tvati

„პარტნიორობა ადამიანის უფლებებისთვის“ (PHR)-ის განცხადებით, ორგანიზაცია იცავს ქალს, რომელიც პროფესიული საქმიანობის გამო ონლაინ სექსუალური შევიწროების სამიზნეა. ეკა კვირკველია ექიმი რეზიდენტი რეპროდუქტოლოგი, სექსოლოგი, კავკასიის უნივერსიტეტსა და შავი ზღვის საერთაშორისო უნივერსიტეტის მეან-გინეკოლოგიის მიწვეული ლექტორია, რომელიც 1 წელზე მეტია პაციენტების საგანმანათლებლო ბლოგს აწარმოებს ონლაინ პლატფორმებზე, სადაც მის პროფესიულ საქმიანობაზე საუბრობს. PHR-ის ინფორმაციით 2024 წლის 5 მარტს ორგანიზაციის ხელმძღვანელი და მოქმედი ადვოკატი თამარ გაბოძე, ეკა კვირკველიასთან ერთად პოლიციის განყოფილებაში მივიდა და სამართლებრივი პროცედურები დაიწყო. ქალისა და ადვოკატის ინიციატივით, საქმეში ჩაერთო შინაგან საქმეთა სამინისტროს ადამიანის უფლებების დეპარტამენტიც. PHR-ის განმარტებითი, ისინი სახელმწიფოსგან მომხდარზე მკაცრი მყისიერი და ადეკვატური ზომების მიღებას ელიან.

უკრაინის საგარეო საქმეთა სამინისტროს ინფორმაციით, უკრაინის შეიარაღებული ძალების ყოფილი მთავარსარდალი, ვალერი ზალუჟნი ბრიტანეთში უკრაინის საგანგებო და სრულუფლებიანი ელჩის პოსტზე დაინიშნა. 8 თებერვალს ვლოდიმირ ზელენსკიმ გაავრცელა განცხადება, სადაც მან ისაუბრა ზალუჟნისთან შეხვედრაზე და აღნიშნა, რომ ყოფილ მთავარსარდალს მადლობა გადაუხადა ორი წლის განმავლობაში უკრაინის დაცვისათვის. გენერალი ზალუჟნი უკრაინის შეიარაღებული ძალებს 2021 წლიდან ხელმძღვანელობს. პუბლიკა

სამინისტროს მიერ არ არის შეფასებული სკოლების არსებული მდგომარეობა, რომელიც სხვადასხვა რელევანტურ კრიტერიუმზე დაყრდნობით მოახდენდა საჭირო რესურსების, მზაობის და შესაძლებლობის მქონე სკოლების იდენტიფიცირებას, რაც მნიშვნელოვანი წინაპირობაა ავტონომიურობის გაზრდის შესაძლებლობის განსახილველად, - ამის შესახებ სახელმწიფო აუდიტის სამსახურის მიერ ჩატარებულ ზოგადი განათლების მართვის მოდელის აუდიტის ანგარიშშია ნათქვამი. დოკუმენტის მიხედვით, არ არის შემუშავებული რესურსცენტრების სამოქმედო გეგმის ერთიანი ფორმა, ხოლო წარმოდგენილი სამოქმედო გეგმები რიგ შემთხვევაში არაერთგვაროვანი და ფორმალურია, რაც მიუთითებს დაგეგმვის პროცესის არაეფექტიანობაზე. „ეფექტიანი მართვის სისტემის განვითარება სამინისტროს სტრატეგიული ამოცანაა, რაც ერთ-ერთ მიზნად მოიაზრებს სკოლის მართვის დიფერენცირებული მიდგომისა და ავტონომიურობის გაზრდის მხარდაჭერას. სამინისტროს მიერ არ არის შეფასებული სკოლების არსებული მდგომარეობა, რომელიც სხვადასხვა რელევანტურ კრიტერიუმზე დაყრდნობით მოახდენდა საჭირო რესურსების, მზაობის და შესაძლებლობის მქონე სკოლების იდენტიფიცირებას, რაც მნიშვნელოვანი წინაპირობაა ავტონომიურობის გაზრდის შესაძლებლობის განსახილველად. რესურსცენტრის ერთ-ერთ ძირითად ფუნქციას წარმოადგენს საჯარო სკოლების მონიტორინგი, თუმცა არ არის განსაზღვრული ჩასატარებელი მონიტორინგის ოპტიმალური რაოდენობა და სიხშირე, აღნიშნული კი, სასწავლო პროცესის და გარემოს გაუმჯობესებისთვის რეკომენდაციების შემუშავების მნიშვნელოვანი საფუძველია. არ არის შემუშავებული რესურსცენტრების სამოქმედო გეგმის ერთიანი ფორმა, ხოლო წარმოდგენილი სამოქმედო გეგმები რიგ შემთხვევაში არაერთგვაროვანი და ფორმალურია, რაც მიუთითებს დაგეგმვის პროცესის არაეფექტიანობაზე. რიგ შემთხვევებში რესურსცენტრების სამოქმედო ტერიტორიაზე არსებული სკოლების რაოდენობა მკვეთრად განსხვავდება ერთმანეთისგან, ხოლო დასაქმებულ თანამშრომელთა იდენტური რაოდენობის პირობებში იქმნება ფუნქციების არაეფექტიანად განხორციელების რისკი. სკოლის მართვის პროცესში სამეურვეო საბჭოს როლი არ არის საკმარისად ეფექტიანი. ძირითად შემთხვევაში საბჭოს წევრების როლი სკოლების მართვის პროცესში ფორმალურ ხასიათს ატარებს − წევრები ნაკლებად არიან ჩართულნი სკოლის მართვასთან დაკავშირებული საკითხების გადაწყვეტისას, მაშინ როცა სამეურვეო საბჭო დეცენტრალიზებული მართვის მოდელის განხორციელებისთვის ერთ-ერთ მნიშვნელოვან რგოლს წარმოადგენს. არ არის განსაზღვრული საბჭოს ფუნქციონირების შედეგად მისაღწევი მიზანი, რომელთან მიმართებითაც შეფასდება საბჭოს საქმიანობის ეფექტიანობა. სამინისტროს მიერ არ არის შეფასებული საბჭოს საქმიანობა და არ განხორციელებულა საჭიროებების კვლევა, რომელზე დაყრდნობითაც მოხდებოდა შესაბამისი ღონისძიებების დაგეგმვა და განხორციელება”, - ნათქვამია ანგარიშში. იპნ

უკრაინის პრეზიდენტი, ვოლოდიმირ ზელენსკი დღეს თურქეთს ეწვევა, - ინფორმაციას უკრაინული მედია თურქეთის პრეზიდენტის კომუნიკაციების დირექტორატზე დაყრდნობით ავრცელებს. მათივე ინფორმაციით, ზელენსკი თურქეთის პრეზიდენტ რეჯეფ ერდოღანს შეხვდება და ლიდერები რუსეთ-უკრაინის ომის, მარცვლეულის შეთანხმების, რეგიონში მშვიდობის პერსპექტივებისა და ორმხრივი ურთიერთობების გაძლიერების საკითხებს განიხილავენ. „ვიზიტის ფარგლებში დეტალურად განიხილება ომის მიმდინარეობა, რომელიც გრძელდება რუსეთსა და უკრაინას შორის, მარცვლეულის დერეფნის შესახებ შეთანხმების გაგრძელების შესახებ კონტაქტებთან დაკავშირებით არსებული ვითარება, ასევე რეგიონში მდგრადი მშვიდობის ძიება“, - ნათქვამია თურქეთის პრეზიდენტის კომუნიკაციების დირექტორატის განცხადებაში.

