tvati

ევროკავშირში აიკრძალება ერთჯერადი პლასტმასის ჭურჭლისა და შეფუთვების გამოყენება. აღნიშნული ითვალისწინებს პლასტმასის შეფუთვას ახალი ხილისა და ბოსტნეულისთვის, სასტუმროებსა და სწრაფი კვების ობიექტებში ჰიგიენური საშუალებების შეფუთვებს. POLITICO-ს ინფორმაციით, ახალი კანონმდებლობა მიზნად ისახავს ევროკავშირში ერთჯერადი შეფუთვების ნარჩენების მზარდი რიცხვის შემცირებას. ევროკავშირის სტატისტიკის სამსახურის ინფორმაციით, 2021 წელს ერთ ადამიანზე 188,7 კილოგრამი შესაფუთი საშუალებების ნარჩენი დაგროვდა. აღნიშნული მაჩვენებელი 2020 წელთან შედარებით 10,8-ჯერ მაღალია. ევროკავშირის დეპუტატმა ფრედერიკ რისმა,რომელიც ამ საკითხზე მუშაობას ხელმძღვანელობს, აღნიშნა, რომ ეს ისტორიული შეთანხმებაა. POLITICO-ს ინფორმაციით, აკრძალვის შემდეგ ბიზნესები ვალდებულები იქნებიან, ნება დართონ მომხმარებლებს რესტორნებში მიიტანონ საკუთარი კონტეინერები. ევროკავშირი ასევე აკრძალავს მსუბუქი პლასტმასის ჩანთების გამოყენებას. იდეის ავტორების მიზანია, რომ 2030 წლისთვის ევროკავშირის მასშტაბით ყველა მსგავსი შეფუთვა გადამუშავდეს. publika

"ანტიკორუფციულ ბიუროსთან დაკავშირებით სანამ არ იქნება გადაწყვეტილი დანიშვნისა და დამოუკიდებლობის საკითხი და არ ექნება ბიუროს საგამოძიებო ფუნქცია, მანამ ეს უწყება იქნება ბუტაფორია." ბექა ლილუაშვილი, საპარლამენტო პოლიტიკური ჯგუფი "საქართველოსთვის" თავმჯდომარე. ვიდეო: https://www.facebook.com/ForGeoGe/videos/954734856353080/

ჯანდაცვის სამინისტროს მიერ წარმოდგენილი ფინანსური გათვლა რომ ვნახე, თუ რამდენი მილიონი ლარი ჯდებოდა ახალი კლინიკა, ცოტა ეჭვი შემეპარა სისწორეში, - ამის შესახებ დაავადებათა კონტროლის ეროვნული ცენტრის ყოფილმა ხელმძღვანელმა, ამირან გამყრელიძემ „ინტერპრესნიუსთან“ ინტერვიუში „რესპუბლიკურ საავადმყოფოზე“ საუბრისას განაცხადა. მისივე თქმით, „რესპუბლიკურ საავადმყოფოსთან“ დაკავშირებით წარდგენილი გეგმები მოუმზადებელი იყო, პროცესი კი ტრანსპარანტული უნდა ყოფილიყო. ამასთან, განმარტა, რომ არ შეიძლება ხელაღებით საუბარი შენობის დანგრევასა და ახლის აშენების თაობაზე. „როდესაც გაიხსნა „რესპუბლიკური საავადმყოფო“, მაშინ დავიწყე იქ მუშაობა. ამ დაწესებულებაში ჩამოვყალიბდი ექიმად, პედაგოგად, მეცნიერად. ძალიან შემტკივა გული. ძალიან ფრთხილად უნდა ვყოფილიყავით. „რესპუბლიკური საავადმყოფო“ ქვეყნის ცენტრალური საავადმყოფოა, რომლის ზურგზეც ბევრმა ჭირ-ვარამმა გადაიარა. მახსოვს 9 აპრილს, რამდენიმე საათში დავცალეთ 2 სართული, რათა მოწამლული ხალხი სწრაფად მიგვეღო. აფხაზეთის ომის დროს თუ 2008-ში, გადმოყვანილი პაციენტების სიმძიმე „რესპუბლიკურ საავადმყოფოზე“ მოდიოდა და ბევრი სხვა. კლინიკის სიმძლავრე 1100 საწოლი იყო. მას ჰქონდა სამხედრო დანიშნულებაც. „რესპუბლიკური საავადმყოფოს“ ეზოში, მიწის ქვეშ არსებობს სამხედრო, მიწისქვეშა ჰოსპიტალი, რომელიც დაახლოებით 120-150 საწოლზე იყო გათვლილი. „რესპუბლიკური საავადმყოფო“ იყო ნამდვილი საუნივერსიტეტო კლინიკის მთავარი კანდიდატი. გასული საუკუნის 70-იან წლებში, ჭკვიანმა ხალხმა, ვინც „რესპუბლიკური საავადმყოფოს“ მშენებლობა განიზრახა, იმიტომ ააშენა იქ და დაუკანონეს ტერიტორიები, რომ ის უნდა ჩამოყალიბებულიყო საუნივერსიტეტო კლინიკად. მე ყოველთვის ვამბობდი, რომ „რესპუბლიკური საავადმყოფოს“ საკითხი უნდა გადაწყდეს სამედიცინო უნივერსიტეტთან მიმართებაში (ეს არ ნიშნავს რომ მისი საკუთრება იყოს). აქედან გამომდინარე, არ შეიძლება ასე ხელაღებით თქვა, რომ მოდი, მე ამას დავანგრევ და ახალს ავაშენებ. კლინიკის განვითარების პირველი პროექტი 80-იან წლების შუა პერიოდში იყო შედგენილი, როდესაც უნდა დამატებოდა ის მიმართულებები, რაც აკლდა საუნივერსიტეტო კლინიკას, ჩვენ არ გვქონდა მეან-გინეკოლოგია, არ იყო პედიატრია, ონკოლოგია, ფსიქიატრია. 90-იან წლებში, როდესაც პირველი მსოფლიო ბანკის კრედიტი აიღო ჯანდაცვის სამინისტრომ, იქ იყო 10-12 მილიონი გამოყოფილი, რათა თანამედროვე დედათა და ბავშვთა რეფერალური სამსახური პოლიპროფილურ კლინიკაში შეგვეტანა, ასეთად შეირჩა „რესპუბლიკური საავადმყოფო“, თუმცა მაშინ ისეთი თანხა იყო საჭირო, რომ კრედიტი და სახელმწიფო რესურსი არ ჰყოფნიდა, ამ კრედიტით ღუდუშაურის კლინიკის რეაბილიტაცია მოხდა მაშინ. საგულისხმოა, რომ პრემიერ-მინისტრმა გამოსვლისას ისაუბრა პროექტზე, რომელიც ჩემთვის კარგად არის ნაცნობი, კერძოდ, 2006-2007 წელს „ქართუ ფონდის“ მიერ, ბატონ ბიძინა ივანიშვილის ინიციატივით შემუშავდა პროექტი, რომლის თანახმადაც „რესპუბლიკური საავადმყოფოს“ მთავარი კორპუსის პერპენდიკულარულად განთავსდებოდა 8-10 სართულიანი, 250-300 საწოლზე გათვლილი კორპუსი შემდგომი განვითარებისთვის-ინფექციური საავადმყოფო და სხვა განყოფილებები უნდა მოთავსებულიყო. ამის შემდეგ კიდევ იყო 2-3 პროექტი რესპუბლიკურის მოდერნიზაციის. რა თქმა უნდა, განახლებისა და ახალი თანამედროვე სტანდარტების საავადმყოფოს მშენებლობის წინააღმდეგი ვინ უნდა იყოს, მაგრამ ეს ყველაფერი კარგად უნდა იყოს გააზრებული, დაგეგმილი და განხორციელებული. რაც მთავარია ასეთი მასშტაბური სამედიცინო პროექტის განხორციელებისას მუდმივი კომუნიკაციაა საჭირო თანამშრომლებთან და მთლიანად სამედიცინო საზოგადოებასთან, რამეთუ საქართველოში ალბათ ყოველი მეორე და მესამე ექიმი რესპუბლიკურთან იყო დაკავშირებული თავისი კარიერის განმავლობაში. ჩემი წინადადება, რომელიც გასულ ზაფხულს გამოვთქვი, როდესაც ეს „ციებ-ცხელება“ დაიწყო, იყო შემდეგი - „რესპუბლიკური საავადმყოფოს“ მთავარი კორპუსის უკან, ან პერპენდიკულარულად აშენებულიყო 200-300 საწოლზე გათვლილი ახალი კორპუსი, მომხდარიყო პერსონალის იქ გადაყვანა და შემდგომ, თუ დემონტაჟის აუცილებლობა იქნებოდა, მომხდარიყო ეს და მის ადგილზე აშენებულიყო ახალი, 500-700 საწოლზე გათვლილი თანამედროვე კორპუსი. იმ ადგილზე მივიღებდით ნამდვილი საუნივერსიტეტო კლინიკის თანამედროვე კამპუსს, რომელიც ასე აკლია ჩვენს ჯანდაცვის სისტემას. სამინისტროს მიერ წარმოდგენილი ფინანსური გათვლა რომ ვნახე, თუ რამდენი მილიონი ლარი ჯდებოდა ახალი კლინიკა, ცოტა ეჭვი შემეპარა სისწორეში. შესწავლილი მქონდა თავის დროზე, თუ რა ღირდა საუნივერსიტეტო კლინიკაში 1 საწოლის ევროპული სტანდარტით გაკეთება და დიდი განსხვავება იყო. ვფიქრობ, ეს წინადადება მოუმზადებელი იყო, ეს ყველაფერი ტრანსპარანტულად უნდა მომხდარიყო, კოლექტივთან სწორი კომუნიკაცია იყო საჭირო. განახლების წინააღმდეგი ვინ უნდა იყოს?! მინდა გავიხსენო ისიც, რომ 2012 წლის ოქტომბერში, როცა ხელმეორედ მიმიწვიეს ჯანდაცვის მინისტრის პოზიციაზე, გარკვეული პერიოდის განმავლობაში ინტენსიური კონტაქტი მქონდა „ქართული ოცნების“ ხელმძღვანელობასთან, მაშინაც წამოიწია „რესპუბლიკური საავადმყოფოს“ საკითხმა. „რესპუბლიკური კლინიკა“ წინა მთავრობის მიერ საპრივატიზაციოდ იყო გამზადებული. ბატონ ბიძინა ივანიშვილს შევხვდი და ვუთხარი ჩემი მოსაზრებები, თუ რატომ არ იყო სასურველი, „რესპუბლიკური საავადმყოფოს“ პრივატიზაცია. აღვნიშნე, რომ ის აუცილებლად უნდა ჩამოყალიბებულიყო ნამდვილ დასავლური სტანდარტების საუნივერსიტეტო კლინიკად. ბატონმა ბიძინამ მთხოვა, პრესკონფერენცია ჩამეტარებინა და ეკონომიკის სამინისტროსთვის მომეწოდებინა კლინიკის პრივატიზაცია შეეჩერებინათ. ალბათ, ამ პრესკონფერენციის ჩანაწერი არსებობს, სადაც მოკლე დასაბუთებით გამოვედი საკითხთან დაკავშირებით, მოვუწოდე ეკონომიკის სამინისტროს პრივატიზაციის შეჩერებასთან დაკავშირებით და მართლაც შეჩერდა მისი განკერძოება, შემდგომში აღარ განხილულა ეს საკითხი. „რესპუბლიკურ საავადმყოფოს“ უნდა მიეცეს ახალი დანიშნულება რისთვისაც ის თავის დროზე აშენდა და ჩამოყალიბდეს ნამდვილ საუნივერსიტეტო, მრავალპროფილურ კლინიკად. მსგავსი 3-4 კლინიკა სჭირდება ქვეყანას“,- აღნიშნა გამყრელიძემ. ინტერვიუს სრული ვერსია იხილეთ ბმულზე. ipn

