tvati

ტექნიკური ხარვეზის გამო ათენის-ქუთაისის რეისის თბილისის საერთაშორისო აეროპორტში დაჯდა. ამის შესახებ ინფორმაციას საქაერონავიგაცია ავრცელებს. მათივე ცნობით, მიმდინარეობს მუშაობა, რათა ქუთაისის აეროპორტი დაუბრუნდეს ჩვეულ ოპერირებას. “ქუთაისის საერთაშორისო აეროპორტში სანავიგაციო შუქ-ტექნიკის ტექნიკური ხარვეზის გამო ათენის-ქუთაისის რეისის თბილისის საერთაშორისო აეროპორტში დაჯდა. შესაბამისი სამსახურების მიერ მიმდინარეობს მუშაობა, რათა ოპერატიულად აღმოიფხვრას ტექნიკური ხარვეზი და ქუთაისის აეროპორტი დაუბრუნდეს ჩვეულ ოპერირებას“, - ნათქვამია საქაერონავიგაციის ინფორმაციაში.

თბილისს ხვალ ოფიციალური ვიზიტით ისლანდიის რესპუბლიკის პრეზიდენტი გუდნი იოჰანესონი ეწვევა. პრეზიდენტის ადმინისტრაციის ინფორმაციით, ოფიციალური ვიზიტის ფარგლებში, ორბელიანების სასახლეში, გაიმართება ისლანდიის რესპუბლიკის პრეზიდენტისა და საქართველოს პრეზიდენტის პირისპირ და გაფართოებულ ფორმატში შეხვედრა, რის შემდეგაც პრეზიდენტები ერთობლივ განცხადებებს გააკეთებენ. დაგეგმილია ისლანდიის რესპუბლიკის პრეზიდენტის შეხვედრები საქართველოს პრემიერ-მინისტრთან და საქართველოს პარლამენტის თავმჯდომარესთან. ისლანდიის რესპუბლიკის პრეზიდენტი მონაწილეობას მიიღებს ასევე, საქართველო-ისლანდიის ბიზნესმენთა შეხვედრაში, რომელიც მრგვალი მაგიდის ფორმატში საქართველოს პირველი ვიცე-პრემიერის, ეკონომიკისა და მდგრადი განვითარების მინისტრის, ლევან დავითაშვილის მონაწილეობით გაიმართება. ისლანდიის პრეზიდენტის ვიზიტის ფარგლებში, დაგეგმილია მისი ოფიციალური დელეგაციის წევრების შეხვედრები საქართველოს ხელისუფლების წარმომადგენლებთან: ისლანდიის რესპუბლიკის გარემოს, ენერგეტიკისა და კლიმატის მინისტრი გუდლაუგურ ფორ ფორდარსონი საქართველოს ვიცე - პრემიერს და საქართველოს გარემოს დაცვისა და სოფლის მეურნეობის მინისტრს შეხვდება. თბილისში ვიზიტისას ისლანდიის პრეზიდენტის ი. ჯავახიშვილის სახელობის თბილისის სახელმწიფო უნივერსიტეტს ეწვევა და სტუდენტებისთვის საჯარო ლექციას წაიკითხავს. იპნ

"ძალიან სახიფათო განცხადება გააკეთა „ოცნებამ“ - საუბარი დაიწყეს იმ სამსახურის შესაძლო გაუქმებაზე, რომლის 2018 წელს შექმნა 2012 წლამდე წამებებმა და არაადამიანურმა/დამამცირებელმა მოპყრობებმა განაპირობა. როგორც ჩანს, სპეციალური საგამოძიებო სამსახურის გაუქმებას და მისი მანდატის პროკურატურისთვის გადაცემას აპირებენ. ანუ, ჯერ ხომ ინსპექტორის სამსახური გააუქმეს იმ მოტივით, რომ თითქოს რეფორმის გატარება და სამსახურის გაძლიერება უნდოდათ - მის ადგილას შექმნეს სპეციალური საგამოძიებო სამსახური (პროკურატურის ფილიალი). ახლა მსჯელობა დაიწყეს ამ სამსახურის მთლიანად გაუქმებაზე იმ „არგუმენტით“ რომ კონსტიტუციური ორგანო არ არის ნაცვლად იმისა, კონსტიტუციური ორგანოს სტატუსი მიანიჭონ და მისი ხელმძღვანელის პოლიტიკური კონსენსუსით არჩევის წესი შემოიღონ. ინსპექტორის სამსახური რომ კონსტიტუციური ორგანო ყოფილიყო, ასე ხელაღებით ვერ გააუქმებდნენ. როგორც ჩანს, მიუხედავად იმისა, რომ სპეციალური საგამოძიებო სამსახური დღეს დამოუკიდებელი არ არის, მისი რეფორმირების სივრცის არსებობა და საერთაშორისო პარტნიორების მხრიდან მის გაძლიერებაზე მუდმივი აქცენტები, ბიძინა ივანიშვილის წინა და პოსტსაარჩევნო თავის ტკივილია და „გამოსავალი“ მოძებნეს. შეგახსენებთ, ხელისუფლების ცვლილების შემდეგ, ნაცმოძრაობისდროინდელი წამების საპასუხოდ, ეს იყო ვალდებულება, რაც ოცნებამ აიღო (ამისთვის ჩამოიყვანეს თომას ჰამერბერგი) და ამასაც ღალატობენ. ძალიან დიდი იმედი მაქვს, რომ საბოლოო ჯამში, ამას არ და ვერ გაბედავენ!" ნათია მეზვრიშვილი, პარტია "საქართველოსთვის" თავმჯდომარის მოადგილე.

