tvati

„საქართველოს ახალგაზრდა იურისტთა ასოციაციის" თავმჯდომარის ნონა ქურდოვანიძის განცხადებით, ე.წ. ვეტინგის სისტემა არის კეთილსინდისიერების შემოწმება და მექანიზმი იმისთვის, რომ მართლმსაჯულების სისტემა გაჯანსაღდეს. როგორც მან ჟურნალისტებს განუცხადა, ამ რეკომენდაციების შესრულების გარეშე, სამწუხაროდ, საქართველო ევროპასთან ინტეგრაციის პროცესში წინ ვერ წავა. „ეს არის კეთილსინდისიერების შემოწმების მექანიზმი, რომელიც ევროკომისიის რეკომენდაციებში გვხვდება. კეთილსინდისიერების შემოწმების მექანიზმი არის შესაძლებლობა იმისთვის, რომ მართლმსაჯულების სისტემა გაჯანსაღდეს. ამ რეკომენდაციების შესრულების გარეშე, სამწუხაროდ, საქართველო წინ ვერ წავა ევროპასთან ინტეგრაციის პროცესში. ეს ცალსახად წერია გაფართოების ანგარიშში, რომ საქართველომ კეთილსინდისიერების შემოწმების მიმართულებით უნდა შექმნას შესაბამისი მექანიზმი", - განაცხადა ქურდოვანიძემ. გარდა ამისა, მან სასამართლო სისტემაში არსებულ ძირითად გამოწვევებზე ისაუბრა. როგორც ნონა ქურდოვანიძე განმარტავს, ეს ეხება იუსტიციის უმაღლეს საბჭოს მოწყობის სისტემას, სასამართლოში გავლენის არსებობას და ა.შ. „ევროკომისიის ერთ-ერთი რეკომენდაცია არის სასამართლოს რეფორმა. სასამართლოს სიღრმისეული რეფორმა სჭირდება, მათ შორის ის მოდელი, რომელიც აქამდე განხორციელებულა, საკმარისი არ არის. ვიმედოვნებთ, ახლაც პარლამენტი გადადგამს შესაბამის ქმედით ნაბიჯებს იმისთვის, რომ გაჯანსაღდეს მართლმსაჯულების სისტემა, მათ შორის კეთილსინდისიერების შემოწმება არის ერთ-ერთი წამყვანი საკითხი, რომელიც ევროკომისიის რეკომენდაციებში გვხვდება“, - განაცხადა ქურდოვანიძემ. ipn

თუ სალომე ზურაბიშვილი სააკაშვილის შეწყალების გადაწყვეტილებას მიიღებს, ეს იქნება პირდაპირი საჩუქარი პერსონალურად ბიძინა ივანიშვილისთვის და „ქართული ოცნებისთვის“, - ამის შესახებ პარტია „საქართველოსთვის“ წევრმა ანა ბუჩუკურმა განაცხადა, რითაც გამოეხმაურა საქართველოს პრეზიდენტის, სალომე ზურაბიშვილის განცხადებას საქართველოს მესამე პრეზიდენტის, მიხეილ სააკაშვილის შეწყალებასთან დაკავშირებით. ამასთან, დეპუტატის თქმით, ბრიუსელში და ბერლინში გამართულ შეხვედრებზე მიხეილ სააკაშვილის, როგორც პოლიტიკოსის მიმართ ინტერესი, არ ყოფილა. „დავიწყებ იმით, რომ ზუსტად გუშინ დავბრუნდი ევროპიდან, ძალიან ბევრი შეხვედრა გვქონდა ჩვენ, ჩემი პირადი მონაწილეობით ბრიუსელში და ბერლინში. არცერთ ასეთ შეხვედრაზე ევროპული სახელმწიფოების ოფიციალურ წარმომადგენლებთან მიხეილ სააკაშვილის საკითხი არ დასმულა, უბრალოდ მიხეილ სააკაშვილის, როგორც პოლიტიკოსის მიმართ ინტერესი, არც ბრიუსელში და არც ბერლინში შეხვედრებზე არ ყოფილა. ეს არის ფაქტი და მოცემულობა. რაც შეეხება კონკრეტულად სალომე ზურაბიშვილს, მხოლოდ ერთს ვიტყვი, თუკი სალომე ზურაბიშვილი მიიღებს გადაწყვეტილებას სააკაშვილის შეწყალებასთან დაკავშირებით, ვთვლით, რომ მანდ ეს არ უნდა გააკეთებს, მაგრამ თუ ის ასეთ გადაწყვეტილებას მიიღებს, ეს იქნება პირდაპირი საჩუქარი პერსონალურად ბიძინა ივანიშვილისთვის და “ქართული ოცნებისთვის”, - განაცხადა ანა ბუჩუკურმა. ცნობისთვის, საქართველოს პრეზიდენტმა სალომე ზურაბიშვილმა Chatham House-ში ყოფილ პრეზიდენტ მიხეილ სააკაშვილთან დაკავშირებულ კითხვაზე პასუხის დროს განაცხადა, რომ „სააკაშვილის შეწყალების შესაძლებლობა მორალური გადაწყვეტილებაა, რომელსაც ჩემით მივიღებ, შეუძლებელია ამაზე გავლენის მოხდენა საგარეო ან შიდა ზეწოლით.” ამასთან, პრეზიდენტმა აღნიშნა, რომ სააკაშვილი ალექსეი ნავალნი არ არის. მან ისაუბრა სააკაშვილის მმართველობის პერიოდზე და განაცხადა, რომ ის პატიმრობაში "რეალური მიზეზით" არის, თუმცა, პრეზიდენტის თქმით, ეს არ ნიშნავს, რომ ჰუმანიტარული პერსპექტივა არ უნდა იყოს დაცული და ძალიან ახლოდან აკვირდება ყოფილ პრეზიდენტთან დაკავშირებულ ვითარებას. იპნ

