tvati

დღეს ჩვენ აღვნიშნავთ უფლის აღდგომის დღესასწაულს. მისი მთავარი სიმბოლოა გამარჯვება: სიკეთის გამარჯვება, სიმართლის გამარჯვება, სიცოცხლის გამარჯვება. აღდგომას აღვნიშნავთ ამ გამარჯვებების შეუქცევადობის ურყევი რწმენით, - ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა, რომელმაც უკრაინელებს აღდგომის დღესასწაული მიულოცა. „ერთი წლის წინ ამ დღეს ჩვენ ყველა ვლოცულობდით, რომ უკრაინას გაეძლო. დღეს ვლოცულობთ უკრაინის გამარჯვებისთვის. ჩვენ არა უბრალოდ ველოდებით და ვითხოვთ, არამედ ვიმარჯვებთ და თავად ვქმნით ამ გამარჯვებას. 417 დღე. ჩვენ უკვე დიდი გზა გავიარეთ. ალბათ, ყველაზე რთული მწვერვალები წინ გველის. გადავლახავთ და ერთად შევხვდებით ჩვენს გარიჟრაჟს", - განაცხადა ზელენსკიმ. მისი თქმით, უკრაინის დროშა მალე ქვეყნის მთელ ტერიტორიაზე აფრიალდება, კანონის უზენაესობა და სამართლიანობა იზეიმებს და დაისჯება ყველა, ვინც გასცა და აღასრულა დანაშაულებრივი ბრძანება. „ყველა, ვინც მოკლა, აწამა, გაძარცვა, პასუხს აგებს როგორც საერთაშორისო ტრიბუნალის, ასევე უფლის წინაშე“, - აღნიშნა ზელენსკიმ. მისი თქმით, უკრაინა აუცილებლად გაიმარჯვებს. „ზეცა ხედავს ჩვენს რწმენას და სიმტკიცეს. მსოფლიო ხედავს ჩვენს გამბედაობას და უძლეველობას. მტერი ხედავს ჩვენს ძალასა და მონდომებას და ამიტომ, უკრაინა იხილავს გამარჯვების შუქს. ომმა ვერ წაგვშალა ჩვენ, ჩვენი ღირებულებები, ჩვენი ტრადიციები, ჩვენი დღესასწაულები. სადაც არ უნდა აღვნიშნოთ აღდგომა, სადაც არ უნდა ვიყოთ ახლა თითოეული ჩვენგანი, აღდგომას ერთად აღვნიშნავთ. ჩვენ ერთი დიდი ოჯახი ვართ - უკრაინელები. ერთი დიდი სახლი გვაქვს - უკრაინა. ჩვენ ერთი დიდი მიზანი გვაქვს - გამარჯვება“, - აღნიშნა ზელენსკიმ. IPN

16 აპრილს ფინეთი აამუშავებს Olkiluoto 3-ის (OL3) სახელით ცნობილ ბირთვულ რეაქტორს, რომელიც უდიდესი იქნება ევროპაში - რაც გააუმჯობესებს ჩრდილოეთის ამ ქვეყნის ენერგეტიკულ უსაფრთხოებას, რუსეთის მხრიდან ენერგიის მიწოდების შეწყვეტის ფონზე. OL3 დააკმაყოფილებს ფინეთის ელექტროენერგიის საჭიროების დაახლოებით 14 პროცენტს, და ამით შემცირდება იმპორტის საჭიროება შვედეთიდან და ნორვეგიიდან - აცხადებს სადგურის ოპერატორი. ევროპის ქვეყნები მზარდ ძალისხმევას მოახმარენ თავიანთი ბირთვული ენერგიის მრეწველობის გაფართოებას, რასაც აღიქვამენ გზად გაზზე დამოკიდებულების შესამცირებლად - მას მერე, რაც რუსეთმა შარშან მკვეთრად შეამცირა ბუნებრივი აირის ექსპორტი, რასაც ფასების ზრდა მოჰყვა. ბირთვული გზა ყველაზე იაფია ენერგიის გენერირებისთვის, თუმცა ეს ფორმა კამათის საგნად რჩება, უსაფრთხოებასთან დაკავშირებული შეშფოთების გამო. გერმანია ამჟამად დარჩენილი ბირთვული სადგურებიდან სულ მცირე სამის გამორთვის პროცესშია - ეს გადაწყვეტილება მიღებულ იქნა 2011 წელს, მას მერე, რაც იაპონიაში ფუკუშიმის კატასტროფა მოხდა. პარალელურად, შვედეთი, საფრანგეთი, ბრიტანეთი, პოლონეთი და ევროპის სხვა ქვეყნები ენერგიის წყაროთა დივერსიფიკაციის მიზნით გეგმავენ ახალ ბირთვულ პროექტებს, მათ შორის მცირე რეაქტორებს, რომლებიც უფრო უსაფრთხოდაა მიჩნეული. OL3 16 წლის განმავლობაში პირველი ბირთვული სადგურია ევროპაში. ის 2009 წელს უნდა ამუშავებულიყო, თუმცა მისი აშენების პროცესი შეფერხდა. რუსეთმა ფინეთს ენერგიის მიწოდება შეუწყვიტა გასულ წელს, მას მერე, რაც ქვეყანამ ნატოში გაწევრიანების სურვილი გამოთქვა, უკრაინაში მოსკოვის შეჭრის შემდეგ. radio tavisupleba

