალური ოპოზიცია პარლამენტში მთელი ოპოზიციის დაშანტაჟებას ცდილობს. „ვნახეთ ის აგრესიული კამპანია, რომელიც რადიკალურმა ოპოზიციამ თავის ოპოზიციონერ კოლეგებზე გაატარეს, მათ წინააღმდეგ პირდაპირ დევნა იყო, ბოლშევიკური მეთოდებით გაუსწორდნენ ოპოზიციონერები საკუთარ ოპოზიციონერ კოლეგებს, რაც კიდევ ერთხელ ადასტურებს იმას, რომ რადიკალური ოპოზიცია მთელი ოპოზიციის დაშანტაჟებას ცდილობს პარლამენტში. ცდილობენ, ყველა დეპუტატს თავს მოახვიონ ის, რაც მათ სჭირდებათ. მათ რაც სჭირდებათ, წინააღმდეგობაშია იმასთან, რაც საქართველოს და საზოგადოებას სჭირდება. იმედი მაქვს, ოპოზიციონერი კოლეგების ნაწილი მაინც სწორედ ამ გადმოსახედიდან დაინახავს საკითხს და მხარს დაუჭერს ევრორეკომენდაციების შესრულებას“,-განაცხადა თალაკვაძემ.

უკრაინის პრეზიდენტმა ვოლოდიმირ ზელენსკიმ უკრაინის უმაღლეს რადას ირანის წინააღმდეგ 50 წლით დამატებითი სანქციების დაწესებასთან დაკავშირებით მიმართა. როგორც მედია წერს, კანონპროექტი ირანთან ვაჭრობის, ინვესტიციებისა და ტექნოლოგიების გადაცემის სრულ აკრძალვას ითვალისწინებს. გარდა ამისა, კანონპროექტის მიხედვით, უკრაინის ტერიტორიაზე ირანული ტრანზიტის შეწყვეტა და ირანული აქტივების უკრაინიდან გატანის აღკვეთა უნდა მოხდეს. მედიის ცნობით, უკრაინის პარლამენტს აღნიშნულზე კენჭისყრა ჯერ არ ჩაუნიშნავს. შეგახსენებთ, დღეს გამთენიისას, რუსულმა ძალებმა უკრაინაზე ირანული წარმოების Shahed-136/131-ის დრონებით იერიში მიიტანა. უკრაინის საჰაერო ძალების განცხადებით, რუსმა სამხედროებმა 54 უპილოტო საფრენი აპარატი გაუშვეს, რაც რეკორდული რაოდენობაა. უკრაინული მხარის ცნობით, რუსებმა შეტევა განახორციელეს ქვეყნის ცენტრალურ რეგიონებში, განსაკუთრებით კიევის რეგიონში, არსებულ სამხედრო ობიექტებსა და კრიტიკულ ინფრასტრუქტურაზე. უკრაინულმა ძალებმა 52 Shahed-136/131-ის დრონის ჩამოგდება მოახერხეს. ipn

საქართველოში კენიური ავოკადოს პირველ ლოგისტიკურ ცენტრი გორში, სამაცივრე მეურნეობა Tiriphoni Fruits-ის ბაზაზე გაიხსნა, რომელსაც კომპანია, Eximcrop მართავს. ინფორმაციას EastFruit ავრცელებს. Eximcrop-მა კენიური ავოკადოს პირველი პარტია სუპერმარკეტების ქსელ „ნიკორაში“ უკვე შეიტანა. ლოგისტიკური ცენტრის მიზანია, საქართველოში მოქმედი სამაცივრე საწყობები 100%-ით დატვირთოს და ადგილობრივი ბიზნესისთვის დამატებითი შემოსავალი მიიღოს. კომპანიის პარტნიორი სამაცივრე მეურნეობა, Tirifoni Fruits-ია, რომელიც თანამედროვე ტექნიკითა და უახლესი ტექნოლოგიებით არის აღჭურვილი. Eximcrop-მა საქართველოში „პუერტეს“ ჯიშის ავოკადო როგორც ადგილობრივი ბაზრისთვის, ისე დაგეგმილი რეექსპორტისთვის ჩამოიტანა. პირველი საპილოტე კონტეინერის მოცულობამ 24 ტონა შეადგინა, თუმცა იმპორტი გაგრძელდება. კომპანიამ ტვირთი აფრიკიდან Maersk-ის ხაზით, 40-დღეში ჩამოიტანა. Eximcrop-ის სტრატეგული მიზანია ქვეყანაში სავაჭრო ეკოსისტემის შექმნა, რაც იმპორტ-ექსპორტის, რეექსპორტისა და ვაჭრობის დიჯიტალიზაციისთვის საქართველოს ხელსაყრელი ადგილმდებარეობის გამოყენებას გულისხმობს. კერძოდ, კომპანია „შუა დერეფნის“ პოტენციალის ათვისებას აპირებს. ასევე, ავოკადო საქართველოდან ექსპორტზეც გავა, პირველ მიმართულებად კი უზბეკეთი მოიაზრება. ამასთან, ეკოსისტემის სტრატეგიული მიმართულების ფარგლებში, პოპულარული პროდუქტები, როგორიც ავოკადო და ბანანია, საქართველოს პორტებიდან მეზობელ ქვეყნებს მიეწოდება. მეტიც, საქართველოში Avocado Hub (ავოკადოს ჰაბის) გამოყენების მიზნით, Eximcrop-მა კენიაში ადგილობრივ მსხვილ კოოპერატივებთან ხელშეკრულებები გააფორმა. კომპანიაში აცხადებენ, რომ ბაზრების დივერსიფიკაცია აფრიკელი მეწარმეების ინტერესებში შედის, ამიტომ უახლოეს მომავალში ავოკადოს იმპორტის ზრდა არის მოსალოდნელი. აფრიკული ავოკადო უმაღლესი ხარისხისაა და მისი ფასი შედარებით დაბალია, რადგან ამ ქვეყანაში წარმოება, ძირითად ექსპორტიორ ქვეყნებთან შედარებით, გაცილებით იაფია. როგორც წესი, ხელმისაწვდომ ფასში ხარისხიანი პროდუქტი გასაღების ბაზრის მთავარი ფაქტორია, ამიტომ კომპანიაში იმედოვნებენ, რომ ავოკადო გაიაფდება და პროდუქტი უფრო ხელმისაწვდომი გახდება, ანუ ფასი დაეცემა და მოხმარება გაიზრდება. შესაბამისად, საქართველოში მისი მოხმარებაც გაიზრდება და პრემიუმ ნიშიდან პროდუქტი მასობრივ მოხმარებაში გადაინაცვლებს. Eximcrop, „პუერტეს“ ჯიშის გარდა, წითელი და შავი ავოკადოს იმპორტსაც გეგმავს. მოამზადა ლადო სულაბერიძემ