ზოგადსაგანმანათლებლო სკოლების დაფინანსების მოდელი არ ეფუძნება სკოლების წინაშე მდგარ გამოწვევებსა და მოსწავლეების საჭიროებებს, - ამის შესახებ სახელმწიფო აუდიტის სამსახურის მიერ ჩატარებულ ზოგადი განათლების მართვის მოდელის აუდიტის ანგარიშშია ნათქვამი, რომელიც 2019-2021 წლებს მოიცავს. ამასთან, დოკუმენტის მიხედვით, 2019-2021 წლებში დამატებითი დაფინანსების მიზნით სამინისტრომ სკოლებს ჯამურად 6,694,993 ლარი გადაურიცხა, თუმცა "სამინისტროს მიერ არ მომხდარა დაფინანსების არსებული მოდელის შეფასება, არ გაანალიზებულა გაწეულ ხარჯსა და მიღწეულ შედეგებს შორის ურთიერთკავშირი". „საქართველოში „ზოგადი განათლების შესახებ“ კანონის მიხედვით, სახელმწიფოს მიერ მოსწავლის განათლების დაფინანსება სახელმწიფო ბიუჯეტიდან ხორციელდება ერთ მოსწავლეზე გათვლილი ფინანსური ნორმატივის შესაბამისი ვაუჩერით. არსებული დაფინანსების მოდელის მიხედვით, ვაუჩერული დაფინანსება ძირითადად მიმართულია მასწავლებლების ხელფასზე და არ არის გათვალისწინებული მოსწავლეთა სრულფასოვანი განათლების მიღებისთვის სხვა სახის მნიშვნელოვანი კომპონენტები, როგორებიცაა მაგალითად: არაფორმალური განათლება, კლასგარეშე, კულტურული და შემოქმედებითი პროექტების განხორციელება. აუდიტის ჯგუფმა ვერ მიიღო რწმუნება, რა გათვლებსა და კვლევებს ეფუძნება დაფინანსების არსებული მოდელი და კონკრეტული კომპონენტების მიხედვით, რა საჭიროებებიდან გამომდინარე განისაზღვრა ვაუჩერის ოდენობა; არ არის განხორციელებული იმ ხარჯებისა და საჭიროებების ანალიზი, რომელიც შეიძლება ჰქონდეს სკოლას და რომელსაც უნდა ეფუძნებოდეს მათზე მიმართული დაფინანსების ოდენობა. აღსანიშნავია ასევე, რომ დაფინანსების არსებული მოდელი ვერ უზრუნველყოფს სკოლის საჭიროებების სრულად დაკმაყოფილებას. მიუხედავად იმისა, რომ დაფინანსება გამოითვლება არაერთ კომპონენტზე დაყრდნობით, სკოლები ითხოვენ დამატებით დაფინანსებას თანხების უკმარისობის გამო − ძირითადად, კომუნალური ხარჯების დაფარვის მიზნით. 2019-2021 წლებში დამატებითი დაფინანსება გაიცემოდა, საშუალოდ, 205 (საერთო რაოდენობის 10%) სკოლის შემთხვევაში, ხოლო აღნიშნული სკოლებიდან, საშუალოდ, 41% სისტემატურად, ყოველ წელს ითხოვს დამატებით ფინანსურ რესურსს. 2019-2021 წლებში დამატებითი დაფინანსების მიზნით სამინისტრომ სკოლებს ჯამურად 6,694,993 ლარი გადაურიცხა. მიუხედავად ზემოაღნიშნული გამოწვევებისა, სამინისტროს მიერ არ მომხდარა დაფინანსების არსებული მოდელის შეფასება, არ გაანალიზებულა გაწეულ ხარჯსა და მიღწეულ შედეგებს შორის ურთიერთკავშირი; არ არის დანერგილი მექანიზმები და შესაბამისი კრიტერიუმები, რითაც შეფასდება დაფინანსების არსებული მოდელის ეფექტიანობა. შესაბამისად, არ არის დასაბუთებული, რამდენად ითვალისწინებს დაფინანსების არსებული მოდელი სკოლის რეალურ საჭიროებებს და უზრუნველყოფს თუ არა ზოგადი განათლების სათანადო ხელმისაწვდომობას. ზოგადსაგანმანათლებლო დაწესებულებების დაფინანსებიდან 3% მიმართულია კერძო სკოლების დაფინანსებაზე. კერძო სკოლები თითოეულ მოსწავლეზე სახელმწიფო დაფინანსების ფარგლებში იღებენ ფიქსირებულ 300 ლარს. 2019-2021 წლებში კერძო სკოლების დაფინანსებაზე სახელმწიფო ბიუჯეტიდან, საშუალოდ წლიურად, გახარჯულია 18 მლნ ლარი. სამინისტროს მიერ არ არის დანერგილი მექანიზმი, რომლის საშუალებითაც შეფასდებოდა თუ რა მიმართულებით გამოიყენეს კერძო სკოლებმა მიღებული დაფინანსება, რაც ხელს შეუწყობდა პროცესის გამჭვირვალობას. ანგარიშვალდებულების მექანიზმის არარსებობა წარმოშობს საბიუჯეტო სახსრების არაეფექტიანად განკარგვის რისკებს. ზოგადსაგანმანათლებლო სკოლების დაფინანსების მოდელით გათვალისწინებული ვაუჩერული სისტემის ფარგლებში არ ხორციელდება დაფინანსებით მისაღწევი მიზნებისა და შედეგების წინასწარ განსაზღვრა და შესაბამისად, არ არის დადგენილი გაწეულ ხარჯსა და მიღწეულ შედეგებს შორის ურთიერთკავშირი, ხოლო არსებული დაფინანსება არ ეფუძნება სკოლების წინაშე მდგარ გამოწვევებსა და მოსწავლეების საჭიროებებს. არაქართულენოვანი სექტორის სკოლების წინაშე მდგარი გამოწვევების გადასაჭრელად, სამინისტროს მხრიდან გათვალისწინებულია გაზრდილი ვაუჩერული დაფინანსება, თუმცა დამატებითი მექანიზმებისა და შესაბამისი კვლევების გარეშე გატარებული ღონისძიებები, სათანადოდ არ პასუხობს აღნიშნული სექტორის გამოწვევებს. კერძო სკოლების დაფინანსება ეფუძნება მხოლოდ ერთ, რაოდენობრივ კრიტერიუმს და არ ხორციელდება ვაუჩერული დაფინანსების ოპტიმალური, სკოლის ფინანსური მდგომარეობისა და მისაღწევი შედეგების გათვალისწინებით განაწილება. ამასთანავე, არ არის დანერგილი კერძო სკოლების დაფინანსების ფარგლებში ანგარიშვალდებულების სისტემა. ყოველივე ზემოაღნიშნული ქმნის რესურსების არაპროდუქტიულად და არაეფექტიანად განკარგვის რისკებს”, - ნათქვამია ანგარიშში. იპნ

ფაქტი, რომ არაერთ დანაშაულში ბრალდებული ადეიშვილი უმაღლესი დონის შეხვედრებში იღებს მონაწილეობას, სრულად "ოცნების" პასუხისმგებლობაა - "ოცნებამ" ჩვენი მოქალაქეების წინაშე უნდა აიღოს პასუხისმგებლობა და როგორც მინიმუმ, განმარტება უნდა გააკეთოს, როგორ ხდება, რომ ეს ადამიანი ასე მარტივად, ასე თავისუფლებად მონაწილეობს უმაღლესი დონის შეხვედრებში, - ამის შესახებ პარტია "საქართველოსთვის" დეპუტატმა, მიხეილ დაუშვილმა ზურაბ ადეიშვილის ბუნდესტაგში ვიზიტზე საუბრისას განაცხადა. კითხვაზე, გიორგი გახარიას პრემიერობის დროს რატომ არ მოითხოვეს ადეიშვილის საქართველოში ექსტრადირება, დაუშვილი პასუხობს, რომ "მაშინაც პრობლემა იყო, რომ არ ხდებოდა გადმოცემა, მაგრამ მაშინ ადეიშვილი ბუნდესტაგში ასე ზარზეიმით ვერ შედიოდა". როგორც დაუშვილი განმარტავს, გახარია პრემიერობის დროს ყველაფერს აკეთებდა, რაც შეეძლო და ისე მოხდა, რომ მის დროს ადეიშვილის ექსტრადირება ვერ მოესწრო. "რატომ ფიქრობთ, რომ ვინმე არ ითხოვდა მის ექსტრადირებას საქართველოში? გიორგი გახარიას დროსაც პრობლემა იყო, რომ არ ხდებოდა გადმოცემა, მაგრამ მაშინ ადეიშვილი ბუნდესტაგში ასე ზარზეიმით ვერ შედიოდა. რისი გაკეთებაც შეეძლო, აკეთებდა [გახარია]. რატომ არ გადმოეცა? სამწუხაროდ, ისე მოხდა, რომ ჩვენს დროს ვერ მოვასწარით," - განაცხადა დაუშვილი. ცნობისთვის, გერმანიის საელჩომ განაცხადა, რომ ადეიშვილი ბუნდესტაგში იმყოფებოდა, როგორც უკრაინის ელჩის დელეგაციის წევრი და გერმანიაში არ არსებობდა სამართლებრივი სახელმწიფოს პრინციპებზე დაფუძნებული მიზეზი იმისათვის, რომ მისთვის აეკრძალათ პარლამენტში შესვლა აეკრძალათ. ევროკავშირის წარმომადგენლობამ კი განაცხადა, რომ გერტ იან კოპმანი, გასულ სამშაბათს, უკრაინის გენერალურ პროკურორს შეხვდა, რომელსაც უკრაინის დელეგაციაში შემავალი რამდენიმე ადამიანი ახლდა. მათივე განცხადებით, ამ შეხვედრის სხვაგვარად წარმოჩენა დეზინფორმაციაა. იპნ

