tvati

როგორ შეიძლება გამჭირვალობაზე საუბრობდეთ, როცა ორ საგამოძიებო კომისიას, ერთს სასამართლოებზე უარი უთხარით, ერთს კეზერაშვილის ქოლ-ცენტრებზე უარი უთხარით. კეზერაშვილის მიერ დაფინანსება არ შეიძლება იყოს მტრული? ივანიშვილის მიერ დაფინანსება არ შეიძლება იყოს ინტერესებისთვის შეუსაბამო? შესაბამისად დავაინიცირეთ "გრანტების შესახებ კანონში" ცვლილება, რომელიც პირდაპირ ადგენს გამჭირვალობის მაღალ სტანდარტს, თუ მართლა გამჭირვალება გადარდებთ, დაუჭირეთ ჩვენს ინიციატივას მხარი. ბექა ლილუაშვილი, საპარლამენტო პოლიტიკური ჯგუფი "საქართველოსთვის" თავმჯდომარე. ვიდეო: https://www.facebook.com/ForGeoGe/videos/795277385824345/

ჩვენი კანონპროექტი ემსახურება იმ მიზნის მიღწევას, რომ დღეს, ამ ქვეყანაში თუკი ვინმე საფრთხეს წარმოადგენს გარე ძალებიდან და ჩვენს ქვეყანას თუკი ვინმესგან დაცვა სჭირდება, ეს არის რუსეთი. ამიტომ, თუ მართლა უნდათ გარე ძალებისგან და მტრული სახელმწიფოებისგან ჩვენი ქვეყნის დაცვა, მაშინ უნდა მიიღონ ჩვენი შეთავაზებული კანონები. მიშა დაუშვილი, საპარლამენტო პოლიტიკური ჯგუფი “საქართველოსთვის” წევრი. ვიდეო: https://www.facebook.com/ForGeoGe/videos/940779677528532/

საჯარო მოხელეების დაყოფა „ნაცებად“ და „ქოცებად“ უნდა დასრულდეს. დავიცავთ კეთილსინდისიერ მოხელეებს ბულინგისგან და მოქალაქეებს - არაკეთილსინდისიერი მოხელეებისგან. ნათია მეზვრიშვილი, პარტია "გახარია საქართველოსთვის" თავმჯდომარის მოადგილე. ვიდეო: https://www.facebook.com/NatiaMezvrishvili25/posts/454841330397617

"დღეს, პარტიის „გახარია საქართველოსთვის“ საპარლამენტო გუნდმა პარლამენტის ბიუროს წარუდგინა „რუსული კანონის“ ალტერნატიული პროექტი „ოკუპანტი სახელმწიფოს - რუსეთის ფედერაციის გავლენებისგან დაცვის შესახებ“. დღესვე დავარეგისტრირეთ ცვლილებები კანონში გრანტების შესახებ, რომელიც საჭიროზე მეტ გამჭვირვალობას უზრუნველყოფს და უკარგავს ოცნებას ყოველგვარ საფუძველს მიიღოს რუსული კანონი. ჩვენს ამ ორ კონკრეტულ ინიციატივაზე უარი კიდევ ერთხელ ნათელს გახდის, რომ „ოცნების“ მიზანი სინამდვილეში არა გამჭვირვალობაა, არამედ საზოგადოებაში დაპირიპირების გამწვავება, ქვეყნის პარტნიორების მტრებად გამოცხადება და ამ მღვრიე წყალში არჩევნების როგორმე თავის სასარგებლოდ გამოყენებაა. ამ ტრიბუნიდან, პარლამენტის თითოეულ დეპუტატს, მათ შორის, „ოცნების“ თითოეულ იმ წევრს, რომელთაც ჯერ კიდევ შერჩათ უნარი - ემსახურონ არა პარტიას და ივანიშვილს, არამედ ქვეყანას და მის მომავალს, დეპუტატებს, რომლებიც ჯერ კიდევ განასხვავებენ ერთმანეთისგან საქართველოს მტრებსა და მეგობრებს, მოვუწოდებთ: მხარი დაუჭირონ ჩვენს კანონპროექტებს. გამოიყენონ ეს უკანასკნელი შანსი და ქვეყნისთვის ამ გადამწყვეტ მომენტში დადგნენ ისტორიის სწორ მხარეს! საქართველოს მოქალაქეებს კი შევახსენებთ, რომ არჩევნებამდე სულ რაღაც 7 თვე დარჩა და თქვენს ხელშია ყველაზე ძლიერი ინსტრუმენტი - ევროპას უთხრათ - კი, ხოლო რუსეთს - არა!" ანა ბუჩუკური, საპარლამენტო პოლიტიკური ჯგუფი “საქართველოსთვის” წევრი.

პოლიტიკური ჯგუფი „გახარია საქართველოსთვის“ პარლამენტს გრანტის მიმღები ორგანიზაციებისთვის დამატებითი ანგარიშგების მექანიზმებს სთავაზობს. მათ მიერ “გრანტების შესახებ“ კანონსა და “ბუღალტრული აღრიცხვის, ანგარიშგებისა და აუდიტის შესახებ“ კანონში მომზადებული ცვლილებებით, რაც “უცხოური გავლენის გამჭვირვალობის შესახებ“ კანონპროექტის კიდევ ერთი ალტერნატივაა, ნებისმიერი როგორც ქართული, ასევე უცხოური წყაროებიდან დაფინანსებული გრანტის მიმღები ვალდებული იქნება შესაბამის ორგანოს წარუდგინოს საქმიანობის წლიური ანგარიში საანგარიშო წლის დასრულებიდან სამი თვის ვადაში. წლიური ანგარიში უნდა მოიცავდეს ინფორმაციას გრანტის მიმღების მიერ საანგარიშო წლის განმავლობაში მიღებული თითოეული გრანტის შესახებ, მათ შორის გრანტის გაცემის მიზანი, მოცულობა და სხვა ძირითადი მოთხოვნების შესახებ, რომელიც ასახულია საგრანტო ხელშეკრულებაში. პროექტით, ანგარიშგებების წარდგენისა და ადმინისტრირების ცვლილებებით განსაზღვრულ ორგანოს ბუღალტრული აღრიცხვის, ანგარიშგებისა და აუდიტის სამსახური წარმოადგენს, რომელიც დღეის მდგომარეობით, ისედაც არაკომერციული იურიდიული პირების ფინანსურ ანგარიშგებებს იღებს. წარდგენილი ანგარიშგებები - გამოქვეყნდება საჯაროდ. “ცვლილებები არ ითვალისწინებს არანაირ რეგისტრაციას არანაირ რეესტრში და მითუმეტეს რაიმე იარლიყის მიწებებას ან გრანტის მიმღები ორგანიზაციების რაიმე ფორმით სახელდებას. მიდგომა არის საერთო, ყველა გრანტის მიმღები იურიდიული პირისთვის. შეიძლება გამონაკლისად დადგინდეს საგანმანათლებლო დაწესებულებები, სახელმწიფო გრანტის მიმღები და სხვ. პირები მთავრობის დადგენილებით“, - განმარტავს პოლიტიკური ჯგუფი“ საქართველოსთვის. უმრავლესობის პროექტის ალტერნატივად ასევე ინიცირებულია "ოკუპანტი ქვეყნის - რუსეთის ფედერაციის გავლენებისგან დაცვის შესახებ" პროექტი, რომელიც ბიუროს დღევანდელ სხდომაზე გავა. იპნ