დღეიდან, 15 აპრილიდან, თელავში მუნიციპალური ტრანსპორტით მგზავრობა ფასიანი გახდა და 0.70 ლარი ეღირება. ამუშავდა ე.წ. კონტროლირების სისტემაც. თელავის მერიაში რადიო თავისუფლებას უთხრეს, რომ ტრანსპორტით უფასოდ იმგზავრებენ მუნიციპალიტეტის ადმინისტრაციულ საზღვრებში არსებული საჯარო და კერძო სკოლების მოსწავლეები, ხოლო შეღავათიანი ტარიფით, 40 თეთრად, ისარგებლებენ შემდეგი სტატუსის მქონე პირები: პენსიონერები; იძულებით გადაადგილებული პირები - დევნილები; ომისა და თავდაცვის ძალების ვეტერანები; შეზღუდული შესაძლებლობის მქონე პირები; სოციალურად დაუცველი ოჯახები, რომელთა სარეიტინგო ქულა არ აღემატება 100 000-ს; სოციალურად დაუცველი მრავალშვილიანი ოჯახები, რომელთა სარეიტინგო ქულა არ აღემატება 150 000-ს; სოციალურად დაუცველ მარჩენალდაკარგული პირები, რომელთა სარეიტინგო ქულა არ აღემატება 150 000-ს; სოციალურად დაუცველი მარტოხელა მშობლის სტატუსის მქონე პირები, რომელთა სარეიტინგო ქულა არ აღემატება 150 000-ს; ა(ა)იპ „თელავის მუნიციპალიტეტის უმწეოთა და უპოვართა სამსახურის“ ბენეფიციარები; თელავის მუნიციპალიტეტის ადმინისტრაციულ საზღვრებში არსებული ავტორიზებული უმაღლესი და პროფესიული საგანმანათლებლო დაწესებულებების სტუდენტები. ამ კატეგორიის მგზავრებისთვის გადახდის სპეციალური ბარათები გაიცემა უფასოდ, სხვა შემთხვევაში ბარათის ღირებულება 2 ლარია. მგზავრობის საფასურის გადახდა შესაძლებელია მხოლოდ უნაღდო ანგარიშსწორებით, TBC-ის ნებისმიერი ბარათით და ციფრული საფულის მეშვეობით, ასევე თელავის სატრანსპორტო კომპანიის ბარათით. თელავს მუნიციპალური ტრანსპორტი 2021 წლის თებერვლიდან ემსახურება, თუმცა მგზავრობა ამ დრომდე უფასო იყო. მერიას და შესაბამის სამსახურებს ორი წელი დასჭირდათ გადახდის სისტემების დასანერგად და ასამუშავებლად. თელავს და ქალაქთან ახლოს მდებარე რამდენიმე სოფელს 10 ავტობუსი ემსახურება. თელავი კახეთში ჯერჯერობით ერთადერთი ქალაქია, სადაც მუნიციპალური ტრანსპორტი მუშაობს. radio tavisupleba

ფარმაცევტული კომპანიების ასოციაცია განცხადებას ავრცელებს და წერს, რომ თურქეთის ბაზრიდან გარკვეული მედიკამენტების მოწოდებასთან დაკავშირებული შეფერხებაა. ასოციაციის განცხადებით, ფარმაცევტული კომპანიებისგან აქვთ ინფორმაცია, რომ შეიქმნა გარკვეულ მედიკამენტებზე, როგორც ასორტიმენტის, ასევე რაოდენობის მხრივ, მოწოდების შეზღუდვა თურქი მომწოდებლების მხრიდან, რაც გარკვეული პერიოდის შემდგომ აისახება ადგილობრივ ბაზარზე. „მოსახლეობას ვთხოვთ, გაგებით მოეკიდოს ამ ფაქტს, ვინაიდან ეს გარემოება არ არის დამოკიდებული ადგილობრივ კომპანიებზე. სწორედ ამიტომ ინფორმაციას ვაჟღერებთ ჩვენ, პირველი წყარო, უშუალოდ ის მხარე, რომელიც უზრუნველყოფს ამ პროცესს. აქვე, კიდევ ერთხელ, მივმართავთ შესაბამის მარეგულირებელს, ინსტიტუტებს, რომ მოსახლეობისთვის მიწოდებული ეს ინფორმაცია არ იქნეს გამოყენებული მათი მხრიდან სექტორის უმიზეზო ბრალდებისთვის, როგორიცაა საბოტაჟი თუ ხელოვნური დეფიციტის შექმნა, რასაც სამწუხაროდ მრავალჯერ ჰქონდა ადგილი,“ — ვკითხულობთ განცხადებაში. განცხადების ავტორები ასევე აღნიშნავენ, რომ „ფარმაცევტული პროდუქტის რეალიზაციაში ჩართული პირების მიერ ფარმაცევტული პროდუქტის მიმოქცევის შესახებ ინფორმაციის/დოკუმენტის მიწოდების წესისა და პირობების დამტკიცების თაობაზე“ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის 2023 წლის 15 თებერვლის №9/ნ ბრძანების თანახმად, კომპანიებს დაუწესდათ ვალდებულება ინფორმაციის ჯანდაცვის სამინისტროსთვის გაზიარების თაობაზე, მაგრამ განცხადების ავტორების თქმით, სექტორისთვის არ იყო შემუშავებული და შეთავაზებული უნივერსალური პროგრამა: „მიუხედავად ბიზნესის დაჟინებული მოთხოვნისა და მცდელობისა, რომ მოხდეს გონივრულ ვადებში და სწორი მეთოდით პროექტის გაშვება, მაკონტროლებლის მხრიდან არაა უზრუნველყოფილი სათანადოდ უნივერსალური ტექნიკური ბაზა ამ პროცესების გამართულად ასამუშავებლად. რეალურად არსებული პრობლემების იგნორირებით ხდება მეწარმეებისთვის გამაფრთხილებელი ოქმების გამოწერა, რაც უკვე საჯარიმო სანქციების წინაპირობაა. სამწუხაროდ, მარეგულირებელი უკვე იღებს დამსჯელობითი ორგანოს ფორმას, რაც საბოლოოდ მოსახლეობისთვის და ამ სფეროში დასაქმებული პირებისთვის პირდაპირი ზიანის მიღების პირობა გახდება,“ – ვკითხულობთ განცხადებაში. ორგანიზაციის განცხადებით, ასოციაციის წევრი კომპანიები მაქსიმალურად გამოიყენებენ მათ ხელთ არსებულ ყველანაირ მექანიზმს იმისათვის, რომ გაგრძელდეს ქვეყნის მოსახლეობის მაღალი ხარისხის მედიკამენტებით უწყვეტად უზრუნველყოფა და კვალიფიციური მომსახურეობის გაწევა. netgazeti

