tvati

საქართველოს ეტლით მოფარიკავე ქალთა ნაკრებმა პარიზში მიმდინარე ეტლით მოფარიკავეთა ევროპის ჩემპიონატზე მოიპოვა ბრინჯაოს მედალი. ირმა ხეცურიანი, ნინა თაბილაშვილი და გვანცა ზადილშვილი ნახევარ-ფინალში დამარცხდნენ პოლონეთის ნაკრებთან – ანგარიშით 43:45, ამ გზით, ისინი ოქროს მედლისთვის ბრძოლას გამოეთიშნენ, თუმცა შეძლეს მოეპოვებინათ ბრინჯაოს მედალი. იქამდე, ირმა ხეცურიანმა და ნინა თიბილაშვილმა ხმლით ფარიკაობის ინდივიდუალურ შეჯიბრში მოიპოვეს ვერცხლის მედლები. ირმა ხეცურიანი ფინალში იტალიელ როსინა პასკუინოსთან დამარცდა ანგარიშით – 15:9, ნინა თიბილაშვილი კი, პოლონელ კინგა დროჟდთან ანგარიშით – 15:7. ნეტგაზეთი

სომხეთის საგარეო საქმეთა მინისტრმა, არარატ მირზოიანმა თურქეთში ვიზიტის დროს ადგილობრივ ტელეარხთან ევროკავშირზე ისაუბრა და აღნიშნა, რომ სომხეთი გაწევრიანების პერსპექტივას განიხილავს. სომხეთსა და ევროკავშირს შორის ურთიერთობების დაახლოების შესახებ კითხვაზე, მან აღნიშნა, რომ ქვეყანა აგრძელებს სხვადასხვა სფეროში ურთიერთობების გაღრმავებას როგორც ევროკავშირთან, ასევე ევროპულ ქვეყნებთან. პუბლიკა

თბილისის მერიის ინფორმაციით, ვარკეთილის მეტროსადგურის რეაბილიტაციის ვადა შესაძლოა გახანგრძლივდეს. როგორც „ინტერპრესნიუსს“ მერიაში განუცხადეს, ამ ეტაპზე, მიმდინარეობს ჭერის მასალებისა და სამაგრი დეტალების საინჟინრო დამუშავება, რის შემდეგაც, განახლდება ჭერის მოპირკეთების სამუშაოები. „თავდაპირველად, მეტროსადგურ “ვარკეთილის” სრული რეაბილიტაციის სამუშაოებს აწარმოებდა შპს “მამისონი”, რომელთანაც ხელშეკრულება გაუქმდა პირობების შეუსრულებლობის გამო. 2022 წლის 21 დეკემბერს თბილისის სატრანსპორტო კომპანიამ სახელმწიფო შესყიდვების კანონის მე-10 პრიმა მუხლის, მე-3 პუნქტის, “დ” ქვეპუნქტის საფუძველზე, რომელიც გულისხმობს სახელმწიფოებრივი და საზოგადოებრივი მნიშვნელობის ღონისძიების შეზღუდულ ვადებში შეუფერხებლად ჩატარების მიზნით შესყიდვას, გამარტივებული შესყიდვით გააფორმა ხელშეკრულება შპს „ბადა კონსთრაქშენთან“, რომელიც იყო ერთადერთი დაინტერესებული კომპანია. ხელშეკრულების ვადად განისაზღვრა 18 თვე, ხოლო ბიუჯეტი არის 13,8 მლნ ლარია. ხელშეკრულების პირობების თანახმად დაიგეგმა შესაბამისი სარემონტო და სადემონტაჟო სამუშაოები, რომელიც სრულდებოდა გეგმა-გრაფიკის მიხედვით. მს „ვარკეთილში" არსებული ჭერის დემონტაჟის შემდეგ, ჩატარდა რკინა-ბეტონის თაღის დეტალური სკანირება და კვლევა. კვლევის შედეგებიდან გამომდინარე, განხორციელდა ჭერის შეცვლილი გეომეტრიისა და დამაგრების კვანძების პროექტის განახლება. ამ ეტაპზე, მიმდინარეობს ჭერის მასალებისა და სამაგრი დეტალების საინჟინრო დამუშავება, რის შემდეგაც, მოხდება მათი შეკვეთა/მოწოდება და განახლდება ჭერის მოპირკეთების სამუშაოები. ამის პარალელურად, სარემონტო სამუშოები მიმდინარეობს ბაქანის ქვედა ნაწილში. ვინაიდან საჭირო გახდა დამატებითი კვლევების ჩატარება და პროექტის განახლება, მეტროსადგურის რეაბილიტაციის დასრულების ვადამ შესაძლოა გადაიწიოს გარკვეული ვადით“, - ნათქვამია მერიის მიერ „ინტერპრესნიუსისთვის“ მოწოდებულ ინფორმაციაში. ცნობისთვის, „ერთიანი ნაციონალური მოძრაობის” ანტიკორუფციული მიმართულების მდივნის, ვასო ურუშაძის ინფორმაციით, „ვარკეთილის მეტროს რეაბილიტაციისთვის კახი კალაძემ კომპანია ტენდერის გარეშე შეარჩია და ხელშეკრულება პირდაპირ მოლაპარაკების გზით გაუფორმა“. როგორც ურუშაძე აცხადებს, „ეს ყველაფერი არის გაფლანგული მილიონები“. იპნ

ჩვენ არჩევნებზე წავალთ დამოუკიდებლად- არასდროს ისე ოპტიმისტურად არ ვყოფილვარ განწყობილი, როგორც ვარ დღეს, არასდროს მქონია ისეთი ბრძოლის უნარი როგორც დღეს მაქვს, - ამის შესახებ პარტია „საქართველოსთვის“ლიდერმა, გიორგი გახარიამ ჟურნალისტებს განუცხადა. როგორც გახარიამა აღნიშნა, პარტია „საქართველოსთვის“ შეუძლებელი და „წითელი ხაზია“ „ნაციონალურ მოძრაობასთან“ რაიმე სახის კოალიცია. მისივე თქმით, ასევე კატეგორიულად მიუღებელია დღევანდელი სახის „ქართულ ოცნებასთან“კოალიცია, ამიტომ ურჩევნიათ, ოპოზიციაში დარჩნენ. „ჩვენ ვამბობთ, რომ ჩვენთვის კოალიცია სხვაა და თანამშრომლობა სხვა რამეა. კოალიცია კატეგორიულად მიუღებელია „ნაციონალურ მოძრაობასთან“, „წითელი ხაზია“, „ოცნება“ „ლურჯი ხაზია“ იმიტომ, რომ დღევანდელი „ოცნება“ მიუღებელია. დღეს, ერთის მხრივ, „ოცნება“, პროპაგანდისტულ სისტემას რომ გადახედოთ, გვიმტკიცებს, რომ ქვეყანაში არ არსებობს არჩევანი, არის მხოლოდ ბოროტი „ნაციონალური მოძრაობა“ და ვითომ კეთილი, სამართლიანი და პატრიოტი „ოცნება“. „ნაციონალური მოძრაობა“ გვეუბნება, რომ არა, არ არსებობს არჩევანი, არის მხოლოდ პროგრესული „ნაციონალური მოძრაობა“ და „რუსული ოცნება“. სინამდვილეში, ნამდვილი არჩევანი არის ამ ორი რადიკალური ძალის მიღმა. საქართველოს მოქალაქეებმა ეს უკვე დაინახეს იმიტომ, რომ ძალიან კარგად ხედავენ, „ნაციონალური მოძრაობის“, ამ რადიკალურ, ბრუტალურ რევანშისტულ განწყობებს და ძალიან კარგად ხედავენ „ოცნების“ რაღაც კორუმპირებულ , ინფანტილურ [დამოკიდებულებას]... ერთი ვერაფერი გააკეთეს. ამხელა ადამიანი დააბრუნეს, იძულებით გამოიყვანეს, აქტიურ პოლიტიკაში დააბრუნეს და რა? რაიმე პრობლემა გადაწყდა, რაიმე კითხვებს პასუხი გაეცა, მართვის სისტემა დაიხვეწა? პირიქით, გაურკვევლობის ხარისხის სულ უფრო და უფრო გაიზარდა“, - განაცხადა გიორგი გახარიამ. ამასთან, როგორც მან აღნიშნა, თუ ორი თვის წინ მმართველი პარტია ამბობდა, რომ რომ 60%იანი მხარდაჭერა აქვს, მაშინ მთავრობებს რატომ ცვლიან?! „მთავრობებს თუ ვცვლით, თავიდან რატომ ვამბობთ, რომ ჯერ შევცლით, მერე არ შევცვლით, მერე ისევ შევცვლით, მერე გავაგდებთ, ჩვენ ხომ საბავშვო ბაღში არ ვართ, ჩვენ ხომ მოქალაქეები ვართ. ჩვენ ვუყურებთ პროცესს და ვამბობთ, რომ მეგობრებო, რა ხდება?! - სინამდვილეში, ის იმედი, რომელიც საქართველოს მოქალაქეებს ჰქონდათ, რომ ივანიშვილის ნათლად, ხილულად გამოჩენა ოფიციალური თუ როგორც გინდათ დაარქვით, პოლიტიკაში დაბრუნება სიტუაციას დაალაგებდა, ქვეყანას დაამშვიდებდა, პირიქით, ქაოსია, პირიქით, უფრო მეტი არეულობაა. მე პასუხისმგებლობიანი ადამიანი ვარ, მე არავის არც კარგს ვუკარგავ და პრობლემებზეც ლაპარაკი არასდროს გამჭირვებია. მე ხომ ვხედავ, რომ შესაძლებლობების ფანჯარა ჩვენნაირი პოლიტიკური პარტიებისთვის იზრდება იმიტომ, რომ საქართველოს მოქალაქეები ხედავენ, რომ ვერაფერს ალაგებენ, „ნაციონალური მოძრაობა“ თავისუფალ ვარდნაშია, ვერ გაუგიათ რამდენად იშლებიან, „ოცნება“ კი, მაგალითად, თქვენ იცით, არჩევნებზე მარტო წავა, თუ „ხალხის“ ძალასთან ერთად, თუ კიდევ ვიღაცებს შემოიკრებს? ჩვენ ერთი წელია ვამბობთ, რომ ჩვენ არჩევნებზე წავალთ დამოუკიდებლად. შესაბამისად, ჩვენ ძალიან მყარად ვართ. არასდროს ისე ოპტიმისტურად არ ვყოფილვარ განწყობილი, როგორც ვარ დღეს, არასდროს მქონია ისეთი ბრძოლის უნარი როგორც მაქვს დღეს“, -განაცხადა გიორგი გახარიამ. ამასთან მან ისაუბრა მის გუნდთან დაკავშირებით, რომელსაც მისივე თქმით, მიუხედავად იმისა, რომ ხან ემუქრებიან, ხან სამსახურიდან აგდებენ, ბრძოლას აგრძელებენ. „ამიტომ, მე ვხედავ შესაძლებლობას, რომ არჩევნებზე ჩვენ დავასრულებთ ამ მანკიერ ერთმანეთთან ბრძოლას. ჩვენ არ გვინდა წარსულთან ომი, ჩვენ არ გვინდა გავაგრძელოთ შურისძიება“, - განაცხადა გახარიამ. მისივე თქმით, „უნდა მოხდეს ივანიშვილის დეინსტიტუციონალიზაცია“. „რა გგონიათ, გენიოსები არსებობენ, გჯერათ? - გენიოსები იბადებიან ას წელიწადში ერთხელ. ქვეყნის ყველა ფუნქციური ინსტიტუტის შეთავსება ერთ ადამიანს შეუძლია, რამდენადაც ჭკვიანი არ უნდა იყოს? როგორ გითხრათ, საპატიო თავმჯდომარეს რომ პრემიერ-მინისტრის წარდგენის უფლება აქვს, ეს უბრალოდ, არასწორია კი არა, ღიმილის მომგვრელია“, - განაცხადა გახარიამ. იპნ

