tvati

გლდანში, შვილის მიერ მამის მკვლელობის საქმეზე ახალი დეტალები ხდება ცნობილი. როგორც კორპუსის მაცხოვრებლები აღნიშნავენ, მკვლელობა დანით მოხდა. მათივე ცნობით, შემთხვევას დაკავებულის 12 წლის დაც შეესწრო. „დანით მოკლაო ამბობენ, მე რომ ჩამოვედი, უკვე დამთავრებული იყო ყველაფერი. ოჯახში რა მოხდა, არ ვიცი. ერთი ჭრილობა ჰქონდა მიყენებული, სისხლისგან დაიცალაო, ეს ბიჭი არ გაქცეულა, სახლიდან გამოიყვანეს სამართალდამცავებმა. თუ არ ვცდები, კლინიკაში გარდაიცვალა, 49 წლის იყო დაღუპული. ხელოსანი, მშრომელი კაცი იყო, აქამდე კარგი ურთიერთობა ჰქონდათ მამა-შვილს, რა მოხდა არ ვიცი, წყნარი ოჯახი იყო. სახლში დაკავებულის დაც იყო, სასწრაფოში ალბათ, იმან დარეკა“,- აცხადებს მეზობელი. ამასთან, მამის მკვლელობისთვის დაკავებულის, რეზი გამხიტაშვილის მეზობლების ინფორმაციით, ის წარსულშიც არაერთხელ იყო ნასამართლევი. როგორც კორპუსის მაცხოვრებლები ჰყვებიან, ახალგაზრდა მამაკაცმა ბოლოს ციხე დაახლოებით, 2 წლის წინ დატოვა. თუ რა მოხდა დღეს დილით, ან მკვლელობას წინ რა უძღოდა, ადგილობრივები ინფორმაციას არ ფლობენ, მათ არც ჩხუბის ხმა გაუგიათ. „მოკლული ძალიან კარგი კაცი იყო. ამ ბიჭს არ ვიცნობ, ნახევარჯერ დაჭერილი იყო, 2-ჯერ თუ 3-ჯერ იყო დაკავებული, ბავშვობიდან ციხეში ზის“,- განაცხადა მეზობელმა. ცნობისთვის, მკვლელობა გლდანში, მე-2 მიკროში დღეს დილით, დაახლოებით, 09:00 საათზე მოხდა. გელა გამხიტაშვილი დანით მიყენებული ერთი ჭრილობის შედეგად გარდაიცვალა, შვილი - რეზი გამხიტაშვილი კი, სამართალდამცავებმა ადგილზე დააკავეს. იპნ

ევროკავშირის მიერ რუსეთის წინააღმდეგ დაწესებული სანქციების ახალი, მე-13 პაკეტი 194 ფიზიკურ და იურიდიულ პირს მოიცავს, - ამის შესახებ ევროკავშირის საბჭოს პრესრელიზშია აღნიშნული. „საბჭომ დღეს, უკრაინაში რუსეთის სრულმასშტაბიანი შეჭრის დაწყების მეორე წლისთავის გათვალისწინებით, შემაკავებელი ზომების მე-13 პაკეტი მიიღო პუტინის რეჟიმის წინააღმდეგ, მათ მიმართ, ვინც პასუხისმგებელია პუტინის უკანონო, არაპროვოცირებული და გაუმართლებელი აგრესიული ომის გაგრძელებაზე და მნიშვნელოვნად უჭერს მას მხარს. საბჭომ მიიღო გადაწყვეტილება, დამატებით 106 ფიზიკური და 88 ორგანიზაციისთვის შემაკავებელი ზომების დაწესებაზე, რომლებიც პასუხისმგებლები არიან უკრაინის ტერიტორიული მთლიანობის, სუვერენიტეტისა და დამოუკიდებლობისთვის ძირის გამოთხრასა და საფრთხის შექმნაზე“, - აღნიშნულია ინფორმაციაში. ევროკავშირის საბჭო განმარტავს, რომ ახალი სანქციები ძირითადად ეხება სამხედრო და თავდაცვის სექტორებს და მათთან დაკავშირებულ პირებს, მათ შორის მათ, ვინც ჩართულია ჩრდილოეთ კორეის მიერ რუსეთისთვის შეიარაღების მიწოდებაში, ასევე სასამართლოს წევრებს, ადგილობრივ პოლიტიკოსებს და უკრაინელი ბავშვების უკანონო დეპორტაციაზე პასუხისმგებელ პირებს. პრესრელიზში აღნიშნულია, რომ იმ პირებისა და ორგანიზაციების საერთო რაოდენობამ, რომლებსაც ევროკავშირმა სანქციები დაუწესა უკრაინის ტერიტორიული მთლიანობის, სუვერენიტეტისა და დამოუკიდებლობისთვის ძირის გამოთხრისა და საფრთხის შექმნის გამო, ორი ათასს გადააჭარბა. „სანქცირებული პირები ექვემდებარები აქტივების გაყინვას და ევროკავშირის მოქალაქეებსა და კომპანიებს ეკრძალებათ, მათთვის სახსრები ხელმისაწვდომი გახადონ. ფიზიკურ პირებზე ასევე ვრცელდება მოგზაურობის აკრძალვა, რაც ხელს უშლის მათ ევროკავშირის ტერიტორიებზე შესვლაში ან ამ ტერიტორიაზე გავლაში“, - აღნიშნულია ინფორმაციაში. ამასთან, ევროკავშირის საბჭოს პრესრელიზში აღნიშნულია, რომ ევროკავშირმა რუსეთის წინააღმდეგ დაწესებული სანქციების მე-13 პაკეტში დაამატა 27 ახალი ორგანიზაცია, რომლებიც უშუალოდ უჭერენ მხარს რუსეთის ფედერაციის სამხედრო-სამრეწველო კომპლექსს უკრაინის წინააღმდეგ აგრესიულ ომში. „ისინი ექვემდებარებიან უფრო მკაცრ საექსპორტო შეზღუდვებს ორმაგი დანიშნულების საქონელსა და ტექნოლოგიებზე, ისევე როგორც ისეთ საქონელსა და ტექნოლოგიაზე, რომელმაც, შესაძლოა, ხელი შეუწყოს რუსეთის თავდაცვისა და უსაფრთხოების სექტორის ტექნოლოგიურ გაუმჯობესებას“, - აღნიშნულია პრესრელიზში. ევროკავშირის საბჭოს ინფორმაციით, აღნიშნული ორგანიზაციების ნაწილი განლაგებულია მესამე ქვეყნებში: ინდოეთში, შრი-ლანკაში, ჩინეთში, სერბეთში, ყაზახეთში, ტაილანდსა და თურქეთში და ჩართულები არიან სავაჭრო შეზღუდვების გვერდის ავლაში, ზოგი კი რუსული ორგანიზაციებია, რომლებიც რუსეთის სამხედრო-სამრეწველო კომპლექსისთვის ელექტრონული კომპონენტების შექმნაში, წარმოებასა და მიწოდებაში. „გარდა ამისა, დღევანდელი გადაწყვეტილება აფართოებს იმ შეზღუდულ ნივთების ჩამონათვალს, რომლებმაც შეიძლება ხელი შეუწყონ რუსეთის თავდაცვისა და უსაფრთხოების სექტორის ტექნოლოგიურ გაუმჯობესებას უპილოტო საფრენი აპარატების განვითარებისა და წარმოებისთვის კომპონენტების დამატებით. და ბოლოს, ევროკავშირმა შემოიღო დამატებითი შეზღუდვები იმ საქონლის ექსპორტზე, რომელიც ხელს უწყობს რუსეთის სამრეწველო შესაძლებლობების გაძლიერებას, როგორიცაა ელექტრო ტრანსფორმატორები“, - აღნიშნულია ინფორმაციაში. ამასთან, ევროკავშირის ცნობით, დღევანდელი გადაწყვეტილებით, გაერთიანებული სამეფო ემატება პარტნიორი ქვეყნების სიას, რომლებიც აწესებენ შემზღუდველ და კონტროლის ზომებს რუსეთიდან რკინისა და ფოლადის იმპორტზე და ეს ზომები, არსებითად, ევროკავშირის ზომების ეკვივალენტურია. იპნ

თბილისში, გლდანში შვილმა მამა მოკლა. მომხდარის სხვა დეტალები, ჯერჯერობით, უცნობია. „ინტერპრესნიუსის“ ინფორმაციით, ამ ეტაპზე ერთი პირია დაკავებული და ფაქტზე გამოძიება მიმდინარეობს. იპნ

“ოცნების” ამოსავალი წერტილია თვითონ კარგად იყვნენ, ბევრი ფული მოიპარონ, ძალაუფლება გაიხანგრძლივონ, ჩარტერებით იფრინონ, ვილები აიშენონ, პარტიული აქტივი დაასაქმონ, ჩვენი მოქალქეები კი ისევ სიღარიბეში იყვნენ, არც განათლების პერსპექტივა ჰქონდეთ, არც კეთილდღეობა, არც უმუშევრობის დაზღვევა, არც მინიმალურ ხელფასი, არც ჯანმრთელობის დაზღვევა. ბერდია სიჭინავა, პარტია “საქართველოსთვის” აღმასრულებელი მდივანი. ვიდეო: https://www.facebook.com/ForGeoGe/videos/356920193879024/

არჩევნების არჩევნებამდე გაყალბების მცდელობა: ფაქტები და გამოსავალი ამომრჩევლისათვის: ვიდეო:

უკრაინაში რუსეთის სრულმასშტაბიანი შეჭრიდან ორი წლისთავზე, 24 თებერვალს, თბილისში უკრაინის მხარდამჭერი აქცია „Believe in Ukraine“ გაიმართება. აქციის მონაწილეები 18:00 საათზე პირველი რესპუბლიკის მოედანზე შეიკრიბებიან და პარლამენტისკენ მსვლელობას გამართავენ. აქცია საქართველოში უკრაინელი აქტივისტების მიერ არის ორგანიზებული და მას ქართულ-უკრაინული პლატფორმაც უერთდება. ქართულ-უკრაინული პლატფორმა არის არასამთავრობო ორგანიზაცია, რომლის ამოცანაა საქართველოში უკრაინული სათემო ჯგუფებისა და უკრაინელ ბენეფიციარებთან მომუშავე ორგანიზაციების მხარდაჭერა უკრაინული თემის ინტეგრაციის და ქართულ- უკრაინული ურთიერთობების გასაძლიერებლად. ნეტგაზეთი

უკრაინის შეიარაღებულმა ძალებმა ომში რუსებზე ხუთჯერ ნაკლები დანაკარგები განიცადა, - ამის შესახებ უკრაინის პრეზიდენტმა, ვოლოდიმირ ზელენსკიმ Fox News-თან ინტერვიუში განაცხადა. უკრაინული ძალების მიერ ომში განცდილი დანაკარგების შესახებ დასმული შეკითხვის საპასუხოდ, ზელენსკიმ განაცხადა : „ვიცით, რომ ათიათასობით ადამიანი დაიღუპა. ათიათასობით ბავშვი იქნა დეპორტირებული. თუ შევადარებთ დაღუპული ჯარისკაცების რაოდენობას, მე ვიტყოდი, რომ თანაფარდობა არის 1:5. ბრძოლაში დაღუპული ყოველ უკრაინელ ჯარისკაცზე 5 რუსი დაღუპული ჯარისკაცი მოდის ეს არის მიახლოებითი სტატისტიკა“, - განაცხადა ზელენსკიმ. შეგახსენებთ, უკრაინის თავდაცვის სამინისტროს შეფასებით, რუსეთმა უკრაინაში 400 000-ზე მეტი ჯარისკაცი დაკარგა. იპნ