თბილისში, ნუცუბიძის პლატოზე ხანძარს ერთი ადამიანი ემსხვერპლა. არსებული ინფორმაციით, გარდაცვლილი ასაკოვანი ქალია, რომელიც ხანძრის გაჩენისას სახლში მარტო იმყოფებოდა. რა გახდა ხანძრის გამომწვევი მიზეზი, ამ დრომდე უცნობია.

უკრაინის პრეზიდენტის, ვოლოდიმირ ზელენსკის განცხადებით, აღდგომის წინა კვირის არცერთი საათი გასულა რუსული ტერორის გარეშე. უკრაინის პრეზიდენტმა ყოველდღიურ მიმართვაში სლავიანსკზე რუსეთის ძალების მიერ მიტანილ იერიშზე ისაუბრა და აღნიშნა, რომ ბოროტების სახელმწიფოზე გამარჯვება არის უკრაინის ვალდებულება კაცობრიობის წინაშე. „მთავარია ოკუპანტების მუდმივი განადგურება, მათი ლოგისტიკისა და ნებისმიერი პოტენციალის განადგურება ოკუპირებულ ტერიტორიაზე. ეს არის ჩვენი აქტიური ნაბიჯების მომზადება, ეს არის კონტრშეტევითი სამუშაო. მადლობას ვუხდი ყველა ჯარისკაცს, ვინც ამას უზრუნველყოფს, ვისაც ახსოვს, რომ რუსეთის მიერ ჩვენს ქალაქებსა და სოფლებზე, ჩვენს პოზიციებზე ყოველი დარტყმისთვის, უკრაინელების ყოველი მკვლელობისთვის ოკუპანტმა მაქსიმალურად საგრძნობი დანაკარგი უნდა განიცადოს. უკრაინული მიწის ყოველი მეტრი ოკუპანტებისთვის ამ ომში რუსეთის დამარცხების გარდაუვალობას უნდა ნიშნავდეს. იმის გარდაუვალობას, რომ უკრაინის მიწაზე მტერს პერსპექტივა არ ექნება. აღდგომის წინა კვირის არცერთი საათი გასულა რუსული ტერორისა და მკვლელობების გარეშე. ეს არის ბოროტების სახელმწიფო და ის დამარცხდება. გამარჯვება – ჩვენი ვალდებულებაა კაცობრიობის წინაშე და ჩვენ გავიმარჯვებთ“, – განაცხადა ვოლოდიმირ ზელენსკიმ. ზელენსკიმ უკრაინის ნატო-ში ინტეგრაციაზეც ისაუბრა. „აშკარაა, რომ უკრაინის ადგილი ნატო-შია, ეს კანონიერი ადგილია. ჩვენ არ გვინდა, მოძველებულმა ილუზიებმა, რომლებიც აქამდე აფერხებდა ალიანსში ჩვენს გაწევრიანებას, უკრაინისა და მისი პარტნიორებს დრო უწინდებურად დააკარგვინოს. ჩვენ ვმუშაობთ შესაბამის ნაბიჯებზე“, – აღნიშნა ზელენსკიმ. 1tv