„თავისუფალი და სამართლიანი არჩევნები დამოკიდებული არაა იმაზე, სად იქნება სააკაშვილი. ის არ არის პოლიტიკური ოპონენტი ციხეში, ის არ არის ნავალნი“, — განაცხადა საქართველოს პრეზიდენტმა სალომე ზურაბიშვილმა ლონდონში, Chatham House-ის საერთაშორისო საქმეთა სამეფო ინსტიტუტის მიერ ორგანიზებულ დისკუსიაზე, ექსპრეზიდენტის შესახებ დასმული კითხვის საპასუხოდ. მისი თქმით, სააკაშვილი სასჯელს იხდის რეალური დანაშაულებისთვის. „გეთანხმებით, რომ რეპუტაციული მიზნებისთვის უკეთესია, ის სადმე სხვაგან იყოს. ეს მთავრობის გადასაწყვეტია. არსებობს სხვადასხვა გზა, თუ როგორ წყვეტენ სხვა ქვეყნები ასეთ საკითხებს — არის შინაპატიმრობა; არის ექსტრადიცია — უკრაინამ გამოთქვა მზადყოფნა, თუმცა არ ვარ დარწმუნებული, რომ ოფიციალურად მოითხოვა ექსტრადიცია. ეს შესაძლებლობები არსებობს“, — განაცხადა ზურაბიშვილმა. ზურაბიშვილის თქმით, თავად მას მხოლოდ შეწყალების შესაძლებლობა აქვს, რაზეც კომენტარს არ გააკეთებს. „ეს მორალური გადაწყვეტილებაა, რომელსაც მე თვითონ ვიღებ და მარტო ჩემი თავის წინაშე ვარ პასუხისმგებელი. ეს არ არის საკითხი, რომელზეც ზემოქმედება შესაძლებელია საგარეო ან საშინაო ზეწოლით“, — დასძინა პრეზიდენტმა. ნეტგაზეთი

საქართველოსთვის კანდიდატის სტატუსის მინიჭებიდან მთავრობის რიტორიკა უეცრად შეიცვალა, დარწმუნებული არ ვარ, რომ ამისთვის სწორი ახსნა გამაჩნია. ამის შესახებ საქართველოს პრეზიდენტმა სალომე ზურაბიშვილმა Chatham House-ში დისკუსიის ერთ-ერთ კითხვაზე პასუხის დროს განაცხადა. პრეზიდენტის თქმით, მთავრობის "ორაზროვან პოზიციაზე" პასუხი არ აქვს, თუმცა კარგია, რომ რიტორიკა შეიცვალა. “არ ვიცი იმ კითხვაზე პასუხი, თუ რატომ არის [საქართველოს] მთავრობა ამ ორაზროვან პოზიციაში. დარწმუნების გარეშე თუ რამდენ ხანს გაგრძელდება, მაგრამ სანამ გრძელდება, მინდა აღვნიშნო და მხარი დავუჭირო ამას, რომ ევროკავშირის გადაწყვეტილებიდან [მიანიჭოს საქართველოს კანდიდატის სტატუსი] და ეს ამ გადაწყვეტილებების საოცრებაა, მთავრობის რიტორიკა უეცრად შეიცვალა. იმის გარდა, რომ საქართველოში, მთელს სპექტრზე, ყველა სრულიად პროევროპული გახდა, არამედ ახლა ყველა ამბობს, რომ ის იყო მთავარი ფაქტორი. რაც კარგია. ეს ერთია. ამ გადაწყვეტილებიდან და პრემიერ-მინისტრის ცვლილებიდან, ჩვენ ძალიან უცნაურ რაღაცებს ვხედავთ. კვლავ, არ მთხოვოთ ავხსნა, შემიძლია, ის გითხრათ თუ რას ვხედავ და როგორ ვახდენ ინტერპრეტაციას, მაგრამ დარწმუნებული არ ვარ, რომ სწორი ახსნა მაქვს”, - განაცხადა პრეზიდენტმა. ამასთან, პრეზიდენტის თქმით, ახალ პრემიერ-მინისტრს „ყველაზე ანტიდასავლური პროპაგანდისტული“ რიტორიკა ჰქონდა, მაგრამ შეიცვალა. “ახალი პრემიერ-მინისტრი გვყავს, ის ადამიანი, რომელმაც შარლ მიშელის დოკუმენტი უარყო, რომელსაც ყველაზე ანტი-დასავლური პროპაგანდისტული რიტორიკა ჰქონდა ბოლო წელიწად-ნახევრის განმავლობაში. და მოულოდნელად, როგორც ახალი პრემიერ-მინისტრი, ის პირველ რიგში ბრიუსელში მიდის და ამტკიცებს, რომ ძალიან მნიშვნელოვანია ბრიუსელი პირველი ვიზიტის ადგილი იყოს. თითქმის ყოველდღიურად ევროპელ ელჩებს იღებს, რათა თქვას თუ რამდენად მნიშვნელოვანია ამ 9 რეკომენდაციის იმპლემენტაცია. იღებს ამერიკელ ელჩს, რათა თქვას, რომ ჩვენს სტრატეგიულ პარტნიორ აშშ-სთან ურთიერთობები უნდა გავაღრმაოთ. თუ ეს არის ევროპული გადაწყვეტილების შედეგი, ვფიქრობ ამ ცვლილებაზე უნდა ვკონცენტრირდეთ და იმავე მიმართულებით გავაგრძელოთ. ასე რომ, ძალიან კარგია, რომ ამ ძალიან ნათელ პოზიციაზე ხარ”, - განაცხადა ზურაბიშვილმა. იპნ