საქართველოში დნმ-ის ერთიანი ბაზა შეიქმნება. ამ მიზნით საქართველოს შინაგან საქმეთა სამინისტრო „დნმ-ის მონაცემთა ერთიანი ბაზის შექმნის შესახებ“ კანონის პროექტს შეიმუშავებს. როგორც დოკუმენტშია ნათქვამი, ნებისმიერ პირს ნებაყოფლობით შეეძლება კუთვნილი დნმ მონაცემების წარდგენა, ბაზაში რეგისტრაციის მიზნით. „საკანონმდებლო ინიციატივის შესაბამისად, უგზო-უკვლოდ დაკარგულ პირთა იდენტიფიკაციის, დანაშაულის პრევენციის, დანაშაულის გახსნისა და მის წინააღმდეგ ეფექტიანი ბრძოლის მიზნით, სსიპ – ლევან სამხარაულის სახელობის სასამართლო ექსპერტიზის ეროვნული ბიუროში შეიქმნება დნმ-ის მონაცემთა ერთიანი ბაზა , რომელშიც შეინახება გენეტიკური მონაცემები. ასევე განისაზღვრება დნმ მონაცემების სავალდებულო პროფილირებას დაქვემდებარებული სუბიექტების ჩამონათვალი, ამასთან, ნებისმიერ პირს ნებაყოფლობით შეეძლება კუთვნილი დნმ მონაცემების წარდგენა, ბაზაში რეგისტრაციის მიზნით“,- აღნიშნულია დოკუმენტში. საქართველოს მთავრობის კანონშემოქმედებითი საქმიანობის მოკლევადიანი გეგმის თანახმად, კანონპროექტის მიღება გამოიწვევს სახელმწიფო ბიუჯეტიდან დამატებითი ხარჯების გამოყოფას (დაახლოებით 13 მილიონ ლარამდე). იპნ

მარტის აქციებზე პოლიციელების ჯანმრთელობის ხელყოფისა და სახელმწიფო ქონების განადგურების ბრალდებით დაკავებული 21 წლის ლაზარე გრიგორიადისის საქმეზე პროცესი გადაიდო. შესაბამის ინფორმაციას ლაზარე გრიგორიადისის დედა, თამთა კალანდაძე ავრცელებს. “რამდენიმე წუთის წინ დაგვირეკა ადვოკატმა, ლაზარეს სასამართლო პროცესი გადაიდო, მოსამართლე შვებულებაშია...”, - წერს გრიგორიადისის დედა. შეგახსენებთ, მარტის აქციებზე პოლიციელების ჯანმრთელობის ხელყოფისა და სახელმწიფო ქონების განადგურების ბრალდებით დაკავებული 21 წლის ლაზარე გრიგორიადისის საქმეზე მოლოდინი იყო, რომ განაჩენი 26 თებერვალს გამოცხადდებოდა. სწორედ ამ დრომდე გადაიდო 15 იანვარს სასამართლო პროცესი, სადაც დაცვის მხარის მოწმეები უნდა დაეკითხათ. ცნობისთვის, ლაზარე გრიგორიადისს, რომელსაც პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ედება ბრალი, აღკვეთის ღონისძიების სახით პატიმრობა 31 მარტს შეეფარდა. გამოძიების ინფორმაციით, ბრალდებულმა 7 მარტს, რუსთაველის გამზირზე გამართული აქციის მიმდინარეობისას, 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, რომლებიც სამსახურებრივ მოვალეობას ასრულებდნენ, ორჯერ ისროლა ე.წ. „მოლოტოვის კოქტეილი“. ასევე, ბრალდებულმა 9 მარტს, ჭანტურიას ქუჩაზე, განზრახ წაუკიდა ცეცხლი შინაგან საქმეთა სამინისტროს კუთვნილ „ტოიოტა კოროლას“ მოდელის ავტომანქანას, რომელიც ადგილზე დაიწვა. ამ ქმედების შედეგად, სახელმწიფო ბიუჯეტს 39 500 ლარის ქონებრივი ზიანი მიადგა. ლაზარე გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის „ა“ ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს. 7-8 მარტის საქმეზე სისხლის სამართლის კოდექსით ჯამში, 6 პირი დააკავეს, მათგან 5 ბრალდებული გირაოს სანაცვლოდ არის გათავისუფლებული. ipn

თათია ჩაფიჩაძე "ბახმაროს პროექტს არ ახლავს მშენებლობისთვის საჭირო ყველა კვლევა და მისი მასშტაბი კურორტის მოცულობასთან წინააღმდეგობაშია,“ - ამის შესახებ “ურბანული განვითარების ინსტიტუტის” დამფუძნებელმა და ხელმძღვანელმა ანი ბიბილაშვილმა „საქმიანი დილის“ ეთერში ისაუბრა. ბიბილაშვილი ამბობს, რომ პროექტი არ ჯდება კურორტის ლანდშაფტში და მისი ზომა ვერ უზრუნველყოფს გახსნილი ხედების შენარჩუნებას. არქიტექტორებისა და ურბანისტების ნაწილი მოითხოვს, რომ განაშენიანების რეგულირების ნაწილი პროფესიონალების ჩართულობით ახლიდან შემუშავდეს. „პროექტი არ არის სრულყოფილი, ის ვიზუალური მასალაც კი, რაც გამოქვეყნდა არ შეესაბამება პროექტს რომელიც წარდგენილია ნებართვის მისაღებად. ეს შეიცვალა რადგან აღმოჩნდა, რომ იქ ზვავსაშიში ტერიტორია ძალიან ახლოს ჩადიოდა ტერიტორიის ნაწილზე. ამიტომ პროექტი დაკორექტირდა, თუმცა არ დაკორექტირებულა მისი ვიზუალური ნაწილი. პროექტი, რომელიც წარდგენილია სანებართვოდ, არ ახლავს გეოლოგიური კვლევა, რომელიც დაგვანახვებს რისკებს, რაც მიწას გააჩნია. ასევე პროექტში არ არის საინჟინრო ნაწილი. ასევე განსაკუთრებული პრეტენზია გვაქვს იმასთან დაკავშირებით, რომ კომპანიას საინვესტიციო ვალდებულებაში ეწერა შეზღუდვა, რომ მას არ შეეძლო მრავალბინიანი ნაგებობის მშენებლობა, მაგრამ, თუ ამას დავარქმევთ აპარტოტელს ან სასტუმრო კომპლექსს და შემდეგ ბინებად გავყიდით, მაშინ ამ საინვესტიციო ვალდებულებას თითქოს კანონმდებლობით გვერდს ავუვლით და მოვახერხებთ, რომ ერქვას მრავალბინიანი კომპლექსი ან სასტუმრო. ამის აკრძალვა იმიტომ დგას, რომ ის გარემო ვერ გაუძლებს მრავალბინიან განაშენიანებას და ამ ტიპის საცხოვრისის გაჩენას. არ ვეთანხმებით პროექტის ავტორს იმაში, რომ ლანდშაფტზეა მორგებული ეს პროექტი, ეს პროექტი არის ჩაკეტილი თავისი არსით, შიდა სივრცეს ქმნის და ის ზურგს აქცევს გარემოს. პირდაპირ წინააღმდეგობაში თუ არ არის კოეფიციენტი გენერალურ გეგმასთან, პროექტი წინააღმდეგობაშია გენგეგმაში ჩადებულ პირველად არსთან, რომ შენარჩუნებული იყოს ლანდშაფტი, გახსნილი ხედები. როგორ შეიძლება შევინარჩუნოთ გახსნილი ხედები, რომელიც თავისი ზომით არის თითქმის ოლიმპიური სტადიონის ზომის? 150 მეტრიანი შენობა ვერაფრით შექმნის გახსნილ ხედებს იმისთვის, რომ შენობებს შორის ადამიანებმა იმოძრაონ და ა.შ.“ - ამბობს ბიბილაშვილი. პროფესიულ წრეებში მიიჩნევენ, რომ კურორტზე რამდენიმე მიზიდულობის ცენტრის აშენება მიზანშეწონილია, თუმცა ის არ უნდა იყოს ერთიანი და უნდა დაიშალოს ზონებად. BMG-თან ბიბილაშვილი ინფრასტრუქტურული გარანტიების არსებობაზეც ამახვილებს ყურადღებას და ამბობს, რომ გუდაურისა და ბაკურიანის მაგალითზე მშენებლობას ინფრასტრუქტურა ვერ გაჰყვა, რამაც სამთო კურორტების დაზიანება განაპირობა. „განვითარების წინააღმდეგი არ ვართ, გვინდა რომ ვისწავლოთ იმ შეცდომებზე რაც ბაკურიანთან და გუდაურთან მიმართებით დავუშვით. ბახმაროში რომელიც ძალიან ადამიანური მასშტაბისაა, ნამდვილად ვერცერთ ევროპულ კურორტს ვერ შევადარებთ იმდენად განსაკუთრებულია თავისი ხასიათით, აქ მაინც გავაკეთოთ ისეთი რამ, რომელიც ხვალ მსოფლიოს რუკაზე დასვამს როგორც საუკეთესო ადგილს, სადაც მისვლა შეიძლება. კომპლექსი შეიძლება დაშლილიყო ზონებად, აქ საუბარი არ არის 60კვ-ად დაყოფაზე, მაგრამ შეიძლებოდა ისე დაშლილიყო, რომ მას შექმნა მიზიდულობის ცენტრი, ამავდროულად შეენარჩუნებინა გახსნილი სივრცეები. ნებისმიერი მოცულობის დასახლებას სჭირდება თავისი მიზიდულობის ცენტრები, ეს შეიძლება დიდი დასახლებების შემთხვევაში რამდენიმეც იყოს, ხოლო მცირეს შემთხვევაში ერთი ან ორი. გვესმის, რომ ბახმარო უნდა განვითარდეს მაქსიმალური პოტენციალით, მაგრამ ვსაუბრობთ იმაზე, რომ ინფრასტრუქტურულ გარანტიებზე, რომელსაც სამწუხაროდ „ორბი“ ვერ გასცემს. ასეთი გარანტიების არარსებობის პირობებში ჩვენ ვნახეთ, რომ მშენებლობას ინფრასტრუქტურული განვითარება არ გაჰყვა არც ბაკურიანში და არც გუდაურში. გვჭირდება გარანტიები, რომ ბახმარო ამ უნიკალურ გარემოს არ დაკარგავს,“- ამბობს ურბანული განვითარების ინსტიტუტის დამფუძნებელი „საქმიან დილასთან.“ bm.ge