29 აპრილის შუალედურ/რიგგარეშე არჩევნებამდე ზუსტად ორი კვირა რჩება და საარჩევნო ადმინისტრაცია აგრძელებს აქტიურ მუშაობას იმისათვის, რომ არჩევნები მაღალ დონეზე, საერთაშორისო სტანდარტების შესაბამისად ჩატარდეს. როგორც დღეს გამართულ ბრიფინგზე ცესკო-ს პრესსპიკერმა, ნათია იოსელიანმა განაცხადა, 29 აპრილის არჩევნები განსაკუთრებული მნიშვნელობისაა, რადგან წელს ელექტრონული ტექნოლოგიები ფართო მასშტაბით პირველად იქნება გამოყენებული და საარჩევნო ადმინისტრაცია მოუწოდებს ამომრჩევლებს, აქტიურად ჩაერთონ პროცესში. „საარჩევნო ადმინისტრაცია, არსებული პრაქტიკის შესაბამისად, ამომრჩეველს ამ არჩევნებისთვისაც არაერთ სერვისს სთავაზობს. დღეს მინდა, შეგახსენოთ ინფორმაცია იმ სერვისებისა და ვადების შესახებ, რომლებიც გადასატანი ყუთისა და ადაპტირებული საარჩევნო უბნის მოთხოვნას უკავშირდება. 29 აპრილის არჩევნებში მონაწილეობის მისაღებად, ეტლით მოსარგებლე ამომრჩევლებს, რომლებიც მონაწილეობას იღებენ შუალედურ არჩევნებში, შეუძლიათ, მოითხოვონ შესაბამისი მაჟორიტარული საარჩევნო ოლქის ტერიტორიაზე არსებული ნებისმიერი ადაპტირებულ/მისაწვდომი საარჩევნო უბანი. ამისათვის მათ არაუგვიანეს 21 აპრილის 18:00 საათამდე უნდა მიმართონ შესაბამის საოლქო ან საუბნო საარჩევნო კომისიას ან დაუკავშირდნენ ცესკო-ს კონტაქტჰაბს ტელეფონის ნომერზე – 2 51 00 51 და მოითხოვონ მათთვის სასურველი ადაპტირებული საარჩევნო უბანი. იგივე პროცედურა იმავე ვადებში უნდა გაიაროს იმ ეტლით მოსარგებლე ამომრჩევლებმა, რომლებიც მონაწილეობას იღებენ რიგგარეშე არჩევნებში. მათ შესაძლებლობა აქვთ, არჩევნებში მონაწილეობის მისაღებად მოითხოვონ შესაბამისი საოლქო საარჩევნო კომისიის ტერიტორიაზე არსებული ნებისმიერი ადაპტირებული/მისაწვდომი საარჩევნო უბანი. აღსანიშნავია, რომ ეტლით მოსარგებლე ამომრჩეველს ცესკო-ს ვებგვერდზე განთავსებულ „საარჩევნო რუკაზე“ შეუძლია, ნახოს დეტალური ინფორმაცია და ფოტოები კონკრეტული საარჩევნო ოლქის სამოქმედო ტერიტორიაზე არსებული ადაპტირებული/მისაწვდომი საარჩევნო უბნების შესახებ. ცესკო-ს ვებგვერდზე ხელმისაწვდომია ინფორმაცია როგორც მარტივი ადაპტაციის, ისე პანდუსის მქონე 69 საარჩევნო უბნის შესახებ, რომლებიც 29 აპრილის არჩევნებისთვის იფუნქციონირებს. მივმართავთ ეტლით მოსარგებლე ამომრჩევლებს, სურვილის და საჭიროების შემთხვევაში შეარჩიონ მათთვის ყველაზე ხელსაყრელი ადაპტირებული საარჩევნო უბანი და ინფორმაცია დროულად მიაწოდონ შესაბამის საარჩევნო კომისიას. რაც შეეხება გადასატანი საარჩევნო ყუთის მოთხოვნას, ამომრჩეველს, რომელსაც ჯანმრთელობის მდგომარეობის გამო არ შეუძლია კენჭისყრის შენობაში მისვლა და იმყოფება ამავე საარჩევნო უბნის ტერიტორიაზე, შესაძლებლობა აქვს, მოითხოვოს გადასატანი საარჩევნო ყუთი. ამისათვის მან უნდა მიმართოს შესაბამის საუბნო საარჩევნო კომისიას 21 აპრილის 18:00 საათამდე. აღსანიშნავია, რომ ამ არჩევნებზე პირველად მოხდება იმ ამომრჩევლების მარკირება, რომლებიც ხმას მისცემენ გადასატანი საარჩევნო ყუთის მეშვეობით“, – განაცხადა ნათია იოსელიანმა. შეგახსენებთ, 29 აპრილს საქართველოს პარლამენტისა და მუნიციპალიტეტის საკრებულოების შუალედური, ასევე მერების რიგგარეშე არჩევნები გაიმართება. ამომრჩევლები აირჩევენ: საქართველოს პარლამენტის ფოთი-სენაკი-ხობის მაჟორიტარ დეპუტატს, გურჯაანის, თიანეთის, ახალციხის, ტყიბულის, ქუთაისის საკრებულოების მაჟორიტარ დეპუტატებს, ასევე ცაგერისა და თერჯოლის მერებს. ინფორმაციას ცესკო-ს პრესსამსახური ავრცელებს.

უკრაინის პრეზიდენტმა, ვოლოდიმირ ზელენსკიმ რუს სპორტსმენებს, ასევე კომპანიებს – „იანდექსსა“ და „რამბლერს“ სანქციები დაუწესა. უკრაინის პრეზიდენტმა რუსეთის წინააღმდეგ სანქციების გამკაცრების განკარგულებას ხელი მოაწერა. პრეზიდენტის განკარგულებით, სანქციები დაუწესდათ რუს სპორტსმენებს, ასევე ფიზიკურ და იურიდიულ პირებს. კერძოდ, პრეზიდენტის ვებგვერდზე გამოქვეყნებული ერთ-ერთი განკარგულებით, ეროვნული უსაფრთხოებისა და თავდაცვის საბჭოს გადაწყვეტილების შესაბამისად, სანქციები დაუწესდა 87 ფიზიკურ პირს, რომელთა უმეტესობა რუსი სპორტსმენები არიან. ასევე, მეორე განაკრგულებით, შეზღუდვები უწესდება 351 ფიზიკურ და 254 იურიდიულ პირს, რომელთა შორის არის „იანდექსი“, „რამბლერი“, ასევე რუსული IT-კომპანიები და საწარმოები. ავტორი - ქეთი ჩოხელი

საავტომობილო გზების დეპარტამენტის ხელმძღვანელის გიორგი წერეთლის განცხადებით, დღეს დილის 7:00 საათიდან რიკოთის უღელტეხილზე მსუბუქი სატრანსპორტო საშუალებების მოძრაობა აღდგა. მისივე თქმით, დაწესებული შეზღუდვები კვლავ მოქმედებს და 19:00 საათის შემდეგ მსუბუქი ავტომობილები მოძრაობას გომი-საჩხერე-ჭიათურის გზაზე გააგრძელებენ. როგორც გიორგი წერეთელმა აღნიშნა, მოძრაობა რიკოთზე დატვირთულია, რაც აღდგომის დღესასწაულისთვის დამახასიათებელია. „დღეს დილის 7:00 საათიდან უკვე მსუბუქი სატრანსპორტო საშუალებებისთვის აღდგა მოძრაობა რიკოთის უღელტეხილზე. ტრადიციულად, აღდგომის დღესასწაულზე მომატებულია ყოველთვის ინტენსივობა და ნაკადები. საღამოს 19:00 საათამდე მსუბუქი სატრანსპორტო საშუალებები იმოძრავებენ რიკოთის მონაკვეთზე, ხოლო 19:00 საათის შემდეგ, მსუბუქი სატრანსპორტო საშუალებებისთვის მოძრაობა დასაშვები გომი-საჩხერე-ჭიათურაზე იქნება . 24-საათიან რეჟიმში მიმდინარეობს მონიტორინგი, რომელშიც ჩართულები არიან სამშენებლო კომპანია, საზედამხედველო კომპანია და ასევე, საავტომობილო გზების დეპარტამენტის თანამშრომლები“, - განაცხადა გიორგი წერეთელმა.