უკრაინელი დამცველების შესაძლებლობებმა დაამტკიცა, რომ რუსი ოკუპანტებისთვის შავ ზღვაში უსაფრთხო ნავსადგურები არ არსებობს და არც იქნება. „მინდა, მადლობა გადავუხადო ყველა ჩვენს ჯარისკაცს, ყველა ქვედანაყოფს, რომელიც აღადგენს უსაფრთხოებას და კონტროლს როგორც უკრაინის ცაზე, ასევე ჩვენს შავ ზღვაში“, - განაცხადა პრეზიდენტმა ზელენსკიმ. მისი თქმით, უკრაინამ დაამტკიცა, რა შეუძლია. „ამას მოწმობს ჩამოგდებული რუსული სამხედრო თვითმფრინავების რაოდენობა და ჩვენი ბიჭების შესაძლებლობები რუსეთის ფლოტთან დაკავშირებით. შავ ზღვაში რუსი ტერორისტებისთვის უსაფრთხო ნავსადგური აღარ არის და არც არასდროს იქნება და არ იქნება მათთვის უსაფრთხო სივრცე ცაზე - ჩვენი უკრაინული ძალა საკმარისი იქნება. ეს ეხება როგორც პარტნიორების მხრიდან მოწოდებას, ასევე ჩვენს შიდა წარმოებას“, - განაცხადა ზელენსკიმ. შეგახსენებთ, 5 მარტის ღამეს უკრაინის სამხედრო-საზღვაო ძალების დრონებმა რუსულ საპატრულო გემ სერგეი კოტოვს დაარტყეს. ეს იყო უკრაინის მთავარი სადაზვერვო სამმართველოსა და უკრაინის შეიარაღებული ძალების სამხედრო-საზღვაო ძალების ერთობლივი სპეცოპერაცია. ipn

ჩემი პრიორიტეტი, როგორც საქართველოში ამერიკის შეერთებული შტატების ელჩის, არის ჩვენი მეგობრობის გაღრმავება და საქართველოს მხარდაჭერა მის დემოკრატიულ გზაზე, განსაკუთრებით მის გზაზე ევროკავშირში წევრობისკენ - საქართველოს ადგილი დემოკრატიულ, დასავლურ ოჯახშია და მტკიცედ მჯერა, რომ საქართველო შეძლებს მიზნის მიღწევას, - ამის შესახებ ამერიკის შეერთებული შტატების ელჩმა საქართველოში რობინ დანიგანმა „სტრატეგიისა და საერთაშორისო ურთიერთობების კვლევის ფონდის“ (რონდელის ფონდი) მიერ ორგანიზებულ რონდელის უსაფრთხოების ყოველწლიურ კონფერენციაზე განაცხადა. როგორც ელჩმა აღნიშნა, საქართველოს კიდევ ბევრი სამუშაო აქვს წინ და იმისთვის, რომ ევროატლანტიკური ინტეგრაციის გზაზე სასურველ მიზანს მიაღწიოს და ამისთვის მას საზოგადოების ყველა სეგმენტის თანამონაწილეობა და საზოგადოების ერთიანობა დასჭირდება. დანიგანის თქმით, ამერიკის შეერთებული შტატები იქნება საქართველოს ყველაზე ძლიერი პარტნიორი ამ გზაზე. „მინდა შევეხო შედარებით ახალგაზრდა და ენერგიულ დემოკრატიას აქ საქართველოში და იმ განსაკუთრებულ მეგობრობას, რომელსაც ქართველები და ამერიკელები იზიარებენ. მე ვფიქრობ, რომ ეს განსაკუთრებული მეგობრობა და პარტნიორობა, რომელსაც ჩვენ საქართველოსთან მრავალი წლის განმავლობაში ვიზიარებთ, ფესვგადგმულია დამოუკიდებლობისა და თავისუფლების სიყვარულში - დემოკრატიის საკვანძო ელემენტებში. ის ფესვგადგმულია რწმენაში, რომ თუ ჩვენ გვაქვს თავისუფლება ასე მოვიქცეთ, ბევრი შრომითა და თავდადებით შევძლებთ უკეთესი სამყაროს დატოვებას ჩვენი შვილებისთვის. ჩემი პრიორიტეტი, როგორც საქართველოში ამერიკის შეერთებული შტატების ელჩის, არის ამ მეგობრობის გაღრმავება და საქართველოს მხარდაჭერა მის დემოკრატიულ გზაზე, განსაკუთრებით მის გზაზე ევროკავშირში წევრობისკენ. საქართველომ უკვე მიაღწია შესანიშნავ პროგრესს ამ წლების განმავლობაში დამოუკიდებლობის აღდგენის შემდეგ. ეს აღიარებულ იქნა, როდესაც ევროკავშირმა საქართველოს კანდიდატის სტატუსი მიანიჭა. მჯერა, რომ საქართველოს ევროატლანტიკური ტრაექტორია გარდაუვალია. ის ჩაწერილია საქართველოს კონსტიტუციაში, მხარდაჭერილია საქართველოს მოსახლეობის 90%-ის მიერ და არის საქართველოს საგარეო პოლიტიკის საკვანძო ელემენტი. საქართველოს ადგილი დემოკრატიულ, დასავლურ ოჯახშია. მაგრამ ჯერ კიდევ დიდი შრომაა საჭირო იქამდე მისაღწევად. საზოგადოების ყველა სეგმენტის მხრიდან საჭირო იქნება ამაში საკუთარი როლის შესრულება, ევროკავშირის წევრობის მიზნის მისაღწევად საზოგადოების მხრიდან გაერთიანება იქნება საჭირო. კვლავაც ეს უბრუნდება დემოკრატიის რთულ, მაგრამ აუცილებელ ელემენტებს - ტოლერანტობას, ინკლუზიურობას, კომპრომისს. მე მტკიცედ მჯერა, რომ საქართველო შეძლებს ამის გაკეთებას და მიზნამდე მიღწევას. ვიმედოვნებ, რომ ეს უფრო ადრე მოხდება, ვიდრე გვიან, როდესაც თქვენ იქნებით ევროკავშირის წევრი ქვეყანა. შემიძლია პირობა მოგცეთ, რომ ამერიკის შეერთებული შტატები იქნება საქართველოს პარტნიორი, ყველაზე ძლიერი პარტნიორი ამ გზაზე“, - განაცხადა რობინ დანიგანმა. ipn