"იმპერიალისტური რუსეთის ბუნებრივი პოლიტიკური ინტერესია საქართველო, როგორც სუსტი ქვეყანა და არა სახელმწიფო. ეს რუსული პოლიტიკური აზრის ფუნდამენტია სამხრეთ კავკასიაში. როცა ვამბობთ, რომ დასავლეთი ჩვენი სტრატეგიული პარტნიორია, იმას გულისხმობს, რომ დასავლეთის ინტერესია საქართველო იყოს, ძლიერი, განვითარებული სახელმწიფო. როგორი რთულიც არ უნდა იყოს, მტერსაც უნდა ველაპარაკოთ. როდესაც საქმე ეხება საქართველოსთვის ისეთ ეგზისტენციალურ თემას, როგორიც ტერიტორიული მთლიანობაა, ჩვენ ეს ლაპარაკი მოგვიწევს. ამ ხელისუფლების პირობებში არ ჩანს ურთიერთობების დალაგების პერსპექტივა, მხოლოდ ფულს აკეთებენ. რუსეთისთვის კორუმპირებული მთავრობა საჩუქარია, ევროპა კი ამ შემთხვევაში ღიად ასანქცირებს. ასე რომ, რუსეთისთვის მოსყიდული ხელისუფლება არის იარაღი, როგორ გააკონტროლონ მეზობელი სახელმწიფო. სამწუხაროდ, ასე ჰყავთ დამორჩილებული დღევანდელი ხელისუფლება." გიორგი გახარია, პარტია "გახარია საქართველოსთვის" თავმჯდომარე.

"ქართველი ხალხი დღეს არის ბევრად ევროპელი, ვიდრე დღევანდელი ხელისუფლება. ეს ხელისუფლება პრო ვისია, უკვე აღარ ვიცი. ადრე ვამბობდი პროთავისიანები არიან-მეთქი, მაგრამ, როგორც ჩანს, პანიკაში ჩავარდნილები იმდენ სისულელეს აკეთებენ, უკვე პროგნოზირებაც შეუძლებელია. რა თქმა უნდა ევროპული მომავლის კითხვის ნიშნის ქვეშ დაყენება ასე ადვილი არ არის, დაზიანება კი შესაძლებელია ასეთი გაუაზრებელი ნაბიჯებით, ეს კანონი კიდევ იმიტომ არის რუსული, რომ საზოგადოებას ორ ნაწილად ჰყოფს. კანონს გამოიყენებენ იმისთვის, რომ საზოგადოების ერთ ნაწილს დაარქვან უცხო ქვეყნის აგენტი, მეორე ნაწილს დაარქვან პაგტრიოტები. იგივე ხდებოდა სააკაშვილის ბოლო ჟამს. მას ყველგან რუსეთის აგენტები ელანდებოდა, ივანიშვილს ყველგან დასავლეთის აგენტები ელანდება. ამ კანონს როგორც კი მიაბამენ საარჩევნო კამპანიას და დაიწყებენ აღსრულებას, საზოგადოებისთვის ნათელი გახდება რა იყო ამ კანონის მიზანი." გიორგი გახარია, პარტია "გახარია საქართველოსთვის" თავმჯდომარე.

ხელისუფლებას არ მოსწონს რომ ამ კანონს ხალხი რუსულს ეძახის, რაც პირველ რიგში მათი ბრალია, რადგან ეს კანონი სამწუხაროდ თანაბარ მდგომარეობაში აყენებს ქვეყნის მეგობრებს და ოკუპანტს, - ამის შესახებ, პარტია "გახარია საქართველოსთვის" ლიდერმა, გიორგი გახარიამ განაცხადა. მისივე თქმით, "ოცნებამ" ფაქტობრივად პირობა დადო, რომ ეს კანონი ქართულ პოლიტიკურ დღის წესრიგში არასოდეს აღარ დაბრუნდებოდა და მოიტყუა. "ყოფილმა პრემიერმა, ახალმა პრემიერმა, ქართველ ხალხს და საერთაშორისო საზოგადოებას დაპირდნენ, რომ დღის წესრიგიდან ეს კანონი მოხსნილია და მოიტყუეს - მივიღეთ კანდიდატის სტატუსი და კანონი ისევ დააბრუნეს. ეს ქართველი ხალხის დაცინვაა, იმ ხალხის, ვინც აბსოლუტურად სწორად დაარქვა რუსული კანონი. ეს კანონი რუსულია იმიტომ, რომ ათანაბრებს მტერს და სტრატეგიულ პარტნიორებს. მაგალითად, ამ კანონის მთავარი ობიექტები არიან დასავლური ფონდები და მათ მიერ დაფინანსებული ორგანიზაციები. ბოლო 3 წლის განმავლობაში, განსაკუთრებით უკრაინასთან ომის პერიოდში, საქართველოში უზარმაზარი რუსული ფინანსებია განთავსებული. ვინმეს მოუვიდა აზრად გაეკონტროლებინა ეს ფინანსები? უამრავი ფირმა, უამრავი საბანკო ანგარიშები იხსნება, უამრავი უძრავი ქონების შეძენა ხდება ეს ვითომ არაფერი და ანტიდასავლური რიტორიკა მხოლოდ - მტრების ძებნა იქ, სადაც მეგობრებს უნდა ვეძებდეთ. ასე რომ ყველა ობიექტური მიზეზი არსებობს იმისთვის, რომ ამ კანონს ხალხმა რუსული დაარქვა.", - აღნიშნა გიორგი გახარიამ. 00:17 - რატომ დააბრუნა რუსული კანონი ივანიშვილმა და რატომ ჰქვია ამ კანონს რუსული? 05:43 - აქვს თუ არა ივანიშვილს რესურსი, რომ ეს საქმე მიიყვანოს ბოლომდე? 09:45 - და არის თუ არა რაიმე გზა გამჭირვალობისთვის რუსელი კანონის მიღმა?