იერუსალიმში, მაცხოვრის საფლავზე წმინდა ცეცხლი გადმოვიდა. უფლის საფლავზე აღმართული სამლოცველოდან წმინდა ცეცხლი იერუსალიმის და სრულიად პალესტინის პატრიარქმა გამოიტანა. იერუსალიმის მართლმადიდებელი პატრიარქი აღდგომის ტაძარში უფლის საფლავზე 15:50 საათზე შევიდა, რის შემდეგაც საფლავი დაიხურა. ზეციური ცეცხლი საფლავზე თბილისის დროით 15:54 საათზე გადმოვიდა. წმინდა ცეცხლის გადმოსვლისთვის აღდგომის ტაძარში მომლოცველები მსოფლიოს სხვადასხვა ქვეყნიდან ჩავიდნენ. მათ შორის არიან მომლოცველები საქართველოდანაც. წმინდა ცეცხლი იერუსალიმის აღდგომის ტაძარში პირველად III საუკუნეში გადმოვიდა. IPN 2018 ყველა უფლება დაცულია

,,პრაიმ ჰაუსელები" მოხუცებულთა სახლს ესტრუმნენ. ეს იყო შეხვედრა, რომელსაც უცრემლოდ არ ჩაუვლია. მაყურებელმა დღეს პროექტის მონაწილეები სულ სხვა კუთხით დაინახა. ემოციებით ატირებული ახალგაზრდებისა და მოხუცების სიხარულის ცრემლები გაერთიანდა. ნახეთ, ,,პრაიმ ჰაუსის" ყველაზე ემოციური ვიდეო: prime time

აღდგომის ღამეს, მოქალაქეთა შეუფერხებლად გადაადგილების მიზნით, მეტრო დილის 04:00 საათამდე იმუშავებს. ამავე ღამეს, 23:00 საათიდან დამატებითი დროის განმავლობაში მეტრო მგზავრებს უფასოდ მოემსახურება. ამასთან, 16 და 17 აპრილს დაწესდება ავტობუსის დროებითი მარშრუტები, რომლებიც 08:00-დან 20:00 საათამდე იმოძრავებენ მუხათგვერდის, ვაშლიჯვრის, კუკიის, ახალი კუკიის, მახათას, საბურთალოს, ღრმაღელის, ველისა და ვარკეთილის სასაფლაოების მიმართულებით. აღნიშნულ მარშრუტებზე მოძრავი ავტობუსები მგზავრებს მოემსახურება უფასოდ. ავტობუსები იმოძრავებენ მეტროსადგურებიდან: „მარჯანიშვილი“, „დიდუბე“, „დელისი“, „სარაჯიშვილი“, „ვარკეთილი“, ასევე, სადგურის მოედნიდან, ბესარიონ ჭიჭინაძის ქუჩიდან და ვარკეთილის III მასივიდან, კერძოდ, შუამთისა და აბაშვილის ქუჩების გადაკვეთიდან.

უკრაინა ნატო-ს მომდევნო სამიტზე ალიანსში გაწევრიანებისკენ მიმართულ რეალურ ნაბიჯებს ელოდება, – ამის შესახებ უკრაინის საგარეო საქმეთა მინისტრმა, დმიტრო კულებამ ჟურნალისტთან საუბრისას განაცხადა. „თუ მოკავშირეები ვილნიუსში, ნატო-ში გაწევრიანების საკითხზე უბრალოდ 130-ედ დაადასტურებენ ღია კარის პოლიტიკას, მაშინ უკრაინისთვის ეს სამიტის მიუღებელი შედეგი იქნება. თუ ისინი შეეცდებიან ვილნიუსში შემოგვთავაზონ ნატო-სთან თანამშრომლების გასაღრმავებლად დადებითი წინადადებები, მაგრამ არცერთ ნაბიჯს არ გადადგამენ უკრაინის ნატო-ში გაწევრიანებისკენ, ეს ჩვენთვის მიუღებელი იქნება“, – განაცხადა დმიტრო კულებამ. ცნობისთვის, უკრაინის პრეზიდენტის, ვოლოდიმირ ზელენსკის განცხადებით, უკრაინა არ დათანხმდება არცერთ ალტერნატიულ წინადადებას, რომელმაც შეიძლება, ჩაანაცვლოს ნატო-ში ინტეგრაციის პროცესი. ჩრდილოატლანტიკური ალიანსის მომავალი სამიტი ვილნიუსში 11-12 ივლისს გაიმართება.