მედვედევისთვის მხოლოდ ფსიქიატრიული დახმარების რჩევა შეგვიძლია. ამის შესახებ ევროკავშირის საგარეო სამსახურის პრესსპიკერმა პიტერ სტანომ ბრიუსელში გამართულ ბრიფინგზე განაცხადა. სტანოს განცხადება ჟურნალისტის კითხვას მოყვა რუსეთის ყოფილი პრეზიდენტის დიმიტრი მედვედევის შესახებ, რომელმაც განაცხადა, რომ კიევი და ოდესა რუსული ქალაქებია, ხოლო რუსეთი კიევამდე უნდა მივიდეს. “როგორც წესი, კომენტარს არ ვაკეთებთ ხოლმე უცნაურ განცხადებებზე, განსაკუთრებით ისეთი ხალხისგან, რომლებიც სასოწარკვეთით ეძებენ ყურადღებას და მარადიული მეორე ნომერი არიან. თუმცა სასიამოვნოა, რომ ადამიანი, რომელიც თქვენ ახსენეთ [მედვედევი], საჯაროდ გვიზიარებს თავისი ფსიქიკური მდგომარეობის დიაგნოზს. ვფიქრობ, ჩვენ მხოლოდ კონსულტაციისა და ფსიქიატრიული დახმარების რჩევა შეგვიძლია. თუმცა დარწმუნებული არ ვარ, რომ რუსეთის სახელმწიფოს იმ მილიარდებით, რომლებსაც ტყუილად ხარჯავს უკრაინის წინააღმდეგ უკანონო ომში, რეალურად ჰქონდეს სოციალურ დახმარებასა და ხალხისთვის ჯანდაცვაში ინვესტირების შესაძლებლობა,” - განაცხადა სტანომ. ევროკავშირის საგარეო სამსახურის სპიკერმა ევროკავშირის წევრი ქვეყნების საგარეო საქმეთა მინისტრების ბოლო სხდომა ახსენა, სადაც ევროკავშირმა მკაფიო მზადყოფნა დააფიქსირა უკრაინის მხარდაჭერის გაგრძელებაზე. “[შეხვედრაზე] ძალიან ნათალი გახადეს, რომ სრულიად მზად ვართ გავაგრძელოთ უკრაინის მხარდაჭერა აგრესიისგან მის კანონიერ დაცვაში, განსაკუთრებით ახლა, როდესაც ფართომასშტაბიანი შეჭრიდან ორი წლის სამწუხარო ნიშნულს ვუახლოვდებით. უმაღლესი წარმომადგენელი [ჯოზეპ ბორელი], წევრი სახელმწიფოები ყველაფერ შესაძლებელს აკეთებენ, რათა, როგორ უმაღლესი წარმომადგენელი ამბობს, უზრუნველვყოთ უკრაინისთვის მეტი და უფრო სწრაფი [დახმარება], იმდენი, რამდენიც საჭირო იქნება - საბრძოლო მასალა, სამხედრო ტექნიკა, საჰაერო თავდაცვა და ა.შ., რათა უკრაინამ საბოლოო ჯამში შეძლოს აგრესორთან ეს ომი მოიგოს,” - განაცხადა სტანომ. იპნ

ჩვენი მიზანია, ყველა პროცესი გამოვიყენოთ იმისთვის, რომ ქვეყნის ევროინტეგრაციას ხელი შევუწყოთ, - ამის შესახებ პარტია “საქართველოსთვის” დეპუტატმა მიხეილ დაუშვილმა პარლამენტში, ევროკავშირის ცხრა რეკომენდაციის შესრულების საკითხზე შეხვედრის დაწყებამდე განაცხადა. მისივე თქმით, სამწუხაროდ, რასაც “ქართული ოცნება” სთავაზობს, ვერ იქნება ვერც ყოვლისმომცველი და ვერც ეფექტური. “ჩვენი მიზანია, რომ ყველა პროცესი გამოვიყენოთ იმისთვის, რომ ქვეყნის ევროინტეგრაციას ხელი შევუწყოთ. მიუხედავად იმისა, მოლოდინები პოზიტიური გვაქვს, ნაკლებად პოზიტიური, თუ მაღალი, მთავარია, ჩვენ ჩვენი პასუხისმგებლობები უნდა შევასრულოთ. “ოცნებას” რაც აქვს წარმოდგენილი, უშუალოდ მაგ ცვლილებებსა და ინიციატივებში ვერ ვხედავ პრობლემას. პრობლემა იმაში კი არ არის მისაღებია თუ არა, არ ფუჭდება არაფერი, რაღაცებს გააუმჯობესებს. მთავარია, 9 რეფორმაში გვიწერია ყოვლისმომცველი და ეფექტიანი რეფორმები, სამწუხაროდ, რასაც გვთავაზობენ [ “ქართული ოცნება”] ვერ იქნება ვერც ყოვლისმომცველი და ვერც ეფექტური. დანარჩენი რასაც გვთავაზობენ მისაღებია, არც არაფერს გააფუჭებს, თუმცა არც არაფერს გააკეთებს სიღრმისეულად”, - განაცხადა დაუშვილმა. იპნ

