tvati

სპეციალურმა საგამოძიებო სამსახურმა, პირადი ცხოვრების საიდუმლოს ხელყოფის ფაქტები გამოავლინა. ამის შესახებ ინფორმაციას სპეციალური საგამოძიებო სამსახური ავრცელებს. მათივე ცნობით, პირადი ცხოვრების საიდუმლოს ხელყოფის ფაქტზე, დაკავებულია 20 წლის მამაკაცი, ხოლო ამხილეს ახალგაზრდა ქალი, რომელიც ყოფილ მულს ყალბი პროფილით მამაკაცის სახელით გაეცნო, ნდობა მოიპოვა და პირადი ცხოვრების საიდუმლოს ამსახველი ფოტო-ვიდეო მასალა ნათესავებთან გაავრცელა. სპეციალური საგამოძიებო სამსახურის თანამშრომლების მიერ, პირადი ცხოვრების საიდუმლოს ხელყოფის ფაქტზე, დაკავებულია 20 წლის მამაკაცი. უწყების ცნობით, გამოძიებით დადგინდა, რომ 2003 წელს დაბადებულმა მამაკაცმა, მისი მეგობრის ყოფილი შეყვარებულის ინტიმური შინაარსის ფოტოსურათები და ვიდეოჩანაწერები უკანონოდ მოიპოვა. „მიმდინარე წლის იანვარ-თებერვლის პერიოდში, ბრალდებული სოციალურ ქსელ „Facebook”-ის ყალბი გვერდის გამოყენებით დაუკავშირდა დაზარალებულს და ინტიმური შინაარსის ფოტოსურათებისა და ვიდეო ჩანაწერების გავრცელების მუქარით, უსიტყვო მორჩილება და კონკრეტული ქმედებების შესრულება, მათ შორის, ინტიმური შინაარსის ფოტოსურათების გადაგზავნა და დაზარალებულის სოციალურ ქსელ „Facebook”-ის პაროლის გადაცემა მოსთხოვა. გარდა ამისა, იგი პირადად უკავშირდებოდა დაზარალებულს და სთხოვდა ჰქონოდათ სასიყვარულო ურთიერთობა, ხოლო უარის მიღების შემდეგ, დაზარალებული ქალის დაკნინების მიზნით, სოციალურ ქსელ „Facebook”-ის ყალბ გვერდზე ინტიმური შინაარსის ვიდეოჩანაწერები საჯაროდ განათავსა. დაზარალებულის მომართვის შემდეგ, სპეციალურმა საგამოძიებო სამსახურმა საგამოძიებო მოქმედებები მოკლე დროში წარმართა. პირადი ჩხრეკისას მობილურ ტელეფონში, ნანახი და ამოღებული იქნა დაზარალებული ქალის ამსახველი ინტიმური შინაარსის მასალა, რის შემდეგაც დაკავებული იქნა ბრალდებული. სპეციალური საგამოძიებო სამსახურის მიერ პირადი ცხოვრების საიდუმლოს ხელყოფის ფაქტზე ასევე, მხილებულია 2000 წელს დაბადებული ქალი. გამოძიებით დადგინდა, რომ 2023 წელს, სოციალურ ქსელ „ინსტაგრამის“ ყალბი პროფილის გამოყენებით, 2000 წელს დაბადებული ქალი, შურისძიების მოტივით მამაკაცის სახელით მისი ყოფილი მეუღლის დას გაეცნო და ნდობა მოიპოვა. დაზარალებულმა მითითებულ ყალბ პროფილზე ყოფილ რძალს, რომელიც მამაკაცის სახელით, ყალბი პროფილით ესაუბრებოდა, თავისი შიშველი სხეულის ამსახველი ფოტოები და ვიდეოები გადაუგზავნა. ბრალდებულმა, ამ გზით, მოტყუებით, უკანონოდ მოიპოვა და შეინახა დაზარალებულის პირადი ცხოვრების საიდუმლოს ამსახველი ფოტო-ვიდეო მასალა, რომლებიც შემდგომ სახელის გატეხის მიზნით დაზარალებულის ნათესავებთან გაავრცელა. სასამართლოს განჩინების საფუძველზე ჩატარებული ბრალდებული ქალის პირადი ჩხრეკისას, მობილურ ტელეფონიდან ამოღებულ იქნა დაზარალებულის შიშველი სხეულის ამსახველი ფოტო-ვიდეო მასალა. დანაშაულში მხილებულ ქალს ბრალდება პირადი ცხოვრების საიდუმლოს ხელყოფის ფაქტზე წარედგინა. დანაშაული 7 წლამდე თავისუფლების აღკვეთას ითვალისწინებს. სპეციალური საგამოძიებო სამსახური ორივე ფაქტზე აგრძელებს გამოძიებას“,- აღნიშნულია უწყების მიერ გავრცელებულ ინფორმაციაში. იპნ

"ჩვენ ეტაპობრივად შევცვლით ნარკოდანაშაულთან ბრძოლის, არაეფექტურ მეთოდებს და წლების განმავლობაში არსებული დასჯის პოლიტიკიდან გადავალთ მომხმარებელთა რეაბილიტაციისა და გამავრცელებელთა დასჯის ეფექტიან და სამართლიან პოლიტიკაზე, რაც აქამდე არც ერთ ხელისუფლებას არ გაუკეთებია. სახელმწიფო ორიენტირებული იქნება მომხმარებელთა და მათი ოჯახების მხარდაჭერა-რეაბილიტაციაზე. პირველ რიგში სარეაბილიტაციო ცენტრების მშენებლობით და ფსიქიკური ჯანმრთელობის სერვისების გაძლიერებით. რა თქმა უნდა სისტემატურად გადაიხედება ჩანაცვლებითი თერაპიის - მეტადონის პროგრამის ადმინისტრირების ეფექტიანობა, აღმოიფხვრება კორუფცია ადმინისტრირების პროცესში." ნათია მეზვრიშვილი, პარტია "საქართველოსთვის" თავმჯდომარის მოადგილე.

"სარჯველაძის დანიშვნა ჯანდაცვის მინისტრად ნიშნავს, რომ "ოცნებას" განახლების რესურსი არ აქვს და პოლიტიკურად სრულად დაცლილია." ანა ბუჩუკური, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/1708344072908023/

"სახიფათოა ძალაუფლების გახანგრძლივების სურვილით შეპყრობილი ადამიანების ხელისუფლებაში ყოფნა. ყველა უწყება თუ ინსტიტუტი, რომელიც არჩევნების გაყალბებაში დაეხმარებოდა დაიქვემდებარეს, მომავალში რას იზამენ არავინ იცის." ბექა ლილუაშვილი, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/264093480088755/

"ადეიშვილის ხილვა გერმანიაში ოფიციალურ შეხვედრაზე არის "ოცნების" უსუსურობა და დადასტურება იმისა, რომ სამწუხაროდ, მათ სიტყვას საერთაშორისო დონეზე ფასი არ აქვს. ასევე გავახსენებ საზოგადოებას, რომ "ოცნების" მეგობარმა ორბანმა მოახდინა ადეიშვილის რეაბილიტაცია, ამიტომ ორბანს მოკითხონ ეგ საკითხი." ანა ბუჩუკური, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/426141926524351/

გელათში სარეაბილიტაციო- საკონსერვაციო სამუშაოები გრძელდება. ტაძარში საერთაშორისო სპეციალისტების მორიგი ჯგუფი იმყოფება. სპეციალისტებმა შიდა სივრცეში არსებული მდგომარეობის პირველად დასკვნაზე ისაუბრეს. მათი თქმით, გამოვლინდა 21 კრიტიკული კერა, რომლის კონსერვაცია მოხდება. პარალელურად დაიწყება აღდგენითი სამუშაოები. გელათის რეაბილიტაციის დროებითი კომიტეტის წევრების თქმით, ჯერჯერობით შეუძლებელია საუბარი, დაზიანებული მხატვრობიდან და მოზაიკიდან რა ნაწილის გადარჩენა მოხდება. ამასთან, გაგრძელდება გადახურვის სამუშაოები და მოეწყობა დროებით გადახურვა. სამუშაოები წლის ბოლომდე დასრულდება. გელათში სარეაბილიტაციო სამუშაოები საპატრიარქოს ორგანიზებით ხორციელდება. დროებითი კომიტეტი გასულ წელს შეიქმნა და ეროვნულ და საერთაშორისო საბჭოებს აერთიანებს. იპნ