ვაშინგტონში გამართული ნაყოფიერი შეხვედრების შედეგად უკრაინამ პარტნიორების მხრიდან დამატებით 5 მილიარდი დოლარის დაფინანსების დაპირება მიიღო, – ამის შესახებ უკრაინის პრემიერ-მინისტრმა, დენის შმიგალმა მედიასთან ისაუბრა. დახმარების ახალი დაპირებები უკრაინამ შვეიცარიის, დანიის, ესპანეთის, ირლანდიის, იაპონიის, ლატვიისა და ლიეტუვისგან მიიღო. ამას გარდა, უკრაინულმა მხარემ ამერიკულ კომპანია „ბოინგთან“ მიაღწია შეთანხმებას უკრაინული კომპანიებისთვის 200 მილიონი დოლარის დავალიანების ჩამოწერის შესახებ. უკრაინის პრემიერ-მინისტრის თქმით, უკრაინას დაახლოებით 14 მილიარდი დოლარის დაფინანსება სჭირდება წელს საბიუჯეტო დანაკლისის დასაფარად. როგორც მან აღნიშნა, ამ მიზნისთვის აშშ გამოყოფს 2,3 მილიარდ დოლარს, ევროკავშირი კი, მილიარდ ევროს. რაც შეეხება პენტაგონის საიდუმლო დოკუმენტების გაჟონვის საკითხს, უკრაინის პრემიერ-მინისტრმა განაცხადა, რომ უკრაინა აშშ-სთან და სხვა პარტნიორებთან ერთიანი რჩება. „ლოიდ ოსტინთან საუბრისას განვიხილეთ უკრაინის მხარდაჭერის საკითხი მთელი ამ პერიოდის განმავლობაში. ახლა ვემზადებით ჩვენი კონტრშეტევისთვის. აბსოლუტურად გაერთიანებულნი ვართ ამერიკელ და სხვა საერთაშორისო პარტნიორებთან კონტრშეტევისთვის მომზადების პროცესში. დარწმუნებული ვართ, რომ ამ ომს მოვიგებთ. ჩვენ გავათავისუფლებთ ტერიტორიებს და ვერც ერთი სპეციალური ფსიქოლოგიური ოპერაცია რუსეთის მხრიდან ვერ შეაჩერებს ჩვენს ერთიანობასა და კონტრშეტევას“, – განაცხადა შმიგალმა ამერიკის შეერთებული შტატების თავდაცვის მდივანთან შეხვედრის შემდეგ. 1TV

უკრაინის კანონიერი ადგილი ნატოშია, - ამის შესახებ უკრაინის პრეზიდენტმა ვოლოდიმირ ზელენსკიმ ევროატლანტიკურ ინტეგრაციაზე სხდომის შემდეგ გავრცელებულ ვიდეომიმართვაში განაცხადა. „ჩავატარე სხდომა ევროატლანტიკურ ინტეგრაციაზე, უკრაინისა და ნატო-ს პოტენციალების გაერთიანების გარდაუვალობის შესახებ. არსებითი სხდომა იყო - [ესწრებოდნენ] უმაღლესი რადას თავმჯდომარე, მთავრობის წევრები, საგარეო საქმეთა მინისტრი, პრეზიდენტის ოფისის საგარეო პოლიტიკური ბლოკი, პრეზიდენტის ოფისის ხელმძღვანელი,” - განაცხადა ზელენსკიმ. მან აღნიშნა, რომ უკრაინა ალიანსში გაწევრიანებისთვის შესაბამის ნაბიჯებზე მუშაობს. „აშკარაა, რომ უკრაინის ადგილი ნატო-შია. კანონიერი ადგილი. არ გვინდა, რომ დაძველებული ილუზიები, რომლებიც აქამდე აკავებდა ალიანსისადმი ჩვენს მოძრაობას, ახლაც აგრძელებდნენ უკრაინისთვისა და პარტნიორებისთვის დროის წართმევას“, - აღნიშნა ზელენსკიმ. IPN

მუსიკოსმა სოსო პავლიაშვილმა იმღერა სტავროპოლის სამხედრო ჰოსპიტალში, სადაც უკრაინაში, ომში დაჭრილი რუსი სამხედროებიც მკურნალობენ. სტავროპოლის ჰოსპიტლის გახსნიდან 80 წელი შესრულდა, სწორედ ამას მიეძღვნა, რუსული მედიის მიხედვით, ღონისძიება, რომელშიც პავლიაშვილიც მონაწილეობდა. არტისტმა რამდენიმე ჰიტი შეასრულა და გამოელაპარაკა სპეციალური სამხედრო ოპერაციის (რუსეთში ასე უწოდებენ უკრაინაში სრულმასშტაბიან შეჭრას) მონაწილეებს. ასევე ფოტოები გადაიღო მათთან. მებრძოლებმა მისი მიმართვები ტელეფონშიც ჩაიწერეს და თანამებრძოლებს გაუგზავნეს ფრონტზე”, – იყწყება Сайт Ставрополя. ნეტგაზეთი

ვნუკოვოს აეროპორტის ოფიციალურ ვებგვერდზე ჯერ გამოქვეყნდა ცნობა, რომ 18 აპრილიდან მოსკოვიდან თბილისში პირდაპირი რეისებით იქნება ფრენა შესაძლებელი, შემდეგ კი წაიშალა. “ვნუკოვოს” აეროპორტის ვებგვერდზე მითითებული იყო, რომ პირდაპირ ფრენებს ჯორჯიან ეარვეისი შეასრულებს ყოველდღიურ რეჟიმში. თუმცა ამ ავიაკომპანიის ვებგვერდზე მსგავსი ინფორმაცია არ იყო განთავსებული. ბილეთის დაჯავშნის საშუალებას არც ვნუკოვოს აეროპორტის ვებგვერდი გაძლევდა. BM.GE-სთან საუბარიში ჯორჯიან ეარვეისის დამფუძნებელმა თამაზ გაიაშვილმა უარყო, რომ კომპანია 18 აპრილიდან მოსკოვისკენ პირდაპირ ფრენებს იწყებს. „ინფორმაცია არასწორია. არანაირი სააღდგომო რეისი არ დანიშნულა. არ ვგეგმავთ 18 აპრილიდან რეისებს. მომავალში რა იქნება, ვნახოთ, ჩემთვის ფრენა არავის აუკრძალავს”, – განაცხადა თამაზ გაიაშვილმა. 2019 წლის შემდეგ, როდესაც რუსეთმა საქართველოსთან პირდაპირი რეისები აკრძალა, ორ ქვეყანას შორის ფრენები სომხეთის გავლით წარმოებს. ბოლო პერიოდში რუსეთის არაერთმა წარმომადგენელმა განაცხადა პირდაპირი ფრენების აღდგენის შესაძლებლობის შესახებ, რასაც საქართველოს ხელისუფლების წარმომადგენლები მიესალმნენ. ნეტგაზეთი