„ქართული ოცნების" მიერ უცხოური გავლენის შესახებ კანონის ხელახლა დაინიცირებას საქართველოს დასავლელი პარტნიორები ეხმაურებიან. პირველი მამუკა მდინარაძის განცხადებას ლიეტუველი ევროპარლამენტარი პეტრას აუსტევიჩუსი გამოეხმაურა. სოციალურ ქსელ X-ში მან დაწერა, რომ საქართველოს მმართველი პარტია ევროპას ზურგს აქცევს და სახით ევრაზიული ტირანიისკენ ტრიალდება. https://twitter.com/petras_petras/status/1775431017978798106 საკუთარი აზრი გამოთქვა აშშ-ის სენატის საგარეო ურთიერთობათა კომიტეტის წევრმა ჯიმ რიშმაც, რომელმაც დაწერა, რომ ეს კანონი საქართველოში პოლიტიკურ პროცესს არასწორი მიმართულებით წაიყვანს და ქვეყნის ევროატლანტიკურ მომავალს საფრთხეს შეუქმნის. რიშს მიაჩნია, რომ საქართველოს პარლამენტმა ამ კანონპროექტს მხარი არ უნდა დაუჭიროს. https://twitter.com/senateforeign/status/1775646977167856013?s=46 სლოვაკი ევროპარლამენტარი მირიამ ლექსმანი კი წერს, რომ „ქართული ოცნება" ყველანაირად ცდილობს, დამალოს საკუთარი ქმედებები, თუმცა უკვე არავისთვისაა საიდუმლო, რომ საქართველოს მმართველი პარტის ევროპული მომავლის საბოტაჟს ეწევა. https://twitter.com/MiriamMLex/status/1775476803508773188 „ნაცვლად ძალიან საჭირო რეფორმების გატარებისა, "ქართული ოცნება" ისევ ცდილობს, გააჩუმოს სამოქალაქო საზოგადოება. ევროკავშირის კანდიდატის სტატუსის მიღების შემდეგ ეს პარტია კვლავ აჩვენებს თავის ნამდვილ სახეს",- ეს გერმანიის პარლამენტის წევრის, თომას კაკერის სიტყვებია. ამასთან, გერმანიის ბუნდესტაგის საგარეო საქმეთა კომიტეტის თავმჯდომარემ, მიხაილ როთიმ განაცხადა, რომ "აგენტების კანონის" ხელახლა წარდგენა ნდობის სერიოზული დარღვევაა და ერთხელ და სამუდამოდ უნდა მოიხსნას დღის წესრიგიდან. მისივე თქმით, "მმართველ პარტია "ქართულ ოცნებას" სრულიად არასწორად გაუგია რაღაც: საქართველოსთვის ევროკავშირის კანდიდატის სტატუსის მინიჭება იყო ნდობის გამოცხადება და არა ჯილდო. https://twitter.com/hacker_fdp/status/1775478696708579536 ევროპარლამენტის გერმანელი წევრი ვიოლა ფონ კრამონი კი კონკრეტულად პარლამენტის თავმჯდომარეზე, შალვა პაპუაშვილზე წერს. „ეს ის კაცია, რომელიც გერმანულ ორგანიზაცია „გიცს“ წლების განმავლობაში ჰყავდა დასაქმებული საქართველოში კანონის უზენაესობასთან დაკავშირებულ პროექტებზე. როგორ შეიძლება დასავლელი დონორები ასე შედიოდნენ შეცდომაში და ასაქმებდნენ ისეთ ადამიანებს, რომლებიც ყველაფერს აკეთებენ კანონის უზენაესობის დაცვის გარდა, არღვევენ პარლამენტში დეპუტატების უფლებებს და იცავენ რუსეთის ინტერესებს?“ - დაწერა ფონ კრამონმა სოციალურ ქსელში. https://twitter.com/ViolavonCramon/status/1775521763683602474 "ქართული ოცნების" ინიციატივაზე კომენტარი აშშ-ის სახელმწიფო დეპარტამენტის სპიკერმა, მეთიუ მილერმა გააკეთა. მისი თქმით, გასულ წელს ათიათასობით მოქალაქე გამოვიდა ქუჩებში ევროპული მომავლის დასაცავად და ამ კანონის გასაპროტესტებლად. მილერი აცხადებს, რომ საქართველოს ახლა ისტორიული შესაძლებლობა აქვს, გახსნას მოლაპარაკებები ბრიუსელთან, რასაც ვაშინგტონი კვლავაც მხარს უჭერს. სპეციალურ განცხადებას ავრცელებს ევროკავშირის უმაღლესი წარმომადგენლის პრეს-სპიკერი და აღნიშნავს, რომ "უცხოური გავლენის გამჭვირვალობის შესახებ" კანონპროექტის ხელახლა შემოტანა სერიოზულ შეშფოთებას იწვევს. "ევროკავშირი შეგახსენებთ საქართველოს მთავრობისა და მმართველი პარტიის გასული წლის საჯარო დაპირებას, ასეთი კანონპროექტის "უპირობოდ გაწვევის" შესახებ. ევროკავშირი წუხილს გამოთქვამს, რომ ის კვლავ განიხილება 2023 წლის მარტში საზოგადოების და საერთაშორისო მძაფრი რეაქციის მიუხედავად. სამოქალაქო საზოგადოების ორგანიზაციებისთვის ხელსაყრელი გარემოს შექმნა, შენარჩუნება და მედიის თავისუფლების უზრუნველყოფა დემოკრატიის საფუძველს წარმოადგენს. მას ასევე გადამწყვეტი მნიშვნელობა აქვს ევროკავშირში გაწევრიანების პროცესისთვის. ევროკავშირი შეგახსენებთ, რომ ევროპულმა საბჭომ საქართველოს კანდიდატის სტატუსი მიანიჭა იმის გათვალისწინებით, რომ ევროკომისიის 2023 წლის 8 ნოემბრის რეკომენდაციის შესაბამისი ნაბიჯები გადაიდგმებოდა. ნაბიჯი 9 მოიცავს რეკომენდაციას, რომ საქართველომ სამოქალაქო საზოგადოების თავისუფლად მუშაობა უზრუნველყოს და ნაბიჯი 1 მოუწოდებს საქართველოს ევროკავშირისა და მისი ღირებულებების წინააღმდეგ მიმართულ დეზინფორმაციას ებრძოლოს. გამჭვირვალობა სამოქალაქო საზოგადოების თავისუფალი მოქმედების შესაძლებლობის შეზღუდვის ინსტრუმენტად არ უნდა იქნას გამოყენებული. მოვუწოდებთ საქართველოს პოლიტიკურ ლიდერებს მიიღონ და განახორციელონ რეფორმები, რომელიც ევროკავშირში გაწევრიანების გაცხადებულ და საქართველოს მოქალაქეების დიდი უმრავლესობის მიერ მხარდაჭერილ მიზანს შეესაბამება. ევროკავშირი მოუწოდებს საქართველოს, დემოკრატიის, კანონის უზენაესობისა და ადამიანის უფლებების ხელშეწყობის კუთხით ნაკისრი ვალდებულებები შეასრულოს", - აღნიშნულია ევროკავშირის უმაღლესი წარმომადგენლის პრეს-სპიკერის განცხადებაში. globalnews.ge