Facebook-ი და Instagram-ი მსოფლიოს მასშტაბით შეფერხებით მუშაობს. DownDetector-ის თანახმად, სოციალური ქსელების მომხმარებლებს პრობლემები აქვთ Facebook Messenger-თან დაკავშირებითაც. ბოლო მონაცემებით, “ფეისბუქზე“ 300 000-ზე მეტი ანგარიშის გათიშვის შესახებ შეტყობინება დაფიქსირდა, ხოლო “ინსტაგრამის“ გათიშივის შესახებ 47 000-ზე მეტმა მომხმარებელმა განაცხადა. "მეტას" სერვისებზე პრობლემას გამოეხმაურნენ კომპანიაში. "ჩვენ ვიცით, რომ ადამიანებს პრობლემა აქვთ ჩვენს სერვისებზე წვდომზე. ჩვენ ამაზე ვმუშაობთ", - დაწერა სოციალურ ქსელ X-ზე "მეტას" წარმომადგენელმა, ენდი სტოუნმა. იპნ

"საინტერესოა, როდემდე აპირებთ ნაცების დაცვას იმისთვის, რომ გაიხანგრძლივოთ ხელისუფლებაში ყოფნის დრო, კიდევ რამდენ ხანს აპირებთ მოჩვენებითად ნაცების რისხვის ხატად წარმოაჩინოთ საკუთარი თავი? სადამდე ფიქრობთ ნაცებთან ერთად მუნიციპალიტეტებში შეთქმულებების მოწყობას. საინტერესოა, როდემდე გააგრძელებთ ძალაუფლების შენარჩუნების მიზნით, შუას გაკრეფის პრინციპით ერთმანეთის დაცვას და გამხნევებას? მაგრამ არ გამოგივათ იმიტომ, რომ ოცნება უკვე ჩამოსულია ხალხის მხარდაჭერის ისტორიულ მინიმუმზე და აღარც ერთს გაქვთ ხელისუფლებაში დარჩენის შანსი და აღარც მეორეს დაბრუნების." შალვა კერესელიძე, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/2733494530134780/

"ოფიციალური სტატისტიკით რეალური ეკონომიკა ქვეყანაში 28 პროცენტით გაიზარდა, ეს ნიშნავს იმას, რომ მოსახლეობაზე რაღაც უნდა ასახულიყო, მათი ცხოვრება უნდა გაუმჯობესებულიყო. შედეგი გვაქვს ის, რომ მათი ცხოვრება რეალურად არ გაუმჯებესებულა, 28 პროცენტიანი ეკონომიკური ზრდა ადამიანებს როგორ შეეხოთ, დიდი კითხვის ნიშნის ქვეშ დგას და პრობლემა არის ის, რომ "ოცნება" ორიენტირებულია პოლიტიკურ კორუფციაზე და რამდენიმე ათეული ოჯახის კეთილდღეობაზე." მიშა დაუშვილი, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/1046246703142951/

მოსამართლე გიორგი მიქაუტაძეს დედამ 50 000 დოლარი აჩუქა – ამის შესახებ საუბარია ახალ დეკლარაციაში, რომელიც 29 თებერვლით თარიღდება. რაც შეეხება სხვა მონაცემებს, დეკლარაციის თანახმად, მიქაუტაძე ფლობს 3 მიწის ნაკვეთის 100%-იან წილს, ასევე, ერთი მიწის ნაკვეთის 50%-იან წილს, 2 ავტოფარეხსა და ბინას. მიქაუტაძის მფლობელობაშია მსუბუქი ავტომანქანა, toyota land cruiser 105 და კვადროციკლი. გარდა ამისა, დოკუმენტში მითითებულია, რომ ინდივიდუალური საცხოვრებელი სახლის ასაშენებლად გიორგი მიქაუტაძემ გასულ წელს 307 000 ლარი დახარჯა. პუბლიკა

სახალხო დამცველის განცხადებით, ხელვაჩაურის ერთ-ერთი სკოლის მოსწავლეების წარმომადგენელმა სქესის/გენდერის ნიშნით დისკრიმინაციის დადგენისთვის მიმართა. საქმის მიხედვით, სკოლაში წლებია მოქმედებს ქვედაბოლოსგან და თეთრი ზედატანისგან შემდგარი უნიფორმა. განმცხადებელი მიუთითებს, რომ მოსწავლეები მოითხოვენ, ფორმას დაემატოს გოგოებისთვის შარვალიც და მათ არჩევანის უფლება მიეცეთ. განმცხადებელი ხაზს უსვამს ასევე იმას, რომ ზამთარში კაბის ტარება მოსწავლეებს დისკომფორტს უქმნის. განმცხადებლის განმარტებით, სკოლის პრაქტიკა უთანასწორო მდგომარეობაში აყენებს მოსწავლეებს. როგორც სახალხო დამცველი წერს, სკოლის პოზიციის თანახმად, უნიფორმა მოსწავლეების ესთეტიკური თვალსაზრისით გამორჩეულობის მიზნით და მშობლების თანხმობით შემოიღეს. მკაცრი მითითება, რომ უნიფორმა ქვედაბოლოსა და თეთრი ზედატანისაგან უნდა შედგებოდეს, ოფიციალურად გაცემული არ ყოფილა. სკოლის დირექტორის პასუხის მიხედვით, მან გოგოებს ზამთარში შარვლის ტარების უფლება მისცა. თუმცა განმცხადებელი სკოლის პოზიციის საპასუხოდ ამბობს, რომ შარვლის ტარების უფლება თებერვლამდე მოქმედებს და არ აგვარებს პრობლემას. სახალხო დამცველმა სკოლის დირექტორს ზოგადი წინადადებით მიმართა და მოუწოდა, არ დაუშვას სკოლაში სქესის ან/და სხვა ნიშნით დისკრიმინაციული მოპყრობა და გაატაროს თანასწორობის პოლიტიკა, ხოლო სასკოლო ფორმასთან მიმართებით, უზრუნველყოს მოსწავლეების არჩევანის თავისუფლება. საქმეს ვრცლად გაეცანით ბმულზე. პუბლიკა