რუსეთის ფედერაციის საბჭოს საერთაშორისო ურთიერთობების ხელმძღვანელმა გრიგორი კარასინი „დარწმუნებულია, რომ საქართველოსთან არაფორმალური დიალოგის გამოცდილების გამოყენება მომავალშიც მოხდება”. ინფორმაციას რუსული სამთავრობო მედია TASS ავრცელებს. გამოცემის ცნობით, კარასინისვე თქმით, 2012 წელს რუსეთის ხელისუფლებამ ორჭოფობის გარეშე დაუჭირა მხარი საქართველოს ხელისუფლების მიერ შეთავაზებულ კურსს ორმხრივი ურთიერთობების ნორმალიზაციასთან დაკავშირებით. გრიგორი კარასინმა განცხადება მას შემდეგ გააკეთა, რაც ზურაბ აბაშიძემ 12 წლის შემდეგ რუსეთთან ურთიერთობის საკითხებში პრემიერ-მინისტრის სპეციალური წარმომადგენლის თანამდებობა დატოვა და ის გიორგი ქაჯაიამ ჩაანაცვლა. რუსი დიპლომატის თქმით, ის „დარწმუნებულია, რომ მიღწეულ შედეგებს მომავალშიც გამოიყენებენ”. რუსმა დიპლომატმა განაცხადა, რომ 11 წლის განმავლობაში მასსა და ზურაბ აბაშიძეს შორის 26 შეხვედრა შედგა და არაერთი რამ გაკეთდა, მათ შორის, გაწეულ იქნა ძალისხმევა სავიზო რეჟიმის შერბილებისკენ. – ახლა საქართველოს მოქალაქეებს არ სჭირდებათ რუსეთის ვიზა 90 დღემდე მოგზაურობისთვის. მან ასევე ილაპარაკა ტვირთბრუნვასა და ტრანსპორტის კუთხით „მიღწეულ წარმატებებზე”. აღნიშნა, რომ ფრენების აღდგენის შემდეგ უკვე კვირაში 60-ზე მეტი რეისი ინიშნება საქართველოსა და რუსეთის ქალაქებს შორის. გუშინ, 11 მარტს, მას შემდეგ, რაც თანამდებობიდან წასვლის შესახებ განცხადება გაკეთდა, რუსეთთან ურთიერთობის საკითხებში პრემიერ-მინისტრის ყოფილმა სპეციალურმა წარმომადგენელმა, ზურაბ აბაშიძემ რუსეთთან მუშაობის 11 წელი შეაჯამა და განაცხადა, რომ რუსეთთან მუშაობის შედეგად „დაბალანსდა სავაჭრო ურთიერთობები, რომლებიც 2006 წელს რუსეთის მიერ ემბარგოს შემდეგ გართულდა”. აბაშიძემ ასევე თქვა, რომ რუსეთთან ორმხრივი არაფორმალური დიალოგი 2012 წელს, ბიძინა ივანიშვილის ინიციატივით დაიწყო. პუბლიკა

საქართველოს პროკურატურამ ყოფილი იუსტიციის მინისტრის, ზურაბ ადეიშვილის დაკავებისა და საქართველოში ექსტრადირების მიზნით, გერმანიის და ბელგიის კომპეტენტურ უწყებებს მიმართა. როგორც უწყება აცხადებს, მიმართვა საჯაროდ გავრცელებული ინფორმაციის საფუძველზე მოხდა. „საქართველოს პროკურატურა, საკუთარი უფლებამოსილების ფარგლებში, ყველა კანონით გათვალისწინებულ ღონისძიებას ახორციელებს საქართველოში დანაშაულის ჩამდენი პირების ქართული მართლმსაჯულების წინაშე წარსადგენად, მიუხედავად მათი ადგილსამყოფელისა“, – აცხადებს პროკურატურა. 28 თებერვალს გერმანიის ბუნდესტაგის გვერდზე გამოქვეყნებული ვიდეოჩანაწერის მიხედვით, სხდომას უკრაინის გენერალურ პროკურორთან ერთად საქართველოს იუსტიციის ყოფილი მინისტრი, ზურაბ ადეიშვილიც ესწრებოდა. 6 მარტს კი უკრაინის გენერალურმა პროკურატურამ გამოაქვეყნა ფოტო, სადაც უკრაინის გენერალური პროკურორის გერტ იან კოპმანთან შეხვედრას უკრაინის დელეგაციაში მყოფი ადეიშვილიც ესწრებოდა. საქართველოს პარლამენტის თავმჯდომარემ, შალვა პაპუაშვილმა ევროკავშირის ელჩისგან ადეიშვილის დასწრების შესახებ განმარტება მოითხოვა. უმრავლესობის წევრმა, ირაკლი ზარქუამ კი განაცხადა, რომ საგარეო საქმეთა სამინისტრომ ამ საკითხზე გერმანიის ელჩი უნდა დაიბაროს. 8 მარტს საქართველოში ევროკავშირის წარმომადგენლობა გამოეხმაურა „ქართული ოცნების“ კრიტიკას, რომელიც უკრაინულ დელეგაციასთან ევროკავშირის წარმომადგენლის შეხვედრას შეეხებოდა. ევროკავშირის წარმომადგენლობამ აღნიშნა, რომ „ამ შეხვედრის სხვაგვარად წარმოჩენა დეზინფორმაციაა (ხოლო სწორი ინფორმაციის მოპოვება მარტივადაა შესაძლებელი ევროკავშირის გვერდებზე სოციალურ ქსელში). ევროკავშირის წინააღმდეგ მიმართულ დეზინფორმაციასთან ბრძოლა პირველი ნაბიჯია იმ ცხრა ნაბიჯიდან, რომელიც გაწევრიანების შესახებ მოლაპარაკებების გახსნისკენ უნდა გადაიდგას“. 11 მარტს საგარეო საქმეთა სამინისტრომ განაცხადა, რომ ევროკავშირისა და გერმანიის ელჩებს ოფიციალურად გადაეცათ შეშფოთება იმასთან დაკავშირებით, რომ ზურაბ ადეიშვილი ევროკავშირსა და გერმანიაში ოფიციალური ვიზიტით იმყოფებოდა და კონფერენციებში მონაწილეობდა. ზურაბ ადეიშვილი საქართველოში რამდენიმე საქმეზეა მსჯავრდებული. პუბლიკა

სახელმწიფო დეპარტამენტმა გუშინ გამოაქვეყნა 2025 წლის ბიუჯეტის პროექტი, სადაც საქართველოსთვის გამოყოფილი დახმარებისთვის 80 მილიონი აშშ დოლარია გათვალისწინებული. დოკუმენტში საუბარია, რომ ეს ქვეყანას დაეხმარება დემოკრატიულ და ეკონომიკურ განვითარებაში, ასევე, ევროატლანტიკურ წინსვლაში და ხელს შეუწყობს საქართველოს მედეგობის გაძლიერებას მავნე გავლენების წინააღმდეგ. შემოთავაზებული პროექტის თანახმად, ეს ფულადი დახმარება დაეხმარება ინსტიტუციურ შემოწმებებს და დააბალანსებს კანონის უზენაესობას, ასევე, ხელს შეუწყობს საქართველოს სამოქალაქო საზოგადოებას, წინ წაიწიონ დემოკრატიული და ეკონომიკური განვითარების მხრივ, გააძლიერებს დამოუკიდებელ, სანდო, დაბალანსებულ მედიაზე წვდომას, ხელს შეუწყობს პოლიტიკურ პლურალიზმს. აღსანიშნავია, რომ 2024 წლის თანახმად, საქართველოსთვის 88 მილიონი აშშ დოლარი იყო გამოყოფილი. პუბლიკა