წყარო: https://www.facebook.com/GakhariaGiorgi/posts/934482958135125

შვედეთი NATO-ს 32-ე ოფიციალური წევრი გახდა. აღნიშნულ ინფორმაციას აშშ-ის სახელმწიფო დეპარტამენტი ავრცელებს. პროტოკოლის მიხედვით, დოკუმენტი ძალაში 2024 წლის 7 მარტიდან შევიდა. NATO-ს გენერალური მდივანი იენს სტოლტენბერგი „ტვიტერის“ პირად გვერდზე ეხმიანება შვედეთის ორგანიზაციაში გაწევრიანებას და აღნიშნავს, რომ „შვედეთის გაწევრიანება ნატოს უფრო ძლიერს, შვედეთს უფრო უსაფრთხოს და მთლიან ალიანსს უფრო დაცულს ხდის“. უკრაინაში რუსეთის შეჭრის შემდეგ, მაისში ფინეთმა და შვედეთმა ნატოს წევრობაზე ოფიციალური განაცხადი შეიტანეს. მათ წევრობას თურქეთი ეწინააღმდეგებოდა იმ მოტივით, რომ ისინი თავშესაფარს აძლევდნენ ქურთ აქტივისტებს, რომლებსაც ანკარა ტერორისტებად თვლიდა. თუმცა მოგვიანებით თურქეთის, ფინეთისა და შვედეთის საგარეო საქმეთა მინისტრებმა ხელი მოაწერეს მემორანდუმს, რომელიც ადასტურებს, რომ მადრიდის NATO-ს სამიტზე თურქეთი მხარს დაუჭერს ალიანსში ფინეთისა და შვედეთის გაწევრებას. პუბლიკა

პრეზიდენტი სალომე ზურაბიშვილი გამოეხმაურა ოდესაზე რუსეთის თავდასხმას მაშინ, როცა ვოლოდიმირ ზელენსკი ქალაქს საბერძნეთის პრემიერ-მინისტრთან ერთად სტუმრობდა. რუსებმა ოდესა გუშინ იმ დროს დაბომბეს, როცა ვოლოდიმირ ზელენსკი ქალაქს კირიაკოს მიცოტაკისთან ერთად სტუმრობდა. შედეგად, 5 ადამიანი დაიღუპა – უკრაინის პრეზიდენტი და საბერძნეთის პრემიერი თავდასხმის შედეგად არ დაშავებულან. CNN-ის ინფორმაციით, ოდესაში უკრაინის პრეზიდენტისა და საბერძნეთის პრემიერ-მინისტრის ვიზიტის დროს რუსული რაკეტა მათი მანქანიდან 500 მეტრში აფეთქდა. პუბლიკა

2023 წლის მარტის აქციების 1 წლისთავზე ქალი ევროკავშირის დროშით, ნანა მალაშხია ახალგაზრდებს მიმართავს და „ბრძოლის, ერთიანობისა და მაღალი მოქალაქეობრივი თვითშეგნებისთვის“ მადლობას უხდის. თავის მიმართვაში ნანა მალაშხია ხაზს უსვამს ლაზარე გრიგორიადისის პატიმრობას. მიმართვაში ნანა მალაშხია აღნიშნავს 2024 წლის საპარლამენტო არჩევნებსაც და ახალგაზრდებს პოლიტიკურ პროცესებში ჩართვისკენ მოუწოდებს. პუბლიკა

ზემო სვანეთი საქართველოს მთიან რეგიონებს შორის ერთადერთია, სადაც ელექტროენერგიის ტარიფს არ იხდიან. გასული საუკუნის 90-იანი წლებიდან სვანეთის მოსახლეობასთან სიტყვიერი შეთანხმების შედეგად, ფიზიკური პირები დენს უფასოდ იღებენ, კომერციული სექტორი კი მხოლოდ მინიმალურ თანხას იხდის. ამ შეღავათებს ფიზიკური პირების ნაწილი კრიპტო-მაინერების ასამუშავებლად იყენებს. ამის გამო, მესტიაში სერიოზულ გამოწვევებთან უწევთ გამკლავება, რადგან ელექტროენერგიის გადაჭარბებული მოხმარების გამო, ხშირად მოსახლეობა უშუქოდაც რჩება. ელექტროენერგიის ჭარბი მოხმარების ისტორიული რეკორდი კი ზემო სვანეთში 2024 წლის 16 იანვარს დაფიქსირდა. როგორც მაშინ „ენერგი პრო-ჯორჯიაში“ განაცხადეს, პირველად, დღიურმა მოხმარებამ 500 ათასი კილოვატ/საათი შეადგინა. ხაზგასასმელია, რომ იმავე დღეს, სრულად ,,ენერგო-პროს“ აბონენტთა მოხმარებულმა ელექტროენერგიამ 14 მილიონი კოლივატსაათი შეადგინა, საგულისხმოა, რომ აღნიშნული 14 მილიონი კილოვატსაათი მოიხმარეს ყველა კატეგორიის მომხმარებლებმა, მათ შორის დიდმა კომერციულმა თუ საბიუჯეტო აბონენტებმა, ხოლო მხოლოდ მოსახლეობამ მოიხმარა დაახლოებით 6 მილიონი კილოვატსაათი. ზემო სვანეთის მოსახლეობის ასეთ პრივილეგირებულ მდგომარეობაში ჩაყენება სპეციალისტების, მათ შორის, სემეკის თავმჯდომარის თქმით, არასწორია. ჯერ კიდევ ორიოდე წლის წინ დავით ნარმანია ამბობდა, რომ ამის გამო „ენერგო-პრო ჯორჯიას" არ ეძლევა შესაძლებლობა სვანეთში ინვესტირების და ქსელის შეცვლის, რაც ქსელის მზარდი დატვირთვის პირობებში პრობლემაა“. „მესტიასთან დაკავშირებით შეგვიძლია ვთქვათ, რომ იქ დაწესებულ შეღავათებს აქვთ პოლიტიკური დატვირთვა. მთავარი მიზეზი კი ის იყო, რომ არ დაცლილიყო ეს რეგიონი ადამიანებისგან და მოსახლეობას არ დაეტოვებინა მამა-პაპური ადგილი“, - ამბობს დღეს „ბიზნესპრესნიუსთან“ საუბრისას ენერგეტიკოსი გია არაბიძე. მისი თქმით, კარგი იქნება, თუ მსგავსი შეღავათები დაწესდება როგორც რაჭის მაღალმთიან, ისე აღმოსავლეთ საქართველოში მდებარე მაღალმთიან დასახლებულ რეგიონებში (ხევსურეთი და ა.შ.). „დღევანდელი ტენდენციის მიხედვით, მთის მოსახლეობა ყოველწლიურად ტოვებს თავის სახლს და მოდის ქალაქში, სადაც არ არის მუშა-ხელის საჭიროება და იმის მაგივრად, რომ მთიდან ბარში ჩამოსულმა ადამიანმა ეკონომიკური სარგებელი ნახოს, თავად ხდება მომხმარებელი. ამიტომ, თუ იგივე შეღავათები დაწესდება რაჭაში და სხვა მაღალმთიან რეგიონებში, სადაც საქართველოს აქვს ტურისტული და სხვა ეკონომიკური განვითარების პოტენციალი, ამ ხალხს აღარ მოუწევს თბილისში ლუკმა-პურის საშოვნელად ჩამოსვლა და ეს მაღალმთიანი დასახლებული რეგიონებიც განვითარდებიან ეკონომიკურად.“, - აღნიშნა გია არაბიძემ. საგულისხმოა, რომ ხევსურეთის მოსახლეობა უკვე დიდი ხანია, რაც არათუ უფასო ელექტროენერგიას, არამედ ზოგადად, ელექტროენერგიის მათ სახლებამდე და დასახლებამდე გაყვანას ითხოვს. იმის მიუხედავად, რომ ბოლო წლებში მილიონობით ლარი დაიხარჯა რამდენიმე სოფლის ელექტროენერგიით უზრუნველსაყოფად, აშენებული მცირე ჰესები ხშირად გამოდის მწყობრიდან და მოსახლეობას ელექტროენერგია არ მიეწოდება. სიტუაცია ხევსურებისთვის იმდენად გაუსაძლისი გახდა, რომ 10-მდე სოფლის მოსახლეობამ, გასული წლის სექტემბერში საპროტესტო აქციაც კი გამართა. გია არაბიძემ განმარტა ისიც, რომ მაღალმთიან რეგიონებზე სხვადასხვა სახის შეღავათების დაწესება უნდა იყოს ეკონომიკურად გათვლილი. ასევე აუცილებელია მოსახლეობის რაოდენობის დაანგარიშება და მათი ცხოვრების სიმჭიდროვის აღრიცხვა. „იმისათვის, რომ ეს შეღავათები დაწესდეს, აუცილებელია მოხდეს იმის დადგენა, თუ რა რაოდენობის მოსახლეობა ცხოვრობს კონკრეტულ ტერიტორიაზე და როგორია ამ მოსახლეობის სიმჭიდროვე. ამით გავიგებთ იმ თანხის ოდენობას, რომელიც დასჭირდება მათ სუბსიდირებას.“, - თქვა გია არაბიძემ „ბიზნესპრესნიუსთან“. ავტორი: ბაჩანა ტყემალაძე