როდესაც გალის რომელიმე სკოლაში აფხაზურის გაკვეთილი ცდება, მასწავლებლებიც და მოსწავლეებიც შეთანხმებული არიან, რომ ქართულის გაკვეთილი ჩატარდეს, რაც თუნდაც მცირე შესაძლებლობას აძლევს მოსწავლეებს, ქართული ენის სწავლებისთვის გამოყოფილზე ოდნავ მეტი დრო ჰქონდეთ. ყოველ ახალ სასწავლო წელს გალში ქართული ენისა და ლიტერატურის მასწავლებლებს, მოსწავლეებსა და მშობლებს ახალი საფიქრალი უჩნდებათ – წელსაც ამცირებენ თუ არა ქართულის საათებს? უკანასკნელი რამდენიმე წლის განმავლობაში გალში ქართული ენის რეპრესირება რუსული ენის პრიორიტეტად გამოცხადებსთანაა დაკავშირებული. 2021 წელს, აფხაზეთის დე ფაქტო განათლების სამინისტროს გადაწყვეტილებით, გალის რაიონის სკოლებში ქართულ ენაზე სწავლება სრულად აიკრძალა. თუმცა ჯერ კიდევ 2015-2016 სასწავლო წლიდან გალის ქვედა ზონაში, პირველიდან მეოთხე კლასამდე, რუსულ ენაზე სწავლება დაწესდა, რაც ასევე გულისხმობდა ყოველი მომდევნო პირველი კლასებისთვის რუსულ ენაზე სწავლის დაწყებას. წლიდან წლამდე გალში თვალშისაცემი ხდება ქართული ენის რეპრესირების ტენდენცია, რაც რუსული ენის პრიორიტეტად გამოცხადებასთანაა დაკავშირებული: ქართული ენა ჯერ უცხო ენად გამოაცხადეს, შემდეგ კი მისი სწავლება კვირაში 2 საათამდე დაიყვანეს. მოსწავლეები ქართული ენისა და ლიტერატურის მასალის შესწავლას ორ საათში ვერ ასწრებენ, რაც საბოლოოდ პრობლემას უქმნის იმ მოსწავლეებსაც, ვისაც სწავლის გაგრძელება თბილისის კონტროლირებად ტერიტორიაზე სურს. რა ხდება დღეს გალის სკოლებში? 16 წლის ლ.რ. გალის რაიონის ერთ-ერთი სკოლის დამამთავრებელი კლასის მოსწავლეა. იგი მესამე კლასამდე ქართულ ენაზე იღებდა განათლებას, შემდეგ კი მისი სკოლაც რუსულენოვანი სწავლების მოდელზე გადავიდა. ახლა მის სკოლაშიც ქართულ ენასა და ლიტერატურას მხოლოდ და მხოლოდ ორი საათი ეთმობა “საერთოდ არ გვყოფნის ეს დრო. მასწავლებელი ახერხებს ხოლმე, როდესაც სხვა გაკვეთილები გვიცდება, ჩავანაცვლოთ და ქართული ჩავატაროთ, მაგრამ ესეც არაა საკმარისი. აბიტურიენტები ვართ და გვიწევს, ცალკე ვიაროთ, თანხა ვიხადოთ ამ ყველაფერში, რადგან ვერ ვახერხებთ, სკოლაში გავიაროთ მთელი მასალა. ზოგს, რა თქმა უნდა, არ აქვს იმის თანხა და საშუალება, რომ ცალკე იაროს კერძო მასწავლებელთან”, – გვიყვება მოსწავლე. ქართული ენის სწავლებისთვის გამოყოფილი არასაკმარისი საათების მიუხედავად, წელს ლ.რ-ს ერთიანი ეროვნული გამოცდების ჩაბარება მოუწევს. სწორედ ამიტომ, ის და მისი თანატოლები კერძო მასწავლებლებთან ემზადებიან, ზოგი მათგანი – იქვე ან მეზობელ სოფელში. ლ.რ. ქართულში მისივე სკოლის მასწავლებელთან დამატებით ემზადება, ინგლისურში კი – ქალაქ ზუგდიდში [რაც, მოსწავლის თქმით, კიდევ დამატებით ხარჯებთანაა დაკავშირებული]. სკოლებში დანერგილი ცვლილებები შესვენებებზე სასაუბრო ენითაც იგრძნობა. თუმცა, ლ.რ-ს თქმით, ის და მისი კლასელები გაკვეთილებს შორის შუალედებში მუდმივად ქართულად საუბრობენ. “ორი – სამი წლის წინ ერთი შემთხვევა იყო ასეთი, რომ ჩვენთან მოვიდნენ ორგანიზაციიდან – გალიდან, და ჩემმა კლასელმა ქართულად დაიწყო საუბარი დერეფანში, იმიტომ, რომ ზოგადად, ქართულად ვსაუბრობთ. იმ ორგანიზაციის ერთ-ერთმა წევრმა გვითხრა, რომ ქართულად არ გვესაუბრა, რადგან რუსული სკოლაა და მოგვეთხოვება, რუსულად ვისაუბროთ” . ლ.რ. ამბობს, რომ აფხაზური ენისა და აფხაზეთის ისტორიის ახალი მასწავლებლები ჰყავთ, რომლებიც თავს იკავებენ ენის საკითხზე დისკუსიისგან. “თუმცა ერთ-ერთმა ორი წლის წინ სპეციალურად გვკითხა, რა ენებზე ვსაუბრობდით შესვენებებზე და ჩვენც არაფერი დაგვიმალავს – ვუთხარით, რომ ქართულად და მეგრულად. ამაზე გვიპასუხა, რომ ჩვენ არ უნდა ვისაუბროთ ქართულად, რადგან ჩვენი მშობლიური ენა არის რუსული. დღეს ბევრი ბავშვია დაწყებით კლასებში, რომელიც სახლშიც კი რუსულად საუბრობს, ქართულს ვერ აღიქვამენ თავიანთ მშობლიურ ენად”, – ჰყვება ლ.რ. ახალი თაობისა და მისი თაობის ერთმანეთთან შედარებისას ჩვენი მოსწავლე რესპონდენტი ამბობს, რომ “უმცროს თაობას ქართულად საუბრისას უკვე რუსული აქცენტი აქვს, ქართული სიტყვები ავიწყდება და რუსულ სიტყვებს იყენებს”. “ეს, რა თქმა უნდა, ჩვენ, უფროსკლასელებს, ძალიან გვაბრაზებს”. ქართული ენისა და ლიტერატურის გაკვეთილების სიმცირე გალის რაიონის სკოლების მასწავლებლებსაც აშფოთებთ. გალში მცხოვრები მასწავლებელი ი.კ. გვიყვება, რომ დაახლოებით 10 წლის წინ ქართულს იმდენი საათი ეთმობოდა სკოლებში, რამდენიც კონტროლირებად ტერიტორიაზე. “წარმოიდგინეთ, ერთი საათი ქართული ლიტერატურა კვირაში – ეს არის კატასტროფა. ფაქტობრივად, ნიშნავს, რომ ვერ ასწავლო მოსწავლეს. ეს არის წარმოუდგენელი. შედარებაც არ შეიძლება 10 წლის წინ არსებულ მდგომარეობასთან”. ფოტო: აფხაზეთის დე ფაქტო განათლების სამინისტროს ვებ-გვერდიდან ი.კ. ამბობს, რომ ქართული ენისა და ლიტერატურის დამატებით გაკვეთილების შესახებ, რომლებსაც ისინი ატარებენ არაოფიციალურად, მოსწავლეები დარიგებული არიან, რომ არ ისაუბრონ. “ხშირად ცდება ჩვენთან აფხაზეთის ისტორიისა და აფხაზური ენის გაკვეთილები. ასეთ დღეებში ბავშვებმა იციან, რომ ქართულის სახელმძღვანელოები უნდა მოიტანონ. მაქსიმალურად ვცდილობთ ჩავსვათ დამატებითი გაკვეთილები, მაგრამ როდესაც ეს ცხრილში სტაბილურად არ წერია, ეს არ არის გამოსავალი – გვიჭირს ჩვენც და ბავშვებსაც. ჩვენთან ისედაც ერთი წლით ნაკლებს სწავლობენ, მეთერთემეტე კლასით ამთავრებენ სწავლას. ნახტომს ვაკეთებთ და ვტოვებთ მეცხრე კლასის პროგრამას, ესეც პრობლემაა, რადგან უამრავი ტექსტი რჩება. ჩვენი ბავშვები არიან არაჩვეულებრივი, რაც აქვთ, ამ შედეგსაც რომ აჩვენებენ. აბსოლუტური უმრავლესობა რუსულად საუბრობს. თუმცა ვერავის დავადანაშაულებთ – 30- წლიანი წნეხი მცირე ნამდვილად არ არის”. მასწავლებელი ამბობს, რომ უკანასკნელ წლებში რაიონის სხვა სკოლებშიც იზრდება ზეწოლა, რაც უკვე თითქმის ყველა საკითხში გამოიხატება. “ღონისძიებებს რომ ვატარებთ, რომლებიც სრულიად ნეიტრალური და აპოლიტიკურია, იმაზე უნდა ვიფიქროთ, რომ რამე ქართული არ გაიპაროს. იყო პრეცედენტი დირექტორის მოხსნის, რადგან პირველ სექტემბერს რაღაც ქართული წამოსცდა. განყოფილების გამგემ კი დირექტორების თათბირზე პირდაპირ თქვა, რომ ჩვენი განათლების მინისტრი აღშფოთდა, როგორ თუ გალის რაიონში კიდევ ისწავლება ქართულიო”. ი.კ. მიიჩნევს, რომ ქართულ ენას სკოლების სასწავლო პროცესიდან სრულად ჯერ არ ამოიღებენ, რადგან ეს ჯერჯერობით პოლიტიკურად არამომგებიანია. “ეს რეზონანსული ამბავი იქნება, რადგან ყველა საერთაშორისო შეხვედრაზე თავს იწონებდნენ იმით, რომ ქართულის სწავლებას საათები ეთმობა”. ქართულის მასწავლებლების მიმართ დამოკიდებულებაზე საუბრისას ი.კ-ს გაახსენდა მასწავლებლის დღისადმი მიძღვნილი ღონისძიება, სადაც დაჯილდოების ცერემონიაც გაიმართა. “იქ იყვნენ ჩემი ყოფილი მოსწავლეები, რომლებიც მასწავლებლები არიან. გაუხარდათ ჩემი დანახვა და მეც ქართულად მივესალმე, რამაც რამდენიმე იქ დამსწრე აფხაზურის მასწავლებელზე უცნაური რეაქცია იქონია – შეხვედრის დასრულებამდე ქილიკობდნენ და იცინოდნენ. ასეთი ფრაზა გაისმა: “мы гостеприимные” (სტუმართმოყვარეები ვართ), რაც ჩვენს თავზე მივიღეთ, რომ თითქოს, ჯანდაბას, ქართველები არიან, მაგრამ როგორც სტუმრებს, ისე მივიღებთო. ეს იყო ძალიან დამთრგუნველი”. ქართულის სახელმძღვანელოები დღეს გალის სკოლებში ქართული ენა და ლიტერატურა ცალ-ცალკე სახელმძღვანელოთი ისწავლება – ლიტერატურას ვახტანგ როდონაიას სახელმძღვანელოთი ასწავლიან, ხოლო ენას – აკაკი შანიძის და ლეო კვაჭაძის წიგნებით. “გალის საგანმანათლებლო რესურსცენტრი გვაძლევდა ხოლმე გარკვეული რაოდენობის სახელმძღვანელოებს წინა წლებში. ეს არ იყო სახელმძღვანელოების მთელი კომპლექტი, მაგრამ იყო საკმარისი რაოდენობა. ახლა ჩვენ ვცდილობთ გადმოვიტანოთ წიგნები ისე, რომ “საზღვარზე” არ შენიშნონ, რადგან ამაზე გვქონდა სკანდალი და სერიოზული პრობლემები. ამიტომ ვმალავთ, თითო-თითოდ და ორ-ორად მოგვაქვს, ზედ დავალაგებთ ჩანთაში რაღაცებს და ისე”. ი.კ. იხსენებს, რომ ყოფილა შემთხვევაც, როდესაც აფხაზური ენის სახელმძღვანელოზეც შექმნილა პრობლემა “საზღვარზე”, რადგან მას ჰქონდა ქართული გერბი – “ეს ამბავი ადგილობრივ უშიშროებამდეც მივიდა”. სკოლის მასწავლებლების გარდა, ეს პრობლემა იმ მასწავლებლებსაც აწუხებთ, რომლებიც მოსწავლეებს კერძოდ ამზადებენ სხვადასხვა საგნებში. ე.რ. გალის რაიონში მოსწავლეებს ქართულ ენასა და ლიტერატურაში დამატებით ამზადებს. რეპეტიტორი ამბობს, რომ როგორც ქართულში, ასევე, ყველა სხვა საგანში იგრძნობა, რომ ბავშვები რუსულ ენაზე აზროვნებენ. “მათ უჭირთ, მაგალითად, როდესაც ეუბნები, რომ კონკრეტულ გვერდზე ნახონ დავალება. ამაზე შემხვედრი კითხვა არის, თუ როგორ იქნება ეს რიცხვი რუსულად” მისი თქმით, მოსწავლეებს უჭირთ ქართულ ენაზე გარკვეული სიტყვების გაგებაც. “როდესაც ბავშვი ვერ იგებს სიტყვას, მისთვის ყველაფერი უინტერესო ხდება. შექმნილია რთული გარემო როგორც მასწავლებლისთვის, ასევე მოსწავლისთვის. უჭირს მასწავლებელსაც, იმიტომ, რომ ძალიან დიდი დროის დახარჯვა უწევს ძალიან მარტივი თემისთვის და შემდეგ ამ თემის გაშლაც კი ვერ ესწრება. ფუნდამენტური საკითხებიც იმდენად ზედაპირულად იციან ბავშებმა, რომ მასზე რაიმეს დაშენება გიჭირს – ბაზისი არის ძალიან ცუდი”. მომავალში სიტუაციის ცვლილებას მასწავლებელი პესიმიზმით უყურებს: “სამწუხაროდ, მასწავლებელი მეტს ვერაფერს იზამს. ამ რთული, საშიში გარემოდან გამომდინარე, მასწავლებლები, პრაქტიკულად, მეტს ვერც გააკეთებენ მაშინ, როდესაც მშობლიურ ენაზე ხელმისაწვდომობა აქ არ არის და გადაადგილების თავისუფლების უფლებასთან ერთად ირღვევა ადამიანის ფუნდამენტური უფლება განათლების ხელმისაწვდომობის შესახებ. ეს არის კომპლექსური პრობლემა და განათლების სფეროში არსებული სიტუაცია ამ კუთხით არ მაძლევს ოპტიმიზმის საფუძველს”, – ამბობს ქართულის რეპეტიტორი. სკოლის დამთავრების შემდეგ გალის რაიონის სკოლის მოსწავლეები პრობლემის წინაშე დგებიან მაშინაც, როდესაც ქართული უნივერსიტეტების სტუდენტები ხდებიან. გ.ფ-მ 2018 წელს გალში რუსულენოვანი სკოლა დაამთავრა. რუსულენოვან სკოლაში კი მშობლებმა მეტი “პრესტიჟის” გამო შეიყვანეს. ამასთან, მოსწავლე ცდილობდა, ქართულის სწავლა არ შეეწყვიტა და მთელ თავისუფალ დროს უთმობდა. “მშობლებისგან სულ მესმოდა: “რა უნდა ვქნათ, ჩვენ აქ ვცხოვრობთ და სხვანაირად ვერაფერს ვიზამთ”. თუმცა მერვე კლასში, როდესაც ინტერნეტის გამოყენება უკეთ ვისწავლე, ისტორიას ჩავუღრმავდი, მივხვდი, რომ სრულიად სხვა სამყაროში ვცხოვრობდი და თავი მოტყუებულად ვიგრძენი. მეშვიდე კლასამდე სხვა ცხოვრებით ვცხოვრობდი და არა იმით, რითიც უნდა მეცხოვრა სინამდვილეში. პროტესტი გამიჩნდა. ვიგრძენი, რომ უნდა ვთქვა რაღაც ამ თემაზე, როდესაც მეცხრე კლასში მასწავლებლებმა დაიწყეს საუბარი- “თქვენ არ ისაუბროთ ქართულად ამ სკოლაში, ქართულად საუბარი არ შეიძლებაო”. აი, ამის მერე გამიჩნდა კითხვა, რომ რატომ არ შეიძლება ვისაუბრო ჩემს ენაზე. როდესაც მასწავლებლებს ამ თემაზე სიტყვას შევუბრუნებდი, ყოველთვის ან დირექტორთან მიშვებდნენ, ან ჩემს მშობლებს ურეკავდნენ და ამაზე სულ პრობლემა მექმნებოდა. მივხვდი, რომ პროტესტის გამოხატვით ვერაფერს მივიღებდი და დინებას მივყევი, რადგან მეგონა, რომ ამით შეიძლებოდა ჩემს მშობლებსაც რაღაც პრობლემა შექმნოდათ. თუმცა, როცა ვხედავდი, რომ სხვა სკოლებში ამ თემასთან დაკავშირებით ასევე გამოხატავდნენ პროტესტს, თუნდაც ფოტოებს რომ ტვირთავდნენ ქართული დროშით და ა.შ. ისევ ის რუტინა მეორდებოდა – დირექტორთან ასვლები, მშობლების გამოძახებები. მერე ისევ ჩემს მშობლებზე ვფიქრობდი”. ქართული ენის გარდა, გ.ფ-ს ერთიანი ეროვნული გამოცდების ჩასაბარებლად ისტორია და უნარებიც სჭირდებოდა, თუმცა გალის სკოლაში მხოლოდ ე.წ. “აფხაზეთის ისტორიას” სწავლობდნენ. “სხვებთან შედარებით ძალიან გამიჭირდა ქართული ენის და ისტორიის სწავლა. რუსულ სკოლაში სწავლის გამო ქართულ ენას ვერ ვუთმობდი იმდენ დროს, რამდენიც საჭირო იყო. როდესაც ჩავაბარე, რა თქმა უნდა, ისეთი ქულა ვერ ავიღე, რამდენიც სხვებმა აიღეს. ავიღე სულ 27 ქულა, სადაც ზღვარი იყო 24 ქულა. ჩემთვის, ისეთი ადამიანისთვის, სულ რომ კარგად ვსწავლობდი და ოქროს მედალზე დავამთავრე სკოლა, არ იყო მისაღები დაბალი ქულის აღება”. უნივერსიტეტში ჩაბარება ახალი გამოწვევა აღმოჩნდა მისთვის. გ.ფ. გვიყვება, რომ პირველი კურსის პირველი სემესტრი განსაკუთრებულად მტკივნეული იყო, რადგან მოხვდა “სრულიად სხვა სამყაროში”, სადაც ყველა ქართულად მეტყველებდა და წერდა. რასაც სხვა სტუდენტები ბევრად მარტივად აკეთებდნენ, მისთვის რთული იყო – ათასჯერ ამოწმებდა, როგორ უნდა დაეწერა სწორად. “ჩემს თანაკურსელებს შორის გალელები არ იყვნენ. სხვა ჯგუფში ვიყავი, სადაც მიჭირდა კომუნიკაცია, იმიტომ, რომ ქართულ ენას, თუნდაც ახლა, ვერ ვფლობ კარგად. რაღაც შეცდომებს ვუშვებ ხშირად. მაგრამ პირველი პერიოდი უფრო რთული იყო ჩემთვის, რადგან მეგონა, რომ რამეს თუ არასწორად ვიტყოდი, დამცინებდნენ და მეტყოდნენ, უი, შენ ქართული არ იცი, რატომ არ იცი, შენ ხომ ქართველი ხარ და ა.შ.” ქართული ენის საათების შემცირებაზე საუბრისას გ.ფ. ამბობს, რომ მათ, ვინც ახლა გადის ამ გზას, ცდილობს დაეხმაროს, რჩევები მისცეს, თუნდაც ურჩიოს, ვისთან მოემზადოს ქართულში და რა ელით მათ თბილისის უნივერსიტეტში. “ჩემი აზრით, ახლა გალის რაიონის დამამთავრებელი კლასების მოსწავლეებს რთული პერიოდი უდგათ, თუ ისინი შემდეგში გადაწყვეტენ აქ (თბილისში) სწავლას, რადგან უმეტესად ასე ხდება, ძალიან გაუჭირდებათ. ამავე დროს, იქ მცხოვრები ბავშვები და მშობლები ფიქრობენ, ვერაფერს ვიზამთ, ამაზე გავლენას ვერ მოვახდენთო. დინებას მიჰყვებიან. ჩვენ კი ყურადღებას არავინ გვაქცევს, არც იქ და არც აქ”. ნეტგაზეთი

