tvati

ეკონომიკური პოლიტიკის კვლევის ცენტრმა (EPRC) ინდექსი შეიმუშავა, რომელიც აჩვენებს საქართველოს ეკონომიკურ „დამოკიდებულებას“ მსოფლიოს ქვეყნების ჯგუფებზე, მათი დემოკრატიულობის მაჩვენებლის შესაბამისად. 2022 წლის მონაცემებით ეკონომიკური დამოკიდებულების ინდექსი, ჯამურად, სრული და არასრული დემოკრატიის ქვეყნებისკენ არის გადახრილი – 56,9.%-ით. აქედან სრულ დემოკრატიაზე დამოკიდებულება 30,8%-ს შეადგენს, არასრულზე კი – 26,1%-ს. ორგანიზაციაში აღნიშნავენ, რომ გასულ წლებში ეს მონაცემები ბევრად მაღალი იყო, განსაკუთრებით კი, 2020 წელს, როცა 63,7% შეადგენდა. 2007 წელს კი ეს მაჩვენებელი, ჯამში, 62,4% იყო, სრულ დემოკრატიაზე დამოკიდებულება- 50,9%, არასრულზე – 11,5%. EPRC-ს განცხადებით, 2022 წლის და, ზოგადად, დემოკრატიულ ქვეყნებზე უპირატესი დამოკიდებულების მაჩვენებელი ძირითადად განპირობებულია ინდექსის ორი კომპონენტის – სახელმწიფო საგარეო ვალისა და პირდაპირი უცხოური ინვესტიციების ინდიკატორებით, რომელთა მიხედვითაც ქვეყნის ეკონომიკაში ძირითადი საინვესტიციო ჩადინებები, ისევე, როგორც გრძელვადიანი საბიუჯეტო და ზოგადად სახელმწიფო სესხები, სწორედ დემოკრატიული ქვეყნებიდან მოემართება, ამოძრავებს და იწვევს საქართველოს ეკონომიკის ზრდას. ამასთან, ორგანიზაციაში აღნიშნავენ, რომ ამ მონაცემებში არ არის გათვალისწინებული (ინდექსის მეთოდოლოგიიდან გამომდინარე) საერთაშორისო საგრანტო დახმარებები, რომელთა მოცულობაც (კონკრეტულად საბიუჯეტო გრანტების) განსახილველ პერიოდში (2007-2022 წლებში) 5,9 მლრდ ლარამდე იყო. შესაბამისად, EPRC-ის განცხადებით, რეალურად ქვეყნის ეკონომიკური განვითარება, მიუხედავად მზარდი დამოკიდებულებისა ავტორიტარულ ქვეყნებზე, კვლავ დემოკრატიულ ქვეყნებთან თანამშრომლობით ხდება. ამასთან, ეკონომიკური დამოკიდებულების ინდექსი აჩვენებს, რომ მკვეთრი სხვაობაა ავტორიტარულ რეჟიმებზე ეკონომიკურ დამოკიდებულებებს შორის 2007 და 2022 წლებში. კერძოდ, ორგანიზაციის განცხადებით, პირველ შემთხვევაში ეს მონაცემია 11%-ია, 2022 წელს კი – 30.9%. „ეს ცვლილება, ერთი მხრივ, თავად ქვეყანათა დემოკრატიული სტატუსის ცვლილებამ გამოიწვია – მაგალითად, 2011 წელს რუსეთმა ჰიბრიდული რეჟიმიდან ავტორიტარულ რეჟიმზე გადაინაცვლა, რაც 2011 წელს საქართველოს ეკონომიკური დამოკიდებულების ინდექსის ავტორიტარულისკენ მკვეთრ გადახრაში გამოიხატა და ეს დიაგრამაზეც კარგად ჩანს; ასევე, საქართველოს მეზობელი ქვეყნების, რომლებიც ქვეყნის მთავარი სავაჭრო და ეკონომიკური პარტნიორები არიან, დემოკრატიის მაჩვენებელი ბოლო წლებში გაუარესებულია“, — აცხადებენ ორგანიზაციაში. მეორე მხრივ, EPRC აღნიშნავს, რომ მიუხედავად იმისა, რომ ტრადიციულად ეკონომიკურ პარტნიორთა მთავარი ათეული მკვეთრად არ შეცვლილა, იცვლებოდა ქვეყანათა პარტნიორობის წილი. განსაკუთრებით – საგარეო ვაჭრობაში და ფულადი გზავნილების შემთხვევაში. საგარეო ვაჭრობა ინდექსის თანახმად, 2015 წლიდან საქართველოს ვაჭრობის ვექტორი მუდმივად და სტაბილურად იხრება ავტორიტარული ქვეყნებისკენ. მათ შორის, იზრდება რუსეთის ფაქტორი, როგორც იმპორტის, ასევე ექსპორტის თვალსაზრისით, განსაკუთრებით სასიცოცხლოდ მნიშვნელოვან პროდუქტებზე (ხორბალი, ნავთობი, ბუნებრივი აირი და ა.შ.) იმპორტდამოკიდებულების კუთხით. ამასთან, დოკუმენტში აღნიშნულია, რომ 2022 წლის მიგრაციულმა პროცესებმა, რომელიც საქართველოში რუსეთის მოქალაქეების მასობრივი შემოსვლით აღინიშნა, ფულად გზავნილებში განვითარებულ დემოკრატიის ქვეყნების წილის ზრდის ტენდენცია შეამცირა და კვლავ რუსეთისა და დსთ-ს ქვეყნების სასარგებლოდ გადახარა. დამოკიდებულება რუსეთიდან იმპორტზე ორგანიზაციაში აღნიშნავენ, რომ 2014 წლიდან მოყოლებული, რუსეთზე იმპორტდამოკიდებულება მუდმივად იზრდება და 2022 წელს, 2007-2022 წლებისთვის, პიკს მიაღწია 14%-იანი წილით სრულ იმპორტში. დოკუმენტის ავტორები აღნიშნავენ, რომ 2021 წელთან შედარებით, 2022 წელს, რუსეთიდან იმპორტი თითქმის 80 პროცენტით გაიზარდა. „ამასთან, მნიშვნელოვანია თავად იმპორტის არა მხოლოდ მოცულობა, არამედ სტრუქტურა: 2022 წელს რუსეთიდან 622 მლნ აშშ დოლარის ღირებულების ნავთობი და ნავთოპროდუქტი შემოვიდა, რაც 2021 წელთან შედარებით წარმოადგენს 306- პროცენტიან ზრდას. ამ მონაცემით ნავთობის და ნავთობპროდუქტების 47 პროცენტი სწორედ რუსეთიდან შემოვიდა, ეს მონაცემი 2021 წელს 16 პროცენტი იყო, პარალელურად შემცირდა აზერბაიჯანიდან აღნიშნული პროდუქციის იმპორტიც, 60 პროცენტით. გასულ წელს 6-ჯერ გაიზარდა რუსეთიდან იმპორტირებული ხორბლის და ხორბლის ფქვილის მოცულობა მონეტარულ გამოსახულებაში და 66 მლნ აშშ დოლარი შეადგინა“, — აცხადებენ ორგანიზაციაში. ეკონომიკური პოლიტიკის კვლევითი ცენტრის თქმით, ორივე პროდუქტი საარსებოდ მნიშვნელოვანია საქართველოსთვის და მაღალ რისკებთან არის დაკავშირებული მათი დამოკიდებულება ისეთ ქვეყანაზე, როგორიც რუსეთია. დოკუმენტის ავტორების თქმით, საწვავის შემთხვევაში, კუმულირებული მონაცემებით, მხოლოდ აზერბაიჯანი არის უფრო მსხვილი მომწოდებელი საქართველოსთვის. ხოლო ხორბალს რაც შეეხება, კვლევითი ცენტრის თქმით, რუსეთი უპირობოდ უდიდესი იმპორტიორია და მხოლოდ მეროხარისხოვან როლს ასრულებენ ყაზახეთი და უკრაინა: „აღსანიშნავია ისიც, რომ ხორბლის იმპორტის დინამიკამ წლების განამავლობაშიც განიცადა ცვლილება. 2010 წლის მონაცემებით საქართველოში იმპორტიებული ხორბლის უმსხვილესი მომწოდებელი ყაზახეთი იყო, თუმცა 2022 წლისთვის საქართველოში იმპორტირებული ხორბლის 95% რუსეთიდან შემოვიდა. გეოპოლიტიკური გარემოებების გათვალისწინებით, ასეთი დიდი ზომის დამოკიდებულება რუსულ პროდუქტზე ნეგატიური შედეგების მომტანი შეიძლება გახდეს. მნიშვნელოვანია იმის გათვალისწინებაც, რომ რუსულ პროდუქტზე დამოკიდებულების ტენდენცია, რუსეთის მიერ უკრაინაში წარმოებული ომის პირობებში, კიდევ უფრო გაიზარდა და ხორბლის და საწვავის მთავარ მომწოდებლად საქართველოსთვის კვლავ რუსეთი რჩება“, — ვკითხულობთ ანგარიშში. რაც შეეხება ექსპორტის გადანაწილებას ქვეყნების ჯგუფებზე, ორგანიზაციის განცხადებით, 2007-2022 წლებში, ჯამში, გადახრილია ავტორიტარული ქვეყნებისკენ. დოკუმენტის ავტორების თქმით, ბოლო წლებში კიდევ უფრო შემცირდა სრული დემოკრატიის ქვეყნების წილი საქართველოს საექსპორტო პორტფელში, რაც, ერთი მხრივ, უშუალოდ ქვეყნიდან ექსპორტზე გატანილი პროდუქტის მოცულობის ცვლილებით არის განპირობებული, ხოლო, მეორე მხრივ – ქვეყნების ტრანზიციით სრული დემოკრატიიდან არასრულ დემოკრატიულ და ჰიბრიდულ რეჟიმებად. ანგარიშში ვკითხულობთ, რომ 2020 წლიდან დემოკრატიის ხარისხის შემცირების ტენდენცია საყოველთაო გახდა, რასაც წვლილი მიუძღვის საქართველოს საექსპორტო პორტფელის ცვლილებაშიც. ორგანიზაციის განცხადებით, ეკონომიკური დამოკიდებულების შესაფასებლად გამოყენებულია ინდიკატორები: პირდაპირი უცხოური ინვესტიციები; საქონლის ექსპორტი; საქონლის იმპორტი; საგარეო ვალი; ქვეყანაში შემომავალი ფულადი გზავნილები. „ქვეყნები დაჯგუფებულია Economist Intelligence Unit -ის „დემოკრატიის ინდექსის“ მიხედვით – „ავტორიტარული“, „ჰიბრიდული რეჟიმი“, „არასრული დემოკრატია“ და „სრული დემოკრატია“. ინდექსი საზოგადოებას აძლევს ქვეყნის ეკონომიკური უსაფრთხოებისა და ეკონომიკური გეზის უკეთ აღქმისა და გააზრების საშუალებას. ინდექსი შემუშავებულია ინოვაციური მეთოდოლოგიით ეკონომიკური პოლიტიკის კვლევის ცენტრის (EPRC) მიერ, USAID ეკონომიკური მმართველობის პროგრამის მხარდაჭერით“, — აცხადებენ ორგანიზაციაში. netgazeti