სახელმწიფო-პოლიტიკური თანამდებობის პირებს, შესაძლოა, თანამდებობრივი სარგო გაეზარდოთ. ამის შესაძლებლობას “საჯარო დაწესებულებაში შრომის ანაზღაურების შესახებ“ კანონში ცვლილებების პროექტი ითვალისწინებს, რომლითაც დაგეგმილია სახელმწიფო-პოლიტიკური თანამდებობის პირებისათვის დღეს მოქმედი თანამდებობრივი სარგოს ზედა ზღვრის კოეფიციენტის ფიქსირება. პროექტის ავტორები “ქართული ოცნების“ დეპუტატები არიან, რომელთა განმარტებითაც, ცვლილება სახელმწიფო-პოლიტიკური თანამდებობის პირებისათვის გასამრჯელოს ოდენობის ზრდას გამოიწვევს. დღეს არსებული ანაზღაურების წესის საფუძველზე კონკრეტულად განსაზღვრული კოეფიციენტი არ არის, ხოლო პროექტის მიღების შემთხვევაში, სახელმწიფო-პოლიტიკური თანამდებობის პირებისთვის თანამდებობრივი სარგოს კონკრეტული კოეფიციენტები დგინდება. პროექტის განმარტებით ბარათში ხაზგასმულია, რომ კანონმდებლობა სახელმწიფო-პოლიტიკურ თანამდებობის პირებს უფლებას აძლევს, მათი სახელფასო ანაზღაურება დადგენილი კოეფიციენტის ფარგლებში თავად განსაზღვრონ, რაც გარკვეულწილად არასისტემურობას იწვევს. “პროექტი ითვალისწინებს საქართველოს სახელმწიფო-პოლიტიკური თანამდებობის პირებისათვის, დღეს მოქმედი თანამდებობრივი სარგოს ზედა ზღვრის კოეფიციენტის ფიქსირებას, რაც გამოიწვევს გასამრჯელოს ოდენობის ზრდას. აღნიშნული თანამდებობის პირები გადაიხდიან გადასახადებს გაზრდილი ხელფასის პროპორციულად. შესაძლოა, აღნიშნული ცვლილებით მოხდეს ქონების გადასახადის გადამხდელთა გადასვლა “საგადასახადო კოდექსით“ დიფერენცირებულ შემდგომ კატეგორიაში - 100 000 ლარს ზემოთ“, - აღნიშნული პროექტის განმარტებით ბარათში. სახელმწიფო-პოლიტიკური თანამდებობის პირის თანამდებობრივი სარგოს წესში ცვლილება შემდეგ თანამდებობის პირების ანაზღაურებას შეეხებათ: - პრეზიდენტი, პრემიერ-მინისტრი, მინისტრი/სახელმწიფო მინისტრი, მათი პირველი მოადგილე და მოადგილეები, ასევე ავტონომიური რესპუბლიკის უმაღლესი საბჭოს თავმჯდომარე, მთავრობის თავმჯდომარე, მათი მოადგილეები. რაც შეეხება პარლამენტის წევრების შრომით ანაზღაურებას, მათთან დაკავშირებით საკანონმდებლო ცვლილებები რამდენიმე თვის წინ განხორციელდა და ის პარლამენტის რეგლამენტში აისახა. ახალი კანონი 2025 წლიდან ამოქმედდება. იპნ

მიუსაფარი ძაღლების ოფიციალური აღრიცხვის შედეგების მიხედვით, დედაქალაქში 30 150 ძაღლი ირიცხება. როგორც კვლევის შედეგებიდან ირკვევა, ოფიციალურად აღრიცხული მიუსაფარი ძაღლების მხოლოდ 32% ანუ 10 500 ძაღლია სტერილიზებული. კვლევა ცხოველთა მონიტორინგის სააგენტოს დაკვეთით განხორციელდა. როგორც კვლევის განმახორციელებელ ორგანიზაციაში აცხადებენ, 2024 წელს აქცენტი ძაღლების სტერილიზაციაზე გაკეთდება. ცნობისთვის, თბილისში მიუსაფარი ძაღლების ფართომასშტაბიანი კვლევა 2023 წელს სამი თვის განმავლობაში მიმდინარეობდა. როგორც „ინტერპრესნიუსისთვის“ იყო ცნობილი, 2015 წლის შემდეგ ეს მიუსაფარი ძაღლების პირველი აღრიცხვა იყო. იპნ

ინგუშეთის ქალაქ ყარაბულაკში გაუქმდა კონტრტერორისტული ოპერაციის რეჟიმი, რომელიც 2 მარტის 19:30 საათიდან მოქმედებდა. რუსეთის ფედერალური უშიშროების სამსახურის ინფორმაციით, ქალაქ ყარაბულაკში სპეცოპერაციის შედეგად ლიკვიდირებულია 6 მებრძოლი. „ბანდიტების ვინაობა დადგენილია. არსებული მონაცემებით, ისინი იყვნენ საერთაშორისო ტერორისტული ორგანიზაციის ISIS-ის მიმდევრები და მონაწილეობდნენ არაერთ ტერორისტულ აქტში, მათ შორის საგზაო პოლიციის პოსტზე თავდასხმაში და სამი პოლიციელის მკვლელობაში 2023 წლის მარტში“, — აცხადებს რუსეთის ეროვნული ანტიტერორისტული კომიტეტი. საინფორმაცია სააგენტო Baza-მ გაავრცელა ინფორმაცია, რომ მოკლულთაგან ერთ-ერთი მშვიდობიანი გამვლელი იყო, რაც ადგილობრივმა ხელისუფლებამ უარყო. ინგუშეთში პოლიციასა და შეიარაღებულ დაჯგუფებას შორის შეტაკებები შესახებ გუშინ, 2 მარტს გავრცელდა ინფორმაცია. ნეტგაზეთი

თბილისის მერი, კახა კალაძე აპლიკაციის მოსარგებლე ტაქსის მძღოლების პროტესტს პასუხობს და აცხადებს, რომ მათ შესაბამისი დრო ჰქონდათ განსაზღვრული იმისთვის, რათა კატეგორია აერჩიათ და მუნიციპალიტეტის მიერ დადგენილი შეღავათით ესარგებლათ. თბილისის მერიის ცნობით, ავტობუსის ზოლში მოძრაობის უფლება, გარდა საზოგადოებრივი ტრანსპორტისა, აქვს სახანძრო, სამაშველო, სასწრაფო და საპატრულო პოლიციის ავტომანქანებს (როცა ჩართული აქვთ შესაბამისი ციმციმა) – ასევე, ავტობუსის ზოლში გადაადგილება შეუძლიათ სასკოლო ავტობუსებს და მხოლოდ A კატეგორიის ტაქსების გარკვეულ ნაწილს მგზავრის აყვანა-ჩამოსმის მომენტში, თუ ამ დროს ხელს არ უშლიან ამავე ზოლში მოძრავ საზოგადოებრივ ტრანსპორტს. იმისთვის, რომ A კატეგორიის, თეთრი ფერის ტაქსი გადაადგილდეს საავტობუსო ზოლში, ავტომანქანის ასაკი არ უნდა აღემატებოდეს 10 წელს. აღნიშნული ცვლილება ძალაში შევიდა 2023 წლის პირველი ივნისიდან, იმ ტაქსების რაოდენობა კი, რომლებიც აღნიშნულ კრიტერიუმებს აკმაყოფილებენ, თბილისში 3 500-ია. გასულ კვირას თბილისში აპლიკაციით მომუშავე ტაქსის მძღოლებმა ავტობუსის ზოლში მოძრაობის პირობები გააპროტესტეს და აღნიშნეს, რომ რეგულაციების გამო, ჯარიმების რაოდენობა გაიზარდა. თუმცა მათი პროტესტის მთავარი მიზეზი ტარიფები და აპლიკაციებთან შრომითი ხელშეკრულებების გაფორმებაა. პუბლიკა