ზესტაფონის შემოვლითი მაგისტრალური გზით მოსახლეობა მაისიდან ისარგებლებს, - ამის შესახებ რეგიონული განვითარებისა და ინფრასტრუქტურის მინისტრმა, ირაკლი ქარსელაძემ რიკოთის მონაკვეთზე მიმდინარე სამუშაოების გაცნობისას განაცხადა. როგორც ქარსელაძემ აღნიშნა, აღნიშნულ მონაკვეთზე 4-ზოლიანი გზა მოეწყობა, რომელიც არგვეთას კვანძთან შეუერთდება აღმოსავლეთ-დასავლეთის ჩქაროსნულ მაგისტრალს. „დასკვნით ფაზაშია რიკოთის შემადგენელი შორაპანი-არგვეთას მონაკვეთი, სადაც გაჭრილი და მოსახულია პროექტით გათვალისწინებული ათივე გვირაბი, 17 ხიდიდან აშენებულია 15 ხიდი და მიმდინარეობს 2 ხიდზე კოჭების მოწყობა, საფარის, საინჟინრო სისტემების და სხვა სამონტაჟო სამუშაოები. შესაბამისად, შორაპანი-არგვეთას მონაკვეთზე ზესტაფონის შემოვლითი გზით მოსახლეობა მაისიდან ისარგებლებს. მაისიდან ავტოტრანსპორტს აღარ მოუწევს ქალაქ ზესტაფონში შესვლა და ისარგებლებს ზესტაფონის შემოვლითი, ახალი 4 ზოლიანი გზით. ბუნებრივია, გზის დარჩენილ მონაკვეთზე კი, გაგრძელდება სამუშაოები“, - განაცხადა ქარსელაძემ. რაც შეეხება ღირებულებას, რიკოთის საუღელტეხილო მონაკვეთის სამშენებლო სამუშაოების ჯამური ღირებულება 2.6 მილიარდ ლარამდეა. სამშენებლო სამუშაოები 2024 წელს დასრულდება. მანვე ისაუბრა სპეციალურ სავაჭრო მოედნებზეც, რომელიც ახალ მაგისტრალურ გზასთან მოეწყობა. მისი თქმით, უკვე მიმდინარეობს სატენდერო პროცედურები შროშასთან შესაბამისი მოედნების მოსაწყობად, სადაც ადგილობრივ მოსახლეობას თიხის ნაკეთობების რეალიზაციის შესაძლებლობა ექნება. გარდა ამისა, უწყებათაშორისი კომისიის ფარგლებში, გამოცხადდება სურამში და ზესტაფონში ტრადიციული პროდუქციით სავაჭრო ადგილებისთვის გათვალისწინებული მოედნების და ახალი ინფრასტრუქტურის მოწყობა. ცნობისთვის, რიკოთის მაგისტრალური გზის მშენებლობის ფარგლებში, ჯამში, შენდება 52 კმ-მდე კმ გზა, 97 ხიდი და 51 გვირაბი. ამ დროისათვის, 51 გვირაბიდან უკვე გაჭრილია 50 გვირაბი და 51-ე გვირაბის გაჭრის სამუშაოები მიმდინარეობს. აქედან, 38 გვირაბით ავტოტრანსპორტი უკვე სარგებლობს. ასევე, პროექტით გათვალისწინებული 97 ხიდიდან უკვე აშენებულია 89 ხიდი. 65 დასრულებული ხიდით ავტოტრანსპორტი უკვე სარგებლობს. ავტორი: მერი ტაბატაძე

რუსეთის მევენახეთა და მეღვინეთა ასოციაციამ ნატოს ქვეყნებიდან ღვინის იმპორტის გადასახადის 200 პროცენტით გაზრდა მოითხოვა. ამის შესახებ RIA-ს ასოციაციის აღმასრულებელმა დირექტორმა ალექსეი პლოტნიკოვმა განუცხადა. “ჩვენ გადავწყვიტეთ, კიდევ ერთხელ მივმართოთ მთავრობას და სახელმწიფო სათათბიროს თხოვნით, გააძლიერონ ზომები რუსული ბაზრის დასაცავად”, – განაცხადა სააგენტოსთან პლოტნიკოვმა. ასოციაციამ ასევე ინიციატივით გამოვიდა, გაუქმდეს საქართველოდან ღვინის იმპორტზე დაწესებული შეღავათიანი რეჟიმი. გარდა ამისა, მევენახეთა და მეღვინეთა ასოციაციამ მოითხოვა, რომ 1 სექტემბრიდან დაწესდეს ვალდებულება, რომ მაღაზიების დახლებზე საერთო სარეალიზაციო რაოდენობის მინიმუმ 20% რუსული ღვინო იქნება, შემდგომში 50%-მდე გაზრდის შესაძლებლობით. გასული წლის ივლისის ბოლოს რუსეთის ეკონომიკური განვითარების სამინისტროს პრესსამსახურმა გაავრცელა ინფორმაცია, რომ მთავრობამ 2023 წლის ბოლომდე არამეგობრული ქვეყნებიდან ღვინოების იმპორტის გადასახადი გაზარდა – 12,5-დან 20%-მდე, მაგრამ არანაკლებ ერთნახევარ დოლარზე ლიტრში. ეს ძალაში 1 აგვისტოდან შევიდა, მოგვიანებით კი გაგრძელდა 2024 წელსაც. რუსული გამოცემის ინფორმაციით, 2023 წელს საქართველო რუსეთში ღვინის მთავარი იმპორტიორი იყო. ამის მთავარ მიზეზად WineRetail-ის საინფორმაციო ცენტრის ხელმძღვანელი ალექსანდრ სტავცევი ასახელებს იმ ფაქტორებს, რომ საქართველოდან იმპორტის გადასახადი ნულოვანი იყო, ხოლო ტერიტორიული სიახლოვე პროცესს გაცილებით ამარტივებდა. ნეტგაზეთი