2023 წლის ბოლო სამ თვეში „ქართულმა ოცნებამ“ 9.5 მილიონამდე ლარის შემოწირულება მიიღო - მმართველი პარტიის შემომწირველებთან დაკავშირებულმა თერთმეტმა კომპანიამ კი 2023 წლის მეორე ნახევარში 200 მილიონზე მეტი ლარის ოდენობის ტენდერი მოიგო,- ამის შესახებ „საერთაშორისო გამჭვირვალობა - საქართველოს“ მიერ გავრცელებულ ინფორმაციაშია აღნიშნული, სადაც ორგანიზაციას პოლიტიკური შემოწირულებების კვარტალური მონაცემები აქვს წარმოდგენილი. ინფორმაციის თანახმად, გასული წლის ბოლო კვარტალში მმართველი პარტიის მიერ მიღებული შემოწირულება 5-ჯერ მეტია, ვიდრე წინა სამ კვარტალში ჯამურად მიღებული და 13-ჯერ მეტი, ვიდრე ყველა სხვა პარტიის მიერ მიღებული შემოწირულება ჯამურად. სხვა ძირითადი მიგნებები კი ასეთია: „2023 წლის მე-4 კვარტალში „ქართული ოცნების“ მიერ მიღებული შემოწირულებების რაოდენობა მკვეთრად გაიზარდა და თითქმის 9,5 მილიონი ლარი შეადგინა, რაც ყველა პარტიის მიერ მიღებული შემოწირულების 93%-ია. ყველა ოპოზიციურმა პარტიამ ჯამში 700,000 ლარამდე ღირებულების შემოწირულება მიიღო; „ქართულმა ოცნების“ მიერ მიღებული შემოწირულება 13-ჯერ მეტია ვიდრე სხვა ყველა პარტიის ერთად აღებული; „ქართულ ოცნებას“ 284-მა პირმა შესწირა თანხა, სხვა ყველა პარტიას ჯამურად - 130-მა. დონორებთან დაკავშირებული კომპანიების შესყიდვებში და სახელმწიფო პროგრამებში მონაწილეობა - მმართველი პარტიის შემომწირველებთან დაკავშირებულმა თერთმეტმა კომპანიამ 2023 წლის მეორე ნახევარში 200 მილიონზე მეტი ლარის ოდენობის ტენდერი მოიგო, ამავე კომპანიებს 2013 წლიდან 1.7 მილიარდ ლარზე მეტი ღირებულების ტენდერი აქვთ მოგებული; „ქართული ოცნების“ დონორებთან დაკავშირებულმა 24-მა კომპანიამ 2023 წლის მეორე ნახევარში 616 ათასი ლარის ღირებულების გამარტივებული შესყიდვის კონტრაქტები მიიღო, 2013 წლიდან კი ამავე კომპანიებს 10 მილიონ ლარზე მეტი ღირებულების კონტრაქტები აქვთ მიღებული; ამავე პერიოდში ოპოზიციური პარტიების დონორებთან დაკავშირებულ არცერთ კომპანიას ტენდერი არ მოუგია, ხოლო გამარტივებული შესყიდვის კონტრაქტები სამ კომპანიას ჰქონდა მიღებული ჯამური ღირებულებით 15,000 ლარი; „ქართული ოცნების“ შემომწირველებთან დაკავშირებული 26 კომპანიას სახელმწიფო აგროპროგრამების ფარგლებში 2017-2021 წლებში ჯამში 22 მილიონ ლარზე მეტი დაფინანსება აქვთ მიღებული, ხოლო 2021-2022 წლებში რთვლის სუბსიდირების პროგრამის ფარგლებში ხუთ კომპანიას - 18 მილიონ ლარამდე“, - ნათქვამია ანგარიშში. დოკუმენტში ასევე საუბარია, სავარაუდოდ, მესამე პირების მეშვეობით განხორციელებული შემოწირულებებზეც და აღნიშნულია, რომ „მსხვილი ბიზნეს ჯგუფების დირექტორებისა და პარტნიორების გარდა, ხშირად მმართველი პარტიის დონორები კომპანიებში ისეთ პოზიციებზე დასაქმებული პირები არიან, როგორებიცაა ფინანსური ოფიცერი, გეოლოგი, მექანიკოსი, საამქროს უფროსი და ა.შ. და „ეს გარემოება აჩენს ეჭვს, რომ ისინი ფიქტიური დონორები არიან, რეალური შემომწირველი კი დაფარულია, რაც კანონდარღვევაა“. „ასეთი პრაქტიკა გამოიკვეთა RMG ჯგუფთან, „ანაგი“ ჯგუფთან, „ალიანსი“ ჯგუფთან, „ნექსთი“ ჯგუფში დასაქმებულ დონორებთან დაკავშირებით; ფიქტიური შემოწირულების ეჭვს აჩენს აგრეთვე დროის მცირე ინტერვალში ერთი ჯგუფის მიერ განხორციელებული შემოწირულებები, რომლებსაც ადგილი ჰქონდა შპს „ლილო-მოლთან“ დაკავშირებით, როდესაც კომპანიის წვრილმა მეწილეებმა ერთსა და იმავე დღეს მსხვილი თანხები შესწირეს მმართველ პარტიას“, - ნათქვამია გავრცელებულ ინფორმაციაში. პარტიებზე ზედამხედველობის საკითხთან მიმართებით კი დოკუმენტში აღნიშნულია, რომ ანტიკორუფციულმა სააგენტომ, 2023 წლის მე-4 კვარტალში, კანონიერების შემოწმების მიზნით შემოსავლების სამსახურიდან 350 პირის შესახებ გამოითხოვა ინფორმაცია, რომლებიც 11 სხვადასხვა პარტიის შემომწირველები იყვნენ - ფიზიკური პირებიდან 175 „ქართული ოცნების“ შემომწირველი იყო ხოლო 175 - სხვა პარტიების. რაც შეეხება საკანონმდებლო ცვლილებებს, დოკუმენტის თანახმად, 2023 წლის დეკემბრის საკანონმდებლო ცვლილებებით აიკრძალა იურიდიული პირების მიერ პარტიის სასარგებლოდ შემოწირულების განხორციელება; აგრეთვე, შემცირდა პარტიების მიერ წლის განმავლობაში გაღებული ხარჯების ზედა ზღვარი. ცვლილებები მეტწილად ფორმალური ხასიათისაა და ვერ აღმოფხვრის მმართველ პარტიასა და სხვა პარტიებს შორის არსებულ დიდ ფინანსურ უთანასწორობას. იპნ

გვირჩევნია, ოპოზიციაში დავრჩეთ, ვიდრე ნაციონალურ მოძრაობასთან შევქმნათ კოალიცია. „ნაციონალური მოძრაობა" ჩვენთვის წითელი ხაზია. რა ლოგიკასაც ჩვენს წინააღმდეგ ავითარებენ, მაგ ლოგიკით საკრებულოებში კოალიცია „ოცნებასთან" გვაქვს. მიშა დაუშვილი, საპარლამენტო პოლიტიკური ჯგუფი "საქართველოსთვის" წევრი. ვიდეო: https://www.facebook.com/ForGeoGe/videos/1465400681053765/