იუსტიციის უმაღლესი საბჭოს მოსამართლე წევრი დიმიტრი გვრიტიშვილი „იმედის კვირაში“ ვეტინგის შესახებ მომზადებულ სიუჟეტში ამბობს, რომ ვეტინგის მიზანი სასამართლოზე კონტროლის მოპოვებაა. ის იხსენებს გვარამიას საქმის მოსამართლე ლაშა ჩხიკვაძეს, რომელის აშშ-ის საელჩომ პროექტიდან მოხსნა და ამბობს, რომ სასამართლოზე კონტროლის მოპოვების მსურველებს ჩხიკვაძის მსგავსი მოსამართლეები არ სჭირდებათ. ამავე სიუჟეტში მოსამართლე ამტკიცებს, რომ ალბანეთში ვეტინგმა სისტემის პარალიზება გამოიწვია. დიმიტრი გვრიტიშვილი სასამართლო რეფორმის საკითხის წამოჭრას არჩევნების მოახლოებას უკავშირებს. დიმიტრი გვრიტიშვილის მსგავსად ლევან მურუსიძეც მიიჩნევს, რომ ვეტინგის მიზანი სასამართლოდან მოსამართლეების გაყრაა. „TV პირველთან“ მან თქვა, რომ ვეტინგი შეეხება ყველა მოსამართლეს და სისტემაში დაინიშნებიან არადამოუკიდებელი მოსამართლეები, რომლებიც „დონორების ყველა დავალებას შეასრულებენ“. სასამართლო სისტემის რეფორმა არჩევნების მოახლოებასთან კავშირში არაა. ის ევროკავშირში ინტეგრაციის ერთ-ერთი მთავარი წინაპირობაა და ამის შესახებ აღნიშნული იყო როგორც შარლ მიშელის დოკუმენტში, ასევე ევროკომისიის რეკომენდაციებში. ვეტინგის საკითხი დღის წესრიგში კანდიდატის სტატუსის მიღების შემდეგ დადგა. 8 ნოემბერს გამოქვეყნებულ გაფართოების ანგარიშში წერია, რომ საქართველომ უნდა შეიტანოს ცვლილებები საერთო სასამართლოების შესახებ კანონში, რათა ის სრულად შეესაბამებოდეს ვენეციის კომისიის რეკომენდაციებს. კერძოდ: საერთაშორისო ექსპერტების ჩართულობით დანერგოს კეთილსინდისერების შეფასების ექსტრაორდინალური მექანიზმი ყველა იმ კანდიდატისთვის, რომლებიც სასამართლო სისტემის, კერძოდ, იუსტიციის უმაღლესი საბჭოს, უზენაესი სასამართლოს და სხვა სასამართლოების მაღალი თანამდებობის დასაკავებელ კონკურსებში მონაწილეობენ. გარდა ამისა, ჩამოაყალიბოს ქონებრივი დეკლარაციების მუდმივი და პერიოდული სისტემა, საერთაშორისო ექსპერტების ჩართულობით საზედამხედველო და საკონსულტაციო ფუნქციაში. რა არის ვეტინგი და როგორ მიმდინარეობს ვეტინგი ალბანეთში ვეტინგი საჯარო მოხელეების კეთილსინდისიერების შემოწმების ერთ-ერთი მექანიზმია; ამ მეთოდით პირის თანამდებობასთან თავსებადობა ფასდება, რასაც დანიშვნაზე უარი ან გათავისუფლება შეიძლება მოჰყვეს; ვეტინგის გზით მოსამართლეთა/პროკურორთა შემადგენლობის განახლებას, ძირითადად, ტრანზიციის პროცესში მყოფი ქვეყნები მიმართავენ მართლმსაჯულების სფეროში სისტემურ უნდობლობასა და უსამართლობასთან საპასუხოდ; 2014 წელს ალბანეთმა ევროკავშირის კანდიდატის სტატუსი მიიღო და გაწევრების ერთ-ერთ მთავარ წინაპირობად მართლმსაჯულების რეფორმა დასახელდა. 2016 წელს ალბანეთში ვეტინგი დაიწყო და ჯერაც არ დასრულებულა. საინფორმაციო მასალა ამის შესახებ „კომენტარმა“ მოამზადა. ვეტინგს დამოუკიდებელი საკვალიფიკაციო კომისია ახორციელებს და მისი შედეგების გასაჩივრება სააპელაციო პალატაშია შესაძლებელი. კომისიის და პალატის წევრებს პარლამენტი ირჩევს. პროცესს მონიტორინგს საერთაშორისო დამკვირვებლები უწევენ, რომლებსაც ფართო უფლებამოსილებები გააჩნიათ, მათ შორის, მონიტორინგისთვის საჭირო ნებისმიერ ინფორმაციაზე დაუყონებლივი წვდომა; საერთაშორისო დამკვირვებლები არანაკლებ 15 წლიანი გამოცდილების მოსამართლეები და პროკურორები არიან. ვეტინგს ექვემდებარება ყველა მოსამართლე და პროკურორი. თუმცა პირველ ეტაპზე ვეტინგს გადიან მხოლოდ საკონსტიტუციო სასამართლოს წევრები, უზენაესი სასამართლოს თავმჯდომარე და გენერალური პროკურორი. ვეტინგი სამ ძირითად კომპონენტს მოიცავს. ესენია: „შესამოწმებელი პირის და მასთან დაკავშირებული ახლო პირების ქონების წარმომავლობის კანონიერება, ფინანსური ვალდებულებების და მათგან მომდინარე კერძო ინტერესების შეფასება; პროფესიული უნარების, ეთიკის, ცოდნის შეფასება; ორგანიზებულ დანაშაულში ჩართულ პირებთან კავშირის დადგენა.“ „კომენტარის“ მასალის მიხედვით: „ვეტინგისთვის თავის ასარიდებლად პროცედურას დაქვემდებარებულმა პირებმა მალევე დაიწყეს თანამდებობის საკუთარი ნებით დატოვება; 2022 წლის სექტემბრის მონაცემებით, 554 მოსამართლე/პროკურორიდან 64% გათავისუფლდა, უფლებამოსილება შეუჩერდა ან საკუთარი ნებით გადადგა; ზოგიერთ შემთხვევაში სისხლის სამართლის დანაშაულის ნიშნებიც გამოიკვეთა. ალბანეთის ვეტინგის საკითხზე იმსჯელეს ალბანეთის საკონსტიტუციო სასამართლომ და ადამიანის უფლებათა ევროპულმა სასამართლომ. არც ერთ ინსტიტუტს დარღვევა არ დაუდგენია. საკითხი ასევე განიხილა ვენეციის კომისიამ. ევროპულმა სასამართლომ აღნიშნა, რომ ვეტინგის გამოყენება გამართლებულია შემაშფოთებელი დონის კორუფციის აღმოსაფხვრელად; ვენეციის კომისიის აზრით კი, ვეტინგი, როგორც უკიდურესი აუცილებლობის დროს მისაღები ზომა, ალბანეთში გამართლებულია. ვეტინგის პროცესის გამოწვევად შეიძლება მივიჩნიოთ, სასამართლოების მუშაობის შეფერხება: 2020 წლამდე უზენაეს სასამართლოში მხოლოდ 1 მოსამართლე იყო; ვეტინგის გამო, საქმეთა განსახილველად მოსამართლეთა საკმარისი რაოდენობა არც საკონსტიტუციო სასამართლოში აღმოჩნდა; მათ დანიშვნას კი უზენაესი სასამართლოს კვორუმი სჭირდებოდა.“ პუბლიკა