ისლანდია და საქართველო იზიარებენ ერთიან სულისკვეთებას ევროპის კონტინენტზე მშვიდობის, სტაბილურობის და თავისუფლების განმტკიცების - განვიხილეთ შავი ზღვის სტაბილურობისა და უსაფრთხოების გაზრდილი როლი ალიანსის სტრატეგიაში და საქართველოსთვის მნიშვნელოვანი მომავალი ვაშინგტონის სამიტი, რომ ეს საკითხები კიდევ უფრო აქტუალური გახდეს, - ამის შესახებ პრეზიდენტმა სალომე ზურაბიშვილმა ისლანდიის პრეზიდენტთან ერთად გამართულ ბრიფინგზე განაცხადა. როგორც ზურაბიშვილმა აღნიშნა, შეხვედრისას პრეზიდენტებმა ვრცლად ისაუბრეს საქართველოს ოკუპირებულ ტერიტორიებზე არსებულ უმძიმესი მდგომარეობასა და გამოწვევებზე, როგორიცაა ახალი სამხედრო ბაზა ოჩამჩირეში. მისივე თქმით, ისლანდიის პრეზიდენტმა გამოთქვა სურვილი მოინახულოს საოკუპაციო ხაზი. „საქართველოს ევროპული მომავლისთვის, რეგიონისა და მთლიანად ევროპის მშვიდობისა და სტაბილურობისთვის ძალიან მნიშვნელოვანი პერიოდია, როცა საქართველომ კანდიდატის სტატუსის მიღებით ისტორიული ნაბიჯი გადადგა და არანაკლებ მნიშვნელოვანი ნაბიჯისთვის, გაწევრიანების მოლაპარაკებების დაწყებისთვის ემზადება. ეს პერიოდი ასევე და ზოგადად ევროპისთვის ძალიან მნიშვნელოვანი პერიოდია. ევროპის მომავალი წყდება უკრაინაში, სადაც სასტიკი ომი უნდა დასრულდეს აგრესორის და აგრესიის დამარცხებით და სუვერენიტეტის აღდგენით. ჩვენ განვიხილეთ დღევანდელი სიტუაცია თავის ჰუმანიტარული ასპექტებით და შევთანხმდით, რომ ყველაზე მნიშვნელოვანი დღეს არის სოლიდარობა ამ ქვეყნის და მისი მოსახლეობის მიმართ. ისლანდია, როგორც ნატო-ს დამფუძნებელი სახელმწიფო და საქართველო, რომლის კონსტიტუციით გამყარებული მიზანია ნატო-ში ინტეგრაცია, იზიარებენ ერთიან სულისკვეთებას ევროპის კონტინენტზე მშვიდობის, სტაბილურობის და თავისუფლების განმტკიცების. ერთად განვიხილეთ, ამ მხრივ, შავი ზღვის სტაბილურობისა და უსაფრთხოების გაზრდილი როლი ალიანსის სტრატეგიაში და საქართველოსთვის მნიშვნელოვანი მომავალი ვაშინგტონის სამიტი, რომ ეს საკითხები კიდევ უფრო აქტუალური გახდეს. ვრცლად განვიხილეთ ასევე საქართველოს ოკუპირებულ ტერიტორიების უმძიმესი მდგომარეობა და დღევანდელი სტრატეგიული გამოწვევა: ახალი ნაბიჯები, ახალი სამხედრო ბაზა ოჩამჩირეში, რასაც რუსეთი აცხადებს როგორც პროექტს და აეროპორტის რუსეთისთვის გადაცემა წარმოადგენს ახალ აგრესიულ ნაბიჯებს საქართველოს მიმართ და დესტაბილიზაციის ნაბიჯებს შავი ზღვის მიმართულებით. დასაფასებელია, რომ პრეზიდენტმა იოანესმა გამოთქვა სურვილი, მოინახულოს საოკუპაციო ხაზი და ადგილზე გაეცნოს რუსული ოკუპაციის მძიმე სახეს და შედეგებს“, - განაცხადა ზურაბიშვილმა. იპნ

" კორუფცია აფერხებს განვითარებას და ასუსტებს თანამედროვე საზოგადოებას. კორუფცია არყევს საზოგადოების რწმენას სახელმწიფო ინსტიტუტების მიმართ. კორუფცია განსაკუთრებით ხელს უშლის გარდამავალი ქვეყნების პროგრესს სახელმწიფოს მშენებლობაში არსებული რესურსების გადამისამართებით. კორუფცია ლახავს ადამიანის ღირსებას, თანასწორობასა და თავისუფლებას. კორუფციაა მთავარი მტერი მოსახლეობის კეთილდღეობის და სახელმწიფოს მშენებლობის გზაზე. ყველა წარმატებული სახლმწიფოს პოლიტიკის მთავარი სამიზნე არის კორუფცია. თვალსაჩინო მაგალითი შესაძლო კორუფციული გარიგების არის ბალდის კანიონის გარშემო არსებული მდგომარეობა, კორუფციას დაემატა უმწვავესი დაპირისპირება ადამინებს შორის და ამას ყველაფერს გულგრილად ადევნებს თვალს დღევანდელი „ოცნება“. მე მსურს მოგმართოთ თქვენ, ჩემს კოლეგებს ამ დარბაზში, მოგმართოთ გარემოს დაცვისა და აგრარულ კომიტეტებს, დროულად ჩაერიეთ, მივმართავ სოფლის მეურნეობის და გარემოს დაცვის სამინისტროს - გაიწვიეთ თქვენი უკანონო გადაწყვეტილება კანიონის გასხვისებასთან დაკავშირებით და განავითარეთ კანიონი, კანონის შესაბამისად. საჯარო განხილვისა და მისახლეობასთან კომუნიკაციის მეშვეობოთ. მივმართავ ანტიკორუფციულ ბიუროს - იმოქმედეთ! ბუნების ეს ძეგლი ვერ დარჩება მავანთა ხელის მოთბობის საშუალებად. „ოცნების“ ოპონენტებო, როდესაც საუბრობთ, რომ ყველაფერი კარგადაა და კორუფციას ებრძვით, აგერ კონკრეტული მაგალითია და რატომ ხართ ჩუმად ? ხმას რატომ არ იღებთ ? რატომ ზომებს არ მიმართავთ ? თანამონაწილეები ბრძანდებით? თუ არა, მაშინ მიიღეთ ზომები, დაუმტკიცეთ საზოგადოებას, როგორ ებრძვით კორუფციას!" ალექსანდრე მოწერელია, პარტია „საქართველოსთვის“, აბაშის, მარტვილის, წალენჯიხისა და ჩხოროწყუს მაჟორიტარი დეპუტატი.

საქართველოში ოფიციალური ვიზიტით მყოფი ისლანდიის რესპუბლიკის პრეზიდენტი, გუდნი იოჰანესონი საქართველოს პრეზიდენტს, სალომე ზურაბიშვილს ხვდება. მანამდე კი, ორბელიანების სასახლეში სტუმრის ოფიციალური დახვედრის ცერემონია გაიმართა. პრეზიდენტების პირისპირ შეხვედრა, რის შემდეგაც მხარეები აუდიენციას გაფართოებულ ფორმატშიც გამართავენ, პრეზიდენტის ადმინისტრაციაში მიმდინარეობს. შეხვედრის დასრულების შემდეგ დაგეგმილია ორი ქვეყნის პრეზიდენტების ბრიფინგი. ისლანდიის პრეზიდენტი საქართველოში სამდღიანი ვიზიტით იმყოფება. ვიზიტის ფარგლებში შეხვედრები დაგეგმილია პრემიერ-მინისტრ ირაკლი კობახიძესთან, პარლამენტის თავმჯდომარე შალვა პაპუაშვილთან, ასევე გაიმართება საქართველო-ისლანდია ბიზნესშეხვედრა მრგვალი მაგიდის ფორმატში. ვიზიტის ფარგლებში ისლანდიის პრეზიდენტი გუდნი იოჰანესონი საოკუპაციო ხაზს ეწვევა. იპნ

ძალაუფლების დაკარგვის გეშინიათ და ყველაფერს შესწირავთ, ოღონდ ეს ძალაუფლება გაიხანგრძლივოთ - არჩევნების ტოტალური გაყალბების ინსტრუმენტებიც ვერ გიშველით! - ამის შესახებ პარლამენტში, პლენარულ სხდომაზე პარტია „საქართველოსთვის“ წევრმა ბექა ლილუაშვილმა განაცხადა. როგორც მან აღნიშნა, „ქართული ოცნება“ ყველაფერს აკეთებს, რომ ქვეყანაში არსებული პრობლემები გადაფაროს. „ასობით ათასი ბავშვი რომ საარსებო შემწეობას იღებს, გაზრდილს კი ბატონო, მაგრამ გაჭირვებაში რომ ცხოვრობს და ნორმალურად კვების პრობლემა რომ აქვთ, ამ ბავშვებს შიმშილისგან რატომ არ იცავთ? რატომ არ განახორციელეთ სასკოლო კვების პროგრამა 2022 წლიდან? იცით, ეს ასე იყო დაგეგმილი. ამაზე ისაუბრეთ თუ მართლა გულწრფელი ინტერესი გამოძრავებთ და არა საარჩევნო ინტერესი. მოკლედ, თავს იტყუებთ ან ჩვენი ხალხი გგონიათ სულელი. ყველამ იცის, რომ დალხენილი ქვეყნიდან არავინ გარბის, გაჭირვებაა ის, რის გამოც ქვეყნიდან მიდიან. ამიტომ ამ მოცემულობის ფონზე, ცხადია, თქვენ ყველაფერს გააკეთებთ, რომ მსგავსი პრობლემები გადაფაროთ, ყველაფერს გააკეთებთ, რომ მოქალაქეებს, რომლებიც თავიდან ბოლომდე ჩართულნი არიან ქვეყნის ეკონომიკურ ცხოვრებაში და ემიგრაციიდან აკეთებენ ამას, ხმის უფლება წაართვათ, მოჰპაროთ, არ მიაღებინოთ არჩევნებში მონაწილეობა, რადგან საბოლოო ჯამში, გეშინიათ! გეშინიათ ძალაუფლების დაკარგვის და ყველაფერს შესწირავთ, მათ შორის ბევრ მიღწევას კარგს, რომ ოღონდ ეს ძალაუფლება გაიხანგრძლივოთ. ამას კარგად ხედავს ჩვენი საზოგადოება, 60% მხარდაჭერას რომ იმეორებთ სასაცილოდ, ივანიშვილამდეც რომ 60 გქონდათ, მისი გამოსვლის შემდეგაც 60. სასაცილოა, თქვენს თავს ელაპარაკებით მხოლოდ. ამას ნახავთ, რომ არჩევნების ტოტალური გაყალბების ინსტრუმენტებიც ვერ გიშველით,“- განაცხადა ლილუაშვილმა. იპნ

