tvati

ბელარუსის პრეზიდენტი ალექსანდრე ლუკაშენკო ვლადიმერ პუტინთან შეხვედრის შემდეგ კრიტიკულ მდგომარეობაში საავადმყოფოში გადაიყვანეს. ამის შესახებ ბელორუსმა ოპოზიციონერმა ვალერი ცეპკალომ განაცხადა. „ჩვენს ხელთ არსებული ინფორმაციით, რომელიც დამატებით დადასტურებას საჭიროებს, ლუკაშენკო პუტინთან დახურულ კარს მიღმა შეხვედრის შემდეგ სასწრაფოდ გადაიყვანეს მოსკოვის ცენტრალურ კლინიკურ საავადმყოფოში, სადაც ამჟამად იმყოფება“, - განაცხადა ცეპკალომ. იპნ

„ქართული ოცნების“ გენერალური მდივნის, კახა კალაძის განცხადებით, ხელისუფლების წარმომადგენლებს რუსეთის ფედერაციასთან არანაირი მოლაპარაკებები ფრენების აღდგენასა და უვიზო მიმოსვლასთან დაკავშირებით არ ჰქონიათ. მისივე შეფასებით, მსგავსი ინფორმაციის გაჟღერება არის „პოლიტიკური მანიპულაცია“. „ჩვენ არა ერთხელ გვითქვამს და კიდევ ერთხელ გავიმეორებ, რომ “ქართული ოცნება“ ქართულ პოლიტიკას ატარებს - პირველ რიგში, რაც ჩვენს ქვეყანას სჭირდება და ჩვენი ქვეყნის ინტერესებს. შესაბამისად, ჩვენ გავაკეთებთ ყველაფერს იმისთვის, რომ ქვეყანაში შენარჩუნებული იყოს მშვიდობა, ასევე ქვეყნის ეკონომიკური განვითარება და გაძლიერება მოხდეს, იმისთვის, რომ თითოეულმა ჩვენი ქვეყნის მოქალაქემ კეთილდღეობა იგრძნოს. დღეს ყველაზე მთავარი და მნიშვნელოვანი არის მშვიდობა, ტერიტორიული მთლიანობის აღდგენა და ამ გზაზე „ქართული ოცნება“ ყველაფერს გააკეთებს“, - განაცხადა კალაძემ. ასევე, კახა კალაძე გამოეხმაურა ვლადიმერ პუტინის განცხადებას უვიზო მიმოსვლასთან დაკავშირებით და აღნიშნა, რომ რუსეთის ფედერაციის ლიდერს გაუკვირდა ის, რომ „დღეს აპროტესტებენ ის ადამიანები, ვინც გუშინ ამას პირდაპირ მოითხოვდა და რუსს მოქალაქეებს მოუწოდებდა, ისინი საქართველოში შემოსულიყვნენ“. „არ ვიცი, ამ კითხვას რამდენად სერიოზულად უნდა ვუპასუხო და რა ფარულ მოლაპარაკებებზეა საერთოდ საუბარი. პუტინის განცხადებაში გაკვირვება, რაც იყო ამ უვიზო მიმოსვლასთან და ფრენების აღდგენასთან, მე დარწმუნებული ვარ, ეს ყველაფერი განპირობებული იყო იმით, რომ დღეს აპროტესტებენ ის ადამიანები, ვინც გუშინ ამას პირდაპირ მოითხოვდა და მოუწოდებდა რუსს მოქალაქეებს, რომ ისინი საქართველოში შემოსულიყვნენ, ტურისტულად ბიზნესი ეკეთებინათ და ა.შ. შესაბამისად, ეს განცხადება გაკეთებული იყო ამისთვის. „ქართულ ოცნებას“ და ხელისუფლებას, რა თქმა უნდა, არ გაუპროტესტებია ფრენების აღდგენა და არ გაუპროტესტებია ვიზების მოხსნა. ეს როგორც იცით, ცალმხრივად სანქცირებული საკითხი იყო და რუსეთის ფედერაციამ გადაწყვეტილება სანქციების გაუქმებასთან დაკავშირებით მიიღო. შესაბამისად, დღეს არის იმის საშუალება და შესაძლებლობა, რომ არა მხოლოდ სახმელეთო გზით შემოვიდნენ ადამიანები საქართველოში, ან არა მხოლოდ ერევნის გავლით, მათ შეუძლიათ პირდაპირ ჩამოფრინდნენ. ამაში ცუდი არაფერი არ არის. ასევე, ის რომ ქართველს საქართველოს პასპორტით ექნება საშუალება ვიზის გარეშე რუსეთის ფედერაციაში წავიდეს, ნებისმიერი ადამიანის გადასაწყვეტია და ამაში პრობლემა არ არის. რა თქმა უნდა, არანაირი მოლაპარაკებები არ ყოფილა და ეს არის ჩვეულებრივი პოლიტიკური მანიპულაციები, რასაც კონკრეტული ტელევიზიები ცდილობენ“, - განაცხადა კალაძემ. იპნ