გიორგი გახარიას სიტყვა პარტიის კონფერენციაზე ვიდეო: https://www.facebook.com/ForGeoGe/videos/957661155728548/

როგორ შეიძლება, პოლიტიკური ძალა, რომელიც ხელისუფლებაშია, ამბობდეს, რომ 60%-იანი მხარდაჭერა აქვს და მეორე მხრივ, ძრწოდეს იმის შიშით, რომ კონტროლს ვერ მოიპოვებს ცენტრალურ საარჩევნო კომისიაზე - იცით, რატომ მიდის რისკზე? საზოგადოებაში მხარდაჭერა არ აქვს და მისი პოლიტიკური რეიტინგები ისტორიულ მინიმუმზეა, - ამის შესახებ პარტია „საქართველოსთვის“ დეპუტატმა ბექა ლილუაშვილმა ჟურნალისტებს განუცხადა. კითხვაზე, რომ „ქართული ოცნება“ საარჩევნო კოდექსში შესატან ცვლილებებზე პრეზიდენტის ვეტოს დაძლევას აპირებს, ლილუაშვილი ამბობს, რომ „ეს არის დამფრთხალი ხელისუფლების ზრუნვა ძალაუფლების გახანგრძლივებაზე“. „როგორ შეიძლება, რომ პოლიტიკური ძალა, რომელიც ხელისუფლებაშია, ამბობდეს, რომ დღეს 60%-იანი მხარდაჭერა აქვს და მეორე მხრივ, ეშინოდეს, ძრწოდეს იმის შიშით, რომ კონტროლს ვერ მოიპოვებს ცენტრალურ საარჩევნო კომისიაზე და ვერ მოახდენს მის სრულ დაქვემდებარებას - ეს ორი ერთმანეთთან როგორ შეიძლება იყოს თანხვედრაში. შეუძლებელია, ხელისუფლებას, რომელიც თვლის, რომ 60%-იანი მხარდაჭერა აქვს, სჭირდებოდეს ცესკო-ს ტოტალური დაქვემდებარება. თუ ის მყარად დგას თავის მხარდაჭერაში, აბსოლუტურად თავისუფალ და სამართლიან საარჩევნო სისტემას შექმნის მიზანმიმართულად, რათა არჩევნების ლეგიტიმაციას რაიმე კითხვის ნიშანი არ ჰქონდეს. მაგრამ ამ რისკზე, იცით, რატომ მიდის? - საზოგადოებაში მხარდაჭერა არ აქვს და მისი პოლიტიკური რეიტინგები ისტორიულ მინიმუმზეა“,- განაცხადა ბექა ლილუაშვილმა. რაც შეეხება პარტიის - „საქართველოსთვის“ კონფერენციას, რომელიც დღეს იმართება, ლილუაშვილი ამბობს, რომ განიხილავენ როგორც საარჩევნო პროგრამას, ისე პარტიის პოლიტსაბჭოს შემადგენლობის ცვლილება. „გვაქვს პარტიული კონფერენცია, სადაც ორი ძირითადი მიმართულება იქნება წარდგენილი. პირველია საარჩევნო პროგრამის მნიშვნელოვანი ნაწილები, რაც მოიცავს სოციალურ ეკონომიკურ პოლიტიკას, კანონის უზენაესობის საკითხებს, ახალგაზრდულ პოლიტიკას, ქალთა გაძლიერების პოლიტიკას და ა.შ. მეორე საკითხია პოლიტსაბჭოს შემადგენლობის ცვლილება და სხვა საკითხები, მათ შორის წინასაარჩევნო საკითხებიც, რომლებიც აუცილებლად უნდა გავიაროთ კონფერენციის ფორმატში. ამის შემდეგ გვექნება კიდევ ერთი კონფერენცია, სადაც საზოგადოებას ჩვენს გაძლიერებულ ახალ გუნდს წარვუდგენთ“,- განაცხადა ბექა ლილუაშვილმა. იპნ

2024 წლის 9 მარტს გაიმართა მოქალაქეთა პოლიტიკური გაერთიანება (პარტია) „გახარია საქართველოსთვის“ პარტიული კონფერენცია, სადაც კონფერენციის დელეგატებს წარედგინათ პარტიის პროგრამული ხედვა - „ევროპული კეთილდღეობა საქართველოსთვის“. შეხვედრაზე გუნდის ლიდერმა გიორგი გახარიამ მიმართა კონფერენციის წევრებს და განაცხადა: დემოკრატიულად ჩატარებული თავისუფალი არჩევნებით საქართველო კიდევ ერთხელ დაუმტკიცებს მსოფლიოს, რომ საქართველო უკვე დღეს იმსახურებს ევროპული ოჯახის სრულფასოვან წევრობას. ჩვენი როლი ამ პროცესში არის ნათელი - ვერთიანდებით საქართველოსთვის და ყველას წინააღმდეგ, ვინც საფრთხეს უქმნის ქვეყნის ევროპულ მომავალს! საპარლამენტო პოლიტიკური ჯგუფის „საქართველოსთვის“ თავმჯდომარემ ბექა ლილუაშვილმა კონფერენციის დელეგატებს წარუდგინა პარტიის სოციალურ-ეკონომიკური ხედვა და ამ ხედვის მთავარი პრინციპები და მიზანი: „კეთილდღეობა ყველას სჭირდება და იგი არ არის პრივილეგირებული, მცირე ჯგუფებში შემავალი ადამიანების უპირატესობა; ჩვენი სტრატეგული მიზანია ეკონომიკის სწრაფი ინტეგრაცია ევროკავშირში და ევროპული კეთილდღეობის შექმნა ქვეყანაში.“ პარტიის თავმჯდომარის მოადგილემ ნათია მეზვრიშვილმა კონფერენციის მონაწილეებს გააცნო პარტიის ხედვა „სამართლიანი წესრიგი საქართველოსთვის“, რომელიც მოიცავს ხედვას კორუფციის წინააღმდეგ ბრძოლის, დამოუკიდებელი და ეფექტიანი მართლმსაჯულების, ნარკოპოლიტიკის, პროფესიული და დეპოლიტიზირებული საჯარო სამსახურის და ადამიანის უფლებათა დაცვის შესახებ. პოლიტიკური საბჭოს წევრმა, საქართველოს პარლამენტის დეპუტატმა ანა ბუჩუკურმა ისაუბრა ევროკავშირში გაწევრიანების მნიშვნელობაზე და გაწევრიანებისთვის საჭირო აუცილებელ ნაბიჯებზე და აღნიშნა, რომ საქართველო აუცილებლად უნდა გახდეს მიმდინარე გაფართოების ციკლში ევროკავშირის სრულუფლებიანი წევრი. ინიციატივები უკეთესი თბილისისთვის - როგორ აპირებს გიორგი გახარიას გუნდი თბილისის ევროპული, ღია ტიპის მმართველობად გარდაქმნას, კორუფციასთან და ნეპოტიზმთან ბრძოლას, თბილისის ისტორიული იერსახის შენარჩუნებას და სატრანსპორტო პოლიტიკის გაუმჯობესებას - ამ თემაზე კონფერენციის დელეგატებს სიტყვით თბილისის საკრებულოს დეპუტატმა გიორგი შარაშიძემ მიმართა. პარტიის „გახარია საქართველოსთვის“ ახალგაზრდული ორგანიზაციის თავმდჯომარემ, მესტიის საკრებულოს წევრმა ვიკა ფილფანმა წარმოადგინა ახალგაზრდული ორგანიზაციის პრიორიტეტები და ახალგაზრული პოლიტიკის დოკუმენტი - „სამართლიანი, ევროპული შესაძლებლობები ახალგაზრდებისთვის“. „გახარია საქართველოსთვის“ ქალთა ორგანიზაციის ხელმძღვანელმა ტატა ხვედელიანმა ისაუბრა ქალების პოლიტიკაში ჩართვის მნიშვნელობასა და მათი ეკონომიკური გაძლიერების აუცილებლობაზე. მან აღნიშნა, რომ მზადდება საკანონმდებლო ცვლილების პროექტი, რომელიც მოიცავს ქალთა ეკონომიკური გაძლიერების, ქალთა ბიზნესისა და სოციალური მეწარმეობის ხელშეწყობის რეგულაციებს. კონფერენციაზე პარტიის ლიდერებმა რეგიონალური გუნდის ლიდერებს და პარტიის სხვა წევრებს მოუსმინეს და მათს სამომავლო ხედვებსა და საჭიროებებზე ისაუბრეს.