„ადამიანი უკანასკნელ მდგომარეობაში ვარ”; „ბოლომდე ნუ გამწირავთ და ნუ დამღუპავთ“; „ოჯახის წევრია ცუდად, დროებით შეაჩერეთ გამოსახლდება“; „წინაპრების ნივთებიც არ გამომიტანია სახლიდან“; „გეშინოდეთ ჩემნაირი დედების, რომლებსაც აღარაფერი დაგვრჩა დასაკარგი; ვიბრძოლებთ, რომ ჩვენი შვილები ქუჩაში არ დარჩნენ“, – ეს უკვე სამწუხარო ტრადიციად ქცეული, ოჯახების ძალადობრივი გამოსახლების დროს მოსმენილი ფრაზებია. აღსრულების ბიუროს სტატიტიკით, 2023 წელს ქონების დათმობა 562 ოჯახს მოუწია. ასეთია „გამოსახლება ქართულად“: აღსრულების პოლიცია სახლის შორიახლოს რომ გამოჩნდება, ოჯახის დასაცავად შეკრებილ მეზობლებსა და მხარდამჭერებში ნერვიულობა, ბრაზი და შემართება ერთიორად იმატებს. მალევე იწყება ფიზიკური შეტაკება. პოლიცია ნელ-ნელა ცდილობს, გაათავისუფლოს მხარდამჭერებით, მანქანებით, ავეჯით ჩახერგილი შესასვლელი; ელექტროხელსაწყოთი გაჭრას დადუღებული კარი. გამოსახლების წინააღმდეგ შეკრებილი ხალხი იბრძვის წყლით, ცოცხალი ჯაჭვითა და მორალური შეძახილებით. მეზობლებისა თუ გამოსახლების პოლიტიკის წინააღმდეგი მოქალაქეების პროტესტის შედეგად არაერთი გამოსახლება შეჩერებულა, თუმცა ბევრჯერ გვინახავს კიბეებზე გამოყრილი წინაპრების ნივთებიც, წვიმით გაჟღენთილი ავეჯი და აჭედილი კარი. როგორც წესი, მევახშეებს უკავშირდებიან ის ადამიანები, რომლებსაც ფორმალურ საბანკო-საფინანსო სისტემაში პრობლემა აქვთ, – გვიყვება ჯანიაშვილი და დასძენს: „მევახშეებს მიმართავენ ადამიანები, ვინც ვერ იხდიან სესხს, დაკარგეს შემოსავალი; ან კიდევ ისინი, რომლებიც ვერ აკმაყოფილებენ ბანკებისა და მიკროსაფინანსო ორგანიზაციების გადახდისუნარიანობის კრიტერიუმებს და უკიდურესი საჭიროებების გამო, იძულებულნი არიან მევახშეებთან მძიმე პირობებით ხელშეკრულებები გააფორმონ“, – თქვა ჯანიაშვილმა. „მევახშურია“ გარიგება, თუ ამ საქმიანობის უპირველესი მიზანი, არა საპროცენტო სარგებელი, არამედ იპოთეკით დატვირთული ქონების დაუფლებაა“, – წერია კვლევაში „მოსახლეობა მევახშეობის პირისპირ“, რომელიც „სოციალური სამართლიანობის ცენტრმა“ 2020 წელს გამოაქვეყნა. კვლევის თანახმად, გამოვლინდა ისეთი შემთხვევები, როდესაც საცხოვრებლის დაუფლების მიზნით მევახშეები მაღალ წლიურ საპროცენტო განაკვეთსა და მოვალის მხრიდან ვალდებულების დარღვევის შემთხვევაში არაპროპორციულ ფულად სანქციას (პირგასამტეხლოს) აწესებდნენ. ამასთან ერთად „კრედიტორები სარგებლობდნენ ადამიანების ფორსმაჟორული, გამოუვალი სიტუაციებით, უყურადღებობითა და გამოუცდელობით“. ჯანიაშვილის თქმით, მსესხებლებისთვის მევახშესთან დადებული ხელშეკრულება უმეტესწილად საცხოვრებლის პოტენციურ დაკარგვას გულისხმობს და ამ გზით მოვალეები რთულ, ჩახლართულ ფინანსურ ქსელში ეხვევიან. კვლევაში „საკრედიტო ბუმი, ჭარბვალიანობა და ეროვნული ბანკი“ აღნიშნულია, რომ მასობრივი დაკრედიტების პოლიტიკამ (2005 წლიდან), 2015 წლის ლარის კრიზისთან ერთად, ჭარბვალიანობის სახით იფეთქა. ჭარბვალიანობამ კი კიდევ უფრო გაზარდა იმ მსესხებელთა რაოდენობა, რომელთაც კრედიტის გადაუხდელობის გამო საცხოვრებელი დაკარგეს. ცალკე თემაა, შუამავლების საკითხი. ჯანიაშვილის თქმით, არის შემთხვევები, როდესაც მევახშესთან დაკავშირებაში ე.წ. შუამავალი პირებიც მონაწილეობენ, თუმცა ისინი ოფიციალურად არსად ფიგურირებენ. ის გვეუბნება, რომ დაზარალებულ ადამიანებს აღუნიშნავთ ისიც, რომ მათ მევახშესთან დაკავშირება ბანკის გავლით მოახერხეს. „საყურადღებოა, თუმცა ჩვენ მტკიცება არ შეგვიძლია, რადგან ეს საკითხი არ გვიკვლევია“, – დაამატა მან ჩვენთან საუბრისას. კვლევაში ასევე ნათქვამია, რომ მევახშეებთან კავშირები მათი ადვოკატების გავლითაც იბმება. რეგულაციების გვერდის ავლით – რა გზა ნახეს მევახშეებმა გამოსყიდვის უფლებით ნასყიდობის ხელშეკრულება – სამევახშეო სქემაში ამ ხელშეკრულების გამოყენებას იურისტები თვალთმაქცურ ტაქტიკას უწოდებენ, რომელიც მევახშის მხრიდან უძრავ ქონებაზე დაპატრონების შანსს ზრდის. ამ ხელშეკრულებით მევახშე გვერდს უვლის იმ რეგულაციას, რომლითაც იპოთეკური სესხის გამცემ სუბიექტებს შეზღუდვები აქვთ დაწესებული. „პუბლიკაზე“ განთავსებული ბლოგით – „ნასყიდობის საფარქვეშ“, იურისტი დავით კლდიაშვილი იხსენებს, რომ 2018 – 2019 წელს ქვეყანაში ორი მნიშვნელოვანი აქტი მიიღეს, რომელთა შედეგადაც: დადგინდა ზღვარი, რომლის ფარგლებშიც სესხი მხოლოდ ლარში უნდა გაიცეს; დაუდგინდა ჭერი საპროცენტო განაკვეთს; აიკრძალა ფიზიკურ პირებს შორის სასესხო ურთიერთობა, თუ სესხის უზრუნველყოფის საგანი უძრავი ნივთია; ყველა პირი, რომელიც სხვა პირზე 20-ზე მეტი ოდენობით სესხს გასცემდა, სავალდებულო წესით დაექვემდებარა ეროვნულ ბანკში რეგისტრაციასა და რეგულირებას. კლდიაშვილის თქმით, რეგულაციით მივიღეთ სურათი, რომ იპოთეკური სესხის გაცემა შეუძლია სამ სუბიექტს – ბანკს, მიკროსაფინანსო ორგანიზაციასა და სესხის გამცემ სუბიექტს (სესხის გამცემი სუბიექტები, ძირითად შემთხვევაში, იურიდიული პირები არიან). მისივე განმარტებით, ზემოაღნიშნულ ორგანიზაციებს დაევალათ ეროვნულ ბანკში რეგისტრაცია და პასუხისმგებელიანი დაკრედიტება, რაც ნიშნავს იმას, რომ ძირითად შემთხვევაში იპოთეკური სესხი მხოლოდ მაშინ გაიცემა, როცა მსესხებლის შემოსავლები, ანუ გადახდისუნარიანობა დასტურდება. მისი თქმით, ცვლილებების მიზანი იყო, რომ გონივრული პირობებით სესხი აეღო გადახდისუნარიან პირს, რითაც მცირდებოდა ვერგადახდისა და შესაბამისად, „ბინის დაკარგვის“/„გამოსახლების“ რისკიც, რაც ნამდვილად მტკივნეული სოციალური მოვლენაა. კლდიაშვილი ამბობს, ამ რეგულაციების დაწესების შემდეგ ზოგ მოქალაქეს შეეზღუდა წვდომა სესხზე. ცალსახა იყო, რომ ისინი გამოსავლის ძიებას დაიწყებდნენ. ასევე გამოსავლის ძიებაში იყო ფიზიკური პირიც, რომელსაც აეკრძალა გასესხება უძრავი ქონების უზრუნველყოფით. სწორედ ამიტომ დაიწყეს „გამოსყიდვის უფლებით ნასყიდობის ხელშეკრულების“ გაფორმება. ეს ხელშეკრულება გარიგების აპრობირებული სახეა, რომელიც გულისხმობს ქონების გაყიდვას იმ პირობით, რომ გარკვეული დროის შემდეგ უკანვე შეგიძლია შეიძინო, მაგრამ, კლდიაშვილი დასძენს, რომ ამ შემთხვევაში იგი გამოყენებულია რეგულაციების გვერდის ავლის მიზნით. „უხეშად რომ ვთქვათ, სქემა ასეთია: დავუშვათ გსურთ 1 000 ლარი სესხი, რომელიც ერთ წელიწადში პროცენტთან ერთად, ჯამში 1 500 ლარი უნდა დააბრუნოთ. ფორმდება ხელშეკრულება, რომ თითქოს თქვენ ბინა გაყიდეთ (გადაუფორმეთ კრედიტორს) 1 500 ლარად, და ერთ წელიწადში უკან შეგიძლიათ შეიძინოთ ასევე 1 500 ლარად, რეალურად კი კრედიტორისგან 1 000 ლარს იღებთ. ამ სქემის სხვა ვარიაციებიც არსებობს, მაგალითად, 1 500 ლარის პერიოდულად გადახდა ა.შ. თუ თანხას ვერ გადაიხდით (უკან არ „შეიძენთ“) ბინა კრედიტორს რჩება. აღსანიშნავია, რომ ასეთი ტიპის „სესხებზე“ საპროცენტო განაკვეთი საბაზროზე გაცილებით მაღალია“, – განმარტავს კლდიაშვილი. კლდიაშვილის განცხადებით, გამოსყიდვის უფლებით ნასყიდობის ხელშეკრულებით მსესხებელი პირდაპირ „უფორმებს“ ბინას კრედიტორს, რომლის ღირებულებაც ხშირად მნიშვნელოვნად აღემატება სესხის თანხას. ჯანიაშვილიც ამბობს, რომ ამ რეგულაციის შემოღების შემდეგ მევახშურმა საქმიანობამ იატაკქვეშ გადაინაცვლა და დაიწყეს გამოსყიდვის უფლებით ნასყიდობის ხელშეკრულების გაფორმება. თავისთავად ამ ხელშეკრულების გაფორმება კანონიერი ქმედებაა, თუმცა ამ შემთხვევაში მისი გაფორმების მიზანი არის თვალთმაქცური. „მაგალითად, შეიძლებოდა ბინა გაყიდულიყო, დაახლოებით, 6 000 დოლარად და მოვალეს გამოსყიდვის უფლება ჰქონოდა 15 000 დოლარად. გამოსყიდვის უფლებით ნასყიდობის ხელშეკრულებში ამგვარი უსამართლობაც გვხვდება“, – თქვა მარიამ ჯანიაშვილმა. ჯანიაშვილი აღნიშნავს, რომ გამოსყიდვის შესაძლებლობას ართულებს მოვალისთვის მიცემული მოკლე ვადა, რაც, უმეტესად, 3-6 თვეს მოიცავს. ბუნებრივია, მოვალეს, რომელსაც არამყარი ფინანსური მდგომარეობა აქვს, ამ დროში ქონების უკან გამოსყიდვას, უმეტეს შემთხვევაში, ვერ ახერხებს. იურისტის თქმით, პრობლემურია ის საკითხიც, რომ ეს ტრანზაქციები ოფიციალურად არსად ფიქსირდება, და საჭიროების შემთხვევაში, რთულია დამტკიცება, ნამდვილად გადაუხადა თუ არა მოვალემ მევახშეს თანხის ნაწილი. რა შემთხვევაში ერთვება პროცესებში სახელმწიფო როგორც ზემოთ აღინიშნა, იპოთეკური სესხის გაცემის უფლებამოსილება ეროვნულ ბანკში რეგისტრირებულ სამი სხვადასხვა ტიპის დაწესებულებას აქვს – ესაა ბანკი, მიკროსაფინანსო ორგანიზაცია და სესხის გამცემი სუბიექტი. ამას გარდა, ზემოთ ასევე მიმოვიხილეთ ნასყიდობის გამოსყიდვის ხელშეკრულება, რომლითაც ფიზიკური პირები ახერხებენ, დაეუფლონ სხვის ქონებას. რა ხდება პირველ შემთხვევაში, როდესაც ადამიანი ვეღარ ახერხებს ბანკთან, მიკროსაფინანსო ორგანიზაციასთან თუ სესხის გამცემ სუბიექტთან აღებული ვალდებულებების შესრულებას, ანუ ვეღარ იხდის იპოთეკურ სესხს? – მარიამ ჯანიაშვილი ამ პროცედურებს გვიხსნის და სახელმწიფოს როლსაც გამოყოფს. თავდაპირველად სახელმწიფო ერთვება, როდესაც მოვალე ვალს ვერ უხდის კრედიტორს (ბანკს, მიკროსაფინანსო ორგანიზაციას და ეროვნულ ბანკში რეგისტრირებულ სესხის გამცემ სუბიექტს) და ქონება გადის აუქციონზე. კერძოდ, მას შემდეგ, რაც ადამიანი ვეღარ იხდის თანხას, კრედიტორი გარკვეული პერიოდის შემდეგ მიმართავს სასამართლოს. კრედიტორის მიერ საქმის მოგების შემდეგ საქმე გადაეცემა აღსრულების ეროვნულ ბიუროს, უწყებას კი ქონება აუქციონზე გააქვს. ჯანიაშვილის თქმით, სახელმწიფო უშვებს, რომ თუ აუქციონზე გატანილი ქონება პირველ და მეორე ეტაპზე ვერ გაიყიდა, მესამედ მისი ღირებულების 5%-ად გაიყიდოს, რაც იურისტის შეფასებით, არაპროპორციულია. აღსანიშნავია, რომ აუქციონზე არ გადის ქონება, როდესაც მოვალესა და კრედიტორს შორის გამოსყიდვის უფლებით ნასყიდობის ხელშეკრულებაა გაფორმებული. ამ შემთხვევაში ქონება თავიდანვე გამსესხებლის საკუთრებაში გადადის. თუ მოვალე არღვევს ამ ხელშეკრულებას, გამსესხებელი მიდის სასამართლოში და მოითხოვს თავისი ქონების უკანონო მფლობელობიდან გამოთხოვას. სასამართლოს გადაწყვეტილების შემდეგ საქმეში აღსრულების ბიურო ერთვება. „აღსრულების ბიუროს, სასამართლოსა თუ აუქციონის ეტაპზე სახელმწიფო სტრუქტურები ჩართული არიან პროცესში, ისინი ასევე შემსწრე არიან გამოსახლების ისეთი ბრუტალური მეთოდებისა, როგორებიც დედაქალაქსა თუ საქართველოს სხვადასხვა რეგიონში არაერთხელ ვნახეთ. ამრიგად, სახელმწიფოსთვის შინაარსობრივად და იდეურად უსამართლო პროცედურების შესახებ ყველა ეტაპზე ცნობილია“, – ამბობს ჯანიაშვილი. მისივე განმარტებით, პრობლემურია პროცესში სასამართლოს ჩართულობის ფარგლებიც. ჯანიაშვილის შეფასებით, საქართველოში სასამართლოს გადაწყვეტილებები ამგვარ საქმეებზე შაბლონურია და მხედველობაში იღებს მხოლოდ იმ ფაქტს, თუ ვინ არის ქონების ოფიციალური მფლობელი. „საქართველოში სასამართლო არსებითად არ სწავლობს ამგვარ საქმეებს, უგულებელყოფს ოჯახის მოწყვლადობას და არ ითვალისწინებს, რჩება თუ არა ალტერნატიული საცხოვრებლის გარეშე ოჯახი“, – თქვა ჯანიაშვილმა და დაამატა, რომ მათ შეისწავლეს, როგორია საერთაშორისო გამოცდილება და აღმოჩნდა, რომ სასამართლო მსჯელობს ოჯახის მძიმე მდგომარეობაზე, იმ შემთხვევაში, თუ ოჯახი უსახლკაროდ რჩება და თავს იკავებს გამოსახლების გადაწყვეტილებისგან, ან ავალდებულებს შესაბამის ორგანოებს, რომ ოჯახი უზრუნველყონ ადეკვატური საცხოვრებლით. მისი თქმით, ამ კუთხით ყურადსაღებია სამხრეთ აფრიკის სასამართლოს გადაწყვეტილებები, სადაც საკუთრების უფლება ყველა შემთხვევაში არ არის უპირატესი. არგენტინის სასამართლოს მიხედვით კი, იმ შემთხვევაში, როდესაც გამოსახლების ობიექტები შეიძლება იყვნენ ბავშვები, სახელმწიფო ვალდებულია, უზრუნველყოს ისინი ალტერნატიული და ადეკვატური საცხოვრებლით. ევროპული ქვეყნებიდან ის ყურადღებას ამახვილებს ბელგიის, გერმანიისა და ავსტრიის გამოცდილებაზე, სადაც პრაქტიკა აჩვენებს, რომ სასამართლოსთვის მნიშვნელოვანია, გამოსახლების საკითხის განხილვის პარალელურად იმსჯელოს პირის უსახლკაროდ დატოვებაის პერსპექტივაზე და გადაწყვეტილების მიღებამდე იზრუნოს საცხოვრისის უფლების დარღვევის თავიდან აცილებაზე. სასამართლოებს ეკისრებათ ვალდებულება, რომ გამოსახლების შესახებ საქმის წარმოებაზე ინფორმაცია მიაწოდონ ადგილობრივ მუნიციპალიტეტებს/სოციალურ სამსახურებს, რადგან გამოსახლებისას ოჯახები საცხოვრისით უზრუნველყოფილნი იყვნენ, ხოლო სოცმუშაკებმა შეაფასონ მდგომარეობა და ოჯახები შესაბამის სოციალურ სერვისებში ჩართონ. სად მიდიან ოჯახები, რომლებმაც დაკარგეს უკანასკნელი საცხოვრებელი? ჯანიაშვილი გვიხსნის, რომ სახელმწიფო პოლიტიკა და სერვისები ამგვარი პრობლემების წინაშე მყოფი ადამიანებისთვის ძალიან მწირი და დროში გაწელილია. გამოსახლებული ოჯახისთვის ოფიციალურად დახმარების მიღების ორი გზა არსებობს: გამოსახლებულ ოჯახს შეუძლია მიმართოს მუნიციპალიტეტს და სთხოვოს ბინის ქირით დაკმაყოფილება, რომელიც ამ ეტაპზე 500 ლარს შეადგენს. მარიამ ჯანიაშვილის თქმით, ოჯახს იმ შემთხვევაში გაუმართლებს, თუ აღმოჩნდება, რომ მუნიციპალიტეტს აქვს ბიუჯეტი ოჯახის დასაკმაყოფილებლად. ამასთან, ცხადია, რომ უძრავი ქონების ბაზარზე შექმნილი სიტუაციიდან გამომდინარე 500 ლარად საბაზისო პირობებით საცხოვრებლის პოვნა შეუძლებელია და აუცილებელია თანადაფინანსება. გამოსახლებულმა ოჯახმა შეიძლება მიმართოს მერიას და დარეგისტრირდეს, როგორც უსახლკარო. კომისია შეისწავლის ოჯახის მდგომარეობას და იმ შემთხვევაში, თუ ოჯახი აკმაყოფილებს მთელ რიგ კრიტერიუმებს, შესაძლებელი ხდება ოჯახის სოციალურ საცხოვრისში განთავსება. ჯანიაშვილის თქმით, კომისია საკმაოდ დატვირთულია და გადაწყვეტილებები დაყოვნებით მიიღება. თავის მხრივ, სოციალურ საცხოვრისში მოხვედრილ ოჯახს უმეტესად მძიმე პირობები ხვდება. სოციალურ პოლიტიკაზე მომუშავე ორგანიზაციები წლებია, საცხოვრისებში არსებულ მძიმე საყოფაცხოვრებო პირობებზე საუბრობენ და მისი მოგვარების აუცილებლობას აყენებენ დღის წესრიგში. „პუბლიკა“ უსახლკარობის საკითხს მომდევნო მასალებში ვრცლად ისევ დაუბრუნდება. ასე რომ, საწყის ეტაპზე გამოსახლებული ოჯახი ან რჩება ქუჩაში, ან ახლობლების, მეგობრებისა და საზოგადოების დახმარების იმედად არის. რას ამბობს სტატისტიკა? „აღსრულების ეროვნული ბიუროს“ ვებგვერდზე ცალკე ინფორმაცია, რომელიც ქონების დათმობის ან ე.წ. იძულებითი გამოსახლების შემთხვევებს ასახავს, არ იძებნება. „პუბლიკამ“ აღსრულების ეროვნულ ბიუროს პრესსამსახურს შეკითხვებით მიმართა, თუმცა უწყებაში განაცხადეს, რომ ინფორმაცია საჯარო ინფორმაციის გამოთხოვის წესით უნდა მოვითხოვოთ. უწყებიდან ინფორმაციის მიღების შემთხვევაში ინფორმაცია განახლდება. 2023 წელს აღსრულების პოლიციამ საქართველოს მასშტაბით 600-მდე ოჯახს ქონების დათმობა სხვადასხვა პირობით მოუწია. „პუბლიკამ“ მოიძია გასულ წლებში მედიასაშუალებების მიერ გავრცელებული სტატისტიკა. bm.ge-ის სიუჟეტის თანახმად, 2022 წელს 8 თვის განმავლობაში, (იანვრიდან აგვისტოს ჩათვლით) ქონების დათმობის 387 შემთხვევა იყო. კრედიტორებს შორის რამდენი იყო ბანკი, მიკროსაფინანსო ორგანიზაცია თუ კერძო პირი, ბიურო აცხადებს, რომ ინფორმაციას ჩაშლილად არ ამუშავებს. ბიუროს პრესსამსახური განგვიმარტავს, რა იგულისხმება მორიგებით დასრულებულ საქმეთა რაოდენობაში და როგორ უნდა წავიკითხოთ სტატისტიკა სწორად: მისი თქმით, მორიგებით დასრულება არ ნიშნავს, რომ მოვალეს ქონების დათმობა არ მოუწია. როგორც გვიხსნის, ბევრნაირი მორიგება არსებობს, შესაძლოა მოვალემ და კრედიტორმა მოილაპარაკეს კონკრეტულ პირობაზე, ვადაზე, ალტერნატიული ბინის ქირაობაზე და ა.შ. ბიუროსთვის კი ასეთი ტიპის საქმეც დასრულებულს ნიშნავს. „2022 წელი რომ განვიხილოთ, 387 საქმიდან 337-ში რაღაცა ტიპის შეთანხმება შედგა, ხოლო დანარჩენ შემთხვევაში იძულებითი გამოსახლება განხორციელდა. ანუ, იძულებითსა და ნებაყოფლობითზეა აქ საუბარი, თორემ გამოსახლება ნებისმიერ შემთხვევაში მოხდა… „გამოსახლებას“ ამას თქვენ უწოდებთ, თორემ ოფიციალურად ეს არის უძრავი ქონების გამოთავისუფლებულ მდგომარეობაში კრედიტორისთვის გადაცემა. ჩვენ გადავცემთ ბინას კრედიტორს, უბრალოდ მერე ერთმანეთში რას მორიგდებიან, ეს ჩვენ აღარ გვეხება“, – განმარტავენ უწყებაში. მათივე თქმით, უმრავლეს შემთხვევაში მორიგებით დასრულებაც ბინის დატოვებას ნიშნავს. ბინის უკან გამოსყიდვის შემთხვევები ძალიან ცოტაა. დავით კლდიაშვილის ბლოგში, რომელზე საუბარი ზემოთაც იყო, მოყვანილია მონაცემები, რომლებიც გამოსყიდვის უფლებით ნასყიდობის ხელშეკრულებებთან მიმართებით საერთო ტენდენციას გვიჩვენებს. ამ მონაცემების მიხედვითაც 2018 წლიდან გაზრდილია გამოსყიდვის უფლებით ნასყიდობის ხელშეკრულებების რიცხვი, რაც, სავარაუდოდ, გამკაცრებულ რეგულაციებს უკავშირდება. აქვე უნდა განიმარტოს – ეს არ ნიშნავს იმას, რომ ამ ხელშეკრულებების უკან ყველა შემთხვევაში მევახშური გარიგება დგას, თუმცა ამგვარი ხელშეკრულებების რაოდენობის ზრდა რიგი საფუძვლიანი მსჯელობის საშუალებას იძლევა. კლდიაშვილის მიერ გამოთხოვილი ინფორმაციით, 2016 წლის 01 მარტიდან 2018 წლის 01 სექტემბრამდე პერიოდში ნოტარიულად დამოწმებულია 1 465 ერთეული გამოსყიდვის უფლებით უძრავი ნივთის ნასყიდობის ხელშეკრულება, მაშინ, როცა 2018 წლის 01 სექტემბრიდან 2021 წლის 01 მარტამდე პერიოდში დამოწმებულია 11 132 ერთეული. პლატფორმა „კომენტარის“ მიერ დამუშავებული ინფორმაციით, საქართველოში შინამეურნეობების ვალი წლიდან წლამდე იზრდება, როგორც აბსოლუტური მოცულობით, ასევე მშპ-სთან შეფარდებით. არსებობს ჭარბვალიანობის პრობლემაც. მათი განმარტებით, კოეფიციენტი PTI-ით იზომება, განკარგვადი შემოსავლის რა ნაწილს იხდიან შინამეურნეობები სესხის პროცენტის სახით. „კომენტარის“ ცნობით, მაგალითად, 2022 წელს იპოთეკური სესხების გადამხდელების 35% ყოველთვიურად იხდიდა შემოსავლის ნახევარს ვალდებულების დასაფარად. რა ბერკეტები არსებობს გამოწვევებზე საპასუხოდ? მარიამ ჯანიაშვილი მიიჩნევს, რომ არსებული კანონმდებლობა ყველა აქტორის ჩართულობით უნდა გადაიხედოს და რეფორმა გატარდეს. მისი თქმით, ცვლილებები უნდა შეეხოს როგორც ფულად-საკრედიტო სისტემას, ისე გამოსახლების პოლიტიკას, სოციალურ მხარდამჭერ სერვისებს, ადამიანის უფლებების დაცვის საკითხებსა და სხვა სამართლებრივ რეგულაციებს. ცვლილებები აუცილებელია და მასზე მუშაობის დასაწყებად მყისიერი ნაბიჯი მორატორიუმის გამოცხადება იქნება“, – აცხადებს ჯანიაშვილი. მორატორიუმის გამოცხადება გამოსახლების წინააღმდეგ აქციის მონაწილეებისა და სხვადასხვა აქტივისტური მოძრაობის საერთო მოთხოვნაა. ზამთარში გამოსახლება უნდა შეჩერდეს – სახალხო დამცველმა 7 თებერვალს აღსრულების ეროვნულ ბიუროს წერილით მიმართა, რომ ზამთრის განმავლობაში შეიზღუდოს იმ პირთა გამოსახლების პროცესი, რომლებიც უკანასკნელ საცხოვრებელს კარგავენ. ზამთარში გამოსახლების წინააღმდეგ განცხადება გააკეთა საქართველოს პრეზიდენტმაც. უფლებადამცველები მიმართავენ სახელმწიფოს, რომ საერთაშორისო სტანდარტით ზამთარსა და ცუდ ამინდში გამოსახლება აკრძალულია და ის უნდა აიკრძალოს საქართველოშიც. „შევიკრიბებით და ვიმსჯელებთ“ – ასეთი იყო მმართველი გუნდის წარმომადგენლის პოზიცია იანვრის ხმაურიანი გამოსახლების პასუხად. მას შემდეგ თვეზე მეტი გავიდა, თუმცა კონკრეტული ხედვა და გეგმა საზოგადოებისთვის ჯერ არავის გაუცნია. რაც შეეხება მორატორიუმის საკითხს, პარლამენტის ადამიანის უფლებათა კომიტეტის თავმჯდომარის რანგში მიხეილ სარჯველაძე ამბობდა: „მორატორიუმისთვის რამდენად არსებობს საფუძველი, არ ვიცი. თუ მორატორიუმს შედეგად ის უნდა მოჰყვეს, რომ რამდენიმე თვის შემდეგ უნდა შედგეს გამოსახლება, ბუნებრივია, აზრს კარგავს. რაღაც კონკრეტულ იდეაზე უნდა იყოს საუბარი, სხვაგვარად უბრალოდ ლოგიკურად არ მეჩვენება“, – განაცხადა სარჯველაძემ. სანამ გადაწყვეტილების მიმღებნი საკანონმდებლო ცვლილებებზე დაიწყებენ მსჯელობასა და მოქმედებას, დავით კლდიაშვილი ამგვარი გამოწვევების წინაშე მყოფ ოჯახებს ურჩევს, რომ მიმართონ სასამართლოს. „ეფექტიანი გზა არის, რომ მსესხებელმა მიმართოს სასამართლოს და მოითხოვოს ხელშეკრულების ბათილად ცნობა, რის პრეცედენტებიც უკვე არსებობს. …უზენაესი სასამართლოს გადაწყვეტილებებიც არსებობს, როცა სასამართლო დაეთანხმა ნასყიდობა-გამოსყიდვის უფლებით ხელშეკრულების გაბათილებას, ვინაიდან ცალსახა იყო მხარეთა განსხვავებული ნება“, – ამბობს კლდიაშვილი. პუბლიკა