რუსულ ავიაკომპანია RedWings-ის საიტზე მიმართულებების ჩამონათვალში აფხაზეთი ცალკე ქვეყანად არის მითითებული. საქართველო ამ ჩამონათვალში არ არის. RedWings-მა რამდენიმე კვირის წინ საქართველოსთან პირდაპირი ფრენების უფლება მოიპოვა. საიტზე აფხაზეთის რამდენიმე ქალაქია მითითებული, მათ შორის, გაგრა, გუდაუთა და სხვები. თუმცა, მიუხედავად მითითებისა, ბილეთების ყიდვა შეუძლებელია როგორც აფხაზეთში, ასევე აფხაზეთიდან. სქრინშოტი Redwings-ის საიტიდან. სქრინშოტი RedWings-ის საიტიდან. საიტზე ასევე შეიძლება მიმართულებად ქუთაისის მითითება. თუმცა ბილეთები ამ მიმართულებისთვისაც არ არის ხელმისაწვდომი. რუსეთმა 10 მაისს მოხნა შეზღუდვა საქართველოსთან პირდაპირ ფრენებზე. მოსკოვში ამ გადაწყვეტილებას „ჰუმანიტარული ხასიათის“ უწოდეს. რუსეთმა 10 მაისს მოხსნა შეზღუდვა საქართველოსთან პირდაპირ ფრენებზე. საქართველოს ხელისუფლება მოსკოვის გადაწყვეტილებას მიესალმება და ამბობს, რომ ეს გაუმარტივებს ცხოვრებას რუსეთში მცხოვრებ „მილიონ ქართველს“. იმისათვის, რომ ავიაკომპანიებს ფრენები შეესრულებინათ, საჭირო იყო საქართველოს მთავრობის ნებართვა. ამ დროისთვის საქართველომ ფრენების ნებართვა უკვე გასცა სამმა კომპანიაზე – რუსულ „აზიმუტზე“, Red Wings-ზე და ქართულ „Georgian Airways-ზე“. მთავრობაში აგრეთვე აცხადებენ, რომ მხოლოდ არასანქცირებული კომპანიები და ხომალდები შეძლებენ ფრენას. პოლიტიკოსების და მოქალაქეთა ნაწილი ავიამიმოსვლის აღდგენას აპროტესტებს. ფრენების აღდგენას კრიტიკულად უყურებენ აშშ და ევროკავშირი. netgazeti

დეოლიგარქიზაციის, მედიის თავისუფლების, სამოქალაქო საზოგადოების, მართლმსაჯულების რეფორმისა და დეპოლარიზაციის მხრივ საქართველოსგან მეტი პროგრესია საჭირო. ევროპული საბჭოს პრესსამსახურის ცნობით, ამის შესახებ ევროპული საბჭოს პრეზიდენტმა შარლ მიშელმა სალომე ზურაბიშვილთან შეხვედრის დროს განაცხადა. “პრეზიდენტებმა საქართველოს რეფორმების განხორციელებაში დარჩენილი გამოწვევები და 12 პრიორიტეტი განიხილეს. პრეზიდენტმა მიშელმა ხაზგასმით აღნიშნა, რომ საჭიროა მეტი პროგრესი მართლმსაჯულების რეფორმასთან, მედიის თავისუფლებასთან, სამოქალაქო საზოგადოებასთან, დეოლიგარქიზაციასთან და დეპოლარიზაციასთან დაკავშირებულ საკითხებში. სიღრმისეული სტრუქტურული რეფორმების რიგისთვის პარლამენტში გაძლიერებული უმრავლესობის მხარდაჭერა იყო საჭირო. ეს კიდევ უფრო მნიშვნელოვანს ხდის ინკლუზიურობისა და ინტერპარტიული თანამშრომლობის საჭიროებას. პრეზიდენტმა მიშელმა მაღალი შეფასება მისცა საქართველოს პრეზიდენტის როლს ევროპულ გზაზე საქართველოს წინსვლისა და პარტიებს შორის არსებული განხეთქილების დაძლევაში,” - წერია ევროპული საბჭოს პრესსამსახურის განცხადებაში. მათი ცნობით, შარლ მიშელმა სალომე ზურაბიშვილის საქართველოში მიწვევა მიიღო და დათანხმდა მას. ipn

საკვანძო პრიორიტეტებში კონკრეტული პროგრესი გადამწყვეტია საქართველოს გზაზე ევროკავშირის ოჯახისკენ. ამის შესახებ ევროპული საბჭოს პრეზიდენტი შარლ მიშელი საქართველოს პრეზიდენტთან სალომე ზურაბიშვილთან გამართული შეხვედრის შემდეგ “ტვიტერის” პირად გვერდზე წერს. “ევროპული ღირებულებები ქართველი ხალხის სისხლშია. პრეზიდენტ ზურაბიშვილს კიდევ ერთხელ დავუდასტურე ევროკავშირის მტკიცე მხარდაჭერა ჩვენი საერთო ევროპული მომავლის მიმართ. საკვანძო პრიორიტეტებში კონკრეტული პროგრესი გადამწყვეტია თქვენს გზაზე ევროკავშირის ოჯახისკენ”, - წერს მიშელი. IPN

საქართველო თავის ევროპულ ოჯახში დაბრუნდება , - ამის შესახებ საქართველოს პრეზიდენტი სალომე ზურაბიშვილი ევროპული საბჭოს პრეზიდენტთან შარლ მიშელთან გამართული შეხვედრის შემდეგ “ტვიტერის” პირად გვერდზე წერს. “მადლობა, შარლ მიშელ, საქართველოს ურყევი ევროპული გზისადმი მუდმივი მხარდაჭერისთვის და ჩვენი საერთო ევროპული მომავლისთვის ევროკავშირის მტკიცე მხარდაჭერისთვის. საქართველო თავის ევროპულ ოჯახში დაბრუნდება”, - წერს ზურაბიშვილი.

ევროკომისიის პრეზიდენტთან ურსულა ფონ დერ ლაიენთან ხაზი გავუსვი ქართველი საზოგადოებისთვის ევროკავშირის კანდიდატის სტატუსის მნიშვნელობას. ამის შესახებ საქართველოს პრეზიდენტი სალომე ზურაბიშვილი ევროკომისიის პრეზიდენტთან ურსულა ფონ დერ ლაიენთან შეხვედრის შემდეგ “ტვიტერის” პირად გვერდზე წერს. “პრეზიდენტ ფონ დერ ლაიენს კიდევ ერთხელ ვუთხარი ქართველი ხალხის ურყევ ნებაზე შეუერთდეს ევროპულ ოჯახს და ხაზი გავუსვი ქართველი საზოგადოებისთვის ევროკავშირის კანდიდატის სტატუსის მნიშვნელობას. მოუთმენლად ველი ჩვენს თანამშრომლობას, რომელიც გააგრძელებს ევროკავშირისკენ ისტორიულ გზაზე საქართველოს წინსვლას”, - წერს ზურაბიშვილი. ipn