საქართველოს პრეზიდენტი რუსული კანონის საწინააღმდეგო აქციების ერთი წლის თავზე ამბობს, რომ კანდიდატის სტატუსის მიღება აქციაზე გასული ახალგაზრდების დამსახურება იყო, წელს კი საქართველოს ევროპული მომავალი არჩევნებზე მისვლით წყდება. „მე მაქვს სათქმელი ახალგაზრდებისთვის, რომ რასაც იცავდნენ შარშან ქუჩაში, ეს იყო ძალიან მნიშვნელოვანი და რეალურად, დიდი ნაწილი იმ გადაწყვეტილების, რაც იქნა მიღებული წლის ბოლოს, არის მათი დამსახურება. ეს იციან კარგად, იგრძნეს თავიანთი ძალა და იგივე უნდა მოხდეს ამ წელს, თუ გვინდა, რომ მივაღწიოთ შედეგს ანუ მოლაპარაკებების გახსნას და ეს არის მათი მონაწილეობა ძალიან აქტიურად, დღეს უკვე ქუჩაში არ წყდება ჩვენი მომავალი, წყდება არჩევნებში და მათი მონაწილეობა არის გადამწყვეტი, მათთვისაც პირადად, იმიტომ, რომ მე ვიცი ბევრი ახალგაზრდა, რომელიც თავს იკავებს წასვლისგან იმ მოლოდინში, რომ ეს პერსპექტივა გაჩნდა და ეს პერსპექტივა განხორციელდება. მე მინდა ვუთხრა, რომ მათზე არის დიდწილად დამოკიდებული და დარწმუნებული ვარ, მოვლენ არჩევნებში და ეს იქნება მათი გამარჯვება. ასევე მინდა დავამატო, რომ ასევე მნიშვნელოვანი არის დიასპორის მონაწილეობა არჩევნებში. ამჯერად, ეს არჩევნები არ არის რომელიმე ადამიანის ან პარტიის არჩევანი, ეს არის არჩევანი ევროპის, ეს არის ერთგვარი რეფერენდუმი. მე მგონია, დიასპორაში ვინც ცხოვრობს და გაუჩნდა იმედი, რომ ეს ქვეყანა პერსპექტიულია, რომ ეს ქვეყანა გახდება ევროპის ნაწილი და მათთვისაც გაიხსნება დაბრუნების გზა, მათი მოვალეობაცაა, რომ არჩევნებში მონაწილეობა მიიღონ, რაც ვიცი, რთულია, ბევრი შეზღუდვებია ამ გზაზე და ჩვენ ვცდილობთ და ვმუშაობთ, ასევე არასამთავრობოებთან იმისთვის, რომ გავამარტივოთ არჩევნებში მონაწილეობა…მექნება მომავალ კვირას ჩართვა უცხოეთში ბევრ ორგანიზაციასთან, ეს ყველას საქმეა, რომ ვისაც ვიცნობთ უცხოეთში, ვუთხრათ, აიღე ბილეთი და ჩამოდი ან ადგილზე როგორც შეძლებთ, მობილიზდით, თქვენი ქვეყნის ბედია საარჩევნო ყუთში“, – განაცხადა პრეზიდენტმა. სალომე ზურაბიშვილმა დღეს, 6 მარტს მედიის ნაწილთან პრესკონფერენცია გამართა. პუბლიკა

რუსეთთან დაკავშირებული ბიზნესმენი, დავით ხიდაშელი „ქართული ოცნების” დეპუტატს, გია ვოლსკის საქართველოს პარლამენტის გვერდით მდებარე კაფეში შეხვდა. ინფორმაცია და შეხვედრის ამსახველი კადრები მოძრობა „დროამ” გაავრცელა. მათ შეხვედრას პარლამენტის გვერდზე მდებარე კაფეში პარტია “დროას” წევრები შეესწრნენ. „დროას” განცხადებით, შეხვედრაზე მათ განიხილეს შემდეგი საკითხები: აფხაზეთის რკინიგზის აღდგენა; პირდაპირი ურთიერთობა აფხაზეთის მარიონეტულ რეჟიმთან; საქართველოს უმაღლესი პოლიტიკური თანამდებობის პირების არაფორმალური შეხვედრები საოკუპაციო რეჟიმის წარმომადგენლებთან აფხაზეთში; ბიზნეს ურთიერთობები ოკუპირებულ ტერიტორიებზე. „დროამ” გამოაქვეყნა ნაწყვეტები და ციტატები ვოლსკისა და ხიდაშელის საუბრიდან. მოძრაობის თანახმად: ხიდაშელი ვოლსკის ესაუბრება კონფედერაციაზე აფხაზეთთან და სამხრეთ ოსეთთან; ხიდაშელი ვოლსკის ესაუბრება ოკუპირებულ აფხაზეთში ტვირთების შეტანასა და ბიზნეს ურთიერთობებზე; “რკინიგზის 37 კმ. აფხაზეთში არის დანგრეული” – ხიდაშელი ვოლსკის ესაუბრება აფხაზეთის რკინიგზის აღდგენაზე; “7 კომპანიაა და 20% დღგ” – ეუბნება ხიდაშელი ვოლსკის; “მე რომ ეს თემა დავძრა უნდა ვიცოდე, რომ იქიდან ერთ კვირაში უნდა გადმოდგან ნაბიჯი.” – ეუბნება გია ვოლსკი ხიდაშელს; “ღარიბაშვილს ვეუბნებოდი აფხაზეთის მთავარ 5 მინისტრთან, ვინც ყველაფერს წყვეტს, გქონდეთ ურთიერთობები, კომუნიკაცია” – ეუბნება ხიდაშელი ვოლსკის; “თქვენ გაქვთ თემა და გჭირდებათ მიმართულება” – ეუბნება გია ვოლსკი დავით ხიდაშელს. „დროას” მიერ გავრცელებულ ვიდეოში დასახელებული თემების განხილვა არ ჩანს. კადრები კაფის გარეთ არის გადაღებული, სადაც ვოლსკის და ხიდაშელს მოძრაობის წევრები ესაუბრებიან და კითხვებს უსვამენ. ინფორმაცია, რომ დავით ხიდაშელთან ვაჭრობისა და აფხაზეთთან კონფედერაციის საკითხზე ისაუბრა, დღეს, 7 მარტს გია ვოლსკიმ დაადასტურა. მისი თქმით, შეხვედრის იდეა ხიდაშელისგან წამოვიდა. დეპუტატმა თქვა: კონფლიქტოლოგი პაატა ზაქარეიშვილი „პუბლიკასთან” ხსნის, რომ თავისთავად კონფედერაციის იდეაში ცუდი არაფერია. თუმცა, კატეგორიულად მიუღებელია რუსეთიდან წამოსული ინიციატივა. დავით ხიდაშელი კი რუსეთის ინტერესებს ატარებს. მისივე თქმით, კონფედერაცია მართვის ფორმაა და ის ყველა შემთხვევაში მხარეებს შორის შეთანხმებაზეა დაფუძნებული. „არ არსებობს კლასიკური კონფედერაცია”. – ამბობს ზაქარეიშვილი და დასძენს, რომ მისაღები იქნებოდა ამ საკითხზე მსჯელობა აფხაზურ მხარესთან დასავლეთის შუამავლობით.

საქართველოს პრეზიდენტმა, სალომე ზურაბიშვილმა საარჩევნო კოდექსზე ვეტოს გამოყენების გამო „ოცნების“ კრიტიკას უპასუხა. პრეზიდენტმა მედიის ნაწილთან პრესკონფერენცია გამართა და მათ შეკითხვებს უპასუხა. შალვა პაპუაშვილის განცხადებაზე, რომ პრეზიდენტის ვეტო მომავალი არჩევნების დისკრედიტაციისთვის ნიადაგის მომზადებაა, სალომე ზურაბიშვილი ამბობს, რომ „ოცნება“ ოცნებობს, რომ პრეზიდენტი „ნაციონალური მოძრაობის“ ლიდერი გახდეს, თუმცა მმართველი გუნდის სპიკერები თავად არიან ამ პარტიის განშტოებები. პრეზიდენტი კიდევ ერთხელ ამბობს, რომ ის ვეტოს დაადებს ყველა კანონპროექტს, რომელიც ეწინააღმდეგება ევროკავშირის რეკომენდაციებს. სალომე ზურაბიშვილის თქმით, მისი სურვილია კოალიციური მთავრობა ქვეყნის შემდეგ ეტაპზე გადასასვლელად, მაგრამ მისთვის მთავარია, არჩევნების სანდოობა მისი შედეგის მიუხედავად. ამასთან, საქართველოს პრეზიდენტმა განაცხადა, რომ საქართველოს ინტერესში დღეს მრავალპარტიული წყობის შემოტანაა. საქართველოს პარლამენტის თავმჯდომარე შალვა პაპუაშვილი საარჩევნო კოდექსზე პრეზიდენტის ვეტოს შესახებ ამბობს, რომ ესაა ნადაგის მომზადება იმისთვის, რომ „ნაციონალურმა მოძრაობამ“ არ აღიაროს 2024 წლის საპარლამენტო არჩევნების შედეგი. პრეზიდენტმა „საარჩევნო კოდექსში“ ცვლილებებზე მოტივირებული შენიშვნები პარლამენტს წარუდგინა. ვეტოს დასაძლევად 76 ხმაა საჭირო და საპარლამენტო უმრავლესობა მის დაძლევაზე უკვე შეთანხმდა. პუბლიკა