ბექა ლილუაშვილი, პარტიის „საქართველოსთვის“ საპარლამენტო პოლიტიკური ჯგუფის თავმჯდომარე „ოცნებას“: "აი, დღესაც გისმენთ და ისევ აგრძელებთ საკუთარი თავის ქება-დიდებას. ამასობაში, სამწუხაროდ, ქვეყანაში დარჩენილი ახალგაზრდები ევროპაში, ამერიკაში გაქცევაზე ფიქრობენ და უკვე იქ მყოფ ახალგაზრდებს კი, აქეთ გამოხედვაც არ სურთ. დაცლილი ქვეყანა, სადაც მომავალი თაობისთვის, ახალგაზრდისთვის - ცხოვრება მხოლოდ უსამართლობასთან და უპერსპექტივობასთან ასოცირდება - აი, ეს არის თქვენი პოლიტიკური მემკვიდრეობა. თქვენს ირგვლივ მაინც ვერ ხედავთ ამ პრობლემას? აი, ჩემს ირგვლივ, არ დარჩა ერთი ადამიანიც კი, ვინც საზღვარგარეთ წასვლას არ აპირებს ან არ ფიქრობს მაინც წასვლაზე. მაგრამ არ გინდათ დაინახოთ. სამწუხაროდ, ხელისუფლებისთვის მთავარი ამოცანა ამ პრობლემების მოგვარება კი არაა, პოლიტიკური კორუფციის ჭაობში ქვეყნის კიდევ უფრო მეტად ჩაძირვაა. მაგრამ ეს ყველაფერი სააშკარაოზე გამოდის. აი, როგორც, მაგალითად, გუშინ ვნახეთ კონკრეტული, ყოფილი მინისტრის მიერ ირიბი მითითება და აღიარება რესპუბლიკური საავადმყოფოს საკითხზე. თქვა მან ის, რასაც ჩვენ დიდი ხანია ვამბობთ. მაგრამ, მთავარია, მოსახლეობაც ხვდება, რომ 25 ოჯახის მომსახურე პერსონალად იქცა მთელი ხელისუფლება. მათი ბიზნეს ინტერესების, კორუფციული მიზების შესრულების ინსტრუმენტად და არა ხალხის პრობლემების მომგვარებლად! არ არის ასე? დებატებში დაჯდომას რომ ვერ ბედავთ, გასაგებია, ამიტომ, აქვე გკითხავთ: ვინც დააღწია თავი ამ გაჭირვებას და გაიქცა - გაიქცა, ვინც აქ არის, მათ დასახმარებლად რას აკეთებთ? ქვეყანაში დღეის მონაცემებით 170 ათასი ახალგაზრდა ადამიანია, 18-დან 40 წლამდე, ისეთი, რომელიც არის საარსებო შემწეობის მიმღები იმ ვითომ დასაქმების პროგრამის მიღმა ვსაუბრობ. აპირებთ თუ არა, დაასრულოთ ამ ადამიანების გაჭირვების პოლიტიკურად გამოყენება? თუ აპირებთ, მაშინ მოახდინეთ ყველა ფულადი სოციალური დახმარების კანონით გარანტირებული ყოველწლიური ზრდა! მიზნობრივი სოციალური დაცვის სისტემის რეფორმა და დანერგეთ საყოველთაო სოციალური დაზღვევის სისტემა! ხომ არ გგონიათ ვინმეს ეხალისება ხელი გამოგწოდოთ იმ კაპიკებზე, რასაც ეს ოჯახები ამ შემწეობის სახით იღებენ? არაფერს ვამბობ უმუშევრობის დონეზე ახალგაზრდებში, არაფერს ვამბობ საფასურების ზრდაზე და უთანასწორობაზე საითაც არ უნდა გაიხედო. ასობით ათასი ბავშვი რომ საარსებო შემწეობას იღებს, გაზრდილს, კი, ბატონო, მაგრამ მაინც გაჭირვებაში რომ ცხოვრობს, ამ ბავშვებს შიმშილისგან რატომ არ იცავთ? რატომ არ განახორციელეთ ბავშვთა სასკოლო კვების პროგრამა 2022 წლიდან? იცით ეს, რომ ასე იყო დაგეგმილი. ამაზე ისაუბრეთ, თუ მართლა გულწრფელი ინტერესი გამოძრავებთ და არა საარჩევნო ინტერესი. მოკლედ, თავს იტყუებთ, ან ჩვენი ხალხი სულელი გგონიათ. ყველამ იცის, რომ დალხენილი ქვეყნიდან არავინ გარბის, გაჭირვებაა სწორედ ის, რის გამოც ადამიანები სხვაგან მიდიან. ამიტომ ამ მოცემულობის ფონზე, ცხადია, თქვენ ყველაფერს გააკეთებთ, რომ მსგავსი პრობლემები გადაფაროთ, ყველაფერს გააკეთებთ, რომ ამ ხალხს, ამ ქვეყნის მოქალაქეებს, რომლებიც თავიდან ბოლომდე ფინანსურად, ჩართულები არიან ამ ქვეყნის ეკონომიკურ ცხოვრებაში - მოპაროთ ხმის მიცემის უფლება, არ მიაღებინოთ არჩვენებში მონაწილეობა. იმიტომ, რომ საბოლოო ჯამში გეშინიათ, გეშინიათ ძალაუფლების დაკარგვის და ყველაფერს შეწირავთ, მათ შორის, ბევრ მიღწევას, წარმატებას - ოღონდ ეს ძალუფლება გაიხანგრძლივოთ და ამას ძალიან კარგად ხედავს ჩვენი საზოგადოება! 60%-იან მხარდაჭერას რომ იმეორებთ, ივანიშვილამდეც რომ 60 გქონდათ, ახლაც რომ 60 გაქვთ მისი გამოსვლის შემდეგ, სასაცილოა, თქვენს თავს ელაპარაკებით მხოლოდ, ამას ნახავთ, არჩევნების ტოტალური გაყალბების ინსტრუმენტებიც ვერ გიშველით!"