შაბათს ოდესაში ოკუპანტების თავდასხმას 12 ადამიანი ემსხვერპლა, მათ შორის 5 ბავშვია. როგორც ადგილობრივი მედიები წერენ, ამ დროისთვის სამძებრო-სამაშველო ღონისძიებები დასრულებულია – ორი ბავშვის ცხედარი ნანგრევებში გუშინ ღამით იპოვეს. დაღუპულთა შორის არიან 8 და 10 წლის ბავშვები, ასევე, 1 წლამდე ასაკის ჩვილი. რუსები ოდესას 2 მარტს დაესხნენ თავს – დრონების სამიზნე იყო საცხოვრებელი კორპუსი. მომდევნო დღეს ოლქში გლოვის დღე გამოცხადდა. პუბლიკა

რუსეთის საგარეო საქმეთა სამინისტრომ გერმანიის ელჩი, ალექსანდრე ლამბსდორფი უწყებაში დაიბარა, - ინფორმაციას რუსული მედია ავრცელებს. „გერმანიის ელჩი დღეს საგარეო საქმეთა სამინისტროშია დაბარებული“, – განაცხადა წყარომ „რია ნოვოსტისთან“ საუბარში, თუმცა დეტალები არ დაუზუსტებია. ელჩის რუსეთის საგარეო საქმეთა სამინისტროში დაბარება, სავარაუდოდ, რუსული სახელმწიფო მედიის მიერ პარასკევს გავრცელებულ აუდიოჩანაწერს უკავშირდება, სადაც, რუსული მედიის ცნობით, გერმანელი სამხედრო ოფიცრები უკრაინის მხარდაჭერაზე, მათ შორის Taurus-ის რაკეტების პოტენციურ გამოყენებაზე, საუბრობენ. გერმანიის თავდაცვის მინისტრმა, ბორის პისტორიუსმა კვირას განაცხადა, რომ ჩანაწერის გამოქვეყნება დასავლეთის წინააღმდეგ რუსეთის საინფორმაციო ომის ნაწილია და მისი მიზანი გერმანიაში უთანხოების შექმნაა. „ეს არის საინფორმაციო ომის ნაწილი, რომელსაც პუტინი აწარმოებს. ამაში არანაირი ეჭვი არ არსებობს. ეს არის ჰიბრიდული თავდასხმა, რომელიც მიზნად ისახავს დეზინფორმაციის გავრცელებას. ეს ეხება ჩვენს გაყოფას, ჩვენი სიმტკიცის შერყევას“, - განაცხადა გერმანიის თავდაცვის უწყების ხელმძღვანელმა. იპნ

ჩხოროწყუს მუნიციპალიტეტის მერთან, დავით გოგუასთან ფიზიკური დაპირისპირების ფაქტზე მერიის სპორტის სამსახურის ყოფილი უფროსი ედემ კვარაცხელია დააკავეს. თავდაპირველად გამოძიება სსკ-ის 126-ე მუხლით მიმდინარეობდა, რაც ძალადობას გულისხმობს, თუმცა, როგორც ცნობილი ხდება მოგვიანებით მუხლი გადაკვალიფიცირდა და გამოძიება სსკ-ის 353-ე მუხლით გაგრძელდა, რაც საზოგადოებრივი წესრიგის დამცველი ან ხელისუფლების სხვა წარმომადგენლის მიმართ წინააღმდეგობას, მუქარას ან ძალადობას გულისხმობს. არსებული ინფორმაციით, ედემ კვარაცხელია სენაკის წინასწარი დაკავების იზოლატორშია მოთავსებული. ცნობისთვის, ჩხოროწყუს მერსა და მერიის სპორტის განყოფილების ყოფილ უფროსს შორის ფიზიკური დაპირისპირება რამდენიმე დღის წინ მოხდა. გავრცელებული ინფორმაციით, დაპირისპირების მიზეზად ედემ კვარაცხელიას სამსახურიდან გათავისუფლება სახელდება. იპნ