ფინანსთა მინისტრის, ლაშა ხუციშვილის განცხადებით, საგადასახადო დავალიანებების ჩამოწერის თაობაზე მომზადებული პროექტი პარლამენტში უახლოეს მომავალში დაინიცირდება. როგორც მინისტრი განმარტავს, იგეგმება 2021 წლამდე წარმოქმნილი და აღიარებული საგადასახადო დავალიანებების ჩამოწერა, რომელიც ფიზიკურ პირებსა და ინდივიდუალურ მეწარმეებს გააჩნიათ. ხუციშვილის თქმით, განმსაზღვრელი ფაქტორი, რის გამოც აღნიშნული პერიოდი შეირჩა, საგადასახადო ხანდაზმულობა იყო. “ჯამში 145 ათასი პირია, რომელთა ჯამური საგადასახადო დავალიანება არის 590 მილიონ ლარი. აღნიშნული თანხა აღიარებული საგადასახადო დავალიანებების ფარგლებში ჩამოიწერება. გამომდინარე იქედან, რომ საგადასახადო ორგანოს აღსრულების ღონისძიებები ჰქონდა მიღებული, გადასახადო დავალიანების მქონე ფიზიკურ პირებს ეკონომიკურ საქმიანობაში მონაწილეობის უფლება ჰქონდათ შეზღუდული. მას შემდეგ, რაც პროექტს პარლამენტი დაამტკიცებს და მოხდება ჩამოწერა, მათ ეკონომიკურ ცხოვრებაში მონაწილეობის სრული შესაძლებლობა ექნებათ. ბოლო წლებში ეკონომიკური ზრდა საკმაოდ მაღალია, ეკონომიკის ზრდის ტემპი გრძელდება. ბოლო სამი წლის განმავლობაში არის ორნიშნა ეკონომიკური ზრდა. გასული ორი თვის განმავლობაში ეკონომიკური ზრდა 7.7%-ს შეადგენს, რაც მაღალი ეკონომიკური ზრდაა. 9.5%-იანი ეკონომიკური ზრდა დაფიქსირდა უშუალოდ თებერვლის თვეში, რაც სასიხარულოა. მნიშვნელოვანია, რომ ყველა ადამიანმა შეძლოს მონაწილეობა საქართველოს ეკონომიკის განვითარებაში“, - განაცხადა ლაშა ხუციშვილმა. იპნ

უკრაინის პრეზიდენტის, ვოლოდიმირ ზელენსკის განცხადებით, უკრაინა ეძებს შესაძლებლობას, რომ ხარკოვის ცა უფრო მეტად დაიცვას და პარტნიორებს მოუწოდა, უკრაინას საჰაერო თავდაცვის სისტემები გადასცენ. „ვეძებთ შესაძლებლობებს, რომ ხარკოვის ცა უფრო მეტად დავიცვათ - და ეს არის როგორც ყველა უკრაინელი სამხედროს, ასევე ყველა დიპლომატის ამოცანა - თითოეულისთვის და ყველასთვის, ვინც პასუხისმგებელია საერთაშორისო კომუნიკაციაზე, ვინც ყოველდღიურად უნდა იყოს დიალოგში პარტნიორებთან. აბსოლუტურად აშკარაა, რომ საჰაერო თავდაცვის სისტემები, რომლებიც გვაქვს უკრაინაში, არ არის საკმარისი - და ეს აშკარაა ყველა ჩვენი პარტნიორისთვის. მსოფლიომ საბოლოოდ უნდა გაიგოს ტკივილი, რომელსაც რუსი ტერორისტები აყენებენ ხარკოვს, კუპიანსკს, დონეცკს, ზაპოროჟიეს, სუმის და ბევრ ჩვენს სხვა უკრაინულ თემს“, - აღნიშნა ზელენსკიმ. მისი თქმით, მსოფლიოში არის საჰაერო თავდაცვის სისტემები, რომელსაც უკრაინის დახმარება შეუძლია. „მსოფლიოში არის საჰაერო თავდაცვის სისტემები, რომლებსაც შეუძლიათ დახმარება. ჩვენ მხოლოდ პოლიტიკური ნება გვჭირდება, რომ ეს სისტემები უკრაინას გადაეცეს“, - აღნიშნა ზელენსკიმ. მისი თქმით, „Patriot-ების ადგილი ახლა უკრაინაშია, რათა შემდგომში მათი გამოყენება, როგორც მინიმუმ, ნატო-ს მთელ აღმოსავლეთ ფლანგზე არ გახდეს საჭირო“. იპნ

არ შეიძლება ერთ ქვაბში მოხარშო და ერთი სახელდება მისცე მტრული სახელმწიფოების მიერ წარმოებულ კამპანიას და შენი მეგობრების მიერ განხორციელებულ მხარდაჭერას თუ დახმარებას. ამიტომ, რა თქმა უნდა არანაირ გამჭვირვალობაზე საკითხი არ დგას, მხოლოდ და მხოლოდ იმაზე თუ როგორ გახლიჩოს საზოგადოება. იმედი მაქვს, რომ ხვალ, ბიუროზე ეყოფათ გამბედაობა “ოცნების” წარმომადგენლებს, რომ პასუხი გაგვცენ იმაზე თუ აი ამ ალტერნატიულ კანონპროექტს რატომ ეუბნებიან უარს. ბექა ლილუაშვილი, საპარლამენტო პოლიტიკური ჯგუფი “საქართველოსთვის” თავმჯდომარე. ვიდეო: https://www.facebook.com/ForGeoGe/videos/7608588799177837/