თავდაცვა ესკალაცია არ არის. კრემლის სამარცხვინო პროპაგანდა საქართველოს პრემიერის მხრიდან, - ამის შესახებ გაერთიანებული სამეფოს პარლამენტის საგარეო ურთიერთობების კომიტეტის ხელმძღვანელი, ალისია კერნსი „ტვიტერზე“ წერს, რითაც ის საქართველოს პრემიერის, ირაკლი ღარიბაშვილის მიერ ბრატისლავაში, გლობალური უსაფრთხოების ფორუმზე გაკეთებულ განცხადებას ეხმაურება. მისი თქმით, დასავლეთმა საქართველოს მიმართ თავის პოლიტიკას უნდა გადახედოს. პრემიერმა ირაკლი ღარიბაშვილმა ფორუმზე უკრაინაში ომის დაწყების მიზეზებზე ისაუბრა და აღნიშნა, რომ ერთ-ერთი მიზეზი იყო ნატოს გაფართოება იყო. „ყველამ იცის, მე მგონი, მიზეზი. ერთ-ერთი მიზეზი იყო ნატოს გაფართოება და ბევრი სხვა მიზეზი, ხომ ასეა?! არ მინდა ამაზე სპეკულირება ან ციტირება რუსეთის მთავრობის, მაგრამ ერთ-ერთი მიზეზი იყო უკრაინის ნება და განზრახვა გამხდარიყო ნატო-ს წევრი და ამიტომ ჩვენ ვხედავთ შედეგებს“, - აღნიშნა პრემიერმა. იპნ

„Говорит Москва!"- ასე ეხმაურება ევროპარლამენტარი რასა იუკნევიჩიენე ირაკლი ღარიბაშვილის ბრატისლავაში გლობალური უსაფრთხოების ფორუმზე გაკეთებულ განცხადებას. პრემიერმა ირაკლი ღარიბაშვილმა ფორუმზე უკრაინაში ომის დაწყების მიზეზებზე ისაუბრა და აღნიშნა, რომ ერთ-ერთი მიზეზი ნატოს გაფართოება იყო. „ყველამ იცის, მე მგონი, მიზეზი. ერთ-ერთი მიზეზი იყო ნატოს გაფართოება და ბევრი სხვა მიზეზი, ხომ ასეა?! არ მინდა ამაზე სპეკულირება ან ციტირება რუსეთის მთავრობის, მაგრამ ერთ-ერთი მიზეზი იყო უკრაინის ნება და განზრახვა გამხდარიყო ნატოს წევრი და ამიტომ ჩვენ ვხედავთ შედეგებს“, - აღნიშნა პრემიერმა. იპნ

წარმოუდგენელია, საქართველოს პრემიერ-მინისტრი უკრაინაში რუსეთის შეჭრაში ნატო-ს გაფართოებას ადანაშაულებს, - ასე ეხმაურება ევროპაში აშშ-ის არმიის ყოფილი სარდალი, ბენ ჰოჯესი ირაკლი ღარიბაშვილის მიერ ბრატისლავაში, გლობალური უსაფრთხოების ფორუმზე გაკეთებულ განცხადებას. „რა დაემართა საქართველოს“? - წერს ბენ ჰოჯესი „ტვიტერზე“. პრემიერმა ირაკლი ღარიბაშვილმა ფორუმზე უკრაინაში ომის დაწყების მიზეზებზე ისაუბრა და აღნიშნა, რომ ერთ-ერთი მიზეზი იყო ნატოს გაფართოება. „ყველამ იცის, მე მგონი, მიზეზი. ერთ-ერთი მიზეზი იყო ნატოს გაფართოება და ბევრი სხვა მიზეზი, ხომ ასეა?! არ მინდა ამაზე სპეკულირება ან ციტირება რუსეთის მთავრობის, მაგრამ ერთ-ერთი მიზეზი იყო უკრაინის ნება და განზრახვა გამხდარიყო ნატოს წევრი და ამიტომ ჩვენ ვხედავთ შედეგებს“, - აღნიშნა პრემიერმა. იპნ

ნატო-ს ისტორიაში ყველაზე დიდი საავიაციო წვრთნები გერმანიაში გაიმართება, – ამის შესახებ გერმანული მედია წერს. მედიის ცნობით, ნატო-ს ქვეყნების საჰაერო ძალების წვრთნები ორ კვირაში დაიწყება, რაც ალიანსის ისტორიაში ყველაზე მასშტაბური იქნება. როგორც მედია წერს, თითქმის ყველა მანევრი გერმანიის ტერიტორიაზეა დაგეგმილი. გერმანიის საჰაერო ძალების ინსპექტორის, ინგო გერჰარცის ინფორმაციით, წვრთნებში 250-მდე თვითმფრინავი და ვერტმფრენი მიიღებს მონაწილეობს, მათგან ასამდე აშშ-ის საჰაერო ძალებიდან. გერჰარცმა განაცხადა, რომ წვრთნებმა საჭიროების შემთხვევაში მოკავშირეების სწრაფი რეაგირების მზადყოფნა უნდა აჩვენოს. მისივე თქმით, რუსეთის საჰაერო სივრცის სიახლოვეს „მხოლოდ იზოლირებული მანევრებია“ დაგეგმილი და მხოლოდ თავდაცვითი სცენარების შემუშავება იგეგმება. მედიის ინფორმაციით, საავიაციო წვრთნები დაგეგმილია სამოქალაქო ავიაციის მაკონტროლებლებთან და „Eurocontrol“-თან მჭიდრო კოორდინაციით, რათა მანევრებმა დისკომფორტი არ შეუქმნას სამოქალაქო ავიაციას. ავტორი - მარიამ ახალაია

30 მაისი სლავა მეტრეველის დაბადების დღეა – თბილისის „დინამოს“ ლეგენდარული მოთამაშე, 1960 წლის ევროპის ჩემპიონი 87 წლის გახდებოდა. სლავა მეტრეველი 1936 წლის 30 მაისს სოჭში დაიბადა. 15 წლის ასაკში დაიწყო თამაში. სწრაფი და ტექნიკური ფეხბურთელი პირველად გორკის „ტორპედოში“ აიყვანეს. შემდეგ წელს კი მოსკოვის „ტორპედოში“ გადავიდა, სადაც გახდა სსრ კავშირის ჩემპიონი და ორჯერ – ვიცე-ჩემპიონი. თბილისის „დინამოში“ 1963 წელს გადმოვიდა. უპრობლემოდ შეეწყო გუნდს და მეორე სეზონში ქართული ფეხბურთისთვის ისტორიული მატჩის მონაწილე გახდა, რომელშიც „დინამო“, არსებობის განმავლობაში პირველად, სსრ კავშირის ჩემპიონი გახდა. ქართული ფეხბურთის ლეგენდა „დინამოს“ ღირსებას1963-1971 წლებში იცავდა და 259 შეხვედრაში 73 გოლი გაიტანა. საბჭოთა კავშირის ნაკრებთან ერთად მოიგო ევროპის თასი (ევროპის ჩემპიონატი), გახდა ევროპის ვიცე-ჩემპიონი, მონაწილეობდა მსოფლიოს და ევროპის ორ პირველობაზე. ტექნიკურმა, სწრაფმა და გოლის ალღოს მქონე ფლანგის თავდამსხმელმა სსრ კავშირის ნაკრების სამხრეთ ამერიკაში გამართულ ტურნეს დროს დიდი შთაბეჭდილება მოახდინა. არგენტინელებთან მეტრეველმა იმდენად კარგად ითამაშა, რომ უმდიდრესი კლუბები მზად იყვნენ, მის შესაძენად სოლიდური თანხები გაეღოთ. სპრინტერული სისწრაფისა და უმაღლესი ინდივიდუალური ტექნიკის მქონე ფორვარდი ათწლეულის განმავლობაში საბჭოთა ფეხბურთის უძლიერეს მარჯვენა გარემარბად რჩებოდა. აღსანიშნავია, რომ თბილისის „დინამოს“ ინტერესებიდან გამომდინარე, იგი ცენტრალური თავდამსხმელის პოზიციაზე გადაიყვანეს, მეტრეველმა თავი აქაც კარგად გამოავლინა. კარიერის დასრულების შემდეგ სლავა მეტრეველი თბილისის „დინამოს“ მწვრთნელად მუშაობდა. გამორჩეული სპორტული მიღწევებისათვის სსრ კავშირის დამსახურებული ოსტატისა და საქართველოს დამსახურებული მწვრთნელის წოდება მიენიჭა, ხოლო 1996 წელს ქვეყნის წინაშე განსაკუთრებული დამსახურებისათვის მთავრობის განკარგულებით ღირსების ორდენი გადაეცა. სანაკრებო კარიერა სლავა მეტრეველმა 1958–1966 წლებში საბჭოთა კავშირის ნაკრებში 48 შეხვედრაში 11 გოლი გაიტანა. 1960 წლის 10 ივლისს „პარკ დე ფრანსზე“, ევროპის თასის პირველი გათამაშების ფინალში იუგოსლავიის ნაკრებს 49-ე წუთზე გაუტანა, ანგარიში გაათანაბრა და თამაშში გარდატეხა შეიტანა. საბჭოთა ნაკრებმა დამატებით დროში, 113-ე წუთზე მიხეილ მესხის გადაცემის შედეგად ვიქტორ პონედელნიკის მიერ გატანილი გოლით 2:1 მოიგო და ევროპის თასს დაეუფლა. მეტრეველი ამ ჩემპიონატის სიმბოლურ ნაკრებში დაასახელეს და დღემდე ერთადერთი ქართველი მოთამაშეა, რომელმაც ევროპის ჩემპიონატის ფინალში გოლი გაიტანა. მიღწევები: საკლუბო სანაკრებო, საბჭოთა კავშირის ნაკრები ინდივიდუალური ავტორი - მერაბ მამულაშვილი