თბილისში მშენებარე კორპუსიდან მუშა გადმოვარდა, რომელიც ადგილზევე დაიღუპა. შემთხვევა თემქაზე მოხდა. არსებული ინფორმაციით, ახალგაზრდა მამაკაცი მე-10 სართულიდან გადმოვარდა. მომხდარის შესახებ ინფორმაციას შსს ადასტურებს და აცხადებს, რომ მომხდართან დაკავშირებით მიმდინარეობს გამოძიება. იპნ

უკრაინაში, რუს ოკუპანტებთან ბრძოლას ქართული ლეგიონის კიდევ ორი მებრძოლი ემსხვერპლა. ამის შესახებ ინფორმაციას „ქართული ლეგიონი“ ავრცელებს. მათივე ცნობით, გარდაცვლილები არიან ნოდარ ნასიროვი და გიორგი გოგიაშვილი. „ფრონტის ხაზზე საბრძოლო დავალების შესრულების დროს ქართული ლეგიონის მეომრები, ნოდარ ნასიროვი და გიორგი გოგიაშვილი დაიღუპნენ. “ქართული ლეგიონი“ სამძიმარს უცხადებს გარდაცვლილთა ოჯახებს. დიდება გმირებს!“,- აღნიშნულია „ქართული ლეგიონის“ მიერ გავრცელებულ ინფორმაციაში. ipn

სამწუხაროდ, ჩემი ბრალიც არის, ჩვენი ბრალიც არის, დღეს საქართველოში ფუნქციონირებს ერთადერთი ინსტიტუტი და ამ ინსტიტუტს ჰქვია ივანიშვილი.სხვა ყველა ინსტიტუტი ფუნქციურად გაუქმებულია, დისფუნქციურია. ახალა, ყოფილი პრემიერი ახალ პრემიერს, მიმდინარე პრემიერს რაღაცაში ეხმალავება, არანაირი მნიშვნელობა ამას არ აქვს, - ამის შესახებ პარტია „საქართველოსთვის“თავმჯდომარემ, გიორგი გახარიამ ჟურნალისტებს განუცხადა. გახარიამ დასმული კითხვის, თუ რა აზრი აქვს ყოფილი და მოქმედი პრემიერ-მინისტრების დაპირისპირებაზე, აღნიშნა, რომ ამის უკან არანაირი შინაარსი არ არის. „სინამდვილეში, რომ გითხრათ არ მაინტერესებს-მეთქი, ცოტა უხეში [ნათქვამი] იქნება. მერწმუნეთ, ამის უკან არანაირი შინაარსი არ არის იმიტომ, რომ მე ამ კაბინეტში მიმუშავია, ჩემდა სამწუხაროდ, ეტაპობრივად ბოლო სამი წლის განმავლობაში „ქართულმა ოცნებამ“ ყველა ინსტიტუტი შინაარსისგან დაცალა. პარლამენტი დაცალა, პრეზიდენტი საერთოდ შეზღუდა, კონსტიტუცია ხომ საერთოდ გააუქმა. საბოლოო ჯამში, ქვეყანაში დარჩენილი იყო ერთადერთი ინსტიტუტი, პრემიერის ინსტიტუტი, რომელიც ასე თუ ისე ფუნქციონირებდა. დღეს, რაც ხდება, რასაც ვხედავთ, პრემიერის ინსტიტუტსაც, ფაქტობრივად, ყველანაირი აზრი დაუკარგეს. რა მნიშვნელობა აქვს, სიმართლე თუ გინდათ, არც მახსოვს, ვინ არის და ვინ იყო ეს პრემიერი. სამწუხაროდ, ასეა. მე ჩემ თავზეც ბევრჯერ მითქვამს, ეს კალეიდოსკოპი უნდა დასრულდეს, არ შეიძლება მაღალი პოლიტიკური თანამდებობის პირებს სრულად არ ჰქონდეთ გააზრებული პოლიტიკური პასუხისმგებლობა და არ შეიძლება მაგალითად, თუნდაც დღეს, მაღალი პოლიტიკური თანამდებობის პირები, არა მხოლოდ პრემიერები, არ ვიცი, ვიღაც-ვიღაცები ამბობდნენ, რომ, აი, საპატიო თავმჯდომარე განსაზღვრავს მინისტრი ვინ იქნება. მეგობრებო, საქართველოში არსებობს კონსტიტუცია, ძალთა ბალანსი, საერთოდ პარტიას არავინ ეკითხება პრემიერი ვის დანიშნავს თავის კაბინეტში. ყველაფრის ასე თავდაყირა დაყენება არის სახიფათო იმიტომ, რომ როდესაც ქვეყანაში ინსტიტუტები დისფუნქციურია, ვეღარ ასრულებენ დაზღვევის ფუნქციას და ელემენტარულად, საბოლოო ჯამში, ყველაფერი ერთ ადამიანზეა ჩამოკიდებული. ჩვენ, ყველა უნდა შევთანხმდეთ მოგვწონს ეს, თუ არ მოგვწონს, სამწუხაროდ, ჩემი ბრალიც არის, ჩვენი ბრალიც არის, დღეს საქართველოში ფუნქციონირებს ერთადერთი ინსტიტუტი და ამ ინსტიტუტს ჰქვია ივანიშვილი. სხვა ყველა ინსტიტუტი ფუნქციურად გაუქმებულია, დისფუნქციურია უბრალოდ და ახალა, ყოფილი პრემიერი ახალ პრემიერს, მიმდინარე პრემიერს რაღაცაში ეხმალავება, არანაირი მნიშვნელობა ამას არ აქვს“, - განაცხადა გიორგი გახარიამ. ამასთან, მისივე თქმით, მთავარი არის პრიორიტეტები, რადგანაც ის, რომ საქართველო გახდეს ევროკავშირის სრულფასოვანი ოჯახის წევრი მხოლოდ პოლიტიკური მიღწევა არ არის, რა თქმა უნდა, ეს არის ქვეყნისთვის უზარმაზარი შესაძლებლობების ფანჯრის გახსნა. „ამიტომ, ჩვენ ეს ყველაფერი უნდა გამოვიყენოთ იმისთვის, რომ თითოეულ ოჯახზე აისახოს ეს კეთილდღეობა, ევროპული კეთილდღეობა ხელმისაწვდომი არ უნდა იყოს, მხოლოდ და მხოლოდ, რამდენიმე ელიტარული ოჯახისთვის, ეს უნდა იყოს ყველასთვის ხელმისაწვდომი და ეს ყველაფერი ხელმისაწვდომი უნდა იყოს აქ, ამ ქვეყანაში. ხალხი არ უნდა გარბოდეს ემიგრაციაში იმისთვის, რომ ღირსეული ხელფასი, ღირსეული სოციალური დაცვა, ჯანდაცვა, განათლება და კიდევ ბევრი რამ ჰქონდეს“, -განაცხადა გახარიამ. ipn

ბათუმში 20 წლის ნიკა ცეცხლაძეს ეძებენ. არსებული ინფორმაციით, ახალგაზრდა მამაკაცი ბოლოს ხუთი დღის წინ ნახეს. სამძებრო სამუშაოებში სამართალდამცავებიც არიან ჩართული. ოჯახი მოქალაქეებს მიმართავს და 20 წლის ბიჭის პოვნის შემთხვევაში, 112-ზე დარეკვას სთხოვენ. იპნ