დღეს, “ოცნება” ჩამოყალიბდა პოლიტიკურ ძალად, რომელიც ყველანაირ მიღწევას, ღირებულებას, ფასეულობას გადააყოლებს ერთ მარტივ ამოცანას, რომ მომდევნო არჩევნებზე ქვეყანაში არ დარჩეს არანაირი ლეგიტიმური ძალა, ინსტიტუტი, რომელიც ობიექტური შემფასებლის როლს შეასრულებს, არამარტო ქვეყნის შიგნით, არამედ ქვეყნის გარეთ. მე მაქვს ჩვენი საზოგადოების, საქართველოს მოქალაქეების იმედი და მე მათ მოვუწოდებ, რომ ყველამ ერთად რა თქმა უნდა, ჩვენ, ჩვენი სამოქალაქო პოზიცია უნდა გამოვხატოთ და მთავარი პასუხი ჩვენმა საზოგადოებამ ამ ხელისუფლებას უნდა გასცეს მომდევნო არჩევნრბზე, რამოდენიმე თვეში. ბექა ლილუაშვილი, საპარლამენტო პოლიტიკური ჯგუფი “საქართველოსთვის” თავმჯდომარე. ვიდეო: https://www.facebook.com/ForGeoGe/videos/7488167524581139/

ჩვენ ერთი რამე უნდა გვახსოვდეს, ყველა ჩვენთაგანს გვიჭირავს ყველაზე მძლავრი იარაღი- ჩვენი ჩართულობა არჩევნებზე. ჩვენ ერთად უნდა შევქმნათ პოლიტიკური პროცესები და დავაყენოთ შედეგი! ბექა ლილუაშვილი, საპარლამენტო პოლიტიკური ჯგუფი “საქართველოსთვის” თავმჯდომარე.

ჩვენ, ჩვენმა გუნდმა დავაინიცირეთ ალტერნატიული კანონპროექტი, რომელიც ხვალ გავა ბიუროზე და რომლის შინაარსიც არის ის, რომ- რეალური, ქმედითი ნაბიჯები გადაიდგას, მათ შორის საკანონმდებლო დონეზე, რომ ჩვენმა ქვეყანამ შეძლოს რუსული გავლენებისგან თავის დაცვა. მიშა დაუშვილი, საპარლამენტო პოლიტიკური ჯგუფი “საქართველოსთვის” წევრი.

"დღეს პარტია „გახარია საქართველოსთვის“, ბუროზე წარვადგენთ დამატებით კიდევ ერთ ალტერნატიულ კანონპროექტს, კერძოდ „ცვლილებებს გრანტების შესახებ საქართველოს კანონში“. არანაირი გამჭვირვალობა დღეს რეალურ მიზეზს რუსული კანონის ინიცირებისთვის არ წარმოადგენს, ყველანაირი ინფორმაცია აქვს ხელისუფლებას და აქვეყნებენ თავად ორგანიზაციები. ამასთან ჩვენი ცვლილებები, უზრუნველყოფს საჭიროზე მეტ გამჭვირვალობას, ვიმეორებ, საჭიროზე მეტ გამჭვირვალობას და სრულიად უკარგავს აქტუალობას ოცნების მიერ ინიცირებულ რუსულ კანონს. დღეს, როდესაც ოცნება გვატყუებს და გამჭვირვალობის არგუმენტით აინიცირებს რუსულ კანონს, ჩვენი ცვლილებები მათ სრულად აცლის მსგავსი მანიპულირების სივრცეს და ამ ცრუ არგუმენტს. ჩვენ მოვუწოდებთ ოცნების ყველა იმ წევრს, ვისაც ჯერ კიდევ შეუძლია ერთმანეთისგან საქართველოს ისტორიული მტრების და მეგობრების გარჩევა, მხარი დაუჭირონ ჩვენს ინიციტივებს, ორივე კანონპროექტს, რომლებიც ამ ქვეყანას ოკუპანტის გავლენებისგანაც დაიცავს და საჭიროზე მეტ გამჭვირვალობის სტანდარტს ამკვიდრებს ყველასთვის. Წინააღმდეგ შემთხვევაში, ივანიშვილი და „ოცნება“ უპირობოდ დაადასტურებენ იმას, რომ მათი მიზანი მეგობრების მტრებად გამოცხადება და ქართულ საზოგადოებაში განხეთქილების შეტანა, მოქალაქეების ერთმანეთთან დაპირისპირებაა. როგორც ჩანს, ივანიშვილს მხოლოდ ასე წარმოუდგენია მომავალ არჩვენებში გადარჩენა. Მოვუწოდებთ მთელს საზოგაოებას, მხარი დაუჭირონ ჩვენს საკანონმდებლო ინიციატივებს. კიდევ ერთხელ ვიმეორებ, ეს საკანონმდებლო ცვლილება, შექმნის საჭიროზე მეტ გამჭვირვალობას, ყოველგვარი იარლიყების გარეშე. " პარტია "გახარია საქარტველოსთვის"

პარლამენტის ბიუროს, 8 აპრილის სხდომაზე, ინიცირებისათვის "უცხოური გავლენის გამჭვირვალობის შესახებ" კანონის პროექტი წარედგინება. ბიურო მას განსახილველად პარლამენტის კომიტეტებს გადასცემს. კანონპროექტი ფრაქცია "ქართული ოცნების" სახელით არის რეგისტრირებული. ის შინაარსით გასულ წელს ინიცირებული და საპროტესტო აქციების შედეგად "ჩაგდებული" პროექტის ანალოგიურია. კანონპროექტი "გამჭვირვალობის უზრუნველყოფის მიზნით", უცხოური ძალის ინტერესების გამტარებელ ორგანიზაციად ისეთი არასამეწარმეო (არაკომერციული) იურიდიული პირებისა და მედიასაშუალებების რეგისტრაციას ითვალისწინებს, რომელთა შემოსავლის გარკვეული მოცულობა - კერძოდ კი, 20%-ზე მეტი - უცხოეთიდან არის მიღებული. კანონპროექტის მიხედვით, ყველა, ვინც "უცხოური ძალის ინტერესების გამტარებელ ორგანიზაციად" მოიაზრება, საჯარო რეესტრში სავალდებულო წესით ამავე სახელწოდების ბაზაში უნდა დარეგისტრირდეს. რეგისტრაციის დროს აუცილებელი იქნება მიღებული შემოსავლების ასახვა. ამავდროულად, ორგანიზაციებს საფინანსო დეკლარაციის ყოველწლიურად შევსების ვალდებულება ექნებათ. კანონპროექტი "უცხოური ძალის ინტერესების გამტარებელ ორგანიზაციის გამოსავლენად" იუსტიციის სამინისტროს უფლებამოსილებას ანიჭებს ნებისმიერ დროს კვლევა ჩაატაროს და საკითხის შესწავლა-მონიტორინგი განახორციელოს. ამავე პროექტით, მონიტორინგის დაწყების საფუძველი იქნება იუსტიციის სამინისტროს შესაბამისი უფლებამოსილი პირის გადაწყვეტილება და იუსტიციის სამინისტროსთვის წარდგენილი წერილობითი განცხადება, რომელიც "უცხოური ძალის ინტერესების გამტარებელ კონკრეტულ ორგანიზაციასთან დაკავშირებულ სათანადო მინიშნებას შეიცავს". უცხოური ძალის ინტერესების გამტარებელ ორგანიზაციად რეგისტრაციისთვის თავის არიდება ან დეკლარაციის არშევსება გამოიწვევს ორგანიზაციის დაჯარიმებას 25 ათასი ლარის ოდენობით. პროექტით ასევე გათვალისწინებულია შემდეგი სახის ჯარიმები: - იუსტიციის სამინისტროს ვებ-გვერდზე დაშვებიდან 10 სამუშაო დღის ვადაში, თუ ორგანიზაცია არ შეავსებს განაცხადის ფორმას - 10 ათასი ლარი; დოკუმენტებში ხარვეზების განსაზღვრულ ვადაში არგამოსწორების შემთხვევაში - 10 ათასი ლარი; კანონით გათვალისწინებული სამართალდარღვევის ერთი თვის შემდეგ ჩადენა - 20 ათასი ლარი. ipn