საერთაშორისო ქსელის სასტუმრომ Golden Tulip Design Tbilisi, ტურიზმის ოსკარის სახელით ცნობილ World Travel Awards-ის დაჯილდოებაზე „საუკეთესო დიზაინ სასტუმროს“ სტატუსი მეორედ მოიპოვა. World Travel Awards-ის 31-ე ცერემონიას ბერლინმა უმასპინძლა. ცერემონიალი 1993 წლიდან იმართება. დაჯილდოებაზე მონაწილეობას ათასობით ნომინანტი იღებს, რომლებიც კონტინენტებისა და ქვეყნების მიხედვით სხვადასხვა კატეგორიაში არიან გადანაწილებულნი. მათ შორისაა წამყვანი სასტუმროები, ტურისტული სააგენტოები და მიმართულებები. „ზედიზედ მეორედ, მსოფლიოს ყველაზე ცნობილი და მნიშვნელოვანი დაჯილდოების World Travel Awards-ის გამარჯვებულად ყოფნა, ნამდვილად ღირსშესანიშნავი მოვლენაა. ეს არის უდიდესი აღიარება და დაფასება იმ შრომის და მონდომების, რაც ჩვენმა გუნდმა სასტუმროს გახსნის დღიდან გასწია. უზომოდ გვიხარია, რომ ამ მოკლე პერიოდის მანძილზე, შევძელით სტუმარმასპინძლობის სექტორში გამორჩეული ადგილის დაკავება. მადლობა მინდა გადავუხადო ჩვენს მმართველ პარტნიორ თორნიკე ჯანაშვილს, ჩვენი გუნდის სრული ნდობისთვის და მუდმივი მხარდაჭერისთვის“ – აცხადებს სასტუმროს გენერალური მენეჯერი ელენე ოთარაშვილი. Golden Tulip Design Tbilisi მსოფლიოს წამყვანი მულტიბრენდული სტუმარმასპინძლობის ჯგუფის – Louvre Hotels-ის სტრატეგიული ბრენდია, რომელიც ინდუსტრიაში ახალი ინოვაციური მიდგომების დანერგვაზეა ორიენტირებული. ამჟამად ეს მზარდი ჯგუფი 54 ქვეყანაში 1 600 სასტუმროს მართავს. Golden Tulip Design Tbilisi თანამედროვე დიზაინის 77 ნომრისგან შედგება. სასტუმროს ყველა დეტალი სტუმრის სასიამოვნოდ დასვენებაზეა მორგებული. თითოეული ნომერი ქართველი არტისტების ხელით შექმნილი ნამუშევრებითაა გაფორმებული და საქართველოს ისტორიის მნიშვნელოვან ფრაგმენტებს გადმოსცემს. სასტუმრო აერთიანებს რესტორანს, ტერასას და ორ საკონფერენციო სივრცეს. გამორჩეული არქიტექტურის შენობიდან მტკვარსა და დედაქალაქის ისტორიულ ნაწილზე შთამბეჭდავი ხედი იშლება. სივრცის ადგილმდებარეობა ტურისტებისთვის განსაკუთრებით საინტერესოა. შენობის დიზაინზე „ნოა სტუდიომ“ ცნობილი პორტუგალიელი დიზაინერის, ცეზარ რიბეიროს ხელმძღვანელობით იმუშავა. მისი ექსტერიერი და ინტერიერი გეომეტრიული ფორმების ერთგვარი თამაშია, ხოლო საკულტო ავეჯი, რომელიც საზღვარგარეთ დამზადდა, სასტუმროში გამორჩეულ ატმოსფეროს ქმნის. სასტუმრო მთლიანად ეკო-მეგობრული და ენერგოეფექტური მასალებითაა აშენებული და ე.წ. მწვანე შენობის სტატუსს ატარებს. პროექტი საინვესტიციო კომპანია Block Group-მა განახორციელა, რომელსაც საქართველოს ბაზარზე ოპერირების 28-წლიანი ისტორია აქვს. ტურისტული მიმართულებით, ამჟამად ჯგუფი ორ მსხვილ პროექტზე მუშაობს. საუბარია ორ მულტიფუნქციურ ცათამბჯენზე - Central Park Towers და რედისონის ბრენდის 180-ნომრიან სასტუმროზე თბილისის ცენტრში. (R)

„რონდელის ფონდის“ ევროპული კვლევების ცენტრის დირექტორის, კახა გოგოლაშვილის განცხადებით, საარჩევნო კოდექსში განხორციელებული ცვლილებები ეწინააღმდეგება როგორც ვენეციის კომისიის დასკვნას, ისე ევროკავშირის მოთხოვნებს. როგორც გოგოლაშვილმა „რონდელის უსაფრთხოების კონფერენციის” ფარგლებში ჟურნალისტებს განუცხადა, მიდგომა, რითაც აღნიშნული ცვლილებები განხორციელდა, არა მარტო საქართველოს ევროპული ინტეგრაციის კონტექსტშია დამაზიანებელი, არამედ, მთლიანად დემოკრატიისთვისაა საფრთხე. „ცვლილებები, რაც განხორციელდა, ვენეციის კომისიის რეკომენდაციებს და ევროკავშირის მოთხოვნებს ეწინააღმდეგება. ამის გარდა, თავად საღი აზრი მოითხოვს - იმისთვის, რომ ქვეყანაში იყოს სტაბილურობა, მოსახლეობის მხრიდან არჩევნების ნდობა, საჭიროა ისეთი ცვლილებების განხორციელება, რაც გამორიცხავს ან მინიმუმამდე დაიყვანს რაიმე სახის შესაძლებლობას, რომ არჩევნები გაუმჭვირვალედ ჩატარდეს, ან იმას, რომ არჩევნების შედეგებს მოსახლეობაში ნდობა არ ჰქონდეს. ვფიქრობ, რომ მიდგომა, რაც გამოყენებული იქნა, არა მარტო ჩვენი ევროპული ინტეგრაციის კონტექსტშია დამაზიანებელი, არამედ, მთლიანად დემოკრატიისთვისაა საფრთხე”,- განაცხადა კახა გოგოლაშვილმა. იპნ

თბილისის მეტროს 100-მდე ვაგონის შესყიდვაზე 205 მილიონი ევრო გამოიყოფა. საქართველოს მთავრობის განკარგულებით, თბილისის სატრანსპორტო კომპანიას მიეცა უფლება, მეტროს ინფრასტრუქტურის აღჭურვის — 97 ვაგონისა და სასწავლო სიმულატორის — სახელმწიფო შესყიდვა განახორციელოს „მსოფლიო ბანკის“ მიერ განსაზღვრული პროცედურების ფარგლებში. შესყიდვა 205 მილიონი ევროს (დღგ-ის გარეშე) ფარგლებში სახელმწიფო ბიუჯეტის სახსრებიდან განხორციელდება. გასული წლის ბოლოს თბილისის მერმა კახა კალაძემ განაცხადა, რომ ცენტრალურ ხელისუფლებასთან ერთად მიღწეულია მეტროს ვაგონების ეტაპობრივი ჩანაცვლების გადაწყვეტილება. მისი თქმით, მეტროს ვაგონებს გარკვეული დროის შემდეგ ეწურება გადაადგილების რესურსი და საჭიროებს ჩანაცვლებას. „როდესაც აღნიშნულ ვაგონს დაუმთავრდება ექსპლუატაციის ვადა, შემოვა მეტროს ახალი ვაგონები. თუ რომელი ფირმის იქნება, ამაზე ამჯერად პასუხი არ მაქვს, რადგან ჯერ ტენდერი არ გამოცხადებულა. ფასთა კვლევაზე გვაქვს გაშვებული, რის შემდეგაც გამოვაცხადებთ შესყიდვაზე ტენდერს და გვეცოდინება, თუ რომელი კომპანია იქნება მომწოდებელი“, — განაცხადა მაშინ კახა კალაძემ. ნეტგაზეთი