თურქეთის საპრეზიდენტო არჩევნების მეორე ტურის მოახლოებას ოპონენტებს შორის ხისტი ურთიერთბრალდებები, ყალბი ამბების გავრცელება და ნაციონალისტური დისკურსის გაფართოება სდევს თან. მოქმედ პრეზიდენტს, რეჯეფ თაიფ ერდოღანსა და მის მთავარ კონკურენტს, ქემალ ქილიჩდაროღლუს შორის გადამწყვეტი კენჭისყრა 28 მაისს უნდა გაიმართოს. პირველი ტური და გამოწვევა ოპოზიციისთვის თურქეთის საპრეზიდენტო არჩევნების პირველი ტური, რომელიც 14 მაისს ჩატარდა, ერთ-ერთი ყველაზე რთულად პროგნოზირებადი იყო უკანასკნელ ათწლეულებში. მიზეზებს შორის დომინირებდა ერდოღანის მმართველობისას გამწვავებული ეკონომიკური კრიზისი ისევე, როგორც ოპოზიციის ერთიანობა მოქმედი პრეზიდენტის წინააღმდეგ. წინასაარჩევნო კვლევების უმრავლესობა ოპოზიციისთვის დამაიმედებელ რიცხვებს იძლეოდა, თუმცა საბოლოო შედეგი მისთვის ცალსახად არასახარბიელო აღმოჩნდა: თურქეთის “ცესკოს” თანახმად, ვერც ერთმა კანდიდატმა მოაგროვა პირველივე ტურში გამარჯვებისთვის საჭირო 50%-ზე მეტი, თუმცა ქილიჩდაროღლუსა და ერდოღანის ხმებს შორის განსხვავება 5.6%-ია ამ უკანასკნელის სასარგებლოდ. ერთმა 44.8% (24 მილიონ 594 ათასი ხმა) მიიღო, მეორემ — 49.5% (27 მილიონ 133 ათასი ხმა). ყვითელი ფერით აღნიშნულია პროვინციები, რომლებიც ერდოღანმა მოიგო, წითელი ფერი კი ქილიჩდაროღლუს მიერ მოგებულ პროვინციებს აღნიშნავს. წყარო: AA ავტორი: BBC ქილიჩდაროღლუმ მოიგო არაერთი დიდი ქალაქი, მათ შორის, ანკარა და სტამბოლი ისევე, როგორც ეგეოსისა და ხმელთაშუა ზღვისპირა რეგიონები და ქურთული რეგიონების დიდი ნაწილი, ერდოღანმა კი მაღალი შედეგები აჩვენა ცენტრალურ თურქეთსა და შავი ზღვისპირეთში. მოქმედმა პრეზიდენტმა მოიგო თებერვლის მიწისძვრით დაზარალებული პრაქტიკულად ყველა პროვინცია, სადაც მანამდეც დიდი მხარდაჭერით სარგებლობდა. გამონაკლისია ჰათაი, რომელსაც ოპოზიციონერი მერი ჰყავს. ამასთან, ისლამო-ნაციონალისტურმა ალიანსმა, რომელიც ერდოღანს უჭერდა მხარს, იმავე დღეს გამართულ საპარლამენტო არჩევნებში, “ცესკოს” შედეგით, ხმათა უმეტესობა მიიღო, რის გამოც 600-მანდატიან პარლამენტში უმრავლესობის შეკვრას ახერხებს. საპარლამენტო უმრავლესობის ფაქტორი საშუალებას აძლევს ერდოღანს, მეორე ტურში თავისი გამარჯვება ამომრჩეველს დაუხატოს, როგორც სტაბილურობის გარანტია და მოუწოდოს მათ, თავიდან აიცილონ აღმასრულებელი და საკანონმდებლო შტოების გაყოფა სხვადასხვა პოლიტიკურ ძალას შორის. სწორედ “სტაბილურობის” მოტივით ახსნა მეორე ტურში ერდოღანის კანდიდატურისადმი თავისი მხარდაჭერა სინან ოღანმა — ულტრანაციონალისტმა პოლიტიკოსმა და აწ უკვე ყოფილმა საპრეზიდენტო კანდიდატმა, რომელმაც პირველ ტურში 5%-ზე მეტი მიიღო. რეჯეფ თაიფ ერდოღანი და სინან ოღანი ოღანმა თავის მხარდამჭერებს მოუწოდა, მეორე ტურში ერდოღანს მისცენ ხმა და დასძინა, რომ ოპოზიციამ ვერ შეძლო, მომავლის დამაჯერებელი პერსპექტივა წარმოედგინა საზოგადოებისთვის. საერთაშორისო დამკვირვებელთა თქმით, მოქალაქეებს პირველ ტურში არჩევანის საშუალება ჰქონდათ, თუმცა თურქეთს არ შეუსრულებია ძირითადი პრინციპები დემოკრატიული არჩევნების ჩასატარებლად. ეუთო/ოდირის შეფასებით, “მოქმედი პრეზიდენტი და მმართველი პარტიები სარგებლობდნენ გაუმართლებელი უპირატესობით, მათ შორის, მიკერძოებული მედიაგაშუქებით”. უკანასკნელ წლებში პრეზიდენტმა ერდოღანმა არამხოლოდ გაიფართოვა ძალაუფლება, არამედ, გააძლიერა განსხვავებული აზრის დევნა, რომელიც შეეხო როგორც პოლიტიკურ სპექტრს, ისე მედიას, აკადემიურ სივრცესა და სასამართლოს. სხვადასხვა ბრალდებით, რომელთა შორისაა ტერორიზმთან კავშირი, ხელისუფლების დამხობის მცდელობა თუ პრეზიდენტის შეურაცხყოფა, ერდოღანის მრავალი კრიტიკოსი დაუკავებიათ და გაუსამართლებიათ. ოპოზიციის დაპირებაა, რომ გამარჯვების შემთხვევაში დემოკრატიულ რეფორმებს გაატარებს, თურქეთს საპრეზიდენტოდან საპარლამენტო სისტემაზე დააბრუნებს, უზრუნველყოფს მოქალაქეთა თავისუფლებების დაცვას და მეტად დაუახლოვდება დასავლეთის ბლოკს. ჩვეული ბრალდებები და მანიპულაციები რეჯეფ თაიფ ერდოღანის წინასაარჩევნო კამპანია მნიშვნელოვანწილად იყო აგებული ოპოზიციის დისკრედიტაციის მცდელობებზე. მეორე ტურის წინ აღნიშნული მცდელობები მხოლოდ გამწვავდა. უწინდელის მსგავსად, ერდოღანი ახლაც ცდილობს, მთავარი კონკურენტი დააკავშიროს “ქურთისტანის მუშათა პარტიასთან”(PKK), რომელიც ათწლეულების მანძილზე აწარმოებდა შეიარაღებულ ბრძოლას თურქეთში ქურთების ავტონომიისთვის. ის თურქეთს, აშშ-სა და ევროკავშირს ტერორისტულ ორგანიზაციად ჰყავთ გამოცხადებული. ერდოღანის ხელისუფლების მიერ ოპონენტების ტერორიზმთან კავშირში დადანაშაულება ახალი ფენომენი არ არის. ის ამას წარსულშიც აკეთებდა, განსაკუთრებით, თურქეთის მსხვილ პრო-ქურთულ პარტიასთან, “ხალხთა დემოკრატიულ პარტიასთან”(HDP) მიმართებით, რომლის ათასობით წევრიც ხსენებული და მსგავსი ბრალდებებით დააკავეს ბოლო წლებში. უკვე ახლა, როცა HDP ქემალ ქილიჩდაროღლუს კანდიდატურას უჭერს მხარს, ერდოღანმა გააძლიერა მტკიცება, რომ თავად ქილიჩდაროღლუც PKK-სგან იღებს მხარდაჭერას. ამ კონტექსტში მან რამდენიმე დღის წინ მანიპულაციური, დამონტაჟებული ვიდეოც უჩვენა მხარდამჭერებს. მეორე მხრივ, სოციალურ მედიაში ვრცელდება მრავალი ყალბი პოსტერი თურქეთის მთავარი ოპოზიციური პარტიის, “რესპუბლიკური სახალხო პარტიის”(CHP) სახელით, რომელსაც ქილიჩდაროღლუ თავმჯდომარეობს. ერთ-ერთზე წერია: “ჩვენთვის YPG ტერორისტული ორგანიზაცია არ არის!” YPG წარმოადგენს ქურთულ სამხედრო შენაერთს თურქეთის მეზობელ სირიაში, რომელსაც ანკარა PKK-სთან კავშირებს ედავება, ტერორისტულად აცხადებს და ებრძვის. ფაქტების გადამმოწმებელმა თურქულმა პლატფორმამ Teyit.org გამოიკვლია როგორც ეს, ისე სხვა მანიპულაციური პოსტერები და დაასკვნა, რომ ისინი არ წარმოადგენენ ქილიჩდაროღლუს პარტიის ოფიციალური კამპანიის ნაწილს. იმ ფონზე, რომ თურქეთის სახელმწიფო მედიის უდიდესი ნაწილი ხელისუფლების მკაცრ კონტროლს ექვემდებარება, რთული გამოსაცნობი არაა, როგორ და რა დოზით აშუქებს ის ოპოზიციის კამპანიას. ქემალ ქილიჩდაროღლუ. ფოტო: MAHMUT SERDAR ALAKUS/ANADOLU AGENCY/GETTY IMAGES თურქეთის კომუნიკაციების საბჭოს ოპოზიციონერი წევრების თანახმად, ქვეყნის საზოგადოებრივმა მაუწყებელმა პირველი აპრილიდან პირველ მაისამდე 32 საათი დაუთმო ერდოღანის სიტყვით გამოსვლების გაშუქებას, ქილიჩდაროღლუს კი — 32 წუთი. მეორე ტურის წინ ერთ-ერთმა პროსამთავრობო ტელევიზიამ საარჩევნო ბიულეტენი აჩვენა დიდ ეკრანზე, სადაც ედოღანის სახე და სახელი ჩანს, გვერდით კი, ქილიჩდაროღლუს ნაცვლად, დახატულია გრაფიკული ფიგურა, წარწერით — “სხვა კანდიდატი”. სახელმწიფო მედიის ამ პოლიტიკის პარალელურად, ქილიჩდაროღლუ ალტერნატიული პლატფორმებით ცდილობს საზოგადოებამდე თავისი სათქმელის მიტანას. 24 მაისს მან მონაწილეობა მიიღო ერთ-ერთი Youtube-არხის პროგრამაში, სადაც ახალგაზრდების კითხვებს უპასუხა. 4-საათიან ვიდეოს 25 მილიონზე მეტი ნახვა აქვს. პირველი ტურის შემდეგ, სიმშვიდით ცნობილი ოპოზიციონერი კანდიდატი უფრო მწვავეა ერდოღანის ბრალდებებზე პასუხისას. “შენ არ იყავი, ერთ მაგიდასთან რომ იჯექი ტერორისტულ ორგანიზაციებთან ერთად და დახურულ კარს მიღმა ფარულ გარიგებებს რომ აწარმოებდი [მათთან]? ყველა ჩემს მოქალაქეს ვუცხადებ, რომ არასდროს დავმჯდარვარ ტერორისტულ ორგანიზაციებთან ერთად და არც მომავალში გავაკეთებ ამას”, — საჯაროდ მიმართა ქილიჩდაროღლუმ ერდოღანს. ამ ფორმით მან მიანიშნა სამშვიდობო პროცესზე, რომელსაც თურქეთის ხელისუფლება ერდოღანის მმართველობის პირველ პერიოდში, 2015 წლამდე აწარმოებდა “ქურთისტანის მუშათა პარტიასთან”(PKK). მზარდი ნაციონალიზმი მშვიდი, ნაკლებად ხისტი რიტორიკით გამორჩეული ქილიჩდაროღლუ მრავალგზის აღიქმებოდა, როგორც რადიკალურად განსხვავებული პოლიტიკური ფიგურა ქარიზმატული ერდოღანისგან. მეორე ტურში ოპოზიციის კანდიდატის ტონი საგრძნობლად შეიცვალა, განსაკუთრებით, თურქეთში მცხოვრებ ლტოლვილებთან მიმართებაში. ოპოზიცია პირველი ტურის წინაც აცხადებდა, რომ გამარჯვების შემთხვევაში, სამშობლოში დააბრუნებდა თურქეთში მცხოვრებ რამდენიმე მილიონ სირიელ ლტოლვილს. თუმცა, თურქული ლირის გაუფასურების, ინფლაციისა და ფასების ზრდის ფონზე, წინასაარჩევნო გზავნილებში პირველი ტურის წინ მაინც ეკონომიკური გაჯანსაღების საკითხი დომინირებდა. შემდეგ იყო 14 მაისის არჩევნები, რომელშიც, ბევრისთვის მოულოდნელად, მესამე ადგილზე ულტრანაციონალისტი სინან ოღანი გავიდა. ამასთან, თურქეთის პარლამენტი, თავისი ახალი შემადგენლობით, უფრო ნაციონალისტურია, ვიდრე მანამდე. ამ ფონზე, საპრეზიდენტო კანდიდატები სხვადასხვა გზით ცდილობენ ნაციონალისტების გულის მოგებას. ქილიჩდაროღლუს სამიზნეც, პირველი ტურის დღეს სახლში დარჩენილი და გადაუწყვეტელი ამომრჩევლის გარდა, მოქმედი პრეზიდენტით უკმაყოფილო ნაციონალისტი ამომრჩეველია. ამის გამო, ლტოლვილების საკითხთან დაკავშირებით მისი განცხადებები უწინდელთან შედარებით გაცილებით მწვავეა. ოპოზიციონერის ეს ცდა უსაფუძვლო არ არის: ერთ-ერთი კვლევით, თურქების 80%-ს სურს, ლტოლვილები თავიანთ ქვეყანაში დაბრუნდნენ. ქილიჩდაროღლუ ამტკიცებს, რომ ერდოღანმა ქვეყანაში “განგებ შეიყვანა 10 მილიონი ლტოლვილი” და მოქმედი პრეზიდენტი “თურქეთის მოქალაქეობას ყიდის, რათა იმპორტული ხმები მიიღოს” არჩევნებზე. “მე გეუბნებით: ყველა ლტოლვილს სახლში გავუშვებ, როგორც კი პრეზიდენტი გავხდები. მორჩა”, — აღნიშნა მან და იქვე დასძინა, რომ თურქეთში კიდევ 10 მილიონი ლტოლვილი შევა, თუ ერდოღანი მოიგებს. საპასუხოდ, ერდოღანმა სიძულვილის ენაში დაადანაშაულა ქილიჩდაროღლუ და გაიმეორა, რომ ოპოზიციონერის გამარჯვება ტერორიზმის გამარჯვების ტოლფასი იქნება. სირიელი ბებია და შვილიშვილი თურქეთის ქალაქ გაზიანთეფში. ფოტო: Ozan Kose/AFP/Getty Images მოქმედი პრეზიდენტის თქმით, მისი ხელისუფლების პირობებში სირიელი ლტოლვილების სამშობლოში დაბრუნების პროცესი უკვე დაწყებულია და ეს გაგრძელდება. ორივე კანდიდატი ამბობს, რომ ამ მიზნით სირიის პრეზიდენტთან, ბაშარ ალ-ასადთან ურთიერთობების დალაგებას შეეცდებიან. თურქეთის მთავრობის მონაცემებით, ქვეყანაში დაახლოებით 3.7 მილიონი სირიელია დროებითი დაცვის ქვეშ, ავღანელი ლტოლვილების რიცხვი კი 300 000-ს შეადგენს. ქილიჩდაროღლუს არ უთქვამს, საიდან აქვს სტატისტიკა 10-მილიონი ლტოლვილის შესახებ. ლტოლვილების საწინააღმდეგო დისკურსის გაფართოების პარალელურად, ქილიჩდაროღლუს მეორე ტურში მხარი დაუჭირა ანტი-საიმიგრაციო განწყობებით ცნობილმა ულტრამემარჯვენე ძალამ, “გამარჯვების პარტიამ”(ZP), რომელმაც საპარლამენტო კენჭისყრაში 2.23% მიიღო. ხსენებული პარტია პირველ ტურში სინან ოღანს უჭერდა მხარს, თუმცა ამ უკანასკნელის მიერ მეორე ტურში ერდოღანისადმი მხარდაჭერის გამოცხადების შემდეგ, ZP-მ თქვა, რომ ოღანი მის პოზიციას არ გამოხატავს და საბოლოოდ, ქილიჩდაროღლუს კანდიდატურას მიემხრო. ქილიჩდაროღლუსა და “გამარჯვების პარტიას” შორის ახლად გაფორმებული შეთანხმების თანახმად, გამარჯვების შემთხვევაში ოპოზიციამ სირიელი ლტოლვილები 1 წლის ვადაში უნდა გაუშვას ქვეყნიდან და არა 2 წელიწადში, როგორც ეს მანამდე იყო ნათქვამი. პრეზიდენტობის კანდიდატი ამბობს, რომ ამას “საერთაშორისო კანონმდებლობის შესაბამისად” გააკეთებს. ქურთების ხმები საპრეზიდენტო კენჭისყრის როგორც პირველ, ისე მეორე ტურში, რეჯეფ თაიფ ერდოღანს მხარს უჭერს თურქეთის მმართველი პარტიის გარშემო გაერთიანებული “სახალხო ალიანსი”, რომელსაც ისლამისტური და ნაციონალისტური პარტიები აკომპლექტებენ. მათ 14 მაისის არჩევნებით საპარლამენტო უმრავლესობა მოიპოვეს. ქილიჩდაროღლუს ზურგს უმაგრებს უმსხვილესი ოპოზიციური ალიანსი (“ეროვნული ალიანსი”), რომელშიც შედიან როგორც მისი თავმჯდომარეობის ქვეშ მყოფი მემარცხენე-ცენტრისტული “რესპუბლიკური სახალხო პარტია”(CHP), ისე მემარჯვენე-ნაციონალისტური “კარგი პარტია”(IYI) და შედარებით მცირე ოთხი პოლიტიკური ძალა, მათ შორის, ლიბერალები და ისლამისტები. უმსხვილეს ოპოზიციურ ალიანსში პრო-ქურთული, მემარცხენე “ხალხთა დემოკრატიული პარტია”(HDP) არ შედის, თუმცა პირველ ტურში მან და მისმა მოკავშირეებმა ქილიჩდაროღლუს გამოუცხადეს მხარდაჭერა. შედეგად, ქილიჩდაროღლუმ მნიშვნელოვანი უპირატესობით მოიგო თურქეთის ქურთებით დასახლებული ის რეგიონები, სადაც HDP დიდი მხარდაჭერით სარგებლობს. თუმცა, მეორე ტურის წინ, როცა ქილიჩდაროღლუს ულტრამემარჯვენე “გამარჯვების პარტიამ”(ZP) დაუჭირა მხარი, ქურთების ხმების საკითხი უფრო ბუნდოვანი გახდა. HDP-სთან იდეურად შეუთავსებელ პარტიასთან ოპოზიციონერი კანდიდატის თანამშრომლობამ გააჩინა კითხვები, ხომ არ მოუწოდებდა პრო-ქურთული პარტია ამომრჩეველს, მეორე ტურში სახლში დარჩენილიყვნენ და ხმა არავისთვის მიეცათ. ეს ეჭვები გაამწვავა ქილიჩდაროღლუსა და ხსენებული ულტრამემარჯვენე პარტიის ლიდერს, უმით ოზდაღს შორის გაფორმებული შეთანხმების ზოგიერთმა პუნქტმაც. “ხალხთა დემოკრატიული პარტიის” მხარდამჭერები ქალაქ დიარბაქირში, ნოვრუზის დღესასწაულის აღსანიშნად გამართულ შეკრებაზე სკანდირებენ. ფოტო: EPA/SEDAT SUNA ერთ-ერთი პუნქტის თანახმად, ძალაში უნდა დარჩეს პრაქტიკა, რომლითაც ერდოღანის ხელისუფლებამ ბოლო წლებში ქურთულ რეგიონებში HDP-ს სახელით არჩეული ათეულობით მერი მოხსნა თანამდებობიდან “ტერორიზმთან დაკავშირებული” ბრალდებების გამო. ისინი ცენტრიდან დანიშნული პირებით ჩაანაცვლეს. თავად HDP ამ ბრალდებებს უარყოფს და დევნაზე საუბრობს. ქილიჩდაორღლუსა და ოზდაღის შეთანხმება ამბობს, რომ ეს პრაქტიკა უნდა გაგრძელდეს, იმ განსხვავებით, რომ თანამდებობის პირთა მოხსნისთვის არამხოლოდ გამოძიება, არამედ დადასტურებული ბრალდება იქნება საჭირო. საბოლოოდ, პრო-ქურთული პარტიისა და მისი მოკავშირეების პოზიციას ნათელი 25 მაისს მოეფინა. ანკარაში გამართული ბრიფინგიდან გაირკვა, რომ ქილიჩდაროღლუსადმი მათი მხარდაჭერა მეორე ტურშიც შენარჩუნდება. HDP-ს თანათავმჯდომარემ, ფერვინ ბულდანმა, კრიტიკულად ისაუბრა როგორც მერების მოხსნის პრაქტიკაზე, ისე “მიგრანტებისა და ლტოლვილების პოლიტიკური ინტერესების მასალად გადაქცევის” მიუღებლობაზე. თუმცა, ბულდანის სიტყვებით, მეორე ტურში ყველა უნდა წავიდეს არჩევნებზე, რათა შეცვალოს “ერთი კაცის რეჟიმი”. როგორია ოპოზიციის შანსები პირველ ტურში ქემალ ქილიჩდაროღლუმ დაახლოებით 2.5 მილიონი ხმით ნაკლები მოაგროვა თავის კონკურენტთან შედარებით. მესამე კანდიდატმა, სინან ოღანმა, რომელიც ამჟამად ერდოღანს უჭერს მხარს, 2.8 მილიონი ხმა მიიღო, ოღანის ყოფილმა მოკავშირემ, “გამარჯვების პარტიამ” კი, რომელიც ახლა ქილიჩდაროღლუს უჭერს მხარს, საპარლამენტო კენჭისყრაში 1.2 მილიონი ხმა დააგროვა. თურქეთის “ცესკოს” მონაცემებით თუ ვიმსჯელებთ, რომლის თანახმადაც ამომრჩეველთა აქტივობამ პირველ ტურში ლამის 90%-ს მიაღწია, გამოდის, რომ 8 მილიონი ამომრჩეველი სახლში დარჩა და ხმა არ მისცა. ბუნდოვანია, რამდენად გაამართლებს ოპოზიციონერი კანდიდატის მცდელობა, 28 მაისს ხელისუფლებისადმი კრიტიკული ნაციონალისტები და პირველ ტურში სახლში დარჩენილები მიიზიდოს. 14 მაისისგან განსხვავებით, მისთვის წინასაარჩევნო კვლევების შედეგებიც გაცილებით ნაკლებად დამაიმედებელია. თურქულმა საინფორმაციო სააგენტომ, Bianet-მა, გააერთიანა ბოლო 3 კვლევის შედეგი, რომელთაგან ორიც ქილიჩდაროღლუს მარცხზე მიანიშნებს მეორე ტურში, ერთი კი – გამარჯვებაზე. ავტორიტეტული კომპანია Konda, რომლის უწინდელი კვლევითაც პირველ ტურში ქილიჩდაროღლუს უნდა მოეგო, ახლა ოპოზიციონერის მარცხს პროგნოზირებს მეორე რაუნდში. netgazeti