ქართულ ავიაკომპანია „ეარ ჯორჯიას“ ტრანსკონტინენტალური ფრენები აშშ-ს მიმართულებით ჯერ კიდევ, 2021 წლის აგვისტოში უნდა დაეწყო, თუმცა ბიუროკრატიული პროცედურების გამო, გაურკვეველი ვადით არაერთხელ გადაიდო. კომპანიის დამფუძნებელი გიორგი კოდუა დღეს „ბიზნესპრესნიუსთან" აცხადებს, რომ ხელისუფლების სათანადო ნების არგამოჩენის გამო, იძულებული გახდა სხვა ხერხი ეპოვა და საქართველოდან-აშშ-ში ფრენებს იტალიის გავლით ყველაზე გვიან წლის ბოლოს დაიწყებს. „ჩვენ საქართველოს მთავრობისგან ვერ მივიღეთ მზაობა, დაეკმაყოფილებინა სტანდარტი ტრანსკონტინენტალური ფრენების შესასრულებლად. ამბობენ, რომ დრო სჭირდებათ - 1-2 წელიწადი. ამის შემდეგ, ვიპოვე გამოსავალი და თბილისი- ნიუ-იორკის რეისის განხორციელება გადავწყვიტე რომის გავლით, რადგან ევროპის კონტინენტზე ფრენის უფლება გვაქვს. რომში „აერო იტალიასთან" უკვე მაქვს კონტრაქტი. პირველ ეტაპზე დავიწყებთ ფრენებს, რომი-ნიუ-იორკი და შემდეგ, თუ ოდესმე ჩვენი მთავრობა დააკმაყოფილებს სტანდარტებს, მარშრუტი პირდაპირი იქნება. ხელშეკრულება ბოლო ეტაპზეა და ყველაზე გვიან, ეს რეისი 6 თვეში ჩაეშვება. ასე რომ, თბილისი-ნიუ-იორკის რეისი რომის გავლით შესრულდება. იმის გამო, რომ თავიდან პირობა არსებობდა, რომ გასულ წელსვე მოხდებოდა აშშ-ში ფრენის უფლების მოპოვება, თვითმფრინავიც კი მყავდა ჩამოყვანილი, რომლის უკან ევროპაში დაბრუნება და სხვა რეისებზე ჩასმა მომიწია", - განაცხადა კოდუამ „ბიზნესპრესნიუსთან" საუბრისას. ინფორმაციისთვის, „საქართველოს აეროპორტების გაერთიანების" დირექტორმა, თამარ არჩუაძემ გასული წლის შემოდგომაზე განაცხადა, რომ საქართველოსა და აშშ-ს შორის პირდაპირი ფრენების დანიშვნა უახლოეს მომავალში არ იგეგმება. "აშშ-ში ფრენების დაწყება საკმაოდ კომპლექსური საკითხია. ამისთვის მზად უნდა იყოს არა მხოლოდ ავიაკომპანია, არამედ მთლიანად ქვეყანაც. უნდა ჩატარდეს აშშ-ს საავიაციო ხელისუფლების საერთაშორისო აუდიტი. შესაბამისად, ეს არის საკმაოდ გრძელვადიანი პროცესი და ამ ეტაპზე ეს პროცესი არ დაწყებულა", - აცხადებდა არჩვაძე 2022 წლის ოქტომბერში. ავტორი: თამარ მუკბანიანი