თამარ ქიტიაშვილმა დატოვა უნარების სააგენტოს ხელმძღვანელის პოზიცია - გარკვეული აცდენები იყო იმ პოლიტიკის განხორციელების მექანიზმებში, რომელიც მე და სამინისტროს გვქონდა დასახული. შესაბამისად, მივიღეთ გადაწყვეტილება ხელმძღვანელი შეცვლილიყო, - ამის შესახებ საქართველოს განათლების, მეცნიერებისა და ახალგაზრდობის მინისტრმა გიორგი ამილახვარმა განაცხადა. მისივე თქმით, მომავალ კვირაში გახდება ცნობილი, თუ ვინ გახდება პროფესიული უნარების სააგენტოს გენერალური დირექტორი. „ვადასტურებ, თამარ ქიტიაშვილმა დატოვა უნარების სააგენტოს ხელმძღვანელის პოზიცია. აღნიშნული გადაწყვეტილება მიიღეს უნარების სააგენტოს დამფუძნებლებმა და შესაბამისად, ბორდის აბსოლუტურმა უმრავლესობამ. მე მას ვესაუბრე, მან საკმაოდ წარმატებული წლები განვლო, როგორც სააგენტოში, ასევე პროფესიული განათლების მიმართულებით ბევრი საქმე გააკეთა, თუმცა იყო გარკვეული აცდენები იმ პოლიტიკის განხორციელების მექანიზმებში, რომელიც მე და სამინისტროს გვქონდა დასახული. შესაბამისად, მივიღეთ გადაწყვეტილება ხელმძღვანელი შეცვლილიყო“, - აღნიშნა მინისტრმა. იპნ

პრეზიდენტმა „საარჩევნო კოდექსში“ ცვლილებებზე მოტივირებული შენიშვნები პარლამენტს წარუდგინა. დღევანდელ ბიუროს სხდომაზე პრეზიდენტის ვეტოს საკითხი იურიდიულ საკითხთა კომიტეტს გადაეცა. კომიტეტის შემდეგ საკითხი კენჭსაყრელად პლენარულ სხდომას გადაეცემა. ვეტოს დასაძლევად 76 ხმაა საჭირო და საპარლამენტო უმრავლესობა მის დაძლევაზე უკვე შეთანხმდა. მოტივირებულ შენიშვნებში პრეზიდენტი პარლამენტს სთავაზობს, ცესკოს თავმჯდომარის და წევრობის კანდიდატების შერჩევის და პარლამენტისთვის წარდგენის უფლებამოსილება მას დაუბრუნდეს. ეს ცვლილება საარჩევნო კოდექსში გასულ წელს შევიდა – პრეზიდენტის აღნიშნული უფლებამოსილება პარლამენტის თავმჯდომარეს გადაეცა. ასევე, პრეზიდენტი მნიშვნელოვნად მიიჩნევს ოპოზიციის მიერ დანიშნული ცესკოს თავმჯდომარის მოადგილის პოსტის შენარჩუნებას. მოტივირებულ შენიშვნებში აღნიშნულია, რომ პრეზიდენტის როლი შეზღუდულია, რადგან კანონში შესული ცვლილებით, თუ კანდიდატები კენჭისყრაზე ორჯერ ვერ მიიღებენ 76 ხმით მხარდაჭერას, საკითხი გადაწყვეტილების მისაღებად პრეზიდენტს გადაეცემა. პრეზიდენტი „ვეტოს“ დოკუმენტში წერს, რომ დაბალია შანსი იმისა, რომ კანდიდატმა ეს მხარდაჭერა ვერ მიიღოს. საარჩევნო კოდექსში ცვლილებები 20 თებერვალს მიიღეს. კოდექსში შესული ახალი ცვლილებებით გათვალისწინებულია ცესკოს თავმჯდომარისა და წევრების არჩევის წესის ცვლილება და ოპოზიციის კვოტით ცესკოს მოადგილის თანამდებობის გაუქმება. პუბლიკა

სამოქალაქო საზოგადოება ევროკომისარს სამეზობლო პოლიტიკისა და გაფართოებისა საკითხებში ოლივერ ვარჰეის თხოვნით მიმართავს, განიხილოს საქართველოს მიერ რეკომენდაციების შესრულების შესახებ შუალედური შეფასების მომზადების შესაძლებლობა. ორგანიზაციების თქმით, ეს მნიშვნელოვნად დაეხმარება ხელისუფლების ანგარიშვალდებულების ხარისხის გაზრდას, რეფორმების გამჭვირვალობასა და ინკლუზიურობას. „2023 წლის დეკემბერში ევროკავშირმა საქართველოსთვის კანდიდატის სტატუსის მინიჭების შესახებ გადაწყვეტილება მიიღო. ეს უმნიშვნელოვანესი წინგადადგმული ნაბიჯია ჩვენი ქვეყნის ევროკავშირში გაწევრების გზაზე, რომელსაც საქართველოს მხრიდან უნდა მოჰყვეს სწრაფი რეფორმები ევროკომისიის მიერ განსაზღვრული 9 პრიორიტეტული მიმართულებით. სამოქალაქო საზოგადოების ჩართულობა საკანონმდებლო და პოლიტიკის განხორციელების პროცესში, კვლავ ევროკომისიის მიერ განსაზღვრული 9 ნაბიჯის ერთ-ერთ მნიშვნელოვან კომპონენტად რჩება. ხელმომწერი ორგანიზაციები გამოვთქვამთ მზადყოფნას აქტიური როლი შევასრულოთ და წვლილი შევიტანოთ საქართველოს ევროინტეგრაციისა და დემოკრატიული ტრანსფორმაციის გზაზე და ვიმუშაოთ იმისთვის, რომ საქართველოს მოსახლეობის უმრავლესობის ნება სრულად აისახოს სახელმწიფო პოლიტიკაში. ჩვენ ვაგრძელებთ ევროკომისიის რეკომენდაციების შესრულების მუდმივ მონიტორინგს, შევიმუშავებთ წინადადებებს ეფექტიანი რეფორმების ხელშესაწყობად და შევეცდებით, რომ 9 ნაბიჯი შიდა რეფორმების დღის წესრიგის მთავარ პრიორიტეტად იქცეს. 12 საზოგადოებრივი ორგანიზაციის კოალიციამ, სამოქალაქო საზოგადოების ფონდის (ყოფილი ღია საზოგადოების ფონდის) ლიდერობით, შეიმუშავა დეტალური ხედვა, თუ როგორ უნდა შესრულდეს ეფექტიანად ევროკომისიის მიერ განსაზღვრული 9 ნაბიჯი, რათა ქვეყანა გადავიდეს ევროინტეგრაციის შემდგომ ეტაპზე. ჩვენ ვაცნობიერებთ, რომ დამკვიდრებული პრაქტიკის თანახმად, ევროკომისია გაფართოების ქვეყნების მიერ რეფორმების იმპლემენტაციის პროცესს ყოველწლიურად აფასებს. თუმცა, მიგვაჩნია, რომ საჯაროდ ხელმისაწვდომი შუალედური შეფასება, მნიშვნელოვნად შეუწყობდა ხელს რეფორმების პროცესის სწრაფად და ეფექტიანად წარმართვას. ამ კუთხით პოზიტიური გამოცდილება იყო 2023 წლის 23 ივნისს ევროკომისიის შუალედური ზეპირი ანგარიში, რომელმაც დადებითი როლი ითამაშა და ბიძგი მისცა ხელისუფლების მხრიდან გარკვეული ნაბიჯების გადადგმას. შუალედური ანგარიში მნიშვნელოვანი დამხმარე ინსტრუმენტი აღმოჩნდა სამოქალაქო საზოგადოებისთვისაც რეკომენდაციების შესრულების ზედამხედველობის პროცესში. ზემოთქმულიდან გამომდინარე, რეფორმების პროცესის ხელშეწყობისა და დაჩქარების მიზნით, ხელმომწერი ორგანიზაციები მოგმართავთ თხოვნით, განიხილოთ საქართველოს მიერ რეკომენდაციების შესრულების შესახებ შუალედური შეფასების მომზადების შესაძლებლობა. მიგვაჩნია, რომ ეს მნიშვნელოვნად დაგვეხმარება გავზარდოთ ხელისუფლების ანგარიშვალდებულების ხარისხი, რეფორმების პროცესის გამჭვირვალობა და ინკლუზიურობა და განვახორციელოთ ეფექტიანი ზედამხედველობა. თქვენი ხელშეწყობა ამ საკითხში მნიშვნელოვან წვლილს შეიტანს ჩვენი საერთო მიზნების რეალიზაციაში“,-აღნიშნულია მიმართვაში, რომლის ხელმომწერები არიან: სამოქალაქო საზოგადოების ფონდი; საფარი; დემოკრატიის კვლევის ინსტიტუტი (DRI); მმართველობის მონიტორინგის ცენტრი (GMC); საქართველოს რეფორმების ასოციაცია (GRASS); საქართველოს ახალგაზრდა იურისტთა ასოციაცია (GYLA); სოციალური სამართლიანობის ცენტრი; საქართველოს დემოკრატიული ინიციატივა (GDI); საქართველოს სასამართლოს გუშაგი; საქართველოს სტრატეგიისა და საერთაშორისო ურთიერთობების კვლევის ფონდი (GFSIS); სამართლიანი არჩევნები (ISFED); ინფორმაციის თავისუფლების განვითარების ინსტიტუტი (IDFI). პუბლიკა