არასამთავრობო ორგანიზაციები მოუწოდებენ, „ქართული ოცნების“ ლიდერებს, რომლებიც წლების განმავლობაში საქმიანობდნენ საერთაშორისო ორგანიზაციებში, ქართველ ხალხს აუხსნან, ავალებდნენ თუ არა მათ უცხო სახელმწიფოს ინტერესის სასარგებლოდ მოქმედებას. არასამთავრობო ორგანიზაციები განცხადებაში აღნიშნავენ, რომ თავად მოქმედებენ და იმოქმედებენ საქართველოს მოქალაქეთა ინტერესების დასაცავად და საქართველოში დემოკრატიული საზოგადოებრივი წეს-წყობილების გასაძლიერებლად. „საზოგადოებისთვის ცნობილია, რომ "რუსული კანონის" ავტორი პარტიის წარმომადგენლები ათწლეულების განმავლობაში საქმიანობდნენ აშშ-ს და ევროკავშირის მიერ დაფინანსებულ ორგანიზაციებში. მათ შორის: - ირაკლი კობახიძე - 9 წლის განმავლობაში მუშაობდა აშშ-ისა და გაეროს ორგანიზაციებში; - შალვა პაპუაშვილი - 17 წელი მუშაობდა გერმანულ ფონდში; - გივი მიქანაძე - 10 წელი ევროსაბჭოს, ეუთოს, გაეროსა და ევროკავშირის დაფინანსებას იღებდა; - რატი იონათამიშვილი - 9 წელი ევროკავშირის, USAID და სხვა საერთაშორისო ფონდების დაფინანსებას იღებდა; - ნიკოლოზ სამხარაძე - 11 წელი მუშაობდა ევროკავშირისა და გაეროს პროგრამებში; - არჩილ თალაკვაძე - 3 წელი მუშაობდა აშშ-ის ორგანიზაციებსა და „სოროსის ფონდში“; - მაია ბითაძე - 15 წელი მუშაობდა გაეროს, ეუთოს, მსოფლიო ბანკის ორგანიზაციებში მათი ნაწილი, როგორც დონორი ორგანიზაციების წარმომადგენლები, ისე მუშაობდნენ ქართულ არასამთავრობო ორგანიზაციებთან მართლმსაჯულების, თანასწორობის, თვითმმართველობისა და სხვა საკითხებზე. დღეს ისინი აცხადებენ, რომ ის ორგანიზაციები, რომლებსაც წლების განმავლობაში თავად წარმოადგენდნენ, უცხო სახელმწიფოების ინტერესებით მოქმედებენ და საფრთხეს წარმოადგენენ საქართველოსთვის. შესაბამისად, მოვუწოდებთ მათ, ქართველ ხალხს საჯაროდ აუხსნან, ვინმე ავალებდათ თუ არა მათ უცხო სახელმწიფოს ინტერესის სასარგებლოდ მოქმედებას და თუ კი, დაასახელონ კონკრეტული შემთხვევები. ქართული არასამთავრობო ორგანიზაციები ვმოქმედებდით, ვმოქმედებთ და ვიმოქმედებთ საკუთარი წესდებებით გათვალისწინებული მიზნების მისაღწევად, საქართველოს მოქალაქეთა ინტერესების დასაცავად და საქართველოში დემოკრატიული საზოგადოებრივი წეს-წყობილების გასაძლიერებლად”, - წერია განცხადებაში. ხელმომწერი ორგანიზაციები არიან: „ადამიანის უფლებათა ცენტრი“; “ინფორმაციის თავისუფლების განვითარების ინსტიტუტი“; “მმართველობის მონიტორინგის ცენტრი“, მრავალპარტიული დემოკრატიის ცენტრი; მწვანე ალტერნატივა; საბჭოთა წარსულის კვლევის ლაბორატორია; პლატფორმა სალამ; სამართლიანი არჩევნებისა და დემოკრატიის საერთაშორისო საზოგადოება; სამოქალაქო საზოგადოების ფონდი; საფარი; საქართველოს ახალგაზრდა იურისტთა ასოციაცია; საქართველოს დემოკრატიული ინიციატივა; საქართველოს ევროპული ორბიტა; საქართველოს რეფორმების ასოციაცია; საქართველოს სასამართლოს გუშაგი; სოციალური კვლევისა და ანალიზის ინსტიტუტი; სოციალური სამართლიანობის ცენტრი; ქალთა ინიციატივის მხარდამჭერი ჯგუფი; წამების მსხვერპლთა ფსიქოსოციალური რეაბილიტაციის ცენტრი, Tbilisi Pride. IPN