ყველაზე მთავარი პროპაგანდისტი ამ ქვეყანაში არის „ქართული ოცნება“. ჯამში რომ აიღოთ, როგორ პროპაგანდას ეწევა თავად „ოცნება“, რამდენჯერ ახსენებს ლგბტ-ს, რამდენჯერ ახსენებს ერთსქესიანთა ქორწინებას, ზოგჯერ მრჩება შთაბეჭდილება, რომ ზოგიერთ მათგანს და ზოგიერთ პროპაგანდისტს სიამოვნებს ეს ყველაფერი, - ამის შესახებ პარტია „საქართველოსთვის“ ერთ-ერთმა ლიდერმა ანა ბუჩუკურმა სექსუალურ უმცირესობასთან დაკავშირებით და ამ მიმართულებით მმართველი პარტიის ინიციატივასთან დაკავშირებით განაცხადა. მისი თქმით, ყველანაირი პროპაგანდა ცუდია, განსაკუთრებით ბავშვებით მიმართ განხორციელებული პროპაგანდა. „ჩვენი გუნდის პოზიცია თქვენ იცით, პირველი, ყველა პროპაგანდა არის ცუდი. მეორე ის რომ, მით უფრო ბავშვების მიმართ განხორციელებული პროპაგანდა არის განსაკუთრებულად და კატეგორიულად მიუღებელი. ყველაზე მთავარი პროპაგანდისტი ამ ქვეყანაში არის „ქართული ოცნება“. ჯამში რომ აიღოთ, როგორ პროპაგანდას ეწევა თავად „ოცნება“, რამდენჯერ ახსენებს ლგბტ-ს, რამდენჯერ ახსენებს ერთსქესიანთა ქორწინებას, ზოგჯერ მრჩება შთაბეჭდილება, რომ ზოგიერთ მათგანს და ზოგიერთ პროპაგანდისტს სიამოვნებს ეს ყველაფერი. წარმოადგინონ როგორ აპირებენ საკუთარი პროპაგანდისგან ბავშვების დაცვას, რატომ მალავენ ამ კანონპროექტს და მეორე, კიდევ უფრო სერიოზული თემა არის ის, რატომ გაახსენდათ ბავშვები ახლა?! სირცხვილია, ხან ეკლესიას ამოეფარნენ, ახლა ბავშვებს ამოეფარნენ, ხან ოჯახის ღირებულებებს ამოეფარნენ, ნუ იმალებიან! წარმოადგინონ პროექტი“,- განაც ხადა ანა ბუჩუკურმა. იპნ

უკრაინისთვის დახმარების წვეთ-წვეთად გადაცემა აღარ მუშაობს, ძლიერი გადაწყვეტილებები - ომის დასასრულია, - ამის შესახებ უკრაინის საგარეო საქმეთა მინისტრმა დმიტრო კულებამ ლიეტუვაში ესტონელ, ლიეტუველ, ლატვიელ და ფრანგ კოლეგებთან გამართულ პრესკონფერენციაზე განაცხადა. „დღეს ერთი რამ არის ნათელი, და ეს სიმწრითა და სიფხიზლით უნდა ვაღიაროთ. მინდა, რომ ყველა ჩვენმა პარტნიორმა იცოდეს: უზომოდ მადლიერები ვართ იმისთვის, რაც უკრაინისთვის გააკეთეთ, მაგრამ უკრაინისთვის დახმარების წვეთ-წვეთად გადაცემა აღარ მუშაობს. ის დასრულდა. თუ ყველაფერი ისე გაგრძელდება, როგორც ახლა ხდება, ყველა ჩვენგანისთვის ეს კარგი არაფრით არ დასრულდება. აუცილებელია ყველა სახის იარაღისა და ამუნიციის შეუფერხებელი და დროული მიწოდებები, რათა უკრაინამ რუსეთი დაამარცხოს და ევროპაში ომი უშუალოდ მასზე არ გავრცელდეს”,-განაცხადა კულებამ. უკრაინის საგარეო საქმეთა მინისტრის თქმით, საჭიროა ახალი რეალობის მიღება, რომ ევროპაში მშვიდობის ეპოქა დასრულდა. „ეს, ჩემი აზრით, ის გზავნილია, რომლამდეც პარიზი მივიდა, როდესაც ერთი კვირის წინ სამიტი მოიწვია: ვისაც არ სჯერა, რომ ომი უკრაინის ფარგლებს გარეთაც შეიძლება მოხდეს, გავრცელდეს ტერიტორიაზე, რომელიც ამ დროისთვის ნატო-ს ტერიტორიაა, გთხოვთ, გაიღვიძეთ, ისტორიის სახელმძღვანელოები წაიკითხეთ, მოუსმინეთ, რას ამბობს ახლა პუტინი და 10 განსხვავება იპოვეთ. ვერ იპოვით”, - განაცხადა კულებამ. იპნ

უკრაინის საჰაერო ძალების ინფორმაციით, რუსების მიერ გაშვებული Shahed-ის ტიპის 12 დრონი ჩამოაგდეს. უკრაინის საჰაერო ძალების ცნობით, რუსებმა უკრაინის მიმართულებით სულ 15 დრონი გაუშვეს. უკრაინელებმა რუსული დრონები დნეპროპეტროვსკის, დონეცკისა და პოლტავის ოლქებში ჩამოაგდეს. იპნ

ადიგენში რელიგიური ნიშნით დაპირისპირება მოხდა. გუშინ ათობით პირი დაბა ადიგენთან მივიდა და მუსლიმებს ლოცვის ჩატარების საშუალება არ მისცა. ადგილიდან ვიდეო გაავრცელა გამოცემა ბათუმელებმა, სადაც ჩანს სახლთან შეკრებილი მოქალაქეები, რომელთა შორის არიან სასულიერო პირებიც. ისინი სიტყვიერ შეურაცხყოფას აყენებენ სახლში მყოფ პირს და მოითხოვენ, რომ მან სახლი დატოვოს. როგორც გამოცემა ბათუმელები წერს, დაპირისპირების მოხდა იუსუფ მიქელაძის საკუთრებაში არსებულ სახლთან, სადაც ბოლო წლებია ადიგენში მცხოვრები მუსლიმები იკრიბებიან და პარასკევის ლოცვას აღავლენენ, რასაც მოსახლეობის ნაწილი, მათ შორის სასულიერო პირები აპროტესტებენ. პუბლიკა

“ქალთა მოძრაობა” გაუპატიურების შესახებ კანონში ცვლილებების შეტანას ითხოვს. უფრო კონკრეტულად, უფლებადამცველები აცხადებენ, რომ გაუპატიურების ის დეფინიცია, რომელიც კანონში წერია, არასწორია – არ მოიცავს ყველა იმ შემთხვევას, რომელიც ფაქტობრივად არის გაუპატიურება. შესაბამისად, მთელ რიგ შემთხვევებში, დამნაშავე დაუსჯელი რჩება. “ქალთა მოძრაობის” წევრები აცხადებენ, რომ გაუპატიურების შესახებ კანონმდებლობის დახვეწა და მისი საერთაშორისო სტანდარტებთან შესაბამისობა უფლებრივი საკითხია და არ შეიძლება ამ თემით პოლიტიკური მანიპულირება. “ქალთა მოძრაობა” და ქალთა უფლებებზე მომუშავე ორგანიზაციები წლებია მოითხოვენ გაუპატიურების დეფინიციის შეცვლას. საერთაშორისო და ადგილობრივი ორგანიზაციების ძალისხმევით გადამზადდნენ სამართალდამცველები, შეიქმნა სახელმძღვანელოები, არსებობს შესაბამისი კანონპროექტიც. გარდა ამისა, “ქალთა მოძრაობამ” ჩაატარა არაერთი აქცია-პერფორმანსი ამ საკითხის ადვოკატირებისთვის. ფოტო: Shalika Studio ნეტგაზეთი