ჩინეთი უფრო აქტიური ხდება საქართველოში, ახლა “სტრატეგიულ პარტნიორობაში” ვართ, არ ვიცი რას ნიშნავს ეს, მე ნუ მკითხავთ. ამის შესახებ საქართველოს პრეზიდენტმა სალომე ზურაბიშვილმა Chatham House-ში დისკუსიის დროს ჩინეთთან დაკავშირებით დასმულ კითხვებზე პასუხისას განაცხადა. სალომე ზურაბიშვილის თქმით, გარდა ამისა, ჩინეთი საკმაოდ აქტიურად არის ჩართული ინფრასტრუქტურულ პროექტებში, ამიტომაც საქართველოს დასავლელი პარტნიორებისგან მსხვილ ინფრასტრუქტურულ პროექტებში მეტი ჩართულობა სჭირდება. სალომე ზურაბიშვილმა ანაკლიის პორტის პროექტზეც ისაუბრა და აღნიშნა, რომ მას არსებითი მნიშნველობა აქვს, რადგან შავი ზღვის უსაფრთხოება გლობალურად ყველას ეხება. “ჩინეთი უფრო აქტიური ხდება საქართველოში. ეს ბოლო რამდენიმე წლის განმავლობაში მოხდა, მაგრამ უფრო და უფრო აქტიური გახდა. ახლა “სტრატეგიულ პარტნიორობაში” ვართ, არ ვიცი რას ნიშნავს ეს, მე ნუ მკითხავთ. ჩვენ, ასევე, გუშინ ჩინეთთან უვიზო რეჟიმი მივიღეთ. გარდა ამისა, ჩინეთი საქართველოში აქტიურია ბევრ ინფრასტრუქტურულ პროექტში, ვინაიდან იაფია, პატივს არ სცემს ბევრ კანონსა და შრომის უფლებებს, მაგრამ ეს იმიტომაც ხდება, რომ ჩვენი დასავლელი პარტნიორები ნაკლებად არიან ჩართულები. ალბათ, მეტი ჩართულობა გვჭირდება დასავლელი პარტნიორებისგან დიდ ინფრასტრუქტურულ პროექტებში. ერთ-ერთი მათგანი ძალიან მნიშვნელოვანია და ეს საკითხია, რომელსაც ჯერ არ შევხებივარ - ანაკლიის პორტი. მას არსებითი მნიშვნელობა აქვს, ვინაიდან, შავი ზღვრის უსაფრთხოება არის საკითხი, რომელიც, ალბათ, ყველას გვეხება სამომავლოდ. შავ ზღვაზე საქართველოს სანაპირო არსებითი მნიშვნელობის არის, რათა რუსეთს ექსკლუზივი არ ჰქონდეს შავი ზღვის თანამშრომლობაზე, ვაჭრობაზე, და ა.შ.”, - განაცხადა ზურაბიშვილმა. იპნ

თბილისში, ლილოს დასახლებაში, 21 წლის გოგოს მკვლელობაში ბრალდებული პირის დაკავებაზე შინაგან საქმეთა სამინისტრო ინფორმაციას ავრცელებს. უწყების ცნობით, დაკავებული გარდაცვლილის ნაცნობი, 21 წლის მამაკაცია და ის მომხდარიდან რამდენიმე საათში, ზუგდიდის მუნიციპალიტეტში დააკავეს. „შინაგან საქმეთა სამინისტროს თბილისის პოლიციის და სამეგრელო-ზემო სვანეთის პოლიციის დეპარტამენტების თანამშრომლებმა, ცხელ კვალზე ერთობლივად ჩატარებული ოპერატიული ღონისძიებებისა და საგამოძიებო მოქმედებების შედეგად, განსაკუთრებული სისასტიკით ჩადენილი განზრახ მკვლელობის ბრალდებით 2003 წელს დაბადებული ო.ც. დააკავეს. დანაშაული 16-დან 20 წლამდე ან უვადო თავისუფლების აღკვეთას ითვალისწინებს. გამოძიებით დადგინდა, რომ ბრალდებულმა თბილისში, ურთიერთშელაპარაკების ნიადაგზე ცივი იარაღის გამოყენებით, ნაცნობ ქალს - 2003 წელს დაბადებულ ქ.ჯ.-ს სასიკვდილო ჭრილობა მიაყენა და შემთხვევის ადგილიდან მიიმალა. სამართალდამცველებმა ჩატარებული საგამოძიებო მოქმედებების შედეგად, ო.ც. მომხდარიდან რამდენიმე საათში, ზუგდიდის მუნიციპალიტეტში დააკავეს. განსაკუთრებული სისასტიკით ჩადენილი განზრახ მკვლელობის ფაქტზე გამოძიება საქართველოს სისხლის სამართლის კოდექსის 109-ე მუხლის “მ” ქვეპუნქტით მიმდინარეობს“,- ნათქვამია უწყების მიერ გავრცელებულ ინფორმაციაში. იპნ

"ამნისტია ჰუმანური აქტია და თუ ის არის უსაფრთხო და საზოგადოების მხრიდან ნაკარნახევი ამ პროექტს მივესალმებით. ჩვენ უკომპრომისოები ვიქნებით სამოხელეო დანაშაულთან მიმართებით, ქვეყანაში ნარკოტიკების შემომტან, გამავრცელებელ და გადამზიდ ნარკობარიგებთან დაკავშირებით და უკომპრომისოები ვიქნებით მკვლელებთან მიმართებით. მოცემულ ამნისტიის პროექტს კონკრეტული პოლიტიკური პარტიის ინტერესი ეტყობა. ჩვენსა და სხვა პოლიტიკურ პარტიებს შორის ის განსხვავებაა, რომ ჩვენთვის პოლიტიკური ამნისტიის აქტი პოლიტიკური ვაჭრობის საგანი არ იქნება არასდროს." ბერდია სიჭინავა, პარტია "საქართველოსთვის" აღმასრულებელი მდივანი.