4 მარტს პარლამენტში „შინაურ და ბინადარ ცხოველთა შესახებ“ კანონპროექტის საკომიტეტო განხილვა დაიწყო. პარლამენტის კომიტეტების გაერთიანებულ სხდომაზე კანონპროექტი გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ წარადგინა. როგორც ბითაძემ განაცხადა, კანონპროექტის ირგვლივ არაერთი დეზინფორმაცია გავრცელდა. მისი თქმით, 2 წელიწადში სავალდებულო იქნება, რომ ადამიანმა ცხოველის ყიდვის შემთხვევაში შესაბამის სწავლება გაიაროს. „დღეს ერთმანეთს ვეჯიბრებით, ვინ უფრო კარგი კინოლოგია… მე არ მაქვს პრეტენზია, რომ კინოლოგი ვარ. მე ვარ ერთი ადამიანი, რომლის ძაღლიც თავის დროზე არასწორად გაწვრთნეს და დღეს მე პრობლემები მაქვს ძალიან დიდი. შესაბამისად, ჩვენ ვფიქრობთ, რომ ამ ქვეყანაში ერთხელ და სამუდამოდ უნდა შეიქმნას სერტიფიცირების სისტემა. ვფიქრობთ, რომ კანონის მიღებიდან 2 წელში უნდა ამოქმედდეს, რომელიც მისცემს ჩვენს კეთილსინდისიერ კინოლოგებსა და ფერინოლოგებს იმის საშუალებას, რომ ის ტრენინგ-კურსები, რომლებსაც ახლაც ახორციელებენ, მოაქციონ სერტიფიცირების ერთიან სისტემაში, აიმაღლონ თავიანთი სტატუსი. ჩვენთვის, ყველასთვის, 2 წელში სავალდებულო იქნება, რომ ცხოველის ყიდვის შემთხვევაში გავიაროთ სწავლება, როგორ მოვეპყროთ ძაღლს და როგორ ვეცადოთ, რომ ძაღლი არ გახდეს აგრესიული. იმიტომ, რომ ნებისმიერ შემთხვევაში შესაძლებელია შპიციც კი აგრესიული გავხადოთ, თუ არასათანადოდ გავზრდით. ეს შესაძლებელია მივამგვანოთ ადამიანს, რომელიც ისეთი იზრდება, რა პირობებშიც გაზრდიან“, – განაცხადა მაია ბითაძემ. ამასთან, მაია ბითაძის თქმით, კანონპროექტით დაზუსტდება, სად არ არის ღია სივრცეში მიუსაფარი ცხოველის მიკედლება შესაძლებელი. „მიკედლების აკრძალვა დავტოვეთ მხოლოდ სკოლების, დაწესებულებების შიდა ტერიტორიებზე. თუმცა ამ მუხლთან დაკავშირებით სივრცე გვაქვს, მეორე მოსმენამდე ვიმსჯელოთ. ასევე, ეს საკითხი ებმოდა თბილისურ ეზოში მიკედლების აკრძალვას, ამასთან დაკავშირებითაც, სამართლებრივად, კომიტეტებთან ერთად ვიმსჯელებთ, რომ არ არის აუცილებელი ამის დაკონკრეტება ერთი მარტივი მიზეზის გამო – სადარბაზოები და თბილისური ეზოები არის თანასაკუთრება. ვისაც სურს და არ სურს ძაღლის მიკედლება, თუ ერთობლივი თანხმობა არ იქნება, ეს საკითხები მოქმედი კანონმდებლობითაც რეგულირდება ჩვეულებრივად, სამოქალაქო კოდექსით. ასე რომ, ვფიქრობთ, რომ შესაძლებელია თბილისური ეზოს საკითხიც დარეგულირდეს“,- განაცხადა მაია ბითაძემ. როგორც მაია ბითაძემ განაცხადა, ევთანაზია, რომელიც ცოფთან არის დაკავშირებული, პრაქტიკაში როგორც ხდებოდა, ისე გაგრძელდება. მისივე თქმით, ევთანაზიის საფუძველი შეიძლება ასევე იყოს კინოლოგისა და ვეტერინარის დასკვნა, რომელიც დაადასტურებს, რომ ძაღლი არც დამამშვიდებლისა და არც ქცევის კორექციის შედეგად არ ექვემდებარება დამშვიდებას. „ევთანაზიის მუხლი ეყრდნობა მთლიანად მთავრობის დადგენილებას. მინდა ხაზგასმით ვთქვა, საეჭვო შემთხვევა არ არის ის, რომ მაია ბითაძეს მოეჩვენება, რომ ძაღლი ცოფიანია, საეჭვო შემთხვევა კანონმდებლობით დასტურდება. ვეტერინარები დაადასტურებენ, რომ ცოფი არის საშიში დაავადება, რომელიც 100-დან 100%-ით სიკვდილიანობით სრულდება. იმ შემთხვევაში, თუ მიმკედლებელი ან მეპატრონე არ განახორციელებს საკუთარ ძაღლზე მეთვალყურეობას, ვიცით, რომ კარანტინის ვადა 1 წელია, ამ შემთხვევაში ძაღლი დაექვემდებარება ევთანაზიას. მოქმედი კანონმდებლობა ევთანაზიასთან მიმართებით ბევრად ჰუმანურია, ვიდრე ეს არის ევროკავშირის სახელმწიფოებში“, – განაცხადა მაია ბითაძემ. გარდა ამისა, მაია ბითაძემ დაასახელა ის პირობებიც, რა შემთხვევაშიც ადამიანს მომეტებული საფრთხის შემცველი ძაღლის ყოლა არ შეეძლება. „ვის არ შეიძლება ჰყავდეს ძაღლი, რომელიც პოტენციურად მომეტებული საფრთხის შემცველი შეიძლება იყოს – ვფიქრობთ, ეს უფლება შეიძლება შეეზღუდოთ იმ ადამიანებს, რომლებიც ძალადობრივი დანაშაულისთვის არიან ნასამართლევი და ნასამართლობა არ აქვთ გაქარწ####ბული და ადამიანებს, რომლებსაც აქვთ ფსიქიკური პრობლემები, რაც ფურცლით დასტურდება”. – განაცხადა მაია ბითაძემ. ნეტგაზეთი

რუსეთის შავი ზღვის ფლოტის საპატრულო ხომალდი „სერგეი კოტოვი“ უკრაინის სამხედრო დაზვერვის თავდასხმის შედეგად განადგურებულია. ინფორმაციას ამის შესახებ უკრაინის დაზვერვა ავრცელებს. მათივე ცნობით, თავდასხმის დროს რუსული ხომალდი ყირიმში, ქერჩის სრუტესთან ახლოს იმყოფებოდა. რუსულ გემზე თავდასხმის შესახებ ინფორმაცია ოკუპირებულ ნახევარკუნძულზე ღამით აფეთქებების შემდეგ გავრცელდა, რის გამოც დაიხურა ქერჩის ხიდი. რუსეთის თავდაცვის სამინისტროს განცხადებით, ყირიმთან 38 უკრაინული დრონი ჩამოაგდეს. უკრაინის სამხედრო დაზვერვის მონაცემებით, გემს დაუზიანდა უკანა, მარჯვენა და მარცხენა მხარეები. როგორც ისინი აცხადებენ, განადგურებული ხომალდის ღირებულება 65 მილიონ დოლარს შეადგენს. სერგეი კოტოვს 2023 წლის სექტემბერშიც დაეჯახა საზღვაო დრონი, სხვა საპატრულო გემთან, ვასილ ბიკოვთან ერთად. რუსეთის თავდაცვის სამინისტრომ მაშინ განაცხადა, რომ გემებმა შეძლეს შეტევის მოგერიება. ნეტგაზეთი

მთავრობა საყოველთაო ჯანდაცვის პროგრამის ფარგლებში სუროგატ დედებს მშობიარობის და საკეისრო კვეთის ხარჯებს არ აუნაზღაურებს. აღნიშნულის შესახებ საუბარია საქართველოს მთავრობის დადგენილებაში, რომელიც საკანონმდებლო მაცნეზე 29 თებერვალსაა გამოქვეყნებული. კერძოდ, პრემიერ-მინისტრ ირაკლი კობახიძის გადაწყვეტილებით, „საყოველთაო ჯანდაცვაზე გადასვლის მიზნით გასატარებელ ზოგიერთ ღონისძიებათა შესახებ“ საქართველოს მთავრობის 2013 წლის 21 თებერვლის №36 დადგენილებაში ცვლილება შევიდა და განისაზღვრა, რომ პროგრამის ფარგლებში არ ანაზღაურდება სუროგატული დედის მშობიარობა/საკეისრო კვეთის ხარჯები. დოკუმენტსი მითითებულია, რომ დადგენილება გამოქვეყნების მომენტიდან, ანუ 29 თებერვლიდან ძალაშია. ნეტგაზეთი