ვლადიმერ პუტინი ოცნებობს საბჭოთა კავშირის აღდგენაზე. უკრაინის შემდეგ ის ბელარუსს დაუპირისპირდება, – ამის შესახებ უკრაინის პრეზიდენტმა, ვოლოდიმირ ზელენსკიმ კორეულ გამოცემა Chosun-თან ინტერვიუში განაცხადა. „საბჭოთა კავშირის აღდგენა არის პუტინის ცხოვრების მიზანი. ამის მიღწევა დიპლომატიური გზით შეუძლებელია, ამიტომ მან გადაწყვიტა, გამხდარიყო აგრესორი და მოეკლა ათასობით მშვიდობიანი მოქალაქე. პუტინი უკვე თითქმის ორი წელია, თავს არიდებს ჩემთან სატელეფონო საუბარსაც კი, ამის მიზეზი მხოლოდ ერთია – სიმართლე ჩვენკენაა და მას არაფერი აქვს სიმართლის წინაშე სათქმელი“, – განაცხადა ზელენსკიმ. უკრაინის პრეზიდენტი გამოეხმაურა რუსული ტაქტიკური ბირთვული იარაღის ბელარუსში განთავსებას და აღნიშნა, რომ „ახლა ეს არაფერს ნიშნავს უკრაინისთვის“ და რუსეთის რიტორიკა ბირთვული იარაღის გარშემო მხოლოდ წარუმატებელი პოლიტიკაა. „ეს არ არის პირველი შემთხვევა, როცა რუსეთი ატომური იარაღის გამოყენების მუქარას იყენებს, ეს იმდენჯერ განმეორდა, რომ უკრაინას აღარ ეშინია. პოლიტიკური შანტაჟი თითქმის ერთადერთი იარაღია, რაც მათ დარჩათ“, – განაცხადა ზელენსკიმ. უკრაინის პრეზიდენტმა ისაუბრა ჩინეთის პოზიციაზე და აღნიშნა, რომ ჩინეთი პირდაპირ არ უჭერს მხარს უკრაინის პოზიციას მშვიდობის საკითხში. „ჩინეთი პირდაპირ არ უჭერს მხარს უკრაინის პოზიციას. ჩინეთის სამშვიდობო ინიციატივას რაც შეეხება, ჩვენ მკაფიოდ განვაცხადეთ: ვაფასებთ სხვა ქვეყნების ნებისმიერ ძალისხმევას მშვიდობის მისაღწევად, მაგრამ ჩვენი საკუთარი მშვიდობის ფორმულა, ჩვენი საკუთარი ინიციატივა არის ფუნდამენტური, რადგან ეს ომი დაიწყო უკრაინაში და გრძელდება აქ. ჩინეთი თუ გააკეთებს მკაფიო განცხადებას, რომ რუსული ჯარები უკრაინის ყველა ტერიტორიიდან უნდა გაიყვანონ, მაშინ, ვფიქრობ, ეს ჩვენ დაგვეხმარება“, – აღნიშნა ზელენსკიმ. ავტორი - მარიამ ახალაია

საქართველოს პრეზიდენტმა, სალომე ზურაბიშვილმა და ევროპული საბჭოს პრეზიდენტმა, შარლ მიშელმა საქართველოს ევროპული მომავალი, 12 რეკომენდაციისა და რეფორმების განხორციელებაში არსებული გამოწვევების საკითხი განიხილეს. შარლ მიშელმა დადებითად შეაფასა საქართველოს პრეზიდენტის როლი საქართველოს ევროპულ გზაზე მსვლელობის პროცესში და პარტიული დაყოფების დაძლევაში. საქართველოს პრეზიდენტმა ევროპული საბჭოს პრეზიდენტი საქართველოში ვიზიტით მოიწვია. ევროპული საბჭოს პრეზიდენტმა მოწვევა მიიღო და უახლოეს პერიოდში ვიზიტისთვის მზადყოფნა გამოთქვა. პრეზიდენტმა მიშელმა ევროპული პერსპექტივის მინიჭების შესახებ ევროპული საბჭოს 2022 წლის ივნისის ისტორიული გადაწყვეტილება გაიხსენა და კიდევ ერთხელ ხაზი გაუსვა მის მტკიცე რწმენას, რომ საქართველოს მომავალი ევროკავშირშია. საქართველოს პრეზიდენტის მხრიდან ხაზი გაესვა ქვეყნის ევროკავშირის წევრობის კანდიდატის სტატუსის მინიჭების მნიშვნელობას. პრეზიდენტმა კიდევ ერთხელ გამოხატა ქართველი ხალხის ურყევი ნება ევროკავშირში გაწევრიანებასთან დაკავშირებით. პრეზიდენტმა მიშელმა აღნიშნა, რომ კომისია შემოდგომით, „გაფართოების პაკეტის“ ფარგლებში, ანგარიშს მოამზადებს ევროკომისიის 12 რეკომენდაციის შესახებ, რის შემდეგაც პრეზიდენტი მიშელი გეგმავს, რომ 2023 წლის ბოლო კვარტალში ევროპული საბჭოს დღის წესრიგში შემდეგი ნაბიჯების საკითხი წამოაყენოს. პრეზიდენტმა მიშელმა ხაზი გაუსვა, რომ საჭიროა მეტი პროგრესი მართლმსაჯულების რეფორმასთან, მედიის თავისუფლებებთან, სამოქალაქო საზოგადოებასთან, დეოლიგარქიზაციასა და დეპოლარიზაციასთან დაკავშირებულ საკითხებზე. ინფორმაციას საქართველოს პრეზიდენტის ადმინისტრაცია ავრცელებს.

„დიახ, რუსეთს აღიზიანებს NATO-ს გაფართოება, ეს თურმე ღარიბაშვილისგან გაიგეს”, – ასე ეხმაურება პრემიერ ირაკლი ღარიბაშვილის განცხადებას ფრაქცია „ქართული ოცნების“ თავმდჯომარე, მამუკა მდინარაძე. ირაკლი ღარიბაშვილმა სლოვაკეთში გამართულ გლობალური უსაფრთხოების ფორუმზე განაცხადა, რომ რუსეთის უკრაინაში შეჭრის ერთ-ერთი მიზეზი NATO-ს გაფართოება იყო. მდინარაძის თქმით, ირაკლი ღარიბაშვილი საუბრობს ეროვნული ინტერესებიდან გამომდინარე და მას ყველა საერთაშორისო ტრიბუნაზე აქვს „მკაფიო გზავნილები“.

ოკუპირებულ სოხუმში ოპოზიცია და სამოქალაქო ორგანიზაციების ნაწილი საპროტესტო აქციისთვის ემზადება. მოქალაქეებმა სახელმწიფო დრამატული თეატრის მოედანზე, სამთავრობო კომპლექსთან ახლოს შეკრება უკვე დაიწყეს. „სახალხო მიტინგის“ ორგანიზატორები ხელისუფლებას საგარეო პოლიტიკის კუთხით ერთი მხრივ რუსეთისთვის მიწის გადაცემაში ადანაშაულებენ, მეორე მხრივ კი თბილისთან ვაჭრობის გაღრმავებაში. საგარეო პოლიტიკის გარდა, ოპოზიცია და სამოქალაქო ორგანიზაციების ნაწილი დე ფაქტო მთავრობას არაერთი გადაწყვეტილების გამო აკრიტიკებს. „სახალხო მიტინგის“ ორგანიზატორები ბჟანიას მთავრობის დათხოვნისკენ მოუწოდებენ. აქციისთვის მზადება დაიწყო ოკუპირებული აფხაზეთის დე ფაქტო ხელისუფლებამაც. დე ფაქტო მთავრობის შენობა ადგილობრივმა სამართალდამცველებმა რკინის ჯებირებითა და მავთულხლართებით შემოღობეს, ხოლო მცირე ზომის ხიდი დაშალეს. დამცავი კონსტრუქციებით შემოღობეს ოკუპირებულ აფხაზეთში სხვა ადმინისტრაციული ობიექტებიც. მთავრობის შენობასთან კი 29 მაისს სამხედროები და ჯავშანტექნიკა გამოჩნდა. ჯავშანტექნიკის გამოჩენას ადგილობრივ ოპოზიციასა და სამოქალაქო საზოგადოებაში დამატებით პროტესტი მოჰყვა. ოპოზიცია აცხადებს, რომ მთავრობას თავდაცვის ძალების პოლიტიკურ პროცესებში ჩართვა მათი კანონმდებლობით ეკრძალებათ. დე ფაქტო პრეზიდენტმა ასლან ბჟანიამ კი თქვა, რომ ძალოვანი უწყებები მიიღებენ ყველა საჭირო ზომას, რათა „თავიდან აიცილონ შესაძლო თავდასხმები და პროვოკაციები“. დე ფაქტო ძალოვანი უწყებების წარმომადგენლებმა 29 მაისს სპეციალური განცხადებებიც გაავრცელეს და მოქალაქეებს მოუწოდეს დაიცვან კანონი და წესრიგი. მანამდე ადგილორივი მედია წერდა, რომ სამართალდამცველებმა დააკავეს 8 მოქალაქე. ოპოზიცია დაკავებებს პოლიტიკურ ზეწოლად მიიჩნევს, ოკუპირებული აფხაზეთის დე ფაქტო შინაგან საქმეთა სამინისტრო კი აცხადებდა, რომ ღონისძიება სამართალდარღვევისა და დანაშაულის პრევენციისკენ იყო მიმართული. პუბლიკა