Cannes 2023-ის გამარჯვებულები უკვე ცნობილია. რიგით 76-ე კინოფესტივალი 11 დღის განმავლობაში მიმდინარეობდა. ფესტივალის ჟიური, რომელსაც შვედი რეჟისორი, რუბენ ოსტლუნდი თავმჯდომარეობდა, მაროკოელი რეჟისორის, მერიამ ტუზანის, ფრანგი მსახიობი დენის მენოშეს, ბრიტანელ-ზამბიელი სცენარისტ და რეჟისორ რუნგანო ნიონის, ამერიკელი მსახიობების, ბრი ლარსონის და პოლ დანოს, ავღანელი ავტორის ატიკ რაჰიმის, არგენტინელი რეჟისორის, დამიენ სზიფრონის და ფრანგი რეჟისორის, ჯულია დუკარნაუს შემადგენლობით იყო დაკომპლექტებული. ოქროს პალმის რტო გადაეცა ჟუსტინ ტრიეს ფილმს – „დაცემის ანატომია” („Anatomy of a Fall”). (Photo by Patricia DE MELO MOREIRA / AFP) გრან პრის მფლობელი გახდა ჯონათან გლეიზერის ფილმი – „The Zone of interest”. Grand Prix winner : THE ZONE OF INTEREST de/by Jonathan GLAZER ჟიურის პრიზის მფლობელი გახდა აკი კაურისმაკი ფილმისთვის Fallen Leaves. საუკეთესო რეჟისურისთვის პრიზი მიიღო TRAN ANH Hùng-მა ფილმისთვის LA PASSION DE DODIN BOUFFANT. საუკეთესო სცენარისთვის კი დაჯილდოვდა „მონსტრი“ – კორე-ედა ჰიროკაძუ. საუკეთესო მსახიობების ჯილდო მიიღეს მერვე დიზდარმა (ნური ბილგე ჯეილანის KURU OTLAR USTUNE-ში) და კოჯი იაკუშომ (ვიმ ვენდერსის „იდეალური დღეები“). (Photo by Kristy Sparow/Getty Images) publika