#5 ეპიზოდი: გახარია საკუთარი პარტიის რეიტინგზე, ოპოზიციაზე, ივანიშვილის და ოცნების ცვეთაზე

„მინდა ვიცოცხლო“ - ამ სახელწოდებით ორგანიზაცია „კავშირი სიცოცხლისთვის“ ორგანიზებით, ონკოპაციენტების ჯანმრთელობის უფლების დასაცავად საქართველოს პარლამენტთან აქცია გაიმართა. აქციის მონაწილეების მოთხოვნები კვლავ უცვლელია. ისინი ჯანდაცვის სამინისტროს მოუწოდებენ, რომ ყველა ონკოპაციენტი ინდივიდუალურად, სრულად დაფინანსდეს და არა განსაზღვრული თანხის ოდენობით, რაც მათი თქმით, მოიცავს წლიურ 25 000 ლარიან ლიმიტს, რომელიც ხშირ შემთხვევაში, ონკოპაციენტებისთვის საკმარისი არ არის. ასევე, ისინი ჯანდაცვის სფეროში არსებულ ხარვეზებზეც საუბრობენ, კერძოდ, წამლების დეფიციტისა და ქვეყანაში ე.წ. მესამე თაობის მედიკამენტების არარსებობაზე. ონკოპაციენტებმა და მათმა მხარდამჭერებმა საკანონმდებლო ორგანოსთან მოიტანეს პლაკატები წარწერით: “მინდა ვიცოცხლო!”, “ჩვენ ვდგავართ სიცოცხლის სადარაჯოზე!”, “მხარდაჭერა ონკოპაციენტებს”, “მინდა სიცოცხლე დამიდექით გვერდით”. “ჩვენ დღეს ვაწყობთ საპროტესტო აქციას ონკოპაციენტების ჯანმრთელობის უფლების დასაცავად. ჩვენ შეხვედრა გვინდოდა ზურაბ აზარაშვილთან, მაგრამ 16 თებერვალს, როდესაც ჩვენ ჯანდავის სამინისტროში დაგვიბარეს შეხვედრაზე, არ შეგვხვდა არავინ გადაწყვეტილების მიმღები პირი, ნაცვლად ამისა, ჩვენ ჯანმრთელობის ეროვნული სააგენტოს უფროსი, შოთა შალაყაძე შეგვხვდა. მან ვერანაირი პასუხი ვერცერთ კითხვაზე ვერ გაგვცა. მათ ჩვენ გვითხრეს, რომ არც კი იცოდნენ იმ ხარვეზების შესახებ, რომელსაც ონკოპაციენტები აწყდებიან, არ იცოდნენ იმის შესახებ, რომ დეფიციტია წამლების და ვერ გვითხრეს რამდენ ხანში მოგვარდება და იქნება საქართველოში ხელმისაწვდომი სიცოცხლისთვის აუცილებელი მედიკამენტები. ისინი ვარაუდობდნენ, რომ ეს შეიძლება მოხდეს 2-3 თვეში. 2 და 3 თვე ონკოპაციენტებისთვის არის სასიკვდილო განაჩენის გამოტანა. ჩვენ დაგვპირდნენ იმას, რომ 25 000 - ლარიანი ლიმიტი მოიხსნებოდა, თუმცა ჯანდაცვის სამინისტროსთან შეხვედრაზე გამოგვიცხადეს, რომ ეს არის პირობითი ლიმიტი, რაც იმას ნიშნავს, რომ როდესაც ადამიანებს ამოეწურებათ ეს ლიმიტი, მათ უნდა მიმართონ რეფერალურს. ამის შემდეგ ის პაციენტები, რომელსაც უკვე ლიმიტი ამოწურული აქვთ რეფერალურში მივიდნენ, ესეც დიდი პრობლემაა, იმიტომ, რომ მათ პირადად უნდა მიიტანონ განცხადება, ელექტრონულად არ იგზავნება, ამ ადამიანებს ეს ფიზიკურად არ შეუძლიათ და რეგიონებში მცხოვრებლებისთვისაც საშინელებაა, რადგან დედაქალაქში ჩამოსვლა უწევთ და საათობით რიგში დგომა. ეს ხარვეზიც გამოსასწორებელია. ამასთან, რეფერალურიდან წელს უკვე ყველას უარი მოუვიდა. რაც არის ძალიან საშინელება იმიტომ, რომ ჩვენ სრულფასოვან მკურნალობას დაგვპირდნენ. ლიმიტი ამოეწურა ხალხს, რეფერალურიდან უარი მოსდით. რა უნდა ქნას ამ ხალხმა?! საიდან უნდა მოიტანონ ათიათასობით ლარი, რომელიც მათ სიცოცხლის გადარჩენისთვის სჭირდებათ?!”, - განაცხადა ორგანიზაცია „კავშირი სიცოცხლისთვის“ დამფუძნებელმა, გვანცა აფხაიძემ. გარდა ამისა, აქციის მონაწილეები საქართველოს პრემიერ-მინისტრთან, ირაკლი კობახიძესთან შეხვედრას ითხოვენ. იპნ