ფოტოგრაფი ზურაბ ცერცვაძე ამბობს, რომ მარტის აქციებისას გადაღებული მისი ცნობილი ფოტო არ მიიღეს ნატოსა და ევროკავშირის შესახებ სამთავრობო საინფორმაციო ცენტრის მიერ გამოცხადებული ფოტოკონკურსში – „მე ვხედავ ევროპას“. ფოტოგრაფი ზურაბ ცერცვაძის ცნობილ ფოტოზე ჩანს, რომ მოქალაქეებს აქციაზე ევროკავშირის დროშა წყლის ჭავლის წინ აქვთ აღმართული. ფოტო არაერთმა საერთაშორისო მედიამ გამოაქვეყნა. თუმცა, საქართველოს სამთავრობო საინფორმაციო ცენტრის ფოტოკონკურსზე ვერ მოხვდა. როგორც ფოტოგრაფი ზურაბ ცერცვაძე ამბობს, მას მისწერეს, რომ მისი ფოტო კონკურსის კრიტერიუმებს არ აკმაყოფილებდა. ის მიიჩნევს, რომ ცენტრს „პოლიტიკური კრიტერიუმები“ ჰქონდა. „როცა მომწერეს, მე გამიჩნდა აზრი, რომ ამას პოლიტიკური სარჩული და მიზეზი ჰქონდა“, – ამბობს ის ტელეკომპანია „ფორმულასთან“. ფოტოკონკურსში შერჩეული ფოტოები გუშინ გამოქვეყნდა საინფორმაციო ცენტრის Facebook-გვერდზე. სამთავრობო საინფორმაციო ცენტრში ამ საკითხზე კომენტარს მედიასთან არ აკეთებენ. „პუბლიკა“ ცდილობს მათგან განმარტებების მიღებას. ნატოსა და ევროკავშირის შესახებ სამთავრობო საინფორმაციო ცენტრის ხელმძღვანელი თამარ წულეისკირია. ის უმრავლესობის დეპუტატის ლევან კობიაშვილის ცოლია და საზოგადოების ყურადღების ცენტრში მას შემდეგ მოექცა, რაც სოციალურ ქსელში გამოაქვეყნა პოსტი, რომ ვინც მის მეუღლეს მოღალატეს ეძახდა რუსული კანონის მხარდაჭერის გამო, მეგობრობიდან ამოეშალათ ის. პუბლიკა

„ქართული ოცნების” თავმჯდომარე ირაკლი კობახიძე აცხადებს, რომ თუ პრეზიდენტი სალომე ზურაბიშვილი „მთავარი არხის” დირექტორს, ნიკა გვარამიას შეიწყალებს, „გამოდის, რომ რასაც ნიკა გვარამია სალომე ზურაბიშვილს ეძახდა, მართალი იყო”. „როდესაც კონკრეტული ადამიანი შენ გეძახის რეზიდენტს და მერე აღარ მინდა გავიმეორო რას გეძახის, ამის მერე თუ კიდევ ფიქრობ ასეთი პიროვნების შეწყალებაზე, მაშინ ადასტურებ, რომ ეს გამონათქვამი ყოფილა სწორი. რასაც ეძახდა გვარამია ზურაბიშვილის, გამოდის, რომ ის ყოფილა მართალი და ის ყოფილა სწორი, თუ ის დათანხმდება ამ პიროვნების შეწყალებას. ნუ ეს არის სალომე ზურაბიშვილის გადასაწყვეტი”, – განაცხადა კობახიძემ. ირაკლი კობახიძის თქმით, „ქართულმა ოცნებამ“ წინასწარ არ იცის, რას გადაწტვეტს ნიკა გვარამიას შეწყალებასთან დაკავშირებით პრეზიდენტი. „ჩვენ არ ვართ სალომე ზურაბიშვილი, და ვერ ვიტყვით რას იზამს“, – ამბობს კობახიძე. მან კიდევ ერთხელ თქვა, რომ პრეზიდენტთან ხელისუფლება პოლემიკაში შესვლას აღარ აპირებს. პუბლიკა

პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა, რომ როცა ევროკავშირი დემარშში საქართველოს უკრაინის ტერიტორიული მთლიანობის დარღვევის გამო რუსეთის სანქცირებას სთხოვს, მათ უნდა გაითვალისწინონ, რომ რუსეთს საქართველოს მთლიანობაც აქვს დარღვეული. სამხარაძის მტკიცებით, ევროკავშირის ოფიციალურ დოკუმენტებში დღემდე დაფიქსირებული არ არის ტერმინი ოკუპაცია აფხაზეთთან და ცხინვალის რეგიონთან მიმართებით. „ეს არის სრულიად ბუნებრივი და ლოგიკური, როდესაც ევროკავშირს სურს, საქართველომ იმოქმედოს ისე, როგორც მოქმედებს ევროკავშირი, იმიტომ რომ ის არის ჩვენი პარტნიორი და საქართველო მიაჩნია პარტნიორად. ამაში არც გასაბრაზებელი, არც გასაკვირი და არც საწყენი არაფერი არ არის. ლოგიკურია ეს მათი მოთხოვნა. თუმცა მეორე მხარეს დგას ინტერესები – ევროკავშირს საკუთარი აქვს, ჩვენ – ჩვენი. ევროკავშირის 27 ქვეყნის ელჩმა ეკონომიკის მინისტრს რუსეთთან ფრენის დაწყების გამო დემარში 29 მაისს გამოუცხადა. „ქართული ოცნების“ თავმჯდომარემ, ირაკლი კობახიძემ, 30 მაისს აღნიშნა, რომ ამ დემარშით ევროკავშირმა საქართველოს რუსეთის დასანქცირება მოსთხოვა. პუბლიკა

გლობალური უსაფრთხოების ფორუმზე პრემიერ ღარიბაშვილის მიერ გაკეთებულ განცხადებებს საქართველოს დასავლელი პარტნიორები ეხმაურებიან და აკრიტიკებენ. ლიეტუვის სეიმის საგარეო ურთიერთობათა კომიტეტის თავმჯდომარე ჟიგიმანტას პავილიონისი აკრიტიკებს ღარიბაშვილის განცხადებას იმის შესახებ, რომ უკრაინაში რუსეთის შეჭრის ერთ-ერთი მიზეზი კიევის სწრაფვა იყო ნატოში გაწევრიანებისკენ. პავილიონისი აცხადებს, რომ ომის პროვოცირება არა უკრაინის სურვილმა, არამედ ნატოს არ გაფართოებამ გამოიწვია: „შესწორება, ომის პროვოცირება ნატოს არ-გაფართოებამ გამოიწვია“ — აცხადებს ლიეტუველი პოლიტიკოსი. ესტონეთის პარლამენტის საგარეო საქმეთა კომიტეტის თავმჯდომარე მარკო მიკელსონი კი აცხადებს, რომ „ქართული ოცნება“ „კრემლის კარტებით თამაშობს“: „ეს უკვე ითქვა, „ქართული ოცნება“ კრემლის კარტებით თამაშობს“ — აცხადებს მიკელსონი. ღარიბაშვილის განცხადებებს ტვიტერზე გამოეხმაურა ამერიკელი გენერალ-ლეიტენანტი და ევროპაში აშშ-ის ჯარის ყოფილ სარდალი ბენ ჰოჯესიც. გენერალი ჰოჯესი ღარიბაშვილის განცხადებას წარმოუდგენელს უწოდებს და სვამს კითხვას, თუ რა დაემართა საქართველოს: „წარმოუდგენელია, საქართველოს პრემიერ-მინისტრი უკრაინაში რუსეთის შეჭრას ნატოს გაფართოებას აბრალებს, რა დაემართა საქართველოს?“ — წერს ბენ ჰოჯესი ტვიტერზე. ევროპარლამენტარი პეტრას აუსტრევიჩიუსი კი აცხადებს, რომ ღარიბაშვილი საუკეთესოდ ასრულებს პუტინის საქმეს: „საქართველოს პრემიერ-მინისტრი ირაკლი ღარიბაშვილი საუკეთესოდ ასრულებს პუტინის საქმეს. საქართველოს მოქმედი მთავრობა აგრესორი რუსეთის გამხმოვანებელი გახდა. დასავლეთმა უნდა გადახედოს საკუთარ პოლიტიკას საქართველოს მიმართ“ — აცხადებს ევროპარლამენტარი. საქართველოს პრემიერ-მინისტრის განცხადებებს გამოეხმაურა ჩეხეთის პარლამენტის საგარეო ურთიერთობათა კომიტეტის თავმჯდომარეც. მარეკ ზენიშეკის თქმით, ღარიბაშვილმა იცის რომ სინამდვილეში ვითარება პირიქითაა, თუმცა არჩია მხარი დაეჭირა რუსული პროპაგანდისთვის: „სინამდვილეში ვითარება სრულიად საწინააღმდეგოა. საქართველოს პრემიერ-მინისტრმა ეს იცის, უბრალოდ არჩია რუსული პროპაგანდისთვის დაეჭირა მხარი“ — წერს ჩეხი პოლიტიკოსი ტვიტერზე. ევროპარლამენტარი მირიამ ლექსმანი კი აცხადებს, რომ ღარიბაშვილს აქვს ძალიან მოკლე მეხსიერება, ან ამას ირჩევს: „პრემიერ ღარიბაშვილს აქვს ან ირცევს ჰქონდეს ძალიან მოკლე მეხსიერება“ — წერს ევროპარლამენტარი. საქართველოს პრემიერ-მინისტრი ირაკლი ღარიბაშვილი გლობალური უსაფრთხოების ფორუმზე გამართულ დისკუსიაზე აცხადებს, რომ რუსეთის უკრაინაში შეჭრის „ერთ-ერთი მიზეზი“ ამ უკანასკნელის ნატოში გაწევრიანების განზრახვა იყო. აღნიშნული კითხვა პრემიერ ღარიბაშვილს ბრატისლავაში მიმდინარე დისკუსიის მოდერატორმა დაუსვა და ჰკითხა, მისი აზრით, რატომ დაიწყო რუსეთმა უკრაინაში ომი, რაზეც ღარიბაშვილი პასუხობს — „ყველამ იცის მგონი მიზეზი“: „ერთ-ერთი მიზეზი იყო ნატო, ნატოს გაფართოება — ხომ ასეა? და ბევრი სხვა მიზეზი“, — თქვა ირაკლი ღარიბაშვილმა. მოდერატორის დამატებით კითხვაზე ფიქრობდა თუ არა ის, რომ ნატოს გაფართოება იყო ომის პროვოცირება, ღარიბაშვილი აცხადებს, რომ არ სურს ამაზე სპეკულირება და არც რუსეთის მთავრობის ციტირება უნდა, მაგრამ მისი თქმით, „ერთ-ერთი მიზეზი“ ომის დაწყების სწორედ ეს იყო: „არ მინდა ამაზე სპეკულირება, არც ციტირება მინდა რუსეთის მთავრობის, მაგრამ ერთ-ერთი მიზეზი იყო უკრაინის ნება და განზრახვა რომ გამხდარიყო ნატოს წევრი და ამიტომ ჩვენ ვხედავთ შედეგებს,“ — აცხადებს ირაკლი ღარიბაშვილი. ნეტგაზეთი