უკრაინის მარცხი ევროკავშირის ღირებულებებს საფრთხის ქვეშ დააყენებს, - ამის შესახებ ევროპული საბჭოს პრეზიდენტმა, შარლ მიშელმა განაცხადა. „უკრაინის მარცხი არ შეიძლება შესაძლებლობად განიხილებოდეს, რადგან ჩვენ ყველას გვესმის, სად მიგვიყვანს და რა შედეგები მოჰყვება ამას, თუ ეს მოხდება. ვერავინ იწინასწარმეტყველებს იმას, თუ როგორი შიდა ვითარება იქნება რუსეთში, მაგრამ ნათელია, რომ თუ უკრაინა ამ ომში დამარცხდება, ჩვენი ღირებულებები დიდი საფრთხის წინაშე აღმოჩნდება“, - განაცხადა ევროპული საბჭოს პრეზიდენტმა, შარლ მიშელმა. შარლ მიშელმა აღნიშნა, რომ ბოლო ორი წლის განმავლობაში ევროკავშირმა უკრაინის დასახმარებლად ბევრი რამ გააკეთა. „არსებობს ერთადერთი გეგმა A - მხოლოდ ერთადერთი - და ეს არის უკრაინის მხარდაჭერა. მე უკრაინაში მომხდარი მოვლენების ცენტრში ვიყავი. ბოლო წლებში ევროკავშირის 27 წევრთან ერთად გადაწყვეტილებების მიღების ცენტრში ვიყავი და უფრო ფართო გლობალური სიტუაციის გათვალისწინებით, ჩვენ ბევრი რამ გავაკეთეთ. საკმარისია თუ არა ეს? ჩვენ უფრო მეტი უნდა გავაკეთოთ, ჩვენ უკრაინის მხარდაჭერა უნდა გავაგრძელოთ, ჩვენ ის უნდა გავაკეთოთ, რაც საჭიროა“, - აღნიშნა შარლ მიშელმა. იპნ

რეალურად, ცვლილებები და ინიციატივები, რაც წარმოდგენილი აქვს “ოცნებას”, მე არ ვიტყვი, რომ ეს ყველაფერი უსარგებლოა და არ ვარგა. არ არის ეგრე, იქ არის კონკრეტული საკითხები, მათ შორის ორგანული კანონის პროექტში, რომელიც მისაღებია, - ამის შესახებ პარტია „საქართველოსთვის“ დეპუტატმა, მიხეილ დაუშვილმა ჟურნალისტებთან განაცხადა, რითაც პარლამენტში 9 რეკომენდაციის შესრულების თაობაზე დაგეგმილ სამუშაო შეხვედრას გამოეხმაურა. მისივე თქმით, “ქართული ოცნების” წარმოდგენილი ინიციატივები, რეალურად, ზედაპირულია და ძირეულად სისტემას არ ცვლის. “9 დათქმის შესრულება მნიშვნელოვანი კი არ არის, პირდაპირი მოვალეობაა ჩვენი, იმიტომ, რომ ეს აუცილებელი პირობაა იმის, რომ გადავიდეთ მოლაპარაკებების ეტაპზე. რეალურად, ცვლილებები და ინიციატივები, რაც წარმოდგენილი აქვს “ოცნებას”, მე არ ვიტყვი, რომ ეს ყველაფერი უსარგებლოა და არ ვარგა. არ არის ეგრე, იქ არის კონკრეტული საკითხები, მათ შორის ორგანული კანონის პროექტში, რომელიც მისაღებია. მაგრამ მთავარია, რომ ესენი ზედაპირული ცვლილებებია და ძირეულად სისტემას არ ცვლის. როდესაც შენმა მთავარმა სტრატეგიულმა მოკავშირემ 4 ადამიანი სასამართლო სისტემაში, ერთი ყოფილი და სამი მოქმედი დაგისანქცირა, მითუმეტეს მთავარი საფუძველი კორუფცია იყო, შენ ამ დროს ამ საკითხის აღმოსაფხვრელად ან იუსტიციის უმაღლესი საბჭოს ძირეული რეფორმების ჩატარების ნაცვლად გვთავაზობ იმას, რასაც გვთავაზობ, სამწუხაროდ, ეს ვერ ჩაითვლება მართლმსაჯულების სისტემის ძირეულ რეფორმად. ეს არის ჩვენი ხედვა, თორემ რა თქმა უნდა ამ შეხვედრებს დავესწრებით, საკითხებს გავივლით და ჩვენი ინიციატივებიც გვექნება”, - განაცხადა დაუშვილმა. ცნობისთვის, დღეს პარლამენტში, ევროკავშირის 9 ნაბიჯთან დაკავშირებით, შეხვედრა გაიმართება. ipn

აშშ-ის პრეზიდენტმა, ჯო ბაიდენმა რუსეთის პრეზიდენტ ვლადიმერ პუტინს გიჟი SOB-ი (son of bitch) უწოდა. ჯო ბაიდენმა კლიმატის ცვლილებებზე საუბრისას განაცხადა, რომ მსოფლიოს ჰყავს ვლადიმერ პუტინი და მისი მსგავსი ადამიანები, რომლის გამოც ყოველთვის უნდა აღელვებდეთ ბირთვული კონფლიქტის საფრთხე. ”ჩვენ გვყავს გიჟი SOB-ი, როგორიცაა პუტინი და სხვები და ჩვენ ყოველთვის უნდა გვაღელვებდეს ბირთვული კონფლიქტი, მაგრამ კაცობრიობის ეგზისტენციალური საფრთხე კლიმატია,” - აღნიშნა ბაიდენმა. ჯო ბაიდენს ვლადიმერ პუტინი არაერთხელ გაუკრიტიკებია. წარსულში და რუსეთის ლიდერის დასახასიათებლად გამოიყენა ისეთი სიტყვები, როგორიცაა მკვლელი, დიქტატორი, ჯალათი და ომის დამნაშავე. ipn

გასულ წელს, სიმთვრალის მდგომარეობაში ავტოსატრანსპორტო საშუალების მართვის 23 210 შემთხვევა გამოვლინდა - ამავე პერიოდში, დადგინდა სიჩქარის გადაჭარბების 1 მილიონ 303 032 ფაქტი, მათ შორისაა სიჩქარის გადაჭარბება სხვადასხვა დამამძიმებელ გარემოებაში და აღნიშნული დარღვევის განმეორებით ჩადენის შემთხვევებიც. რაც შეეხება 2023 წელს საგზაო მოძრაობის წესების დარღვევის გამო სხვა ადმინისტრაციულ სამართალდარღვევებს, შინაგან საქმეთა სამინისტროს სტატისტიკური მონაცემების თანახმად, ერთ წელში ტექნიკური ინსპექტირების გაუვლელობის 568 108 შემთხვევა გამოვლინდა. უფრო კონკრეტულად კი, ეს მონაცემი მოიცავს იმ ავტოსატრანსპორტო საშუალების მართვას ან სხვა პირისთვის სამართავად გადაცემა/საექსპლუატაციოდ გადაცემა/საექსპლუატაციოდ დაშვებას, რომელსაც პერიოდული ტექნიკური ინსპექტირება არ გაუვლია. გარდა ამისა, 2023 წლის 4 სექტემბრიდან, წლის ბოლომდე საქართველოს 4 დიდ ქალაქში - თბილისში, რუსთავში, ქუთაისსა და ბათუმში მოძრავი ავტოსატრანსპორტო საშუალებების გამონაბოლქვის დადგენილ ნორმასთან შეუსაბამობის სულ 4354 შემთხვევა გამოვლინდა, მათ შორისაა ფაქტები, როდესაც აღნიშნული დარღვევა პირს ადმინისტრაციული სახდელის დაკისრებიდან 15 დღის განმავლობაში განმეორებით დაუდგინდა. ამასთან, გასულ წელს BUS LANE-ზე სამარშრუტო სატრანსპორტო საშუალების გარდა სხვა სახის სატრანსპორტო საშუალების მოძრაობა, გაჩერება ან დგომის 152 340 შემთხვევა გამოვლინდა. უფრო კონკრეტულად აღნიშნული დარღვევის თაობაზე ადმინისტრაციულ სამართალდარღვევათა კოდექსის შესაბამისი მუხლი ითვალისწინებს შემდეგ სამართალდარღვევას: სამარშრუტო სატრანსპორტო საშუალების მოძრაობისათვის განკუთვნილ სპეციალურ ზოლში („BUS LANE“) სამარშრუტო სატრანსპორტო საშუალების გარდა სხვა სახის სატრანსპორტო საშუალების მოძრაობა, გაჩერება ან დგომა (გარდა მუნიციპალიტეტის წარმომადგენლობითი ორგანოს დადგენილებით განსაზღვრულ შემთხვევაში შესაბამისი კატეგორიის მსუბუქი ავტომობილის − ტაქსის (M1 კატეგორია) მოძრაობისა ან/და მგზავრთა ჩასხდომა-გადმოსხდომის მიზნით გაჩერებისა) ან სამარშრუტო სატრანსპორტო საშუალების მოძრაობისათვის განკუთვნილ სპეციალურ ზოლში („BUS LANE“) სამარშრუტო სატრანსპორტო საშუალების გაჩერების ადგილზე მსუბუქი ავტომობილის − ტაქსის (M1 კატეგორია) გაჩერება ან დგომა ან მსუბუქი ავტომობილის − ტაქსის (M1 კატეგორია) მიერ სამარშრუტო სატრანსპორტო საშუალების მოძრაობისათვის განკუთვნილი სპეციალური ზოლის („BUS LANE“) მონიშვნის უწყვეტი ხაზის გადაკვეთა. ipn

დამოუკიდებელი პროფკავშირის, „გილდიის“ განცხადებით, ახმეტელის სახელობის დრამატული თეატრიდან, დასაბუთებისა და წინასწარი გაფრთხილების გარეშე, სამსახურიდან გაათავისუფლეს 27 და 15-წლიანი სტაჟის მქონე 2 კაპელდინერი. თეატრის თანამშრომლები, გაურკვეველი მიზეზით, იანვარში გაათავისუფლეს. „გილდია“ აცხადებს, რომ საქართველოს შრომის კოდექსის მიხედვით, თუ შრომითი ხელშეკრულების ვადა 30 თვეზე მეტია, ან თუ შრომითი ურთიერთობა ვადიანი შრომითი ხელშეკრულების მიმდევრობით ორჯერ ან მეტჯერ დადების შედეგად გრძელდება და მისი ხანგრძლივობა 30 თვეს აღემატება, მიიჩნევა, რომ დადებულია უვადო შრომითი ხელშეკრულება. შესაბამისად მოცემულ შემთხვევაში ორივე კაპელდინერი თეატრში უვადოდ იყო დასაქმებული. ასევე შრომის კოდექსის მიხედვით, თეატრი ვალდებული იყო დასაქმებულებისთვის მიეთითებინა, მათი გათავისუფლების კონკრეტული საფუძველი, რაც ადმინისტრაციას არ გაუკეთებია. პროფკავშირის განცხადებით, ახმეტელის თეატრმა არ შეასრულა შრომის კოდექსით გათვალისწინებული კიდევ ერთი ვალდებულება. შრომის კოდექსით გათვალისწინებულია, რომ თუკი დასაქმებული 30 დღის ვადაში მოითხოვს მისი გათავისუფლების წერილობით დასაბუთებას, დამსაქმებელი ვალდებულია, ეს დასაბუთება გააცნოს 7 დღის ვადაში. თეატრმა კი არც ეს ვალდებულება შეასრულა და უპასუხოდ დატოვა დასაქმებულთა შეტყობინება. „ყოვლად მიუღებელია თეატრის აღნიშნული დამოკიდებულება და ყოველგვარი მიზეზის გარეშე სტაჟიანი თანამშრომლების სამსახურიდან გათავისუფლება, რაც სამართლებრივი ნორმების გარდა, მორალურ პრინციპებსაც არღვევს.