თერ­ჯო­ლის მუ­ნი­ცი­პა­ლი­ტე­ტის სო­ფელ ზედა სა­ზა­ნო­ში უდი­დე­სი ტრა­გე­დია დატ­რი­ალ­და. მდი­ნა­რე ძუ­სა­ში ოთხი ადა­მი­ა­ნი და­იხ­რჩო. მათ შო­რის არი­ან გო­გო­ნე­ბი, რომ­ლე­ბიც სო­ფელ­ში სტუმ­რად ჭი­ა­თუ­რი­დან იყ­ვნენ ჩა­სუ­ლე­ბი. გარ­დაც­ვლი­ლი გო­გო­ნე­ბი ელე­ნე შუ­კა­კი­ძე და ნინო კენ­ჭოშ­ვი­ლი არი­ან. მომ­ხდა­რის შე­სა­ხებ Ambebi.ge-ს გო­გო­ნე­ბის დამ­რი­გე­ბე­ლი, სოფო ჩუ­ბი­ნი­ძე ესა­უბ­რა: "გო­გო­ნე­ბი ჩემი მოს­წავ­ლე­ე­ბი იყ­ვნენ, ჩემს სა­დამ­რი­გებ­ლო­ში სწავ­ლობ­დნენ. სა­ზა­ნო­ში სტუმ­რად იყ­ვნენ, მიმ­დე­ბა­რედ ღირ­სშე­სა­ნიშ­ნა­ო­ბებს ათ­ვა­ლი­ე­რებ­დნენ. ერთ-ერთს ფეხი და­უც­და და მერე რიგ-რი­გო­ბით ჩაჰ­ყვნენ და­ნარ­ჩე­ნე­ბიც, გა­დარ­ჩე­ნის მიზ­ნით. ელე­ნე და ნინო უკვე მო­ას­ვე­ნეს. მშობ­ლე­ბი სახ­ლში ჰყავთ ამ გო­გო­ნებს. ძა­ლი­ან მძი­მე მდგო­მა­რე­ო­ბა­ში ვართ ყვე­ლა. წე­ღან ბავ­შვე­ბი წერ­დნენ, იქ­ნებ ემო­ცი­ებს თავი მო­ვუ­ყა­როთ და ორი სა­ა­თის­თვის ავი­დე­თო. ვუ­თხა­რი ბავ­შვებს, მეც გა­მოგ­ყვე­ბით-მეთ­ქი, მაგ­რამ არც ის ვიცი, რო­გორ უნდა წა­ვი­დე, არც ის ვიცი, და­ნარ­ჩე­ნე­ბი რო­გორ უნდა ვნა­ხო, რო­გორ შევ­ხვდე ოჯახს. ქა­ლა­ქი შოკ­შია", - გვე­უბ­ნე­ბა გო­გო­ნე­ბის დამ­რი­გე­ბე­ლი.

„ამდენი მდინარეა და არსად ხდება თევზის რეწვა“ - ამის შესახებ მონადირეთა და მეთევზეთა ფედერაციის პრეზიდენტმა თემურ ტყემალაძემ „ბიზნესპრესნიუსთან“ საუბრისას განაცხადა. მისი თქმით, მიუხედავად იმისა, რომ ქვეყანას თევზის წარმოების კუთხით დიდი პოტენციალი აქვს, რესურსის ათვისება შესაბამისად არ ხდება. როგორც თემურ ტყემალაძე განმარტავს, სახელმწიფოს მხრიდან ხელშეწყობა და რეგიონებში ტბორების რაოდენობა მომრავლდა, თუმცა ეს საკმარისი არ არის. „ასათვისებელია კიდევ წყალსატევები. წესით, თევზის წარმოების მიმართულებით ყველა უნდა იყოს გამოყენებული. უფრო მეტად ადგილობრივები ინტერესდებიან თევზის მოშენებით, რაც ძალიან მისასალმებელია, მაგალითად, კახეთში არის ძალიან ბევრი ტბორი. თუმცა, ამასაც თავის წესები აქვს, ყველგან ვერ გააკეთებ. ზოგან ეკოლოგიურად არ არის მისაღები, ან წყალმოვარდნებია და არ გამოვა. თუმცა, სადაც შესაძლებელია, ყველგან უნდა გაკეთდეს. ჩვენ საერთოდ ვერ ვიყენებთ მდინარეებს. ამას ემატება ისიც, რომ ბრაკონიერობაა და უმართავი სისტემაა. ამდენი მდინარეა და არსად ხდება თევზის რეწვა. ეს კარგად დასაგეგმი და მისახედია. მდინარეების შევსება უნდა მოხდეს ხელოვნურად. მართალია კალმახზე უკვე დაწყებული აქვს გარემოს დაცვის ველური ბუნების სააგენტოს და გათევზიანება მიმდინარეობს მაღალმთიან რეგიონებში, მაგრამ ესეც ბოლომდეა მისაყვანი. ახლა ეს თევზი რომ მოაშენო, მერე ვიღაცამ გაიაროს და დენით მოსპოს, ხომ არ ივარგებს?! არადა, ეს ტურიზმისთვისაც და ეკონომიკისთვისაც ძალიან მნიშვნელოვანია. ტურისტები ძალიან ინტერესდებიან ამ მიმართულებით. დარგის განვითარებას ასევე, ხელს უშლის ღორღის ამოღება და კარიერები. მაგალითად, დასავლეთის მდინარეებს ზუთხისებრებრების პრობლემა აქვს. იქ არის უნიკალური კოლხური ზუთხი, რომელიც წითელ ნუსხაშია და გადაშენების პირასაა. ყურადღების მიქცევა სჭირდება ამ ყველაფერს“,- ამბობს თემურ ტყემალაძე. ავტორი: ნინი ქეთელაური

საფრანგეთში, არალეგალურ მდგომარეობაში მყოფი 58 ქართველი საქართველოში დააბრუნეს. აღნიშნულ ინფორმაციას საფრანგეთის სააელჩო ავრცელებს. 2023 წელს, 965 არალეგალი ქართველი დაბრუნდა რეადმისიის ფარგლებში, 2300-ს კი უარი ეთქვა ბორტზე ასვლაზე საქართველოს აეროპორტიდან გასამგზავრებლად. ფრანგულ-ქართული თანამშრომლობა არელეგალური მიგრაციის წინააღდეგ საბრძოლველად, 2019 წლიდან გაძლიერდა და გაგრძელდა. აღსანიშნავია, რომ საქართველო საფრანგეთმა, ჯერ კიდევ 2013 წელს შეიყვანა უსაფრთხო ქვეყნების სიაში. 2020-2021 წლებიდან კი განსაკუთრებით გაიზარდა საქართველოს მოქალაქეების მხრიდან, საფრანგეთის მთავრობისადმი თავშესაფრის მოთხოვნა. 2020-2021 წლებში, ეს რაოდენობა 103.4%-ით გაიზარდა, 2021-2022 წლებშ კი 114.3%-ით. უნდა ითქვას ისიც, რომ საქართველო მეოთხე ადგილზეა თავშესაფრის მოთხოვნის კუთხით საფრანგეთში, ავღანეთის, ბანგლადეშისა და თურქეთის შემდეგ. 2023 წელს, თავშესაფრის მთხოვნელთა რიცხვი შემცირდა, მაგრამ საქართველო კვლავ მეოთხე ადგილს იკავებს. საფრანგეთი, საქართველოს ხელიუსლებასთან მჭიდრო კოორდინაციით გეგმავს, რომ 2024 წელს გაზარდოს დეპორტირებული ადამიანების რაოდენობა. ავტორი: ბაჩანა ტყემალაძე