„ქართული ოცნების“ თავმჯდომარე, მამუკა მდინარაძე აცხადებს, რომ ტექნიკური საკითხების გამო რუსეთთან ფრენებზე უარის თქმა – დე ფაქტო სანქციები იქნებოდა. 29 მაისს გამართულ ბრიფინგზე მდინარაძე გამოეხმაურა როგორც რუსეთთან ფრენების აღდგენის საკითხს, ასევე ევროკავშირის ელჩის განცხადებას, რომლის მიხედვითაც პირდაპირი ფრენების აღდგენას საქართველოს მხრიდან თანხმობაც სჭირდებოდა. 29 მაისს ევროკავშირის ელჩი საქართველოში პაველ ჰერჩინსკი, ევროკავშირის ყველა ელჩთან ერთად, რუსეთთან პირდაპირი ფრენების აღდგენის გამო დემარშის მიზნით ვიცე-პრემიერს, ეკონომიკის მინისტრ ლევან დავითაშვილს შეხვდა. ჰერჩინსკის თქმით, ვიცე-პრემიერთან „ძალიან ღია და გულწრფელი“ საუბარი შედგა. შეხვედრის შემდეგ, ჟურნალისტებთან საუბრისას მან დასძინა: „მართალია, რომ ეს [ფრენების აღდგენა] იყო რუსეთის ერთპიროვნული გადაწყვეტილება, მაგრამ ეს ასევე მოითხოვდა თანხმობას საქართველოს მთავრობისგან“, — თქვა ჰერჩინსკიმ. რუსეთმა 10 მაისს მოხსნა შეზღუდვა საქართველოსთან პირდაპირ ფრენებზე. საქართველოს ხელისუფლება მოსკოვის გადაწყვეტილებას მიესალმება და ამბობს, რომ ეს გაუმარტივებს ცხოვრებას რუსეთში მცხოვრებ „მილიონ ქართველს“. იმისათვის, რომ ავიაკომპანიებს ფრენები შეესრულებინათ, საჭირო იყო საქართველოს მთავრობის ნებართვა. ამ დროისთვის საქართველომ ფრენების ნებართვა უკვე გასცა სამმა კომპანიაზე – რუსულ „აზიმუტზე“, Red Wings-ზე და ქართულ „Georgian Airways-ზე“. მთავრობაში აგრეთვე აცხადებენ, რომ მხოლოდ არასანქცირებული კომპანიები და ხომალდები შეძლებენ ფრენას. პოლიტიკოსების და მოქალაქეთა ნაწილი ავიამიმოსვლის აღდგენას აპროტესტებს. ფრენების აღდგენას კრიტიკულად უყურებენ აშშ და ევროკავშირი. წაიკითხეთ ვრცლად: რუსეთის გადაწყვეტილება იყო, მაგრამ საქართველოს თანხმობას საჭიროებდა — ჰერჩინსკი ფრენების აღდგენაზე; რას ნიშნავს ელჩთა დემარში საქართველოს ევროპული მომავლისთვის; netgazeti

სპეციალურმა საგამოძიებო სამსახურმა გამოძიება დაიწყო ინფორმაციაზე, რომლის თანახმად, შსს-ს სასაზღვრო პოლიციის თანამშრომელმა ვაშლოვანის ეროვნული პარკის მიმდებარედ ტურისტების კარვების მისამართით სავარაუდოდ ცეცხლსასროლი იარაღით გასროლა განახორციელა. უწყება განცხადებაში აღნიშნავს, რომ გამოძიება საქართველოს სისხლის სამართლის კოდექსის 333-ე მუხლის მე-3 ნაწილის „ბ" ქვეპუნქტით გათვალისწინებული დანაშაულის ნიშნებით დაიწყო. „სპეციალურმა საგამოძიებო სამსახურმა, ვაშლოვანის ნაკრძალში, შინაგან საქმეთა სამინისტროს სასაზღვრო პოლიციის თანამშრომლის მიერ ტურისტების მიმართ შესაძლო არასათანადო მოპყრობის და ცეცხლსასროლი იარაღის უკანონოდ გამოყენების ფაქტზე, საქართველოს სისხლის სამართლის კოდექსის 333-ე მუხლის მე-3 ნაწილის „ბ" ქვეპუნქტით გათვალისწინებული დანაშაულის ნიშნებით გამოძიება დაიწყო. გამოძიების დაწყების საფუძველი 2023 წლის 29 მაისს, სპეციალურ საგამოძიებო სამსახურში მედიის წარმომადგენლის მხრიდან მოწოდებული ინფორმაცია გახდა, რომლის მიხედვითაც 2023 წლის 28 მაისს, შინაგან საქმეთა სამინისტროს სასაზღვრო პოლიციის თანამშრომელმა ვაშლოვანის ეროვნული პარკის მიმდებარედ განთავსებული ტურისტების კარვების მისამართით სავარაუდოდ ცეცხლსასროლი იარაღით გასროლა განახორციელა. სპეციალური საგამოძიებო სამსახური, სწრაფი, ეფექტიანი და ობიექტური გამოძიების უზრუნველსაყოფად, ყველა საჭირო საგამოძიებო და საპროცესო მოქმედებას ატარებს”, - აღნიშნულია ინფორმაციაში.

საქართველოს პრეზიდენტი 31 მაისს, 13-წლიანი პაუზის შემდეგ, ევროპარლამენტს მიმართავს. ამის შესახებ ინფორმაციას საქართველოს პრეზიდენტის ადმინისტრაცია ავრცელებს. საქართველოს პრეზიდენტი სალომე ზურაბიშვილი სამუშაო ვიზიტით ბრიუსელში გაემგზავრა. „საქართველოს პრეზიდენტი პირისპირ შეხვედრებს გამართავს ევროკავშირის უმაღლესი თანამდებობების პირებთან: ევროპული საბჭოს პრეზიდენტ შარლ მიშელთან, ევროკომისიის პრეზიდენტ ურსულა ფონ დერ ლაიენთან და ევროპარლამენტის პრეზიდენტ რობერტა მეცოლასთან. 31 მაისს კი, საქართველოს პრეზიდენტი ევროპარლამენტს სიტყვით მიმართავს. დაგეგმილია საქართველოს პრეზიდენტის ინტერვიუები საერთაშორისო მედიასთან”, - აღნიშნულია ინფორმაციაში. იპნ