ევროპის საბჭო აქვეყნებს ევროპაში პრესის თავისუფლების შეფასების 2024 წლის ანგარიშს. დოკუმენტში, რომელიც ევროპის ქვეყნებში ჟურნალისტების უფლებრივ მდგომარეობას და პრესის თავისუფლების მიმართულებით არსებული ვითარებაა მიმოხილული, საქართველოს შესახებაცაა საუბარი. დოკუმენტში პოზიტიურადაა შეფასებული პრეზიდენტ სალომე ზურაბიშვილის მიერ „მთავარი არხის“ დამფუძნებლის, ნიკა გვარამიას შეწყალება. ანგარიშის ავტორების თქმით, ის ქვეყანაში ერთადერთი ჟურნალისტი იყო, რომელიც პატიმრობაში იმყოფებოდა. ამასთან, დოკუმენტში შეშფოთებაა გამოთქმული იმასთან დაკავშირებით, რომ უკრაინაში რუსეთის სრულმასშტაბიანი ომის დაწყების შემდეგ საქართველოში არ შემოუშვეს არაერთი დამოუკიდებელი რუსი ჟურნალისტი. ანგარიშში უარყოფითადაა შეფასებული საზოგადოებრივი მაუწყებლის დაფინანსების წესთან დაკავშირებული ცვლილებები, რომლის მიხედვითაც,მაუწყებლის დაფინანსება ყოველწლიურად ქვეყნის მთლიანი შიდა პროდუქტის პროპორციულად აღარ გაიზრდება. ანგარიშის ავტორების თქმით, კანონპროექტი პარლამენტმა ღია საჯარო დებატებისა და ექსპერტების ჩართულობის გარეშე მიიღო. მას შემდეგ, რაც პარლამენტმა საზოგადოებრივი მაუწყებლის დაფინანსების წესში ცვლილებები გასული წლის ნოემბერში პირველი მოსმენით მიიღო, მაუწყებლის მენეჯმენტმა პარლამენტის თავმჯდომარესთან შეხვედრა მოითხოვა. ისინი აცხადებდნენ, რომ დაფინანსების წესის ცვლილება და ბიუჯეტზე მისი მიბმა საფრთხის ქვეშ აყენებდა მაუწყებლის დამოუკიდებლობასა და მისი ფუნქციების სრულყოფილად შესრულებას. საზოგადოებრივი მაუწყებლის გენერალური დირექტორი, თინათინ ბერძენიშვილი და სამეურვეო საბჭოს თავმჯდომარე, ვასილ მაღლაფერიძე პარლამენტის თავმჯდომარეს, შალვა პაპუაშვილსა და “ქართული ოცნების” იმდროინდელ თავმჯდომარეს, ირაკლი კობახიძეს შეხვდნენ და მხარეებმა მაუწყებლის დაფინანსების წესის ცვლილებაზე იმსჯელეს. ამ შემხვედრის შემდეგ კი პარლამენტმა კანონპროექტი შეცვალა. დოკუმენტის საბოლოო ვერსიით, რომელიც პარლამენტმა გასული წლის დეკემბერში დაამტკიცა მესამე მოსმენით, უქმდება კანონით განსაზღვრული მაუწყებლის დაფინანსების ნორმა, რომელიც მაუწყებლის დაფინანსებას მთლიანი შიდა პროდუქტის არანაკლებ 0,14%-ს ითვალისწინებდა. საზოგადოებრივი მაუწყებლის დაფინანსების ახალი ფორმულის გათვალისწინებით, 2026 წლიდან მაუწყებლის დაფინანსება სტატისტიკის სამსახურის მიერ გამოქვეყნებულ დასაქმებულ პირთა მონაცემებზე დაყრდნობით გამოითვლება. კერძოდ, საზოგადოებრივი მაუწყებელი დაფინანსდება წინა წლის დასაქმებულ ფიზიკურ პირთა რაოდენობისა და საზოგადოებრივი მაუწყებლობის ბიუჯეტის დაფინანსების კოეფიციენტის – 64 ლარის ნამრავლის შედეგად მიღებული თანხის მოცულობით, მაგრამ არანაკლებ წინა წელს დამტკიცებული ბიუჯეტის მთლიანი ასიგნების ოდენობისა. ამასთან, საზოგადოებრივი მაუწყებლისათვის დაფინანსების ოდენობის შემცირება მხოლოდ სამეურვეო საბჭოს თანხმობით იქნება შესაძლებელი. აღნიშნული ნორმები 2026 წლის პირველი იანვრიდან შევა ძალაში. პროექტით ასევე განისაზღვრა გარდამავალი დებულებები 2024-2025 წლებისთვის. კერძოდ, საზოგადოებრივი მაუწყებელი 2024 – 2025 წლებისთვის წინა წლის სახელმწიფო ბიუჯეტით დამტკიცებული მთლიანი ასიგნების ოდენობით დაფინანსდება. გარდა ამისა, იცვლება აჭარის ტელევიზიისა და რადიოს დაფინანსების ოდენობა. ნეტგაზეთი

უნგრეთის პრეზიდენტმა ხელი მოაწერა დოკუმენტს, რომელიც შვედეთის NATO-ში გაწევრიანებას ეხება. როგორც Reuters წერს, ეს დოკუმენტი შესაძლებლობას მისცემს შვედეთს, ალიანსის 32-ე წევრი უახლოეს დღეებში გახდეს. შვედეთის თავდაცვის მინისტრის, პოლ იუნსონის განცხადებით ამ ნაბიჯს სტოკჰოლმისთვის განუზომელი მნიშვნელობა აქვს: „საბედნიეროდ, ჩვენ გავხდებით ალიანსის წევრები და ეს მოხდება არა კვირებში, არამედ რამდენიმე დღეში“, — აღნიშნა შვედეთის თავდაცვის მინისტრმა. იუნსონის განცხადებით, შვედეთის NATO-ში გაწევრიანება ორმხრივი სარგებლის მატარებელი იქნება როგორც ქვეყნისთვის, ასევე, ალიანსისთვისაც. 26 თებერვალს უნგრეთის პარლამენტის 199 დეპუტატიდან 194-მა მხარი დაუჭირა შვედეთის NATO-ში გაწევრიანებას. გასულ წელს NATO-ს წევრი გახდა ფინეთიც. ორივე ქვეყანამ ალიანსის წევრობაზე განაცხადი მას შემდეგ შეიტანა, რაც რუსეთმა უკრაინაში სრულმასშტაბიანი ომი დაიწყო. ომის საბაბად ოფიციალურმა მოსკოვმა უკრაინის NATO-ში გაწევრიანების მზაობა გამოთქვა და ამისკენ სწრაფვა დაიწყო. ალიანსში ახალი ქვეყნის მიღებას ყველა წევრი სახელმწიფოს თანხმობა სჭირდება. ფინეთისა და შვედეთის სურვილს, გამხდარიყვნენ NATO-ს წევრები, თითქმის ყველა წევრი სახელმწიფო დროულად დათანხმდა. პროცესი გააჭიანურა თურქეთისა და უნგრეთის პოზიციებმა. თუმცა, საბოლოოდ, ორივე წევრი ქვეყანა დათანხმდა ალიანსის გაფართოებას. Reuters აღნიშნავს, რომ ახლა ფორმალური პროცედურებიდან დარჩენილია დოკუმენტაციის ვაშინგტონში გაგზავნა. ნეტგაზეთი

ელენე ნავერიანის ფილმში „შაშვი შაშვი მაყვალი” განსახიერებული როლისთვის ეკა ჩავლეიშვილმა მოიპოვა დუბლინის კინოკრიტიკოსთა წრის ჯილდო. მსახიობმა გაიმარჯვა ნომინაციაში – საუკეთესო მსახიობი ქალი. ეკა ჩავლეიშვილი აქამდე საუკეთესო მსახიობ ქალად დასახელდა სარაევოს, ბელფასტის, ხიხონისა და კოტბუსის ფესტივალებზე. იგი ასევე ნომინირებული იყო ევროპული კინოაკადემიის ჯილდოზე. „შაშვი შაშვი მაყვალი” ელენე ნავერიანის მესამე სრულმეტრაჟიანია ფილმია, რომლის პრემიერაც გაიმართა წლევანდელ კანის კინოფესტივალზე დამოუკიდებელ სექციაში – „Quinzaine des cinéastes“. ფილმმა სარაევოს ფესტივალზე მოიპოვა მთავარი პრიზი, ასევე მოიგო პრიზები კოტბუსისა და ხიხონის კინოფესტივალებზეც. ამჟამად, „შაშვი შაშვი მაყვალი” შვეიცარიის კინოდაჯილდოების მოკლე სიაშია ოთხ კატეგორიაში: საუკეთესო მხატვრული ფილმი, საუკეთესო ხმა, საუკეთესო სცენარი და საუკეთესო მონტაჟი. დაჯილდოების ცერემონია გაიმართება 22 მარტს ციურიხში. ნეტგაზეტი