გახარია ემიგრაციაზე : ემიგრაციის მთავარი მიზეზი უსამართლო და უთანასწორო გარემოა. ამიტომ, აუცილებელია სამართლიანი გარემოს შექმნა, რათა ადამიანებს ღირსებაზე და ფასეულობებზე უარის თქმა არ მოუწიოთ

ბელგია უკრაინისთვის 800 000 საარტილერიო ჭურვის შესაძენად 200 მილიონ ევროს გამოყოფს. ამის შესახებ ბელგიის პრემიერ-მინისტრი ალექსანდრ დე კროო “ტვიტერის” პირად გვერდზე წერს. “ვერასდროს ვერ შევედრებით იმ მსხვერპლს, რაზეც უკრაინა ყოველდღიურად მიდის, მაგრამ შეგვიძლია პრეზიდენტ ზელენსკის მივცეთ ის, რასაც ითხოვს - მეტი იარაღის რუსი აგრესორისგან დაცვისთვის”, - წერს დე კროო. დე კროოს თქმით, ბელგია უკრაინისთვის 800 000 საარტილერიო ჭურვის შეძენის ჩეხეთის ინიციატივას 200 მილიონი ევროთი დააფინანსებს, რის შედეგადაც მომავალ კვირებში უკრაინაში მეტი საბრძოლო მასალა ჩავა. ცნობისთვის, აქამდე ჩეხეთის პრემიერ-მინისტრმა პეტრ ფიალამ განაცხადა, რომ ევროპის ფარგლებს მიღმა უკრაინისთვის საარტილერიო ჭურვების პრაღის ინიციატივას 15 ევროპული ქვეყანა უჭერს მხარს.

ადგილობრივების ინფორმაციით, ლილოს დასახლებაში, წინუბანში მოკლულ 21 წლის ქეთი ჯავახიშვილს ხელები მავთულით ჰქონდა შეკრული. როგორც ჟურნალისტებთან საუბარში ერთ-ერთი ადგილობრივი აცხადებს, სავარაუდო დამნაშავე იმავე დასახლების მცხოვრებია. ამასთან, ერთ-ერთი გავრცელებული ვერსიით, აღნიშნული პირი გოგონას ფულს სძალავდა. „მავთულით ჰქონდა ხელები შეკრული, დასახიჩრებული იყოო. მგონი, შინაურები არიან, ეჭვი აქვთ ახლომდებარე კორპუსში მცხოვრებზე, ფულს სძალავდა ის ბიჭი მგონი, ასეთი ლაპარაკი მიდის. ამ გოგოს ტელეფონი უპოვიათ გატეხილი, იმას [სავარაუდოდ დამნაშავეს] ეძებენ“, - აცხადებს მეზობელი. ცნობისთვის, წინუბანში, 21 წლის ქეთი ჯავახიშვილი მოკლული დღეს დილით, სახლთან ახლოს იპოვეს. გოგონას დაზიანებები ბლაგვი საგნით ჰქონდა მიყენებული და ორმოში იყო ჩაგდებული. არსებული ინფორმაციით, სავარაუდო დამნაშავე სამართალდამცავებს უკვე იდენტიფიცირებული ჰყავთ და მის დასაკავებლად სამეძებრო ღონისძიებები მიმდინარეობს. როგორც „ინტერპრესნიუსს“ შინაგან საქმეთა სამინისტროში განუცხადეს, გამოძიება სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს. ipn

“ოცნება” და “ნაციონალური მოძრაობა” რომ ჩავტოვოთ 50%-ს ქვემოთ, ამის გასაღები მხოლოდ გახარიას პარტიას უჭირავს.” გიორგი შარაშიძე, თბილისის საკრებულოს წევრი. ვიდეო: https://www.facebook.com/ForGeoGe/videos/370335359222478/

“არსებული კორუფციის პირობებში ჩვენ ვერ გვექნება სამართლიანი არჩევნები. თუ ჩვენ არ გვექნება სამართლიანი, კონკურენტული და თავისუფალი არჩევნები, ვერ გავხდებით ევროკავშირის წევრები.” გიორგი შარაშიძე, თბილისის საკრებულოს წევრი. ვიდეო: https://www.facebook.com/ForGeoGe/videos/435943342193585/

“როგორ წარმოგიდგენიათ, ადამიანი, რომელიც თვითონ არის კორუფციაში შემჩნეული, მის მიერ დანიშნული პირი გამოიძიებს იმის დეკლარაციებს? “ ზაზა თავაძე, თბილისის საკრებულოს წევრი. ვიდეო: https://www.facebook.com/ForGeoGe/videos/769579178062693/

"ნარკოლოგიური შემოწმების ვალდებულების გაუქმებაზე ის პოლიტიკური ძალა საუბრობს, რომელმაც 2021 წელს კობახიძე-კალაძის დაჯგუფების ორგანიზებით „კოკაინშიკობის“ ბინძური, ამორალური კამპანია წამოიწყო გიორგი გახარიას წინააღმდეგ. დღეს ეს ადამიანები გამოდიან და საუბრობენ, რომ ასეთი შემოწმება სახელმწიფო პოლიტიკური თანამდებობის პირებს არ უნდა მოეთხოვებოდეთ. წარმოუდგენელ სიბინძურეებს კადრულობდნენ მთელი ამ პერიოდის განმავლობაში." ბერდია სიჭინავა, პარტია "საქართველოსთვის" აღმასრულებელი მდივანი. ვიდეო: https://www.facebook.com/ForGeoGe/videos/1769602936878235/