შინაგან საქმეთა სამინისტრო ბოჭორმის ქუჩაზე, მაღაზია "ბეთლგრაუნდის" სასროლეთში მომხდარ აფეთქებასთან დაკავშირებით განცხადებას ავრცელებს. უწყების განმარტებით, აფეთქების შედეგად დაიღუპა შინაგან საქმეთა სამინისტროს ერთი თანამშრომელი და დაშავდა ორი. ამასთან, როგორც შსს-ში აღნიშნავენ, მომხდარზე გამოძიება საქართველოს სისხლის სამართლის კოდექსის 240-ე პრიმა მუხლის მესამე ნაწილით დაიწყო, რაც ელექტრო-ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს, რამაც ორი ან მეტი ადამიანის სიცოცხლის მოსპობა გამოიწვია. „შინაგან საქმეთა სამინისტროს თანამშრომლებმა თბილისში, ბოჭორმის ქუჩა N12-ში მაღაზია "ბეთლგრაუნდის" სასროლეთში მომხდარ აფეთქებაზე გამოძიება საქართველოს სისხლის სამართლის კოდექსის 240-ე პრიმა მუხლის მესამე ნაწილით დაიწყეს, რაც ელექტრო-ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს, რამაც ორი ან მეტი ადამიანის სიცოცხლის მოსპობა გამოიწვია. შემთხვევის ადგილზე მუშაობას აგრძელებენ, ექსპერტ-კრიმინალისტები, გამნაღმველები და სხვა შესაბამისი დანაყოფების თანამშრომლები. ასევე ადგილზე მუშაობენ, სხვადასხვა დარგის ექსპერტები-მათ შორის, სახანძრო და ფეთქებადსაშიში საგნების კვლევის სამსახურის ექსპერტები, ასევე ლევან სამხარაულის სახელობის ექსპერტიზის ბიუროს ენერგეტიკის მიმართულების ინჟინერ ექსპერტი. აფეთქების მიზეზების დასადგენად, გრძელდება საგამოძიებო მოქმედებები. ბოჭორმის ქუჩა N12-ში მაღაზია "ბეთლგრაუნდის" სასროლეთში მომხდარ აფეთქებაზე, შეტყობინების მიღებისთანავე შემთხვევის ადგილზე გამოცხადდნენ, მეხანძრე-მაშველები, საპატრულო პოლიციისა და კრიმინალური პოლიციის წარმომადგენლები. მეხანძრე-მაშველებმა შემთხვევის ადგილიდან ორი გარდაცვლილი და ოთხი დაშავებული გამოიყვანეს, რომელთაგან ერთი კლინიკაში გარდაიცვალა. გარდაცვლილთაგან ერთი შინაგან საქმეთა სამინისტროს თანამშრომელია. დაშავებული პირებიდან ორი მათგანი შინაგან საქმეთა სამინისტროს თანამშრომელია, ხოლო ერთი, მაღაზია "ბეთლგრაუნდის" თანამშრომელია. შინაგან საქმეთა სამინისტრო მწუხარებას გამოთქვამს მომხდარ ფაქტთან დაკავშირებით და უსამძიმრებს გარდაცვლილთა ოჯახებს“,-აღნიშნულია შსს-ის განცხადებაში. იპნ

აშშ-ის ჰელსინკის კომისიის სენატის ხელმძღვანელობა საქართველოს პარლამენტში „უცხოური გავლენის გამჭვირვალობის შესახებ“ კანონპროექტის თავიდან დაინიცირებას გამოეხმაურა. „ეს საქართველოს მყიფე დემოკრატიაზე მიზანმიმართული თავდასხმაა, მისი ევროპული კანდიდატურის თვითსაბოტაჟია და ქართველი ხალხის მიერ დიდი ძალისხმევით მოპოვებული ევროატლანტიკური არჩევანის აშკარა უარყოფაა. ეს კანონპროექტი რუსული კანონმდებლობით არის შთაგონებული და მისი მსგავსია. შემთხვევითი არ არის, რომ მისი თავიდან დაინიცირება რეგიონში მსგავსი კანონმდებლობის უფრო ფართო გავრცელების ფონზე ხდება. შემაძრწუნებელია, მაგრამ გასაკვირი არ არის ის, რომ „ქართული ოცნება“ ისევ ამ გზით წავიდა, მიუხედავად იმისა, რომ რუსეთი ქვეყნის ტერიტორიის 20%-ის ოკუპაციას აგრძელებს“, - ნათქვამია ჰელსინკის კომისიის განცხადებაში. „ჩვენ საქართველოს ხელმძღვანელობას მოვუწოდებთ, რომ ეს კანონპროექტი მიატოვოს და ლიბერალურ-დემოკრატიულ ტრაექტორიასა და მისი ხალხის ევროატლანტიკურ არჩევანს დაუბრუნდეს“, - აცხადებენ აშშ-ის ჰელსინკის კომისიის თანათავმჯდომარე, ბენ კარდინი და სენატორი, როჯერ ვიკერი. იპნ

სამტრედიაში ქმრის მკვლელობის ბრალდებით დაკავებულ ქალს მკვლელობის ბრალდება მოეხსნა, - ამის შესახებ ინფორმაციას დაკავებულის ადვოკატი მაგდა კოტრიკაძე ავრცელებს. მაგდა კოტრიკაძე წერს, რომ მკვლელი ქალის ძმა აღმოჩნდა და ახლა ქალს გამოძიება ცრუ ინფორმაციის მიწოდებას ედავება. "ქალს, რომელსაც ქმრის მკვლელობას აბრალებდნენ და ბრალი წარედგინა სსკ-ის 109- ე მუხლით, რაც გულისხმობს განზრახ მკვლელობას დამამძიმებელ გარემოებაში და 16-დან 20 წლამდე ან უვადო თავისუფლების აღკვეთას ითვალისწინებს, დღეს ბრალდება შეუცვალეს და ახლა ცრუ ჩვენებას ედავებიან - რატომ თქვი, რომ მე მოვკალიო", - აცხადებს ადვოკატი და აღნიშნავს, რომ ნატო ხელაძე მალე დატოვებს საპატიმროს. სასამართლო პროცესი გუშინ ქუთაისში გაიმართა. მოსამართლემ ქმრის მკვლელობის ბრალდებით დაკავებულს პატიმრობა შეუფარდა. სასამართლოზე დაკავებული აცხადებდა, რომ ქმარი მას არ მოუკლავს და მისმა ძმამ მოკლა. შემთხვევა სამტრედიაში 30 მარტს მოხდა. საქმეზე 29 წლის ქალი იყო დაკავებული.