საქართველოს შინაგან საქმეთა სამინისტროს სასაზღვრო პოლიციას თანამედროვე, ახალი, ევროპული ტიპის „H 145“ ვერტმფრენი შეემატა. ამის შესახებ ინფორმაციას შსს ავრცელებს. მათივე ცნობით, ვერტმფრენის გადმოცემა, გერმანიაში, „Airbus Helicopters“-ის საწარმოში განხორციელდა, რომელსაც სასაზღვრო პოლიციის უფროსის მოადგილე გიორგი მალანია და სასაზღვრო პოლიციის სპეციალური დანიშნულების ავიაციის დეპარტამენტის დირექტორი, იოსებ არჯევანიშვილი დაესწრნენ. „თანამედროვე ევროპული ტიპის „H 145“, ვერტმფრენი, ფრანგული კომპანია „Airbus Helicopters" ერთ-ერთი უახლესი მოდელია. ახალი ბორტები სრულად დაკომპლექტებულია ხანძართან ბრძოლისა და სამთო-სამაშველო აღჭურვილობით. მათ გააჩნიათ 2 ძრავა, რაც ზრდის ფრენის უსაფრთხოებას. ამ ტიპის შვეულმფრენები მაღალ სიმაღლეზე ოპერირებისა და მანევრის შესაძლებლობებით გამოირჩევა, რაც, საქართველოს მაღალმთიანი რელიეფის გათვალისწინებით, არსებულ ამოცანებთან სრულად თავსებადი იქნება. მსგავს ვერტმფრენებს წარმატებით იყენებენ გერმანიის, შვეიცარიის, საფრანგეთის, კანადისა და სხვა ქვეყნების პოლიციისა და საგანგებო სიტუაციების მართვის სამსახურები. სასაზღვრო პოლიციის სპეციალური დანიშნულების ავიაციის დეპარტამენტის მფრინავები და ბორტ-ტექნიკოსები თეორიულ და პრაქტიკულ მომზადებას გერმანიაში, „Airbus Helicopters“-ის სასწავლო აკადემიაში გადიან. მომზადების კურსი 15 მარტს დასრულდება, რომლის შემდგომაც ქართული ეკიპაჟის მიერ ვერტმფრენის საქართველოში ტრანსპორტირება განხორციელდება. 2022 წლის 19 დეკემბერს შინაგან საქმეთა სამინისტროში ხელშეკრულება გაფორმდა ფრანგულ კომპანია „Airbus Helicopters“-თან სამი „H145“ ვერტმფრენის შეძენასთან დაკავშირებით. შემდეგი ორი ბორტის გადმოცემა ქართული მხარისთვის 2024 წლის ივნისამდე იგეგმება“, - ნათქვამია ინფორმაციაში. იპნ