ISFED-მა (სამართლიანი არჩევნებისა და დემოკრატიის საერთაშორისო საზოგადოება) საქართველოში ფეისბუქისა და ინსტაგრამის პლატფორმებზე განთავსებული პოლიტიკური რეკლამების დანახარჯები იკვლია. „მეტას“ რეკლამების ბიბლიოთეკის (ads library) მიხედვით, 2023 წლის 1 ოქტომბრიდან 29 დეკემბრის ჩათვლით პერიოდში ფეისბუქისა და ინსტაგრამის პლატფორმებზე საქართველოში მყოფი მომხმარებლებისთვის სოციალური/პოლიტიკური რეკლამა 846-მა გვერდმა განათავსა, 288-ით მეტმა, ვიდრე წინა კვარტალში. რეკლამების ბიბლიოთეკაში მოცემულ პერიოდში ამ გვერდების მიერ განთავსებული 8 139 რეკლამა იძებნება, რაც 2 927-ით მეტია, ვიდრე წინა კვარტალში განთავსებული რეკლამების რიცხვი. გამოქვეყნებული რეკლამების ჯამური ღირებულება 279 441 აშშ დოლარია, 113 606 დოლარით მეტი წინა კვარტალის დანახარჯებზე. ყველაზე მსხვილი სარეკლამო დანახარჯის მქონე გვერდები ISFED-ის თანახმად: „მეტას“ რეკლამების ბიბლიოთეკის მიხედვით, 2023 წლის 1 ოქტომბრიდან 29 დეკემბრის ჩათვლით პერიოდში ფეისბუქისა და ინსტაგრამის პლატფორმებზე სოციალური და პოლიტიკური საკითხების შესახებ რეკლამებისთვის სულ დახარჯული თანხის 56.7% ქვემოთ მოცემულ 15 გვერდზე მოდის. რეკლამებზე დახარჯული თანხის ოდენობით გამოირჩეოდა შერიგებისა და სამოქალაქო თანასწორობის საკითხებში სახელმწიფო მინისტრის აპარატის ოფიციალური ფეისბუქგვერდი, რომელმაც სოციალური მედიის პლატფორმაზე 16-ჯერ მეტი ღირებულების რეკლამა განათავსა, ვიდრე წინა კვარტალში. ISFED წერს, რომ წინა კვარტალთან შედარებით, გაიზარდა პარტია „ქართული ოცნების“ ოფიციალური გვერდის სარეკლამო დანახარჯიც. მმართველი პარტიის ფეისბუქგვერდზე რეკლამების უმეტესობა ირაკლი კობახიძის განცხადებებს, ბრიფინგებს, ვიზიტებსა და შეხვედრებს მიეძღვნა. პოლიტიკური გაერთიანება ფეისბუქზე, ასევე, ასპონსორებდა საინფორმაციო ბარათებს საქართველოს მთავრობის მიერ განხორციელებული ან დაგეგმილი პროექტების შესახებ. ირაკლი ღარიბაშვილის ოფიციალურ ფეისბუქგვერდზე, ძირითადად, დასპონსორებული იქნა პირდაპირი ვიდეოჩართვები, რომლებიც შეეხებოდა პრემიერ-მინისტრის თანამდებობაზე ყოფნისას გამართულ ორმხრივ შეხვედრებს, მთავრობის სხდომებს, ბრიფინგებს, კონფერენციებზე სიტყვით გამოსვლებს, პანელურ დისკუსიაში მონაწილეობასა და სხვა აქტივობებს. აგრეთვე, რეკლამის სახით განთავსდა იმგვარი ღონისძიებების ამსახველი ვიდეოჩართვებიც, რომელთა ხანგრძლივობა ერთ საათს აღემატებოდა. ასევე, მოკვლევის თანახმად, „მეტას“ ბიბლიოთეკაში მოცემული რეკლამების რაოდენობის მიხედვით, მონიტორინგის პერიოდში დასპონსორებულ პოსტებს ყველაზე აქტიურად ვატო შაქარიშვილის მიერ დაფუძნებული მოძრაობის „საქართველო უპირველეს ყოვლისა“ ფეისბუქგვერდი – Georgia First NEWS აქვეყნებდა. რეკლამირებული მასალები, ძირითადად, ანტიდასავლურ, ირიბად პრორუსულ, უკრაინის საწინააღმდეგო, ანტილიბერალურ და ჰომოფობიურ ნარატივებს შეიცავდა. რეკლამებში წარმოჩენილი იყო რუსეთისადმი დასავლეთის მიერ დაწესებული სანქციების არაეფექტურობა, რუსეთის ეკონომიკური მდგრადობა, ომში უკრაინის მარცხის ფაქტობრივი გარდაუვალობა, აშშ-სა და ევროკავშირის სახელმწიფოებში გენდერული და სექსუალური იდენტობის თავსმოხვევა და სხვა. გავრცელებულ მასალებში, განსაკუთრებით, შეინიშნებოდა აშშ-ის პრეზიდენტის, აგრეთვე, ევროკავშირისა და უკრაინის ლიდერების მადისკრედიტირებელი კამპანია, ხოლო პოზიტიური გზავნილები მიემართებოდა უნგრეთის პრემიერ-მინისტრ ვიქტორ ორბანს. ამავდროულად, დასავლეთი დადანაშაულებული იყო სხვა ქვეყნების შიდა პოლიტიკაში ჩარევაში, რის მაგალითადაც სერბეთში მიმდინარე საპროტესტო აქციები სახელდებოდა. გვერდზე განთავსებულ რეკლამებში მიუთითებდნენ, რომ მსგავსი სცენარის განხორციელება საქართველოშიც იყო დაგეგმილი. დასავლეთი საქართველოს რუსეთთან ომის მეორე ფრონტში ჩართვის მცდელობებშიც იყო დადანაშაულებული. საქართველოს შიდა პოლიტიკასთან დაკავშირებით კი რეკლამები ხელისუფლების მხარდამჭერ გზავნილებსაც შეიცავდა. პოლიტიკური პარტიებისა და მათი წარმომადგენლების გვერდებზე მონიტორინგის პერიოდში არანაკლებ 91 063 და არაუმეტეს 94 528 აშშ დოლარის ღირებულების რეკლამა განთავსდა. მმართველმა პარტია „ქართულმა ოცნებამ“ და მისმა წარმომადგენლებმა რეკლამებში უფრო მეტი თანხა (49 743-დან 50 832 აშშ დოლარამდე) დახარჯეს, ვიდრე ყველა სხვა პარტიამ და მათმა წარმომადგენლებმა ერთად აღებული (41 320-დან 43 696-მდე აშშ დოლარი).  მედიების სარეკლამო დანახარჯები „მეტას“ პლატფორმებზე „მეტას“ რეკლამების ბიბლიოთეკაში მონიტორინგის პერიოდში 133 მედიის გვერდზე განთავსებული 1 884 რეკლამა იძებნება, რომელთა ღირებულება 30 330-დან 42 111 აშშ დოლარამდეა. მათ შორის, 56 ქართული მედიის რეკლამებისთვის 30 253-დან 34 411-მდე აშშ დოლარი დაიხარჯა. საქართველოდან ფეისბუქისა და ინსტაგრამის მომხმარებლები წარმოადგენდნენ ჩინეთის სახელმწიფოს მიერ კონტროლირებული 19 მედიის გვერდის 74 რეკლამის ერთ-ერთ სამიზნეებსაც. თუმცა, მათზე დახარჯული თანხის ოდენობა 1 900 აშშ დოლარს არ აღემატებოდა. ქართულ მედიებს შორის „მეტას“ რეკლამებისთვის ყველაზე მეტი დანახარჯი ტელეკომპანიებმა „იმედმა“ და „პოს ტვ“-მ გასწიეს. ამ ორი ტელევიზიის მიერ დახარჯული თანხა აღემატება ყველა სხვა ქართული მედიასაშუალების ფეისბუქისა და ინსტაგრამის რეკლამების ჯამურ ღირებულებას. ამასთანავე, მათ, ივლისი-სექტემბრის პერიოდთან შედარებით, რეკლამებზე გაწეული ხარჯები მნიშვნელოვნად გაზარდეს. ოქტომბერ-დეკემბერში „მეტას“ პლატფორმებზე სარეკლამო დანახარჯების მნიშვნელოვანი ზრდა დაფიქსირდა „მაუწყებლისა“ და „მთავარი არხის“ შემთხვევაშიც. „ფორმულამ“, „ტაბულამ“ და „Pia.ge“-მ კი სარეკლამო ხარჯები მნიშვნელოვნად შეამცირეს. პუბლიკა