ავიაკომპანია „ვიზეარის“ მემინგენი-ქუთაისის რეისი საგანგებოდ დაეშვა რუმინეთში. როგორც „ნეტგაზეთს“ რეისის ერთ-ერთი მგზავრი უყვება, მიზეზი ფრენის დროს მგზავრებს შორის კონფლიქტი გახდა, რაც ფიზიკურ დაპირისპირებაში გადაიზარდა. „ნეტგაზეთის“ წყაროს თქმით, დაპირისპირება ქართველ და რუს მგზავრებს შორის მოხდა, რა დროსაც ამ უკანასკნელმა ფიზიკური დაზიანებები მიიღო. ამის გამო თვითმფრინავი სასწრაფოდ დაეშვა რუმინეთში. დაშვების შემდეგ მხარეები ბორტიდან პოლიციის თანხლებით ჩაიყვანეს. „ნეტგაზეთი“ ინფორმაციის გადამოწმებას ავიაკომპანიიასთან ცდილობს. დამატებით დეტალებს მიღებისთანავე მოგაწვდით. ნეტგაზეთი

ახალგაზრდა მამაკაცი, რომელიც დედოფლისწყაროს რაიონში, ტყის მიმდებარედ ხანძარს მიზანმიმართულად აჩენდა, 500 ლარით დაჯარიმდა. აღნიშნულის შესახებ განცხადებას საგანგებო სიტუაციების მართვის სამსახური ავრცელებს. „შინაგან საქმეთა სამინისტროს საგანგებო სიტუაციების მართვის სამსახურის სახანძრო-სამაშველო ჯგუფის თანამშრომლებმა, დედოფლისწყაროს რაიონში, ტყის მიმდებარედ, პატრულირების დროს, დააფიქსირეს ხანძრის კერა. ტერიტორიის დათვალიერებისას სახანძრო-სამაშველო ჯგუფის წევრებმა შენიშნეს ახალგაზრდა მამაკაცი, რომელიც მიზანმიმართულად ახდენდა ცეცხლის წაკიდებას. ადგილზე გამოძახებულ იქნა შინაგან საქმეთა სამინისტროს კახეთის პოლიციის დეპარტამენტის, ასევე, ადგილობრივი მუნიციპალიტეტისა და გარემოს დაცვის სამინისტროს შესაბამისი სამსახურების თანამშრომლები. აღნიშნული პირი ადმინისტრაციულ სამართალდარღვევათა კოდექსის შესაბამისი მუხლის თანახმად - 500 ლარით დაჯარიმდა. მოვუწოდებთ მოსახლეობას, გამოიჩინონ მაღალი სამოქალაქო პასუხისმგებლობა და დაემორჩილონ კანონს. წინააღმდეგ შემთხვევაში, მათ მიმართ გატარდება კანონით გათვალისწინებული შესაბამისი ზომები“, - ნათქვამია განცხადებაში. იპნ

საქართველოს ტურიზმისა და ავიაციის 2023 წლის შემაჯამებელი ანგარიშის მიხედვით, 2023 წელს საქართველოს ბაზარზე 9 ახალი ავიაკომპანია შემოვიდა, საჰაერო რეისებს კი 21, მათ შორის, 6 ევროპული ახალი მიმართულება დაემატა. მონაცემების მიხედვით, სტრატეგიულ ახალ მიმართულებებს შორის არის ჰამბურგის, კოპენჰაგენის, მადრიდის, ფრანკფურტის, ბრიუსელის, პოზნანის, კიოლნისა და დელის მიმართულებები. “შედარებისთვის: 2022 წელს გვქონდა 81, ხოლო 2023 წელს - 108 მიმართულება, ზრდა პანდემიამდელ 2019 წელთან შედარებით 29 პროცენტია. ამავე პერიოდთან შედარებით, 13.2 %-თ არის გაზრდილი ევროპული მიმართულებები, რომლის ოდენობა 2022 წელს 48-ს, ხოლო 2023 წელს 66-ს შეადგენდა. 2019 წელთან შედარებით 25 პროცენტით მეტია ავიაკომპანიების რაოდენობაც. ტოპ-ავიაკომპანიებს შორის, რომლებიც საქართველოს ავიაბაზარზე ოპერირებენ, აღსანიშნავია Wizz Air Hungary, Turkish Airlines, Pegasus, Georgian Airways, Azerbaijan Airlin, Fly Dubai, Air Arabia და ა.შ. ხაზგასასმელია შიდა ფრენების სტატისტიკაც: ქვეყნის შიგნით ავიარეისებით გადაყვანილ მგზავრთა რაოდენობა 33 187-ს შეადგენს, საიდანაც 62% საქართველოს, ხოლო 38% უცხო ქვეყნების მოქალაქეები იყვნენ. ავიაციის მიმართულებით სამომავლო გეგმებიდან აღსანიშნავია თელავის აეროპორტის განვითარების პროექტი, რომლის გამტარუნარიანობა 200 000 მგზავრზეა გათვლილი. პროექტის ფარგლებში დაგეგმილია 1.7 კმ ასაფრენ-დასაფრენი ზოლის, თანამედროვე სანავიგაციო სისტემების, ახალი სანავიგაციო კოშკურისა და საპარკინგე სივრცის მშენებლობა. დაგეგმილი ინფრასტრუქტურული პროექტებიდან ასავე ხაზგასასმელია თბილისის ახალი აეროპორტის პროექტი, მესტიის აეროპორტის ახალი ტერმინალის მშენებლობა, ქუთაისის საერთაშორისო აეროპორტის გაფართოება (ახალი, 3.5 კმ. ასაფრენ0დასაფრენი ზოლის მშენებლობა, 500 ადგილიანი ახალი საპარკინგე სივრცე, აეროპორტის გენგეგმის შემუშავება და ა.შ.) მთის კურორტებზე დაგეგმილი პროექტებიდან აღსანიშნავია ჰაწვალის მთაზე 6 კმ, სასრიალო ტრასა, გუდაურში 3 კმ. ხელოვნური გათოვლიანების სისტემის მონტაჟი, ბაკურიანსა და გუდაურში ახალი ამბულატორიები და ა.შ. “2024 წლის საპროგნოზო მაჩვენებლები ასეთია: მგზავრთნაკადი - 6.8 მლნ; შემოსავლები ტურიზმიდან - 4.5 მლრდ აშშ დოლარი; საერთაშორისო მოგზაურის ვიზიტი - 7.9 მლნ; საერთაშორისო ტურისტული ვიზიტი - 5.2 მლნ”,- ნათქვამია შემაჯამებელ ანგარიშში. იპნ

რუსი ოპოზიციონერის, ალექსეი ნავალნის გარდაცვალების საქმეზე საერთაშორისო გამოძიებას 43 ქვეყანა ითხოვს, - ამის შესახებ ინფორმაციას გაერო-ში ევროკავშირის ელჩი, ლოტე კნუდსენი ავრცელებს. „ჩვენ რუსი ოპოზიციონერი პოლიტიკოსის, ალექსეი ნავალნის სიკვდილის გამო აღშფოთებულები ვართ. მისი მოულოდნელი გარდაცვალების გარემოებების შესახებ რუსეთმა დამოუკიდებელი და გამჭვირვალე საერთაშორისო გამოძიება უნდა დაუშვას“, - განაცხადა ლოტე კნუდსენმა. გაერო-ში ევროკავშირის ელჩმა აღნიშნა, რომ გამოძიებას 43 სახელმწიფო ითხოვს და საბოლოო პასუხისმგებლობა ვლადიმერ პუტინს ეკისრება. შეგახსენებთ, ალექსეი ნავალნი იამალო-ნენეცის ავტონომიური ოლქის კოლონიაში 16 თებერვალს გარდაიცვალა. რუსეთის ფედერალური სასჯელაღსრულების სამსახურის მტკიცებით, ნავალნიმ თავი ცუდად იგრძნო და გონება დაკარგა, რის შემდეგაც მედიკოსებმა მის გადასარჩენად რეანიმაციული ღონისძიებები განახორციელეს, მაგრამ უშედეგოდ. ალექსეი ნავალნი 1-ელ მარტს, მოსკოვში, ბორისოვის სასაფლაოზე დაკრძალეს. იპნ