ადეიშვილი ახლა აქ უნდა იხდიდეს სასჯელს - „ოცნების“ უსუსურობის დადასტურებაა, რომ ის გერმანიაში ოფიციალურ შეხვედრაზე ვიხილეთ, - ამის შესახებ პარტია "საქართველოსთვის" დეპუტატმა, ანა ბუჩუკურმა ზურაბ ადეიშვილის ბუნდესტაგში ვიზიტთან დაკავშირებით განაცხადა. მისივე თქმით, ადეიშვილი აქამდეც უნდა იყოს პასუხისგებაში მიცემული საქართველოში, ეს ყველაფერი კი ადასტურებს, რომ საერთაშორისო პარტნიორებთან "ოცნების" სიტყვას ფასი აღარ აქვს. "მე პირადად ვერავინ მასწავლის ადეიშვილი სად უნდა იყოს ახლა, წესით. ის რომ დღეს ადეიშვილი ყველამ ერთად ვიხილეთ გერმანიაში ოფიციალურ შეხვედრაზე, ეს არის "ოცნების" უსუსურობის დადასტურება. ამდენი წელი გავიდა. უფრო მეტსაც გეტყვით, როდესაც "ოცნების" ლიდერები გამოდიან და ამაყობენ ორბანთან მეგობრობით, მე ასევე გავახსენებ საზოგადოებას, ორბანმა მოახდინა ზურა ადეიშვილის რეაბილიტაცია. ეს ხომ არ დაავიწყდა ვინმეს?! ამიტომ დღეს ვითომ რომ თამაშობს "ოცნება", სინამდვილეში აბსოლუტური ფარისევლობაა ეს ყველაფერი, თითქოს წუხან, რომ ადეიშვილი იმყოფება ოფიციალურ შეხვედრებზე საზღვარგარეთ, ჩვენს მეგობრებთან და პარტნიორებთან. ეს არის "ოცნების" ხელისუფლების უსუსურობა. ეს არის დადასტურება იმის, რომ სამწუხაროდ, საერთაშორისო პარტნიორებთან "ოცნების" სიტყვას ფასი აღარ აქვს. მე ეს არ მახარებს, იმიტომ, რომ მომწონს თუ არ მომწონს "ოცნების" ხელისუფლება, ის ჩვენს ქვეყანას წარმოადგენს, მათ შორის, საერთაშორისო ასპარეზზე," - განაცხადა ბუჩუკურმა. იპნ