ოკუპანტებმა ქარელის მუნიციპალიტეტის სოფელ ტახტისძირის მიმდებარედ, ოკუპირებულ ტერიტორიაზე საქართველოს მოქალაქე დააკავეს. როგორც სახელმწიფო უსაფრთხოების სამსახურის განცხადებაშია აღნიშნული, ინციდენტის შესახებ ინფორმაციის მიღებისთანავე სახელმწიფო უსაფრთხოების სამსახურის მიერ გააქტიურდა ევროკავშირის სადამკვირვებლო მისიის მიერ ოპერირებული „ცხელი ხაზი“.

გაკვირვებული ვარ იმ ყურადღებით, რომელიც აქ აშშ-ის სახელმწიფო დეპარტამენტის შიდა მემორანდუმს დაეთმო, - ამის შესახებ საქართველოში აშშ-ის ელჩმა ჟურნალისტებს განაცხადა. რობინ დანიგანმა ენტონი ბლინკენის მიერ აშშ-ის სახელმწიფო დეპარტამენტის თანამშრომლებისთვის გამოქვეყნებული შიდა მემორანდუმის შესახებ დასმულ შეკითხვაზე საპასუხოდ აღნიშნა, რომ ამას საქართველოსთან კავშირი არ აქვს. „უნდა ვთქვა, რომ გაკვირვებული ვარ იმ ყურადღებით, რომელიც აქ აშშ-ის სახელმწიფო დეპარტამენტის შიდა მემორანდუმს დაეთმო, რადგან ეს არის შიდა მემორანდუმი აშშ-ის სახელმწიფო დეპარტამენტისთვის, რომელიც სახელმწიფო დეპარტამენტში მყოფ ადამიანებს ეხმარება სამუშაო ადგილზე უფრო ინკლუზიურები იყვნენ და ამ თემაზე სასაუბრო გზები იპოვონ. მე ვიტყოდი, რომ ამას საქართველოსთან კავშირი არ აქვს. იქ საქართველოსთვის არაფერია, მაგრამ რეალურად, ეს იმისთვის არის, რომ სახელმწიფო დეპარტამენტში მომუშავე ადამიანებს დაეხმაროს, უფრო ინკლუზიურები იყვნენ. რაც შეეხება ენას, ქართულ ენასაც არ აქვს გენდერის აღმნიშვნელი ნაცვალსახელები, ვფიქრობ, ეს საინტერესოა. მე ამაყი დედა, ამაყი და, ამაყი ცოლი ვარ და ვფიქრობ, ყველამ ის ენა უნდა გამოვიყენოთ, რომელიც სხვების პატივისცემას გამოხატავს“, - განაცხადა საქართველოში აშშ-ის ელჩმა, რობინ დანიგანმა. ინფორმაციისთვის, „ნიუ იორკ პოსტის“ ცნობით, ამერიკის შეერთებული შტატების სახელმწიფო მდივანმა ენტონი ბლინკენმა სახელწმიფო დეპარტამენტის თანამშრომლებს სთხოვა, თავი შეიკავონ გენდერული ტერმინებისგან როგორიც არის დედა, მამა, ცოლი, ქმარი. ბლინკენმა თანამშრომლებს შესთავაზა, სანაცვლოდ გამოიყენონ ისეთი ტერმინები, როგორის არის მშობელი, მეუღლე და ა.შ. გამოცემის ცნობით, ბლინკენმა თანამშრომლებს სთხოვა, გამოიყენონ გენდერულად ნეიტრალური ტერმინოლოგია, სადაც კი ეს შესაძლებელია, რათა გამოხატონ პატივისცემა და თავიდან აიცილონ გაუგებრობა. მან ასევე, გამოთქვა სურვილი, რომ თანამშრომლებმა თავად განსაზღვრონ მათთვის სასურველი ნაცვალსახელი მეილის წერისას ან შეხვედრებზე საკუთარი თავის წარდგენისას. ბლინკენის მემორანდუმში აღნიშნულია, რომ პიროვნების გენდერული მიკუთვნებულობის განსაზღვრა მისი სახელის ან გარეგნობის მიხედვით, შეიძლება პრობლემური იყოს, თუმცა ბლინკენმა ასევე განმარტა, რომ არავისზე ზეწოლა არ უნდა მოხდეს, რომ განსაზღვროს საკუთარი ნაცვლასახელი - He/Him, ის/მას – კაცი, She/Her ის/მას – ქალი და ა.შ. იპნ