საქართველოს ბაზარზე ოპერირება თურქულ-გერმანულმა ავიაკომპანია SunExpress-მა დაიწყო. ამის შესახებ ინფორმაციას საქართველოს აეროპორტების გაერთიანება ავრცელებს. მათივე ცნობით, ავიაკომპანიამ თბილისის საერთაშორისო აეროპორტში ანტალიიდან ბოინგ 737-800-ით პირველი რეგულარული რეისი გამთენიისას შეასრულა და 135 მგზავრი ჩამოიყვანა. აეროპორტების გაერთიანების ინფორმაციით, 2-წლიანი მოლაპარაკებების პროცესი საქართველოს აეროპორტების გაერთიანებამ ავიაკომპანიასთან წარმატებით დაასრულა. Sun Express-ი თბილისის საერთაშორისო აეროპორტში ერთდროულად თურქეთის სამი ქალაქიდან: დედაქალაქ ანკარადან, ანტალიიდან და იზმირიდან კვირაში 5 სიხშირით იფრენს. საქართველოს აეროპორტების გაერთიანების ბიზნესგანვითარების მენეჯერის, ვაკო ჭილაშვილის განცხადებით, ახალი ავიაკომპანია ბაზარზე კონკურენციას კიდევ უფრო გაზრდის. ,,თბილისის საერთაშორისო აეროპორტში ანტალიიდან ავიაკომპანია Sun Express-მა პირველი რეგულარული რეისი განახორციელა. ავიაკომპანია თბილისის მიმართულებით ანტალიიდან და იზმირიდან კვირაში ორჯერ, ხოლო დედაქალაქ ანკარადან კვირაში 1 სიხშირით იფრენს. ჩვენ მოლაპარაკებებს ავიაკომპანიასთან 2 წელზე მეტი ვაწარმოებდით და მათი მხრიდან დადებითი გადაწყვეტილება ოპერირების დაწყებასთან დაკავშირებით რამდენიმე თვის წინ იქნა მიღებული. იმედი გვაქვს, რომ ისეთი ახალი ავიაკომპანიის შემოსვლა, როგორიც Sun Express-ია კიდევ უფრო გაზრდის საქართველოს ავიაბაზარზე კონკურენციას, რაც თავის მხრივ, ხელს შეუწყობს საქართველო-თურქეთს შორის ტურიზმის განვითარებას“, -განაცხადა ვაკო ჭილაშვილმა. ცნობისთვის, SunExpress-ი 33 წლის წინ ანტალიაში დაფუძნებული ავიაკომპანიაა და იზმირისა და ანტალიის ძირითად ავაიგადამზიდავს წარმოადგენს. ის გახდა პირველი კერძო ავიაკომპანია, რომელმაც 2001 წელს მომხმარებლებს თურქეთსა და გერმანიას შორის პირდაპირი რეგულარული ფრენები შესთავაზა. SKYTRAX-ის მიხედვით, SunExpress 2022 წლის საუკეთესო ტურისტულ ავიაკომპანიად დასახელდა. ipn

თურქეთის მოქალაქეებს არჩევანის გაკეთება პრეზიდენტ რეჯეფ თაიფ ერდოღანსა და მთავარ ოპოზიციურ კანდიდატს, ქემალ ქილიჩდაროღლუს შორის მოუწევთ. ხმის მისაცემად 64. 1 მილიონზე მეტი ადამიანია რეგისტრირებული. თურქული მედიის ცნობით, საპრეზიდენტო არჩევნების მეორე ტური ქვეყნის ისტორიაში პირველად იმართება. შეგახსენებთ, თურქეთში, საპრეზიდენტო არჩევნების პირველი ტური 14 მაისს გაიმართა, რა დროსაც რეჯეფ თაიფ ერდოღანმა ხმების 49,52 პროცენტი მიიღო, მისმა მთავარმა კონკურენტმა ქემალ ქილიჩდაროღლუმ კი ხმების 44,88 პროცენტი. ნაციონალისტმა კანდიდატმა, სინან ოგანმა პირველ ტურში მესამე ადგილი დაიკავა და ხმების 5.17 პროცენტი მიიღო. მან რამდენიმე დღის წინ განაცხადა, რომ არჩევნების მეორე ტურში მხარს მოქმედ პრეზიდენტს, რეჯეფ თაიფ ერდოღანს დაუჭერს. IPN

დღეს გამთენიისას, რუსულმა ძალებმა უკრაინაზე ირანული წარმოების Shahed-136/131-ის დრონებით იერიში მიიტანა. მედიის ცნობით, თავდასხმა რუსეთის ბრიანსკისა და კრასნოდარის რეგიონებიდან განხორციელდა. უკრაინის საჰაერო ძალების განცხადებით, რუსმა სამხედროებმა 54 უპილოტო საფრენი აპარატი გაუშვეს, რაც რეკორდული რაოდენობაა. უკრაინული მხარის ცნობითვე, რუსებმა შეტევა განახორციელეს ქვეყნის ცენტრალურ რეგიონებში, განსაკუთრებით კიევის რეგიონში, არსებულ სამხედრო ობიექტებსა და კრიტიკულ ინფრასტრუქტურაზე. უკრაინულმა ძალებმა 52 Shahed-136/131-ის დრონის ჩამოგდება მოახერხეს. IPN

გერმანიაში უკრაინელმა სამხედროებმა ამერიკული „აბრამსის“ ტიპის ტანკებზე მომზადება დაიწყეს. ინფორმაციას „ნიუ იორკ თაიმსი“ პენტაგონის წარმომადგენლებზე დაყრდნობით ავრცელებს. წვრთნებში სულ 400 უკრაინელი ჯარისკაცი და 31 ტანკი მონაწილეობს. სწავლება ითვალისწინებს ტანკის ტარების სწავლას, მანევრირებას და ტექნიკურ მომსახურებას. როგორც ამერიკული გამოცემა წერს, სწავლება 10-დან 12 კვირამდე გაგრძელდება, ხოლო „აბრამსის“ ტანკები უკრაინის საბრძოლო ველებზე შეიძლება შემოდგომისთვის გამოჩნდეს. აშშ-ის მაღალჩინოსნების განცხადებით, M1A1 „აბრამსის“ ტიპის ტანკების კიდევ ერთი პარტია უკრაინას შემოდგომისთვის მიეწოდება. 1ტვ

წალკაში ტექნიკური მატარებელი ლიანდაგებიდან გადავიდა, რის შედეგადაც ტექნიკური ჯგუფის ერთი წევრი დაიღუპა, 4 კი დაშავდა. შემთხვევა გუშინ მოხდა. როგორც შინაგან საქმეთა სამინისტროში აცხადებენ, მომხდარზე გამოძიება სისხლის სამართლის კოდექსის 275-ე მუხლით დაიწყო, რაც რკინიგზის ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს. publika

პუტინის ყველა სიტყვაზე ხომ არ შეიძლება მოვითხოვოთ პასუხი?! - ქართული მხარის დაინტერესება რომ არ იყოს, თავის თანამემამულეებს უკეთესი პირობა შეუქმნას, რა საკვირველია, არც ფრენების აღდგენა მოხდებოდა და მოხდებოდა ის, რასაც ჰქვია ეკონომიკური სანქციებით კონფრონტაცია, რაც საქართველოს დაანგრევს, - ამის შესახებ პარლამენტის ვიცე-სპიკერმა გია ვოლსკის რუსეთის პრეზიდენტის ვლადიმერ პუტინის განცხადების შეფასებისას აღნიშნა, რომლის თქმითაც, საქართველოს მოქალაქეებისთვის სავიზო რეჟიმის გაუქმებისა და პირდაპირი ფრენების საკითხი ქართულ მხარეს არაერთხელ წამოუწევია. ამასთან, ვოლსკიმ განმარტა, რომ რუსეთმა თავად მიიღო, როგორც პირდაპირი ფრენების შეწყვეტა წლების წინ, ასევე ახლა ფრენების აღდგენის შესახებ გადაწყვეტილება. „ოპონენტები, ამ შემთხვევაში ძალიან ცუდად იქცევიან, მით უმეტეს მაშინ, როდესაც პერიოდულად რუსეთიდან რაღაც ინფორმაცია შემოდის, რაღაც განმარტებები შემოდის და ოპოზიციასთან, პრაქტიკულად, მათ ინტერესებთან, თანხვედრაში ხდება ხშირად განცხადებების გაკეთება, მათ შორის, რუსეთის ფედერაციიდან. დაპირისპირების გაღრმავება ჩვენს ინტერესებში არ არის, რადგან საფრთხეები მართლაც რეალურია. რაც შეეხება გადაწყვეტილებას, რუსეთმა მიიღო გადაწყვეტილება ფრენების შეწყვეტაზე, რუსეთმა მიიღო გადაწყვეტილება ფრენების აღდგენაზე და როდესაც ჩვენ ვაძლევთ ტექნიკურ დოკუმენტაციას, ეს თანხმობას ნიშნავს, როდესაც არ აძლევ ტექნიკურ დოკუმენტაციას, ეს ნიშნავს სანქციის გამოცხადებას, რასაც საპირისპირო სანქციები მოჰყვება. ასე რომ გახსოვდეთ, არსებობს ქვეყნების ინტერესები, ჩვენი ქვეყნის ინტერესი, რუსეთსაც გააჩნია გარკვეული ინტერესები შავი კატების გამოშვების, ასე რომ ყურადღებით იყავით ყველა და რეალურად ვიმოქმედოთ ისე, როგორც ჩვენს ქვეყანას სჭირდება“,- განაცხადა ვოლსკიმ. იპნ