მოსკოვში, პრესის ჯიხურებიდან ამოიღეს გაზეთის სრული ტირაჟი, რომლის პირველ გვერდზეც ნავალნის ფოტო იყო გამოსახული. ამის შესახებ ინფორმაციას “მედუზა” ყოველკვირეულ გაზეთ “საბესედნიკის” ჟურნალისტზე დაყრდნობით ავრცელებს. ჯიხურებიდან სწორედ ეს გაზეთი ამოიღეს. ეს პრესის შეზღუდვის აპრობირებული მეთოდია ტოტალიტარულ რეჟიმებში. “მედუზას” ერთ-ერთმა მკითხველმა განუცხადა, რომ ვერ შეძლო გაზეთის ამ ნომრის ყიდვა, რადგან პრესის ჯიხურში უთხრეს, რომ მიიღეს ბრძანება ამ ნომრის გაყიდვის აკრძალვაზე. “საბესედნიკი” 1984 წლიდან გამოდის და “მედუზას” ცნობით, მის ვებგვერდს რეგულარულად ბლოკავს რუსეთის როსკომნადზორი. netgazeti

კრიმინალური მენტალიტეტი და საზოგადოებაზე მისი გავლენა – ასე ჰქვია კვლევას, რომლის შედეგები წამების მსხვერპლთა ფსიქოსოციალური და სამედიცინო რეაბილიტაციის ცენტრმა (GCRT) დღეს გამოაქვეყნა. კვლევის მიხედვით, ყოველი მე-5 ადამიანი საქართველოში სადავო საკითხების გადაწყვეტისას უპირატესობას კრიმინალურ სუბკულტურებს ანიჭებს. კვლევის მიხედვით, კრიმინალური სუბკულტურის მიმღებლობა უფრო მაღალია დასავლეთ საქართველოში, ვიდრე თბილისსა და აღმოსავლეთ საქართველოში. ურბანულ ჭრილში კი ამგვარი მენტალიტეტის მიმღებლობა უფრო დაბალია სოფლებში, ვიდრე ქალაქებში. კვლევის მიხედვით, გამოკითხულთა მხოლოდ 14%-მა იცოდა კრიმინალური სუბკულტურის მნიშვნელობა, რომ ეს გულისხმობს გარკვეული კრიმინალური ფასეულობების აღიარებას, გაზიარებას და კანონდარღვევას არ აქვს გადამწყვეტი მნიშვნელობა. გამოკითხულთა უდიდესმა ნაწილმა, 29%-მა კრიმინალური სუბკულტურა სისხლის სამართლის მძიმე დანაშაულთან დააკავშირა. 23%-ის აზრით კი, ადამიანი კრიმინალური სუბკულტურის ნაწილი ხდება ნებისმიერი კანონდარღვევის ჩადენის შემდეგ. კრიმინალური სუბკულტურების შესახებ ინფორმაციის მიღების ძირითად წყაროებად ტელევიზია და სოციალური ქსელები დასახელდა. გამოკითხულთა 27%-მა მათ საცხოვრებელ გარემოში კრიმინალის დონე შეაფასა როგორც “ძალიან მაღალი”, ან “მეტ-ნაკლებად მაღალი”. კვლევის მონაწილეები საუბრობენ კრიმინალის ზრდის ტენდენციაზე და მას ქალები უფრო მძაფრად აღიქვამენ, ვიდრე კაცები. პოლიცია გამოკითხულთა 24% თვლის, რომ პოლიციელები პასიურად, ან თითქმის არ მონაწილეობენ სამართალდარღვევების აღკვეთასა და პრევენციაში. მიზეზად ადამიანური რესურსის ნაკლებობა (14,6%), არაკვალიფიციური კადრები (14,5%) და ქვეყანაში არსებული შერჩევითი მართლმსაჯულება (15,4%) დასახელდა. ისინი, ვინც თვლიან, რომ პოლიციელები აქტიურად მუშაობენ საზოგადოებრივი უსაფრთხოების შესანარჩუნებლად (65%), ამის მაგალითებად ხშირ პატრულირებას (55%) და მოსალოდნელ კანონდარღვევებზე დროულ რეაგირებას (20%) ასახელებენ. კვლევის ფარგლებში კითხვა დაისვა სამართალდამცავ სტრუქტურებში მუშაობის მიმღებლობაზეც. გამოკითხულთა თითქმის მეხუთედი (19%) ფიქრობს, რომ პოლიციაში მუშაობა “არაპრესტიჟული”, ან “ძალიან არაპრესტიჟულია”. ოჯახის წევრის საპოლიციო სტრუქტურაში დასაქმების წინააღმდეგია მოსახლეობის 40%. როგორც საკუთარი, ისე ოჯახის წევრის პოლიციაში დასაქმებას უფრო მეტად კაცები ეწინააღმდეგებიან, ვიდრე ქალები, უფრო მეტად თბილისის მცხოვრებლები, ვიდრე რეგიონებში მცხოვრები მოსახლეობა. მიზეზად ისინი სიცოცხლისთვის საფრთხის რისკის შემცველ ფუნქცია-მოვალეობების შესრულების ვალდებულებასა (27%) და პოლიციის მიმართ საზოგადოებაში არსებული სკეპტიკური განწყობას (23%) ასახელებენ. დოკუმენტი მოამზადა სოციალური კვლევისა და ანალიზის ინსტიტუტმა (ISSI), იაგო კაჭკაჭიშვილის ხელმძღვანელობით. კვლევა კომპლექსურია და მოიცავს როგორც რაოდენობრივი, ისე თვისებრივი კვლევის მეთოდების კომბინირებულ გამოყენებას. რაოდენობრივი კვლევის ფარგლებში საქართველოს 11 რეგიონში (ოკუპირებული ტერიტორიების გარდა) ჩატარდა პირისპირი ინტერვიუები. მონაწილეობა მიიღო 15 წელზე მეტი ასაკის 1908 რესპონდენტმა. მიღებული მონაცემები რეპრეზენტატულია საქართველოს მასშტაბით – ცდომილება 2.2%-ის ფარგლებშია. თვისებრივი კვლევის ფარგლებში, 2023 წლის ივნისიდან ნოემბრის შუალედში, ჩატარდა 11 ფოკუს-ჯგუფი. ამ შემთხვევაში, კვლევის მონაწილეები იყვნენ სკოლის პედაგოგები, მანდატურები და ფსიქოლოგები, პრობაციის ეროვნული სააგენტოს სოციალური მუშაკები, არასამთავრობო სექტორის ექსპერტები, რომლებიც მუშაობენ არასრულწლოვანთა მართლმსაჯულების სფეროში. კვლევის ფარგლებში ექსპერტული ინტერვიუები აიღეს ბავშვთა განვითარების 2 ფსიქოლოგთან და 4 მოსამართლესთან. პრეზენტაციისას ავტორებმა აღნიშნეს, რომ მათი მცდელობის მიუხედავად, კვლევაში მონაწილეობა არ მიიღეს შსს-სა და პროკურატურის წარმომადგენლებმა. netgazeti