8 მარტს, ქალთა უფლებების დაცვისა და სოლიდარობის საერთაშორისო დღეს, საქართველოს ახალგაზრდა იურისტთა ასოციაცია (საია) იმ გამოწვევებზე საუბრობს, რომლებიც დღეს ქალებს საქართველოში აქვთ. ოჯახში ძალადობა, სექსუალური ძალადობა, სოციალური-ეკონომიკური გამოწვევები, ხელმისაწვდომობა მართლმსაჯულებაზე – საია დეტალურად აღწერს ამ და სხვა მიმართულებით არსებულ სისტემურ პრობლემებს. ქალთა მიმართ და ოჯახში ძალადობა საიას ინფორმაციით, 15-69 წლის ასაკის ქალების 50,1%-ს ცხოვრების განმავლობაში ძალადობის ერთი ფორმა მაინც გამოუცდია. ქალების 22,9%-ს გამოუცდია ძალადობა პარტნიორის მხრიდან. საია ყურადღებას ამახვილებს იმ წინასწარგანწყობებზე, სტერეოტიპებსა და სტიგმაზე, რომლის გამოც ძალადობის გამოცდილების მქონე ქალები საერთოდ არ მიმართავენ სამართალდამცავ უწყებებს. ამ პრაქტიკის მიზეზად სახელდება პოლიციისადმი უნდობლობა და მოძალადის მხრიდან შურისძიების შიშიც. სექსუალური ძალადობა — გენდერული ძალადობის ერთ-ერთ ყველაზე მძიმე, დაფარული და დაუსჯელი ფორმა მთავარი პრობლემა არის ის, რომ სექსუალურ ძალადობასთან დაკავშირებული ეროვნული კანონმდებლობა არ შეესაბამება საერთაშორისო სტანდარტებს. ორგანიზაცია საუბრობს გაუპატიურების მსხვერპლი ქალებისთვის განკუთვნილ კრიზისული და რეფერირების ცენტრების ნაკლებობაზე. ასევე, მათთვის ფსიქოლოგიური თუ სხვა სახის გადაუდებელი სამედიცინო დახმარების უზრუნველყოფის საჭიროებაზე. მნიშვნელოვანი გამოწვევაა ქალების სექსუალური შევიწროება. ორგანიზაციის ინფორმაციით, 15-69 წლის ქალების 24.5%-ს ცხოვრების მანძილზე ერთხელ მაინც გამოუცდია სექსუალური შევიწროება. ორგანიზაცია ყურადღებას ამახვილებს პარლამენტის წევრების მხრიდან ქალების სექსუალური შევიწროების შემთხვევებზეც: „ოცნების“ წევრმა ირაკლი ბერაიამ თეონა აქუბარდიას სიტყვიერი შეუარაცხყოფა მიაყენა წითლიძემ ღუდუშაურს პარლამენტში დებილი უწოდა, მან ქალ დეპუტატს სექსისტური ფრაზით უპასუხა მართლმსაჯულების ხელმისაწვდომობა საიას თქმით, მართლმსაჯულების სისტემა არ არის ორიენტირებული მსხვერპლ ქალსა და მის საჭიროებებზე. ამის მაგალითად მოჰყავთ პოლიციის მხრიდან კონტექსტუალური მტკიცებულებების იგნორირება და პირდაპირი მტკიცებულებების მოლოდინი. მაშინ, როცა ბევრ შემთხვევაში, განსაკუთრებით, სქესობრივი დანაშაულების დროს, მსგავსი პირდაპირი მტკიცებულებების არსებობა, ფაქტობრივად, შეუძლებელია. საია ყურადღებას ამახვილებს სამხარაულის ბიუროს თანამშრომელთა კვალიფიკაციის ნაკლებობასა და მათ არამგრძნობიარე დამოკიდებულებაზე დაზარალებული ქალების მიმართ. ადამიანის უფლებათა ევროპული სასამართლოსა და გაეროს ქალთა კომიტეტის რეკომენდაციების შეუსრულებლობა საიას შეფასებით, სახელმწიფო სტრუქტურები ცდილობენ თავი აარიდონ საერთაშორისო სასამართლოების რეკომენდაციების შესრულებას და არ დასაჯონ ის ადამიანები, ვისი არასწორი მოქმედების ან უმოქმედობის გამო მოხდა ქალის მიმართ კონკრეტული დანაშაული. სექსუალური და რეპროდუქციული ჯანმრთელობა და უფლებები ამ მიმართულებით საია ყურადღებას ამახვილებს ჯანდაცვის აწ უკვე ყოფილი მინისტრის, ზურაბ აზარაშვილის გადაწყვეტილებაზე, რომელმაც მოულოდნელად შეიტანა ცვლილებები აბორტის შესახებ კანონში. გენდერული თანასწორობის სოციალურ-ეკონომიკური განზომილება “ქალები, განსაკუთრებით სოფლად, უფრო მოწყვლადები არიან სიღარიბის მიმართ და მეტ ბარიერს აწყდებიან რესურსებზე წვდომის თვალსაზრისით. დაბალია ქალების დასაქმების და ეკონომიკური აქტივობის მაჩვენებლები კაცებთან შედარებით. ამასთან, არაპროპორციულად არის განაწილებული აუნაზღაურებელი შინ შრომის ტვირთი ქალებსა და კაცებს შორის, რაც ზრუნვის სერვისებზე ხელმისაწვდომობის პრობლემასთან და დამკვიდრებულ სოციალურ ნორმებთან ერთად, კიდევ უფრო ართულებს ქალთა ეკონომიკურ გაძლიერებას”, — აცხადებენ საია-ში. ნეტგაზეთი

8 მარტს, ქალთა უფლებების დაცვისა და სოლიდარობის საერთაშორისო დღეს, პრეზიდენტმა სალომე ზურაბიშვილმა ხუთი ქალი ღირსების მედლით დააჯილდოვა. დაჯილდოების ცერემონია ორბელიანის სასახლეში გაიმართა. ღირსების მედლით დაჯილდოვდნენ: ბაია პატარაია (ფემინისტი, უფლებადამცველი, ორგანიზაცია “საფარის” აღმასრულებელი დირექტორი) – ქალთა გაძლიერების, გენდერის ნიშით ძალადობის ბრძოლის საქმეში შეტანილი განსაკუთრებული წვლილისათვის, არაძალადობრივი გარემოს ჩამოყალიბების ხელშეწყობისათვის; ანა არგანაშვილი (იურისტი, უფლებადამცველი) – ბავშვთა და შეზღუდული შესაძლებლობის მქონე ქალთა უფლებების დაცვის, ძალადობისა და დისკრიმინაციის წინააღმდეგ ბრძოლის საქმეში შეტანილი განსაკუთრებული წვლილისთვის; თამუნა მუსერიძე (ორგანიზაციის “ვეძებ” დამფუძნებელი) – განსაკუთრებული სამოქალაქო ინიციატივისა და პასუხისმგებლობისთვის, პიროვნული გამბედაობისა და გამორჩეული საზოგადოებრივი საქმიანობისთვის; ნატო შავლაყაძე და ელისო ამირეჯიბი (ძალადობისგან დაცვის ეროვნული ქსელის დამფუძნებლები) – გენდერის ნიშნით ძალადობის მსხვერპლ ქალთა დაცვის, მათ სოციალურ ინტეგრაციასა და ეკონომიკურ გაძლიერებაში შეტანილი განსაკუთრებული პირადი წვლილისათვის, ძალადობის წინააღმდეგ ბრძოლაში სისტემური ცვლილებების ადვოკატირებისა და ადამიანური რესურსის განვითარებისათვის გაწეული განსაკუთრებული ძალისხმევისათვის. ამავე დღეს, ორიველიანის სასახლეში გაიმართა ფოტოხელოვან ნათელა გრიგალაშვილის გამოფენა სერიიდან “მაღალმთანი აჭარის ცხოვრება”. “ჩემთვის დიდი პატივია ამ სასახლეში გამოფენის გაკეთება, რათა განახოთ იმ ქალბატონების ცხოვრება, რომელთაც ამ ფოტოებზე ხედავთ. ჩემი ეს სერია გახლავთ მაღალმთიანი აჭარის ცხოვრება და სწორედ ასეთი ძლიერი ქალები იბრძვიან ყოველდღიურობისთვის და თან ძალიან მხიარულებიც არიან, ძალიან ძლიერებიც არიან და შეუძლიათ თავის დამკვიდრება”, – განაცხადა ნათელა გრიგალაშვილმა გამოფენაზე, რომელიც პრეზიდენტმა და ქალთა საერთაშორისო დღესთან დაკავშირებულ მიღებაზე მოწვეულმა სტუმრებმა დაათვალიერეს. ნეტგაზეთი

შინაგან საქმეთა სამინისტროს საპატრულო პოლიციის დეპარტამენტის თანამშრომლებმა მთელი ქვეყნის მასშტაბით ქალბატონებს 8 მარტი მიულოცეს და ყვავილების თაიგულები გადასცეს. ამის შესახებ ინფორმაციას შსს ავრცელებს. უწყების ცნობით, სამართალდამცველებმა მათ უსაფრთხო გადაადგილება და წარმატება უსურვეს.