გელათის ტაძრის მთავარ პრობლემას კედლის მხატვრობის მძიმე, დაზიანებული მდგომარეობა წარმოადგენს. ჩვენ მოვიწვიეთ მსოფლიოში აღიარებული სპეციალისტები - ბატონი სტივენ რიკერბი და ქალბატონი ლიზა შეკედე, რომლებიც საქართველოში 10 ივლისს ჩამოდიან. ისინი მეცნიერულად შეისწავლიან არსებულ ვითარებას და მოგვცემენ პირველ რეკომენდაციებს, თუ როგორი საკონსერვაციო მიდგომებით გვმართებს მოქმედება, - ამის შესახებ საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი) გელათის სარეაბილიტაციო პროცესის პრეზენტაციაზე სიტყვით გამოსვლისას განაცხადა. მეუფე შიოს განმარტებით, იუნესკოს მთავარი და უცვლელი რეკომენდაცია არის გელათის ღვთისმშობლის შობის ტაძრის, დაუყოვნებლივ, მთლიანი დამცავი დროებითი გადახურვის ქვეშ მოქცევა, რამაც კედლის მხატვრობის გადარჩენაში ერთ-ერთი გადამწყვეტი როლი უნდა შეასრულოს „თქვენო აღმატებულებავ, ბატონო პრემიერ-მინისტრო, ყოვლად უსამღვდელოესო მეუფენო, დიპლომატიური კორპუსის წარმომადგენლებო, ღირსნო მამანო, ქალბატონებო და ბატონებო, ჩვენო ძვირფასო მეცნიერებო, მოგესალმებით და მადლობას გიხდით მობრძანებისათვის. დღეს გვინდა გაგაცნოთ გელათის სამონასტრო კომპლექსის რეაბილიტაციასთან დაკავშირებული ვითარება, საქართველოს საპატრიარქოს მიერ საწყის ეტაპზე (ამ მიმართულებით) შესრულებული სამუშაოები და ასევე ჩვენი სამომავლო ხედვა და გეგმები. მოგეხსენებათ, რომ პრობლემის სირთულიდან გამომდინარე, კათოლიკოს-პატრიარქ ილია II-ის ლოცვა-კურთხევით, სახელმწიფოსა და ეკლესიის მიერ ერთობლივად შემუშავდა თანამშრომლობის უნიკალური ფორმატი, რომლის ფარგლებშიც გელათის რეაბილიტაციის პროცესს წარმართავს საქართველოს საპატრიარქო, სახელმწიფოსთან ერთად, პირადად საქართველოს პრემიერ-მინისტრის, ბატონ ირაკლი ღარიბაშვილის თანადგომით და ჩართულობით. ამ მიზნით მიმდინარე წლის 6 აპრილს საქართველოს საპატრიარქოსა და საქართველოს კულტურული მემკვიდრეობის დაცვის ეროვნულ სააგენტოს შორის დაიდო ხელშეკრულება“, - აღნიშნა მეუფე შიომ. საპატრიარქო ტახტის მოსაყდრემ პრემიერ-მინისტრს, გელათის გადარჩენის საქმისადმი გამოვლენილი გულისხმიერებისთვის, კათოლიკოს-პატრიარქ ილია II-ის სახელით მადლობა გადაუხადა. „ჩვენთვის ერთ-ერთ მთავარ ამოცანას წარმოადგენდა მსოფლიო მემკვიდრეობის ცენტრის - იუნესკოს მიერ მოცემული რეკომენდაციების შესრულება, რისთვისაც, ამ არასრული ორი თვის განმავლობაში, საპატრიარქოს მიერ შესრულდა საწყისი ეტაპისთვის აუცილებელი შემდეგი სამუშაოები: 1.იუნესკოს რეკომენდაციის თანახმად, საქართველოს საპატრიარქომ დააფუძნა გელათის რეაბილიტაციის დროებითი კომიტეტი. საკონსერვაციო სამუშაოების მაღალი სამეცნიერო სტანდარტით შესრულებისათვის, კომიტეტის სტრუქტურაში შეიქმნა საერთაშორისო და ადგილობრივ მეცნიერთა საბჭოები. საერთაშორისო მრჩეველთა საბჭოში მოვიწვიეთ მსოფლიოში აღიარებული უცხოელი სპეციალისტები, ხოლო ადგილობრივი სამეცნიერო საბჭო დაკომპლექტდა კულტურული მემკვიდრეობის დარგში მოღვაწე ქართველი მეცნიერებით. 2.იუნესკოს მთავარი და უცვლელი რეკომენდაცია არის გელათის ღვთისმშობლის შობის ტაძრის, დაუყოვნებლივ, მთლიანი დამცავი დროებითი გადახურვის ქვეშ მოქცევა, რამაც კედლის მხატვრობის გადარჩენაში ერთ-ერთი გადამწყვეტი როლი უნდა შეასრულოს. ამის განსახორციელებლად, ჩვენ მოლაპარაკება ვაწარმოეთ გერმანულ კომპანია „ლეიერთან“, რომელიც მსგავსი სამუშაოების შესრულებაში ამჟამად მოწინავეა მსოფლიოში. აღნიშნულმა კომპანიამ უკვე დაიწყო დროებითი გადახურვის პროექტზე მუშაობა და მათი მოთხოვნით, ჩვენი მხრიდან მათთან თანამშრომლობისთვის შეირჩა კვალიფიციური არქიტექტორ-ინჟინერი. 3.მოგეხსენებათ, რომ გელათის ტაძრის მთავარ პრობლემას კედლის მხატვრობის მძიმე, დაზიანებული მდგომარეობა წარმოადგენს. ჩვენ მოვიწვიეთ მსოფლიოში აღიარებული სპეციალისტები: ბატონი სტივენ რიკერბი და ქალბატონი ლიზა შეკედე, რომლებიც საქართველოში 10 ივლისს ჩამოდიან. ისინი მეცნიერულად შეისწავლიან არსებულ ვითარებას და მოგვცემენ პირველ რეკომენდაციებს, თუ როგორი საკონსერვაციო მიდგომებით გვმართებს მოქმედება. 4.ასევე მსოფლიო მემკვიდრეობის ცენტრის - იუნესკოს მოთხოვნის თანახმად, ჩვენი ადგილობრივი, მაღალკვალიფიციური სპეციალისტების მიერ, შეიქმნა გელათის ტაძრის ჩრდილოეთ, სამხრეთ და დასავლეთ მკლავების კამარებისა და აფრების გრაფიკული სქემები და ზუსტი აღწერა-დოკუმენტაცია. ეს პროცესი, როგორც მთელი ტაძრის სივრცეზე, ასევე წმინდა გიორგის ტაძრის მხატვრობაზეც განხორციელდება. 5.იუნესკოს კიდევ ერთი რეკომენდაციის შესასრულებლად, აღმოსავლეთ მკლავში მოეწყო უსაფრთხო-ინვენტარული ხარაჩო, რაც სპეციალისტებს საშუალებას მისცემს დაათვალიერონ და მეცნიერულად შეისწავლონ საკურთხევლის აფსიდის უნიკალური მოზაიკა, რომელიც პირველადი შეფასებით, აშკარად საჭიროებს საკონსერვაციო მიდგომებს. ასეთი ტიპის უსაფრთხო ხარაჩო, ხანგრძლივი დროით უზრუნველყოფს სპეციალისტების მუშაობას საკურთხევლის აფსიდში. 6.ზემოთ ჩამოთვლილის გარდა, საქართველოს საპატრიარქომ მოლაპარაკებები წარმატებით დაასრულა მსოფლიოში აღიარებულ ორგანიზაცია - „სტუდიო პროჯეტაციონე ე კონტროლთან”. ეს კომპანია მოწვეულია გელათის კონსტრუქციული, სეისმური და სტრუქტურული კვლევისა და სამუშაოების შესასრულებლად. კომპანიის დირექტორი - ბატონი ალესანდრო ბოცეტტი და მთავარი სპეციალისტი - ბატონი კრისტიანო რუსსო, გელათში 1-ელ ივნისს ჩამოვლენ. აღსანიშნავია, რომ ეს კომპანია ამჟამად რომის კოლისეუმის სტრუქტურული კვლევისა და გამაგრების სამუშაოებს აწარმოებს”, - განაცხადა მეუფე შიომ. მისი განმარტებით, გელათის აღდგენის პროცესი იქნება გამჭვირვალე და ინფორმაცია მიმდინარე სამუშაოების შესახებ საზოგადოებას მედიისა და ინტერნეტპლატფორმის საშუალებით მიეწოდება. „გელათის სამონასტრო კომპლექსი განსაკუთრებით ძვირფასია საქართველოს თითოეული მოქალაქისთვის. როგორც თავისი სულიერი მნიშვნელობით, ისევე კულტურული მემკვიდრეობის თვალსაზრისით, იგი სრულიად გამორჩეული ძეგლია ჩვენი ერისათვის. მოგეხსენებათ, რომ გელათი - სხუა ათინად და მეორე იერუსალიმად იწოდებოდა. ეს არის სულიერებისა და მეცნიერების შეხვედრის ადგილი და ქართული სახელმწიფოს ძლიერების სიმბოლო. გელათი არის სახელმწიფოსა და ეკლესიის ერთობის დიადი გამოხატულება, რაც იყო ჩვენი დიდი მეფის, წმინდა დავით აღმაშენებლის გზაც და ანდერძიც. სასიხარულოა, რომ დღესაც, ჩვენს თანამედროვე ეპოქაში, ვხედავთ სახელმწიფოსა და ეკლესიას შორის ისეთი კავშირის გამოვლინებას, რომელიც ზრუნავს ჩვენი ერის სულიერი და კულტურული მემკვიდრეობის გადარჩენისთვის. კიდევ ერთხელ მადლობას გიხდით მობრძანებისთვის. ღმერთმა დალოცოს ამ საქმის ყველა შემწე და მონაწილე!“- განაცხადა მეუფე შიომ. იპნ

უკრაინის პრეზიდენტმა, ვოლოდიმირ ზელენსკიმ 200-ზე მეტ რუსულ და ბელარუსულ კომპანიას სანქციები დაუწესა. ზელენსკის განკარგულების თანახმად, სანქციები რუსეთის 51 მოქალაქეს, მათ შორის მეცნიერებსა და ქარხნების გენერალურ დირექტორებს, ასევე რუსეთთან დაკავშირებულ 220 იურიდიულ პირს დაუწესდა. სანქციების სიაში შედის რუსული კომპანია "მობილური ტელესისტემებისა" და „რუსეთის რკინიგზის“ სტრუქტურები, ასევე ბელარუსული კომპანიები, მათ შორის მინსკის საავტომობილო ქარხანა, მინსკის მექანიკური ქარხანა, ვიტებსკის რადიო კომპონენტების ქარხანა „მონოლითი“, ორშას თვითმფრინავების სარემონტო ქარხანა. იპნ

უკრაინელებმა ომის დაწყების შემდეგ რუსეთის 206 200-მდე ჯარისკაცის ლიკვიდაცია განახორციელეს, მათ შორის რუსებმა 480 ჯარისკაცი ბოლო დღე-ღამის განმავლობაში დაკარგეს, - ამის შესახებ ინფორმაციას უკრაინის შეიარაღებული ძალების გენერალური შტაბი ავრცელებს. ამასთან, უკრაინაში შეჭრის დღიდან რუსების საერთო დანაკარგები მოიცავს: 3 799 ტანკს, 7 442 ჯავშანტექნიკას, 3 406 ერთეულ საარტილერიო სისტემას, 310 საბრძოლო თვითმფრინავს და 296 ვერტმფრენს, 6 172 ავტომობილსა და საწვავის ავზს, 18 გემს/ნავს, 2 941 უპილოტო საფრენ აპარატს, 449 ერთეულ სპეცტექნიკას და 1025 ფრთოსან რაკეტას. იპნ