„უცხოური გავლენის გამჭვირვალობის შესახებ“ კანონპროექტის თავიდან განხილვას სინანულით ვუყურებთ, - ამის შესახებ გერმანიის მთავრობის სპიკერის მოადგილემ, კრისტიანე ჰოფმანმა განაცხადა. „ჩვენ გარკვეული სინანულით ვუყურებთ იმას, რომ საზოგადოებისა და საერთაშორისო საზოგადოების მკაფიო რეაქციის მიუხედავად, კანონის განხილვა კვლავ ხდება“, - განაცხადა გერმანიის მთავრობის სპიკერის მოადგილემ, კრისტიანე ჰოფმანმა. „ქვეყანა ევროკავშირის რეფორმების გზაზე დგას და იცის, რომ პრესის თავისუფლება და დემოკრატია კავშირის ფუნდამენტური კომპონენტებია“, - აღნიშნა კრისტიანე ჰოფმანმა. გერმანიის ფედერალური მთავრობის სპიკერის მოადგილის, კრისტიანე ჰოფმანის ცნობით, 12 აპრილს გერმანიის კანცლერი, ოლაფ შოლცი საქართველოს პრემიერ-მინისტრს, ირაკლი კობახიძეს უმასპინძლებს და მხარეები ორმხრივი ურთიერთობების, ეკონომიკური, ევროპული და უსაფრთხოების პოლიტიკის საკითხებს განიხილავენ. ცნობისთვის, „უცხოური გავლენის გამჭვირვალობის შესახებ“ კანონპროექტი პარლამენტში 3 აპრილს ხელახლა დააინიცირეს. იპნ

ქუთაისში გაიმართა შეხვედრა მოქალაქეებთან. პარტია „გახარია საქართველოსთვის“ თავმჯდომარის მოადგილემ ნათია მეზვრიშვილმა და ქალთა ორგანიზაციის ხელმძღვანელმა ტატა ხვედელიანმა დაინტერესებულ მოქალაქეებს წარუდგინეს პარტიის პროგრამული ხედვა „სამართლიანი წესრიგი საქართველოსთვის“ და გააცნეს ქალთა ორგანიზაციის მიღწევები და სამომავლო გეგმები. მოქალაქეებს პარტიის წარმომადგენლებმა გააცნეს ხედვა კორუფციის (მათ შორის ელიტური/პოლიტიკური კორუფციის) წინააღმდეგ ბრძოლაზე. შეხვედრის ფარგლებში გაიმართა დისკუსია მართლმსაჯულების, კანონის უზენაესობის, დემოკრატიის, არჩევნების, ქალთა პოლიტიკური მონაწილეობის და სხვა მნიშვნელოვან საკითხებზე. ინფორმაციას პარტია "გახარია საქართველოსთვის" ავრცელებს.

ღარიბაშვილის მიერ შექმნილი ანტიკორუფციული ბიუროს შემოწმებასაც კი ვერ გაუძლო მურუსიძე-ჩინჩალაძის ჯგუფმა და რა გააკეთეს? აბსურდი, თავისივე კონტროლქვეშ მოსამართლეებთან წარადგინეს სარჩელი და მოითხოვეს ანტიკორუფციული ბიუროს მიერ მათი დეკლარაციების შემოწმება. ზაზა თავაძე, თბილისის საკრებულოს წევრი. ვიდეო: https://www.facebook.com/ForGeoGe/videos/437756455381621/

ევროკავშირისკენ გზაზე საქართველოს მხრიდან რეგრესული პროცესების შემთხვევაში, ევროკომისიამ გაფართოების პროცესს უნდა გადახედოს, - ამის შესახებ 22 ევროპარლამენტარი ერთობლივ წერილში აცხადებს. „ჩვენ, ხელმომწერი ევროპარლამენტარები, ღრმა მწუხარებას გამოვთქვამთ მმართველი „ქართული ოცნების” პარტიის მიერ “უცხოურ აგენტებზე” კანონის დაბრუნების ზრახვასთან დაკავშირებით, რომელიც გასულ წელს ქართულმა საზოგადოებამ მასიური პროტესტებით უარყო. საქართველოს ევროკავშირის კანდიდატის სტატუსი 2023 წლის დეკემბერში მიენიჭა იმ პირობით, რომ ევროკომისიის მიერ დადგენილი შესაბამისი ნაბიჯები შესრულდებოდა. “უცხოურ აგენტებზე” შემოთავაზებული კანონი, რომელიც ასევე ცნობილია როგორც “უცხოური გავლენის გამჭვირვალობაზე” კანონი, ამ ნაბიჯებიდან როგორც მინიმუმ ორს არღვევს: მე-9 ნაბიჯს, რომელიც მოუწოდებს, რომ სამოქალაქო საზოგადოება თავისუფლად უნდა მოქმედებდეს, და ჩართული იყოს საკანონმდებლო და პოლიტიკური გადაწყვეტილებების მიღების პროცესებში, და 1-ელ ნაბიჯს, რომელიც ევროკავშირისა და მისი ღირებულებების წინააღმდეგ მიმართულ დეზინფორმაციასთან ბრძოლისკენ მოუწოდებს. “უცხოურ აგენტებზე” ან “უცხოური გავლენის გამჭვირვალობაზე” კანონი ევროკავშირის ღირებულებებსა და დემოკრატიულ პრინციპებს არ შეესაბამება, და საქართველოს ევროკავშირის წევრობის ამბიციებს ეწინააღმდეგება. საქართველოს ოფიციალურ პირებს მოვუწოდებთ სამოქალაქო საზოგადოების ორგანიზაციების, მათ შორის მედიის, გამჭვირვალობასა და ანგარიშვალდებულებაზე ევროკავშირის პრაქტიკებს გაყვეს, და არა რუსეთის და სხვა ავტორიტარული ქვეყნების, რომლებიც სამოქალაქო საზოგადოებისა და თავისუფალი მედიის კონტროლს, რეპრესირებას და საბოლოო ჯამში დაშლას ისახავენ მიზნად… ჩვენ ასევე მოვუწოდებთ ევროკომისიას მონიტორინგი მოახდინოს საქართველოს ოფიციალური პირების ასეთი გადაწყვეტილებები შეესაბამება თუ არა კანდიდატი ქვეყნის სტატუსს და დროულად მოახდინოს შეფასება. ჩვენ გვესმის და მხარს ვუჭერთ ფაქტს, რომ ევროკავშირისკენ გზაზე საქართველოს რეგრესიული პროცესების შემთხვევაში ევროკომისიას შეიძლება გაფართოების პროცესის თავდაპირველ პოზიციებზე დაბრუნება მოუწიოს,” - წერია განცხადებაში. განცხადების ხელმომწერები არიან ევროპარლამენტარები: პეტრას აუსტრევიჩუსი, მირიამ ლექსმანი, სვენ მიქსერი, ვიოლა ფონ კრამონი, ანა ფოტიგა, ანდრიუს კუბილიუსი, კარინ კარლსბრო, ფრანსუა თიოლე, კატალინ ჩე, ანა ჯულია დონათი, ანდრეი კოვაჩევი, ჰილდე ვაუტმანსი, მიჰაელა შოიდროვა, მაიკლ გალერი, რეინჰარდ ბუტიკოფერი, რამონა სტრუგარიუ, იოზეფ მიჰალი, მარეკ პაველ ბალტი, რასა იუკნევიჩიენე, ატილა არა-კოვაჩი, ნაჩო სანჩეზ ამორი და ისაბელ სანტოსი. იპნ