ქალთა მიმართ ძალადობა, ფემიციდი ანუ ქალთა მკვლელობა, ეს არის პირდაპირ სირცხვილი ქვეყნისთვის, როცა ასეთ მოვლენებთან გვაქვს საქმე, რაც პირდაპირ ეწინააღმდეგება ჩვენს კულტურას, იდენტობას და ყველა იმ ღირებულებას, რაც ჩვენ გვაერთიანებს, - ამის შესახებ პრეზიდენტმა სალომე ზურაბიშვილმა ქალთა დღისადმი მიძღვნილ ღონისძიებაზე განაცხადა. მისი თქმით, მნიშვნელოვანია პრობლემის გადაჭრა სკოლებიდან დაიწყოს. „ეს არის, ალბათ, მთავარი გამოწვევა, რომ ჩვენ შევძლოთ და დავძლიოთ ეს მძიმე სურათი. ეს ყველას საქმეა და თქვენც ხართ ბრძოლის ფრონტზე. ვისურვებ, რომ ამ დარბაზში მეტი კაცი დამენახოს, რადგან ეს არ არის მხოლოდ ქალების საქმე, ეს საზოგადოების საქმეა, ეს იწყება სკოლიდან და მე არ ვიცი, რამდენად სწორად მუშაობს ჩვენი განათლების სისტემა ამ მიმართულებით, რომ პირველივე წლებიდან ვასწავლოთ ის, რაც არის და იყო ჩვენთვის ინსტინქტური - ქალის მიმართ პატივისცემა და ოჯახის მიმართ პატივისცემა, რაშიც შედის ბავშვები და აღზრდის ფორმები და მეთოდები. მგონი, რომ ამას უნდა მივხედოთ პირველ რიგში, რადგან იქიდან იწყება ყველაფერი. ჩვენ ვცხოვრობთ მსოფლიოში, სადაც ბევრი გამოწვევაა და ძალადობა ბუნებრივიც გახდა, რადგან ყოველდღიურად და ყოველ წამს ვართ ზეწოლის ქვეშ. სტრესი არის ყველგან გავრცელებული, ცხადია ეს გადადის ოჯახზე და ვლინდება სასტიკ მოვლენებში. ეს არის ჩვენი საზოგადოების, მედიის პასუხისმგებლობა, რომ ის, რაც ესწავლება ბავშვებს და უნდა ესწავლებოდეს ჯერ ოჯახში, შემდეგ სკოლაში, მერე მედიაშიც დაინახონ, მოუსმინონ ფსიქოლოგებს. ხშირად გვიყვარს ვთქვათ, რომ სახელმწიფოს და ხელისუფლების გასაკეთებელია, არის მათი გასაკეთებელი ძალიან ბევრი, მაგრამ მაინც მთავარია ჩვენი ინდივიდუალური გასაკეთებელი და ადამიანების მოქალაქეობრივი აღზრდა არის ჩვენი ყველასი პასუხისმგებლობა“, - განაცხადა ზურაბიშვილმა. იპნ

საქართველოს პრეზიდენტი, სალომე ზურაბიშვილის პოლიტიკასა და ეკონომიკაში ქალების როლის გაძლიერებაზე საუბრობს. როგორც მან აღნიშნა, ქალების როლი პოლიტიკაში უნდა გაიზარდოს. „პოლიტიკაში ვერა და ვერ მივაღწიეთ იმას, რომ პარლამენტში ქალთა რაოდენობამ აიწიოს. ჩვენ ევროპასა და აზიაში ერთ-ერთი უკანასკნელი თუ არა ბოლო რიგებში მყოფი ქვეყანა ვართ. ეს არ ასახავს იმ მდგომარეობას, რაც აღვწერე და რაც არის საქართველოში, სადაც ქალები არიან ყველა სფეროში წინ, მაგრად და ძლიერად წარმოდგენილები. რატომ არ არიან პოლიტიკაში, პარლამენტში, მთავრობაში ცოტანი არიან, ეს არის იმ ზოგადი მდგომარეობის, ძალადობის შედეგი, რაც არსებობს. იმ მორალური ძალადობის, რაც პოლიტიკაში არსებობს. სიძულვილის ენა და არამხოლოდ, გამოხატულებები, რაც არსებობს და რაც ყველამ გამოვცადეთ, ყველამ ვიცით, და რაც ფაქტობრივად, ქალების შესვლას პოლიტიკაში აფერხებს. ისინი თავს იკავებენ, რომ ამ მდგომარეობაში არ აღმოჩნდნენ, რასაც ტელევიზიით ხედავენ და დიდად მიმზიდველი ახალგაზრდა ქალებისთვის არ არის. შედეგი კი გვაქვს სახეზე. მეორე მიმართულება სადაც არ არის სახარბიელო მდგომარეობა, ეს არის ეკონომიკა. ეკონომიკის კუთხით, ქალები, როგორც ქვეყანაში ქალთა ძალა ეკონომიკაში იმ დონესა და საფეხურზე არაა, სადაც უნდა იყვნენ. არც იმ ხელფასებით, რაც მათ უნდა ჰქონდეთ. ეს არ არის მხოლოდ საქართველოს პრობლემა, ყველა ქვეყანა იმისკენ იღვწის, რომ ხელფასები გათანაბრდეს. ჩვენ შორს ვართ და კიდევ ბევრია გასაკეთებელი. სოფლად მყოფი ქალებისთვის კიდევ უფრო მძიმე მდგომარეობაა, რამეთუ მათ ფინანსურ სახსრებთან ხელი რთულად მიუწვდებათ. ეს ვიცით, ამას ვიმეორებთ, თუმცა კანონმდებლობით ეს მდგომარეობა არ იცვლება, არ არის მიღებული ის ზომები, რომ მათ უფრო გაეხსნათ საშუალებები, თუნდაც კრედიტთან ხელმისაწვდომობის კუთხით. ეს მათ მისცემთ შესაძლებლობას, რომ დინამიკური წამოწყების უნარები, რაც მათ გააჩნიათ, გამოიყენონ და გამოიყენონ ამ ქვეყნის სასიკეთოდ“,- განაცხადა სალომე ზურაბიშვილმა. იპნ

საქართველოში თამაშდამოკიდებულების საკითხზე მომუშავე სარეაბილიტაციო ცენტრებისა და შესაბამისი კვალიფიციური პერსონალის დეფიციტია - ამჟამად ქვეყანაში მხოლოდ 3 სარეაბილიტაციო ცენტრი ფუნქციონირებს და სამივე თბილისშია (შპს „დღე პირველი“, შპს „კამარა“ და შპს „გამოსავალი“), - ამის შესახებ მოზარდებისა და ახალგაზრდების აზარტულ თამაშებზე დამოკიდებულების საკითხზე პარლამენტში შექმნილი თემატური მოკვლევის ჯგუფის ანგარიშშია ნათქვამი. დოკუმენტის თანახმად, ეს გარემოება ცხადყოფს, რომ დაინტერესებულ პირებს აქვთ გამოჯანმრთელების სერვისების ხელმისაწვდომობის პრობლემა, განსაკუთრებით − რეგიონებში. გარდა ამისა, დასკვნაში ნათქვამია, რომ არსებითი გამოწვევაა ამ სერვისების მაღალი ღირებულებაც. „სფეროში დაგროვილი პროფესიული გამოცდილება ცხადყოფს, რომ აზარტული თამაშების ხელმისაწვდომობის გონივრულ შეზღუდვასთან ერთად აუცილებელია თამაშდამოკიდებულ პირთა გამოჯანმრთელების გამართული სისტემისა და ინფრასტრუქტურის არსებობა. ქვეყნის მასშტაბით თამაშდამოკიდებულ პირთა გამოჯანმრთელების სერვისების შეზღუდული გეოგრაფიული ხელმისაწვდომობის გარდა, არსებითი გამოწვევაა ამ სერვისების მაღალი ღირებულება. კერძოდ, თამაშდამოკიდებული პირის სრულფასოვანი გამოჯანმრთელების პროგრამა საშუალოდ 6-7 თვის განმავლობაში მიმდინარეობს და მისი ყოველთვიური ღირებულება (თვიური გადასახადი) 1000-დან 2500 ლარამდეა. თამაშდამოკიდებულ პირთა გამოჯანმრთელების პროცესი საკმაოდ სპეციფიკურია. ის სპეციალურ კვალიფიციურ კადრებს, მათ მომზადებასა და გადამზადებას საჭიროებს. ამჟამად საქართველოში არ არსებობს ერთიანი გაიდლაინი ან/და გამოჯანმრთელების მეთოდოლოგია, მკაფიოდ ჩამოყალიბებული სისტემა აღნიშნული სპეციალისტების საქმიანობასთან დაკავშირებით. აგრეთვე არ ხორციელდება ამ საქმიანობის მონიტორინგი, კონტროლი და შეფასება. საყურადღებოა, რომ გამოჯანმრთელების პროცესში ჩართულმა არაკვალიფიციურმა პერსონალმა შეიძლება ბენეფიციარებს სირთულეები შეუქმნას. მაგალითად, შესაძლებელია პაციენტის ფსიქიკური მდგომარეობა დამძიმდეს და მას უიმედობის განცდა გაუჩნდეს. გამოწვევაა თამაშდამოკიდებულ პირთა გამოჯანმრთელების სერვისებთან დაკავშირებით მათი და მათი ოჯახის წევრების გათვითცნობიერებულობის დაბალი დონე, აგრეთვე ამ სერვისების შესახებ ინფორმაციის მოძიების სირთულე,“ - აღნიშნულია დოკუმენტში. ამავე ანგარიშის თანახმად, დაავადებათა კონტროლისა და საზოგადოებრივი ჯანმრთელობის ეროვნული ცენტრისთვის სტატისტიკური მონაცემების მიწოდება სათანადოდ არ ხორციელდება. „საქართველოში გამოიყენება ჯანდაცვის მსოფლიო ორგანიზაციის დაავადებათა საერთაშორისო კლასიფიკაციის მე-10 გადახედვა, რომლის მიხედვით, აზარტულ თამაშებთან დაკავშირებულ აშლილობებს მინიჭებული აქვს კოდი F63.0. ამ დაავადების დიაგნოსტირება და სსიპ − ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრისთვის სტატისტიკური მონაცემების მიწოდება სათანადოდ არ ხორციელდება. მაგალითად, ამბულატორიული სერვისის მიმწოდებელ დაწესებულებებში დაავადებათა ახალი შემთხვევების ელექტრონულ სისტემაში 2022 წელს F63.0 კოდით მხოლოდ 9 შემთხვევაა დაფიქსირებული. ამის მიზეზი, ერთი მხრივ, შეიძლება იყოს ის, რომ პირველადი ჯანდაცვის ექიმები აზარტულ თამაშებთან დაკავშირებული აშლილობების გამოვლენასა და დიაგნოსტირებაში კომპეტენტური არ არიან, და, მეორე მხრივ, − ის, რომ ამ პრობლემის მქონე პაციენტები ძირითადად მიმართავენ კერძო პრაქტიკით დაკავებულ სპეციალისტებს (ფსიქოლოგებს), რომელთაც არ აქვთ სპეციალიზებული სტატისტიკური ფორმების შევსების ვალდებულება,“- აღნიშნულია დასკვნაში. მოზარდებისა და ახალგაზრდების აზარტულ თამაშებზე დამოკიდებულების საკითხზე თემატური მოკვლევის ჯგუფი პარლამენტის სპორტისა და ახალგაზრდულ საქმეთა კომიტეტის ფარგლებში გასული წლის 7 ივნისს ჩამოყალიბდა და პარლამენტს საკუთარი დასკვნა წარუდგინა, რომელიც პარლამენტის ვებ-გვერდზე გამოქვეყნდა. იპნ