ბოლო 9-10 თვეში საქართველოში ოფიციალურად რუსეთის 1052 მოქალაქე დასაქმდა. ამის შესახებ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მიერ პარლამენტის დეპუტატის თამარ კორძაიას სადეპუტატო კითხვის პასუხად გაგზავნილი მონაცემებიდან ირკვევა. კერძოდ, დეპუტატის კითხვის პასუხად გაგზავნილი მონაცემების თანახმად, საქართველოში 2022 წლის აგვისტოდან დღემდე (პასუხი დათარიღებულია 24 მაისით, კითხვები გაგზავნილია 26 აპრილს) ადგილობრივი დამსაქმებლის მიერ დასაქმებულია ჯამში უცხო ქვეყნის 1 646 მოქალაქე, აქედან 1 052 დასაქმებული ანუ 63.9% არის რუსეთის ფედერაციის მოქალაქე. ავტორი: თაია არდოტელი

საქართველოს შინაგან საქმეთა სამინისტრო გეგმავს ქვეყანაში უსაფრთხო ტურისტული გარემოს შესახებ ვიდეორგოლის დამზადებას. ამ მომსახურების შესყიდვას სახელმწიფო უწყება ტენდერის გარეშე აპირებს და გათვლილი აქვს 159 777 ლარი. შესყიდვების სააგენტომ თანხმობა უკვე გასცა - უწყების ვებგვერდზე წერია, რომ ამ რგოლის დასამზადებლად 10 დღე საკმარისია. "გადაღების სპეციფიკიდან გამომდინარე (სცენების უმეტესობა არის ღია ცისქვეშ), დიდი მნიშვნელობა ენიჭება მომსახურება განხორციელდეს კარგ მეტეოროლოგიურ პირობებში, რის გამოც კიდევ უფრო დიდ მნიშვნელობას იძენს, მომსახურების შესყიდვა მოხდეს მაქსიმალურად შემჭიდროვებულ ვადებში, ზაფხულის სეზონის დადგომამდე, ეს გარემოება კი შეუძლებელს ხდის შესყიდვა ჩატარდეს ელექტრონული ტენდერის საშუალებით, მისი ჩატარებისთვის საჭირო ვადების გათვალისწინებით", - ასე დაასაბუთეს შინაგან საქმეთა სამინისტროში ტენდერის გარეშე მომსახურების შეძენის გადაწყვეტილება. ვიდეორგოლი, რომელიც არანაკლებ 60-წამიანი უნდა იყოს, უნდა განთავსდეს სატელევიზიო ეთერებსა და სოციალურ ქსელებში. შესყიდვების სააგენტოსთვის მიწოდებულ ინფორმაციაში ასევე წერია, რომ ვიდეორგოლის მიზანია ტურიზმის უსაფრთხოების ნაწილში შინაგან საქმეთა სამინისტროს თანამშრომლების წვლილის წარმოჩენა. "შსს ეკონომიკურ დეპარტამენტში წარმოდგენილია შსს სტრატეგიული კომუნიკაციების დეპარტამენტის 2023 წლის 17 მაისის სამსახურებრივი ბარათი საიდანაც დგინდება, რომ საზოგადოების მხარდაჭერის მოპოვება, პოლიციელთა მიმართ ნდობისა და პატივისცემის ზრდა მეტწილად დამოკიდებულია საზოგადოებასთან ეფექტურ კომუნიკაციაზე. მნიშვნელოვანია, საზოგადოებამ აღიქვას მკაფიო კორელაცია საპოლიციო საქმიანობასა და უსაფრთხო გარემოს ჩამოყალიბებას შორის", - წერია 2023 წლის 17 მაისით გამოცემულ სამსახურებრივ პატაკში. radiotavisupleba

უკრაინაში, დნიპროში სამედიცინო დაწესებულებაზე რუსული სარაკეტო თავდასხმის შედეგად დაშავებულთა რაოდენობა 32-მდე გაიზარდა. დნიპროპეტროვსკის რეგიონული სამხედრო ადმინისტრაციის ხელმძღვანელის სერჰი ლისაკის თქმით, ჯერ კიდევ ეძებენ 3 ადამიანს, რომელიც იმ დროს კლინიკაში უნდა ყოფილიყვნენ. აფეთქების ადგილას ადამიანის სხეულის ნაწილებიც იპოვეს. თავდასხმის შედეგად მინიმუმ ორი ადამიანი დაიღუპა. დაშავებულებს შორის არიან ექიმები და მოქალაქეები, მათ შორის ბავშვები. ლისაკის ინფორმაციით, 13 დაშავებული საავადმყოფოში რჩება, 5 მათგანის მდგომარეობა მძიმეა. უკრაინის ხელისუფლების განცხადებით, რუსეთმა დნიპროში სამოქალაქო ობიექტებს ბალისტიკური რაკეტა ესროლა. სამედიცინო დაწესებულების ნაწილი დაინგრა, დაზიანდა მის ირგვლივ მდებარე ათობით შენობა, ცეცხლი გაჩნდა ვეტერინარულ კლინიკაშიც. კიევში აცხადებენ, რომ რუსულმა არმიამ მშვიდობიანი მოქალაქეები კიდევ ერთხელ დაბობმა გამიზნულად და მორიგი დანაშაული ჩაიდინა. დნიპროში 27 მაისი გლოვის დღედ გამოცხადდა. publika

26 მაისის აღსანიშნავად უკრაინის მართლმადიდებელი ეკლესიის (არ ექვემდებარება მოსკოვის საპატრიარქოს) წინამძღოლმა და უმაღლესმა იერარქმა ეპიფანემ “ქართული ლეგიონის” მეთაური მამუკა მამულაშვილი წმინდა გიორგის ორდენით დააჯილდოვა. ამის შესახებ ინფორმაციას “ქართული ლეგიონი” ავრცელებს. “ქართული ლეგიონი” უკრაინის არმიაში შემავალი უცხოელთა ყველაზე დიდი დანაყოფია. მამუკა მამულაშვილის ინფორმაციით, ლეგიონში 30-ზე მეტი ქვეყნის 1000-მდე მებრძოლი ერთიანდება. netgazeti

საქართველოს პრეზიდენტმა სალომე ზურაბიშვილმა საქართველოს თავდაცვის მინისტრი ჯუანშერ ბურჭულაძე დღეს, 27 მაისს, მწვავედ გააკრიტიკა 26 მაისს, დამოუკიდებლობის დღეს მომხდარის გამო. პრეზიდენტის თქმით, მას პრეტენზია აქვს ინსტიტუციების უპატივცემულობასთან დაკავშირებით და არა პერსონალური მიზეზის გამო. დიასპორის ფორუმს ესწრება პრემიერმინისტრი ირაკლი ღარიბაშვილიც, რომელსაც, მათ შორის, მიემართებოდა პრეზიდენტის კრიტიკა. პრეზიდენტის თქმით, სწორედ გამართული პროტოკოლია იმის გარანტი, რომ პატარა ქვეყნები ღირსეულად იყვნენ წარმოჩენილი საგარეო ურთიერთობებში. პრეზეიდენტის გამოსვლის შემდეგ ტრიბუნა პრემიერმა ირაკლი ღარიბაშვილმა დაიკავა, რომელმაც თქვა, რომ 26 მაისი არის დღე, „რომელიც ყველას გვაერთიანებს“. მან მადლობა გადაუხადა მთავრობის პროტოკოლის უფროსს კვალიფიციური მუშაობისთვის. პრეზიდენტ სალომე ზურაბიშვილის 26 მაისის მიმართვის მთავარი ხაზი „ქართული ოცნების“ ხელისუფლების ანტიდასავლური პოლიტიკის კრიტიკა იყო, რასაც დამოუკიდებლობის დღის ღონისძიების ზოგი სტუმრის მხრიდან შეძახილები მოჰყვა. netgazeti

ბახმუტის მიმართულებით შეიმჩნევა მტრის აქტივობის დინამიკის დაქვეითება, ხოლო „ვაგნერის“ ხელმძღვანელის, ევგენი პრიგოჟინის განცხადება ბახმუტიდან დაქირავებული ჯარისკაცების გაყვანის შესახებ, „ლატენტურ კაპიტულაციას“ ნიშნავს. ამის შესახებ უკრაინის შეიარაღებული ძალების აღმოსავლეთ სარდლობის სპიკერმა, სერჰი ჩერევატიმ განაცხადა. „პრიგოჟინის ეს განცხადებები, მისი ჯგუფის ლატენტური კაპიტულაციაა", - აღნიშნა ჩერევატიმ. მისივე თქმით, პრიგოჟინი ცდილობს გადაარჩინოს „ვაგნერის“ ნარჩენები, რადგან ესმის, რომ ბახმუტის მიმართულებით რამდენიმე კვირიანმა ბრძოლამ შეიძლება მისი ორგანიზაციის არსებობა შეწყვიტოს. „ძალიან სასაცილოდ ჟღერდა განცხადება იმასთან დაკავშირებით, რომ ის „მსოფლიოს ნომერ პირველი არმიაა“. სირიაში, როდესაც „ვაგნერელებს“ დაუპირისპირდნენ არა დაუცველი სირიელები, არამედ აშშ-ის შეიარაღებული ძალები, მათი დიდი ნაწილი ერთ საათში განადგურდა. 2 თვეზე მეტი ხნის წინ ვიწინასწარმეტყველეთ, რომ თუ დანაკარგების ასეთი დინამიკა გაგრძელდებოდა, მტერი ვერ გამონახავდა პერსონალის შევსების წყაროს და დამარცხდებოდა, რაც ახლა ხდება“, - აღნიშნა ჩერევატიმ. ipn

უკრაინის შეიარაღებული ძალების მთავარსარდალმა, ვალერი ზალუჟნიმ გამოაქვეყნა ვიდეო, რომელიც კონტრშეტევის დაწყებაზე მიანიშნებს, - ინფორმაციას უკრაინული მედია ავრცელებს. მათივე ინფორმაციით, ვიდეო მთავარსარდლის ტელეგრამის არხზე გამოჩნდა. კადრებში ჩანს, რომ უკრაინელი ჯარისკაცები ბრძოლისთვის ემზადებიან. „დროა, დავიბრუნო ის, რაც ჩვენია“, - აცხადებს ზალუჟნი. უკრაინული მედია წერს, რომ შეიარაღებული ძალების მოსალოდნელი კონტრშეტევის ფონზე, ზალუჟნის ეს განცხადება შესაძლოა მის დასაწყისს მიანიშნებდეს. ipn