„ევროპული კეთილდღეობა საქართველოსთვის" - პარტია "საქართველოსთვის" საარჩევნო სოციალური პოლიტიკა - ნაწ. 1

"ოცნება" ცდილობს არჩევნების გაყალბებით გაიხანგრძლივოს ძალაუფლება, სწორედ ამიტომ სჭირდება მას კონტროლირებადი სახელმწიფო ინსტიტუტები, გავლენის ქვეშ მყოფი სასამართლო, საარჩევნო კომისია, კონტროლირებადი ეროვნული ბანკი, აუდიტის სამსახური და ა.შ." ბექა ლილუაშვილი, საპარლამენტო პოლიტიკური ჯგუფი "საქართველოსთვის" თავმდჯომარე. ვიდეო: https://www.facebook.com/ForGeoGe/videos/1342139129747075/

"ფაქტია, რომ დღეს "ოცნებას" აქვს კრიზისი. გვიმტკიცებენ, თითქოს საკონსტიტუციო უმრავლესობის მოპოვება შეუძლიათ, ამის ფონზე კი, ორი კვირა სამდიცინო სფეროს წარმომადგენელი ვერ იპოვეს, რომელიც დათანხმდებოდა, ყოფილიყო ჯანდაცვის მინისტრი. ბოლოს აღმოაჩინეს, რომ ჰყავთ იურისტი მიხეილ სარჯველაძე, კომიკურია ეს ყველაფერი." ბერდია სიჭინავა, პარტია "გახარია საქართველოსთვის" აღმასრულებელი მდივანი. ვიდეო: https://www.facebook.com/ForGeoGe/videos/435133052377330/

"ივანიშვილის 30 დეკემბერს გამოსვლის შემდეგ "ოცნებაში" სრული ქაოსია. სამწუხაროდ, არ გვაქვს მოლოდინი, რომ "ოცნება" უკეთესი გახდება. კოალიცია ჩვენთვის ნაცმოძრაობასთან წითელი ხაზია, დღევანდელ "ოცნებასთან" ლურჯი." ანა ბუჩუკური, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/25637873809137113/

"სამართლიანი წესრიგი არის ჩვენი მთავარი მიზანი. აუცილებელია თანაბარი შესაძლებლობები ყველასთვის, ადამიანები უნდა შედიოდნენ სამართლიან კონკურენციაში ერთმანეთთან. არა ნეპოტიზმს, არა კორუფციას, არა კერპთაყვანისმცემლობას და ბელადომანიას, რომლითაც ჯერ "ნაც.მოძრაობა" იყო შეპყრობილი, ახლა კი "ოცნება". დღეს არ არსებობს ინსტიტუტები და ერთი ადამიანის პირად ნებაზეა დამოკიდებული გადაწყვეტილებების მიღება.” გიორგი შარაშიძე, ფრაქცია "თბილისი საქართველოსთვის" წევრი. ვიდეო: https://www.facebook.com/ForGeoGe/videos/711554331124605/