მთავრობის ადმინისტრაციის შესასვლელთან დამონტაჟებული რკინის კონსტრუქცია მოხსნეს. როგორც „ინტერპრესნიუსს“ მთავრობის ადმინისტრაციაში განუცხადეს, შენობის გარშემო რკინის ღობის მოხსნის გადაწყვეტილება პრემიერ-მინისტრმა ირაკლი კობახიძემ მიიღო. როგორც ცნობილია, მთავრობის ადმინისტრაციის წინ არსებულ ტერიტორიაზე სკვერის მოწყობის შესახებ ინფორმაცია გასული წლის აპრილში გავრცელდა. მოგვიანებით შენობის გარშემო რკინის ღობე აღიმართა და სკვერის მოწყობის სამუშაოები დაიწყო. იპნ

პარლამენტმა „საჯარო დაწესებულებაში შრომის ანაზღაურების შესახებ“ კანონში ცვლილება მესამე მოსმენით, 77 ხმით მიიღო. სახელმწიფო-პოლიტიკური თანამდებობის პირების ანაზღაურების წესთან დაკავშირებული ცვლილების თანახმად, კანონპროექტით განსაზღვრული სახელმწიფო-პოლიტიკური თანამდებობის პირებისთვის კონკრეტული თანამდებობრივი სარგოს კანონით განსაზღვრულ კოეფიციენტებთან შესაბამისობაში მოყვანა ხდება. შესაბამისად, აღნიშნული თანამდებობის პირების ანაზღაურება განისაზღვრება იმ კოეფიციენტების საბაზო თანამდებობრივ სარგოზე ნამრავლით, რომელიც კანონით არის განსაზღვრული. საკანონმდებლო ცვლილებით წესრიგდება შემდეგი პოლიტიკური თანამდებობის პირების ანაზღაურების წესი: საქართველოს პრეზიდენტის, პრემიერ-მინისტრის, მინისტრის/სახელმწიფო მინისტრის, ავტონომიური რესპუბლიკის უმაღლესი საბჭოს თავმჯდომარის და მთავრობის თავმჯდომარის, მინისტრის/სახელმწიფო მინისტრის პირველი მოადგილის, მინისტრის/სახელმწიფო მინისტრის მოადგილის, ავტონომიური რესპუბლიკის უმაღლესი საბჭოს თავმჯდომარის მოადგილის და უმაღლესი საბჭოს კომიტეტის/ფრაქციის თავმჯდომარის, ავტონომიური რესპუბლიკის მინისტრის და მინისტრის პირველი მოადგილის, ავტონომიური რესპუბლიკის უმაღლესი საბჭოს კომიტეტის/ფრაქციის თავმჯდომარის მოადგილის, ავტონომიური რესპუბლიკის მინისტრის მოადგილის და ავტონომიური რესპუბლიკის უმაღლესი საბჭოს წევრის. ცვლილების თანახმად, ყველაზე მაღალი - 10 კოეფიციენტი განისაზღვრა პრეზიდენტისა და პრემიერის ანაზღაურებასთან დაკავშირებით. ეს კი ნიშნავს, რომ 2024 წლის მონაცემებს თუ ავიღებთ, მათი წლიური ანაზღაურება 159 600 ლარამდე გაიზრდება. უფრო კონკრეტულად, 2024 წლის სახელმწიფო ბიუჯეტის თანახმად, საბაზო თანამდებობრივი სარგო შეადგენს 1 330 ლარს. ეს უნდა გავამრავლოთ შესაბამის კოეფიციენტზე, რაც პრეზიდენტის და პრემიერის შემთხვევაში არის 10 და მიღებული 13 300 ლარი იქნება მათი თვიური ანაზღაურება. ეს კი წლის განმავლობაში 159 600 ლარი გამოდის. აღნიშნულ თანხას თუ გამოვაკლებთ 20%-იან საშემოსავლოს მივიღებთ, რომ პრეზიდენტის და პრემიერის დარიცხული წლიური ხელფასი (ე.წ. ხელზე ასაღები წლიური ანაზღაურება) იქნება 127 680 ლარი. შედარება რომ გავაკეთოთ, ქონებრივ დეკლარაციებში მითითებულ ინფორმაციას თუ დავეყრდნობით, პრეზიდენტის 2023 წლის დარიცხული ხელფასი 84 220 ლარი იყო, პრემიერის 2022 წლის კი 41 004 ლარი. რაც შეეხება მინისტრებს/სახელმწიფო მინისტრს, მათ შემთხვევაში კოეფიციენტი 8.5-ს შეადგენს, შესაბამისად მინისტრებს წლიური დარიცხული (20%-იანი საშემოსავლოს გამოკლებით) ხელფასი 108 528 ლარი ექნებათ. ამასთან, კანონში შეტანილი ცვლილების თანახმად, მინისტრის/სახელმწიფო მინისტრის პირველი მოადგილის შემთხვევაში, წლიური ანაზღაურება იქნება 119 700 ლარი; მოადგილეების - 115 710 ლარი; ავტონომიური რესპუბლიკის უმაღლესი საბჭოს თავმჯდომარის და მთავრობის თავმჯდომარის - 135 660 ლარი; მათი მოადგილეების კი - 103 740 ლარი; უმაღლესი საბჭოს კომიტეტის/ფრაქციის თავმჯდომარის წლიური ანაზღაურება - 95 760 ლარი იქნება; ავტონომიური რესპუბლიკის მინისტრის და მინისტრის პირველი მოადგილის შესაბამისად, 95 760 და 83 784 ლარი; ავტონომიური რესპუბლიკის უმაღლესი საბჭოს კომიტეტის/ფრაქციის თავმჯდომარის მოადგილის - 79 800 ლარი, ავტონომიური რესპუბლიკის მინისტრის მოადგილის და ავტონომიური რესპუბლიკის უმაღლესი საბჭოს წევრის ასევე 79 800 ლარი. (შეგახსენებთ, რომ ამ თანხას საშემოსავლო 20%-იანი გადასახადი არ აქვს გამოკლებული). ცნობისთვის, ახალი კანონი 2025 წლიდან ამოქმედდება. შესაბამისად, თუ 2025 წელს მთავრობა საბაზო თანამდებობრივ სარგოს უფრო გაზრდის, ვიდრე 2024 წელს 1 330 ლარია, სახელმწიფო-პოლიტიკური თანამდებობის პირთა ანაზღაურებაც უფრო მეტი იქნება. bpn.ge