ეს არის პირველი უაზრო დაპირისპირების საგანი. დიდი ხანია ამ ქვეყანაში არაფერი მწყინს და ამით ვერავინ მაწყენინებს, მაგრამ ეს არ არის პრეზიდენტის შეურაცხყოფა, პროტოკოლის დარღვევაა... იწყება გაუთავებელი - „მე პირველი ვარ, შენ მეორე“, - ამის შესახებ საქართველოს პრეზიდენტმა სალომე ზურაბიშვილმა საგარეო საქმეთა სამინისტროში, დიასპორის ფორუმზე განაცხადა. როგორც სალომე ზურაბიშვილმა აღნიშნა, პრეზიდენტს დიასპორის ფორუმზე, სკამი პროტოკოლის დარღვევით დაუდგეს. „მინდა, დავიწყო პატარა რაკურსით. რადგანაც ვიმყოფებით ამ არაჩვეულებრივ, განახლებულ შენობაში, სადაც დღეს საგარეომ დაიმკვიდრა ადგილი და ეს საგარეოს მიერ არის ორგანიზებული, არ შეიძლება რომ არ ვთქვა, თუ რა მნიშვნელობა აქვს პროტოკოლს. ეს არ არის „მე ასე მინდა, სკამი იქ დამიდე, ან გადადექი, ჩაიჩოჩე, ჩამოიჩოჩე“ და ეს არ არის პრეზიდენტის შეურაცხყოფა, ეს არის პროტოკოლის დარღვევა და პროტოკოლი არის სხვა რამე კი არა, სახელმწიფოს საყრდენი. თუ არა, იწყება გაუთავებელი - „მე პირველი ვარ, შენ მეორე“. ეს არის პირველი უაზრო დაპირისპირების საგანი. მე დიდი ხანია ამ ქვეყანაში არაფერი მწყინს და ამით ვერავინ მაწყენინებს, მაგრამ მე ამ ადგილს დავტოვებ, სხვა მოვა და ეს ადგილი არის პრეზიდენტის. არ შეიძლება რომ 26 მაისს თავდაცვის მინისტრი ჯერ პრემიერს მიესალმოს და მერე პრეზიდენტს, უმაღლეს მთავარსარდალს, არ შეიძლება, არცერთ ქვეყანაში! ეს ყველგან იწვევს გაკვირვებას. კიდევ ერთ რამეს ვიტყვი, რომ პროტოკოლი არამხოლოდ შიგნით არის სახელმწიფოს დაცვა და ჩვენი ურთიერთობების დალაგება ისე, რომ არაფერი მოხდეს. აზრების როგორი განსხვავებაც არ უნდა იყო ყველას თავისი ადგილი ჰქონდეს და ეს იყოს წყნარად, მშვიდად დამკვიდრებული. სხვათა შორის, ამისთვის სამი წელია ვცდილობ, რომ ერთი პროტოკოლის უწყება ანუ სხვადასხვა სამინისტროების კოორდინაცია შეგვექმნა, ყველასთან ერთად, თუნდაც საპატრიარქოსთან და ერთხელ და სამუდამოდ დაგველაგებინა საქართველოს პროტოკოლის წიგნი, რაც ასევე არის სახელმწიფოს საყრდენი იმიტომ, რომ ყველას აქვს თავის რაღაც კერძო, პატარა ამბიციები. პროტოკოლი ასევე არის პატარა სახელმწიფოების საერთაშორისო დონეზე მთავარი დაცვა. თუ არა პროტოკოლი, მაშინ ჩვენ ყველგან, საერთაშორისო დონის შეხვედრებზე ვიქნებოდით სადღაც ქვემოთ, უკან. პროტოკოლი იცავს პატარას, იცავს ყველას და ეს არ არის ისე გამოგონილი, რომ ვიღაცის თავმოყვარეობას ან ამბიციებს მოერგოს... ეს როგორც პატარა შესავალი ამ საკითხზე“, - განაცხადა ზურაბიშვილმა. სიტყვით გამოსვლის შემდეგ, პრეზიდენტმა სალომე ზურაბიშვილმა საგარეო საქმეთა სამინისტროში მიმდინარე დიასპორის ფორუმი დატოვა. ipn

იმისთვის, რომ ქართული დიასპორის წარმომადგენლებმა ქვეყნის პროცესებში ჩართულობა იგრძნონ, ორი რამ არის საჭირო - მათთვის პარლამენტში წარმომადგენლის გამოყოფა და არჩევნებში მათი მონაწილეობა, - ამის შესახებ საქართველოს პრეზიდენტმა სალომე ზურაბიშვილმა საგარეო საქმეთა სამინისტროში დიასპორის ფორუმზე სიტყვით გამოსვლისას განაცხადა. როგორც სალომე ზურაბიშვილმა აღნიშნა, თუ ქვეყანაში ელექტრონული არჩევნები დაინერგება, ეს უცხოეთზეც უნდა გავრცელდეს და დიასპორის წევრები საარჩევნო სიებში უნდა დარეგისტრირდნენ. „იმისთვის რომ ქართული დიასპორის წარმომადგენლებმა ქვეყნის პროცესებში ჩართულობა იგრძნონ, ორი რამ არის საჭირო. ერთია ის, რომ მათთვის პარლამენტში ერთი წარმომადგენელი მაინც იყოს გამოყოფილი. ამისთვის აუცილებელი არ არის, რომ კანონმდებლობა შეიცვალოს. ყველა პარტიამ, რომელსაც პარლამენტში თავისი წარმომადგენლობა ჰყავს, საკუთარ სიაში, ოღონდ არა ბოლოში, დიასპორის ერთი წარმომადგენელი ჩაწეროს. ამით ეს საკითხი მოიხსნება და მათ ეცოდინებათ რანაირად და როგორ დაიცვან საკუთარი თანამემამულეები სხვადასხვა ქვეყნებში. მეორე არის არჩევნები. ეს არ არის დღევანდელი ხელისუფლების საკითხი, მაგრამ ჩვენ არასდროს არაფერს ვაკეთებთ იმისთვის, რომ საკონსულოები აქტიურად მუშაობდნენ იმაზე, რომ ხალხმა თავი დაირეგისტრიროს და ამომრჩეველი გახდეს. ამას სჭირდება მუშაობა, რეკლამირება. არალეგალებისთვის ეს არ ნიშნავს იმას, რომ იმ ქვეყანაში, სადაც ისინი ცხოვრობენ, ვინმე მთავრობას შეატყობინებს იმას, რომ საკუთარი ქვეყნის საარჩევნო სიაში არიან ჩაწერილები. მაგალითად, საფრანგეთში, მაშინ როდესაც ალჟირში არჩევნები ტარდება, საელჩოების წინ უზარმაზარი რიგებია. მათი დიდი ნაწილი არალეგალია, მაგრამ ამას ხელს არავინ უშლის. თუ ქვეყანაში ელექტრონულ არჩევნებს დავნერგავთ, რაღატომ გვიჭირს, რომ ეს უცხოეთზე გავავრცელოთ და შორ მანძილზე მცხოვრებ ადამიანებს ვუთხრათ, რომ მონაწილეობა მიიღონ?! თუ ჩვენ დიასპორის დაცვა გვინდა, ეს არის ის, რასაც დიასპორის დაცვა ჰქვია“, - განაცხადა სალომე ზურაბიშვილმა. სიტყვით გამოსვლის შემდეგ, პრეზიდენტმა სალომე ზურაბიშვილმა საგარეო საქმეთა სამინისტროში მიმდინარე დიასპორის ფორუმი დატოვა, თუმცა გასვლამდე ღონისძიებაზე დიასპორების წარმომადგენლებს მიმართა, რომ მისი სოციალური ქსელი მუდმივად ღიაა და მათ შეკითხვებს ნებისმიერ დროს უპასუხებს. „გარეთ ზოგიერთი დიასპორის წევრები მეც მელოდებიან და ბოდიშს ვიხდი, რომ აქ თქვენთან ვეღარ დავრჩები, მაგრამ იცით, რომ ჩემი სოციალური ქსელები ღიაა და ნებისმიერ დროს ყველას ვპასუხობ“, - აღნიშნა პრეზიდენტმა. palitranews