პუტინი კრიმინალური დაჯგუფების ლიდერია. ამის შესახებ გარდაცვლილი რუსი ოპოზიციონერი პოლიტიკოსის, ალექსეი ნავალნის მეუღლემ, იულია ნავალნაიამ ევროპარლამენტში სიტყვით გამოსვლისას განაცხადა. „პუტინი კრიმინალური დაჯგუფების ლიდერია. პუტინმა ჩემი ქმარი ალექსეი ნავალნი მოკლა. მისი ბრძანებით, ალექსეი სამი წლის განმავლობაში აწამეს. მას პატარა საკანში აშიმშილებდნენ, გარე სამყაროსგან მოწყვეტილი იყო და ვიზიტების უფლება არ ჰქონდა. ამის შემდეგ მის სხეულსა და დედას მიაყენეს შეურაცხყოფა. პუტინს ყველაფერი შეუძლია. მასთან მოლაპარაკება შეუძლებელია“, - განაცხადა იულია ნავალნაიამ. ნავალნაიამ აღნიშნა, რომ პუტინმა პასუხი უნდა აგოს იმისთვის, რაც ალექსეი ნავალნის და მეზობელ ქვეყანას გაუკეთა. „ორი წლის წინ პუტინმა უკრაინის წინააღმდეგ სრულმასშტაბიანი სასტიკი ომი დაიწყო. უკრაინის დასახმარებლად მთელმა მსოფლიომ სწრაფად იმოქმედა. ორი წლის შემდეგ დაღლილობა დაგროვდა, ბევრი სისხლი დაიღვარა. პუტინი წინ არ წასულა, მაგრამ სანქციების მიუხედავად, მიუხედავად ფულისა, რომელიც მის შესაჩერებლად არის მიმართული, ომი გრძელდება. ისმის ხმები, რომლებიც პუტინთან მოლაპარაკებების შესახებ მოწოდებებს აკეთებენ. და შემდეგ, პუტინი ჩემს ქმარს, ალექსეი ნავალნის კლავს“, - აღნიშნა იულია ნავალნაიამ. დღეს, ევროპარლამენტში ნავალნის გარდაცვალების შესახებ რეზოლუციის პროექტზე დებატები დაიწყო. პროექტის ტექსტში ევროპარლამენტარები რუსი ოპოზიციონერის სიკვდილს მკვლელობას უწოდებენ და ევროკავშირს მოუწოდებენ, რომ ნავალნის მკვლელობაში დამნაშავე პირებს პასუხისმგებლობა დააკისროს. იპნ

ქართველებმა უნდა იცოდნენ, რომ მათი ხმები სამართლიანად არის დათვლილი, საარჩევნო პროცესი კი თავისუფალი და სამართლიანია, - ამის შესახებ საქართველოში აშშ-ის ელჩმა, რობინ დანიგანმა საქართველოს პარლამენტის საგარეო ურთიერთობათა კომიტეტის სხდომაზე სიტყვით გამოსვლისას განაცხადა. „მე რამდენიმე თქვენგანს არჩევნების შესახებ პირადად ვესაუბრე და ვიცი, რომ თქვენ იზიარებთ ჩვენს შეხედულებას იმასთან დაკავშირებით, რომ თავისუფალი და სამართლიანი არჩევნები დემოკრატიის ქვაკუთხედს წარმოადგენს. აშშ ყველა მხარესთან მუშაობას გააგრძელებს, თქვენთან პარლამენტში, მთავრობასთან, სამოქალაქო საზოგადოებასთან, ოპოზიციურ პარტიებთან და განსაკუთრებით, ცენტრალურ საარჩევნო კომისიასთან, რათა ქართველებმა იცოდნენ, რომ მათი ხმები სამართლიანად არის დათვლილი, მათ მიერ მიცემული ხმები ფარულია, პროცესი კი თავისუფალი და სამართლიანია“, - განაცხადა რობინ დანიგანმა. ipn

თბილისში, ლილოს დასახლების ტერიტორიაზე მკვლელობა მოხდა. როგორც „ინტერპრესნიუსისთვის“ გახდა ცნობილი, მოკლულია 20 წლის გოგო. არსებული ინფორმაციით, მკველობის მოტივი მეგობართან არსებული კონფლიქტია. როგორც "ინტერპრესნიუსს" შინაგან საქმეთა სამინისტროში განუცხადეს, გამოძიება სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს. იპნ

როგორ მუშაობს პოლიტიკური კორუფცია ქალაქ რუსთავის მაგალითზე.