საპარლამენტო უმრავლესობა მხარს დაუჭერს კანონპროექტს, რომლის მიღების შემთხვევაში პოლიტიკური ჯგუფის შექმნას შეძლებენ პარლამენტის წევრები, რომლებმაც დატოვეს შესაბამისი პოლიტიკური პარტიის ან საარჩევნო ბლოკში შემავალი პარტიის წევრობა. ცვლილებების ინიციატორები „ნაციონალური მოძრაობის“ ყოფილი წევრები, რომან გოცირიძე და ხატია დეკანოიძე არიან. დეპუტატებმა აღნიშნული ცვლილებები 11 მაისს, მას შემდეგ დაარეგისტრირეს, რაც პოლიტიკური ჯგუფის შექმნის შესაძლებლობა არ მიეცათ. რეგლამენტის არსებული რედაქციით, პოლიტიკური ჯგუფის შექმნა შეუძლიათ ერთი პარტიიდან წამოსულ დეპუტატებს, თუმცა ეს არ ეხებოდა საარჩევნო ბლოკში შემავალ პარტიას. ურავლესობის სხდომის დასრულების შემდეგ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა, რომ უმრავლესობა ამ ცვლილებას მხარს დაუჭერს. კანონპროექტმა აზრთა სხვადასხვაობა გამოიწვია ოპოზიციაში. ცვლილებების ინიციირების შემდეგ. 17 მაისს ენმ-ის ფრაქცია დატოვა იმ 4-მა დეპუტატმა, რომლებმაც იუსტიციის საბჭოში სამი არამოსამართლე წევრის არჩევას მისცა ხმა. ამის შემდეგ დაიწყო საუბარი იმაზე, რომ ეს ინიციატივა მათ შესაძლებლობას მისცემს, რომ შექმნან პოლიტიკური ჯგუფი და ისარგებლონ ამ უპირატესობით. „ქართული ოცნება“ ხაზს უსვამს იმას, რომ ცვლილებები ხატია დეკანოიძისა და რომან გოცირიძის ინიციირებულია. პუბლიკა

მაისის ბოლო კვირას უკრაინაში კიევის დაარსებას აღნიშნავენ — მეორე წელია, ომის პირობებში და მოკრძალებულად. რუსეთმა სწორედ კიევის დღეს მიიტანა მორიგი მასიური საჰაერო იერიში უკრაინის დედაქალაქზე. შედეგად, ერთი ადამიანი დაიღუპა და ორი დაშავდა. როგორ ცხოვრობს კიევი მუდმივი საჰაერო განგაშის პირობებში, ნახეთ „ნეტგაზეთის“ რეპორტაჟში უკრაინის დედაქალაქიდან. კიევის ოპერამ ერთი წელია განაახლა ფუნქციონირება ომით გამოწვეული იძულებითი პაუზის შემდეგ. თავიდან კვირაში 2 სპექტაკლს ატარებდა, დასის წევრების ევაკუაციიდან დაბრუნების შემდეგ კი — სამს. თეატრი 1 300-ზე მეტ მაყურებელს იტევს, თუმცა ახლა, უსაფრთხო ევაკუაციის მიზნებიდან გამომდინარე, სახელმწიფოს მოთხოვნით, გაყიდვაში მხოლოდ 450 ცალი ბილეთი გამოდის. თუ წარმოდგენის დროს საჰაერო განგაშის სიგნალები ჩაირთო, მაყურებლებს თეატრის გასახდელში მოწყობილ თავშესაფარში ეპატიჟებიან. საჰაერო თავდასხმის საფრთხის გადავლის შემდეგ წარმოდგენა ზუსტად იმ მონაკვეთიდან გრძელდება, სადაც შეწყდა. თუმცა ზოგჯერ სპექტაკლის გაგრძელებას უბრალოდ აზრი არ აქვს — ერთხელ სირენები „ტრავიატას“ დასრულებამდე 3 წუთით ადრე ჩაირთო. „იმ დღეს ვიოლეტა არ მომკვდარა“, – იხსენებს ლუდმილა მოვლენკო, უკრაინის ეროვნული ოპერის წარმომადგენელი. „კარმენი“, კიევის ოპერა, 04/2023. ფოტო: ნინო ჩიჩუა/ნეტგაზეთი წელიწად-ნახევრის წინ, როდესაც რუსეთმა დაახლოებით 100 000 სამხედრო მიაყენა უკრაინის საზღვარს და ყველაფერი მოასწავებდა ომის დაწყებას, ძალიან ცოტას თუ წარმოედგინა, რომ რუსული არმია აღმოსავლეთ უკრაინას გასცდებოდა და კიევის აღებას შეეცდებოდა. დედაქალაქის ალყის წარუმატებელი მცდელობის შემდეგ, რუსეთის შეიარაღებულმა ძალებმა კიევის და ჩერნიგოვის ოლქებიდან უკან დაიხიეს, თუმცა დღემდე აგრძელებენ საჰაერო თავდასხმებს. რუსულ რაკეტებს და ირანულ დრონებს უკრაინის საჰაერო თავდაცვის სისტემები მეტწილად წარმატებით უმკლავდება. კიევიც, მუდმივი განგაშის სირენებით და კომენდანტის საათით, თუმცა ნორმალურ ცხოვრებას დაუბრუნდა. კიევი, უკრაინა. 04/2023. ფოტო: ნინო ჩიჩუა/ნეტგაზეთი „თავიდან ყველაფერი დაკეტილი იყო. არც კინოთეატრები მუშაობდა, არც კლუბები… როცა კიევის ოლქზე სრულმასშტაბიანი შეტევის საფრთხე შემცირდა, ცხოვრებამ დაიწყო დაბრუნება. დაბრუნდნენ ქარხნები, დაწესებულებები, ორგანიზაციები… როგორც ჩვენი პრეზიდენტი ამბობს, ეკონომიკა უნდა ავამუშაოთ. ეს ძალიან მნიშვნელოვანია. მიუხედავად მძიმე სიტუაციისა უკრაინის აღმოსავლეთში, აქ ყველაფერი უნდა გავაკეთოთ სიტუაციის გასაუმჯობესებლად, რომ დავეხმაროთ ფრონტის ხაზზე“, — ამბობს 21 წლის სოფია კიევიდან. “კლიჩკოს ხიდი“, რომელიც 2022 წლის ოქტომბერში რუსეთის სარაკეტო დარტყმის სამიზნე გახდა. ფოტო: ნინო ჩიჩუა/ნეტგაზეთი კიევის მცხოვრებლები ჰყვებიან, თუ როგორ შეიცვალა გასულ ერთ წელიწადში მათი ყოველდღიურობა — შეეჩვივნენ საჰაერო განგაშს იმდენად, რომ სირენების გაგონებისას ყოველ ჯერზე თავშესაფარში აღარც ჩადიან; თუმცა ვერ შეეჩვივნენ უდანაშაულო ადამიანების მსხვერპლს; ომმა გააძლიერათ, გააღრმავა მათი სიყვარული სიცოცხლისა და სამშობლოსადმი; გაწყვიტეს კავშირები რუს ნათესავებთან და ამბობენ, რომ მათ ვერასდროს აპატიებენ. კრისტინა კისელოვაიტე, მსახიობი და არტ-მენეჯერი: ანატოლი ტარჩენკო, კიევის მკვიდრი: სოფია, 21 წლის: საშა, 35 წლის: ქვიშის ტომრებით შეფუთული კულტურული ძეგლების ფონზე, კიევის ქუჩებში ახლა მთავარი სანახაობა დამწვარი რუსული ტანკებია. კედლებზე გაკეთებული წარწერები, გრაფიტები თუ პლაკატები ომის დამთავრებისკენ და ჯარისკაცების ცოცხლად დაბრუნებისკენ მოუწოდებს. მათი დიდი ნაწილი მარიუპოლს ეძღვნება. განადგურებული რუსული ტანკებისა და ჯავშანტექნიკის გამოფენა კიევში, წმინდა მიქაელის მოედანზე. ფოტო: ნინო ჩიჩუა/ნეტგაზეთი პუტინის ჰააგაში გასამართლებას „წინასწარმეტყველებს“ ხრეშჩატიკზე გამოფენილი ბანერი და ინსტალაცია. გისოსები და პლაკატი-მარკა ხრეშჩატიკზე, კიევის ცენტრალურ ქუჩაზე. პოსტერზე გამოსახულია პატიმრის უნიფორმაში ჩაცმული ვლადიმერ პუტინი, რომელსაც უკრაინელი გენერალი ვალერი ზალუჟნი ჰააგის სასამართლოში წარადგენს. ფოტო: ნინო ჩიჩუა/ნეტგაზეთი „გმირები არ კვდებიან“ — პლაკატი კიევში. ფოტო: ნინო ჩიჩუა/ნეტგაზეთი რუსეთის შეჭრის შემთხვევაში კიევს 3 დღეში დაცემას უწინასწარმეტყველებდნენ, თუმცა უკრაინული წინააღმდეგობა 459 დღეა გრძელდება. უკრაინელმა ხალხმა სრულმასშტაბიანი ომის დაწყებისთანავე თვითორგანიზების შესაშური მაგალითები აჩვენა. მაგალითად, ფონდმა „დაბრუნდი ცოცხალი“, 2022 წლის 24 თებერვლის შემდეგ, უკრაინის თავდაცვის ძალების დასახმარებლად 7 მილიარდ გრივნაზე მეტი შეაგროვა. და ეს მხოლოდ ერთ-ერთია ასობით არასამთავრობო ორგანიზაციას შორის, რომლებიც ხალხისგან შემოწირულობას აგროვებენ. „დააბრუნეთ ჩვენი 1700 ბირთვული ბომბი ახლავე“ — წარწერა ეხმიანება ბუდაპეშტის მემორანდუმით გათვალისწინებულ უსაფრთხოების გარანტიებს, რომლის სანაცვლოდაც უკრაინამ დათმო მსოფლიოს სიდიდით მესამე ბირთვული არსენალი. ფოტო: ნინო ჩიჩუა/ნეტგაზეთი საქველმოქმედო ორგანიზაციები ჯარისთვის დრონებს და აღჭურვილობას ყიდულობენ. ფონდის „დაბრუნდი ცოცხალი“ წარმომადგენელი მაქსიმ ლემანსკი იხსენებს, რომ კომპანია „ბაირახტარში” თავდაპირველად „შოკში ჩავარდნენ“, როცა დრონების შესასყიდად უკრაინიდან საქველმოქმედო ორგანიზაციებმა მიმართეს — ვერ გაეგოთ, როგორ შეიძლება ენჯეო ყოფილიყო იარაღის შემსყიდველი არმიისთვის. შეთანხმების მიღწევას რამდენიმეთვიანი მოლაპარაკებები დასჭირდა. „დააბრუნეთ ჩვენი 1700 ბირთვული ბომბი ახლავე“ — წარწერა ეხმიანება ბუდაპეშტის მემორანდუმით გათვალისწინებულ უსაფრთხოების გარანტიებს, რომლის სანაცვლოდაც უკრაინამ დათმო მსოფლიოს სიდიდით მესამე ბირთვული არსენალი. ფოტო: ნინო ჩიჩუა/ნეტგაზეთი „პრიტულას ფონდმა“ 15 000 დოლარი შეაგროვა სამი Bayraktar-ის შესაძენად, თურქულმა კომპანიამ ისინი უფასოდ გადასცა. დაზოგილი თანხით საქველმოქმედო ორგანიზაციამ შეიარაღებული ძალებისთვის ICEYE-ის თანამგზავრი შეიძინა. თუმცა შიდა შემოწირულებები ომის პირველ პერიოდთან შედარებით კლებადია — თუ 2022 წლის მარტში Come back alive-მა მილიარდი გრივნა შეაგროვა, ახლა თვეში მხოლოდ 300 000 გრივნას აგროვებს, ამიტომ რიგითი მოქალაქეებიდან ფოკუსის გადატანას მსხვილ ბიზნესზე გეგმავს. უკრაინის პრეზიდენტ ვოლოდიმირ ზელენსკის ინიციატივით შექმნილმა საქველმოქმედო პლატფორმა „უკრაინა 24-მა“ ამ დრომდე 340 784 756 დოლარის მოზიდვა შეძლო. ამ და საერთაშორისო დონორების თანხების რეკონსტრუქციაზე მიმართვას შეცდომად მიიჩნევს ლიუბა შიპოვიჩი, Dignitas Foundation-ის წარმომადგენელი და ამბობს, რომ რეკონსტრუქციამდე უკრაინას ომი აქვს მოსაგები და საჭიროა უფრო მეტი რესურსის მობილიზება ბრძოლის გასაგრძელებლად. „ვფიქრობ, მსოფლიო უკრაინის მთავრობის პროპაგანდის გავლენის ქვეშაა, თითქოს ომს ვიგებთ. ეს პროპაგანდა კარგია ჩვენი ჯარისკაცების სულისკვეთების ასამაღლებლად, მაგრამ რეალობას თვალი უნდა გავუსწოროთ — რუსეთს მობილიზაციის მეტი რესურსი აქვს“, — ამბობს იგი. „ჩვენ ვერ წავაგებთ ამ ომს“, — ალტერნატივის არქონაზე უთითებს ფონდის „დაბრუნდი ცოცხალი“ წარმომადგენელი მაქსიმ ლემანსკი. უკრაინელი ხალხის თავისუფლების თაღი (ყოფილი „ხალხთა მეგობრობის თაღი“). 2022 წლის აპრილში კიევის მთავრობამ დემონტაჟი განახორციელა თაღის ქვეშ მდებარე ორი მუშის ქანდაკებისა, რომელიც უკრაინელი და რუსი ხალხების მეგობრობის სიმბოლოს განასახიერებდა. ფოტო: ნინო ჩიჩუა/ნეტგაზეთი უკრაინული საზოგადოება თავის არჩევანში — დაიცვას სუვერენიტეტი, ევროპული მომავალი და საბოლოოდ დაშორდეს კრემლს — გაცილებით უფრო ცალსახა და ერთიანია რუსეთის სრულმასშტაბიანი შეჭრის შემდეგ, ვიდრე თუნდაც 2014 წლიდან დონბასში მიმდინარე ომის მიმართ. „რუსეთმა დაიწყო ეს ომი, მაგრამ ჩვენი არჩევანი იყო, ბრძოლითვე გვეპასუხა. ჩვენ არ შეგვიძლია შევაჩეროთ ეს ომი ისე, რომ არ დავნებდეთ. თუ არ ვიბრძოლებთ, დავკარგავთ ქვეყანას. და ეს არ ეხება მხოლოდ სახელმწიფოებრიობას. ესაა ბრძოლა ჩვენი საყვარელი ადამიანებისთვის, ადამიანის სიცოცხლისთვის. ჩვენ ვერჩით რუსეთის არმიას, მაგრამ რუსეთის არმია არ ებრძვის მხოლოდ უკრაინულ შეიარაღებულ ძალებს — ისინი ებრძვიან მთელ უკრაინას“, — ამბობს არტემ დენისოვი, უკრაინის ვეტერანთა ჰაბის დირექტორი. უკრაინელი ლტოლვილების სამარშრუტო გზა —რკინიგზის სადგური ჩელმში, პოლონეთის სამხრეთ-აღმოსავლეთში, უკრაინის საზღვრიდან დაახლოებით 25 კილომეტრში. ფოტო: ნინო ჩიჩუა/ნეტგაზეთი ბრიტანელი არტისტის ბენკსის გრაფიტი კიევის ცენტრში. ფოტო: ნინო ჩიჩუა/ნეტგაზეთი ნეტგაზეთი