თბილისის მერიის ინფორმაციით, დიდუბის რაიონში, აკაკი წერეთლის გამზირსა და მის მიმდებარე ქუჩებზე 1-ელი აპრილიდან ზონალურ-საათობრივი პარკირება ამოქმედდება. როგორც თბილისის მერმა კახა კალაძემ დღეს, 6 მარტს, დედაქალაქის მთავრობის სხდომაზე განაცხადა, 1-ელი მარტიდან კონკრეტულ მისამართებზე უკვე განთავსებულია საინფორმაციო ჯიხურები. „კიდევ ერთხელ შევახსენებ მოსახლეობას, რომ 1-ელი აპრილიდან დიდუბის რაიონში, აკაკი წერეთლის გამზირსა და მის მიმდებარე ქუჩებზე ზონალურ-საათობრივი პარკირება ამოქმედდება. იმისთვის, რომ ადგილობრივმა მოსახლეობამ საცხოვრებელ სახლებთან უფასოდ გააჩერონ ავტომანქანები, ადგილობრივ მცხოვრებლებს მოვუწოდებ, დროულად მიმართონ განთავსებულ პავილიონებს და დაარეგისტრირონ ავტომობილები“, — განაცხადა კახა კალაძემ. დედაქალაქის მერმა დაასახელა მისამართები, სადაც მოქალაქეები აღნიშნულ მომსახურებას მიიღებენ. კერძოდ, პავილიონები განთავსებულია შემდეგ მისამართებზე: წერეთლის გამზირი N118 (საგამოფენო ცენტრ „ექსპო ჯორჯიას“ მიმდებარედ); წერეთლის გამზირი N12ა-ს მიმდებარედ; წერეთლის გამზირი N116; წერეთლის გამზირი N76; წერეთლის გამზირი N48; წერეთლის გამზირის N140 (მეტროსადგურ „დიდუბის“ მიმდებარედ); წყალტუბოს ქუჩა N10. როგორც კალაძემ აღნიშნა, პავილიონები მუშაობს ყოველდღე, კვირისა და ორშაბათის გარდა, 09:00-დან 18:00 საათამდე. netgazeti

შინაგან საქმეთა სამინისტროს ცნობით, თბილისსა და რეგიონებში ნარკოდანაშაულისთვის 6 პირი დააკავეს. უწყების განცხადებით, აღნიშნული პირები ცენტრალური კრიმინალური პოლიციის, თბილისის, ქვემო ქართლის, აჭარისა და გურიის პოლიციის დეპარტამენტების თანამშრომლებმა, ბოლო პერიოდში კომპლექსურად ჩატარებული ოპერატიული ღონისძიებებისა და საგამოძიებო მოქმედებების შედეგად დააკავეს/ „დიდი ოდენობით ნარკოტიკული საშუალების გასაღების, გასაღების მცდელობის, ასევე, უკანონო შეძენა-შენახვის, მარიხუანას გასაღებისა და უკანონო შეძენა-შენახვის, განსაკუთრებით დიდი ოდენობით ნარკოტიკული საშუალების შემცველი მცენარის უკანონო დათესვა-მოყვანა-კულტივირების ფაქტებზე დაკავებულები არიან: 1996 წელს დაბადებული ბ.ნ., 1999 წელს დაბადებული ი.ბ., 1989 წელს დაბადებული ე.ხ., წარსულში ნასამართლევები -1986 წელს დაბადებული მ.ე., 2003 წელს დაბადებული ლ.უ. და 1985 წელს დაბადებული რ.ჯ“, – აცხადებს შსს. შსს-ის განცხადებით, დაკავებულებს შორის არიან როგორც საქართველოს, ასევე, ბელარუსის და რუსეთის ფედერაციის მოქალაქეები. დანაშაული 17 წლამდე ვადით თავისუფლების აღკვეთას ითვალისწინებს. როგორც შსს აცხადებს, სამართალდამცველებმა მოსამართლის განჩინების საფუძველზე, განხორციელებული ნარკოტიკის საკონტროლო შესყიდვების, ასევე, ბრალდებულების მიერ მითითებული ლოკაციებიდან, მათი პირადი, ავტომანქანების და საცხოვრებელი სახლების ჩხრეკის შედეგად, ნივთმტკიცების სახით ამოიღეს სხვადასხვა სახის ნარკოტიკული საშუალებები. „ცენტრალური კრიმინალური პოლიციის დეპარტამენტის თანამშრომლებმა ნარკოტიკული საშუალების რეალიზაციის ბრალდებით დაკავებული ე.ხ. -სგან მოსამართლის განჩინების საფუძველზე რამდენჯერმე განახორციელეს ნარკოტიკული საშუალება „ჰეროინის“ საკონტროლო შესყიდვა და აღნიშნული შესყიდვის ფარული აუდიო-ვიდეო გადაღება. ამავე დეპარტამენტის თანამშრომლების მიერ დაკავებული რ.ჯ.-სგან ნივთმტკიცების სახით ამოღებულია „მეტადონი“, ხოლო ბრალდებულის ავტომობილის ჩხრეკის შედეგად სამართალდამცველებმა ნივთმტკიცებად „ჰაშიში“ ამოიღეს. თბილისის პოლიციის დეპარტამენტის ისანი-სამგორის მთავარი სამმართველოს თანამშრომლებმა, თბილისში, ლ.უ. – ს პირადი ჩხრეკის შედეგად, ნივთმტკიცებად ამოიღეს ნარკოტიკული საშუალება მარიხუანა. გამოძიებით, დადგინდა, რომ ბრალდებული ნარკოტიკული საშუალებების გასაღებას სოციალური აპლიკაციის – „ტელეგრამის“ გამოყენებით ახდენდა. ლ.უ.- ს მიერ თბილისში, სხვადასხვა ლოკაციაზე სარეალიზაციოდ განთავსებული მარიხუანა სამართალდამცველებმა ნივთმტკიცებად ამოიღეს. ქვემო ქართლის პოლიციის დეპარტამენტის რუსთავის საქალაქო სამმართველოს თანამშრომლებმა, რუსთავში ბ.ნ. – ს პირადი ჩხრეკის შედეგად, ნივთმტკიცებად ამოიღეს 60 შეკვრა ნარკოტიკული ნივთიერება ,,მეფედრონი”. გამოძიებით, ასევე, დადგინდა, რომ ბ.ნ. ნარკოტიკულ საშუალებებს, შემდგომი რეალიზაციის მიზნით ე.წ. დადების მეთოდით სხვადასხვა ლოკაციაზე ათავსებდა. სამართალდამცველებმა ბრალდებულის მიერ თბილისში, სხვადასხვა ლოკაციაზე განთავსებული ნარკოტიკული საშუალებების „მეტადონის“ და „ალფა პვპ“ – ს შემცველი ნივთიერებები ნივთმტკიცებად ამოიღეს. აჭარის პოლიციის დეპარტამენტის ხელვაჩაურის რაიონული სამმართველოს თანამშრომლებმა, ბათუმში, ი. ბ. – ს საცხოვრებელ სახლში ჩატარებული ჩხრეკის შედეგად, ნივთმტკიცებად ამოიღეს განსაკუთრებით დიდი ოდენობით მარიხუანა, ნარკოტიკულ საშუალების შემცველი 43 ძირი მცენარე კანაფი. გამოძიებით დადგინდა, რომ ბრალდებული აღნიშნული მცენარის კულტივირებას თავის საცხოვრებელ სახლში მოწყობილ სპეციალურ სათბურებში ახდენდა. გურიის პოლიციის დეპარტამენტის საგამოძიებო სამმართველოს თანამშრომლებმა მ.ე. ოზურგეთის მუნიციპალიტეტში დააკავეს. სამართალდამცველებმა ბრალდებულის პირადი, ავტომანქანისა და საცხოვრებელი სახლის ჩხრეკის შედეგად, ნივთმტკიცებად ამოიღეს ნარკოტიკული საშუალება “სუბოტექსი” და “მარიხუანა”“, – აცხადებს შსს. უწყების განცხადებით, გამოძიება სისხლის სამართლის კოდექსის 260-ე, 19-260-ე, 265-ე მუხლებითა და 273 -ე პრიმა მუხლით netgazeti

9 მარტიდან საზოგადოებრივი ტრანსპორტის ქსელს ახალი, 18-მეტრიანი ავტობუსები დაემატება, რომლებიც N314 მარშრუტის მგზავრებს მოემსახურებიან. როგორც დედაქალაქის მერმა, კახა კალაძემ განაცხადა თბილისის მუნიციპალიტეტის სხდომაზე. კახა კალაძის განცხადებით, ახალი ავტობუსები პირველ ეტაპზე იმ მარშრუტებზე გადის, სადაც ყველაზე დიდი მგზავრთნაკადია. მისივე თქმით, 16 მარტიდან ახალი ავტობუსები N301 მარშრუტზეც იმოძრავებენ. publika