უკრაინის პრეზიდენტმა, ვოლოდიმირ ზელენსკიმ მსოფლიოს მოუწოდა, უპასუხოს რუსეთის აგრესიის ყველა გამოვლინებას, რადგან უკრაინელი ბავშვები რუსეთის ფედერაციის სამიზნეები ხდებიან. ამის შესახებ მან „ფეისბუქზე“ გამოქვეყნებულ პოსტში განაცხადა. ზელენსკიმ გამოაქვეყნა ვიდეო ოდესადან, სადაც რუსებმა დრონებით საცხოვრებელ კორპუსზე თავდასხმა განახორციელეს. ”ჯერჯერობით დაფიქსირდა 10 ადამიანის დაღუპვის შესახებ ინფორმაცია, მათ შორის სამი ბავშვი: მარკი, რომელიც სამი წლის გახდებოდა, ელიზავეტა, რომელიც რვა თვის იყო და ტიმოფი, რომელიც ოთხი თვის იყო. რუსეთმა უკრაინელი ბავშვები სამხედრო სამიზნეებად აქცია. ვის ებრძვიან ეს მხეცები“, - განაცხადა ზელენსკიმ. მისი თქმით, გადარჩენილია ხუთი ადამიანი. უკრაინის პრეზიდენტის თქმით, სამძებრო სამუშაოები გრძელდება. მან დასძინა, რომ ყველა დაზარალებულს უტარდება საჭირო დახმარება. „რუსეთის ყოველი დანაკარგი ფრონტზე არის ჩვენი ქვეყნის პასუხი რუსულ ტერორზე. მსოფლიომ უნდა უპასუხოს რუსული ბოროტების ყველა გამოვლინებას და მოიგერიოს რუსეთის ქმედებები. ყოველი რუსული ტერორისტული აქტი, რომელსაც მსოფლიო უგულებელყოფს, საშუალებას აძლევს რუსეთს განაგრძოს მკვლელობა. ჩვენ უნდა მოვიგოთ ეს ომი. მხოლოდ უკრაინის ძალას შეუძლია უკრაინელებისთვის ნორმალური ცხოვრების უზრუნველყოფა“, - განაცხადა ზელენსკიმ. 1-2 მარტის ღამეს რუსებმა ოდესას დრონებით შეუტიეს. თვითმფრინავი კორპუსს დაეჯახა, რის შედეგადაც შენობის ნაწილი ჩამოინგრა. ამ დროის მონაცემებით, თავდასხმას ათი ადამიანი ემსხვერპლა, მათ შორის ოთხი ქალი და სამი ბავშვი. იპნ

"საჯარო სამსახურში 14 წლიანი მუშაობის შემდეგ (საკმაოდ მაღალ თანამდებობებზე) ჩემი „კაპიტალია“ 10 წლიანი სესხით შეძენილი 60კვ.მ. ბინა. საჯარო სამსახურში კეთილსინდისიერი მუშაობით კაპიტალი ვერ გროვდება. საჯარო სამსახურით გამდიდრებას ჰქვია კორუფცია." ნათია მეზვრიშვილი, პარტია "საქართველოსთვის" თავმჯდომარის მოადგილე.

საქართველოს თავდაცვის ძალების სამხედროებმა საქართველოს ტერიტორიული მთლიანობისათვის, ასევე სამშვიდობო მისიის შესრულებისას დაღუპული სამხედროების დედებს 3 მარტი მიულოცეს. თავდაცვის სამინისტროს ინფორმაციით, სამხედრო მოსამსახურეები დაღუპული სამხედროების ოჯახებს საქართველოს მასშტაბით ყველა ქალაქსა და სოფელში ესტუმრნენ. მათ გმირების მშობლებს დედის დღესთან დაკავშირებით თაიგულები მიართვეს და საქართველოს თავდაცვის მინისტრის მისალოცი ბარათები გადასცეს. ჯარისკაცებმა თანამებრძოლების თავდადება და ქვეყნის წინაშე გაწეული ღვაწლი კიდევ ერთხელ გაიხსენეს. 1tv

თერჯოლის მუნიციპალიტეტში, სოფელ ზედა საზანოში, მდინარე ძუსაში კიდევ ერთი ადამიანის ცხედარი იპოვეს. მანამდე, სამაშველო სამსახურის თანამშრომლებმა წყლიდან სამი ადამიანის ცხედარი ამოიყვანეს. არსებული ინფორმაციით, მამაკაცს ფეხი დაუცურდა და წყალში ჩავარდა, რის შემდეგაც, თანმხლები პირები წყალში მის დასახმარებლად ჩავიდნენ, თუმცა ისინი მდინარემ გაიტაცა. ერთი თანმხლები პირი კი ხმელეთზე დარჩა. არსებული ინფორმაციით, დაღუპულია სოფელ საზანოში მცხოვრები მამა-შვილი და სტუმრად მყოფი ორი ახალგაზრდა გოგო. მდინარიდან ამოყვანილი კიდევ ერთი ადამიანი სამედიცინო დაწესებულებაშია გადაყვანილი. იპნ

თერჯოლის მუნიციპალიტეტში, სოფელ ზედა საზანოში მდინარე ძუსაში სამი ადამიანი დაიხრჩო. არსებული ინფორმაციით, მამაკაცს ფეხი დაუცურდა და წყალში ჩავარდა, რის შემდეგაც, თანმხლები პირები წყალში მის დასახმარებლად ჩავიდნენ, თუმცა ისინი მდინარემ გაიტაცა. ერთი თანმხლები პირი კი ხმელეთზე დარჩა. როგორც „ინტერპრესნიუსს“ საგანგებო სიტუაციების მართვის სამსახურში განუცხადეს, შემთხვევის შედეგად მდინარეში 3 ადამიანის ცხედარი იპოვეს, ერთს კი ამ დრომდე ეძებენ. მდინარიდან ამოყვანილი კიდევ ერთი ადამიანი სამედიცინო დაწესებულებაშია გადაყვანილი. იპნ