ამის შესახებ საუბარია კვლევაში – „შრომითი მიგრანტი ქალების სოციალურ-ეკონომიკური სტაბილურობა”, რომელშიც განხილულია გამოწვევები, რომლებსაც შრომითი მიგრანტი ქალები საქართველოში დაბრუნებისას აწყდებიან. კვლევა აჩვენებს, რომ ბოლო წლების განმავლობაში, საქართველომ მნიშვნელოვანი ნაბიჯები გადადგა მიგრაციის მართვის სისტემის განვითარების მიმართულებით, თუმცა, კანონმდებლობაში, პოლიტიკასა თუ პროგრამებში ვლინდება მნიშვნელოვანი ხარვეზები, რომლებიც აბრკოლებს მიგრანტი ქალების დაბრუნებისა და მდგრადი რეინტეგრაციის პროცესს. კვლევაში ვკითხულობთ, რომ შრომითი მიგრაციის არარეგულარული ხასიათის გამო რთულია მისი ზუსტი მაჩვენებლების განსაზღვრა. გარდა ამისა, საქართველოდან წასული ემიგრანტების რაოდენობას სხვადასხვა წყარო სხვადასხვანაირად განსაზღვრავს. კვლევის ფარგლებში 22 სიღრმისეული ინტერვიუ ჩატარდა როგორც მიგრაციაში მყოფ, ისე დაბრუნებულ ემიგრანტ ქალებთან, ასევე იმ სახელმწიფო უწყებების, საერთაშორისო და ადგილობრივი ორგანიზაციების წარმომადგენლებთან და მკვლევრებთან, რომლებიც მიგრაციის, დაბრუნებისა და რეინტეგრაციის და, ზოგადად, ქალთა ეკონომიკური გაძლიერების საკითხებზე მუშაობენ. დოკუმენტში ხაზგასმულია, რომ უმუშევრობა და სიღარიბე კვლავ უმნიშვნელოვანეს გამოწვევად რჩება, რაც, ავტორების თქმით, საერთაშორისო ეკონომიკური საზომებითა და მოსახლეობის დამოკიდებულებითაც დასტურდება. სწორედ ამ მიზეზების გამო, სოციალურ-ეკონომიკური კეთილდღეობის ძიებაში, ქალების ემიგრაცია, ხშირად, უკიდურესი გამოსავალია. ასევე იხილეთ „ემიგრანტი ქალები საკუთარი თავისთვის შემოსავლის მინიმუმს იტოვებენ“ - ახალი კვლევა შრომით მიგრანტ ქალებზე 22 ნოემბერი, 2023 კვლევის ზოგად მიმოხილვას შეგიძლიათ „პუბლიკის“ მასალაში გაეცნოთ, აქ კი ყურადღება გამახვილებულია კვლევაში მონაწილე დაბრუნებულ მიგრანტ ქალებზე და მათ გამოწვევებზე. კვლევის მიხედვით, მათი დაბრუნების მიზეზები განსხვავდება, თუმცა უფრო ხშირად პირად და ოჯახთან დაკავშირებულ ვალდებულებებს უკავშირდება, ვიდრე – ფინანსური თვითკმარობის მიღწევას. რაც შეეხება დაბრუნებული მიგრანტი ქალების ეკონომიკური სტაბილურობის ხელის შემშლელ ფაქტორებს, პირველ რიგში, სამუშაო ადგილების ნაკლებობა და დაბალი ანაზღაურება დასახელდა. კვლევაში ვკითხულობთ, რომ მიგრაციაში მყოფი ქართველი ქალები, ძირითადად, შინ შრომაში არიან ჩართულები – უვლიან ბავშვებს ან მოხუცებს, ალაგებენ სახლებს. მიუხედავად საქმის ფიზიკური და ემოციური სირთულისა, შინ შრომა დაბალანაზღაურებადია და ქალებს უკარგავს პროფესიული განვითარების შესაძლებლობებს. საშინაო შრომა კი, საქართველოში დაუფასებელი და მინიმალურად ანაზღაურებადია, ვერ უზრუნველყოფს ოჯახების ეკონომიკურ უსაფრთხოებას და დაბრუნებული ემიგრანტი ქალები გამოსავალს ისევ ემიგრაციაში პოულობენ: გარდა ამისა, დოკუმენტში აღნიშნულია, რომ შრომის ბაზარზე რეინტეგრაცია განსაკუთრებით უჭირთ 50 წელს გადაცილებულ, დაბრუნებულ მიგრანტ ქალებს, ვინაიდან ფორმალურ სექტორში, თითქმის ყველა პოზიციაზე, დამსაქმებლები, ძირითადად, ახალგაზრდა და გამოცდილ კადრს ეძებენ. ეს კი კვლევის ავტორებისთვის ვარაუდის საფუძველს იძლევა, რომ არაანაზღაურებადი ზრუნვის ვალდებულებებთან ერთად, ასაკი მნიშვნელოვანი დაბრკოლებაა ქალების ეკონომიკური აქტიურობისთვის და მაშინ, როდესაც ისინი საქართველოს შრომით ბაზარზე აღარ წარმოადგენენ „სასურველ მუშახელს“, ისინი საზღვარგარეთ ეძებენ შემოსავლის წყაროს. კვლევის ავტორების შეფასებით, სოციალურ-ეკონომიკურ რეინტეგრაციას, ასევე, აფერხებს: შეზღუდული წვდომა ზრუნვის ინფრასტრუქტურაზე და სოციალური დაცვის არსებითი სისტემების სისუსტე – დაბალი პენსიები, ჯანდაცვის სერვისებისა და მედიკამენტების მაღალი ფასები, უმუშევრობის დახმარების არარსებობა და სოციალური დახმარების სიმწირე, ბანკების მიერ დაწესებული მაღალი პროცენტები, საცხოვრისთან დაკავშირებული და სხვა გამოწვევები. რესპონდენტები ამბობენ, რომ ემიგრაციიდან დაბრუნების შემდეგ ეკონომიკური ინტეგრაციის ძირითადი სტრატეგია „საკუთარი საქმის წამოწყებაა“. თუმცა, დოკუმენტის ავტორები თვლიან, რომ ვინაიდან ემიგრაციაში ყოფნის დროს დანაზოგის გაკეთება და კვალიფიკაციის ამაღლება ჭირს, სხვა ფაქტორებთან ერთად, ეს თვითდასაქმებისთვის მნიშვნელოვანი ხელისშემშლელი ფაქტორია კვლევაში აღნიშნულია, რომ თვითდასაქმების შესაძლებლობებს კიდევ უფრო ამცირებს ქალების დაბალი ხელმისაწვდომობა ფინანსებზე. კვლავ უმუშევრობის მაღალი მაჩვენებლიდან გამომდინარე, სტაბილური შემოსავლების არქონასთან ერთად, ქალებისთვის სირთულეს წარმოადგენს კრედიტის მოპოვება. ფინანსებზე ხელმისაწვდომობას კი ასევე ზღუდავს სესხების სიძვირე. როგორც რესპონდენტები ამბობენ, დაბრუნების შემდეგ ეკონომიკურ სტაბილურობასთან ერთად, მათთვის მნიშვნელოვანია ჯანდაცვასა და სოციალურ სერვისებზე სრულყოფილი ხელმისაწვდომობაც. ასევე, კვლევაში ნათქვამია, რომ ემიგრანტ ქალებს ხშირად უწევთ დაბრუნება მოხუცებული მშობლის ან შვილიშვილის მოსავლელად, რაც თავისთავად გამორიცხავს დაბრუნების შემდეგ ეკონომიკური რეინტეგრაციის შესაძლებლობას. დოკუმენტში ვკითხულობთ, რომ შრომის ბაზარზე ინტეგრაციის წარუმატებლობის შემთხვევაში, დაბრუნებულ ემიგრანტ ქალთა მდგომარეობას ამწვავებს დასაქმების პოლიტიკის ისეთი ხარვეზები, როგორებიცაა უმუშევრობის დაზღვევისა და უმუშევრობის შემწეობის არარსებობა. როგორც ერთ–ერთი რესპონდენტი ამბობს, სამუშაოს პოვნის წარუმატებელი მცდელობების შემდეგ, სახელმწიფომ მას სოციალურად დაუცველის სტატუსი მიანიჭა და დაუნიშნა დახმარება 270 ლარის ოდენობით, თუმცა მას და მის არასრულწლოვან შვილს ეს შემოსავალი არ ჰყოფნით და ის ისევ ემიგრაციაში წასვლაში ხედავს გამოსავალს. კვლევაში მითითებულია, რომ საქართველოს მსგავს კონტექსტში, სადაც მაღალია არასტანდარტული და არაფორმალური მშრომელების რაოდენობა, მნიშვნელოვანია სოციალური დაცვის ისეთი სისტემა, რომლით სარგებლობაც ყველა უმუშევრად დარჩენილს შეეძლება და რომლის წინაპირობადაც სახელმწიფოს მიერ შეთავაზებული დასაქმების სხვადასხვა მომსახურება განისაზღვრება. რეკომენდაციები კვლევის ავტორებმა შეიმუშავეს რეკომენდაციებიც, რომლებიც მიემართება როგორც სახელმწიფო უწყებებს, ისე საერთაშორისო თუ ადგილობრივ ორგანიზაციებს. რეკომენდაციები ეხება: მიგრაციის პოტენციალის მაქსიმალურად გამოყენებას და მიგრანტი ქალების დროული დაბრუნების ხელშეწყობას; მიგრაციის ფემინიზაციის სოციალური ფასის შემცირებას; დაბრუნებული მიგრანტი ქალების რეინტეგრაციასა და მათი წვლილის გაზრდას ქვეყნის განვითარების პროცესში; მიგრანტი ქალების სოციალურ-ეკონომიკური სტაბილურობის მიღწევა შეუძლებელია მხოლოდ მიგრაციაზე ფოკუსირებული, ვიწრო მასშტაბის მქონე პროგრამებით, შესაბამისად, მნიშვნელოვანია: ქვეყნის არსებული სოციალურ-ეკონომიკური სისტემის რეფორმირება, მათ შორის, ზრუნვის ინფრასტრუქტურის გაძლიერება; ჯანდაცვისა და სოციალური დაცვის სერვისებზე, ფინანსურ რესურსებზე ხელმისაწვდომობის გაზრდა. ამ მიმართულებებით საჭირო კონკრეტული პროგრამებისა და სერვისების შესამუშავებლად კი, დამატებითი კვლევებია საჭირო. კვლევა მოამზადა არასამთავრობო ორგანიზაციამ „ქალები საერთო მომავლისათვის (WECF) – საქართველო“ გაეროს განვითარების პროგრამის, შვედეთისა და ევროკავშირის მხარდაჭერით. კვლევის სრულ ვერსიას შეგიძლიათ გაეცნოთ ბმულზე. პუბლიკა