ოკუპირებული ცხინვალის რეგიონის ე.წ. პრეზიდენტმა ალან გაგლოევმა ხალხისა და პარლამენტისადმი მიმართვაში რუსეთს „მთავარი მოკავშირე“ უწოდა და მხარდაჭერა გამოუცხადა უკრაინაში მიმდინარე „სპეციალურ ოპერაციაში.“ „ჩვენი სამხედრო მოსამსახურეები და მოხალისეები რუსი ჯარისკაცების გვერდით დადგნენ საერთო ინტერესების დასაცავად უკრაინულ ნეონაციზმთან ბრძოლაში, რომლებიც კოლექტიური დასავლეთის ხელში მარიონეტად იქცნენ”, - თქვა მან. ამასთან, გაგლოევმა აღნიშნა, რომ საქართველოს „მეორე ფრონტის“ გახსნისკენ უბიძგებენ. „სპეცოპერაციის მიმდინარეობის ფონზე საქართველოს რესპუბლიკის დესტრუქციული ძალები გააქტიურდნენ, რომლებიც მას სამხრეთ ოსეთისა და აფხაზეთის წინააღმდეგ „მეორე ფრონტის“ გახსნისკენ უბიძგებენ. ამ კუთხით ჩვენ მივიღეთ ზომები ქვეყნის თავდაცვისუნარიანობის გასაძლიერებლად და რუსულ მხარესთან სამხედრო სფეროში ურთიერთობების გასამყარებლად“, - განაცხადა გაგლოევმა. ასევე ნახეთ ბჟანია: “სანამ ჩვენ ამით ვიყავით დაკავებული, საქართველოსთან საჰაერო მიმოსვლა აღადგინეს“ მანვე დაამატა, რომ ქართულ მხარესთან შემდგომი ურთიერთობები საერთაშორისო ასპარეზზე, მათ შორის ჟენევის დისკუსიების ფორმატში, "დაფუძნებული იქნება დავების გადაწყვეტისას ძალის გამოუყენებლობის შესახებ ორმხრივად სავალდებულო დოკუმენტის მიღების აუცილებლობაზე“. გაგლოევმა ისიც თქვა, რომ „სამხრეთმა ოსეთმა სრულად დაუჭირა მხარი დონეცკისა და ლუგანსკის სახალხო რესპუბლიკების, ზაპოროჟიესა და ხერსონის ოლქების რუსეთის ფედერაციაში შესვლას“. „მოხარული ვართ ჩვენი მეგობრების გამო, დადგა ისტორიული მომენტი, როდესაც რუსეთთან გაერთიანების შესახებ ხალხის სურვილი ამ ნაბიჯის განხორციელების გეოპოლიტიკურ შესაძლებლობას დაემთხვა. იმედი მაქვს, შორს არ არის ის დღე, როცა სამხრეთ ოსეთის ჯერი დადგება“, - განაცხადა მან. გარდა ამისა, გაგლოევმა თქვა, რომ აქტიურად მუშაობს რუსეთიდან ინვესტორების მოზიდვაზე და სამშაბათს მოსკოვში შეხვედრას გამართავს „რუსეთის საექსპორტო ცენტრის“ ხელმძღვანელობასთან. ალან გაგლოევმა 2022 წელს, ე.წ. ინაუგურაციის შემდეგ, მალევე შეაჩერა რეფერენდუმი „სამხრეთ ოსეთის“ რუსეთის ფედერაციაში გაწევრიანების შესახებ, რომელიც დანიშნული იყო მისი წინამორბედის, ანატოლი ბიბილოვის მიერ. მოსკოვში გაგლოევის გადაწყვეტილებას მაშინ „გონივრული“ უწოდეს. რადიო თავისუფლება