ავიაკომპანია Wizz Air ბოდიშს იხდის საბორტო ჟურნალში აფხაზეთის ცალკე სახელმწიფოდ მოხსენიების გამო. კომპანიის განცხადებით, ჟურნალის ონლაინ ვერსიაში შეცდომა უკვე გასწორებულია და მიმდინარეობს მუშაობა ბეჭდურ ვერსიაში ცვლილებების განსახორციელებლად. “გვინდა ბოდიში მოვიხადოთ აპრილ-მაისის საბორტო ჟურნალში გაპარული სამწუხარო შეცდომის გამო და გითხრათ რომ ჟურნალის ონლაინ ვერსიაში შეცდომა უკვე გასწორებულია. მიმდინარეობს მუშაობა ბეჭდურ ვერსიაში ცვლილებების განსახორციელებლად. ხაზგასმით გვინდა აღვნიშნოთ, რომ ავიაკომპანია Wizz Air-ს არ აქვს შეხება ჟურნალის შინაარსობრივ ნაწილთან, მასზე მუშაობს დამოუკიდებელი სარედაქციო და საგამომცემლო ჯგუფი, თუმცა, ეს რა თქმა უნდა, არ გვათავისუფლებს პასუხისმგებლობისგან. კიდევ ერთხელ გვსურს მოვიხადოთ ბოდიში მომხდარის გამო და აღვნიშნავთ, რომ მუდამ ვრჩებით საქართველოს ტერიტორიული მთლიანობის მხარდამჭერებად”, – ნათქვამია კომპანიის განცხადებაში.

საქართველოში პროტესტი სრულიად ნათელი, გასაგები კანონპროექტის წინააღმდეგ იყო, - ამის შესახებ რუსეთის საგარეო საქმეთა მინისტრმა სერგეი ლავროვმა უზბეკეთში ვიზიტის დროს ჟურნალისტებთან საუბარში განაცხადა. „ის, თუ როგორი დამოკიდებულება აქვს დასავლეთს ამა თუ იმ ხელმძღვანელობისადმი, ნათლად გამოჩნდა, როდესაც მოლდოვაში პრეზიდენტისა და მთავრობის პროდასავლური კურსის წინააღმდეგ იყო პროტესტები, ეკონომიკის განვითარების ინტერესების იგნორირების წინააღმდეგ პროტესტები. დასავლეთმა ეს ლამის როგორც კანონიერი ხელისუფლების დამხობის მცდელობა დაგმო, ამავდროულად საქართველოში პროტესტები სრულიად ნათელი, გასაგები კანონპროექტის წინააღმდეგ იყო, რომლის თანახმადაც თუ საზღვარგარეთიდან იღებ ფულს და საზოგადოებრივ-პოლიტიკურ საქმიანობას ეწევი - გთხოვთ, გაგვაგებინე, საიდანაა ფული”, - განაცხადა ლავროვმა. მისი თქმით, საქართველოს პროტესტის შემთხვევაში დასავლეთმა მათ აქტიურად დაუჭირა მხარი. იპნ

რუსეთის საგარეო საქმეთა მინისტრის სერგეი ლავროვის თქმით, დასავლეთი საქართველოსა და მოლდოვაში „მეორე ფრონტის” გახსნას ცდილობს. ამის შესახებ მან უზბეკეთში ვიზიტის დროს ჟურნალისტებთან საუბარში განაცხადა. მისი თქმით, რუსეთი საკუთარ სამხედრო-პოლიტიკურ და დიპლომატიურ გეგმებში ითვალისწინებს დასავლეთის მცდელობებს გახსნას “მეორე ფრონტი” საქართველოსა და მოლდოვაში, ასევე პოლონეთში ბელარუსის საზღვართან მდებარე სამხედრო კონტინგენტს. „ამ ფაქტორების ერთიანობა არავის არ აძლევს მოსვენების უფლებას, ჩვენ არც ვისვენებთ, ამ ყველაფერს ვხედავთ და ყველაფერს ვითვალისწინებთ ჩვენ დაგეგმარებაში - სამხედრო-პოლიტიკურშიც, დიპლომატიურშიც, და სხვა მხრივადაც“, - განაცხადა ლავროვმა. მისი თქმით, რუსეთმა დაინახა „მეორე ფრონტის“ გახსნაში საქართველოს ხელისუფლების ჩათრევის მცდელობები, მაგრამ ქვეყნის მთავრობამ „პასუხისმგებელი მიდგომა“ გამოავლინა და ასეთ ქმედებებზე უარი განაცხადა. ასევე, ლავროვის თქმით, იყო ცნობები, რომ მოლდოვისგან “მეორე, მესამე, ერთ-ნახევრიანი ფრონტის” შექმნას ცდილობენ. პალიტრა

საფრანგეთის საკონსტიტუციო სასამართლომ პრეზიდენტ ემანუელ მაკრონის საპენსიო რეფორმას მხარი დაუჭირა. რეფორმა, რომელიც მაკრონმა პარლამენტის გვერდის ავლით გასულ თვეს დაამტკიცა, საპენსიო ასაკის 62-დან 64 წლამდე გაზრდას ითვალისწინებს. ამასთან, საკონსტიტუციო სასამართლოს დადგენილებით, კანონპროექტის ზოგიერთ მუხლს აქვს სამართლებრივი ხარვეზები. სადავო საპენსიო რეფორმის გამო, საფრანგეთში იანვრიდან მასობრივი საპროტესტო გამოსვლები იმართება. მთავრობის განცხადებით, ინიცირებული ცვლილებები აუცილებელია საპენსიო სისტემის კოლაფსის თავიდან ასაცილებლად. ავტორი - ქეთი ჩოხელი