ამერიკის კინოაკადემიის პრემია „ოსკარი“ 7 ნომინაციაში მოიპოვა ფილმმა „ოპენჰაიმერი“. ამერიკელ ფიზიკოსზე, რობერტ ოპენჰაიმერზე გადაღებული დრამა კინოაკადემიამ საუკეთესო ფილმად აღიარა, მისი რეჟისორი კრისტოფერ ნოლანი კი - საუკეთესო რეჟისორად. ფილმი სულ 13 ნომინაციაზე იყო წარდგენილი. რობერტ ოპენჰაიმერის როლის შემსრულებელმა კილიან მერფიმ „ოსკარი“ მიიღო, როგორც საუკეთესო მსახიობმა მამაკაცმა. ამერიკელი ფიზიკოსი რობერტ ოპენჰაიმერი მეორე მსოფლიო ომის დროს ხელმძღვანელობდა „მანჰეტენის პროექტს“ - ატომური ბომბის პირველი ნიმუშების შექმნას, რის გამოც ხშირად „ატომური ბომბის მამად“ მოიხსენიებენ. „ოპენჰაიმერში“ ატომური ენერგიის კომისიის ხელმძღვანელ ლუის შტრაუსის როლისთვის „ოსკარი“ მიიღო უმცროსმა რობერტ დაუნიმაც. მან მამაკაცის მეორე პლანის როლის საუკეთესო შემსრულებლის ნომინაციაში გაიმარჯვა. „ოპენჰაიმერმა“ გაიმარჯვა ოპერატორის საუკეთესო ნამუშევრის, საუკეთესო მონტაჟის და საუკეთესო საუნდტრეკის ნომინაციებშიც. ასევე ნახეთ „ოქროს გლობუსი“ მიიღო „ატომური ბომბის მამაზე“ გადაღებულმა ფილმმა ამერიკის კინოაკადემიის პრიზებით დაჯილდოების 96-ე ცერემონია 10 მარტს ლოს-ანჯელესში გაიმართა. ქალის საუკეთესო როლისთვის „ოსკარი“ მიიღო ემა სტოუნმა (ფილმი Poor Things). ქალის მეორე პლანის როლის საუკეთესო შემსრულებლის ნომინაციაში გაიმარჯვა დავაინ ჯოი რენდოლფმა (ფილმი The Holdovers). ამერიკის კინოაკადემიამ საუკეთესო უცხოურ ფილმად აღიარა ბრიტანელი რეჟისორის, ჯონათან გლეიზერის The Zone of Interest - დრამა აუშვიცის (ოსვენციმის) საკონცენტრაციო ბანაკის კომენდანტის ოჯახზე. საუკეთესო ორიგინალური სიმღერისთვის What Was I Made For (ფილმი Barbie) ოსკარი მიიღო ბილი აილიშმა. radio tavisupleba

რუსეთთან ურთიერთობის საკითხებში პრემიერ-მინისტრის მრჩეველი გიორგი ქაჯაია იქნება. ის ჩაანაცვლებს ზურაბ აბაშიძეს ე.წ. პრაღის ფორმატში, რომელიც ჰუმანიტარულ, ეკონომიკურ და კულტურულ საკითხებში რუსეთთან პირდაპირ მოლაპარაკებებს ითვალისწინებს გრიგორი კარასინის გავლით. ქაჯაიას მრავალწლიანი დიპლომატიურ კარიერა აქვს. ის ბოლო წლებში რუსეთის ფედერაციაში შვეიცარიის კონფედერაციის საელჩოში საქართველოს ინტერესების სექციაში საგანგებო და სრულუფლებიანი დესპანი იყო. გიორგი ქაჯაია ასევე მუშაობდა რუსეთთან ურთიერთობის საკითხებში პრემიერ–მინისტრის სპეციალური წარმომადგენლის, ზურაბ აბაშიძის მრჩევლად. გიორგი ქაჯაიას შესახებ მედიასთან დღეს, 11 მარტს, სწორედ მისმა წინამორბედმა, ზურაბ აბაშიძემ ისაუბრა. აბაშიძე, რომელსაც აღნიშნული თანამდებობა 12 წელი ეკავა, ამბობს, რომ პოსტის დატოვება თავად სურდა. მისი თქმით, რამდენიმე თვის წინ მაშინდელ პრემიერ-მინისტრს, ირაკლი ღარიბაშვილს წინადადებით მიმართა, რომ მის შემცვლელზე ეფიქრათ. როგორც აბაშიძე ამბობს, მის შემცვლელად თავიდანვე გიორგი ქაჯაია დასახელდა, რადგან რუსეთთან ურთიერთობის საკითხებს კარგად იცნობს. „ლოგიკა ძალიან მარტივია – 2012 წლის შემდეგ გავიდა 12 წელი, ყველაფერს აქვს დასაწყისი და დასასრული. მან [პრემიერმა] დადებითად მიიღო ეს ჩემი წინადადება და ბუნებრივია, ასეთ შემთხვევაში ჩნდება კითხვა, ვინ იქნება შემცვლელი. იმთავითვე დასახელდა გიორგი ქაჯაიას კანდიდატურა, რომელიც ჩვენი სექციის ხელმძღვანელი გახლდათ მოსკოვში 4 წლის განმავლობაში, მაგრამ ის უნდა დაბრუნებულიყო საქართველოში. გიორგი დაბრუნდა, ამ წლის იანვარში დაუსრულდა მას იქ მუშაობის ვადა და ახლა ის ინიშნება ამ თანამდებობაზე. მე წლებია ვიცნობ გიორგი ქაჯაიას, ის მუშაობდა საგარეო საქმეთა სამინისტროში, დიდი გამოცდილება აქვს, მუშაობდა უშიშროების საბჭოში… კარგად იცნობს ამ თემას, კვალიფიცირებული და სერიოზული ადამიანია. მე ვფიქრობ, ის შესაბამისად წარუძღვება ამ საქმიანობას“, – განაცხადა ზურაბ აბაშიძემ. ნეტგაზეთი

საქართველოში, ფსიქიკური ჯანმრთელობის სფეროში საწოლფონდის რაოდენობა და დაფინანსების წესი პაციენტთა ნაწილს სტაციონარულ სერვისზე წვდომის შესაძლებლობას უზღუდავს და ლოდინის დროს ახანგრძლივებს. ამასთან, ფსიქიატრიულ საწოლებს ის პაციენტები იკავებენ, რომელთა გაწერაც ვერ ხერხდება არა კლინიკური მდგომარეობის, არამედ ალტერნატიული საცხოვრებლის არქონის გამო - ოჯახის წევრები ხშირად პაციენტთა მიღებაზე უარს აცხადებენ, - ასეთია მოკვლევის შედეგი, რომელიც ფსიქიკური ჯანმრთელობის სერვისების ხელმისაწვდომობისა და გამოწვევების საკითხზე პარლამენტის ჯანდაცვის კომიტეტის ფარგლებში შექმნილმა თემატური მოკვლევის ჯგუფმა დადო. მოკვლევა 2023 წლის ივნისში დაიწყო, დეკემბერში დასრულდა - დასკვნითი დოკუმენტი კი დღეს გახდა ცნობილი. მოკვლევის პროცესში მონაწილეობდნენ და მოკვლევის საკითხზე დასაბუთებულ პოზიციებს წარადგენდნენ: ფსიქიკური ჯანმრთელობის სერვისების პროვაიდერები, სფეროს ექსპერტები, საკითხით დაინტერესებული არასამთავრობო ორგანიზაციების წარმომადგენლები, სადაზღვევო კომპანიების წარმომადგენლები, მუნიციპალიტეტთა აღმასრულებელი ორგანოები, ჯანდაცვის სამინისტროა და ფსიქიკური ჯანმრთელობის სერვისების მომხმარებლები. თემატური მოკვლევის ჯგუფის ინფორმაციით, თვალსაჩინოა საწოლფონდის პრობლემა. გამოკითხული პირები აღნიშნავენ, რომ ამჟამად ქვეყანაში ამბულატორიული და სტაციონარული სერვისების ხელმისაწვდომობის პრობლემას თანამედროვე ტიპის ფსიქიატრიული კლინიკების, ფსიქიკური ჯანმრთელობის ცენტრებისა და ზოგადი პროფილის საავადმყოფოების ფსიქიატრიულ განყოფილებათა სიმცირე ქმნის. ამ ეტაპზე საქართველოში ფუნქციონირებს 11 სტაციონარული დაწესებულება მოზრდილთათვის და 2 დაწესებულება - მოზარდებისა და ბავშვებისთვის. საწოლფონდის რესურსს ამცირებს პაციენტთა რიცხვის დინამიკაში ზრდა პენიტენციური სისტემიდან გადმოყვანილი ფსიქიკური ჯანმრთელობის პრობლემების მქონე პირების გამო. „გასვლითი ვიზიტისას გამართულ შეხვედრაზე აღინიშნა, რომ იძულებით მკურნალობაზე მყოფმა პაციენტებმა საწოლების მნიშვნელოვანი წილი დაიკავეს. ასეთია საწოლფონდის რაოდენობა 2020-2023 წლებში: 2023 წელი - 1 328; 2022 წელი - 1215; 2021 წელი - 1205; 2020 – 1 495. 2023 წლის აგვისტოს მონაცემებით, საწოლფონდის საერთო რაოდენობიდან 485-ს სასამართლო ფსიქიატრიის პაციენტები იკავებდნენ. საწოლფონდის პრობლემას ხელს უწყობს ის ფაქტიც, რომ ქრონიკული ფსიქიკური აშლილობების მქონე პაციენტთა ნაწილი, საკუთარ თემსა და ოჯახში მიმღებლობის პრობლემათა გამო კლინიკას ვერ ტოვებს. შესაბამისი საცხოვრისისა და ზრუნვის სერვისის შეთავაზება მათ მდგომარეობას საგრძნობლად შეამსუბუქებდა და საწოლებსაც გამოათავისუფლებდა“, - ვკითხულობთ პარლამენტის თემატური ჯგუფის მიერ მომზადებულ დასკვნით დოკუმენტში. ამავე დოკუმენტის თანახმად, მუნიციპალიტეტთა ნაწილში სტაციონარული მომსახურება საერთოდ არ გვხვდება, ხოლო იქ, სადაც მომხმარებლებს მსგავსი ტიპის სერვისს სთავაზობენ, საწოლფონდის პრობლემა არსებობს. გარკვეულ რეგიონებში საწოლფონდი ზრდის ტენდენციას ამჟღავნებს, თუმცა სერვისის პროვაიდერები გაზრდილ მიმართვიანობას ვერ აკმაყოფილებენ. “უნდა აღინიშნოს, რომ სტაციონარული საწოლები არ გვხვდება გურიაში, კახეთში, მცხეთა-მთიანეთში, რაჭა-ლეჩხუმსა და ქვემო სვანეთში და სამცხე ჯავახეთში“, - წერია ანგარიშში. აღსანიშნავია, რომ საწოლფონდის პრობლემა დაფინანსების მეთოდოლოგიასთან კავშირში განიხილება. ექსპერტთა მითითებით, სტაციონარში ადგილების გადატვირთვას ხელს უწყობს ის, რომ სერვისის მიმწოდებლები მაქსიმალურად ტვირთავენ კლინიკებს (საწოლდღეების სრულად ათვისებით) სრული დაფინანსების ასაღებად. ასეთ გარემოებებში სტაციონარები სულ გადატვირთულია. “საწოლფონდისთვის ბიუჯეტის გაზრდა ამ პრობლემას ვერ მოაგვარებს - მნიშვნელოვანია, აქცენტი დაფინანსების მეთოდოლოგიის შეცვლაზე გაკეთდეს“, - აღნიშნულია ანგარიშში. ipn