მიმაჩნია, რომ წარმოშობით ყველა ქართველს აქვს უფლება, დაიბრუნოს საქართველოს მოქალაქეობა, - ამის შესახებ საქართველოს პრეზიდენტმა სალომე ზურაბიშვილმა საგარეო საქმეთა სამინისტროში დიასპორის ფორუმზე სიტყვით გამოსვლისას განაცხადა. პრეზიდენტის თქმით, ქვეყანა, რომელმაც ძალიან კარგად შეძლო თავის დიასპორასთან ურთიერთობა და მისი გაძლიერება, ისრაელია. „აგერ იყო ნათქვამი, რომ ერთი მილიონი [ქართველი] არის რუსეთში, აღარ არის ერთი მილიონი რუსეთში, ეს კარგად ვიცით. დაახლოებით, ნახევარი მილიონი თუ არის და ისინიც ნახევრად ქართველები და ნახევრად რუსები. მაგრამ დათვლა ძალიან რთულია იმიტომ, რომ დათვლილი არალეგალები არ არიან არსად. მაგრამ დანარჩენ მსოფლიოში, ალბათ მილიონს უახლოვდება და ეს არის ძალიან დიდი გამოწვევა ჩვენი სახელმწიფოსთვის, რომ მათთან შევინარჩუნოთ ყველანაირი კავშირი და არ დავკარგოთ ჩვენი მოქალაქეები თუ თანამემამულეები. ამის ერთი მაგალითი მსოფლიოში, რომელმაც ძალიან კარგად შეძლო თავის დიასპორასთან ურთიერთობა და მისი გაძლიერება, როგორც თავის თავის გაძლიერება, არის ისრაელი. ისრაელს აქვს ამ მხრივ ძალიან ბევრი ჩვენთვის სასწავლებელი, რომ ჩვენ მივყვეთ ამ გზას და ამითი ჩვენ გავაძლიეროთ ჩვენი დიასპორა, ე.ი. ჩვენი თავი იმიტომ, რომ ეს არის კავშირი იმ ყველა ქვეყანასთან, რომელსაც გვინდა, რომ დავემსგავსოთ“, - აღნიშნა ზურაბიშვილმა. პრეზიდენტის თქმით, ქართული დიასპორის წარმატებული ფიგურები, ისევე როგორც ნაკლებად ცნობილები, ყველა საქართველოს წარმომადგენელია უცხო ქვეყნებში. ზურაბიშვილის თქმით, მისი წვლილიცაა, რომ საქართველოს კანონმდებლობაში ორმაგი მოქალაქეობა არსებობს. „მათი ერთად ყოფნა ჩვენთან ძალიან მნიშვნელოვანია. ამისთვის პირველი არის მოქალაქეობა და აქ კიდევ ერთხელ უნდა ვთქვა, რომ არ შეიძლება გაგრძელდეს, როგორც გრძელდება კომისიის მუშაობა. მივაღწიეთ იმას და ამაში მე ჩემი წვლილი მქონდა, მაგრამ არამხოლოდ ყველას მიღწევა არის ის, რომ ორმაგი მოქალაქეობა არსებობს ჩვენს კანონმდებლობაში, მაგრამ არ უნდა იყოს ის, რომ პრაქტიკა ხელს უშლის ამ კანონმდებლობის შესრულებას. ჩვენ არ უნდა ვიგონებდეთ რაღაც მიზეზებს, ვიღაცას რატომ არ ვაძლევთ მოქალაქეობას. „არ ჩამოსულა ქვეყანაში დიდი ხანიაო“, „არა აქვს რაღაცა კავშირები ქვეყანასთანო“, ყველა ქართველი, რომელსაც აქვს სურვილი, რომ დაიბრუნოს, აღიდგინოს ან მივანიჭოთ იმიტომ, რომ არ ჰქონია [მოქალაქეობა], აქვს [ამის] უფლება. ჩვენ უნდა ვფიქრობდეთ, რომ მას აქვს უფლება, რომ დაიბრუნოს, არა აქვს მნიშვნელობა, ის ჩამოვიდა ქვეყანაში, რამდენჯერ ჩამოვიდა, აქ ფლობს რამე ქონებას თუ არ ფლობს, ეს ხომ არ წერია კანონმდებლობაში, რომ ეს კრიტერიუმები უნდა იყოს გამოყენებული?! რატომ იგონებს ვიღაცა ჩინოვნიკი კომისიაში რა უნდა იყოს ახლი დამატებითი კრიტერიუმები. მე მიმაჩნია და ამას ჩემი წარმომადგენლები კომისიაში ბოლომდე მიყვებიან, რომ წარმოშობით ყველა ქართველს, მათ შვილებს, ყველას აქვს უფლება, რომ დაიბრუნოს საქართველოს მოქალაქეობა. სამწუხაროდ, არის რაღაც ტესტები, სამი წელია იუსტიციის სამინისტროსთან გვაქვს გაუთავებელი მოლაპარაკებები, გავამარტივოთ, ნუ ვეკითხებით უცხოეთში დაბადებულ ადამიანს ვინ იყო შუშანიკის დედა. ნუ ვეკითხებით! ნუთუ არ გვაინტერესებს, რომ ეს ადამიანები ხვალ იყვნენ ქართველები?! ხვალ მათ შორის დაიბადება დემნა გვასალია, კვარაცხელია და მაშინ მოვინდომებთ, „ოჰ, ქართველია თურმე“. ახლა უნდა ჩვენ მათ მივაწვდინოთ ეს ხელი, რომ, მოდით, იყავით ქართველი, იყავით ინგლისელი, გერმანელი, ამერიკელი, რუსი, რაც გინდათ, მაგრამ იყავით ასევე ქართველი, იმიტომ, რომ ეს ბმა, რაც გაქვთ ჩვენთან, არის ჩვენთვის, ქვეყნისთვის, სახელმწიფოსთვის ძალიან ძვირფასი და ძალიან აუცილებელი. ამიტომ იმის მაგივრად, რომ ფრენებზე ვიფიქროთ, ვიფიქროთ იმაზე, რომ მივცეთ მოქალაქეობა. ეს არის მათი პირველი მოთხოვნა“, - აღნიშნა ზურაბიშვილმა. როგორც პრეზიდენტმა განაცხადა, საქართველოს არ აქვს უფლება, რომ დიასპორაში მყოფი ხალხი დაკარგოს. „აქ მაქვს მთელი სია, 15 მაისიდან დღემდე, რაც გავიდა კომისიაში რუსეთიდან მოთხოვნები მოქალაქეობის, მე პირადად, სადაც არის რამე უსაფრთხოების კითხვა, იქ ჩემი წარმომადგენელი არ აძლევს ხმას. მაგრამ თუ არ არის უსაფრთხოებიდან რამე კითხვა, რომ ვთქვათ, სამხედრო თანამდებობა ეკავა ან რაღაც უსაფრთხოების კუთხით შეიძლება იყოს კითხვის ნიშანი, იმათ არა, დანარჩენებს ყველას. იმიტომ, რომ ისინი არიან ჩვენი შვილები, სადაც არ უნდა ცხოვრობდნენ. არ მაინტერესებს რუსეთში თუ ამერიკაში ცხოვრობდნენ და ვერ თუ არ ჩამოდიოდნენ, მთავარი არის, რომ ამ ქვეყანას არ აქვს უფლება, რომ ეს ხალხი დაკარგოს. და სხვათა შორის, არცერთ ქვეყანას არა აქვს ამის უფლება, მაგრამ კიდევ უფრო მნიშვნელოვანი არის პატარა ქვეყნისთვის. აბა, რისთვის ჩვენ მერე რაღაც ცეკვა-თამაშებისთვის იქ რაღაც თანხებს ვუგზავნით, ეს არ არის დაცვა დიასპორის. ეს არ არის დახმარება დიასპორის. დახმარება არის, რომ ჩავთვალოთ ისინი როგორც ჩვენიანები და კიდევ ერთხელ ისრაელი არის ამის მაგალითი. ავტომატურად უბრუნებენ [მოქალაქეობას] თუ ადამიანი ამტკიცებს, რომ წარმოშობით ებრაელია. ჩვენ რაღა გვიჭირს, რისი გვეშინია?! არ ვიცი, ჩვენების რატომ უნდა გვეშინოდეს?!“ - განაცხადა ზურაბიშვილმა. საქართველოს პრეზიდენტის თქმით, მეორე რაც უნდა გაკეთდეს დიასპორისთვის არის, რომ „ჩვენ მათ მივცეთ, არამხოლოდ მოქალაქეობა, მაგრამ მოქალაქეობასთან ერთად განცდა, რომ ისინი მონაწილეობენ ქვეყნის ყველაფერში“. „ჩართულები არიან და არამხოლოდ იმიტომ, რომ გვიგზავნიან ტრანსფერებს და ამით ამდიდრებენ ბიუჯეტს ან თავიანთ ოჯახებს, ეს არის ძალიან მნიშვნელოვანი, ძალიან დიდი წვლილი აქვთ ამას ჩვენ განვითარებაში, რომელსაც არ ვაღიარებთ ხშირად. მაგრამ მთავარი არის, რომ მათ იგრძნონ, რომ აქვთ რაღაც როლი ამ ქვეყანაში, ეს იქნება პოლიტიკური, ეს იქნება ეკონომიკური, სოციალური, განათლებაში, რომ ჩამოვიდნენ, დაგვეხმარონ. ექიმები გვყავს მთელ მსოფლიოში, ყველანი წარმატებული. ჩვენ აქ არ ვუხსნით გზას, რომ მაინცდამაინც ჩამოვიდნენ და დაგვეხმარონ“, - განაცხადა ზურაბიშვილმა. palitranews

რუსეთის პრეზიდენტის ვლადიმერ პუტინის თქმით, ვიზების გაუქმების შემდეგ მას საქართველოს რეაქცია გაუკვირდა. ამის შესახებ ვლადიმერ პუტინმა „დელოვაია როსიას“ წევრებთან შეხვედრაზე განაცხადა. „ჩემთვის სრული მოულოდნელობა იყო რეაქცია, რომელიც ამას მოჰყვა. ვფიქრობდი, ყველა იტყოდა „აი, მადლობა, კარგია.” არა, იქ სრულიად გაუგებარი აურზაური ატყდა ამ საკითხზე. ძალიან გასაკვირია. უბრალოდ, სიმართლე გითხრათ, მოულოდნელად. გვერდიდან როდესაც ვუყურებ, ვფიქრობ: ნუთუ სულ გაგიჟდნენ? რა ხდება იქ მათთან, გაუგებარია”, - განაცხადა პუტინმა. მისი თქმით, მან ასეთი გადაწყვეტილება დასვენების სეზონიდან გამომდინარე მიიღო. პუტინის თანახმად, მას ასევე სურდა საქართველოში იმ ხალხის მხარდაჭერა, რომლებსაც რუსეთთან ნორმალური ურთიერთობების დალაგება სურთ და ასევე, რუსეთის იმ ბიზნესებისა და მოქალაქეების მხარდაჭერა, რომლებსაც მეზობელი ქვეყანა უყვართ. “ჩვენ მზად ვართ გზის ჩვენი მონაკვეთი გავიაროთ, როგორც უკვე ვთქვი, ნაბიჯებს ვდგამთ და გავაგრძელებთ იმის გათვალისწინებით თუ როგორი რეაქცია ექნებათ ამაზე ჩვენს პარტნიორებს,” - განაცხადა პუტინმა. რუსეთის პრეზიდენტის თქმით, საქართველომ თავად უნდა გადაწყვიტოს როგორ განვითარდეს და რა გზით იაროს. იპნ

საქართველოს ევროპულ ოჯახში ყოფნას ვუსურვებ, - ამის შესახებ უკრაინის პრეზიდენტმა ვოლოდიმირ ზელენსკიმ ვიდეომიმართვაში განაცხადა, რომელშიც საქართველოს დამოუკიდებლობის დღეს ულოცავს. „მთლიანად ქართველ ერს ვულოცავ დამოუკიდებლობის დღეს, და მინდა, რომ ჩვენთან და ევროპის ყველა სხვა ერებთან ერთად თავისუფლად, მშვიდობიან და გაერთიანებულ ევროპულ ოჯახში იყვნენ. მთელ საქართველოს ვუსურვებ ამას - და თქვენი ქვეყნის იმ ნაწილებსაც, რომლებიც ჯერჯერობით რუსულ ოკუპაციაში იმყოფებიან. ჯერჯერობით! საქართველო ერთ-ერთი უძველესი და მნიშვნელოვანი ისტორიული ძალაა და ეს ძალა დაუძლეველია, ამაში დარწმუნებული ვარ. ოკუპანტი წააგებს”, - განაცხადა ზელენსკიმ. "გაუმარჯოს თავისუფალ საქართველოს", - აღნიშნა ზელენსკიმ ქართულ ენაზე. იპნ