პენტაგონის საიდუმლო დოკუმენტების გასაჯაროებაში ეჭვმიტანილ ეროვნული გვარდიის საჰაერო ძალების წევრს, ჯეკ ტეიშეირას ოფიციალურად წაუყენეს ბრალი. ის ბოსტონში ფედერალური სასამართლოს წინაშე წარდგა. მედიის ინფორმაციით, ტეიშეირას ბრალი წაუყენეს ეროვნული თავდაცვის შესახებ საიდუმლო ინფორმაციის უკანონო მოპოვებაში, შენახვასა და გადაცემაში. 21 წლის ჯეკ ტეიშეირა გამოძიების ფედერალური ბიუროს მიერ ჩატარებული სპეცოპერაციის შედეგად მასაჩუსეტსის შტატის ქალაქ დაიტონში დააკავეს. ის ეროვნული გვარდიის საჰაერო თავდაცვის ძალების დაზვერვის განყოფილების IT-სპეციალისტად მუშაობდა. სისხლის სამართლის დანაშაულზე გამოძიება მას შემდეგ დაიწყო, რაც დოკუმენტების გაჟონვის შესახებ პენტაგონმა იუსტიციის დეპარტამენტს აცნობა. პენტაგონის საიდუმლო მასალების გაჟონვის შესახებ გასულ კვირას გახდა ცნობილი. გრიფით „საიდუმლო“ ინფორმაცია უკრაინაში მიმდინარე საომარ მოქმედებებსა და აღჭურვილობას, ასევე აშშ-ის სხვა მოკავშირეებს ეხება, მათ შორის ისრაელს, სამხრეთ კორეასა და თურქეთს. ავტორი - ქეთი ჩოხელი

ავიაკომპანია „ჯორჯიან ეარვეისი“ არ ადასტურებს ინფორმაციას მოსკოვის მიმართულებით რეგულარული ფრენების აღდგენასთან დაკავშირებით, – ამის შესახებ ნათქვამია განცხადებაში, რომელსაც „ჯორჯიან ეარვეისი“ ავრცელებს. როგორც განცხადებაშია აღნიშნული, მსგავსი დაუდასტურებელი ინფორმაცია აქამდეც გავრცელებულა. „მსგავსი ცრუ, დაუდასტურებელი ინფორმაცია აქამდეც არაერთხელ გავრცელებულა. ავიაკომპანიას არ გაუკეთებია განაცხადი აღნიშნულ რეისებთან დაკავშირებით“, – ნათქვამია ავიაკომპანიის განცხადებაში.

ყველა დამოუკიდებელი ერის ადგილი ნატო-შია, საქართველოდან მოლდოვამდე, უკრაინიდან ბოსნიამდე და ნებისმიერი სხვა დემოკრატიის ევროპაში, თუ აირჩევთ იყოთ ევროატლანტიკური ალიანსის ოჯახის წევრი, ეს ოცნება ახდება, – ამის შესახებ ნატო-ს გენერალური მდივნის მოადგილემ, ჯოანა მირჩამ ბუქარესტში, ყირიმის საერთაშორისო პლატფორმის შავი ზღვის უსაფრთხოების კონფერენციაზე სიტყვით გამოსვლისას განაცხადა. როგორც ჯოანა მირჩამ აღნიშნა, შავი ზღვის რეგიონი თითქმის 10 წელია რუსეთის აგრესიის სამიზნეა, რაც მისი თქმით, ზეგავლენას ახდენს დასავლეთ ბალკანეთზე, საქართველოზე, მოლდოვაზე, ბოსნია და ჰერცეგოვინაზე და საბოლოო ჯამში, მოქმედებს ჩრდილოატალანტიკური ალიანსის უსაფრთხოებაზე. ნატო-ს გენერალური მდივნის მოადგილის თქმით, სწორედ ამის გათვალისწინებით შარშან, მადრიდში ნატო-ს ლიდერებმა დაამტკიცეს „სტრატეგიული კონცეფცია“, სადაც შავი ზღვის მნიშვნელობაა ხაზგასმული. „ჩვენ ასევე გავზარდეთ მხარდაჭერა ჩვენი პარტნიორებისადმი, რომლებსაც რუსეთის აგრესიის საფრთხის ემუქრებათ, მათ შორის, მოლდოვის მიმართ. ჩვენი მეგობრები საქართველოში არიან ნატო-ს გაძლიერებული შესაძლებლობების პარტნიორები და ველოდებით ჩვენს პარტნიორობაში ინვესტიციების დაბანდების გაგრძელებას. წარმატებას გისურვებთ ევროკავშირის ფრონტზე, რადგანაც მნიშვნელოვანია, რომ უკრაინასთან და მოლდოვასთან ერთად, იაროთ ევროპისკენ“, – განაცხადა მირჩა ჯოანამ. ავტორი - ლევან ახალაია

გაერო-ში დაცული „ვეფხისტყაოსნის“ ხელნაწერის ხილვისას ნათლად ჩანს, რომ ქართველი ხალხისთვის ენა „ღვთაებრივი საუნჯეა, - ამის შესახებ დედაენის დღესთან დაკავშირებით საქართველოში ამერიკის საელჩოს მილოცვაშია აღნიშნული. „გაეროში დაცული „ვეფხისტყაოსნის“ ხელნაწერის ხილვისას ნათლად ჩანს, რომ ქართველი ხალხისთვის ენა „ღვთაებრივი საუნჯეა“. 45 წლის წინ თქვენ არა მხოლოდ საბჭოთა რეჟიმს, არამედ მთელ მსოფლიოს დაანახეთ, რომ სიამაყეს, რომლითაც ქართული ენის სიყვარულს დაატარებთ, ვერავინ წაგართმევთ. გილოცავთ დედაენის დღეს!“ - ნათქვამია ამერიკის საელჩოს მილოცვაში.