დაპირებული 800 000 საარტილერიო ჭურვი, რომელიც ჩეხეთმა ევროკავშირის გარეთ მოიძია, უახლოეს კვირებში გადაეცემა კიევს, - Bild-ის ინფორმაციით, ამის შესახებ ჩეხეთის პრეზიდენტმა, პეტრ პაველმა განაცხადა. ჩეხეთის ლიდერის თქმით, მიწოდების ამ ვადაში განხორციელება შესაძლებელია, თუ „ფუნდამენტური პრობლემები" არ იქნება. ამასთან, პეტრ პაველი არ აკონკრეტებს, რომელ ქვეყნებს შეუძლიათ ასეთი რაოდენობის საბრძოლო მასალის მიწოდება. ცნობისთვის, მანამდე, უკრაინულმა მედიამ გაავრცელა ინფორმაცია, რომ ჩეხეთის მთავრობა რამდენიმე თვის განმავლობაში ცდილობდა უკრაინისთვის მისაწოდებელი საბრძოლო მასალის ევროკავშირის ფარგლებს გარეთ მოძიებას. შედეგად, შესაძლებელი გახდა 155 მმ კალიბრის დაახლოებით 500 ათასი ჭურვის და 122 მმ კალიბრის 300 ათასი ჭურვის მოძიება. მიწოდების წყაროები უცნობია, ანალიტიკოსები სხვადასხვა ქვეყნებს ასახელებენ, დაწყებული სამხრეთ კორეიდან დამთავრებული აფრიკის ქვეყნებამდე. იპნ

მთავრობის ადმინისტრაციის უფროსი ლევან ჟორჟოლიანი გახდა. ის საქართველოს პრემიერ-მინისტრმა ირაკლი კობახიძემ მთავრობის ადმინისტრაციაში გამართულ სპეციალურ ბრიფინგზე წარადგინა. ამ დრომდე ლევან ჟორჟოლიანი თბილისის საკრებულოს წევრი იყო. ჟორჟოლიანმა ამ პოსტზე მიხეილ ჯაველიძე ჩაანაცვლა, რომელიც აღნიშნულ თანამდებობას 2022 წლის 10 მაისიდან იკავებდა. პოსტიდან კი მიმდინარე წლის 29 თებერვალს გათავისუფლდა. ipn

ჯანდაცვის მინისტრად მიხეილ სარჯველაძე დაინიშნა. სარჯველაძე საქართველოს პრემიერ-მინისტრმა ირაკლი კობახიძემ მთავრობის ადმინისტრაციაში გამართულ ბრიფინგზე წარადგინა. „როგორც მოგეხსენებათ, გასული ერთი კვირის განმავლობაში გვქონდა კონსულტაციები საქართველოს ოკუპირებული ტერიტორიებიდან, დევნილთა, შრომის, ჯანმრთელობისა და შრომისა და სოციალური დაცვის მინისტრის შესარჩევად. ამ ერთი კვირის განმავლობაში გვქონდა ინდივიდუალური კონსულტაციები, როგორც ჩვენი პოლიტიკური გუნდის წევრებთან, ასევე სამედიცინო საზოგადოების წარმომადგენლებთან. კონსულტაციების ერთ-ერთი მთავარი საკითხი იყო ის, თუ რამდენად უნდა ყოფილიყო ახალი მინისტრი სამედიცინო წრეების წარმომადგენელი. ამ საკითხთან დაკავშირებით როგორც პოლიტიკურ გუნდში, ისე სამედიცინო საზოგადოების წარმომადგენლებს შორის აზრი იყო ორად გაყოფილი. ერთი ნაწილი მიიჩნევდა, რომ ახალი მინისტრი აუცილებლად სამედიცინო სფეროს წარმომადგენელი უნდა ყოფილიყო. მეორე ნაწილი ზუსტად ამის საპირისპირო მოსაზრებას გამოხატავდა. კონსულტაციების საფუძველზე მივედი დასკვნამდე, რომ მინისტრის პოსტზე შეიძლებოდა როგორც სამედიცინო წარმომადგენლების, ისე სხვა კანდიდატების განხილვა. საბოლოოდ, უპირატესობა მივანიჭე ჩვენი პოლიტიკური გუნდის წევრს, რომლის პროფესიონალიზმისა და კეთილსინდისიერების, გამოცდილების მიმართ განსაკუთრებული ნდობა მაქვს. მინდა გაცნობოთ, რომ საქართველოს ოკუპირებული ტერიტორიებიდან, დევნილთა, შრომის, ჯანმრთელობისა და სოციალური დაცვის მინისტრად დაინიშნა ბატონი მიხეილ სარჯველაძე. მას განსაკუთრებული წარდგენა არ სჭირდება. 2012 წლამდე ბატონი მიხეილი ეწეოდა წარმატებულ საადვოკატო საქმიანობას, 2012 წლის შემდეგ მას საჯარო სამსახურში სხვადასხვა თანამდებობა ეკავა. შეგახსენებთ, მიხეილ სარჯველაძე იყო აღსრულების ეროვნული ბიუროს ხელმძღვანელი. მოგვიანებით, ის იყო იუსტიციის მინისტრის მოადგილე. 2012 წლიდან ის გახლავთ საპარლამენტო გუნდის წევრი და პარლამენტის ადამიანის უფლებათა დაცვის უფლებათა და სამოქალაქო ინტეგრაციის კომიტეტის თავმჯდომარე. მინდა წარმატებები ვუსურვო მიხეილ სარჯველაძეს, რომელიც დღეიდან რამდენიმე უმნიშვნელოვანეს მიმართულებას გაუძღვება. ეს არის ჯანდაცვა, მოსახლეობის სოციალური უზრუნველყოფა, დევნილების ინტერესების დაცვა, დასაქმება და შრომის საკითხები. გამოწვევა არის უამრავი. ყველა მიმართულებით არის სერიოზული გამოწვევა, თუმცა, დარწმუნებული ვარ, მისი პროფესიონალიზმი და გამორჩეული პიროვნული თვისებებით იქნება საუკეთესო მინისტრი და მნიშვნელოვან წარმატებას მოუტანს ამ დარგს“, - განაცხადა კობახიძემ. მიხეილ სარჯველაძემ ამ პოსტზე ზურაბ აზარაშვილი შეცვალა. ipn

#6 ეპიზოდი: პარტიის ახალ სახელზე, ახალ მეტროსადგურებზე, ივანიშვილის ფატალურ შეცდომაზე ვიდეო:

დიდ ბრიტანეთს გერმანიისგან Taurus რაკეტების მიღებს სურს, რათა უკრაინას მეტი Storm Shadow რაკეტა გადასცეს, - ამის შესახებ დიდი ბრიტანეთის საგარეო საქმეთა მინისტრმა, დევიდ კამერონმა გამოცემა Süddeutsche Zeitung-თან ინტერვიუში განაცხადა. „მზად ვართ ყველა ვარიანტი განვიხილოთ უკრაინისთვის მაქსიმალური ეფექტის მისაღწევად“, - განაცხადა კამერონმა. ბრიტანელი მინისტრის იდეა იმაში მდგომარეობს, რომ გერმანიამ დიდ ბრიტანეთს Taurus რაკეტები მიაწოდოს, ხოლო ბრიტანული მთავრობა, სანაცვლოდ, უკრაინას დამატებითი რაოდენობით Storm Shadow რაკეტებს მიაწვდიდა. „ბოლომდე მზად ვართ მჭიდროდ ვითანამშრომლოთ ჩვენს გერმანელ პარტნიორებთან ამა და სხვა საკითხებზე, რათა დავეხმაროთ უკრაინას”, - განაცხადა კამერონმა. ამავდროულად კამერონმა აღნიშნა, რომ „არ მსურს დეტალების განხილვა და ჩვენი ოპონენტებისთვის იმის თქმა, თუ რის გაკეთებას ვაპირებთ.” მან უარყო შიშები, რომ უკრაინისთვის ფრთოსანი რაკეტების გადაცემას ომის ესკალაცია შეუძლია. „სრულიად შესაძლებელია ამ იარაღის გამოყენებაზე შეზღუდვების გაწესება, რათა გარანტირებულ იქნას, რომ ის არანაირად არ შეუწყობს ხელს ესკალაციას,” - განაცხადა კამერონმა. იპნ