პარტია „საქართველოსთვის" პოზიცია ამნისტიასთან დაკავშირებით. ვიდეო: https://www.facebook.com/ForGeoGe/videos/7154945844623512/

ილია თოფურიას, რომელიც ცოტა ხნის წინ UFC-ის ჩემპიონი გახდა, ესპანეთის მოქალაქეობას მიანიჭებენ, იტყობინება „მარკა“. დღეს, 27 თებერვალს, თოფურია ესპანეთის პრემიერმა, პედრო სანჩესმა მიიღო. თოფურიამ, რომელიც მრავალი წელია ესპანეთში ცხოვრობს, თუმცა ამ ქვეყნის მოქალაქეობა ჯერ არ აქვს, თქვა, რომ ჩემპიონობის შემდეგ მისი ოცნება ესპანეთის მოქალაქეობის მიღება იყო და უნდოდა, პრემიერისთვის მოქალაქეობის მინიჭება ეთხოვა. თოფურიას თქმით, ესპანეთის პრემიერს შეხვედრაზე მოქალაქეობა უნდა სთხოვოს „მარკა“ წერს, რომ პედრო სანჩესმა დააფასა თოფურიას „ძალისხმევა, თავგანწირვა და სიჯიუტე, რომელმაც იგი მიზნის მიღწევამდე მიიყვანა“. გარეკანის ფოტოზე: პედრო სანჩესი და ილია თოფურია, ჩემპიონის ქამრით. ნეტგაზეთი

რუსი პროპაგანდისტი, ვლადიმერ სოლოვიოვი ნანობს, რომ 2008 წელს რუსეთმა საქართველო არ დაიპყრო და მიიჩნევს, რომ ასეთ შემთხვევაში, რუსეთს დღეს სომხეთთან პრობლემები არ ექნებოდა. 25 თებერვლის გადაცემაში, რომელშიც სომხეთ-რუსეთის გაუარესებულ ურთიერთობებს განიხილავდნენ, სოლოვიოვმა განაცხადა: „არ იქნებოდა საზღვარი არც საქართველოსთან და არც სომხეთთან. [იქნებოდა ისე], როგორც უნდა იყოს“, – უპასუხა მას კოლეგა-პროპაგანდისტმა, მარგარიტა სიმონიანმა, რასაც სოლოვიოვიც დაეთანხმა. ბოლო დროს სომხეთი სულ უფრო და უფრო ცდილობს რუსეთისგან დისტანცირებას. ცოტა ხნის წინ სომხეთმა გაყინა თავისი წევრობა „ოდკბ“-ში, რუსეთის მიერ შექმნილ თავდაცვით ორგანიზაციაში. აგრეთვე, ერევანი შეუერთდა ჰააგის სასამართლოს. ამ ყველა ნაბიჯმა მოსკოვში უკმაყოფილება გამოიწვია. უახლეს ანგარიშში რუსეთის საგარეო უწყების შექმნილმა ფონდმა სომხეთის ირგვლივ რუსი ექსპერტების „განგაშზე“ განაცხადა. ნეტგაზეთი

რუსეთის საგარეო საქმეთა სამინისტროს მიერ დაარსებულმა ფონდმა „რუსული სამყარო“ [„რუსკი მირ“] 2023 წელს რუსეთისდამი მეგობრული/არამეგობრული ქვეყნების სია გამოაქვეყნა. საქართველო „შედარებით მეგობრულ ქვეყნადაა“ მიჩნეული. კვლევის თანახმად, შედეგები დამოკიდებულია 400 რუსი და უცხოელი ექსპერტის გამოკითხვაზე, კვლევის პერიოდში მომხდარ მოვლენებზე, სახელმწიფო დოკუმენტების ანალიზზე, მედიარესურსებსა და სახელმწიფოს ლიდერების განცხადებებზე. გამოქვეყნებული კვლევა ეხება მხოლოდ პოსტსაბჭოთა ქვეყნებს და ასევე, მოსკოვის მიერ ოკუპირებულ აფხაზეთსა და სამხრეთ ოსეთს, რომლებსაც კრემლში დამოუკიდებელ ქვეყნებად აღიარებენ. საქართველო ერთადერთი ქვეყანაა, რომელიც შედარებით მეგობრულად მიიჩნიეს. მეგობრული ქვეყნების სიას სათავეში ოკუპირებული სამხრეთ ოსეთი უდგას. მეორე ადგილზეა ბელარუსი, მესამეზე კი, ოკუპირებული აფხაზეთი. ამავე სიაში არიან შუა აზიის ქვეყნები – ყაზახეთი, ყირგიზეთი, უზბეკეთი, ტაჯიკეთი და თურქმენეთი. მეგობრულ ქვეყნებად კვლევაში მიჩნეულნი არიან აზერბაიჯანიც და სომხეთიც, თუმცა უკანასკნელი რუსი ექსპერტების „განგაშს იწვევს“. არამეგობრულ ქვეყნებად მიიჩნიეს უკრაინა, ლიეტუვა, ლატვია და ესტონეთი. ასევე, ამავე კატეგორიაში 2023 წელს მოხვდა მოლდოვა. ნეტგაზეთი