მართალია, თავად ამბობს, ჩემი მუშაობა განსაკუთრებულად არ მიმაჩნიაო, მაგრამ მისი მიდგომა საკითხებისადმი და უცვლელი ინტერესი სიახლისადმი, მის კვლევებთან ერთად, მზექალა შანიძეს ბევრი ნიშნით გამორჩეულ ფიგურად აქცევს ჩვენი ქვეყნის უახლესი ისტორიისთვის. ჩვენი საუბარი ბავშვობით დაიწყო, სადაც რა გასაკვირია, რომ მისი მთავარი ინტერესი წიგნი იყო: წიგნი – მთავარი ინტერესი ყოველთვის წიგნი იყო ჩემი ინტერესი. მე მგონი, რომ დავიბადე, პირველად წიგნებს შევხედე, ამიტომ ბავშვობაში ძალიან მიყვარდა წიგნების კითხვა. მართალია, სკოლაში რომ ვსწავლობდი, მათემატიკაც მემარჯვებოდა, მაგრამ წიგნს რომ გადაფურცლავ და წაიკითხავ, იქიდან მიღებული ინფორმაცია ჩემთვის მაინც სხვა არის. ბავშვობაში ვკითხულობდი იმასაც, რაც შეიძლებოდა და იმასაც, რაც არ შეიძლებოდა. აი, ასე თანდათანობით მივედი წიგნამდე და პროფესიამდე. რაც შეეხება ენების სწავლას, ინგლისური ასე შევისწავლე – მყავდა ინგლისელი მასწავლებელი, ძალიან კარგი ქალი იყო. პატარა რომ ვიყავი, დააპატიმრეს და გააქრეს. დამრჩა წიგნები, ამ წიგნებს ვკითხულობდი. რაც არ მესმოდა, ვტოვებდი, რაც მესმოდა კი, ვკითხულობდი და ასე უნებურად შევისწავლე ინგლისური ენა. როცა უნივერსიტეტში დავიწყე სწავლა, ფრანგულზე დავდიოდი და ასე რაღაცნაირად შემომესწავლა ეს ენები. უნივერსიტეტში ჩაბარება და ქალი მეცნიერის გამოცდილება უნივერსიტეტში სწავლა ომის დროს დავიწყე. აღმოსავლეთმცოდნეობის ფაკულტეტზე ჩავაბარე, უკეთ რომ ვთქვა, მე რომ დავიწყე სწავლა, აღმოსავლეთმცოდნეობის ფაკულტეტი არ იყო, ჩემი სწავლის დროს ჩამოაყალიბეს და იქ გადავედი, მაშინ მოდაში იყო და მეც მაინტერესებდა. ჩვენს ოჯახში არ ყოფილა ასეთი წინააღმდეგობა, დედაჩემსაც უნდოდა, რომ მესწავლა, მამაჩემი ბევრ რამეში ძველებური შეხედულების კაცი იყო და სიმართლე გითხრათ, მეცნიერად ქალებს კაცები ერჩივნა, მაგრამ რაკი ძალიან გავძალიანდი, ჩემთვის არაფერი უთქვამს და მერე მეც დავიწყე მუშაობა. საერთოდ რომ გითხრათ, ამ ბოლო ხანებში იმდენია ქალი მეცნიერი და პოლიტიკური მოღვაწე და იმდენი ვიცით მათ შესახებ, ვფიქრობ, ქალს არ უნდა უჭირდეს მეცნიერული მუშაობა, თუ სათანადო პირობები აქვს. ჩემს დროს არ იყო კარგი პირობები. ოჯახი მქონდა და შვილები მყავდა, ამის გამო რამდენჯერ ღამე მიკეთებია სადილი და მირეცხია სარეცხი, მაგრამ პრინციპულად ეს გულისხმობს ისეთ მინიმალურ ოჯახურ კომფორტს და ხელშეწყობას, რათა ზედმეტად არ აკეთო შავი სამუშაო და აკეთო უფრო სასარგებლო რამ. ბრძოლა სტერეოტიპთან მე მომიხდა ბრძოლა ისეთ სტერეოტიპთან… რომ თურმე ხუთებს არ ვწერ და სულყველას ვჭრი. ეს არ არის სიმართლე, მე არა მაქვს არავითარი მორალური უფლება, რომ თუ ადამიანს კარგი ნიშანი ეკუთვნის, იმას ის არ დავუწერო. ეს არის ოღონდ, როგორია ჩვენს სწავლებაში პრინციპი – რაში ვწერთ კარგ ნიშანს და რაში – არა. ვარლამ დონდუა იყო ცნობილი მეცნიერი, ივანე ჯავახიშვილის მეგობარი, მეც კარგად ვიცნობდი. ერთხელ უსაყვედურეს, თქვენ სტუდენტებს ნიშნებს დაბლა უწევთო. ახირებული ლაპარაკი იცოდა და უპასუხა – ჩვენ არ ვეკითხებით სტუდენტებს, როდის მოკვდა თამარ მეფე, ჩვენ ვეკითხებით – ხომ მოკვდა თამარ მეფე 1213 წელსო. როდესაც სწავლება მიმდინარეობს ამ პრინციპით – ხომ მოკვდა თამარ მეფე 1213 წელს – ჩემი თვალსაზრისით, ასეთი სწავლება არ არის სწორი და, სამწუხაროდ, ჩვენთან ხშირად დღესაც ასეა. მე როდესაც ვასწავლიდი, ჯერ კიდევ საბჭოთა კავშირი იყო, ნიშანს როცა არ დავუწერდი სტუდენტს, შეიქნებოდა ერთი ჰაი – ჰუი, დაიბარებდნენ სტუდენტს, ხელახლა ჩაუტარებდნენ გამოცდას, ხანდახან მე თვითონ არც კი დამასწრებდნენ ამ გამოცდას, რაც წესი არ არის. დაბოლოს, რაღაცას რომ იტყოდა – კაცო, რაღაც ხომ თქვა და დავუწეროთ ნიშანიო – ეს არ შეიძლება. დღევანდელი განათლების სისტემა ისეთი ქაოსია ჩვენს განათლების სისტემაში, არ ვიცი, როდის უნდა გამოვძვრეთ ამ ქაოსიდან. ორი უკიდურესობა გვაქვს: დღევანდელი ინფორმაციის სიმრავლე გვაძლევს საშუალებას, მივიღოთ ძალიან დიდი ინფორმაცია. ადამიანს თუ აქვს ამის სურვილი, ძალიან ბევრი შეუძლია ისწავლოს დამოუკიდებლად. შეიძლება სვანეთის რომელიმე სოფელში მოსწავლემ იცოდეს ისეთი რამ, რაც არ იცის ძალიან თავმოწონებულმა მოსწავლემ ქალაქში, მაგრამ ამისათვის საჭიროა სურვილი და მონდომება. ამიტომ გვაქვს ჩვენს მოსწავლე- ახალგაზრდობაში ასეთი სიჭრელე. არის ერთი ნაწილი, რომელიც კარგად არის ორიენტირებული, (როგორც ახლა იტყვიან), ბევრი რამ იცის, ისეთი რამ, რაც შესაძლოა, ჩვენ როცა მოსწავლეები ვიყავით, არ ვიცოდით, და არის მეორე ნაწილი, რომელმაც საერთოდ არაფერი არ იცის. ხელნაწერებთან ურთიერთობა ჩემი მუშაობა არ მიმაჩნია დიდ რამედ. არაფერი განსაკუთრებული არ შემიქმნია, მაგრამ ვცდილობდი, რასაც ვწერდი, ისეთ დონეზე ყოფილიყო, არ ეთქვათ – ეს რა დაუწერიაო. ხელნაწერთა ინსტიტუტში ვიყავი თანამშრომელი, საკმაოდ ბევრი მაქვს ნამუშევარი ხელნაწერებზე და უნდა გითხრათ, რომ ხელნაწერი ისეთი რამაა, ერთხელ რომ შეგეყრება მისი სენი, ვეღარ მოიშორებ, სულ იმას უყურებ. ძალიან დიდ ინფორმაციას იძლევა ხელნაწერი წარსულის შესახებ, ეს არ არის მხოლოდ დამწერლობების (ნუსხურია თუ მთავრული) ცოდნა. მინაწერები და სიძველე, როცა იცი, რომ ხელნაწერი არის 864 წლის, ეს სულ სხვა გრძნობაა. სინაზე როდესაც ვიყავი, ხელში მეჭირა ქართული უძველესი სინური მრავალთავი და ასე მეგონა, რომ თუ სადმე ქვეყანაზე რამე საუნჯეა, ის ახლა მე მიჭირავს ხელში – მეთქი. ეს სიყვარული არ ქრება?… რა თქმა უნდა. ახლის გაგების სურვილი არ ვიცი, რამდენად შემიძლია ფეხი ავუწყო თანამედროვეობას, მაგრამ იმის ინტერესი, რაც ხდება თუ მეცნიერებაში თუ სხვა დარგებში, არ დამიკარგავს. მახსოვს, ერთხელ მამაჩემმა ჩერჩილის მემუარები წაიკითხა. ის მემუარები, რომლებშიც ჩერჩილმა ნობელის პრემია მიიღო ლიტერატურაში და კმაყოფილებით თქვა, რამდენი რამე ვისწავლეო. ენობრივი თვალსაზრისით ძნელი წასაკითხი არ არის, მაგრამ იმდენი დეტალი, პიროვნება და სიტუაციაა განხილული, ჩვენ ხომ რკინის ფარდის უკან ვიყავით და ეს ყველაფერი არ ვიცოდით. აი, ეს სურვილი, რომ რაღაც ახალი გაიგო, მიუხედავად იმისა, რომ ლამის 100 წლისა ვარ, 98 წლისა ვარ, ვეღარ დავმალავ ამას, და მიუხედავად ამისა, ეს ინტერესი, რომ კიდევ რაღაც გავიგო, რა ხდება თუ მეცნიერებაში, თუ საერთოდ ქვეყანაზე, კიდევ შემრჩა. netgazeti

უკრაინისთვის ევროკავშირში გაწევრიანების მოლაპარაკებების ჩარჩო ზაფხულამდე არ იქნება მზად. შესაბამისი განცხადება ევროკომისიის პრეზიდენტმა ურსულა ფონ დერ ლაიენმა ბრიუსელში გამართულ ბრიფინგზე განაცხადა. ფონ დერ ლაიენმა აღნიშნა, რომ უკრაინის ევროკავშირში გაწევრიანების მოლაპარაკებების ჩარჩო ევროპულ პარლამენტში არჩევნებამდე არ იქნება მზად, რომელიც ივნისის დასაწყისში გაიმართება. “სკრინინგის პროცესზე შესანიშნავ პროგრესს ვაღწევთ. ეს ძალიან კარგია. და მოლაპარაკებების ჩარჩოებზე ვმუშაობთ. ჩემი საუკეთესო ვარაუდია, რომ ის ევროპულ არჩევნებამდე არ იქნება მზად, არამედ მას შემდეგ, ვინაიდან, მოლაპარაკებების სხვადასხვა პოზიციების განვითარებას ვხედავ. ეს დროს წაიღებს. მაგრამ ვფიქრობ, რომ დაახლოებით ზაფხულში, ზაფხულის დასაწყისში მზად ვიქნებით”, - განაცხადა ფონ დერ ლაიენმა. ცნობისთვის, ევროკომისიამ იანვარში დაიწყო უკრაინისთვის მოლაპარაკებების ჩარჩოს პროექტზე მუშაობა - დოკუმენტზე, რომელიც ევროკავშირში გაწევრიანების შესახებ მოლაპარაკებების წარმოების პრინციპებსა და პროცედურებს განსაზღვრავს. ipn

საქართველოსთვის მნიშვნელოვანია განაგრძოს და გააფართოოს შიდა რეფორმები, დაიცვას დემოკრატიული ღირებულებები, - ამის შესახებ ნატოს გენერალურმა მდივანმა იენს სტოლტენბერგმა საქართველოს-პრემიერ მინისტრ ირაკლი კობახიძესთან ერთად გამართულ პრესკონფერენციაზე განაცხადა. ნატო-ს გენერალურმა მდივანმა აღნიშნა, რომ ნატო საქართველოსთან ერთად დგომას განაგრძობს მისწრაფებების შესრულების პროცესში. “ნატო აგრძელებს უკრაინის მხარდაჭერას. მხოლოდ ბოლო დღეების განმავლობაში მოკავშირეებმა მილიარდობით ევროს ოდენობის სამხედრო დახმარების პაკეტების შესახებ გამოაცხადეს, მათ შორის საჰაერო დაცვისთვის, საარტილერიო ჭურვებისთვის და აღჭურვილობა F-16-ისთვის. ნატოს პარტნიორები, ასევე, საკვანძო როლს თამაშობენ და მივესალმები იმას, რომ საქართველო ჰუმანიტარულ და ფინანსურ დახმარებას აწვდის [უკრაინას] და ათასობით უკრაინელ დევნილს იფარებს. დღევანდელ შეხვედრაზე ჩვენ, ასევე, შევეხებით უსაფრთხოებას შავი ზღვრის რეგიონში, რომელიც ვიცი, რომ ძალიან მნიშვნელოვანია საქართველოსთვის. უკრაინის წინააღმდეგ რუსეთის ომი მნიშვნელოვან რისკებს უქმნის ნავიგაციის თავისუფლებას. ასევე, გავლენას ახდენს მსოფლიოს მასშტაბით საკვების უსაფრთხოებაზე. ასე რომ, მივესალმები ჩვენი მოკავშირეების ძალისხმევებს, რომლებიც შავი ზღვრის განაღმვაზე მუშაობენ, რათა უფრო უსაფრთხო გახადონ ნავიგაციისთვის და კომერციისთვის. ჩვენს დღევანდელ შეხვედრაზე, ასევე, განვიხილავთ, უფრო მეტად როგორ განვავითაროთ პარტნიორობა ნატო-სა და საქართველოს შორის. მივესალმები პროგრესს კრიზისების მენეჯმენტში, კიბერუსაფრთხოებაში, სამხედრო ინჟინერიასა და უსაფრთხო კომუნიკაციებში. ასევე, გილოცავთ, ევროკავშირთან კანდიდატის სტატუსის მოპოვებას. ახლა საქართველოსთვის მნიშვნელოვანია განაგრძოს და გააფართოოს შიდა რეფორმები, დაიცვას დემოკრატიული ღირებულებები. გვინდა ვნახოთ, რომ საქართველო ამ მიმართულებით მოძრაობს, მეტი დემოკრატიისკენ და კეთილდღეობისკენ, ევროატლანტიკურ ოჯახში სრულფასოვანი წევრობისადმი. ნატო თქვენთან ერთად დგომას განაგრძობს ამ მისწრაფებების შესრულების პროცესში”, - განაცხადა სტოლტენბერგმა ნატო-საქართველოს კომისიის სხდომის დაწყებამდე გამართულ ბრიფინგზე. იპნ