რაგბი ევროპის ჩემპიონატის ნახევარფინალში საქართველოს ნაკრებმა რუმინეთი დაამარცხა და ფინალში ითამაშებს. „ბორჯღალოსნებმა“ ანთიმოზ ივერიელის თასი და რაგბი ევროპის ჩემპიონატის საგზური მოიპოვეს. საქართველოს ნაკრებმა რუმინეთთან 7 ლელო დადო და ანგარიში 43:5 დამთავრდა. რაგბის ევროპის ჩემპიონატის ფინალური შეხვედრა 17 მარტს პარიზში შედგება. ფოტო: ირაკლი ტყემალაძე (საქართველოს რაგბის კავშირი) იპნ

3 მარტი ოდესაში გლოვის დღედ გამოაცხადეს. შესაბამისი გადაწყვეტილება ოდესის ოლქის ადმინისტრაციამ რუსეთის მიერ განხორციელებული დარტყმის გამო მიიღო, რომელსაც ბოლო ინფორმაციით, ოთხი ადამიანი ემსხვერპლა. დაღუპულებს შორის არის სამი წლის ბავშვი. დაშავდა სულ მცირე რვა ადამიანი. რუსეთმა ქალაქზე თავდასხმა დღეს დილით განახორციელა. უკრაინის ტერიტორიაზე შესული დრონი ოდესაში საცხოვრებელ კორპუსს დაეჯახა, შედეგად სახლის ნაწილი ჩამოინგრა. მაშველები ამ დრომდე ეძებენ ნანგრევებში მოყოლილ ადამიანებს. მათ უკვე მოახერხეს ხუთი დაშავებულის ამოყვანა. ავტორი - ლევან ახალაია

პარიზში, ეიფელის კოშკთან არსებული საავტომობილო გზები შესაძლოა, საფეხმავლო ზონად გადაიქცეს. ინიციატივით ქალაქის მერი, ანნ იდალგო გამოდის. მისი პროექტის მიხედვით, ეიფელის კოშკსა და ტროკადეროს სანაპიროს შორის მთელი სივრცე ავტომობილებისგან გათავისუფლდება. ყოფილ სამანქანო გზებზე ხეები დაირგვება და პარიზის გულში დიდი პარკი შეიქმნება. იდალგო ამ პროექტს 2018 წლიდან უჭერს მხარს. თუმცა, მისი განხორციელება იმ საფრთხის გამო შეფერხდა, რომ გზების ჩაკეტვა ქალაქის სხვა უბნებში საცობებს გამოიწვევდა. ამჯერად ცვლილებების გეგმა საბოლოოდ შემუშავებულია და მერი იმედოვნებს, რომ ეიფელის კოშკთან საფეხმავლო პარკი ოლიმპიური თამაშების დასრულების შემდეგ გაჩნდება. ავტორი: ლადო სულაბერიძე

მსოფლიოს სხვადასხვა ქვეყანაში პენსიაზე გასვლის ასაკი განსხვავებულია. ეკონომიკური თანამშრომლობისა და განვითარების ორგანიზაციის (OECD) უახლესი მონაცემების გამოყენებით, ევროპის უმეტეს ქვეყანას საპენსიო ასაკი ერთნაირად აქვს განსაზღვრული. თუმცა, მაინც არსებობს განსხვავება 1 ან 2 წელს შორის. მაგალითად, თურქეთში და ბელგიაში მამაკაცი პენსიაზე გადიან 61 წლიდან, ხოლო ქალები საშუალოდ 60 წლის ასაკში. როგორც პოლონეთში, ავსტრიაშიც ოფიციალური საპენსიო ასაკია 60 წელი ქალებისთვის და 65 წელი მამაკაცებისთვის. საფრანგეთში მამაკაცები პენსიაზე გადიან საშუალოდ 60 წლის ასაკში, ხოლო ქალები - 62 წლის ასაკში. საშუალოდ, ბერძენი კაცები პენსიაზე გადიან 63 წლის ასაკში, ხოლო ქალები წყვეტენ მუშაობას 59-60 წლის ასაკში. ესპანეთში მცხოვრებლებს აქვთ ყველაზე მაღალი სიცოცხლის ხანგრძლივობა (83,3 წელი), ვიდრე დანარჩენ ევროპაში. საშუალოდ, როგორც წესი, ესპანელი მამაკაცი პენსიაზე 60 წლის ასაკში გადის, ქალები კი 61 წლისა. საშუალოდ ლატვიელი მამაკაცი პენსიაზე 61 წლის ასაკში გადის, ხოლო ქალი 63. იტალიაში პენსიაზე გასვლის საშუალო ასაკი 63 წელია. პოლონეთის მთავრობამ 2017 წელს შეამცირა საპენსიო ასაკი 67-დან 65 წლამდე მამაკაცებისთვის და 60 წლამდე ქალებისთვის. საპენსიო ასაკი დიდ ბრიტანეთში ამჟამად 66 წელია, თუმცა კაცები ჩვეულებრივ პენსიაზე გადიან 63 წლის ასაკში, ხოლო ქალები ოდნავ ადრე -62 წელს. გერმანელი მამაკაცები ამჟამად პენსიაზე გადიან 63 წლის ასაკში, ხოლო ქალები ცოტა ადრე - 60 წლის ასაკში. შვეიცარიაში საშუალო საპენსიო ასაკი არის 64 წელი როგორც მამაკაცებისთვის, ასევე ქალებისთვის. თუმცა, შვეიცარიის სახელმწიფო გთავაზობთ მოქნილ საპენსიო ასაკს და პენსიების აღება შესაძლებელია ბევრად უფრო ადრე, მაგრამ დაბალი უფლებებით. რაც შეეხება აშშ-ს,1943-დან 1954 წლამდე დაბადებულებს შეუძლიათ პენსიაზე გასვლა 66 წლის ასაკში, ხოლო 1960 წლის შემდეგ დაბადებულებმა უნდა იმუშაონ 67 წლამდე. თუმცა, საშუალოდ, ამერიკელი მამაკაცები პენსიაზე გადიან 65 წლის ასაკში, ხოლო ქალები პენსიაზე გადიან 65 წლის ასაკში. წყარო: lovemoney.com ავტორი: თეონა რამაზაშვილი